رواية هدية الشيخ هشام الفصل الثاني عشر بقلم التميمية
ابو حمزة ابتسم اله:ابن اصل والله وتسلم وتربية الشيخ ابو هشام ماضاعت بيك ابداً..ربه انسان عظيم..لذلك واليوم وكدام كل هالزلم.. انه راح اهديك هدية غالية عندي حيل وهي وصلة من هالكلب...حتى مايصير بينه عداوة..ياشيخ هشام هديتي الك بنيتي الي ماعندي اعز منها..اهديها الك كحليلة خل يشهد ربي عليه هي غالية عندي حيييل وماراح الكه الها انسان احسن منك ومن اصلك ياشيخ واتشرف بنسبك....
الكل كامو وعمامها رفضو واعترضو وماقبلو..وصارت هوسة وحجي وكلمن يكول لا منقبل بتنه تنطه هدية الهم....
هشام تفاجئ بالهدية وماتوقعها ابداً وظل ساكت مايعرف شيرد او شيكول....
ظلو كلهم يباوعون عليه منتظرين رده شنو...وهو هم يباوع على كل عمامها واحد واحد وميدري شيرد يرفض لو لا هو بهالعمر ويريد ينطي بته هدية الشيخ حسين....
هشام باوع لشيخ حسين:بس ياابو حمزة..انه رجال مزوج وابني شباب ومزوج وبهالعمر راح تضحي ببتك لرجال اكبر منها اكيد
ابو حمزة:العمر بحياته مصار حاجز يمنع زواج..وانه اشتريت انسان اصله ذهب ومينوجد مثله نادراً..والشرع حلل اربعة..تتقبل هديتي وان شاء الله مابينه الا كل خير
ابو سلام:اعترض شنو تهدي بنيتنه الهم وهو ابنهم جنى على بتنه لا ابد مو موافق..ولدنه موجودين واحنه اولى بيها من الغريب
الشيخ حسين:بس هاي بنيتي ومحد اله دخل حتى لو عمامها انتم..ولدكم مابيهم خير لنفسهم..كل واحد نطيته مرة وينه صانها..ولا ولد عدكم يستحق جوهرتي والي يستحقها كاعد كبالي..واذا يقبل هديتي راح يصير بينه نسابه ونكون لغينه كل العداوة
العمام كلمن كام يحجي بصفحة وماقبلو وصار نقاش حاد...طبعاًالي بالمجلس بس اخوان ابو حمزة وحازم وهشام وجم عم من عمام هشام...
هشام ظل حاير واخيراً استجمع كلماته وباوع للشيخ حسين بثقة..وحتى يوكف كل هاي المناقشات...كله شيخ حسين هديتك مقبولة واتشرف بنسبك وببنيتك...
ماكدر يرفض هديته ويفشله وهو كدام كل اخوانه والزلم الكاعدة هداه بته..اصلاً سد حلوك عمامها الي ودهم يشنقونه...
قسم من عمامها عافو المجلس وطلعو والي عصبي على اخوه..والشيخ حسين
كله تسلم يابو كرار انته ماكو منك وبتي بالحفظ ماخاف عليها بعد...
وانتهى النقاش وهشام تنازل عن القضية..وقرر بعد مايكوم بالسلامة كرار يروح للشيخ حسين ويطلب بته على سنة الله ورسوله....
حوراء ابوها كلها السالفة وظلت تنحب وتتوسله وتكله بابا لا تظلمني ليش هيج نطيتني هدية وانه ماعرف رأيي ليش ماخذيته..شنو ظالة على كلبك انه بشر مو سلعة...
ماتوقعت تنطيني هدية بابا انته جنت متريد تنطيني لعمامي لان ولدهم مو خوش ولد هنوب اجي اسمع انتي صرتي هدية لشيخ فلان...
كللها وشرحلها موقفه وكلها وداعتج وغلاتج بويه لو ما ادري بي يصونج وخوش انسان مانطيج اله..واعرفج عاقلة متكسرين كلمتي وانتي رفعة راسي...وحتى مايصير مشاكل وعداوة انطيتج للشيخ...
وكلها انتي مختلفة عن خواتج مؤدبة وهادئة واكيد متكسرين كلمة ابوج وتفشلينه...
