رواية لست خائنه الفصل الثالث عشر بقلم انين الليل
سلام
خلصت تلث تيام الفاتحه جانت ضخمه وثكيله بحكم معارف فواز ومعارفي وعرف عمامي وخوالي لكن
فواز اجت علي هوايه ناس مبين جان يتعامل وياهم انا اعرف انو فواز چان عنده شغله الي ابحده
لكن الناس الي شفتها ناس الها وزنها بالعمل ومعروفه ورغم ثگل الفاتحه چانت الغصه والسؤال الي
بعيون العالم
منو هاي الي جانت ويا يوم الحادث واتوفت بنفس اللحظه ؟
اي شي ما نعرف عنها والناس تدري هو متزوج بوكتها عمي طاهر اضطر يگول خطيبته
وچانت ضربة حظ يعني كلمه وگالها حتى ايبرد الموقف ولو طالعه متزوجه او مخطوبه او منهزمه من اهلها
يمكن صار غير كلام وغير تصرف
بعد يوم الثالث كعدنا بالديوانيه وصارت الناس تجي علينه واحيانا نفتح الصاله الخارجيه يعني نكوم النسوان
يرحن للصاله الثانيه صارو اولاد عم ابوي وناس من عشيرتنا وشيخ العشيره يجون لان لازم نلكى حل
لان ما نعرف شلي راح يصير چنت مهموم وانا اتذكر فواز بالمستشفى اجاني عمي طاهر وشاورني
- - گوم سلام الشيخ يريد يحچي وياك ابيناتنا
باوعتله وكفت ورحت انا ويا للصاله واجه ويانه عمي صاحب سلمت وگعدنا وسالني الشيخ
- - عمي سلام شتعرف عن البنيه الي جانت ويه اخوك
باوعت بحزن :: والله شيخنا كل شي ما اعرف
- - ها يعني اخوك ما حاجيلك
::لا والله الي اعرفه انو راح الاربيل بشغل هو كل مره يروح تلث او اربع تيام هالمره بقى تسع تيام
- - ها وما خابرك ما فهمت منه شي
::لا شيخنا بس مره يمكن وره اربع تيام خابرني وگلي حول فلوس وفعلا حولت ها واتذكرت
- - شنو عمي
::من اجه ابو المكتب مر علي ياخذ الفلوس كلي انو شايفه يعني هو كلنه مسافر بس باقي اهنا
- - وانت ما تدري ؟
هزيت راسي :: لا والله ابو كاظم ولا عندي علم حتى انا اتصلت برحمن كلي اي هو خلا السياره وسافر وره
اربع تيام من كلي مسافر
الشيخ/:زين ومن رجع
:: هم ما ادري بس لمن خابروني بالمستشفى ورحت شفت جثة البنيه
الشيخ جر حسره /:اي عمي انا سالت عليهم خوش ناس وبت عائله وبعدهي بت بيت المشكله ما ندري شنو
وضعها ويا (الشيخ نكت ملابسه قريب صدره ) استغفر الله ظلمه ودليلها الله
طاهر //مبين شيخنا مصاحبها
- - شنو هاي ابو صلاح عود انت الزين الله يستر على بناتنا
طاهر //يعني واحد جاي من اربيل ما يجي البيته يطلع ويه وحده شنو غير صاحبته
الشيخ//ياخي تسكت خلف الله عليك اتلافيت الموقف بالمستشفى وكلت الشيخهم واخوها بتكم جانت مخطوبه الابنه
ولاتنسى اذا البنيه ما متوفيه وفواز متوفي غصبن على سلام ياخذها لو يكتلوها
وتعال شيل واكتل وافصل
باوعلي الشيخ وكلي //عمي هسه اريد احد يسالي مرته شنو شكايللها شحاجاها لازم مسولف عليها
طاهر // شمسولف ايگللها مصاحب عليچ مره
صاحب وگف // هسه رايح اسالها
رديت ::لا عمي انت استريح (وگفت )انا اودي على عمتي وتستفسر منها
ودخلت للبيت شفت هواي نسوان كاعدات بالصاله سلمت
:... السلام عليكم
الكل رد اشرت العمتي عليه الي اجت وراي ودخلت الغرفتي لحگتنا كوثر كتلها :: اطلعي عدي شغله ويه عمتي
هي طلعت وبوجها الف سؤال عمتي عليه اتقربت مني وباستني وكلتلي
- - البقيه بحياتك ( وصارت تبجي )
انى جاوبتها بعبره. :: عمه بعد ما يفيد راح اخوي وبعد ما يرجع
عمتي // الله يصبرك يمه ويصبرنا
جريت نفس :: عمه اريد ترحين تسالين بتج فواز بسفرته شنو كللها شراد منها بينج وبينها انتي وهي ما اريد اي احد
يدري وانا اهنا منتظرج
وراحت عمتي بقيت منتظرها دخلت كوثر سالتني بهدوء // خير شردت من عليه
جاوبتها ابرود :: شغله تخص فواز
بقت كوثر واكفه منتچيه على ميز تواليت واجت عمتي بقت واگفه انا باوعت الكوثر
:: كوثر اطلعي شويه
اشوف كوثر متوتره وتريد تنفجر طلعت وسدت الباب بقوه وعمتي انطتني نقال وگالت
- - عمه تكول هو اول يومين كتب المسج كال انطي السلام الفلوس الي انطتك اياهن وانوب قبل الحادث
بساعتين كتب هذا المسج
انا اخذت التلفون وشفت انو هو متصل عليها وهي ما ترد واخر شي كاتبلها
رضوى حضريلي 150 مليون من القاصه وانطيهن الرحمن هسه يجي عليهن
عمتي واكفه كتلها روحي اساليها //رحمن اجه واخذ الفلوس واعرفي منها شنو قضية البنيه الي جانت ويا بالسياره
وراحت عمتي جان النقال بيدي فتحته شفت فواز طيلة سفرته ما مخابرها بس متصل مرتين وهي ما شايلته لمن
على تحويل الفلوس وقبل وفاته
وشفت مراسلات ويه اختها رقيه بيوم الي كتلتها كوثر وامها وسهير
=رقيه جا موتني لو ما اجه سلام باللحظه الاخيره مو تكلين الامي ما عايزه ضيم
رقيه //وهسه شناويه تسوين
رضوى =يجي فواز لو انا وهو نطلع لو سلام ياخذ كوثر ويطلع بعد ما ترهم اعيش وياهم ابيت واحد كوه متحمله
رقيه //ادري بيج رضوى بس شتسوين فواز اخو السلام يعني انسي افتهمتي
رضوى =هو انا وكفت كدام صبيحه وبتها وسلام جان موجود
وكلت لو يبقى بس سلام ما اخذه حتى لو فواز طلكني
رقيه //ليش رضوى ليش هيج حجيتي
رضوى =لان مو بس فواز ظلمني سلام ظليمته اكبر سلام مربيني ويعرف اخلاقي يعرفني كلش زين ليش ما
سمعني ما انطاني فرصه ليش قدمني للموت بيده
رقيه //وج رضوى اي واحد بمكان فواز جا سووا اكثر لا تنسين خطه محبوكه
رضوى =اي وطلعت براسي
رقيه //ادري بيج هسه انتي تبجيين وعيونج راح تعمى بس لازم تنسين وتتعايشين ويه واقعج
رضوى =رقيه ما اكدر انسى شنسى وشنسى بس اناشويه فرحت
