رواية خيط الدم الفصل السابع عشر بقلم زينب طالب
انتِ حركتي البحر من بعد سَكتة
انتِ حليتي السؤال المَاعرفتة
انتِ خليتي النجم بعيُوني يلتم
والنَجم مو هينه لمتة
......
جوري..
_مغصتني بطني من جابت سيرتهم سألتهة
اريد اتأكد من لسمعتةة صحيح لو شنوو
:: شنو گلتِ عيدي؟
شفق :: شبيچ متسمعين دااگلچ الضابط بلغة باچر محكمة غصون ورجلهاا واخوها ويريد منچ تحضرين ..
_حچيت بخووف
:: عادي مااروح؟
شفق :: لا مو عادي اذا ما رحتي تسقط القضية و يروح حقج صيري قوية و روحي اوكفي گدامهم اخذي حقج منهم لازم يتحاسبون على فعلتهم بالدنيا وحساب الأخرة هم ينتظرهم هالحثالة هذولي ، يلة روحي غيري هدومچ حتى
نتغدة متنة من الجوع
_هزيت راسي ورحت للغرفة غيرت هدومي وغسلت
وصليت واني فكري كلةة باچر شلون ارجع واشوفوهم والله مااتحمل اباوع بوجهم
_سمعت شفق تصيحني طلعت لگيتهم ينتضروني
عيون بيبي تباوعلي بخووف وشفق نضراتها تطيني
القوة گعدت بدون كلام اكل حچة صارم يسألني
صارم :: شبيچ جوري شو وجهج نخطف
_ردت عليه شفق
شفق :: عرفت باچر المحكمة وخاافت الجبانة
ومتريد تروح
صارم :: من اگول عليها نعجة ثولة لحد يلومني
شبيچ لچ شنوو ماخذينچ للأعدام هو بس تشوفيهم شلون يتحاسبون على فعلتهم حتى بعد
تشيليهم من دماغچ وتنسيهم للأبد وبعدين اني
ويااچ منين تخافين
شفق :: واني هم أروح
صارم :: انتِ نچبي
شفق :: والله اروح معليك بيةةة
صارم :: گتلچ نچبي لاتنبصين
جمارة :: اهووو راح يتعاركون دخذهاا وياك يا
يمة هسة شايلهاا على راسك انتَ
صارم :: وين ماخذهاا محكمة وخبصة وضباط
ومحامين شنو استعرض بيهاا
شفق :: مو جوري راح تروح
صارم :: جوري مو حلوة محد يباوعلها بس انتِ
تطگين بالگاع اغار عليچ حبيبتي
_باوعتلة صفح ورديت
::ترة احلى من مرتك اني
صارم :: ها حچت ضلي ساكتة وخايفة احسلچ
_بقى يداهر وياي وشفق تحرگ بگلبة ويتشاقون
ادري بيهم يردون يسحبون الخوف من گلبي
واتقوة أبتسمت الهم وگمت للغرفة نمت بعد تفكير
طويل گعد العصر كملت واجبي هو اني بااچر ما
ادوام بس حتى لاتتراكم المواد علية وابقى ابچي بعدين، خلص اليوم على خير
_ثاني يووم گعدت من وقت كلهم گاعدين وشفق
لهسةة تتوسل بصارم تروح بس هو قافل من كل
عقلة يغار عليهاا تريگنة وهية تنگ على راسةة
صااحت بيبي
جمارة :: اخخخ يمة ولچ راسي راح ينفجر سكت
مرتك يمعوود شنو مستمتع انتَ
شفق :: هابيبي هسةة صار صوتي مزعج مع الأسف عليچ مو راح تشمتينة بيةة
جمارة :: ياأشمتة بيبي هو انتِ منو يحملچ غيرة
صارم :: ههههه وشهد شاهد من اهلهاا
شفق :: تضحك موو بسيطة اني الكم اثنينكم
_ عافتهم وراحت زعلانة وبيبي تضحك عليهم هو ركض وراهاا مايخليها تزعل كملت الريوگ وگمت
طولوا بالغرفة صحت بيهم
::تأخرنة يمعودين وينكم
_طلعوا من الغرفة وهية مبدلة وتضحك مشت كلامها ليش وين يگدر الهاا المگرود بس هو ضايج چان
سلمنة على بيبي وطلعنة من البيت أجر تكسي
وصلتنة للمحكمة نزلت من السيارة امشي ورة
صارم وشفق لازمة أيدي دخلنة بقينة ننتضر
أباب القاعة اجانة الضابط نفسة ويا المحامي
سلموا على صارم وصارو يحچون سوية
_ساعة وبدت الجلسة ماقبلوا لاصارم ولاشفق يدخلون وياي خفت وماقبلت ادخل تقرب مني
يحچي
صارم :: جوري دخلي ولاتصيرين ضعيفة اني
عندي ثقة بيچ البنت لطلعت من الموت وتحملت
ظلم وقساوة الوحوش العايشة وياهم راح تدخل
وتسولف للقاضي شنوو صار وياهاا حتى تاخذ حقها منهم ثقتي بيچ چبيرة لاتخيبيها
شفق :: اي طبعاً اختي بطلة وراح توگف بعيونهم وتسولف دنائتهم للقاضي
_كلامهم طمني شوية دخلت وحدي امشي بخوف
وصلت لمكاني باوعت الضابط اكرام وصديقة
هم الضابط الثاني واگفين والمحامي وياهم مسافة
بسيطة تفصلني عنهم
_باوعت للقفص وشفت احقر نااس عرفتهم بحياتي
المتجردين من الرحمة والانسانية شياطين على هيئة بشرر عيوني تباوع الهم بخووف لهسة اخاف منهم
اي اعترف اني جبانة گدامهم
_صافنة عليهم فززني الصوت يعلن بدء المحاكمة
صار القاضي يسأل اول مابدء بقضيتي سألني وحچيت كلشي صاار وياي ضربهم طول الفترة العشت بيها عدهم واعتدائهم وتهديدهم المستمر الية الى ان وصلت لليوم النفذوا بيه جريمتهم احچي وعيوني تهمل أشرلي كافي بقيت اشهگ النفس
_رفعت راسي من حسيت شخص قريب مني باوعت الضابط اكرام طلع كلنس من جيبة وقدمة الية
اخذتة منة مسحت دموعي وباوعتلة ممتنة هز
راسةة ورجعنة ننتبه لكلام القاضي صار يسألهم
بسرعة اعترفوا بجريمتهم غصون وغالب اما رافد ينكر هو ميدري وهو صحيح ميعرف اكثر لمريت بيه
_بعدها صار المحامي يحچي نيابة عني مااعرف منو وكلة بعدها اجة الضابط اكرام وصديقة لإن يعتبرون احد الشهود لشهدوا على حالتي والمكان لشمروني بيه كل الأدلة تثبتت عليهم طلعنة من القاعة بعد مايداولون الحكم بينهم