هي اكتفت بالبجي وماردت وسكت عنها كال خليها براحتها هي تالي تقتنع وراح تشركني لان اختاريت الها انسان زين وماكو منه...
زمزم سمعت وخبصت الدنيا كالت شلون تنطي بتي هدية ماقابلة..كلها انخرسي يامرة وان سمعت حسج لسانج كصيته..انتي مو اعرف مني بمصلحة بتي....
طلع كرار من المستشفى وذبحو ذبايح برجعته بالسلامة بس مايمشي على رجلينه هل الفترة راح يطول..لذلك راح يكعد بكرسي متحرك..لان رجليه اثنين مكسرات...
همه من بعد ماضاربينه شايلينه وشامرينه عالصخر يعني متاذي هواي وهمزين ظهره ما مكسور...
نسمة سوتها مناحة بالبجي من طلع ومو مصدكة طلع....
اما رقية مخلد يراسلها ويكلها بس ردي وهي ماترد..وحاظرته وماتنطي وجه بالجامعة...وهو يلح فد واحد يلج هههههه ويكلها الي الي بويه ماتصيرين لغيري...
ومرات يستفزها بالمحاظرة يلتفت على مقعدها الي وراه بجم كرسي وبس تباوعله يغمزلها ويعض شفته..وهي تفور وتعصب وتدور وجهها عنه...
تطنشه وتعوفه..بس اكو شي داخلها مستمتع بأعجابه بيها بس اكو عنده شغلات متحبها حيل جريئ...
وكل العائلة عرفو انو هشام انطاه الشيخ حسين بته هدية ام هشام فرحت وكالت خل ينكسر خشم ايمان...
ورقية هم فرحت لأخوها برغم خايفة من المشاكل ايمانو خبيثة متسكت...
وكرار مو فرح الا طار فرحة لان يعرف ابوه مابينهم علاقة هو وايمان طبعاً بس هو يدري...هشام ماكل لأحد غير كرار...واصلاً الكل ملاحظين ويعرفون ومغلسين مالهم علاقة...
ابوه ماعنده مشكلة المهم ينتظرون هشام بلكي يصير عنده طفل ويفرح كلبه بي بعد هالسنين...
ايمان اتشعوطت واعترضت وظلت تصيح كالت الهدية ماتجي على راسي..هشام خرسها بكلمتين..كلها صوتج لا اسمعها...
ومرت ايام وحوراء كاضيتها بجي متريد تصير هدية لشخص ماتعرفه ولا شايفته وماتدري شنو اصله شنو اطباعه...
وهي اصلاً مارايده الزواج كله وتريد تكمل دراستها بدون مايتعرضلها احد..وصارت تشوف كوابيس اكثر هنوب كامت كله تحلم تنزف لهذا الشيخ والي نقذها بالحلم يدير وجهه ويروح....
وتكعد وتبجي بحركة على حظها المصخم...
نايمة العصر وحتى عابر وقت الصلاة عليها كامت من فراشها وباوعت للساعة وهي مقموته ومو شي جديد عليها وراحت طلعت غسلت وجهها وتوضت وراحت تريد تصلي وآية اجتها ركض...
حوراء حست بيها من جيتها بحلكها حجي..كلتها هاا ام الاخبار شعندج من حجي...
آية:ول ول وين عرفتي جايبة اخبار ههههههه
حوراء تنهدت:ماعرفج نشرة اخبار..شعندج كولي وارتاحي
آية ابتسمت ابتسامة عرييييضة وتبالغ شوي:جوو ناس لأبوي وزلم..ولو تدرين شفت بينهم رجال يضوي يضوي الا شوي يشتعل كلوب..هيبة وسامة يممماااي🤔 ولو كلهم حلوين حتى هذا ابو دشداشة نيلية هههههه صكوك عزززا فلك طرهم هاي كل عائلتهم هيج صكوك
حوراء كلبها نقزها والخوف تسلل لكلبها:ومنو ذولي وجاي تتغزلين بالناس عابت وين شفتيهم ولج
آية:جنت صاعدة السطح ومديت راسي من شباك البيتونة وشفتهم دخلو..شفت رجال شايب اعمى يمكن واحد لازم ايده..اخخخخ حورو حلووو وهيبة والي وياه هم حلوين بس اكو واحد اجكم بينهم لابس جفية سودة
حوراء تكول بس لا الي ابالي اجو لابوي وخافت وبطنها ظلت توجعها حييل...
