رواية بنت الحرام الفصل الثاني بقلم جمانه السعيدي
جمانه:::
بقيت صافنه بوجهه..وكتله:
شنو..شكلت!
شكلت..كتلج شنو قياس ملابسج الداخليه!.
وفوكاها يعيد السؤال بدون خجل ولامستحه هذا شبي ..فعلا موطبيعي فكتلة..
اخويه..شنو هالسؤال انت شعليك!بخصوصياتي!
اشو هذا بسرعة وكف السيارة ع صفحة:
وزمخ بيه:
اسمي..ضرار..ضرار..وبس..وهاي اخر مرة تصيحيلي اخويه افتهمتي!!
خفت من صوته ومن عيونه فكتلة:.
ماشي..ماشي..اصيحلك بس ضرار..
ورجع يسوق بس بعد مسألني وبالاخير وكفنا يم بيت..جبير..كولش وحديث الوانه الخارجية..حيل هادئه وع الباب..مكتوبة قطعة جبيرة(لئن . شكرتم ..لازيدنكم)
نزل فتح الباب ودخل سيارته منطقتهم مبينه حيل هادئة حتى مشفت احد يمشي بالشارع..ومن نزلت من سيارته..نزل الجنطة وانطانياها..مشيت وراه..دخلنا صاله جبيره بيها تخمين واثاث مشايفته بس بالافلام..اي صدوك..
طلعو حيل زناكيل..كعد ع التخم..ردت اكعد كلي:
ابقي واكفه..استغربت!
ماشي..بقيت لازمة..الجنطة..واكفة سمعته..يكول:
يوم...يوم..ام ضرار!
شويه وطلعت مريه من الغرفة..لابسه نفنوف نيلي منقط..
جيتك يوم..
من شفتها كلت؛
السلام عليكم.
اشو مردت السلام ولا حاجتني باوعتلي من فوك لجوة وكالت لابنها!
ها..جبتها!.
اي..جبتها..
حسيت نفسي مو انسانه عبالك..فد نعجة اشتراها من السوك وجابها..ذوله شبيهم؟؟ كعدت ع التخم كبال ابنها..هو خلة رجل ع رجل وورث جكارة..حتى مكلتلي اكعدي بقيت واكفه..سمعتها تسألة:
ها..يوم نتغده!
ابويه بالمحل مو!؟
اي بالمحل..راح ويه..سعيد
ماشي لعد صبولنا غده
اي..يوم..اصعد بدل..بينما هديل تحضر الغده..
وصاحت..
هديل..هديل..يله حضري الغدة اجه ضرار..
جان تجي بنيه تقريبا بعمري..بس..حيل ضعيفة..
اي..اي يوم هسه راح اصب..
التفتت عليه المرة الجبيرة:
شبيج واكفه روحي..ويه هديل حضرن الغده
هااا..اني!؟
اي انتي..لعد دا احجي ويامن!؟
اي..خاله...ماشي!
ومشيت شفت البنيه بالمطبخ مستعجلة تركض ركض وتصب بالغدة..بقيت صافنه عليها..هاي شبيها ليش هالكد مستعجلة..اخوها حجيه كوله الغاز..وامها عبالك تمثال ابو الهول..بس تخازر بيه..وهيه..تشتغل بسرعة عبالك..مكينه مال خياط..يربي شنو هالعائلة احسهم كومة مخابيل..بعدين اشو همه بسرعة خلوني افوت للمطبخ شنو القصة..اباوع المطبخ جبير..كولة سيراميك..من السكف للكاع والكاونتر من هذا الي الي اشوفه بالاعلانات ..وبالنص..ميز مال اكل جبير..وداير مدايرة 12كرسي..وسمعتها تكولي:
اكولج..بسرعة..طلعي..الزلاطةواللبن..والطورشي من الثلاجة قسميهن باماعين يله..
انتي ليش مستعجلة ع كيفج!
كتلج بسرعة!
ياااا..ليش بسرعة نصب ع كيفنا!
