رواية نقش بارد الفصل الثامن والعشرون بقلم فدك فاطمه
أروح لوين؟
كُلشي گبالي من لونك
أغمض وألتفت والگاك
كُل الدِنيا بعيونك .
.
.
غــــنوة
ضميت راسي بين ادية ابجي تقرب اخذ ايدي يحجي بهمس:غناوي
دفعت ايدة گمت عايفتة رحت للغرفة افتر من القهر
تمددت بصف غمزة متغطية وياهة اريد انام ما افكر
اموت اذا ضليت كاعدة
احس روحي كلش متعلقة بي ماكدر اعوفة ولا لحظة
فكرة يغيب هواي عني تموتني الدنيا تضيگ علية
حسيت بي من دخل للغرفة اباوعلة من جوة الغطة خلة المخدة على الفراش تمدد درت وجهي للحايط
كل ما اريد انام اتذكر باجر احتمال ورة التحقيق يروح للمحكمة گبل مايرجع هنا اذا حكمو عليه بعد
مايجي ولا اشوفة
رفعت راسي الصار طبل من التفكير اخذت غمزة تبجي گوة دنكت عليهة هاجت علية الشقيقة وجع طر راسي طر بس اعصابي تنشد يوجعني
ارتكيت على الحايط فكرة توديني فكرة تجيبني الساعة جانت بالتسعة اباوع للميل يتحرك واحسب الدقايق و غمزة مجلبة بية و اني كوة كاعدة متحملة
امسح دموعي يطيحن غيرهن كاتمة صوتي ما اريد ابجي و اضايقهة من ترضع كل شوية اوخرهة خاف تختنگ تبجي و ارجعهة
زهگتني عطت بيهة ادفعهة لمكانهة بجت بصوت عالي رفع راسة حجة بنتر:شبيييج وياهة
شمرت الغطة طلعت برة عايفتهة تصرخ طلعت بالحوش كعدت شاردة من صوتهم اريد التفكير يروح و راسي يهدئ
حسيت بي اجة هي بحضنة تناشغ حجة واكف بمسافة عني :تعاي سكتيهة
غنوة:وخر منا راسي يوجعني
دلهم:طفلة شنو تفتهم و تشمرينهة هيج تعاي الهة لاتخلينهة تبجي
تنهد گمت اسمعهة تناشغ اخذتهة ابجي لان صحت بوجهة حضنتهة دخلت للبيت افتر بالهول حتى تسكت عيني عليه كاعد يم الباب يباوعلنة
سكتت من البجي غفت نومتها بمكانهة ضليت مرتكية على حافة الجرباية صافنة بالغرفة مسحت وجهي متنهدة عيني على الباب
كفشت شعري من شفت الساعة صارت بالعشرة
و الوقت يركض ركض من كد ما ركزت بيهة احس حتى صار صوت للميل من يتحرك
مسحت دموعي گمت للحمام غسلت اباوع لعيوني مورمة و حمر ، رجعت للغرفة فتحت الباب خليت مخدة خاف تبجي ما ادري بيهة اسمع صوت من الاستقبال
وكفت قريب من الباب اتصنت الة اهز برجلي اخذت نفس متضايقة حتى من أتنفس مختنگة ثگل فوك گلبي كاتم علية
دخلت للاستقبال حس بية فتح عيونة كعدت بصفة
اباوعلة مقهورة مد ايدة يمسح دموعي من خدي
دلهم:كافي شجاج تورطت گتلج استدعوني نصبتي مناحة
غنوة:اذا نسجنت
دلهم: خل انسجن و افتك من هذة الحمل السنين تمشي بسرعة تخلص
غنوة:شنو سنيين دلهم لاتخبلني واگعد سنة انتظرك
دلهم:جا يروح نصج
غنوة:سنة اتخبل والله
دلهم:لا تتخبلين لا يصير بيج شي گولي يالله سهليهة تسهل
رديت مقهورة:هسة سهلة عليك من تعوفنة
دلهم: اصعب من الموت
غنوة: جا لا تلومني الفرق انتة ساكت واني ابجي نفس القهر و الحرگة
دلهم: هدي روحج الله اعلم شيصير باجر شنو حكم المحكمة
غنوة:ولا مرة وگفت ويانة توگف هسة
رد ياخذ ايدي :وگفت ليش ما وگفت لا تتشائمين
و تنكرين النعمة العدنة كافي غمزة بخير و انتي
رجعنة لبيتنة عدج سگف يحميج هاي كلش كافي
غنوة: الحمدلله اني ما ناكرتهن بس ماريدك تروح
دلهم: ارجع يروحي المهم تديرين بالج على روحج
و على غمزة و كلشي يسهل كافي بجي
زفرت بضيق اضم وجهي بين ادية حسيت بي گام
نزيت من شالني لزمت ايدة متفاجئة نهض شايلني
دلهم: تعاي اكلي و شربي علاجج عايني من الله خير
غنوة: ما اشتهي نفسيتي مسدودة
دلهم: تاكلين معليج
دخل للمطبخ گعدني على الكاونتر هو مطكطك لزمت ايدة خايفة:نزلني يمعود لاينكسر
حجة ينزلني:عبالي مثل الاجانب
حضن جتفي فتح الثلاجة طلع بتيتة وخر ايدة يدور على السجينة ضليت واكفة يمة حاضنة خصرة مرتكية عليه هو يگشر بيهة
غنوة: يمتة تروح
دلهم:بثمانية
غنوة:اذا انتة رايح للمحكمة قضية حاتم تسدونهة
دلهم:لا مالهة علاقة المحامي موجود يمشي بالقضية
غنوة:جا ليش خلو جعفر يرجع اذا ما يستفادون
رد يفتح الخانة : خابرني صلاح ساومني اسحب الدعوة و يقنع جعفر يوقع تنازل نهائي
غنوة:و من جهة نعمان يحرگ بيتنة حتى يخوفك شبيهم ذولة مايستحون ماكو قانون يردهم
دلهم: ماكو لعدة فلوس كلشي توقعي يسوولة هسة اني لو عدي فلوس و واسطات اطلع من القضيتين ربحان لو عدي من زمان خليت جعفر يتنازل
تنهدت بضوجة مشيت للغرفة اخذتلي نظرة عليهة خاف گاعدة لگيتهة تلعب دخلت شلتهة ابوسة الاعبها ضليت يمهة لحد ما اجة بيدة ماعون و خبزة
اخذهة يلاعبهة تمدد منومهة على صدرة يدلك بظهرها سنحت تضحك وحدها مغمضة عيونهة
غنوة: راح تشتاق لتدليكك
أبتسم يبوسهة براسهة عدل نومتة خلاة راسهة فوك ايدة ، اكلت شوية گمت شلتهن للمطبخ شربت علاج
رجعت يمة كعدت بصفة شفتهة غافية اجيت اخذهة حجة بهمس:عوفيها
لميت رجلية ساندة راسي عليهن اشوفة كل شوية يحضنهة قريب عليه لو يشمهة عيونة حمر گوة فاتحهن واضح عليه منعس
غنوة:نطيني اياهة ترتاح بمكانهة و انتة نام
دلهم: وديهة و تعاي
شلتهة على كيفي خاف تفز نومتهة بمكانهة رجعت يمة حضني رفعت ايدي لشعرة امشيهة بين الخصل
حسيت بلمساتة على خصري يحضن ظهري يقربني
عليه رفع راسة يبوسني غمضت عيوني يحرگني من البجي و دموعي گبل طاحن
