رواية خيط الدم الفصل العشرون بقلم زينب طالب
اشيلك من خَيالي وترد مثل الشيب
تعبت وياك كل ما تنشلع تكثر
...............
جوري...
باوعتلة منتضرتة يحچي ولازمة گلبي تنهد وگال..
صارم :: الضابط اكرام
فتحت عيوني على وسعهاا اباووع عليه متعجبةة مااعرف سمعت صح لو غلط رجعت سألتة شفق
شفق :: اكرام اكرام ضابط التحقيق ماغيرة؟
صارم :: اي هو ماغيرة حاچاني اليووم اجاني للشغل مخصوص علمود هالموضوع
شفق :: شمعنى بهالوقت يعني هسةة يشووف وقتنة مناسب للخطوبة وهالسوالف؟
صارم :: قابل شفتِ جاب عمامة واجة خطب الولد حچاها يمي يريد كلمة حتى يحجز ومن يصير الوقت المناسب يتمم الباقي شگلتِ جوري؟
شفق :: واحنة شنعرف منةة صارم اني اختي مااطيها لأي احدد اذا ماواحدد ثقة ويعوضها على الشافتة ويدللها مااطيها مو حمل مصايب بعدد كافي الصار وياهاا قبل
صارم :: لعد اني الاطيها شلوون ماكان انتِ مدري شلون تحچين اذا اخذت الموافقة منهاا اروح انبش جدة السابع عشرر واخليه عليه شرووط اكسرر ضهرة بيهاا غيرر اخيتي هاااي
شفق :: متقصر حبيبي الله يخليك النةة
_همة يحچون ويتفاصلون واني بعدني ممستوعبة يعني شنوو يحبني هوو واجاني يريد يتزوجني لعد ليش صار فترة مختفي وگطع بية وخلاني اشك يلعب على مشاعري گطع صفنتي صووت شفق وهية تسألني
شفق :: هاا جوري وين صفنتِ مو نحچي ويااچ؟
::شنوو؟
شفق ::موافقة على الضابط اكرام لو لا
::مااعرف
صارم :: هو شنو المتعرفين اي لو لااا الزلمة منتضر جوااب ترةة
شفق :: على كيفك صاارم شسالفة ترة الشغلة مو هينةة غير تفكر تشووف يناسبهاا لو لااا
صارم :: والله انتن تتعايرن هية مبينة ذيچ هية بس تحبن الدراماا بكلشي
شفق :: ياا تر هذا زوااج يعني عشرة عمرر مو موضوع عاادي
صارم :: چا اني من اجيتِ وخطبتيني مو وافقت بسرعة وماشلعت گلبچ
شفق :: اهووو شوكت تنسى عادد
صارم :: كلشي منچ محفور بالگلب محبوبي
عفتهم يتغزلون وگمت عنهمم اريد اصفي باللي واركزز تمددت بفراشي ونرسمت صورتة گبالي وهو يباوعلي نضراتة كلها حب يعني شنوو يحبني ويريدني بس خااف افشل لو اهلة مو زينين ويأذوني خاف يتكرر عليه الماضيي ويطلع يضحك علية شلون اثق وأمن بيه واسلمة گلبي وحياتي
راسي صار يوجعني من التفكيرر دخلت عليةة شفق صاحت
شفق :: گومي گومي مو عفتِ علية الغدة وشردتي تسوين سوالف العرايس تعالي ساعديني
::شبيچ يمعودة فززتيني ترة هسة جااية روحي
شفق :: لاتتأخرين
:: اي اي
عافتني وطلعت گمت وراهاا صارم چان بالحمام يسبح وهيةة تشتغل اني مسوية المرگة وهية ركبت التمن صار معجن مو قوية بالطبخ هية بس اني اعرف بيبي الله يرحمها كلشي معلمتني
گاعدين نتغدة وسط هدوء تاام وعيوني لمكانهاا فارغ رفعت عيني لشفق عيونهاا مدمعة عرفتهاا ذكرتهاا ولو احنة ماناسيها حتى نذكرهها احس لهسة صوتهاا بأذني وهية تصيح عليةة
بيبي جوري گعدي راح عليچ الووقت...
جورية تعالي تريگي وياي مااعرف اكل وحدي...
ولچ جوري گومي صلي فاتت الصلاة ...