_بعدها دخلوا نااس لعرفتة اهل البنت القتلوها غالب
وغصوون واعتدوا عليهاا گدام رافد صارت الجريمة عليهم اثنين
_رجعنة للقاعة ونحكم عليهم على قتل البنت وعلى محاولة قتلي وتعذيبي
غصون وغالب (بالأعدام)
_اما رافد يطلع برائة لأن ماكو دليل هو مشترك وياهم سكوتة عن الجريمة مال البنت بدافع الخووف فهناا طلع برائة
_طلعت من المحكمة واني راسي مرفوع وگلبي بارد تلگوني صارم وشفق حضنتهاا وبقيت ابچي شفت صارم راح يتشكر من الضابط والمحامي لأن العرفتة هو لفتح القضية مال البنت ووكل الية محامي ابتعدت منهاا ورحت وگفت گدامة صارم خزرني مااهتميت الرجال ووگفتة حلوة وياي حچيت
::مااعرف شلون اشكرك كل الأگدر اگولة شكراً
الك هواي ماقصرت
_رد علية وعينة بعيني
اكرام :: ميحتاج تشكريني هذا واجبي وتعهد اخذتة على نفسي ماارتاح الا يتحاسبون على فعلتهم وحقچ يرد الچ
_ووعدت ووفيت صدگ، سحبني صارم وگلة
صارم :: مشكور مرة ثانية فيمالا
اكرام :: هلا بيكم
_سحبني وشمرني يم شفق يحچي متعصب من بين اسنانة
صارم :: جيبي اختچ ولحگيني بسرعةة حسابچ بالبيتت جوري
شفق :: ياشسووت؟
صارم :: لتسألينن يلةة
_سبقنة يمشي واحنة وراه وشفق تسألني شبيه
حچيت الهاا هزت ايدهاا وگالت
شفق :: صدگ مخبل واذا شكرتي الزلمة شنوو راح ياكلچ قابلل
_مارديت عليهاا صعدنة تكسي وصلنة للبيت لگيت
بيبي گاعدة على نار رحت عليهاا وسولفت الهاا ردت علية فرحانةة
جمارة :: الحمد لله يمة الحمد الله اخذ حقچ والله يراد نسووي ثواب بهاي المناسبةة
شفق :: اي بيبي سوي حلاوة مالتچ طيبة ونجيب شي وياها ونوزع للجوارين واني اساعدچ
جمارة :: خووش العصر اطلع اجيب المواد واسوي
_بعدني مرادة عليهن دخل صارم يصيح علية متعصب
صارم :: لچ جووري شلوون تجين گدامي وتتشكرين منة شوو انتِ ماتستحين مو اني واگف وجاي اصخم اتشكرر بعد شكوو نبصتي بالنص انتِ متشوفين شلوون يباووع عليچ
_عفية انت ليش كلة عندك عركةة هاا يعني الرجال نقذني من الموت وراح حاسبهم ووكلي محامي وفتح القضية مال بنت هم صارت ضدهم غير اتشكر منةة عيب انتَ شبيكك
صارم :: ولچ غير اني سوويت الواجب انتِ شنووو
_صاارم الزم حدك لتتصيح ترة اني مو خفيفة وتجي تحاسبني شنوو شفتني ضحكت وياه لو قليت ادبي تشكرتة بكل احترام وفضت راحت لا كلشي تكبرهاا ترة اني لان ادري بيك تخااف عليك وساكتة والله غير واحد مااسكتلة بس لاتتمادة اكثرر
_عفتة وطيبت للغرفة اسمع شفق تتعارك وياه طيرر فرحتي ليگوول مدري شسوويت غيرت ملابسي ونمت حتى بدون غدة بيبي گعدتني ماقبلت نسدت نفسي
_للعصر گعدت بس غسلت واكلت لگمة وبديت اقرة
البيت هدوء مدري وينهمم شوية ودخلت بيبي عباتها
على راسهاا سالتهاا
::هابيبي وين چنتِ؟
جمارة :: رحت للأسواق اني وشفق جبت كم شغلة اريد أسوي حلاوة لوجه الله واهل البيت اكلتي شي؟
::اي اكلت لفة جبن
جمارة :: شنو لفة جبن مو ضميتلچ حصتج مسوية دولمة تحبيهاا
:: ضميهاا الية اتعشى بيهاا هسة مشيت حالي اجي
اساعدكم؟
جمارة :: لاماعدنة شي اقري انتِ
_ طلعت وعافتني رجعت اقرة بس كلساع اصفن صدگ يعني هسةة خلصت من غصون وغالب واخذوا جزاتهم؟ اخخخ يارب والله اعجز عن شكرك الف الحمد لله
_نرسمت صورتة گبالي وهو ينطيني الكلنس خايف علية نضراتة شگدد حلوة ليش يباوعلي هيچ وشدعوة هلگد مهتم للقضية مالتي معقولة بس تأنيب ضمير لو شنوو؟
_زين ليش صارم ميرتاحلة مع العلم كلامة وأسلوبة حلو ويا بس هوو مدري شبيه خلاه بعقل بعد
عفت الكتب وطلعت يمهن بيبي تحوس بالحلاوة وشفق يمهاا تساعدهاا بس صافنة تحچي وياها مترد
جمارة :: جوري بيبي ماتطيني مي بعدد هاي اختچ ضاربة دالغةة احاچيهاا وعقلهاا مدري وين
::اي ادللي
_ اطيتها مي ضافتة وبقت تحوس بيهاا جهزت المواعين وياهاا بس استوت بقينة نصب حلاوة وفوگاها چرك خير من الله صارن
:: اگلچ بيبي هاي منو يوزعهاا؟
جمارة :: انتِ وأختچ منو يعني اني رجلية متعيني
افتر على البيووت ورجل اختچ مو هناا
:: يلة لعد قبل المغرب شفق شفق شبيچ يمعودة
شفق :: شكوو؟
::شيلي الصينة واني ادگ الباب لحگيني
_صاحت بيبي
جمارة :: قريتي الفاتحة على الشكرر ؟
شفق :: اي بيبي قريت قريت يلة انتِ طلعي فضيني
:: هااي شبيچ يمعودة اليووم هايجين علينة انتِ ورجلج طالعةة امشي
_حچيتها وطلعت قبلهاا اني ادگ الباب واوزع وهية شايلة الصينة كملنة الفرع مالتنة كلةة خلصت الصينة
ورجعنة چانت قلقة وتباوع منا ومنا مثل لدور على احدد سحبت ايدي حيل ولزمتهاا وسرعت المشي
:: ااي راح اوگعع شبيچ شفق ليش مستعجلة والله خوفتيني
شفق :: امشي بسررعة امشي ولچ لايلحگونة
_نداريت اشووف عاطت بيةة
شفق :: راااسچ لاتلتفتين لاتلتفتين امشي وانتِ
سااكتةةة
_نخلست بمكاني ماعولنة نووصل للبيت بسرعةة
