رواية علي اليتيم الفصل الثاني عشر بقلم جمانه السعيدي
علي....رجعت للبيت بس امي مارجعت وياي رجعت مكسور اكثر من قبل
شلون راح اعيش بدونها
احس نفسي كلشي مااعرف وكانما اول مره جاي الهاي الدنيا مااعرف اتصرف
مااعرف شنو اشتغل شلون اخلص يومي
للاربعين واني حابس نفسي بلبيت ماطلعت
ومهدي ابد ماعافني
يوميه يطلع للشغل من يرجع يروح الاهله يوصل المسواك
ويجيب غده مطبوخ من امه
ويجي نتغدا انا ويااا
والعصر يطلع للشغل ويرجع عليه بليل
يوم الجمعه يكعد ينضف البيت وحتى ملابسي يغسلهن
يحاول يلطف الجووو وياي ويطلعني من حالة الكئابه
كل شويه وكال اني خوش جنه
الله عليك اذا اجا واحد يخطبني لا توكف بطريقي
عود كول اعرف انضف واطبخ واغسل ملابس
بشرفي اذا ازوجت اله ادلل زوجي دلال ماصاير
علي...ماازوجك ابد
مهدي....ليش عيوني تربد توكف بطريقي
علي...لان اخاف تجي بت حرام تغيرك عليه انت احسن اخو
مهدي.. مو خوش يعني ابقى عانس
معليه معليه اربد ازوج
علي...ابتسمت
مهدي....اصحك ياخويه الدنيا خلصانه امك ارتاحت من الالم ايجوز هسه يله ارتاحت فعلا
الحياة كانت صالمه ويااها خلصتها كلها تعب بتعب
علي...الله يرحمها
شكد حاول يطلعني من هاي العزله يريدني اطلع برا
حتى تتحسن حالتي
بس مااكدر احس نفسي بس اطلع للشارع اضيع
كل النهار احجي وياا امي
اتخيلها يمي واكعد احجيلها عن حزني وضيمي
يوم الأربعين رحنا للنجف اني ومهدي وكل عائلته راحت وياي حتى يواسوني على مصيبتي
خطيه كلهم يبجون حالهم حالي
فعلا مهدي واهله ثبتولي هم أهل اصل وعدهم غيره
عليه
جمانه السعيدي
من رجعنا بقيت يومين بلبيت
حسيت نفسي ثقلت على مهدي خطيه عايف عائلته
وعايش وياي حتى ما يقبل اصرف
هو الي يصرف عليه
مهدي....لازم تطلع من البيت ارجع اشتغل
علي....ماعندي طاقه
مهدي...بس مايصير هيج حطمت نفسك
علي....اريد اروح اشوف ابوي
مهدي.. اي لازم تروح خل يعرف انت موجود
علي....اريد اشوف شنو الي استفاده من طرد امي
مهدي....بس لا تروح بهذا شكلك
علي....شبي شكلي
مهدي....شعرك طويل ولحيتك وحالتك حاله
من جانت امك بلمستشفى وانت لا حلقت ولا رتبت شكلك
اذا ناوي تروح تشوفه
تروح تحلق وترتب شكلك البس قاط
كون اذا شافك يتعجب بيك
حتى تبين كدامه انسان راقي وشبعان
خاف يكول هذا دكه الضيم والفقر وجاي يدور كم فلس
علي...اني لا ميت علي ولا على فلوسه
بس اربد اشوفه اريد اسئله ليش هيج سوا باامي
اذا هو موكد المسؤليه
ليش حطمها ضيع عمرها وشبابها ليش
مهدي....من حقك تروح تتعرف علي وتشوفه
بس مثل ما كتلك كون اخر كشخه وقيافه
خاف صدك عنده اولاد لازم ما تبين اقل منهم مانريده يتشمت بيك
علي....كلامك صحيح باجر اروح الحلاق
وبعد باجر اسافر حتى اروح اشوفه
مهدي...تريد اجي وياك
جمانه السعيدي
علي....لا اني اروح وحدي
بيني وبينكم مااريد مهدي يجي وياي خاف ابوي ينكرني لو يطردني لو يعيرني بامي
ومااريد انزل من عين مهدي
اريد اتحمل اي ردت فعل وحدي اي شي يصير اتحمله
لان مااعرف شراح يصير من يشوفني
ثاني يوم رحت للحلاق حلقت شعري وعدلت لحيتي
اشتريت عطر فاخر
مااريد أبين كدامه زغير لو محتاج لو ناقصني شي
اريد اوكف كدامه مثل الجبل الشامخ
كون يرفع راسه حتى يشوفني
اريده يتندم الف مره لان اتخلى عني