رقيه //اي فرحينه وياج
رضوى =سلام كل الصبيحه انو هو ما يريد كوثر وراح يطلكها بس صبيحه الجلبه كلتله اكول
لكيته ويه مرت اخو
رقيه //هاي صبيحه شكد جلبه الله ياخذها
رضوى =هو يعرف بخباثتها هي وبتها عاد دز على خالته ام بهاء وخابرها وهي يمي گلها انو بس يجي فواز
ياخذ حصته ويطلك كوثر ويهاجر وج رقيه سلام يريد يهاجر
رقيه //لا تنسين انتي متزوجه وحرام تفكرين باحد غير زوجج
قطعت علي تكملة المحادثه عمتي اجت وكالت
- - يمه تكول اختك لا بعدهن موجودات هي حضرتهن وما اجه عليهن رحمن حتى توها تذكرت وطلعتهن من
الكنتور لان ضمتهن بالخانه ومن صارت الفاتحه نستهن هسه اتذكرتهن
- - هاا زين عمه هاج النقال
عمتي /:يمه سلام رضوى تكول خلي يحلوها من يم اهل البنيه شني ذنبها العالم تتدهور ويصير كاتل ومكتول
راحو وماتو ومات السر وياهم فواز عده فلوس خلي يفصلون الناس شكد ما يردون
انا بحسره ::يصير خير عمه يصير خير ( واتقربت من عمتي ) عمه فهمي بتج اي كلمه تخص فواز
ممنوع تحجي اي احد يسالها ابد تكول ما اعرف اي شي
عمتي /:وهي صدك يمه بكل شي ما تدري
وطلعت عمتي وانا بقيت اتصلت برحمن وكتله
الو رحمن
رحمن /:هلا عمي هلا بيك
::هلا بيك اكلك رحمن شنو قضية الميه وخمسين مليون الي دزك عليهن فواز
رحمن/:هاا يا ميه وخمسين
::شنو رحمن تضم علي ناسي انا هسه مسؤول على كل شي
رحمن/:لا والله عمي بس انا الله شاهد ماماخذهن
::ادري بيك ما اخذتهن بس فهمني المن رادهن
رحمن/:شوف عمي فواز الله يرحمه قبل لا يسافر الاربيل كلي شوفلي بيت مبني ونظيف
ومو كلش جبير انا هم شفت البيت ودليته على صاحبه واخذ رقم تلفونه من اجه اخذ السياره
كلي تروح للبيت تاخذ الفلوس من مرتي وتنطيهن لابو البيت وانا اجي وراك اتكاتب بس صار
الحادث وما لحكنه
::خوش عمي اسمعني هذا الحجي يبقى ابيناتنا ما اريد اي واحد يسمعه ابيناتنا عمي
رحمن/:صار تامر بشي ثاني
::لا تسلم وكل للعمال راتبهم جاري لا يهمون بشي
رحمن /:طال عمرك
::هاها عمي قبل لا انسى تعرفه ابو البيت الي راد فواز يشتري
رحمن/:اي عمي اعرفه واندل مكانه
::زين اخاف احتاج امرله
رحمن/:مي خالف يمته ما تريد كلي وامشي ادليك
::تماام الله وياك
رحمن/:سالم عمي
حسيت برحمن حصرته البجيه وانا رحت للشيخ وكتله انو مرته ما عدها علم بكل شي ولا تعرف
منو هاي البنيه
بس ما جبت طاري البيت الي فواز مشتري
الشيخ // بس السالفه چبيره وما ندري الناس شناويه
:: شقصدك شيخنا
قصدي مرته شتكول تره الناس تعبانه
جريت نفس :: عمي مرته تكول حلوها وشگد ما يردون انطو
عمي طاهر //جا هي خسرانه من جيبها يطيح على ولد الخايبه
انا باوعت العمامي وكلت ::عمي مرته قصدها تكول اتكفو الشر وهو عنده فلوس ودفعو فصل من فلوسه
من سمعو هيج الكل سكت وصارت السابعه وسوينا مثوبه كلش جبيره وجبنه قارئ والنسوان همه
قرت الهن ملايه بعدين راحو الناس وبقينا بس احنا كاعدين نتباصر ويه الشيخ شنسوي باجر
لمن ما اجه بهاء وشاورني
بهاء/:سلام امي تكول خلي يجي بسرعه
باوعتله ::ليش شصاير
بهاء /؛ما ادري هي خابرتني ومبين عليها عصبيه
انا رحت لكيت خالتي ربيعه منتظرتني بالطارمه
::ها خاله شكو
خالتي بخوف /:يمه سلام هذني اخواتك زينب وغدير هدن على رضوى يكللها اطلعي من غرفة
اخونا وانطينا المفاتيح مال الغرفه وصارن يغلطن وكله من جوه راس صبيحه تحجي باذنهن
انا بعصبيه ::يمته هذا الشي صار
خالتي/:هسه ويه ما راحت النسوان وسلمن علينه بقينا فد احنه وهنه عبالك مصبرات يردن بس يسمعن
لو كلمه
:: هو احنه بياحال وهذني شيردن
ما ادري خاله ما تسمع
دخلت للصاله شفت صبيحه وبناتها وسهير واكفات ويتبسبسن واسمع زينب وغدير
يحجن بصوت عالي وباب الغرفه مفتوح وعمتي تجاوبهن
زينب //عمه شنو هاي بتج ما تسمع يالله خليها تطلع كافي اخونا ومات شنو مطلوبين بطلابه يالله بره
عمتي //زينب عيب هذا الحجي هاي غرفتها
غدير //لا مو غرفتها وما الها شبر بهذا البيت انتي مو تنازلتي عن حصتج الابوي على مود
تتزوجين وحصة رقيه اخذتها وحصتها تاكل وتشرب وتدرس وتلبس وانوب لفت على فواز وضحكت علي
واخذته وضيعته بعد ما الها اي شي
عمتي //والله ياغدير هذا مو كلامجن شوف منو قاري باذانجن جا استحيتن اخوجن الليله السابعه
مالته وانتن تدورن غرفه ومفاتيح
زينب تحجي وتزمخ //هذا الموجود حتى بالغرفه الفوك ما تبقى
عمتي //والله بتي ما تطلع من هذا البيت وشعدجن سوون تره رضوى محترمه عدتها وما تحجي
ولا تجاوب على اي اساس تطلع
زينب باستهزاء // هههي اي مبين محترمه عدتها على مود بس تخلص تلوف على واحد وتاخذه هي الها بالساس
عمتي /:وبعد شعدجن لاتضمنا بكلبجن طلعنا وبتي هم ما تطلع
زينب /:لا تطلع ماكو نطلعها بالدفرات وعينج تشوف اخونا ومات تره كوة جنا لازمات نفسنا بالفاتحه
غدير //تطلع ما تبقى لو نخلي الما يشتري يتفرج عليها هالحقيره ضحكت على فواز وعافت سلام
لان درت فواز عده فلوس اكثر من سلام
عمتي //ولجن جا استحيتن انا عمتجن وتكولن تخلن الما يشتري يتفرج على بتي
زينب //ومو بس عليها وعليج همه بعدين تعاي اكلج انتي شعدج باقيه فاتحه وخلصت ياالله الله وياج بيت ابونا
واخونا بكيفنا نخلي الي نريده ونطرد الما يعجبنا يالله رحم الله من زار وخفف
يالله انتي وبتج طلعن بكرامتجن لا هسه تشو...
