رواية نقش بارد الفصل السابع والعشرون بقلم فدك فاطمه
شيردها بعَد گعداتنة الحَلوه .
.
.
غنــوة
طحت يم دلهم لفز مخبروع، عگد حواجبه ويلتفت وراه كل عقله عباله الصوبة مشغلة الغرفة متروسة بالدخان خنگة و كاتمة علينة
التفت إليّ بصدمة عيونه متوسعة طفر مفزوع ما مستوعب ركض ناحية الباب بس أول ما لمسه لسعته حرارتة حارة سحب إيده بسرعة
غمزة تبجي و تكح صوت مثل الصفير يطلع من صدرها ماگدر اوكف ابجي و اباوعلها بين اديه
النار بدت تلوح طرف الفرشة جوة
جان گلبي يرجف ردت أگوم أعين روحي ما گدرت
التفت على غمزة تكح وتخنَگ صوتها ضعيف يقطع الگلب
صحانة من صدمتنة صوت غريب من جهة الشباك يدك عليه يصيح بأسم دلهم الي جان محتار يباوعلنة
من صدمتة و خوفة نسى الشباك
ما انتظر جراني من إيدي مشاني لجهة الشباك فتحه صار بوجهنة هوة و الدخان سبقنة طلع ليبرة اخذ غمزة خلاهة بيد الولد
دلهم: اختنگت وخرها عن الدخان تلاحگوها للمستشفى اخذوها
الشباك حديد مانكدر ثنينة نطلع منة الولد اخذ غمزة و راح گلبي فرفرح وراهة صرت ما اسمع صوتها يگول اخذو روحي حتى رجلية ماتن كعدت بسد البردة
اسمعهم يصيحون ناس تگول خابرو الإطفاء رجال يصيح على صودنة يعبرونهة للغرفة لبدت ورا البردة هدومي گصار ما لابسة حجاب
سمعت صوت علوان ميزتة من اصواتهم فزيت على ايد دلهم يخليني بسدة اخذ سطل الماي من الولد نگعني من راسي لرجلية
رجفت اشهگ گلبي يم بتي اتخيلهة على لحظة تختنك ماتوصل للمستشفى وجها جان تزرگ فحطانة من البجي
لا أطفاء لاشي ناس تطفي بالنار احنة بسد الشباك ولد لازم كوسرة يگص بالحديد مالتة لحد ما فتحة
صاح دلهم على علوان طلعني الة صرت بحضنة حتى مايشوفوني طلع دلهم وراي اباوعلة الغصة مجلبة بية ماكدر احجي اريد اروحلهة
صار البيت جمرة مشتعلة النار اكلت كلشي كل واحد يحجي بجهة لو ما ابو المحل شايف النار و مفزع جان اختنگنة گبل لا نحترگ
امشي بسد دلهم اجر بهدومي اجت نرجس تركض من ورة البيت بيدهة العباة لبستهة ارجف گبل رحنة للمستشفى وراهم
الطريق صار شطولة گلبي يبس من الخوف عيني للجام اريد بس المح المستشفى هذة الدرب هلبعدة شلون وصلوهة خاف اختنگت ما وصلت
عيني على دلهم كاعد بصف السايق مدنگ راسة بين اديه و الرجال يحجي ويلوم شلون ما حسينة بالنار
بس لمحت قربنة فتحت الباب گبل لا يوگف السيارة داس بريك متفاجئ نزلت اركض لحظات حسيت دلهم وراي لازم جتفي
طبينة للمستشفى واحد اتعس من الثاني عيونة شتايهة كعدت ماتحمل بعد راح هو يسأل عنها لمح
واحد من الولد عيوني غوشت گوة اشوفهم
شهگت لازمة راسي الشقيقة هاجت علية الوجع بين عيوني ماينحمل مادري شكد مر الوقت من فزيت لهاي اللحظة ساعات بس احسها سنة
عيوني تعلگت بدلهم الي رجع لزمت اديه ابجي:وينهاا بنتيي وينهاا
نحنى علية يگومي حجة متنهد:هسة يطلع الدكتور مخليلهة اوكسجين
غنوة:اموت والله بس يصير بيهة شي امـ..
دلهم:شش لاتفاولين دعليها هسة تطلع هسة
گعدني على الكراسي گبال الطوارئ راح يجيب ماي
مشيت گبل اشوف واحد من الولد واحد و كدامة سرير و البردة مسدودة
دكتور و بصفة ممرضة من بينهم اشوف بس البطانية و جهاز الأوكسجين بعدهة صغيرة وضعيفة
مافكرو بيهة ماگالو طفلة عدهم
التفت لدلهم وخرني عن الدرب وجهة اسود من الدخان شعرة هوسة شكلة مبهذل بطرگ التراك ثنينهة حفاي
ترس ايدة ماي غسل وجهي يرفع العباة على شعري يعدل بيهة جفة صار على عيوني يمسحهة يمسح الدموع
دلهم:تعاي يخلولج اوكسجين شدي حيلج علمود بنتج
غنوة: ماتگح مالهة صوت
دلهم:مخليلهة اوكسجين خل يستعدل النفس عدهة
گعدت ماتحمل اوگف ولا راسي يهدئ وكف فوك مني عيونة على السدية ايدة على راسي يدلك بي
احس بخشونة جفة فوك گصتي لزمنة الجلد منكمش و حمرة عصر ايدي يطمني مسحت دموعي
ماعرف حتى شنو اسوي شلون ادعي
عقلي متلخبط و جسمي كلة يرجف بس دار علينة الدكتور فزينة ثنينة ملهوفين رحنة يمنة نزع الجفوف يباوعلنة ماتنهد
