 |
رواية الشبح العاشق الجزء الثاني الفصل الثاني بقلم رباب حسين
أحيانًا تقضي عمرًا لكشف الحقيقة ظنًا بأن كشفها سيضعك على الطريق الصحيح.... تظل تفكر وتبحث وتتقصى الحقائق حتى تصل إلى مبتغاك ولكن عندما تنقشع غمامة الجهل وتُفتح عينيك لترى ما كنت تريد معرفته تجد ذاتك تتمنى لو بقيت في هذا الجهل القديم.... لو لم تبحث.... لو لم تنكشف الحقيقة القاسية أمامك.... فكم من حقيقة قتلت قلوب وعذبت نفوس بالندم والحسرة.... كم من حقيقة محت أمال وكسرت أرواح ونفوس ضعيفة لم تتحمل قسوة الحقيقة..... فا ها هي بحثت عن الحقيقة لتجد نفسها في منتصف حرب لم تعرف أنها خصم بها..... حرب أقوى منها من الممكن أن تمحي عالمها بأكمله.... والآن عليها التصدي لقوة لا تعرف مدى حجمها ..... وبالجهة الأخرى يقف رجلًا اكتشف للتو أن هناك عالم أخر لم يعرف عنه قبلا.... عالم لا يستطيع عقله إستيعابه دفعةً واحدة..... عالم يسيطر على البشر دون معرفتهم..... يدمر ويحرق ويقتل وهم منغمصين في ملذات الحياة.... يلومون في نفوسهم الضعيفة ولا يعلمون أن هناك من يزيد من حقدهم ويتمنى السوء لهم وهم مجرد أدوات بين أصابعهم.... غذاء للشر الذي يقضي على نور الحياة بداخلهم أولًا..... فالحقيقة وإن كانت قاسية فأنها بالنهاية تعيد كل شئ إلى نصابه الصحيح....
ظل عزيز ينظر إلى ليان التي تطفو أمامه بالهواء وهو يفتح عينيه في صدمة حتى نزلت ووقفت أمامه وقالت : دلوقتي أعتقد هتصدقني
عزيز في صدمة : لا
زفرت ليان وقالت : لا إيه؟!.... كل ده ومش مصدق
عزيز : ماشي.... أنا فهمت إنك غريبة.... أو كنت حاسس بصراحة بس مش كده.... مش لدرجة كده
أشار إلى وئام وإلى أعلى فقالت : طيب أقعد كده وحاول تسمعني وتستوعب اللي هقوله بس قبل أي حاجة..... بنوفيل إنزلي للراجل اللي قتل المساجين ده وشوفي إيه اللعنة اللي خلته كده ونعكسها إزاي
بنوفيل : هحاول
عزيز : يا ستي فهميني إنتي بتكلمي مين؟!!
نظرت له ليان وقالت : هحكيلك
قصت له ليان كل ما حدث معهما وعزيز ينظر إليها في صدمة متزايدة ثم قال : إيه علاقة ده كله بقى باللي بيحصل دلوقتي؟
ليان : أنا متأكدة إن اللي بيحصل في الناس ده في الوقت الحالي بسبب مالوس.... وواضح إن فيه ناس كتير اتصابت باللعنة ديه
وئام : يعني اللعنة ديه خلت الناس تشوف الأشباح؟
ليان : اه.... وطالما شافوهم يقدرو يتواصلو معاهم وكده هيستغلو جسمهم زي بنات القمر بالظبط
عزيز : يعني الأشباح بتنتقم وتقتل اللى قتلهم لما بتدخل في جسم الناس اللي جواهم لعنة.... مش ده قصدك؟
ليان : بالظبط
عزيز : بعيدًا عن الخرافات ديه يعني..... إيه بقى اللى حصل تحت في الزنزانة؟
ليان : الأتنين اللي قتلو إمبارح والنهاردة حواليهم أشباح الأتنين اللي ماتو وواضح إنهم كانو شايفنهم ولما هجم عليهم الأتنين اللى قتلوهم كانو الأشباح جواهم وبعد ما ماتو اختفو لأن ضغينتهم راحت..... الأتنين بقى اللى ماتو أشباحهم ظهروا بس استغلو جسم الجاني اللي موجود تحت دلوقتي وقتلو اللي قتلوهم عشان كده مكنش فيه غير شبحين بس تحت اللي أنا موتهم
وئام : كده معناه إن فيه ٥ في مكان واحد مصابين باللعنة
