رواية هدية الشيخ هشام الفصل الثاني العشرون بقلم التميمية
بعدها كامت بتعب من الفراش ولبست ملابسها وتريد تطلع يم البنات تساعدهم...سمعت صريخ وصياح وبجي...
حيلها راح وصاحت هشام...وتريد تطلع...
شافت ايمان بوجها بالباب كلش وعيونها كلها دموع وتبجي وتصيح حقيرة انتي بسببج كلشي صار بحياتي
اليوم اقتلج واخلص منج.....
وشافت بيدها سجينه ماتت رعب..ايمان قفلت الباب عليهم ودفعت حوراء وطاحت وتأذت وتريد تطعنها وتبجي وتصيح وتغلط على حوراء...
حوراء كامت بسرعة من الرعب جسمها كله رجف وماتت بدمها وبطنها كامت توجعها...
بس صارت سريعة وراحت بسرعة دخلت الحمام وتريد تقفله ايمان دفعته حيل وحوراء تدفع بكل قوتها تريد تقفله بس ماعدها قوة مثل ايمان....
بس دفعته حيل من خوفها وقفلته على نفسها وايمان تصرخ وتدفع بالباب وتصيح طلعي حقيرة الا اموتج واقتل الي ابطنج...
حوراء ظلت تبجي من الخوف والرهبة وترجف بمكانها ورجليها ماتشيلها وبطنها صارت توجعها وظلت تتصلب بطنها...
ايمان تضرب عالباب وتبجي وتصيح:كله منكم صرت مالي احد حتى اخوي الوحيد الي بقالي هم راح..افرحو انتي وهشام بس ماخليكم تتهنون اليوم اقتلج واخلص منج انتي سبب دماري وكرهي الكم ماراح يخلص....
وتضرب عالباب حيل وام هشام ونسمة ورقية بره ومخبوصات خبص ويدكون الباب وكرار اجه على صياحهم والصريخ مال ايمان....
نسمة تبجي وخايفة على حوراء لان شافت ايمان بيدها سجين وركضت وكالت وينها الا اقتلها واحرك كلبه لهشام...
ومالحكت عليها قفلت الباب مال غرفة حوراء...
كرار حاول يكسر الباب ويصيح لج كلبه ان مديتي ايدج على خالتي اقتلج والله..ومايكدر يكسر الباب رغم ضخامته بس رجله ما تساعده والباب من نوع الثكيل...
وصاح يابه وينك...شاف ابوه اجه على اصواتهم..ويكول شصاير...
نسمة ببجي:ايمان تخبلت وتريد تقتل حوراء
هشام اخترع وخرهم عن الباب ودفعه بس الباب من النوع الثكيل كسره يحتاج قوة اكبر بحديد...
ورقية ترجف وخايفة تسويها صدك ايمان هاي ماعدها دين..ام هشام طاحت عليهم..وهشام احتار بيها يرروح لأمه لو لحوراء.. نسمه لحكتها لأم هشام...
اما الحجي ابو هشام طلع من غرفته وهو يدعم بلي كدامه لان رجال ضرير مايشوف ويصيح ابني هشام كرار وينك شصايرلكم....
داخل الغرفة...
ايمان بأستهزاء وخبال:اجه بطلج يابعدي خلي يسمع صرخاتج خل يتعذب شوي اليوم اخلي يدفنكم انتم الاربعة..وتضرب عالباب..فتحي واوعدج اخليج تموتين بسرعة
حورء ببجي وخوف:ليش هيج حاقدة انتي ماسويتلج شي ومو انه منعت الشيخ عنج..عوفيني بحالي حرام عليج مو بس تقتليني تقتلين 3 ارواح وياي
ايمان بغضب:لج انعل ابوج لابو الشيخ انتي وياه متهموني ولا احسبله بقندرة اجاني وله لا...صرتي انتي هدفي احرك كلبه بيج وميهمني وخل يقلتني يسجني بس المهم اخلص منج واحرك كلبه عليج وعلى جهاله
ظلت تضرب عالباب حيل وحوراء خايفة وتبجي..وايمان التفتت وشافت انفتح الباب عليها ودخل هشام معصب بعد ما كسر الباب من الكيلون...