انا من سمعت هيح صحت بصوت عالي وعصبيه
::زينب غدير تعالن
الكل نز من مكانه وباوعلي وهنه طلعن جان وجهن يطي الوان كلتلي زينب /:ها خويه سلام اامر
كتلهن بعصبيه ::وين عبيجن مالت الراس
زينب بخوف وتباوع للقنفه //هذن سلام ليش
رحت اخذت عبيهن ولبستهن وكتلهن وادفع بيهن :: بره والتوصل اهنا اكطعها تكطع وادفنها بصف فواز
غدير بارتباك //سلام شنو هالحجي نريد نحفظ حقنا
لزمتها من ايدها ::ياحق ام حق ولج ادب سزز انتن شني الجن من حق وتحجن هسه بسرعه تطلعن
ما اريد اشوف جهرتجن لا بالعظيم اسوي شي محد مسوي
زينب //سلام احنا كاعدات ابيت ابونا مو بيتك من نجي البيتك اطردنا
انا بعصبيه ::لا غلطانات انتن اخذتن حصتجن من بيت ابوجن واشتراها فواز وبقت حصتي ويا واكللجن
بعد يحرم عليجن تدخلن هذا البيت ما اريد اشوفجن اهنا بس اشوفجن صدكن
ايتم جهالجن اموتجن حقيرات طايحات الحظ
سمعت عمتي عليه تكلي //لا يمه سلام اخواتك يفيدنك
درت عليها وانا اهز بايدي ::عمه شيفيدن ما تكليلي هو الليله سابعة فواز فواز النايم ع التراب الوحده
(صارت عمتي وخالتي يبجن )
وهنه يردن الغرفه والمفاتيح بعد كافي كلمن يلزم حده وخلي الحجى براسهن يفيدهن
وهسه ياالله كلمن البيتها اطلعن ما اشوفجن مو بس فواز مات حتى انتن
عمتي //مي خالف عمه خليهن ما يفتهمن عوفهن
انا بنتر ::شوفي عمه ورووح فواز ما يبقن الليله اهنا كلمه وكلتها لا اقترف جريمه ويصيرون
ولد صبار واحد بالنجف والثاني بالسجن هسه يطلعن تره المسدس بالغرفه
ام بهاء/:سلام يمه صل على محمد على كيفك يمه
انا بعصبيه ::خاله مصلي بس ما يبقن اتكفن شري وخلي يطلعن ما اريد اشوفهن
وصلت خالتي ربيعه وكلتلهن // هسه ارتاحيتن ما عدچن احترام لا الزغير ولا الچبير
زينب وغدير طلعن وهنه يبجن وصارن يحجن علي ويدعن على رضوى
ظليت انفخ وحسيت اختنكت كعدت ع القنفه شافتني خالتي صاحت
ربيعه /:يمه سلام اسم الله عليك وج كوثر جيبي ماي
انا صار كلبي يدك حيل وعركت بس ودي اكسر كل شي كدامي جابت كوثر الماي انطتني ايا خالتي اخذته
وصارت تقرا اية الكرسي والمعوذتين وشربتني شويه والباقي ذبته على كلبي وظلت تفرك بصدري هدات شويه
لمن رن تلفوني شفته رجل زينب جاوبته
::الو
- - الو سلام شبيهن البنات يبجن وعلى اساس يباتن وهنه ودن علينه يكولن نريد نروح
انا جاوبت بتعب ::اي انا طردتهن
ناصر/:ها وليش
::اكلك ناصر زينب وغدير مو اخذن حصتهن من الورث
ناصر/:اي اخذنهن بس ليش هالسؤال
::من اخذن حقهن احنا انا او المرحوم اكلنه عليهن فلس احمر
ناصر/:لا الشهاده لله انطاهن المرحوم زايد مو ناقص
::بعد باي حق يتهجمن عل مرت فواز ويطردنها من بيتها والله لو ما جانن متزوجات جا وذرتهن
اووذرت كلمن قرت براسهن فاحسن الك ضب مرتك وكل الاخوك هم يضب مرته واي حجايه
بحق مرت فواز راح يصير شي مو زين
ناصر/:سلام حقك عليه وانا زينب اعلمها وغدير الها رجل الي يوكفها عد حدها احسبها علي سلام
انا شويه هدات ::هاي هي ناصر بس رجاءا ما اشوفهن بعد لان البيت بالحقيقه بيت المرحوم اي
احد ما اله بي
تستمر القصة أدناه
اجت خالتي يمي وصبيحه وسهير صافنات خالتي كالت
خالتي/:يمه سلام على كيفك ويه روحك
دنكت وخليت اديه على راسي ::يا على كيفي ما ندري باجر شيصير ما يصير ما ادري نتكتل ما ادري نتجهول
والحبايب يبسطن ويحجن وذاك بيت ابوجن وطلعن منه مرت فواز وهنه الغبيات مصدكات ما ادري والله
واحد شايل لحيته والثاني ممتحن بيها
ام بهاء/ الله كريم ان شالله تنحل
::ان شالله خاله بس كون الحبايب يلزمن لسنتهن
لزمت ايد خالتي وصحت على عمتي عليه ورقيه هنه اجن وحجيت بصوت عالي رغم تعبان وكلبي يدك
::اسمعني انتن التلاثه تقسمن الايام شوفن كل وحده شكد تريد بالاسبوع تجي اهنا
لا تعوفن مرت فواز ابحدها
اشرت على خالتي ربيعه وكلت ::انتي خالة فواز مثل ابنج وانتي عمه مرته بتج ورقيه هي اختج لازم تتحملن
على ما تكمل عده على خير انا ما راح اجي لهنا حدي للديوانيه اتكمل العده ويصير خير
رقيه //خويه سلام رضوى تروح وياي تگعد بالطابق الثاني ويه جهالي على ما تكمل عدتها
::هاي شنو منج ام احمد اكو وحده تعوف بيت رجلها وتروح الغير بيت اذا عليه انا ما اوصل حدي للديوان البره
وصار الاتفاق كل وحده تلث تيام صبيحه من سمعت هيج حجت
صبيحه/:يا عليمن تقسمن الايام شعليها شو هي رابيه بالبيت شنو خاف يطلع الها بعبع
انا من سمعت ما جاوبتها هزيت ايدي وطلعت
ثاني يوم لازم نروح ع الناس وبدا عمي طاهر يدز ع الشيوخ وعلى ناس اجاوويد وسوينه غدا وجانت الكعده
ورة صلاة المغرب وره الظهر شيخنا راح ورجع العصر صاحلي وصاح العمي طاهر وعمي صاحب وكال النه
انو هو راح الاخوان البنيه واجتمع وياهم اخذ ويا سيد وصار الاتفاق انو اخوانها ياخذون 75 مليون وبعدين راح
السيد على شيخهم واتفقوا العشيره تاخذ 25 مليون يعني الفصل 100 ويكولون انو فواز اجه وخطبها وجانو
طالعين اتاجر بدله للمهر وعلى اساس اخوها يروح بس صار عنده شغل ومن يسالون عمامها ليش ما ندري
اخوها يكول لان متزوج راد لمن ما يعقد ويتزوجون يالله يحجي
عمي طاهر هو وصاحب تخبلو وكالو ما كو هيج شي لو صدك فواز خاطبها وعاد عليها ما كلفته 15 مليون
الشيخ كلهم //اذا ما تقبلون لازم هسه تطلعون وراح يجون يحركون بيوتكم ويجوز يكتلون سلام
لو اي واحد منكم وراح توكف اعمالكم ومو بس انتم العشيره كلها او ولدها الناس طالعه روحهم
عمي طاهر //انت شتحجي واحنا منين نجيب هلكد فلوس شنو كايلين البتهم تطلع اذا همه ما عرفوا يربونها
احنا شلنه غرض
الشيخ /:شوف ابو صلاح الناس فاير دمهم ويردولهم بس حجايه يندعون ابنكم خاطف بتهم
طاهر /:ها انوب خاطفها
الشيخ /:اي خاطفها ويمشي سريع وانكلب انا هذا العندي عمي سلام انت شتكول
انا طلعت وصحت على خالتي ام بهاء وكتلها