حوراء:طاح حظج واطلين من البيتونه والله لو يدري بابا يطيح حظ حطج..ولا كاعدة تتغزلين بزلم غربه..وطولج شبر يمته كبرتي وكمتي تدورين حلوين..طاح حظج
آية ضحكت:عابت هو انه اشاقه..اصلاكلهم انه اصير بتهم كبار بالعمر..بس واحد اجكم هذا شاب شكله بالعشرينات هيج..بس حيرني ابو دشداشة بيضة احس شايفته جاي لأبوي مرة
حوراء عافتها وراحت بدون رد وراحت صلت وخلصت وكعدت تكورت على نفسها وكلبها يضرب حيل ودكاته تخنكها بكد الخوف...
بعد شوي من الخوف والقلق اجتها امها وصيحت عليها كومي ساعدينه جاين ناس لأبوج..راح ترحين بيت رجلج بعد هاي هي انحسمت..ولو مو راضية انه بس مانكدر نحجي ويه ابوج....
حوراء كأنه اجاها 50 كف مو حجايات امها..دموعها صارن بطرف عيونها وطاحن:ماما فدوة حاجي ابوي ماريد اتزوج ماريد..وراحت طلعت من الغرفة وركضت للطارمة وطلعت وره البيت...
وظلت تبجي هناك وتنحب..وامها ادورها ومعصبة مالكتها بالبيت كالت طبها مرض خل تبجي مصيرها تقبل...
بقت حوراء لمن راحو الزلم وهي وره البيت تبجي تسمع صوتهم طلعو وتسمع سوالف وضحكهم ويه ابوها واخوانها...
بس حمزة ماحاضر مايكدر يواجه الشيخ هشام بعد عملته بأبنه..طلعو وهي بقت مكانها وتحس راح تنزف لموتها بكد ما مقموته ومقهورة...
وسمعت حجي ايو انهم كبار بالعمر اكيد العريس وياهم هو اصلا كلالها ابوها شيخ هو اكيد شايب وظلت تتخيل اشكال والوان نوب الشايب الاعمى نوب مادري شنو....
مو هامها العمر ولا الشكل ماتريد تزوج وهي بعدها حتى مادخلت ال18 هي هسة بصف الرابع...
هي من مات عزام عمرها 16 ودخلت ال17 بعد اشهر من وفاته...وتقريب صار على وفاته سنة واشهر...
بعد ماراحو ابوها افتقدها يريد يحاجيها بخصوص سالفة الزواج..همه اجو وخطبوها رسمي...
كلهم وين حوراء..اية كلتله رحت لكيتها وره البيت حوراء ومن مساع تبجي..هي ما قابلة بالزواج بابا...
كام راح وراها وشافها بعدها تبجي..وهي من شافته مسحت دموعها ونزلت راسها...
ابو حمزة ابتسم:شنو هاي حوريتي تنزل لؤلؤ من عيونها هاي ليش دموعها جواهر ثمينة وجاي تهدرن..ماعاش الي ينزل جواهر عيون بت الشيخ حسين
حوراء رجعت بجت:بابا فدوة فهمني انه مضايقتك بشي هيج تريد تخلص مني
ابو حمزة كعد يمها على الأرض:اليوم خوش جوو حلو والسمه مليانة نجوم..شوفي السمه صدك مليانة نجوم..بس بويه لاحظي كل نجمة تختلف عن الثانية..وحدة ضاوية حيل والخ خافته..وكذلك البشر مو كلهم يتشابهون واخلاقهم هي تخليهم خافتين او يشعون..بويه انتي غالية عندي وشكد ما احجيلج عن حبي ماراح تفهمينه لمن تصيرين ام وتفهمين حب اهلج الج..انطيتج لهل الرجال مو لاني ضايج منج شايفة اب يضوج من بته..بعدج زغيرة متفهمين عدل للحياة..والشيخ هشام انسان رائع وعندي وياه مواقف والله ماكو منه..ومراح الكه احسن منه يحفظج..احسن من ما تصيرين لولد عمج عباس وايمن..ذولي انه لو اخر زلم مانطيج الهم..مو مهم فرق العمر هو رجال والمهم طيبة كلبه واخلاقه..لتفشليني بويه اعرفج عاقلة واحسن حتى من خواتج الكبار..اختاريتلج هالرجال لمصلحتج وبعدين راح تعرفينه وتكولين اي بويه مشكور اختاريتلي انسان ذهب
حوراء ببجي:بس انه ماريد اتزوج بابا بعدني صغيرة وبنفسك كلت لعمي بتي صغيرة ومو وقت زواج..انه اريد اكمل دراستي فدوة بابا فدوة رحتلك الغي هالسالفة ماريد اتزوج مو هامني شكله ولا عمره بس ماريد اتزوج
ابو حمزة:اي بويه تكملين دراسة اذا هو سمحلج..وبالنسبة للزواج صح بعدج صغيرة بس فاهمة انتي وعقلج يوزن بلد واعرف راح ترفعين راسي وماراح تفشليني مو لو مو
حوراء سكتت ودموعها تنزل تتمنه تموت روحها حتى يفهمها ابوها بس مجاي يفهمها...وظلت ساكته وهي تريد تشوف وين توصل...
