رواية خيط الدم الفصل الرابع عشر بقلم زينب طالب
ما عَفتك تنام وأنتَ مَا مرتاح
وتنومني بسوَالف نار بيه تشب
..........
هدوء ...
_ابتسمت لهفتة علية وأنتصاري عليه
سحبت نفسي منة ونزلت باوعتلة ارمش
برائة وحچيت گاعدة بحالي ممأذية احد
شمسويتلك وتگول شليت حالك؟
:: رد عليه بصوت ذايب
جعفر :: هدوءء مو حملچ اني يبوي خفي علية
_جاي تظلمني ترةة !
جعفر :: لا مااظلمچ انتِ ظلمتيني بسوالفچ
_راح ترجع لنفس الموضوع ؟
جعفر :: لااا ماارجع الصار صار وخلينة نبدي صفحة
جديدة شگلتِ؟
_بهالسهولة؟
جعفر :: اي
_مااگدر ،تقرب گعد يمي ولزم ايدي ويحچي
بحنية
جعفر :: ليش انتِ مو تحبيني؟
_اي بس انتَ متحبني وضايج مني
جعفر :: لاتفسرين بكيفچ يبووي ماضايج منچ
اني ضجت من تصرفچ بذاك الوقت بس من
صرتِ على ذمتي گلبي برد عليچ صحيح حچيت
ويااچ بس حتى لاتكررين الغلط ذاتةة
_يعني شنوو اكرر الغلط اني حبيتك الك
وعيوني متشووف غيرك شنو على ذمتك و احب
لو اكرر الغلط مرة ثانية
جعفر :: ماگلت تحبين گلت تكررين الغلط بس
بغير اموو لأن الحياة طويلة والا اني
اعرف تربايتچ شنوو
_لا لو تعرف متجرحني بكلامك جعفر ترة
اني ماسويت لسويتة بس لأن نعجبت بشكلك
لو شخصك لو مكانتك اني نعجبت بروحك
النقية احس من اشوفك گلبي يدگ سرريع
وروحي تريد تحچي ويااك ماسويت لسويتة
اول ماحسيت بهالشعورر لاا الا تأكدت من حبي
وعشقي يلة تجرأت ولوما موضوع زواجك مستحيل
اسويهاا بس خفت اي خفت تروح مني؟
جعفر :: لو يرجع بيچ الوقت تسوين هيچ؟
_لاا
جعفر :: ليش؟
_لأن غلط واكبر غلط مو كل الزلم مثلك ويسترون
اكو يفضحون لو يعيرون واكو متمشي الشغلة وياها بستر مثل ماصار وياي احتمال انكشف واهلي يدرون
لو العالم وانفضح بالمنطقة لو انزل من عيون اهلي واكو اهل حتى يقتلون البنت فلسويتة غلط ومتندمة عليه
جعفر :: اني عيرتچ هدوء؟!
_لا متسويهاا وحتى لو تسويهاا استاهل تدري ليش ؟ لان غلطت وليغلط يتحمل نتيجة غلطة
صحيح اني ضجت من حچيت علية بس اطيتك
الحق
جعفر :: هسةة شنو؟
_شنو؟
جعفر :: نبقى هيچ كل واحد بمكان؟
_انتَ لردت هيچ مو اني مو گلت لاتطالبيني
بشي الى ان يصفى گلبي عليچ هاي اني
ماطالبة شي كافية خيري شري ومبتعدة
جعفر :: بس هسة گلبي صفى عليچ
_ رفعت حاجبي، امممم ولمطلوب؟
جعفر :: نفتح صفحة جديدة؟
_باوعتلة وأبتسمت، تقرب وحچة
بأذني همس وانفاسة الحارة برگبتي
حچاها حرف حرف
جعفر :: أريدچ...
_وأني ألك شيخ گلبي..
_رفع عيونة بعيوني نضراتة حيرتني بس تختلف
تختلف عن نضراتة قبل چانت حلوة حيل سحب
شعري شماه وغمض عيونة رفع ايدة على وجهي
ترسم معانيه صارت على شفافي مسح عليهن
برقة غمضت عيوني من حسيت تقرب وطبع
قبلة رقيقة عليهن ادية تتجول على تفاصيل
جسمي بهدووء سحبني عليه
_و أخذني لعالمة عالم مابيه غير اني وياه
عاملني مثل الفراشة بين ادية ويخاف علية
كانت من اسعد الليالي لتمر علية باسني براسي
وگال
جعفر :: هسة من صدگ صرتِ اليةة
_ابتسمت ونمت على صدرة وچانت احلى
نومة للصبح حتى للفجر ماگعدنة
فزيت عليه الصبح يحچي مخبووص باوعتلة
شكو شبيك
جعفر :: صلاة الفجرر هدووء فاتتني شوفي
الساعةة
_باوعت الساعة بثمانية عزززة، سحب المنشفة
وراح للحمام گمت من الفراش لبست الروب
وعزلت الغرفة حضرت الة ملابس دگيت الباب
صااح خليهن يمچ طلعت الية ملابس مو مال ارجع
انام بعدد
_طلع من الحمام المنشفة على خصرة وضايج
حتى ماصبح علية باوعتلة هااي شبيك؟
جعفر :: اول مرة تصير بيةة واليوم جمعة
استغفر الله شجاني
_لأن تأخرنة بالنووم الله غفور رحيم لاتحملها
زيادة ، باوعلي وگال
جعفر :: مطولة بوگفتچ اريد البس لو ابدل گدامچ
عادي؟
_يمة متت بدمي عفتة ورحت اركض الايحرجني
شگد خبيث سبحت بسرعة وطلعت لگيتة على
السجادة يسَبح مديت سجادتي وراه وصليت
من خلصت سجدت ودعيت ربي يدم هالنعمة
علية رفعت راسي لگيتة مبتسم بوجهي
جعفر :: تقبل الله
_منا ومنكم
جعفر :: تسويلنة ريوگ لو ترجعين تنامين
_لامتسوة بعد صارت فوگ التسعة راح احضر
الريوگ واگعد خالتي تاكل ويانةة
جعفر :: براحتچ يابة
_ابتسمت بوجهه وگمت لميت السجادة ومشطت
شعري ورفعتة على السريع وطلعت للمطبخ
خليت الچاي على النار وسلگت بيض هو يحبة
حضرت الصينة سمعت باب الشارع نفتح يعني
راح يجيب صمون رحت لخالتي گعدتها
_شوية واجتِ تنشف بوجهاا وتلف بشيلتهاا
صبحت علية رديت عليها گالت
ام جعفر :: اليوم جمعة ليش من وقت گاعدة
شعدنة ياامي
_استحيت شگللها اضطريت اجذب عليهاا
مو جعفر گعد جوعان راد ريوگ عاد گمت
اسويلة وگعدتچ ويانةة
ام جعفر :: اي طبعاً يجوع اذا اكلة قليل بالليل
يخاف يسمن
_هاا اي صح بهالأثناء دخل هو والصمون بأيدة
صبح على امة وگعدنة ناكل طبعهم ابد ميحجون
على الأكل الا اذا شي مهم بس خلصوا لميت السفرة
وعفتهم يسولفوون نظفت المطبخ واحتاريت
شسوي غدة رحت يمهم حاير سألتهاا
_اگلچ خالة شنو نسوي غدة اليومم، باوعتلي
وردت
ام جعفر :: اني راح تجي اختي علية واروح
وياها عندي واجب لليل يلا ارجع شوفي
رجلج شنو يريد سوي
جعفر :: وين ترحين حجية؟
_اواصل نااس يمهم وابقى عدهم لليل انتَ
اخذ مرتك طلعهاا مادام ماعدكم دوام هم خطية.
