رواية هشاشة قلب الفصل الثامن والعشرون بقلم العباديه
هاا تصعددين
نزلت دمعتي وظليت اسرع بمشي
تي هذا مو صوته لو صوته جان عرفته بس صدگ سواهه وماإجه وراي .. بعد ولا اصالحه لو اموت على هذا موقفه وياي .
ظلت الهورنات تدگ واني ارجف وامشي سريع اخر شي سمعت صوت بإسمي
- ثُررررياااا
رأساً إلتفتت من سمعت صوته .. شفته كاعد بالسياره ويمه دكتور قاسم
مباشرةً نزلت دمعتي وغطيت وجهي بإيدي .. نزل من سيارته وإجه عليه وخر إيديه عن وجهي وسحبني من إيديه .
دكتور قاسم ظل يضحك
- ههههه نصبنه عليج بس خوش نصبه يمكن كلبج راح يوكف من الخوف اني كتله ماهر استمر بالنصبه بس هوَ أعرف صاحج لان مشيتج انعوجت كال راح تتخربط بالشارع هههههه
ماهر.. امسحي دموعج
ظليت امسح بدموعي الواحد من يحس نفسه بخطر مايدري شيصير بيه .
هوَ ظل ساكت بس صعدني بالسياره وهمس
- شبيج تبجين متوقعتج حتبجين
- غير ناصبين عليه بهالظهريه وبس اني بالشارع كلت هسه راح يخطفوني ويتاجرون اعضائي ويعذبوني ويحرگوني بتيزاب
ماهر.. عقلج اكشن زياده متأثره بالمسلسلات حيل هههه يابه بالناصريه ماكو خطف
- لا والله اكو
- اي بس قليل يعني نادراً وبالمناطق البعيده والاطراف اليريد يخطف مايخطف بشارع عام ويم جامعه
- شدراني
دنگت وظليت ساكته .
باوعلي بالمرايه وكال :-
- اسماعيل اليوم وين
- ماادري ماإجاني وأخابره مايجاوب
- اهاا
وصلنه دكتور قاسم ورجع بيه لااهلي .. هوَ سيارته صايره محط للماعنده سياره ولليريد توصيله .. كله هوَ يوصل الدكاتره الماعدهم سيارات لو السيارته عاطله كريم عشتو.
ظلينه ساكتين طول الطريق وكلساع يباوعلي بالمرايه بس نضرتيش كله خزر بخزر .
ادري مامليت من التخوزر .
كال :-
- بس اسأل سؤال !؟
- اي جواب
- من دخلتي للشط شفكرتي؟
- شنو شفكرت؟
- يعني ماگلتي اني بنيه ومااعرف اسبح وماكلتي ممكن اغرگ لان شط وروجات تاخذني اكيد اغرگ ومن اغرگ يجون يطلعوني زلم .. لو مطلعج رجال مااضمنلج شأسوي بس احمدي ربج البنات طلعوج لان بعدج قريبه مارحتي للوسط
- من شفت برودة الماي وشلون حلو من غطيت رجليه ماحسيت على نفسي
- هاي سالفه سولفيهه ع الدبدب مال ماحسيت لو نسيت
سكتت.
- اخخخخخ لج شااافووج والدشداشه ملطووششششه وشعرررجج طاللللععع
- ماهر توني طلعتي من رعب لاتدخلني برعب ثاني فددوه
- شمتوقعه يعني اسكتلججج اعبرلججج سالفتج هيج ثُررريااا بطلي هالسوالف جزعتيييني شوكت تعقلين
- من تبطل تگول ثُريا اني ابطل
- ابطل يابه ابطلل بس شويه بطلي هالسوالف
- اي مااسوي شي بعد
- سمعتهه قبل
- لا والله
- لتحلفين لان انتِ مضامنه نفسج تصرفاتج كلهه بدون عقل
- كول مخبله وفضني
- لا والله اضلم الكلمه
- ييححح
- ههههههه صارلي 4 أيام عايفج ومااتصلتي لج شلون گلب ردت اشوفج تتصلين لو لا ومااتصلتي رغم انتِ الغلطانه كلت هسه تتصل وتگول مااعيدهه وتعتذر مني لان سبق وحذرتهه بس ابدد الجان هذا الحايط يحس ثُرىٰ تحس
- انتَ هم ع الاساس عايز قساوه گعدتني بالأخير
- احسللج خليج بالاخير
- اي غير ماتكدر تقاوم نظراتي
ضحك من أعماقه بصوت رجولي
- هههههههههههههه ثقتج بنفسج عاليه
- الله يحفظهه
ظل مبتسم ودخلنه بالفرع اليروح لبيتنه .. لگيناه ازدحام ومسدود بالسيارات !
