رواية سراج السادة الفصل السادس والعشرون بقلم غسق ادريس
" ملاك "
_جادح:: موافق اعقد بس بشرط....
كلها سكتت تسمع ل جادح
كمل كلامه وكال
_جادح:: بس عماد يوكف على حيله اطلك
_عبد الرؤف:: جادح
_جادح:: سيد غيرها تعذرني
سكت الكل منتظر رد السيد
هز السيد راسه وحجه
_عبد الرؤف:: هاي هيه رجعها لذمتك
_جادح:: خاف باجر اطلك محد يجي يعاتبني
سكت السيد موافق على شرط جادح
طلع جادح والشباب من المصلا والسادة الكبار كعدو ب المصلا تعبانين
ثاني يوم كعدت الصبح الساعه ب ٨ ونص جنت شابعه نوم كمت من مكاني توقعت محد كاعد بس اني
دخلت للمطبخ شفت عمتي جهاد كاعده على الكرسي التلفون بيدها
صبحت عليها وكعدت حجت عيونها ب التلفون
_جهاد:: من وكت اليوم
_ملاك:: كعدت وماكدرت ارجع انام
طفت تلفونها وحطته على الطاولة
_جهاد:: يلا لعد خليني اسوي ريوك
_ملاك:: اساعدج
كامت من مكانها واشرتلي اكعد
_جهاد:: لا كعدي
هزيت راسي ساكته وهيه كامت تسوي الريوك
باوعت لعمتي وحجيت
_ملاك:: عمه يمتى جادح يرجع مرته؟
_جهاد:: ماعرف اليوم يجوز
_ملاك:: عمه تشوفين قرار السيد صح لو غلط
رفعت عمتي اكتافها ب ماعرف
خليت ايدي على خدي واتحسرت
سمعت صوت خطوات قريب من المطبخ
التفتت على دخلة فقار للمطبخ جان مدنك راسه من دخل رفع راسه باوعلنه مبتسم
_فقار:: صباح الخير
_جهاد:: صباح النور
باوعلي منتظر ارد عليه
درت عيوني منه متجاهله وجوده كعد على الكرسي بعيد عني
دارت عمتي جهاد وحجت
_جهاد:: اكل البيض بدون صفار اسويلكم وياي
_ملاك:: عمة اني ما اكل البيض
_جهاد:: اسويلج مخلمة لعد؟
_ملاك:: لاعمة ماريد ماشتهي
_جهاد:: اكو عجين مال كباب اعروك اسويلج؟
باوعت لفقار وباوعت لعمتي اضحك
هزيت راسي ب اي
_ملاك:: اييي
_جهاد:: وانت فقار افندي شسويلك
_فقار:: شنو يجي من ايدج
هزت عمتي راسها فتحت باب الثلاجة طلعت عجين الكباب خلت الطاوة على الطباخ خليت الزيت
اخذت قوري الجاي ترسته ماي وخلته على الطباخ
رجعت للكباب خلت ب الطاوة وعافتهن
طلعت البيض وكعدت تكمل تطبخ ايديها وشغلها بسرعه
التفتت على فقار من حجه
_فقار:: عمة صدك اريد اكلج سالفة
_جهاد:: شنو!
_فقار:: عمة حميدة هل جم يوم متأذية ومقهورة
_جهاد:: ليش شبيها
باوعلي فقار ورجع يباوع لعمتي
_فقار:: موقف عماد هيه محملة نفسها الذنب ب الي صار بي
_جهاد:: اي؟؟
_فقار:: هيه بيوم الحادث طالبة من عماد يصيح احمد اخوها وهوا راكض يصيح احمد عاثر وضارب الجدر ف هيه تكول السبب مني لان هوا راد يدخل للبيت واني منعته
هزت عمتي راسها ساكته وفقار يباوعلي حسيته يكلي سمعي هذا الي بيني وبين حميدة
التفتت على دخله جادح للمطبخ صبح علينه جر الكرسي وكعد وجهه مكلوب حسيتة كاعد على اعصابه
باوعتله عمتي وحجت تكلب ب الكباب
_جهاد:: شنو تتريك
_جادح:: اريد طماطة
_فقار:: عمة معليج سويله بيض وكباب مابيج انتِ
_جهاد:: لا بعد هوا مشتهي طماطه نسويله طمامه
باوع جادح لفقار ورفع حواجبه يغيض بي
دخل معراج للمطبخ باوعلنه مبتسم
_معراج:: صباح الخير
_جهاد:: صباح النور هلا معراج
كعد على الكرسي مبتسم وجهه بشوششش
باوعتله عمتي وحجت
_جهاد:: معراج انت متعود تشرب حليب ب الريوك اسويلك؟
_معراج:: اذا ماتعبج
_جهاد:: تدلل
كعدت عمتي تطبخ لكل واحد شي والولد يسولفون بينهم وعمتي تحجي وياهم وترد عليهم
دارت عمتي على الولد مستغربة
_جهاد:: ولكم مشواق وين؟
_معراج:: شكد توسلتله يجي مايقبل
_جادح:: اجاني للمستشفى توقعتة يجي لهنا بس لا طلع رايح لصديقه
_فقار:: السيد شكد حجه ويا ماقبل يجي
استغربت عمتي واني استغربت وياها توني تذكرت مشواق حتى ناسيته
خاف انتن هم نسيتن مثلي؟ مشواق ابن العلوية لباب الصغير شفناه ب كربلاء وبعد اختفى مارجعنا التقينه بي ابدد
عرفت من كلامهم جادح راح يرجع ام عماد على ذمتة اليوم....