بعدهاا عرووس
_باوعلي مبتسم وگال
جعفر :: ترحين للامام الكاظم (عليه السلام)
نزور ونتغدة على عناد الحجيةة
ام جعفر :: هههه والله عليك سوالف لاعيني.
اني دائماً اروح اخذ عروستك وزورا بالعافية
_خالة اجلي واجبج وتعالي وياانة حبابة
ام جعفر :: لايووم مااگدر روحي حبيبتي
حضري نفسچ
_حچتها وراحت تبدل تقربت حچيت وياه
صدگ تاخذني نزور؟
جعفر :: ليش مجذب عليچ قبل؟
_لا بس استغربت وفرحت همم
جعفر :: دوومچ فرحانة يلة يابة جهزي
نفسچ حتى نوصل قبل صلاة الضهر
اليوم جمعة وزحمة الشوارع هيچ وقت
_ركضت للغرفة غيرت ملابسي بسرعة
ولفيت شالي سمعت خالتي اصيح علية
طلعت سلمت عليها تريد تروح راح
يوصلهاا للباب واني رجعت للغرفة
طلعت الة ملابس دخل شافني باوعلي
من فوگ ليجوة مبتسم
_كنت لابسة فستان كالعادة لأن مااحب غير.
شي ولاهو يقبل لونة ازرق سادة وشال ابيض
وحذاء بيضة وجنطة بيضة ولازمة العباية
بأيدي تقرب مني اخذ العباية فتحها ولبسها.
الية وباسني براسي وحچة مبتسم
جعفر :: من اليوم اني البسچ العباية بأيدي
احب هالشي تقبلين؟
_اقبل بس بشرط
جعفر :: شنو؟
_البسك العمامة بيدي ابتسم وگال
جعفر :: متفقين.
_حچاها وراح يغير ملابسة كمل واني عيوني
علية رحت يمة شلتها بستها وهو نزل نفسة
حتى اسيطر خليتهاا براسة واحس نفسي
مسوية انجاز رفع نفسة عدلهاا واخذ أيدي
وطلعنة من البيت و احس گلبي يرگص من السعادة
_طول الطريق ساكتين وصوت القراءن مشتغل
اريد اسولف وياه بس احسة مركز يسمع استحيت
وسكتت عيب هدوء ترة الرجال مبين ميحب البنت
اللغوية فسكتي لاتتفشلين
_وصلنة للأمام طبگ السيارة بالگراج ونزل
اخذ أيدي ومشيت وياة وکف گبال الإمام يسلم
ويحچي بگلبة مااعرف شنو يگول اني هم
رفعت أيدي اسلم
_دلاني الطريق وكلمن راح يزور دخلت مع النسوان
زرت ولزمت الشباك اتشكر من الأمام وين اجيت
ذيچ المرة وين چان حالي وين هسة يارب دومها
علية
_صليت صلاة الضهر والزيارة وطلعت لگيتة
واگفلي أشررلي وگعدنة برة باوعلي وگال
جعفر :: هدوء اسألچ ليش الأمام الكاظم(عليه السلام) لقب ابو طلبة ؟
_اي اعرف لأن الناس تطلب مرادهاا منة وتطلبة
وهو بجاها عند ربة يستجاب الهم وهم نسميه
باب المراد وباب الحوائج لأن يقضي حواجئنة
جعفر :: صحيح كلامج بسس كل لقب من الذكرتيه
مختص بشي
مثلاً
"باب الحوائج" قبل استشهادة
المؤمنين كانوا يقصدوه بدعواتهم وحوائجهم، ويشوفون إن الله يقضي حوائجهم ببركتة ودعائة.
اما بعد شهادتة الناس صاروا يزورون مرقدة في الكاظمية ويطلبون من الله عند قبرة قضاء حوائجهم فيتحقق مطلبهم.
من كثرة ما تحقق الأمنيات عندة صار لقب "باب المراد" ملازم إلـه.
