رواية بنت الحرام الفصل الثالث بقلم جمانه السعيدي
من حجالي عمو..حيل انقهرت عليه هسه فهمت..ليش عمو ما اله كلمة..وليش ضرار الكل بالكل بالبيت..بس شعجب..ضرار قبل اعيش عدهم..هذا اللغز الي مفهمته ومر يوم واثنين شفت العجايب من ام ضرار..حيل قاسيه وتعاملها خشن ويه بناتها خطيه سالتهن سل..واني طبكتني وياهن اول يومين جانت زينه وياي...بعدين تغيرت..كامت كل شويه جيبي هاي ودني هاي..اوكفي ويه البنات تعلمي طبخ..ومتصحيلي بأسمي..تسميني..الغبرة..طبعا ما اكدر احجي لان شكيت العمي..كلي اسمعي منا وطلعي منا حالج حال البنات..وهيه بيها..طبع غريب..عجيب كل ما انظف تصيح بعده البيت وصخ..وتكلب الدنيا اذا شافت تراب..وحجيها كله رزايل..خايسات..وصخات ..قذرات..مراويه البنات نجوم الظهر..واني طبعا شويه شويه معاملته وياي من سيء الى اسوء..ورة اسبوع من القهر رجع ضرار..راح شايل جنطة رجع بيدة جنطتين احتمال جايب هدايه لخواته وامه المهم كعدو يتغدون اني ابد محجيت وياه لان شفت اخواته بس سلمن عليه وطلعن كعدن بالصالة..همه يتغدون بالمطبخ..خلصو غده..سمعت ام ضرار:
وينها هاي الغبرة..
طبعا عرفت هي دتصيحني لان هذا لقبي الجديد الغبرة رحت للمطبخ:
ها خاله:
سوي جاي..بسرعه..لضرار.وابو ضرار اني راح اتمدد بفراشي!
هي طلعت من المطبخ اني وكفت اسوي جاي احس ضرار..يباوع عليه سمعته يكول:
مو كتلج..لتلبسين اسود!
تعجبت اشو هذا يحجي كدام ابو..تشجعت كلت :
عمو..يعني انت تقبل انزع الاسود..وماما صارها..23يوم من توفت؟
بنيتي قابل الاسود راح يرجعها..
لا مراح يرجعها بس اني كلبي مينطيني البس الوان. بعدين هو ضرار ليش يتدخل بملابسي..
عمو سكت بس ضرار..كال:
عوفها..يابه..اني اعرف شلون اخليها تنزعه للاسود..
عمو مجاوبه تعجبت ليش عمو هالكد ضعيف كدامة يعني هو ابنه شدعوة شايخ..عليه وعلى البيت كوله..
صبيت الجاي وطلعت كعدت يم البنات..بالصاله..اسمعهن يسولفن ع غراض مال عرس..لان الي فهمته..انو اسيل عرسها بعد 3اسابيع..وديحضرن اني ساكته بس اباوع لان.تعلمت ما ادخل وياهن بالحجي امهن محذرتهن ميحجن ويايه بس ع التنظيف وشغل البيت..صار العصر..عمو وضرار..طلعو للمحل ورجعو بالليل تعشو..خاله..ام ضرار..
كالت:
سدن البوري..لتخلنه مفتوح ع الحديقة للصبح..هنه وحدة تباوع ع اللخ..عرفت يردني اكوم..يتعاجزن.كمت طلعت سديت البوري ..محسيت اله ضرار..ورايه..فزيت من شفته..قريب مني :
ساعة بالوحدة..اصعدي لغرفتي!
قصدك..باجر الظهر..بالوحدة..بس ليش اصعد شبيها غرفتك يوميه انظفها:
لا..مو باجر..اليوم..وره 12بالليل!
شنو..؟
مثل مسمعتي!
ليش..يعني!..شعندي صاعده نص الليل!
