رواية سراج السادة الفصل الخامس والعشرون بقلم غسق ادريس
" شاهيناز "
اتصنمت بمكاني عيوني على عماد مصدومه واني اشوفه مفرفح ومتلوع ب الكاع وجدر المرك طايح فوكه
ركض جادح على ابنه يصرخ والعلوية لباب ادك على وجهه تبجي
كلها ركضت على عماد حتى عمتي جهاد
ماهمها المرك الي ب الكاع وحرورته جانت تصرخ ب اسم عماد الي جان يصرخ من قلبه متوجع
رجعت للخلف ايدي على حلكي ابجي على منضر عماد واذيته شال جادح ابنه ايديه يرجفن مابيه حيل
اخذ غضنفر عماد وركض بي للخارج والسادة خلفه يركضون
وكف معراج فوك جادح يعينه اباوع جادح بس عيونه يرمشن كاعد بنص المرك مامهتم صافن يسمع صريخ ابنه وصريخ الولد
صاحت عمتي مفرفحه بجادح
_جهاد:: لاتصفننننن كومممم وراهم كول يالله وعين روحك مو وقت صفنات
_معراج:: كوممم جادح يلاااا
اخذ معراج ايد جادح وكومه من الارض
كام جادح وهوا مامستوعب الي صار جسمه يرجف بس شفايفه تتحرك
طلعو من البيت خلف صدمتنا وخوفنا على عماد
العلوية زهراء ماتحملت طاحت ب الارض متخربطه والعلوية لباب تضرب على رجليها وتبجي
واني والبنات واكفات بس دموعنا تطيح
دخلت عمتي تركض للبيت
باوعت للكاع بخار المرك بعده يطلع ماعرف شنو تحمل عماد من وجع وقتها
دخل السيد عبد الرؤف والسيد مقتدر ومعز للبيت مستغربين مايدرون شصار باوعو للكاع وباوعو النا
محد جانت شجاعه تحجي من الهبطه والخوف الي مرينا بي
طلعت عمتي تركض لابسه عباتها ونقابها سويج السيارة بيدها باوعلها السيد مستغرب
_عبد الرؤف:: شنو صار وين رايحه جهاد؟
حجت عمتي بسرعه تريد تطلع
_جهاد:: جدر المرك طاح على عماد وهسه اخذو للمستشفى رايحة وراهم امشووو وياي عمه يلااا تعاي
وكفو السادة مصدومين مامستوعبين الي حجته عمتي طلعت منة الله تركض بيدها عباية العلوية لباب
اخذت العلوية لباب العبايه من منه ولبستها تركض وتصيح ب السادة تستعجلهم
_لباب:: يلااا
طلعو كلهم يركضون من البيت واحنا بس دموعنا تصب
كعدت ب الارض ظهري على الحايط عيوني على المرك موقف عماد وصريخه ينعاد براسي
خليت ايدي على كلبي ابجي بحركه متذكرة اول مادخل اجاني يضحك فرحان بيده تفاحات ثنين وجادح خلفه مبتسم
مدها ب اتجاهي فرحان
_عماد:: جبتلج وحده وجبتلي
ابتسمت بوجهه اضحك اخذت التفاحه منه وحجيت
_شاهيناز:: شكرااااااا
_عماد:: عفواا هاي وزعوها ب الشارع قبل شوي
ابتسمت اباوعله احبه طفل هادء ولطيف مابي اذيه ليش هيج صار توا يضحك متونس يريد يوزع هسه احترك وروحه شاغت
خليت ايدي على وجهي اشهك شلون راح يتحمل هذا الوجع الحرك ماينحمل ابد ماينحمل
حسيت ب ايد على كتفي
بعدت ايدي عن وجهي شفت قدس كاعده يمي تبجي
حضنتها ابجي وهيه تبجي وياي
حجت من بين شهكتها ودموعها صوتها مكتوم
_قدس:: صوته براسي شلون يتوسل ب ابو يجي
هزيت راسي ب اي ابجي
_شاهيناز:: جادح اجه يركض من شافه طايح ب الكاع ماكدر يتحرك
_قدس:: انصدم ورجلي خانته
نزلت راسي عيوني ماوكفن من البجي
بالي يم عماد
رفعت راسي شفت عاتكه كاعده ب الزاوية تبجي بسكته ايدها ترجف وملاك كاعده يمها تبجي
رفعت ملاك راسها تباوعلنه الدموع بعيونها
_ملاك:: الحرك يأذي والله يأذي
حضنتها عاتكه تبجي وياها وهيه ترجف وتحجي
_ملاك:: احتركت رجلي ومتتت الف موته عماد احترك كله وهوا طفل شلون يتحمل؟؟
_عاتكه:: اللهي مثل مابردت النار على سيدنا ابراهيم برد حرورة الحرك على عماد مايتحمل ياربي مايتحمل
سكتت كاعده بمكاني ادعي الله يخفف عنه الوجع والاذيه الي جاي يعيشها
مر الوقت والكل رجعت لشغلها بس بالنا كله عند عماد محد اتصل وانطانا خبر او طمنا عليه ولا واحد يجواب على الاتصال
ضلينه بقلق منتظرين وقدس كل شوي تتصل على غضنفر يطلع مغلق حاولت اني والبنات نتصل على السادة ماكو رد
جنا متجمعين ب المصلا العلوية زهراء تقره دعاء الفرج واحنا وياها
رفعت العلوية زهراء ايدها والدموع بعيونها
_زهراء:: ياللهي ادعوك بهذا اليوم. اليوم العاشر من محرم اليوم الي استشهاد ابا عبدالله الحسين. اتوسل اليك يارب تفرجها على هذا الطفل الصغير وتبرد علي حرورة النار
توسلت ب الله وب الامام المهدي مثل هذا اليوم الي استهشد بي جده وانسبو النساء وتيتمو الاطفال
يبردها ويفرجها على عماد
مرت خمس ساعات ضبط ومحد اتصل ولا حجه ويانا دب الخوف بقلوبنا
والعلويات الكبار ماوكف السانهن من الدعاء
افتر ب البيت وافرك ب ايدي ياربي لاتفجعنا ب عماد الخوف محتلني خايفه حيل
مرت الوقت ومحد كدرت تاكل ولا وحده ارتاحت كلنا خايفات ونتراجف
كمزنا كلنا من سمعنا صوت الباب ينفتح وصوت معراج
طفرت اركض اريد بس اسمع خبر واحد يبرد كلبي ويريحني
دخلت عمتي للصاله وخلفها معراج بيده العلوية لباب كوا تمشي
دخلو للصاله وكعدو العلوية على القنفه وعمتي كعدت بصفها تهز برجليها
ركضت على عمتي ابجي كعدت كدامها خايفه انصدم ب الي راح اسمعه
حجيت بتردد خايفه
_شاهيناز:: عمه عماد شلون صار؟
اتحسرت عمتي وهزت راسها بأسف. عضيت على شفايفي بخوف
طلعت العلوية زهراء من المصلا وخلفها العلويات
اول ماشافت عمتي كاعده حجت فاتحه ايديها بخوف
_زهراء:: يمههه جهاد الجاهل شلونه
باوعت عمتي للعلوية ورجعت تحسرت مره ثانيه
_جهاد:: يمه شلونه. حالتة حالة
فتحت العلوية لباب ايدها تحرك بيها وتبجي
_لباب:: سودة عليه يا يمه صريخه وصوته بكلبي يدك