أما لقب "أبو طلبة"
فإجى لأن هواي طلاب علم وفقهاء كانوا يلتفون حوالية وهو كان معلمهم وملجأهم بالعلم والمعرفة، فاشتهر بهاي الكُنية (سلام الله عليه)
_باوعتلة بأعجاب شگد حلو كلامك
جعفر :: مو احلى من عيونچ
_خجلت ودنگت سألتي
جعفر :: نگوم نتغدة؟
_بكيفك حچيتها وگام واني وراه امشي
دخلنة للمطعم اكلنة وشربنة چاي وطلعنة
بعدهاا اخذني للمكتبة قريب الأمام دخل
يتجول بيهاا اني ماحب لاالكتب ولااقراهن
هو كتب المدرسة بالشفاعات چنت افتحهن
نوب ذني
_اباوعلة يفتح الكتاب يگلب بيه يعجبة ياخذة
ميعجبة يرجعةة اشترة كم كتاب حاسبهم
وطلعنة اخذ حلويات وترب كل شوية يسألني
شنو تردين واني ارد ممحتاجة شي خلصنة
ورجعنة للبيت
_دخلنا لغروب وية الصلاة هو نزلني وراح
للجامع واني دخلت خالتي لهسة مجاية
قفلت الباب علية وغيرت ملابسي وصليت
وبقيت وحدي انتضرهم خابرت امي حچيت
وياها خلصت گمت رتبت الكنتور اضيع وقت
على ما يرجع بس كملت طلعت برة الغرفة
_افتريت بالبيت نظيف مامحتاج اسوي شي
دخلت للمطبخ احضر للعشة طلعت لحم اسوي
مخلمة خليت اللحم على النار وبديت اثرم باقي
المواد سمعت باب الشارع انفتح باوعت من الشباك
هو دخل بسرعة غسلت ادية كلهن بصل دخل من
باب المطبخ سلم رديت عليه باوع للطباخ
جعفر :: شتسووين؟
_مخلمة تحبهاا لو لا؟
جعفر :: كلشي من أيدچ طيب
_حچاها مبتسم وراح للغرفة لحگتة دخلت باوعلي
مستفهم تقربت منة مديت ايدي دنگ راسة نزعتة
العمامة بستهاا وخليتهاا بمكانها اخذت العباية علگتهاا سحبت ايدة نزعتة الساعة واخذت السبحة
خليتهن على الميز فتحت دگم الدشداشة وعيوني
بعينة نظرتة متعجبة لتصرفاتي ونضرتي كلهاا حب
_فتحت الدگم وابتعدت حچيت مستحيةد لهناا
كافي انتَ كمل عفتةة وطلعت اركض وجهي
نار غسلت بالسنگ عززة هدوء شگد جريئة بس
حبيت ادللة اريدة يتعوود عليةة سمعت صوت وشة
يمةة اللحم نشف بسرعة خليت زيت وحمستة
كملت المخلمة وغطيتهاا جهزت الصينة باوعت
الساعة بالعشرة و خالتي ماكوو
_طلع من الغرفة لابس تراك شتوي اسود قليل
يلبس تراكات اكثرها دشاديش ابتسمت لشكلة
تقرب مني فتح الغطاء يشوف الأكل
جعفر :: الريحة تجيب التايه كملت؟
_اي بس ننتضر خالتي غير
جعفر :: شنو ماگتلچ امي تبات عد خالتي متجي
اليوم
_هاا لاماادري يعني اصب الاكل
جعفر :: اي والله جعت على هالمنظر
_كملت الصينة ووشلتها اخذهاا مني وداها
بالصالة وگعدنة ناكل بيه طبع قبل الأكل يلزم.
الخبزة يبوسهاا يلة يبدي ياكل ومن يكمل نفس
الشي، بس خلصنة شلت الاكل ونظفت المطبخ
وصبيتلة چاي وسبقتة للغرفة
_مرت أيامي وياه حلوة حيل كانت عاىلتهم
مليانة بالحب والسعادة والرضى خالتي تتخلى
على الجرح يطيب كلة تصيحني لو هدوة لو.
بنتي اذا اسوي شي غلط تعلمني وتنصحني بيني
وبينهاا وتحمد بيةة گدامة وشنو اسوي تدعي
الية وكلمة الله يرضى عنچ متوگع من لسانهاا
مخلصة يومهاا بين الصلاة وقراءة القران
ومن عندي دوام تطبخ الغدة تعلقت بيها
وحبيتها حيل
_اما هو من بعد ذاك اليوم لجمعني بيه تغير
جذرياً يعاملني بكل حب وحنية صحيح لهسة
مگايل كلمة احبچ بس المسهاا بتصرفاتة
كل يوم حبي الة يزيد مينقص ويومي يخلص
بسعادة علمتة على الدلال اول ميطب للبيت.
استقبلة من الباب يبوسني براسي ومن يدخل.للغرفة
انزعة ملابسة بيدي وهو يباوعلي مبتسم حتى اذا
نرجع سوية من الدوام لازم اسوي كلشي الة يلة.ابدي
بنفسي وهو مكيف على هالوضع
_ خابرتني امي علمود عقد شفق انصدمت من
سمعت بيها تزوج هذا لمخبل لخطفهاا بس حتى
يأمن الهاا بيت حچيت وياه اريد اروح لهلي
وافق ومن عرفت الموضع عذرتهاا وحقها بكلشي
تسووي يمكن تطلع نضرتي الة غلط ويطلع خوش
رجال
_من رجعت للبيت چان ضايج گعدت يمة وسألتة
شبيك رد علية
جعفر :: هدوء صديقتچ منين تعرف هذا الولد
وشلون قبلت بيه؟
_گعدت يمةة سولفت الة شلون التقت بيه وشسوة
الهاا
جعفر :: عادي عدهاا خطفهاا ووهسة قبلت بيه
زوج الها وتأمن بيه عدها عقل بلة؟
_جعفر ترة شفق ذكية لو مامأمنة بيه متقبل لو
تعيش بالشارع بعدين الصار وياها مو قليل تريد
شخص تذب حملهاا عليه ومالگت غيرهاا لأن هواي
طمعوا بيهاا وحچيتلك ومثل منگول الغرگان يتعلگ
بگشاية وهية لگت بيه الشخص لتتعلگ بيه
بعدين انتَ ليش ضايج منةة شنو تعرفةة
جعفر :: شفتة بالمنطقة كم مرة شخص مابعينة.