" قس "
نزلت الدرج اني وابتهال بهدوء مانريد نحسس احد احنا كاعدات بعد قرار عمي الجديد محد يسهر اليل كلها صارت تنام من وكت بس اني متعودة انام من الفجر يطلع
باوعت للساعه ب 3:15 بليل
درت على ابتهال وحجيت بهمس
_قس :: دربالجججج يطلع صوت
هزتلي راسها ب اي ساكته
نزلنه الدرج وركضنا على اطراف اصابعنا للمطبخ صدك الخوف يعادل الشوف
عمي حلف لو لكف وحده كاعدة واحنا اكيد نخاف من عمي وماراح نخلي يلكفنه واحنا كاعدات
دخلنه للمطبخ نتلفت خاف واحد يشوفنا
درت على ابتهال وحجيت بهمس
_قس:: وين الاندومي؟؟
_ابتهال:: ب الثلاجه ضميته خفت امي تشوفه
_قس:: جيبي خليني اترس الجدر ماي
راحت تجيب الاندومي واني رحت اطلع الجدر اخذت الجدر وترسته ماي وهذا الحجي اني كل شوي اطفر اشوف الوضع وارجع
خليت الجدر على الطباخ وابتهال جابت الاندومي
انتظرنا الماي يفور وفرغنا الاندومي ب الجدر
درت على ابتهال وحجيت ب استغراب
_قس:: وين المندوزي ( ملح حامض)
_ابتهال:: مادري امي وين ضمته
كعدنا اني وابتهال اندور على الامندوزي ادري بنضال ضامته حتى لا ناكل اندومي
جبت دبة الماي خليتها كدام كاونتر الماعين وصعدت عليها فتحت المجر مالكيته
باوعت فوك الكاونتر بين المواعين والجدورة شفته ضامته بينهن عبالها مالكاه
جان اعلى مني وماوصله خفت اصعد على الكاونتر رفعت اصابعي اجر ب الجدر عود اوخره حتى اخذ علبه المندوزي
اتحركت دبة الماي لزمت الكاونتر ب ايدي خاف اطيح درت على ابتهال شفتها خاله خاشوكتها ب الجدر وتاكل
_قس:: سم لاتاكلين خل اجي
_ابتهال:: جاي اضوكه
رفعت اصابع رجلي حتى اخذ العبه رجعت الدبة اتحركت مره ثانيه بس هل مره من خوفي لا اطيح لزمت الجدروة بيدي
وصار الي ماتوقعته طاحن الجدورة كلهن ب الارض واحد فوك الثاني والصوت عبالك انفجار
شمرت روحي من الدبة وركضت اني وابتهال نريد نطلع من المطبخ
سمعت نضال تصرخ من الغرفه وتصيح
_نضال:: طبوناااااااا ولككك محمد طبونااا
ركضت على الدرج بعدني توني صعدت رابع بايه وانفتح باب الغرفه التفتت اني وابتهال على غرفه اهلها طلع عمي محمد بيده اسلاح ركض على المطبخ ونضال ورا تصرخ وادك على راسها
_نضال:: ولكمممم حراميه انهبنا
طلعو اخواني من الغرف يركضون وكلها تصرخ عبالهم حراميه بقينه اني وابتهال واكفات على الدرج وجوهتنا صفره واروحتنا مسحونه
بقيت واكفه اترقب حراكات عمي محمد شلون رافع الدشداشة ويركض اليشوفه يعوفه
باوعت لابتهال الخاشوكه بعدها ب ايدها
طلعو اخواني من البيت يركضون عود يلكفون الحرامي مايدرون الحراميه واكفين على الدرج
دخلت نضال للمطبخ باوعت لابتهال
_قس:: ابتيله اليوم يطلعونا جلد ثاني
_ابتهال:: شدراهم احنا شبيج نكلهم نزلنا على صوت التكسر
بعدني حتى مالحكت ارد عليها وطلعت نضال من المطبخ نعالها بيدها تركض علينه
نريد نعرف نركض ماكو جرتنا من الدرج وادك على روسنا وتغلط
دخلو عمي والولد عبالهم كضت الحراميه وهيه مستمره ادك على روسنا
_محمد:: شكوووو شنووو
_نضال:: ماكو حراميه موووو
_قاسم:: ماكو حتى البيبان مسددة
_نضال:: اي ريا وسكينه هنا الحراميه جانن ب المطبخ هنا المطيحات الجدورة
رفعت راسي ايدي على وجهي خاف يلوحني انعال يكلب معاني وجهي
_قس:: احنا شعلينه
_نضال:: لعد وجدر الاندومي ابوي طابخه
باوعت لابتهال ورجعت باوعت لنضال
_قس:: شدراج يجوز الحراميه جاعو وكعدو ياكلون اندومي
رجعت ادك فوك روسنا واني اكول نستاهل لو ماكلات الاندومي بدون حامض جان احسن من اكله النعال والكتله هسه
ثاني يوم نمنا جسمي يأذيني من الدك الاخذته من نضال
جنت ب الغرفه اكلب ب التلفون دخلت على صفحه السيد معراج اكلب بيها جان ناشر عماد وكاتب دعواتكم
كتبته اله
_🗣:: الله يشافي ويمسح على جرحه
طلعت من محادثتة وكعدت اكلب ب الفيس جانت صفحه ابتهال طالعه عندي اسمها " بياض الثلج "
باوعت لتلفون لعبانه روحي شهل اسماء هاي منين يخترعوها درت على ابتهال اهز ب ايدي
_قس:: بياض الثلج مووو
رفعت راسها تباوعلي كلبت عيونها وحجت
_ابتهال:: احسن من رحلة
_قس:: رحلة ولا بياض الثلج وين بياضج انتِ. ابيض جزء عندج شحمه رجلج من جوا وين اجه البياض
شمرت المخدة علي وحجت ب انزعاج
_ابتهال:: انجبي ام رحلة
_قس:: بياض الثلجججج
_ابتهال:: رحلةةة
كمت من مكاني اضحك عليها على الاقل رحلة تحسو غريب يعني ماتعرفون رحلة وين لنجف لكربلاء
فتحت جرار الملابس اطلع عصير وكيكه الحصلتهن من الثواب
باوعت للحلويات ناقصات اني اعرف حلوياتي كلش زين اكو شي ناقص
درت على ابتهال وحجيت رافعه حواجبي بشك
_قس:: ابتهال ماخذة شي من حلوياتي
_ابتهال:: لااااا شعلي بس اني ب الغرفه خواتج هم
رفعت قبس راسها وحجت تباوع لابتهال
_قبس:: جذابة صالها يومين من تنامين تاكل بحلوياتج
باوعت لابتهال عيوني مخنزرة وهيه تباوعلي بخوف
شمرت تلفوني على الميز وركضت عليها
شمرت تلفونها وطلعت من الغرفه تركض واني اركض وراها
_قس:: بياضضضض الثلج اليوم ازوركج من الدك
_ ابتهال:: يمههههه
دخلت لغرفه نضال واني دخلت وراها جانت نضال كاعده على الجربايه تليفونها بيدها
باوعت لابتهال
_قس:: وين ترحين اليوم
قفلت باب الغرفه ب المفتاح اخذت نعال نضال من الكاع وركضت على ابتهال هيه تركض يمنى واني وراها اريد الكفها ب الاخير ركضت كدام نضال
شمرت النعال توقعته يطيح بيها بسس لااا طاح براس نضال
التفتنا اني وابتهال نباوع لنضال بخوف
رفعت عيونها من التلفون باوعت للنعال وباوعتلنا
جانت سلسه بكلشي اخذت النعال وكامت ب اتجاهنا
اريد اركض افتح الباب ماكو مقفول انحصرنا اني وابتهال اندك على الباب وهيه فوكنا ادك علينه
اني ماقهرني بس شلون بيدي سديت الباب
حتى من طلعنه من الغرفه ماخلتنه نطلع الى بعد ما ارتاحت من الدك
ابتهال تبجي واني حاصره الدمعه صدك لو كالو مرت العم تكره
مرت الايام وبيوم جنت كاعده اني والبنات ملتمات نباوع لمسلسل هندي على قناة زي الوان طلعت لقطه ب المسلسل البطله تروح تدعي للقدير وتبجي لان البطل بين الحياة والموت
وكف علي ابن باسم كدامنا وشبك ايديه مثل حركه الهنود وصاح مغمض عيونه
_علي:: ياقديررر يابو الباس الجبير
دارت نضال علينه عاوجه حلكها تأشر على علي
_نضال:: هذا شبي الولد ضارب عقله
_قس:: ماتشوفي حركاته غير قانونيه طلع القدير ساطره
باوعت نضال على علي تهز ب ايديها ماعجبتها حركاته واني اضحك على علي هسه بلا هذا منين اجته هاي الحركات
التفتنا كلنا على دخلة عمي محمد واخواني قاسم وباسم جانو معصبين
كعدو على القنفه وجوهتم مكلوبه كلامهم كله صياح ورفض
باوعتلهم نضال وحجت ب استغراب
_نضال:: هااا خير شصاير؟
باوع عمي لنضال وباوعلنه
_محمد:: خابرنا الشيخ ابو جابر
_نضال:: خير ان شاءالله ليش؟
جر نفس بعصبيه وسكت
وكف باسم اخوي وصاح موجه كلامه لعمي
_باسم:: عمي خواتي مانطيهن والله اكتلهن وماخليها تشوفهن
_محمد:: باسم لادوخني فوك ما انا دايخ كايلك انطيهن انا!؟؟
_قاسم:: لعد كلامك قبل شوي شنو عمي مو تكول ماكدر اكسر بكلمه الشيخ؟؟؟؟
كلنا استغربنا كلامهم مافاهمين شي
صاحت نضال بيهم تريد واحد يحجي ويفهمنا
_نضال:: احجووو شريد الشيخ وشدخل البنات؟؟؟
اتحسر عمي يهز راسه ب الرفض باوع لنضال وحجه
_محمد:: فرودس رايحة لشيخ ابو جابر
_نضال:: فرودس شتريدد؟؟؟؟
_باسم:: تريد البنات تريد تاخذهن حنت الهن بعد هاي السنوات كلها
انصدمنا كلنا بكلامهم فرودس امي؟؟ تريد تشوفنا بعظ هاي السنوات كلها هسه جايه تريدنا؟؟
كامت نضال من مكانها تباوع لعمي وولد
صاحت بيهم بعصبيه
_نضال:: مانطيها البنات اني اربي واتعب بيهن وتجي فرودس ام السمج تاخذهن على الحاظر!!!