نزلت دمعتي مسحتهاا بسرعة مااريد يحسون علية
بس خلصنةة گلت لشفق تروح لغرفتهاا اني انضف بس سوت چاي لرجلها وراحت نظفت المطبخ وخلصت ودخلت للغرفة ماعندي شي اسوي
رحت توضيت ولبست مالت الصلاة وگعدت اقرة قران الهاا يفيدهاا احسن من البچي والعتااب
ايامنة مرت مثل بعضهاا مابيها كل جديد صارم گال فكري على راحتچ ورديلي خبرر اكيد شفق محاچيتة
خلصت العطلة وصادفت اربعين بيبي ماداومت بيوومها سوينة ثواب لروحهاا اجتنة هدوء وعيالهاا
وابوها وامهاا النسوان اجني من الصبح لأن طبخ خطية ام هدوء تكفلت بكلشي والحجية وياهاا
راد صارم يجيب من المطعم بس ماقبلت وگالت اني اطبخ للحجية بأيدي عاد قبل يووم تسووگ وجاب ذبيحة طبختها وتمن وحشوو وتبسي سووت وفواكة وخيرر من الله وزعنة نصةة وتغدينة منةة ماراحوا بقو يمنة لأن صارم أجر كيةة ياخذنة للنجف كلنة
باليل طلعنة شيخ جعفر وياه وهناك واشوف شخص گاعد بالصدر عرفتةة اكرام صعدت اني ورة وشفق وهدوء رغم حامل بس عاندت واجت وياناة وامها وعمتهاا اكرام نزل من الصدر وصعد عمو ابو هدوء صعدوا يمنةة بس بالمقاعد الامامية ونطلقت السيارةة بينةة
نص اليل وصلنة للامير علي (عليه السلام) زرنة
بقينة لحدما اذن الصبح صلينة وتوجهنا للمقابر
بس وصلنة هناا نعادت علينةة الفاجعة وعبالك اليووم فگدناهاا بقيت ادگ والطم وشفق اسووء مني
هدوء تخربطت اجةة رجلها اخذها ويحچي عليهاا
هية مناا تعبانة من الحمل اخررشي صااحت بينة
الحجية ام جعفرر
ام جعفر :: كاافي حراام لدسوونة انتن هذا جزع هيچ دتأذنهاا بدال متقرن قران دعااء ينور قبرهاا تأذوهاا باللطم والبچي ليش هيچ ياامي ليشش
بقت تحجي علينةة سحبتنة ام هدوء وغسلت وجهنةة قرينة قران وطلعنة من المقابر الحجية لازمتني صارت عيني علية يباوعلي مكسور خاطرة درت وجهي روحي رايحةة وتعبانةة صعدنة بالسيارة وانطلقنةة للبيت كلمن راح لبيتة بس سبحت ونمت
ثاني يووم داومت بدة الدوام من كم يوم بس اني مارحت چنت منتضرة الأربعين يلة اداوم دخلت للصف تلگتني عبيرر شبگتني وصاحت
عبير :: حبيبتي جوريي والله خفت عبالي بطلتي
::ليش ابطل؟
عبير :: مو حضي واعرفة شكو وحدة اتعلق بيهاا لو تبطل لو تمووت
::خاف امووت ولچ
عبير :: يمة اسم الله عليچ شلونچ والله اشتاقيتلچ
شصاير بيچ ضعفانة يمعودة راح تنگطمين
:: شسووي مااشتهي والله اجبر نفسي لخاطر شفق وهية هم تجبر نفسها لخاطري وحدة تواسي الثانية
عبير :: الله يساعدچن مصيبتچن چبيرة
::شوكت النتائج ماعرفتِ
عبير :: بلكت اليووم والله اريد اعرف حتى اقط ابوية بهديةة هو وعدني
::شيجيبلچ؟
عبير :: گال ابدل تليفوونچ
::شگد تحبين التليفونات
عبير :: قابل اكو احلى منهن صدگ انتِ عندچ جهاز؟
::لاماعندي ومااحبة
عبير :: يااا اكوو احد ميحب الجهاز ويتصفح بيه يشوف الدنيا شبيها مابيهاا
:: يمعودة كافي علية بيتنة والمشاكل اروح اشوف مشاكل الدنيا همم
عبير :: هاا شكووو شصاير شي جديد سولفي
گعدت يمهاا وخرطتهن كلهن مابقيت شي دگ الجرس واحنة نسوولف اخررشي سولفت الهاا على اكرام صااحت
عبير :: وافقي وافقي شمنتضرة يحضي
:: اخاف عبيرر اخاف اكرر التجربة مرة ثانية
عبير :: ولچ هو زواجج الاول هم حاسبتةة انسيه يمعودة انسيهه وعيشي حياتچ لعد تبقين هيچ
::انسى لاوالله جذب انسى الاذية لعشتهاا هناك جذب
عبير :: عمي لاتنسين بس تخطي وعيشي حياتچ جوري الرجال مبين شاريچ لو ملعب چان بقى بس يراقب ويبصبص بس الزلمة اجاج من الباب وطلبچ من اهلچ شمنتضرة بعدد
::مااعرف شس عنةة شلون اوافق
عبير :: طولي فترة الخطوبة عسما سنةة لحد ما تعرفين اطباعةة وكلشي يخصة يلةة تتزوجين
::وشفق اعوفهاا وحدها؟
عبير :: شنو وحدهاا ترة اختچ مزوجةة وعدهاا حياتهاا باچر عگبة يصير عدهاا اطفال وتلتهي وياهم ورجلها حسب كلامچ يمووت عليهاا شعليهاا بعدد
:: الله كريم
عبير ؛: ونعم باالله بس رجعي الجواب اليووم
للرجاال خطية صار هواي منتضر
::لامو هسةة خاف يريد يخطب
عبير :: وشنو يعني بعدد احسن يصير كلشي رسمي
::شبيچ عبير ياخطووبة ترة بيبي ترابهاا بعدة اخضرر والله يومي بالگوة يمشي نوب اروح افرح وانخطب صدگ تحچين
عبير :: هااا لاتبچين يلة براحتچ بس خليه يگلة موافقة بدون خطووبة مناا لحدما تمر فترةة وراها تنحل وهسةة گومي راح ننكتل ترة اجة الدرس الثاني واحنة نصرچ بالحچي
::يلة گومي
_گمت وياهاا رحت للصف سلمت على باقي البناات
والتهينة الدروس هواية انطونة واجبات، وخلص الدوام وهم ماكو النتيجةة طلعت بالباب كالعادة انتضر صارم والمحة من بعيد درت وجهي نزل من سيارتة واجةة ناحيتي باوعلي وگال
اكرام :: شلونچ جوري
::زينة
اكرام :: صحتچ شلونهاا
::الحمد لله زينة
اكرام :: دوومچ يارب، جوري
::هاا!