وراح تمشي وره ما اختاره ابوها الها وتكول ربي ارحم بحالي انه عبدك الضعيف..ويجي ابالها الشخص الي تشوفه بأحلامها والي نقذها...
وتكول هذا الملاك الي نقذني وين هسة ياترا وليش رابطه احلامي بهيج سرراب...
مرت ايام وظلو يجهزون حوراء لزواجها من الشيخ هشام..وهي بس ساكته ومن تصير لوحدها تختلي بدموعها وحزنها المايفهمه احد...
وقبل العقد مالتهم بيوم اجه عباس ويصيح بالشارع وهو شارب ويكول حوراء ماتزوج ماخليها انهي عليها...
ويجي ايمن العار نفس حجيه ويتعاركون بنص بيت عمهم الشيخ حسين وهو يصفكلهم ويكول عفية ولدي خوش تسون....
تتعاركون بنص بيتي على بتي..واحد سكران والخ يعارك اخوه...والله ياحسافة تعب اخوي راح بيكم..ماتستحون ماتخجلون بت عمكم عرضكم وانتم خوان تتعاركون عليها....وبيومها طردهم طرده تسوة حياتهم..وصارت طلابة جبيرة بينهم...وحوراء ظلت بس سادة ذاناتها ومغمضة وكاعدة لوحدها متريد تسمع شي...
ويوم ثاني عقدولهم هي وهشام ومشافها لحد هسة ولا شافته..وبس خلص العقد بجت دموع بكد عمرها الراح...
ام هشام فرحانة بالرغم هشام متزوج ايمان بس مافرحت هيج...وبس تسأل وين جنتي الحلوة واجت حوراء يمها...
واكلتها اكل بالمباركه والسلام ورقية متعجبة بعدها صغيرة مبينة حيل صغيرة..وتكول ليش هيج خطية صغيرة وهشام جبير عليها...
وتكول يعني هسة هاي لهشام شلون راح يتفاهمون وهشام راح يربيها لو يزوجها..بس تكول شكلها فقيرة وطيبة على نياتها مو مثل ايمان وهادئة....
نسمة فرحت لعمها لأن كرار كلها ابوي مزوج ايمان بس شكل وشكلهم الكل يعرفون بس يسون نفسهم مايعرفون لان ابوه ماينام يمها بغرفة وحدة...
اما ايمانووو بانزين ينزل من خشمها وعيونها..ولازمة الجداحة بيدها على لحظة تشعل البانزين الي بخشمها وعيونها😂😂....
وتباوع لحوراء بحقد وبغض وغضب داخلها صار يشتغل مليون بالمية....
هل الأسبوع عرسهم وليهسة مشايفها ولا شايفته ويكول مايهمه الشكل هو.. وامه ورقية كلوله البنية شكلها صغيرة..هو هسة متوقع تطلع بالعشرينات لذلك قابل...
فزت من نومها وباوعت للسكف وتذكرت اليوم زفتها على شيخ هشام الي حتى مشافته لأن هو عقد والأسبوع الوراه العرس...