اليوم الي بعدا كعدت الصبح سبحت وتريكت اني ومهدي
مهدي راح للشغل
مهدي...اتصل عليه طمني
علي...بليل تلكاني هنا بلبيت
مهدي ...تمام
لبست قاط كامل رمادي وقميص ابيض
لبست حذاء اسود وساعه شسورت شعري وتعطرت
علي.....يمه اعرف انتي موجوده هنا اعرف روحج تراقبني
ادعيلي اني رايح ارجعلج حقج
اريد اروح الابوي لازم يعرف اني موجود
ادعيلي الله يوفقني واكدر اخذ حقي منه
طلعت رحت للكراج وصعدت للمحافظة الي بيها بيت ابوي
وبيت جدي اهل امي
وصلت نزلت بلكراج
طلعت برا اكو تكسي واكف
بس كتله على اسم ابوي الثلاثي
كال اي اعرفه شلون مااعرفه اكو واحد ما يعرفه
تريد اخذك للمكتب لو للبيت
علي....وين الكا هسه موجود بلمكتب لو بلبيت
باوع للساعه
...الساعه هسه ١١ موجود بلمكتب
علي...خلاص اخذني للمكتب
صعدت وياااا
جمانه السعيدي
السايق....انت كرايبه
علي...لا
السايق...لان ما شايفك قبل هاي اول مره
علي....ليش تسئل
السايق...مبين من ملابسك ابن عز وخير همه الناس الشبعانه ناس تعرف ناس
علي...هو شبعان
السايق....هووو هوو وين وين نص هاي الولايه ملكه
ابو كبل شبعان
هذا الخير متوارثينا اب عن جد
علي...الله يزيدهم
السايق...ماكتلي شتريد منهم
علي....شغل
السايق....شنو من شغل
علي....وانت شنو دخلك ليش تريد تعرف هذا الشغل شنو
السايق...هيج نسولف بلطريق
علي....لا تدخل
وصلنا نزلني كدام مكتب دلاليه واستثمار وبيع شرا
بس مكتب فخم حيل
انطيته الاجره ونزلت
وكفت عدلت سترتي باوعت من ورا الجامه
كاعد ورا المكتب وبيدا تليفون جاي يحجي
ركزت على ملامحه صدك بينا هواي شبه
امي كانت تكول دائما انت تشبه ابوك
جمانه السعيدي
دخلت سلمت علي اكو ولد ثنيين جوا
ردو عليه السلام وهو رفع ايده بمعنى اهلا وسهلا
سلم عليه وبقت عينه عليه
لازم التليفون وعيونه عليه وكانما يكول اني شايفك
مااعرف وين بقه يتفحص شكلي
اني ماشاء الله طويل ولابس قاط وشكلي طالع عبالك استاذ جامعي
بقيت واكف اشرلي اكعد
كعدت كباله شويه ونها المكالمه
شعرا ولحيته بيض اكو جرح او حرك على خده اليمين
كان كاعد ورا المكتب
محمد....الله بلخير
علي...الله بلخير والعافيه
محمد...مااعرف اني شايفك قبل اعرفك
علي... عز المعرفه
محمد....اي ولله بس شفتك كلبي ارتاحلك حسيت اعرفك من زمان اني كلبي يرتاح بسرعه للوجوه اللطيفه
علي...تسلم
محمد...وين اني شايفك او اعرفك
علي...تعرفني صار ٢٢ سنه
محمد....حيل هواي وقت بس انت زغير شلون اعرفك صار ٢٢ سنه
انت مو بعمري حتى اعرفك صار ٢٢ سنه
يولد جيبو جاي ال ماعرفت اسمك بلخير
علي...اسمي علي
محمد...عاشت الاسامي
علي...تعيش وتسلم
محمد....اي وين اعرفك صدك بدون مجامله احس كلبي ارتاحلك حيل
بيش اكدر اخدمك
علي...سكتت لان الجاي وصل
محمد...اجيبلك ريوك
علي...شكرا
محمد....تفضل اشرب جايك واي شي انت جاي علي اعتبره خلصان
علي....يمكن ماتكدر على طلبي
محمد....افا مااكدر على طلبك شوف اني حبيتك
بدون سبب ومراح تطلع منا اذا مو طلبك خلصان
حتلو تريد مره
ولو اني ماعندي لا ولد ولا بنات
علي...هااا ماعندك ابناء
محمد....اي ولله مع الأسف رب العالمين حرمني من هاي النعمه بس اذا تريد مره
ترخصلك اني اروح وياك اخطبلك
علي....بس ايجوز اذا تعرف اني منو ما تقبل تخطبلي