اكرام :: مو طالت المدة؟
::أي مُدة
اكرام :: لتفكرين بيهاا طولت حيل
::عفية اكرام اني...
اكرام :: اعرف اعرف وعاذرچ بس مو كل اصابعچ سوة جوري مو صح؟
::صح كلامك بس موبيدي والله
اكرام :: شوفي يبنت النااس خليني احچيهاا الچ من الأخير مو ال....اكرام ليأذي مرة ويستقوي عليهاا
لو يتخذها وسيلة يفرغ شهواتة بيهاا اني رايدچ شريكة حياتي وام جهالي وشاريچ بعيوني
وافقي وخلي ثقتچ چبيرة بيةة وماراح تندمين اني ماردت اخوون صاحبي واجي احچي ويااچ من وراه بس ردت ابين الچ الصورة و اگلچ
" اكرام شاريچ ولو تطلبين عيونةة مهر ينطيهن الچ بدون تردد"
كمل كلامة وعافني وراح واني صافنةة عليه فززني صوت صارم درت عليه باوعلي بشكك وسألني
صارم :: شبيچ صاافنة عالشارع منو شفتًِ
::هاا محد بس سرحت شووية شو تأخرت
صارم :: لاماتأخرت بس انتِ طالعة من وقت اليوم
::ها اي يمكن يلة نروح تعبت
صارم :: شبيچ جووري صاار شي احچي احد ضايقچ؟
::لالا مابية شي بس اني تعبانةة من البارحة وداومت بالگوة
_باوعلي مامقتنع درت وجهي ومشيت قبلة لحگني وصاار يمشي گدامي مستعجل واني اركض وراه
يادوب الحگ بخطوواتة وصلنة للبيت لگيت المطبخ مگلوب گلب وشفق گاعدة تبچي ركض عليها صارم گاعدة گدامهاا ويسألها خايف
صارم :: شبيچ حبيبتي شصاير ويااچ ليش هيچ حالتچ وشبيچ وتبچين
شفق :: من رحتو لهسةة متحزمة واسوي دولمة
وعلى المقادير بسس
صارم :: بس سنوو
شفق :: لفيتهاا وكملت واني احس ناقصها شي اخر شي تذكرت ما مخلية الهاا تمن
صاؤم :: چا شخليتي
شفق :: بس خضروات
_هية حجتهاا وهو گعد على حيلة يضحك واني وياه وهية تحچي علينةة
شفق :: تضحكوون عليةة موو مو صوچكم والله كلةة مني ردت اسويلكمم مفاجاءة ادري بيكم تحبوون الدولمةة بس طلعتوا ماتستاهلوون
صارم :: لچ لو مركبة التمناات هيچ وياهن لبن هم احسن مو دولمة بدوون تمن شنوو مسوية دايت
شفق :: صاارم كاافي عقاباً الك تاكلهاا كلهاا
صارم :: لاعمي اني اكل بيض وطماطة ومااكل دولمتچ الرشيقةة
شفق :: والله اذا ماتاكلهاا ولااحچي ويااك بعدد
وانتِ يلة نضفي المطبخخ تعبت ترةةة
_عافتنة وطلعتزعلانة ركض ورةهاا واني اباووع المطبخ صاير بيه انقلاب هاي لبنية شوكت تتعلم الطبخ الجدر على النار يفوور عفتة ورحت بدلت وصليت وطلعت
انضف الهوسة لمسويتهاا نوب كل شوية افتح الجدر بعدو مناشف مدري شگد مخلية مي
خلصت كلشي يلة استوت گلبتها بالصينة وهمة يمي يباوعون رفعت الجدر شو هاي مايعة عباارة عن سلگ مسحونة روحهاا صارم بالگوة لازم الضحكة وهية تراقب بيه خااف يضحك گعدنة ناكل لاتنلزم ولاتنشال خليت لگمة بحلگي حشى نعمة الله تلعب النفس حامضة على ماصخة على حارة
اني وصارم واحد يباوع للثاني اذا نحچي تبتلي وتريدنة ناكلهة وهية متاكل خلصتهاا زلاطة حچة هوو
صارم :: اكلي حبيبتي خوش دولمة تفوتچ
شفق :: هاا لاماشتهي اكل انتو اني قبل شوية تريگت
صارم :: ميصير لازم تاكلين فتحي حلگچ شووو
شفق :: گتلك مااريد لاتلحح
صارم :: فتحي حلگچ لچ
فتحت حلگهاا مجبورة دحس لكمة شكبرهاا بحلگهاا
ضلت حايرة بيهاا حلگهاا مترووس سادتة وتباوع علينة واحنة مركزين ويااها لابيها تذبهاا تخاف نحجي عليها ولابيهاا تاكلها لأن ماتنبلعع
صارم :: هاا بشرري شلوونهاا؟
هزت راسهاا متگدر تحچي، شووية وطفرت للمغاسل ذبتهاا وهو يصيح وراهاا
صارم :: الله يساامحچ حرمتينةة من الغدةة كم مرة گتلچ لاتفوتين للمطبخ اشبگچ بعدد
اجت عصببية وتحچي عليه
