رواية سراج السادة الفصل الثالث والعشرون بقلم غسق ادريس
" شاهيناز "
صدمتنا واحنا نشوف سهام عارضه نفس الفيديو الي صورته ملاك وقت عمتي والعلويه لباب كتلنهن بعرس قدس وغضنفر
اشرت سهام على نفسها تبجي تباوع لسيد
_سهام:: شوف الفيديو سيد ترضاها قدس تعيرني يعني اني سكتت وبلعتها وكلت عادي جهاد اختي الجبيرة واني غلطت واني مسامحتها وماشايله عليها وكلنا نسينه السالفه وفتحنا صفحة جديد تالي قدس تعيرني بهذا الفيديو
جانت نضرات الانزعاج والغضب بعيون الكل تجاه قدس
الي جانت مصدومه عيونها مدمعه تباوع لغضنفر
حجت سهام تبجي بعصبيه وغيض موجها كلامها للعلويه لباب وعمران زوجها
_سهام:: ماضل اني هنا بعد هواي انداس عليه وسكتت بس كافي هسه اخابر اخواني يجوني ماجايه من الشارع اني انطك واتعير
حجه السيد يهدء الوضع موجه كلامه لسهام
_عبد الرؤف:: ام موسى اهدي كلشي ينحل ب التفهام ماكو داعي للعصبيه وهذا الكلام
باوعت العلويه لباب لقدس بعصبيه وحجت
_لباب:: ليش يمه قدس مو حقج ورجعلج واحنا سدينه الصفحه القديمه ليش ترجعين تفتحين السالفه؟
باوعت قدس للعلويه لباب وطاحت دمعتها تهز راسها بلا
_قدس:: معليه اني ماسويت شي مو اني الدزيت الفيديو
وكف غضنفر كدام قدس وحجه
_غضنفر:: عمة مو دفاعاً لزوجتي بس قدس ماتطلع منها هاي السالفه لان هيه لحد مساع تكلي مقهوره على ام موسى والعلوية حفيدتج وحتى العلوية منة الله شاهده
هزت منة راسها ب اي وحجت
_منة الله:: صح اني اعتذرت من قدس ولحد مساع احنا كعدنا نحجي ناسين السالفه القديمه
العلويه لباب تحسرت ودارت على سهام
_لباب:: ها سهام؟
باوعت سهام للعلويه لباب وبجت
_سهام:: عمة يعني اتبلى عليها شعندي وياها قابل وهاي كدامج شوفي رسالتها
حجتهأ وخلت التلفون بوجه العلويه لباب
صارت عيون العلويه لباب وعمتي والسيد عيونهم بتلفون سهام
باوعت سهام لسيد وحجت
_سهام:: ها سيد وهسه. شفتها شلون تعيرني دازتلي وتكلي جنج تردين تنكتلين مره ثانيه؟
اباوع السيد دنك راسه بخجل والعلويه لباب ضلت ساكته بس ملامح الغضب والانزعاج مرسومه بوجهه اما عمتي ف جانت مكتفه ايدها وساكته عيونها على سهام
سهام من شافت سكوت عمتي باوعتلها ورفعت حواجبها
_سهام:: ها جهاد خيه ماتحجين لو لان الحق يمي سكتي
ضلت عمتي على سكوتها مركزه ويا سهام بس بدون ماتحجي شي
_سهام:: انتِ كلتي اليفكر يأذي غيره راح يشوفني اول وحده بوجهه؟ وين حقج والعدل لعد انتِ كلش مو منصفه
حجه السيد يهدء الجو
_عبد الرؤف:: ام موسى كولي يالله وانتِ جبيرة وواعية اكيد هذا التصرف بدر بدون قصد
باوعت سهام لسيد وفتحت عيونها بدهشه
_سهام:: لعد التصرف الي بدر مني اني ومنة محد كال بدون قصد. بس لان جهاد تحب قدس خلت الحق كله ويا قدس وهسه ساكته جهاد لان ماتكدر تنطي بقدس
_عبد الرؤف:: ام موسى مو دفاعاً عن بنتي بس جهاد ويا الحق دوم حتى وان كان الشخص الغلطان الاقرب لقلبها بس دام هوا غلطان ف هيه توكف ويا الحق
رفعت سهام ايدها معارضه كلام السيد
_سهام؛؛ لاسيد لا ماكو عدل وحقانيه شمعنى من غلطنه اني ومنة قامت القيامه وهسه وانتو تشوفون الغلط بعيونكم محد يحجي كلها ساكته
الكل جان ساكت وسهام الوحيدة الي تحجي
قدس جانت تمسح بدموعها وغضنفر يحاول يهديها مامهتم ب الي جاي ينحجي
لهناك وعمتي كسرت هدوئها موجها كلامها لسهام
_جهاد:: حقج يرجعلج ام موسى بس اول شي لازم نتأكد وبعدين نتصرف
باوعت سهام لعمتي وحجت
_سهام:: شنو تتأكدين مو هذا الفيديو كدمج والمراسله
رفعت عمتي ايديها ب ماعرف وحجت
_جهاد:: ومنوو كال هاي قدس؟
فتحت سهام عيونها بعصبيه والعلويه لباب عارضت كلام عمتي
_سهام:: ابسط شي يأكد هاي قدس. البارحه من كعدت بصف قدس عافتني وكامت يعني بعدها شايله بكلبها لحد مامساع حجيت وياها عافتني ومشت وهاي كدام عيون الكل هم خاف تكولين سهام تتبلى على قدس
باوعت لقدس جانت صافنه على سهام فعلا الي صار سهام البارحه من جنا نتعشه كعدت بصف قدس وقدس بس شافتها كامت ولحد مساع حاولت سهام تحجي ويا قدس وقدس تجاهلتها
باوعت العلوية لباب لعمتي وحجت
_لباب:: جهاد صيري ويا الحق
هز عمتي راسها ب اي وحجت موجهه كلامها للعلويه لباب
_جهاد:: اذا قدس ورا هاي السالفه ف اني اعتذر من سهام وكتها وهسه تفضلو دخلو جوا حتى نعرف نتصرف بهدء
اشر السيد للكل يدخل للبيت
تمشينا الكل للبيت
غضنفر جان لازم ايد قدس يهديها وهيه تبجي وتحلف مو هيه الدازه الفيديو
دخلنا للصاله والجو متوتر سهام كل شوي تعيد ب السالفه وتذكر الي صار وقت عمتي والعلوية لباب ضربنها ماعرف شنو غايتها معقوله تريد عمتي تكتل قدس؟
الكل توجه للصاله جانت سهام تبجي وتشكي للسيد والعلويه لباب والسادة يحاولون يهدوها ويجبرون بخاطرها باوعت عمتي لسهام وحجت
_جهاد:: ام موسى اريد اشوف الفيديو والمحادثة الي دزتهن قدس
باوعت سهام لعمتي وهزت راسها ب اي اخذت التلفون فتحته وانطته العمتي صفنت عمتي ب المحادثة دقايق
رجعت التلفون لسهام وباوعت للكل
_جهاد:: انتظروني
حجتها ومشت ب اتجاه غرفتها فتحت باب الغرفه ودخلت واحنا على كعدتنا ب الصالة منتظرين عمتي وشنو راح تسوي
باوعت لقدس مقهورة عليها دموعها على خدها غضنفر ايده ب ايد قدس ضاغط عليها والسيد محتار بين قدس وبين سهام مره يهدي ب سهام ومره بقدس والعلويات ساكتات مايكدرن يحجن الكل جان يباوع لقدس مقهور عليها ولان الكل يحبها عكس سهام صح محد يكرها بس معزتها مو مثل قدس وبعد موقفها الاخير الكل تجنبها
وبنفس الساعة محد ينكر قدي غلطانه والفيديو والمحادثة غلطة جبيرة من قدس
التفت الكل على فتحة باب غرفة عمتي
طلعت عمتي من الغرفة تلفونها بيدها
مشت ب اتجاه السيد والعلوية لباب
وكفت عمتي كدام الكل
فتحت عمتي تلفونها ودخلت على الوتساب رجعت طلبت من سهام تلفونها ترددت سهام تنطي التلفون وحجت بعصبيه
_سهام:: وين تردين توصلين جهاد؟
_جهاد:: للحق
اخذت عمتي تلفون سهام وطلعت الرقم الي داز الها الفيديو خلته بوجه الكل وحجت باستغراب
_جهاد:: شكد نهايه الرقم!
جان جواب الكل رقم "3" هوا نهايه الرقم
هزت عمتي راسها ب اي وانطت التلفون للسيد
باوعت عمتي للسيد وحجت
_جهاد:: سيد من يمك دوس اتصال على الرقم
_عبد الرؤف:: قصدج اتصل على الرقم الي داز الفيديو؟
هزت عمتي راسها ب اي
داس السيد اتصال الكل وجهه تركيزه على تلفون مهجان الي جان يرن بيدها كلنا استغربنا معقوله هذا رقم مهجان؟
باوع السيد ب استغراب لمهجان
_عبد الرؤف:: رقمج هذا مهجان؟
دنكت مهجان رايها وعمتي هزت راسها ب اي وباوعت لفقار
_جهاد:: ردلي رقم مهجان من تلفونك
طلع فقار تلفونه من جيبه وبده يرد رقم مهجان والسيد والعلويه لباب يقرون ب رقم مهجان بتلفون سهام
رفع السيد راسه وحجة ب استغراب
_عبد الرؤف:: الرقم مطابق لرقم مهجان
هزت عمتي راسها ب اي ودارت على عضنفر
_جهاد:: اتصل على رقم قدس
طلع غضنفر التلفون من جيبه واتصل
رن تلفون قدس بيدها حجت عمتي تباوع لغضنفر
_جهاد:: شكد نهايه الرقم
_غضنفر:: 7
باوعت عمتي للكل وحجت
_جهاد:: ما اطول عليكم وادوخكم الفيديو مو من رقم قدس يعني مو قدس الي دزته
_عبد الرؤف:: منو دازه لعد. بابا مهجان ليش المحادثا من رقمج
الكل جان مستغرب ومافاهم وتوجهت اصابع الاتهام والشك كلها لمهجان الي جانت مدنكه ايديها ترجف
حجت عمتي بكل ثقه مبعدة الاتهامات من مهجان
_جهاد:: اني. سهام البارحه ضوجتني بحجايه لهذا اني هددتها ب الفيديو حتى تذكر الفعل وماتعيده ودزيت الفيديو من تلفون مهجان ورقمها لان للاسف ام موسى حاظرتني من رقمي
استغربت العلويه لباب تباوع لعمتي
_لباب:: بس انتِ هم جنتي مستغربه من الفيديو والمحادثة شلون تكولين اني دزيتهن
هزت عمتي راسها ب اي
_جهاد:: ردت اراويكم شلون سهام بعدها حاقدة على قدس بحيث عافت الكل وراحت ركضت لقدس تشمر السالفه براسها؟
الكل جان مصدوم وسهام مصدومه اكثر من عدنا باوعت عمتي لسهام وحجت ب استغراب
_جهاد:: سهام انتِ تدرين الفيديو مو من قدس ليش ركضتي على قدس ب الضبط؟
باوعت سهام لعمتي بصدمه ماتعرف شتحجي
_سهام:: ماتوقعتج انتِ
هزت عمتي راسها ب اسف تباوع لسهام
_جهاد:: دائما اكول لازم نتأكد قبل لانحجي لان بعض الظن اثم
دنكت سهام راسها تفرك ب ايديها شفت الكل انزعج من تصرف سهام والعلويه لباب تخزر بيها
دارت عمتي على قدس ورجعت باوعت لسهام
_جهاد:: انتِ هسه مجبورة تعتذرين لقدس
رفعت سهام راسها تباوع لعمتي بصدمه وغضب
_سهام:: لا ماعتذر اني!!