شكو شصاير !
شيوخ هواي بالشارع ! كوه وصلت السياره لبابنه .
لگيت بابنه مفتوح وولد تطب وتطلع !
عززا شكو شصاير ؟!
باوعت لماهر بخوف وهوَ هم باوعلي بخوف .
نزلت ركض ميته خوف وقلق .. ماهر لگه مكان للسياره صفهه ونزل وياي .
وكف بصفحتي من جهة باب الاستقبال يغطيني خاف يشوفوني. وصلني للباب مال الصاله ورجع للاستقبال
دخلت للصاله لگيت امي تبجي والبنات ملتمات عليهه يسكتن بيهه
ركضت عليهن
- شكو شكو شصاير فهموني
امي بس تدگ وتلطم
- ابني اذا صار بيه شي اموت ورااه
- ماما شكوو فدوه شبيههم اخواني ياهو من عدهم
ركضت لنهى
- ولج فهميني شكوو
نهى.. اسماعيل متصوب
- عزززاا شصوبه
نهى.. راح لهذا الضابط وتعاركو
- هاي الزلم شنو
نهى.. ابو الولد جاب الشيوخ يشدون علگ
- عززا وين مصوب
ظليت ابجي وياهن خايفه كلشي ولا إسماعيل
نهى.. متصوب بكتفه مو خطيره بس امي گلبتهه گلاب نسكّت وماكو والنوب هيَ منا مريضه شيهديهه
ظلت امي تنحب واحنه نريد نروح للمستشفى واخواني مايقبلون اخر شي حسن اخذ امي وراح بيهه لان شبعت بجي مفرفحه وتلوب .
اني التخيلات المو زينه كلهه اجت ببالي ظليت اشهك وابجي .
كلشي ولا اسماعيل.
اندك باب المطبخ رحت فتحته ماهر كال :-
- ثُرىٰ سوي الچاي خل نضيف الناس
- إذا هيج شيوخ وخوش ناس شبيه ابنهم مايستحي ماعنده عرض البنيه انخطبت وراحت بعد ليش هيج يسوي الله لاينطيه
- ثُرىٰ عوفي هالكلام هسه وسوي جاي عيب العالم كاعده مااكدر اعوفهم
- اي هسه راح اسوي
- من تكملين خابريني مو تصيحيني ويسمعون صوتج
- لا لا مااصيح
- عفيه ببنيتي
سويت قوري چبير مال چاي وصبيته وخابرته دخل أخذه .. إلتجئنه للقرآن والصلوات الله يحفظه ويكوملنه اخوانه بالسلامه .
راحو العالم وحددو يوم يتفاهمون
بيه
من راد يروح ماهر اجه كاللي
- اني راح اروح للمستشفى اشوف اسماعيل شويه وارجع ديري بالج على نفسج لتنقهرين مابيه شي خلي ايمانج قوي
دنكت وبجيت اني كوه متظاهره القوه مقابيل اخواتي وهسه حچه هيج ماتحملت.
سحب راسي خلاه على صدره وظل يمسد على شعري
ماهر.. ميلوكلج البجي يروحي هسه يطيب ويطلع تتلگيه بضحكتج وفرحانه .
مسح دمعتي برقه بإبهامه ومرره على وجناتي بهدوء .. ابتسم بهدوء بوجهي وعيونه تطمني وتخليني أشعر بالراحه والإطمئنان .
راح واني ظليت ادعي وأصلي .. لما رجع كال ماكو خطر والإصابه خفيفه شغلة كم يوم ويطلع . فدك بقت عدنه وتبجي تلوم بنفسهه كله من وراهه اكلت روحهه لحم نهدي بيهه وماكو بس تبجي وتصيح من وراي صار بيه هيج .
مرت كم يوم وطلع إسماعيل .. تلكيناه بالضحكه والهلاهل واني تبجي بدموع فرح .
اني اضحك فرحانه وسوينه كل الاكل اليحبه بيتنه جان اظلم لان مابيه اسماعيل .
گعدناه بالاستقبال وسلمنه عليه حضننه كلنه ويضحك .. مقابيلنه باس فدك براسهه وكالهه
اسماعيل.. شغلة كم اسبوع ونتزوج حضري روحج
فدك.. ان شاء الله
بقت عدنه تهتم بيه والضحكه ماليه وجهه حتى اخوي مكيف بيهه .. خليهم خطيه .
