رواية بنات سهر الفصل التاسع والعشرون بقلم فراقد حسن علي
تجاهلنا كل شي
حتى أتجهنا الى اللأشعور 🥺🥺
والمشكله المابي جرح ما يفهم ألبي حسرة 😞😞
===============================
أساور / بيوم اجاني مازن فالت
من دوامه وجان كلش متلهف عليه
شو اني بس حظني وبوسني نفرته ،
شكد حاول ويايه بس مااعرف شبيه
احس روحي كارهته وروحي كامت تلعب
من ريحه عطره المخبوطة بريحه الجكاير
دفعته عني وكمت ابجي واتوسل بي
يعوفني بحالي ولا يتقرب عليه
هو تخبل شبيج وليش ما ترديني ؟؟
واني بس اكله / والله مااعرف شبيه
مااعرف ليش مااريدك
هو هنا تخبل وكالي / شنو شايفه واحد غيري عاجبج وهيج كارهتني ؟؟......
هو كالي هيج وأني شكو بجي ولطم
بالعالم انشمر عليه ...
تخبلت شلون هيج يكلي ويشك بيه
هلكد ما بجيت وانقهرت احس نفسي دخت
تمددت بالكاع أريد أجر النفس مااكدر
هو خاف عليه ،
اجى شالني رجعني على السرير
وبقى يتعذر مني
كالي / بس فهميني شبيج ليش هيج متغيره عليه
كتله / والله مااعرف ، مازن افتهم عليه
مااعرف شبيه احس روحي مخنوكه .
والله العظيم وروح بابا وماما
اني حتى استحي اباوع على رجال غيرك
شلون تسمح لنفسك تكلي عاجبج غيري ؟؟
هو بقى يتعذر من عندي،
وكالي /كلمة طلعت من لساني بدون قصدي
كتله / مازن تعرف بيه اني الكلمه تقتلني
تمزق قلبي ، بطل هذا أسلوبك ويايه
مره ثانيه اضربني طلقه ولا تسمعني كلمه
عدت الايام عندي بصعوبه
جسمي يوجعني ، روحي تلعب
مخنوكه من بيتي ، مااريد رجلي
كاره الجاهل البطني استغفر الله
احسه ثمرة حرام لان صار قبل العرس
وبس ألتقي بااقرباء مازن بيئ مكان
يباوعولي بنظرة استحقار
ولا حسبالك هو رجلي شرعا وقانونا
وهذا الجاهل أبنه وابن حلال
وشكد اشكي المازن من عدهم
ومن سوالف خواته ويايه كاعدة بيتي وحدي
ومامخلصه من سوالفهن يجن البيتي ويسمعني
حجي يغث روحي ويطلعن
وهو يجاوبني / خليهن يولن
البسيهن ،،
انطيهن اذن الطرشه
بيوم جان ما عندي مسواك
وكلش ضايجة ،
هو مازن جان ملتحق
وينزل باجر مجاز من دوامه
وجنت داخله بالشهر الرابع
واحس بحركة الجاهل بس مو قويه ،
أوضاعي الطبيه زينه
بس اوضاعي النفسيه كلش تعبانه
خابرت على مازن اريد اروح للسوك اني وساهرة
كالي / باجر نروح نسوك
ولا تشيلين همي من اجي اجيب اكل جاهز ويايه
كتله / اني كلش ضايجة ومخنوكه اريد اطلع
كالي / امري لله، روحي بس لا تتأخرين
بدلت واخذت فلوس من كنتوره
هو مخولني اخذ شكد مااحتاج
ابد ما يحاسبني ماعنده بخل
ورحت لبيت ساهرة حتى تروح ويايه للسوك
خطيه ما تتعذر وين مااريد تروح ويايه
دخلت ولكيت يمها وفاء اخت مازن
وعادي سلمت عليه بس مو بوس واحضان
لا من بعيد شلونج، واخبارج
هي واختها شهلاء أبد ما يحبني اني وخواتي
لان بابا قاتل اخوهن الكبير
يعني احنه شنو ذنبنا نتحمل ذنب مو أحنا سويناه
فأبد مالي دخل بيهن كد السلام وهاي هيه
شويه واجتي لمى
هم سلام وشلونج واخبارج
وكعدنا شويه سولفنا
-
وكلت لساهرة /فدوه حجيه روحي ويايه للسوك محتاجه كم شغله
-
هي جاوبتني/ من عيوني شويه ونروح بعد وكت
وفاء كالت / شعجب مازن يخليج تطلعين وحدج ؟؟
كتلها / لا ما يقبل اطلع وحدي
بس ويه الحجيه يقبل عادي
كالت / هااا اي حقه لازم يمشي وياج حسيب ورقيب
حقه يخاف بيجن رس من امجن الشريفه
كتلها / رجاءا وفاء مااسمحلج تحجين على ماما
واني اشرف من الشرف نفسه مايحتاج عليه رقيب
ماما ربتني أحسن تربيه
ضحكت وهزت ايدها وكالت / اي خوش تربيه
من هذا النغل الشايلته بطنج
ساهرة ولمى ما قبلن عليها
وكاللها / حرام عليج هيج تحجين عليها
ترى هي خوش بنيه
وما شفنا منها لو من خواتها شي مو زين
والبطنها ابن اخوج
هي عاطت / لا مو ابن اخويه شوفن منين لفته