عندي شغلات جبتهن الج من تركيا!
انت جبتلي..شنو المناسبة!
انت شكد تسألين كتلج صعدي وخلص.
فكرت يمكن جايبلي ملابس حتى انزع الاسود..ردت اكوله ما اريد شي عافني. وراح...دخل جوة..
بقينا كاعدين شفنا..الفلم ع mbc2خلص..ساعة 12 اني نسيت ضرار..ونسيت كلي اصعدي وره 12 فتت..لغرفتي انام..شويه ودخلت..هديل..:
جمانه ضرار..يصيحج!
فدوة كوليلة باجر احجي وياه اريد انام هسه حيل نعسانه!.
واني هم حيل نعسانه مبيه اصعد..فوك..بعدين ضرار كال خلي تجي بسرعة..
ماشي شويه واصعد..وراحت..بقيت تقريبا عشر دقايق افكر..هسه شكوله اذا كال جايبلج ملابس..ونزعي الاسود وبقة يلح..ويخوف بيه بصوته وعيونه..هاي شبيه ليش خايفة قابل راح يجبرني انزع الاسود..اكيد ميجبرني..ليش هيج خابصة..نفسي وافكر..خلي اصعد اكوله شكرا ليش تعبت نفسك ما اريد ملابس ومراح..انزع الاسود وهاي هيه فضت خلصت..طلعت من غرفتي صنطة..البوب كلها مسدودة صعدت..فوك..دكيت باب غرفته كال:
فوتي..
دخلت لكيته كاعد ع القنفة الي..يم شباك غرفته لان غرفته جبيرة بيها غرفة نوم كاملة وقنفتين متوسطات وبلازما جبيرة حيل مرتبه..اول مدخلت..كال..
تعالي:
فتت..كال..
كعدي..كعدت ع القنفه..جان يفتح كنتورة يطلعلي..جنطة زغيرة..كلي..
فتحيها..
فتحتها..عزة..هاي...شنو شو بيها بس ملابس مال..نوم..من هاي الخفيفة كولش..
كتله:
هاي شنو:
كال:
الج..اختاري اي واحد يعجبج..ولبسي..بينما انزل..اجيب ثلج..من جوة..
هذا شديحجي..اني مثل الي انسطرت من كلامه..شفته طلع بطل جبير جوزي وخلاه ع الميز الزغير..
بقيت مبهوته:.كلي:
شبيج...صافنه اختاري..اي واحد..وخلي عطر..اكو بالجنطة نوعين..
هاي انت شدتحجي!
شنو..دا احجي انكليزي..اكولج...بدلي وخلي عطر بينما انزل اجيب كرزات ومزة من جوه..
شنو..بدلي شنو خلي عطر..
اي قابل اتونس..وياج..بهدومج المصخمة هاي
ادنيت يمه عبالك اريد اسمعه زين:
شنو..شكلت!تتونس ويايه!
اي..وياج..شنو اكو..وحده غيرج بالغرفة..
حسيت..روحي طلعت من صدري..بسرعة كتله:
يا..حقير..يا..ادب سز
وتفلت بوجهه..وركضت ملحك..بيه..طلعت..بكل سرعتي اركض..سمعته..يحجي ورايه:.
لج اوكفي..بت القندرة
موكفت بقيت اركض فكرت بسرعة ما اروح لغرفتي اخاف يلحكني ويضربني لان تفلت بوجهه وانهزمت..ركضت لغرفة..البنات..دخلت همزين كلهن نايمات كعدت بالكاع ارجف وكلبي..يدوك حيل ودموعي..يجرن هذا شبي..شمفكر..اني شنو شلون هيج يحجي ويايه شنو قابل اني مرته ويكولي بدليلي واتونس وياج..شنو الحجي..