احد يفوت مني يباوع ويمشي لايسلم ولايحترم
احدد وفوگ كل هذا ازعاجة للنااس سنين ومحد يتجرء يوصل للشارع مالهم بسبب تصرفاتة تدرين
اكو عالم شالت من بيوتهاا بسببة مخبلهم چان ومن
تجي الشرطة كلشي متلگةة البيت فارغ هسة صار
فترة يلة گمنة نشووفة وهم گتلچ ميحترم احدد
يمشي واحسة يدور مشاكل
_انتَ شمدريك يجوز هسة يلة رجع لبيتهم وجان
بيتهم صدگ مسكوون يعني هو ممأذي الناس
جعفر :: شلون شمدريني غير اني بعيني شايفة
يطلع الفجر ملثم ويرجع تالي الليل هم ملثم
بحيث محد بالشارع والمصيبة يطلع وصوت
القصائد بيتةة عاللي يوهم العالم هو داخل
البيت
_مااعرف احس ورة تصرفاتة شي چبير بس
شنوو هو مااعرف
جعفر :: الله يصلح حالةة ويكون گد المسؤولية
الشالهاا ومايخذل البنت
_امين يارب الله يسمع منك
جعفر :: يلة تعالي انام ورانة دوام
_طفيت الضوة وتمددت سحبني على صدرة
مثل كل يوم يقرة ايات على راسي مااعرف
ليش يبقى يقرة الى ان انام براحة
_گاعدة بالجامعة اشرب چاي راسي يوجعني
اريد اركز المحاضرة الجاية عندي امتحان واحس
روحي ماراح اجاوب مع العلم اني قارية زين
بس والله صعبة المادة وتنسيي
_رفعت راسي من حسيت اكو شخص قريب مني
باوعت نفسها البنت لسألتني شنو تصيرين من جعفر
ومن عرفت اني زوجتةة تخربطت احوالهاا هزيت
راسي مستفهمة وگفتها يمي كانت نضرتهاا خبيثة
ومستفزة نفس الوقت مدت ايدهاا للجنطة سحبت
تليفونهاا فتحتة ووجهتة علية فتحت عيني على
وسعها واني اشوف جعفر بالصورة وهية قريبة.
منةة....
....
شفق :: طلعت من الغرفة لگيت بيبي گدامي
باوعتلة متعجبة سواها مثل ماوعدني هز راسة
مبتسم ركضت الهااا شمرت روحي بحضنهاا
ابجي بيبي حبيبتي مامصدگة واگفة گدامي
شفتِ شنووو سوويت حتى اطلعچ منااك
من شفتچ بذيچ الحالة واني ليلي مانمتةة
سويت المستحيل حتى اطلعچ وگدررت
اي گدررت
_احچي ودموعي تجري وهية تمسح بيهنن و
ترد عليةة
جمارة :: شفت يروحي شفت ماقصرتيِ يمةة
شفيقة ماقصرتِ سويت لماسوتة زلم بشري
ولچ اخيتچ شلوونها حچالي رجلج ونمرد
گلبي وينهاا اشوفهاا
_باوعتلة خزرتة شلون يحچيلها سوة نفسة
يگلب بالتليفوون، بست ايدهاا اهديهاا على
كيفچ حبيبتي جوري زينة وتحسنت وين
چانت وين صارت مسحي دموعچ ودخلي
الهاا اريدچ قوية لأن حالتها مو مال احد يبچي
گدامهاا نريد نقويهاا حتى تگووم على حيلهاا
هزت راسهاا موافقة
_بس وين هيةة شافت جوري لو انفجرت بالبچي
تحضن بيها وتبچي بالگوة گدرت اهديهاا وتغلط
علة امي بودي الزمة اگطعة لأن حچة الهاا بسرعة
تداهرات وياه طلع ضايج يجيب عشة بقيت اسولف.وياها وهية تحمد بيه وترجع ليورة مدري شافت من عندة ماصارلها ساعة من التقت بيه غسل دماغهاا
_اجة جايب العشة جهزت الصينة وهو عيونة علية
واني مغلسة منةة تعشينة وبقيت اسولف وياهاا
كلساع تگلي روحي لرجلج واني اضحك عليهاا
شگد بطرانة بيبي ندگ الباب عرفتة هو گمت من
حضنهاا فتحتة چان واگف داير ضهرة علية لابس
بس بنطرون وصدرة عاري كالعادة حچيت متعصبة
_هاا شعندك تالي الليل تدگ الباب بعدين البس شي
عيب مو وحدك انتَ هناا وماخذ راحتك رد عليه
صارم :: معليچ لچ اني اعرف مو تعلمني انتِ
بعدين انتِ شعندچ هناا شوفي الساعة بيش
متجين تنامين
_لاوالله وانتَ شعليك بية اني هناا انام يم بيبي
بس لاتريد تعيش دور العرسان لاعيني لا احنة
متفقين لاتغشم روحك بعدي...
_ماخلاني اكمل سحبني من ايدي قوي وسد الباب
سحلني للغرفة شمرني وقفل الباب گمت معترضة
شيبك انتَ شبيك مو عيب هيچ سويت هسةة
شنوو يگولون علينةة تقرب مني نضراتة مو راحة
حسيت رجعت ورة لزگت بالكنتور بلعت ريگي
خايفة بس لايسوي شيي رد علية وعينة بعيني
صارم :: اشششش لاتحچين هواي زرفتي راسي
الغرفة مالچ طلعة منهاا وممنوع تنامين خارجهاا
مكانچ هنااا
_حچيت بخووف بس احنة متفقين
صارم :: واني مااسوي شي مارايدتة بس خليچ
يمي
_شنو بس لاتخاف وتريدني يمك
صارم :: اي اخاف مااگدر انام وحدي
_اي صدگتك لعد منوو چان عايش بذاك البيت
مال اشباح خزرني وابتعد راح تمدد على الچرباية
وايدة على عيونة عبالك ذكرتة بشي صااح بية
صارم :: طفي الضوة وتعالي نااامي
_اخترعت من صوتة بسرعة مثل الحبابة طفيت
الضورة ورحت بطرف الچرباية تمددت ولفيت روحي
لف بالغطاء خايفة منة عيوني علية صدرة يصعد وينزل يتنفس سريع شبيه بسرعةة تغيرر مودة شحچيت وياه قابل اوووي هسة شعلية بيه خليني
انام احسلي
_غمضت عيوني انام شوية وحسيت ايد نمدت علية
فتحت عيني واخترع الگاه گبالي وجهة قريب من وجهي ردت اگووم سحبني على ايدة وقيد حركتي
وايدة على حلگي مااگدر احچي قيد رجلية بين
رجلية و حضني بأديه قوي فتح حلگي حچيت
متضايقةة
_صاارم شبيك عوفني ترة عيب عليك هالسوالف
شنوو مشبگني وخرر مني اريد اناام لاتخليني
اطلع من الغرفةة حچة بهدوء بأذني
صارم :: من اليووم مكانچ هناا نامي بدوون اي
اعتراض
_مو هية بكيفك عوفني اگلك لاتلزگ وخرر مني
ولاچنة يسمع غمض عيونة واني ادردم واحوسس
اريد اووخر وهو مغلس شكيت بيه ناام استسلمت
وهدئت بصعوبة يلة نمت احس نفسي متقيدة مناا
قربة مني ومناا مقيدي بس بالأخير نمت لأن تعبانة
_گعدت الصبح لگيتةة ماكو رحت لگيت بيبي
گاعدة سألتهاا عليه گالت طلع سويت الريوگ
وگعدت جوري اكلنة سوية وگمت نضفت البيت
بيبي سوت الغدة لل2يلة رجع سلم ودخل ملابسة.