اخوي مابي بزره
بس شوفن هاي النكسه شلون لحست عقله
وقنعته النغل الشايلته بطنها ابنه
ساهرة كالتلها/ لهنا وحدج
ارجوج ممنوع تجاوزين عليها وعلى شرفها بيتي
وهذا كلامج انا بذات نفسي اوصله لرجلها
اشوفه يقبل ينكال هيج كلام ماصخ بحق مرته
هي زعلت وطلعت وبالباب جان تكول الساهره/
حقج ادافعيلها اثنينجن نفس الطينه
اني شبعت بجي فرفحت من القهر
بساعتها خابرت مازن وحجيتله كلشي
هو بس يكلي /خل انزل والله كريم يصير خير
حتى للسوك مارحت وبقت لمى وساهرة
يواسن بيه ويقنعني بالحجي الحلو
-
يعني من القهر الليل كله ما نمت
ماصدكت طلع الصبح ورجعت البيتي
-
عقلي طافي بس افكر واعيد واصقل بكلام وفاء
اجى مازن الضحى ، ومو مثل كل مره استقبله
بوس وحظن واشتياق
لا من بعيد كتله /شلونك
وبقيت كاعدة بماكني بالصالة
ومبينه خلقتي مكلوبه
وعيوني منفوخه من البجي
هو هز ايده وكالي / ابقى اكلي بروحج لحد ما تموتين
كتلج شنو يحجن خلي يولن
انا راضي بكلشي
شيجي منج انا راضي بي
شعليج بيهن يطبهن مرض
راح للغرفة يريد ياخذ هدوم نظيفه
ويدخل للحمام يسبح تعبان من الطريق
رحت لحكته ،
كتله / مازن واني الى متى ابقى اتحمل لسان خواتك
شنو ذنبي اتحمل ذنب بابا
والله قتل اخوك قبل اكثر من عشرين سنه
كالي / انتي مالج ذنب
بس بعد هاي عقول النسوان الماعدهن خوف من الله
ركبن ذنب ابوج براسج وبراس خواتج
وخلي اكوالها الج بوجهج وهاي حقيقه ما تكدرين تنكريها
تبقن للممات لازكة بيجن تهمه أبوجن وفعلة أمجن
تبقن بنات عدنان القاتل
وبنات سهر المنهوبه
تقربت عليه وصحت بصوت عالي/ ماااازن لا تحجي
على بابا وماما مااسمحلك
هو دفعني من جتفي وبعد ايد رجال قويه
كعدت على السرير وكالي / ما تكفيني شرج
جاي من ضيم الدوام اتلكه اخبالاتج
كتلج انا راضي بيج بكل أحوالج بعد شكو تاكلين بروحج من كلام هاي وذيج
عافني وراح للحمام يسبح
اني زدت قهر وبجي
وكمت املخ بروحي من الغثه والقهر
بقيت بمكاني ادك والطم
هو طلع من الحمام واني بعدني الطم
دخل للغرفه كالي / كومي بدلي اخذج للزياره
خل ترتاح روحج
-
ما جاوبته ،
كمت للحمام اريد اغسل هدومه
اطلع شغل الهي بي روحي
صار كدامي (......) المحلول
بقيت اباوع عليه واحد يوز بعقلي
يكلي /خلصي حياتج
عليمن باقيه تتحملين هاي الاهاين والذله
وليش تبقين طول عمرج تتحملين ذنب امج وابوج
هنا من كثر الكبت والقهر والغثه
فتحت القبق وشربت المحلول جرة وحده
وما حسيت على روحي شنو اسوي
ماكو دقايق لو نار جهنم اشتعلت بيه
اريد اجر النفس مااكدر ضاق صدري
وروحي كامت تلعب معدتي انكلبت
احس بلعومي انطبك ما يدخل هوه الصدري
حتى عيوني احسهن غوشن
ركضت على مازن اكله /الحكلي
حسباله اجذب عليه
لو اجذب انتباهه
جان متمدد على السرير جاي تعبان من الدوام
ميدري بيه انتحرت وشربت المحلول
اشرلي بيده يعني روحي
وكالي / ابقي بخبالج
كعدت بالكاع وكمت اشحط بقوة مااكدر اتنفس
هنا حسيت الجاهل كام يرفس بطني بقوة
احس حركه بطني مو طبيعيه
العفو زعت بالكاع يم السرير
هنا مازن صدك اني مو اجذب عليه
طفر عليه ويصيح/ وووولج شبيج
اريد أحجي مااكدر اختنكت
عزت روحي كمت اعتعت بي من فانيلته الداخليه
وبالكوة اشهك واطلع الكلمه /راح اموت
هو انخبص من شافني بقيت اشحط وزعت دم
وبطني تكطعت كمت اكمش بيها من الوجع
لبس دشداشته بسرعه حتى بدون ما يدكمها
ولبسني ربطتي على راسي لفها شلون ماجان
وجاب عبايتي خلاها بيده
بقى يسحول بيه لحد باب الشارع
كعدت بالكاع وتمددت بعد ما ظل هوا بريتي
حسيت شي وانقطع من نهايه ظهري
ونهايه بطني احسها أنظربت بسجين
عطت بصوتي المكطوع /مازن الحكلي
واحس من قوة الالم برده سودة
ونزلت على عيوني ......