حجة بجدية:تنفسهة صار زين على العلاج تتحسن
بس لازم تضل تحت المراقبة خلوهة اليوم بالطوارئ
عفتة يحجي رحت يمهة كعدت بصف السدية ابدي احضنهة اخليهة بگلبي سودة علية مغمضة و جهاز عليهة نطحنت طحن من شفتها
لزمت اديها الصغار ابوس بيهن جان راحت من ايدي
شلون ماحسيت من وكت ليش مافزيت دنگت اشم ايدهة دموعي تصب گوة كاتمة صوتي
مغمضة عيونهة صدرها يصعد و ينزل ساكنة ماتتحرك رفعت راسي لدلهم اجة گعد يم رجليهة
دنگ يبوسهن يمسح عليهن
فترة اجتنة الممرضة كل شوية واحد جاي يشوفهة
كل ما يجون اجفل من الخوف ضلينة يمهة على نفس الوكفة حتى من اگعد ماتحمل گلبي يفرفح
لحد الصبح استقرت حالتهة نقلوهة لغرفة ثانية حيلي نهد ماضلت بية قوة ضميت راسي بين أديه
اهز برجلي يتراوالي وجهة هي بنص الدخان
شلون صوتهة ضعيف و شفتهة گلبت زرگة شهگت مخلية ايدي على حلگي حسيت بالباب نفتح التفتت طگيتهة بجية من شفت رفا حضنتهة كاتمة صوتي
رفا:غنوة حبيبتي كافي گولي يالله شجاج الحمدلله طلعتو بخير و بنتج زينة صلي على محمد
غنوة:جاان راحتت منيي شلوون ماكعدت لو مختنگة وييين انطي وجهي
رفا: الله ياخذهم المايخافون من الله وين يرحون من حسابة ماعدهم ضمير
غنوة: اختنگت بيدي مادري وين انطي وجهي لو تشوفين شكلهة تكسر الخاطر
رفا: الحمدلله طلعتو من البيت الله يگومها بالسلامة يحفظها الكم ،شدي حيلج حبيبتي لاتضلين هيج روحج مخلوبة هسة تگعد بنتج ترضعينهة تشوفينها
گومي غسلي لخاطرهة هدي روحج
مسحت وجهي بعباتي عيني عليهة من كد ما مركزة بحركة صدرة و النفس عيوني تغوش و امسحهن خايفة اغفل عنها ماتتنفس
گومتني رفا دخلت للحمام مال الغرفة نزعت العباة
ارعش رجلية گوة شايلاتني غسلت وجهي لمت شعري بيدهة جنطتها جايبة هدوم وياهة
رفا:اگوم لو تسبحين احسن كلج ريحة دخان
حجيت برحفة افتحلها الباب:اي اي بس روحي شوفيها روحي يمها فدووة عينج عليهة
رفا:اروح يمها بس اهدي راح تطيحين على كيفج
طمنت من شفتهة راحت يمهة سديت الباب فتحت الماي شلون ما جان ذبيت على روحي لبست الهدوم لجايبتهن و لبست الحجاب طلعت
اسمعها تبجي بصوت ناصي اجت الممرضة شافتهة طمنتنة شلتهة حاضنتهة على گلبي ياريت الخنگة بية ولا بيها تنمرد روحي من اشوف الكانونة برجلها
گالت الممرضة ارضعها بس مو هواي خاف تختنگ بين فترة و فترة خليتهة بحضني امسح على شعرهة
عيونها گوة تفتحهن و تتنفس بسرعة صدرهة يصعد و ينزل مثل الفحطانة
ضليت متوترة اخاف عليهة من كلشي رجعت نومتها
اسمع خرخشة بصدرهة من النفس گعدت بالگاع لازمة ايدهة اجت رفا مسحت على شعرها
جايبة هدوم الهة بدلنالهة ضلينة مراقبينهة ورة فترة رجع الدكتور يشوفها وخرت اباوع بقلق الة
رجعت عيوني للباب اشوف دلهم واكف برة أديه ورة ظهرة مستند على الحايط صافن عيونة على السرير
:هاي علامة على التهيج تروح وية الأوكسجين
و العلاج لاتخلونها تبجي قريب تتحسن عدهة العافية
رديت بهمس طلع و دلهم وراه يحاجيه واكفين برة
كعدت متحسرة من الصار مقهورة تعوذت من الشيطان كلشي يتعوض المهم غمزة بخير
حسيت برفا تمسح على ظهري تنهدت ارفع راسي
گلبي يوجعني مختنكة صدري ضايگ بيه الهوة
التفت لرفا اسألهة:شلون عرفتو
رفا:صفوان بالخمسة اجانة دلهم مخابرة ولا صدگت من گالي حارگين بيتهم عليهم
غنوة: جلاب خافو من الدعوة لرفعها عليهم يردون يموتونة فوك ما همة غلطانين
رفا: والله كون تصير بمكان الدعوة الوحدة ثنين ماكو كامرات بالمنطقة شي بلكي مصورة البيت
غنوة:ياكامرات هو الأطفاء ماكو عفنة البيت مشتعل و اجينة ، نحبسنة بالغرفة لو ما الجيران
جان راحت البت اخذونهة ولد گدامنة للمستشفى
رفا:حسبي الله عليهم جاهل لابيهة لا عليهة الله ستركم كلشي يهون خلي البيت يحترك يتفلش المهم انتم بخير
غنوة: فدوة بس خل تطلع بخير و سلامة
رفا:بخير بخير ادعيلهة انتي هاي تحسنت لاتخافين
