رواية سراج السادة الفصل الثلاثون بقلم غسق ادريس
خطوات هادئة تتسلل في ممرّ مظلم،
البيت يغرق في صمت خانق... لا صوت سوى أنفاسٍ متقطعة وخوفٍ يزداد ثقله مع كل ثانية
ركضٌ بخطوات سريعة على الدرج، كأن شيئًا ما استيقظ للتو من سباته الطويل.
ركضت ب اتجاه الغرفة فتحت الباب بسرعة،
دخلت وأغلقته بقوة، توقعت أني بأمان... لكن قبل أن ألتقط أنفاسي المكتومة، سمعت ركضًا سريعًا، أقرب... وأقرب... يتوقف خلف الباب مباشرة.
شيء ما كان يعلم أنني هنا
تجمدت في مكاني، ظهري ملتصق بالباب،
قلبي كأنه سيكسر ضلوعي من نبضاتة السريعة. الصوت توقف... لكن الصمت الذي تلاه كان أسوأ. كان ثقيلًا، خانقًا، كأن الهواء ذاته يراقبني.
مددت يدي ببطء نحو المقبض، لكن قبل أن ألمسه— نقرتان... خفيفتان... على الخشب خلفي.
لم يطرق الباب، لم يحاول فتحه... فقط نقر... وكأنه يقول: "أنا أعلم أنك هنا."
تراجعت بخطواتي. عيوني لا على الباب
، ضوء الغرفة بالكاد يضيء بنور خافت.
،هدوء لاشي يحصل.... ثم— صرير خفيف... مقبض الباب يتحرك.
جفّ حلقي، من الخوف تراجعت بخطواتي عيوني على مقبض الباب .يداي ترتجفان.
المقبض دار نصف دورة... وتوقف.
ثم جاء الهمس.
"افتحي الباب قدس ... شفتج تدخلين ..."
كان الصوت هادء كأن شخصًا يتكلم من تحت الأرض، مشوّه، مبلل، قريب جدًا من الباب، بل كأنه يتسلل من بين شقوق الخشب.
لم أجب. لم أتحرك. السكون يحتل اجزاء جسمي
وفجأة... ضربة قوية على الباب كادت تخلعه من مكانه.
صرخت ابجي رجعت ايدي على حلكي
جسمة كله يغتض بخوف
فجأة سكون تام.
لاكن انا لم أعد وحدي في الغرفة. شعرت بذلك... شيء ما دخل.
تنفّستُ بصعوبة، أحاول كتم شهكاتي الي تخونني، وأغرق في صمتٍ ثقيل لا يرحم. صدري يرتفع وينخفض بسرعة، وقلبي ينبض كطبول الحرب.
لصقت نفسي بالحائط، وكل عضلة ب جسمي مشدودة، على وشك الانفجار.
خارج الباب، ترددت أصواتٌ خافتة… وشوشات… كلمات غير مفهومة
شخص يهمس بكلمات لا تُفهم، كلمات تُقال بلغة قديمة، ضائعة… أو ربما لم تكن يومًا للناس.
اقتربت الأصوات من الباب أكثر… ثم تراجعت… ثم عادت… ثم هدأت فجأة.
عمّ المكان سكونٌ عميق.
توقعت انتهى كل شيء. يمكن غادر. يجوز كل هذا مجرد وهم، لعبة من عقلي المنهك والخائف.
لكن… لا. لم أشعر بالراحة. لم أشعر بالأمان. على العكس، شعرت بشيء أسوأ من الخوف… الهدوء قبل العاصفة.
ثم… بدون سابق إنذار… انطفأت الكهرباء.
الضوء الخافت الي كان يتسلل من الانارة اختفى، والغرفة غرقت في ظلامٍ دامس كأن الليل نفسه قرر أن يبتلعني. لم أعد أرى شيئًا، حتى يدي أمام وجهي أصبحت غير مرئية.
وهنا… بدأ الخوف الحقيقي.
أصبحت الأصوات أقرب… ولكن دون مصدر. كأن الجدران نفسها تهمس. كأن شيئًا يتحرك داخل البيت، بلا وزن، بلا شكل. خطوات خفيفة لا تُسمع لكنها تُحس، مثل نَفَس بارد يمر بجانب رقبتك.
أردت أن أصرخ، أن أركض، أن أفعل أي شيء… لكنن انا كنت متجمدة، كأن الظلام كبّلني، كأن العتمة نفسها تمسك بي.
فجأة، شعرت بنَفَس قريب من أذني.
لم أسمع خطوات، لم أسمع الباب يُفتح، لكنني أعلم… أن هناك شيئًا قريب مني
شيئًا لا يرى… لكنه يراني.
شيئًا لا يتكلم… لكنه يسمع أفكاري.
ثم، من حولي، بصوتٍ لا يشبه صوت احدهم، لا يأتي من فم، بل من الأعماق…
"لاتخافين راح اسحبة من جسمج بدون ماتحسين بوجع ."