اسمع صوت صدى يروح ويرجع
أساور تسمعيني؟
أساور شو فتحي عيونج ؟؟
وانوب انكرصت كرصه كلش قويه من اذاني
من يم التراجي شاطت روحي
بس فزيت وحركت راسي
حتى يعوفني هذا الكرصني
ورجعت نمت .....
بقيت افتح عيوني واغمضها
كلش ثكيلات ، جسمي كله مكسر
وين يلا صحصحت حلكي يابس
وعلى وجهي قناع مال اوكسجين
واكو صوندة بحلكي توجعني تجك بلعومي
باوعت صدري كله ملزك لصقات صغيره
اصبع ايدي بي جهاز شلون القراصه
كل أيد بيها كانونة
مخليلي محلول طبي
فوك راسي اجهزة طبيه اطلع اصوات
احس روحي كلش مختنكة ومضايقه
عندي صعوبة بالتنفس مع العلم قناع
الأوكسجين على وجهي
باوعت أني ومراه ثانيه نايمات بغرفة
غرفه كلها اجهزة طبيه
ماكو دقايق ودخلت عليه الممرضه
كالت / يالله وعيتي الحمدلله على سلامتج
يمعودة شبيج زهتكي من الدنيا وانتحرتي
وسلمتي روحج فداء للوطن
وخبلتي الدكاترة وياج
ولج دكتور حيدر دخلنا انذار من وراج
شدي حيلج واطلعي لاهلج
وخلصينا من خبالات رجلج ودكتور حيدر
اشرتلها صدري يوجعني ومتضايقة
مااكدر اتنفس زين
جيكتني وشافت اوضاعي
كالت /دقيقه هسه ارجعليج
طلعت تركض وماكو دقيقه رجعت وياها طبيب
اجى جيكني ، وبقى يشوف حالتي
دخل حيدر يركض وكلش خايف
كاله / هااا أحمد شبيها رئتها
-
كاله / يمكن توقعك صح تجمع سوائل بالرئة
عدها ضيق بالتنفس .
-
حيدر مااعرف شنو حجي ويه الممرضه
وهي راحت تركض
-
رفعلي السرير وصرت شبه كاعدة
وكف بصفي عيونه تحجي خوف وقلق
-
كالي / شلونج هسه
انقلع كلبي عليج
ليش هيج ياخويه خسرتي عافيتج
وسودنتي رجلج عليج
هذا الطبيب كاله / حيدر مو وكت اللوم هسه
شوفها تلكف الهواء كوة
الحمد لله قدر ولطف بحالتها
اجتي البنيه بيدها شغلات طبيه
وراها اثنين ولد وياهم سديه متحركه
حولوني من مكاني على هاي السديه
بعد ما بعدوا عني الاجهزه
من وخروا قناع الأوكسجين كمت اشاهك
خلولي قناع متحرك وهاي البنيه تضخلي اوكسجين
بهذا الجهاز الصغير
طلعوني ركض وحيدر يمشي وراهم
باوعت مازن واقربائنا الرياجيل
وساهرة ومسرة وخالتي
وبعد كومة ناس موجودين
من شافوهم طلعوني من الغرفه طلعت ردهه الانعاش
ركض مازن من مكانه واجى عليه
-
حيدر كاله / وخر عنها خل اخذها الاشعه
رئتها مليانه مي ،
اخذوني بسرعه للأشعة حتى لا سرة ولا ابد
حيدر هو اليركض ويايه ،
اخذوا لقطة الصدري
حيدر كال للولد/ رجعوها لمكانها هسه اجي وراكم
وبعد ما رجعوني وخلولي قناع الأوكسجين
اجى حيدر وياه هذا الطبيب احمد
مااحجي عن الوجع واللعبان النفس الشفته
من سحبولي المي ....
اللهم يكفيكم شر المرض النفسي والجسدي
اتحطمت ادمرت نفسيا وجسديا
تعبت من العلاجات والأبر
صدري مقبط وبس اشحط وأكح
تنفسي على قناع الأوكسجين
قلبي يوجعني يركض من الخفقان
حلكي وبلعومي مورمات مخليلي صونده
كبل المعدتي يضخولي سوائل بيها
والمغذيات يخلص واحد يخلولي الثاني
والقهره الاكبر بساعه ما عرفت الجاهل ميت بطني
ومسويلي عمليه كرداج ومنزليه اليه
شبعت بجي شكد جنت ضايجة من عندة
شكد ما نقهرت عليه
كل مااتذكر هذيج الدقايق شلون رفس ابطني
وشلون كام يتحرك بسرعه كلبي ينمرد عليه
يومين وطلعوني من الإنعاش
لغرفة خاصه الوحدي
كل الأقرباء سلموا عليه
وخالتي ومسرة هن الوحيدات
النمردن على حالتي
بس مازن ابد ما سمعني صوته
بس لزم ايدي وبقى كاعد يمي ويباوع بوجهي
وبساعة فرغة الغرفه كالي / ليش حرمتيني من فرحة عمري .ونزلت دموعه تكوطر بسرعه على وجهه
رجع كالي /تدرين حيلي مات من جبتج للمستشفى
تزوعين دم ماادري النزف الاخذج وغركني وياج وبالطوارئ أخذوج مني الدكاتره
يكلولي هاي ميته شنو سبب وفاتها
وانا صافن بوجهم مااعرف شكلهم لو شحجي وياهم
-
تدرين قلبي وكف بدال كلبج
-
تدرين روحي طلعت بساعه شفتهم يرجونج بالكهرباء
-
تدرين حيدر اخوي يكلي خفت عليك
لاتموت انت وياها سويه
ولك شلون سقت سيارتك وصلت بيها للمستشفى
على هذا خوفك ورجفتك يمكن شكل عندك سكر
بقى يحجي ويبجي
واني ابجي وياه
بس كتله / تعبت واني اشكيلك وأنت ساد اذنك عني
اذا انت ما تسمعلي من اشكيلك بعد المن انطي وجهي
كالي / اششش اسكتي انتي تعبانه
ومو وكت هذا الحجي
وانا الخسران الوحيد بكل هاي المصايب .
