رواية نقش بارد الفصل السادس والعشرون بقلم فدك فاطمه
چَتال گلبـي و جَارعك حِيل .
.
رفـــا
حجة بصوت عالي:حي الله أحمد امشي فتحيلة الباب ولج
جمد الدم بجسمي اصتكيت مرعوبة و احمد سمعة دفر الباب حيل صفاء يصيح علية الباب حديد گلت راح يكسرونة من عصبيتهم
لزمني من ايدي دفعني لغرفتي اخذ الفتاح قفل الباب ،واني رجلية خملن من الخوف كعدت يم الباب بس اسمع صياحهم
أحمد:انتتتة شنييي ما براسك غيرة ماعدك مستحة هوواي سكتت و عديت سوالفك و اگول اخوي ميخالف ماعددة غيرررنة جاان استحيت گ****" جان استحيت
اسمع صياح احمد و امي تصيح عليه عرفت جاي يضرب بصفوان ،طفرت من مكاني على دك الباب
صفاء:افتحييي لا اكسرة على راسج جلبة افتحيي رفا لا والقرءان اكضي التوبة بيج
صفوان:عوووفهة وخر من الباب ماعليهة اني اجيت من شفتكم طلعتو
عصرت عيوني مخلية ادية على أءني اسمع بس صوت التكسير و العرك اصواتهم عالية يسبون بي
و امي من جهة تصيح تريد تحايزهم
صفوان:كاافي كافي شلزگت يابة اي لاغيرة ولا مستحة عدي مرتي اريدها
أحمد:مرررتك شنييي مرتك انتة تلعببب علينة احترمناك مرة وگفت وياك وعفت اختيي ، ورة عملتك الناقصة سكتت سنة سنتين بلكي تهدة النفوس اجيييت طلگتهة و احترمنة قرارك هسة راجع شنييي هييي لعبة تضحك علينة انتتت
صفوان:اختتك مخبلة لو مامطلگهة تولي للمحاكم حتى تطلگك طحنت الي براسهة طلگتهة هسة اريدهة فضت راحت
خاتون: ولك خالة شجاك هي لعب جهال خزيتونة الناس تكوم و تكعد بسيرتهة
صفاء: والقرءان محد كبر راسة الة انتيي يتيم
و خطية هو اكبر گ**" كل حظ مابي
صفوان:صفاء خليتي محترمك لا احط رجلي بحلكك
سمعت صوت امي صاحت:ولككك يمة عوفة عليتوني بطلايبكم گعدو لاتخزونة اوخر هذة يجي هذة گعدو تحاجو لا تفضحونة منا بيت عمك نصير علج بحلوگهم
أحمد:لا احجييي ويااا ولا اهدئ هسة يطلع بعد اذا لمحتة بالمنطقة اكسر رجلة امشيي اطلع گ**"
صفوان: بتكم اريدهة لا ناهب ولا بايگ انتم اخوتهة جاي اطلبهة منكم بيهة شي لااا
صفاء:اوگف احمد اسأل رفا قرارها شنو اذا رفضت وحق الله الموت اقرب الك منهة وجهة ماتشوفة بعد
بلعت ريگي نزيت من ضرب الباب قوي وعاط:افتحييي المهجوم
صفوان: اني افتحة المفتاح عدي
صفاء:جيبة
مارضى ينطيه ضلو يتجادلون لحد ما سمعت طكة القفل نفتح الباب صار بوجهي أحمد توة مد ايدة
يريد يجرني دفعة صفوان رجع هو دفعة من صدرة
صفوان:لاتمدد ايدك
رد يعتة من ياختة:انتتة تريد اموتك شنيي وخر منا
صفوان:اختك ماعليها اني دخلت للبيت ماتدري بية
تدافعو ركضت من بينهم لحضن امي ضميت روحي وراهة العيون علية من الخوف نبلع لساني عاصرة عباتهة ابجي من الموقف لخلاني بي
صفاء:هنة كلمتين لو لا لو اي ، ترجـعين لصفوان؟
بلعت ريگي اباوع الهم محتارة هو عيونة مثبتة علية بنظرة ترجي و تهديدة يرن بأذني بعدة و حجي
صفاء و تهديدة الة ثنينهم مايتراجعون
فززني احمد من عاط:احجيييي
رفا:ءء ارجع ارجعلة
صوت تنهيدتة وصلتني ،زفر احمد متنرفز گعد يخوزر بينة و صفوان عيد و اجاه الضحكة من الاذن للاذن
حجة يطلع:راح اجيب الشيخ
مالحگو حتى يوگفونة صفاء صاح وراه يگلة استر علية بس تجيهة الحالة تبطل ،عضيت شفتي فشلانة
گعدت بصف امي اجر بردان العباة
عيونهم علية حجيت متوترة:انتم مو رحتو تخطبون الة شصار
ردت امي تضحك:لايمة رايحين نخطب لأحمد
فكيت عيوني التفتت الهة:شنووو ماتگليلي
صفاء:عوفينة هسة من هاي السالفة الكلب صفوان يمتة دخل للبيت
رفا:گبل لاتجون اني قفلت البيبان والله خفت قفلتهن كلهن مادري منين دخل
هز رجلة يباوعلي بطرف عينة بشك و أحمد ساكت احسهم كاشفيني گام صفاء كعد بصفي نزيت من خلة ايدة على شعري
ماحجة بس نظراتة كافية طخت عندي صفوان جان وياهم و خابرتة و رجع بلعت ريگي مدنگة موقف ما اتمناه لاي واحد
أحمد:تدرين لو گايلة لا سسوي بيج املصج
عرگت من الخوف ضلو يخوزرون بية خالسيني مرت ساعة اكثر ندك الباب صفوان جاب الشيخ و دخلة للاسقبال هم تنهد أحمد يمسح بوجهة
گامو راحو هناك باوعت لأمي أشر للباب:راح أعقد هيج بتراكي
خاتون:عقدي يمة و العرس سوه بعدين خليني افتك مو مرمرتوني
تنهدت ضايجة أحمد خابر عمي گوة يالله اجة كعدت بالصالة يم الباب ايدي على خدي اسمع صوت الشيخ يحجي وياه
امي كاعدة يمي مكيفة اكثر مني لو بيدهة هي تگل لشيخ موافقة نوب گامت سوت الضيافة تطلع حلويات رحت وراهة لازمة ثوبها