بلعت ريكي
هذا صوت مراة صوتها مو غريب علية سامعتة قبل
ضحكت بصوت عالي نطقت بكلمات شلت جسمي شل
" راح اسحبة من احشائج قدس "
فزيت من نومتي اصرخ
فز غضنفر من نومتة مصدوم طفر من مكانة فتح الضوة ورجع يركض ب اتجاهي ملامح الصدمة بوجهه مايعرف شصاير
اخذني بحضنة يطبب على ظهري بهدوء واني ارجف بحضنة خليت ايدي على كلبي ابجي
مسح غضنفر على راسي يقرة ادعية وسور
رفعت راسي اتنفس بصعوبة ماكو هواء
اريد اتنفس ماكدر
باسني غضنفر براسي وحجة بهدوء
_غضنفر:: انا يمج قدس لاتخافين
_قدس:: تريد تموتني غضنفرررر راح اموت خليها تعوفني
خليت ايدي على وجهي اصرخ بقوة الدموع تارسة عيوني
اخذ غضنفر ايدي من وجهي باس كف ايدي بهدوء
باوعتلة. قوست حلكي بتعب
حجيت
_قدس:: تعبت راح اموت ماتحمل اشوفهم بعد
سكت غضنفر ماحجة شي
شمرت نفسي على الفراش عيوني على السقف
بقى غضنفر بيومها كاعد مانام
جان يمسح على راسي ولسانة ماوقف عن ذكر الله
ثاني يوم جنت كاعدة وحدي ب الغرفة ابجي بخوف الحلام ماجاي تعوفني حتى ب الواقع ماجاي اعرف ارتاح عيوني ماجاي ترتاح من شوفتهم
اندك باب الغرفة بهدوء كمزت من مكاني خايفة محد موجود غيري غضنفر ماموجود بس اني ب الغرفة
رجع تكرر صوت دكة الباب
بلعت ريك وحجيت الدموع بعيني
_قدس:: من ... منوو.. منووو
_جهاد:: اني ماما قدس
مسحت وجهي اتنفس براحة
مشيت ب اتجاه الباب
فتحت الباب شفت عمتي جهاد واكفه تباوعلي باستغراب عكدت حواجبها
حجت
_جهاد:: شبيج؟
_قدس:: شبية
_جهاد:: اني جاي اسألج صايرة مو على بعضج تتهربين من الكل حتى ماتنزلين تاكلين ويانا. اكو واحد مضوجج بحجاية؟
دنكت راسي واتحسرت.اشرت الها تدخل للغرفه دخلت للغرفه كعدت على الجرباية واني كعدت بالارض نزلت راسي وفركت ايدي بتوتر
حجت عمتي رفعت راسي جانت تباوعلي بخوف
حجت
_جهاد:: قدس بنيتي لاتخوفيني عليج صاير وياج شي
_قدس:: عمة تعبت
نزلت من الجرباية كعدت كدامي اخذت ايدي بحضنها تباوعلي
_جهاد:: من شنو تعبتي؟
_قدس:: ماجاي يتركوني وحدي بكل مكان اشوفهم صرت اخاف حتى من خيالي
اتحسرت عمتي دخلت شفايفها بحلكها
كملت كلامي واني ابجي
_قدس:: عمة اكو مرة دوم لاحكتني ماتعوفني
_جهاد:: منو هاي؟
_قدس:: نفسها الي شفتها اول مرة ببيتكم طويلةةة حيل لابسة عباية شكلها يخوف عمة دوم تتوعد الي تنزع شخص من احشائي
عكدت عمتي حواجبها ب استغراب
حجت
_جهاد:: تنزع شخص من احشائج؟
_قدس:: اي عمة اي. ماكتفو يلاحكوني ب خيالي واحلامي. لااا صرت اشوفهم ب الواقع
خليت ايدي على راسي ابجي
_قدس:: اريدهم يطلعون من راسييي تعبتتت منهم تعبببب
سحبتني عمتي لصدرها تمسح على ظهري بهدوء واني بحضنها اشهك من التعب والخوف الي جاي اعيشة
حجت عمتي
_جهاد:: مستعدة تبلشين ب علاجج !
رفعت راسي اباوعلها ب استغراب الدموع بعيوني
_قدس:: علاجي؟
_جهاد:: راح اتعبين هواي قدس هواي راح تتأذين
_قدس:: راضيةة بس خليهم يبتعدون عني اريد اعيش حياة طبيعية
بعدت عن حضنها
باوعتلها وبجيت
_قدس:: تدريننن عمة حتى صرت اكره غضنفر صرت ماطيقة ابتعد واتهرب منة
_جهاد:: قدس اسألج سؤال واريدج صريحة وياي
هزيت راسي ب اي امسح دموعي
حجت عمتي
_جهاد:: انتِ و غضنفر ماصار بينكم شي مو!