_محمد:: منوو كال ننطيهن بس الشيخ خابرني يكول العصر نجيكم
رفعت نضال ايدها معارضه كلام عمي
_نضال:: لا يجي ولايتعنا خليها تنسى البنات ب احلامها تشوفهن
_محمد:: كافيييي سكتوووو انا ماكايل انطيهن خليهم يجون ونشوف
دارت نضال علينه مخنزرة ايديها ترجف
_نضال:: ولجن شوفن الي تفكر بس تروح لامها لاتجي بعد وهذا البيت يتعذر الها
_قبس:: عمه احنا ماحاجيات شي؟
_نضال:: ايييي خاف تفكرن وتحننن مفهوم!!!!!
حجيتها ومشت تدخل لغرفتها
كلها جانت مصدومه من رجعه امي المفاجئه واني مصدومه اكثر من الكل شرجعها؟؟ ليش رجعت بعد هاي السنوات كلها!!!
الكل جان رافض رجعه امي
ونضال اعصابها تلفت من سمعت ب امي راجعه مرتين تعاركت ويا عمي اسمعها تصيح
_نضال:: اخذهن واشرد بيهن والله مانطيها البناتت
جانت متمسكه بينا بقوه وحقها نضال بعد ما امي عافتنا هيه الي ربتنا
وهيه الي كبرتنا صح مرات تصيح بينا وتضرب بس ابد ماكو بحنيتها لكل شخص جانب ايجابي وجانب سلبي ونضال هيج جانت!!
العصر صارت كعده ببيتنا اجو ناس معكله وشيوخ عرفت امي ماتعبت روحها واجت لبيت عمي لان جانت تعرف الرفض الي راح يجيها
راحت كبل لشيخ عشيرتنا
وفعلاً سوتها امي وكدرت تخلي الشيخ يتعاطف وياها ويطالب برجعتنا!!
باوعت لاخواني وعمامي جانو يتعاركون بينهم اخواني يصيحون مايرجعن وعمامي يصيحون يرجعن
باوعت نضال لعمي محمد وحجت بحركه كلب
_نضال:: شلوننن ينطيك كلبك ترجعنهن الهاا مووو عافتهن وهنا صغار ولكم مارفلها كلب بنات صغار يبجن على امهن وهيا تصيح ماريدهن هسه تردون ترجعوهن؟؟؟؟
_محمد:: ماسمعتي الشيخ شحجه
_نضال:: انعل ابو الشيخ لابو البسه عكال
صاح عمي موجه كلامه لنضال
_احمد:: يابه المره تريد تشوفهن فتره وترجعهن
_نضال:: اي مو نلعب احنا فترة وترجعهن
_محمد:: امهن مريضه اتريد تبري ذمتها وياهن خليهن يرحن فتره ويرجعن
بعد رفض شديد من نضال واخواني وعرايك اتفقو اتفاق اخير لا اني ولا خواتي جنا راضين بي
_محمد:: هاي هيه عمو بناتي ترجعن لامجن صح هيه غلطت ب اخر موقف الها بس تبقى امجن
_قس:: عمو اني مارجع خلي خواتي يرجعن بس اني لااا ماريد اشوفها
اتحسر عمي بقوه وحجه
_محمد:: لا بوية كلجن ترحن
باوعت لنضال عيوني مدمعه مشيت ب اتجاهه نضال اريد ابجي
_قس:: نضال ماريد اروح والله ماضوجج بسوالفي بعد ولا اقهرج بس اني ماريد اروح اكرهههاا ماريد اشوفهاااا
باوعتلي نضال وبجت خلت ايدها على وجهه تبجي واني ابجي وياها قادسيه وقسار جانن رافضات الرجعه عكس قبس جانت متونسه على رجعه امي
" شاهيناز "
دخلت للغرفه شمرت نفسي على الجربايه وجهي على المخده
رفعت راسي من المخده خليت ايدي على خدي اتحسس الدمعه الطاحت
مسحتها وتربعت على الجربايه
_شاهيناز:: شبيج شاهيناز كافي عليمن تبجين
رجعت مسحت دمعتي الطاحت من عيني الثانيه
ماكدرت اسيطر على نفسي دموعي بدت تنذرف من عيوني
جادح رجع عقد على ام عماد عادي يعني شكو بيها شصار
شهكت امسح بدموعي ايدي يرجفن ليش هيج ليش رجع عقد عليها
حسيت نفسي مختنكه ماعرف شجاني ماعرف شجاي يصير بيه
ليش هيج صار؟
نزعت الربطه وشمرتها كمت من الجربايه ومشيت ب اتجاه المراية وكفت اباوع لنفسي
عيوني حمر الدموع ماليتهن شفايفي يرجفن وايدي هم يرجفن كعدت ب الارض اعاتب روحي
ليش هيج سويتي بنفسج ليش شجابج عليه شوداج وين حطيتي روحج شاهيناز!!!
ليش هيج اني من يمتى اصلا اهتم لجادح؟ من يمتى افكر بيه حتى هسه ابجي ومقهورة بس لان رجع ام عماد
مادري مو بيدي مو بيدي الي جاي يصير هسه
خليت راسي بين رجلي ابجي اعيد ملامحها براسي
شلون دخل جادح وجميلة ام عماد للبيت
جانت اسم على مسمى جميلة وفعلاً جميلة !!