::صيحي عمتي عليه وعمتي قسيمه ورقيه خلي يجن الشيخ يريدهن
شويه واجن سلمن الشيخ باوعلي وعمامي ظلو صافنين سالني
الشيخ //شكو سلام صحت للنسوان
::شيخنا هاي خالتي ام بهاء وهاي عمتي ام مرت فواز وهاي عمتي الثانيه وهاي اخت مرت فواز
انت احجي كل السمعته من اهل البنيه على مود يرحن يكللها بدون لا زياده ولا نقصان
يجوز مرت المرحوم تعرف شي يفيدنا الها راي ها واسمعوني كلكلم
:: لو ادري ابيع هدومي افصل ما اريد الناس تتجهول كلها العالم عدهم عوايل وهمه ما الهم بالصار
لا نا قه ولا جمل انا افصل لو ادري اكعد بالشارع ما اريد فواز يشبع مسبه وهو بالكبر وانت
شيخنا طمن الناس الله ينطيهم وكفو ويانه ما قصرو
الشيخ/:تسلم يا ابني والله انت واخوك سباع لان ابوكم الله يرحمه سبع وفواز مع الاسف كلنا خسرنا
طاهر //اي شيخنا وكلهن شكد يردون خلي تطلع من فلوسه مو هو يتمعشك والناس تنهجم بيوتها
انا خزرت عمي وصار الشيخ يحجي كل الي سمعه وهنه راحن نص ساعه واجت خالتي ام بهاء ورقيه وعليه
- - سلام تعال يمه رايدتك
انا رحت ::ها خاله خيير
- - كل الخيير رضوى من سمعت الحجي وسمعت كلام عمك كالت
=العشيره هي التشيل الفصل شنو فواز مو النهار كله يركض لعشيره ويدفع ويوكف وياهم قابل هو وحد
بس من عرفت شنو انت حاجي وانا كتلها اهل البنيه يجوز يهجمون واحتمال يكتلون سلام طلعت الفلوس
وكالت انطيهن السلام وخلي يتصرف ويفض السالفه
انا من سمعت كلام خالتي كتلها ::خاله اخذيهن وياج للبيت وروحي وانا اجي اخذهن ما امن اهنا يبقن
وفعلا خالتي خابرت على بهاءءالي اجه وراحت وانا رحت للشيخ كتله شيخنا الفلوس حاضرات
كلي باليل من تروح اخذ بس ال 25 وياك ذنيج بعدين ننطيهن
عمي طاهر // هاا طلعت الفلوس وانطتهن ما سوت مشاكل لو فاكه حلكها بكلمه
بلكي ما تقبل على مود افوت اموتها باديه
صاحب //شحدها ما تقبل غصبن عليهاحلال وتعب ابن اخونا ومرده النه
الشيخ باوع بتك عين وهز راسه // لا صاحب تعب ابن اخوكم الاولى بي من ناحية القرابه اخو اما من ناحية
الشرع مرته وخلف الله عليها طلعت الفلوس وما صارت اتجرجر لو وحده غيرها چان كالت منيلي ومنين اجيب
وخلي العشيره تشيل الفصل
طاهر // اي مو جايبتهن من ورث ابوها كله تعب ابن اخوي
الشيخ // بس تبقى اذا ما تريد تنطيهن بكيفها
بالليل رحنا على اهل البنيه بعد ما اتصل الشيخ باخوتها جانو تلاثه واتفق وياهم وحضر
شيوخ وناس ورحنا وتم الفصل كدام العالم ب25 مليون وانها خطيبته واخوتها يدرون بس هو رادها بسكته لان
متزوج واهله ما يقبلون كال اكمل الزواج واعلنه بس القدر ما مهلهم
عمها كال/: احنا هذا الي نعرفه لكن اذا فد يوم طلع غير هذا الحجي تفصلون اربع اضعاف
وتشيلون من البصره كلها او دم كل العشيره مهدور
بعدين شدو الرايه ورجعنا من وصلنه خابرني الشيخ وكلي
- - جيب باقي الفلوس وتعال البيتي انا رحت واخذت الفلوس
واصرت خالتي ربيعه هي وبهاء اله يجون وياي حتى لو يبقون بالشارع واجو اخوتها
واخذو القلوس شيخنا راح هو والسيد ما قبل ادخل للديوان بقيت بالهول كال لان الوضع
محتقن وبقيت وانا اسمع واحد من اخوتها يكول
- - قبلنا بالجذبه على موود ما نفضح نفسنا وما نظل عار
&ولا ندمر عوايل ونكتل ناس ماالهم يد بكل هاي
&الشغله اتمنى يكون فواز او حتى هي عدلين جا علكتهم بالشارع
الشيخ هدا الامر //عمي ماتو واخذو سرهم وياهم واختك انت الي شفت اكثر من طبيب شافها
واكد عل انها بنيه ومحد لامسها ياابني سكتو واتقبلو الوضع الله ستار ويحب الساترين
وراحو اخوان البنيه وانا رجعت ويه خالتي وبهاء بعد ان تشكرت من الشيخ وخالتي ما قبلت ارووح للبيت
كالت امشي بات ويانه انا قبلت لان احس من اروح للبيت اختنك وبتت ابيت خالتي بالديوانيه وهي اجت باتت
يمي وظلت تسولف علي وتكلي
- - خاله انت لازم منا وهيج تطلع تشوف شغلك وشغل اخوك انت بركبتك عايله خطيه والعمال شنو ذنبهم
هم اصحاب عوايل
::ادري خاله ان شالله خلي تعبر هاي الفتره واشوف
ربيعه/:شتشوف بعد خالتك شتشوف اخوك اتوفى الله يرحمه وانت صرت مسؤول ومنا وهيج شد
راسك من صبيحه وبتها
انا بنتر::يولن ولا اعرفهن وين صايرات
ربيعه/:خاله سلام انا الي اعرف صبيحه دير بالك لاتاكل ولا تشرب منهن والله يسولك سحر ويخلنك
دايخ وما تندل دربك
ابتسمت على كلامها وهي هزت راسها
ربيعه/:اي يمه وما يراد اكلك الحي ابقى من الميت ورضوى صدك مرت اخوك بس هو راح للرحمه
يعني ما بيها شي اذا تاخذها
انا كعدت على حيلي وجاوبتها باستغراب ::خاله شتحجين انا اخذ رضوى لو تبقى اخر مره
ربيعه/:على كيفك يمه ولا تستعجل بس انت اهم شي لاتبين انت مهتم بيها كدام صبيحه وسهير
انا باستغراب ::خاله شمهتم اخواتي اعتدن عليها وما خلن حرمه الاخوي وانا طردتهن
ربيعه/:صحيح بس الي ما تعرفه يمه تره صبيحه هي الي قرت براس اخواتك وخلتهن يرحن
يهدن عل رضوى وعمتك
::ادري خاله
ربيعه /:هاا زين من تدري علمود هيج يمه حاول من يرحن للدوام تطلع كبلهن ولاتجي للبيت تره صبيحه
كل شي تسوي وما عدها مانع تذب جذبه وتخلي عمام رضوى يكتلوها ابني دير بالك
بقينا نسولف انا وخالتي بعدين نامت خالتي وانا بقيت صاحي ما نمت افكر بكلام خالتي
::شنو انا اخذ مرت فواز ما ترهم ومنو رضوى الي خانتني اي ليش لا على مود انتقم منها وفواز
الي لزم ايدي ويكلي اتزوجها هي شريفه وبريئه هههي شريفه وانا شفتكم بالغرفه وع الجربايه
اتزوجها لو تبقى بس هي ما اتزوجها
دخنت جگاره وكلام فواز يرن باذني وحتى كلام خالتي هزيت راسي :: ايي اتزوجها واعذبها بكد ما عذبتني
:: لا لا سلام شنو هالحجي استحي من الله اخوك امس مات وانت هيج تفكر شبي
:: شنو نسيت فواز اخوك الي راح محروم نسيت شكد دللك وهسه تفكر تاخذ مرته
صرت ابجي بسكته على فواز ما ادري على روحي واتكلب على فراشي على ما نمت الصبح كعدت وخالتي