ليان : وده عدد كبير جدًا في مكان واحد ويفسر برده حالة الغضب اللي منتشرة في البلد
عزيز : يعني كل اللي بيحصل ده شغل عفاريت؟
ليان : لا أكبر.... اللعنة ديه لو فضلت تنتشر في الناس مش هيبقي حد فينا عايش في أمان
عادت بنوفيل ووقفت أمام ليان وقالت : اللي في صدره ده آثر طعن بخنجر معمول من السحر الأسود
ليان : سحر أسود؟!.... طيب إيه الحل
بنوفيل : هرجع للكتاب وأشوف لو نقدر نعمل حاجة نعكس بيها اللعنة ولا لا
أماءت لها ليان وذهبت بنوفيل ثم نظرت ليان إلى عزيز وقالت : أهم حاجة الناس اللي تيجي في تهمة قتل وتلاقيهم بيقولو نفس الكلام أفصلهم عن الناس نهائي لحد أما أشوف حاجة تعكس اللعنة
عزيز : بسيطة..... بس لو فعلًا في إيدك الحل فا أنا هستنى مع إن عقلي مش مستوعب كل اللي بتقوليه ده
وئام : طبيعي.... بس أنا عشان شفت بعيني مصدقها جدًا
عزيز : طيب أنا عندي فيديو لحادثة القتل اللي حصلت أول إمبارح.... شوفيه يمكن تشوفي الشبح ده ونتأكد إن الموضوع ده فعلًا منتشر
أماءت له ليان وشاهدت التسجيل وتأكدت من وجود شبح ضغينة يغادر جسد القاتل ويخرج شبح ضغينة أخر من جسد المجني عليه فتأكدت من الأمر وأبلغت عزيز بالوضع ثم ذهبت إلى المنزل مع وئام وفي الطريق تلقت مكالمة هاتفية من روما فقالت : عاملة إيه يا روما؟
روما في سعادة : أنا خلصت الدكتوراة يا ليان وراجعة مصر خلاص
ليان في سعادة : بجد.... مش مصدقة أخيرًا هشوفك
روما : اه شفتي.... وعندي ليكي مفاجأة
ليان : إيه هي؟
روما : آسر طلب إيدي وقالي إنه هينزل يستقر في مصر
ليان : مبروك يا حبيبتي..... ألف مبروك.... مصر هتنور بيكم.... هتيجي إمتى؟
روما : بعد بكرة.... هبعتلك معاد الطيارة وكل حاجة عشان عايزة أشوفك أول ما أنزل من الطيارة
ليان : أكيد.... خلاص هستنى منك المعاد
أنهت ليان المكالمة ونظرت إلى وئام وهو يقود السيارة وقالت : أخيرًا خبر حلو في وسط كل المشاكل ديه
وئام : هتخلص إن شاء الله
ليان : حبيبي شكلك تعبان أوي
وئام : عايز أنام بصراحة.... الشغل كان كتير أوي بليل
ليان : حقك عليا خليت بنوفيل تجيبك القسم بس كان لازم الظابط يصدقني
وئام : ولا يهمك حبيبتي.... تعبك راحة.... أنا كده كده هروح أنام عادي
ليان : أنا هروح معاك وبعدين هروح الكهف عشان أشوف بنوفيل عملت إيه
وئام : ماشي
عادا إلى المنزل وبعد أن نام وئام ذهبت ليان إلى الكهف لتجد بنوفيل جالسة تقرأ بالكتاب وهناك كثير من الأسلحة التي من الممكن أن يصنعها مالوس بواسطة السحر الأسود فاقتربت منها ليان وقالت : ها وصلتي لإيه؟
بنوفيل : ده باب شر كبير واتفتح علينا.... مش عارفة هنعرف نقف قصاده ولا لا.... بصي فيه أسلحة كتير أوي يقدر مالوس يعملها وفي المقابل في أسلحة تانية نقدر نعملها نقف بيها قصاده بس المشكلة أن عشان نعمل الأسلحة ديه محتاجين حاجات صعب نوفرها بسهولة
ليان : زي إيه؟
بنوفيل : زي نصل النور وده ممكن يطرد الشبح من الجسم اللى هو داخل جواه من غير ما يأذي الشخص ده..... وكمان بلورة الصفح ديه لو حد لبسها وفيه شبح جواه بيتحبس جوا البلورة ويفضل جواها الشبح لو أتكسرت يقدر يخرج منها لكن لو فضلت زي ما هي يفضل الشبح محبوس