هو ماراد عرس وخبصه يكول بهالعمر انه والعرس شنو بس عمامه خبصو الدنيا فرحانين اله من تزوج ايمان جانت توه طالعة سنة عزام والكل فاهمين انو هشام قبل يعقد عليها بس اكيد بالشكل بس...
لذلك الكل جانو عادي مافرحانين ولا ضايجين تزوجها بس لخاطر جهال اخوه..بس هاي تختلف ناطينه بت بيت....
حوراء كعدت ودموعها تسرسحت من جفونها على خدودها:ليش بعدني احلم بهذا الرجال ياربي رحمتك بيه..اليوم حاسه راح انزف للموت
امها دخلت الغرفة:هاي بعدجن نايمات..كومن..يالله حوراء كومي وراج كومة تعب..وشعلت الضوى وحوراء بسرعة مسحت دموعها وكامت حتى لا تشوف وجها امها...
راحت الحمام بسرعة..وغسلت وجهها وباوعت لوجها احمر من الخيط امس تولنها خواتها حفافة وسون جسمها وهالسوالف مال عروس...
باوعت شكثر متغيرة لان ماتحف هي وحفت هسة وطالعة حلوة متغيرة هواي...وطلعت راحت صبحت على ابوها بعيون كسيرة...
وهو فهمها وباس راسها وشجعها ترفع راسه وتراويهم شيخ حسين شنو تربيته....
راحو الصالون هي وامها وخواتها ثنين وياها الباقيات بالبيت...وخلصت وطلعت تخبل حوراء...وصارت حورية بجمالها الطبيعي...
هي ام الصالون ماغطتها بالمكياج تشوف مايلوك عليها هواي مكياج..بس احتارت بصدر البدلة ترسته كلينس 😂 يالله صار عليها...
بس طلعت تخبل وطول الوقت ساكته حتى كلمة ماحجت وخواتها يحاجنها وامها وهي ولا يمها ام الصالون تكول البنية حتى ماتبتسم شكو...
وشما تكلها شي يجاوبن خواتها لان ما تجاوب هي وساكته ولازمة دموعها بالكوة والخوف مسيطر عليها..شلون راح تتقبل رجال مشايفته ولا شايفها...
خلصو كلتلها باوعي لنفسج وهي باوعت بالمراية وشافت نفسها بالأبيض وصارت صدك وراح تنزف لشخص ماشايفته ولا تعرفه...
غستان حوراء
وهنا تفجرن دموعها بالبجي وظلت تشهك حييل..وخواتها كامن الها وحدة تمسح الدموع وحدة تهدي بيها...
وامها رزلتها حتى كدام ام الصالون ماهماها وتكلها كافي دلع شنو رايحة للحرب بعمرج وتزوجت ابوج وعلى شريجة وعنده جهال...
وبألف ياعلي مسكتيها خواتها...
بجهة عريسنه الشيخ 🤩...
بغرفته كاعد وبيده صورة فرات هو وياها وبيدهم كرار من صغير...ابتسم الها وحاجاها وكلها لا تحزنين محد ياخذ مكانج عندي لو بعد دهور...
رجع الصورة بالمجر وكام لبس دشداشته البيضة ولبس الشماغ ورتب العكال عليه...شكل كبكات البصمة ولبس محابسة ورش عطر...
راد يطلع صارت بوجهه امه وكومة نسوان بالصالة..حاجته امه ودنك راسه وطلع من بينهم..وكلما تشوغه وحدة من بنات تباركله ويرد وهو مدنك...
وطلع واول ماطلع استقبلوه بالتبريكات الزلم وكرار فرحان لأبوه لا من صدك فرحان لأبوه...
كرار ابتسم وهو على كرسي:الف مبرروك يا شيخ..منك المال ومنها العيال
هشام ابتسم اله:الله يبارك بيك نور عيناي
كرار:شني هاي طالع شحلاتك..والهيبة تسطر يابه فدوة رحتلك..هيج العرس يرجعك شباب..خل نزوج عمو حازم لعد بلكي يرجع شباب
حازم ضحك:مبروك ياشيخ
هشام:الله يبارك بيك اخويه حازم
كرار ضحك:اكول بويه ارفع راسنه الليلة..خاف ناسي يابه لا تستحي كول عادي عادي ههههههه وهاي عمو حازم يذكرك هههههههه واءا تريد اذكرك هم عادي
هشام ابتسم للزلم وهمس لأبنه:جاي تجفص بعد ابوك..بلا مستحه صاير ولا تخجل خربك الزواج
كرار ضحك وهمسله:يابه تره كلها تعرف بيك زواجك من مرت عمي بس بالشكل..كلشي ماحجيت انه بس الكل طلعو يعرفون
هشام سكت وظل يفرك بلحيته ويباوع لكرار...
