 |
رواية بنات نعمة الفصل الرابع والعشرون بقلم احمد حسن
في ورشة عم مسعد
ناصر .. صباح الخير ياست سمية
سمية .. صباحك ما يعلمه الا ربنا ايه ال أخرك لحد دلوقتي
ناصر .. تأخير ايه بس ياست سمية دي كلها نص ساعة
سمية .. النص ساعة دي بتحصل فيها حاجات كتير ابقا خد
بالك بعد كده ياأستاذ وزي ما بتاخد حقك كامل تدي الشغل
حقه
ناصر .. حاضر ياست سمية
سمية .. إعمل حسابك مخصوم منك النهاردة نص يوم ولو
إتكررت هيتخصم منك 3 أيام
ناصر .. لا ده كده كتير دي مش نص ساعة ال تخليكي
تمرمطيني كده!
سمية .. انت كمان مش عاجبك وبتعلى صوتك!
الشيخ مسعد .. في ايه !! صوتكم جايب برة الشارع ليه!!
ناصر .. ( حكى كل حاجة للشيخ مسعد )
الشيخ مسعد .. خلاص ياسيدي حقك عليا ، روحي شوفي شغلك انتي ياسمية وسيبيني أنا أتكلم مع ناصر شوية
سمية .. أفضل دلع أنت بس كده فيهم ياأبويا لحد ما يتطنطو علينا بعد كده
الشيخ مسعد .. وبعدين بقااا قولتلك روحي شوفي شغلك !
سمية .. ماشي ياأبويا رايحة؛
الشيخ مسعد .. متزعلش منها ياناصر ياابني وبعدين افتكر كلامي ليك في البداية لما قولتلك حاول تستحملها
ناصر .. كلامك على دماغي ياعم مسعد بس برضو هي مزوداها حبتين
الشيخ مسعد .. معلش ياابني ربك وحده يعلم هي طيبت القلب قد إيه بس ظروفها مع طليقها مخلياها مش طايقة حد
ناصر .. هي مطلقة ؟
الشيخ مسعد .. أيوه ياابني وطليقها مش سايبها في حالها وعايز يرجعها بأي طريقة بس هي مش موافقة
ناصر .. ليه!
الشيخ مسعد .. بتقول إن اهل جوزها مش كويسين وهو طول اليوم مسطول مش داري بالدنيا غير ده كله مكانش بيصرف عليها وهي ال كانت بتشتغل هنا وتصرف على البيت وزي ما أنت شايف هي شخصيتها قوية مقدرتش تستحمل ولما طلبت الطلاق رفض فخلعته
ناصر .. عشان كده عندها عقدة من صنف الرجالة وكل ماييجي راجل ميستحملش معاملتها
الشيخ مسعد .. بالظبط كده بس ياريت الكلام ده يفضل بيني وبينك
ناصر .. حاضر ياعم مسعد
الشيخ مسعد .. روح بقا شوف شغلك عشان متقلبش عليك تاني 😁
يوم في التاني في التالت بدأ ناصر يتأقلم على شخصية سمية وبقا يفوتلها كتير بعد ما عرف حكايتها من الشيخ مسعد
لحد ما جه يوم وناصر إتفاجئ بزيارة ريهام ليه في الشغل ومعاها ناهد بنت عم عبده فرح ناصر أوي بزيارة ريهام ليه ووقفوا يتكلموا سوا لاحظت سمية الموضوع وجت قالت
سمية .. ومين دي كمان ؟!
ناصر .. دي ريهام مراتي
سمية .. هو انتوا مشبعتوش من بعض في البيت وجايين تكملو هنا !!
ناصر .. ايه الكلام ده ياست سمية دي مراتي وجاية تزورني مفيهاش حاجة يعني !
سمية .. مراتك هناك في بيتكم أما هنا مكان للشغل وبس يعني المرقعة دي في البيت مش في الشغل
ريهام .. مرقعة !! أنتي اتخبطتي في نفوخك ولا إيه عاد !! وبعدين إحنا بنعمل إيه يعني ما أحنا واقفين في الشارع قدام الخلق كلها
ناصر .. خلاص ياريهام حقك عليا روحي أنتي دلوقتي
سمية .. أنتي عبيطة يابت انتي ولا ايه ! انتي مش عارفة أنا مين !؟
ريهام .. تكوني زي ما تكوني أنا محدش.........
ناصر .. قولتلك خلاص ياريهام وروحي على البيت يلا
ناهد .. يلا بينا ياريهام جوزك عنده حق
ريهام .. حاضر ياناصر .ومشيت
ناصر .. أنتي إزاي تكلمي مراتي بالشكل ده !!؟
سمية .. أنا أقول ال أنا عايزاه
ناصر .. تقولى ال أنتي عايزاه لعمالك هنا مراتي مش شغالة عندك عشان تكلميها كده !