مصخمةة دخلت للغرفة لگيتة يجهز الةة هدوم
سألتةة وين چنت؟ رد علية
صارم :: بالشغل وين يعني
_ياشغل ليش انتَ شنو تشتغل
صارم :: بنچرچي
_لاوالله احچي بدون استهزاء
صارم :: والله شبيچ عندي محل تصليح سيارات
_يا والله عبالي گاعد عطال بطال باوعلي صفح
رديت عليةة لاتباوع هيچ شمدريني بيك اشم
ايدي قاابل انتَ غامض ومتسولف
صارم :: ليش انتِ سألتيني وماگتلچ فالحة بس
تصيحين وتطولين لساانچ
_حچة هيچ وطلع ياا اني هيچ بسيطة اني اعلمك
طلعت من الغرفة جهزت الغدة اكلنة كل احنة سوة.
هو راح ناام بالغرفة واني بقيت يمم بيبي
_بهااي الفترة اقترحت علية يشووف دكتور
نفسي لجوري ووافق اخذتهاا كل جلسةة تطلع
النة منتهية من البچي ومن اشوفهاا هيچ اذب حرگتي بيه چان يتحمل كلاميي لجارح الةة
وما يجاووب بيووم لحچت جوري حسيت الدنيا ماوسعتني من الفرحةة
_ابوس بيهاا وابجي وصوتي عاالي فشلني
بوقتهاا من رجعنة على البيت لحگتةة چاان يبدل
انتَ شبيككك ها شبيك ليش هيچ تسووي غير
فرحانةة بأختي واذا شبگتهاا گداام الناااس شنوو
شابگة صااحبي قاابل
_ندار علية لزمني من ايدي بقووة وحچة بعصبية.
صارم :: حاسبي على كلامچ وصلت حدهاا ويااچ
ترة لاتخليني اگلب عليچ فااهمةة
دفعني وطلع من الغرفة ضاايج، گعدت بمكاني
نقهرت عليه چني زودتهاا وياه بس شسووي
اي تصرف منة ينرفزني موبيدي طلعت برة
هو بالحمام واني رحت يم جوري بييومهاا
اجت هدوء تونسنا وياهاا لليل نام داير
وجهه زعلان مني بقيت بمكاني احووس
بلكت يحچي شي حتى لوو يرزلني بس
لايبقى سااكت بس وين ولا چنة يسمعني
_يومين مرت وهو مامعبرني صارت سالفة
جوري ويردون ياخذون اقوالهاا ماعافها وحدها
وگف ويااهاا وگفة اخ چان حاير بينةة يطلع
من الصبح قبل لااگعد مايرجع الا لليل ومرات يرجع
الضهر ينام ويطلع العصر ابد ميدخل للبيت وادية
فارغة لازم جايب شي وياه چانت بيبي من شوفني.هيچ وياه تلووم بيه وتحچي عليةة تگلي
لاتخسريه مبين يحبچ والا شنو جابرة شايل مسؤوليتنة وحاير بينةة
_صفنت بيني وبين نفسي صدگ شنوو جابرة؟
يشتغل ويتسوگ ولماني اني واهلي بعد ماامي
الطالعين من گلبهاا طردتنة بالشارع وهو وگف
ويانةة ياترى يستحق مني هيچ اعاملة لمت
نفسي وحسيت روحي مصلحچية وگاعدة استغلةة
وهو حتى كلمة حلوة مسامع مني عندي
_باليل بعدما خلصنة العشة دخل هو قبلي للغرفة
واني بس خلصت لحکتةة متمدد يباوع بالتليفوون
تقربت گعدت بصفةة مديت ايدي اندهة رفع نضرة
علية ورجع يباوع مامعبرني حچيت
شنوو بعدك ضاايج مني ترة ماسويت شيي
ليش تتزعل هواي
صارم :: مضاايج
_لعد ليش هيچ تعاملني؟
صارم :: انتِ تردين هيچ واني لبيت رغبتچ
_بس اني مااردت هيچ
صارم :: انتِ متعرفين شنوو تردين شفق
_صاارم لاتحچي وياي هيچ حباب
صارم :: شحاچي انتِ ردتِ بس اشيل مسؤولية
اهلچ ومااتقرب منچ واني لبيت رغبتچ لأن الصراحة
تعبت منچ وكرامتي ماتسمح اليةة بعد اذل روحي
اكثرر من هيچ
_بس انتَ ممجبور بينةة وليش تذل نفسك ترة
ماگتلك شي اني بس انتَ كبرتهاا باوعلي بستهزاء
صارم :: صحيح اني غلطان اني مو بس على هذا
الموقف لاا سوالفچ كثرن شفق بكل مرة تفشليني
وتصديني وكلشي يصير تذبي براسي وكلامچ
وياي كلة جارح وماطايقتني فضلت اسحب
روحي منچ و احفظ الباقي من كرامتي احسن الية
_صارم لاتحچي وياي هيچ ترة دتحملني الذنب
والله لبية كافيني تقرب مني عينة بعيني يحچي
محروگ كگلبة
صارم :: مو مثل البية مايجي ربع البيةةة بس
من دخلتِ حياتي عفت كلشي وراي وگمت لعيونچ
حاولت اتناسى كلشي لخاطررچ بس انتِ مگاعدد
تساعديني مجاااي تنطين لنفسچ ولاالية فرصةة
نداوي جروحنةة سووية كلة عندچ عركةة
وطول لسااان
_حچيت واني گلبي محروگ على حالة شنوو
بيك گلي اني مو حچيتلك كلشي ليش
انتَ مصرر تضم عليةة هاي وحدة من الأسباب
لتخليني ابتعدد عنك وهو الغمووض العايش بيه
مااعرف شي عنك اني شلوون تريد مني اعيش
ويااك مثل اي زوجين واتقبلك عاادي ليش
متنطيني العذرر صاارم
صارم :: شنوو تردين تعرفين البيه ماينحچي
والله ماينحچي ليش تفتحينن جروحي ليشش
_احچيلي واني اداوي جروحك ذب حملك علية
واني اشيلةة افتح گلبك صاارم احچي وبردد گلبك