خلت عباتها على وجهها وبجت
_لباب:: يكلي بيبي راح اموت من الوجع
بجينا كلنا نسمع للعلوية لباب وهيه تبجي ويانا والسيد معراج مدنك راسه عيونه مدمعه
_لباب:: جسمه كله ماضال كتر بجسمه مامحترك
جرت حسره وشهكت اكتافها تهتز
_لباب:: خايفين لا يموت لو يتسمم جسمه
بجيت بقوة رافضة هاي الفكره والعلوية زهراء كعدت ب الكاع تبجي ويا العلوية لباب
باوعت لعمتي صافنه ب الارض عيونها مدمعه
_لباب:: جادح ميت ضال مكبال ابنه ويبجي
_شيماء:: يا يمه يا عماد شلون بيك تتحمل هل اذيه
بجت العلوية لباب ادك على رجليها
_لباب:: شحلاته يفتر ب البيت يكول بيبي اريد اعينكم حتى الامام الحسين يشوفني اخدم بيومه
لزمت راسي راح ينفجر من الوجع الي اجاني
وكلها على بجيه وحده محد سكت ولد صغير مو مال هيج يصير بيه
باوعت لعمتي بعدها على صفنتها
دارت العلوية لباب على عمتي خلت ايدها على رجل عمتي. فزت عمتي من صفنتها تباوع للعلوية
_جهاد:: ها عمه
_لباب:: يمه ابوج كال انطو علم ل رنا خل تجي
_جهاد:: ماتتحمل لو تدري
اتحسرت العلوية لباب وحجت
_لباب:: لعد شلون
_جهاد:: احجي وياها انتِ كليلها اريد اشوفج مشتاقتلج واليوم مسوين قراية ومجلس للامام وعدنا طبخ ماتجين وهيه تحبج ماتردج
_لباب:: مابيه يمه اخاف احجي وابجي واهبط المره
هزت عمتي راسها وتحسرت
باوعت لمهجان وحجت
_جهاد:: مهجه جيبيلي تلفوني
كامت مهجان تجيب تلفون عمتي واحنا بقينه على كعدتنا. جابت مهجان التلفون وانطته العمتي
فتحت عمتي التلفون ودخلت على الوتساب طلعت رقم رنا زوجت السيد معز ام جادح اتصلت عليها
فتحت عمتي سبيكر منتظرتها ترد
انفتح الاتصال واجانه صوتها تهلي بعمتي
_رنا:: ياهلا ب الذاكرنا اليوم
_جهاد:: هلا بيج شلونج ام جادح
_رنا:: هلا ب ام عون الحمدلله بخير انتِ شلونج السيد والدتج شلونها العلويات والسادة شلونهم
_جهاد:: كلهم بخير الحمدلله
_رنا:: الف الحمدلله
جرت عمتي نفس وحجت
_جهاد:: اكلج ام جادح
_رنا:: عيوني ام عون امريني
_جهاد:: ما يأمر عليج ظالم. بس تكدرين تجينه للبيت؟
_رنا:: ليش شصاير ولدي بيهم شي؟؟
_جهاد:: لا لا مابيهم شي بس عمتي رايدتج تريد تشوفج و اليوم عدنا مجلس وثواب ورايدج ويانا
_رنا:: صدك جهاد عليج الله ماصاير شي!
سكتت عمتي لحظات ورجعت حجت
_جهاد:: ماصاير شي ام جادح بس مثل ماكتلج رايدين نشوفج ونشوفج كفوفه هم
_رنا:: شو خوفتيني جهاد خاف صاير شي بواحد من الولد شو اتصل عليهم من مساع محد يجاوب
_جهاد:: مو تدرين عدنا طبخ وكلها ملتهيه لاتخافين مابيهم شي
_رنا:: هاي هيه لعد
_جهاد:: غل موجود مو يجيبج
_رنا:: اي موجود هسه اكوم اكله
_جهاد:: يلا تمام ننتظرج يعني؟
_رنا:: اي جايه
ودعت عمتي ام جادح وسدت الاتصال بس سدت عمتي الاتصال من ام جادح العلوية لباب رجعت تبجي
باوعتلها عمتي وحجت
_جهاد:: كافي ياعمه شوفي وجهج صاير ليمونه لاتتخربطين
_لباب:: ولج جهاد صوته مايطلع من راسي
_جهاد:: الله موجود عمه ورحيم بي اكثر مني ومنج احنا مو احن من الله عليه وهذا كله قضاء وقدر هسه ماتفيدنا دموعنا نريد الدعاء بس
حجتها عمتي وكامت من مكانها جانت اكثر وحدة هادئه عمتي واكثر وحدة صلبه بهذا الموقف
مشت ب اتجاه غرفتها فتحت الباب ودخلت
باوعت للعلوية لباب رفعت ايدها تدعي بس ادموعها ماوكفت
كمت من مكاني ومشيت لغرفه عمتي دكيت الباب ودخلت بسرعه شفتها واكفه كدام الجربايه التلفون بيدها من دخلت دارت تباوعلي ب استغراب
مشيت ب اتجاها ابجي وافرك ب ايدي وكفت كدامها وحجيت
_شاهيناز:: عمه عماد هم يصير زين
_جهاد:: مادري شاهيناز حالي حالج
قوست حلكي وحجيت
_شاهيناز:: اخاف يموت عمه
باوعتلي عمتي وتحسرت تهز راسها بأسف
_جهاد:: ربج رحيم يا امي مابيدنا شي احنا
دنكت راسي افرك ب ايدي عضيت شفايفي ورفعت راسي اباوع لعمتي
_شاهيناز:: عمه جادح شلونه؟
باوعتلي وقوست حلكها بأسف
حجت
_جهاد:: ابنة وروحة من الدنيا بين الحياة والموت شلونه يعني؟
_شاهيناز:: خطيه
هزت عمتي راسها ب اي وسكتت
التفت على الجربايه شمرت التلفون على الميز وكعدت على الجربايه فتحت ربطتها ونامت على الفراش
باوعتلها ب استغراب
_شاهيناز:: عمه راح تنامين
_جهاد:: تعبانه شاهيناز من يجي واحد من الولد كعديني
هزيت راسي ب اي ودرت اطلع من الغرفه طفيت الضوه وطلعت من الغرفه
بالي وتفكيري كله يم عماد ومقهورة على جادح شحاله هسه وهوا يشوف ابنه بهاي الحاله؟
" قس "
سديت الاتصال من قدس مقهورة على عماد والي صار بي كعدت على القنفه عيوني مدمعه شحاله هسه وهوا طفل والحرك ماكل جسمه اكل
حسب الي سمعته من قدس الجدر طايح فوكه كله يعني ماضال بي جزء صاحي
اتحسرت وخليت ايدي على خدي طفل شنو شاف من الدنيا وهيج يصير بي حتى لو عاش
راح يضل الاثر بجسمه للكبر
كعدت ادعيله يطلع منها سالم حجيت لنضال وهيه نقهرت وياي
صعدت للغرفه اريد انام ماكدرت ضليت اتكلب بمكاني باوعت للساعه مرت نص ساعه واني كاعده هنا مايجيني نوم
كمت من مكاني وطلعت من الغرفه
نزلت الدرج شفتها كلها ملتمه ب الصالة عمي ونضال والولد خواني ونسوان الولد والبنات
مشيت ب اتجاه القنفه كعدت بصف نضال وصفنت اسمع لكلامهم
بدون ماشارك بس اسمع
من بين حديثهم كله جذبتني سالفة
جانو ينطون صفه لكل واحد بينه وشنو اكثر شي مزعج بي
باوعتلهم وحجيت
_قس:: زين اني شنو اكثر صفه مو حلوة بية!
