 |
رواية الشبح العاشق الجزء الثاني الفصل الثالث بقلم رباب حسين
كأن الخير يمشي بخطوات واهنة فوق أرض أثقلتها خطايا البشر يحمل في يديه شعلة صغيرة تحاصرها رياح الظلام من كل جانب..... الشر يتكاثر كالأشواك في صحراء قاحلة يمد جذوره في النفوس وينبت في كل زاوية حتى غطّى الضوء بظلاله الثقيلة.... يقف الخير ضعيفًا كطفل وحيد يواجه جموعًا من الأشباح صوته خافت لا يكاد يُسمع وسط ضجيج الكراهية والخيانة وقلبه يتردد بين الأمل والانكسار.... فكلما حاول أن يمد يده بالرحمة قوبل بطعنة من جحود وكلما نشر بذرة سلام اجتثها إعصار الغدر قبل أن تورق.... ومع ذلك... ورغم ضعفه أمام كثرة الشر يظل الخير موجودًا
يرفض أن يموت.... قد ينهزم في معركة وقد يترنح تحت وطأة الظلم لكنه يترك أثرًا لا يمحى.... لمسة حنان.... دمعة صادقة... أو قبس نور يُذكر أن الليل مهما طال لا بد أن ينهض الفجر من جديد.....
كانت الصدمة شديدة على آسر وروما التي لم تفهم ماذا حدث فجأة حتى أخذهم وئام إلى المنزل وأعطى آسر مهدأ وظلت روما بجواره تنظر إلى ليان ويوجد على وجهها علامات إستفهام وتعجب لما يحدث فنظر وئام إليها وقال : أعتقد روما لازم تعرف إيه اللي بيحصل
تنهدت ليان وقالت : هقولها أكيد بس مش عارفة أعمل إيه مع آسر.... عايزة أخليه يبطل يشوف الأشباح ومش عارفة..... زي ما يكون جي يحملني هم أكبر فوق همي
وئام : طيب ده هنعمله إزاي؟
ليان في حزن : مش عارفة يا وئام
بنوفيل : ممكن نحميه بس إنه ميدخلش في جسمه أشباح لكن نحجب عنه إنه يشوفهم صعبة دلوقتي.... لازم نصل النور
ليان : نحميه بإيه؟.... سلسلة زي وئام كده
بنوفيل : اه.... هروح أشوف حجر ينفع ولما نروح الكهف نعمله ونيجي تاني
ليان : طيب أنا هستناكي هناك وإنتي حصليني
ثم نظرت إلى روما وقالت : بصي أنا عارفة إنك مش فاهمة أي حاجة بس أنا مش عايزاكي تتخضي ووئام هيفهمك كل حاجة
ثم أمسكت السيف واختفت من أمامها فنظرت روما إلى وئام في صدمة فقال وئام : الله يسامحك يا ليان.... هتفهم مني إزاي دلوقتي
ثم اقترب منها وجلس بجوارها وقص لها ما يحدث.... ذهبت ليان إلى الكهف وانتظرت بنوفيل حتى أتت بعد وقت ومعها جنة ويبدو عليها الضعف كثيرًا فقالت جنة : بنوفيل تعبانة وأعتقد لازم ترتاح وتبطل تستخدم قوتها شوية
اقتربت منها ليان في حزن وقالت : أعمل إيه طيب عشان أساعدك؟
بنوفيل : متحمليش نفسك أكتر.... إنتي شايلة هم كبير... متقلقيش عليا أنا هبقى كويسة
ليان في غضب : مش هتبقي كويسة غير لما ألاقي حل.... وأنا واقفة متكتفة.... مش عارفة أعمل إيه وكل شوية الموضوع بيسوء أكتر.... أنا بدأت أيأس.... الأسلحة اللي في الكتاب كلها تستخدم لشخص واحد وأنا عايزة أنقذ الناس كلها من اللعنة.... أعمل إيه؟!.... أمشي وراهم كلهم وأضربهم بنصل النور اللي أصلًا مش عارفة أعمله إزاي؟
جنة : بنوفيل عندها حل بس مش عايزة تعمله
بنوفيل : ومش هعمله
ليان : حل إيه؟!