اذا الاكل تأخر على ضرار امي تكلب الدنيا استعجلي..
ياااا..هاي شبيها هالكد تخاف من امها..
وفعلا..صبينا بسرعة وطلعت صاحت امها..جتي..كعدت..بس..
بس ممدت ايدها..الى ان نزل ابنها..شنو ذوله شبيهم فكرت كلت هسه هاي الي اسمها هديل تكعد تاكل واكعد يمها..بس هي مكعدت بقت واكفه يم الطباخ..كعد ضرار ع الكرسي..امه تباوع عليه مد ايده شال الخاشوكة...يله هيه بدت تاكل..شفت هديل هزتلي راسها..تأشرلي..اطلع..
طلعت من المطبخ جتي وراية:
يله..خلي نطلع..انطف البرة بينما يتغدون!
ليش..احنا متغدة وياهم!؟
لا..احنا ناكل بعدين من يخلصون!؟
ياااا..ليش
انتي شكد تسألين شنو ليش..قابل نكعد كدام ضرار..ناكل!؟
وشكو..بيها!
هذا نظامنه احنا البنات..مناكل يمهم افتهمتي ومو كل شويه تسأليني..
طلعتني برة انطتني..ماسحة وصونده:
انتي نظفي البرة..واني اصعد للغرف الفوك!
باوعت المساحة البره حيل جبيرة..فكتلها:
لا..اني ما اكدر انظف وحدي تعالي وياي..
طبعا انتي حيل دوختيني..نطفي وسكتي مثلي صيري سكوتيه..
ليش يعني!
امي متحب..وحدة تسأل وتحجي..من هسه تعلمي..
وعافتني وراحت..دا انظف بالبرة انفتحت الباب هاي شنو..
دخلت مريه لابسه عبايه ع الراس..تقريبا تشبه ام ضرار..وياها اثنين بنات مبوشات بس دخلن للبيت رفعن البوشي وحدة تكول للخ:
عزة..عزة..الساعة ب12ونص هسه ضرار..يكلب الدنيا علينا..
المرة الجبيرة كالت:
شنو يكلب الدنيا..ليش احنا شمسوين..اكيد نتأخر بالسوك..هو جهاز مال عرس بي اشكال والوان..معليحن اني احاجيه..
باوعت..صدوك ذني جايان من السوك بيدهن كومه علاليك..بس ليش هالكد خايفات..اذا يتسوكن ..وفكرت شنو اخوات ضرار يلبسن بوشي من يطلعن..زين شعجب هو قبل اجي سافره لبيتهم ومكلي ع الاقل لبسي حجاب..استغربت واكفه كبالهن..ولا انتبهن لوجودي هالكد..ممرتبكات..وخايفات دخلن جوة هنه وعلاليكن كتلني الفضول كلت خلي افوت اشوف شحيصر..بسرعة ذبن العلاليك بالصالة وفاتن اتلاثتهن كبل للمطبخ..رحت يم باب المطبخ حتى اسمعهم شنو يحجون اول مفاتن كلهن:
ليش..تأخرتن هالكد؟!
وحدة من البنات كالت:
مو المحلات ازدحام و
اسيل سدي حلكج اني دا اسأل خالتي..ليش هالكد اخرتجن!
خالة شنو اخرتهن غير جهاز مال عرس..والبنيه تختار على..
على كيفها غراضها!
واذا تختار ع كيفها اطلعن من 8الصبح..وترجعن 12ونص الظهر!؟
خاله ..قابل بس احنا بالسوك!؟
هذه اخر مره تطلعن..بعدين شكو ماخذات.. سلسبيل وياجن!
شكو بيها بعد خالتك..سلسبيل هم مخطوبه وباجر عكبة هم تطلع اجهز..هسه شصار ع شنو انت تحقق ويه اخواتك..خطية الطريق كوله يتراجفن تأخرنا ما اتأخرنا..ع كيفك وياهن يوم..ترة اخواتك..خطار يمك..