باوعلي عمي محمد وحجه مصغر عيونة
_محمد:: والله ياعمي ماشفت بيج صفه بيها خير كل صفاتج شينه شعددلج ب الضبط
باوعتله مخنزرة اي حقه هيج يحجي لان راصدته وادور وراه
باوعت نضال لعمي وباوعتلي
_نضال:: كل صفاتج حلوة بس عندج صفة وحدة شينه
_قس:: اللهههه. وهيه شنو شنو
_نضال:: ام افليس
خليت ايدي على صدري مصدومه اباوعلها
_قس:: انييي ام فليس؟؟؟
_باسم:: اي الفلوس سر سعادتج
_قس:: اني؟؟؟؟؟؟؟
_قاسم:: والله ماكو واحد ب البيت روحه الفلوس بكدج
باوعتلهم مصدومة كلهم مأيدين الفكرة يعني اني ام افليس؟ اصلا اكثر بشر مفلس اني منين اجيت ام فليس
باوعلي عمي وحجه عود ينصح
_محمد:: ياعمو الفلوس وصخ دنيا
_قس:: شلون وصخ يكتل كتل اويلي لو اتوصخ عمري كله بهيج وصخ
حجيتها فرحانة فعلا احلى وصخ هذه
باوعولي كلهم صفح ماعاجبهم
طفرت ابتهال من مكانها تباوعلي
_ابتهال:: قس مثلا مثلا؟ عندج صالون واجتج وحده مكيجت عندج وكملتيها ومن اجيتي تاخذين حقج منها تكلج ماعندي فقيرة شتسوين
باوعتلها صفح وحجيت
_قس:: ماتطلع اذا ماتدفع الفلوس
_ابتهال:: فقيرة؟؟
_قس:: تدفع
_نضال:: ماعدها فلوس؟
_قس:: تدفع
باوع عمي محمد الهم وضحك
_محمد:: مو اكلكم ام فليس
دار اخوي باسم علي طلع ربع من جيبه ووكف كدامي
_باسم:: لو خيروج بين العراق وهذا الربع شنو تختارين
باوعت للربع وباوعت لباسم هزيت ايدي وحجيت بفخر
_قس:: هذا سؤال؟ اكيد اختار الربع
حجيتها واخذت الربع من ايده
صفنو كلهم بوجهي واني دنكت اضم الربع ب جيب الملابس
باوعتلي عمي محمد وطلع الف من جيبه
خلاه بوجهي وحجه
_محمد:: لو خيروج بين الالف وعائلتج شنو تختارين
_قس:: لا عمو لا هنا نوكف
ابتسمو يباوعولي واني وكفت اباوعلهم بحب وحنيه
باوعت لعمي محمد وحجيت
_قس:: الف هواي اكيد الالف
حجيتها واخذت لالف منه خليته بجيب الملابس
باوعتلهم مصدومين واحد يباوع بوجه الثاني
باوعتلهم نضال تأشر عليه
_نضال:: خوفي لايجي هذا اليوم
كعدت على القنفه اباوعلهم
_قس:: يلا ياهو يخيرني بينه وبين الفلوس
_محمد:: مو اكلج ماعندج خصال حميدة
باوعتله صفح والله يالله وشنو يعني غير الفلوس حلووه؟
رجعو يسولفون واني وياهم اسمع
كمت من مكاني عطشانه اريد اشرب ماي
دخلت للمطبخ اسمع اصواتهم بعدها تنسمع
اخذت كلاص الماي ومشيت اطلع من المطبخ
باوع عمي لنضال وحجه ب ابتسامه
_محمد:: نضال تدرين شكد انتِ نظيفه من الداخل
باوعتله نضال عاكده حواجبها
_نضال:: خير محمد ذهب وماضل عندي بعته كله بعد نظيفة من الداخل والخارج شنو
_ابتهال:: سودة عليه يمه نظفج من الذهب ابوي
خزر عمي ابتهال
ورجع يباوع لنضال ب ابتسامه
مشيت ارجع اكعد على القنفه بين نضال وعمي
توني اشرب الماي وحجه عمي
_محمد:: تدرين ابو ساري بايع كليته
رفعت راسي اباوع لعمي مصدومه ونضال تباوعله عيونها يردن يطلعن من مكانهن
_نضال:: لحكتني على اعضائي محمددددد؟؟؟
_قس:: وتكلي ام فليس وانت عيونك على كلية نضال
باوعلي عمي وغمز
_محمد:: ب 18 مليون وتوصل اكثر
درت على نضال وحجيت ب استغراب
_قس:: ماتحسيها ثكيله ببطنج ومسوية ازدحام بين الامعاء؟
انصدمت نضال تباوع لعمي وتباوعلي
_نضال:: خليتها ببال قسسسس هسه تشرحني واني نايمه يايمههههه يا ساطيههه راحت بتج تاجرو ب اعضائها
باوعت لعمي وحجيت
_قس:: شتكول اليمنى لو اليسرى
_محمد:: مابيهن فرق هيه ياهي تريد ناخذها
_قس:: ها نضلية شكلتي؟
دكت نضال على راسها والباقين يضحكون واني كاعدة
احسب بكلية شكو واحد موجود هنا
والله احنا هواي يعني نعيش امراء زمانا....
" مهره "
خبر حملي هوة صدمة الي يعني اني راح اصير ام؟
خليت ايدي على بطني خايفه ومامستوعبة معقولة اكو طفل ببطني
ضحكت بتعجب ماعندي رد فعل
ماعرف افرح احزن لو انصدم؟ اني راح اصير ام؟؟ ومن منو من مسلم؟
غمضت عيوني استوعب الي جاي امر بي بهاي الحظه
فتحت عيوني اباوع لاختبار الحمل خطين
بلعت ريكي وابتسمت
اني صدك حامل
طلعت من الحمام اركض لعمتي عيوني مدمعه الفرحه غمرتني مايهمني اني من منو حامل مايهمني الي ببطني من نطفة منو
بس فرحتي جانت غريبه صح بعدني صغيرة صح بعدني ب البداية وصح اني حامل من مسلم بس ممكن يكون هذا الطفل سبب لتغير حالي للافضل
ممكن اكو امل مسلم يتغير وحياتي تتغير ويا
دخلت للصالة شفت عمتي كاعدة بيدها التلفون
من شافتني دخلت رفعت راسها تباوعلي وتباوع لاختبار الحمل
مشيت ب اتجاها اضحك حطيت اختبار الحمل بوجهه مبتسمه
_مهره:: عمه شوفي
صغرت عيونها تباوع للاختبار من شافته خطين ابتسمت تهز براسها باوعتلي تضحك
_كوثر:: يلا مبروك بلكت الله مسلم ينكض
نزلت اختبار الحمل اضحك
_مهره:: عمه يعني اكو جاهل ببطني
_كوثر:: ولججج بعده هسه الي بطنج حمصه بعدين ويا الشهور يصير طفل
ابتسمت فرحانه وعمتي تهز ب ايدها تضحك
طلعت مسرة من المطبخ وخلفها روان باوعلي مستغربات فرحتي
ضحكت مسرة تباوعلي
_مسرة:: حامل مو؟؟؟؟
_مهره:: اي ايييي
فتحت ايديها تحضني فرحانة
_مسرة:: مبروككككك
حضنتها فرحانة وهيه فرحانة وياي
باوعت لروان تباوعلي وتضحك مستهزءة هزت ايدها وحجت
_روان:: اول طيحة الجهال شنو ونوب من منو من مسلم
مارديت عليها وسكتت مامهتمه بس عمتي ماسكتت حجت تباوعلها صفح
_كوثر:: لعد اذا اول طيحة الجهال شمالج كل سنه حامل بفرخ شنو مامصدكه بطنج تزاكط فروخ
_روان:: عمهههه شبيج بس احجي ويا مهره تضوجين
جرت بتها الصغيرة ومشت ب اتجاه الغرفة ادردم صاحت عمتي من مكانها موجهه الكلام لروان
_كوثر:: ضبي جهالج ودخليهم للبيت مو تارسين الشوارع جنهم صخول
دارت روان على عمتي مخنزرة ماتكدر تحجي وترد تدري عمتي ماتسكت الها
دخلت للغرفه وركعت الباب وراها
هزت عمتي ايدها وفتحت تلفونها تكلب بي
عفت مسرة وعمتي ب الصالة وصعدت للغرفه فرحانه فتحت باب الغرفه مسلم ماكو
ركضت على تلفوني اتصلت على امي اريد ابشرها
انرفض الاتصال
رجعت اتصلت مره ثانيه وبكل مره الاتصال ينرفض
دخلت على محادثه الوتساب دزيت بصمه مبتسمه بس عيوني مدمعات
_مهره:: هاا ماما شلونج شخبارج لجين شلونها محمد اخوي ان شاءالله كلكم بخير. اتصلت عليج اكثر من مره بس انتِ جاي ترفضين مبين ماتردين تسمعين صوتي
دزيت البصمه ومسحت دمعتي الي طاحت بلعت ريك ورجعت فتحت بصمه ثانيه صوتي مكتوم من غصتي
_مهره:: ماما اني حللت قبل شوي وطلعت حامل كلت اكلج دام انتِ امي وادري بيج راح تفرحين من تسمعين. باجر اجيج ماما مشتاقتلج حتلو طردتيني هم اجيج خوش لاعبالج تفتكين مني
دزيت البصمه وشمرت التلفون ابجي ليش هيج تسوي امي مو اني بتها وماعندي غيرها رغم كل الي سوته ماكدر تبقى امي وابقى احبها
حسيت واهسي انكسر ومابيه حيل بعد نمت على الجربايه صافنه استوعب الي جاي امر بي هسه معقوله اني حامل؟ ماصالي هواي من متزوجه؟ زين شلون راح اتعايش ويا الحمل وويا مسلم
معقوله مسلم يضل عمره كله هيج مخربط واني متونسه والله حامل ومن منو من مسلم؟
صفنت اتذكر كلام روان وافعال مسلم تكرر كدام عيوني
خليت ايدي على بطني بقهر
ياربي انتِ تدري مسلم شنو وتدري اني بشنو جاي امر رغم هذا انت منحتني هذا الحمل
تذكرت كلام السيد عبد الرؤف
_عبد الرؤف:: الله سبحان وتعالى مايرزقنا شي ومايسلب من عدنا شي الى اذا بي حكمه ممكن يمنحنا اشياء احنا مانودها ويسلب من عدنا اشياء احنا نريدها ومتعلقين بيها. الله يعرف شنو ينطينه وشنو ياخذ من عدنا احنا مانكدر نرفض عطايا الله والعكس صحيح.