محمد...ولله مبين عليك من وجهك ابن اوادم
علي...بس اني ابوي موخوش انسان
نكرني ونكر امي
محمد...لا لا تحجيها ليش هذا واحد ما مقدر النعمه الي عندا
لو رب العالمين حارمه من نعمة الاطفال جان بأس
ايده وجه وكفه
اكو غيره هواي ناس محرومين من هاي النعمه
ليش ابوك موخوش
علي...رافض يعترف بيه
محمد....لا صدك تحجي انت تشرف الشيوخ
عمي اني رجال بس شفتك حسيت بهبيتك
مبين متعلم وابن ناس
جمانه السعيدي
علي....بس هو مايريدني وما يقبل يعترف بيه ولا يرضا يسجلني على اسمه
محمد....شنو القصه وين هذا ابوك اني اريد اروحله
واحجي ويااا هاي النعمه كلها عنده
وهيج متبطر عليها
علي...يعني اذا تعرف منو تروح تحجي ويااا
محمد....اطيح حظه هذا صدك اعمى مايشوف
وولد شاب مثل الورد مايريده
ياعمي اني ابجي على ريحة الطفل
خسرت فلوس شكد بس حتى يصير عندي طفل وماكو
حتى مرتي عافتني
تكول اني اريد اطفال مااكدر اعيش وياك
كل فلوسي مو بعينها تريد طفل
علي...انت هسه مامزوج
محمد...لا ازوجت وحده ارمله وعدها ولد وبنيه
عايش والسلام
ابد مو سعيد بحياتي كل هذا الخير مو بعيني
جذب مثل ابنك من صلبك يشيل همك ويساعدك
تستند علي بكبرتك
علي.... همزين عرفت
محمد...شلون يعني
علي...مو اجاك ولد وزحت نعمتك بايدك
محمد...اني اجاني ولد ووينه الولد اتحسر على ريحة الولد
علي...شنو نسيت ابنك الي نكرته وكلت مااريده
محمد...وينه ابني خاف انت مشتبه
علي... ابن امل تذكر امل لو نسيتها الي حملت منك وانت طردتها
ونكرت الطفل الي بطنها
وهددتها تسجن ابوها وتلبسه قضيه
الي بطنها هذا ابنك لو موابنك
انت تخليت عنه قبل لا ينولد
راسا فتح عيونه حيل كوه بلع ريكه نزلن من عيونه دموع
منا ومنا بقه يباوع عليه
وعلى وجها صدمه جبيره
انصدم من كلامي بقا ساكت
مثل الي مصدك مدري ما مصدك
أشر عليه وكال انت
علي... اي اني مو كتلك ابوي مايريدني شمرني اني وامي بلشارع
ما يقبل يعترف بيه
مسح دموعه رجع الكرسي ليوره
طلع عكازه من جوه المكتب
كام على حيله
بس رجل وحده الرجل الثانيه مبتوره من الركبه
تقدم وكف كبالي
واني بعدني على كعدتي واباوع علي بحقد
كاعد وفارد ضهري على الكرسي
وكنما كعدت ملك
جمانه السعيدي
وكف كبالي
محمد.... انت ابني انت ابني ابن امل
علي...بس هزيت راسي بحركه كلها ثقه وكنت رافع راسي
محمد....اهييي اهييي انت ابني انت علي محمد
اني ما مصدك انت ابني
ولله وعرفت امل تربي صدك انت ابني الف رحمه على امج وابوج امل
يحجي ودموعه تنزل منا ومنا
تعال تعال اريد احضنك ولله بس شفتك
كلبي طار عليك اني ما مصدك
هذا الولد الشاب الحلو الكشخه ابني اني
التفت على العمال
سمعتو سمعتو زين هذا ابني الي صار ١٨ سنه ادور علي
ماخليت مكان مادورت على امه
شفتو كرم رب العالمين
ابني رجعلي هذا ابني
يحجي وجسمه كله يرجف ودموعه تنزل منا ومنا
تعال اريد احضنك
علي...وكفت بس ما تقدمت علي
راسا هو تقدم عليه يمشي ويتخربط
اجا يوكع قرب عليه شمر العكاز وحضني حيل
حضني وكام يبجي
يبجي بحركه وبلوعه
محمد....اهيي اهييي وين جنت كل هاي السنين
لو تعرف شكد دورت عليك انت وامك
شوف رب العالمين شسوي بيه
لان نكرتك ونكرت امك رب العالمين كان شاهد على هذا الزواج واني استخفيت برب العالمين
وهاي كانت النتيجه