خاله..خطار..لو مو خطار..هاي اخر مرة يطلعن للسوك!
جان البنيه الجبيرة تكوله:
بس بعدني ممكمله غراضي!
خلي خالتي وامي يطلعن يجيبن باقي الغراض..مفهوم!
اي..صار
وطلعن من المطبخ رجعن للصالة الجبيرة الي اسمها اسيل..اخذت نفس وكالت:
هووووووف..الحمد لله عدت على خير..كلت هسه ضرار..يكلب الدنيا..
الاصغر كالت:
تعالي خلي نشوف الغراض..
الجبيرة انتبهت عليه لان اني واكفه ولازمة الماسحة صاحتني:
منو انتي!
اني..جمانه!!
هااا..انتي جمانه الي صارت ع مودها الطلابة اول البارحة
طلابة؟؟طلابة..شنو؟؟
معليج..تعالي ادني
جيت وكفت يمها وكفت كبالي..
هاي شبيها يمكن هم خبلة مثل اهلها هي هم ضعيفة مثل هديل اشو وكفت كبالي وعصرت خدي..وكالت:.
اكولج..انتي شمخليه لوجهج وهالكد متفح..شنو تستخدمين حريم السلطان..
جان اللخ..يم تجي توكف بصفها..وتباوع بوجهي وع جسمي وتكولها:
اي مبينه تستخدم حريم السلطان مو كتلج خلي نشتري. منه دباعي وجهها..شلون متفح..وصدرها..منفوخ وواكف!؟؟
عززززة..عززززة ذني شبيهن شيخرطن...شافني ساكته..كالت سلسبيل.
شبيج متحجين..شلون تستخدمين الكريم مال حريم السلطان كم مرة باليوم!
مدا افهم عليجن شنو حريم السلطان اني ما استخدم..كريمات!
جان وحدة تباوع ع اللخ..
هااا..يعني هيج..وجهج من الله متفح وصدرج هيج واكف وجبير؟؟
بعدها تحجي جان تطلع امهن وخالتهن من المطبخ جان تكولها:
اسكتي..هسه بعدين نحجي..جان تجي امهن تكعد..يمهن شافتني بيدي الماسحة وواكفه جان تشهك حيل وتخنزلي:
ولج..شنو هاي:
خفت من شهكتها..
شنو خاله شصار..
ولج وصخة قذرة شنو هاي الماسحة الواكفه بيها ع الزوليه..
دنكت اتذكرت الماسحة بايدي
العفو خاله هسه اشمرها برة
العفو خاله شنو..انقلعي من وجهي..
بعدني مطالعة من الصالة شفت ضرار..طلع من المطبخ..وكال:
اصعد انام ساعة 3كعدوني ورايه سفر
اي يوم اصعد اخذ راحتك..
وطلعت برة كمت انشف بالممر..شويه وطلعت هديل صاحتني..ع مود نتغده..كعدنا تغدينا اني والبنات..طبعا هنه يحجن بيناتهن....بس اسيل يمكن كتلها الفضول فسألتني:.
اي..مكتيلنا هذا وجهج هو هيج من الله..لو من عبد الله!
مفهمت شنو من عبد الله!
يعني شنو تستخدمين..اني ع وجه زواج واريد وجهي شويه يورد لان ضعيفة..
جان هديل تكولهن:
اسيل ..معليح بيها..امي شوصتنا قبل متجي لبيتنا جمانه مو كالت لتسلوفن وياها ولتختلطن بيها خلن حجيجن بس ع شغل البيت..
فأني ضجت من حجي هديل فكتلها:.
ليش..ليش هديل اني شبيه ومتختلطن بيه!.
فكالت:
والله ما اعرف بس هاي اوامر ضرار..وامي وصلت النا كلامه..
هااا..وانتن شيكول ضرار تكولن اي!
