رواية دخيل في بيتنا الفصل الخامس عشر بقلم جمانه السعيدي
علي....ليش تكسرين كلامي اني مو كلت مااطلعين
شنو انتي تتصرفين بكيفج
لو تردين تمشين كلامج عليه
حلوه هسه كلهم يكولون مرتك وكحه وماتخاف من اي واحد
احنا مو تناقشنا بهذا الموضوع واني كلت لا
يله جيبي ملابسج والجهال وخل نرجع للبيت
لازم تعتذرين من امي وابوي
سعاد....كنت اردد بداخلي لازم اكون قويه مستحيل اضعف هاي اللحظه هي اللحظه الحاسمه
مستحيل ارضي اي احد على حساب نفسي علي اكثر واحد يعرف اني مامرتاحه بيت اهله
علي....يله جيبي الجهال والغراض خل نرجع
سعاد...اني مااارجع
فتح عيونه حيل مستغرب من ردة فعلي
علي....شنو
سعاد...سمعت كلش زين انت اكثر واحد تعرف اني مامرتاحه بيت اهلك
ولا تكول ماادري صار ست اشهر اتوسل بيك
بس انت رافض اني الصراحه هذا حدي
تريد تجي تعيش وياي هنا ونتعاون على الحياة اهلا وسهلا
تريد ننفصل ماعندي مانع
ننفصل بطيب خاطر انت ابن عمي واني احترمك
علي....انتي واعيه شجاي تحجبن
سعاد.... ماكنت واعيه بحياتي بكد هاي اللحظه
فكر على كيفك ورجعلي خبر
بس رجعه مراح ارجع
بكيفك قرر لو اني وجهالك لو اهلك
الك القرار الاخير ومهما كان قرارك راح احترمه
جمانه السعيدي
علي....لا تتهورين اني بعدني احبج ومراح اكدر افارك الجهال اصبري سنه سنتين ونطلع بيت وحدنا
الاجازه الي تجي اني اسرح من الجيش
بس اسرح ادور شغل ونجمع الفلس على الفلس ونطلع
سعاد....ماارجع لو تقتلني خلاص هنا ماارجع بعد
كافي تحملت هوواي صبري خلص
بشرفك هو هذا حالي من ازوجنا
شوفني عبالك كبرت خمسين سنه مو خمس سنوات
علي...هذا اخر كلام عندج
سعاد...اي
علي...شوفي الجهال شحالهم
سعاد...ازمه وتعدي راح اشتغل ومااخليهم ناقصهم شي
علي...ارجعي وياي هلمره واني اوعدج مراح اخلي احد يمر بيج
سعاد...شبعت من هذا الكلام اني اريد اعيش كافي
شبعت جوع واذيه وحجي ومهانه
اني اربد اشيل مسولية نفسي
علي...ماترجعين
سعاد....لا
طلع علي وطبك الباب
اني متأكده راح يرجع علي يحبني ومستحيل يكدر على بعدي ولا راح يكدر يفارك الجهال
دخلت الجهال وطبختلهم تمن وعدس اتعشينا
اجا أكرم يطمن على الوضع
حجيتله كلشي صار بينا
كرم....اكيد انتي متوقعه هذا التصرف منه
سعاد...جاي يكابر اكيد راح يرجع
نمنا اني والجهال وأكرم بات يمنا
ثاني يوم الصبح تقريبا الساعه بلعشره الصبح
اندكت الباب
فتحته علي جايب مسواك للجهال
دخله بدوم مايحجي اي كلمه ولا سلم عليه
دخل المسواك وراح
جمانه السعيدي
زين على الاقل حاس بلمسوليه اتجاه الجهال
العصر أكرم اجا كال علي دزني يربد الجهال خالتي تريد تشوفهم
بدلتلهم واخذهم خفت شويه خاف مايرجعهم
بعدين كلت لا علي مستحيل يحرمني من جهالي
للمغرب رجعهم علي مشتريلهم ومرجعهم
بقا بس يومين من الاجازه
اني اعرف علي كلش زين مايكدر يتحمل مايشوفنا اني والجهال
بس حاسب حساب اهله
اذا اجا كعد ويانه اهله راح يقاطعونه
راح يكولون ماشا ورا مرته وعافنا
وعلي كلش متعلق بااهله مايكدر يفاركهم
اليوم ماقبل الاخير مااجا علي
ولا شفنا بقيت منتضرته بس مااجا
اليوم الي التحق للجيش اجانا وهو لابس الملابس العسكريه
دك الباب. فتحته
علي...اني رايح للجيش ديري بالج على الجهال
هذا مصرف دبري نفسج بي
اعرف قليل بس مابقى عندي غير الكروه
اني هاي اخر مره التحق انشاء الله المره الجايه
تخلص خدمتي وارجع
ديري بالج على نفسج وعلى الجهال
باسني براسي دنك على الجهال بأسهم وطلع