سكتت وما رديت عليه
بقيت أسبوع بالمستشفى
وطلعت لبيت عمو حاتم ما رجعت البيتي
الرجال الما يسندني ويوكف بوجه الكلمه
التنكال بوجهي باطل وتمس شرفي
وتاكل بروحي
وهو يشوفها هينه
مااريده بعد
لو مو أحبه لو صارلي الهواء بعد مااتنفسه ......
-
-
-
-
مسرة/بيوم كاعدين كلنا نتغدا
منتصر كالي/ من تخلصين أكلج
جيبلي مفتاح بيت اهلج محتاجه بشغله ضروريه ....
شنو اريد أبلع اللكمه مااكدر غصيت بيها
كتله / شسوي بي
باوعلي بخزره ورفعلي حاجبه
كالي / عندي بي شغل ضروري عندج اعتراض
لو اقدملج كشف كامل عن طبيعة شغلي ؟؟
شافين الواحد من يتهرب من شي
كمت اكل على كيفي
وانوب غسلت مواعين الغدا
وخدرت جاي وصبيت للكل ووزعت عليهم
ومنتصر كاعد على القنفه بالمطبخ يراقبني
ابد مراح كعد بالصالة،
كالي بصوت كاتمه بين سنونه / اذا خلصتي اصعدي فوك ..
صعدت ركض أخاف يجيني راشدي وأتفشل كدام الكل
وهم أخاف خالتي مابيها حيل مشكله جديده
الصبح تلاغوا طارق وسوار علمود جهال
وانوب هسه تكب لغوة جديدة بيني وبين منتصر
غير يصعد ضغطها وسكرها
لحكني منتصر بس طبك باب الغرفة
كالي / شعندج ويه مهند؟؟
اريد أحجي اخرسيت خفت ومااعرف شنو اكله
وعرفت هدى سوتلها سالفه عليه
بس كتله / والله العظيم ماعندي شي مو زين
هو اجى عليه بسرعه جان يريد يروح للزاويه
يبدل دشداشته ، لوه ايدي وخلاها وره ظهري
وكالي / منو كال عندج شي مو زين وياه
سألتج شعندج ويه مهند
مو تفهمين سؤالي اشك بيج لو بخويه
بجيت كلش خفت من عنده
كتله / والله العظيم وجعتني
جتفي انخلع حباب عوفني
عافني وراح يبدل كالي / احجيلي كلشي
اريد اسمع منج
سولفتله كل الموقف الصار بيني وبين مهند
من الاتصال
والاتفاق علمود يسكن العائله الفقيره بيتنا
وليش ضميت الموضوع عن الكل
علمود الثواب يروح لبابا ولماما بدون نقص
هو بقى ساكت وراح تمدد كالي /اطلعي وطفي الضوة وراج اريد انطمر ممنوع تكعديني
طلعت ورحت بغرفة لمى بقت فارغه
تمددت بيها وبقيت ابجي
للمغرب ونزلت بس ما كلت الخالتي على لغوتنا
منتصر بقى اسبوعين لو اكثر ما يحجي ويايه
وحتى الغرفة ما يقبل ادخلها من هو موجود
حتى طردني وكمت انام بغرفة لمى
وكل الموجودين بالبيت عرفوا بينه احنا متلاغين
كام يسخر تبارك لو سوار على شي يريده
وخالتي اكلت كلبي تسال شعدكم ، وشبيكم
واني اكلها هو زعلان
ومن تساله خالتي يكلها / ماكو شي
لحد ما بيوم الضحى
الجو كاسر ودخل علينا الشتاء
واجى همام يركض كالي البسي عباتج والحكيني
اختج مرت مازن ماادري شبيها
مازن خابر حاتم يعيط الحكوا عليه مرتي ماتت
جانت كاعدة اثرم اسبيناغ اريد اكمل الغدا
كمت بخوف وعطت ماااامااا لحكيني
وانجبحت على طولي
وخالتي عاطت / بررررد يمه برررد شجاكم
واجتي تدعبل نهضتني هي وهمام من الكاع
طارق على عطيتي اجى يركض
جان يلعب بجهاله بالصالة
همام بسرعه صلى الخبر صلي عليهم
طارق صاح / سووووار ركضي جيبلي دشداشة
وفلوس من فوك ، وركض على تلفونه
خابر على مازن ،
اني انثولت اكمت كلشي مااعرف اسوي
كلمه اختج ماتت اخذت روحي
لكفت عبايه خالتي من وره باب المطبخ
وركضت ويه همام
وانوب لحكنا طارق وخالتي بسياره
من وصلت لكيت لمى وبيداء
ايدكن ويلطمن بيت مازن
ونسوان جيران ملتمات عليهن
وساهرة وامها يدعن الها كون ما بيها شي
سالت شكو وشبيها محد يعرف
لمى تصيح / ولج اختج غركانه بدمها
وماتت بين ايدين مازن حتى هو مايعرف شبيها
اخذها للمستشفى مسودن عليها عقله طار عليها
طارق اخذني اني وخالتي وساهرة
للمستشفى كال / خاف تحتاج شي هناك
خابر على مازن مايرد
خابر على حيدر جاوبه
كاله / مرت مازن يمي وحالتها خطره
دخلناها للعمليات الطفل مقلوع عنه الحبل السري
والمشيمه مفطوره اخذها النزف
كاله طارق/ هي شبيها
واكعه ' منتوله ، محروكه غير نفتهم شبيها
جاوبه حيدر/ منتحره وشاربه ......
