رواية الهاويه الفصل الثاني بقلم جمانه السعيدي
نور....شكد جانت امي بعبده عني بعد ماحجيت الابوي صارت تحقد عليه اكثر واكثر
ارجع من المدرسه الكه الشغل كله منتضرني
انضف المطبخ واخلص الشغل واصعد ارتاح بغرفتي
اتفاجئ نسوان الجوارين فوك راسي بغرفتي
نايمه والنسوان كاعده يم راسي تحجي عليه
امي دازتهن يحجن عليه
كل وحده السانه شطوله
....ليش هيج خاله نور ماتساعدين امج خطيه الشغل كله عليه
تجين من الدوام وكبل تنامين
ليش ماتساعديها بنات آخر وكت
لا يستحن ولا يخافن
ابقه صافنه شنو مااساعدها اني اذا مااخلص الشغل كله مااصعد انام
جمانه السعيدي
نزلت جوا لكيت امي واختي كاعدات يسولفن ويضحكن
نور...ليش ماما ليش هيج
تضحك وتهز ايدها وترد عليه
امي...شنو طار نصج لو شافن حجولج
نور...اني نضفت وصعدت
امي...ووين التنظيف هو هذا هم تحسبينه تنضيف
نور....ولله حرام عليج يعني الجوارين تتفرج علينه
صيحي عليه وكولي انزلي نضفي مو اتفاجئ
النسوان كاعدات يم راسي
امي.....يطبج مرض شنو استنكفتي لان حجيت عليج
نور....الشغل تقسيم بلبيت مثل مااني ارجع هلكانه من الدوام وتردين مني شغل خلي رزان تهز نفسه شويه
رزان... اش ولا كلمه لا تقربين عليه ولا تساوين نفسج بيه
نور...ليش عيوني اني بت البطه السوده
امي...يوم اسود الي صرتي بي وثاني مره اشتغلي وانتي ساكته لا تقربين على رزان ابد
نور....مايفيد الكلام امي مستحيل تتغير هذا طبعه صعب تغيره
طبعا هاي المعامله وياا اختي نورهان
نفس المعانا والتفرقه
مااعرف ليش هيج تعاملنا ثنيبنه
محد مهون عليه العيشه غير ابوي وطيبته وحنيته علينا
من كد ماتفرق بلمعامله بينا وبين رزان
كامت رزان تكرهنا وماتختلط بينا اكثر وقته كاعده وياا امي
اما اني ونورهان النا رب العالمين
جمانه السعيدي
قررت اركز بدارستي وابتعد عن المشاكل
فعلا كمت اخلص شغلي واصعد الغرفتي اقرا
منا لمن خلصت اعداديه
طبعا هذا الكلام مو يعني ماكو مشاكل لان امي تخلق المشاكل من جوه الكاع بس اني تعلمت على كلامه
كمت اسمع واسكت
على كلام ابوي مااريد مشاكل
كنت انقهرت من التفرقه بلتعامل بيني وبين رزان
بعمري ماحسيت بحنان لو حب عشت وكبرت واني احس بنقص بداخلي
امي الي خلقت هذا النقص ومحد عوضه ابد
كنت ادور بيني وبين نفسي عن حب حقيقي
كبرت وصرت حلوه وشكلي حيل مميز بيضه وعيوني حلوه جسمي متناسق
صرت ملفته للانتباه
دخلت كليه كلية تربيه اروح وارجع بطريقي
محد يقرب عليه رغم شكلي الحلووو بس مادخلت بعلاقه ابد كنت احسد البنات الي عدهم علاقات
ويحبون حب حقيقي
بس اني مااعرف ليش مادخلت هيج تجربه
يمكن مااعرف اجاوب وياا الشباب
منا لمن وصلت المرحله الاخيره
هنا صار الحدث الأهم بحياتي
بيوم احتاجت كم شغله اريد انزل للسوك اشتري كم حاجه
من اجا بابا طلبت منه ياخذني للسوك
لان امي ابد ماله شغل بيه ولا تهتم الطلباتي اني واختي
نورهان
فعلا العصر اخذني بابا ورحنا
بوكته بابا كان تعبان يعني جاي من الشغل تعبان
بس مايحب يكسر خاطري
اخذني ورحنا اني ويااا جمانه السعيدي
من نزلت من السياره بابا مانزل
نور.. هااا بابا مانزلت
بابا....شوبه تعبان روحي اشتري الأشياء الي ترديها اني انتضرج هنا لا تتأخرين عليه
مابيه حيل افتر على المحلات
نزلت وحدي اربد اشتري كم حاجه وارجع الابوي
هذا اليوم اول يوم نزلت بي للهاويه برجليه
كنت اعتقد اني التقيت بلانسان الصح الي راح ينقذني من عذاب امي ويعوضني الحب الي افتقدته
امشي وصار كدامي شاب بس مو شاب ضيم
جمال واناقه ووسامه ورشاقه وشياكه وحضور
علي طله تذبح تسحل اكبر وحده
كل هاي الأشياء شفته بي
من اول نضره اخذ كلبي
يمكن هو حس من هاي النضره إعجابي بي
عيوني واني اباوع علي كانت فاضحتني
دنكت ومشيت اجا وراي
امشي ويمشي وراي
اشتريت وكف بصفي
خالد...ممكن نتعرف
نور سويت نفسي ماسمعت اشتريت ومشيت
رجع يمشي وراي
مااخفي عليكم اني كنت فرحانه ب صراره يتعرف عليه