دخلتني وقفلت الباب ولازمة گلبهاا فحطاانة
:: تحچين شبيچ لو اسولف لبيبي تعرف شلوون تحچيج
شفق :: اششش لاتسمعچ ماكوو شي غير دنيا
غروب واخااف عليچ
::شفق ترة مو زعطوطة وتضحكين عليةة احچي
شكوو
شفق :: گتلچ ماكوو ماكوو لاتلحين يلة ولي جوةة
::ما تحچين موو بسيطةة
_عفتهاا جاي ارووح سحبتي من ايدي تمنعني
شفق :: وينن موليةةة
:: احچي لبيبي واخليهاا تحچيچ غصباً عن رااسچ
شفق :: اووگفي يمعوودة شيخلصني منهاا اني اسولفلچ بس مووهسة امشي دخلي راح تننبهه
::خووش نشووف بلة واذا ماتحچين اسوويها ترة
شفق :: لاتهددين هيوو لاامدچ هناا ووين ليوجعج
::ههههه غير اسحلچ سحل شحدچ تمدين ايدچ
شفق :: يااا اني محد يستفزني شوو تعاالي
_سحبتني من شعري مدتني بالگااع ودگ بالنعال
وعض وتمليشش طيحت حضي
:: اخخخ ولچ چلبةةة عوفيني تخبلتِ شفقق
ايي شعررري الغمةة وخرييي
_ذبت خوفها بيةة طلعت بيبي تصيح
جمارة :: يايا ولچن مناا الناسس خزيتنةة صوتچن والله ماتستحنن شوكت تكبررن ولچ شفق وخري عنهاا
شفق :: بيبي هااي الگطمةة تهددني ماتدري اني محد يگدرلي اسحلها هية وامهاا
جمارة :: چا ماصرتِ شويطرة على امهاا وسحلتيهاا شو طردت بالشارع وماحچيتِ
شفق :: مااريد اغضب ربي بيهاا تبقى امي وانتِ
لچ گومي لمي شعفتچ ونضفي المطبخ صاير هووسة لاارجع اكتلچ لأن عينچ طالةة يراد اربيچ
جمارة :: وانتِ منو يربيچ يبيبي؟
شفق :: صاارم
جمارة :: خلي يربي روحة اول نوب يربيچ
شفق :: اذا مااگلة عليچ بسيطة بيبي بسيطة تحچين على رجلي الفقير الطيوب لماكو منة
_حچيت اني غرغرت الدمعة بعيني امشسي لچ فقير وطيوب گولي مشكلچي كلاوچي اگلچ اي
شفق :: هاا اعيد الكتلة ماتبتي؟
جمارة:: يلة علساس انتِ متحچين علية شو مطيحة حظ الزلمة وهو ساكت
شفق :: اني احچي بس غيري لاا مااقبل
:: تعالي گوميني كسرتيني الله يطيح حضچ
شفق :: انتِ گومي ولااگومچ
_عافتني وطبت يمة شگد عرمةة اجتي بيبي گومتني دخلت للمطبخ طاگة بيه عبوة نظفتة بسرعة ورحت اصلي جبت ماعوني مال دولمة وماعون حلاوة گعدت اقرة واكل ماطلعت يمهم زعلانة منة
بعدني اكل نفتح الباب اللگمة بحلگي وهو واگف متخصر يباوع علية ومسوي نفسة ضايج مااهتميت بقيت اكل حچة
صارم :: شنو لازم زعلانة وگاعدة هناا وحدچ
:: عليمن ازعل ليش اني عندي احساس كرامةة
صارم :: هم گلت انتِ ماعندچ گومي اكلي وياانة
لااطيح حضچ
:: هسة انتَ تصالحني لو ترزلني
صارم :: اثنينهن يلة گومي
:: عوفني هناا جاي اكل معليكم مني
صارم :: جوري گومي لساني زفر ترة ماعدنة بنات ياكل بالغرف يلةة
:: ليش حرام؟
صارم :: اي حرام يلة گومي
:: ماا
صارم :: استغفر الله انتِ مو مال عيني واغاتي
_تقدم علية صحتت
::لاعفية والله جسمي يوجعني من ورة مرتك تريد تكملهاا انت عليةة هسة طالعة وراك رووح
صارم :: اي عفية صيري حبابة
_عافني وطلع صدگ متراهمين هو وياها اثنينهم مخابيل شلت صينيتي ورحت يمهم تعشينة وسط سوالفهم الحلوة خلصنة وبقينة گاعدين على التلفزيوون
_ثاني يووم صادف جمعةة گلت اي راح ابقى نايمةة لأن احنة دوامنة كلة صباحي اتحسرر على نومة الصبح نايمة واتحلم واسمع بيبي تگعدد بيةة
جمارة :: جوري ولچ جوري گعدي الساعة بالتسعةة
_حچيت والنعااس بعيووني
:: بيبي صدگ تحچين اليووم جمعةة شعندچ من هسة مگعدتني والله نعساانة
جمارة :: گومي حبيبتي عجنت الحنة من الفجر اريد الوخ راسچ يلةة هم يلة نلحگ
::بيبي بيبي فدوة وقت حنةة مو گتلچ مااريد نووب مگعدتني من عزز نومتي علمودهاا حرام عليچ
جمارة :: ياا فوگاهاا ولچ غيرر علاج لشعررچ
گعدي يلةة لاتشلعين گلبي
::فد ساعة بعد حبابة
جمارة :: ابد ولاشوية بين ماتغسلين وتتريگين صايرة العشرة اريدهاا تضل هوااي بشعرچ يلةة گومي تعبتيني
_گمت متعاجزة اريد ابچي وادردم عليهاا غسلت وتوضيت وصليت صاحتني اتريگ اكل واني مغمضة وهية تسولف وياي تريد تصحيني
جمارة :: يااا شجاج مو كل يوم تگعدين من الصبح شبيچ اليووم؟
::نعسانة يانااس والله نعسانة يعني جمعة شعدنة من الصبح
جمارة :: ياصبح ترة راح تصير العشرة وانتِ تصيحين الصبح اكلي بسرعة هم يالله نلحگ
::اي مو راح الوقت عليةة
_اكلت شوية وگمت صعدنة بالسطح لگيتها فارشة
فراش ومحضرة كلشي والله يابيبي بالگوة گدرت
تصعد حچيت عليهاا
::هسةة الا بالسطح چان خليتي جوة
_حچت وهية تجذب النفس فحطانة من الدرج
جمارة :: لاهناا عالشمس ربچ حتى اشووف زين
_ضحكت عليهاا مدري شعاجبهاا گعدت تربعت وگعدت مقابيلهاا بالبداية مشطت شعري وقسمتة
اربع اقساام كل قسم ترسة تررس وسوتة ضفيرة
بسس شنوو هلكت خطيةة فووگ الساعتين هيةة
تشتغل اخر شي لفتهن وخلت على راسي چيس
نووب شدتة بوصلةة لعبت بية طووبة كلما اعترض
تصيح عليةة
:: اخخخ بيبي والله راس شثگلة صاار حرام