هشام بعصبية اتجه الها:يالماتخافين الله شنو قصتج...
وحاولت تشرد لزمها واخذ السجين الي بيدها وشمرها بعيد...
وحوراء امنت من سمعت صوته..بس هم بعدها خايفة تفتح الباب..تخاف على الي ابطنها مو خايفة على نفسها...
هشام بغضب:شتردين تسوين شتخططين وين تردين توصلين بالظبط..وصاح..حوراء مابيج شي
حوراء برجفة وبدموع:مابيه شي
ايمان بخبث:لا تخاف هسة مابيها شي بس اوعدك احرك كلبك بيهم..اتركني..عبالك اخاف منك واعوفها لا ابد
هشام سحبها:انتي الظاهر تردين تنحطين بمستشفى المجانين صايرة بلا عقل نهائياً ومجرمة وماتخافين الله..واخذها وطلع...
رقية ونسمه ركضو لحوراء وكرار وره ابوه راح...
ايمان حبسها هشام بغرفتها بس مو ناوي يطولها عليها لأن مايريد تأذي نفسها ويبتلي لأن بحالتها هاي ممكن تأذي احد واذا ماكدرت يخاف تقتل نفسها...
جهالها يبجون خايفين وذيج اصرخ بخبال وتكلهم فتحو الباب اليوم اقتل حوراء اقتلها لو اموت الي ابطنها...
بالكوة مسكتين الجهال واخذوهم يم جدهم ابو هشام..وهشام دك على عمها يكله عنها والي فهمه منه انو اخوها متوفي البارحة وتوه واصلها خبر وفاته...
لاكينه مقتول ومايدرون منو... هو خارج العراق عايش..والي قاتلينه عصابة...
هشام فهم انو هي فقدت عقلها بسبب فقدان اخر شخص من عائلتها ومايعرف شيسوي بهالحال ايمان مايكدر يحبسها اكثر تتخبل اكثر ولا يكدر يفتحها وتأذيهم...
وحس بشعورها واشفق عليها لان هو هم فقد اخوه بس ماتوصل لهالدرجة هي بيها شي اكبر من هيج...
قرر ياخذها للمستشفى يحجزوها جم يوم لمن يشوف شيصير وياها...
مرت ايام وايمان كلش حالتها صارت ومرتين حاولت تقتل نفسها ويلحكون عليها...اخذها هشام للمستشفى وخلاها يمهم واتفق ويه دكتور يحاول يساعدها...
اما حوراء عاشت خوف ماينوصف من حاولت تقتلها ايمان وتخاف مرات تطلع من غرفتها لمن اخذها هشام للمستشفى...
كلش جاي تتعب بالحمل وحالتها حالة..وزنها بتزايد بسرعة من ناحية بطنها..وتراجع دكتورة كل فترة لازم اخر مرة راحتلها كالت جسمها مو متحمل التوائم الثلاثة...
لازم ادير بالها على نفسها وماتتحرك قليل..احياناً يصير عدها نزيف قليل...ومنعتها الدكتورة من الحركة بس حوراء ماتكدر تركد مكان واحد تضوج...وكالت احتمال يصير عدها ولادة مبكرة...
هي وهشام نفس وضعهم ماتغير وجاي تحس نفسها ثكيلة عليه وبالكوة متحمل وجودها..لأن مرتين بعد ذاك اليوم حاول يتقرب الها هم نفس الشي ابتعد..وتحس ماعاد يحبها..ويعتبرها وحدة ماتليق بي...وكاضيتها بجي لوحدها..وهالنفسية جاي تأثر عليها بالحمل...
هاي شعورها طبعاً اما هشام مايشوف الدنيا الا بعيونها بس كلشي بداخله ضد هالعشك..هي مختلفة عنه..فرق بالعمر الكبير وفرق التفكير..والتفاهم..بس رغم هالشي يعشكها على صغر سنها...