احمد يأشرلي تعاي اخذت القرآن من الميز رحت كعدت اهز برجلي متوترة الصالة تصوصي امي بالمطبخ أشر اريدها تجي ماكو
نفتح الباب وگف صفاء يباوعلي الشيخ يحجي وية صفوان و أحمد نوب طلب يسمع الموافقة مني
تقربت من الباب گلبي يدك حيل
سألني اذا موافقة سكتت بالاولى و بالثانية صار التحمحم بفلس صفاء لو بيدة يكفخني بالثالثة طزز عيونة علية يخوزر
رفا:نعــم قبلت
رد صفوان بدون محد يسألة:اني هم قبلت
حجة أحمد محترگة اعصابة:خل يسألك يسألك
صفوان:اي اي العفو
ضحكت العب برجلية مايوصلن الگاع اجت امي واكفة بباب المطبخ منتظرة حجة الشيخ و سألة
حجة بدون تردد: اي نعم موافق قبلت
صفاء:بعد گول yes
طگتهة امي بهلهولة شعلوها گطعت بيهة مباركاتهم
تأشرلي اهلهل وياهة لان وحدنة مارضيت شمالني مهلهلة يگول فايزة بي
تم عقدنة رجعت زوجتة شرعاً
گمت للمطبخ اشرب ماي ريگي يبس اجة صفاء اخذ الجاي و الحلويات ، التفتت اخذ من الكيكة صار
بوجهي صفوان واكف بباب المطبخ
دنگ لماما بوستة بخدة حجت تمسح على جتفة:مبروك خالة حبيبي الله يتمملكم على خير واشوف أحفادي بيدي
غصيت دايرة وجهي اكح الكيكة حشرت ببلعومي
ادور على ماي بالثلاجة كلة جامد هو شتة امي تجمد
فتحت بطل العصير صحكيتة همة بعدهم يتباركون
مديت راسي من ورة الثلاجة اباوعلة مبتسم وجهة مستبشر حاضن امي
صارت عينة بعيني باوعتلة بغرور درت وجهي رجع للاسقبال و عمو اجة من برة سلم و باركلي ماعاجبة
العقد مشة يهز بيدة
طشينة كل واحد بغرفتة صفوان طردة أحمد گالة ماتجي الة بيوم الزفة ممنوع تشوفهة استسلم و راح
باوعت لموبايلي اشوف اخر اتصال بي لو ما متصلة
هسة اني ضالة على حالي ولا راجعتلة تفلت على روحي شكد غبية
اتصلت على غنوة گتلهة ندرعت علية معصبة تزمخ
نگلبت بجي وصارت شكاوي دلهم مايحاجيهة تبجي
رفا:اسمعي ولججج عقدت توني شبييج
غنوة:لاصدك مو شقة
رفا:لا والله تونة عقدنة
غنوة:ياجلبة ماتگليلي
رفا:ترة كلشي صار بسرعة حتى عقدولي بجادر الصلاة غير الحقير دخل علية للبيت وحدي و خزانة
غنوة:شكد حقيرة
رفا: نجبي حبيبتي بنت اختي شلونها
غنوة:هاي سهرانة
ضحكت التفت للجامة طحت من الجرباية خايفة اشوف وجه صفوان گبالي جايني من الشباك طفرني من الخوف يأشر افتح
ردت اخبث ماكدرت دنيا باردة مو بعيدة اذا شافوه يگبعوني يگلولي روحي وياه لان صدك صارت هيتة
سديتة بوجه غنوة قفلت باب الغرفة رحت فتحت الشباك دنك ينزع ببوتينة مدمر طين من برة الهوة
بارد لفح وجهي خلاني ارجف
دخل بدون مقدمات حضني عاصرني بين اديه يتحرك يمنة ويسرة كزبر جسمي من ملامستة ضليت متقلصة
صفوان:خرب روحج بنت النداف عليتي گلبي
رديت ادفة:وخر خنگتني
صفوان:رفرف
تنهدت مترددة رفعت ايدي حضنت ظهرة زفر براحة
شالني من الگاع شهگت اگرص بي اريدة ينزلني رفع
وجهي يبوس كل مكان بي خلاني افهي
سد الشباك و البردة رجع يقربني الة:نتمم زواجنة
توسعت عيوني ضربتة على صدرة:نجببب شبييك
صفوان: مو أمان انتِ
رفا:شبيك لا تخوفني شتحجي انتتتة اطلع برة
صفوان: والله مامصدك رضيتي
درت عيوني عنة اباوع للحايط تقرب يحشرني بينة
و بين الباب خفت ادفع بجتفة:صفوان لا
حجة يرفع ادية :اشاقة حبيبتي خليني اباوعلج بدون ماتغثيني مو جدي استلك من وراج
رفا:سامحتك بس أذا عدتهة ما اعوفك ولا اتطلگ ادير بانزين عليك و احركك
رد يبوس ادية ثنينهن : مخبل واعيدهة لو مفارگتني سنة بعد جان صرت راهب من القهر
ضحكت اهز بيدي راحت الضحكة من ندك الباب اجاني صوت صفاء :رفااا شاحنتي وين
دفعت صفوان متيهة من الخوف شلع الشاحنة خلاهة بيدي فتحت الباب مديتهة الة و صفوان وراه
صفاء:شعدج كاعدة
رديت اشر وراي :اسولف وية صديقتي
صفاء:جيبي الموبايل
مشيت خايفة لايدخل وراي اخذت الموبايل خليتة بيدة شاف اخر مكالمة وية غنوة و الجواهة صفوان
شمرة علية لزمتة بأخر لحظة كفخني دخلني للغرفة
سديت الباب زفرت براحة قفلتة ،نزيت من حضني صفوان يسحبني لجهتة
رفا: شوية شوية گلبي خلص من الهبطات
صفوان: ابوس الساعة لخابرتيني بيهة و رجعت
رفا:فد متندمة
حضني حسيتة مايعرف شيسوي من كد ما فرحان حتى ما اتحرش مثل سوالفة و تصرفاتة متعودة عليهن بس حاضني و هادئ
رفض يروح تمدد بمكاني تعاي يمي جريتة اريد اطردة مايرضى سحبني بقوة طحت بصفة شاطت روحي من نطگيت بالجرباية
رفا:شبيك رجلي تعورت
صفوان: بصفاء ولا بيج تعاي حبيبتي
رفا:وين اجي عيب شبيك ترة تونة عقدنة