جنة : حل يقدر يزود قوتها
ليان : بجد.... نعمله فورًا.... بس إيه هو؟
جنة : تمتص شبح طاهر
نظرت لها ليان في صدمة وقالت : لا يا جنة.... لا مينفعش اللي بتفكرى فيه ده
جنة : أنا السبب في إن لؤي يتحول لشبح شر.... الضغينة بتاعتي عشان قوية خليته شبح غير عادي.... لولا لؤي مكنش مالوس عرف يستخدم السلاح بتاعه.... أنا اللي عملت كده ولازم أدفع التمن.... اه حاولت أصلح الوضع بس دلوقتي الوضع بقى أسوء.... ناس كتير بتتأذي بسببي.... وبعدين من غير بنوفيل كلنا هنتدمر.... مش هيبقى فيه خير على الأرض.... مالوس هيقضي على كل حاجة
بنوفيل في ضعف : وأنا قولت لا..... هيبقى إيه الفرق بيني وبين مالوس اللي عايش على ضغينة الأشباح
جنة : أنا اللي بطلب منك ده ومش زعلانة.... إنتي وجودك أهم مني..... ليان محتاجاكي أكتر مني أنا
بنوفيل : وجودك جنبها كمان مهم.... إنسي الموضوع ده خالص
ليان : طيب على الأقل دلوقتي ريحي نفسك ومتستخدميش قوتك لحد ما أشوف طريقة أعمل بيها نصل النور
بنوفيل : فيه نجم سقط زمان أوي وكان ليه رواسب كتير في جبل في سينا.... كنت عايزة أروح هناك يمكن ألاقي حتى شظية منه
ليان : هتروحي إزاي وتدوري وإنتي تعبانة كده؟
بنوفيل : ممكن أسافر بأي حاجة مش لازم اتنقل بسرعة
ليان : طيب خليني أعمل السلسلة الأول لآسر وبعدين نشوف حوار السفر ده.... عايزة اطمن عليهم قبل ما أمشي
بنوفيل : لا.... أنا هروح لوحدي.... خليكي هنا لأنك مش هتعرفي تمشي في الجبال وكمان منقدرش نبعد أنا وإنتي لازم حد يفضل جنبهم ويحميهم
أماءت لها ليان وقامت بعمل سلسلة أخرى لآسر ثم نظرت إلى بنوفيل وقالت : هو مش عشان حد يصاب باللعنة لازم يتضرب بخنجر النسيان زي ما قولتي؟
بنوفيل : اه
ليان : وأكيد الخنجر مع مالوس أو لؤي أو شادي
بنوفيل : أكيد
ليان في تعجب : طيب إزاي أنا مشفتش اللي طعن آسر؟
بنوفيل في تعجب : إنتي مشفتهوش؟!
ليان : لا
بنوفيل : يبقي عاملين تعويذة تخفي.... ديه مصيبة..... ده معناه إنهم ممكن يكونو حوالينا ومراقبينا وإحنا مش شايفنهم
ليان : يعني إنتي كمان متشفيهمش؟
بنوفيل : لا أنا ممكن أظهرهم بس أنا قوتي مش مساعداني دلوقتي نهائي
وضعت ليان رأسها بين كفيها في حزن ويأس وقالت : أنا تعبت يا بنوفيل.... نفسي ألاقي حل
بنوفيل : متقلقيش.... هنلاقي حل قريب إن شاء الله
تنهدت ليان وقالت : أنا هروح البيت عشان أشوف آسر وخليكي إنتي هنا
بنوفيل : خدي جنة معاكي عشان متقعدش تزن عليا.... أنا هرتاح النهاردة وبكرة هروح سينا
ليان : لا خلى جنة معاكي عشان لو حصلك حاجة تيجي تبلغني وأنا هروح أي مكان أشتري حجر كهرمان.... نعمل بيه بلورة الصفح.... أي حاجة نقدر نساعد بيها ولو حتى شخص واحد
بنوفيل : طيب روحي بس أمني آسر الأول
استيقظ آسر ونظر حوله في صدمة بمجرد أن تذكر ما حدث وقال في ذعر : إبعدو عني.... محدش يقرب.... إنتو عملتو فيا إيه؟!
