رواية خيط الدم الفصل الثاني عشر بقلم زينب طالب
أَنا بروحي حـِزن دٌيرة
مَلامح خوف .. وحَرب چـذبه !
وحّلم تاية ونَهر ثالث حُفر خديّ
غَريب بگاع تلمَني ...
چم ليلة أَذب دُموعّي
علىٰ المامش ولا أَدري !
...........
هدوء...
مغمضة عيوني استنشق سمعت الباب
نفتح بسرعة فزيت فتحت عيوني
واشوفة گدامي دخل وسد الباب
وراة وطگ القفل،
بسرعة عدلت گعدتي باوعلي وسلم
جعفر :: السلام عليكم
_وعليكم السلام، دار وجهة نزع السترة
علگهاا بالزواية فتح الرباط هم علگة
نزع الجواريب خلة واحد بالثاني
ولزمهم بأيدة اخذ دشداشة
بيضة معلگة والخاولي ودخل للحمام
كنت اراقب كل تحراكاتة كانت بهدوء
ونظام
گمت على حيلي اباوع لشكلي هسة
موحرامات هذا المكياج ينغسل والتسريحة
تروح شگد تعبت بيهن لبنية بلة هاي شيفتحها
الية هسةة شو خالتي تگول هو يفتحهاا الچ
وين يعرف والله رغودة عليها سوالف
بقيت افتح بالمجرات واسد استكشف
الغرفة چانت خوش مرتبةة، من سمعت
الباب نفتح رجعت گعدت على السريع
طلع ينشف بشعرة وگف گدام لمراية تعطر
ومشط باوعلي وگال
جعفر :: ليش گاعدة اخذي راحتچ
بدلي ملابسچ لاتتقيدين
_صفنت عليه ياا لعد منو يفتح التسريحة.
چني تورطت رجع گال
جعفر :: ها يابة حچيت شي غلط متگومين؟
_ها لاا اي هسة گايمةة نهضت رفعت بدلتي
وفتت للحمام هسة شسوي وينچ يمةة
والله بية بچيةة هسةة اول مابديت افتح
بالتسريحة يمكن نص ساعة طولت نوب
شعري صار كفشة كلة سبريه مخشب
اجة هسة دور البدلة بالگوة لحت السحابة
اجيت اگطعهاا واخيراً نفتحت بيدي وگعت
بالگاع تبللت شلتهاا خليتها على الغسالة
همزين الحمام چبير مال واحد يتمدد بيه
فتحت الدوش كاسرت المي ودخلت
جلفت نفسي من المكياح وشعري من السبريه
سديت المي باوعت ماكو لاخاولي ولاملابس
حلوو كملت والله هسة شسووي اني شگد
غبية شوكت اتوب من هذا الطبع ادخل
للحمام بطرگ روحي وابقى اصيح امي
چانت كل سبحة ترزلني لأن مااخذ ملابس
فتحت الباب مديت راسي والگاه گبالي
رجعت بسرعة وطبگت الباب دگة.
على الخفيف
جعفر :: شنو وين صرتِ صار ساعتين
بالحمام عبالي بيچ شي
_هاا لامابية بس ماجايبة ملابس
شلون اطلع
جعفر :: غير تحچين، سهلة هسة اجيبلچ
_سمعتة راح شوية ورجع
جعفر :: تفضلي مدي ايدچ
_فتحت على كيف مديت بس ايدي
خلاهن اخذتهن ودخلت همزين جايب
خاولي نشفت بسرعة چان جايب
الروب الابيض لمعلگ مال العرس
لبستة بس فضيحة هذا عزة بعيني
لبست الروب فوگة علساس يستر بس
وين كلة شفاف خليت الخاولي على
چتفي وشعري ضل ينگط مي وطلعت
چان على السجادة يقرة قرأن بس
سمعني طلعت صدق وگام عود ردت.ابدل
شجاك شيخناا صدقت بسرعة
احچي بگلبي
باوعلي من فوگ لجوة صفن علية
بعدين دار وجهة وحچة
جعفر :: صلي حتى نتعشةة
_صار ، بسرعة مديت السجادة
ولبست الأحرام وصليت بعدها
جففت شعري الجو بارد ندگ الباب
أشرلي اصير على صفحة فتح الباب
اخذ العشة مااعرف منو قدمة الة
سد الباب وصاحني رديت مااشتهي
شو هذا باوعلي بخزرة وأشرلي اجي
بسرعة نفس الحبابة گعدت يمة
احاول استر روحي بس وين شضم
كلشي ميفيد همزين الغرفة بيها تدفئة
والا چان متت برد
چنة ناكل بهدوء اكلت شوية احس
اللگمة بالگوة تنبلع خلصت ورحت
اغسل وهو اخذ الصينة وطلع
رحت للفراش تلفلت مطلعة بس
راسي شوية ودخل قفل الباب
وطفى الضوة بقى ضوة خفيف
باوعتلة ذب الدشداشة بقى
بالداخليات غمضت عيوني مستحية
تقرب نام بصفي كل واحد بصفحة
ياا شو هذا ناام حتى حچي ماحچة
هاهدوء شبيچ شو متستحين
شتردين لعدد بين تفكيري المنحرف
عبالك سمعني شحچي
مد ايدة علية دارني علية
يباوع بعيوني وايدة على راسي
يبعد الشعر عن وجهي لااني احچي
ولاهوو اتمنى ادخل بعقلة واعرف
شنو يفكر هسةةة جلى صوتة وگال
جعفر :: بسم الله الرحمن الرحيم
﴿وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ﴾
_صدق الله العلي العظيم، بس صدقت
عبالك اطيتة الأشارة بموافقي بقربة
تقرب مني بكل حنية وصرت مرتة
باسني براسي وگال
جعفر :: الف مبروك
_رديت مستحية الله يبارك بيك
جعفر :: رايح للحمام لاتنامين ميصح
تبقين للصبح بدون غسل مكروه
_هزيت راسي اخذ ملابسة وراح