ودوم يكول هي انظلمت من اجتني هدية وانظلمت برجال اكبر منها وبحسبة ابوها وانظلمت من صارت حامل مني بهالسرعة...
بس مو بيده كل الصار ومجاي يتقبلها ويكول مكتوب من الله كل هذا ويكول يمكن لو ماخذها رجال صغير بالعمر جان هسة هي ميته منو يصدك سالفتها وحالتها...
محد يصدك هي مظلومة وطفلة..دائما المجتمع الي مثلها مذنب بنظرهم ومايصدكون مظلوميتها ابداً..بس هو عقله مو صغير وجاهل...
هسة هي بالشهر الخامس وبطنها بكبر وحدة بالشهر السابع بس بهالأشهر خلصت من سالفة التقيأ جانت كله بالحمام وبس تستفرغ اي شي تاكله حتى الماي....
بس هسة لا طبيعي وشوي اريح هالفترة بس الثكله..الدكتورة عرفت جنس طفلين بس الثالث مامعروف..واحد بنية والثاني ولد والثالث ماكدرت تعرفه...
دمها كلش نازل وتاخذ ابر سود مال حديد ومثبت ماتكطعه وادوية دكتورة محددتهن الها...وكلتلها تولدين عملية اكيد...
نسمة وكرار رجعو يكملون السنة..ونسمة خطية مو متحمله نظرات الجميع الها والحجي الي تسمعه بغيابها وبظهرها يوجع...ماعدى جم شخص وياها ومايضوجوها...
كرار يكلها لا يهمج كل هذا العالم مادامج وياي وبعيني احطج واحميج..هي صح
تحبه بس الي صار ماينسي وبقت تحس بالنقص...
محتاجه اهلها..محتاجة خواتها وامها واخوانها محتاجة ابوها وسندها حتى لو هو انسان عصبي وماينجرع يبقه ابوها ويبقون اهلها....
امها كلش حالتها نايمة مستشفى بس ماتدري حتى حوراء من تروح لاهلها تسمع بيها بس ماتكلها تخاف على مشاعرها هي تحب نسمه هواي...
رقية ومخلد يخبلون سوية..وشوي خلصو من كرار من رجعت عافيته شوي ورجع يداوم ماخذ راحته من يجيها مخلد مرات بالبيت😁....
يم شيخنه...
راح لغرفته وهو مقهور وضايج منين يتلكاها كلهن يلتمن عليه من يجن يوكعن فد نوبه على راسه..الدكتور كله حالة ايمان كلش بتزايد....
وجهالها يبجون عليها يردون امهم..بالكوة يسكتون بيهم بيبيتهم هم تعبانة مو بحيل جهال..رقية اداريهم..ونسمة ساعات بس من يداومن حوراء تهتملهم شوي بلي تكدر عليه..لان هي مربية اخوها الصغير تعرف للجهال....
دخل الغرفة وحوراء نايمة عالسرير صفح وشكلها مهمومة..من شافته دخل كامت عدلت كعدتها..وتربعت وتباوعله بسكوت...
هشام راح يمها:شلونج اليوم بويه
حوراء بهدوء:الحمدلله زينة...
مد ايده الها يحضنها صايرة تتجنبه وهو مشتاق لحضنها.. بس هي وخرت عنه وكامت نزلت من السرير بثكل وهو باوعلها بتسائل ويدري بسببه....
هشام:ليش بويه صار فترة تتجنبيني
حوراء بهدوء:ماريد تعذب نفسك كافي تجي يمي
هشام سكت لحظات وحجه وهو بصوته وجع عليها:فهميني مجاي تفهميني..مو منج السبب..بيه انه
حوراء:هذا هو فاهمتك لا تبررلي كافي وتعذب نفسك..سوي الي يريحك ما كايله شي انه
هشام:تغيرتي يبت كلبي صاير ماهمج شو
حوراء:انه الي صرت ماتهمني لو انته.. وسكتت وبعيونها لمعت دموع...كام الها وحضنها رغم معارضتها وتبتعد منه...