اقترب منه وئام وحاول أن يهدأ من روعه ويمسك بكلتا يديه ولكن آسر كان يقاومه بشدة وهو في حالة من الهستيرية وقال : إبعد عني.... إنتو أكيد السبب إني أشوف الأشباح.... ومراتك.... ليان قتلتهم إزاي وبإيه؟!
وئام : يا دكتور إهدى أرجوك وأنا هفهمك
دفعه آسر بقوة فصطدم بالحائط ليرتطم حجر السلسلة وينكسر فنظر له وئام ودب في قلبه الخوف ثم اقتربت روما من آسر وقالت : إهدى يا آسر.... هما بيحاولو يحموك مش هما السبب في اللي حصلك
آسر : روما تعالي نمشي من هنا
روما : حاضر بس ليان ترجع عشان لازم تاخد منها حاجة ضروري
ظهرت ليان فجأة أمامهم فنظر لها آسر في صدمة وقال : هي جت هنا إزاي؟
لاحظت ليان الخوف في عينيه فاقتربت منه وقالت : أنا عارفة إنت حاسس بإيه.... أنا زيك بالظبط وفاهمة الخوف اللي إنت فيه دلوقتي عشان شفتهم..... أنا حسيت بنفس إحساسك أول مرة بس صدقني أنا مش هأذيك
هدأ آسر قليلًا واقتربت منه ليان أكثر لتضع السلسال بيده.... خرج وئام من الغرفة ثم قالت ليان : ألبس السلسلة ديه.... ديه هتحميك إن محدش يدخل جواك لكن مش هقدر أحجب رؤيتك ليهم دلوقتي.... هتصرف وأرجعك زي ما كنت بس إياك تقلع السلسلة ديه أبدًا
وفجأة صرخت روما وهي تنظر خلف ليان وجذبتها إليها وقالت : حسبي يا ليان
نظرت ليان خلفها لتجد وئام يقترب منها ويجمل بيده سكين يحاول أن يقتلها به فنظرت إليه في صدمة وقالت : وئام.... بتعمل إيه؟
وئام : هقتلك.... هقتلك عشان أخد بطاري
اقترب منها ليضربها بالسكين مرة أخرى واختبئت روما خلف آسر الذي ينظر إليهما في صدمة وقال : هو جراله إيه ده كمان؟!
حاولت ليان الهرب منه حتى صاحت بقوة : بنوفيل.... جنة.... ألحقوني
ظهرت بنوفيل وجنة حولها ونظرا إلى وئام في صدمة وقالت بنوفيل : ده اتصاب باللعنة!
ليان وهي تحاول الهرب منه ولكن أمسك بها وأحكم قبضتة على رقبتها ورفع يده الأخرى بالسكين فنظرت ليان إلى السلسال لتجد الحجر قد انكسر فنظرت داخل عينيه وقالت وهي تبكي : وئام.... أنا عارفة إنك سامعني.... إنت موجود.... أنا ليان حبيبتك..... وئااام.... أنا بحبك..... متقتلنيش
ظهر الرابط بينهما فضعفت قبضته على رقبتها وارتعشت يده الأخرى فقالت ليان : بنوفيل.... خرجي منه الشبح اللي جواه
بنوفيل : مش هقدر..... مش قادرة يا ليان
ليان : طيب كتفيه بسرعة.... قيدي حركته
رفعت بنوفيل ثوبها لتخرج أشرطة الثوب منه وقامت بلفها حول وئام وقيدت حركته.... ركضت ليان إلى الغرفة مرة أخرى وأخذت السلسال من يد آسر وخرجت من الغرفة وقالت بنوفيل : أول ما تلبسيه السلسلة اقتلي الشبح فورًا عشان آسر
ليان : حاضر
وضعت ليان السلسلة ورفعت سيفها وسقط وئام أرضًا وفجأة ظهر الشبح الذي كان بداخله لتجده أمها ففتحت ليان عينيها في صدمة وتوقفت عن الحركة فلم تستطع أن تضربها بالسيف.... وقعت بنوفيل أرضًا في ضعف وقالت : مش هي.... مش هي يا ليان.... أضربيه
أدمعت عين ليان وهي تنظر إليها واهتزت يدها فلم تستطع أن تضربها بالسيف فابتسمت باستهزاء واختفت من أمامها
اقترب وئام من ليان وقال : مش ديه مامتك؟!....هو أنا شايفها إزاي؟!