باوعت عمتي لسهام وابتسمت ابتسامتها جانت كفيلة تبين لسهام انتِ راح تعتذرين ردتي او لا
باوعت العلويه لباب لسهام وحجت بخزرة
_لباب:: لاتكوم تعتذر وهيه الممنونة خلتنا نشك ب البنيه كومي يلا سهام اعتذري
باوعت سهام للعلويه للباب ورجعت تباوع لعمران زوجها ثنينهم جانو خازرينها وياشرولها تكوم تعتذر
فعلاً كامت سهام من مكانها وراحت لقدس باستها واعتذرت منها بس ببرود وحتى قدس ما اهتمت بس هزت راسها وسكتت
كامت العلوية لباب باست قدس تتعذر منها
حيل نقهرت على قدس لابيها ولاعليها تجيها المشاكل ركض وهيا عن غنى عنها
باوع السيد لعمتي وهز راسه ب اسف
_عبد الرؤف:: ليش ماحجيتي من البداية
_جهاد:: تعرف سيد ماحب اشمر اوراقي ببداية المعركه
سكت السيد بس جان متعصب من عمتي والي سوته وشلون طلعت سهام ب الصغيرة
بعد الي صار سهام ماضلت كاعده ويانا صعدت للغرفه وزوجها عمران صعد خلفها
والعلوية لباب وحفدياتها صعدن وراهم
والكل انسحب من الصاله والسادة انسحبو بس جانو مزعوجعين من عمتي والي سوته بس ماكدرو يحجون وياها
باوعت عمتي النا واشرتلنا ندخل للغرفه
_جهاد:: تعالن وراي
صفنا اني والبنات ب استغراب ليش عمتي طلبتنا؟ مشينه ب اتجاه الغرفه اني وملاك وعاتكه وقدس ومهجان وحميدة وحوراء خلف عمتي
دخلنه للغرفه نباوع لعمتي الي جانت واكفه بنص الغرفه مكتفه ايديها خازرتنا بعصبيه
جانت عمتي مركزه ويا ملاك ومهجان الي جانن مدنكات راسهن عيونهن ب الارض
باوعت مهجان لعمتي وحجت عيونها مدمعه تريد تبجي
_مهجان:: عمه اني دزيت الفيديو
_ملاك:: واني صورته
باوعتلهن عمتي بغضب وحجت
_جهاد:: واني ادري بس ماردت ارزلجن كدام الكل قبل لا اعرف السبب
باوعت ملاك لعمتي وحجت
_ملاك:: عمة اني صورتة ذكرة ودزيته ب كروب المجاهدات
هزت عمتي راسها ب اي تباوع لملاك
_جهاد:: ولايهمج جم يوم وارفع بيج فيديو ضمي لسجل ذكرياتج
انصدمت ملاك بكلام عمتي
باوعت عمتي لمهجان وسكتت
_جهاد:: مهجان !!
مسحت مهجان دموعها وباوعت لعمتي
_مهجان:: عمة سهام جبرتني هيج اسوي
_جهاد:: ليش؟
_مهجان:: عمة من اول يوم اجت بي تشمر عليه كلام لحد البارحه شافتني اني ومفرقد ب المطبخ ناكل تكلي خوش مونسينج ولد عمج
عكدت عمتي حواجبها ب استغراب
_جهاد:: شلون
_مهجان:: تكلي تتودين لولد عمج بحجه اخوانج ومتربين سوا بس انتِ تردين تطيحهم وتلزكيهم بيج يعني قصدها احببهم بيه
انصدمنا بكلام مهجان معقوله سهام هيج تشوف علاقة مهجان والولد؟ ومهجان تربت ويانا هيه اخت مو بت عم رغم السيد مانع الاحتكاك بين اولاد عمامنا بس علاقتنا بيهم اخ واخته مستحيل اكثر من هيج!!
غمضت عمتي عيونها وجرت نفس تسيطر على اعصابها هزت راسها وباوعت لمهجان
_جهاد:: هذا الكلام مايطلع لاحد مفهوم!!
هزينه راسنا ب اي ساكتات
باوعت لعمتي وحجيت ب استغراب
_شاهيناز:: عمة شدراج الرقم رقم مهجان مو قدس؟
_جهاد:: حافظه ارقامجن رقم رقم
_ملاك:: زين عمة ليش ماكلتي مهجان الي دازة الفيديو ليش كلتي انتِ.
_جهاد:: لان اعرف مهجان ماتسوي هيج بدون سبب
التفتنا كلنا على قدس من حجت بحزن
_قدس:: عمة اني جاي احصل حجي واني لابيها ولاعليها
مشت عمتي ب اتجاه قدس وحضنتها من ضهرها ساكته حقها كلنا وياها فعلاً قدس ماجاي ترتاح من سهام الي حاطه راسها براس قدس تريد بس تلكالها زله على قدس حتى تركض للسيد
اتفرق الكل وحاولنا نتناسى الي صار
سهام مانزلت من الغرفة ابد ماعرف يجوز خجلت من فعلتها وماتكدر تواجه الكل
جنت كاعده اني والبنات ب الغرفه نسمع لعمتي هيه واسراء جانن يحضرن للقرايه وشنو راح يقرن ب المجلس باجر لان هنا ملاياتنا
كلنا جنا مركزات ويا عمتي وشلون صوتها يخلي المقابل ينبهر ب الي تقدمه اذا اريد اوصف صوت عمتي ف اكتفي ب "صوت عراقي من الطبقة الحزينه التي تتجلى بداخل مسامع الاخرين لتأخذ السامع الى عالم اخر مليء ب الاحزان والدموع صوت هادء ممزوج ب البروده المصاحبه لتراث قديم من الكلمات التي تصاحب الون الابيض والاسود في فلم من التسعينات"
سمعت صوت دكه الباب وعماد يصيح ب اسمي
كمت من مكاني وتمشيت لباب الغرفة فتحت الباب وضحكت عيوني على عماد الي جان يباوعلي مبتسم
_شاهيناز:: ها عمود ليش ادك الباب ليش مادخلت كبل
_عماد:: لا مادخل عيب بابا مايقبل يكول مايصير ندخل بدون مانستأذن
ابتسمت بفرح اباوعله شكد حلو ومؤدب رغم صغر عمره بس فاهم
_شاهيناز:: عفيه هذا الصح لاابوك يسمعني ويكول انا اربي وشاهيناز تخرب
ضحك عماد بفرح وحجه
_عماد:: لا بابا يكول علويه شاهيناز ورده بيضه
اتصنمت بمكاني من سمعته يحجي التفتت اباوع لداخل الغرفه خاف وحده سمعت شفتهن كلهن مندمجات ويا عمتي باوعت لعماد وضحكت بخجل
_شاهيناز:: عماد عيب لاتحجي هيج كدام احد خوش
_عماد:: اي ماحجي
_شاهيناز:: تمام لعد شنو ردت مني ليش تصيحني
_عماد:: بابا يكول اريد استكان جاي
باوعتله ورفعت حواجبي
_شاهيناز:: وشمعنى اني اسوي
رفع عماد اكتافه وقوس حلكه ب ماعرف
_عماد:: ماعرف بس بابا يكول جايج حلو
مسحت على وجهي بقوه ورجعت اباوع خاف واحد سمع باوعت لعماد وتحسرت بقوه طلعت من الغرفه ومديتله ايدي
_شاهيناز:: امشي خل نسوي جاي
اخذ عماد ايدي ومشه بهدوء واني ساكته مستحيه ومتوتره من كلمات جادح. دخلت للمطبخ واشرت لعماد يكعد على الكرسي واني طلعت القوري غسلته ترسته ماي وخليته على الطباخ
تمشيت للطاوله كعدت كدام عماد صافنه على ملامحه حيل احب شكله لون عيونه يشبه عيون ابو بس بياضه ولون شعره جان مأل للشقار مايشبه لابو
باوعت لعماد وحجيت ب استغراب
_شاهيناز:: عماد شعرك يشبه شعر امك؟
باوعلي وهز راسه ب اي
_عماد:: اي ماما شعرها اشقر
_شاهيناز:: هااا. يعني امك حلوه؟
ابتسم وحجه بلهفه وفرح
_عماد:: اي ماما حيل حلوه حتى لون عيونها تدرين يالون؟
_شاهيناز:: يالون؟
_عماد:: اخضر مثل لون العشب ماما حلوه هواييييي
ابتسمت بوجهه وبلعت ريك
ماعرف شصار بيه وقتها حسيت بخنكه واني اشوفه يوصف امه
باوعلي جان حيل فرحان وهوا يحجي عن امه
_عماد:: تدرين بابا وماما تزوجو عن حب!