جانت تمشي خلف جادح مدنكه راسها
جنت اباوعلها عاضه على شفايفي بقهر
رفعت راسها تباوعلنه عيونها بياضها ملامحها الهادئه جانت ضامه نفسها خلف جادح
باوعت لجادح يسمع لكلام السيد عيونه مخنزرة وحواجبه معكودة ماجان راضي على هاي الخطوة ماجان راضي يرجعها لذمتة
حجه السيد موجه كلامه لجادح وجميلة
_عبد الرؤف:: اريدكم تفتحون صفحة جديدة والي صار ب الماضي تنسو ركزو على حياتكم المُستقبلية وعلى حياة ابنكم. عماد طلع من الموت ب معجزة ابدو ابنو للرحلتكم وحياتكم الجديدة
باوع جادح لسيد وابتسم
_جادح:: بعدنا على اتفاقنا مو سيد؟
خزر السيد جادح ودار عنه ساكت ابتسم جادح ودار عيونه ب اتجاهي
اختفت ابتسامته يباوعلي عيونه تحجي كلشي جان يتعذر ب عيونه
دنكت راسي اتفاده نضراته الي
باوعت لعمتي خازرة جادح هيه وملاك ثنيهن مخنزرات يباوعن لجادح
طلع جادح والسادة كلهم من الصالة والعلويات حاوطن جميلة فرحانات بيها وشلون جادح رجعها لذمتة
ورنا ام جادح تلهي فرحانه بيها هيه وكفاية اخته
باوعتلها صافنه عليها
جميلة وتجذب النضر غصبن عليك تصفن بيها تجبر المقابل بجمالها
جانت كاعده على القنفة العلويات يحجن وياها وهيه تهز راسها ب اي وتبتسم
واذا اجت ترد تكول اي لو لا
ماجانت تحجي وبس تهز برجليها حسيتها كوا كاعده ومكابلتنا
طلعت ويا جادح والسيد للمستشفى واحنا بقينه ب البيت
من شفتهم يحضرون بغرفة جادح وجميلة ماتحملت اكعد اكثر
طلبت من ساجد اخوي يرجعني لبيتنا وفعلاً رجعت للبيت وضعي متخربط ماعرف الي بيه شنو
نمت على الجربايه ومارجعت لبيت السيد ماردت اقابل جادح ولا اشوف مرتة
غلقت تلفوني وسديت باب غرفتي ونمت
كعدت بعد ماشبعت نوم فتحت عيوني بفراشي اتكلب سالفة تجيبني وسالفة ترجعني
رجعت فتحت تلفوني
اجتني الاشعارات والمكالمات الفائته
دخلت على محادثة ملاك جانت دازتلي رسالة كاتبة
_ملاك:: جادح خبصنا كل شوي يصيح وين العلوية شاهيناز
شفت الرسالة الثانية
_ملاك:: يمعودة وينج ترا قلقتيني؟
شمرت التلفون من ايدي وكمت دخلت للحمام سبحت وبدلت ملابسي باوعت للساعه ماضل شي لاذان المغرب انتظرت الاذان حتى اصلي
مر الوقت واني مارديت على احد غلست على الكل واهسي مكسور
صليت واتصلت على سجاد اخوي
اجاني ورحنا لبيت السيد دخلت للبيت شفت البنات كاعدات ب المطبخ يحضرن للعشه باوعتلهن وابتسمت
_شاهيناز:: هاااا شلونجن
دارن يباوعلي صاحت ملاك ب انزعاج تباوعلي
_ملاك:: وينج مو اتصل عليج مغلق
_شاهيناز:: اي جنت نايمة
_عاتكه:: عمتي متحلفة بيج
هزيت راسي ب اي وطلعت من المطبخ ادور على عمتي
صارت كدامي جميلة تريد تدخل للمطبخ باوعتلي ب استغراب وحجت
_جميلة:: انتِ ياهي؟
_شاهيناز:: شنو اني يهي؟
_جميلة:: بت منو انت
_شاهيناز:: بت منتظر حفيدة عبد الرؤف
_جميلة:: هااااا اكلج وين بت السيد
_شاهيناز:: عمتي جهاد قصدج؟
_جميلة:: اي هيه وينها
رفعت اكتافي ماعرف
جرت نفس ب انزعاج وحجت
_جميلة:: يوووو صالي ساعه ادور عليها ماكو
_شاهيناز:: ماعرف وينها
عفتها ومشيت من شفتها تعوج بحلكها كوا تحجي واني خلكي صاير خلك نملة
دخلت هيه للمطبخ واني طلعت للحديقة الخارجية
شفت عمتي كاعده هيه وجادح يحجون من اجيت فز جادح وعمتي دارت تباوعلي
رجعت خطواتي
_شاهيناز:: العفوو عمة البنات كالن ردتيني
_جهاد:: اي شاهيناز ...
بعدها عمتي مامكمله كلامها وطفر جادح من مكانه
_جادح:: وين جنتي؟
_شاهيناز:: العفو؟
_جادح:: افتقدتج
باوعتله عمتي صفح واني دنكت راسي
_جهاد:: شو انت مادري شلونك
_شاهيناز:: عمه بعدين اجيج
_جادح:: وين؟
باوعتله ب استغراب شبي هذا توني ارد عليه واجاني صوت جميلة
التفتت عليها جانت واكفه خلفي
باوعتلي وباوعت لجادح
_جميلة:: ابو عماد مو صالي ساعه اتصل عليك ليش ماترد؟
حجتها واتقدمت ب اتجاه جادح تتغنج بمشيتها
باوعتلها عمتي مقوسه حلكها وعاكده حواجبها
_جهاد:: جان وياي ام عماد عيني
_جميلة:: ويعني شنو يمنعه يرد على اتصالي؟
_جهاد:: اي جادح رد شنو الي يمنعك؟
باوع جادح لجميلة وحجه بعد اهتمام
_جادح:: محتاجه شي؟
_جميلة:: يعني لازم اريد شي يلا اتصل؟
_جادح:؛ لعد؟
_جميلة:: افتقدتك بس
هز جادح راسه ساكت يهز برجلي واني وعمتي صافنات عليهم
اترخصت منهم ورجعت دخلت جوا
دخلت للمطبخ صافنه بالي بعيد البنات يسولفن بصوب واني بصوب ثاني
سمعت صوت جميلة وجادح يدخلون للصالة باوعت لملاك وحجيت مستغربة
_شاهيناز:: اكلجن لعد عماد منو يمه؟
_ملاك:: السيد سوا جدول على كل ثنين شفت وهسه غل وغضنفر عند عماد
هزيت راسي ب اي ساكتة
بليل طلعت للحديقة مختنكة وماطايقة شي بدون سبب شفت عمتي كاعدة ب الحديقه
مشيت ب اتجاها باوعتلي وابتسمت
_شاهيناز:: عمه مختنكه
اتلاشت ابتسامت عمتي وعكدت عمتي حواجبها
_ جهاد:: شبيج
_شاهيناز:: مادري شبيه عمه مادري
كعدت على الارض خليت راسي بحضن عمتي وبجيت
سكتت عمتي تمسح براسي
واني بحضنها اشهك
_شاهيناز:: عمة شبيه؟
_جهاد:: شبيج
_شاهيناز:: ما اعرف عمة مقهورة
سكتت عمتي تمسح على راسي واني اشهك دموعي ينزلن بغزارة
_جهاد:: شاهيناز
_شاهيناز:: هاا
_جهاد:: عندج مشاعر لجادح؟
بلعت ريكي ورفعت راسي باوعت لعمتي وقوست حلكي
_شاهيناز:: مادري عمة ليش هيج سوا؟
_جهاد:: شسوه؟
_شاهيناز:: ماعرف عمه ليش من بديت اتقبل وجودة هيج سوااا
_جهاد:: لاهوا انجبر
جريت حسرة ورجعت نمت بحضن عمتي
مر وقت على كعدتنا ثنينه ساكتات
حجيت بتردد
_شاهيناز:: عمة سؤال؟
_جهاد:: جواب
_شاهيناز:: شنو حسيتي من همام فضل مزن عليج
اسكتت عمتي وجرت نفس
حجت تمسح على راسي
_جهاد:: جنت اشوف بهمام كلشي شكو صفه حلوة جانت عند همام هدوئه جان يجذبني حبه وتعلقه ب الدراسة جان انسان طموح يركض ورا مستقبله يحب يتعب على نفسه جنت اشوفة كامل والكمال لله بس
اتحسرت وكملت كلامها
_جهاد:: وقت اختار مزن وفضلها عليه حسيت الزمن وكف بية ليش ماختارني اني ليش هيه؟ تدرين شاهيناز؟
_شاهيناز:: شنو
_جهاد:: لو همام محاول علمودي جان رجعت وماجان صار هذا كله ولا عون مات وانقتل جان عشنه عائله وحدة بس
سكتت بدون ماتكمل
باوعتلها وحجيت
_شاهيناز:: عمة لو تقدملج شخص توافقين؟
_جهاد:: اي اوافق
ضحكت مصدومه اباوعلها مامستوعبة
_شاهيناز:: صدككك عمه؟؟
_جهاد:: اي شكو بيها منو كلج اني طويت على نفسي لا اني انسانة واعيش مثلي مثل غيري بس خليني اعرف الي قتل عون اني ارتاح وقتها.....