گلبي يدك هالمرة مقهورة و مختنگة ابتعد عني رجع يمسح دموعي فتحت عيوني صارت بعيونة وخر شعري عن وجهي يعدل بي
دلهم: اسمعي مني لاتبجين بروح ابوج لاتنصبين مناحة
رديت ابجي: شكو بعد
دلهم:ولج كافي عيونج نمردن من عشيات على نفس الرنة
حجيت امسح دموعي:ما ابجي يالله گول شعدك
حجة متردد:سامحيني
غنوة:عليمن
دلهم:على الصار گبل من عفتج
غنوة:انتة تريد تموتني اليوم شجاك دلهم شنو اسامحك وين رايح انتة لاتخبلني
دلهم:اجت ابالي گلت اسألج
غنوة:مسامحتك بس اسكت لاتحجي هيج تخوفني
لو اكو شي بعد ضامة علية
دلهم:ماكو شي بعد الصار و الراح يصير حجيتهن
غنوة:تدري بية اعرفك اذا تجذب
دلهم: نجبي ما مجذب
رفعت ايدي اتلمس خدة حضنهة بجفة يقربهة لشفتة يبوسهة تقرب مني مرة يبوسني مرة يشمني
ماعرف شلون غفيت فزيت على صوت من برة گمت على حيلي ناسية روحي رجعت بسرعة لگفت القميص من الگاع لبستة طلعت اسد بالدگم
كل ابالي مشة مادري شلون غفيت باوعت بالاستقبال ما لگيتة فتحت الشباك ردت روحي تنهدت جان كاعد برة يدخن الجو بعدة ظلمة
طفة الجكارة فتح الباكيت شمرة من ما لگة بيه اباوع
بصفة الگاع متروسة شكد شارب صارلة شكد هنا
توة راد يدخل دك جهازة تأفف اسمع صوتة قرب دخل من باب المطبخ اني بالاستقبال كعدت اتسمع
لصوت الموبايل مخلي بصفة مدد بالمطبخ اتصل مرتين و فصل بالثالثة يالله رد عليه جان صلاح
حجة اول ما فتح خط :ها فكرت عدل
دلهم: ما اتنازل لا تضل تلح
صلاح:ماضل وكت الصبح بعد التحقيق يحولونك للتوقيف فكر زين ليش تخلي الفرصة تروح من ايدك
دلهم: لف راسك و نام قضيتي اني احلهة فكر بروحك معليك بية شلون ما تصفى خل تصفى
صلاح:عدك طفلة عائلتك منو الهة ، تعال الصبح علية نروح سوة حتى لو جعفر رفض اني مستعد ادفع كفالتك شكد ما صارت
دلهم:ماريد كفالة و لا تنازل اتحاكم و اخلص منها لاتحاول وياي گتلك القضية بيد المحامي ما اتنازل عنها
صلاح:لمصلحتك نعمان مايسكت انتة بدربك طالع للمحكمة محامي الخصم قوي راح يوگعونك شلون ما جان تدخل السجن وانتة مو غشيم عنة تعرف ليصير هناك مايحتاج اگلك
دلهم:هسة تردون تموتوني بالسجن مو نسدت الدروب كدامكم تخوفني بالموت
صلاح:تدري بية ما عندي اي نية اقتلك اني مو نعمان كل الاريدة تتنازل و ترجع ويانة
دلهم:ارجع وياك حتى تدوسون راسي انتة و اخوانك
تريد اصير عبد جوة ايدك تتشفة بية لا أنتة ولا عشرة مثلك يذلوني
صلاح:بعد گدامك وكت اني موجود يمتة ما رجع عقلك لراسك خابـ..
سداه بوجهة نزيت على صوت الموبايل هو ينرگع بالكاونتر اسمع صوتة يسب و يشتم بيهم ،أستغفر
شفتة مر من الباب رايح للغرفة
اني حجاية صلاح ترن براسي يكتلونة بالسجن بس اتخيل هيج جسمي كلة يبرد من الخوف و گلبي يوجعني تعبت من التفكير
دلهم:غناوي
رفعت راسي الة اباوعلة بعتب علمود هيج گالي سامحيني مخلي الفكرة براسة يخاف يكتلونة هناك بعد ما يكدر يشوفني و يگلي
تنهد اجة گعد بصفي حضن وجهي حجة:عليتي گلبي وحق الله كافي يمعودة
حضنتة ساكتة بس دموعي تصب شبيدي غير البجي
رجع ضهرة على الحايط گاعدة بين رجليه راسي على صدرة حاضنتة بكل قوتي
دلهم:شش كافي ، بالسجن برة وين ما جنت اذا رب العالمين كاتبلي الموت راح يجيني بطلي وهواس وتفكير
ردت اگلة يتنازل بس ما هان علية يضل طول عمرة متحسر على حك اخوه و تعب منهم و من التفكير
حجة يعدل قميصة علية : مطلعة اروح بي گبل جطيتي و لبستي
غنوة: فزيت عبالي طالع مادري بيك گمت مستعجلة بعدين هو ما مغسول
دلهم: نجبي غسلتة
غنوة: ماتروح بي معرس لابسلك قميص ابيض
دلهم: اريد اكشخ
هزيت ايدي على تفكيرة لزمهة يعض بالرسخ يم الشرايين حجة متذكر: ماخليتني ادك اسمي عليج
غنوة:استغفر الله احنة بيا حال
دلهم:هنا يطلع فد شي
غنوة: عود اطلع بخير و سلامة حتى لو تدكة بعيني هم ما اگول أخ
دلهم:أخ منج شكد حابج
غنوة: اسكت دلهم اسكت اريد اخنگك من القهر
ضل مبتسم يباوعلي يمشي اصبعة على خدي و جوة عيوني ، دخل اصابعة بشعري يرفع الخصل فوك يطيحهن على وجهي وخرتهن بضوجة
دلهم:ألــف هنيــالي اللــيلــة يـــمك
أنـــا أحبك ، وأحب كـل حرف بأسمـك
أنــي أحس يجــرن سوة ،دمي وية دمك
تقربت مخلية شفتي فوك شفتة غمض عيونة منتظر ابوسة بلعت ريگي حضنت خدة مغمضة ابوس بي على كيف و برجفة
حضن خصري ايدة تصعد لظهري بعدين حسيت بجفة فوك شعري لامة بيدة قربني لصدرة يفتح بالقميص لحظات عشتهة بين اديه گلبي يحترك من الخوف احسة يودعني
سمعنة صوت غمزة تبجي ابتعد گام يجيبهة دولبناهة كل شوية بمكان مطلعينهة عيني على الباب رجع يلاعب بيهة و يضحكهة
حجة يشم رگبتهة: بابا هذا نوم هذا كل شوية گاعدة
بس يدغدغهة لو يلاعبها تصحصح گامت تناغي توهة تگول "أبا" تتورط من تحجيهة يخنگهة خنك
خلاهة بينة على ايدي
غنوة: تروح وحدك لو صفوان يجيك
دلهم:هناك نتلاگة
غنوة:طمني كل ما اتصل ردو علية خليلي رقم صفوان حباب
حجة عصر خدي:تردين رقم صاحبي
رديت ابعد ايدة:دلهم ما اتشاقة اريد اطمن عليك
دلهم:خابري صاحبتج هي تحاجيه
غنوة:اهووو
دلهم: بيج غلطة بس ماتهونين
غنوة:لو تعرف شأريد اسويلك
تقرب رد بخبث:شسوين
رفعت راسي لگطتة بعضة على جتفة محترگ گلبي