ياااا..لعد شلون غير اخونه الجبيرونحترمه
تحترمنه لو تخافن منه؟؟
جان وحدة تباوع بوجه اللخ..بعدين كالت اسيل:
مبين عليج وكحة ومتخافين..بس هذا الحجي ميمشي ابيتنا..امي..تملخج..وتسويج وصل ..وصل. اذا تسمعج هيج تحجين..
ليش اني شحاجيه..
جان هديل تكول:.
هسه تسكتن لو اروح اكول لامي..
سكتنه..سكتنه..
ذني شبيهن..وليش ضرار..هالكد..مشدد عليهن ميحجن وياي..اني شبيه..قابل بيه مرض واعديهن..بعدين شدعوة هالكد يرجفن من اسم ضرار..موت اليكرفة..مينجرع حتى اهله..مخليهم..مثل الخرخاشة بيده..
خلصنا غدة كمت اريد ابدل سألت سلسبيل:
اكولج عيني وين اخلي ملابسي وابدل
تعالي..اخذج..لغرفتج!
غرفتي!
اي..امي البارحة كالت رتبن الها الغرفة اليم المطبخ..
ليش غرفة وحدي خو انام يمجن!
لا..شلون تنامين يمنه..همه هيج كالو تنامين بهاي الغرفة..واخذتني من ايدي فتحت باب غرفة بيها جرباية ام نفر..وكنتور بابين..وميز صاج بيه مرايه..كالت:
هاي غرفتج خلي ملابسج بالكنتور..وبدلي براحتج..
وفهمت همه ميردوني اختلط بيهم لان عازليني عن بناتهم وعن العائلة..فكرت بعد احسن اشو كلهم مثل المخابيل واحد اضرب من اللاخ..رحت بدلت ملابسي طلعت موبايلي..تذكرت..شلون اكنك سويت بحث شبكات طلعتلي شبكة..يمكن مال بيتهم فرحت كلت لسلسبيل:
هذه شبكتكم..
باوعت بموبايلي
اي هيه..
انطيتها الجهاز..
فدوة كتبلي الرمز حتى اكنك عليه..
اخذته كتبت الرمز بس..شويه وكالت:
عززززة..عززززة..شنو هاي التطبيقات..
كتلها
شبيج خوفتيني ياتطبيقات:
فيس بوك..وفايبر..وماسنجر..وتيك توك..وانستا..
ليش شبيهن التطبيقات!
عزززة تكول شبيهن..غير اذا يشوفهن ضرار..يتخبل!.
ياااا..ليش يتخبل..شبيهن.
مسحيهن..عيني مسحيهن قبل ميشوفهن بجهازج وتبتلين!
ليش اجهزتجن مبيها تطبيقات..
لا مبيها..احنا بس ع اليوتيوب نتفرج..ميقبل اي تطبيق باجهزته..
ليش..يعني بعدين هو شمدريه!
ياااا..شلون شمدريه..اصلا هو ساعة الساعة يلم اجهزتنا..ويفتشهن..
تحجين صدوك..يفتش اجهزتجن!
اي..اني كتلج احذفيهن احسلج..
عجيب اذا ماكو تطبيقات لعد شتسوون بالنت..
كتلج بس ع اليوتيوب!
واسيل..شلون تحجي ويه خطيبها..وانتي شلون تحجين ويه..خطيبج..وتتراسلين!
منتراسل بس هو يتصل بيه ع الخط ونسولف.وحته من يخابرني..هم بسكوت عن ضرار
اويلي..هالكد..متحكم بيكم ضرار..
اكولج..انتي لسوين نفسج عود احسن من عدنا..راح تعيشين بهذا البيت حالج من حالنا..واحتمال حالج انكس من حالنا بعد
ياستار..ليش..
هاي بعد..اسمعي باذنج..وشوفي بعينج..وسكتي..
ساعة3 ونص نزل ضرار من فوك..وجنطته بيده راح باس امه وطلع استغربت اشو عمو مأجة من الصبح لحد الان..وين كل هالوقت..وطلع ضرار..من اجه عمو حجيتله ع الاشياء الغريبة الي صادفتني ابيتهم..استغربت من كلي:
بنيتي عادي..هو هذا نظام حياتهن البنات ضرار هو امشي البيت ع مرامه:
ليش عمو..انته مو ابوهم..ليش..ما الك كلمة!