احچييي بداعتي اذا صدگ تحبني سولف اليةة
وجعك صفن بوجهي شوية واني اباوعلة
رجع راسة على تاج الچرباية وغمص عيوونة
بقى فترة طويلة هيچ وعيوني تراقبة للحظة
ضنيتة ناام بس من بدة يحچي ركزت ويااه
فتحت عيوني وگلبي على كلامة
صارم :: من يوم لكبرت وشبيت حبيتهاا اول
وحدة دخلت لگلبي هية چنت أشوفهاا ملاك
نازل من السماء اغلاطهاا عندي مثل العسل
على گلبي مايوم صحت عليهاا ولايوم رفضت
الها طلب شنو تگول وشنو تريد يتنفذ بس
تخرجت ركضت لأمي گتلهاا يلة يمةة امشي
نروح لخالتي ونخطبهاا اني ووعدهم بيوم
تخرجي اخطبهاا مااگدر اخلف وعدي ويااها
_امي اخخخ امي چانت الدنيا مسايعتهاا
راح تزوج ابنهاا الچبير من بنت اختهاا ووحيدة
اهلهاا بنفس اليوم لتخرجت بيه خطبتهاا ووافقت
بسررعة واهلها هم وافقوا كلهم چانوا شاهدين
على حبي وهيامي بيهاا ماطولت الخطووبة
اقل الشهرر وتزوجنةة چانت بعدهاا طالبة
لأن هية اصغر مني اخذهاا بيدي للدوام وأرجعها
شنوو تريد اجيب الهاا سويتلهاا عررس مامسوي
احد لامن اهلها ولامن اهلي حالتنة زينة أبوية
عندة محلات تصليح السيارات واني أشتغل
وياه ومن توفة شلتهن اني مات ابوي
قبل واني بعدني مرحلة اولى شلت المسؤولية
اني ماقصرت لاعليها ولاعلى اهلي بشي
_اخوووي ولچ اخووي دللتة مااخليه يشتغل
اکول صغير بعدة صاار بزر دلال مخلصهاا اكل
ونوم وسفرر ماچنت احاسبة من حبي الةة
وأمي هم متقبل حتى لو اعلمة ماترضة علية
نجح من السادس بالشفاعات ودخلتة نفس
الجامعة لبيها بنين (زوجتة) اشتريت الةة
سيارة هدية نجاحة ومن بدة يداوم صار
ياخذ بنين وياه ويرجعهاا چنت ملتهي بالعيشة
اريد اعيشهم احسن نااس اطلع من الصبح ارجع
تالي الليل المحلات كسرن ضهري مااشتكي
وااگول غصباً علية هذا واجبي وذولي امانة.
ابوي عندي وكل هذا ماقصرت وياها والله بالسنة
مرتين اسفرهاا والله ادخل للبيت واطلع ابوس ايدها مو ضعف لاا من كثرر حبي الهاا امي واخووي چانوا شاهدين على حبي بسسس
_اختنگ ماگدر يكمل نهضت بسرعة ترست گلاص
مي شربتة الة باوع بعيني وعيونة تلمعع ماردت
احرجة لزمت ايدة اقوي كمل صارم كمل
صارم :: حبلت بنين وفرحتي مااطيتهاا لأحد
زادد دلعهاا علية وزدت بدلالي الهاا حتى خدامة
جبت في سبيل ماتتعتب لاهية ولاامي ولدت
ابني(سند) شفق يخبل چان حلووو حيل حلوو
ارجع من الشغل بس اخليه على صدري يرووح
كل تعبي كبرر وعمرة صاار سنة وبدة يمشي
احسةة يمشي على گلبي
_بهاي الفترة حسيت بنين تغيريت علية حيل
صارت تتذمر مني وتتشكة مااعرف شلون ارضيها
حتى ماتخليني اتقرب الهاا تنفرر مني حرت شنوو
اسوي وياهاا صدمتني بيووم اخذت ابني وراحت لهلها وانصدم منهاا
طالبة الطلاااگ ليش مااعرف اخذت امي وتوسلت
بيهاا يلة قبلت ترجع اسألهاا شبيچ شغيرچ علية
ترد عوفني مااريدك مااحبك واني اگلهاا حالتچ
تعبانة واعذرهاا وماشكيت بيهاا ولو واحد بالميةة
لأن ماجبرتهاا علية هية رادتني وحبتني همم
_بيووم طلعت من البيت الصبح بعد مااخوي
اخذهاا للدوام وسند بقى يم أمي وصلت للمحل
بس احس تعاابن گلبي ينغزني وجهي صاار اصفر
مااعرف شنوو صارلي وگعت من طولي التموا
علية العمال وجبروني ارجع للبيت بعد ماصحيت
سمعت منهم ورجعت وياريتني ميت ولاذيچ
الشوفة لشفتهم بيةة
_فتحت الباب بالمفتاح لعندي واتفاجىء بسيارة
صمد اخوي موجودة بالگراج عفت سيارتي برة
ودخلت للبيت چان هدوء امي ماتگعد هسةة
لگيت العاملة بوجهي شافتني وخافت استغربت.
شبيهاا هااي ماحچيت وياهاا رحت بوجهي للغرفة
فتحت الباب وانصدم بذاك المنظر ادفع عمري
كلة بس حتى انسى ويروح من بالي
_زوجتي واخووي على فراشي مايسترهم شي
غير الباب شافوني انصدموا حاروا شلوون يضمون
دنائتهم بقيت اباووع الهم وعيوني ماترمش من
الصدمة تمنيت لبيه اني حلم خيال اوهاامم بس
لاصدگ الگدامي مرتي الخاينة واخووي الغدار
_گلبي صاار يدگ براسي اريدد اسيطر على نفسي
مااگدر وگعت من طولي حيل اسمع امي تحچي
وياي مااگدر ارد عليهاا عيوني مفتووحة تباوع
عليهمم كلها مجرد دقايق وغبت عن الووعي
صارت عندي ذبحة چان بيبني وبين المووت
شعرة وحدة مااعرف شگد طولت بالمستشفى.