حلكها وبلعومها ومعدتها منخورات من عنده
من فرغنا معدتها عرفنه
خالتي بقت تندب بحظها وحظ مازن
وكالت / مكرود عمه مازن مالحكت تفرح بوليدك
اااخ منهن خواتك شبعن البنيه ذل
كم مره انا بنفسي حجيت وياك وكتلك
كف السان خواتك عن مريتك تراها مو كد خباثتهن
طارق كاللها/ هسه هو حك لو باطل
ابوها كاتل اخوهن شتريديهن ينطنها باقه ورد
وياخذنها بالاحظان
كتله / طارق واحنا شنو ذنبنا
كالي / ذنبجن انتن بنات عدنان قاتل أخوه وأبن عمه
علمود مراة ونهبها من اهلها وشرد بيها
وهي امجن سهر
خالتي كالتله/ يمه الميت ما تجوز عليه بس الرحمة
وهو كريم هم بوكته ما قصر
راد يلفلف سهر جوة ابطه وهي ما نطته عين
وحارب عدنان عبنه فقير وراد ياخذها منه
طارق كاللها/ لا تبررين لحد موقف
وسالفه انتحار مرت مازن
وحدة من نتائج غلطة عدنان وسهر بوكتهم
فكروا بنفسهم بس ما فكروا بزرتهم
اني اسمع الكلامهم وابجي كتلني القهر
شريد اسوي،
لحد ما وصلنا للمستشفى
خالتي وطارق بقوا مناكر واحد يرفع واحد يكبس
دخلنا ولكينا مازن غادي كاغد محروك
دشداشته كلها دمايه وما مدكمه مفتوح صدرها
والعفو مالابس نعال حافي
وشعره مكفش وعيونه منفوخه مبين باجي
هو شاف طارق وتحاظنوا بس ما بجى
بقى يبالع بعبرته
وكال / عمه ادعيلي بالصبر والقوة
مريتي مو زينه
خبلني بالزايد وخالتي كامت تبجي على حالته
اجى منتصر ومهند ورانا
اني روحي صارت بمنتصر
ركضت وشمرت روحي بحظنه واكله /
اساور مو زينه فدوة أروحلك اشتري عمرها
مثل مااشتريت حياة طارق وجهاله
هو حظني بتك ايدك ويكلي / كولي يالله
ان شاء الله خطاها السوء
وبقى حاظني جوة ايده
ويحجي ويه مازن ويفتهم منه
لليل واحنا قطره دم ما بينا
مقابلين الانعاش وكاعدين
الأقرباء كلهم انكلبوا على المستشفى
مازن كلش قهرني كاعد على كرسي الانتظار
وشابيك ايده وحاني ظهره يباوع للكاع
حتى كلاص مي ماشرب
احنا بختنا بحيدر هو يركضلنا بهاي سوالف مال الطبيب الله يكفيكم الشر
بالبيت هو مبتلي بالعائله
وبالمستشفى يخبص اصدقائه على مريضنا
لحد مااستقرت حاله أساور
ونقلوها الغرفه وحدها أني زعت العافيه،
اروح للبيت ارتاح تتلاكاني سوار تبجي عليها ،
طارق ميخليها تجي للمستشفى علمود جهال ،
وارجع للمستشفى اباوع أساور
بالكوة تشهك النفس وخسرت ابنها وصحتها
وحالتها تكسر الخاطر
لحد ماطلعت لبيت عمو حاتم
الا اني مشاهدة على روحي
احس بهاي وكعت أساور كبرت عشر سنين
كتلني الخوف عليها
هنا من جريت النفس
وارتاحيت من شفت اختي بخير
منتصر عاتبني كالي / ليش تعوفيني وراج
قابل انا ماادور أجر وثواب
ومهند اخوي بساعتها كالي بسالفه
بداخلي كبرتي بعيني بس ضجت لان عفتيني وراج
وما فتحت الموضوع وياج الا لمن طلعتها
هدى من ماعونها ومهند كتلها كضى بيها توبه
داكة بيج طبل بين اهلنا عندج علاقه ويه رجلها
لطمت على صدري وكتله / عزززة وصخام بعينها
ليش هيج نسوانكم عدهم الشرف رخيص
وعادي عدهن يشوهن سمعته الواحد
كالي / هن بدون عقل ،
وحدة تغار من الثانيه
وحده تباوع للثانية هاي أجابت وهاي شنو أشترت
واذا وحده وكفت بوجهن يلتمن عليها ويسقطنها
وابسط شي عدهن لطخة الشرف
بجيت بقهر وحلفتله يمين
كتله/ ماعندي شي ويه مهند
وهو اخويه عادته مثل طارق وهمام
كالي / ترى ادري واعرف شنو طينتج
للممات أحمد الله واشكره
رزقني بنوغه صافيه وترفه مثلج
ومحشيه بفلفل الحريف وعمزلي