گوة جراني عنة مسحت حلگي اشوف سنوني مطبعة دائرة و صارت زرگة بسرعة
دلهم:نجلبتي بعد روحي
غنوة:تستاهل وخر عني خل اگوم راح يأذن
تمدد بمكاني حجة : سوت كل المنكرات توهة يالله تذكرت الصلاة
باوعتلة فاكة حلگي احتاريت بيش اطگة ضحك يشيل بنتة يخليهة گبالة حتى ما ينطگ مسويهة درع
غنوة:انتتة ابو انتة
دلهم: غصباً ما عليج ام شعفة الحمرة
غنوة: منگرش جسم و اخلاق
ضحك يعثرني سحگت على رجلة حرگهة عطت لازمة الحايط عيوني عليه مصدومة اجيت اطيح
غنوة:صدك تحجي
دلهم: جا شبيج ترافسين ماجذب الگال اليشبع يرفس النعمة شبعـ..
سديت حلگة رفعت ايدي اريد ادغة ببطنة نزل رجل غمزة خلاهة بينة حتى ما اطگة مالحگت ارفع ايدي عض اصبعي سحبتة متوجعة
غنوة:مهموش
دلهم:اسلوبج بطلي
دفعت جتفة بضوجة:شبيه اسلوبي
رد يباوعةلفتحتة القميص:شبي يخبل
خليت المخدة على وجهة سحبهة يضحك مخلي ايدة الثانية على غمزة حاضنهة هي تسبل عليه مكيف يبوس بيهة
طلعت اخذت هدوم فتت للحمام مبتسمة على عركنة من تذكرت راح يروح خفت ابتسامتي طول ما اني أسبح ابجي گلبي محترك
طلعت اسمعهة تبجي شيطان مو بنية يمتة ما أذن بجت علية ، نشفت شعري لفيتة اخذتهة منة فات عايفنة بالهول گاعدين
حجة من الحمام اسمع صوتة: روحي للغرفة لاتتمرضين و تعدينهة
كيفت عبالي خايف علية گمت رفست باب الحمام طلع صوت قوي صاح من جوة عفتة رحت لمكاني
طول ما اني ارضعهة هو اجة يلم بغراضة اباوعلة مصفنة طلعلة جنطة دوم ياخذ بيهة غراض الوشم
تفاجئت بي محضر هدوم الة بيهة يگلي مو اكيد انسجن الجذاب
اباوعلة بالجامة مرتب روحة و محلق لحيتة يمشط بشعرة كل شوية گالبة على جهة فتح الجرار طلع عطر يريد يخلي
غنوة:غمزة تحسس لاترش هنا
رجعة متذكر مسح اديه خاف ضال بيهن اجة يمي
تنهد يمسح عيوني يحضن راسي لصدرة بوسني فوك حاجبي ضل هيج ثواني
غنوة: اريد اصلي خليهة يمك
خلاهة بحضنة گمت توضيت صليت بالهول طولت دعيت من كل گلبي اذا مكتوبلة ينسجن دعيت كون يضل بسلامة هناك و يرجعلنة
گمت لميت المصلاية كعدت يمهم ساعتين گضاهن بس حاضنهة كل شوية يوصيني عليهة ،يخليهة على المخدة يدغدغ بطنهة بلحيتة بس حتى يسمع صوتها لم اديهة بين اديه يشمهن
دنك يبوس رجليهة و يحسب شكم بوسة بطنهة
واديهة و خدودها لحد راسهة يلمهة بين اديه يشيلهة لصدرة
دلهم: بابا شگدج بس واحد وعشرين بوسة طالعة قزمة على ذيج المرة
غنوة: اسكت دلهم راح اعضك
دلهم: هاي انتي هنا
غنوة:اي هنا على ساس ماتدري بية
التفت الي مبتسم رفع ايدة دخلت بحضنة بوسني براسي و غمزة تخرمش بينة اجت تزرف عيني لو ما لازمهة كعدهة على رجلة
دلهم: اذا وقفوني بالليل تجيج خالتي
غنوة:اروح وياهة؟
دلهم: تردين ترحين هناك
هزيت راسي برفض استحي منهم عدهم هواي ولد
مسح على شعري حجة:هي تجي خابرتهة گالت اضل يمهة
هزيت راسي بفهم اعصر بأدية كل ما يوصيني على شغلة گضاهة يوصي يأكد الة يسمع جواب مني يالله يعوفني لحد ما صارت بالسبعة
گمت سويتلة ريوك گوة علية واكفة رجلية بايدة وگلبي مقبوض ، صبيت الجاي رحت يمة اخذة
مارضى ياكل شي وياه
شربة كلة مرة وحدة خلة الكوب بصفة رجع شايل
غمزة ارتكيت على الباب اباوعلة بغصة كل شوية يگوم و يرجعلهة
نوب گوة عليه خلاهة بمكانهة دار وجهة مايخلي عيونة بعيوني مسح عليهن شال الجنطة طلعت برة احرك برجلي بنفاذ صبر
حضنتة اول ما طلع شدد لزمتة علية شايلني من الگاع حجة يسمح علة راسي:كافي حبيبتي غناي لاتصعبينهة علية تخلص وداعتج
غنوة: راح اشتاق لك احبك
دلهم:لا گد شوگي ولا حبي حبيب روحي و گلبي
غنوة:دير بالك على روحك لخاطرنة
دلهم: ارتاحي لاتفكرين
بوستة بخدة رجعت احاوط رگبتة شكد ما احضنة احس كلش قليل و گلبي يوجعني من فكرة فراگة
غنوة:اوصلك للشارع حباب
رد يمسح دموعي:لا حبيبتي وين ترحين
غنوة: بس هنا شوية
تنهد يهز راسة برفض رجع حضني وصاني علينة باس راسي فتح الباب امسح عيوني يرجعن ينترسن دموع
گوة طلع ركضت للمطبخ ترست الدولكة ماي ايدي ترجف عفتة الماي يجري رجعت بسرعة رشيتهة وراه جان مبتعد
ارتكيت على الباب اعاينلة موبايلة بيدة توة خلاه على أذنة التفت وراه عينة على الباب أبتسم و دار وجهة كمل طريقة
لحد ما ختفى صرت ما اشوفة دخلت طبگت الباب احس البيت خنگة صار و فارغ مشيت سديت الماي
شلت الراس مال القنينة تأكدت من كلشي
مشيت للغرفة لا بية انام ولا بية اگعد راسي نسطر من التفكير الموبايل يمي كل شوية مطلعة رقمة اتذكر طريق لبغداد يتأخر
اگوم افتر و ارجع للغرفة محتارة شسوي اعصر بأدية
رحت للمطبخ اشوف الهوسة ماكدر اشيل اي شي نفسيتي كلش بالحضيض
لحد آذان الظهر صليت بنص الصلاة اسمع الموبايل يرن عصرت عيوني ماريد اغفل عنها كملت صلاة كعدت ادعيلة من سمعت الموبايل مرة ثانية
گمت طلع هو يتصل علية رديت بلهفة:ها دلهم راح ترجع
من السماعة سمعت تنهيدتة رد :لا حبيبتي راح بوقفوني ليوم المحكمة هسة راح ادخل موبايلي يطفى
سكتت كعدت بمكاني اريد أنطق كلمة ماكدر الغصة
تحجرت بلعومي من شاف ماكو رد مني و اسمع اصوت يمة و خبصة سداه بدون مايرد
شمرت الموبايل مشتعلة من القهر ابجي بصوت عالي البيت فارغ بس صوت بجينة اني و غمزة بيه
.