كرار:عمو حازم تعال الحك الشيخ صفن..يمكن يفكر بالبنية الي جايته الليلة..اووييلي يابه راح ترجعك شباب
هشام:هذا ماتودونه بعيد حازم اخذه منا فضحنه بلسانه المتبري منه..اكل كتله وتكسر وفقد عقله ويه الكتله
حازم ضحك وكله تدلل هسة اشمره بالشط ولا يفشلك كرير هههههه..ويريد يدفع كرسية وكرار ميت ضحك...
راحو اخذو حوراء من بيت ابوها ودعها وباس راسها وجبينها وهي تبجي مابطلت...
غطوها وحطوها بالسيارة وهي خايفة ومرعوبة وتبجي وريحة العطر دخلت لرئتها..ومن جوى الغطه وهي مدنكه ماشافت غير ايد زلمة بيها محبسين بالخنصر والبنصر ايده اليمين....
وسمعت صوت رجولي هز كلبها هز من مكانه...وهو يحاجي ابن عمه حازم...لان هو يسوق ماقبل هشام يسوق...
وحست انها سامعته بس ماحافظته..وهي بدموعها تكول ياربي على بابك انه رجائي ترحمني برحمتك بس....
وخل نختصر الاحداث لان تفاصيل مو مهمة وراح تحظروني لو طولتها بعد😁 اي اعرف مستعجلين عالطردة مالتي😂😂
اخذو حوراء لبيت شيخنه وخلص العرس وحوراء تباوع عالكل فرحانين الا هي ليش مو فرحانة ولا تحس بطعم الفرح اصلاً...
تحس روحها تطلع بهاي الليلة..تباوع لأمها وهي تحجي ويه ام هشام وتتمضحك..وهي مشتعلة نار داخلها...
ايمان ماحاضرة ومشتعلة نار وهي بيت عمها وكبت بينها وبين مرت عمها عركة وكتلت مرت عمها...
وصفية كاعدة تبجي من صدك على هشام اليوم عرسه..وتكول لأمها اريد الوح العرس مال الشيخ..امها منعتها ماتريدها تروح يم الزلم تدري بيها هسة تطلع يم الزلم...
وداخل هوسة وبعدها كالو راح يزفون..وخذوها لغرفة شيخنا وبقت يمها بس رقية وحوراء كلبها ظل يدك حيل ورجعت تجمعت الدموع بعيونها وطاحن وتمسحهن ويطيحن وصوت شهكاتها علت وتكول اريد ماما...
رقية شافتها هيج كلت لأمها واجتها..واول مرة زمزم تصير حنونه وبوستها وشجعتها وقوتها وكلتلها راح ابقه وياج لحد ماياخذج الشيخ وبعدها اروح...
وهي تبجي اكثر ورقية كعدت تهديها...
رقية:حوري حبيبتي اهدي..اخوي اطيب انسان..والله مو اخوي واحمده بس انتي حضيتي بأطيب كلب واكثرهم حنية..يالله انه اروح..خالة عني طالعة لو ردتو شي بس صيحي عليه
ام حوراء:شكراً حبيبتي...
خفت الهوسة شوي وراح يزفون الشيخ..وسوله هوسه عمامه ولد عمه..وكرار كل شوي يكله بويه بس لا تستعجل رفقاً رفقاً بالقوارير....
هشام يضحك عليه ويكله ولك صاير منحرف كلش..وكرار يخرب ضحك...
بقت حوراء وحدها بالغرفة والخوف مسيطر عليها لا اصلا مرعوبه حيل..ودموعها مابطلت...
شافت الباب انفتح وعيونها كلها دموع ماشافت غير زلمة طول وشماغ وعكال..........
شكرا لزيارتكم عالم روايات سكيرهوم