ابقة هنا للصبح..ومن يصير الصبح اروح احجي لعمو كل الي صار..بس..حسيت عمو مراح يسوي شي اصلا عمو عبالك يخاف من ضرار..وام ضرار..ميفتح حلكة كدامهم بكلمة ويمكن اذا حجيت محد يصدك بيه احصلي كتله بالخالي بلاش..وبظلموني..بالباطل..فكرت..ما ابقة بالبيت من الصبح..اروح لخوالي..اي عندي 10الاف بجنطتي يكفني كروه لبيت خالو حسيب..لان بس خالو حسيب علاقة ماما بي..جانت زينه واندل بيتهم وجان يسأل ع ماما من تمرضت..بقيت كاعدة للصبح الرجفة بجسمي والخوفة بكلبي..بس سمعت الاذان كمت اخذت جنطتي وطلعت..بعدها دنيا الفجر ماكو سيارات..خصوصا الحي مال بيت ابو ضرار..هاديء..مبي ناس تمشي هوايه بقيت اجر بجنطتي بيها تايرات..وامشي..بردت شويه..لان مفكرت البس جاكيت ..وصلت لراس الشارع بيه تكسيات اسمعهم يصيحون..مستشفى....باب الامام...الشعله...هاي المناطق مال الكاظميه وكفت يم ابو تكسي انطيته عنوان خالو حسيب..وصلني للباب..دكيت الباب طلع خالو رأسا..شافني كال:
جمانه..
شلونك..خالو..
هله..هله خالو..وين جنتي..وليش طالعه من الفجر
فكرت احجيلة لولا..بس اذا حجيت اخاف يروح يتعارك ويه عمو..وتصير مشكلة..فكلت لا..ما احجي..كتلة:.
خالو جنت ابيت عمو ابو ضرار..خالو ما اريد اعيش عدهم..
بعد..خلوني عدكم!.
كال:.
دفوتي هسه نحجي جوة..
دخلت...كعدت مرت خالي..طبعا بيت خالي حيل زغير وحالتهم ضعيفة عدهم..3غرف..وحده لخالي ومرت خالي..وحده..لعباس ومرته وجهالة..والثانيه لمشتاق ومرته..وبالنص الصاله كلت ميخالف وين مجان انام حتلو ..بالمطبخ..انام..
اول مشافتني مرت خالي.
هاي منو جمانه
شلونج خاله ام عباس.
هله..
اشوفها ردت السلام من ورة خشمها..وكالت:
اشو..جايه من الفجر..
خاله اريد اعيش عدكم
اشو..اشرت لخالو فاتو لغرفتهم...البيت حيل زغير وصوتهم مسموع اسمعها تكوله:
شو هاي تكول اعيش عدكم..وين نخليها ابو عباس..فوك راس الحبلة
يامرة..قابل اطردها!
اي اطردها..بعدين حتى اذا عدنا مكان منخليها..عدنا..هي هاي العايزة..والله..
اصبري ..ونصي ..حسج لتسمعج..خطية..
متخليها تسمعني..وديها لهذا الجان مربيها احنا شيخصنا!؟
بيها!
يامرة خلي تاخذ نفس..تتريك..وبعدين نشوفلها صرفه..
حسيت حجيهم سجاجين تكطع بكلبي..فعلا..ذوله ميردوني مثل مكال ضرار..كال خوالج ميستقبلوج..كلت ميخالف اتحمل حجيهم حتى لو اكولهم خلوني خدامه عدكم..ولا ارجع لبيت عمو ابو ضرار..واشوف وجه ضرار..وبعد مسمعت صوتهم بقو يحجون بصوت ناصي بعدين طلعت مرت خالي:
كالت..
اي شلونهم بيت عمو ابو ضرار!
هااا..زينين خاله..بس مرته حيل ظالمتني ما اريد ابقه عدهم!
امداج..عايفه القصر..وجايه للجحر..مالنه!
خاله اني راضيه حتلو..انام عدكم بالمطبخ..وابقه اخدمكم هم راضية بس خلوني عدكم!