غنوة:گلبي راح وياهة
رفا:الله يساعدج
ندك الباب عدلت روحي كامت رفا ، دخل دلهم سلمت عليهة طلعت برة ، اجة بيدة علاليگ خلاهن على جهة راح الهة
كعد بوسهة بيدها و برجليهة يشمهة بحيلة صدر رفع الغطة يغطي رجليهة گام اجة الي ابتعدت اسويلة مجال بصفي
لزمت جفة عليه لزگة مسحت عليه:ايدك احترگت حيل
رد يخلي العلاگة بصفة:لا خفيف ماعليهة شي تعاي اكلي
مديت ايدي حضنت خدة تنهد يبوس جفي نزلهة
گوة علية اكل خايفة منة هو ضايج بس اگلة ما اشتهي يطگني بزمخة
ضلينة بالمستشفى يومين جنة نگدر نطلع گبلهة بس دلهم ما رضى حتى تأكدنة من حالتهة طلعنة
باوعتلة شايلة غمزة حجيت عيوني للشارع:وين نروح
دلهم:اوصلج للهلج الجو بارد ترتاحن هناك
غنوة:وبعدين
مرر ايدة بشعرة محتار دفع كلشي عندة للقضية حتى يمشون بيهة طلعلة البيت صفح صفينة بالشارع كلشي ماعدنة
وكف سيارة وصلنة لبيت اهلي نزلني وكف على جهة
يسولف وية علوان اسمعة يگلة بس اسبوع خليهة لاتغثونهة على ما ارتب وضعي
وگفت على جهة اشوفة يهز راسة مخلي اديه ورة ظهرة كل حجاية و ثانية يگل لدلهم صوجكم ما درتو بالكم على الكهرباء شلون تهملونهة
تنهد دلهم كاتم عصبيتة يسمعلة گوة رحت يمهم مد ايدة اخذ غمزة مني بوسهة شالهة على صدرة
غنوة:شنو راح تسوي
دلهم: مادري البيت مو مال يتصلح كلشي احترك
غنوة: خليني يم اهلي على كيفك سوي
رد متنهد: الله يعين ديري بالج على روحج و عليهة كلشي يصير خابريني رقمي عد اخوج
غنوة: خوش انتة هم على كيفك وية روحك لا تضل تهم
هز راسة مد ايدة بجيبة طلع خمسة خلاهة بيدي وحجة:خاف تحتاجين شي خليهة يمج ارجعلج باجر
اخذتهة اخليهة بالبطانية مال غمزة ، مديت ايدي اريد انزع الحلقة لزم ايدي يمنعني رجعهة لأصبعي
دلهم:عوفيهة هو اني شمنطيج غيرها كل ما زرة الحال نزعتيهة
غنوة:نمونة انتة المن تشتغل غير النة الحلقة تجي بمكانها عشرة دبر بيهة اي شي هسة
دلهم:تدبر معليج روحي يالله الجو بارد عليجن
دفعت ايدة نزعتهة تأفف بضوجة دخلت ردت رفض ياخذهة لبسني اياهة بوسني براسي و باس غمزة وطلع تنهدت ضايجة عليه
دخلت للبيت أشر للجهال يسكتون لا ينززونهة حجت غفران تفتح باب الغرفة: الحمدلله على السلامة
غنوة: الله يسلمج
دخلت للغرفة اجت نرجس نزلتلي بطانية خليت غمزة عليهة الجهال بالباب يباوعولهة خايفين لان نايمة غطيتهة طلعت بوستهم ملتمين علية
اخذت ماي من ايد سجى بنت علوان شربت كاعدة بالهول نزعت العباة اسمع غفران بالغرفة تبسبس وية علوان معروفة سالفتهة
تململت شسويلهم بيت ابوي كاعدة ببيتهم هم الي حصة حتى لو كاشية وحدة اكعد عليهة و اسكت
الجو بدة يستعدل باردة اكثر شي بالليل اخاف اغطيها و ثگيل عليهة و منظرهة هي مختنگة يتراوالي اضل الليل كلة بقلق
صارلي اربع ايام ببيت اهلي تعودت على سوالفهم دلهم اجانة مرتين من الباب يشوفنة و يرجع عرفتة
يريد يبيع البيت يگول تصليحة يحتاج أكثر
فوك كلشي الاجهزة البي كلهة خربت الطباخ و كاونتر
كلشي تضرر من الحريق كل ما يجي وسألة منو لسوة هيج يضل ساكت خايفة لا يسويلة بلية بيهم ويبلينة
كلهة ملتمة عليه تمنيت ارجع لذيج الايام ولا هسة من جهة خسرنة بيتنة و سالفة هذة الولد زياد هم ماخذة بالي خايفة اخوه يرجع يشتكي
رفعت راسي ظهري نكسر اريد بس اشرد من التفكير
نظفت البيت كلة الجهال بالمدرسة و علوان بشغلة
غفران لفت عباتهة و مشت لهلهة تبات يمهم
رجعت للبيت غسلت سويت غدة عيني على غمزة بالهول نايمة مغطيتهة كل شوية اروح اشوفهة بعدهة من تتنفس اكو صوت يصير بصدرهة
و مرات تكح بس احسن من گبل ترضع زين و تلعب
تمددت بصفهة ابوس ايدهة الصغيرة اظافرهة ناعمات متانية تگعد و اقلمهن
رفعت راسي على دگة الباب گمت طالعة برة حجيت
مخلية الشال على راسي:منــو
رد بصوت شبه هامس مرتبك:اني اني جسام
رمشت مستغربة حجيت:شنو تريد
جسام : اشوفج ورة الصار ما شفناكم الحمدلله على السلامة شلون صرتي اذ..