.
رفـــا
خليت موبايلي على الشحن بالادارة طلعت صاعدة ورة المديرة و ثنين وياي من المدرسات اليوم كلة صنتة من ردنة نطلع اجت المديرة تريد تسوي تفتيش لو ما عيب اخ منك لساني
رفا:تفتيش وللسادس صدك جذب هنة اكل ما يلحگن ياكلن
ردت المدرسة لبصفي: احسن حتى كلشي ماتلگين ونطلع
دخلنة للشعبة يگول فلم رعب مو طالبات حجت المديرة عليهن الصف هوسة الكتب مطشرة ناس تقرة ناس لازمة الدفاتر تكتب
وكفت يم الرحلة ياجنطة اسحبهة فارغة و الكتب بالرحلة فتشتهن كلهن بس وحدة عدهة صابونة سويت روحي ماشفتهة
طلعت من الصف مشتنة على الصفوف كلهن بزعتني نوب بنات الرابع كلشي تلگة عدهن حتى قطع مال قماش جدورة يجيبن دولمة
وكفت رزلت لمن ملت و البنية ضامة وجهة بالجنطة من الفشلة اخذتهن طلعت مشيت نازلة خلص الدوام هي مخلية الصفوف تفتش بيهن رجعت للادارة اخذت غراضي طلعت
لگيت الافندي منتظر طابك سيارتة يم الباب انتبه علية من طلعت فتح الجامة حجة:ست تكسي
رفا: شكد الكروة
صفوان:كروتنة بوسة
خزرتة اتلفت بالشارع يريد يطير هيبتي صوتة شعلوة صعدت خليت الجنطة ورة التفت الة رغم شقاه بس شكلة ضايج
رفا:شلونك
حجة يحرك السيارة: مو زين
رفا: الله يستر شصار على دلهم
صفوان:وقفوه بعد اربع أيام المحكمة
رفا: استغفر الله اتصلت على غنوة ماترد وانتة همين شكد اتصلت عليك
صفوان:جنت وياه اخذو موبايلي من طلعت شفتة
رفا: شنو راح تسوون
صفوان:مايرضى يدفع كفالة و هذة الكلب جعفر مخلي ايدة بأيد نعمان
رفا:دير بالك تروح تسويلة شي و تورط الزلمة
صفوان:لو اكدر سويت بس موقفنة زين مو حرج دلهم معترف هذة ينحسبلة و المحامي يكدر يستفاد من كذا نقطة بالقضية
رفا:انتة گلت هو مامتعمد يقتلة
صفوان: مامتعمد بس متعاركين هو ضاربة ذاك رادهة الة بدون مايحس دافعة عنة همة گاعدين بهيكل الگاع مو متساوية طايحلة على حافة حجارة
رفا:يعني مو بقصدة
صفوان:امم سكرانين مرات مايحسبون السكر عذر
و بوقتها هم جان عدهم حبوب و محامي الخصم يحاول يستغل هاي النقاط
تنهدت بضوجة على حالهم الله يساعد غنوة ويصبرهة ، وصلنة للبيت نزلت هو غطى السيارة اجة وراي جانت ماما توهة مخلية الغدة تنتظر الولد
حجة صفاء من شافة:مو كافي تغث بينة
صفوان: روح تزوج
عفتهم گبل لا يتعاركون علية رحت بدلت غسلت وجهي طلعت الم بشعري صفوان هنا ماكدر اطلع مبهذلة لو علية اكعد اتغدة بدون تبديل
ساعدت ماما كعدت بصفهة اصبلهم تغدينة سوة بعدها كلمن راح لمكان و صفوان نام بالاستقبال
كعدت بالغرفة اتصل على غنوة يدك ماتشيلة خفت
عليهة ماعندي غير رقم الهة اتصلت شكد فوك العشر مرات هم ماكو رد
مشيت للاستقبال دغيت جتفة اگعدة تگلب نام على ايدي عصرهة عصر شاطت روحي اريدة يندفع ماكو
شثگلة يگول ثور
رفا: خرب ولك ايدي صفوان يمعود
نام عليهة عمدة طگيتة فتح عيونة وخر سحبتهة افرك المعصم صارت حمرة مسح وجهة گلب صار گبالي ايدة جوة خدة
صفوان:شعدج زرفتي متني
رفا:يمة شوف الخباثة جنت كاعد واني اصيح ماتوخر
صفوان: نجبي لاتغلطين
رفا:اوو لاتنسيني جاي اتصل على غنوة ماترد صار هواي خاف بيهة شي ماتخابر اخوهة مو عدك رقمة
صفوان:يجوز نايمين
رفا:اتصلت اگلك هواي لو نايمة كعدت لا نوب صاير بيهة شي خاف ضالة لوحدهة
طلع موبايلة اتصل على اخوها گالة هسة نودي البت عليهة يابت مادري كعدت منتظرة خبر منهم گمت اسمع موبايلي يدك
صفوان:خابري وتعاي
رد عليه أحمد من الصالة:شعدهة جايتتك
صفوان:اعلمهة على الوضوء
دخلت للغرفة اضحك اخذت الموبايل حجيت اول فتحت:وينج يمعودة اتصل و ماكو
ردت بصوت مبحوح:جنت نايمة مادري صاير شي رفا:لا بس اتطمن عليج اشوفج وين
غنوة: نايمة
رفا:شبي صوتج هيج
غنوة:هسة گعدت لگيت بلاعيمي مطبگة
رفا:ديري بالج على بنتج لاتنعدي
غنوة:اي ، اكلج صفوان يمكم
رفا:اي هنا
غنوة:سألي على دلهم وين هسة هو عدة اكل لو هو ياخذلة اذا يصير حبابة سويلة
رفا:تدللين من عيني هسة اگلة
غنوة: مشكورة
رفا:بالخدمة ، اني الجمعة اجيج اذا وافقو ابات يمج
غنوة:هلة بيج بالليل تجيني خالتي مادري اذا تبات لو ترجع
رفا:اذا ما تبات روحي لبيت اهلج لاتضلين وحدج ديري بالج مو تگضينهة بجي توكلي على الله
غنوة:ان شاء الله
تنهدت گوة عليهة تحجي حاولت اخفف عنها سديت الموبايل خليتة على الشحن مديت راسي من الباب أحمد نايم بالصالة داير وجهة للحايط يمتة نزل مساع من رحت هو ماكو
طلعت امشي على كيف بس رفع راسة دخلت للمطبخ حجة بصوت مسموع:شعددج