عليچ
جمارة :: ميخالف تحملي تحملي للعصر واغسلة
شوفي شلوون يصير تبقين تدعيلي بعدين
_سكتت بدون فايدة باوعت خلصت الطاسة شكبرهاا انتبه طاسة ثانية مغطاية بعدهي سألتهاا
:: بيبي هاي المن الثانية
جمارة :: لأختچ روحي شووفيها بلكت گعدت
استحيت ادگ الباب عليهاا ورجلهاا بصفهاا
:: شفق تستحين بس اني تسحليني من الفراش
جمارة :: دمشي ولچ صيحيهاا رجلية خدرن
نووب ماراضيةة فوگاهاا
:: ادللي حجية جمارة ادللي
_ بستهاا ونزلت اركض وراسي عبالك شايلة جبل فوگاه لگيتهم بالصالة يتريگوون باوعتلي وضحكت
شفق :: هاا صادتچ هههه الله يعينچ
:: ويعينچ حبيبتي دورحي فووگ خليها تصيدچ محضرتلچ طاسةة اكبر من راسچ
_احچي واغمز الهاا متشمتةة صااحت معترضة
شفق :: لااني مو گتلهاا مااريد شجاهاا
:: موبكيفج عجنت الچ ومنتضرتچ يلة صعدي
الهاا خطية تعبت ترة
صارم :: شكوو هاي شعدچن فووگ وانتِ علوية
شمخلية عمامة على راسچ
_ااا متضحك ترةة گوومي انتِ
شفق :: اووو شگوول عليچ بيبي
_عافتي وصعدت ضايجة رحت شلت الصينة وغسلت المواعين اجاني للمطبخ گال
صارم :: لاتسوون غدة رايح اجيب سمچة واشويها
بالسطح اليووم الجو حلوو بيه دفوو
:: اي والله صار هواي ممكالين سمچ
صارم :: چامتحچين شبيچ ثولة
:: صارم انتَ كلك زين بس لسانك مخربك حرامات
صارم :: وانتِ كلچ زينةة بس عقلچ مخربچ حرامات
__ حچاها وطلع شگد خبيث نظفت البيت بسرعة
صارت الصلاة همزين محافظة على وضوئي والاشلوون اتوضة نزلت شفق وبيبي ويااها تچيلهاا
خطية صعبة عليهاا صعدة الدرج بس علمودنةة
هم مثل حالتي جبل فووگ راسهاا ضحكت عليها
صااحت بية
شفق :: صمي حلگچ هسةة شيخلصني من صاارم راح يستلمني تصنيف وينةة هوو؟
:: راح يجيب سمچ يريد يشووي فووگ
جمارة :: الله يرضة عليه ولچ شفيقة حافظي عليه لايطير من ايدچ
شغق :: شنوو بيبي عصفور هوو
جمارة :: لابيبي صگر صگر
شفق :: ادللي راح اگص اجناحاتة
_عفتهن يتناقشن ودخلت صليت وگعدت اقرة شوية وبيبي دخلت يمي تصلي خلصت وطلعت اسمع اصواتهم برة يصنف عليهاا وهيةة متعصبة صعدوا فووگ يشوون واني بقيت لان ماالحگ بعدد اريد امشي مادة
_تغدينة وخلصنة حتى الضهر مانمنة بقينة اني وشفق گاعدين بيبي نامت وذممتنة الا بالستة يلة نغسلهاا ورجلها طلع بقينة نسوولف صاارت بالستة طفرت قبلي فووگ الساعة هيةة بالحمام رحت عليهاا
:: شنوو اليووم ماناوية تطلعين يمعوودة
شفق :: ولچ جووري متت متطلع هااي
_ صاحت بيبي توهاا گاعدة
جمارة :: مو من اول غسلةة تطلع ولچ كاافي
شعرچ رااح من المي
__ بالگوة طلعت وهيةة ضايجة دخلت وطااح
حضي يلةة گدرت اوگعهاا وهم بقى منهاا بيوومها
شفق اجت نامت يمي گالت صارم طردني ريحتي تبخر حنةة ضحكنة عليهه
_همزين ثاني يووم هم عطلة والا ريحتي تبخرر
الاحدد داوومت خلصت اليووم بين الدراسةة
والسوالف وية عبير هيةة الصديقة المقربة اليةة سوالفها ولاتنمل حيل حبابة
_خلص الدوام طلعت كالعادة منتضرة صارم والايشتلني نص سااعة فووگ الدوام يلة يجي لو اروح مشي چاان واصلة ومبدلة همم واگفة على
صفحةة من هوسة السيارات سمعت صووت
صاحني رفعت راسي والگاه الضابط اكرام
ابتسمت لاارادياً تقدم مني وهو يبادلني الأبسامة
اكرام :: شلونچ جوري
__ زينة سيدي
اكرام :: شنو سيدي شفتيني لابس ملابس الدوام
_لعد شگول؟
اكرام :: گولي اكرام
_ياا عيب
اكرام :: لاموعيب اني احب اسمع صوتي بلسانچ
_حچيت مرتبكةة
:: ااا ليش اجيت هنا؟
اكرام :: اشوفچ
_هاا
اكرام :: لاتفتحين عيونچ هيچ مااتحمل ترة
_سيدي اني اروح راح يجي رجل اختي اذا شافك
يضوج
اكرام :: خليچ اني رايح بس اجيت اشوفچ
واذا تقبلين اجي كل يووم حتى لو من بعيد اشوفچ واروح
_بكيفك
_ابتسم وشل حالي بالأبتساممة مالتةة راح وعيوني وراه لحدما ركب سيارتةة يمةة شلون حلو يباوعلي
نضراتة تكتل فززني صووتة
صارم :: وين صاافنة مو ااحجي ويااچ
:: يمةة گمزتني شوكت اجيت؟
صارم :: هسةة وين عقلچ؟
:: لاهناا بس تعبانه تأخرت هوااي
صارم :: صاار عندي شغل يلة امشي
_مشيت وراه خايفة همزين ماشافة چاان شيخلصني منةة وصلني للبيت وراح عندة شغل ما بقى للغدة
_مشت الأيام واكرام يومية يجي قبل موعد صاارم بربع ساعة بس يسلم ويشوفني ويرووح چنت انتضر بس يخلص الدوام حتى اطلع اشووفة مرات اذا الشارع بيه نااس يباوعلي من بعيد ميتقرب يخاف تجيني حچاية ومرات يجي يسلم ويسالني عن احوالي ويروح كلشي ماعرفت عنة غيرر اسمةة
بس هو يعرف حياتي كلهاا بأعتبارة حقق بقضيتي
_اليووم مثل كل يوم انتضرتة يجي تأخر لاهو بين ولا صارم اجة ضجت ووين راح شنوو يضحك علية
من تعودت عليه عافني دنگت راسي ضايجة
هنااك واسمع احدد يصيح بأسمي الصوت مو غريب علية رفعت راسي وانصدم بالشخص الواگف گباالي لايالله شجابة هذاا هناا..