هلمره ضجت على علي مو على نفسي خطيه يريد
الجهال يريدني بس اهله السبب
لاتكولون ما عندا شخصيه وماعنده رئي بس الأبناء قبل تحسب الف حساب للاهل
مو مثل هاي الاجيال تتصرف من كيفه
قبل كلمة الاهل مثل السيف
ماكو اي احد يعارض اهله لو مايمشي برائيهم
اتفقت وياا كرم نروح البغداد حتى نجيب قماش اني متأكده رب العالمين مراح ينساني وراح يساعدني
بعت الكلاده وأخذت فلوسها ورحنا اني واكرم على عنوان المعمل اشتريت على كد فلوسي
بآلة القماش مو جبيره حيل جبت اتلاثه
جهالي امنته يم ام سمير
امشي وكلبي نار عليهم أهلهم تدرسين المنطقه
واني مخليتهم يم الجوارين
النقل كان جماعي يعني مجموعه احنا ندفع كروه وحده
نتقاسم الكروه بينا
لان السياره جبيره واجرتها هواي
كل الي رايح مشتري شغله اوشغلتين مو مال يدفع أجرة السياره وحدا
رجعنا العصر من بغداد رحت جبت جهالي
لكيتهم ماكلين ومبدلين ويلعبون
جمانه السعيدي
اتفقت وياا ام سمير تكول للجوارين واني راح اتساهل
بلبيع
فتحت الباله كبال الباب وعفت الباب مفتوح
حتى كل الي يفوت بلشارع يشوف القماش ويجي
يشتري
الصراحه القماش طلع كلش حلووو
كامت تجيني ناس تشتري
ابيع خير من الله ونسوان تجي تحف والي عدها شغله تريد تبيعها تخليه يمي اببعها الها واخذ عليه عموله
بايام الحصار الناس كلشي باعت حتى المواعين
البرده الفراش
رب العالمين فتحلي باب رزق بيتي وجهالي يمي
الشغل حلووو والفلوس اسوي واهس
٣ اسابيع الي التحق بيهن علي رحت مرتين البغداد
جبت بضاعه اخذني الواهس لان ابيع خير من الله
بسم الله الرحمن الرحيم
ومن يتقي الله يجعل له مخرجا ويرزقه من حيث لا يحتسب
صدق والله العظيم
علاقتي اني وبيت ام سمير اكثر من اهل
خطيه تخبز جيبلي خبز تطبخ اجيبلي
اذا تشوف عليه ازدحالم تجي تساعدني
فعلا هداية رب العالمين
انك لا تهدي من تحب والكن الله يهدي من يشاء
حسيت اجتني قوه وطاقه مو طببعيه الشغل حلو والفلوس احلى
اشتريت ثلاجه مستعمله لان الاكل يخرب برا
اشتريت فراش مستعمل للبيت
اشتريت طباخ جبير مستعمل
وماانسا فضل كرم
يجيني ويساعدني اما امي ابد بعد ماوصلت الببتي
وبيت عمي حتى مافكرو يسئلون على الجهال
بغياب علي
اكيد اخباري كانت توصلهم
جمانه السعيدي
نزل علي جايب كتاب التسريح وجاي
بس مااجاني اول يوم لان وصل متاخر واهله فرحانيبن
لان خلص من الجيش
اخذو الراتب مال علي وسوو بي عشى بثوابه وجه الله
لان تسرح علي من الجيش
بفتره طلعتي من بيت عمي خالتي عرضت على علي يزوج ويعوفني
لان تعرف المره ماتكسرها غير المره
حاولت بكل الطرق ترجعني وماكدرت حركت اهلي عليه
حركت علي عليه بس بدون فايده
مابقى غير تعرض على علي يزوج حتى تقهرني
بما ان اني مااقبل ارجع وياهم
وغرفة النوم موجوده بيتهم
فكرت ازوج علي بغرفتي
خالتي....يمه ليش ضال هيج ماتزوج اني اخطبك من باجر وازوجك
علي...تحجين صدك ماابدل زوجتي وجهالي بكل نسوان الارض
خالتي....هي شني زوجتك مجلب بيه نمونه وحده وكحه عرمه محد يكدر عليه
علي...لا اني مااعوف زوجتي ابد
خالتي...خايب جدد شبيك اكو واحد مايحب التجديد
علي...يمه سدي هذا الموضوع رجاء
جمانه السعيدي
سعاد...يومين علي مااجاني تجيهم ناس تبارك
علمود التسريح
بيت عمي اخذو الراتب اشترو بي خروف ومواد عزيمه وعزمو الناس بمناسبة
تسريحه من الجيش
خاف تبقى عنده فلوس وينطينياهن
المهم اني مامحتاجه اي احد بيهم الله فتحلي باب رزق