رفا:اسوي اريد اعجن
سكت خلاني اردم بالحياطين شفت الخبز عدنة هواي عفتة رفعت راسي اريد امشي للاستقبال طفرت اشوفة واگفلي بباب المطبخ
أحمد:عجنتي
رفا:ها .. لا هسة هاي طلعتهة راح انخل طحين
طلعت المعجانة هو فوك مني من كل عقلي اطلع بالطحين عفتهن التفت الة:بطلت عدنة هواي خبز
رجعت لنخلتة مشيت غسلتهة ضميتهة بالكاونتر امشي هو مقلص عيونة يباوعلي لحد ما طلعت توني خليت رجلي بالاستقبال سحلني من ياخة التيشيرت
أحمد:ذيج غرفتج
رفا: ياا ذيج
رفع ايدة يريد يكفخني دنگت اضحك عافاني طلع برة مشيت للاسقبال سديت الباب قفلتة گعدت بصفة رفع ايدة عن عيونة
رفا:صفصف
خلة ايدة جوة خدة رد: ياعيون صفصف
رفا:نتعشة برة
صفوان:نبات برة ميخالف
ضحكت ادفع جتفة سحبني قرب عليه بوستة بخدة
تذكرت شنو وصتني رفعت روحي الزمة گبل لا يبوس
رفا:خل اگلك اوكف هم تودي غدة لصديقك عشة
صفوان: لا اوديه ياكلونة همة ماينطونة الة
رفا:اووف ميخالف اخذلة
هز راسة بس يريد يسكتني خلة ايدة ورة راسي يقربني عليه يبوسني غمضت عيوني ضليت مفهية
نزل يبوس رگبتي احس بخشونة لحيتة علية
توسعت عيوني من صار سرسري فردنوب دفعت ايدة حجيت انزل تشيرتي:صفووان
رد يحضني قريب عليه: عينة و نظرها
رفا:اگعد راحة
صفوان:مو اني هاي ايدي
رفا:سولفهن على غيري
صفوان:اريد كروتي رفرف شو غلستي
رفا:مو توك بستني
صفوان:اني بوستج اكو فرق يالله راويني مهاراتج
رديت اضحك و ادفع بي:ماعندي مهارات
حجة بحسرة:ماعندج حرامات تعاي اعلمج
رفا:انتتتة منين تطفى
ابتسم حضني عدل نومتة يخليني على أيدة بوسني براسي ضليت ساكتة العب بطروف اصابعي الاستقبال بارد و ظلمة طكيتهة نومة بدون ما احس
فتحت عيوني محشوگة على القنفة هو بصفي خنست اسمع صوت امي كاعدة يمنة مخلية موبايلهة على الشحن مكنكة صفنت اريد استوعب
جسمي نمل من الفشلة صفوان بصفي نايم لو اكفي
جان دخلت جوة القنفة امي عافت البيت كلة اجت هنا شلون دخلت غير قفلت الباب
غمضت عيوني سويت روحي نايمة ضليت هيج اسمعهة تگعد بينة تريد نگوم نصلي حتى تصب عشة مكنكة و تصيح بصوت عالي
اختنگت من التمثيل رفعت الغطة گمت بدون ما اباوع وراي غسلت رحت للمطبخ شربت ماي مرتكية على الكاونتر هبطتني توني فاتحة عيني
مشيت يمهة احجي بدون اهتمام :جا الولد وين
خاتون:معزومين يم صاحبهم گعدي رجلج صبي العشة
رفا:گعدي انتي
رحت للمطبخ اشوف العشة سفري شعجب امي طالبة منها من الشيطان ، حضرت المواعين خليت الكباب بصينية الفرن حتى احتمي
و الباقي تعاجزت بيهن حرورة شوية مديت السفرة بالصالة ، عيني على الباب شفتة گعد اجت امي تشد
بربطتها على راسهة
طفرت بعيد عنها لزمتني حجت تكفخ بية:ماتستحين ماتگولين اخوتي هنا ادبسزز
رفا:نعست شسوي بعدين مو قافلة الباب شلون دخلتي
خاتون:و الباب الثاني المفتوح صفاء طب شافج گوة سكتة
رفا:عزة بعيني والله شافني
ردت تگرص بية:اي شافج عرسو فكونة منكم
هزيت راسي لزمت جتفي اريد تگطع گرصتهة ما عافتني شفت صفوان اجة طلعت من جوة ايدهة لبدت وراه حضن جتفي
صفوان:الة مرتي طگوني لا تطگونهة
خاتون:اخذهة و فكني منها
رفا:ماماا
خاتون:گومي جيبي العشة
باوعتلهة معبسة گمت جبتهن صفوان جان كاعد على بالگاع انتقل للقنفة كل ما ماما تدنگ يوديلي بوسة أشرلة يگعد بمكانة مايرضى
شلت الخبز وصلت للسفرة انتبهت عليه مركز علية
دنگت خليتة غمزلي يأشر بحواجبة طگتة ماما على رجلة التفت الهة يضحك
عدلت تشيرتي اخزر بي شكد مستهتر كعدت بعيد عنة صبيتلهم حجيت بضوجة:مو گتلك نتعشة برة
صفوان:غير هذة العشة جبتة الج
رفا:ياا اگول شعجب سفري مو من عادات امي
حجة بدون مقدمات:الاسبوع الجاي العرس
غصيت اباوعلة مصدومة التفت لأمي كمل:ها خالة شگلتي
خاتون: هاي هي يمة لشوفة
رفا:شنوو غير انييي العروس صدك تحجون
صفوان:الله حي العروس
رفا: ترة ماحب الشقة هيج
صفوان:ياهو المتشاقي وياج الخميس الجاي لاتبديل و لاتعديل
رفا: والله مالحگ اجيك بكفشتي ترضة اجيك مبهذلة
صفوان: بكلشي ارضى
خزرتة رشگ علية الماي التفتت اريد اطگة بشي تكافشنة واحد يطك بالثاني رزلتنة امي, دفعتة لوة ايدي همزين ما كسرهة حصلنة رزالة قوية سكتنة
ماتحملت رجعت الح و اتوسل يأجل العرس رفض حجة بجدية:لو ميتة هم نعرس
رفا:شجاك مالحك
صفوان:لاتلبخين جهرتج
رفا:اي تريدني اطلع جلحة حتى يتشمتون بية لو تموت صفوان اذا مو عرس يشفي الگلب ما ارضى
اشرلي بدون اهتمام گام يغسل اخذ اغراضة طلعت وراه اجر بيدة:اسبوعين