...
....
.....
شفق...
صارم :: انتِ مو مال عيني واغااتي اني
اعررف شلوون ارووضچ تعبتيني
_زحفت ليورة وحچيت خايفة
::شتقصدد؟
صارم :: هسةة اگلچ شقصد
_تقرب مني واني اول مرة اخاف منة هيچ نضراتة خوفتني عيونة تباووع لجسمي بجرائةة،
دفعني وصاار فوگي ادفع بيه خايفةة جسمي يرجف
بس هوو عبالك غيرر شخص دموعي تنزل تتجراه
واحچي بأذنة اريد يحس على نفسةة فقد
:: صارم صارم لاتسووي هيچ اذا جبرتني تخسرني والله تخسرني
_عاصرني حيل بحضنة ويشم بشعري ويحچي روحة رايحةة
صارم :: احبچ شفق احبچ حسي بيةة اريدچ ولچ اريدچ ليش تمنعيني ليشش
::بس اطيني صبرر بس وخرر والله اجيك بنفسي من اشوف روحي مستعدة وخرر گتلك وخرر
_ادفع بيه اريدة يحسس ماكوو لمساتة صارت تتجرء
على جسمي يبوس بية ويهمس كلماات حب ماگدرت اتجاوب ويااه احس شي يمنعني مااعرف شنوو
حچيت بأذنة بخفووت اخوفة
:: اذا سويت لتريد وروح أبويةة تحلم تشووفني
بعدد
_حچيت هيچ تصنم جسمة ساكتت مامتوقع مني احلف هيچ لو اصدة ويعرفني اذا حلفت بأبوية اسويهاا ابتعد مني يباووع بوجهي وعيوني عليه
خايفة ضحك مستهزء
صارم :: واني بعد ماأريدچ..
_نهض مني وسحب تشيرتة وطلع من الغرفة لميت
روحي ابچي ليش ليش ليش هيچ سوويت شنوو أريد بعدد شنوو دموعي تحرگ خدي وگلبي يوجعني لأن زعلتةة فوگ الساعة وهو مادخل للغرفة نهضت لميت شعري وطلعت بهدوء البيت سنطة وين رااح
باب المطبخ مفتوح شوية تقربت امشي على كيفي
مااريد احد يحس علية
_طلعت لگيتة بالطرمة واگف منتچي على الحايط ويدخن ضهرة عليةة ميشوفني نعصر گلبي عليه خفت اتقدم يمة ويفقد اعصابة بقيت اباوع علية
يخلص الجگارة ويرجع يشرب الثانية خلص 3 واني اباوع علية اجاني صووتة فززني
صارم :: مطولة بوگفتچ هنا؟
:: تعال فوت جوة
صارم :: روحي نامي شفق روحي معليچ بية بعد
رووحي
_خفت من نبرة صوتة عفتة وفتت رجعت للغرفة تمددت وبالي بقى يمة انتضرتة هواي وهو مااكو اخر شي غفيت بدون لااحس وهو مادخل للغرفة بعدة
_الصبح گعدت ركزت الساعة تسعة گمت بسرعة مفزوعة طلعت من الغرفة بيبي گبالي سألتهاا بسرعةة
::بيبي صارم وين؟
جمارة :: يمة اسم الله البت متحلمة برجلهاا شبيچ يمة شفق تعالي يمي تعاي
::بيبي ردي علية صارم وين شوو ماكو؟
جمارة :: ياا شنو وين غير بشغلة قابل وين يرووح
:: يعني شفتي الصبح؟
جمارة :: اي يمةة وتريگ واخذ جوري وراح
_من گالت هيچ طمأنيت گعدت يمها على حيلي رايحة روحي عبالي راح لبيتة مرة ثاانية اجتني بيبي خايفة تعدل بشعري وتسألني بخووف
جمارة :: اسم الله يمة ليش هيچ گاعدة شفق شنو شفتِ حلم موزين حبيبتي؟
_لزمت اديها وبستهن اطمنهاا
:: لاتخافين حبيبتي مابية شي بس گعدت فازة وماشفتة يمي نسيت عندة شغل لاتشغلين بالچ
جمارة :: لعد گومي يلة غسلي وتعالي تريگي مادام گعدتي بعدد
::اي هسةة
_عفتهاا وگمت للحمام غسلت وتوضيت ورحت صليت وغيرت هدومي وسويت شعري وطلعت يمهاا لگيتهاا محمية الچاي اليةة ومحضرتلي الريوگ
حضنتهاا
::اويلي وين اكو هيچ بيبي مدللة حفيداتها والله ماكوو مااكوو
جمارة :: يايا تسودنت البت ولچ شني بس تبوسين وتحضنين اضنچ معوزة حنان ذااك رجلج وروحي
شبعي محاضن ويااه
_گعدت اكل وحچيت
::وين يحسرةة كلما يجيني افلت منةة
جمارة :: لاتگليلي بعد مماخذچ ولچ
::وين ياخذني بيبي؟
جمارة :: ولچ شفيقة لاتحرگين گلبي اطيتي نفسچ الة لو لاا
:: لااا
جمارة :: صخام بوجهج سهاام ليش ولچ ليشش؟
:: ماادري كلما يتقرب مني انرعص احسس زواجنة كلة غلط بغلط مااگدر اسلمة نفسي
جمارة :: شنوو ولچ تردين تطلگين منةة
:: لا اسم الله شنوو انطلگ
جمارة :: لعد شنو معنى كلامچ مال زواجج غلط الا ناوية على الغبرة وياه تعوفيه وترحين
:: شنو بيبي وين اعوفة مااتخيل حياتي بدونة
جمارة :: تحبيه يعني؟
:: مااعرف
جمارة :: عادي عندچ تشوفي وية غيرچ ماتنقهرين؟
_صفنت بوجهاا باهتة اول مرة احد يفطني هيچ تخيلت صارم يحب غيري لو يعوفني ويروح يدلع غيري ويبوسهاا ويگلهاا احبچ مثل ميگلي مجرد تخيل نعصر گلبي اذا سواهاا وعافني ومل مني شلوون
صحاحني صوتهاا تستألني
جمارة :: ماجاوبتيني عادي يزوج عليچ لو يطلگج ويروح يشووف حيااتة
::بيبي ليش هيچ تحرگين گلبي
جمارة لأن مالها غير تفسير لو تحبينة وتكملين حيااتچ وياه مثل العالم والناس لو تگليلة روح شوف حياتك اني ماافيدك بس مال عايفة الزلمة لابالسماء ولابالگااع لاا مو حچي هذاا
::بيبي!!