كل ضني من تقربلي راح يتقبلني
بس مااعرف شنو المضموم الية
وراهاا
طلع من الحمام گمت وراه سبحت
بسرعة وطلعت لبست ثوب.خفيف
ونمت بصفة دار وجهة وگال
جعفر :: تصبحين على خير
_اجمعين، شبيه شنو زعل شو داير
واجهه معقولة زعلان شنو سويت وياه
بقى فكري يودي ويجب الى ان نمت
على نفسي من التعب
فزيت الصبح على دگة الباب
صوت الحجية تگعد بينةة
ام جعفر :: يوم جعفر اگُعد حبيبي
الساعة 10 خطار اجووي
_استحي ارد عليهاا همزين فز هو
صااح گعدنة حجية گعدنة
باوعلي وگال
جعفر :: صباح الخير
_صباح النور
جعفر :: يمكن اهلچ اجوي زحمة منهم
گومي بدلي وطلعي الهم بسرعة
_هزيت راسي ورحت غسلت وبدلت
همزين مصلية الفجر لأن گعدني على
الصلاة بدلت گلبية مرتبة ورتبت
شعري ومكياج خفيف وتعطرت وطلعت
خليتة هو يبدل
طلعت للصالة لگيت امي والحجية
گاعدت بس شافتني طگتهاا هلهولة
ام جعفر :: يمة صلوات على النبي عين
الحارة باردة عليچ تعالي اطيني بوسة
يگلبي
_تقربت منها مبتسمة بوستني وباركتلي
تقربت من امي هم بوستني وباركتلي
گعدت يمهن گامت الحجية عافتني
يم امي بسرعة سألتي
ام هدوء :: طمنيني ماما بالي يمچ
_الحمد يوم كلشي تمام لا تخافين
ام هدوء :: الحمد لله ابوچ يسلم عليچ
_حبيبي لعد ليش مااجة ويااچ
ام هدوء :: ميصير عيب هسة يجي اني
جبتلچ ريوگ واروح اكلي وتغذي لاتستحين
نوب تتمرضين
ام هدوء :: لااكل اكل مااستحي
ام هدوء :: مو ماتستحين كلش لان الخجل
حلو للبنية بس قصد بالأكل وديري بالچ على
عمتچ وكسبي رجلج صيري شاطرة ونبها
وانتبهي لكلامچ لاتچفصين اروحلچ فدوة
والله اخاف من سوالفچ
_هاي شبيچ يمةة والله افتهمت من انخطبت
لليوم انتِ تعلمين بية تعلمت والله تعلمت
ام هدوء :: ان شاء الله يلة اروح اني زحمة
صارلي هواي هناا
_وين ابقي ماشبعت منچ
ام هدوء :: لاكافي ابوچ منتضرني اروح اريگة
_گامت وبوستي بهالأثناء طلع جعفر سلمت
عليه وباركتلة هو باس راسهاا صااح لأمة
جعفر :: تعالي حجية خالتي تريد تروح
_اجت امة من المطبخ تصيح معترضةة
ام جعفر :: يا على بختچ دادة وين رايحة
تريگي ويانةة
ام هدوء :: لاوالله الحجي منتضرني اجيكم
غير وقت اعذروني هسةة
_شگد چلبوا بيها ماقبلت اصرت تروح
طلعت واني رجعت للغرفة شووية ودخل
وبيدة الصينة مال الريوگ اخذتهاا من ايدة
وگعدنة نتريگ اكلت لأن چنت جوعانة مو مال
استحي كافي البارحة استحيت على العشة
ومتت جوع
كملنة راد يشيل الصينة هو ماقبلت اخذتها
من ايدة وطلعت للمطبخ خليتها جاي اغسل
المواعين اجتني بسرعةة
ام جعفر :: شدسووين هدوة عوفي من ايدچ
_خالة بس اغسلهن
ام جعفر :: ابد ابد غسلي ايدچ وروحي يم
رجلج يوم ميصح تفوتين للمطبخ بعدچ
عروس
_غسلت ايدي جاي اروح سألتني وچانت
خجلانة
ام جعفر :: ماما طمنيني لوضعكم؟
_دنگت راسي مستحية وتبتسمت
ام جعفر :: كلشي تمام؟
_هزيت راسي امممم
ام جعفر :: الحمد لله طمنتيني يلة
روحي لغرفتچ
_رحت للغرفة لگيتة متمد ويگلب
بالتليفون گعدت يمةة عبالي يحس
ويذب المابيل ماكو هسة شبيه مخلصها
على الصامت ياربي والله منتوالم احنة
اني هواي احچي هو كلماتة ينعدن
بس مبين ضايج مني لاهدوء ماضايج
والدليل الصار البارحة بينةة لعد
شبيه معقولة على السويتة قبل
مو راضي ينسى
هسة شنو احچي وياه لو ابقى
ساكتة شحچي منين ابديها وياه
قويت روحي وحچيت
ااا جعفر ، رفع راسة علية ورد
جعفر :: نعم؟
_انت ضايج مني؟
جعفر :: ليش هالسؤال
_مااعرف احسك ضايج وبالگوة متحملني
اذا متريدني ليش تزوجتني
جعفر :: ليش بدر مني شي ضوجج
_لابس برودك من ناحيتي حسيت اني
مفروضة عليك مو گتلك خلينا ننهي كلشي
وانتَ ماقبلت
جعفر :: شبيچ هدوء شنو سويتلچ هسة
ترة اني هذا طبعي
_لاموهذا طبعك انت ماطايقني ودتسوي
كلشي لخاطر امك ولخاطر اهلي ترة اني
مو طفلة واعرف
جعفر :: أهاا يعني انتِ چبيرة وتفتهمين
الصح من الغلط؟
_طبعاً افتهم لعد شنو شايفني
جعفر :: شايفچ مراهقة طايشة
متحسب لتصرفاتهاا حساب شنو يجي على
بالها ويعجبها تسووي بدون متفكر بالعواقب
ولاتنضر لهذا الشي اذا كان مناسب الهاا ام لا
_ليش شنوو سويت اني كل هذا لأن حبيتك
ومن سمعت تريد تتزوج اا..