شبيج..تتوسلين قابل طردناج عشتو..بس احنا لان ماعدنا مكان..
ميخالف خالة..انا وين مجان..ما اضوجكم..
بكيفج..
وبقيت عدهم 3ايام بس مو 3ايام حسيتهن 3سنوات مرت خالي تحجي كدامي شكل وكدام جناينها شكل..وجناينها يموتن مني..والاتعس..ولدهم..عينهم فارغة..وعبالك مشايفين بنيه..ولا متزوجين وعدهم نسوان..يباوعون ع جسمي من امشي كدامهم..وما اكدر انام الى ان..ينامون..
كولهم اخاف احد منهم يطلع ويلكاني نايمه ويوزه الشيطان..ممرتاحتلهم..بس شسوي ع الاقل محد منهم اتحرش..بيه..لحد الان ومر اسبوع..واني عدهم وتالي متالي..صارت العركه بين عباس ومرته..اسمعها..تفرفح..وتكوله لو اني لو جمانه بالبيت..مدري شصاير بينهم من سمعتهم جابو اسمي خفت..مرت خالي خابرت على خالي..اجه خالي من الشغل يركض!
شبيكم شصاير!
كتلك..من الاول..مترهم ضلتها عدنه كلت خطية يتيمة وين..تروح دشوف بعينك..كبت الطلايب بسببها..مرت ابنك..فضحتنا بالصايح..
اجه..يمي خالي:
خالو..جمانه لمي هدومج.
ليش خالو اني شمسويه؟
خالو لمي هدومج..وخلصينا..
ماشي هسه المهن..
لميت ملابسي وخليتهن بالجنطة..وكتله:.
خالو وين راح تاخذني..
امشي كدامي!
مشيت..اخذلي تكسي..وصلني يم محل مال..ذهب جبير..دخلنا شفت عمو ابو ضرار..وضرار..واكفين..وياهم ولد..يمكن عامل..اول مشافني ضرار..كال:
سعيد..روح..فد ساعة وتعال:
جان يطلع الولد بقه بس عمو..ابو ضرار..وضرار وخالو..اجه عمو ابو ضرار..كلي:
ليش ..طلعتي بنيتي..ليش رحتي لخالج!
وانت ليش مسألت عني من طلعت:
خالج خابرني بيوم الي طلعتي..وكال جمانه عدنا..
وسمعت خالو يكوله:.
ابو ضرار..بيتي زغير عندي عيال..وكتلك من الاول ميرهم..تجي يمنا بعد ليش دزيتها!
اعتقد سمعتني اني مدازها هي عافت البيت وطلعت من الصبح..
ليش طلعت من الصبح..غير مشوفيها نجوم..الظهر..
ضرار كال:
منو كلك مشوفيها نجوم الظهر..هيه كالتلك..
لا مكالت..بس ليش انهزمت من بيتكم من الفجر
وانت شنو دتحقق..ويانه..اذا حنين عليها ليش جايبها..
ما اكدر اخليها عندي..خلوها عدكم وخلصوني من هالطلابه..
جان ضرار..يكوله:
ديله..عوفها..وجر..منا..يله..جر..ولي
خالو..عبالك..السانه انعكد محجه عافني وراح
عمو كلي:
امشي بنيتي اخذج للبيت
ضرار كال:.
انت ضل بالمحل يابه اني اوصلها..
خفت..كلت:.
عمو ما ارجع لبيتكم..اروح لاي مكان بس ما ارجع لبيتكم!.
وين ترحين يابنيتي شفتي خالج شلون شمرج وراح..وانتي
عمو..انته وصلني لعد اريد احجي وياك..
فضرار كال:.
لج فوتي كدامي..ليدخل احد للمحل..
لا..متوصلني انت..عمو يوصلني اريد احجي وياه
يابه..كولها خلي تفوت كدامي ...ليش اجرها من شعرها كدام الناس!