كتله/ يعني مهند مااخذ عني نظره مو زينه لان ساعدته بدون علمك
ضحك وكالي/ ولج مهند حاسدني
يكلي انا اول واحد فزعتلك بدفنه المرحومه
ليش حظي الردي ما خلاني استقتل
على طير حر من بناتها
بلا اليمك مو حسافه بيك تستاهل
بس العد طارق ومازن حرامات
مهند انا وياه روح وحده موزعه على جسدين
اخوي وعضيدي اقرب اليه من طارق وهمام
من اخذ مفتاح البيت من عندج
راح سكن بيت ام احمد المراة الفقيرة
التجي يم الحجيه هناك بيتكم
ابن المرحوم أحمد مراهق يادوب صاير طوله شبر
عايف المدرسه واكع برفكة طايح حظها
معلمينه على شكو درب مكسر
وفوك هذن الدكايك طافر على بنت جارهم
هذيج هم ادبسزز هي فاتحتله باب السطح
ولاكفهم اخوها كاتله كتله موت بس النفس يصعد وينزل ، والبنيه مزوعيها العافيه
انوب جيب العشاير وودي الشيوخ
-
وام أحمد المراة الجبيره ادولبت بجنتها واحفادها
شردت بيهم لعربهم لحد ما فضت سالفه العشاير
-
حكموا الولد غصبن عليه ياخذ البنيه
-
وجلوهم من المنطقه بعد مالهم كعد بيها
المسكينه وين تروح
وما تعرف تعيش هناك بعربهم
عاد هي انتخت بمهند
لان تعرف بيه طامس الراسي بمصايب الدنيا
فهو شاف احسن حل يسكنهم بيتكم
احسن ما يبقى فارغ
وهم بعيد عن منطقتهم القديمه
والولد ازوج البنيه وساكن ويه امه وحبوبته
وشغلنا يمنه مخلينه جوة عيونه
مهند قايم عليه مراقبه
كاطع نفسه ما يخلي يتحرك منا لو منا
ومهند بيده ياخذ أجور الولد للحجيه
هي بعد كعدت بالبيت ما تشتغل يم احد ،
تكول اكعد اراقب واربي الباقين
امهم ما تكدرلهم وحدها
واندزلها مصرف بس هي عزيزه نفس ما تاخذ
عاد كامت تسوي هاي التجهيزات الغذائية
كبه ، وبركر ، وخبز بيت ، وتبيع للعالم
واحنا هم نوصي جعيفر يجبلنا طلبيه وياه للشغل
تمشي بين العمال والسواق والشرايه
والحمد لله على ستر حالهم
هنا بجيت اكثر كتله / يعني حتى ماما وبابا
هم متوفين فادوا الناس وساعدوهم
منتصر امانة االله ورسوله هذا البيت
خلي وقف للأجر ثواب عن روحهم
والحمد لله مرت سنه علينا احنا بيت خالتي
ودخلنا بسنه جديدة ، وشتاء جديد
والحال على ماهو ما كو جديد
لمى بيت رجلها شوكت ما صار عدها وكت تجينا
-د
وسهى تجينا كل شهر خميس وجمعه وترجع السبت
لان جهالها بالمدارس
نهى لا كل أسبوعين اكثر اقل تجي تبقى يومين ثلاثه وتروح
هدى مهند منعها من الجيه علينه
اصلا باب الشارع ما توصلها
وخانكنها خنكة موت بعد سالفتها الاخيرة ويايه
مشهرة بيه يم كل الأقرباء اني عندي علاقه برجلها
عاد خوش مكتوله كتله تسوى حياتها
طارق وسوار يوم حبايب ويوم تكب العركه بيناتهم
وعليمن على الجهال
طارق أيبزع الروح ، ينتبه على كلشي
هذا ليش يبجي
هاي الممه ليش ما غاسلتها
ليش الهسه ما مغسوله هدومهم
ليش ما سوتيلهم افلان اكله
ليش يبجون
ليش ناموا هوايه
ليش ما سبحتيهم
يبووو شيب روسنه تكولون بس هو عنده جهال
اذا بجي فقار افندي شدوا روسكم يا كرعان
طأرق ايدخلنا انذار
واذا كح لو تمرض الله كتبها العركة على سوار
انوب كعد من العسكريه ذب استقاله أسباب صحيه ،
وما يقبل يطلع للشغل ويه منتصر
يكول عندي مشروع براسي
مااشتغل شريك ويه واحد
خالتي شسوت اخذي سوار للدكتوره وخليلها لولب كالت/ هم تحبل ويشيب راسي علمودها
وجهالها صغار ورادلهم حيل
نعمه عدهم ٣ خل يربوهم
يبوو بساعة ألرجعن وعرف بالموضوع
تخبل ويريد يكتل سوار
وخالتي تكله /اتبرى منك وماتبقى بيتي
ممنوع تمد ايدك عليها
وهو يكلها / ليش تشيشيها عليه