صفوان:وان شاء الله تردين نتعرف و نتعود يمعودة غير صايرة عوائل دتعاي
تأففت امدد بصفة حتى خجل ماكو من كد ما عايشة مصايب و لحظات بينة لعب بية فلك ورة مارفضت العرس و عفتة حاول يرجعني
غمضت عيوني احس بأيدة على شعري يسحب خصلاتي يطيحهن على وجهي يرجع يتلمسة غفيت بدون ما احس
بين الواعية و الغافية اسمع موبايل يدك فتحت عيوني كاعدة على حيلي الغرفة فارغة و جهازي يرن منبه و الساعة بثمانية
طفرت استوعب فتحت الباب تذكرت اليوم جمعة
عصرت عيوني متشتتة رحت للحمام غسلت مشيت
للمطبخ سويت ريوك
رجعت اخذت موبايلي اگلب بي لحد ما فار الجاي طفيتة صبيت كاعدة بالگاع افتح بالقوطية مال الجبن ندك الشباك فوك مني
گمت فتحت الباب حجة حضني :فد مشتاقلج
رفا: البارحة شفتني
صفوان: بكل وقت اشتاق
خلة علاگة الصمون بالگاع بعدة حاضني يبوس خدي بكل قوتة صوت البوسة بالمطبخ يتردد دفعتة متفشلة اريد يوخر
رجع باسني اقوة بعدهة شفتة على خدي ودخل أحمد جمدت من الفشلة وخر يضحك حاضن جتفي
صفوان:حي الله احمد
رد عليه بضوجة:شگتلك اني
صفوان:شوفة شرعية الله محللهة علينة نخرب شرع الله
أحمد: استغفرالله دوخر عنها احترمني واكف
وخرتة انتبه لروحي مشيت احمي الجاي صبيتلهم ريوك كعدت بصف احمد هو گبالي صبيت نطيتة الكوب مالتة اخذة يخوطة
صفوان:فدوة لأديج الحلوة
طگاه أحمد على رجلة عاط متوجع:استلكت روحك
أحمد:امشي اطلع
صفوان: والله ذلة ياهو لشافني گالي اطلع
ضحكت مدنكة اخوط بالجاي اخذت صمونة اكل اسمعة يدندن يغني أحمد يتأفف من صوتة حضنة يغني گام يغني بصوت عالي
أحمد:اسكت كافي صوتك مزنجر
صفوان: نسيبك احترمني
أحمد: لاتخليني احلف ما انطيهة الك
صفوان:اخطفها
درت وجهي احك خدي اتذكر شكم مرة خطفني علة گولتة مرة اخذني و شرد للبصرة بنص الطريق خابرتة امي تعاركت وياه زعلت يالله رجعني
ضلو يتعاركون لحد ما كعد صفاء شردت منهم أذني نطرشت مشو لشغلهم و صفوان ضل يمنة كل شوية
شامرلة حجاية يخليني اتفشل گبال امي
فتحت التجفيف طلعت الملابس اخلي بيهن بالسلة
فتح باب الحمام خزرتة الزم الباب بسرعة لا يسدة
دفع ايدي سد الباب قافلة حجيت بهمس:صفوان اكعد راحة
رد يحاوط خصري : من الصبح صابر
رفا:امي هسة تجي وخرر عيب عليك صـ..
ما خلاني اكمل دنگ شفتة لامست شفتي بدون مايبوسها سكنت گلبي يدك تقرب بس طاخني غمضت عيوني انفاسي متسارعة
رفعني من خصري يبوسني بلهفة و قوة عصرت جتفة بأيد و الثانية بشعرة عصر خصري خلاني ابادلة منبتة اظافري بجتفة
ابتعد ورة لحظات يتنفس سريع صدرة يعلةو يهبط
واني مثلة مستندة براسي عليه مدنگة گلبي يرجف
فزينة ثنينة على دكة الباب امي حجت:ولجج يمة شصار وياج نتلتي شني طلعي لهدوم خل يطگها الهوة
رديت متوترة:اي اي هسة طلعت جاي اسبـ.. ابدل
خاتون:يالله استعجلي ،لا غدة مسوية اخوتج على جية هذة صفوان وين راح مشة
رد يهمس يم أذني:راح اتحمحم
گرصتة رديت اعصر بصابعي: يمة راح گال عدة شغل
حضن خصري من مرة يشاورني:احلى شغل
خزرتة امي وكفت بالباب تسولف شنسوي غدة
طلعت الهدوم بسرعة ارد عليهة قاطعني يبوسني
بهذلني اجيت افضح روحي من العصبية
خزرتة ادفع بي ورة الباب فتحتة طلعت السلة امي كعدت بالصالة نزلتهة ادور عذر اگومهة بي من مكانها حتى يطلع الافندي
رفا:ماما تعاي شوفي المجمدة بيها ريحة مو طيبة
خاتون:بعدين اشوفهة امشي شري الهدوم و سوي الغدة
رفا:دتعاي شوفيهة گومي حتى انظفهة
گامت بضوجة راحت للمطبخ طلعت صفوان طلع يغامز من الترك راح رجعت تورطت بيهة و غسلتهة
كملت شغلي رجعت للغرفة تمددت افتح الشبكة
اشوف منو الراسلني منو الفگدني اتصالين من غنوة
واحد من صفوان و دك رسائل من رقم تأففت بدون رد اخذت سكرين دزيتهن لصفوان و حضرتة
الاحد طلعت للدوام وية صفوان اخذ الطريق كلة يتغزل واني ناطة من النعاس عيوني گوة فاتحتهن
وصلني و راح بلشت دوامي نفسة بس اليوم متحمسة يوم الراتب حسيت بشعور يخبل من استلمتة خلص الدوام
رجعت للإدارة كاعدة منتظرة منو يجيني منهم لميت غراضي مشيت من دزلي صفوان رسالة اطلع
عدلت الجنطة عاقجة وجهي اشوف السيارة لطابگة
حديثة و سودة تلمع و قسور موسكو لازم باقة الورد واكفلي يعدل بسترتة
شكد لزگة يومية يجي لو محاجيتة اكول بيهة مجال
المشكلة ابد ما رادة عليه من اشوفة اتذكر الكف لطير بي عيني و طرش أذني
حجة يتقدم:ست رفا
رفعت ايدي اشرلة:متزوجة
رد مامستوعب:شنو
رفا:مـ..