اتحسرت ساكته اني راضيه على كلشي يارب ومستحيل ارفض واعترض على حكمتك وقدرك
حمدت الله كدرت استغل ايام واشهر من عمري بشي مفيد دخولي للحوزة خلاني استوعب واعرف كلشي بحياتي هوا حكمه والقدر كفيل بكلشي
غمضت نايمه نايمه بس مقهورة اني ويني وين الحمل هسه بعدني صغيرة شكو فرحانه هوا اني اريد واحد يطلعني من البقعه الي انشمرت بيها
انوب اجيب طفل يشاركني بهل اذيه وبهل بقعه ليش!!
ساعة اكول حملي اكبر غلط ومصيبة
وساعة اكول اكيد اكو حكمة ونتيجة مرضية من هل حمل
رحت ب النوم بعد تفكير طويل ومحاربة ويا نفسي جزء يكول رافض الفكرة وجزء فرحان ومتقبل الفكرة
فتحت عيوني على صوت فتحة باب الغرفه شفت مسلم يدخل للغرفه
باوعلي شافني كاعدة كمت من مكاني
ساكته
حجه هوا ينزع دشداشتة
_مسلم:: امي اتكول حامل؟
هزيت راسي ب اي ساكته
هز راسه وحجه
_مسلم:: باجر نروح نتأكد
باوعتله وهزيت راسي اني متأكده من الحمل بس فعلا
نروح نحلل افضل
شمر ملابس ودخل للحمام مامهتم
ضحكت اغم روحي من رد فعله
عليمن فرحانه انتِ شوفي بروده حتى ما مهتم
اتحسرت واخذت التلفون
شفت امي شايفه الرسالة بس ماردة
شمرت التلفون ورجعت نمت بمكاني شسوي ماعرف شسوي لا ام تريدني ولا رجل يهتملي
كعدت اليوم الثاني رحنا حللنه وتأكده من الحمل
مافرحت ولا اهتميت مثل اول مره محد مهتم عليمن افرح اني
رحت لبيت اهل دخلت شفت امي واخوي محمد ولجين يتغدون سلمت عليهم وبست امي براسها
وكعدت اسولف وياهم طبيعي متغاضيه عن كلشي
رغم هذا هما الي جانو زعلانين وماراضين بيه
ولاجنهم نفسهم الي باعوني وشمروني هل شمره هاي
سكتت وماحجيت شي....
" ملاك "
فزيت من نومتي مرعوبه على صوت صريخ وبجي
كمت من مكاني اعدل ربطتي وباوع لمكاني
اني يمتى نمت؟
رجع تكرر صوت الصريخ مره ثانية بلعت ريكي واكفه بمكاني خايفه اطلع واعرف سبب هذا الصريخ خايفه لا عماد صار بي شي !!!
طلعت من غرفه عاتكه ومشيت اريد انزل الدرج
وصوت الصريخ مازال مستمر
شبهت على هذا الصوت بصوت رنا ام جادح
نزلت الدرج شفت الكل ملتم ب الصالة وام جادح بنص الصالة تبجي وادك على خدودها
جانت العلوية لباب واكفه كدامها تبجي وياها والعلويات يهدن
نزلت الدرج وبقيت واكفه اباوع ل ام جادح شلون منهارة وتبجي بحركه كلب
_رنا:: يمههه عماددد وليديي
سحبتها العلوية زهراء تهدي بيها تريد تكعدها على القنفه
باوعت رنا للعلوية زهراء وحجت دموعها يصبن
_رنا:: اميت اوليدي شفته ملفلفين جسمه كلههه
هزت العلوية زهراء راسها تبجي رنا تلطم على رجليها
كعدت على الدرج اباوعلهن بقهر شحالك يا عماد هسه
مر الوقت وكلها هدئت بس الحزن والقهر موجوده بملامحهم باوعت لعمتي كاعده على القنفه عيونها حمر دمم !!
وشاهيناز كاعده يمها تمسح بدموعها
سمعت صوت السادة من الحوش
كمت من مكاني والبنات كامن يعدلن كعدتهن
اندك باب الصالة صاحت العلوية لباب صوتها رايح كوا تحجي
_لباب:: دخلو يمه دخلو
انفتح باب الصالة دخلو الولد مدنكين روسهم
" فقار' معراج' غل' ايليا ' غضيمر "
جان التعب واضح بملامحهم بس دخلو ام جادح كامت من مكانها وركضت عليهم تبجي
_رنا:: عماد وليدي شلون. اخذوني اله اريد اشوفه ماشبعت من شوفته
حضن غل امه يهديها وهيه تبجي بحضنه
_رنا:: روحه شايغه من الحرك بيه ولابيك ياعماد
_فقار:: كولي يالله ام جادح ان شاءالله خير وكله قضاء وقدر وهذا امر ربج
دنكت راسها تشهك والولد يتحسرون مقهورين وحزنانين
دار فقار على امه وحجه وياها بهمس بدون مايسمع احد
هزت راسها ب اي وطلعت من الصالة
رفع فقار راسه باوعلي ودار وجهه
اتقدم ايليا يريد يصعد لغرفته واني واكفه على الدرج
باوعتله ومشيت بسرعه ابتعد عن الدرج
جان معراج منطيني ظهره يحجي ويا امه
مانتبهت ولان نزلت بسرعه
صرت بظهر معراج باوعت ل ايليا منتظرته يصعد
دار معراج يريد يحجي ويا فقار مايدري بيه وراه
قبل لايضرب بيه صاح فقار بصوت عالي
_فقار:: دربالكككك
_معراج:: شكوو
دار معراج راسه مستغرب بدون مايلتفت بجسمه
باوعلي ورفع حواجبه مبعد نفسه
_معراج:: العفو العفو
_ملاك:: لاعليمن عادي
دخل معراج شفايفه بحلكه يهز راسه باوعت لفقار رافع حواجبه يباوعلي
رفع ايده ب استغراب وحجه بصوت ناصي
_فقار:: شنو. عليمن عادي؟
باوعتله ب استغراب مافاهمه
_ملاك:: لعد شكله؟
غمض عيونه وهز راسه ساكت اجيت ارجع اوكف على الدرج مرة ثانية
استوقفني صوت فقار من حجه
_فقار:: هناكك كعدي علوية
درت اباوعله شفته يأشر على القنفة
هزيت راسي ب اي ومشيت اكعد بصف شاهيناز وعمتي
محد جان منتبة على حديثي ويا فقار لان كلها مركزة تسمع ل غل. جان يحجي عن وضع عماد وكلها مندمجة وياه
دكت العلوية رنا على رجليها تبجي والسادة يهدون بيها
باوعتلي شاهيناز وقربت راسها تحجي وياي بهمس
_شاهيناز:: ملاك عندج رصيد
_ملاك:: اي عندي
_شاهيناز:: فدوة اريد اتصل على اخوي سجاد يجيبلي براسيتول راسي راح ينفجر
باوعتلها عيونها حمر ووجهه اصفر
رجعت حجيت وياها بهمس
_ملاك:: انتِ ماكله شي وجهج اصفر؟