جعفر :: إششش لاتكملين هدوء
لاتكمميلن اني ماناوي اتكلم وياج
بهالموضع هسةة بس مادام انتِ
فتحتي اسعي زين
ماكو بنت متربية وعاقلة وتفتهم مثل
متگولين حضرتكِ تسوي لأنتِ سويتِ
من شفت الرسالة بذاك اليوم انصدمت
وعلى طول الدوامم افكر منو ممكن تكون
ابد ماخطر على بالي واحد بالمية تكون
هالبنية بنت اشرف واحسن رجال بالمنطقة
من راجعت الكامرات وشفت صورتچ
بس ماعرفتچ انتِ بنت ابو هدوء
الا لمن شوفت الصورة للوالدة گالت
هاي هدوء شنو تسوي عندك تحججت الها
بحجة واهية ومشت عليهاا لو تدري بيچ
سويتِ هالشكل مامكن تقبل تخطبچ الية
حتى لوكانت علاقتها طيبة وياكم
كنت اگدر مااعير اي أهتمام لمشاعرچ
واتزوج واعوفچ بس خفت اي خفت على
سمعة ابووچ خاف تسوين الأضرب من هيچ
وخفت من ربي يحاسبني يوم القيامة
اذا أذيتي روحچ بسببي
اريد اعرف منين جبتِ الجرئة هاي
لخلتچ تطلعين من بيتكم وحدچ
وتسوين هيچ افرضي احد شافچ شنو
راح يكوون موقفچ ساعتهاا ولو اني
عرفتچ جريئة وماتردين من اجيتِ
وسألتيني على الحب حچيت عليچ
بوقتهاا وذميتچ
هدوء مااريد اجرحج اكثر من هيچ
بس كلشي سويتِ غلط بغلط
واذا تهاونت عن هذا الغلط راح يتكرر
اني راح اعمل بأصلي ويااچ واعاملچ
بمايرضي الله ولضمير لحدما گلبي
يصفى عنچ غير هيچ لاتطلبين مني
شي
_كمل كلامة ونهض مغادر من الغرفة
احس حچاياتة سچاچين ونبتن بگلبي
كل هذا الكلام شايلة عليةة معقولة.
لسويتةة چبير لهدرجة ليخليه يحچي
هيچ كلام يجرحني بيه
اخخخخ هدوء تستاهلين كلشي
يصير بيچ ولچ وين كرامتچ وين
خليت راسي بين رجلية ودموعي
تجري الوم بنفسي واحاسب بيهاا
معقولة يحچي هيچ لأن يخاف اعيد
الغلط مرة ثانية لو ماعندة ثقة بيه
احس راسي راح ينفجر من التفكير
سمعت الباب انفتح عرفتة هو من عطرة
احسة قريب مني تنهد وابتعد سمعتة
كبر عرفتة يصلي رفعت راسي اباوع لمگفاه
والله لو تدري شگد احبك ماچان حچيت
هيچ وجرحتني بكلامك بس بسيطة شيخنا
بسيطة اني اعرف شلون اتوبك واخليك
تحبني وتركض وراية هم بعيني
نهصت للحمام غسلت وجهي وتوضيت
وطلعت فرشت المصلاية صليت وكملت
وهو بعدة يقرة قرأن عفتة وطلعت لأن
اخنتگت من الغرفة
البيت دافي ويلمع من النظافة وريحة
البخور تفوح دخلت للمطبخ لگيت
الجدورة تفور على النار والمطبخ
هم يلمع خطية شگد تعتب بالشغل وهي
مرة چبيرة طلعت من المطبخ استكشف.البيت
كان عبارة عن طرمة صغير وبالبداية
استقبال وبصفها مطبخ يعني بيه مدخلين
وبالنص صالة ودرج وعلى صفحة الصحيات
وبالأخير غرفتين نوم وحدة مالتنة والثانية.
اكيد للحجية
رحت يم غرفتها دگيت الباب صاحت
تفضل فتحت الباب ودخلت من شافتني
گامت على حيلها چانت تصلي وترحب
بية والله حسيت نفسي سلطانة هيام
على هذا التقدير
ام جعفر :: اگول الغرفة ليش منورة
اثاري الغالية دخلتهاا هلا يوم هلابيچ
تعالي استريحي
_تعالي يووم شوفي بنتچ شلون عمتها
مقدرتها مو مثلچ تگعديني برزالة وتنوميني
برزالة احجي بگلبي تقربت گعدت على
چربايتها رجعت گعدت على مال صلاة
چانت لابسة احرام الصلاة والوجة منور
ماشاء الله اگول جعيفر عليمن طالع حلو
اثاري عليهاا
ام جعفر :: شلونچ يوم مرتاحة هناا
_الحمد لله حجية
ام جعفر :: سميني خالة لاتكبريني يولي
_ههههه لاخالة بعدچ شباب تخبلين
ام جعفر :: يمة فدوة لحلگچ، لعد رجلج وين؟
_ديقرة قران
ام جعفر :: الله يتقبل منةة هسة اگوم واصبلكم
غدة اكيد جعتوا
_ابقى اني اروح
ام جعفر :: لايوم ميصير مو گتلچ
_خالة عليچ الله لاتقيدييني خليني
على راحتي والله ضجت من الغرفة
ام جعفر :: على راحتچ يووم سبقيني واني.
جاية وراچ
_ماشي، طلعت من الغرفة ماتدري
بية اريد اخلص من التفكير بس ابقى
يمة اچفص واخرب الاول والتالي
دخلت للمطبخ فتحت الجدورة طابخة
برياني لحم ويابسة طفيتهن لگيت الزلاطة
محضرة والخضرة ملگوطة شسوي بعد
واني واگفة اجت هية
ام حعفر :: ماما هدوة طلعي المواعين
من هاي الخانة خليني اصبلكم
_ناكل ويااچ خالة
ام جعفر :: شلون يصير
_كلشي يصير اني اريد ويااج مااحب
اكل بالغرف
ام جعفر :: على راحتچ حبيبتي
_طلعت المواعين بدت تصب واني رتبت.
الصينة وخبطت اللبن طلع هو من الغرفة
درت وجهي سويت نفسي مشغولة
جعفر :: هاالله يساعدكم
ام طعفر :: ويساعدك امي تعال شوف
چنتي شلون معدلة ماخلتني وحدي اصرت.