طفرت من الصوت السمعتة التفت بهوتة صفوان داعم سيارة قسور من ورة بحيث محركها من مكانهة
رجع بگ ليورة فتح الجامة: حبيبتي خلص دوامج
اباوع لسيارتة تضررت و نخسفت و سيارة قسور تطلع اصوات انذار تنبه على الحادث شمر الورد راح
يشوفهة مصدوم
مشيت صعدت بصفة نزيت من مد روحة كدامي شد حزام للامان خلة ايدة حاجز على جافي عاصرهة حيل يمنعني اتحرك
رفع راسة قسور يحجي گبل لا يوصل الجامة حرك السيارة صفوان دعم سيارتة مرة ثانية نهزت بية شهگت خايفة لازمة الكشن
حجة يأشرلة:الثالثة بيك بس اشوف طولك هنا
باوعتلة مصدومة رجع ليورة حرك و مشة عايف ذاك
صافن و مصدوم يباوع لسيارتة بنص الطريق عطلت
سيارة صفوان گامت تعتعت وكفت
رفا: خل تفيدك الغيرة
رد متنرفز: واكسر راسة
رفا: هسة شلون نرجع بالله سيارتك ودعت
التفت حجة يرفع ايدي: فدوة الج السيارة و راعيهة احبج لججج اموت عليج
ضحكت اضم حلگي بين ادية رفع ايدي يبوسهة
اتلفتت بالشارع خايفة لا واحد يشوفنة رجعت باوعتلة خلة ايدي على خدة يقربها لشفتة يبوسهة
رفا:كافي عيب منا الشارع
صفوان: احبج رفرفتي
رديت خجلانة:خوش عرفت
ضحك يگرص خدي نزل يشوف السيارة رافع البنيد
كل شوية ينزلة يوديلي بوسة خليت ايدي على خدي صافنة بيه شكد متغير عن گبل
.
.
غنوة
الايام تمر و الاشهر ايدي على گلبي اراقب اي لحظة وية دلهم من اتذكر سالفة السجن و التهمة كل الراحة تنسلب مني اطنگر اليوم كلة
ثنينة نراقب غمزة وهي تكبر دخلت الشهر الخامس
ليشوفنة شكد متعجبين و مگابلينهة يضحك علينة
عوزنة ما نسويلهة تمثال
خو دلهم شايلهة و يفتر ماتطيح من ايدة يجي من الشغل كون اشيلهة و اتلگاه بالباب بالليل ياخذها للمحل هي لاتاكل حلويات ولا تعرف المحل شنو
طلعت من الحمام لافتهة لف من البرد هي تناغي
دخلت للغرفة الصوبة مشتغلة و مدفيتهة الهة
بدلتلهة البسهة بدلة حمرة شعرهة خفيف لونة على برتقالي ينطي شگار عيونهة على دلهم واسعة مثلة
لبستهة اطلع عطر مال الاطفال امسح رگبتة اخاف يوم من الايام اكلهة من كد ما مكزكزة حضنتهة ابوسهة اعصر الخدود لجنهة غيم
غنوة: فدوة للبنيات سبع فدوات يمة يمة اموت عليج
خلت بشعري لفاتحتة تجلب الخصر بصابعهة سحبتهن ابوسهن كعدتهة بحضني اقلم اظافرها يطولن يسرعة و تعور وجهة بيهن
ضليت لحد العشرة الاعبها عايفة شغلي نامت لازمة
طرف ثوبي سحبتة على كيف منهة و طلعت الصوبة
و رديت الباب وراي
طفيتهة و رحت للمطبخ اسوي غدة خليتة على النار
مشيت لميت الهدوم اخذتني الغيرة جا بس بتة تسبح و تكشخ اني شعوزي
قفلت البيبان حتى اخلي باب الحمام مفتوح دخلت
سبحت بسرعة باردة البخار يطلع ليبرة اخاف اسدة
وغمزة تگعد ما اسمعها
طلعت اطكطك دخلت للغرفة نشفت شعري اتحرك على كيف لبست ثوب گصير جوة الركبة بشوية طكني البرد جمدت رجلية بس طلعت برة
رجعت محترمة الشتة ادور بالكنتور طلعت تراك اباوعلة و ارجعة لبستة خلي يصير ليصير وذا طلعت زنودي العالم كلهة عدهة زنود
رجعت المطبخ اطك راسي بالمشط التمن احترك
رفعتة من النار غسلت الجدرية و خليتة بغيرهة همزين مو كلة صايرة بي ريحة شعواط
خليتة على التهدير طفيت المرگة، رجعت للغرفة
مشطت احل شعري كلة رفعت خصلتين خليت كماشة صغيرة ليورة طلعت گذلة
حسيت براحة احسن من التبهذل لبست تراجي لاول مرة بتاريخ حياتي بعدني اعدل بروحي و أذن الموبايل فزت غمزة تبجي من صوتة
شلتهة اسكتهة نقصت الصوت رجعت نامت خليتهة رحت صليت طفيت النار جوة الغدة حضرت زلاطة
و عدنة روبة سويتها لبن خليت فوكهة ليمون
رجعت متدفية بغرفتي لحد ما اجة دلهم يدك الباب
و يرمش علية مشيت اباوع لغمزة تتگلب تريد تكعد
رحت فتحت الباب مرتكية عليه طاحت العلاگة من ايدة مصدوم بية شلابسة تراك ضيگ وفانيلة تعلاگة
دنكت شلتهة من الگاع حجيت مستغربة:اسم الله شبيك
رد يضحك:عبالي انجلينا
ضربتة على زندة معبسة:مو صوجك