جمارة :: لابيبي ولاابد حرام ولچ ربچ يحاسبچ على هذا الشي شنوو قصورة ويااچ حتى مانعتة ولچ لمانة بعد ماأمچ طردتچ وشمرتني اني بمكان واختچ بمكان جمعنة ويشتغل ليل نهاار ويصرف علينة ويحبچ ويريدلچ الرضى ترضين شنوو تردين بعد لو بشنوو احسن منةة انتِ ؟
_گليلي بشنو احسن ورافضتةة شنوو فضلچ عليه بلةة شفق فتحي عينچ ولتخسرين صارم ترة لو تدورين الدنياا كلهاا متلگين مثلةة لاتتعافين على نعمتچ فكري بكلامي وراجعي نفسچ بنيتي..
_حچت كلامهاا وعافتني وراحت حسيتهاا اطتني كف على وجهي كلامهاا كلة صحيح شنوو انتضر اني ليش مانعتة مني ليش تعاملي جااف وياه ليش مااقدر تعبة علية وعلى اهلي جااي يقدملي بدون مقابل واني اصدد بيه شگد حقيرة اني
_نسدت نفسي حتى ماتريگت عفت الاكل وگمت دخلت للغرفة گعدت صافنة افكر بكلام بيبي كل شوية يرن براسي صوتهاا انتبهت هدومة بالگااع
شلتهن لاارادياً قربتهن لخشمي وغمضت عطرة دخل ريتي سحبت نفس قووي وحضنت التشيرت انتبهت لنفسي عززة شفق البارحة تدفعين بيه واليوم تمشمين بملابسة مثل الچلبة
_شمرتة بسرعة مستحية من نفسي لملمت الغرفة وطلعت اساعد بيبي نضفت البيت وهية كملت الغدة بدون كلام للوحدة اجوي هو وجوري الوجة مدخن والحواجب معگودة سلمت علية رد السلام بدون ميباوع بوجهي مو مثل استقبالة كل مرة ضجت
_تغدينة وسط هدوء لأن كل مرة هو يفتح المواضيع يسولف هالمرة ذابها عالصامت وشافوا ضايج محد حچة شي كملنة الهوسة جوري رادت تغسل المواعين ماقبلت خطية گاعدة من الصبح دخلت للغرفة وبيبي هم اخذت چايها وراحت نضفت المطبخ بسرعةة
وحميت الچاي لأن برد واخذتة الةة
_دخلت الغرفة ظلمة فتحت الضوة مخلي ادية على راسة حچيت بهدوء
:: صارم چايك
صارم :: خليه يمچ مااريد
::موراسك يووجعك
صارم :: مااريد گتلچ
:: اگعد حباب
_عاط بيةة فززني
صارم :: لتلحيييننن
_خنگتني العبرة فشلني خليتة على الميز وطفيت الضوة رحت لمكاني تمددت مهضومة منة بقيت انتضرة هسة يسحبني هسة يندار علية مااكوو لحدما نام وهو مامعبرني ماگدرت اغمض عيني بقيت گاعدة هو سااعتين وگعدد بس غير هدومة وطلع بدون كلاام
_اربع ايام وهو ميحچي وياي ولايعبرني احسس گلبي طگ اشتاقيت لحضنة اشتاقيت لكلامة لغزلة لدهرتة وياي حتى لخبالة اشتاقيت خابرت هدوء
ضايجة بس گالت شبيچ بقيت ابچي ابچي تريد تفتهن مني مااكو
__اخر شي عاطت بيةة يلة سكتت سولفت الهاا كلشي استلمتني رزايل غسل ولبس اريدها تسدد حلگهاا مااكو اخر شي سديت التليفوون بوجهاا موعت اذاني رجعت دگت عليةة عطت بيهاة
::اذا تبقين ترزلين اسدة بوجهج ولچ شنوو عود صرتي متزوجة وتعرفين تسولفين نسيتي مااضيچ ولچ هدوء انتِ العوبة ترزليني امداني كوون
هدوء :: ولچ غيرر اني مرة متزوجة وتسمعين
نصيحتي خبرتي اكثرر منچ بسوالف المتزوجين
:: الله يعينك يشيخ جعفر شمسوية بالزلمة من ورة خبرتچ ؟
هدوء :: مخبلتةة الله وكيلچ ، هسة سمعي الحچي
بالتليفون ميفيد راح ااخابر جعفر بلكت يقبل واخلي يجيبني رجلج وين؟
:: مو هناا طالع
هدوء :: بعد احسن روحي خليني اخابر الحب واقنعةة
:: ههههه خبلة
_سدتة بوجهي والله وقت هدوء تنصحني نگلبت الاية شوية ورجعت دگت گالت جايتچ طلعت من الغرفة الدنيا غرووب بيبي تقرأ قرأن وجوري تدرس
عفتهن ورحت اصلي بعدني على السجادة وندگ الباب شوية وسمعت صوتهاا تسلم لميت السجادة وطلعت لگيتهةة يم بيبي گاعدة
:: هاولچ سويتهاا
هدوء :: شعبالچ لعد يلة بيبي من رخصتچ اروح اربي ها ي حفيدتچ طالعة عينهاا كلش
جمارة :: اي والله يمةة بلكت تعقليها راح تطير الزلمة من ايدهاا وتبقى تنووح
جوري :: شكو شصاير ؟
هدوء :: معليچ انتِ التهي بدراستچ بعددچ طفلة
جوري :: يااا اني طفلة
::اهووو راح يتعاركن يلة تعالي فضني راح يجي
الزلمة
هدوء :: يلة امشي اني هم مااگدر اتأخرر اطاني ساعتين بسس
_سحبتني من ايدي ودخلتني للغرفة صفنت بوجهي وضربتني راجدي قووي لزمت خدي متفاجأة
::عززة بعينچ هااي ليش هيچ
هدوء :: شوفي شاربچ العووبة لاتگليلي من يوم العقد محافةة
:: اي