انصدمت اباوع لعماد رمشت ب استغراب وحجيت
_شاهيناز:: عن حب؟
_عماد:: اي ماما تكول جانت ويا عمتي كفاية ب المدرسه وبابا جان يروح يجيب عمتي من المدرسة وهوا شافها وخطبها
هزيت راسي ب اي وكمت من مكاني بلعت ريك مرتين بحزن ومشيت ب اتجاه الطباخ ماعرف شصار بيه رغم اني ماعندي شي ويا جادح ولا مفكره بي بس الي صار بيه واني اسمع كلام عماد مثل الغيرة!! رغم امه وابو اطلقو بس ماعرف شصار بيه
خليت بثل الجاي ب القوري ومسحت على وجهي بعصبيه مشيت ب اتجاه الكلاصات اخذ الكلاص وخليته على الميز باوعت للقوري بعد الجاي مافار عدل
طفيت الطباخ نزلت القوري صبيته ب الكلاص بدون ماحط شكر شفت الجاي بعده ماي وشوي من لون البثل خفيف
خليت كاسه الجاي ب الصينيه وباوعت لعماد
_شاهيناز:: تعال
طلعت من المطبخ وعماد وراي تمشيت ب اتجاه باب المصلا انطيت الصينيه لعماد
دكيت باب المصلا وابتعدت عن الباب
دخلت للغرفه ورجعت كعدت المكاني بهدوء
مر الوقت واني صافنه بمكاني حرب بعقلي
مره اكول شاهيناز معليج انتِ اصلا جادح راح يخطب بفرحه الزهره يعني كافي واذا جانت ام عماد حلوه انتِ شعليج واذا تزوجو عن حب انتِ هم معليج؟
اصلا انتِ حتى ماشايفه ام عماد شكو ضجتي بس لاغرتي منها؟ لا عليمن اغار اصلا اني حلوة صح عيوني مو خضر ولا شقره بس حلوه يكفي اشبه عمتي
باوعت لعمتي وحجيت
_شاهيناز:: عمه ام عماد طليقه جادح انتِ هم شايفتها؟
دارن البنات كلهن يباوعلي وعمتي مستغربه من سؤالي
هزت راسها وحجت
_جهاد:: جنت مسافره من تزوجو وماملتقيه بيها هواي بس حسب السمعته يكولون خوش بنيه
هزيت راسي ب اي ورجعت سألت عمتي
_شاهيناز:: حلووة؟
حجت اسراء ب استغراب تباوع لعمتي وتباوعلي
_اسراء:: اني اتذكر شفتها البنيه كلش حلوة اعتقد موصلية اصلها. شقره تخبل جنها لعابه
سكتت ودنكت راسي وعمتي والبنات رجعن يكملن قرائه
طلعت اني والبنات من الغرفه صارت عيني على المصلا الباب مفتوح شفت كلاص الجاي الي دزيته ب ايد عماد فارغ والجاي مشروب
دخلت للمصلا مستغربه شفت السيد كاعد يقره ب الكتب من دخلت باوعلي وابتسم
ابتسمت بوجه السيد وحجيت عيوني على الكلاص
_شاهيناز:: سيد كلاص الجاي منو شربه
باوع السيد لكلاص الجاي ب استغراب
ضحك السيد يباوعلي
_عبد الرؤف:: ماعرف ياهي من العلويات الصغيرات مسوية الجاي بدون شكر وخفيف لجادح
ابتسمت بخجل وحجيت اضيع السالفه
_شاهيناز:: شوف شلون شكد عيب جان صحتني سيد اسوي الجاي
_عبد الرؤف:: لابنتي اصلا جادح ماقبل وشرب الكلاص كله يكول خوش جاي
باوعت للسيد وضحكت بدهشه مستغربه فعل جادح خوش جاي؟
"قدس"
كل الي صار وموقف سهام هواي اثر بيه
واني اشوف اصابع الاتهام تتوجه الي واني مالي ذنب حيل نقهرت وحزت بخاطري
بس موقف العلوية جهاد خلاني ارتاح
عرفت بهذا البيت الحق مايضيع بس لازم بظهرك شخص يطلع حقك ومايخاف وهذا الشخص جان العلوية جهاد
رغم الكل جان شايف العلوية جهاد غلطانه بس محد فكر يطلب منها تعتذر لسهام!
بليل الكل جان نايم واني وغضنفر ب الغرفه نايمين
جنت منطية ضهري لغضنفر وصافنه ب الفراغ
احس اكو حسرة بداخلي اريد ابجي بس ماعرف ليش ماعرف السبب
معقولة موقف سهام اثر بية لهل درجة
مسحت دموعي الي طاحت وسكتت ماريد اكعد غضنفر
جريت حسرة مشتاقه لخواتي مشتاقه لقس هيه الوحيدة التعرف تمتص الحزن مني وتحسسني ب الامان
طاحت الدمعه من عيني واني غمضت بقهر
هاي بدايتها هيج بعدين شيصير وياي!
حسيت بغضنفر يحضني من ظهري ويمسح على كتفي
شهكت ابجي بس حسيته قريب مني ويسمعني
_غضنفر:: ليش البجي ليشش
_قدس:: ما اعرف شبيه احس بثكل على صدري مختنكه
كام من مكانه ونزل من الجربايه واني بمكاني ابجي
شغل الضوة يباوعلي بحزن
باوعتله ودنكت
تقرب ب اتجاهي وكرفص نفسه كدام الجربايه يباوعلي
_غضنفر:: شلون ويا دموعج
_قدس:: مو بيدي غضنفر هنا يطيحن
سكت صافن واني هدئت بس دموعي يطيحن
باوعلي ووكف
_غضنفر:: كومي لبسي شالج وعبايتج ولبسي بجامه جوا ملابسج
باوعتله ب استغراب
_قدس:: وين
_غضنفر:: بدون اسألة يلا كومي
مشه ب اتجاه كنتور الملابس يطلع العباية والشال ويحطهن على الجربايه واني بمكاني مستغربه ماعرف وين يريد نطلع بهل ليل الساعه ب 1 ونص كلها نايمه؟
باوعلي واشرلي ب ايده
_غضنفر:: يلاااا قندس بدون صفنات
هزيت راسي ب اي وكمت من مكاني اخذت الشال لبسته ولبست العباية ولبست جوا الدشداشه بجامه ماعرف ليش بس سويت الي طلبه مني مابيه حيل أسأل
لبس غضنفر تراك رياضي اسود وفتح تلفونه يراسل
كعدت على الجربايه صافنه علي ماعرف وين يريد نطلع
هز راسه ب اي وطفه التلفون دار عليه واشرلي ماد ايده ب اتجاهي
_غضنفر:: يلا تعاي
كمت من مكاني اخذ كف ايدي وطلعنا من الغرفه البيت هدوء محد كاعد حيل استغرب شلون منتظمين بنومتهم احنا هيج وقت يكعد عمي محمد يشوفنه ناكل اندومي ب المطبخ
بس بيت السادة ابد!! لساعة ب ١٠ محد يضل كاعد كلها تنام صغار كبار
نزلنه الدرج بهدوء
شفت العلوية جهاد كاعدة ب الصالة بيدها كتاب تقره بي بس نزلنه باوعتلنا وابتسمت سلمنه وهيا ردت السلام
_غضنفر:: ها جهاد
باوعت بصفها شالت الكتاب اخذت مفتاح وشمرته على غضنفر باوع غضنفر للعلوية وابتسم
_غضنفر:: عاشت ايدج
هزت راسها ب اي وباوعتلي
_جهاد:: شبيهن عيونج باجيه؟
هزيت راسي ب لا وابتسمت
_قدس:: لاعمه مابيه شي
هزت راسها ساكته سحبني غضنفر من ايدي ومشه يطلع دار على العلوية وودعها وهيه رجعت تقره الكتاب
طلعنا من الصالة للحوش صافنه على غضنفر ماعرف وين يريد يودينا بهل ليل
عافاني ومشه خلف البيت واني واكفه بمكاني
اجه يجر ب الدراجه رياضيه سوده باوعلي وضحك
_غضنفر:: فتحي باب البيت لايكعد السيد
مشيت ب اتجاه الباب فتحته وغضنفر طلع الدراجة للخارج وكف الدراجة واجه سحبني لخارج البيت سد الباب
باوعلي واشرلي على الدراجه
_غضنفر:: تعاي صعدي
باوعتله بصدمة مامستوعبة
_قدس:: غضنفر!!! اصعد على الدراجه شنوو
مشه ب اتجاه الدراجه وصعد باوعلي واشرلي
_غضنفر:: تعاي
مشيت ب تجاهه بعدني على صدمتي
رفعت عباتي وغضنفر شالني يصعدني ب الدراجة لزمته من ظهره وحجيت
_قدس:: هاي دراجة منو؟
_غضنفر:: دراجة سجاد ابن منتظر
اشرلي غضنفر على زنده ورفع ايده عارض عضلاته
_غضنفر:: لزميني من عضلاتي لاتطيحين
ضحكت ولزمته من ظهره
_غضنفر:: شنو عضلاتي مو بعينج؟
_قدس:: غضنفر شلون تسوق
_غضنفر:: ياهو كلج اسوق بعضلاتي. شيلي عباتج من الكاع
شلت عباتي ولميتها بحضني شغل غضنفر الدراجه ومشه واني لازمته من ظهره اضحك بفرح
وغضنفر كل شوي يدور علي ويضحك
طلعنا من الفرع جان الشارع فارغ بس اني وغضنفر نفتر واني اضحك بفرح شعور غريب واني صاعده ب الدرجه الهوا يضرب بوجهي
غضنفر كل شوي يباوعلي ويضحك
واني رافعه ايدي متونسه
جان غضنفر داير راسه يباوعلي ويغمز واني اضرب على ضهره اريده ينتبه درت من غضنفر اضحك باوعت للطريق كمزت اصرخ لازمه بضهر غضنفر
_قدس:: جلاببببببب غضنفر جلابببببببببب
_غضنفر:: يمههههههه
مرينه من الجلاب الي جانن كاعدات من شافنا مرينا ب الدرجه كامن يركضن ورانا وغضنفر يصرخ واني اصرخ بخوف
وكفن الجلاب عن الركض ورجعن المكانهن يركضن
باوعلي غضنفر وضحك
_غضنفر:: نرجعلهن؟
_قدس:: لاااا غضنفر لاااااااا
مالحكت اكمل كلامي ورجعت اصرخ مره ثانيه من رجعنا على الجلاب يضحك وهنا رجعن يركضن ورانا واني خايفه لا واحد منهن يعضني
عبرهن غضنفر يضحك بقوه واني اريد ابجي من الخوف
_قدس:: غضنفر ازعل عليك لو رجعتتتتتتتت
صرخت من رجع عليهن مره ثانيه هوا يضحك واني اصرخ شوي واوكف على الدرجه وغضنفر مايهمه يضحك
عضيته بضهري بقوه نبتت سنوني بضهره وهوا يصيح
_غضنفر:: ظهريييي
ضربته على ضهره وصحت
_قدس:: رجعني للبيتتتتتت لا اعضك مره ثانيه
مشه غضنفر ب الدرجه كل شوي يمسح على ضهره واني مخنزرة داير راسه يباوعلي بخزرة
_غضنفر:: ترا ارجعج للجلاب لاتخزرين
_قدس:: رجعني خل اعضك بذانك
باوعلي وابتسم
_غضنفر:: اشاقه وياج
لزمته من ظهره ودرت اباوع للشارع
ضحكت مستوعبة موقف الجلاب وغضنفر يضحك وياي مافاهم شي
رجعنا للبيت واني ضحكتي ماغابت عن وجهي كل ماتذكر افرح حسيت موقف غضنفر جان طمأنينه لقلبي فرحتي بهذا اليوم جان حب جديد لغضنفر الي جان يسوي كلشي حتى يفرحني ويخليني سعيدة
نزلنا بباب البيت فتح غضنفر الباب ودخل الدراجه للدخل واني اطفر بمكاني واصيح
_قدس:: غضنفر باجر هم خل نطلع وخليني اسوق
ضحك واخذ ايدي ب ايده يمشي بينه للداخل
_غضنفر:: لا اريد اعلمج تسوقين سيارة
_قدس:: لا غضنفر اريد اتعلم اسوق دراجة
باوعلي ورفع حاجبه
_غضنفر:: هيه هاي تاليتي عرضي يبطنش ب الشوارع
_قدس:: حباب غضنفر حباب
_غضنفر:: خوش بس لاتسولفين لحد لا السيد يبطنش علينه
خليت ايدي على حلكي وحجيت
_قدس:: ابددد ماكول لاحد
_غضنفر:: هاي هيه متفقين لعد
جنت حيل فرحانة الدراجة تونس اكثر من السيارة والهوا يضرب ب الوجه شعور ولا احلى شنو السيارة كتمه بس!