دخل قفل باب المطبخ يباوعلي من فوك ليجوة التفتت مخلية المسواك فوك السنك مبتسمة احس بشفتة على جتفي يبوسني
دلهم:ترد روحي بشوفتج
غنوة: الله يزيد الحب بگلبك
دلهم: فوك هذة يطك و ينفجر
ضحكت التفت الة فتح الماي غسل حجة ينزع بجواريبة:بنتي وين
غنوة: نايمة
رد يوخر شعري عن وجهي:يعني ناخذ راحتنة
غنوة:جؤؤ تأدب
دلهم: ماعرف الادب دربة منين
غنوة:ادليك بي
رد يقرب علية:لا اندلة
حجاهة دنگ يبوس رگبتي يعضعض بية گوة زغلتة
خليتة يروح للحمام مشيت للغرفة طلعتلة ملابس
دكيت الباب امدهن الة فتحة لزم ايدي
دلهم:اكو بريعصي بالحمام تعاي يمي اخاف
غنوة:يا سودة بعين العدو
دلهم:الله يسمع منج
غنوة:اخذهن لا اشمرهن بالماي
اخذهن يسد الباب رجعت احمي الغدة على ما طلع
بطرگ التراك و بنشف بالفانيلة بس شافني لبسهة
غنوة:هسة تنشل انزعهة مبللة
دلهم:ما جبتيلي خاولي
غنوة:معلك يمك خاولي بكد البطانية
دلهم:عبالي بطانية شارتهة
هزيت ايدي اضحك حجة يمد راسة للغرفة:ماگعدت
بتي حبيبتي
غنوة:لا تشبع و تكعد وحدها اذا كعدتهة تتنحس
دلهم:لاتنومينهة بوكت رجعتي
غنوة: والله وحدها غفت
اجة للمطبخ اخذ جزر من الماعون دنگ يعض زندي عطت ادفع براسة وخر لگطني عضة بصفها
غنوة:دلهم والله توجع لاعضني عوفني اخخ خرب اشتعلت
دلهم:صايرة تشاتمين
غنوة:اي من وراك توجع عضاتك
دلهم:عذريني عبالي لجزراية
باوعتلة بطرف عيني لزم عكس ايدي گبل لا اطكة
حضني لازك بية متعجب شلون لابسة هيج سحب
التجة تيهة عطت متوجعة من السلگة مالتهة
رد يمسح جتفي: والله ما عبالي توجع
غنوة:ييمة تشلوط
حجة يبوس المكان:صدگي بالغلط
غنوة:مو صوجك صوج الابستلك
ضحك يراضيني كعدنة نتغدة بس سمع صوتهة كام اللگمة بيدة راح للغرفة شوية و رجع يبوس بيهة
حاضنهة على صدرة
كعد مخليهة بحضنة كل شوية يدنك يشمهة بكل حيلة غورگت عيوني دنكت امسحهن رفعت راسي مبتسمة گوة علية الاعب بيهة رفعت الخاشوكة اوكلة
كملنة گمت اغسل المواعين اباوعلة شايلهة فوك رجليهة على حلگة يبوس بيهن ينزلهة يشم رگبتهة
دلهم:غناوي چاي بدرلج
غنوة:دمك نصبغ من الجاي مو كافي
دلهم:ما اشرب جاي اشرب عرگ تردين اجيج اطوطح
غنوة : حتى اترس جدر جاي و اخلي راسك بي
رد يغمز: قاسية
ترست القوي خليتة على النار كملت شغلي على ما خدر صبيتلة كوب نطيتة الة رحت للحمام غسلت هدومة جففتهن حتى منا لباجر ينشفن
رجعت لگيتة مدد على صفحتة اصبعة بيد غمزة يحرك بي على كيف و يحاجيهة لو يدنك يبوسهة
كعدت يمة عدل نومتة مخلي راسة على رجلي اصابعي بشعرة أسرح بي مغمض عيونة مستراح
دنگت ابوسة بين عيونة
غنوة:أحبــك اتمنى تضل طول عمرك نايم على رجلي ماتروح ولا ساعة
رد ياخذ ايدي:عمي هاي الجنة
غنوة:تضل يمي
دلهم:هسة صرت احس بطعم الرجعة للبيت و طعم الشغل و التعب الصار يستاهل أكمل الشفت من المطعم اروح ادورلي اي شغلة بس حتى ما ترجع ايدي فارغة
غنوة:تتعب هيج اخذ منهم ينطونك هواي يومية ليش تعوفهن هذة حقك
دلهم:حالف مايطب درهم منهم لهذة البيت
غنوة:انتة حالك حالهم هم الك حصة من كلشي
دلهم:حصتي حك حاتم ماقبل بغيرة
غنوة:خليت محامي لو غيرت رايك
دلهم:جاي ادور محامي زين اكو بيهم يغدرون اذا نطوه فلوس يضل يجرجر كلشي مايسوي
غنوة:ينطونة همة
دلهم:ممم بس ياخذ رشوة بعد تنتهي القضية
غنوة:مايخافون من الله عود محامين
دلهم:دنيا صايرة فلوس و بس
غنوة: الله يسهل عليك مادام على حك همة غلطانين
ان شاء الله يتعاقبون
دلهم: امين الله يسمع منج
رديت بغصة: افكر بيك اذا الولد رافض يتنازل شلون
دلهم:ادعي كون مايوصلة نعمان
رديت دموعي تطيح: والله يومية ادعي ليل و نهار
تنهد يوخر يتدنى يم الحايط اشرلي اقرب لحضنة
مددت بصفة حضني يمسح على شعري وايدة الثانية بأدين غمزة يلاعبها
حجة بجدية:حتى لو اشتكى خليني اخذ فترة عقوبة و اخلص ولا اضل متقيد