كمت اطلع وصل القماش الكبار وانطبهن خياطه تخيطهن ثياب
ودشاديش واعرضهن
احصل ببهن اكثر من اببعهن قماش
صارو عندي زبائن من كل مكان
كل النهار ابيع واشتغل
كمت البس ملابس حلوه ووجهي صار حلو
نفسيتي تعدلت
اكل اكل زين جهالي ملابسهم حلوه ومرتبه
صارت عندي علاقات وياا النسوان
نهاري كله مشغوله
ثالث يوم بعد مانزل علي كنت متوقعه راح يجيني
اني اعرف علي يحبني ومستحيل يتخلى عني
كعدت الصبح سبحت وبدلت لان متوقعه راح يجي
لبست نفتوف وردي فاتح شعري رفعته ذيل حصان
خليت مكياج قليل وعطر
كلبي يكول اليوم علي يجي مستحيل راح يصبر اكثر
اندكت الباب الساعه بلعشره الصبح
فتحته
بقه يباوع عليه
علي...صباح الخير كال صباح الخير ودخل كبل وطبك الباب
سعاد...صباح الخير
علي...شلونج
سعاد...زينه مبروك التسريح
علي...الله يبارك بيج شنو هذا أشر على القماش
سعاد...اشتغل
علي...صدك ترحين البغداد
سعاد...اي اني واكرم ونرجع بنفس اليوم
بقه يباوع عليه مثل الي مستغرب شكلي حسيت بلاعجاب بعيونه حسيته مشتاقلي
سعاد... تتريك
علي...لا متريك بس اريد اشوف الجهال
سعاد...نايمين بعدهم تعال ادخل شوفهم
مشيت كدامه
بس دخلنا سحبني من ايدي وحضني
كال بحسره مشتاقلج
سعاد....سكتت شويه باسني
بكيفك تعال عيش ويانه
راسا ملامحه تغيرت دنك
علي...الله كريم انشاء الله خير
كعد حمودي على صوتنا بس شاف ابو وكف على حيله
بابا بابا
اندكت الباب رحت لكيت نسوان جايات علمود القماش
ووحده جايه تحف
التهيت شويه من رجعت لكيت علي محضر الربوك للجهال
وكاعد يريكهم
من خلص أخذهم غسللهم
ابتسمت حتى الجهال نفسيتهم تتحسن من يشوفون ابوهم
بقا علي عدنا للضهر راح جاب سمج وجاب خبز
كعدنا ناكل ونسولف ونضحك
مااريد اعاتبه ابد اريد افتح صفحه جديده ويااا
بلاخير هو زوجي وابو جهالي ومالي احد غيره
بيومها بقى عدنا للعصر يله راح بيت اهله
اليوم الي بعدا اجا وبقى عدنا للمغرب
يكول اجي علمود الجهال اعرف انتي مشغوله ومااريدهم
يبقون وحدهم
كل يوم يجي يبقا عدنا النهار كله
بيت عمي يعرفون هو يخلص النهار ببتنا
بعدين ورا كم يوم بات عدنا
خالتي اتاكدت علي مستحيل يستغني عنا ابد
دزت علي واحد من اخوانه
خالتي. تعال يمه شيل غرفتك مالت النوم نريد نزوج اخوك والمكان مايكفي
علي ماصدك كبل جاب سياره وجابلنا غرفة النوم
اني الصراحه كلش فرحت لان غراضنا والملابس مطشره
همزين جاب الغرفه حتى المكان يترتب اكثر
بعد ماا ستقلينا ببتنا وحدنا
احس علي تغير هواي مو نفس علي القديم السلبي
الي لا حول ولا قوه
وكانما اهله كانو مربطين ادي
بدا يدور شغل ويساعدني على الجهال
ويروح وياي البغداد نجيب بضاعه
ويساعدني بشغل البيت
بهاي الفتره اني تغيرت مشاعري حسيت نفسي احبه
قبل اني كوه جارعته
بس هسه من اشوفه يشتغل ويساعدني ويهتم بيه وبجهاله
مشاعري اتجاهات اتغيرت
اني كمت احبه وتعلقت بي
وكانما توني اكتشفت شخصيته الحقيقه
بيت عمي خطبو الحماي بنيه بعد ماطلعنا منهم بست اشهر
وعلي طلب مني احضر العرس
رحت البيت عمي قبل يومين من العرس
سلمت على خالتي وعمي
كانت هاي اول مواجه من بعد القطيعه الي صارت بينا
اني صار ست اشهر ماداخله ببتهم
كلما التفت الكا خالتي تباوع عليه ومستغربه شكلي
لبسي وشكلي كله متغير
نضفت بيتهم وعدتله وبيوم الحنه رحت عليهم من الصبح
اشتغل وارتب وحضرت صينيه الحنه
بليلته اجت امي وغفران
سلمت عليهن عادي وكانما ماصاير شي
بس ماكعدت احجي واخذ وانطي وياهن
سلام على الماشي