هشام:كلشي ولا يطيحن دموعج..ماريد اضوجج 3 ارواح داخلج وتحزن لحزنج وتفرح لفرحتج
حوراء وخرت عنه:الي هامك الثلاثة الي ابطني مو امهم
هشام:شهل الحجي اكيد انتي هم تهميني
حوراء تريد تغير الموضوع:مو مهم..انه اريد اروح بيت ابوي مشتاقتلهم صار كومة مرايحة
هشام:بس مو الحركة الزايدة مو زينة الج
حوراء:ماعليه شني شسالفة شهل الخوف الزايد انته وعمتي الي كاتبة الله يصير
هشام:الله كريم عود افكر منا لباجر
حوراء:لا شنو تفكر الله يخليك شيخي اريد اشوف امي وابويه مشتاقتله والله ماعرف اذا ما اروحله كل جم يوم اشوفه..وايو الخبلة والله ترا ابجي
هشام شافها تغيرت نبرة حجيها وهسة راح تتحول لحوراء الزعطوطة بتصرفاتها الي تخلي يبتسم....
هشام ابتسم:انه امج وابوج بعد شلج بيهم هو انطاج الي بعد شكو يابه يطالبني بيج لو شنو
حوراء:هاي شنوو انته رجلي شنو امي وابوي.. اشوف كل مرة اكلك اروح ماتكلي هيج
هشام:اخاف عليج وعلى ذولي الي ابطنج وانتي شايلتهم بالكوة
حوراء بقهر:ماريدهم لعد هاك جهالك شيلهم انته.. انه اريد اروح لأبوي
هشام ضحك من كلبه:ولج شنو شيلهم انته..ششيلهم وين احطهم بالله..بجيبي
حوراء بقهر:لا رجعهم ماريدهم مو انته انطيتني اياهم رجعهم متنازلة عنهم خوش..على الاقل خلي واحد بس اكدر اشيله
هشام مات ضحك عليها:البضاعة لا ترد ولا تستبدل وهاي ربج انطاج اياهم 3 فد نوب شبيدي عليج
حوراء سكتت وضاجت وراحت عنه...اخذت ادويتها وهو راح غسل وبدل وانسدح بالسرير وراحت هي للسرير ونامت بعيد عنه كالعادة وهو تاركها براحتها...
اصلا مايكدر يجبرها تجي بحضنه وهي صارلها فترة تتجنبه وهو هم تعب من سالفة انو يحاول يتقبلها ومايكدر وشعور صعب...
هي ناطيته ظهرها...هشام بهدوء:كسرتي خاطري وباجر راح اخذج لبيت ابوج
حوراء التفتت عليه:والله ماتلعب بأعصابي
هشام:شني بويه جاهل يمج..كتلج اخذج الهم..بس ماطولين نص نهار لا اكثر هناك جهال وهوسة واخاف تتأذين لو يعوروج
حوراء ابتسمت:فدوة لكلبك شيخي مو مشكلة نص نهار كافي
هشام ردلها الابتسامة:بس تعاي بحضني وشبكيني صار فترة بعيدة عني..مشتاق للخديدات
حوراء ضاجت ودارت وجهها:الأحسن ماتعذب نفسك وياي..خلينه هيج احسن
هشام سكت وخلاها براحتها...نامو كلمن بجهة..وكالعادة فزت لكت نفسها بحضنه وشابكها حييل حتى تختنك وتتقيد حركتها....
كامت منه ونزلت بتعب وهو فز من كامت..راحت توضت وصلت بصعوبة...وهو هم توضأ وصلى صلاته...
حوراء كعدت عالسرير كباله وهو توه يلف سجادته....
حوراء:هشام فدوة طلب
هشام شكد يحبها من تكول اسمه:عيوني مو بس طلب
حوراء بهدوء:فدوة اظل بيت اهلي جم يوم والله بخ...