_شاهيناز:: لا شهيتي مسدودة
_ملاك:: وجهج اصفر شاهيناز اكلي شي لاتتخربطين
_شاهيناز:: مقهورة على عماد كل ماصفن اتذكر الي صار ويا
اتحسرت بقهر اهز براسي
_ملاك:: والله اني هم مقهورة عليه كل ماشوف رجلي اتذكر الوجع الي عشته بساعتها تمنيت اموت ولا اعيش هل شعور شحالة وجسمه كله احترك
خلت شاهيناز ايدها على وجهه تمسح بدموعها
خليت ايدي على رجلها احجي وياها بهمس
_ملاك:: كافي شاهيناز الدموع ماتفيد الي يحتاجه هسه الدعاء بس
بعدت ايدها عن وجهه شفايفها ترجف
_شاهيناز:: موبيدي والله
اتحسرت اريد احجي وياها
رفعت عيوني صارت على فقار وحميدة
جانت حميدة واكفه على الجهه اليسرى لفقار بينهم مسافه تحجي ويا بهمس وهوا مدنك راسه يسمع الها
عكدت حواجبي اباوعلهم مركزة وياهم
جانو ثنينهم يهمسون ويحجون بهدوء بحيث محد يكدر يسمعهم
وفقار كل شوي يهز براسه مأيد كلامها
حسيت براس قريب من راسي
درت عيوني شفت شاهيناز خاله راسها يم راسي تباوع الهم رافعه حواجبها
باوعتلي وعكدت حواجبها
_شاهيناز:: شيحجون؟
باوعتلهم وعكدت حواجبي وياها
_ملاك:: مادري بس ليش هيج مندمجين؟
قوست شاهيناز حلكها تهز براسها
_شاهيناز:: كلش مندمجين
هزيت راسي ب اي عيوني عليهم
حجيت مخنزرة
_ملاك:: لج باعي شلون فقار حتى مارفع راسه شاف الاجواء شنو ماشنو
حجت شاهيناز تهز راسها
_شاهيناز:: ابدددد ارموشه ماهتزت.
اتحسرت ضايجة عيني عليهم
_ملاك:: صالي ساعه واكفه يم الدرج ماجت حجت من بعدت يلا كامت
_شاهيناز:: لج هسه شلون اروي فضولي وحميدة كتومه ماتحجي شي
حسيت براس ثالث يراقب ويانا التفتت اني وشاهيناز شفنه عطاء تباوعلهم مقربه راسها علينه
باوعتلنه وحجت بهمس مستغربة
_عطاء:: شجاي يحجون؟
باوعتلها ورجعت اباوعلهم ب استغراب
_ملاك:: مادري شيحجون
_شاهيناز:: مابيجن وحدة تقره الشفايف
حجت عطاء تباوع لحميدة
_عطاء:: حميدة قبل شوي جانت تبجي ب المطبخ
_شاهيناز:: صدك؟؟؟؟
_ملاك:: يمتى هاي ليش؟؟
باوعتلنه عطاء وحجت
_عطاء:: قبل لايجون السادة وحتى شفتها تراسل بفقار تكله يمتى تجون عندي موضوع وياك
خليت ايدي على صدري عيوني راح يطلعن من مكانهن
_ملاك:: شنوووووو
_شاهيناز:: السالفه صارت دسمه هواي
_عطاء:: لعد ماتشوفني اريد اعرف شيحجون
باوعت لفقار عكد حواجبة ودار على حميدة بذهول حجه وياها وهيه هزت راسها ترد عليه
دكيت على رجلي مقهورة اريد ابجي
_ملاك:: ولجن شيحجون
_شاهيناز:: مابيجن وحدة تقره الشفايف
_مهجان:: ها شكلها
التفتنا اني و شاهيناز وعطاء على مهجان الي جانت مندمجه ويانا تباوعلهم مصغرة عين وفاتحه الثانيه
قلدت شاهيناز حركتها وباوعتلها فاتحه ايدها ب استغراب
_شاهيناز:: تسمعين بعيونج شنو
_مهجان:: انجبي جاي اراقب
رجعت اباوعلهم واخزر بيهم ثنينهم والبنات وياي حتى نسيت الي جنه نحجي بي وبجينه والقهر
صار الي يهمنه حميدة وفقار شيحجون
بين تركيزنا ونضراتنا الهم
رفع فقار راسه يريد يحجي ويا حميدة
صارت عيونه ب اتجاهنا باوعلنه ب استغراب
عدلنه اني والبنات كعدتنا بسرعه ودرنا عيونه منهم مامهتمات حجت شاهيناز تهز ب ايدها
_شاهيناز :: الله لايشغلنه بهموم غيرنا
_ملاك:: يارب
_عطاء:: امين
_مهجان:: شعلينه احنا
رجعنا نسمع للعلويات والسادة
بس اني تركيزي كله يم فقار وحميدة وحميدة اريد ارجع اباوعلهم بس استحي انوب لايكولون هاي فضولية اني شعلي قابل ابن عم وبنته يحجون بموضوع خاص ليش ادخل نفسي مثلا؟
خليهم براحتهم
رجعت اباوعلهم من حميدة ابتعدت واجت كعدت على القنفه مدنكه راسها بهدوء
اترخص فقار من الكل وصعد لغرفته
باوعت لحميدة جانت غريبة هادئه كل شوي تمسح بوجهه
سكتت مغلسه على الوضع. اجذب اذا اكول ماضجت بس اني شعليه بيهم؟ خليهم براحتهم
رجعت اباوع لحميدة لا شنو خليهم براحتهم غير اعرف
مر الوقت وكلها التهت بشغله
العلويات الكبار راحن للمستشفى يشوفن عماد بعد الحاح من ام جادح واصرار حتى تشوف عماد
اخذ غل العلويات هوا ومعراج وطلعو بيهن للمستشفى
طلعت من المصلا بعد ماكملت صلاتي ودعائي
مشيت ب اتجاه المطبخ اصبلي استكان جاي اشتهيته من شفت منة الله تشرب جاي ونومي
دخله للمطبخ فارغ محد موجود مشيت ب اتجاه القوري فتحته شفته بثل الجاي ومحطوط وياه نومي
شعلت الطباخ عليه
ومشيت اخذ كلاص من الميز
اخذت الكلاص خليت الشكر ووكفت منتظرة القوري يفور
صفنت متذكرة فقار وحميدة ياربي الفضول كاتلني اريد اعرف شنو موضوعهم مادري
المشكله علاقتي بحميدة سطحية هيه بنيه كتومه وهادئة دوم مبعدة نفسها
يعني مو مال ميانة اروح اكلها شحجيتو وهيه حتى لشاهيناز ماحاجيه
باوعت للقوري فار
طفيت النار وشلت ايد القوري بيدي بدون ما انتبهه
_ملاك:: اخخخ اخخخ
رجعت القوري على الطباخ متأذية من حرورة الايد
نفخت على ايدي ابرد عليها
مشيت ب اتجاه البراد فتحت الماي البارد على ايدي
باوعت الايدي بقهر هاي حرورة بسيطه هيج اذتني لعد عماد شحاله هسه؟
اتحسرت ومشيت ب اتجاه الطباخ اخذت الوصله من على القنينه وشلت القوري.