ليان : طيب ما ديه حاجات تقدر تنقذ الموقف فعلًا
بنوفيل : نصل النور بيتعمل من بقايا نجم ساقط وبلورة الصفح ديه بتتعمل من قوة السيف اللي معاكي وتتقال على حجر نادر أوي اسمه الكهرمان موجود في روسيا والصين ولاتيفا والمكسيك وكندا وسيبريا
ليان : تقدري تروح تجيبي حجر الكهرمان ده؟
بنوفيل : أقدر.... بس الفكرة إنه هيستخدم على شخص واحد بس وده مش حل..... العدد كبير جدًا ومحتاجين حل جذري وكمان يقضي على اللعنة كلها
ليان : معاكي حق.... بس ده ليه طريقة ولا لا؟
بنوفيل : لا.... مش لاقية طريقة
جلست ليان أمامها في يأس وقالت : يعني إيه؟!.... خلاص.... الناس هتفضل تقتل في بعضها.... ده كده الناس كلها هتموت.... إنتي متخيلة إحنا فين دلوقتي؟
بنوفيل في حزن : ليان.... أنا عايزة أقولك على حاجة بس مش عايزاكي تفقدي الأمل مهما حصل
ليان : لا أبوس إيدك متقلقنيش
بنوفيل في حزن : السبب اللي كان مخليني أشك إن مالوس بيعمل حاجة كبيرة وقالقني كده إني.... إني حاسة بضعف.... حاسة إن قوتي بتضعف.... وكمان لما بستخدم قوتي بتعب.... ليان لو فضلنا على الوضع ده أنا هنتهي.... قوتي هتروح مني.... كل ما الشر زاد على الأرض أنا بنتهي
ليان في صدمة : لا لا.... أكيد مش هنوصل لهنا.... مش هعرف أعمل حاجة من غيرك
بنوفيل : ليان.... إنتي الأمل اللي عشت عليه.... كنت عارفة إن هنقابل خطر وشر كبير بس كنت برده واثقة إنك هتقدري تتغلبي عليه بقوتك.... أنا اللي مش هعرف أعمل حاجة لوحدي.... فكري يا ليان.... فكري نعمل إيه؟
ليان : طيب بس قبل أي حاجة دوري على طريقة في الكتاب نحافظ بيها على قوتك إنتي
بنوفيل : حاضر بس برده هيبقى حل مؤقت
ليان : ماشي.... بس تديني فرصة أعرف أتصرف
بنوفيل : حاضر.... بس إنتي شايفة نعمل إيه؟
ليان : هنعمل الأسلحة.... هتصرف ونعملها بكل الطرق.... لازم يبقى في إيدي سلاح ضد حتى لو هينقذ عدد قليل.... كل الأسلحة اللي عندك في الكتاب قوليهالي ونعملها سوا.... وأول سلاح بلورة الصفح.... روحي هاتي حجر الكهرمان ده.... هاتي الكمية اللي تقدري عليها كلها
بنوفيل : حاضر.... بس خليني أقرا بقيت الأسلحة واكتبيها كلها مع كل طريقة تحتها عشان لو جرالي حاجة مش هتقدري تفكي شفرة الكتاب
ليان في حزن : متقوليش كده بقى.... مش عايزة أفكر حتى في ده دلوقتي
بدأت بنوفيل تملي ليان بكل الأسلحة ومع الأسف كانت كلها مصنوعة من أشياء نادرة الصنع لكي تتمكن من التصدي لهذا السحر الأسود.... مر يومان لم تعود ليان إلى المنزل فكانت تبحث عن أغراض تساعدها في صنع الأسلحة وجنة كانت تحمي وئام حتى عادت ليان بعد يومين رغمًا عنها كي تستقبل روما وآسر بالمطار وذهب وئام إلى هناك أيضًا كي يراها فقد إشتاق إليها ويعلم حجم الضغط النفسي الذي يقع عليها فعندما رآها ركضت إليه كي ترتمي بين أحضانه فأغمض عينيه ليستنشق عبيرها وقال : يااااه وحشتيني
بكت ليان فإن كانت تستطيع أن تظهر قوتها وصلابتها أمام الناس جميعًا فهي تعود طفلة محملة بالأعباء لترتمي بين ذراعيه تبوح بضعفها وتعلم أنه هو مصدر قوتها الحقيقي.... رتب على ظهرها وقال : إنتي قدها يا ليان.... هتقدري تصلحي كل حاجة.... أنا واثق فيكي