عمو هاي سالفة طويلة لتدوخين راسج بيها...
عمو الله يخليك سولفلي..خلي ارتاح!
عمو..اني..جنت اشتغل عامل بمحلات..حجي عظيم ابو زوجتي ام ضرار..قبل ما اتزوجها..جانت..بنيه شابه تجي ع ابوها للمحل..حبتني وحبيتها..ابوها مقبل اتزوجها لان حافي وماعندي شي..بس ام ضرار..حبتني من صدوك..سوت المستحيل حته اصير الها..وبعد ضغط ع ابوها وافق..
هااا..يعني لان انت فقير مقبل بيك!
مو بس هذا السبب
لعد
والله عمو السبب الثاني يفشل..ما اكدر احجيه
لا عمو كول لان اني راح اتخبل!
عمو اني عندي اخت وحدة جانت حلوة وزغيره..حبت واحد وانهزمت وياه..وهذا الواحد..طلع كلب ابن كلب..طلع بيها..للامارات وبقو هناك..شبع منها..وعافها..ولان هي سوتلها مكسورة ماكدرت ترجع..بقت هناك..تعرفت على..
واحد خليجي..ساقط ابن ساقط..شغلها بقاعة..مال حفلات تركص..وصلت اخبارها..لاهلي وعمامي..كالو..لو تروح تذبح اختك..وتغسل عارها لو نفصخك..من العشيرة..سافرت للامارات دورت عليها مخليت مكان يعتب عليه..خلصن فلوسي..الي اداينتهن للسفر ورجعت..صارت طلايب من جديد..الى ان فصخوني من العشيرة فد مرة..حجي..عظيم عطف عليه وشغلني بمحله وحسبني مثل ابنه..بس شاسوي بته حبتني..وسوت المستحيل حتى ابوها يقبل..حتى رادت تذب نفسها بالشط..وهيه بته الوحيدة اضطر..يقبل وتزوجنا..خلاني بهذا القصر..التشوفيه..وانطاني بته ولزمني محلاته وحاله وماله..وخلفت ضرار..وبناتي اسيل وسلسبيل..بس..علاقتي بمرتي..خربت..لان..هيه متنجرع عصبيه..وهاملتني..اضطريت اتزوج امج..بالسر..ام ضرار..جانت حامل بهديل من تزوجت امج..من عرفت..اتخربطت ورادت تموت ..ممتوقعة اتزوج عليها..اني بعد ما اعرف شلون اتصرف..رجعت لحجي..عظيم كتله حجي راح اطلك مرتي الجديدة واني غلطان..بس هو بعد ميثق بيه طردني من المحل..ومن البيت..رجعت بقيت سنتين يم امج..بس ما طلكت ام ضرار..فجأة خابرني كلي ارجع لبيتك..رجعتلهم..بصراحة تندمت..بس بعد ما اكدر اعوف امج لان حبيتها..وهمه هم رضو بالامر الواقع..صارت حياتي اسبوع يم امج واسبوع يمهم..ام ضرار..حرمت نفسها عليه..وكالت انت..لتحسب..
لتحسب نفسك رجلي مجرد اطب وتطلع كدام الناس..لان ابويه ميريدني مطلكة وعندي كومة. جهال..وراح تشتغل مثل قبل عامل بيوميتك..ورجعت اشتغل بمحلات حجي..عظبم عامل..وسنه ع سنه كبر ضرار..كبرته امه..وزرعت بكلبة الحقد..ودللته..وخلت..بيدي كل حلالها لان ابوها..مات قبل 6 سنوات..وخلته الكل بالكل..وحتى بناتي ما الي ايد بتربيتهن..لان امهن تكول خلي ضرار..يربيهن حتى ميطلعن ساقطات مثل عمتهن!انت