" ملاك "
مر اسبوع على رجعه جميلة وهاي الجميلة شكلها جميل وتصرفاتها عكس اسمها
اذا شافت وحده من البنات لابسه نقاب وعباية تباوعلهن ب استصغار وتضحك
_جميلة:: جنجن شخصيه باتمان ماينشاف منجن بس عيونجن
بس هيج؟ لا جانت تضحك على عطاء كل ماشافتها تصيح
_جميلة:: يمعودة ضعفي شكلج يخزي هيج
كل ماتباوع لعاتكه تكلها
_جميلة:: عاتكه ليش هيج فاهيه انتِ؟
_عاتكه:: اني؟
_جميلة:: باع الفهاوة يربي
محد جانت تحجي وياها بحجه تشاقه وتضحك ويانا عادي حتلو على حساب مشاعرنا المهم هيه ماتحسس
لان بس واحد يحجي وياها تركض للعلويات تتبجبج وتشكي
جانت ب البداية تشكي لجادح بس جادح ماجان ينطيها عين ودوم يصدها
بيوم دخلت للمطبخ اريد اشرب ماي جانت قدس وجميلة ب المطبخ كاعدات وحدهن اسمع جميلة تحجي ويا قدس وتكلها
_جميلة:: بس اريد افهم غضنفر وين جان عقله
_قدس:: ليش؟
_جميلة:: لج عيني لاتزعلين مني بس غضنفر شخصية وكارزما وذوق بس ماتوقعت ذوقه ب النسوان هيجج
باوعت قدس لجميلة ب استغراب وحجت
_قدس:: شنو شنو شقصدج؟
_جميلة:: لاتستغبين بربج ماشوف بينج وبين غضنفر كيمياء هوا وينن وانتِ وين توقعتة يبهرني ب اختياره تالي صدمني
بعدت كلاص الماي عن حلكي اباوعلها بصدمه هاي شلون هيج عدها عادي تشمر ب الكلام بدون ماتفكر بمشاعر المقابل
دخلت سهام للمطبخ تضحك وتهز ب ايديها طبعاً سهام جانت عند اختها بيتهم ب النجف
والبارحة رجعت ولاهلا برجعتها
باوعت سهام لجميلة وضحكت
_سهام:: ام عماد تدرين شلون تزوجو انتِ
_جميلة:: لا شلون؟
_سهام:: غير قدس اتلبسها جن والسيد جابها للبيت هنا ولان انقهر عليها خله غضنفر ياخذها
_جميلة:: هاي شنوووو صدوك عود؟
ضحكت سهام تهز راسها ب اي باوعت لقدس ساكته ماحجت شي مدنكة راسها
عفت كلاص الماي وباوعتلهن
_ملاك:: ولجن شو انتن ماتستحن على ارواحتجن
_سهام:: وانتِ شكو انكرصتي
_جميلة:: ملوكة عيني خليني حابتج ولاتحشرين روحج بسوالف اكبر منج
باوعتلهن وضحكت
مشيت ب اتجاهن افتح بربطتي شمرت الربطه على الطاولة ورفعت ردن ملابسي
_ملاك:: ولجن انتن ناقصجن تربية واني صالي هواي ساكتة ومتحملة بحجه كبار وعيب بس هسه كافي لهنا وبس
باوعلي ثنينهن صفح يضحكن
_سهام:: ولج والله بس اني هواي عليج
_ملاك:: ولج فتون لاتخليني اهوس ببطنج لاعبالجن اني علوية واسكت وانتظر الزمن يدور ويطلع حوبتي بيجن لاعيني لاا اني ادوسجن بنعالي واكطعه على روسجن
كامت جميلة من مكانها تباوعلي من فوك ليجوا وتضحك
_جميلة:: هااا يعني الحلوة تختلف
_ملاك:: كلش اختلف وداعتج اني علوية توبتها متأخره
اجت جميلة ب اتجاهي دفعتني من كتفي وصاحت
_جميلة:: واني لاعلوية ولا استحي هاي سوالفكم انتو
دفعتها من كتفها بقوه وصحت بيها
_ملاك:: سوالفنه ماتعجبج لعد شو تعايييي
حجيتها وجريتها من شعرها بقوة
طفرت قدس تريد تفاكك بينه من شافت سهام تجر بيه من شعري لزمت سهام وجرتها من ورا
صارت قدس وسهام واني وجميلة
طلعت ضيمي كله بجميلة
دخلت مهجان وشاهيناز يركضن للمطبخ توقعتهن راح يفاككن بينا بس لااا مهجان ركضت على سهام تجر بيها ويا قدس وتصيح
_مهجان:: ولججج شلون اجتني للحلك متحلفه بيج اطلع سوالفج كلها هسه
ركضت شاهيناز تجر بجميلة وتصيح
_شاهيناز:: ولجننن بنات كولن يالله استهدن
هيه تحجي وهيه تكتل ب جميلة
صرخت جميلة بقوة متأذية
طيحتها ب الارض ونمت فوكها جريت ايديها وعضيتها منبته سنوني ب ايدها
وهيه تصرخ مفرفحه
انجريت من شعري صرخت متوجعه شفت سهام تجر بيه باوعت مهجان لايديها وجرتها من شعرها بقوه وهيه صرخت
صار صوت صريخهن يجيب التايهه بس ابد ماعفناهن جنت شايله عليهن وكاتمة هوايي
دخلت كفاية اخت جادح وعطاء يركضن للمطبخ
ركضت كفاية علينه تدفع بينه وتصرخ
_كفاية:: عوفيهاااااا راح تموتيها