شفق :: لعدد منوو يسوي غددة غيرر ترجعوون تعبانين فوگاهاا هااي جزاتي يعني؟
::شفق حبيبتي لاتسوين شي اني من االيل اسووي بعدد انتِ عليچ العشة عادد بس تگلين ميراد الةة شي
صارم :: خاف تحرگ البيتانجانة والبتيتةة
شفق :: صارررررم
صارم :: عيوونة
شفق :: لم نفسك
صارم :: صار حبيبي
::هههههه خطية الله يعينك
أشرلي عليها علساس خايف ضحكت عليه وگمت لميت الصينةة ونضفت المطبخ ودخلتت للغرفة
انام ساعتين واگعد اقرة اطونة كومة واجباات عبالك متحملين علينةة
خليت راسي على المخدة وصارت الافكارر تجي
افكر بكلامة ابتسم ومن اذكر الصارلي قبل يوجعني گلبي اخااف اخطي هيچ خطووة گلبي يگلي شي وعقلي الة رأي ثااني بقيت هيچ للعصر ومانمت لعنت الشيطان وگمت غسلت وگعدت اقرة شوية ودخلت شفق هية وشعفتهاا
:: هاا خيررچ
شفق :: صارم طلع واجيت يمچ ضايجةة گلبي مقبووض خوما اعطلچ
::سلامة گلبچ لا تعالي ورة الصلاة اقرة عادي
شفق :: شنو منمتي؟
::لاوالله وماگدرت
شفق :: خيرر صاير شي وياچ؟
:: اكرام اليوم اجااني للمدرسة
شفق :: شيريدد؟
::يريد مني اوافق عليه
شفق :: وانتِ شنو رأيچ؟
:: مااعرف شفق خايفة والله نصحيني انتِ
شفق :: شوفي جوري لاتقيسين تجربتج السابقة المريتِ بيهاا على باقي التجارب مو كل الزلم رافد ولو هو مامحسووب عليهم اكرام حسب كلام صارم عنة خووش ولد ومبين شاريچ ويحبچ هم
::يحبني؟
شفق :: اي يحبچ شفت خوفة عليچ وانتِ بالمستشفى ونضراتة الچ بيووم المحكمة مبين يحبچ اني اگلچ وافقي جوري وافقي وتعرفي عليهه وهم اخلي صارم يسأل عنهمم ويتأكد منهم يلة ننطيه كلمةة مو كل يوم تجيج فرصة من ورة سمعة امنة وسوالفهاا محد يدگ بابنةة ترة
::شعلينة بيهاا
شفق :: ماكو شعلينة تبقى امنةة واحنة لنشيل سوء تصرفاتهاا
::خاف من يعرف بيهاا يغير رأية
شفق :: مااجة وطلبچ اذا مايعرف كلشي وماهامة
من يجي صارم رديلة الموافقة حتى يسأل عنةة
::الله كريم
شفق :: يلة گومي صلي أذن حتى تكملين واجبج
هزيت راسي الهاا وگمت توضيت وصليت بقيت ادرس لليل كلش اسمع العيطة گبت طلعت اركض
شفق تنگز من الوجع وصارم لازم العصارة ويركض وراهاا
:شكوو يمعودين؟
صارم :: اختچ احترگت
::عززة شبيچ شفق
شفق :: اخخخ يمةة ولچ طفرر عليه الزيت روحي شاغتت صاارم شووف طگگتت
صارم :: عساها بيتنجانة الگشرة حبيبتي بلةة اشووف
شفق :: كلة من ورااك
صارم :: شعليةة اني
شفق :: غيرر تريد عشةة مني
صارم :: تووبة اذا اگلچ سووي اكل بعدد
باوعلي وصااح
صارم :: امششي انتِ كملي العشااء بدالهاا
وانتِ تعالي وياي حبيبتي
اخذهاا من ايدهاا وراحو بالصالةة يااا نوب يتأمرر
كملت العشاء وخليتة گدامهم وصحت بيهمم
::اسمع عيني اني مووافقة على العريسس خليني افتك منكم شنوو بنگلاديشيةة اننني عدكم
صارم :: نچبي ماكوو زواجج منو يسويلنة اكل
::والله مرتك خلي تتعلمم مز شاطرة بس باللساان
شغق :: هاا ولچ گلبتي عليةة
::والله تعبتنووني انتِ ورجلج يلةة اكلوو فضووني
صارم :: گعدي انت
::مااريد رايحةة اقرةة
صارم :: يلة نخلص ونصيحچ مرتي متگدر تغسل شي ايدهاا محترگةة
:باوعتلة صفح وعفتهم وفتت ابتليت بيهمم بلووة اني، ثاني يووم داومت سلموني النتيجة وناجحة الحمد لله صحيح مو درجات زينة بس لمهم نجااح
گالت شفق صارم سال عليه وراح لمنطقتهم خوش ولدو وخوش نااس كلها تحمدد بيهم يومين وراها وردلة الخبرر بالموافقة بس العقد مو هسةة بس تخلص هالسنة وهم يمر على وفاة بيبي فترة لأن ابد مالي اي واهس افررح لو اسوي شي