صفوان:لا صبرت هواي
رفا:حبااب صفوان أسبوعين ماريد اسويهة ركض
تنهد بضوجة تقربت منة العب بالسويج بأيدة بوستة بفكة اتلوگ رفع راسة خلاني ابوسة برگبتة و بخدة
رفا:ها شگلت
صفوان:اليوم شنو
رفا:اربعاء
صفوان:الاربعاء الجاية انتي بحضني
خزرتة بضوجة تقرب يرجعني يم الحايط حجة يگرص فكي:هاي ملاعيبج مو علية شابع منهن
رفا: اذا ما العب بيك لعب اصبرلي
صفوان:حلالك رفرف
حجيت مثلة اقلد صوتة عصر خدودي رفع راسي يعض شفتي خلاني انگز من الوجع دفعتة بضوجة
طلع يضحك علية هاي مرتين يخليني اتلوگ و ابوس
ما يسوي الاريدة رجعت شلت المواعين نظفت من سمعت صوت صفاء اجة طفرت لغرفتي متفشلة
الخميس داومت طلعت نص دوام لطشت لأمي اروح لغنوة گوة وافقت رحنة اني وياهة اجرنة سيارة بنص الطريق خابرني صفوان يرعد شنو ما گايلتلة
اريد اقنعة نسيت مايقتنع اخذ الطريق كلة يرزل خرب مزاجي ضوجني وصلنة قريب عليهم نزلنة انتظرت امي تتحاسب وية ابو السيارة
اتفقنة على الكروة هسة اختلف علينة و امي لو تنطبگ السمة على الگاع محد يمشي كلمتة عليهة
نطتة كروتة و الباقي گالتلة هذة صدقة مني غثتة
رفا:شسالفة ماما نمونة الخمسطعش
خاتون:كلشي بعد الاتفاق حرام هو شافنة وحدنة عبالة يمشيهة علينة مناك اتفقت وياه لا زايد ولا ناقص
سكتت تمشينة لبيتهم دگيت الباب اكثر من مرة سمعت صوت مألوف فتحت الباب تفاجئت بـ وتين
سلمنة عليهة دخلت امي اني وراهة اباوعلهة بطرف عيني هي تضحك، كل ماتذكر شلون نصبن علية حتى اغار على صفوان ابدي اخنگهة
رفا:شسويت هنا
وتين:جاية لأختي انتي شعدج
رفا:لصاحبتي الروح بالروح
ضحكت تفتحلي باب المطبخ خليت العلاليك بالگاع دخلت سلمت على امها ، التفتت شلت غمزة الصاكة
حضنتهة ابوسهة اموت عليهة
رفا:مشتاقتلج بت الحلوة شصايرة دنفوشة
وتين: حركة ولا تسكت تدردم
بوستهة التفت الهة:وين غنوة
وتين:بالحمام تبدل تقيئت عليهة هاي الفصمة
كعدت مخليتهة بحضني اباوع لوتين بطرف عيني:يمتة اجيتي مغبشة على المرة
وتين:من امس اني هنا بايتة وية امي
رفا:كش اني اليوم ابات بس كون امي تقتنع
وتين:هلة بيج تشرفينة
التفتت للباب طلعت غنوة من الحمام تنشف بأديهة
متفاجئة بينة سلمت على امي التفت الي نقهرت على حالهة وجهة اصفر و عيونهة مورمة الجفن صاعد على العين ، گمت حتى ماتدنگ سلمت عليه
حجة مستغربة:شعجب اجيتي اليوم مو عدج دوام
رفا:من المدرسة و اجيت حتى ابات يمج باجر اروح
غنوة:هلة بيج فرحت بشوفتج
رفا: حبيبتي شعدنة غيرج
وتين:احجي وياهة عفية طاح لسانة اني و امي ماتسمع لا تاكل ولا تشرب كل شوية دايخة
رفا:تعلميني بيهة ام دميعة بالله هسة تبجين عليه بيهة مجال بطنج شعليهة بنتج هاي ترضع فكري
شوية خطية عليج
غنوة:اسكتن عني مالي خلق ولا اشتهي شي
رفا:شلون تموتين روحج شبيج استهدي بالله لو رجلج عسكري شسوين تموتين
مسحت وجهة ضايجة رفعت غمزة الاعبها صوتها عالي الوكحة تدردم كل شوية گالت" أبا"تخلي غنوة تحوس من القهر
سوينة أكل الهة جبرناهة تاكل كملت لازمة العلاج بيدي الهة شربت فرشتلهة بالغرفة خليتهة تنام احنة لزمنة بتهة حتى ما تضوجهة
امي خابرهة صفوان گالهة وصلت طلعلي نروح هي ملتهية بالسوالف وية خالة ساهرة شلت غمزة طلعت برة انتظرة دك الباب فتحتة الة
دخل بس شافهة بيدي شالهة حجة:هلة عمو هلة بجنتي الحلوة شلون وجه حلو يفتح الباب
ضحكت بوسهة حضنهة يلاعبهة يرفعهة فوك ينزلهة هي تضحك التهة وياهة ولا جنة شايفني حتى ما باوعلي مغلس عني
صفوان:يالله خل نروح اطلعن
رفا:ضايج لان ماگتلك والله راح عن بالي
صفوان:خوش طلعن حتى نوصل من وكت
رفا:ابات هنا
صفوان:ماسمعت عيدي
رفا:حباب اضل بس الليلة الله عليك
تنهد بضوجة هز راسة موافق كيفت حتى اذا امي اعترضت يقنعهة دخلت صحتهة رجعت يمة نلاعب
بيهة كل شوية يدفعهة لأيدي بس توصل يسحبهة
طلعت امي هو رجع غمزة خلة بيدهة فلوس طلعت غنوة من الباب سلمت عليه سألتة على دلهم طمنهة
گالهة بخير لايضل بالهة
اشرتلي ارجع الفلوس الة من ايدهة غلست عنهة ضلت تخوزر وگفت بالباب لحد ما مشو امي ما عاجبهة اضل همزين هو قنعهة سديت الباب رجعت
حجت غنوة تاخذهة :شكد عيب مو گتلج رجعيهة
رفا:شعلية بت و عمها اني ياهو مالتي
غنوة: استغفرالله ولا تبطلين سوالفج
رفا:شگعدج مو نمتي
غنوة:فزيت على صوت امج من طلعت
رفا:امشي نامي عيونج راح تطب بالجمجمة مادام بنتج ساكتة و ملتهية