صبيت ب الكلاص ومشيت اكعد على الطاولة
شربت من الكلاص وصفنت عيوني دمعت
خليت الكلاص على الطاولة
باوعت لايدي عيوني بدن يصبن كلبي يحركني على عماد رغم ماعرفته من مده طويله بس يقهرني من اتذكر الي صار بي
توني امسح عيوني ودخل فقار للمطبخ مانتبهه لوجودي عيونه بتلفونه يكتب بسرعه
رفعت راسه باوعلي بنضره سريعه ووكف يباوع للمطبخ
دنكت راسي عيوني على الكلاص ماريد اباوعله وجهه صاير يضوجني
رفعت عيوني ببطئ
باوعتله واكف بمكانه ما متهم يباوع لتلفونه
خنزرت اريد اشمر الكلاص براسه
بس هاي مو اخلاقي واني علوية وعيب وفوكها المطبخ مطبخهم والكلاص كلاصهم يعني فهمتوني مو؟
تقدم ب اتجاه الطاولة جر الكرسي وكعد منطيني صفاحه يكتب ب التلفون
هذا شبي انوب
عبالكم اهتم ويصير عندي فضول اعرف يراسل منو ويكتب لمنو لا اكيد لا ماتعرفوني زين
باوعلته عاكده حواجبي شبي هيج مركز ب التلفون عيونك راح يرحن سيد شوي انطيهن مجال
هسه انت شعليج شو سكتي
هزيت ايدي بضجر اباوع للميز واحجي ويا نفسي
يعني عايف الاماكن كلها جاي هنا تراسل ماتمشي تراسل بغير مكان لو تدري بملاك تحب تحط روحها بكلشي وجاي
التفت اباوع لفقار
يباوعلي ب استغراب عاكد حواجبه عيونه على ايدي وشلون اهز بيهن
باوعتله وباوعت لايدي مصدومه
نزلت ايدي خجلانه منه
باوعت للكلاص مستحية يااا ملاك شيكول عليج هسه مخبلة شافطة بيج خيط؟
امدج يا ايدي شبيج تعبرين
_فقار:: علوية بيج شي؟
_ملاك:: شنووو؟؟
رفعت راسي اباوعله مستغرب واني عاكده حواجبي
_فقار:: اقصد يعني انتِ زينه؟
_ملاك:: اي ليش شبيه مخبلة قابل؟
حجيتها اباوعلة صفح
وهوا يباوعلي مستغرب
هز راسه ساكت طفة التلفون وخلاه على الطاوله يحك مقدمه راسه
اخذت الكلاص اشرب واباوعله بنضرات ماعرف شوصفها جني لازمة عليه لزمه
اباوعله من فوك ليجوا واكلب بعيوني وهوا مصدوم يباوعلي وينزل عيونه
حسيته خايف ماعرف ليش بس ملامحه كلها انكلبت
باوع للكلاص البيدي ودنك راسه
_فقار:: هذا جاي
_ملاك:: لاااا
_فقار:: نومي؟
_ملاك:: لا
_فقار:: عصير؟
_ملاك:: لاا
_فقار:: ماي؟
_ملاك:: لا
سكتت يهز راسه واني على نضراتي
رجع باوع للكلاص مره ثانيه وحجه
_فقار:: لعد شنو؟
_ملاك:: اصبلك؟
_فقار:: هوا شنو
_ملاك:: جاي ونومي
عكد حواجبه مافاهم
_ملاك:: هااا اصب؟
_فقار:: اي اذا مابيها تعب وزحمه
عفت الكلاص من ايدي وكمت من مكاني وهوا فتح تلفونه
اخذت كلاص وصبيتله
مشيت ب اتجاه الطاولة خليت الكلاص على الطاولة ورجعت كعدت مكاني
طفه التلفون واخذ الكلاص
_فقار:: مشكور
ماريدت عليه وضليت ساكته
شرب من الكلاص
ثنينه ساكتين محد حجه
خله الكلاص على الطاولة وصفن
رفع راسه وحجه ب استغراب
_فقار:: يمتى فرحة الزهره
صفنت احسب براسي
باوعتله وحجيت
_ملاك:: مادري
_فقار:: هااااا اي انا هم مادري
سكتت وهوا سكت
استغربت منه شبي هذا انوب
رجع الهدوء بينه هوا مركز ويا كلاصه واني مركزه ويا كلاصي وكلاصه ووياه
رفعت راسي اباوع لحميدة دخلت للمطبخ تمسح بعيونها دار فقار على حميدة
باوعتله وباوعتلي
حجه فقار يأشرلها تكعد
_فقار:: تعاي حميدة كعدي
هزت ايدها بلا تريد تطلع
_حميدة:: لا ردتك بشغله
_فقار:: اي تعاي كعدي
_حميدة:: خليها على بعدين
حجه فقار ما مهتم
_فقار:: احجي هسه
_حميدة:: لا بعدين احسن
حجتها وباوعتلي فهمت قصدها يعني تريد تحجي ويا على انفراد ماتريديني موجودة اهااا يعني سوالف خاصه اهاااا هيج يعني
خليت الكلاص على الطاولة بقوة وكمت من مكاني فزو ثنينهم يباوعلي ب استغراب باوعت لحميدة
اشرتلها على الكرسي وابتسمت
_ملاك:: ماكو داعي لبعدين سولفيها هنا اني طالعه
باوعتلي واشرتلي بلا بتردد مستحيه
_حميدة:: لالا.. مو قصدي بس
_ملاك:: لالا مو قصدج شنو؟ عادي موضوع خاص بينكم كعدي اني راح اطلع من رخصتكم
حجيتها ومشيت اطلع من المطبخ
اتقربت ب اتجاه حميدة دنكت راسها خجلانه
طلعت من المطبخ فايرة
ترا انتم الي اجيتو وراي مو اني؟
دخلت للمصلا حواجبي معكودة ادردم ويا روحي
كعدت بصف شاهيناز انافخ
باوعتلها شفتها صافنه تفرك ب ايديها
خليت ايدي على ايدي دارت عيونها تباوعلي
حجيت وياها مستغربة
_ملاك:: شبيج؟
_شاهيناز:: شبيه؟
_ملاك:: اني جاي اسألج ليش هيج صافنه شبيج؟
صفنت عاضه على شفايفها
باوعتلي وحجت
_شاهيناز:: طليقة جادح ام عماد جاية لنجف
" مهره "
توقعت الحمل ممكن يغير مسلم ويحننه عليه بس لا. مسلم نفسه ماتغير
ماتغيرت معاملته للاحسن ب العكس تغيرت للاسوء
صار على بسط شي ينهال عليه ب الضرب والغلط
واني جنت اسكت مادافع عن نفسي
اي اسكت؟ شسوي يعني وين اروح امي حتى بعد ماعرفت اني حامل ما اهتمت
اشكي الها وابجي يمها اريد مشاعرها تتحرك ب اتجاهي
بس لا جانت تحط ايدها على راسها وتصيح
_جنان:: كافي مهره كافي شكد تشكين اني شبيدي يعني مره ورجلها اهل بيت انتم ماما خليها ترجيه ب اذنج لاتطلعين مشاكلج انتِ ورجلج للناس
_مهرة:: بس انتِ امي؟
اتحسرت مزعوجه
باوعتلها ودمعت عيوني حجيت الغصه ببلعومي
_مهرة:: يمه اذا ماشكيلج اشكي المن
_جنان:: يمه لاتشكين لحد اشكي لله بس
_مهرة:: بس هيج اضل اكتم واتأذى
_جنان:: لعد تشمرين همومج على غيرج؟
مسحت دموعي اهز براسي
كافي مهره اهدي عادي مو مهم صح لاتشكين لحد شفتي امج ماتحملت همومج
سكتي واشكي لربج بس هوا يفهمج
بس هيج راح اضل اكتم واكتم
بعدين انقهر واتأذى؟
اي عادي محد يريد يسمع انينج ووجعج كافي مهره كافي !