دخلنه للصاله جانت العلويه جهاد بمكانها بس هل مره كلاص الجاي بيدها وصافنه ب الفراغ من دخلنه كسرت صنفتها تباوعلنه
دخل غضنفر للصاله مستغرب
_غضنفر:: شعجب توقعت الكاج نايمه
_جهاد:: مازارني النوم تعبانة اليوم
عاف غضنفر ايدي ومشه ب اتجاه عمتي واني هم خايفين عليها عيونها حمر وايديها ترجف
_غضنفر:: شبيج جهاد بيج شي؟.
اتحسرت وهزت راسها ب لا
_جهاد:: مابيه شي
دنكت راسها تمسح دمعتها الطاحت تقدمت ب اتجاها خايفه عليها
_قدس:: شبيج عمه ليش تبجين
باوعتلي وابتسمت دموعها بعينها
باوعت لغضنفر ودارت تباوع للارض بين الغرفه والدرج
_جهاد:: هنا ذبحو عون
دنك غضنفر راسه ساكت واني سكتت مستغربه ماعرف شلون عون مات رغم اعرف هوا نقتل بس تفاصيل موته اني ماعرفها
اتحسرت عمتي ومسحت وجهه تباوعلي
_جهاد:: تونستي؟
باوعتلها وهزيت راسي ب اي
_قدس:: غضنفر فرني ب الدراجه وكال راح اعلمج تسوقين ب الدراجة كل يوم من تنامون نطلع اني ويا نفتر ونرجع
عكدت عمتي حواجبها تباوع لغضنفر
اباوع لغضنفر باوع على الباب وعلى القنفه وعلى الدرج والصالة ركن ركن الى عمتي جهاد ماحط عينه بعينها ابد
هزت عمتي راسها وباوعتلي
_جهاد:: المهم غيرتي جو
_قدس:: كلششش هواي عمه تجن تجننن الدراجة والهوا ب الوجه شعوررر يخبل
جانت تباوعلي ب ابتسامه وغضنفر كذالك ثنينهم مبتسمين لفرحتي واني اسولف
وكف غضنفر وخله المفتاح على الطاولة
باوعلي واشرلي نصعد
_غضنفر:: يلا نوم
_قدس:: ماريد انام خليني اكعد يم عمتي جهاد
_غضنفر:: ولج بابا راح اصير ب 3
_قدس:: عمه تنامين لو تضلين كاعدة!
باوعت عمتي للغضنفر
_جهاد:: اصلي وانام روح انت اني اوصلها للغرفه
هز غضنفر راسه ب اي ومشه ب اتجاه الدرج
_غضنفر:: يلا تصبحون على خير قدس لاطولين
ردينه علي اني وعمتي وهوا صعد فوك
باوعتلي العلويه وضحكت
_جهاد:: سولفيلي اجواء الدراجة شو حبيت اجرب سواقتها
ضحكت بفرح وتربعت كدامها اسولف وهيه تسمعلي ومندمجه وياي تشرب جاي وتباوعلي
من خلصت ضحكت عمتي وغمزتلي
_جهاد:: نتعلم سوا
صفقت ب ايدي وضحكت اهز براسي
_قدس:: اي اي
باوعتلي العلويه صفنت لحظات وحجت
_جهاد:: لاتخلين السلبيات تأثر عليج اعرف المواقف الها تأثر جبير علينه وتحفر اثر بداخلنه المواقف الحزينه تأثر بشراسه على حالتنا النفسيه السلبيه تسلب الراحه من عدنا وتسلب الابتسامه
تحسرت وباوعت للعلويه
_قدس:: ليش سهام هيج وياي من اول يوم شافتني هيه حاقدة علية رغم اني ماعندي شي وياها ؟
ابتسمت وباوعتلي
_جهاد:: سهام حقودة ومستحيل بيوم تحبج او تتودد الج وبعد الي صار والمواقف الي هيه حطت نفسها بيهن ف ماكو امل تفك ياخه منج
تحسرت وحجيت بقهر
_قدس:: بس اني ماسويتلها شي
_جهاد:: اعرف بعد هاي طبيعه سهام
_قدس:: زين اكو سبب؟؟
سكتت عمتي لحظات
باوعتلي وحجت
_جهاد:: قبل ب ايران غضنفر اجه زيارة فتره كعد ببيت عمتي ف سهام الله يخليها حجت ويا عمتي على بت اخوها البنيه رادت تمشي قسمتها براس غضنفر. والسيد من عرف السالفه بيها زواج واحد من الولد اجه لايران ثاني يوم
سكتت عمتي وهزت راسها
_جهاد:: سبوعين يقنعون بغضنفر
_قدس:: وغضنفر شنو رد فعله؟
_جهاد:: جان رافض ومصر على قراره بس سهام جانت شاطره خوش عرفت تفر عقولهم
_قدس:: بعدين؟
باوعتلي وضحكت
_جهاد:: اجت عمتج جهاد وفضت السالفه بيوم واحد والبنيه بت اخوها ماكسرنا بيها لان جان السيد حاجي ويا اهلها اخذناها لقرايب زوج عمتي لباب
ضجت حيل من سمعت كلام عمتي جهاد وغرت على غضنفر شنو يعني جان يريد يتزوج غيري شوف شوف سهام طلعت تريد امشي قسمه بت اخوها ب راس رجلي والله عمي صدك نسوان ماينكدرن
بقينا اني وعمتي على كعدة وحده نسولف وهيه تاخذ وتنطي وياي
التفتنا اني وعمتي على فتحة باب المصلا شفنا السيد عبد الرؤف مدنك راسه طالع من المصلا رفع راسه وشافنا اني وعمتي كاعدات عكد حواجبة وابتسم صبح علينه واحنا ردينه
_عبد الرؤف:: بديت يومي بوجهه ورداتي الحلوات
ابتسمنا اني وعمتي والسيد وكف كدامنا يسرفن بردنه
طلع السيد معز من المصلا وخلفه السيد مقتدر
صبحو علينه
كامت عمتي من مكانها باوعتلي وحجت
_جهاد:: يلا تعاي خل نرجعج لغضنفر
_قدس:: راح تنامين
_جهاد:: لا هذا موعد صلاة اليل
هزيت راسي ب اي ومشيت ويا عمتي صعدنا الدرج
مشت عمتي ب اتجاه غرفه البنات فتحت الباب وشغلت الضوه
_جهاد:: يلاااا موعدكم ويا الله حان
دقائق والكل كعد البنات لبسن الربطات ونزلن يتوضن
طلعت من الغرفه مشيت لغرفتنا فتحت الباب شفت غضنفر كاعده على الجربايه ضهره عاري بدون ملابس مسح على وجهه وباوعلي
_غضنفر:: تعاي شوفي عضتج
ركضت بسرعه خلفه اضحك بفرح باوعت لضهره وضربته بضهره اضحك
_قدس:: خوش سنون
_غضنفر:: طابعه سنونج بظهري
هزيت راسي وضحكت اثر سنوني واضح بضهر غضنفر حسيته انجاز عظيم
كام من مكانه واني شمرت روحي على الفراش لبس غضنفر دشداشته وطلع من الغرفه واني نايمه على بطني رافعه رجلي صافنه بسالفة سهام عرفت من كلام عمتي جهاد سهام ماراح تفك مني اذا ماتطيح حضي
ورغم هذا بكل مره تغلط تجي تعتذر مني كدام الكل يعني اني ماخاسرة شي بكد ماهيه خاسره ومنزله من نفسها
نفتح باب الغرفه دخل غضنفر متوضي الماي بوجهه
باوعلي وغمز باوعتله وضحكت
_قدس:: بعد كل ماتضوجني اعضك
_غضنفر:: عادي اسويها وحده بوحده
_قدس:: ششنووو تعضني؟؟؟؟؟
_غضنفر:: لاا
حجاها ودزلي بوسه هوائيه خزرته ودرته وجهي منه ضحك بصوت واني بمكاني خجلانه بس اسوي روحي ضايجه
طلع غضنفر التربه والقرأن وكتاب اسمه ضياء الصالحين وبده يصلي باوعتله هادء ويقره بهدوء شكد مر وقت ما مل ولا انزعج من كعدته صله الفجر ورجع مره ثانيه يقره هاي لو اني صليت الفجر بدون تسبيح
________________
عدلت كعدتي وغطيت راسي ب الحاف من شفته كام من مكانه منتهي من عبادته طفه الضوه واجه ب اتجاه الجربايه نام على الجربايه وسحبني اله مسح على راسي وحجه بحنيه
_غضنفر:: هديتلج صلاتي
سكتت مارديت علي حضني بقوه باسني من راسي وسكت غمضت عيوني وغفيت رايحه بنومتي
فتحت عيوني واني نايمه بفراشي شفت غضنفر واكف كدام المرايه يلبس الساعه
كمت من مكاني النومه بعدها بعيوني دار غضنفر يباوعلي ابتسم
_غضنفر:: صباح الخير
_قدس:: صباح النور
_غضنفر:: يلا كومي من فراشج السيد صاحنا على الريوك
هزيت راسي ب اي كمت من الجربايه اخذت الشال وطلعت من الغرفه مشيت ب اتجاه الدرج امسح بعيوني وارتب الشال باوعت باب المصلا مفتوح والكل متوزع ب الصاله والبعض ب المصلا
صبحت عليهم ودخلت للمطبخ اغسل وجهي جانت سهام كاعده على الكرسي حاطه ابنها على الطاوله توكله بسكت وجاي من دخلت باوعتلي مخنزره تجاهلت نضراتها مامهتمه
غسلت وجهي ومسحته ب الشال باوعت لسهام تباوعلي من فوك ليجوا وتهز ب ايديها ماحجيت شي مالي خلك للمشاكل الصباحيه
طلعت من المطبخ باوعتلي شاهيناز مبتسمه
_شاهيناز:: صباح الجمال عيني
ابتسمت بفرح على كلامها
_قدس:: صباح النور شهودة
_شاهيناز:: يلا تعاي السيد اليوم جاب كيمر عرب وخلاهم يكثرون قشطه لان سمعج تكولين احب القشطه
_قدس:: صدك؟؟
هزت راسها ب اي تضحك
_شاهيناز:: حتى ضماه مادري وين من مساع ايليا يحوم يريد ياكله بس مايندله
ضحكت بفرح من موقف السيد
_قدس:: خليني ابدل ملابسي واجي
_شاهيناز:: يلااا بسرعه احتمال اني اكله بدال ايليا
ضحكت وصعدت الدرج الكاع ماشايلتني احب اهتمام السيد اتذكر من سمعني احجي ويا البنات على قشطه الكيمر ودخل علينه ب المطبخ ماتوقعته ثاني يوم يجيبلي الكيمر
مشيت ب اتجاه الغرفه فتحت باب الغرفه ودخلت شفت غضنفر كاعد على الجربايه نازع دشداشته بيده التلفون من دخلت رفع راسه يباوعلي
باوعتله ب استغراب وحجيت
_قدس:: هاي ليش نزعت دشداشتك
_غضنفر:: طاح عليها المرطب
باوعت لدشداشه متروسه مرطب ايدين
_قدس:: ماتنزل شنو؟
_غضنفر:: لا هسه انزل بس احجي ويا مشواق
_قدس:: مشواق منو