عافتهة مالهة خلق لكلشي راحت للغرفة كعدنة بالاستقبال و ام وتين نامت گبل گامت تشخر والله حظوظ احنة نتگلب لحد ما تبزع ارواحنة گوة ننام
لاعبنة غمزة لحد ما تعبت گامت تغفي استخطيناهة
وديناهة لأمهة خاف جوعانة ماتكدر تنام اخذتهة غطيتهن طلعت ، بقية اليوم ضلينة ندور فساتين
فادتني وتين عدهة هواي معارف اني مو كلش بهاي السوالف مبتعدة عن البيجات و التواصل جان عدي عقدة من الاعراس كلشي يطلعلي احضرة
راحت تسوي عشة و اني گعدت امهة گوة من الخجل فزت بوجهي خوفتني باوعت لوتين اخزر بيهة تضحك علية گامت حتى تصلي
نظفت الصالة و الاستقبال رحت صليت على ما خلصت صبينة العشة گعدت غنوة سحلتهة سحل تعشت راحت تصلي
خلصنة الليل نحجي وياهة نحاول نخفف عنها لو نقنعها تبطل بجي و ترحم روحهة قافلة على القضية
حاضنة رجليهة كاعدة مرتكية على الحايط
رفا: تعاي يمنة ضلي ليوم المحكمة و العرس ها شگلتي طلعي من الخنگة
وتين:غير اگللهة تعاي يمنة هم ماترضى
رفا:خااب غنوة كافيي يمعودة حتى للمحكمة ما وصل ان شاء الله المحامي يگدر يخفف العقوبة
و تقل
ردت بحرگة تبجي:اني ما ابجي علمود السجن خايفة عليه صلاح يگلة بس تدخل نعمان يكتلك يردون يكتلونة هناك
باوعتلهة مصدومة ماعرف بشنو ارد درت عيوني لوتين طفرت تباوع برة خاف امهة سمعت رجعت كعدت يمنة بطني مغصتني من الخوف
لا كدرنة نواسيهة ولا نخفف الوضع عليهة خفت احجي و اجفص اني اعرف الوضع بالسجون شلونة كلة ناس ماتخاف الله ولا يردعهم شي
نمت بوقت متأخر مخلية فراشي بصفهة وبينة نايمة دنفوشة تتگلب و وتين كاعدة تدلك براس غنوة هاجت عليهة الشقيقة من البجي
ثاني يوم الجمعة ساعدت وتين نظفنة البيت كلة رتبناه و نظفنة المطبخ كلة طلعت برة اغسل بالحوش ارش ماي اباوع للحديقة
ضجت جانت گبل شحلاتهة زارعينهة ورد معتنين بيهة هسة خربت تحسبت عليهم بگلبي رشيت ماي
ادور بعيوني على الماسحة
طفرت گامزة من نفتح الباب على حيلة دخلت غفران مرت اخوها الدموع تصب و العباة مايلة شعرها مكفش و كل وجهة مطبع احمر
تصيح بحرگة و تدعي عليه مفرفحة طلعت غنوة مبهوتة شافت حالهة گعدت بالباب ايدهة على صدرهة من الخوف جانت نايمة و فزت
شمرت الصوندة ركضت يمهة اشوف عيونهة تگلبت
متشنجة روحي راحت احتاريت شسوي ضليت اصيح اجت وتين تركض غسلنة وجهة مددناهة
اجت ام وتين كعدت بصفهة خايفة عليهة تفرك بأيدهة و تدگ على خدهة گمت ارعش اشوفهة ماترد علينة گلبي صار بين رجلية
طفرت اجر العباة من الباب طلعت برة ادور على سيارة اشوف اخوهة زاكف بالشارع يفتر رحت اركض گوة اطلع الكلمة
راح يجيب سيارة رجعت لگيتهة على حالهة مرت اخوهة نخلست من شافتهة ضلت واكفة تباوع اجيت ادوس ببطنهة على صريخهة لدخلت بي
ندك الباب دخل اخوهة شالهة بس اني لابسة عباة
و ام وتين مالحكت تلبس طلعت وياهم صعدت مخلية راسهة بين رجلية اعصر بأديهة ماتفتحهن
گوة لازمة روحي منظرها يخوف هي هيج مصتكة
ياهسة نوصل للمستشفى شبعدهة عنهم هو يسوق بكل سرعتة كل شوية يلتفت النة
عدلت العباة عليهة اغطي شعرهة مديت ايدي اخذت الماي ارشگ على وجهة اغسلة وصلنة للمستشفى نزلناهة گبل للطوارئ
التمو عليهة الدكاترة وكفت اعصر بأدية خايفة كوة واكفة على رجلية اشوفهم هيج متجمعين اخاف بالزايد ، تحلفت بمرت اخوها الة اكتلهة
مرت فوك الربع ساعة يالله ابتعد الدكتور هي شوية رخت بيدهة كانونة و مغذي و مخليلهة اوكسجين
اخوها گاللهم عدهة شقيقة اول ما دخلنة
مشيت مترددة من سألوه عليهة گال : نوبة شقيقة قوية إجت وياها فقدان وعي وتشجنات بسبب الضغط النفسي وبالعادة هاي الحالات تتكرر إذا ماكو علاج منتظم
رفا:هي تاخذ علاج بس تشرب بجرعات قليلة لان عدهة طفلة
:الافضل تراجعون دكتورهة مرة ثانية خلينالهة مهدئات للنوبة من تخلص تگدرون تطلعونهة
انتبهوا للحالة النفسية و التغذية الشقيقة مرض مرتب بالاعصاب لازم تضل المريضة بحالة هدوء
تنهدت أهز براسي كعدت يمهة امسح على راسهة ارفع الغطة عليهة ضميت شعرهة جوة العباة اعدلهة عيني على الواگف بصف السرير
رفا:ماتشوف شعرهة طالع و مبهذلة ماتنزل عينك لو الاخلاق عدكم نص ردان
خزرني ما عاجبة وخر بعيد سديت البردة اردلة الخزرة ضليت يمهة لحد ما صحصحت باوعت حولهة مستغربة
رفا: بالمستشفى صار انهيار عصبي و شقيقة كملت عليج
غنوة:شصار سمعت صوت صريخ مادري عيوني غوشن
رفا:هاي مرت اخوج حسبي الله عليهة مكتولة مدري شبيهة دخلت هيج تصرخ
تنهدت ضايجة گعدتهة نطيتهة ماي شربت مسحت