عفتة يحجي وحدة مشيت للبيت مالي خلگة المن واكف ببابنة الناس رايحة رادة خرب حضي المصايب تلتم و تجي كلهة سوة ما ينطن فنتك نتنفس و ترد روحنة
تنهد مزعوجة هزيت راسي انساه تمنيت عدي مبايل اخابر دلهم اشوفة شلونة بالي وياه وين كاعد هسة
للظهر اجة علوان و الجهال صبيتلهم غدة و غمزة تبجي صحت على سجى و نرجس خطية بس بدلن
اجن فرشن السفرة يساعدني
هنة مايشتغلن بالبيت امهن تكتلهن يخبثن وياهة هسة مستخطياتني صبيت المواعين انطيهن يودنهن هناك على السفرة
التمو يتغدون رحت للغرفة خايفة على غمزة من البجي لهواي شلتهة اسكتهة خليتهة بحضني الناس كملت غدة و طشت هي ترضع مجلبة بية
خدرت من الگعدة لزمتني الضحكة على شكلهة كوة وخرت خليتهة بمكانهة صحت البنات يمهة رحت غسلت المواعين كملت
اشرت لحسن اجاني دنكت اشاورة:بوگلي موبايل ابوك اذا نايم
رد متنهد:عمة والله يكتلني
غنوة:معليك دروح جيبة اريد اخابر رجلي طگ گلبي راح اموت
هز ايدة راح للغرفة يذكرني بدلهم ايدة خفيفة يخمط كلشي بدون محد يحس بي شوية رجعلي
حسن:بعدة گاعد ابوي كل عين هيج فاتحهة
غنوة: استغفر الله عود من ينام بوگة خوش
حسن:تنطيني ربع
غنوة:جَدي يجدي من مجدي هو اني منيلي
تأفف معبسة ضليت يم بنيتي لعبت روحهة من كد ما ابوس بيهة اريد هيج اكلهة مدري شسويلهة اموت عليهة ولا يوم اجة ابالي احب هيج
التفتت للباب حسن لازم موبايل ابوه يأشرلي فتحت الجرار طلعتلة ربع اخذت الموبايل راح يركض برة
گومت البنات طاردتهن نرجس تباوعلي و تضحك
دخلت على الواتساب عگدت حواجبي اشوف رسايل من واحد اسمة صافي خرب بس لا لبالي دهر دهر عفتهة ضليت مصفنة انتبهت على روحي اتصلت على دلهم مخلية الجهاز على أذني
فترة رد علية صوتة مبحوح حجيت العب بصابع غمزة:شلونك حبيبي
رد متنهد:هلة يا گلب حبيبج و اهلة و ناسة
حجيت اتمايع: تغديت يروحي
دلهم: خرب بالگ**" صيري ادمية و احجي عدل
رديت بضحكة:غير اخفف عنك بصوتي
دلهم:فدوة لصوتج شلونج
غنوة:اصير بخير بشوفتك انتة احوالك
دلهم: حالي من حالج بنيتي شلونهة
غنوة: الحمدالله زينة ،وين هسة انتة
دلهم:بالولاية هنا
غنوة:امم تدكدك
دلهم:اي ادكدك على گولتج ادكدك للزلم
حجيت بضحكة: عبالي للنسوان
دلهم:مو اخلافي افا عليج
غنوة:لا صدك عوف الشقة شلونك متغدي مرتاح
دلهم:زين لايضل بالج جنت نايم
غنوة: ماتكدر تجي تشرب جاي و تراوينة وجهك الحلو اني و بنتك
دلهم: احسة حلم و راح افز شبيج غناي
غنوة:شبية اريد اشوفك ضايجة اذا تكدر تجي
دلهم: مو هسة بالليل
غنوة:يمتة ما فرغت اذا ماتكدر هم تعال
دلهم:بكل الاحوال اريد اجي مشتاقلجن
غنوة: تشتاقلك الفلوس و تجيك
دلهم:هسة الفلوس اهم من العافية
ضحكت اعدل گعدتي : لا اشاقة شني الفلوس المهم سلامتك حبيبي
دلهم : وسلامتج بالدنيا عدي
ابتسمت اتمدد بصف غمزة الموبايل على أذني ورة فترة حجة : امر بالليل وية ولد يشوف البيت حتى ابيعة تطول السالفة تتحملين اهلج
غنوة:اتحمل ميخالف اذا بعتة تشتري هنا لو وين
دلهم: اشوف بيت زين والملم الباقي بعدين
غنوة: ماتخلي و تلمهن ترجع تصلحة حرامات هو انتة اول و تالي راح تصرف خاف تبيعة ماتلگة بيت
زين نفلس من جهتين
دلهم:اي شي المهم اكعدجن هسة بمكان
غنوة: حباب خلي ننظفة و نشوف شنو ضال بي زين
نبيعة و بعدين نأسس على كيفنة
رد بضوجة:گلت للولد بالليل يجي
غنوة: بكيفك بس لو بالبداية تدور بيت يجوز ماتلگة احسن ترة الرخيصات هم مو زينات لو بيهن رطوبة لو بناء قديم
دلهم: اشوف هسة خل يجني هذة الگ**" مدري وين گلب وجهة
غنوة:صفوان جان مهجور ماينشاف مو نوب عقد ميت عليك يعوف الخطيبة و يجي
دلهم:شدراج احجي عليه
غنوة:هو انتة شعدك غيرة
دلهم: خجلان منة الگ**" كل شوية جايبة
غنوة: جا ليش تفشر عليه عم بنتي مارضى
فشر علينة ثنينة حجيت بضحكة : على هاي اخلاقك منين نتوفق من يا باب
دلهم:من باب الخلفوج مشتاقلج خرب روحج جايج بالليل
غنوة: خوش انتظرك خل ارجع الموبايل لعلوان من شغلت الشبكة اجنة رسايل من واحد اسمة صافي كاتبلة حبيبي تجيني بالليل
رد مستهزئ:شني اخوج اللوان
رديت مستغربة:شنو اللوان
دلهم:باي غناوي السالفة يطول شرحهة