كاطعها هشام:لا بوية لا
حوراء:اي ليش الله يخليك شيخي
هشام:من غير ليش..لو رحتي هناك ماتهتمين بنفسج ولا تاخذين ادويتج اعرف..ومنو يوديج تاخذين الأبر
حوراء:وعلي اهتم لنفسي والله وماتحرك ولا اروح مكان..وامي توديني اخذ الأبرة كل يوم
هشام:بلا مناقشة كلتلج لا..تردين تبقين الليلة بس مو مشكلة بس جم يوم هناك لا..اذا ماشوفج كدام عيني وتاخذين الادوية مارتاح
حوراء بضوجة:صار فهمت واذا ماتريد اروح اليوم عادي مو مشكلة مصار شي
هشام شافها ضاجت:حور عيوني انتي..خايف عليج حالتج ماتسمح انج اطلعين وترحين وتجين..انه هنا مطمن حتى الأبر تجيج بنية هنا وتنطيج اياهن
حوراء:اي فهمتك..تخاف على جهالك هم حقك
هشام:يابه ترا مو كلما حجينه ومنعتج من شي كلتي تخاف على جهالك وكأني كايلج ماريدج..ترا اخاف عليج انتي همين..اذا صارلج اسقاط بهالمرحلة لاسامح الله تخسرين الاطفال تعبج يروح عالبلاش ويحترك كلبج
حوراء بحزن:اي فهمتك وانته هم تخسر جهالك..وبعد ماتكدر تجيب غيرهم لأنك مستحيل تتقبل وحدة مثلي ماتليق بمقامك
هشام تأفف:ياريتج تفهمين الي بداخلي..السالفة مو مجرد مشاعر وبس وتليق بيه وماليق بيج..ماتفهميني انتي ولا راح تفهمين رجال اكبر منج بسنين طوال..كلش انظلمتي بيه
حوراء بشوية عصبية:لاء انته الي ماراح تفهم زعطوطة مثلي واصغر من ابنك حتى ولا راح تفهمني..انه ميهمني كل هذا ولا عمرك...انته تهمني الشي الوحيد الي افهمه هو انو اني اعشكك بطريقة ماتفهمها..نسيت كل ماضي مؤلم بهالعشك...
وراحت تركته وراحت للفراش تغطت وغطت حتى وجهها بالرغم تختنك بسرعة وتفحط من تغطي راسها....
تركها على راحتها وبقه كاعد ماكدر يرجع يغفه..كام قرا من كتاب الله وبقه كاعد لمن طلعت الشمس....
كام شعل الضوى وبدل لبس دشداشته وهي انزعجت وفزت..كلها بهدوء كومي مو تردين ترحين بيت ابوج..حظريلج ملابس وابقي جم يوم مثل ماتردين...
طلع قبل لا يسمع ردها وراح يصبح على امه وابوه..شوي واجت مبدلة ولابسة عبايتها ومابيدها بس جنطة بسيطة بيها تلفونها وفلوس وادويتها...
وراحت صعدت وياه السيارة...
هشام:هااا مو كلتي تردين تبقين وين اشياءج وملابسج
حوراء بهدوء:ماكدر ابتعد يوم عنك..وسكتو ثنينهم...
راحت بيت ابوها وشافت بيبيتها هناك..وفرحت بيها بالرغم شكد تغلط وتفشلها وشكد تحجي حجي سخيييييف ههههههه.....ام حسين:ولج حويره بت الكح......اشو ازوجتي ونسيتي بيبيتج وجدج ولج هاااا
حوراء:بيبي شسوي غير زواج مسؤلية..هاي ظروفي متسمح..والشيخ مايقبل اطلع هواي ومن اجي هنا مايقبل اروح بيت جدي والله
ام حسين:عزززااا بعينه شني مهلكج هذا الشيخ شكله ساد عليج باب الغرفة ومايطلع منها..ما مخلي بيج حال ولج
حوراء خجلت من حجي بيبيتها لان ابوها كاعد وهمستلها:بيبي شهل الحجي.. انطي مجال عيب مو ابوي كاعد والله فشلتيني كدامه كل مرة هيج
ام حسين بعلو صوتها:لعد مجذبة شكله رايح دوس حيل وحيل طول وعرض ماشوفين سوالج ثلاثة موش وحييد
حوراء غطت عيونها بيدها:عزززززااااا بيبي كافي
اية فطست ضحك:بيبي لا مسكين شيخها بريء وفقيير هاي بس بوسه سوت هالثلاثة...ماكملت اجاها نعال من حوراء سد حلكها....ههههههههههههه....