تساعدني
جعفر :: اي الله يديمهاا، شنو طابخة
حجية شو الريحة وصلتني للغرفة
ام جعفر :: كل خير امي كل خير
يلة تعال اخذ الصينة
_باوعتلها متعجبة وحچيت لاخالة اني
اخذهاا حچت مبتسمة
ام جعفر :: لا يوم ثگيلة عليچ تعال حبيبي
_تقدم وعينة مني درت وجهي اخذ
الصينة وطلع اخذت المي ورحت وراه
گعدنتة بالصالة صارت بيهاا ميز طعام
صغير على صفحة خلة الصينة علية وگعد
انتضرت امة تجي گعدت يلة اني گعدت
ياكلون بدون كلام تشيل اللحم وتخلي گدامي
خالة والله هواي مااكل هلگد
ام جعفر :: اكُلي يوم تغذي لاتستحين اني
مثل امچ وجعفوري رجلج وسترچ انتِ
بنيتنا بعدد
_حبيبتي خالة حچيت وصارت عيونة علية
دنگت راسي اكلت وگمت قبلهم خليت القوري
على النار وعزلت المطبخ اجة هو شايل
الصينة خلاها وگال
جعفر :: چاي بلازحمة عليچ
_على النار، طلع يغسل اجتِ امة تريد
تغسل المواعين ماخليتها شگد حاولت
تطلعني ماقبلت بقت يمي تسولف ودليني
الامكان واني اشتغل خلصت وصبيت الهه چاي
اخذتة وراحت لغرفتهاا تگول متعودة تشرب
ااچاي وانام الضهر
واني صبيت الية والة ورحت دخلت لگيتة
على مكتبة مااعرف شنو يقرة خليت الكوب
رفع راسة علية
جعفر :: مشكورة يابة
_العفو، گعدت على الچرباية أشرب
چاي واگلب بالتليفون خلصت اخذت
الگلاصات غسلتهن ورجعت للغرفة
لگيتة متمدد بفراشة دخلت فرشت
اسناني ولبست شي خفيف وطفيت
الضوء وتمددت بفراشي درت
ضهري منة بقيت افكر الى ان غفيت
وهيچ استمر الحال الى ان اجة يوم
السبعة خالتي ماقبلت الاتسوي حفلة
هو عارض يگلها ماحاجة وهية ترد عليه
انت وحيدي واريد افرح بيك واستمرت
المناوشات بينهم بالأخير ماصار الا لهية
تريدة
رادت تاخذني للصالون ماقبلت اني
رتبت نفسي وسويت شعري خابرت.امي
تعزم شفق تگول متگدر تجي ملتهية
عذرتها حالتها مو مال تحضر حفلات
عزمت خالتي نسوان قريباتها وسوت
حفلة بسيطة على گدنة واخذنة صور
وتونسنة هو طالع بيومها مارجع للبيت
الى ان راحوا الناس
بعدني بملابسي ورتبت البيت صار هوسة
ونظفت المطبخ وهية ويااي بس حركتها
بطيئة كلساع اگلها گعدي متقبل الاتشاركني
خلصت كلشي باوعت الساعة عشرة
دخلت للغرفة اخذت المنشفة ودخلت
للحمام سبحت وطلعت لفيت المنشفة
على جسمي وطلعت مأمنة محد بالغرفة
بس عديت الباب والگاه گدامي اتصنمت
لابيه ارجع ولابيه اتقدم بقيت واگفة
وهو عينونة گصتني گص المتدين هم بيه
البلة
قويت روحي مو مال مستحى خليني
احرگ گلبة بعيني شيخنا بعيني فتحت
الكنتور اخذت ثوب احمر ستن من فوگ
بس خيوط ويوصل لنص الفخذ بدلت
بنص الكنتور ميشوفوني رحت للميز
تعطرت وسرحت شعري وشسورتة
خليت حمرة حمرة اتحرك بهدوء وثقة
اعرف بيه عينة مني بس مسوي نفسة
يباوع للتليفون ميدري الفيديو انعاد
اكثر من مرة وهو بالة مويمة
باوعت للمراية راضية على نفسي
درت وجهي عليه سالتة متعشي
لو احضرلك العشة مارد صحت
شيخ جعفررر
جعفر :: هايابة هاا گولي
_تتعشة
جعفر :: لارحم الله والديچ تعشيت
_أطفي الضوة اريد انام
جعفر :: بس قبلها تگدرين تجهزين هدومي
بلاامر عليچ باچر لازم ادوام
_اممم بعيني هسة اجهزهن، رحت فتحت
الكنتور بهاي الايام عرفت امكان غراضة
وشنو يلبس طلعت هدومة علگتها على
الزواية هنة مكويات ميحتاج والعمامة
اصلاً موجودة على الميز مسحت حذاءة
افتر وكأنة ماموجود مااعرف منين اجتني
الجرءة والله اني بربوگ
درت عليه لگيتة صافن بية، خلصت تريد
بعد شي؟
جعفر :: هاا لا لا مشكورة تعبتچ
_لاعادي ، اطفي الضوة؟
جعفر :: لاهسة اني بس اغير هدومي
اطفي
_تمام، عفتة وفتت للفراش تعبانة
اريد انام شوية وغفيت مادريت
طفة الضوة لو لا
گعدت الصبح على طگطگة بالغرفة
فزيت صبحت علية رد علية
جعفر :: صباح النور نامي نامي
مااريد ريوگ
_لاميصير هسة اسوي بسرعة
گمت بسرعة غسلت وبدلت ملابسي
وطلعت احضر الريوگ خالتي ماكو نايمة
يمكن سويتلة طلع مبدل والعمامة على
راسة شگد هيبة وحلو يربي بعدت
نضري مااريد ينتبه اباوعلة
گعد على الاكل صاحني گتلة
مااشتهي كمل ريوگ وسلم وطلع
رجعت ركض للفراش باردة ونعسانة
طگيتها نومةة لل10 بسرعة غسلت
وطلعت لگيت خالتي هسة گاعدة
سوينة ريوگ وتريگنة وكملنة الشغل
وهيچ صار روتيني عبارت عن نوم وشغل
وسوالف وية خالتي اما هو ميجمعني
بيع غير السلام واذا راد شي احضر