باوعتلها وجبتها براشدي على وجهه رجعتها ورا مصدومه
باوعتلنا عطاء تضحك متونسه ب الوضع
ماعفت جميلة ابد هيج ريحت كلبي بكتلها ومهجان وقدس يكتلن ب سهام مفرفحات عليها ومن سوالفها وشكد اذتهن
دخلن العلويات يركضن للمطبخ شافني نايمه على جميلة خانكتها والبنات وياي
التمن علينه كلهن يفاككن بينه
_ملاك:: عوفنييييي خل اموتها
_زهراء:: استهترن البناتتتتت
_لباب:: خايبةة اتسودننننن
بعدنا عن جميلة وسهام اباوعلهن نايمات ب الكاع روحهن مسحونه جميلة تبجي وسهام تسب بينه
طلعنه من الصالة يجرن بينه
اباوع لعمتي جهاد تباوعلنه تضحك متونسة
دارت العلوية لباب عليها وصاحت خازرتها
_لباب:: ولجج جهادددددد
_جهاد:: ها شنو شصار
طلعت من المطبخ ربطتي بيدي الم بشعري والبنات وياي حالتهن حالة كلها ترزل وتحجي علينه بس مو مهم المهم شفيت غليلي بيهن
دفعنا العلويات خارج المطبخ ودخلن لجميلة وسهام
لبست ربطتي اجر ب النفس
مشيت ب اتجاه المصلا انتبهت على فقار ومعراج واكفين خارج الصالة عيونهم ب الارض بس الصدمة بوجهم
باوعلي فقار مصدوم يرمش بعيونه كلبت عيوني منه ودخلت للمصلا
لحكني البنات وعاتكة تضرب على خدها واطفر
_عاتكة:: ولجننن ليش ماصحتني ليششش
_مهجان:: حتى ب اول طكه ينغمي عليج
_شاهيناز:: هيج نلكه عاتكه فاتحه حلكها ورايحة ب الغيبوبة
ضحكت عاتكة اطفر واحنا نضحك وياها
جنا متونسات على كتلتهن باوعت لقدس وغمزت
_ملاك:: هااا اخذتي حقج
_قدس:: علست شعرها ب ايدي عضيتها من خشمهاا انوب مالح عيع
ضحكنا اني والبنات متونسات
انفتح باب المصلا دخلت عمتي والعلوية لباب وزهراء يخزرن بينه بس عمتي كل شوي ادنك وتحط ايدها على حلكها
_لباب:: ولجن انتن المستحة وين عنجن
_شاهيناز:: ماسوينه شي علوية احنا فزعنه بس
صاحت العلوية زهراء ب شاهيناز
_زهراء:: فزعهههه شنوو بنيه ابنها بين الحياة والموت كلبها محترك ومتلوع على ابنها هيج تسون بيها؟؟؟
_ملاك:: لعد من ابنها بين الحياة والموت ماتكعد وتستجن ليش تشمر حجي
_لباب:: كافي انتن دواجن عد عبد الرؤف هوا يشوف الجن حل
طلعن من المصلا مزعوجات وعمتي واكفة مكتفه ايديها تضحك
باوعتلنه متونسه
_جهاد:: عفية عجبتني
_لباب:: جهادددددددد!!!
كمزت عمتي من مكانها
_جهاد:: ها عمه ها جاي ارزلهن
باوعتلنه عمتي وطلعت من المصلا تضحك
باوعت للبنات حسيتهن خافن واتوترن من عرفن السالفة راح توصل للسيد
اجه العصر والسادة كلها رجعت باوعت لجميلة وسهام بس سمعن صوت السيد كامن يبجن وركضن للمصلا
باوعت للبنات صارت وحدة تباوع بوجه الثانية
اقل العشر دقايق طلعت العلوية لباب وصاحت بينه
_لباب:: يريدجن السيد تعالن
كمت اني اول وحده والبنات وراي
دخلنه للمصلا شفت الكل ملتم بالمصلا وجميلة وسهام كدام السيد يبجن
باوع النا السيد ب انزعاج وعصبية وصاح بينة وهاي جانت اول مرة السيد يصيح بينه
_عبد الرؤف:: شنو هل تصرفاتتتت هاي انتن ليش صايرات ماتحترمن الاكبر منجن
جنا اني والبنات واكفات ومدنكات روسنا نسمع لسيد وهوا يرزل بينه كدام الكل
_عبد الرؤف:: بهذا البيت انمسح الاحترام والعيب صرتو تصرفون بقلة حياء ماتفكرون بجبير!!
_فقار:: سيد اسمع من الطرفين
التفت السيد على فقار خازره
_عبد الرؤف:: ليش اسمع انا جاي اشوف بعيوني ام موسى من اول يوم اجت الكل عاداها واولهم جهاد الجبيرة والعاقله
رفعت عمتي راسها تباوع للسيد ب استغراب
رجع السيد كمل كلامه
_عبد الرؤف:: وهسه ام عماد فوك اذيتها على ابنها تاذوها بهل شكل؟؟
كلها جانت ساكته ومحد حجت بس اني ماكدرت اسكت رفعت راسي وباوعت للسيد
_ملاك:: ليش سيد احنا منا والدرب بدر من عدنا هيج؟ مو ام موسى نفسها عقدت وشدت ويا قدس بدون سبب وقدس خطية ماتحجي وساكتة ولاجنها عروس جديد وام موسى تركض وراها.