غنوة:خوش روح صلي دلهم صلي و تغدة سمعت
دلهم: امم اي روحي
سديتة رجعت الموبايل لعلوان نمت فترة الظهر كعدت كملت شغلي شگول عليج غفران ماصدگت اجي تروح هناك يم اهلهة
تعشينة عزلت لدلهم منة رحت بدلت لغمزة كعدت
البنات يمهة غسلت المواعين و فرشت لجهال حتى ينامون ضليت منتظرة دلهم
تأخر يالله اجة اخذت غمزة لفيتهة بالبطانية طلعت
الاعبها توهة تطلع اصوات لو تخلي ايدهة بحلگهة كلشي تلزمة تخلي بحلگهة
فتحت الباب حجيت مرتكية عليه: اجة بابا
ابتسم يحضن خدي:يروح بابا
بوسني براسي شال غمزة حضنهة سديت الباب مبتسمة اباوعلهم مسحت على ظهرة مقهورة هسة هيج وكت كاعدين ببيتنة و مستريحين
غنوة: ادخل محد موجود
دلهم:اخوج وين
حركت جتفي ارد:مادري طلع
فتحت باب الاستقبال راح گعد مرتكي على الحايط شايل غمزة حاضنهة يشم بيهة و يبوسهة هي تجر بشعرة تريد تخلي بحلگهة
غنوة:متعشي
دلهم: لا
غنوة: خوش اني هم انتظرتك رايحة احمي العشة
مشيت للمطبخ شغلت الطباخ جوة الطاوة رجعت اخذت ماي رحت يمة نطيتة عدل بنتة العزيزة بحضنة اخذة يشرب
غنوة:شكم بوسة لحد الان
رد ينزل الدولكة: عشرين وتيهت الحساب
غنوة: واني بس وحدة
حجة ياخذ ايدي: لو تدرين شكو براسي
باوعتلة بطرف عيني اجيت ادغة ببطنة استخطيتة
گمت صبيتة عشة طلعت الخبز اخر گرصتين خليتهن شلت الصينية رجعت يمة قفلت البيبان
صارت عيني على ركن الاستقبال مادري ليش هسة اجة ابالي اليوم الي فحصتني بي القابلة هنا سبحان مغير الاحوال
انتبهت لدلهم يحاجيني گعدت بصفة اريد اخذ اللگمة من ايدة مارضة هو وكلني نوب بدة ياكل
تيهت غمزة لوحدهة تحوس
غنوة:مشتـاقين
كح غاص ضحكت انطيه الماي مسحت علة ظهرة حجيت بعدني اضحك:شجاك
دلهم:فد وحدة مسربتة
ضحكت بعلو صوتي اميل براسي عليه طول العشة اتشاقة وياه حتى مايحس اني ضايجة لو مزعوجة من گعدتي هنا و اغيرلة جو بطريقي
شلت المواعين وديتهن للمطبخ خليت الجاي على النار اسمع صوتة يحاجي غمزة صوت البوسة يوصلني لو يشمهة ويلاعبها
شلت الكوب وديتة الة كعدت اخذهة منة لا تنجوي
حجة يمسح على راسهة :زينة لو تكح
غنوة:مو هواي قليل بس صدرهة بعد بي صوت من تتنفس
رد متحسر: اخذهة لدكتور احسن
غنوة: ان شاء الله مابيهة شي
حجة يبوسهة : ياريتهن بية و لا بيج بابا
غنوة:منو لحرك البيت
رد مغتاض:الكلب نعمان
غنوة: لخطف رفا شبي هذا مالة رداد ماعندة ضمير يحرك البيت علينة حياة الناس لعبة
دلهم:گ***" شتترجى منة
غنوة: و صلاح
دلهم:يحلف يگول مادري بي ولا سامع يسوي هيج
اجة كذا مرة ما حاجيتة
غنوة:نعمان لو ما القضية تمسة حيل جان ما سوة هيج
دلهم:امم لو اكو كامرات نثبت الحريق بفعل مو طبگ بالكهرباء بس ماكو بقى الة ندور لسوة هيج
غنوة:تگدر تلگاه
رد يهز راسة:اگدر بس ماعندي مجال هسة احاول الزملي شي عليه حتى تقوى ادلتنة بالمحكمة ورة ايام من رفعنة قضية نحرك البيت يصير نعمان مشتبه قريب من الجريمة
غنوة:ان شاء الله تلگاه تفتك منهم
هز راسة كمل الجاي خلاه التفت اخذ موبايلة حجيت مستغربة:شنو راح تروح
دلهم:امم زحمة من اخوج ماكو هنا
غنوة:محد هنا اگلك مرتة يم اهلهة و جهال نايمين هو طالع ضل على الاقل لحد ما يجي
دلهم: جنج ترديني ابات
غنوة:جنك ماتريد تبات
حجة يقرب علية:اني الاريد
غنوة:تأدب بتك كدامك
دلهم: لو متأب ما اجت بتي
خزرتة اضحك قربني يمة حاضنة ثنينة رفعت راسي طخ خشمي برگبتة لا إراديا شميتة و تنهدت بصوت
حجة يمسح شعري:تشمشمين بس لا حامل
غنوة:يمة اسم الله غير بنتي امس فتحت عيونها
دلهم: ربيهن سوة
غنوة: اربيهن حتى متأكد بنية
دلهم: بلكي يجي رزقة وياه و نستفاد منة
غنوة:يمة من افكارك ارتاح مو حامل
دلهم:غيرهة بغيرهة
دغيتة بعكس ايدي مايسكت الة هيج طلع الجداحة خلاهة بيد غمزة وخرهة متربع كدامي خلة اديه وراه وتقرب علية
حجيت بعبسة من شفتة گعدتة هيج :دلهم قميصي احترگ
رد يرفع ايدي الة:بدل الواحد اجيبلج عشرة
غنوة: يالله كلشي يتعوض المهم نرجع ببيتنة
دنگ يبوس اصابعي حجة:أحبك قنوعي
غنوة:واني اموت عليك صبح و ليل افكر بيك
دلهم: واني ميت عليج و بيج
غنوة:تعال افلي شعرك
رد يقرب علية:شربت جكارة العصر