جابت الريوك وكعدنا انا وياها وبهاء واتريكنه بصراحه انا بحاجه الهيج جو اتذكر امي وفواز من جانت تريكنا
واحنا نريد نروح للمدرسه وشلون فواز جان ما يقبل يتريك اله تجي عطاء ورضوى ااخ يافواز ليش اتغيرت
على عطاء الي تحبك وكسرت خاطرها مو جنت تكلي هي الهوى الي تتنفسه ليش عفتهاضيعتهاوضيعتني
انا صافن وخالتي حاجتني //بالله شلون سلام تمووت روحك خاله وليدي استهدى بالرحمن
لان خالتي شافت دموع نزلن عل خدي بدون ما احس اتريگت وبقيت گاعد انا وبهاء نسولف بالي صار
الضحى رحنا انا وخالتي البيتنا انا بالديوانيه وخالتي راحت جوه اجت كوثر كعدت بدون ما تسلم حاچتني
كوثر/:شنو سلام الى متى هيج مو كافي عقاب
انا سكتت ما جاوبتها هي ججت
كوثر/:يعني لا تحجي وياي لا تجي تنام بغرفتك زين مو انت تخاف من الله وين حقوقي عليك
انا باوعت الها وكتلها ::اطلعي منا لا تجي زلم
كوثر/:سلام شو ما رديت عليه
::اكلج شتردين
هي اتدنت عليه وحضنتني وهي تكلي//سلام اريدك اريدك انت وبس
هزيت راسي :: لا كوثر احنا طريقنا مسدود ولا تصدكين نرجع
هي من سمعت هيج عبالك لدغتها حيه صارت تحجي وتصرخ //
اي طبعا طريقنا مسدوود ليش لا فواز مات ورضوى كاعده مكابلتك ليش لا خلالك الجو
انا راسا لزمتها من ركبتها وصكيت سنوني ::احترمي نفسج حقيره واحجي عدل
كوثر /:انوب انا احترم نفسي ما تحاجي روحك ولا جن اخووك امس مات تفكر شلون تاخذ مرته
انا عضيت شفتي ولزمتها من شعرها ودفعتها بره الديوانيه
ايا بت الكلب اطلعي لا اقترف جريمه اطلعي ما اريد اشوفج
واخذت السويج والموبايل وطلعت رحت للسوك اخذت ملابس اليه قمصان وبنطرونات وتراكات لونهن اسود
وملابس داخليه ومناشف ورحت للمحل لكيته معزل فتحته ودخلت وسديته علي من داخل
وقررت ابقى بالمحل لان ما اطيق ارجع للبيت او الصحيح ما اريد اشوف كوثر وامها ولا احب اسمع باسم
رضوى خابرت عمي صاحب وفهمته هو ما قبل كتله احسن على مود مرت فواز هم من حقها تتحرك بالبيت
وانت خالها محرم عليها
سديت التلفون وظلبت متمدد ع القنفه لمن ما رن التلفون باوعت شفته فارس ما جاوبت بعدين رن مره ثانيه وثالثه
انوب اجاني مسج
- - ادري بيك ما تريد تحاجيني بس هالمره مضطر لان لازم نصفي امر الشقه لو انت تاخذها وتدفع لي فلوسها
لو انا اخذها وادفعلك فلوسها لازم نصفيها مثل ما صفينه صداقتنه
رن التلفون شفته فارس انا فتحت ويا خط هو بدون ما يسلم كلي //انت وين
- - بالمحل مالتي
فارس/:ربع ساعه وجايلك
وسدا حتى ما سلم علي مع العلم فارس بس سمع اجه للمستشفى وشك قميصه على فواز وغسله وياي وهو
يصرخ علي وراح للمكبره ولقنه وطيلة ايام الفاتحه وبعدها واكف على رجلي يستقبل الناس ربع ساعه ورمش
عليه وانا فتحت اله الباب الداخلي شفته لابس قميص وبنطلون لونهم اسود
هو ابرود //السلام عليكم
انا بدون نفس ::عليكم السلام
فارس //سلام انا جاي احجي وياك
::وانا اسمع
فارس /:ولو عدي عتاب عليك ومو وكته
::عتاب شنو انت مو جاي على مود الشقه انصفيها
فارس/:اي نعم بس بالبدايه لازم تفهم
::فارس انا ما اريد افهم هذا شي يخصك بس انا ما اقبل صاحبي يطلع خاين
فارس/:هاا سلام انا هسه خاين شوف ما اريد ابرر بس لازم تعرف الحقيقه يااستاذ سلام وانت لازم تسمعني
::وانا ما اريد اسمعك ولا يهمني اسمع تبريراتك لان الي صار شي ما يهمني
فارس غوركن عيونه وگلي //واذا اگلك بروح فواز اسمعني
باوعتله واتحسرت ودنگت
فارس //انا حبيت ابنيه من تخرحت هي جانت مرحله اولى وهي حبتني وانت تدري وتسالني دووم عنها وانا
اسكت ما اجاوبك لو اغير الموضوع تتذكر مو المهم اتفقنا ع الزواج لكن بين يوم وليله
البنيه تبدلت اوضاعهااخابرها ما تشيل التلفون انتظرها يم باب الكليه ما تطلع ما افتهمت القصه خليتها كلت
لازم صاير شي لمن ما بيوم قررت اشوفها واسالها ليش هيج اتبدلت وفعلا رحت الها للكليه
واتفاجئت بيها كاعده ويه عمي رعد من شافوني هي بقت كاعده بكل صلافه وتباوعلي عرفت عمي ما يعرف
بعلاقتي بيها وعرفني على انها هاي البنيه الي يسولفلي عليها ويريد يخطبها جنت اشوف الفرحه بعيون عمي
عمي الي احسبه بمثابة اخوي الجبير احتاريت شگله سكتت وانا احس بروحي مذبوح
هي جانت تضحك عليه وجانت مسويه علاقه ويانه اثنينه بس هي اختارت عمي يجوز لان احلى مني او
عبالها اغنى مني لذلك ياصاحبي سكتت وضميت هذا الشي على نفسي وعنك وبس فواز الله يرحمه چان يعرف
واتحملت بقيت بالطابق الثاني صارت تصعد وتعرض عليه نفسها تتحارش بيه اضطريت اطلع من البيت واشترينا
الشقه ومن شفتهم اجوني انا ما قبلت ارجع بس المصيبه هي بقت تتصل بيه واجت وكلتلي مجرد ما اولد اطلك
وانت تزوجني لان انا احبك ما احب عمك بس عمتني الفلوس والجاه وهسه انت ما تقل عنه
سلام انت صحيح شفتنا انا وياها بغرفة النوم انت شفتنا واكفين هي لابسه حجابها وانا ادفع بيها صحيح جنت احبها
بس ياسلام مجرد ما اختارت عمي انا نسيتها وصرت اشوفها مرت عم وبس مو انا الاخون سلام اقسم بالله هذا الي
صار وروحه الفواز ولو اريد اخون ما اعوف بيتي واجي بشقه وهسه ياصاحبي انت بكيفك انا حجيت كل شي
والله شاهد عليه انت ما تصدك وحقك بس هاك اقرا مسجاتها وشوف ردي عليها واقرا حتى التاريخ
واخذت نقاله وانا اقرا شلون تغازل بي وهو يردعها ويكلها مستحيل انتي مرت عمي
انا من قريت المسجات خجلت من نفسي ورحت يمه وكتله:: انا اسف فارس بس الموقف ما جان
بحتمل التفكير
فارس /:ولا يهمك المهم اتاكدت انو مو فارس الي يخون
حضنته وصرنا نبچي وجمع ملابسي واخذني للشقه وره الظهر كلي
- - امشي خلي نروح الكربلا نزور وبعدين نروح للنجف
::لا فارس زحمه خاف احد يجي
- - عمامك موجودين امشي روح ذب همومك واتنفس هوا نقي يالله
سمعت كلام فارس وسافرنا بالطريق خابرت خالتي وكتلها وفهمتها ما اريد احد كل شويه يخابرني