غنوة:ياعقوبة دلهم واني شسوي هو الشغل ماصدك تجي منة شكد اضل مفارگتك غير اموت
دلهم:اسم الله عليج صلي على محمد شجاج
غنوة:اختنگ من اتذكرة
دلهم: وجع يوم ولا وجع عمر
سكتت مخنوگة گام طلع برة يشرب جكاير اخذت غمزة و رخت للغرفة خاف تبرد مو زين عليهة
شوية و اجة وراي خلة موبايلة على الشحن كعد صافن يگلب بالجداحة
غنوة:شكم باكيت شربت
التفت يباوعلي بطرف عينة:جكارة وحدة و منتظر العشر بوسات
ضحكت اتذكر اشرتلة قرب علية بوستة بخدة حجة يوخرني:غناوي مو هيج البوسة هاي مال فاهين
غنوة:هاي بوسة رومنسية مال أميرات
دلهم:لا يطيح تاجي شايفتني سندريلا دبوسي عدل
غنوة:استحي
دلهم:لا ربحنة بيج
غنوة:مو زين الخجل حلو
دلهم:البوسة احلى
درت وجهي اضحك بنتي تبجي جوعانة دلهم مگابلني گمت جبت الشال اتغطى بيه خليتهة بحضني احس بدلهم وراي قريب علية
فتح الجرار طلع قلم يرسم على جتفي من ورة حجيت مكزبر جلدي:شسوي
دلهم:اجت ابالي فكرة شفتهة بمكان
غنوة:ان شاء الله تريد توشمهة على جتفي
دلهم:بس اركدي خل ارسم
ثبتني بيدة على خصري كعد مركز مدري شنو يرسم
شمر القلم طلع موبايلة يقربة و يصور التفت اريد اشوف مدة الي
مافهمت خطوط مدري شنو من رسم كبرت الصورة حجيت :اكلك شنو هذة الخط الازرگ بجتفي
دلهم:خط الاستواء
شهگت اباوعلة:هذة اثر التجة هيج صار
دلهم:اي ضابة عليج نزعيهة
غنوة: والله حرام عليك
باس المكان كزبر جلدي من حك لحيتة عليه يمرغ وجهة بشعري اشرتلة يسكت لا تغص البنية من وراه
عافني تمدد بمكانة
لحد ما شبعت وخرتهة اقرب الكاروك خليتهة بي تلعب بالخراخيش النازلة فوك منهة تطگهن يطلعن صوت تمددت اهز بيهة
حسيت بي تقرب همس يم أذني:غناي
غنوة:همم گول
دلهم:مشتاقلج
غنوة: تشتاقلك العافية و توصلك
فشر على العافية التفتت الة اضحك تقرب يسد حلگي بشفتة حضنت خدة ابادلة سحبني اقرب عليه ايدة على خصري يمشيهة
غمضت عيوني احضن جتفة مستسلمة لكل حركاتة
عصرت جفوني سوة من وجعني راسي طخ بالميز
غنوة:شجاك علية اليوم فشختني
رد ايدة على شعري: بالغلط غناوي اعصابج
غنوة: ترضة اكتلك
دلهم:امم اكتلي حلالج
ضحكت اطگ على جتفة جر وجهي يقربة الة يبوسني يمشي شفتة من خدي لرگبتي يشمني يتنهد
نطيتة ظهري مسنحة و منعسة رجفت اسحب الغطة
حضني من ظهري باوعت ضميري يأنبني غمزة غافية ايدهة بحلگهة
غنوة:غفت خطية صايرة هواي تنام
دلهم:لاحگة على السهر عوفيهة
التفتت عاگدة حواجبي:شقصدك
حجة يضحك:يا ادبسزز وين راح بالج
درت وجهي متفشلة لزمهة علية كل شوية يگلي فسريلي بشنو فكرتي و يضحك لو يغار عليهة
و يكتلني جريت شعرة عض شفتة متوجع مايكدر يحجي خاف تكعد
مر اسبوع بهاي الايام لگو محامي بس طلب هواي فلوس جاي يحاول يدبرهة باع البيت ليم بيت خالتة
و صفوان باع سيارتة
جاب الفلوس ضلو بالساعتين يتعاركون واحد يشمرهن على الثاني حلف ما ياخذهن ذاك هم حلف ضلن على الميز مشمورات
خليتهن بالجرار لاينباگن و يبتلي الزلمة يحير بيمن
شلت غمزة اعدل بشعرهة لبستهة شي متين طلعت
اخذهة دلهم يبوسهة
طلعنة نتمشى من خنگة البيت جزعت لاعندي واحد اروحلة مسافة قليلة رجعنة حسيت الجو بارد حيل
دخلنة للمحل ماردت اشتري بس دلهم مايسمع الة يصرف الالفين الي بجيبة يالله يفوخ گلبة و يرتاح
اخذ حليب باكيت حجة يلتفت الي:تشربة
غنوة:لا حبيبي صغيرة بعدها
علوان:احمم
التفتت مخلوسة گمزني حتى غمزة نزت من صوتة
خزرني شنو اگول لدلهم هيج واحنة بالمحل ناس تسمعني ابتعدت عن طريقة
سلم و اخذ غمزة من دلهم بوسهة ابتسمت العب بطرف العباة تمنيت علوان حنين هيج يجينة وافرح بجيتة و اگللهة خالو اجاج
مسحت عيوني دايرة وجهي مشيت للكراتين مال الجبس طلعت بوشار ادور على جبس ليز الحار
دلهم: غناي خلصتي
التفتت الة متوترة:اي اريد ذني
اخذهن راح دفع فلوس خلاهن بعلاگة طلعت وراه
لازمة ايدة التفت مبتسم راد يبوسني تذكر احنة بالشارع ضحكت عليه