ثاني يووم گاعدة بالصف الدرس الأخير والمدرسة تشررح ومركزة وياها ندگ الباب بنية گالت يردوني بالأدارة رحت وياها واني مستغربةة قبل لاندخل
للادارة لزمت ايدي وحچت وياي وتتلفت منا ومناا
::اوگفي عفيةة لاتدخلين
_ليش مو گلتي طالبينچ؟
::لاجذب بس اختچ برة تريدچ وگالت خلي تطلع وچانت تبچي مااعرف شبيهاا
::شفق شجابهاا شبيهاا ؟
::مااعرف تعالي هيةة بالباب منتضرتچ
_طلعت وراهاا خايفة باب المدرسسة مفتووح والحارس ماكو طلعت سيارة طابگةة گبال المدرسةة
سودة درت راسي اسألها وينهاا البنية اختفت بعدني اباووع ادور عليهاا مااحس الا نسحبت من ايدي حيل وصعدوني بالسيارة ونطلقت بيةة بكل سرعتهاا....
......
هدوء...
_راجعين من الدكتورة وهو معصب ويحچي علية وخالتي تهدي بيه
ام جعفر :: كافي ياأمي شجااك قابل بيدهاا
جعفر :: لعدد بيد منوو حچيت وگلت وترجيتها هم مترووح طريق النجف طويل وصعب الصاحي يتعبةة مو انووب هية حامل وبداية حملهاا شنوو مستغنيةة عن روحهاا لو عن طفلهاا
ام جعفر :: غير صديقاتهاا وتريد تواسيهن بعدين حجية جمارة عزيزة عليهاا هم زارتهاا لاتخااف مادام دخلت عد الامير علي مايصير بيه شي بس لاتعصب اروحلك فدوة حبيبي
جعفر :: استغفر الله هذا هوو سكتتت وامري لله ليش هو انتِ تنطين بيهاا
ام جعفر :: بنيتي شلون انطي بيهاا
_حچتها ودارت وجهاا علية باوعتتلهاا مبتسمة
ضايج ويحچي عليه شلون عاندت الا اروح وياهم للنجف ثاني يووم صبحت بطني تلويني حيل خااف عليه حتى ماداووم لاهو ولااني اخذني للطبيبة
گالت تقلصاات لان متعبة نفسچ انطتني علاج ورجعنة خلص الطريق كلة يلووم بيةة اول مرة اشوفة يحچي بالسيارة دومة ساكت من يسووق
وصلنة للبيت نزلنة وراح للجامع لان ارتفع اذان المغرب قبل لايتحرك صااح على خالتي
جعفر :: لتتسوون عشةة اجيب وياي
ام جعفر :: الله يرزقك امي حبيبي
_دخلت للبيت بوجهي لغرفتي صاحت خالتي
ام جعفر :: صلي وتمددي هدوة
::صار خالة
ام جعفر :: الله يرضة عليچ
::حبيبتي
_دخلت لغرفتي غيرت هدومي وتوضيت وصليت سحبت تلفوني وبقيت اتصفح بالبرامج متمددة شوية وذبيتة مليت ونفسيتي تعبانة حيلل مقهورة على جوري وشفق حالتهن تكسرر باب الگلب
الله يصبرهن صعبة عليهن بيبتهن عزيزة چانت عليهن
ومناا بالدوام مامرتاحةة احس اكوو شي بس مااعرف شنوو والامتحانات قربت واحس روحي ممسيطرة ومناا الحمل حيل مأذي نفسيتي وصايرة مااتحمل ولاكلمة من أي شخصص ومزاجية حيلل
نزلت دمعتي مااعرف ليشش ضايجة مخنوگةة سمعت صووت جعفر اجةة بسرعة مسحت دموعي مااريد اضوجة اكثرر دخل للغرفة سلم وبدة يغير بهدومة وعيني عليه خلص وتقرب گعد يمي مسح على شعري ابتسمت بوجههه حچة بحنان
جعفر :: لاتزعلين مني بس والله خايف عليچ
::علية لو على ابنك
جعفر :: ابني بعد ماشفتةة خايف عليچ انتِ
::تحبني جعفرر
جعفر :: ههههه كل يوم تسأليني وارد عليچ نفس الجوااب اموت عليچ هدوئي
::الله يخليك اليةة
جعفر :: ويخليچ الية وهسة گومي اكلي ويانة جبتلچ لفة برگر تحبيهاا
::وببسي؟
جعفر :: لاموگلنة منشرب ببسي هالفترة امي سوتلچ عصير برتقال
::بس والله مشتهيةة
جعفر :: شكو شي مضر تشتهي ماكوو يلة گومي وياي وبلا دلع
_حچاها وگومني وياه طلعنة لگينة خالتي منتضرتنة
گعدنة يمهاا نطتني العصير تشكرت منهاا واكلنة ردت اشيل الصينة صاحت
ام جعفر :: معليچ رووحي تمددي اني اعزلهاا
::خالة فدوة لاتسووين هيچ
ام جعفر :: دروحي ياامي هية بس صينة وگلاصات هسة اخضهن بسررعة روحي