باوعت لجميلة الي جانت مخنزرة تباوعلي
حجيت
_ملاك:: وام عماد لو صدك متأذية على ابنها جان حفظت ماي وجهه واستحت مو ماصالها اسبوع داخله للبيت وتشمر كلام وتتنمر على الكل ماخلت واحد ماضحكت عليه هاي تصرفات وحدة ابنها نايم مستشفى بين الحياة والموت؟
باوعت لجادح مكتفه ايديه يباوع لجميلة بعصبيه
_ملاك:: ابو عماد انت ترضاها زوجتك تستصغر ب المقابل هيج؟ يعني هيه لو ادمية احنا نتصرف بهل شكل؟ لا اكيد بس بعد كتمان طويللل احنا تصرفتنه بشهل شكل
جان الكل يسمع الي ومركز وياي حتى من كملت كلامي رجعت حجيت موجهه كلامي للسيد
_ملاك:: هنا اعتدن علينه ب الاول سيد لازم تكون منصف تكول ام موسى اول ماجت عاديناها وشدينه وياها. الكل هنا يعرف ام موسى شنو جانت تسوي وشنو الافعال القبيحه الي تتصرفها. هيه جبيرة عمر بس تصرفاتها الاطفال مايفكرون بيها
كملت كلامي وحجيت
_ملاك:: بكل مشكلة تصير انت تطلب من الطرف الغلطان يعتذر للمقابل وهاي ام موسى شكد اعتذرت من قدس بس بدون نتيجة
_عبد الرؤف:: وتبقون هيج واحد شايل على الثاني وحاقد عليه
هزيت راسي ب اي وحجيت
_ملاك:: اي سيد افضل من الاعتذار بدون نتيجة
سكت السيد والكل سكت ويا
العلويات دنكن راسهن وجميلة وسهام بقن يباوعلي مخنزرات
باوع السيد الهن وحجة
_عبد الرؤف:: انا اخجل احجي وياجن وانتن كبار وواعيات اكيد وتعرفن الصح من الغلط انا انسان ماحب الغلط وماحب اشوف الحقد بداخل احد للمقابل ف يا ام موسى ويا ام عماد انا ساكت عن تصرفاتجن عيباً لكبر عمرجن وانتن اكبر من انو اجي احجي وياجن كدام الكل واطلعجن غلطانات . اتمنى تتصرفن بعقلانية اكثر حتى لايجي يوم وتصرفاتجن الغلط ترجع عليجن بموقف مخجل الجن
ختم السيد كلامه ومشه طالع من المصلا
دنكن جميلة وسهام راسهن بخجل من كلام السيد طلعن ثنينهن من المصلا تحت خجل ازواجهن منهن
جادح ماجان مهتم بس عمران زوج سهام جان حيل مستحي من تصرفات مرتة الي جاي تزيد ماتنقص
طلعت من المصلا اني والبنات اهم شي حجيت الي جنت كاتمتة
طلع جادح من المصلا وصعد فوك
صعدت خلفه اريد اخذ تلفوني مشه جادح ب اتجاه الغرفه
جانت جميلة ب الغرفه
فضولي خلاني امشي اتسمع الهم اريد اعرف شلون راح يرزلها
جر جادح جميلة وحجة كاتم عصبيتة
_جادح:: انتِ شنو دواج؟؟؟
_جميلة:: شنو شنو دواي شبيك جادح فوك ما ادفع الي شلون هيج يسون بيه ساكت وتخزر بيه كدام الكل
_جادح:: اعرفج كلش زين جميلة لاتغشمين نفسج عايش وياج سنين اعرف السواد الي بداخلج شنووو
كامت جميلة من مكانها وسحبت ايديها من جادح
_جميلة:: انت شبيك جادح شبيك
_جادح:: باعي لج انا متحملج لخاطر عماد اريد سالفة بس حتى اطلكج لان انا كلش مامتحمل وجودج بحياتي
باوعتله وحجت بحزن مصحوب بعصبية وغيض
_جميلة:: ليش هيج جادح ليش!!
_جادح:: مثل ما سمعتي انتِ رجعتج غلط . خربتي كلشي برجعتج هاي
_جميلة:: ليش ابو عماد ان شاءالله جنت راسم على شي واني خربتة
حجتها تضحك ايدها على ركبة جادح تتغنج وتحجي عوجت حلكي لعبانة روحي من سوالفها
بعد ايديها منه وحجه
_جادح:: ماخربتي شي ام عماد الي راسم اله يصير برجعتلج او بلاها
_جميلة:: شنو الي ابالك جادح!!!
ابتسم جادح ومشه يريد يطلع من الغرفه جرتة ب اتجاها وحجت بعصبيه
_جميلة:: جادح لاتفكر تلعب وياي ادري بعيونك وين يركضن
بعد عنها جادح مامهتم الها
صاحت جميلة بصوت عالي تباوع لجادح
_جميلة:: شاهيناز موووو؟؟
التفت عليها جادح وابتسم
_جادح:: علويتي شاهيناز
فتحت عيوني مصدومة ياياااا شنو جادح نسى روحه؟
باوعت جملية لجادح عيونها كلهن شر
_جميلة:: شايف عماد شلون متلوع وروحة رايحة ب الحرك؟؟ احرك كلبك والوعك عليها يا جادح
_جادح:: ابدي عدي لطلاكج من هسة
_جميلة:: اعرف بيك اطلكني بس ما اطلع من حياتك قبل لا اترك بصمه تذكرك بيه سنين
انصدمت بتهديد جميلة لجادح
ابتعدت من الباب مصدومه هاي شجاي يصير هنا اخذت تلفوني من الغرفة ونزلت
نزلت الدرج بعدني بصدمتي من اعتراف جادح وكلام جميلة
باوعت الكل ملتم ب الصالة كعدت على القنفة افرك ب ايدي باوعت لشاهيناز تحجي ويا البنات ماتدري ب الي سمعته فوك احجي لو اضل ساكتة؟
سكتت اهز برجلي
رفعت عيوني اسمع لمعراج يحجي ب التلفون ايراني ركزت اسمع اله شلون يجمع ب الكلام
باوعت لمعراج شكلة جذاب لابعد درجة عيونه تحسهن كوا مفتوحات النظارة دوم بعيونه شعره نازل على وجهه
درت عود اكسر نظراتي
باوعت لفقار يباوعلي مخنزر ايده على حلكه
دنكت راسي سويت روحي اسمع للبنات
اني نظراتي لمعراج مجرد جاي اشوف ملامحه وشكله عدل شبي هذا يخزر بيه
رجعت باوعت لفقار لكيتة على كعدتة خازرني رجعتلة الخزرة وكلبت عيوني منه
_ملاك:: سيد معراج
رفع معراج راسه يباوعلي اشرلي على التلفون هزيت راسي ب اي ناسية كاعد يحجي مكالمة
مر الوقت سد معراج المكالمة وباوعلي
_معراج:: ها علوية تفضلي
_ملاك:: زاد فضلك سيد. بلا زحمة شفتك ناشر تصوير لقبة الامام علي وردت انشرة عندي تكدر ادزه اذا ماتصير زحمه يعني
ابتسم وهز راسه فتح التلفون وحجه
_معراج:: رحمة ان شاءالله ماكو زحمة
ابتسمت اتشكره شكد لطيف السيد معراج احسه متربي مرتين
باوعت لفقار اختفت ابتسامتي شبي هذا نظراته احس يريد يطكني مادري شبي عيونه يردن يطلعن من مكانهن
هز رجلي بقوة ينافخ التفت على السيد معراج من حجه
_ معراج:: دزيتهن علوية واكو صور بعد هم شوفيهن حلوات
_ملاك:: اي هسه
فتحت التلفون اكلب ب الصور مبتسمه
_ملاك:: تصويرك كلش حلو سيد
_معراج:: اي ب ايران دخلت دورة للتصوير
_ملاك:: هااااي الصورة كلشش حلوة
_معراج:: ياهي اشوفها