نظرت له ليان في حزن وارتمت بين أحضانه فرتب وئام على ظهرها ثم فتح عينيه في صدمة عندما استوعب ما حدث فأبعدها عنه ونظر إليها ليطمئن عليها وقال في صدمة : أنا عملتلك حاجة؟.... أذيتك؟!
بكت ليان وقالت : لا يا حبيبي.... معملتش حاجة
لاحظ وئام آثار أصابعه على رقبتها فنظر إليها في صدمة وقال : أنا اللي عملت ده..... صح؟!
ليان : أنا كويسة والله متخفش.... مش إنت اللي عملت كده أكيد.... الرابط وقف الشبح.... بس مش عارفة إزاي ماما اللي كانت جواك؟!
بنوفيل في ضعف : مش هي.... ده شادي
اقتربت ليان منها وقالت : إزاي طيب؟!
بنوفيل : وشاح الوهم.... استخدمه عشان كان لازم يظهر لوئام عشان يقدر يشوفه ويدخل جواه وعشان يحمي نفسه استخدم وشاح الوهم.... الوشاح يخليكي تشوفيه شخص تاني وهو اختار مامتك عشان متقدريش تقتليه.... ونجح للأسف أنه يهرب تاني
جنة : إنتي بتضعفي يا بنوفيل.... أرجوكي اسمعي كلامي.... إتكلمي يا ليان واقنعيها.... اقنعيها إن وجودها أهم مني
ليان في بكاء : إنتو بتحطوني في إختيار ما بينكم؟!.... إختيار صعب أوي
جنة : أنا مش بقولك إختاريني..... بقولك إنقذيها.... خليها تاخد قوتي.... لازم بنوفيل تكمل الحرب ديه معاكي.... صدقيني وجودي مش هيعمل حاجة
نظرت لها ليان وهي تعلم أنها محقة ثم نظرت إلى بنوفيل التي قالت : متحاوليش.... مش موافقة.... عندي أموت ولا إني أعمل زي مالوس
ليان : عمرك ما هتبقي زيه.... بس جنة معاها حق.... من غيرك مش هقدر أحارب لوحدي.... أنا محتاجاكي يا بنوفيل.... اه صعب عليا أودع جنة لكن مقدرش أكمل في كل ده لوحدي.... إنتي شايفة إحنا بيحصل فينا إيه..... أرجوكي يا بنوفيل وافقي
شعرت بنوفيل أن نهايتها أوشكت بالفعل فنظرت إلى جنة وقالت : أنا أسفة
ابتسمت جنة وقالت : متتأسفيش.... يلا بسرعة عشان تقدري تقفي على رجلك من جديد وتقضي على مالوس
نظرت جنة إلى ليان وقالت : إنتي أنقذتي حياتي زمان..... عمري ما هنسى لما فتحت عيني وشفتك أول مرة.... كنتي بتكلمي نفسك وساعتها قلت ديه مجنونة بس لما لفيتي وشك وبصيتيلي وشفت ضحكتك الحلوة حسيت إنك طيبة أوي.... دلوقتي جيه الدور إني أرد كل حاجة عملتيها عشاني.... بس قبل ما أمشي عايزة أطلب منك طلب.... لما تخلفو بنت سموها جنة
بكت ليان وقالت : حاضر..... بس هاتي حضن بقى قبل ما تمشي
اقتربت منها جنة واحتضنتها ثم قالت : أنا بحبك أوي يا ليان
ليان في بكاء : وأنا كمان
ابتعدت عنها ونظرت لها في حب ثم وقفت أمام بنوفيل وقالت : يلا.... أنا جاهزة
رفعت بنوفيل يدها لتمتص نورها حتى اختفت من أمامهما ثم أنزلت بنوفيل يدها في حزن والتفتت ليان إلى وئام وارتمت بين أحضانه وهي تبكي بشدة فقال وئام : هو إيه اللي بيحصل؟
ليان في بكاء : جنة مشيت.... خلاص مشيت.... أنا عمالة أخسر كل اللي حواليا.... بس خلاص مش هخسر حد تاني.... مش هسمح لمالوس ياخد مني كل حاجة.... مش هخليه يعمل فيا كده..... أنا هتصرف وبكل الطرق