جعفر :: سمعي الكلام
::زين اسوي چااي
جعفر :: اني اسووي روحي حبيبتي
::خااف اتعوود على الدلال شيخلصكم مني
ام جعفر :: بيچ خيرر وادللي
_هههههه تحملوا لعد يلة تصبحون على خيرر
عفتهم ودخلت للغرفة بوجهي للحمام سبحت ولبست شي حلوو صاار هواي مامددلتة خطية من موت الحجة لليوم لا يزووج علية نووب الشيوخ مو اماان رتبت نفسي وتعطرت خففت الضوة وتمددت بفراشي
شوية ودخل للغرفة باوعلي مبتسم طبگ الباب وتقرب تمدد بصفي دارني عليهه بعد الشعر من وجهي وحچة بصوت دافي
جعفر :: اليوم مغيرة؟
:: اشتاقيتلك
جعفر :: ميت شوگ عليچ وحق ابو طلبة
:: عود انتَ ليش هيچ حلوو؟
جعفر :: ههههههههه
:: والله شبيك تضحك يعني امك شتنست بيك وهيچ طاالع
جعفر :: مو بحلاتچ وحق معزتچ بگبلي
::اتمني يجينة ولد ويطلع يشبهك شكلك وطبعك
جعفر :: هيچ تحبيني هدووء؟
::يبووو اسكت وخليها حبي الك ماالة مقيااس
جعفر :: شلوون ثبتيلي
:: شلون اثبتلك؟
جعفر :: بطريقتچ الخاصة
_حچاها وغمزلي تقربت منةة وبستةةة بشفتة كل قووتي اخذني لحضنة عصرني عصرر صار يوزع قبلاتة على وجهي واحد شررح حبة للثانية وشوگة بطريتقةة الخاصة
اخذني لحضنة حيل باسني براس وگال
جعفر :: اروح اسبح لاتنامين حبيبتي
:: لامنتضرتك
_اخذ هدومة وراح گمت جهزتلي ملابس ولملمت الغرفة وحضرت هدوم الدوام بس طلع دخلت وراه سبحت ونمنة
الصبح گعدت بالكوة مفتحة عيووني يباوعلي ويضحك
::ليشش تضحكك والله نعسانةة
جعفر :: يلة گومي لايروح عليچ الأمتحان تأخرتي ترة
::اوووف شوكت اخلصص
جعفر :: هانت حبيبتي
گمت غيرت هدومي ماتريگنة بيوومها لان متأخرين بالطريق اشترة كلاص چااي شربة راد ياخذلي ماردت
وصلتي لقسمي وراح دخلت للقاعة احس الانظار كلها علية شكيت بنفسي بيةة شي رحت گعدت بمكاني
شوية ودخل الدكتور وزعوا الاسئلة وبلشت احلل
الحمد لله جاوبت خلصت ونزلت للحديقة بعد مااخذت قهوة اصحصح شوية
گاعدة وحدي اشرب واباووع للطلااب اجتني بنية
اعرفها من بعيد موجودة بقسمي بس غير قااعة
گعدت يمي باوعتلهاا حچت
::اسفة گعدت بدون استأذان بس اريد ابلغچ بشي مااعرف اذا تدرين اولا
حچيت متسائلة
::شنو حبيبتي گولي شغلتي باالي
::صاار فترة جااي يطلعوون عليچ كلاام استغفر الله مدري شلوون احچيهاا
_كلام شنوو وضحي فدوة لعينچ
::علساس انتِ مسوية علاقة وية دكتوور بغير قسمم حتى هو يوصلچ ويااه وعلاقتكم متطوورة
يعني
__يعني شنوو؟
::فهميها فدووة يعني علاقة مو زينة واني لوما اعرف انتِ شنوو واخلاقچ شنوو مستحيل اگلچ بس لازم تسووين حلل هاي البنت بالايام لتغيبين بيهاا تستغل الوضع و تروح للقاعة مالتچ وتحجي عليچ وجايبة الهمم صوور مااعرف شنوو اني ماشفت الصور بس سمعت يعني معقولة مالاحضتي
::حچيت واني احس وشة صارت بأذني وشفايفي ترجف
حسيت والله حسيت حتى البناات گامن يبتتعدن منيي منوو هاي عفيةة احجيلي انتِ منوو هاي لتشووه سمتعتي هيچ وشنوو مصلحتهاا؟
::مااعرف والله اني بنية اجت گلتلي وماصدگتهاا
هدوء مااعرف منو هالشخص لتمشين وياه ومو من حقي ادخل بس لازم تنتبهين هناا على كلشي يسوون سالفةة ويكبرووهةة
_شتحچين انتِ هالشخص يصير زوجي دكتوور
بغير قسممم يعني شنوو معقوولة ميعرفوا مو تگولين صوور ماشتفوه صوورتة هوواي طلاب تعرفة هنااا شلون شلوون ماعرفوا لچ اول يووم دوام هو دخلني هناا بيدةة
::زوجج والله مااعرف اذا تقصد هوو او غيرر احدد اني مشايفة زوجج