وطلعت بس صحتي رايحةة رجعت للبيت واني
ناووي عليهم اقتلهم مااطلع صارم وطالع من ضهر
ابوي اذا ماكتلتهم بمكان جريمتهم لسووهاا بغرفتي
_وصلت للبيت دورت عليهم ماااكو البيت فارغ
محدد بيه ركبت سيارتي ورحت لبيت خالتي.اكيد
الگاهم هنااك دخلت مالگيتهم بس أميي رحت يمهم
سلاحي بيدي صحت بصوووت
:: وينهممم يمةةة وين راحووا طلعيهم من جووة
الگااع ولچ يمةة اخوي طعني بضهري ومرتي ام
ابني خانتني على فراااشي ويةة اخووي بس
گليلي وينهم اريدد ابررد ناار گلبي يمةةة
احچي احچي لاتسكتين اهزز بيهاا اريدهاا
ترد عليةة صافنةة بوجهي متحچي تقربت
لخالتي
_بنتچ ووين وينهاا طلعيهاا لاتخليني اكتلچ
بدالهااا احچ
ي
ردت علية اميي
"لاتعب نفسك هاجروا من العراق"
_هاجروا ؟! شلوون وثارري يمة وگلبي شلوون
ابررد نارة ابنچ غدر اخوو يمة ردت وعينها بعيني
:: اخووك حبهاا وهية حبتة عمرهاا ماچانت
تحبك بس انتَ چنت معمي بحبهاا ومتشووف
رادت منك تعوفهاا وانتَ اصريت ترجعهاا هاي
سوت لتريدة وعافتك انساها صارم انساهاا
بنين سافرت واخووك وياهاا طلگهاا وخليهم
يتزووجن واني ازوجك اغاتهاا
_چانت كلماتهاا سچاچين وتنبتهن بگلبي لاراعت
رجولتي ولاكرامتي ولاحالتي الصحية لچنت
بيهاا اطتهن الية دفعة وحدة حچيت بخيبة.امل
_هيچ بسهوولة بسهوول اطلگها واخووي يتزوجها.
عاادي عندچ يمةة
"اي عاادي الصار صار مانگدر نغيرة تسووي.
الأگلك علية لو اغضب عليك شنوو تريد تكتل
اخووك تخبلت صاارم
_ولچ لاتسودنيني يمة لاتسوودنيني اخووي
دااس عرضييي وغدررني يمةةو شلوون تريديني
اعووفة والله اكتلة واكتلهاا ويااه وگلبي ماييبرد
هممم اخخخخ يابة الا اشررب من دمهم وعينچ
تشووف، تقدمت منني تحچي متعصبة
" انتَ عقلك شخط ومستحيل تصحى بعد
اني اسافرر ويااهم وخلي خبالك يفيددك
_ابني وينةة ابني يمةة لاتگليلي اخذووا
"لعد شتريد تعووف ابنهاا اي اخذتها واذا تضل
بهذا عقلك تحلم تشووفة بعدد يريد يقتل اخوو
علموود مرتةة الله يطيح حضك
_عافتني وسط صدمتي ودخلت جوة امي
عقلهاا مغسوول فضلت اخووي علية وتغاضت
عن غلطة الچبير بحقي وبحق نفسةة اخوزي
لغدرني وزنى بمرتي سامحتة واني تحچي علية
مرتي لخانتني واخذت ابني مني مالامتهاا وذبت
الصوچ بيةة يعني شنووو امي هم غدرتني مثلهم!
_زين ليش شنوو سويت حتى استحق كل هذا
خيانة وغدر وفراق ابني وحرماني منةة بس موصارم ليسكتت لاا مستحيل اسكت
_ايام واسابع ادور اريد اعرف بأي بلد سافروا
ماحصلت اي خبرر امي غدرتني وسافرت وراهمم
هية وبيت خالتي محددد بقى وياي ومحد نصفني
وانطاني الحق مع العلم اني المغدوور ليش هيچ
سوو مااعرف
_دخلت للبيت بعدما ماكان يشع بالحياة صاار
يقبض الگلب دخلت للغرفة هناا دللتها وهنا
بستها هناا تشاقيت ويااها ماغزرن كلهن بيهاا
ماعرضتلهاا عيوني وهية تخوني على فراشي
وية اخووي
_تعبت وتمرضت دخلت مستشفى گلبي تعب محد
عندي من اهلي ولاگرايب حالتي زادت سووء
صرت اي احد اشووف اتعارك وياه واضربة
دخلت سجن لأن اشتكووا علية تخبلت صرت
اضرب المساجين لوياي افلش اكسررر ملو مني
لافاد انفرادي ولافاد تعذيب دخلووني مستشفى
مجانين شفقق صرت مخبلل صاروا يطوني
مهدائات تعبن عقلي حيل سنةة كاملة يلة
طلعت منااك بعد مااثبتت اني مابية شي
رجعت للبيت حبست روحي هنااك صارت
القصيدة سلوتي اشغلها وابقى استمع بيهاا
احسهاا تشرح حالتي
تجيني ساعات اكسرر البيت
العالم يجوون يدگوون الباب ارعبهمم صاروا
يصحون لبيتنة مسكوون من كثرر الازعااج
الأسوية نااس باعت بيوتها من وراي، حتى الشرطة اجت بس.گدرت.
اضم نفسي منهم قفلوا الباب من برة محد تقرب صرت اتلثم واطلع لازم اشتغل فتحت محل واحد
ورجعت اشتغل وحدي مودائماً كم يوم اشتغل اطلع مصرفي وابطل امي غدرتني شفق مثلهم
وماسألت عني بعدد شگد دورتهم ردت خيط
يوصلني الهمم ماكو ابني هسة شكبرر وشگد عمرة مااعرف
_الى ان شفتچ كم مرة الگفچ توگفين گدام البيت
سويت الچ كمين ووگعتچ بيه وعرفت انتِ كل
يوم تمرين مناا شكيت احد دازچ عليةة خفت
منوو يراقبني محد يعرف اني هناا لو رجعت
محد يعرف شنوو الصار بهذا البيت ووين راحوا
اهلة بس من شفت عيونچ نسيت كلشي
_نسيت اني منوو وشنو صار اليةة بقيت.