وصلنا بالليل ورحنا للفندق واخذنا غرفه وطلعنه زرنا الامام الحسين عليه السلام وصلينه وقرينا قران وبعدها
رحنا للامام العباس عليه السلام صلينه وقرينا قران انا بالامام بصراحه فقدت صرت اتذكر فواز وابجي اجه
يمي فارس وكلي
- - ابجي سلام فرغ همومك وابجي
وظلينه يومين بكربلاء قليل نروح للفندق بعدين رحنا للنجف وزرنا وصلينه وهناك تذكرت من يقررون
امي وابوي ياخذونه للزياره شلون كوه يكعدون بينا وهناك تروح ويانه رضوى وعطاء ونخلصها بس سوالف
وضحك وهنه بالسياره يلفن لفات وانا اسوق واكول جوعان على مود تجي تكعد رضوى يمي عود توكلني
وعطاء تكعد يم فواز بس ساعات امي تخبث هي تجي توكلني وفواز يم ابوي والبنات وره
رحنا انا وفارس للمقبره وزرنا القبور وكعدت يم قبر امي وابوي جان قبر فواز بعده ما مبني والنزله علي انا كعدت
بس ابجي واعاتبه بكلبي احس الكلام ما يطلع وفارس ضل يقرا قران ويرش ماي وانا ظليت ساكت وكاعد بالشمس
اريد اسوي شي ما اعرف شنو
فارس انتبهلي واجه يمي وكلي
::سلام ابجي وطلع عبرتك ابجي ياصاحبي وطلع صوتك عاتب واحجي ولا تضم بكلبك
انا من سمعت صدك بجيت بصوت وكتلهم تلاثتهم /:مو انا عزيزكم والمدلل شو عفتوني بمهب الريح
ساعدوني حملي ثكييل وانا ابحدي انكسر ظهري
بقيت ابجي واعاتب بيهم واكلهم ::شفتو فواز شسوه بيه ظليت الوحدي ما اعرف شسوي
فارس حضني وكلي /:سلام انا اخوك وياك للموت انت شتحجي
بقينا بالمكبره ومره اعاتب فواز ومره اعاتب اهلي بعدين گوه رجعنا للفندق بتنا ومناك قررنا نروح البغداد ورحنا
وبقينا يومين رجعنا جانت نفسيتي شويه مرتاحه وانا رجعت للشقه ويه فارس جنا كل خميس نسوي مثوبه ونجيب
قاري والنسوان يجيبن ملايه خالتي توسلت بيه يجن زينب وغدير كدام الناس انا كتلها يجن باحترامهن بس يخلصن
عشا يرحن
وظلينه هيج كوثر وعطاء رجعن للدوام ورضوى وحده من صديقاتها سووت الها تاجيل وانا فتحت المحلات
وطلبت من فارس يبقى ويه رحمن موقتا على ما نخلص الاربعينيه ونشوف
/////////////////////////////////////////يتبع
القصه بعد بيها احداث قويه
اتمنى اسمع توقعاتكم
////////////////////////
سلام
انا بقيت اكثر وكتي بالشقه ويه فارس وره تلث اسابيع قررت نفتح المحلات وطلبت من فارس يروح ويه رحمن
المحلات فواز رغم فارس هم يبيع ويشتري اكثر شي بالسيارات بس من طلبت منه هو ما كال شي رد عليه
- - تدلل سلام بعيني
::انت الاخ الي ما جابته امي
فارس /:وانت وفواز الله يرحمه اخواني والله شاهد
ورجعنا اول ايام ما جان هلكد شغل لان تونا بسطنه وجان يجون علينه اهل السوك يسلمون ويعرضون خدماتهم
لان فواز صاحب فضل عليهم مثل ما يكولون
جان فواز محتفظ بالسجلات بمكتبه وفارس اجه راد السجلات لان واحد يطلبونه ومحتاج يشوف السجلات
الي محتفظ بيهن فواز بالقاصه الي بمكتبه وچنت بس انا وهو نعرف الرقم السري ورحت للمحل واتلكوني العمال
خصوصا عمي رحمن يبوسني ويبجي همه من شافوني اريد افتح
القاصه فارس وعمي رحمن طلعو انا فتحتها لكيت بيها السجلات ومبلغ 6 ملايين دينار و20 ورقه وسجلات تلاثه
عفت الفلوس وانطيت السجلات الفارس وانطيته الرقم السري او وكفته على الفلوس الي بالقاصه
رجعت للمحل وتميت بي الحد ما عزلنا وانا احجي ويه نفسي :: معقوله بس هاي الفلوس بالقاصه واتذكرت
ال 1500 مليون الي طلعتهن رضوى وهو ما لحك ياخذهن وال 100 مال الفصل يعني فلوس فواز بالقاصه
الي بالغرفه
بالليل رجعنا انا وفارس للشقه فارس كلي
سلام اطلعت ع السجلات تدري فواز شكد يطلب لازم تسويلك همه وتجمع الدين تره الناس ما عدها مانع تنكر
وتاكل الدين اكو ناس لا ذمه ولا ضمير
انا كتله ::هسه انت حاول تجمع الي تكدر علي والباقي وره الاربعينيه
بعدين دنكت راسي وحجيت ويه نفسي
:: المن اجمعهن فواز خلصها بس التعب وطلع حتى ولد يشيل اسمه ما ظل ورا
تذكرت شلون لزم ايدي وكلي سلام جهالي
انا بيني وبين نفسي كلت ::يجوز رضوى حامل بس هو يكول جهالي
هزيت راسي :: هو بوكتها بالكوه يطلع الكلمه
اتحسرت ولزمت النقال وخابرت خالتي
::الو شلونج خاله
ام بهاء/:هلا يمه هلا بيك
::خاله انتي وين اذا ابيتنا اطلعي الغير مكان
ام بهاء/:لا يمه باجر الصبح اروح ليش
::خاله اريد اسالج سؤال بس ما تحسبينه غير شي
ام بهاء/ لا يمه شنو ما اعرفك اسال
::خاله هم عدج علم مرت فواز اقصد ارملة فواز حامل او لا
ام بهاء: /والله يمه انا ما سالتها بس سالت عليه وكالت لا مو حامل
::مي خالف خاله ارجعي اساليها بس الله يخليج لا تكولين انا وصيتج تسالين
ام بهاء /:صار اطمن باجر ارجعلك الخبر وما اكول انت سالتني
ظليت اباوع للسجلات شكد يطلب ناس مئات الملايين وطبعا كاتب عليهم سندات امانه يم محامي
ثاني يوم الظهر اتصلت خالتي ام بهاء وكلتلي انو رضوى مو حامل وانها متاكده من هذا الشي
سديت التلفون وانا احجي ويه نفسي
:: چا كلام فواز شنو (لملمت حلگي ) يجوز مجذبه علي وكايلتله حامل اي كل شي يصير ااااه منك يافواز
رحت وخليتني تايه ما اعرف شسوي
بقيت ادز مسواك بيد العامل ومصرف الكوثر اجرة سيارة الخط مال الكليه ومصرف الها انا ما اوصل يمها ولا
احجي وياها حتى من اجي للبيت حد السلام والف راسي وانام بالديوانيه ومن تجي يمي
حدي وياها بس السلام واطلب منها ترجع الغرفتها لان الموقف مو مال واحد ينسى كل الاحداث
خصوصا من اباوع الوجهها اتذكر كلام امها من گالت (اتهمك ويه مرت اخوك )
وعرفت بان انا ما عاقبت رضوى بقدر ما عاقبت نفسي باختياري الغير صحيح
چنت كل خميس اسوي مثوبه جبيره وبالنهار ادز واحد من العمال يجيب الفواكه وحلويات وعصائر وادز نصهن
يم فارس والباقي يمي اوزعهن على الناس الي يمنا واطلع صدقه عل روحه الناس فقراء وايتام