دخلنة للبيت اخذتهة منة راح طفى الاضوية و سد البيبان رجع يمي يحمي اديه على الصوبة كعد مدد رجلي يحمي بيهن
غنوة:فلم لو مسلسل
دلهم:فلم للبالغين
غنوة:دلهممم
رد ياخذ الموبايل:افلامج فاهية
غنوة:طلع فلم زين مو دم و عرك
دلهم:رعب
غنوة:على ما انوم بنتك
خلاه يحمل حتى يطفي الشبكة و يفتك من الرسائل
غمزة بسرعة تنام بس تشبع بوستهة خليتهة بمكانهة گمت غيرت ملابسي طلعت الصوبة لا نغفى و تضل نوب نطيح بمصيبة
رجعت يمة اضم روحي بالغطة حجيت اتلفلف: اشتاقيت لنومة الگاع
دلهم:ام الخير هاي
طگيتة شكد ادبسزز و عقلة وصخ شغل الفلم مبين رعب من صدك درت وجهي ما اتحمل صدك يخوف
فتح الحلويات يوكني و مستمتع بالرعب كل شوية مد رجلة يگرصني بصابعة يخليني افز لو يدك الخشب يطلع صوت
غنوة:راح اكتلك المنگرش البت نايمة
دلهم: شمسوي
غنوة: لاتتحرش
دلهم: ترة أطفي و اراويج التحرش على اصولة
صميت حلگي سكتت عنة غفيت مادري بي شوكت نام كعدت الصبح مر اليوم روتين عادي شغل البيت لو اتملعب وية بنتي افتر انظف
العصر اجة صفوان جايب وياه عشاه دجاج شوي على تمن و طرشي شكد شريف فكني من العشة
كعدت يم الباب اسمع سوالفهم صفوان دافع مهر غمزة مقدماً هذة عشة لتسهيل امر ضحكت عليه
حجة دلهم يستهزئ:اظفرهة هذة لنگصة و نذبة ما انطيه الكم
صفوان:ماتعصب على ابني يجيب راسهة
دلهم:امرد راسة
فشر عليه شهگت ذيج الشهگة تحمحم صفوان وخرت متفشلة دقايق اجاني دلهم گالب وجهة معبس باوعتلة بورطة هددني ماكعد يم الباب
بس راح رجعت اخذولهم دقايق يسولفون كلة حجي مو حلو سكتت صامة أذني نوب بدو يحجون بجدية
صفوان: خليه يستلمهة كافي تأجل بس ياخذ قضية ثانية بعد تفلس
دلهم:خل اكمل بس شهر اصبرلي
صفوان:لاتخبلني فلوسك كاملة خابرة يالله
دلهم:ما اخذ منك وراك عرس و هوسة
صفوان:انعل ابو العرس ما طاير گوم لم فلوسك توكل على الله افتك ريح راسك
ضل دلهم ساكت حجة صفوان متنهد:شبيك ليش تأجلهة منين خايف
دلهم:ما خايف منين اخاف
صفوان:جا فضني و گوم توكل على الله لم فلوسك حتى نروحلة ورة العشة
ما سمعت ردة بس من حجي صفوان مبين وافق دعيت الله يسهل الهم گمت احضر بالعشة صبيتة
اجة دلهم شال الصينية اخذهة كعدت اتعشة اتسمعلهم كل حجيهم على الدجاجة اريد اعرف شنو المهم بيهة
صفوان:تحس الدجاج صاير غالي
دلهم: صعد سوك الدجاج واحنة ما صعدنة
ضحكت التمن طلع من حلگي كوة حابسة الصوت
رجعو يسلفون هالمرة على التمن شلون ينزرع
صفنت مامفتهمة عضيت شفتي اشوف غمزة يم الباب مادة ايدهة تلعب اصابعهة تبين من جواه
طلعو كاشفيني شكد فشلة يبوي گمت اخذتهة مشيت للغرفة لحد ما اجة دلهم بدل لم الفلوس
اخذ بنتة يبوسهة و يشمهة گمت امسح على جتفة
بوسني و لم غراضة يتأكد من كلشي من الأوراق
دلهم:غناوي خل اوديج لبيت اهلج وداعتج ما ارتاح
غنوة:ما ارتاح هناك
دلهم:اوصي اخوج يعمودة بالي يضل هنا
تنهدت انتظرني لحد ما گفظت المطبخ على السريع
لبست عباتي طلعت جان صفوان واكف بالحوش يدخن يباوع للحديقة ظهرة علينة
حجة من حس أحد طلع:گ***" زارع ورد وينك وين الورد و كتاب الله خاي المحروسة برمجتك غاسل ايدي من يوم الخمسين
دخلت فشلانة دلهم يم الباب يمشط سمعة طلع تحمحم التفت النة مدنگ سلمت عليه مشينة كدامة وصلني لهلي لزمتة يم الباب
غنوة:دير بالك على روحك و طمني
دلهم: لاتخافين بس نوصل المحامي ماكو شي انتي عينج على روحج لاتبجين
غنوة:اي بس انتة رد من اخبارك
دلهم: صار بالخدمة
بوستي و باس غمزة براسهة جان علوان واكف بباب المطبخ وصاه علية و مشة دخلت هو يسأل شكو
گتلة عدهم فاتحة هز ايدة كل ما يغيب دلهم اگول فاتحة واحد من بيت عمة ميت هسة يبتلون الناس
ضليت يم اهلي كوة نومت غمزة جهال هوسة مكيفين عليهة وراهة كوة نمت ورة ما طمني واصلين غفيت الموبايل بيدي