_غضنفر:: ابن عمتي لباب
_قدس:: ماشايفته
_غضنفر:: هوا واصدقائه ببغداد
هزيت راسي ب اي ساكته مشيت ب اتجاه الكنتور
فتحت باب الكنتور طلعتي ملابس عيوني على غضنفر استحي ابدل كدامه بس شفته مندمج ب التلفون
بدلت وباب الكنتور كدامي ابدل بسرعه خاف يدور ويشوفوني من كملت تبديل فتحت باب الكنتور وباوعت لغضنفر شفته صافن على المرايه
_قدس:: يلا بدل خلينا ننزل
_غضنفر:: هااا اي اي يلا
حسيته تعلثم ب الكلام واتوتر شمر التلفون من ايده وسحب الدشداشه يريد يلبسها باوعت لضهره من الخلف
ضهره عريض وعضلاته طاكات وزني الشيطان ومشيت ب اتجاهه وكفت بضهره وباوعتله مامنتبه الي يفك دكم الدشداشه
ضربته على عضلاته وضهره بقوه اضحك متونسه بصوت الضربات وهوا مصدوم مامستوعب موقفي
_قدس:: الضربه القاضيه
حجيتها وضربته على كتفه بقوه كام من مكانه واني ركضت ب اتجاه الباب من ركض وراي ماكدرت افتح باب الغرفه نحصرت بين الباب وبين الحايط
حطيت ايدي على راسي اتوسل بي واتمسكن بحزن
_قدس:: لااا غضنفر لااا اشاقه وياك
_غضنفر:: ولج اطكيني وتصيحين اشاقه
_قدس:: عضلاتك حلوه ماسيطرتتتتت
باوعتله بنص عين
رفع ايده ضاب على عضلاته
_غضنفر:: هيج تكولين
_قدس:: اي وداعتك
شالني من ايدي واني بعدني ايدي بوجهي
مشه ب اتجاه الجربايه وكل شوي يرفع ايدي يشوف عضلاته واني اضحك
لبس دشداشته ودار يباوعلي
_غضنفر:: يلا امشينا
عدلت شالي وملابسي ومشيت خلف غضنفر طلعنه من الغرفه باوعتله من الخلف والله ضهره يجبرني اضربه حتى وهوا لابس ملابس
طكيته بخفه على ضهره وضحكت
_قدس:: خوش ضهر
مالحك يرد علي بسرعه ركضت ب اتجاه الدرج وهوا ركض وراي
واني اضحك درت اباوعله شكله يجبرني اضحك العمامه على راسه وهوا يركض
ماجنت منتبهه على الدرج عيوني على غضنفر
صرخت مرعوبه من راحت رجلي مشمورة من الدرج
لزمني غضنفر من ياختي وجرني
باوعتله مصدومه اريد ابجي
_قدس:: يمهههههه
سحبني غضنفر لصدره يضحك واني اريد ابجي من الخوف والهبطه نزلنا الدرج غضنفر يمسح على ظهري
نزلنا اني وغضنفر دخلنه للمصلا نتريك
بدن العلويات تجهزيات للقراية الي راح تصير
طلعت من المطبخ بيدي صينيه النومي بصره وشاهيناز وراي شايلة صينيه كاسات الماي
دخلت للصالة نزلت الصينيه اقدم للنساء
مشيت مكملة لسطر النساء اوزع النومي والبنات حميدة وحوراء وشاهيناز وعاتكه وياي
جانت الصالة عاجه ب النساء والاطفال والباقين ب المصلا كاعدين
مجلس السادة من المجالس الي الكل يتوجه اله ب محرم حسب وصفن النساء
جانت النساء تجينه من مناطق بعيدة واماكن بعيدة حتى تحضر المجلس
اغلب النساء الي كاعدات من المُحافظات الي يجون يزورون النجف من وحدة لوحدة يعرفون ب احد مناطق النجف بيت سيد معروف قريب لامام علي (عليه السلام)
كلمه مترددة بين نساء المنطقة سمعتها واني اوزع
" هذا المجلس تاخذين مرادج وتطلعين بيت السادة ماتنرد الحاجة هنا "
كعدت اني والبنات بباب المطبخ لان المكان مايكفي غير هاي المساحة جانت العلوية لباب واسراء وعمتي كاعدات بنص الصاله على الحايط كدامهن السماعه
وحجيت بده المجلس وجان من اجمل المجالس الحسينيه....
" قس "
مرت الايام واجت ايام السواد والحزن "شهر محرم"
علكنه الرايات ولبسنه الاسود
طلعت من المطبخ امشي واحجي ويا نضال الي جانت كاعدة على القنفه تمشط بشعرها
_قس:: اكلج نضليه شنو ماكو قرايات منا مناك
_نضال:: بيت ابو محمد وابو سلوى
_قس:: لا بيت ابو سلوى مانروح العام تعاركت ويا سلوى. اكلج مانروح لعد لابو سمير خوش يوزعون
_نضال:: كعدي وسكتي قس تردين عمج يحجي علينه
_قس:: نضليه ترا هنا بس عشر ايام
هزت راسها ب الرفض وكملت تمشيط شعرها
_نضال:: ماكو مانروح
_قس:: تراااا للاماممم هيه خلينه ناخذ امراد ماتردين تجيبين لعمي شمعه بخور بلكت يكف من النسوان
باوعتلي مامهتمه
_نضال:: لاتهتمين الزلمه وينه وين هاي السوالف
_قس:: هاااا نضيله هااا اختلفنه هسه مووو
_نضال:: معليج برجلي اني احاسبه
بقيت ساكته اباوع لنضال شلون اختلفت عليه عود ردت اكلها على حليمه وكريمه بس هاي هيه نضال شلت ايدي بعد لا اعرفج ولاتعرفيني
طلعت من البيت ماشيه ب اتجاه البستان شلون انوب هاي نضال ماتريد تطلعنا تحرمنا من القرايات مثل العام هم ماخلتنه نروح للقرايات وخلتني ابجي وانوح بمكاني
دخلت لدجن الدجاج شفتهن متجمعات كلهن خوش جمعه شلون 13 دجاجه واربع ديوجه باوعت لديوجه وغمزتلها
_قس:: خو انتم متونسين على الوضع
باوعلي اربعتهن وشلون اربعه فريق خطر عمي محمد يخاف من الديوجه بس يشوفن عمي يركضن ورا والله مادري خاف هم جاي يتمحرش بنسوانهم
مشيت ب اتجاه الدجاجات بس خايفه لايركضن وراي الديوجه يخلني اصرخ ويشمتن نضال بيه
بس صرت قريبه من الدجاجات الديج بده يتقرب مني ثنين بضهري منزلين روسهم ويمشون ب اتجاهي هشيته ب ايدي اصيح
_قس:: امشي لك شنو شايف روحك ثور وتريد تنطح ب النعال اكتلك
بس شافوني اشمر عليهم ب ايدي اركضن طفرن علي
ولاجنهن ديوجه يطفرن تطفرن كناغر هيج شي
واحد يم رجلي يركض وثنين وراي واحد كدامي والدجاجات يتصارخن حسيتهن جاي يحشمن اهلي علي على روجلتهن كتلوني
طلعت منهم اركض العوده بيدي بس ولارجفتهن العودة يتناطحن مناطح وكفتت كدامهن ورفعت ايدي
_قس:: خياس تردون تردون تبرزون بطولتكم كدام الدجاجات براسي
اجن يركضن عليه واني طلعت اركض خايفه منهن وكفن بنص الطريق ورجعن للدجاجات
رجعت عليهم مره ثانيه عليهن عبالهم اني خايفه منهم شنو اني قس ترا مو ياهي جانت
وكفت ب الباب اباوعلهم دارن عليه
_قس:: مساع اكلنا بيض وبتيته مالت نسوانكم زينو ريشاتكم. يمههههههههه
طلعت اركض من اجني يركضن بقوه واني شايله العوده بيدي
وكفن بنص الطريق يباوعلي يرحن ويرن عبالهن ارجع عليهن مره ثانيه رفعت ايدي اسلم عليهن
_قس:: اني اعلمكم ولك انت الاجلح مو جنت جنك وزغه ربيتك بطول صبعي هسه تجاسر عليه بس يلا فعلا الدنيا دوارة اني هم نضال ربتني وضليت اتجاسر عليها
رفعت راسي اباوع لسمه
_قس:: فعلاً يارب الك بيها حكمه
باوعت الهن غميتهن ومشيت ضلن عليه بس هذن بعد هنا وريشاتهن المشكله قويات حقه عمي محمد يخاف منهن
صفنت بنص الطريق باوعت الهن رجعن لدجاجات والله اجت فكره براسي يا نضال اخليج تاخذيني للقرايات وانتِ الممنونه بس اني فقيرة مو مال هاي السوالف
مشيت راجعه للبيت عيوني على الحايط شفت حيه ام سليمان تركض ب الكاع رفعت ايدي اضحك
_قس:: حيه ام سليمان سلمينه على سلمان كليله شعجب كاطع بينه
شمرت العصه من ايدي وركصت عليها حاصرتها ب الحايط
_قس:: ها شبيج لعد ابو سلمان والحبايب وين يكولون متزاعلين
اخذت جيس اسود من الكاع شلت ام سليمان بي شكلها جنه بريعصي بس لا شكلها غليط من الحيه ومن البريعصي ف صارتلنا ام سلمان
مشيت ب اتجاه البيت ام سليمان ب ايدي
_قس:: صدك اسمج مجربعه اني من كالولي ماصدكت كلت شكلها مو مال امجربعه مال معذربة والحجي ابيناتنا عيونج والخصر العندج مايستاهل ابو سلمان هذا كله وهوا يباوع على عفراء
وكفت بنص الطريق اباوعلها ب استغراب
_قس:: تدرين عفراء منو؟ عفراء بت ابريج هذا ابوها بريعصي شكبره دوم واكف ب الحمام يطلطل عليه واني اسبح فلا يستحي اكله روح لعمي محمد خوش بي مناظر مايقبل
دخلت للبيت احجي ويا ام سلمان وهيه ساكته تسمعلي شوف حتى ام سلمان تعجبها سوالفي
_قس:: خلي الحجي ب الكلب ام سلمان لاتفتحين البواجي
دخلت للصالة جانت نضال تشرب الجاي حاطه رجل على رجل تباوع لقناة العقيله من دخلت باوعتلي
صارت عينها على ام سلمان
كمزت من مكانها مصدومه تباوع لام سلمان
_قس:: شبيج ماجبتلج زينب وهيج خفتي
_نضال:: طلعييها قس تلعب روحي منها
_قس:: اذا ماتكولين نروح للقرايات ماطلعها واشمرها عليج هم
وكفت نضال بمكانها ادك على وجهه اعرف بنضال حيل تخاف من حية ام سليمان مادري شعدها شكيت بيها تحب ابو سلمان قبل عمي وتخاف ام سلمان تحجي