غنوة:لا يمعود استر علية
دلهم:على الشفة بروح أبيج
ضحكت اخلي ايدي على حلگي خجلت من نظراتة
تقرب يوخر شعري عن أذني اصبعة يتلمس طرف شفتي رفع راسي ليفوك
خلة وجهة برگبتي بوسني حجة :يم مـَرد النفس حتى كل ما تتنفسين تذكريني
غنوة: مانساك حتى اذكرك
التفت لغمزة تلعب تقرب يمهة يلاعبها من شافهة ملتهية رجع الي مد ايدة لخصري يتلمسة و يحضنة
ذبلت عيونة يباوع على لشفتي قربت وجهي عليه مغمضة بوسني يحضن خدي يخليني اميل براسي على راحة ايدة
حاوطت رگبتة ايدي الثانية على صدرة كل شوية يبتعد يخليني اجر النفس و يرجع عيوني غوشن وخرت اسند گصتي عليه صارت يم شفتة
باسني و حضني لصدرة رجع ليورة اني بحضنة تمدد
ايدة بأيد غمزة يلاعبها حضنتة انام على ذراعة رفعت ايدي خليتهة بشعرة امشيهة بين الخصلات
دلهم: مو نومة ضيم
غنوة:اذا غفيت ترة ما اگعدك
دلهم: والله منعس انتي بس تضليت تتملعبين بشعري اطكهة للصبح
غنوة:بات هنا ميخالف
دلهم: اخوج يضل ينعثل على راسي الصبح تصير ذلة
غنوة: حشاك محد يذلك حبيبي
غمض عيونة ابتسمت اباوعلة كلش منعس واضح عليه ما طول و غفى سحبت روحي بهدوء اخذت
غمزة لاتگعدة بصوتها
ضليت وياهة بلكي تعطف علية و تنام اباوع للساعة
بالوحدة و علوان ما اجة گلبي لعب گامت تجيني افكار تشككني بيه عفتة شعلية
دخلت للغرفة اخذت فراش و شايلة غمزة بأيد بهذلتني رحت للاستقبال خليتهة و رجعت جبت بطانية غطيت غمزة
و قفلت بيبان الاستقبال و المطبخ جهال علوان عادي ينامون وحدهم وهو ماكو لهسة عبرت نص الليل ما رجع للبيت
غطيت دلهم تمددت بصفة اباوع لوجهة شلون تعبان حتى لو گاعد هو من التفكير يبين بيه التعب بسرعة لحيتة و شعرة طالع بيهن شيب
دنت نفسي الة ابوسة تقربت بوستة على خدة رجعت نمت مادري شكد غفيتلي كعدت غمزة تناغي تخرمش بوجهي
باوعتلهة منعسة بس لا تصحصح و ابتلي غمضت
احس بيهة يمي صوتها تناغي لو تضحك وحدها
شوية تحول اللعب لبجي
التفت لدلهم عبالي فز طلع أصلا كاعد مبتسم يباوعلهة كعدت أخذتهة بحضني طگتهة الجوعة
حجة يرفع الموبايل: حيل بتلاثة غير تگعديني صدك جذب غناوي
غنوة:ماهنت علية شفتك تعبان
دلهم: محد هنا اخوج ما اجة
غنوة:امم محد اخذ راحتك
گام طالع برة راح يغسل اسمع صوت الاذان من برة
اگول جاعت الادبسزز تلزمني بوكت الصلاة رجع دلهم صلى و كمل هاي بعدها
غنوة:ماتجي تاخذهة اريد اشوف دربي
دلهم:خليهة تشبع
غنوة: الحليب بفلوس
تقرب يلزم ايدهة:يالله بابا كافي راح نفلس
ضحكت اوخرهة نطيتهة الة گمت توضيت صليت
تقربت يم دلهم مسحت صدر غمزة بالتربة و وجهة
بدربي مسحت وجهة
دلهم:شني مزار
غنوة:حتى يصير بوجهك نور
دلهم:لهدرجة معطب
خليت التربة بمكانهة اضحك عليه كعدت كدامة هو مدد مخلي غمزة على صدرة تلعب بلحيتة لو تخلي اصابعهة بحلگة و يعضهة جذب
غنوة: أحبـك
دلهم: حبيبة روحي
غنوة:اريد اضمك بقوطية
دلهم:گولي يالله
حجيت اعددلة:انتة زوجي و حبيبتي و صديقي
و بيتي و اهلـ..
سكتت لازمتني الغصة عيوني غورگن نزلهة گعد حضني :شبيج حبيبتي عليمن البجي
غنوة:اخاف عليك
دلهم:شش مايصير بس الكاتبة الله توكلي لا تهمين
غنوة:دير بالك على روحك حباب
دلهم: حبيبتي غناي اهلي وناسي رويحتي
حضنتة اتنهد كل خوفي من قضية صديقة بس ماحجيت كم مرة گالي لاتفكرين بيهة ماردت ازيدهة عليه و اذكرة ادعي كون مو كلهة تلتم سوة
كشف الوكت گمت سويت ريوگ اخذت غمزة اغلسللهة رجعت بسرعة گبل لا يروح لبستهة اباوعلة كاعد بالباب يلبس ببوتينة
غنوة: اوگف خل نبوسك
دلهم: غناي هدي اللعب
غنوة:انتة شتكفر احنة بيا حال
شلتهة الفهة بالبطانية دنگ علينة اديه على إطار الباب بوسهة بخدهة حجة:اخ منج بابا شمتج تهد الحيل
غنوة:وأنــي طوفت
دلهم:اسكتي وخليهة هي بس هزت بتوتج تهز گلبي
ابتسمت فرحانة بوستة بخدة حضن راسي لصدرة
بدون مايحس نزعت الحلقة خليتهة بجيبة ابتعدت
حجة يطلع من جيبة الثاني موبايل خلاه بيدي:دبري روحج بي رصيد مجاني حتى ماتضلين كل شوية ماخذة موبايل اخوج
گلبتة بيدي مبايل نوكيا من هذة الينفتح حجيت اباوعلة:يگول مال مزعطة
دلهم:نجبي اشتريتة بعشرة
غنوة:اريد لمس
رد بخبث:خل نرجع لبيتنة نلمس على كيفة