سمية .. طب بص بقا ياسي ناصر خلص شغلك وأخر اليوم تقعد معايا تصفيلي كل الحسابات وملكش شغل عندنا تاني
ناصر .. بقا كده ؟
سمية .. أيوه كده
ناصر .. في داهية ومش هخلص اليوم وتعالي أسلمك حساباتك عشان مش طايق ابص في وشك أكتر من كده
____
في المحكمة
نروح بقا عند فؤاد ابن مرسي ال الوضع إزداد عنده سوء خصوصا إن القضية لابساه
فؤاد خلف القضبان مرعوب ومرسي قاعد عمال يفرك في لحظات مروعة لحظة النطق بالحكم القاعة كانت هوس سكوت وترقب
وإذا بالقاضي يقول .. تحول أوراق فؤاد مرسي المغازي لفضيلة المفتي ( يعني إعدام )
نظيمة وتوحيد صوتو
وفؤاد قعد يصرخ ويقول مظلوم إلحقني ياأبوي هيموتوني ياابوي
ومرسي حط إيده على دماغه في لحظة إنهيار ، فجأة قام وقف وتماسك نفسه ومشي على إبنه وقاله متخافش ياواد طول ما أبوك عايش محدش هيمس منك شعره ( وخرج )
خرج مرسي من المحكمة ومسك تليفونه وكلم حد من رجالته وقاله ( نفذ ال قولتلك عليه )
بالفعل طلعت عربية نقل المساجين من المحكمة في طريقها لنقلهم لسجن طره تمهيدا لإعدامهم ولكن في منتصف الطريق خرج عليهم جماعة ملثمين إشتبكت معهم وتم قتل جميع رجال الشرطة وتهريب فؤاد ابن مرسي المغازي
____________
في محل نعمة
نعمة كانت قاعدة وإتفاجئت بدخول عثمان ابن طليقها
عثمان .. إزيك ياحاجة نعمة
نعمة .. اهلا اهلا بالغالي إزيك ياواد ياعثمان وازيي إخواتك وامك عاملين إيه
عثمان .. كويسين والله وبيسلمو عليكي وحشاني والله ياست الكل
نعمة .. متشوفش وحش يارب ياحبيبي
عثمان .. شوفتي ياست ال حصل
نعمة .. قصدك هروب إبن مرسي؟
عثمان .. اه وأنتي رأيك في الموضوع ده ياست نعمة؟
نعمة .. والله ياابني انا مبشغلش بالي بأي حاجة تخص بيت المغازي
عثمان .. يعني انتي مقتنعة إن هروب فؤاد كان صدفه
نعمة .. بص ياابني كلنا عارفين إن مرسي إيده طايلة ومش
هيسيب إبنه يتعدم بالسهولة دي بس في النهاية محدش شاف بعنيه وإن بعد الظن إسم انا كل صعبان عليا العساكر ال ماتت ربنا يصبر أهاليهم
عثمان .. كنت عايز أسألك سؤال غريب شوية ( هو ليه حضرتك مسألتيش في الورث بتاع أبويا رغم إنك من حقك تاخدي حق بناتك في ورث ابويا من جدي ؟
نعمة .. ههههه ورث إيه بس ياولدي ال هدور عليه ! اذا كنت مدورتش عليه وأنا مكنتش لاقية أكل تفتكر هدور عليه دلوقتي !؟
عثمان .. انا عارف إنك مش محتاجة للورث بس بقول يعني لو انتي حطيتي إيدك في إيدينا وخدنا ورثنا من مرسي ....
نعمة .. متكملش ياولدي أنا عارفة إنكم محتاجين للورث بس
صدقني مشكلة الورث دي هي مشكلة أبوك لوحده ومن حقه
إنه ياخده او يسيبه أما أنا فالحمدلله ال رزقني بيه ربنا ملا
عيني وشرح صدري وسد حاجتي وانا مش عايزة من الدنيا
أكتر من كده وخليني أقولك حاجة كمان أنا مشاكلى مع
مرسي مش صغيرة ومش قليلة يمكن أكبر من مشكلة الورث
ال انتوا بتدورو عليه أعقل ياابني وبلاش تتحنجلوا في وش
مرسي دلوقتي لأن من بعد موت إبنه والتاني ال شبه ميت
بعد ما اتحكم عليه بالإعدام بقا بايع القضية ومش هيسمي
على ال يقف في وشه أصبر ياابني أصبر .