ليش تكطعين بزرتي
بس اريد افتهم ترى هي جنتج وانا ابنج
ليش توكفين وياها ضدي
كالتله / هن بناتي وغصبن عنك اوكف وياهن
وين بناتي الجبتهن وربيتهن صارن حظ النسيب
وهذن الجناين التكول عليهن هن بناتي
هن الشايلات حملي وشيلاتكم
عندك مراة ليرة ذهب و٣ جهال
التف الهم واعتني بيهم
ومن يمشون جهالك ابد انا بيدي اخذها
للدكتوره واذبلها اللولب
وعود عوض هاي السنين
وهلمرة حبلها ب ٤ مو ثلاثه
وبقى اسبوع مطنكر وعاقد حواجبه
حتى الجيران عرفوا سوار خلت لولب ومن يكبرون جهالها يلا بعدين تحبل
ومنتصر يضحك عليه يكله / ما شويه تفك وجه العتوي من جهرتك خل انشوف خلقتك تضحك
هو يكله / انت مو حجي وتعرف حك الله
ربك يرضى امك وجنتها يكطعن بزرتي
كاله / محد كاطع بزرتك
بس جهالك صغار يرادلهم تعب وحيل ،
وهي امهم صغيره
والحجية تتعب وياهم ،
قبل جانت لمى شايله البنات
هسه امهم انا استخطيها من اشوفها
تبجي ويه بجيتهم
خل يشيلون حيلهم ويمشون
وعود خطط لمشروع بزره جديد
وهمام حاير بكليته وتلفونه يكول أنا وفاتن
تصافينا وعلاقتنا شويه تحسنت
بلكت الله يهديها ونتزوج بنهايه السنه
من هي وصغيرة تعرفني
وكل ما أفتح موضوع الزواج وياها
تكلي انطيني مجال اتعرف عليك
شتريد تعرف بعد عني والله سودنتني
عمو حاتم الحمد لله رجله صارت زينه
وكام يمشي عليها
بس هوايه تعب وهوايه عانه
شكد ظل يمشي على هاي الحجله مال كبار السن
وايده رجعت بيها الحركة على العلاج الطبيعي
بس مو مثل قبل خطيه مبينه بيها خلل
وطلع تقاعد من الجيش أسباب صحية
نسبه العجز عنده حددوها ٨٠ بالميه
واساور زعلانه من مازن وساكنه بيته
شكد راد مازن يرجعها بس هي متقبل
متريده تكول / ما يسمعني ولا يرد خواته عني
والرجال المايسندني
ويرد عني الكلمه المو زينه التنكال بحقي
شكو باقيه وياه
هي تريد تطلك من عنده
وهو ما يقبل يكلها /نجوم السماء اقربلج من الطلاك
وباقين كل واحد بطرف
واني مليت من مراجعة الدكتورات
كل وحدة تكلي شكل
وحده تكول عندج حليب يمنع الحمل
وحده تكول عندج تكيس
وحده تكول عندج كيس على المبيض الايسر
يمنع الحمل
وحده تكول عندج خربطه بالغدة
وحده تكول عندج التهابات ولازم كوي
لان الالتهابات هم تمنع الحمل
وحده تكلي نسبه رجلج ضعيفه نسبته ٥٥
ما تسوي حمل
تعبت ومليت من كثر العلاجات والأدوية
حتى عافيتي ما حصلتها
والصراحه خالتي راحت لمراه كشافه تعرفها
تكلها /عليها عمل هي وخواتها
وعساس العمل مسوياته اقربائنا النسوان
خالتي تحلف يمين تكول اعرفهن
مسويات عمل للمرض وتفريق بينا وبين رجولتنا
هاي الكشافه
أنطت الخالتي سبوحات وحروزة وبخورات
وعلمتني عليهن اني وخواتي
سوار صارت اوضاعها زينه ويه طارق
-
واساور تكول راحت مني الخنكة
اني زينه علاقتي بمنتصر
بس يوميه طالع بيه مرض شكل
لحد ما يوم ساهرة تجي من العمرة
راحت هي وامها حمله دار لبيت الله
والسيدة زينب بسوريا،
منتصر صارله هوايه من مواعدها بهاي العمرة
من اجتي جابتلي وياها علاج اعشاب من مكه
واتوقع موجود بكل الدول
اسم الأعشاب(( عود القسط الهندي الأسود ألمر ))
هذا ينظم جميع هرمونات الجسم
حتى ينزل السكر
ويقضي على تكيس المبايض
لان ينظم كل الهرمونات عند المراة،
تكول المعشب ذاكرلها حديث نبوي
عن هاي الاعشاب وفايدتها للنسوان
حتى تفيد بشغلات الروحانية مال حسد ونفس
وتابعه وسحر يسونه بخور بعد ما يقرون عليه الرقيه الشرعيه