باوعتلي واشرتلي على الباب
_نضال:: طلعيها واني اخذج
_قس:: كولي وداعة امي
_نضال:: وروح امي بس طلعيها
_قس:: لاكولي اسمج امج وحلفي اوكفي امج شسمها
باوعت نضال لحيه ام سليمان وحجت
_نضال:: اسمها ساطيه
_قس:: ساق/طه؟
باوعتلي بخزرة واني مستغربه اسمها
_نضال:: امجججج هاي ساطيه اسمهااا
_قس:: لاتحجين على امي ترا اشمرها عليج يلااا حلفي
اتحسرت نضال تباوع لحية ام سليمان
_نضال:: وداعت امي ساطيه اخذج للقرايات
نزلت حيه ام سليمان وحجيت
_قس:: عفيه من البدايه وصيري حبابه يلا ب 2 قرايه
حجيتها وطلعت خلف فشاير نضال بس مايهم المهم اروح قرايات
طلعت برا البيت مقهورة على سلمان
_قس:: عذرينه حبوبه سمعناج كلام مايليق بيج بس فزعتج هاي اردها بعرس سلمان وهااا بس تشوفين سلمان كليله ليش كاطع بقس يلا روحي مع السلامه
شمرتها على الحايط وهيه راحت تركض خلتني اشك بروحي ماخذتها اجبار عنها ترا احنا نسوان اذا مانوكف البعض باجر يطشر شملنا
دخلت للبيت ومشيت ب اتجاه الحمام خليت شامبو وبلسم شعر وزاهي وغسلت ايدي موو مهم عمي محمد يشتري لو فالح يدفع لنسوان بس
طلعت من الحمام شفت نضال كاعده ب الصاله مخنزره ضحكت بوجها وهيه نزلت بيه غلط
صعدت للغرفه مو مهم الكلام المهم اطلع للقرايات
_نضال:: انييييي على ماقس تتزوج مجلوطه
_قس:: مانجلطتي من عمي خانج تنجلطين من قس لان تريد تاخذج للقرايات
_نضال:: ولجججججج قسسسسس
دخلت للغرفه وسديت الباب اضحك شفت البنات متجمعات ب الغرفه كعدن يحجن عن الخلاق وعيب اسوي هيج بنضال وحرام ومن هذا الكلام الي ماله معنه
شمرت روحي على الفراش واخذت التلفون بيدي دخلت على صفحة السيد معراج شفته ناشر منشور جديد
صورته هوا والساده لابسين اسود وواكفين كلهم
السادة الكبار كلهم لابسين عمايمهم عدا معراج وفقار جانو بدون عمايم ماخذين الصورة ب المصلا كتبتله
_🗣:: منور سيد محرم مقبول
دزيتله الرساله وصفنت حسيت اكو غلط ب الموضوع درت على قبس حجيت ب استغراب
_قس:: اكلج اذا واحد كلي محرم مقبول شكله
_قبس:: ياغبي يكلج محرم مقبول؟
صفنت على روحي اي والله هاي اني الغبيه فتحت التلفون بسرعه اريد امسح الرساله
شفته مشاهد الرساله ضربت على راسي بغباء هسه شجاج بلا
غلس على الرساله ومارد حقه يعني شيرد؟
مر الوقت واجت ساعة القرايه واني اول الناس بدلت لبست جبه فوك ملابسي والشال بدون ماحط شي على وجهي احترمت المكان الي رايحتله
تخيلت روحي رايحه لفاتحة شخص عزيز على قلبي معقوله احط مكياج اكيد لا
طلعت نضال من الغرفه والبنات نزلن ابتهال وقبس لاعبات بوجهن ب المكياج ما اهتميت وماحجيت لان ادري بس راح احجي راح اطلع ابيع مثاليات براسهن ف غلست عليهن
طلعنا من البيت نضال كدامنا واحنا وراها ماشين للقرايه الشمس بوجهنا
شفنا باب البيت مفتوح دخلنه للبيت نزعنا النعوله ودخلنه خلف نضال سلمنه وكعدنا جايات متأخرات على النعي
غطيته وجهنا وهيج بدت اول قرايه ويانا
رحنا لثلاث مجالس ونضال ماقبلت نكمل وكالت نرجع شكد توسلت وحجيت مارضت كالت نرجع
اجينا نطلع من البيت شفت وحده من جارتنا تلبس بشحاطتها ركضت عليها مبتسمه
_قس:: هااا ام نرجس شلونج
_ام نرجس:: هلا يمه قس شلونج شخبارج خواتج شلونهن مختفيات صدك اخيتج قدس تزوجت ب المبارك عليها والله يايمه فرحتلها هل فقيره
_قس:: الحمدلله خاله واي قدس تزوجت سيد ب كربلاء من سادة '"''
_ام نرجس:: يا يمه احسن سادة ب المبارك عليها تتهنى كون
_قس:: بعد روحي ام نرجس اكلج خاله ماكو قرايه بليل؟
_ام نرجس:: لا يمه اكو بيت ابو رائد فرعهم كله قرايات اذا تردين ترحين ب 8 اجيج اني والنسوان نوكف على الشارع اوديلج نونه حتى اخذجن ونروح
باوعتلها وضحكت بفرح
_قس:: ام نرجوسه بعد روحي ودينا نونه حنونه بنونه تلكينه مكملات
هزت راسها تضحك واني اضحك وياها ودعتها ومشيت شفت نضال تباوعلي هيه والبنات رفعتلها حواجبي وابتسمت
_نضال:: ابددد قس لاتحلمين نطلع بليل
_قس:: معليج اني اقنعج اجيبلج ام سلمان
_نضال:: لو سلمان بكبره يجي ماروح
رجعنا للبيت ونضال تحلف ماتروح للقرايات ضليت صافنه هسه بلا هاي شلون اقنعها حتى ام سلمان مهي تجيني افزع بيها
وكفت على درج وصحت ادعي
_قس:: روحي ينضال كون عمي ياخذ عليج وحده عيونها زرك وشعرها اصفر يكابلها ويكعد وانتِ ضلي محروك كلبج. اذاااا ماصادق زينب وانسق الها ويا عمي واخليهم يتزوجون كولي قس ماكالت
كعدت على الدرج فحطانه وهيه مامهتمه دخلت لغرفتها خليت ايدي على راسي وتحسرت هسه شلون باوعت للساعه ب 6 ونص ماضل وقت
كمت من مكاني ومشيت ب اتجاه غرفه عمي ونضال فتحت باب الغرفه باوعتلي نضال كاعده على الجربايه
_نضال:: شكووو
_قس:: عليج الله خل نروح
_نضال:: طلعيييي مو توج ادعين
_قس:: ياااا تدريني بيه بدون كلب ادعي
هزت راسها برفض واني كعدت كدامها اتوسل وهيه مصره لا يعني لا
_قس:: زينننن ليششش كليلي حتى اكوم وما ارجع بعد
_نضال:: عمج ينخاف منه يرديني اروح حتى يختل
سكتت صافنه اي والله هسه دريت ليش عمي مساع يشحت بينا عبالي يردينه نروح حتى ياخذ حلوياتنا طلع لااا يريد يسولف ويا النسوان
باوعت لنضال وحجيت بحماس
_قس:: اخليج تلكفين علي دليل هوا يحجي ويا النسوان
_نضال:: كولييي شلون
_قس:: لا حبيبتي تحلفين ب امج نروح للقرايات كل يوم ضهر وليل العشره الاولى كلها يلااا
تحسرت بقوه روحها شايطه هزت راسها ب اي وباوعتلي
_نضال:: وداعت امي ساطيه بس تلكفيلي علي دليل وتحرمنيه من سوالف النسوان مو بس نروح للقرايات شكو شي احصله ب القرايه الج
ضحكت بفرح هوا هذا الاريده
_قس:: اريدج تفتحين تلفونه وتجيبلي ياه
_نضال:: هذا تلفونه تعاي واني اعرف الرمز بس كل ما افتح التلفون الكاه ماسح المحادثات
اخذت التلفون منها وطلعت اركض للغرفتي اخذت تلفوني وفتحت حسابات عمي كدرت افتح التلغرام بتلفوني بس الحسابات البقيه احتاجن كلمه سر
دخلت على الكوكل دخلت على مدير كلمات المرور طلعت كلمات السر كلهن
ربطت حسابات عمي كلهن على حسابي ونزلت انطيت التلفون لنضال واتفقت وياها تخلي الموضوع عليه
اني مانطي بعمي بسهوله بس يستاهل هوا هذا اليخون مرته
ب 8 كملنه اني والبنات وطلعنا للقراية بهذا اليوم حيل ارتاحيت ماخليت قرايه مارحت الها ومن رجعنا للبيت اخذت علاكة نضال وطفرت لغرفتي اتقاسم ويا روحي التوزيعات
بعد تعب يوم كامل نمت من وكت حتى اكعد ثاني يوم اروح للقرايات بعد هنا عشر ايام بس
جنت نايمه ومندمجه ب احلامي بس كل شوي افتح عيوني مزعوجه من الاشعارت جايه من التلفون جوا المخده
رفعت المخده بعصبيه اريد اشوف ياهو يراسل هسه الساعه ب ٧ الصبح
شفت الرسائل من حساب عمي انستا
دخلت على الحساب شفت حساب مكتوب
" صاحبة ذاك الكعب "
عوجت حلكي امسح على عيوني معقوله هذا الاسم ياكعب هذا شفتها حاطه صورتها شعرها اصفر والحواجب تاتو اسودد والشامه بنص وجهه حتى كشت روحي من خلقتها
شفتها هيه وعمي متراسلين بس عمي مختفي عنها وهيه كل شوي ادز رساله تريد تشوفه وين راح كعدت اقره ب المحادثه عمي داز الها
_🗣:: صباح الخير امسيت اليوم على جميلة الجميلات
ضحكت اهز ب ايدي
_قس:: هسه لو نضال تدري بيك مو تخليك تمسي ب النجف
تربعت امسح على وجهي بعد حتى نومتي راحت ماتفيد
دخلت اقره المحادثه من بدايتها هزيت راسي اني اعلمج ولج كتبت الها رسالة
_🗣:: ها جميلتي
ماطولت ثواني ودزت بصمه
فتحت حلكي لعبانه نفس من صوتها وشلون تتموع بطريقه مقرفه
_🗣:: ها حبيبي وين رحت غير جاي نحجي قلقتني
عوجت حلكي ماده ايدي
_قس:: ياعيارة منين قلقتي علي خافي على روحج
كتبت الها
_🗣:: تاج راسج كعدت حبيبتي وخفت تشوفني وتزعل مني
شافت الرساله ودزت ايموجي غضب
دزت بصمه وهم تلحس ب البصمه حسيتها حاطه السامعه بحكلها وتحجي
_🗣:: منو تاج راسي قلبي انت
كتبت الها
_🗣:: تاج راسج مرتي تدرين بيه اخاف منها