ابو حمزة ضحك:لج بابا عيب شهالحجي ويه اختج..شوفي يمه مخربة البنات بحجيج..خفي عليهن ترا بناتي صايرات مايستحن خصوص اية هالوكحة
اية ضحكت وتفرك بوجها:اخخخخ يابه اجاني صاروخ من حويره خلاني اصير حولة بعد اسبوع ماكدر اشوف ههههههه..بابا نشاقه شنو بيها
ام حسين:اي خلي بناتي يشاقن ويضحكن شتريد انته..حلال عليك حاط ثلاث نسوان وكل يوم وحدة تملصلك جاهل
ابو حمزة:يمه والله راح يخربن البنات من وره سوالفج
ام حسين عصبت:وشبيهن سوالفي قابل مثل نسوانك بايعات الحياء كل وحدة لسانها اشطوله..وهاي زمزمو ما جابتلي الجاي ليهسة مدري جاي تحطلي سم تريد تموتني..وينج يالعوبة
زمزم اجت وبيدها الجاي:هاي الجاي اجاج عمه..ونطتها الجاي..حوراء كومي روحي بالغرفة انسدحي لا تكعدين هواي مو زين عليج
حوراء:يمه ترا والله ضوجتوني بهالخوف نطوني حريتي شوي تعبت ترا مو بشهر الاول انه بالخامس
زمزم:انجبي مو زين عليج الكعدة هواي ولا يصيرلج شي انتي والجهال وتبلينه ويه الشيخ
ام حسين: زمزمو انجبي وانكلعي غرتي لان كاعدة يمي البت..وهاي ليش محروك الجاي شنو حاطلتلي يالمسمومة اكيد تردين تموتيني
ابو حمزة ضحك:يمه انتي حتى انه تكولين تريد تموتني شسالفة
ام حسين:اي ماتدري بالحياية نسوانك يردن موتي عندي قاصة بيها جم فلس وذهباتي يردنهن
ابو حمزة ضحك:يمه قاصتج صارلها 16 سنة عندي وهي مالت ابوي وجان بيها بس دراهم حديديه ومنظار مال ابوي ورقة البيت ماله ورقة قطعة ارض..وذهبج وزعتي على بناتج نسيتي
ام حسين تفكر:يمه هاي شوكت ناسية ذكرني يمه
اية:ههههههه بيبي صارلج جم سنة تحجين نفس الحجي كل مرة ههههههه ويذكرج ابوي
ام حسين تنسه كل شوي:يمه سودة بوجهي..ناسيتك ومانطيتك من ذهباتي بعد اهلي يمه..اكول يمه حويرة شنو بيج وليدات لو بنيات
حوراء:ولد وبنية والثالث ماعرفنه شنو هو
ام حسين:اي بالمبارك يمه عليكم..ربي يكومج بالسلامة..راح تسوين امج بيبية وييي مالت وعابت والصخلة جابت..وجهها مال مشاكل مو مال بيبية
اية وحوراء ضحكن على بيبيتهم تموتهم ضحك لو قمة الضوجة والحزن....وحتى ابو حمزة اما زمزم تمد بوزها وتحركه يمين ويسار وماعاجبها....
ام حسين:اي يمه خلي رجلك يخف عليج من الختلات يمه بيج ثلاثة مو شويه شايلة كوم مصارين ولحم ابطنج ديري بالج عليهم..وتحط ايدها بصدرها...ماشاء الله صدرج كبران يمه
حوراء وخرت ايد بيبيتها وحطت ايدها على وجهها:راح ادفن نفسي من وره حجي بيبي والله فشلتني كل شوي تخجلني.....
وكلهم يضحكون عليها....طبعا نسوان الشيخ كلمن بشغلة لاهية بس احفاد الحجية كاعدين يمها يعني حوراء واخوانها الصغار وابوها....
