رواية قيود امرأة الفصل الثاني عشر بقلم جمانه السعيدي
رويده.... قفلت الخط وكعدت ابجي المن اشكي ومنو راح يسمعني ويقدر وضعي
امي ملتهيه بمشاكل مرتضى وزوجته
واختي ملتهيه بزوجها اطفالها صارو عدها اربعه وهي بعدها كاعده بغرفة بيت العيال
وحياتها كلها مشاكل وزوجها مايكدر يطلع بيت وحده
المن انطي وجهي من كد مااكبد الحزن بكلبي راح يصير بيه جلطه ليش واحد مثل أياد مايسوه فلس بسوك الزلم يضربني ويهيني
ليش اني شسويت ماطلبت غير حقي يصرف عليه حالي خال النسوان
عندا خير من الله وهو ميبسها علينا كلش
المن يجمع بهاي الفلوس الخاطر الله
جمانه السعيدي
رجعت تمددت وتغطيت وجهي يوجعني من الضرب
وايدي كلش توجعني
حتى شعري هلكد ماجرني من شعري راسي كام يوجعني
نص ساعه واجتني رساله
هشام....شلون صرتي قلقتيني
مارديت علي اتصال هشام اجا بلوقت الغير مناسب
اول مره افتح خط وياا
كمت ابجي هسه شيكول عليه
هو متخيلني غير شي ووحده ماكو منها تفكر وتخطط وناجحه بحياتها
رجع بعد ربع ساعه دزلي رساله
هشام...بس طمنيني شلون صرتي
رويده....تمام اسفه ازعجتك وياي جاي امر بضروف
هشام....منو ماعندا ضروف
منو حياته تمشي عدل ليش تتاسفين ترا كلنا عدنا ضروف
محتاجين نكون اقويا حتى نكدر نعدي هاي الحياة
اني كدامج جاي امر باصعب ضروف
رغم شغلي ونجاحي بس ضروفي العائليه صعبه ومجاي اكدر اتخطى المشاكل
كلنا محتاجين ناس توكف ويانا وتسندنا
حتى نعدي الصعب
انتي قويه راح تكدرين تجاوزين كلشي
اعتبريني صديق ممكن تحجين وتفضفضين يمتى ما تحبين
لا تعتبرين هذا تدخل بحياتج
بس اني هم محتاج شخص احجي ويااا عن مشاكلي
ايجوز نصير أصدقاء
ونكعد نحجي مشاكلنا واحد للثاني
ايجوز اتساعديني واساعدج
رويده....اني مشكلتي مالها حل
هشام... ماكو مشكله مالها حل كل المشاكل بلدنبا الهن
حل حتى مشكلتي الها حل
بس الحل مااكدر اوصله وحدي محتاج احد قوي يسندني
ويوكف وياي
اني مااعرف ليش جاي احجيلج عن مشكلتي رغم اني رجال لازم اكون قوي ومااضعف
بس ارتاحيت الكلام وياج
اكيد راح احجيلج مشكلتي ايجوز تكدرين تساعديني
رويده....اني اساعدك ولله لو تعرف ضروفي اني لا حول ولا قوه مسكينه اني لو احجيلك ضروفي
تكول شلون انتي عايشه ومكمله وصامده
هشام...كل واحد بهاي الدنيا همه شكل ولا واحد مرتاح
رويده.. ماكو مثل مصيبتي ابد
هشام.. احجيلي خل اسمع مشكلتج بلكت تهون عليه مصيبتي
رويده...ليش ادوخ راسك وياي
هشام.. من سمعتج تبجين ضجت ايجوز اكدر اقدملج شي حتلو اواسيج
جمانه السعيدي
رويده.. مااعرف الشي الي راح اسوي صح لو غلط
بس اني عايشه وحيده كل عمري
بيت اهلي جنت عايشه وحيده
ثنيبن بنات وولد واحد امي وابوي سلطو علينا
يتحكم بكلشي بحياتنا
حتى عفنا المدرسه بسببه ثنيبنه كنا ننتضر فرصة زواج حتى نخلص منه ومن تحكمه
الجبيره ازوجت واحد فقير حداد صح هو يحبها
عدهم اربع اطفال بس مايكدر يوفرله حياة مريحه
صار تسع سنوات مزوجه وعدها اربع اطفال وبعدها عايشه عد العيال بغرفه بالطابق الثاني
هشام.. لا حول ولا قوة الا بلله
رويده...كل هذا وضعها هي أحسن مني اخوي جبرني اعوف اامدرسه من المتوسطه
وزوجوني واحد بخيل بخيل حقيقي بعني لو احجيلك عن بخله تتخبل
بعد الزواج ردت انفصل وامي عارضت كالت اكعدي واسكتي
لا ترجعين للبيت
مراح نستقبلج اتحملي واسكتي
اول ناس سدو الباب بوجهي هم اهلي
رفضو يوكفون وياي ويساعدوني
صار عندي بنيه صار خمس سنوات ونص زواج شفت المر بكل انواعه
واحد اناني وبخيل مو بس بخيل بلفلوس حتى بخيل
بلمشاعر عايشه بجحيم ويااا
حتى يضربني وساكته ومتحمله لان ماعندي مكان اروحله
ولا عندي شغل اكدر اعيش منا
هذا الشغل وياكم زين بس محتاجه وقت حتى اكدر اوكف على طولي واشيل مسؤليتي اني وبتي
هشام... مسكينه اني مصيبتي اهون من مصيبتج