خزرتة ولا يتأدب عضيت شفتي من مد ايدة بجيوبة
طلع فلوس طاحت الحلقة جان بيدة ألفين دنك على صوتهة من طگت بالگاع
حجة ياخذهة:لاتصيرين كلاوجية گتلج مابيعها
غنوة:دلهم هسة شني عناد مشي بيهة امورك تسهيل امر شجاك
رجعتهة بيدة گبل لايحجي رفعت روحي بوستة بشفتة مرتين حضن خدي يبوسني براسي گوة عليه اخذهة طلعت وياه وصلتة للباب
طلع رجعت بعد ماكدر انام كعدت الجهال للمدرسة
علوان مارجع الة وية الغدة ماحجيت ولا علقت معلية همزين غفران رجعت الظهر
ورة فترة رحنة اني و دلهم للعيادة اخذناهة بهذة الاسبوع مرتين لزمتهة الكحة گوة تروح خفنة عليهة
دخلنة للغرفة سولفلة دلهم لصار اهز رجلي بقلق
الدكتور يحفصهة دلهم واكف لازم ايدهة حتى ما تتحرك لو تبجي
حجة يرجع لمكانة:الطفلة عندها ضيق بالمجاري التنفسية يعني تنفسها مو طبيعي وهذا اللي سبب الصفير والسعال المستمر احنا نكدر نعتبره نوع من الربو الطفولي أو الحساسية الصدرية
دلهم:يعني خطر ربو دائمي
رد يهز راسة :هواية أطفال بهالعمر يبين عدهم هيج أعراض مرات تخف ويا العمر ومرات تبقى وتحتاج متابعة المهم الحالة مو خطرة إذا نلتزم بالعلاج
اخذتهة منة عيوني مغورگة اتحسب عليهم وينهة وين هيج امراض وصفلهة علاج و نصحنة مانخليهة تبجي هواي ونبعدها عن الدخان و الروائح
طلعنة الطريق كلة دلهم يسب بيهم شكد ما احاول ما ادعي بس شوفتهة هيج تقهرني رجعنة لبيت اهلي اخذت العلاجات منة راح ضايج كلش كوة يحجي
دخلت للبيت اليوم كلة گضيتة بجي خابرت رفا شوية
خففت عني ضليت يم اهلي فترة طويلة شهرين فوك
دلهم يجينة مثل الخطار ثنين گالبين الخلقة مونستنة بنيتنة صار عمرهة سبع أشهر طايرين بيهة و بحركاتهة و ضحكاتهة
قضية دلهم وية نعمان و صلاح مستمرة مخلين محامي قوي و عدهم هواي واسطات شلعو گلبة كل جلسة يطلعون عذر شكل
رجال من جهتهم رايد يشهد على شوفة حاتم من طالع من بيت صلاح لان هو نكر گالة شفتة بحسينية
قريبة بالمنطقة كذا واحد من جهتة شهد بهذة الشي
نوب الرجال فجأة تراجع و غير اقوالة ، صلاح يگلهم اجانة للمجلس كعدنة سوة و بعدهة راح احنة ضلينة نقيم العزاء بالموكب و نطبخ ماندري بي بعد
خبلوه كل نكرو كلشي من يسولفلي اموت من القهر
دلهم محتار شيسوي و كلشي اجة عليه مرة وحدة يشتغل ليل و نهار من جهة علاجات غمزة و علاجاتي
صار يخلص الدوة و اغلس ما اگلة
غفران شلعت گلبي كل شوية مشتكية من شي غلست تريد اشلركهة بالمصروف مال البيت ادفع ماي و غاز ، سكتتها بالحصة الزيت مالتنة
جنت اخبز كل شوية أصيح نرجس تشوفلي غمزة لا تبجي فتحت التنور طلعت الخبزة لسعت ايدي
جانت غفران كاعدة بالخوش مخلية بساط و تلگط خضرة حجت :شنو خبزج صغران تعودتي على الدلال
غنوة:على الاقل عشتلي شكم سنة مدللة
غفران: يمتة تخلصون بيتكم
غنوة:ماضل شي
غفران: دساعدي الزلمة شبيج من علوان بطل شغلة اخذت ذهبي كلة و بعتة
غنوة:همم اگول اخذتو فلوس حلقتي و طگيتيلج گلادة شبيج متوازية تدرين بعلوان مايرجع ذهبج
خزرتني دنگت تشمر بالكرفص شمر كملت الخبز رحت للمطبخ خليت سجى تصفطة غسلت كعدت بالغرفة خلصت شغلي بعد ما اگوم
بالليل اجانة دلهم گالي ابدل يطلعني شوية مشينة
على الشارع بين الزرع شايل غمزة يلاعب بيهة
حجة يدنگ الي :غناي ساكتة
غنوة:ماكو شي اريد انكد عليك گلبي ماينطيني
دلهم:نكدي حلالج
غنوة:بعد شگد
دلهم:ماضل شي قليل خلصت الكهرباء و الماي صبغتة دبرت طباخ صغير و كاونتر
غنوة:هاي هي نرجع
دلهم: ننام على الگاع بدة الصيف عدج طفلة تردين تسلگينهة بالحر
غنوة: خوش شوفلك بس مبردة
دلهم:تضل تدك براسي صوتهة شعلوة ارگعهة بالگاع انعل ابو اليشتريهة
باوعتلة بطرف عيني:اكلك انتة شو احلامك بعيدة تريد تشتري سبلت ابو المليون
دلهم: ابيع كليتي
غنوة:هو انتة بكليتين گوة عايش اكعد راحة
ضحك يحضن جتفي غيرلي جو رجعنة للبيت بيدنة نستلة و عصير ، اسبوعين و اكثر مل و تعب گالي يالله ندبرهة هناك
لميت كل ملابسي القديمة اليم اهلي ماخليت شي
طلعت راجعة لبيتي كل ما اشوفة انقهر من وراهم
خسرنة هواي
بالفترة الي رجعنة بيهة صفوان گالة يقدم على راتب