الة الصبح يروح لدوامة والعصر بالمسجد
لل9يرجع للبيت مابقى غير يومين لدوامي
استحي افاتحة بالموضوع اني مجهزة
كلشي بس غير هو يحجي ويسالني
همزين اني وياه نفس الجامعة ولهسة
هو ميعرف انتضرتة يفوت للغرفة
واگلة عليمن مستحية قابل والله ياالله
شوية ودخل بس گعد على المكتب يكمل
شغلة حچيت جعفرر رفع راسة
جعفر :: هايابة؟
بعد يومين لدوامي
جعفر :: اي اعرف محتاجة شي
تحضرين شي
_هالالامااريد شي بس حبيت اگلك منو
ياخذني منو يرجعني؟
ردت اشوفة يعرف اني وياه لو لاا
جعفر :: شنو منو ياخذچ غير انتِ وياي
بنفس الجامعة ترحين وترجعين وياي
_هاا ماشي يلة تصبح على خير
جعفر :: اجمعين
_منين عرف اكيد ابوية گالة اووي
هسة عرف وخلاص لاتلحين هدوء
خلصت اليومين واجة وقت الدوام
گعدت الصبح نشيطة متحمسة اشوف
اجواء الكلية تمنيت شفق وياي وندوام
سوة بس اخخخ من الدنيا يومية موگعتها
بمصيبة ماتگدر تجذب نفسهاا
سبحت وطلعت جهزت الريوگ وگعدتة
دخل يسبح واني بدلت لبست فستان
ولفيت شالي مكياج خفيف طلع من الحمام
باوعلي بس چنة ماعاجبة لبسي مع العلم
مستور وعريض گتلة يلة الريوگ كمل
أشرلي أي
طلعت قبلة خالتي متگعد هسة للعشرة يلة
تگعد ردت اسوي غدة من الليل ماقبلت
گالت اني احب اسوي الغدة بس نضفت
البيت وغسلت هدوم ماخليت شي لان
ارجع تعبانة يادوب اكل وانام
طلع مبدل گعد صبيتلة چاي شرب
وكمل غسل وگام واني عزلت الصينة
ودخلت اخذ الجنطة لگيتة فاتح الكنتور
عيني عليه طلع علاگة فتحها وطلت منها
عباية سودة
تقرب مني وخلاها على راسي عدلها الية
وباسني بگصتي بقيت مفهية بوجهة
ابتسم بوجهي وگال
جعفر :: بالستر الزينبي زاد جمالچ، وطلتچ صارت أحلى"
_رجعت اله الابتسامة ماعارضت او ضجت بالعكس
فرحت حسيت بغيرتة وخوفة عليه
جعفر :: موافقة تلبسين العبائة الزينبية بالجامعة
وبكل مكان؟
_هزيت راسي وحچيت بابتسامة اي موافقة
جعفر :: الله يرضة عليچ، يلة نطلع
_اي ماعندي شي، اخذ غراضة وطلع
واني وراه قفل الباب وصعدنة بالسيارة
اول مرة اصعد وياه شغل تدفئة وصوت
القراءن هادىء وعطرة تارس السيارة
حسيت بالسكينة ملت گلبي
حجلى صوتة وگال
جعفر :: شنو شعورچ اليوم وانتِ اول
مرة تدخلين طالبة بالجامعة؟
_فرحت بسؤوالة الية يعني يريد يحچي
وياي جاوبتة متحمسة، كلش متشوقة اشوف
الأجواء واعيشهاا كان حلمنة اني وشفق
ندخل نفس الجامعة بسس ماصارت
جعفر :: ليش وينهاا؟
_خطية يومية تصير الها مشكلة من مقتل
ابوهاا لليوم هية مامرتاحة خلصت سادس
وگعدت
جعفر :: لابد يجي يوم وتفرج عليها
_الله يسمع منك
جعفر :: هدوء اريد انصحچ بما اني اكثر
خبرة منچ بأجواء الجامعة وسنين اني بيها
من كنت طالب وبعدها ماستر ودكتوراة الى
ان تعينت بيهاا يعني كلشي مار علية
_بشنو تنصحني؟
جعفر :: اول شي مااريد تاخذيها من غير
باب لو عبالچ ماليه ثقة بيچ لاا اني لو
ماعندي ثقة مااتزوجج ، بغض النظر عن
الصار بينةة بس اعرف شلوون اروضچ
_ليش شبية اني وتروضني اذا قصدك
ماخلاني اكمل
جعفر :: عوفي ذاك الموضوع الصار صار
واني تكلمت بيه ووضحت وجهه نضري
وعرفتچ غلطچ
_بس اني انقهرت وماانسى كلامك الية وتجريك
ذاك اليووم
جعفر :: منو گال اريدچ تنسيه؟ اصلاً
خليه حلقة بأذنچ ولمايتعلم من غلطة
هذا اعتذر عن المصطلخ غبي
_يعني اني غبية موو
جعفر :: انتِ ليش تاخذين الحديث على
هواچ ليش طبعچ هجومي على كيفچ اني
اعلمچ ليش متتقبلين النصيحة مني؟
_بس اني اعرف مامحتاحة تعلمني
جعفر :: لااعلمچ مو بكيفچ انتِ زوجتي
ومحسوبة علية اي تصرف غير لائق لو
طايش راح ينحسب علية بعد انتِ طلعتِ
من مسؤولية اهلچ واني المسؤول عنچ
الزين والشين يرجع اليةة
واذا مثل ماتزعمين انتِ تحبيبني المفروض
تتقبلين من النصيحة مو تستنكفين هدوء
اترجاج خلي حياتنة هادئة مااحب اعكر
صفو الحياة الكنت بيهاا
_هسة شنو تريد تنصحين
جعفر :: خليتي بيها نصيحة انتِ وصلنة.
للجامعة وماخليتني اكمل الأريد اگولة
_هسة شبيك عصبت يلة گول احچي
جعفر :: خلاص سدي الموضوع بعدد
_حيل ضااج شبيه هذا هسة شگلت
ولايتحمل حچاية مني ،
وصلنة للجامعة دخل السيارة جوة
نزل واني وراه أشرلي اروح وراه
چان يمشي بهيبة ووقار وكل واحد
بطريقة يسلم عليه
من شفت احترام الناس الةة وترحيبهم
بيه ضجت من نفسي شلون تجاسرت
بكلامي مساعة