كعدتني نرجس بالسبعة تريد امشطلهة اجيت اشتم ماعول انام نهضت منعسة مشطتلهة گمت غسلت
ماكو ريوك الثلاجة مقفولة الجهال كل واحد بيدة لفة غفران تخيط بجنطة حسن وتكتل بي لان منگع كتبة و علوان يصيح ضايعة محفظتة
رحت دورتهة الة خبصنة خليتهة يمة مشيت اخذت بنتي و طلعت وياه وصلني لبيتنة فتحت الباب دخلت
نومتها بمكانهة و رحت تريگت حاجيت دلهم عرفت راجعين اجة وية الصلاة گبل صلى و نام تعبان كلش
اني هم وية العبرية صكيتهة للعصر فزيت وحدي لگيتهم كاعدين و مسوي اكل الة عازلي بالطاوة
كاعد بالاستقبال يلعب وية بنتة غسلت و تغديت
رحت يمة كعدت مترددة اسألة احوس و العب بالباكيت مال الجكاير
غنوة:اگول شصار
دلهم:دفعنالة باجر يقدم طلب يفتح القضية
غنوة:شلون تلزمونهم
دلهم: اوراق التشريح بالمستشفى ناخذهن و نثبت ان هو ما توفى بحادث مثل ماكتبو عود سيارتة احتركت و اصلا جان اثر رصاصة بي منها يبلش التحقيق
سكتت امسح على ظهرة تنهد يعصر براسة مايريد
يتذكر گام غسل رجع اخذ باكيتة طلع برة يدخن
بالليل خابرة صفوان بنفس الوقت اتصل عليه صلاح
يرعد و يهدد جهازة بصفة ساكت يطكطك بالجداحة
صلاح:ادوس على راسك وحق الله انتم صدك مو وجه صلح شبعت بفلوسنة و ترفع علية دعوة
دلهم:كلشي تحجي يستجل عليك
صلاح:خل يتسجل تخوفني كلك خلق واحد دايخ مايدري بروحة شيسوي قسم بالله بس تثبت برائتي االة اعفنك بالسجون
دلهم: لا تتأمل السجن منتظرك گبلي ودم حاتم برگبتك أنتَ وذاك الگ**" نعمان واني ادري و أنتَ تدري لا تصير شريف علية
صلاح:شنو ادري ابتليت على روحي من شفتة طلع مني سالم شدراني بي نگلب احترك اشم ايدي
سداه بوجهة مامتحمل مسحت على رجلة اهدي
رجع خابر صفوان غير من نفسيتة ماخلاه يهتم لحجي صلاح
دلهم تغير هواي صار يفكر بكلشي يخاف علينة ما يريد يتحرك لو يسوي شي غلط و يأذينة لو ما صفوان واكف وياه جان كلشي ما سوة
ثاني يوم خابرة صلاح طاردة من الشغل يريدة يسلم المفاتيح غلس عنة لحد ما طكت روحة و ودة واحد ياخذهن ما وصل البيت
طلعة الة دلهم على الشارع نطاهن الة و رجع كاتل الولد يگول غثني سكتت ما جادلتة يريد يطلع عصبيتة مايعرف وين
سويت العشة خليتة بالغرفة صحتة مارضى ياكل مايريد شلت غمزة العزيزة رفعتهة حتى توصل لشعرة
غنوة:گولي لبابا يجي ياكل احنة مانشتهي اذا ضايج
الدنيا تصير مو حلوة
ايدهة بشعرة تناغي طلع اصوات ما مفهومة اخذ ايدهة بوسهة يخليهة على گلبة يشمهة من رگبتهة
غنوة:حباب دلهم اليوم كلة ماماكل فدوة اروحلك تعاي شنو تريد تموت روحك
تنهد گام شايلهة اجة بصفي كعد سويتلة لفة اخذهة خلاهة على جهة و اخذ خبز وخر البيض غمساهة بالطماطمة رفعها يوكلني
حجة يبوس خدي:اول لگمة لغناوي حتى تديم النعمة
ضحكت خجلانة و فرحانة تقربت بوستة بخدة رديت:الله يرزقك تدوم بوجودك بعد روحي
دلهم:شلون حجي يدفي بالشتة
غنوة:ما دام گمت تشمر حجي يعني فكت الضوجة
دلهم:مو بيدي تجبريني
ابتسمت تقربت اكمل عشاي وراهة سويتلة جاي اخذتة الة بالغرفة كاعدين نسولف اشغل بالة عن التفكير حتى ما يضوج
رفع غمزة يبوس بطنهة حجة:بابا حبيبي نظر عيني دخيل الله شلون بنات
غنوة:انتاجي هذة
دلهم:شو بس وحدة شنو متوقف المعمل
شهگت اطكة ضحك يعضني و يبوسهة ضلينة فترة كاعدين نومتهة و راح طفة كلشي و اجة تمدد يمي
غفيت على ايدة حاضنة خصرة جنت تعبانة بسرعة نمت سمعت صوت غمزة تبجي واني مختنگة مادري شبية فزيت احرك ايدي على صدري
گمت احس الغرفة خنگة كلش كح دلهم اول ما طخيتة ندار لجهة الثانية منعس و تعبان كلش
حجة بصوت مبحوح:طفي النعل الصوبة المن مشغلتهة تدخن
وصلت يم غمزة شلتهة اشغل الضوة رمشت عيوني تحرگني صدري نقبض اشوف الغرفة مكبوتة مثل الدخان صاير بالجو تحركت ارجف
طحت يم دلهم لفز مخروع يباوعلي عگد حواجبة يلتفت وراه كل عقلة عبالة مشغلة الصوبة هي الغرفة مكبوتة بالدخان