شافت الرساله مرت دقائق ماردت خفت عمي يجي يشوف المراسله
دزتلي بصمه تحجي ب انزاعج واصياح
_🗣:: هاي شبيك محمد شنو مرتي تاج راسج مو كتلي هيه ونعالج سوا
فتحت عيوني بصدمه ياا عمي اني اعلمك ولك نضال تاج راسك انت وهاي فتحت بصمه ونزلت عليها
_قس:: الخايسه ام عفنه ام الزلم ولج نضال تسوا راسج هايي انتِ الي ادورين فضالة نضال تحجين عليها ولج انتِ تاج راسها باعي ولج وداعت هذا الشهر شهر محرم ولحسين اذا الكفج تسولفين ويا محمد اذا ماحرك طاهرج حرك صورج عندي واعرف موقعج وبيتكم وين اجيج اريد اشوف ماوراج زلمه يطر ضهرج طر وهاي صالي فتره مراقبه محادثتكم اعرف عنج كلش ام الوصخ
دزيت البصمه الها ورجعت مرة ثانيه سجلت بصمه
_قس:: ام دودة
دزيت الها البصمه شفتها سمعتهن هاي هيه مسحت المحادثه وحظرتها سويت حساب عمي خاص وشمرت التلفون شنو الي يريد يصير خلي يصير خو ماخليها تحجي على نضال
كلشي يصير احجي لنضال اخليها هيه التدافع بعد نمت مرتاحه لان ريحت كلبي بوحدة ام شوارع مثل هاي
ثاني يوم كعدت عمي محمض كلش يشرب ب الجاي والجكارة بيده مافتنت لنضال ولاحجيت خليني اصير طباب خير وماريد اهدم عوائل
بيوم السادس من محرم عمي قرر نروح للنجف هم نزور وهم نشوف قدس حيلل فرحت جنت متشوقه حتى اشوف قدس اختي
رحنا اني ونضال وعمي وقبس اختي والباقين عمي وعدهم بغير زيارة
الطريق كله جنت فرحانه يمتى اوصل واشوف قدس اختي واشوف البنات والعلويات
وصلنه للنجف عمي كال نزور يلا نروح لقدس وفعلا نزلنه للمغاسل نغسل ونتوضا
وكفت البس عباتي بباب الحمام سمعت صوت وحده تحجي من الحمام قربت راسي لباب الحمام
سحببتني نضال خازرتني
_قس:: شبيج نضال يجوز البنيه محصورة ب الحمام
_ننضال:: معليج لاتصيرين خيره وتحصريها ب الزايد
جرتني نضال من الباب واني مستغربه شبيها البنيه تبجي
" عاتكه "
طلعت من المطبخ بيدي جدر جبير شايلته بثنين ايدية مشيت اريد اخلي ب الحوش
محد جان موجود المكان فارغ بس الجدورة تارسه المكان
خليت الجدر ب الكاع ودرت اريد ارجع ادخل
سمعت صوت خطوات داخله للبيت توقعته واحد من السادة
درت ب اتجاه الباب شفت دلهب واكف ب الباب لابس دشداشه سوده وغتره "جفية" سوده شاد بيها راسه وبيده جوزتين ياكل
باوعلي واتوتر رجع خطوات ودنك راسه
_دلهب:: العفو ماشفتج
هزيت راسي ب اي توني اريد ادور حتى ادخل ومد ايده ب اتجاهي الجوزات بيده
_دلهب:: تردين جوز؟
باوعت للجوز وهزيت راسي ب للا
_عاتكه:: لا مشكور
_دلهب:: هاا بكيفج لعد. هذا قبل شوي مر ولد انطاني جوزتين كال هذن مال حلال مشاكل مادري شنو يريد يحل مشاكله براسي
حصرتني الضحكه على كلامه بس ماضحكت هزيت راسي ب اي ودرت ادخل استوقفني كلامه من صاح
_دلهب:: علوية اخذي الجوزه لاتخليها بيدي فقار يكول مايرد الكريم الى البخيل
درت ب اتجاها مستغربه باوعت للجوزه بيده ماكدر اخذها خاف ايدي اطخ بيده
حسيته فهمني من ضغط على الجوزه بيده بقوه وكسرها فتح ايده شمر الجزء الصلب وطلع الباقي
دار يباوع ب الحوش شاف جدر صغيرة محطوط ب الجدورة الكبار
خله الجوز ب الجدر ومده ب اتجاهي
توترت منه ولان بس اني ويا ب الحوش رغم اصوات خواني والسادة مسموعه خارج البيت
دنك راسه وطلع من البيت جريت نفس بقوه ومسحت على وجهي اخذت الجوز من الجدر وضحكت
اكلت الجوز ودخلت للمطبخ اضحك
شفت البنات ملتمات بالمطبخ يسولفن وقدس فرحانه قس راح تجي وكلنا فرحانين بيها
السيد من درة ب اهل قدس جايين راح هوا وغضنفر يجيبهم ويجي واحنا هنا منتضريهم
اليوم عدنا طبخ للامام العباس من هسه مجهزين نفسنا حتى نطبخ والصبح نوزع
السيد دز على السادة كلهم حتى يطبخون والذبايح ب الحديقه مشدوات
سمعنا صوت السيد يرحب ب الدخول عرفنا اهل قدس اجو كمزت قدس وركضت للباب بفرح واحنا خلفها بس ماطلعنا للحوش نباوع من الباب
حضنت قدس عمتها ومرت عمها ورجعت حضنت خواتها فرحانه بيهن والسيد يباوعلها مبتسم
اشر السيد لعم قدس على المصلا دخلو واحنا طلعنا نرحب ب مرت عمها وخواتها
العلويات بس سمعن صوتنا اجن يركضن فرحانات بجيه قس والعلوية لباب تضحك وتبوس بيها
دخلنا للداخل والابتسامه بوجهه قدس جابت شاهيناز الماي والضيافه واحنا ملتمات ب الصالة نرحب ب البنات
باوعتلنه قس وهزت بحواجبها واحنا نضحك
مرت نص ساعه انتظرنا النساء يلتهن ب السوالف واحنا انسبحنا للمطبخ فرحانات بقس
كعدنا ب المطبخ وقس تصيح
_قس:: وين عطاء طاكني الشوق الها
_شاهيناز:: عوفني البنيه وكعدي مابينه حيل للكتلات
_ملاك:: والله عيني انتِ كدرتج بس عليه يم عطاء ترجفين مراجف
سكتت شاهيناز مامهتمه لكلام ملاك تعرف صدك عطاء دواها
مر الوقت واحنا على كعدتنا ب المطبخ سمعنا صوت عمتي ب الحوش تحجي ويا فقار كمت من مكاني وكفت بباب المطبخ ابتسمت واني اشوف عمتي تحجي ويا فقار بعد سنوات من فراق عمتي وبعدها عنا هل سنه راح تشاركنا بكلشي ب محرم
جانت عمتي مندمجه تسولف ويا فقار مامنتبهه للحولها
باوعت لباب الشارع شفت جزام جاي ب اتجاه البيت يريد يدخل مامنتبهه على عمتي وفقار
رفع راسه صارت عينه على عمتي صفن شوي بوجهه عمتي ودنك راسه منسحب للخارج
حيل ضجت رغم هوا ماجان قاصد ولان باب البيت مفتوح والولد يطلعون الجدوره والغراض وعمتي هم ماجنت منتبهه على جزام وحتى من شافها مانتبهت علي وهاي جانت اول مره جزام يشوف وجه عمتي
ماحجيت شي وبقيت ساكته ماردت اضوجها ففضلت السكوت من كملت عمتي كلامها باوعتلي واجت تمشي ب اتجاهي دخلت للمطبخ وفقار كتف ايده يباوعلي مبتسم
_فقار:: شلونها محروستي
ضحكت بخجل من كلامه دوم فقار يخجلني بكلامه
سمعنا صوت ضحكت ملاك
دنك فقار راسه ومشه يطلع من البيت جان لابس دشداشه سودة وشاد الغترة براسه مثل دلهب وحتى جزام والسادة كلهم جانو لابسين نفس الشي
باوعت لملاك وصحت بيها
_عاتكه:: ولججج صوتج طالع نصي
_ملاك:: تعاي سمعي قس شمسوية بحبيبه عمها
مشيت ب اتجاهن اسمع لقس وشلون اخذت ثار مرت عمها واحنا نضحك وياها متحمسين
_شاهيناز:: اذا الله راد يبتلي احد يحطه بحلك قس
_قس:: اضوج من الزلم اليخونون اريد زلمه مايخون ماكو
رفعت قدس ايدها وحجت ترفع بحواجبها
_قدس:: غضنفر مايخون
_شاهيناز:: قس السيد عبد الرؤف تزوج العلوية زهراء عمره 18 سنه ولحد هذا يومج مافكر يباوع على غيرها
خلت قس ايدها على خدها وحجت
_قس:: منين الكه اليخاف الله بمشاعري
مر الوقت واحنا على كعده وحده بدو الولد يطلعون الجدوره ويطبخون شكد حاول عم قدس يطلع ويرجع لبيتهم بس السيد جان رافض واصر يبقون وفعلا بقو وكعد يساعد السادة ب الطبخ
جنا اني والبنات نباوع للسادة من المطبخ مفتوح باب الشارع مانكدر نطلع لان جزام ودلهب موجودين اسمع جزام كل شوي يصيح
_جزام:: سيد انا سني وجاي اطبخ وياكم اخذ جدرين قيمه
السيد جان يضحك ويطبطب على ظهره جان متونس ويشجعهم واحنا هم جنا نساعدهم بس. بالداخل ماطلعنا للخارج
نباوعلهم تربعو ب الحوش يكشرون بصل وباقي الاكل وملاك تصور بيهم وتصيح
_ملاك:: ذكريات هاي ذكريات
جنا كاعدات ب المطبخ ملتهيات ب الشغل اندك باب المطبخ كلنا عدلنا كعدتنا مشيت ب اتجاه الباب فتحت الباب شفت فقار ومعراج ب الباب ابتعدت عن الباب سامحتلهم يدخلون
دخلو للحديقه يطلعون القناني طلعو من الحديقه فقار بيده قنينتين ومعراج قنينه باوعت ملاك لمعراج وحجت بخجل مستحيه منه
_ملاك:: سيد ماتصورلي البرا اريد انشرهن
ابتسم معراج مدنك راسه هز راسه ب اي توا يحجي وحجه فقار من مكانه
_فقار:: انطيني انا اصورلج
بباوعت ملاك لفقار وحجت رافضه يصور الها
_ملاك:: لا مشكور بس سيد معراج شفته ناشر على الفيس بوك تصويره حلو اريد مثله
_فقار:: اصورلج احسن منه
اخذ فقار التلفون خلاه بجيبه وطلع من المطبخ هوا فقار باوعت لملاك مصدومه برد فعل فقار وشاهيناز وقس يضحكن
ضحكت وياهن مستغربه رد فعل فقار