وجهة عرگانة باوعت للمغذي عوزة شوية و يخلص
كمل ساعدتهة تگوم طلعنة تنهدت بضوجة تباوع للولد عرفتة أبن عمها فتحت الباب صعدتهة كعدت
مخلية راسهة على جتفي
وصلنة للبيت نزلت خليتهة بغرفتها ترتاح طلعت اخوزر بمرت اخوها لگاعدة بالهول من كل عقلهة تتشكة رجلهة متزوج عليهة
حجيت بهمس:هسة من ادوس ببطنها هم واحد يگلي ليش
وتين:ابوس راسج تستاهل على هاي الهبطة
تحمحمت حجيت بضوجة:حتى لو اخوها كاتلج ماتجين هيج البنية رجلهة مو يمهة خايفة عليه هبطتيهة
غفران:جا وين اولي اهلي بالزيارة و بيتي كاعدة بيه ضرتي متزوج مرت اخوه المرحوم و احجي مايرضى يكتلني شسوي
رفا:اي تزوج طلگ شعلينة احنة جان راحت البت من وراج عيونهة شگلت من الهبطة
غفران:بالله اسكتي انة اشم ايدي غنوة نايمة وتفز
رفا:مرة ثانية لاتسوينهة حتى ما احوسج حوس
ردت تطگ رجلهة:تحوسين منو البغدادية هسة اجيبج بيدي امعش شعراتج
رفا: والله جلدج يحكج عاشت ايدة رجلج بس ماشبعج كتل تعاي اني اطحنج طحن
ساهرة:كاافي البت توهة نهبطت تتصارخن و تفز اسكتن وانتي خالة البينة كافينة روحي لبيت حموينج لگرايبج
تفشلت گامت خلت عباتهة على راسهة طلعت وراهة صفگت ادية غميتهة التفتت تخوزر تمنيت تجي تهد علية الة ادوس بمصارينهة هاي العوبة
ضليت يمهم على ساس اروح الصبح نوب غنوة تعبت مارحت منا بنتها تبجي عليهة هي گوة مفتحة عيونهة سوتها يرن بالراس نومتهة كل ما تكعد نطلهة مرة يمنة نلاعبها
طگيتهة للسبت العصر رحنة هنة أجاهن ابنهم واحنة صفوان غنوة ويانة علمود المحكمة باجر گوة قنعتها تضل يمنة مستحية من خالة دلهم
نوب اقتنعت احنة متعودة علينة اكثر منهم الطريق كلة لازمين گلوبنة صفوان محتار بجنتة يلاعبها كل شوية انبهة للطريق
وصلنة للبيت نزلت شايلتهة فتحت الباب دخلت اخواني مو هنا تلگتنة امي سلمت عليهة كعدت بغرفتي و غمزة بيد امي تلاعبهة
الليل كلة غنوة ماغمضت عينها تحوس بمكانهة خابرت المديرة اخذت اجازة گتلهة عدي ظرف ماكدر اداوم حتى اروح وية غنوة للمحكمة
كعدنة الصبح طاح لساني اتوسل بيهة تتريك قفلت
ماتشتهي بدلت لدنفوشة سويتلهة تسريحة شعرهة بسرعة يكثف رغم عمرها صغير
طلعنة المحكمة بالعشرة بالتسعة رحنة هناك گاعدين على النار من اشوف غنوة متوترة من يمي اتوتر و اخاف ساعة انطيهة بتهة ساعة اخذهة
تحوس وهي گوة لازمة اعصابهة دخلنة للقاعة اخذت مكان كعدتها و غمزة شايلهة صفوان گعد بصفي مخليهة بحضنة
ايد غنوة بيدي من كد ما تعصر بيهة طبعت اصابعهة بجفي خليتهة على راحتهة المهم تفرغ شوية من خوفها و قلقهة
زاغت عيوني اشوف نعمان نفسة الي خطفني دخل شكم مرة علية نفس الهيئة و الشكل رجال يجي عمرة بالاربعين اكثر لبسة مرتب و مهندم وراه واحد
نفس بنية جسمة لابس دشداشة بيضة و جراوية كعدو بالبداية كشمت من شفت قسور موسكو جان عدي فضول بالصيف هم يلبس كووت طويل
خزرني صفوان درت عيوني عنهم التهيت بفكاري اسمع صوت غنوة تدعي بهمس دعيتلة بگلبي خطية
ينسجن يضيع عمرة بعيد عن بنتة
لحظات تجمعوا و المحامين واكفين بعدهة دخلو دلهم فزت من مكانهة التفتت اهديهة گعدتهة هو عيونة تدور لحد ما شافهن
وكفو من دخل القاضي بلشت المحكمة كل واحد يحجي شي و المحامي مالتهم فد واحد لزگة كل ما يسألون دلهم يركز على حجية يستغل كلشي
يفسرهن كلمة كلمة يحاول يخلي يتوتر بس هو منتبه ضل على نفس كلامة و كم مرة خلاه يعيد القصة و يروي الصار و نفس حجية ما زاد حرف
رفا:غير يفضنة شبي لطش
صفوان:يريد منة يتوتر لو يزل بكلمة تختلف عن الحجاه گبل حتى يلزمهة و يضغط عليه
رفا:مايشوفونة يلعب بأعصابة يعني سمع الحجاية
لگالهة صاحبة واضح هو داس بالحجي ليش يخلي يعيد
صفوان:جلب ابن سطعش جلب
سكتت اباوعلة گوة لازم اعصابة من جهة دلهم كل شوية يتنهد يغمض عيونة القصة الولد مفشر عليه و حاجي كلمة مو حلوة على اختة هو مغلس عنة ذاك من شافة تجاهلة گام يزيد بالحجي و تعاركو
المحامي كل شوية يركز على هاي الكلمة و الموقف الحمدلله محامي دلهم شوية بي هدة ضل يتجادل وياه دخلت اريد بس يفضونهة المرة راح تموت
صار وكت الحكم خليت ايدي على گلبي و بنتهم تبجي خلت دلهم يلتفت الهة عيونة عليهن واضح التعب و القهر عليه
ماتكدر غنوة حتى تشيلهة من الرجفة خفت يصير بيهة شي اخذت البنية اهديها سكتت تلعب بگلادتي
اتصنت لحجي القاضي لحد ما بلش ينطق الحكم
بالنهاية اصدر الحكم بالحد الادنى من العقوبة تقرر الحبس المؤقت لمدة خمس سنوات .