بنتي روحي وياه بعدين نحجي..
اضطريت..اصعد وياه..طول الطريق ساكت..بس عيونه تتجادح..وصلنا للبيت اول منزلت جرني من ايدي مدخلني جوه..كبل للاستقبال..دخلني..وسد الباب..خفت منه كلت اكيد راح..يضربني لان..تفلت بوجهه..بس هو كال:
هااا..شبعو..منج..خوالج..وشمروج علينه..تعرفين جنت اعرف راح ترجعين لان..الجلب مرجوعة ع الكصاب!
حبست دموعي بالكوة هذا شديحجي!
شنو شبعو مني شنو قصدك..بعدين ليش مخليت ..عمو يوصلني شنو خفت..لا احجيلة الي..صار..
جان..يضحك..ويكول:
شنو..شكلتي..خفت..اني..اخاف..ضرار..يخاف!؟
اي خفت ..كلت هسه تحجي لابويه وانفضح..
ههههه..انفضح..ومنين اخاف من ابويه زين شلون اخاف وهو بايعج..الي من اول يوم دخلتي بي..لبيتي!
بايعني!
اي..بايعج..بس حرامات..دفعت بيج15مليون!.
هاي انت شدتحجي..شنو عمو بايعني..شنو..اني ..سلعة وعمو يبعني الك!
اي..انتي سلعة..من فتحتي عيونج للدنيا وانتي سلعة..تنباع وتنشره!
رأسا عيوني دمعت..بعدني مفاهمه شي من كلامه بس عزت عليه نفسي بسرعة بجيت!
انت شدحجي..شبيك..مخبل..شنو اشتريتج..ب15مليون..شنو انتي سلعه!
اي..والله اشتريتج..من هذا الخابصتنا بيه عمو ماعمو!
مدا افهم..
شوفي هذا عمو الهيبة جان مطلوب..15مليون وعليه القاء القبض..لان الديانه اشتكو عليه اجاني للمحل كلي يابه مروتك..ساعدني راح انحبس..كتله..اني مكايلك تداين وتنطلب..واذا انطيتك..شنو يضمنلي ترجعهن..كلي..معندي ضمان..حته..الشقه بعتها ع علاج..ام جمانه..وانطلبت..فسألته وهسه شحصلت..مرتك ماتت وبقيت مطلوب والديانه تركض وراك
كلي..منين اجيبلك ضمان..اني حاير بزماني وحاير بهالبنيه البقت وحدها بالدنيا..كتلةشكد..عمرها..كال23..كتله عندك صورة الها شوفني صورتج..بموبايلة. بصراحة حيل..عجبتيني..كتله ماشي..انطيك..فلوس..مقابل..هاي البنيه..تشوف راحتي..وتخدم..اهلي!
احترم..نفسك..شنو اشتريتني شنو عمو باعني..شنو اشوف راحتك.شنو اخدم..اهلك..ليش اني حيوان بالسوك وتشتريني..شنو..عمو بكيفة يبيعني..شنو عبده عنده..لو معندي اهل..وتايهه!.
جان يباوعلي من فوك لجوه!.
اي عفيه عليج..هنا مربط الفرس..اي..انتي تايهه معندج اهل لان انتي بت..حرام
فرفحت من البجي بس هو ممهتم..بعدين كلي:
ليش..تبجين..لان محد كلج..قبل انتي بت حرام..وذوله المكتوبين بجنسيتج..مو امج..وابوج..واصلا امج..اشترتج..من قابلة..والقابلات يبيعن جهال..الحرام..للنسوان الي ميخلفن
انت..انت جذاب..هذا حجيك..كوله جذب..كوله جذب كعد بالكاع كمت الطم ع وجهي:
هههه..اي لطمي..وفرفحي..والله حقج..لو اني بمكانج اسوي اكثر..
شكرا لزيارتكم عالم روايات سكيرهوم