هدوء :: نيالي اي والله متگليلي عليمن الزلمة كاتل نفسة علة شواربچ لو حواحبج المكانيس
:: نچبيي هدووء ترة الشعر خفيف ميبن لا تسويني كلش
هدوء :: واذا يخلي وجه بوجهج هم ميبين دگعدي گعدي راح الوقت خليني اشتغل واسولف
_گعدتني اول مابدت بوجهي حفتة كلةة وسوت حواجبي تشتغل وترزل بيةة وراهةةة سووت جسمي كلة بالشيرة والله شعرر كلش خفيف ميبين تگلي بالتلمس يبين صايرة كلشس ولاتستحي خلصت طلعت للحمام اسبح وهية بقت جلفت نفسي وطلعت لگيتها فاتحة الكنتور وواگفة تگلب بالملابس
::شعندچ بهاي الخانة ترة ذني ماالبسهن لاتحاولين
هدوء :: مو هية بكيفچ گليلي رجلج يالون يحب
:: شمدريني اني
هدوء :: شنوو شمدريچ صارلچ كم شهرر وياه بنفس الغرفة شتسوون يعني
:: بس نتعاررك
هدوء :: امداچ ، لعد خليني اختار على ذوقي هذاا يخبل يطلع على جسمچ ويوالم بشرتچ
_سحبت واحد لون بنفسجي فاتح يخززي صحت بيهاا
:: لچ هدووء هذا بطول چفي شيستر شيضمم نچبي ورجعي البس بجامةة واناام
هدوء :: والله تلبسيه واذا ماسمعتي كلامي الزم الماسحة ووين اليوجعجج تعالي خليني اسوي شعرچ ولتعترضين ولچ بعدين تشكريني سمعي مني
_گعدتني وشسورت شعري صاار سرح مي مكيجتني مكياج خفيف خلصت كلشي وگامت لبست عباتها لان رجلعا دگ عليهاا تلبس وتحجي
هدوء :: بروح ابووچ لبسي وخلي الزلمة يشووف دربة واريدچ تصيرن نازكة ولو بس اليووم ترة حرام عليچ هو يحبچ وانتِ گليلي انتِ تحبيي لو لااا
::هاا اي احبةة بس ماگايلة الةة
هدوء :: اليوم اعترفيلة بمشاعرچ مو بس هو مشعبچ غزل وانتِ يابسةة
:: حبيبتي هو يتغزل بس يرزل بنفس الوقت
هدوء :: هو هيچ طبعةة سايري شفق وطلعي من حالتة لان على كلامچ المر بيه مو قليل لاتصيرن انتِ والزمن عليه
:: صايرة خووش تحچين ماعرفتچ
هدوء :: انتِ ضلي مستهانة بيةة راح اصير ام وانتِ تقليدينن عليةة
:::ههههه احلى ام والله
_رحت شبگتها وبستهاا
:: شكراً هدوء
هدوء :: شنو هالحچي بينة هالرسمياات يلة اني اروح الزلمة نشتل برة وانتِ سوي مثل ماگتلچ اريد اسمع الاخبار الزينة منچ بااچر
:: الله ويااچ
_ هية طلعت واني قفلت الباب استحي احد يشوفني اخذت الثوب اباووع عليه ومترددة شلوون راح البسةة خااف يفشلني ساعة اني مگابلتة وگاعدة اخر شي سمعت صووتة برة بسرعة اخذتة ودخلت جوة الغطةة لايشووفني
_سمعت الباب انفتح اخذ هدووم وطلع يسبح بقيت على نوومتي دگت الباب جوري
جوري :: شفق تعالي تعشي
_حچيت من جوة الغطة
مااريد ماريد
جوري :: شجاكم اليوم لاانتِ ولارجلج شنوو مسوين اضراب
_حچتها وراحت عززة يعني راح يرجع هنااا ميتعشة گمت بسرعة قفلت الباب ولبست الثوب اباوع لروحي بالمراية اول مرة البس هيچ لبس ثوب قصير الجوانب تول خفيف الجسم مبين منة الحمالات خيووط رتبت شعري رشيت العطر صافنة وسمعت الباب ينفتح وراها ندگ اجاني صووتة
صارم :: الباب ليش مقفوول ووينچ
_يمةة عزة بعينچ هدوء شلوون اوگف گدامة هيچ والله عيبب فززني صووتة
صارم :: شفق جووة؟
:: ها ااي
صارم :: فتحي الباب شكو قافلتةة
:: اي هسة لحظةة
_سحبت نفس اقوي روحي وفتحت الباب وختلت وراه دخل وهو يحجي
صارم :: شكوو قافلت...
_گطع كلامة من وگعت عينة علية صفن وعيونة تتجول على جسمي زينت شفافة ابتسامةة دنگت راسي مستحية من نضراتة تقرب مني رجعت لزگت نفسي بالباب مد ايد رفع راسي بهدوء يباوع بعيوني
بلع ريگة وحچة
صارم :: هذا الجمال كلة الية؟
_هزيت راسي موافقة اخذ ايدي لناحية السرير
نومني وراح طفة الضوة نزع تشيرتة وتقرب علية
صار فوگي عيونة تباوعلي بكل حب احسةة ممصدگ
صار يوزع بوساتة بكل وجهي اديه تتجول على جسمي ترسم مفاتنة ويهمسلي بكلام يخليني اضيع وياه لزمت وجهه باوع بعيوني بتساؤل تقربت بستة من شفتة اول مرة اسويهاا تصنم يباوع علية همست
بخفوت
::احبك
_فتح عينة متعجب حضنتة بكل قوتي حس اطيتة أشارة بموافقتي لقربة تقرب مني بكل حب كل شوية يسألني اذا متأذية اهز راسي لااا الى ام صرت مرتة سحبني لحضنةة حيلل باسني من شفتي وگاال
جملتة يعبر بيها عن حبة اليةة
صارم :: أحبچ حب يوجع، بس وجع يخليني عايش.