انتي قويه منو تكدر تتحمل هاي الضروف الصعبه
رويده....اني قررت بس اجمع فلوس واكدر اوكف على طولي اطلع بيت وحدي هذا انسان لا يطاق
كل الصفات المزينه بي
تعرف اني جاي اشتغل بدون مايعرف
حتى التليفون مايعرف بي
لا ينطيني مصرف ولا يقبل اشتغل
لا يرحم ولا يعوف رحمة الله تنزل عليه
حتى حسابي بلمصرف مايعرف بي
جواريني يساعدوني من احتاجهم
اشتغل من يطلع بس يرجع اقفل التليفون واضمه
اخاف منه
جمانه السعيدي
هشام... اني مصيبتي نفس مصيبتج بس انتي شغلتج أصعب
اني ازوجت بعمر زغير تقريبا بعمر العشرين
وحده من اقاربي من بعيد الاهل اختاروها اليه
بعد الزواج اكتشفت هاي انسانه مريضه نفسيا
بلبدايه كانت زينه بس بعد ما صار عدنا بنات ثنيين
حالتها كلش ساءت
وصلت مرحله صعبه فقدت عقلها فد مره
مااكدر اعوفها ام بناتي وهي هم مسكينه فقدت كل اهلها
ماعدها احد غيري يوكف وياها ويساعدها بهذا وضعها الصعب
جاي تاخذ جلسات علاج نفسي
ماشيه على المهدئات حاسبينها بغرفه وحدها
امي والبنات يساعدها
امي عايشه وياي بلبيت تساعدني على البنات وعلى امهن
هسه اني لاني مزوج ولا مامزوج اشتغل كل الوقت حتى اصرف على بيتي وحتى اشغل وقتي
شفتي ماكو اي احد مرتاح بهاي الدنيا كلمن همه شكل
رويده...الله يساعدك
هشام....اني ممكن ادزلج مبلغ تحت الحساب وتاجرين بيت وطلعين وحدج
رويده...لا مو هسه خل ارتب وضعي بلاول
هشام... اي شي تحتاجي اتصلي وبااي وقت تحبين
ممكن نكون اصدقاء
رويده.. مااعرف هذا الشي صح لو غلط بس ممكن نكون اصدقاء
اني محتاجه شخص غريب وبعيد احجيله وافضفضله
يسمعني بدون ما يئنبني ضميري
دقيقه حجينا مشاكلنا بس ماحجينا على المنتج الجديد
هشام...اي ولله نسيت
الشركه راح تنزل منتج واحد بس بي اتلث شغلات
تفتيح ترطيب اساس
يعني اتلاثه بواحد بس شغل عدل ١٠٠/١٠٠
بس تكمل كل التفاصيل ادزلج
راح يسووله دعايه قويه
ويردون الهمه بلاعلان
جمانه السعيدي
رويده.. اي هيج شغله مرغوبه وعليها طلب
هشام... زين بس تنزل الدعايه ادزها اللج
رويده...تمام
هشام.... ممكن لا اضوجين كل صعب لازم يمر
انتي قويه راح تكدرين تعبرين الصعب
رويده ...شكرا على التشجيع
هشام...تستاهلين
رويده...حسيت براحه مو طببعيه بعد ما اتكلمت ويااا
حسيته واعي ويفهم
سمعت اياد رجع قفلت التليفون وطلعت حضرت
الغده خليته كدامه ورجعت للغرفه
زهراء راحت تاكل ويااا
بس خلص صاح ووين الجاي
رحت حضرت الجاي وخليته كدامه ورجعت الغرفتي
كمل ونام بلهول وزهراء اجت يمي
تندل مكان الحلويات كل شويه وطلعت شي وكامت تاكل
ياربي شنو ذنبها هلي المسكينه حتى حلويات ما شبعانه
بليل هشام دزلي صورة بناته
وحده عمرها ثمانيه وحدها ست سنوات
بعدين دزلي صورة امه تخبل شكلها كلش حلو
بعدين دزلي فديو قصير مدته ٣ دقايق الزوجته
من داخل غرفتها ملابسها حلوه ونضيفه
لابسه دشداشه وحجاب بس من حركاتها مبينه
خطيه مو بعقلها
هشام. هاي عائلتي المتواضعه دزيت الصور بصفتج صديقتي
رويده...الله يحفظهم الك
هشام.. ماتردين تشوفين شكلي
رويده.. سكتت
دزلي صورته شاب تقربلا عمره ٣٠ سنه شكله كلش حلو ومرتب صوره وحدا وصوره هو وبناته
رويده... الله يحفظكم
هشام....شكرا صديقتي
بعد اربع ايام
وصل البكج الهديه شكد فرحت بي
بي مرطب وجه ومرطب ادين اربع انواع حمره
مسكاره ورميل وتنت وصبغ اضافر اربعه وكونتور
وكريم تحت العين وجل حواجب
كل يوم اخلي كريمات وانام
وجهي صار يخبل وعلى كصت الشعر والصبغ صرت غير شي
شهر واني واياد مانحجي بس اخدمه اغسل ملابسه واقدمله الاكل بس مااحجي ويااا
خلص هذا الشهر وهلمره على المنتج الجديد والدعايه اني
ارباحي زادت يمكن هشام زودها من يمه
لان عرف ضروفي شنو
كل يوم يدزلي رساله صباح الخير شلونج اليوم
صديقتي القويه
ارد علي الحمد لله
كل يوم توصلني هاي الرساله الحلوه
مرات كلمه حلوه أطيب الخاطر