دخلني وياه كانت عندة غرفة خاصة
بيه خلة بيها غراضة ندار علية وگال
جعفر :: يلة اوديچ لقسمچ
_وين مو هو هذا ابتسم لخوفي وگال
جعفر :: لا انتِ عربي مو هناا امشي
اوصلچ واديلج قاعتچ موبعيد القسم
مناا لاتخافين
_هزيت راسي ورحت وراه امشي
لزگ بيه من التوتر اجيت اوگت على
وجهي ندار علية من شافني متوترة
اخذي ايدي بأيدة ومشت وياه فرحت
لحركتة يعني متباهي بية امشي
وياه فرحانة بداخلي بس العباية
بهذلتني حيل بس مااگدر احچي
وصلنة لقسمي صعدنة فوگ هواي طلاب
يوگفون يسلمون عليه وهو يرد عليهم
من يشوفوني وياه يستغربون
دخلني للقاعة بعدما القى السلام
شاف ستول فارغ أشرلي گعدت عليه
گال
جعفر :: هذا مكانچ بعد وهاي قاعتج
من تخلص محاضرتچ طلعي شوفي
القسم لاتخافين وبس تضوجين اتصلي
بية اجيج
_عبالك طفل صف اول وهو يقنع بيه
هزيت راسي الة ابتسم وصى علية الطلاب
وراح وعيني وراه
من طلع حسيت الأنظار كلهاا علية استحيت
دنگت راسي العب بالجنطة
احس روحي غريبة مااعرف احد
شوية ودخل الدكتور بدت المحاضرة
كانت تعريفية عرفنة على نفسة
وعلى طبيعية الدراسة تقريبا ساعة
هو يحجي من طلع كلها طلعت
اني رحت وراهم مااندل شي واستحيت
اخابرة هم عندة التزامات شنو يتقيد بيه
دخلت للكافتريه عرفتها طلبت گهوة
وگعدت اشرب
تقربن مني بنات اثنين سلمن
عليه چانن يباوعلي من بعيد
قلقني يحچن بيناتهن ويأشرن علية
حچت وحدة منهن بدون مقدمات
::- انتِ مرحلة اولى؟
_اي
::- شصيرن من دكتور جعفر؟
_يا ذني وين يعرفنة شنو قابل يدرسنة
هوو بس مبينات اكبر مني يحوز وياه
وجايات يمنة،
رديت عليهن ليش هالسؤال
::- هيچ مجرد فضول لأن شفناه من
دخلتوا وايدچ بأيدة شنو اختة انتِ؟
_اذا مجرد فضول اني زوجتة مو اختة
عاطت وحدة بيهن خرعتني
::-شفتي مو گتلچ زوجتة
_رجعت ندارت عليةة
::-شوكت تزوجتو؟
_نرفزتني رديت عليهاا اگلچ شنو انتِ
تحققين وياي شعليچ شوكت تزوجنة
راد ترد عفتهاا وگمت حتى الگهوة
ماكملتهاا رجعت للقاعة
لنهاية الدوام اتصل علية سالني وين
انتِ رديت عليه گال ابقي بمكانچ
جايج، شوية وشفتة من بعيد
تقدمت عليه الله يساعدك
جعفر :: ويساعچ يابة ها نتوكل
_اي، اخذني من ايدي وصلنة للسيارة
وطلعنة،
وهيچ مرت ايامي وياه ساعة نحجي ونضحك
وينصحني وساعات مااتحمل حچاية منة
وهو بسرعة يزعل مني بس بالليل كل واحد
ينام بصفحة البس وامكيج اشوفة يتحرمس
بس ميتنازل ويجي انام واعوفة والله يربي
فوگاها هو زعلان فوگ ماحبيتك وتزوجتك
هاي جزاتي
باچر جمعة وضايجة ماجايني نوم خالتي
من العشرة تنام وتگعد بالعشرة وتنام الضهر
هيچ نظامهاا هو طالع دخلت للغرفة خابرت
ماما سولفنة شوية بعدها سديتة منها
دخلت سبحت مثل العادة قبل النوم لازم اسبح
حتى لوباردة
لبست ثوب نوم اسود بس شنو فضيحة
ماينطلع بية شسورت شعري صار سرح
مكيجت مكياج قوي وتعطر شغلت التلفزيون
وگعدت اتفررج ل12 سمعت خطواتة
ركضت رشيت عطر والقيت نضرة اخيرة
على نفسي ورجعت گعدت گلبي يدگ لواني
لو الشيخ اليووم
دخل للغرفة سلم رديت السلام امددة رجلية
واتفرج علساس مامعبرتة واني كل تركيزي
يمة اسمعة يستغفر خلة غراضة على الميز
دخل لحمام واني مغلسة بدل وتقرب تمدد
قريب مني ويباوع
وياي ويسالني على الفلم وارد علية بدون
ماالتفت الةة اخر شي گام طفى التلفزيون
حچيت بدلع يااا هاي ليش هيج مو دنتفرج
حچة متعصب
جعفر :: جاي تلعبين بالنار يبنية
_ليش شسوويت؟
جعفر : ماتعرفين شمسوية؟
_لااا ، طفى الضوة واجاني سحبني علية
وشالني تفاجئت بحركتة دنگ راسة لرگبتي
شماني بنحري وهمس بأذني بهدوء
" شليتي حالي وحق ابو طلبة"
.....
شفق...
واگف گدامي والقلق واضح عليه
سألتة وين نروح رد لجوري حچيت
بخووف شبيهاا اختي؟
صارم :: مابيها شي امشي نشوفهاا
_صارم احچي لاتكذب علية اختي
بيهاا شي
صارم :: بدلي وتعالي لاتلحين گتلچ
مابيها شي
_امشي شبدل امشي بسررعةة
صارم :: يلة
_طلعت وياه چانت تكسي بالباب
هو جايبهاا صعدنة بيها طول الطريق
گلبي يدگ وخايفة احس اختي بيهاا
شي تعابير وجه الخايفة تگول هيچ
طبگت السيارة مقابيل احدى المستشفيات
نزلنة باووعت علية ليش هناا جايبني شنو
بيهاا اختي صاارم احچي
سحبني من ايدي مدخلني ويحچي
وياي
صارم :: اختچ متعرضة للضرب رايدين
يقتلوهاا زوجة رجلهاا واخووها موصليهاا
للموت ..