افكر بيچ وگلبي تعلق بيچ يمكن تگولين تبالغ
وين اكو احدد طالع من هيچ صدمة يحب
واني ويااچ ماتخيلت بيووم من الأيام احب
لو ااتزوج بس الله زرع حبچ بگلبي حسيتچ
العووض لچان مضموم اليةةة
_يحچي واني دموعي تنزل وياه شلون متحمل
كل هذا وشلون گدر يعيش تقرب مني يسمح
دموعي شمرت نفسي بحضنةة ابچي بكل قوتي.واحجي شنوو انتَ جبل صاارم جبل
ومتحمل كل هذاا شلوون گلبگ ماانفجر گليي.
شلوون گدرت تعيشش بعد كلشي مريت بيه
_اني اسفةة والله اسفةة مااعرف انتَ
هيچ واني اضغط عليكك سامحني الله يخيلك
سامحنيي مسح على ضهري وصار هو يهدي.بيةة
صارم :: مااگدر اگلچ اني طلعت من حالتي بسرعة.
طولت سنين ولوما انتِ يمكن لهسةة بعدني بذاك
البيت صحيح اتناسى بس مسحيل انسى غدرهم
وخيانتهم اليةة الا مايجي يووم واحاسبهم
وابني يبقى غصة بگلبي لعمرر كلةة ماارتاح
اذا ماالگاه
_يعني هسة انتَ ماعرف بأي بلد همة معقولة
صارم :: ماعرفت ولاخليت شي ماسويتة
ماعرفت وين همةة فص ملح وذاب بس الا
مايجي يوم واحضى بيهم
_بس اني مااريد تلگاهم
صارم :: ليش؟
_خاف تسوي شي ويسجنوك واخسرك شنو
احصل اني
صارم :: خايفة علية؟
_لعد شلون مااخاف غير زوجي ابتسم بوجهي
وسحبني عليه عصرني بحضنةة والغريبة اني
بادلتة مااعترضت ولا تذمرت مثل كل مرة
بقيت الليل كلة نايمة على صدرة وافكر
_بيه شلونن گدر يشووف اخو وزوجتة لو
غدر امةة الةة ووگفتها بجانب اخوو ضدة
لو فقدان ابنةة ومايعرف بيه وين الله
عينة شلون تحمل
_الصبح گعدت قبلة لازم اغير اسلوبي وياه
كافي بعدد ماقصر وياي والزمن لاعب بيه
طوبة واجي اني ازيد حملةة غسلت وصليت
وطلعت بيبي وجوري نايمين لهسةة عفتهم
بعد ووقت حضرت الريوگ ورحت اگعدة لگيتة
گاعد يبدل صبحت عليه ردد علية وگال
صارم :: ليش گاعدة هيچ وقت ؟
_حچيت خجلانة سويتلك ريوگ فتح عينة متعجب
صارم :: صايرة حبابة شعجب
_هو اني حبابة من زمان بس انتَ ضالمني، هسة
عوف الحچي وتعال اكل
صارم :: يلة سبقيني جاي وراچ
_طلعت وعفتة خليت الصينية على الميز
وگعدت انتصرة شوية وطلع يعدل بشعرة
گعد ياكل اباوع عليه شعرة كلساع ينزل
ويرفعةة رفع عينةة شافني اباوعلة
غمز وگال
صارم :: هاا حلو
_اكل واسكت ميصير تحچي على السفرة
صارم :: اممم ادللي بس تدرين شفق ميلوگ
الچ هالدور رجعي مثل قبل
_تدري مو صوجك صوچي اني عفت نومتي
العزيزة وگلت اسويلك ريوگ وادللك نفس النسوان
بس انتَ الااطلع الجني الجواي يلة ترتاحح
يلة كمل واطلع واعتبر هذا اخررر ريووگ الك
عغتة ورحت اسمعةة يضحك ويصيح
صارم :: اي هااي شفق الإعرفهااا احبچ بكل
حالاتچ البرعةة
_ رگعت الباب ادردم عليه متصريرلك چارة ابد
خليني اناام احسن اليةة مو مال دلال الزلم ابد
لفيت راسي ورحت بالنووم
_مافزيت غير علية ينفخ بأذني فتحت عيني
وحچيت هاا اجيت؟
صارم :: لابعدني، شنو السالفة شعجب لهسة نايمةة
غير تجهزين الغدة لرجلج الحمام شلون زوجة كسولة
انتِ
_غير سويتلك ريووك اختار تريد غدة لو ريوگ
لاتصير طمااع
صارم :: كلشي مااريد منچ جمارة مسوية خوش
دولمة ريحتها تجيب التايه گومي غسلي حتى.
ناكل
_شنو جمارة حااف عيب انتَ شايل الالقاب شو متستحي
صارم :: هية راضية لاتدخلين يلة گومي بطني
تقرقر من بيضتج المالحة الصبح وجايچ المحروگ
كلشي ماخليت بحلگي بعدد
_نهضت معترضة اني وكوشتي هااي فوگاهاا يعني
يلةةة همةة گالوها سوي زين وذب بالشطط
شوف بعدد منو وتسويلك ريووگ
_عفتة وطلعت من الغرفة غسلت ورحت يمهن
بيبي تصلي وجوري يمهاا غير تگعدني ليش
عايفاتني نايمةة
جوري :: ردت اگعدج بيبي ماقبلت گالت خليها.نايمةة ما عدنة شي
جمارة :: يلة هسة گعدتي صلي وتعالي صبي
غدة رجلج جوعان خطية
_اي ادللي انتِ وياه رحت صليت وطلعت اصب ىالغدة اجتمعنة كل احنة سوية طبخ بيبي يخبل
لايعلى عليه اكلنة الدولمة وكلساع صارم يذب
الها حچاية يخليهاا تحچي واني وجوري نضحك
عليهم
_مرت الايام بدون اي جديد جوري تمارس
حياتهاا وهدوء تخابرني مستقرة هية والشيخ
واني وصارم يوم اصحاب وعشرة من الروس يحب
يستفزني واني اطلع لساني عليه بس من بعد العرفتة
عنة صرت مااطول لساني وياه ولا اضوجة هواي
لو شگد مانتعارك من ينتهي اليووم يسحبني
وينومني بحضنة
_اليوم رجع صارم من وقت لحگتة للغرفة حسيت
عندة شي يريد يگولة احيت يمة سألتة شبيك
رد علية وواحس نهد حيلي من السمعتةة...
شكرا لزيارتكم عالم روايات سكيرهوم