_شنوو غيرر احدد شتقصددين! من داومت لليوم ماماشية وية احد ولاحاچيةة اصلاا بس هو ياخذني ويرجعني بيددة حتى صديقاات قليلات عندي ليشش هيچ تحچوون
:: والله مو قصدي واسفة اذا فهمتيني غللط بس اكثر الطلاب هناا متعرف بيه زوجج غير المفرووض توضحين حتى متنحسب نقطة ضدچ
_ وليشش اوضحح والمن مامن حق اي احدد يدخل بحيااتي بس اني اعرف شلوون اتصررف ويااكم
عفتهاا وگمت متعصبةة بقتت تصيح عليةة مااهتميت الهاا امشي سرريع احس بطني بدت توجعني خففت شووية خفت على الطفل لايصير بيه شنوو ذنبةة تعبت يلة وصلت لقسمةة بعيد علينةة
صعدت بسررعة لغرفتةة دگيت الباب ودخلت مموجود الغرفة فارغة انتضرتة اكيد عندة محاظرة گعدت انتضرة وعيوني تهمل معقولة هيچ عدهم اعراض النااس لعبةة حتى يحچوون بيها ويتهمووني نصف سااعة يلةة اجةة
فتح الباب شافني ابتسم من شااف حالتي اختفت ابتسامتةة وتقدم عليةة بهمةة لزم وجهي يحجي بخووف
جعفر :: هدوء حبيبتي شبيچ تبچين يوجعج شي ؟
:: اي گلبي يوجعني جعفر گلبي
جعفر :: اسم الله عليچ بس اهددي شووية وحاچيني شصايرر ويااچ شبيه گلبچ احچي لاتسكتين
::اذوني وطعنوني شوهوا سمعتي جعفر مااگدر ادخل لقسمي احس الطلاب كلها تباووع عليهه
جعفر :: شنو هالحچي هدووء شصايرر احچي
منو يطعن بيچ
:: صار فترةة من اداوم اشوف نضراتهم الية من افووت للقاعة يتهامسوون ويضحكون البنات الأگعد وياهن ابتعدن مني كرهت حتى الدووام بس ماچنت احچي اگول اكيد غلطانة والصووچ بية لأن ذيچ الفترة تعبانة وغياباتي هوواي حتى ماكزت زينن
اليوم من اجت البنية وحچت صرت اربط بين كلامهاا وتصرفاتهمم
جعفر :: يابنية وشحچتت احچي على كيف ختى افهم؟
::بنية بقسمي حبابة اسمها دعاء بينة فقط سلام
معرفة سطحية يعني اليووم اجتني وگالت
_حچيتلة كل كلامهاا ملامح العصبيةة ضهرت علية
صار يفترر بالغرفة ويستغفرر بصووت عالي ايدة ترجف يريد يسيطر على اعصابةة ميگدرر فتح الثلاجة شررب مي وغسل وجهة عيوني تراقبة خايفة منة وعليه لايصير بيه شي مسح وجهةة واشرلي اطلع اخذ غراضة وطلع واني وراه
صعدنة بالسيارةة وشخطهاا وطلع للبيت يسووق بكل سرعتة ايدة تريد تطگ من كثرر مالازم الأستيرن قووي شريان گصتةة مبين من يتعصب يبين بوجهاا
سكتت ماحاچيتةة ابد خايفةة وصلنة للبيت دخل
بوجهة للغرفة بس سلم باوعتلة خالتي متعجبة سألتني
ام جعفرر :: شبيه جعفر هدوء ليش هيج متعصب
:: هاا ماادري ماحچيت وياه خفت منةة
ام جعفر :: روحي وراه امي هدي لايصير بيه شي
:: اي خالة صاار
_عفتها ورحت اركض لگيتة ذاب عمامتة على الميز وگاعد على الچرباية ممبدل لازم راسة بقوة سديت الباب نزعت عباتي علگتهاا ورحت گعدت گبالة بالگاع شال راسةة باوعلي عيوونة حمرر سحبت اديه لزمتهنن وحچيت وياه
::جعفر اخذ حقي وبرد گلبي بس لاتأذي روحك اعرفك حكيم وتتصرف بهداوة وحكمةة اني واثقة بيك راح تعرف منو همةة وتحاسبهمم
ذب حسرة شگت صدرة وحچة بتعب
جعفر :: انتِ شااكة بأحدد عندچ خلاف وية احدد؟
::لاوالله ماعندي كل خلاف بس شاكة اي شاكةة بوحدة
جعفر :: منو؟
::البنت الأجتِ ورادت تخرب بينةة بوقتهاا هددتني بس مااهتميت الهاا گلت شتريد تسووي يعني بس هسة اجت علة باالي محد غيرهاا الة مصلحة بأذيتي بس هيةة
جعفر :: يصير خيرر يصير خير بااچر لاتدوامين
انتِ؟
::والأمتحان شلوون
جعفر :: تمتحنين اخرر يووم حتى لو بس انتِ اني احچي ويا الدكتور مالتچ
::بكيفك بعدد، هسة گوم بدل حتى نتغدة
جعفر :: مااشتهي
::لاعليك الله خطية خالتي ضل باللها عليك اطلع شوفها وخلينة ناكل سووية
.