رفعت تلفوني بوجه معراج شافها وابتسم يهز براسه
_معراج:: صح حلوة هاي
_ملاك:: حتى هاي حلوة هم
كعدت اقيم الصور والسيد معراج وياي
الكل جان موجود ويسمع النه حتى السادة الكبار بس جانو مندمجين يسولفون بينهم
محد داير بال النا غير فقار الي يخزر بمعراج ويرجع يخزر بيه
ب الاخير كام من مكانه وصاح يأشر لمعراج
_فقار:: امشيي نطلعععع
_معراج:: وين
_فقار:: برااا اختنكت هناااا ماكو هوااااا
حجاها وطلع من الصالة باوعت لشاهيناز غمزتلي تضحك
دنكت راسي انشر ب الصور الي دزهن السيد معراج الي
ثاني يوم
طلعنه كلنا من البيت اني والبنات والعلوية لباب وحفيداتها شفنا غضنفر واكف ب الباب مبتسم يضحك
باوعت عمتي للسيارة وحجت بصدمة
_جهاد': شنووو هاي غضنفر؟؟؟
_غضنفر:: كية شنو هاي
_شاهيناز:: شنو ماخذنا نفرات سيد
_غضنفر:: لعد وين تكفن
مشيت العلوية لباب تباوع للسيارة جانت سيارة كية مسكربة
_لباب:؛ ولك هاي منين جبتها
_غضنفر:: اجرتها من صديقي يلا صعدن خل اوصلجن قدسسس قدسي وين قدوستي
طلعت قدس من بينا تباوع لغضنفر
_قدس:: ها غضنفر
_غضنفر:: تعاي صعدي يمي لمي الكروة
مشت عمتي ب اتجاه السيارة فتحت باب السيارة الي بصف السايق وصعدت
_جهاد:؛ لاااا اني اجمع الكروة يلا الماعدها ترجع من هسه
_لباب:: يلا زايرات للامام النفر الف
صعدت العلوية لباب بصف عمتي صارن ثنينهن كدام يصيحن بينه
ضحكت اني والبنات وصعدنا كلنا ب الكية
وغضنفر كدام يسوق متونس
_غضنفر:: هاااا كاملين
_زهراء:: اوكف اوكف ولج عاتكة نزلي جيبي شحاطتي طلعت جايه ب النعال
_مهجان:: علوية انوب ازرك تجيبنا العين شنو
نزلت عاتكه تركض للبيت تجيب شحاطه العلوية واحنا ب الكية عمتي كل شوي ادور علينه
_جهاد:: ها نطلع بيجن لكربلاء
_لباب:: النفر خمسة يمه
_غضنفر:: خجولي مرتاح بكعدتك
ضضحكت قدس خجلانه تهز راسها ب اي والعلوية لباب تصيح من الشباك
_لباب:: ولجججج عاتكة يلا خلينه نسبق السادة
طلعت عاتكه من البيت تركض بيدها شحاطه العلوية زهراء رجعت النعال وصعدت
مشه غضنفر بينه متونس
دارت عمتي علينه وزمخت
_جهاد:: شبيجن تتعاركن
_ملاك:: عمههه عطاء ماتقبل تفتح الجامه
_لباب:: شنو يمه عطاء حارمه الناس من الهوا
_عطاء:: يمهه نقابي يطير
دارت العلوية لباب تصيح ب غضنفر
_لباب:: يمه بس تشوف السادة اطبك عليهم يصعدون ويانا
_غضنفر:: عمه وين اكو مكان
مشينة العلوية لباب مادة راسها من الجامه تريد تشوف السادة طلعو قبلنه مشي
صاحت العلوية لباب تأاشر لغضنفر يوكف
_لباب:: هذول ولك اوكف
_جهاد:: عمة صيحي الهم بدلع عود وحده غريبه
_لباب:: انجبي ولج شهل حركات
مدت العلوية لباب راسها كله من الجامه تباوع لسيد عبد الرؤف والسادة كلهم يمشون مدنكين راسهم يحجون
نعمت صوتها وحجت تباوعلهم
_لباب:: فدوة اروح لهل اعمايم السود
حصرتني الضحكه اباوع السادة مشو بسرعه حاصرين رواحتهم ب الحايط والعلوية لباب تصيح بيهم مايعرفون بينه وارهم
_لباب:: ي الثكال ناقصنا نفرين بعد
هز السيد راسه ب اسف وكمل طريقه
_لباب:: وكم من عمامة سوداء اصحابها ملوك
_جهاد:: شبيج عمه
_غضنفر:: شمرتها فصحى
دار السيد يباوع للكية وكف والسادة وكفو وياه ضحكت العلوية لباب
_لباب:: طالع نفرين
باوع السيد للكل وهز راسه ب اسف
_جهاد:: ها سيد وجهك صار اصفر
_لباب:: هاي كله من ورا جهيده
_جهاد:: عمه اني شعلي
_زهراء:: اصعد عبد الرؤف اكو مكان
دارت العلوية على شاهيناز وعاتكة وصاحت بيهن
_زهراء:: رجعن ورا خلي جدجن يكعد يمي
_شاهيناز:: تعزمين على حسابنا علوية
_زهراء:: رجعننننن
رجعن البنات كعدن ورا صعد السيد عبد الرؤف والباقين ماقبلو كالو نمشي
مشة غضنفر واحنا ملتهيات نسولف
دارت عمتي على السيد وحجت تضحك
_جهاد:: شلون سايق حلووو
_غضنفر:: دورييييي راسج لا انزلج مامسمح الج تتغزلين بركابي
_لباب:: عمي صدك سايق حلو
ضحكت السيد بخجل والعلوية زهراء شابكه ايديها ب ايد السيد تصيح بيهن
_زهراء:: عوفن رجلي يستحي
جنت فرحانه بيهم وبشكلهم شلون حلوين انوب اخاف لا احسدهم واطكهم عين العلوية زهراء تغار على السيد من البنات والنسوان صح السيد جبير بس والله شكله حلو يعني صح جبير ب العمر ولحيتة الشيب تارسها بس شكلة جميل ويجذب المقابل
وصلنه للامام نزلنه كلنا من السيارة اخذت العلوية زهراء السيد ومشو بعيد عنه والبنات كلمن راحت بصفحة بقيت بس اني امشي وراهن
جنت متأخرة عنهن هنا يمشن كدامي واني وراهن نزعن احذيتهن وخلنهن ب الامانات ومشن يدخلن
باوعت لحذائي مابيه انزعه شمرتة ب الكاع على صفحة وركضت خلف البنات
التفتت على صوت فقار شفته يشيل بحذائي ويمشي وكفت بمكاني اباوعله وصل ب اتجاهي جان شايل حذائي ب ايده ابتسم بوجهي وحجه
_فقار:: لاتشمري هيج علوية يضيع
_ملاك:: مووو هاي مابية اودي للامانات
_فقار:: انا اودي روحي انتِ
_ملاك:: لاعيب شنو شايل حذائي انطيني ياه
_فقار:: مابيها عيب روحي لاتيهين العلويات
هزيت راسي ب اي ومشت اريد الحكهن
التفتت على فقار شفته واكف يحجي ويا شخص والحذاء بعده بيده
دخلت للتفتيش ودخلنه للصحن زرنا وكملنة صلاة ودعاء وطلعنة
لكينا السادة منتظرينا برا باوعت لفقار شايل حذائي بيده ابتسمت جوا النقاب
رجعنا للبيت وكلمن انشغل بشغلة
بليل كلها جانت نايمة واني والبنات ب الغرفة متمددات نريد نام
كمزنا من مكانة نسمع لصوت صريخ وبجي طلعنه من الغرفة نركض هذا الصوت صوت رقية ام عاتكة!!!!
نزلنه الدرج مصدومين نباوع لام عاتكة ب الصالة ادك على وجههه وتصرخ
_رقية:: فقاررر يمةةةة ابني فقار راحححح ماتتت فقار ابنييييي.!!!؟؟؟