طلعت من الحمام امسح على وجهي ب المنشفه شفت مسلم نايم على الجربايه
عيونه بالتلفون مشيت ب اتجاه الجربايه
كعدت منطيته ظهري
_مهرة:: مسلم
_مسلم:: نعمم
اتحسرت من حجه بعصبيه مزعوج
حجيت مغلسه على اسلوبه
_مهرة:: تريد بنيه لو ولد؟
حجيتها ودرت اباوعله
رفع عيونه من التلفون وحجه بعدم اهتمام
_مسلم:: مو مهم بنيه لو ولد شنو يجي من الله حلو
ابتسمت اهز راسي ب اي فرحانه
_مهرة:: اني هم مايهمني بنيه لو ولد لان ثنينهم حلوين
باوعلي وابتسم
كبرت ابتسامتي على ابتسامته اول مره يبتسم هيج بوجهي
_مسلم:: المهم يجي الطفل بصحة وعافية
هزيت راسي ب اي فرحانة
_مهرة:: اكيددد
سكت يباوع لتلفونه
واني هم سكتت بس جنت فرحانة
يارب يبقى هيج على الاقل اكرهه بس حنين
ولا اكرهه ومو زين
ثنين يوجعن وماينحملن
نمت وهوا بقى كاعد يراسل بتلفونه
فتحت عيوني من سمعت صوته يضحك متونس
عرفته جاي يحجي ويا بنية وهيج فرحان
غمضت عيوني مامهتمه اني مسلم مايهمني ابد!
الي يهمني اعيش بس
ماريد اعيش بذل وكتل
راضيه بس اعيش سالمة
ما اكدر اشكي لامي ادري بيها ماتريدني وماتتحملني ولا اكدر اروح لاخوي لان اخوي هوا باعني بيده
شسوي؟ اشرد
مايفيد انكض وانكتل
خليني ساكته ومتحملة دام الله الي اختارلي هذا الطريق اكيد اكو حكمة وسبب واكيد اكو فرج بعد هذا كله....
" قدس "
جنت كاعده ب انظف الغرفة
بالي كله عند غضنفر ماجاي اشوفه ولا الحك اسولف ويا مثل كل مره
حقه الي صار ب عماد صعب وهوا ابن اخو وعزيز عنده مايكدر يعوفه ويجي
انفتح باب الغرفه التفتت اشوف منو دخل توقعت وحدة من العلويات بس لا طلع غضنفر
عفت البيدي ومشيت ب اتجاهه فرحانه بجيته
ابتسم يباوعلي بتعب
فتح ايديه ماخذني بحضنه
حضنته بقوه اعبر عن شوقي اله
رفعت راسي اباوعله عيوني دمعن
_قدس:: اشتاقيتلك
_غضنفر:: ميت شوق انا
مشاني ب اتجاه الجرباية حاضني من اكتافي
_ غضنفر:: اكلهم مختنك اريد علاج يكلولي حط اوكسجين مايدرون الاوكسجين شوفتها
ضحكت خجلانه من كلامه
ابتسم بتعب يباوعلي
_قدس :: شلون صار عماد
تحسر غضنفر يهز راسه بقهر
_غضنفر :: متأذي حيل
سكتت اباوع لغضنفر يمسح على وجهه مقهور على ابن اخو كمت من مكاني باوعتله وحجيت
_قدس:: اصبلك اكل؟ جوعان
_غضنفر:: اي ميت جوع خليني ادخل اسبح هم
_قدس:: اسبح على ماجهز الاكل
هز راسه ب اي واني طلعت من الغرفه احضر الغده اله
نزلت للمطبخ شفت العلوية رقيه كاعده على الكرسي بيدها كتاب صغير
من دخلت باوعتلي وابتسمت
ابتسمت بوجهه خجلانه منها حجيت افرك ب ايدي
_قدس:: علوية اريد اصب غده لغضنفر
_ رقية:: اي ليش لا تعاي كعدي اني اصبله
_قدس:: لالا اني اصب
كامت من مكانها باوعتلي تضحك
_ رقية:: لا شو اني اريد اصب
_قدس:: مو خاف اتعبين
_رقية:: تعبيش بنيتي قبل شوي وديت صينه لفقار ياكل الاكل بعده حار بس اصبه
_قدس:: لعد اساعدج
ابتسمت وهزتلي راسها ب اي
مشت ب اتجاه الجدورة واني مشيت اطلع الصحونه انطيتها الصحن والكاسة واخذت الصينيه
اخلي الصحونه بيها
طلعت خضره وطرشي خليتهن ب الصينيه
ترست ب صلاحيه ماي خليتهن كلهن ب الصينيه
باوعتلها وابتسمت ممتنه
_قدس:: شكراً علوية
_رقية:: الشكر لله تعاي اخذ صلاحيه الماي لاتطيح على الاكل
اخذت الصلاحيه وطلعت من المطبخ طلعت وراها شايله الصينيه ديلا تعاي قس كولي مو نادرا
غير ام بيت صرت ومره متزوجه على كولة نضال يم الرجل يصير بيجن خير هيهيهيهي
صعدت الدرج كوا مسيطرة لاتطيح الصينيه وتروح هيبه المرة المتزوجه وام عاتكه تمشي وراي وتحذرني لا اطيح وصلنه للباب الغرفه
دفعت الباب برجلي ودخلت غضنفر ماموجود دخلت للغرفه خليت الصينيه ب الارض رجعت اخذت الصلاحيه من ام عاتكه وتشكرت منها
نزلت هيه واني بقيت منتظرة غضنفر يصعد
التفتت من تلفوني رن متصلين عليه
مشيت ب اتجاه التلفون شفت المتصل قادسية اختي
فتحت الخط وحجيت ب انزعاج
_قدس:: وينجن اتصل عليجن من مساع محد ترد
سكتت اسمع لقادسية. ملامحي نكلبت كلها بس سمعت الي حجته كلماتها جانت مثل السهم الي
سديت الاتصال منها مصدومة من الي سمعته
انفتح باب الغرفة دخل غضنفر يمسح على راسه
باوع للصينه وباوعلي مبتسم
بس شاف حالتي وصدمتي اختفت ابتسامته
تقدم ب اتجاهي مستغرب حالتي
_غضنفر:: شبيج قدس شصار؟
باوعتله اريد استوعب الي سمعته من قادسيه
باوعت لغضنفر وحجيت بشرود
_قدس:: غضنفر امي راجعة وتطالب بخواتي؟
" عاتكه "
الي صار عماد اذانه كلنه
اول ماشالو للمستشفى واني ابجي وادعيله الله يخفف عنه ويشافي
مر ثلاث ايام والكل خايف على عماد خاف ننصدم وونفجع بيه!!