بالبيت يجيبن ملايه ويوزعن ثواب ومحد تتجاوز او تحجي الكل لازم حده ومترقب
التهينا بالاربعينيه جبنا قاري وسويت مثوبه عزمت بيها ناس هوايه وصيت فارس يجيب منشاه
العمامي وعوايلهم والخوالي وسياره ثانيه جبيره اخذنا بيها العمال خصوصا الي يشتغلون عد فواز لان فارس
كلي قررو اياجرون سياره ويرحون ابحدهم وانا اعرف حالتهم لذلك وصيت فارس ان اياجر الهم سياره ابحدهم
ويخلي يمهم ماي وعصير وكيك وراح ابو غدير صعد وياهم خاف واحد يحتاج شي
وانا وياي فارس ورحمن وعزوز وسياره بيها بهاء وخالاتي
وعماتي عليه وقسيمه
رضوى تبقى لان ماسكه عده وتبقى وياها رقيه وزوجهامقداد
من ردنا نتوكل اجت عمتي عليه وياها خالتي ام بهاء وصاحتلي على صفحه انا هم رحت عمتي
عليه طلعت فلوس بعلاكه وكالت
- - هاك عمه
:: شنو ؟
- - عمه هذني من تعب المرحوم تسوي بيهن مثوبه للناس الرايحه واجرة السيارات والفندق ولا تخلي شي ناقص
انا ردت احجي بس خالتي ام بهاء سبقتني
- - يمه سلام انت واخوك ماكو فرق بس هذني من فلوسه وتعبه لازم يطلع من تعبه شي وانت
ما قصرت بكل شي اخذهن يمه ماكو فرق ابيناتكم
عرفت رضوى دزتهن ردت ارجعهن بس تدخل خالتي ام بهاء وماحبيت صبيحه وعمامي يسمعون
وينطوون اراء ورحنا للنجف طلعنا بالليل الفجر وصلنا للامام زرنا وصلينا وبعدين طلعنا للمقبره
فارس هو الي ساق السياره وصلنا اشر الهم يوكفون راح يمهم كلهم
تبقون محد ينزل الى ان نروح للقبر
ونقرا الفاتحه ودعاء اهل القبور بعدين تنزلون بدون ما تصرخون انزلو سلمو واقرو الفاتحه خلي توصله بهدوء
وبعدين ما نملك بس البجي والدعاء
وراح فارس هو ورحمن وصار فارس يقرا قران
بصوت خاشع اما عمي رحمن فصار يحدث القبر ويكله
- - يا عبدالله السلام عليكم انت ترانا ونحن لانراك جئناك مشتاقين ونطلب من الله ان يغفر لك ويرحمك
ويسكنك فسيح جناته انت العبد الفقير المسكين المستكين والله هو الغني ذو الرحمه والمغفره
بعدين صار يبجي واشرلنه ونزلنا نزلت وانا احس گلبي سابقني كل ظني اشوف فواز منتظرني وهو مبتسم
وفاتحلي اديناته ويحضني وصلت شفت القبر مسيج ومبنيه قبه وصور للمرحوم من كل جانب
وهو واكف وهو يضحك وهو رافع ايده وفوك القبر ايات قرانيه ورد اصطناعي اخواتي صارن يصرخن
وخالاتي وعماتي انا ما اتحملت رحت حضنته وصرت اصرخ بكل قوتي واگله
فواز وينك اطلعلي ياخوي مشتاقلك
اسمع الكل يبچي على كلامي الي لفت نظري عطاء لازمه القران وتقرا واكفه ورا القبر وتقرا
ودموعها ما بطلن اما سهير مرت عمي صاحب جانت تبجي بحركه وشايله الجهال
وصبيحه تلطم وتنعى جان الموقف صعب صعب وانا اشوف الكل واكف ويبجي ويسولف
ويمشي بين القبور اله فواز فواز الي جانت ضحكته ماليه وجهه او صوته ومشيته هيبه هسه الكل واكف اله
هو نايم وما يجاوب احد انا اتصورت الموقف كعدت وصرت انحب بصوت عالي من شافوني الكل
سكت وعمي طاهر كال خلو يم اخو الكل ابتعد بس بقو يمي التوم انمار واخو واكفين ويباعون للكبر ويبجون
اجت سهير واخذتهم
انا ظليت اعاتب بي /
::فواز تدري شكد كسرتني تدري يافواز انا تايه بدونك ما صرت احب الناس ولا الحياة وكل
ما اقرر اترك هاي العالم واهج اتذكر وصيتك ما اعرف تره والله حيرتني وانا ما فاهم شي
خويه فواز ليش تسوي بيه هيج مو انا سلام المدلل والي كل شي اريده تجيبه الي هسه
وداعتك ما اعرف شسوي شؤ تايه وباقي بس روح خاويه ما الي خلك روحي غصبن عليه لازم
اعيش ولازم احفظ امانتك نام خويه الي تريده يجرالك رغم انت ظلمتني وظلمت نفسك وظلمت هاي
المسكينه عطاء نام خويه الله يغفر لك
بعدين حظنت القبر وظليت ابجي واجو يمي عمامي او ولد عمي وفارس ورحمن وعزوز وكوموني
اجو العمال صارو يصرخون ويبجون هذا الي يكله
عمي ابو الفوز ما انسى من ساعدتني ابناء البيت
وذاك يكله استادي الله يرحمك فلوس زواجي منك
والثالث يكله ابو كلب الطيب ما يوم عليت صوتك علينه وانت ابو المال والحلال ولا كسرت خاطرنا
وهواي كلام وهواي فواز مسوي اشياء زينه
عمي طاهر كلي //يالله بويه سلام الشمس حاره والناس تعبت
رحمن ظل ينحب حيل ويكول
- - عمي ابو الفوز شويه وتاذينا من الشمس ابو رووح العزيزه وانت جوه التراب ساكت كووم اتشاقى ويانه
واضحك علينه دگوم عمي واويلا عليك وعلى شبابك يابو ضحكة الحلوه الله يهون عليك
انا صرت انحب لان احس ما بقى بيه حييل اجاني فارس هو وبهاء وكلي //يالله سلام لابد من الفراق ولا تنسى
النا رجعه
انا كمت ورحت يم قبر ابوي وامي وصرت احچي كلام مقطع لان ابچي واشهك
::بويه يمه تره انا والله خطيه ساعدوني فواز كسر ظهري وانا تايه ما اعرف شسوي ساعدوني
يمه لاتزعلين عليه محتاج رضاج اعرف انتي ما قابله بس الي صار غصبن عليه
وراحو الكل صعد بالسيارات انا رجعت الكبر فواز ولكيت عطاء وسهير يم الكبر يبجن عطاء تعاتب بي
وتكله //ليش فواز ليش غدرتني وخنتني ويه اعز انسانه ليش خليتني مثل الضايعه وانا اشوف
اختي هي عدوتي ما لكيت غير رضوى وهسه انت هالرحت وبقينا احنا بس لا تصدك يافواز
بيوم اسامح رضوى لو اسامحك
خنكتها العبره وحاجته //مو انت ربيتني وحبيتني او وين ما تروح تكول هاي مرتي بعدين عفتني وخنتني
سهير هم تبجي وتكلها //لا عطاء سامحي هو هسه لا حول ولا قوه
عطاء /:ااه خاله سهير انا مسامحته وهو عدل والله اضحك على روحي فواز ياروحي مسامحتك
الله يسامحك
انا مسامحتك من كلبي الربي بس رضوى لا والله ما اسامحها ولو بيدي اشرب من دمها
من شافني سكتن وعطاء تناشغ وبعدها راحن وانا بقيت شويه يمه حجيت
::فواز خويه انا مسامحك ومو زعلان منك ارتاح خويه ارتاح يابعد اخوك والشي الي امنتني بي احفظه
واسوي حتى لو على حساب كرامتي نام خويه الله يهون عليك
وحضنت الكبر وكمت ابوس بي بكل مكان وانا اكله
::ارتاح ياخويه واامن خويه امانتك بركبتي بس انت لاتزعل عليه انا قسيت وياك سامحني فواز