فرحانه واني اسمع منه كلام حلوووو
امشي واكول معقوله هو هذا العوض من رب العالمين
ياربي شكد حلوووو
بقه يمشي وراي ويسمعني كلام حلووو
خالد...ياعيوني انتي ليش ماتردين عليه
... اوكفي خل نتفاهم ليش مستعجله
...لا تتوقعين من تتجاهليني راح اعوفج
...مستحيل انتي اليه ومراح تصيرين الغيري
نور.. كل كلامه هذا كان يعزز غرور الأنثى بداخلي
كنت طايره من الفرح
طبعا هو حس اكو قبول من ناحيتي بس الخجل كان مخليني متردده
خالد...على الاقل اخذي رقمي وخل نحجي نتعرف إذا ماعجبتج
لا تحجين وياي خبلتيني يابت الناس
ووين جنتي من زمان
لا تتوقعين راح اعوفج اذا ماتحجين ويأي اروح وراج الببتكم
نور...كنت مامصدكه الي جاي اسمعه ياربي هذا وين جان
معقوله نضره وحده مني هيج يبقى لا حكني
جمانه السعيدي
اخر شي من خلصت كل الأغراض الي اربدهم وقررت ارجع للسياره
خفت لا اضيع مني هاي الفرصه
انسان حلو ومرتب وصار ساعه لاحكني خاف اصعد بلسياره واضيعه
كنت مثل الغركان ويريد يتمسك بقشه
خالد كان هاي القشه
الي اتوقعت راح ينقذني من وضعي بس مع الاسف
غرقني اكثر واكثر
المهم التفتت علي راسا خله الرقم بايدي كان كاتبه على ورقه
انطاني الرقم وابتسم
هاي الابتسامه فتحت كلبي وتربعت بي
ماكنت مصدقه الي جاي يصير وياي
رجعت للسياره واني مبتسمه
وهو بقه واكف وعينه عليه
جمانه السعيدي
فتحت باب السياره واني بعدني عقلي وكلبي وياااا
لمن سمعت بابا كال
بابا...هااا بابا كملتي
هنا يله فصلت ورجعت للواقع رديت اي بابا كملت
صعدت بلسياره ورجعت اباوع علي شفته واكف بنفس مكانه عينه عليه
من مشت السياره رفع ايده سلم عليه
بيومها حسيت نفسي اسعد انسانه على وجه الارض
شايفين واحد يلكه كنز
اني احس نفسي لكيت كنز
صعدت الغراض فوك وفتحت الرقم شفته
ياربي معقوله الي جاي يصير وباي
نزلت حضرت العشى ونضفت المطبخ لان مااريد اسمع كلام من امي يعكر مزاجي
اني اليوم فرحانه طايره من الفرح
كملت كلشي وصعدت الغرفتي كانت هاي اخر سنه البه بلكليه ولازم اركز حتى اتخرج
طلعت الكتب قريب شويه بس بالي يم خالد
طلعت الرقم
بوقته ماكو نت بس كان اكو الخدمه المجانيه الي تبدي من الساعه ١٢بليل للصبح
اترددت اتصل بعدين خوفي لا افقده خلاني اتهور وارن علي
لو شكد مااحجيلكم مستحيل اوصللكم شعوري بلحظته
كل الأشياء الي فاقدته بحياتي انجمعت بي
كنت اشوفه راح تجي وياااا وكانما العوض اجا وياا جيته
كنت أريد اتمسك بي اخاف افقده
احسه هو طوق النجاة اذا تمسكت بي راح يخلصني
اتهورت ورنيت علي بعد مااكدر اصبر اكثرر
نورهان نايمه
بس اتصلت بي اقصد رمشت علي رنه وحده وبس
وكانما كان منتضرني
راسا اتصل عليه
خالد....هله وكل الهله منتضرج على نار ماتعرفين انتي شسويت بيه من شغتج الهاي اللحظه ووضعي كله مخربط
لا أعرف اكعد ولا اعرف انام ولا اعرف اكل ولا اشرب
نور....ههههه
خالد. اي اضحكي خل اسمع هاي الضحكه الحلوه
اريد اعرف اسمج
نور.... حجيت بصوت ناصي نور
خالد ... اسم على مسمى انتي النور كله انتي النور الي دخل حياتي بعد ماكانت ضلمه
نور. على كيفك اني مو كد كلامك
خالد...اني اصلا بعدني بالمقدمة بعدج ماسمعت شي مني
خل اكلج شي اليوم لو ما ماخده الرقم مني صدكي اجي وراج البيتكم
انتي ماتعرفين شسويتي بيه أحلفي انتي مو ساحره
نور...يااا شنو ساحره
خالد....لعد ليش بس عيني وكعت عليج تخبلت
نور...اسم الله
خالد...اربد اكلج شي من البدايه انتي الي ومستحيل واحد ياخذج غيري فهمتي لو لا
نور....اي فهمت ههههه
خالد...يابعد اهلي وطوايفي شنو هلضحكه الحلوه
..
.
نور.......بالنسبه اليه هاي كانت بداية الحب والتعلق والاطمئنان بوجود خالد بحياتي
خالد اجا وسد الفراغ الي جنت اعاني منه احس نفسي صرت انسانه ثانيه
مو نور القديمه ابد
اني اليوم وحده ثانيه وحده جديده تحب وتنحب
بعد ماكنت احس نفسي منبوذه
لان وجود خالد بحياتي خلاني احب نفسي
هلكد ماحبيته وتعلقت بي
كمت احب نفسي لان هو يحبني