طلعت من المطبخ بيدي كلاص الماي
مشيت ب اتجاه السيد
انطيته الكلاص اخذه من ايدي وشربه التعب بملامحه
باوع السيد ل جادح الي جان كاعد على القنفه مدنك راسه صافن ومحتار
باوعله السيد وحجه
_عبد الرؤف:: امه وكلبها محترك على ابنها شنوو يطلع منها تعذرها
باوع جادح للسيد وحجه يأشر على نفسه
_جادح:: يعني انا سبب الي صار ب ابني انا محترك كلبي عليه وليلي مانامة بعدين اصير انا الملام وانا السبب؟؟؟
باوعت العلوية لباب لجادح وحجت تهدي
_لباب:: جادح عمه اعذرها هيه مو بوعيها من حجت حقها شافت ابنها بهاي الحالة شتريدها تسوي؟
ضرب جادح على فخده وصاح بقهر
_جادح:: عمههه انا مامسؤللل؟؟؟ انا مو خوش اب؟
حجت عمتي تباوع لجادح
_جهاد:: هسه انت شبيك هيج حارك دمك ركز على ابنك وعوفك من الباقي
سكت جادح يهز برجليه بقوه
باوعتله بحزن التعب مسيطر على ملامحه حقه السيد توسل بي تواسيل يرجع للبيت يرتاح
كام جادح من مكانها يريد يرتاح كام السيد وياه ومشو ب اتجاه الغرفه
دخلو للغرفة وعمتي دارت تباوع للعلوية لباب مستغربه
_جهاد:: هيه جميلة منو كلها؟
_لباب:: ابوج كال انطوها علم
_زهراء:: خطيه هل جادح ماعرف شيسوي جميلة تصيح انت السبب وابنه يبجي ويصرخ متأذي ضل صافن
سكتت عمتي والعلويات كعدن يسولفن الي صار ب المستشفى
عرفنا طليقه جادح ام عماد جايه للمستشفى ومحمله جادح السبب ب الي صار ب ابنها بعد ماشافت ابنها
مر الوقت وجادح والسيد رجعو طلعو للمستشفى
باوعت لعمتي كاعده على القنفه تهز رجليها صافنه
وشاهيناز وملاك كاعدات يمها صافنات هم
باوعت لحميدة هم صافنه مهجان صافنه تبتسم وعطاء صافنه ويا خدلجه ومنة الله
باوعتلهن ب استغراب مافاهمه صفنتهن
_عاتكه:: شنو ليش اني ماصفن
باوعتلي عمتي مافاهمه
_جهاد:: شنو؟
_عاتكه:: اكول ليش ماصفن مثلجن ليش كلجن صافنات
باوعت عمتي للبنات بعدهن على صفنتهن
هزت ايدها وكامت من مكانها
_جهاد:: كومن خل نروح نزور وندعي لعماد
_عطاء:: ااييي عاشت ايدج خوش قرارات
باوعت عمتي لعطاء ب استغراب
رفعت حاجبها وتخصرت
_جهاد:: احس كلامج بي قله ادب بس ماعرف وين ب الضبط
_عطاء:: لا والله عمه بس انتِ تردين ترزليني وماعندج سبب
صفنت عمتي وهزت راسها مأيدة كلام عطاء
ضحكت اباوع لعطاء مبتسمه ترمش حسيتها طلعت من ورطه ومشكله جانت راح تطيح بيها
كمنا اني والبنات لبسنه عبينه ونقابتنا متجهزات نروح نزور الامام علي
طلعت من المصلا اباوع للبنات مخنزرات مادري شبيهن وجوهتهن تتلاطم
طلعت عمتي من الغرفه اشرتلنا نكوم
كمنا اني والبنات بعدنا ماطالعين الصالة ودخل ايليا
باوع لعمتي وباوعلنه ب استغراب
_ايليا:: وين رايحات؟
_جهاد:: يعني احنا وعبينه ونقابتنا وين رايحات اكيد نفرفر ب الشوارع
باوع ايليا لعمتي ب استغراب
_ايليا:: شنوو
_جهاد:: ايليا عمه رايحين نزور للامام
_ايليا:: هااااا
_جهاد:: اي بعد غيرها
_ايليا:: ترحن وحدجن شنو
كتفت عمتي ايديها تباوع ل ايليا بنفاذ صبر
_جهاد:: اي وحدنا
_ايليا:: لا انا اوديجن
هزت عمتي راسها ساكته
طلع ايليا كدامنا واحنا خلفه باوع للسيارت ماشاف بس سيارة فقار
_ايليا:: اجيب السويج واجي
_جهاد:: عندي السويج صعدو يلا
_ايليا:: هااا انتِ تسوقين؟
_جهاد:: اي لعد انتِ؟
سكت ايليا صافن واني والبنات صافنات ويا
صعدنا ب السيارة وعمتي صعدت بمكان السايق وايليا بصفها
شغلت عمتي السيارة تريد تمشي طلع غل من البيت التلفون بيده من شاف عمتي تسوق وايليا كاعد بصفها ضحك يباوع ل ايليا
_غل:: ها شنو ماخذيك كفيان شر
_ايليا:: عمه ماريد اروح راح انزل
_جهاد:: لاتروح. وغل ترا اخليك تجي ويانا مشي
رجع غل للبيت ورفع ايده ويدعنه
_غل:: ادعونا
دخل للبيت يركض وعمتي مشت ب السيارة ايليا كل شوي يصيح اريد انزل وعمتي تكله لا نريدك زلمه ويانا
رفعت شاهيناز راسها تباوع ل ايليا
_شاهيناز:: شحلاتك وانت كاعد يم عمتك
_مهجان:: اوصف النا شعورك بلا
_ايليا:: اريد امي
ضحكنا وعمتي تهز ب ايديها
_ايليا:: عمه غير انا الرجال وانا اسوق
_ملاك:: ماعدنا زلم يسوقون سيارات
_شاهيناز:: متعافي فوك ماكعدتك كدام ويم الجامه
_عطاء:: شحالي مكعدين ثنين بحضني
باوعت لعطاء جنت اني وخدلجه بحضنها
_عاتكه:: عطاء اني خفيفه ترا
_عطاء:: ريشه طير
ضحكت ساكته خطيه دوم يصير بيها هيج اذا انجمعنا بسيارة لازم تكعد ثنين بحضنها
وصلنه للامام وعمتي وايليا نزلو يمشون كدامنا واحنا خلفهم ماطولنه زرنا واندعينا لعماد
ورجعنا للبيت
دخلنه للبيت صوت صياح وبجي
دخلنه نركض خلف عمتي شفنا السيد واكف كدام جادح
يحجي بعصبيه
_عبد الرؤف:: ترجعها هذا افضل حل
باوع جادح للكل وحجه فاتح عيونه مصدوم
صاح بعصبيه موجهه كلامه للكل
_جادح:: مارجعها على ذمتي ابددددد
_عبد المقتدر:: لعد المره تريد ابنها يمهاا
_جادح:: ابني يضل يمي
نفخ غل ب انزعاج وحجه موجه كلام للسادة الاكبار
_غل:: ماكو عدل شلون يرجعها وهما اطلكو من سنين
_عبد الرؤف:: يمكن الي صار بعماد سبب حتى يرجعون مره ثانيه ويلمون ابنهم بحضنهم
ضحك جادح يباوع للسيد
_جادح:: لا ربحنا
_السيد معز:: جادح!!!!
_جادح:: سيد مع احترامي الكم بس انا مارجعها لذمتي
باوعت ام جادح ل جادح تبجي
_رنا:: يمه البنيه تكول اريد ابني يمي وانت تكول ابني يمي رجعها يا امي والبنيه خوش بنيه وانتم بينكم عشرة عمر وبينكم طفل بدال ماكل واحد بصوب لمو ابنكم لحضنكم يجوز صدك الله راد يرجع يلم شملكم ب موقف ابنك
جنا كلنا مصدومين مافاهمين شي بس كدرنا نربط وياهم بنفس الساعة. يعني جادح راح يرجع مرتة لذمته؟
حجت عمتي ب استغراب تباوع للسادة
_جهاد :: شلون تجبرو على هيج قرار؟
_عبد الرؤف:: يا بنتي محد جابرة احنا جاي نفهمه الصح من الغلط
_جهاد:: يابة شنو الصح من الغلط انسان فاهم السالفه من سنوات شلون هسه تردون تفهمو
سكت الكل وعمتي تباوعلهم منتظرة جواب منهم
_لباب :: رجعتهم شفاء ل ابنهم عماد بدال ماضال يوم عد ابوه ويوم عد امه بين هذا وبين ذاك والطفل هم يفهم وينقهر من البعد الي بينهم
_زهراء :: وهسه الولد تعبان ومريض يحتاجكم ثنينكم يايمه فكر ب ابنك ترا مصيبته ماتسولف
الكل سكت يباوع لجادح منتظر رده
جان مدنك راسه متردد ومحتار مايعرف شنو يحجي
باوعت الكل يباوع لجادح مقهورين عليه بس ماكو غير هذا الخيار
صارت عيني على شاهيناز ايدها بحلكها تعض ب اصبعها متوترة ايدها ترجف عكدت حواجبي مستغربه شبيها
التفتت على جادح من حجه حاسم كلامه الي جان فرحه للبعض وصدمه للبعض
_جادح:: هاي هيه موافق ارجعها لذمتي....
شكرا لزيارتكم عالم روايات سكيرهوم