جان طبخنا بهذا اليوم طبخين القيمه ومطبك لحم وهذا الطبخ للعلوية لباب لان جانت ناذرة بس ترجع للعراق تجيب خروف وتوزع ب السابع والقيمه النا السيد الي اشتره الذبيحه
رجعنا مره ثانيه ملتهيات ب الطبخ جانت امي ونسوان عمامي والعلويات ب الحديقة يطبخن واحنا ب المطبخ اندك باب المطبخ فتحت قدس الباب
دخل عماد مدنك راسه جان لابس مثل لبس ابو والباقين هم دشداشة سودة والغترة براسه باوع لشاهيناز وحجه بثكل
_عماد:: ابوي يكول اذا ماتصير زحمه عليج اريد جاي
_شاهيناز:: كله تريده مثل اخر مره
طلع عماد المطبخ وشاهيناز ضربت على وجهه
_شاهيناز:: شبسرعه راح جنت اشاقه
_قس:: شنو جاي اخر مره
_شاهيناز:: حطيت البثل نفس الساعه طفيت الطباخ وصبيت الجاي
حجتها تضحك وقس تعزز الها رجعت اكمل شغل والبنات كذالك رجع باب المطبخ اندك فتحت قدس الباب ودخل عماد باوع لشاهيناز وحجه
_عماد:: يكول جاي اخر مره مثل العسل بس هسه لا يريد غيره لان راسه يأذي ويريد للعمو فقار وعمو معراج وعمو ايليا وعمو دلهب وعمو جزام
كعد عماد يعدد اسماء الكل وشاهيناز صافنه تباوعله بتوتر من كمل هزت راسها ب اي واشرت على عيونها
_شاهيناز:: من عيوني
طلع عماد من المطبخ وشاهيناز تصيح ورا
_شاهيناز:: لاتكول لابوك من عيونييي هاي الك
ضحكنا على رد فعلها وهيه خلت القوري تسوي الجاي بس هل مره لا جاي معدل صبت للكل وصبت النا هم
بعد مرور ساعات وتعب كملنا الطبخ ووبدو السادة يوزعون واحنا منهكات ب المطبخ عيوني تنسد وتنفتح نعسانه والنوم ماشيفته بهذا اليوم بس فرحانه لان كملنا توزيع
اندك باب المطبخ عدلنا كعدتنا وسمحنالهم ب الدخول
دخل فقار وجادح وغضنفر مدنكين روسهم باوعت لغضنفر بيده صحن مطبخ لحم مرتبه احسن ترتيب
مشه ب اتجاه قدس مبتسم خلاه كدامه وضحك يمسح على راسها
_غضنفر:: جوعانه مو
ابتسمت قدس بخجل مدنكه راسها
باوعت شاهيناز لغضنفر وحجت
_شاهيناز:: لعد سيد واحنا
باوع غضنفر لشاهيناز ودنك راسه يضحك بخجل
_غضنفر:: ناسيكم جان بالي يم قدس اكلت لو لا
دخل فقار للمطبخ يضحك كاسه الماي بيده باوعلي وابتسم
_فقار:: جيبي صحونه خل نصبلجن اكل
كمت من مكاني اخذت صحونه من الميز وانطيتهن لفقار طلعو فقار والولد من المطبخ واحنا نباوع لقدس شلون تضحك فرحانه
رفعت صحن الاكل وباوعتلنا
_قدس:: هااا ليش ماتاكلن... يااا تذكرت ماعدجن رجوله يذكروجن
ضحكنا كلنا وهيه تضحك
هزت قس ايديها تباوع لقدس صفح
_قس:: شكو وحده تزوج يصير بيها خيط خبال
بقت قدس تغيض بينا وتضحك واحنا نضحك وياها
سمعت صوت جادح وفقار يتحمحمون حتى يدخلون
سمحنا الهم يدخلون
دخل فقار وجادح بيدهم صحونه اخذنا اني والبنات كل وحده صحن باوع فقار ملاك بدون صحن
رحع اخذ صحن وطلع من المطبخ
واحنا كعدنا ناكل
صارت عيون البنات وتركيزهن كله على فقار من دخل للمطبخ بيده صحن متروس لحم حطه على الطاوله كدام ملاك وحجه
_فقار:: الج هذا علوية
حجاها وطلع من المطبخ
باوعت شاهيناز لصحنها وحجت بقهر
_شاهيناز:: شوفن فقار ترس صحن ملاك لحم واني حاطلي لحمتين صغار
باوعت لملاك اضحك عليها شامره حيلها على قدس مبتسمه بفرح والبنات يضحكن عليها وشاهيناز تلطم شلون فقار ترس صحن ملاك لحم وصحنها لا!!
" جهاد "
بعد كل الي صار بيه من جادح وغدرته ماكدرت ارجع اثق بي مره ثانيه
احتاجيت اتوجه لشخص ثاني يكون اكثر ثقه
ماشفت نفسي غير كدام فقار ابن اخوي مهدي
الوحيد الي اكدر اثق بي من بعد جادح هوا فقار وجان حلي الوحيد
اتفقنا اني وفقار نطلع ثاني يوم الطبخ حتى نقابل جزام الي اخر فتره جنا اني ويا على تواصل
شكد جنت رافضه اتواصل ويا جزام بس ماكدرت غدرة جادح جبرتني
جنت اتواصل ويا وانطي كل المعلومات وهوا جان ماشي ب القضيه حسب الي عرفته منه
طلعنا اني وفقار من البيت بسيارته باوعلي وحجه ب استغراب
_فقار:: عمه جادح شلون؟
_جهاد:: خلي جادح عليه اني اعرف اتصرف ويا
سكت فقار يسوق واني اباوع لطريق
كسر هدوء السيارة من فقار كال
_فقار:: عمه تشوفيني مؤهل للزواج
باوعتله وابتسمت هزيت راسي ب اي
_جهاد:: كلش مؤهل وانت كفو ومسؤل هم
هز راسه مبتسم يباوع لطريق
حجين اضحك عيوني على الطريق
_جهاد:: شنو تردون تفرحونا مرتين بفرحة الزهره
حجه فقار من مكانه
_فقار:: اي انا جاي افكر هم
التفتت على فقار ب استغراب عكدت حواجبي وحجيت
_جهاد:: مو تكول ما مستعد وما مفكر؟
_فقار:: اي بس السيد مايقبل الولد يتزوجون اذا انا ماتزوجت لان انا اكبرهم مو صح؟
باوعتله وهزيت راسي ب اي
باوعلي بتوتر ورجع يباوع لطريق
_فقار:: اي لعد هاي هيه انا ماعندي شي خليني اخطب ويا جادح
_جهاد:: مممم ابالي خوش وحدده
التفت يباوعلي بحماس مبتسم
_فقار:: ياهي؟
ابتسمت نص ابتسامه وحجيت
_جهاد:: بت السيد اسماعيل خوش بينه السيد والعلويه يعرفوها
عكد فقار حواجبه ب انزعاج ماراضي
_جهاد:: هااا شبيك ابالك وحدة!
_فقار:: اي
خفيت ابتسامتي لان اعرف جوابة شنو
حجيت ب استغراب كأنو ماعرف الي راح يختارها منو
_جهاد:: منو نعرفها
هز راسه ب اي وحجه بدون مايخلي عيونه بعيوني
_فقار:: علوية ملاك بت السيد حمزة
ابتسمت بفرح كاتمه ضحكتي ماريد اكول جنت اعرف الي اباله ضيعت ابتسامتي وحجيت ب استغراب
_جهاد:: انت تدري السيد رايد ملاك بس ل ايليا
عض على شفايفه وهز راسه ب اي
_فقار:: اعرف بس انا اريدها؟
_جهاد:: ليش هيج مصر عليها؟
اتحسر وباوعلي متوتر
_فقار:: مادري عمه جني احبها وماريد ادخل ب الحرام وياها
رفعت حواجبي بدهشه حجيت ب استغراب
_جهاد:: يمتى لحكت تحبها؟
_فقار:: من سنوات بس هسه ماكدرت اسيطر على مشاعري وجاي اشوفها تتجاهلني عمه انا بيه شي؟
هزيت راسي ب لا نافيه كلامه
باوعلي وجر حسرة
_فقار:: اخاف اتقدم ويرفضون
ابتسمت اباوعله هزيت راسي ب لا وضربت على اكتافه
_جهاد:: معليك يمي بس مو هسه تحجي بيها
_فقار:: لعد؟
_جهاد:: قبل فرحه الزهره احجي هسه اكتم على الموضوع
هز راسه ب اي ساكت واني مبتسمه جنت متوقعه بس كلامه هسه ريحني ماردت اشوف ملاك تنكسر من فقار خفت لايطلع ماشايل الها مشاعر
وكف فقار كدام المكان الي قاصدينا سحبت نفس بقوه ونزلت من السيارة اني وفقار جان جزام واكف منتضرنا من شافنا ابتسم واتقدم ب اتجاهنا تسالمو هوا وفقار د
بهذا القاء هواي عرفت مواضيع جان مكتوم عليها جانت من طرف والدي ابتسمت بحزن واني اسمع لكلام جزام جنت شاكه ب الموضوع بس هسه ويا دلائل الضابط تأكدت من كلشي
باوعلي فقار بحزن مايعرف شيحجي واني بس اسمع كوا مسيطرة على دموعي
كمنا اني وفقار راجعين لبيتنا استوقفني كلام جزام من حجه مدنك راسه
_جزام:: علوية ادعيلي
هزيت راسي ب اي وطلعنا اني وفقار صعدت ب السيارة وفقار يمسح على وجهه
_فقار:: اكيد اكو سبب عمه
_جهاد:: فقار ماريد اسمع شي رجعني للبيت
سكت فقار يستغفر جان مصدوم مثلي ماجان متوقع الي راسه يسمعه بس اني جنت متوقعه بس ماردت أكدد الكلام
رجعنا للبيت صعدت لغرفتي امسح بدموعي ماردت واحد يشوفني ابجي
مرت ساعات وطلعت من غرفتي مزعوجه بس ماردت ابين لاحد شي كعدت بين البنات جانن يسولفن واني بالي مو يمهن جذب انتباهي سؤال قس
_قس:: علوية هم محتفظه بشي قديم؟
هزيت راسي ب اي وابتسمت بحزن
_جهاد:: اي دشداشه صغيرة
_قس:: لمنو وليش؟*
تحسرت وحجيت بقهر
_جهاد:: دشداشة عون ابني جانت بيها ريحته اخر عطر منه ضل
سكتت قس مصدومه تباوعلي
حسيتها استحت من سؤالها رغم ملاك الي سألت البنات وكلهن جاوبن وقس وجهتلي السؤال
سكت الكل من دخل ايليا يركض للصاله فتحت باب المصلا وحجه يباوع للسيد
_ايليا:: سيد جزام وجادح متعاركين ودلهب طاكهم على روسهم ب الكرك وهسه ثنينهم ب المستشفى!!
............................
سلام حلويني شلونه البارت؟
شنو نهايه علاقة فقار وملاك؟
جادح وشاهيناز!!!!!!!!!
العلوية جهاد وشنو عرفت من جزام؟
عركه جادح وجزام؟؟
"اكرر شكو تعليق عن التأخير ب البارتات الحساب ينحظر وشكرااا"
شكرا لزيارتكم عالم روايات سكيرهوم