ليان : أنا خايفة.... خايفة أوي يا وئام.... خايفة بنوفيل تروح مني.... كل يوم بيبان عليها الضعف أكتر.... أنا مرعوبة مش خايفة بس
وئام : خليكي متأكدة إن مهما طال الظلم هينتصر الحق والخير في الأخر.... ودايمًا بعد العسر يسر.... خليكي واثقة في نفسك وأنا متأكد إنك هتلاقي الحل
ابتعدت عنه ونظرت داخل عينيه وقالت : حقك عليا.... أنا مأثرة في حقك
أمسك وئام خصلات شعرها بين أنامله وقال : كنت عارف إن حياتك صعبة ومع ذلك قررت أفضل جنبك.... عشان كده عمري ما هزعل منك ولا ألوم عليكي..... هتلاقيني دايمًا جنبك وسند ليكي.... متفكريش إني هبقى متضايق ولا زعلان إنك مش معايا بسبب الحمل اللي إنتي شايلاه..... إنتي بس بتوحشيني
ليان : وإنت كمان والله..... أول بس ما ألاقي سلاح يقضي على اللعنة خالص هرجع البيت.... أنا خلاص قربت أخلص كل الأسلحة مع إني بضغط على بنوفيل جامد.... بس هي مش عايزة تسيبني لوحدي وعارفة إني مش هعرف أقرا الكتاب من غيرها
وئام : وأنا مستنيكي.... بس يلا دلوقتي نروح نستقبل روما وبعدين كنت عايز أعرض عليها هي ودكتور آسر يشتغلو معانا في المستشفى.... آسر دكتور كبير وممكن يمسك قسم المخ والأعصاب بدل عمي وروما تمسك بدل لؤي
ليان : والله فكرة.... يلا طيب نستقبلهم
وبالفعل استقبلا روما وآسر وبعد أن عرض عليهما وئام العمل معه وافقا على الفور وطلب آسر أن يرى المشفى بنفسه وذهبو معًا جميعًا وبعد أن مروا على المشفى قام وئام بتوصيل آسر إلى منزله أولًا وعرضت ليان على روما أن تتناول الغداء معها وعندما وصل آسر إلى منزله ونزل من السيارة وقام بتوديعهم التفت ليدخل المنزل ولكن توقف فجأة والتفت خلفه فتعجب وئام فقال : ليان.... بصي على آسر.... شكله اتغير ليه كده
التفتت ليان ووجدته ترك الحقائب بالأرض وأخذ يقترب من أحد الرجال بالشارع وافتعل شجارًا معه..... نزل وئام على الفور وركضت ليان إليه وصاحت : بنوفيل
ظهرت بنوفيل ونظرت إلى الشجار الذي يتم ومحاولة وئام لفصلهما عن بعض فنظرت إلى آسر لترى الشبح الذي يسكنه فقالت : جواه شبح ضغينة يا ليان.... جواه شبح
ليان : أعمل إيه.... قوليلي أعمل إيه؟
بنوفيل : عايزين حاجة تطرده دلوقتي
نظرت ليان إلى وئام وجذبته لتخلع عنه السلسال ووضعته على رقبة آسر فطرد الشبح منه على الفور وأخرجت ليان سيفها وقتلته.... اقترب شادي من وئام ليطعنه بخنجر النسيان حتى يستغل جسده لقتل ليان ولكن بمجرد أن قتلت ليان الشبح خلعت السلسال عن رقبة آسر ووضعته على رقبة وئام مرة أخرى فنظر لها شادي في غضب وقال ميناس : السلسلة ديه لازم تتكسر
أما آسر فقد رأي الشبح بعد أن خرج من جسده أما الرجل الذي يتشاجر معه نظر لما فعلته ليان في تعجب فصاح بهم وقال : لا.... ده إنتو شلة مجانين
ثم تركهم وذهب بعيدًا.... التفت آسر إلى ليان وقال في صدمة : هو ده.... ده شبح.... وإنتي قتلتيه؟!
لاحظت ليان صدمته فقالت : إهدى يا دكتور وأنا هفهمك
سقط آسر أرضًا مغشيًا عليه وركضت روما إليه في خوف وصاحت باسمه : آسررر