_شتحچي عووف ايدي اووگف ولك عوفني
صارم :: اششش صوتچ امشي فووتي
متردين تشوفيهاا
_وصلني سحل لوحدة من الغرف باوعتلة
اختي شتسووي بالعناية صارم احچي احچي
اختي شبيهاا طلع الدكتور من الغرفة
من شافني شلون مفرفحة واسألة شرحلي
حالتهاا ماضم علية شي
تخبلت بقيت ادگ والطم يمةةة ولكم
اختي رادت تمووت واني ماادري بيهاا
ياظلام شنوو جرمهاا وهيچ مسووين بيهاا
الله ينتقمم منكم الله ياخذكممم
بقيت اصرخ بعلوا صوتي التمت الناس
علية صارت هووسة سحبني صارم
لحضنة راسي على بطنة كتم صوتي
واني ازيد بالصريخ مااقل احس فقدت
عقلي على الشي الصار وياهاا
صارم :: شفق اهدي شفق راح يطردونة
ومتشووفين اختچ هدي روحچ حبيبتي
لخاطرهاا برووح ابووچ بسس
_ادگ رجلي بالگاع من القهرر واصيح
ولك انتَ مستوعب شمسوين بيهاا اختي
ميتة جوة ويمكن متطلع منهاا وتگلي هدي
روحچ عوفني وخررر مني عوفني
ادفع بيه محروگ گلبي باوعت شخص
طلع من الغرفة لابس لبس عسكري
من شفتة هديت هذا شعندة جوة يمهاا
تقرب مني وسألني
اكرام :: انتِ منو شنو تصيرين لجوري؟
_اختهاا شبيها اختي چنت يمهاا الله عليك
شبيهاا ماصحت بس طمن گلبي وگلي مافتحت
عيونهاا
اكرام :: وين چنتِ عنهاا ليش شامريهاا
يم هاي الوحووش ومحد يسأل عنهاا
_والله مواني مواني ماادري بيها كلشي
صار غصب عني ومن ورايةة بس گلي
شلونهاا هيةة مو چنت يمهاا انتَ
اكرام :: بعد لسمعتة ولشفتة مو زينة ادعيلهاا
_عافني وراح يحچي وية الدكتور ردت ادخل
الهاا ماقبلو توسلت ردت ماكو راح صارم حچة وياهم
اقتنعوا دخلتني الممرضة
تقربت منهاا خايفة عيوني عليها موهية
مواختي الوجه اصفر مثل الليمونة والجوة
لعيون اسود ماعدا الكدمات لبوجها راسها ملفوف
والاجهزة محاوطتهاا اديها طبع الضرب مبين
عليها ضعيفة حيل ضعيفة بحيث ضايعة بالفراش
نزلت دموعي واني اشوفها بهاي الحالة
چان اكو كرسي قريب يمهاا سحبتة وگعدت
عليه اخذت ايدها بين ادية چانت ثلج بستها
ودموعي تجري عليهاا احچي وياها بلكت تحس
بية وتسمعني
جوري يروحي تسمعيني عزيزة ابوية ومدللتة
گعدي اني اجيتچ حاچيني ولچ حاچيني
هيچ مسوين بيچ واني مويمچ عمت عيني
كون ريتني ميتة ولاشفتچ بهالحالة
ريت اني يمچ چان شلت الضرب عنچ
ولاخليتهم يمسون شعرة منچ شگالت
روحچ بذاك اليوم هم صحتي علية وماسمعتچ
هم استنجدتي بية ومااجيتج اخخخخ يابة
كون الوجع بية ولابيچ يغالية
ابچي واتوسل بيهاا وابوس بأيدهاا
وهية ماكو لاحركة ولاصوت رفعت
عيني عليهاا واشوف دمعة نزلت من
عينهاا يمة والله سمعتني ولچ جوري
سمعتيني والله بچت عليةة خيتي
گعدي والله مااخليهم يأذوچ بعدد
بس گعدي والله اضمچ برموش عيوني
ومااخلي احدد يوصل صوبچ
ابوس بوجهاا تهسترت اجتي الممرضة
والدكاترة صاروا يحچوون علية واني
اصيح والله حست بيه والله بچت على حالي
ولكم اختي سمعتني شووفوهاا شوفوها
طلعوني برة چان الضابط يحجي وية صارم
بس شافني تقرب مني
صارم :: شصار احچي ليش تصيحين
ماقبلوا ادخل جوةة
_صارم والله دمعتها نزلت من حجيت وياها
اختي سمعتني صارم شافتني مفرفخة
بچت علية والله
صارم :: كافي گلبچ راح يوگف اهدي
ان شاء الله هاي علامة هية زينة بس اسكتي
ووقوي روحچ لخاطرهاا
_هزيت راسي وعفتة ورحت تقربت للضابط
واحچي سيدي اريد اشتكي على رجلها ومرتة
واخوهاا سيدي همةة محاولين يقتلوها الله
يخليك اخذ حقها رد علية
اكرام :: هم حاليا بالحبس ميحتاج شكوة
هاي جريمة شروع بالقتل وراح ياخذون
جزاتهم
_بس أريد اشوفهم الله يوفقك
اكرام :: ميصير مازالوا تحت التحقيق
اطمأني اختچ حقهاا يوصل لعدهاا وماارتاح
ولايهدالي بال اذا مااوصلهم لحبل المشنقة
بأيدي
_سحبني صارم وهو يتشكر منةة راح
الضابط واني گعدت ايدي على راسي
منتضرة الدكتور يطلع وهو واگف فوگ
راسي بس شفت الدكتور طلع ركضت
لعندة هاا دكتور بشرر اختي
الدكتور :: الحمد لله نگدر نگول عدت مرحلة
الخطر اكو استجابة للعلاج اجهزة جسمهاا
تشتغل بصورة صحيحة خلال اربعة وعشرين
ساعة تگعد اذا الله راد بس ادعولها
_الحمد لله الف الحمد لله ياربي باوع
لحالها يارب
صارم :: ها هسةة اطمانيتي ان شاء الله
_اي اي صارم مااعرف شلون اشكرك
لوماانتَ مااعرف شسوي
صارم :: تردين تشكريني
_اي
صارم :: تعالي بوسيني
_انچب واسكت مو مال عيني واغاتي انتَ
صارم :: البرعة لاتغلطين عيب
_تستاهل
صارم :: چا غير احبچ
_حبك ربك وكسر ركبك
صارم :: اردهاا الچ
_مااخاف منك
عفتة ورحت صاح وراي ويننن رايحة
رايحة للبيت احاسب سهام ورجلهاا
واجي لحگني امشي وهو وراي
اخذنة تكسي وگبل للبيت وصلنة يلة
روح
صارم :: منتضرچ هناا
_شنو ماعندك شغل وعمل رووح
صارم :: معليچ واگف هناا لاتلحين
_بكيفيك عفتة وفتت من الطرمة اصيح
سهاام ولچ سهاام وينچ طلعت من غرفتها
شافتني صاحت
سهام :: لاهلا شبيچ ولچ تعيطين شنوو
سهاام العب ويااچ اني
_تدرين بتچ شمسوين بيهاا ولچ
رايدين يكتلوهاا ومسقطين طفلها
جوري بالمستشفى الها ايام بين الحياة
والموت ومن اگلچ تگليلي شرردت ولچ
بتچ راحح تموووت وانت ماسألة عنهاا
شنو من گلب عنددچ
سهام ::بس صوتچ الرجال نايم تلگيها
من عرامتهاا مبزعتهم وضاربيهاا خليهم
بلكت يأدبووها شووية
_ولچ اگلچ جارمين بيهاا وفاقدة الها
ايامم ومسقطين الطفل تگليلي يأدبووها
شتحچينن انت ِ
سهام :: يعني ماميتةة لاتخافين كم يووم
وتصحى مثل الصل مابيهااشي ليش تكبرين
المواضيع
_يبوووو صخام على ذيچ الساعة السودة لصرتِ.