صار يوم الكعده وهم انكلبت الطارمه بالشيوخ والمعگلين .. مااخذنه فصل ولا شي بس اسماعيل شرط عليهم يطلع الولد خارج المحافظه وأي خطر يصير عليهم يتهمونه هوَ .
خلصت المشكله وانحلت الحمد لله والشكر .. رب ضارة نافعه خلصنه من الضابط للأبد
اني سألته
- إسماعيل شأخذاك انتَ للولد وصوبك
إسماعيل.. هوَ إتصلت عليه گتله يكف إيده عن خطيبتي ظل يهدد ويگلي بالليلة عرسك يزفوك لگبرك مااهتميت لكلامه بس استفزني من إتهمهه وگال .. هيً تحبني وكالت مجبوره عليك واصلاً كل صور علاقتنه اني وياهه عندي وإذا بيك خير هسه تجي تواجهني الزلم تواجه .. اني كتله مااخاف من احد وماتحملت كلامه أخذت سچينه ورحتله لدوامه .. خليته بس يطلع حجيت وياه .. جان اسلوبه مستفز الى أبعد حد خبلني طلعت السچينه وهوَ ظل يضحك مستهزأ طلع مسدسه وظل يهدد بيه .. سحبته من ياخته من بلش يتجاوز بالحجي ورأساً صوبني .
- انتَ المن رحت
- لا اخليه يگول عليه مايواجه ومو زلمه
- يلا خلصنه من عنده
- اي حضري روحج اسبوعين وتحضرين زواجي
- يعني وره الامتحانات
- اي بالعطله
- خوش خل نحضر من هسه
مرت اسبوعين ماهر رجع يتصل بيه والله وگف وكف ماصايره ويانه بهل كم اسبوع كلهن مافاركنه .
خوش كلما يزعل يصير موقف يرجعه طبيعي
ظل ساندني وواكف وياي ماعافني .
امتحنت امتحانات المرحله الثالثه مال نهاية السنه كلهن زينه بيهن وحتى درسه جايب الاسئله ماي كلهه الطلاب حلتهه سوواله حسنه اخيراً ورحم بحالنه .
محد طلع دور ثاني كلنه نجاح . اخيراً
عطلنه وظلينه نحضر لعرس اسماعيل متحمسه حيل اريد اخبل ماهر اخبله. . هاي عود أذا صحت فرصه وشفته .
البيت مخبوص ونفس كل الاعراس العراقيه زحمه وبوخه والجو حار لان بالعطله الصيفيه .. بيوم الحنه جنت لابسه فستان طويل بس خلع لان ماهر ماقبل بما إنو لبست قبل هالمره ماكو بعد .
ركصنه بالحنه ولعبنه لعب سوينه چوبي وفرحنه صدك يوم ماينسه.
خابرني من خلصت حفلة الولد كال
- اريد اشوفج
- وين تشوفني صايره هوسه
- معليه اشوفج يعني اشوفج
- هههه مااكدر
- صدك عود؟
- والله ماكو مجال
- اممم تمام لعد
سديته منه واني مخططه اخليه يشوفني بس شويه امرمره .. رحت بدلت لبست فستان قصير ماروني مكشوف من الظهر اعشق هيج فساتين وكل فساتين الحفلات العندي من هالنوع .
حطيت حمره ماروني ورفعت شعري كعكه لان مايحبه مايخليه ياخذ راحته حسب كلامه .
لبست كعب اسود ونزلت خصل وطلعت .. النسوان الغريبه طشت بقينه بس احنه ظلينه نركص براحتنه .
تقوى جانت منعزله وبعدهه بعزلتهه تأثرت حيل بالصار وياهه وحتى اكلهه قل وكلامهه نفس الشي .
سحبتهه وياي ماقبلت وظلت ترجع لوره ماعدهه ثقه بنفسهه فاقده ثقتهه .. عبالك تحس بنقص بدون رجلهه .
شكد قنعت ماكو مااختلف تفكيرهه تحس نفسهه ناقصه لان حياتهه تدمرت بأشهر وهيَ بعدهه شابه ببداية عمرهه .
اجتني موج
- ثُرىٰ فد كاسة مي حبابه عطشت حيل
- روحي للمطبخ ماتندلينه
موج.. انتِ جيبيلي
- يختي انتِ من اهل البيت مو خطار
موج.. مااعرف انتِ روحي
- رايحه تدللين
رحت للمطبخ اطكطگ بكعبي واتمايل بمشيتي وفستاني الماروني المضبضب كاعد وياي .
دخلت للمطبخ رأساً انسحبت من إيدي وانطبگت ع الحايط .
شكرا لزيارتكم عالم روايات سكيرهوم