انتكلت على الله وطحنت الأعشاب
وعبيتها بكبسول واخذها كبسوله بعد كل وجبه
هو الرجال المعشب كايل الها بعسل
بس مر يشحط ما ينجرع
عاد كمت ابلعه بكبسول أحسن مااحس بالمروره
وهنا عدت سنه ثانيه النا بيت خالتي
واساور صارلها سنه من زعلانه
مازن ما خله واحد مااخذه على عمو حاتم
ما يقبل يرجعها يكول / اذا هي ما ترضى ترجع
من ذاتها ماارجعها غصبن عنها
مازن صار دوامه يومي
حاله حال الموظف يروح الصبح
ويرجع العصر مرات المغرب حسب شغله
وليش ما بيوم متعارك ويه ضابط ثاني
علمود قضيه تخص شغلهم
وهذاك الضابط مهدد مازن
وصارت لغوة وهوسه اشكبرها وشكدها
وادخلوا العشاير ،
هذاك الضابط هو العايل على مازن
وبشهادة هوايه رياجيل من اصدقائهم
والحقير غدر مازن نصبله كمين على طريق رجعته
وخرطه هو متعدي بسرعته
الحمد لله مازن مابي شي
بس طلقه شخطت زنده
بس سيارته كلها طلقات
وهنا كبت العشيرة
وراحوا دكوا بيت هذاك الضابط
وصارت ملاحم بين عشيرتنا وعشيره هذاك الضابط
وانت اكعد للفصل ، وانت حول للحك
-
ولحد ما فضت سالفه العشاير أحنا زعنا العافيه
نخاف على رياجيلنا يطلعون
لا واحد يغدرهم
عمو حاتم افتهم من مازن
سبب المشكله الأساسية شنو
وهو لدغ هذاك الضابط من جوة العبايه
نقلة بمساعدة جماعته لحدود الأردن
والحمد لله فضت السالفه على خير
بعد طلايب ومشاكل جرت أشهر
أساور من سمعت بمازن مغدور واتصوب
تخبلت عليه ،
كايمه ادك وتلطم تريد تروح للمستشفى تشوفه ،
وعمو حاتم منعها
لحد مااجى مازن لبيته اخذها عمو حاتم وبيداء
ورجعوها لبيت رجلها
والحمد لله حياتهم أستقرت
مازن شسوة كام من يطلع للدوام يقفل الباب عليها
ومن يرجع تطلع هي وياه
ومن احد يروح عليها تكلهم/ مازن قافل عليه الباب
بس هي جذابه عدها نسخه من المفتاح
بس متريد احد يفوت عليها
تتكفى شر المشاكل ، والحجي اليخرمش القلب
والنفاق ، وكاله النسوان
وهو بس اقترح عليها تلبس بوشيه من تطلع
هي بسرعة وافقت لا اعترضت ولا شي
لان يحبها ويغار عليها
ومن يطلع هو وياها يبقون يتناكرون
يكلها / هذا الحجاب يجذب الشوف عليج لا تلبسي
هذا انعجب بيج
هذا باوع عليج ،
لا ترفعين راسج
لا تباوعين
لا تلتفتين
هي لبست البوشيه تكول/ حتى أكسب راحه بالي
من اطلع وياه ومايبقى ينك .
وبفجر اظلم خابرت ساهرة على منتصر
تعيط وتبجي، امها خطيه متخربطة
راحلها هو وطارق وهمام
واخذوها للمستشفى حاروا بيها الاطباء
محد وكف على علتها
خطيه اربعه ايام بالمستشفى وتوفت
أنتقلت الى رحمة الله الواسعة
ودفنوها بكاعهم بكربلاء
ساهرة خطيه هنا انكسرت
و انمردت وره افراك أمها
منتصر حجه ويه خالتي
كاللها / بعد مااكدر أبقيها هناك بيتها وحدها
اريد اجيبها تسكن ويانه
خالتي رحبت بيها
فرغنالها غرفة خالتي الثانيه
وراحت خالتي ومنتصر وعمو جابر
جابوها تسكن ويانه
خطيه نصبت جادر وعزة ثاني
بيوم عافت بيتها ودعت ريحه امها وذكرياتها
سكنت ساهرة ويانه مكسورة الخاطر
شكد ما تبقى كاعدة ويه خالتي
وتساعد سوار بالجهال
وتساعدنا بالبيت
بس دوم تبجي على امها
وتذكرها وتسويلها ثواب وتروح اتزورها
بيوم هي كالت / حلمت حلم وقلبي مقبوض منه
وخايفه على منتصر بس لا يصير شي بشغله
ما حجت الحلم بس طلعت صدقه
وانطتها للفقره .....
-
ما عدا على حلمها يومين وجنا نايمين
وهستوه مشعشع الفجر
ومانسمع بس العياط رج البيت رج .............
شكرا لزيارتكم عالم روايات سكيرهوم