بيهاا اميي ولچ شنوو من گلب عندددچ صدگ
تحچين رااح تخبليني
على صوتي طلع وليد تقدم مني لزمني
من شعري ويضرب بيةة
وليد :: بسسس سكتي خبصتينة الله ياخذج
انتِ واختج بيووم وااحددد يومية جايتنة
بساالفةةة الساقطةةة بنت الكلب الدايحة
احنةةة شكو بيچن انتن كحاااب معلينةة
بيچننن
_يحچي ويضربية اريد اخلص روحي منةة
مااگدر متحمل علية كل ضربة يشوغني للسماء
مااحس الا نرفع مني يمي باوعت صارم
يضرب بية بقوة نها نهي وامي هسة يلة
صارت تصرخ من چان يضرب بيةة
ما صرخت هيچ
سهام :: يبووو راح يمووت الرجاال ولكم
ياناسس الحگوونة الگوواد مال بنتي راح
يكتل رجلي
_تعيط وتفشر عليةة تكول مو بتهاا وسمعتنا
وحدة كلام وفشار استحي احچي استحيت
من صارم هسةة يگوول هاي امچ اخخخ
تمننيت ميتة بهاي الساعة ولاهذا الموقف
_ماعافة الا گطع النفس گامم من يمة
تقرب على امي رجعت ورة خاايفة
ركضت لزمتة لا صاارم لاتضربهاا دير بالك
صارم :: مااضرب مرة، سمعي لچ اذا
سمعت بيچ انتِ لو الذكر مالتچ مأذين
شفق بحرف واحد اكتلة واكتلچ ويااه
فاااهمةةة
سهام :: اي اي
_ندار علية
صارم :: اني طالع اذا صار شي بس
بلغيني هااچ لزمي
_شمر على تليفوون باوعت علية
شنوو هذا مااريد خزرني
صارم :: خليه عندچ اذا صار شي
دگي علية بيه بس رقمي
_اخذتة ضميتة وهو طلع من طلع اجتي
امي تقربت لزمتني من شعري وحچت
بحقد
سهام :: سمعي شفق وجهج مااريد اشوفة
اني هسةة طالعةة اخذ وليد للمستشفى اذا
رجعت ولگيتچ هناا ماتلومين الا نفسچ
_موبكيفچ مااطلع بيت ابوية هذا
عتت شعري وكملت
سهام :: ابوچ نطمر بالگبوور روحي يمة
والله والأسمة الله اذا شفتچ هناا ادخل عليچ
زلم يكسروچ واخليچ تنتحرين عوود وقتها
خلي العناد يفيدچ
_دفعتني وراحت الةة، عفتها وفتت للغرفة
ارتعب گلبي من كلامهاا معقولة تسويهاا
وليش حتى متسويهاا شنو ليمنعهاا الكره
الية ولأختي وحتى لأبوية واضح بعيونهاا
بس ليش هيچ تغيرت شصارلها ماچانت
هيچ ابد ؟
احس جسمي مكسر من ضرب هذا
الحيوان هو ضعيف بسر ضربتة قوية
مال مسمومين، گمت غصباً علية
طلعت جنطة لميت هدومي بيهاا وكم
شغلة احتهاجهاا ذكرياتي وية ابوية واختي
صورنة اخذتهن كلهن وطلعت لگيتها ماكو
باوعت بأرجاء البيت ونزلت دمعتي وين
چنة ووين صررنة اخخخ يابة تعال
شووف بنتك شجرى بحالهااا
ودعت ذكرياتي لبهذا البيت وطلعت
رحت لبيت اهل هدوء اخذت الفلوس
من يمهم مخليتهن عد امهاا لان احتاجهن
ركبت تكسي ورحت للدار شفت بيبي
تعبانة واحسهاا ضايجة هناا ردت اسولف
الها بس من شفت حالهاا ماگدرت خليت
وطلعت لحگتني مرة چبيرة صاحت علية
رجعت عليها نفسها المرة الألگاها يم بيبي
صديقتهاا دائماُ يمهاا سألتني سؤوال
تعجبت منةة
::- يمة شوكت تزوجين؟
_ليش حجية عندچ عريس الية
::- يمة بيبتچ تعبانة هناا نفسيتهاا تعبت
مااريد اخوفچ بس اذا بقت هناا تخسريها
لحيت عليهاا حتى ترجع ويااج ماتقبل تدوس
بيت ابنهاا تگول من تزوج شفق اروح يمهاا
يمة تلاحگي لجدتچ مو تموت وتبقين تبچين
هاي اني گتلچ وسايمة الله عليچ لاتجيبين
الهاا سيرة من خوفي عليها گتلچ والااني
مااريد افارگها بس حياتها اهم من كلشي..
_حچت هيچ وعافتني وراحت طلعت من
الدار مهدود حيلي واحس المسؤولية كبرت
علية والحمل زاد اضعاف اني نفسي مالاگية
الها مكان نوب بيبي وجوري اذا تحسنت
و طلعوها من المستشفى وين اخليهن
وبيت ابوية نطردت منةة واذا بقيت اني
بخطرر
امشي بالشارع واحس ارض الله ضاگت
بيةة وين اروح وين انطي وجهي ماعندي
لااهل ولاگرايب ولااحد اذب حمولي عليه
رحت للمستشفى دخلت بعدها ماصاحية
لليل وطلعوني ماقبلوا ابات يمهم شگد
توسلت بيهم ماقبلوا اخذت جنطتي وطلعت
لازم ادبر مكان لازم اشوفلي حل قبل
لاتطلع جوري حتى لوأجرت بيبي متقبل
تجي ويااي اخخخ يابة شلون بية
وصلت لمنطقتنة اجيت اروح لاهل هدوء
استحيت مهما كان ابقى غريبة عنهم
شگد يردون يحملوني يوم يومين عزت
علية نفسي حيل
اجة ابالي هو ماعندي غيرة رحت
لبيتة دگيت الباب ماكو گعدت يم الباب
راسي بين رجلية وابچي على حالي صفيت
بالشارع لااهل ولاگرايب اخخخ شفق شوكت
تضحكلچ الدنيا شوكت مديت ايدي
على گلادتي اريدها تنطيني القوة
رفعت راسي من حسيت احد يمي شفتة
هو واگف ملابسة كلهن صخام واديه
كلهن دهن اسوود چان متعجب لحالتي
گمت وگفت گبالة وحچيت بدون
مقدمات
"صارم اني موافقة اتزوجك"
شكرا لزيارتكم عالم روايات سكيرهوم