_ضميت روحي بحضنة مستحية شدد حضنتة اكثر
شعور حلوو واني بهالقرب منةة يختلف عن الايام السابقة احسس كل الحواجز البينة نشالت والضروف الجمعتنة تبخرت حسيت من هالليلة اني مو شفق المتشردة وهو لاصارم المغدوور حسيت اثنين حبوو بعض وتوجوا هذا الحب بالزوااج
_كلام بيبي وهدوء چان الية كفخة صحتني لزمااني
طوول الأيام الزعلانين بيهاا افكرر واراجع حساباتي كلشي بية يريدة ليش اصددة بس چنت محتاجة دفعة محتاجة نصيحةة احدد يفتح عيوني على اشياء مااشوفهاا او غالفةة عنهاا وهنة ماقصرن وياي
_الصبح حسيت بوساتة تطبع على وجهي فتحت عيني مبتسمة شعرة مبلل ومبدل گاعد قبلي
حچة
صارم :: يلة يحلوو اگعدد اريد اشوفك
:: ليش مشايفني قبل
صارم :: البارحة اول مرة اشوفچ بيهاا اخخخ
شلون شووفة
_غطيت راسي مستحيةة
:: صاارم عيب لاتخجلني ترة والله ازعل عليك
صارم :: اويلي يابةة كلشي ولازعلچ يلة گومي اريد ريووگ من ايدچ الحلوة
:اممم مو علساس ريوگي مو طيب
_سحب ايدي باسهااا
صارم:: السم من أيدچ طيب يلوعتي
:: اسم عليك حبيبي
صارم :: حبيبچ من شوكت شفق من شوكت ليش عليتي گلبي لعدد
:: من زماان بس ماادري والله ماادري من حسيت روحي راح اخسرك عرفت حبك مزروع بگلبي واني ماادري
صارم :: احبچ احبچ احبچ
:: هههه كافي ترة راح انغر عليك
صارم:: واني ماعندي اعتراض كلشي منچ استقبلة
:: وهذا الحببني بيك حبيبتني بكل حالاتي
_ابتسم بوجهي سحبت ايدي منة وبستة ونهضت من الفراش الافة روحي بالغطاء درت علية صاافن بية صحت بيه
::ديررر وجهك استحي ترةة
صارم :: كلة شافناه البارحة حبيبتي
_يحچي ويغمزلي
::صااارررم
صارم :: طالع من الغرفة بس لاتتخبلين عليةة
_اخذ تليفونة وطلع لبست شي فوگ هدومي واخذت ملابسي ورحت للحمام سبحت وطلعت لگيت تليفوني يدگ باوعت هدوء شلتة بدون سلام سألتني
هدوء :: بشري حمامة غراب
:: هههههه حمامة
هدوء :: گللووووش واخيرا ً
:: هههه ولچ شو خجلت
هدوء :: مبروك حبيبتي والله الليل كلة افكر بيچ
:: الله يبارك بيچ
هدوء :: يلة هسة لبسي شي مال عرايس مو تلبسين تراك اكتلچ وشعرچ عوفي مفتوح لاتضفري عقدتيني بالضفيرة انتِ واختچ
::: هههه مو بيبي متقبل تگول يتگطع
هدوء :: بس هاي الأيام غير عروسة عشتوو
:: هههه صار ادللي يلة روحي
هدوء :: الله ويااچ حبيبتي
_سديتة منهاا وبدلت كلبية وردي حلوة هو جايبهاا اصلاً ملابسي كلة هو مشتريهن وذوقة يخبل مكيجت خفيف ونشفت شعري رفعتة منا ومنا وعفتة مفتوح طلعت لگيت بيبي تسوي الريوگ وصارم يمهاا بس شافتني طگتهاا هلهولة عباللك گلبها حسس بس
وين احنةة مفضوحين من البارحةةة
:: كافي بيبي والله عيب، انتَ مكيف عيني
صارم :: شعلية قابل اني هلهلتت
جمارة :: الف مبرووك يمةة يووم اشوف جهالكم
ان شاء الله
:: حبيبتي بيبي
_رحت بستهاا وگعدت اتريگ لگيت بيبي مكملة الريوگ مانتضروني اسووي گعدنة ناكل وهو يسوي لفات صغار ويوكلني ولايستحي وبيبي مكيفة علينةة
_اسبووع مرر يمكن احلى اسبووع بحياتي صارم
عاملني مثل الالماسة وشايلهاا بيدة يخاف لاتنخدش
دللني دلال صدگ حسيت نفسي عروس يخلص اليوم وياي مابقى مكان مااخذني الةة فراني بغداد كلهاا اماكن بحياتي ماشفتهن صرت اشوفة احلى شخص بعيوني عبالك هسة يلة انتبهت عليه الاناقة والجمال ماشفتهن برجل قبل رجولتة وحضورة يفرضة بكل مكان يدخل الةة حسيت نفسي وياه صدگ انثى وادلل عليه واني هم ماقصرت بحقة كل يووم اصيرلة عرووس كلشي نحرم منةة عوضتة الةة
ماانام الة وجه اافجرر
_بس اعرف اني الفرحة مادووم الية ولاالسعادة تلوگلي وصدگ المنحوس منحوس
_اليوم جمعة جوري مختنگة امتاحناتها مابقى الهن شي والنهار كلة تقرة ونفسيتها تعبانة هالفترة صارم من شافهاا هيچ اقترح علينة نطلعهاا تغير جوو قبل الامتحانات بالگوة گدرت اقنعهاا عفت صارم يبدل ورحت لبيبي دخلت لگيتهها عيونها لجوري مبتسمة وتسبح گعدت يمهاا لزمت ايدها اقنع بيهه
::بيبي حبيبتي امشي ويانة هسة لو اعرف شعندچ
گاعدة وحدچ هناا متضوجين من البيت؟
جمارة :: لابيبي مااحب اطلع خليني هناا راح يصيح الله اكبر اريد اصلي
:: بداعتي بيبي بداعتي والله الطلعة تصير حلوة
ويااچ صارلچ هواي مطالعة
جمارة :: لاتلحين ولچ بيبي والله مالي خلگ روحي تأخرتي منتضريچ
جوري :: دگومي يابيبي هية هاي اخرر طلعة
بعدد منا لورة الامتحانات يلة
شفق :: اي والله راح ننحبس وياهاا
جمارة :: يبوو لاتلحن گتلچن مااروح تعالل صارم اخذ مرتك واختها دوخني
_على صوتها دخل صارم مبدل
صارم :: ها جمارة شبيچ وية مرتي
جمارة :: شبية خالة شمسويتلهاا بس هية تفت الگلب اگلها مااروح ماتقتنع
صارم :: وليش يابة ماترحين يلة گومي بدلي لاتتعزين علينةة شعندج وحدچ
جمارة :: يااا والله حلوة اريد ابقى وحدي ارتاح منكم شنو طالبيني بطلابةة
_توسلنة بيهاا كلنة ماقبلت عفناها براحتهاا وطلعنة
اخذنة للمطعم تعشينة وراها للمتنزه گعدنة هناك سوالف وضحك گدرنة شوية نغير جو لجوري تغيرت نفسيتهاا لليل يلة رجعنة اخذنة عشة ويانة لبيبي
_وصلنة للبيت الباب مفتوح باوعت لصارم بخووف
:: الباب انتَ عايفة مفتوح؟
صارم :: لاسديتة بيدي شلون اعوفة
_دفعني ودخل يركض ركضت وراه وجوري وراية لگيتة واگف اباب الصالة وصاافن بصدمة تقربت منة خايفة وگعت عيوني على المكان الصافن عليه فتحت عيوني على وسعهاا واني اشووف المنظر لرجع شفق لنقطة البداية وقضى عليهاا...
شكرا لزيارتكم عالم روايات سكيرهوم