العصر اجن كل خواتها علمودها..وحدة تشكي للثانية همها وضيمها بس برغم هالشي وحدة تحب الثانية ويسولفن ويضحكن ومايخلن التعاسة الي همه بيها تتغلب عليهم....
...وصار الليل اتصلت على هشام يجيها كلها باتي يمهم اتونسي وباجر العصر اجيج...وهي بقت وتفكيرها كله يمه وماتعرف تنام بدونه تعودت عليه وهي ماتبات عد اهلها قليل كله نص نهار تروح لو نهار كامل ويجي ياخذها...
يوم ثاني اجه اخذها وبنفس اليوم توفت ام نسمة وخطية سمعت بأمها وظلت تصرخ وصارت مثل المخبلة تريد تروح تطلع بلا حجاب بالشارع تكول ارد اروح اشوفها....
بالكوة مانعيها ولازمها كرار وبجه على حالها وياها واتذكر امه من ماتت ويعرف شعورها كلش زين...
هشام انقهر عليهم ثنينهم شاف كرار يبجي ماتحمل الموقف كلش صعب عليه....
وحتى حوراء ظلت تنحب وياها..وصارت الفاتحة ونسمة راحت لفاتحتها بس اول مادخلت ماستقبلنها ويصرخن بسببج ماتت...
بس بعدين كلهن اخذنها بالحضن وبجي وملخن نفسهن خواتها وهي همين...
شوي وصل خبر لأبوها واخوانها جاية للعزاء..شسوو واجو الاخوان داخل وطردوها من فاتحة امها...
وظلت بحسرتها شوفة امها وحتى عزاء ماخلوها تحزن ويه خواتها...بقت ايام يالله تقبلت الصدمة وبدت تستوعب امها ماتت...
حوراء منعها هشام من روحة الفاتحة يخاف عليها ويكلها منو يعتب عليج عالواجب خل تخلص وروحيلهم بالليل...
وحوراء هسة بالشهر السادس والدكتورة كالت الاطفال كلش نازلين وهالشي راح يخلي الدكتورة يمكن تولدها بالسابع....
باقيلها ايام وتدخل السابع...وهي والشيخ نفس حالهم اصلاً صارت ماتقبل حتى بلمسة ايده وتبعده قبل مايفكر حتى يجي يمها....
ايمان كلش منهارة ومتخبلة وفقدت عقلها..وكلهم مقهورين عليها وحتى هشام....
نسمة حزينة على امها وتكضيها بالليل بجي عليها..حتى هاملة كرار مالها خلك طعم الدنيا فقدته والواهس لكلشي بعد وفاة امها وبقت بحسرتها عليها....
مكسورة حيل بموتها وماشافتها ابد وتلوم نفسها على مرضها وطيحته وتكول بسببي ماتت......
طلع من البيت يريد يروح بيت عمه عنده شغله يمه بيته قريب من هنا مايسوة يسوق هيج بعد شارعين...مشه وهو يفكر بحوراء...
خايف عليها من هاالثلاثة الي ابطنها وهم خايف عليهم مايعيشون لو انولدو...
كاطع تفكيره حس واحد يتبعه..وصوت خطوات..وكف والتفت بهدوء...
باوع يمين يسار وكل مكان ماشاف احد...تحرك ورجع يتمشه..ورجع حس بأحد يتبعه....وكف مكانه...
هشام بدون مايلتفت صاح:طلع نفسك وشوفني طولك ياجبان بدل ما تلاحكني بالخفية..اطلع واجهني...
التفت هشام وطلع شخص ملثم ومايبين منه شي واحد قصير القامة....
رفع مسدسه عليه:اتشاهد عل روحك ياشيخ هشام....ورماه بطلقة...واجت بصدره الطلقة....
ماشاف طول هذا الرجال حتى غباره...وباوع لأيده على صدره وكلها دم...نزل دمه يغزارة....صارت ظلمة بعينه الدنيا وكع عالأرض ينزف..............