جعفر :: شگد حنينة
::مو مثل حنيتك عليةة
جعفر :: والله وداعت معزتچ بگلبي لندم كل واحد شارك بدموعچ اليووم
:: واني كلي ثقة بيك شيخ گلبي
جعفر ::: هههههههه حلوة هاي مال شيخ كلبي
:: اروح فدو لضحكتك لترد روحي
جعفر :: اسم الله على روحچ
بست ايدة حيل باسني براسي وگام غير هدومة وطلع يم خالتي هو يصلي بالجامعة ميتأخر بس اني مااگدر، گمت بدلت بسرعة وتوضيت وصليت
وطلعت وراهم چانت خالتي صابة الغدة گعدت وياهم اكلت وحجيت
::عاشت ايدچ خالةة
ام جعفر :: بالعافية حبيبتي
_اكلنة بدون كلام شلت الصينة صاحت علية لاتغسليهن ماقبلت غسلتهن ونضفت المطبخ وسويت چاي شربنة وكلمن راح لغرفتةة دخلت للغرفة فتح ايدة اليةة نمت بحضنة سألتةة
::شراح تسووي باچر؟
جعفر :: يجيج الصافي معليچ انتِ
سكتت هو يعرف شيسوي، يومين ماقبل ادوام راحت علية اثنين امتحانات وعدني امتحهنم بالأخير لان حاچي وية الدكاترة ومتفهمين الوضع ثالث يووم گالي بااچر ادوامين خلصت الشغلة بقيت طول الليل افكر خايفة شلوون ادوام واني كل هذا الحچي طالع عليةة حتى استحي بس اكيد هو حلاهاا لأن كلي داومي حسس بية گاعدة شدد حضنتة عليةة وهمس بأذني بصوت دافي يطمني
جعفر :: نامي لتفكرين حگج رجع وكل واحد حچة عليچ حتى لو بگلبة بااچر يعتذر منچ
_شلت راسي عليه بستة بشفتةة حيل بادلني القبلة
ابتعدت وحچيت بخجل
::الله لايحرمني منك
جعفر :: ولامنچ حبيبتي
نمت بعد كلامة مطمإنة ثاني يوم بدلت وتريگنة وطلعنة طول الطريق چنت قلقة شلوون افوت للقاعة هو كلساع يباوعلي ويطمني بنضراتة وصلنة للجامعة ركن السيارة نزلت ومشيت صااح علية وگفت تقدم بأتجاهي لزم ايدي باوعتلة متسألة
جعفر :: اوصلچ لمكانچ
_فرحت حيل بكلامةة ماعافني وحدي امشي وياه وراسي مرفوع ومفتخرة بيه ياناس والله احبةة احبة وصلت لقسمي ولقاعتي صعدت وياه ودخلنة للقاعة ايدة بأيدي والطلاب كلها موجودة صارت عيونهم علينةة سلم عليهم گاموا ردوا السلام عليه بحرارة وگف سلام هو ينوب على كل الطلاب حچة
سلام :: هدوء بالنيابة عني وعن كل الطلاب نعتذر عن سوء الضن الصار وياريت تسامحينة
ابتسمت ورد جعفر بمكاني
جعفر :: مسامحتكم وديروا بالكم عليهاا
سلام :: بعيونة دكتورر
تشكر منة والتفت الية وعيونة تباوعلي بحب بدون مايهتم لكل الموجودين باسني براسي گدامهم تعجبت بتصرفة ابد ميسويهاا گدام العالم مو انوب وسط الجامعة والطلاب ابتسمت بوجهاا أشرلي افووت وعافني وراح وعيوني تباوع لطولة اكيد سوة كل هذا حتى يسد حلوگهمم عليةة
دخلت للقاعة وراسي مرفوع وشايفة نفسي عليهم لأن يستاهلوون بقن البنات يتعذرن مني ماارد بس اكتفي بالأبتسامة المزيفة على وجهي گلبي لهسةة محمل عليهم
گعدت بمكاني بشموخ وكل كلمة انگالت عليهة رجعت لأهلها، وبقيت أنا مرفوعة راس بجالةة ...
شكرا لزيارتكم عالم روايات سكيرهوم