العاطلين باوعلة بغرور كبرياءة مايسمح من طكة الحر قدم هو الممنون
على الاقل يصير عدنة دخل ثابت ماوكف شغل بكل مكان يروح گوة لملمنة روحنة اكتفينة بالعدنة المهم سوة كلشي يتعوض
بيت خالتة هواي ساعدوه و المرة كل فترة تجينة انواع و اشكال بيدهة نص ملابس غمزة منهة تحبنة
على حبها لدلهم
مرات تحس الحياة تضيق بحيث تصير أضيق من ثقب الإبرة هذة الصار ويانة كل ما اگول هانت تطلع الاضرب منهة
هاي السنة حسيت بروحي تعبت كلش من بدايتهة لحد نصها اني مشتتة بالتفكير و الخوف بدل الواحد
على ثنين ماكدر اعيش بدونهم
دلهم تغير هواي كلش فرق بين السمة و الگاع عن الشخص لألتقيتة و العشت وياه البدايات نسة كلشي
حقدة و تسرعة من صار عدنة طفلة
صارت همة الشاغل گبلهة هو تغير جان طايش و مخبل نوب عقل لو ضال مخبل ولا هذة التعب هسة
غيرت هدومي رجعنة نتشلتح و لبست غمزة كعدنة بالاستقبال فاتحة الباب مخلية يمهة العابهة تلعب
صار وكت جية دلهم الساعة بالخمسة العصر نفتح الباب اجة يباوعلنة اشر بيدة وياه صفوان طلعني
بسرعة خلة غمزة بمكانهة سديت الباب اسمع صفوان يهلي بيهة
يحجي بصوت مسموع:هلة بجنتي هلة بحبيبتي
دلهم:اتفل علية اذا نطيتهة الك
صفوان:وابو فاضل الة اتفل عليك
ضحكت اسمع سوالفهم گمت اشوف العشة مسوية شوربة عضيت شفتي مادري بي يجي دلهم ما گال
فتحت الثلاجة شسوي الهم رحت دكيت الباب اجة
يباوعلي من فوك ليجوة سد الباب بأيد حضني بالثانية مانطاني مجال گبل دنك يباوس
احجي كوة كلمة كلمة :شسوي عشة .. الزلمة گاعد دلهم ياا .. شجاك يمعود
دلهم: أقرب شفتي يم خدك احلى بوسة تنطيني
ضحكت ابوسة بخدة حضنت رگبتة احجي مبتسمة:ماعدنة عشة
دلهم:هذة الجدر شنو سالفتة تصلخيني بي
رجعت اضحك اعدل بشعرة:هاي شوربة
دلهم:ومن ايدج شفايتلنة
غنوة:لا صدك والله اسوي تبسي لو عيب منة
دلهم:كلشي ياكل المـ..
صفوان:يمعودد تعال لبتك راح اسلك ابوهة
عافني راح للاستقبال شوية رجع طلعت متقيئة على شعرة عضيت شفتي بفشلة حلفت ما انطيه شوربة للعشة شكد عيب
جمعت شكو شامبو صابونة نطيتهن لدلهم طلع برة يغسل و هو يضحك عليه صحتة وديتة للمحل اشترة كبة جاهزة
جهزتلهم العشة كعدت بالمطبخ غمزة نامت يم ابوهة جابهة خليتهة بالغرفة تقربت يم الباب اسمع حجيهم عدي فضول علمود العرس
صفوان:طكلك غاط ازرگ
رد يقلد عليه :غاط غطو راسك بالشط لا اجي العرسك ولا اوصلة تفشلنة
صفوان:غير العب بيك لعب اذا مو انتة تسوق سيارة الزفة ماكو عرس
دلهم:انتة ما اجيت بعرسي ما اجي بعرسك
صفوان:وين وين ما اجيت
دلهم:بعرسي
صفوان:تضحك علية على روحك هو احنة شفنة منك لو ما هاي الفرخة ماصدك بيك متزوج
ضحكت بصوت ناصي بعدهم يتجادلون دلهم من كل عقلة ماروح غير اسوي فلك بي اروح لو شيصير
وراهة بأيام هدوء مسيطر علينة گاعدين عادي دلهم برة يدخن اباوعلة من الشباك طير نص الباكيت دكيت الجامة اشرلة كافي
شمر الباكيت اجة كعد بالهول رحت يمة مستغربة
لزم ادية متردد يريد يحجي و يسكت خوفني تقربت
منة اباوع لوجهة المتغير
غنوة:صاير شي
دلهم:ماريد تضوجين اول وتالي جان لازم يصير هيج
غنوة: شكو لاتخوفني
تنهد عصر ادية سوة حجة:استدعوني النيابة جعفر رجع فتح القضية
توسعت عيوني دموعي بسرعة هملت سحبت ادية
منة نسحنت من القهر گلبي نعصر عصر الحجي كلة طار من راسي
غنوة:تنسـ..جن
دلهم:اروح للمحكمة و نشوف شنو يصير
غنوة:لا فدوة احجي وياه گلة ماكدر حاول بلكي يتنازل
دلهم:اروح للتحقيق باجر
غنوة:اي شيصير ترجع مو ماتضل عدهم
دلهم:لا اضل و محامي وياي ورة جلسة المحكمة يصدر الحكم
غنوة:حباب گلي تشاقة دلهم حرام عليك والله
دلهم: يعني شبيدي گتلج من البداية ما دام اريد اسجنهم راح يحقرون وياي اول وتالي اني مسجون
غنوة: شكد تضل هواي
دلهم:بعد التحقيق و المحكمة يحاول المحامي يخفف و يدور اي ثغرة تقلل الحكم
ضميت راسي بين ادية ابجي تقرب اخذ ايدي يحجي بهمس:غناوي
دفعت ايدة گمت عايفتة رحت للغرفة افتر من القهر
تمددت بصف غمزة متغطية وياهة اريد انام ما افكر
اموت اذا ضليت كاعدة
احس روحي كلش متعلقة بي ماكدر اعوفة ولا لحظة
فكرة يغيب هواي عني تموتني الدنيا تضيگ علية