واجوني فارس وعزوز وكوموني واجانه الدفان وسلم علينه انا سالته ::هم الك يمنا فلوس
كال/:لا كلها دفعتها ارملة المرحوم دزت مقداد وكله هذا هي سوته وانطت زايد مو ناقص وما اطلب اي شي
اتسالمنا ويا ورحت وانا بس ابجي من صعدت السياره صرخت حيل يمكن طلعت العبره الي
خانكتني بعدين سكتت
وطلعنا انا كلت الفارس يودينا للمطعم الي متفق ويا وفعلا لكيناهم كل شي محضرين اتغدو الناس الي اجو
وانا طلبت يسوون سفري كلت اوزعه بثواب اخوي انا ما تغديت لان ما اشتهي بس شربت جاي وبعدين
رحنا الكربلاء وزرنا وصلينا واجرنا فندق وثاني يوم رحنا للكوفه وبعدين رجعنا للبصره وطيلة الطريق كل
شويه انزل اجيب فواكه وماي وانزلهم للمطعم انا ما اتقربت يم اي وحده بس دزيت على كوثر وعطاء
انطيتهن فلوس كتلهن
يجوز تريدن تشترن شي
اشوف كوثر بس تخزر بيه ومتنكه وانا ولا سالتها
خالتي ام بهاء تكلي تحجي وتسمع بعليه
- - شنو ما نشبه المفروض انا اصعد يمه ماخذلي العمال ويا بالسياره ولا جني مرته
وصلنه بالليل وكلت للسايق كل واحد يوصله يم بيتهم اما خالتي ام عادل وابنها وبيت حجي مهدي نزلت
اجرت الهم سياره توديهم للمزارع لان ما قبلو يباتون يمنه
وانا رحت للشقه ويه فارس
ونمت ما دريت بنفسي الا ثاني يووم الظهر كعدني فارس وكلي
- - سلام اكعد اتغدا شنو ما جعت
انا باوعت ورجعت غفيت بس هو ما خلاني كمت دخلت للحمام وصحصحت وطلعت لكيته جايب غدا واتغدينا
وشربنا چاي ظلينه نسولف بامور الشغل فارس كلي
- - من باجر ابدي اتصل بالديانه يعني اخاف احد يتصل بيك انت فهمهم انو انا ما جاي من بحدي انت تريد تلم
دين اخوك
جاوبته ::فارس انت واحد من عدنا ومخول بالي تسوي مو كافي عفت شغلك بعد انت المسؤول عن شغل فواز
فارس/: هاي شنو منك شنو عفت شغلي ليش وكفاتك وياي شويه لو شما اسوي ما اجازيك لا انت ولا المرحوم
وبقيت بالشقه ثاني يوم طلعنا انا وفارس للشغل وصلت وتلكوني العمال وانا وصيت الهم على ريوك وبدينا نشتغل
لمن ما اتصل بيه عمي طاهر تقريبا الساعه بالعشره الصبح جاوبته
:: الو هلا عمي
طاهر /:اشلونك سلام
الحمد لله والشكر
طاهر/:اكلك سلام ما تشوف نفسك مصختها وسويتها بلا ملح
اتفاجأت من كلامه :: شنو عمي سلامات اشو حامي علينا من الصبح خيير
طاهر/:ااه هيج تحجي وياي نسيت انا عمك الجبير
:: على عيني وراسي بس خير شكو
طاهر/:ادري بابا الى متى عايف مرتك وتبات بره شنو انت ما تفهم
جريت نفس قوي :: عمي ما اله داعي هذا الحجي نسيت احنا عدنا مره ماسكه عده وانا محرم عليها
بعدين بتك جاي يوصلها مسواك للبيت ومصرف للكليه واي شي تحتاجه توصي العامل وادزه بعد شنو المشكله
طاهر/ المشكله يا سلام كوثر مرتك والها حق عليك مثل ما انت الك حق عليها
:: عمي مو وكته هالكلام تره كلش مشغول وعندي امور لازم اخلصها
طاهر/:هاا وتعوف مرتك بيا قانون هذا الي جاي اتسوي اگلك عمي اذا ما تريدها وشايفلك شوفه وخلالك
الجو طلكها بعد شكو جاي تتحجج
من سمعته اتهيأ لي صبيحه هي الي جاي تحجي مو عمي طاهر جاوبته
:: شنو هالحجي هذا مو عيب شنو خلالي الجو شقصدك
طاهر // انت فاهم قصدي اريد اعرف انت ليش هيچ تتصرف ويه مرتك وليش ما تجي البيتك
:: والله عمي همزين ما اجي
طاهر //. وليش فهمني
:: ما افهمك تگدر تسال بتك ومرتك من اجيت وبعده فواز عدل ولكيتهن لازمات مرته ويكتلن بيها حتى اديان
وياهن اسالهن شكالت صبيحه من كتلها اخذي بتج اسالهن وانوب تعال احجي وياي تره مو هسه انا وبتك
ما نتحاچى لا من قبل وفاة فواز وردت اجي واسولفلك لكن الحادث صار وبعد ما اله داعي الكلام
من رخصتك عمي عدي شغل
وسديت التلفون وانا منهار واحجي ويه نفسي ::فواز والله محنتني وما اعرف اتصرف رجال يلزم ايد اخو يكله
اخذ مرتي ودير بالك على جهالي وانا محتار وكوثر وصبيحه بدن بافلامهن
بقيت بالمكتب مالي خلك شي الظهر دزيت واحد من العمال على غدا وجابولنه وتغدينا سووا انا رحت اغسل
اجيت لكيت عمي طاهر متصل ماحبيت اتصل اشوفه شيريد لكن هو رجع اتصل مره ثانيه
اضطريت ارفعه وانا اخوط باستكان الجاي
::هلا عمي
طاهر /:هلابيك سلام
:: اامر عمي
طاهر/:سلام بويه انا عرفت كل شي وهاي اصبيحه وكويثر موتتهن وانا ابوها اكلك عمي
طلكها انا هسه راح اخذها للبيت واتانيك يمته ما تريد جيب السيد وطلكها لان هي مو مال رجل
واحترام هاي جلبه مثل امها انا ابوها واكلك لاتصير مثلي لحك على روحك
وسد النقال انا ما مصدك الي اسمعه عمي طاهر اخيرا عرفت مرتك وبتك شنو سوون وشلون اتصرفن
بوكتها حسيت براحه وانا بودي اخذ السيد هسه واروح اطلك لان بصراحه ما اطيق لا اسمع باسمها ولا اشوفها
جان عدنا شغل العصر مر عليه بهاء ابن خالتي تسالمنا وكعدنا كلي
بهاء/:سلام خالتك تكول خلي يجي يتعشى يمنا
عكفت حواجبي :: ليش شكو
بهاء/:شبيك سلام شنو شكو خالتك وتريدك لا وتكلي اذا ما تجيبه وياك لا تجي
::يا ستار قلقتني
بهاء ابتسم /:ياخي ما صاير شي تكول هو بالليل يحب ياكل عروك وانا اليوم مسويتله جيبه وتعال
و يالله گوم امشينا هو منو يلحك ع الشغل
وصيت العمال يقفلون المحلات ورحت ويه بهاء بسيارته ودزيت سيارتي بيد عزوز الفارس يرجع بيها ورحت البيت
خالتي تلكتني وجابت العشا مسويتلي عروك وكبه وزلاطه وجاي وكعدت انا وياها وبهاء وتعشينا خالتي عدها غير
بهاء صفاء وهذا صف سادس اعدادي يعني محد يشوفه وعدها بنات اثنين مروة مدرسه وصفا مهندسه واثنينهن
متزوجات بهاء متزوج بت خالي جليل وعنده منها اثنين جهال انا تعشيت ويه خالتي وبهاء بعدها بهاءءاستاذن كال
اروح ارتاح وانا بقيت يم خالتي الي قبل ما سالتها كلتلي
ام بهاء/ عرفت عمك شنو سووا بمرته وبناته
::اي خابرني بس انتي منو گلج
— انا چنت هناك يم رضوى لمن ما اجه طاهر عيونه براسه ما يشوف احد گدامه ما نسمع بس العياط