_قدس:: شلون
_جهاد:: يعني بعدج بنية؟
دنكت راسي بخجل من كلامها افرك ب ايدي
خلت ايدها ب ايدي وحجت
_جهاد:: امج اني لاتخجلين مني جاوبيني اي لو لا ماريد غيرها
هزيت راسي ب اي وحجت بتردد
_قدس:: اي بعدني بنية ماقرب مني
_جهاد:: تمام هاي هية انسي. وتعاي الي
جرت راسي وخلتها بحضنها تمسح عليه
واني ساكتة رجعن دموعي طاحن مرة ثانية مو من الخوف لا من حنية العلوية جهاد
بقت تمسح على راسي وتحجي وياي بهدوء واني ساكتة اسمع الها
صافنة على حنيتها وكلامها الهادء
" قس "
انصدمت عيوني على الحصالة ماكو فلوسي مختفية اخذت الحصالة وطلعت من الغرفة اريد انفجر من العصبية مو على الفلوس لا. شلون يمدون ايديهم شلون ياخذوهن بكل بساطة؟
نزلت الدرج بسرعة. شفت امي كاعدة ب الصالة وخاجية كاعدة يمها يسولفن
خليت الحصالة بوجهن وصحت بعصبية
_قس:: منو ماد ايدة على حصالتي منو ماخذ الفلوس.؟؟
باوعت امي على الحصالة بيدي.
عكدت حواجبها ب استغراب
_فردوس:: منو ماخذ فلوسج؟
_قس:: اني جاي اسأل الحصالة جانت مامفتوحة ومتروسة فلوس هسة ماكو ولافلس ياهو ماخذهن ياهو ماد ايدة؟
صاحت بية خاجية ورفعت عكازتها بعصبية
_خاجية:: ولج ياهو ماخذ فلوسج هوا منو يدري بفلوسج
باوعت لخاجية وحجيت بقهر
_قس:: والله عفت الحصالة مامفتوحة
كامت من مكانها واجت ب اتجاهي
_فردوس:: خاف ماخذتهن وياج وناسية؟
_قس:: لاااااا. قبل لاروح خليت الف ب الحصالة وضميتها
كامت خاجية وصاحت
_خاجية:: سعاددددد سلمى وينججججج تعالن ليه
استمرت خاجية تصيح بنسوان خوالي من شافتهن طلعن من المطبخ مستغربات وحدة العجين ب ايديها والثانية جفجير الاكل
باوعن لخاجية ب استغراب
حجت سعاد
_سعاد:: ها عمة خيرج شصاير
_خاجية:: ياهي داخلة لغرفة البنات من راحن لبيت عمهن؟
باوعت سلمى الي والامي ورجعت باوعت لخاجية
حجت تأشر على امي
_سلمى': محد بس فردوس تدخل للغرفة وتنام بيها. ليش شصاير؟
اشرت خاجية علية وحجت
_خاجية:: الفرخة فلوسها ماكو خالتهن ب الحصالة رجعت من بيت عمها فلوسها مهن
باوعتلي سعاد ورفعت حاجبها
_سعاد': شنو بس لاتبوكنا بس فردوس
_فردوس:: خايبة ماتنجبين ياهو مبوكج انتِ.
صاحت خاجية بيهن مسكتتهن. باوعتلي وحجت
_خاجية:: صعدي انتِ ونسوان خوالج دورن الفلوس بلكت الله طايحات منا مناك لو مغيرة مكانهن وناسيتهن
اتحسرت بقهر ساكتة. باوعت لامي عيونها علية
توقعت هية الي ماخذتهن ومستحية تكول خاف تطلع بواكة كدام نسوان خوالي سكتت وماحجيت شي
بس حلفت فلوسي اطلعهن اطلعهن لو اعرف ادخلهن تحقيقات المهم اطلع فلوسي
صعدنا اني ونسوان خوالي كلبنه الغرفة كلاب ماكو اثر للفلوس جنت واثقة الفلوس انوخذن ما ضاعن اني بيدي ضميت الحصالة وبيها الفلوس شلون يختفن؟
خواتي من درن انقهرن حيل لان يدرن جايبتهن بتعب وشقاء وانتم هم تدرون اكيد
استغربت بيومها نضرات قبس الي جانت تباوعلي وتتبوسم من تشوفني ضايجة على الفلوس
حتى ماسألتني عليهن ولاحجت وياي جانت ساكتة وهادئة لابعد درجة
طلعت من الغرفة بليل اني هيج وقت مامتعودة انام عكس الباقين كلهم يفرشون فراشهم وينامون ابقى اني كاعدة وحدي يا اما اتابع مسلسلات ب التلفون او افتح التلفزون ب الصالة واكعد اتابع
صادف بهذا اليوم نزلت اطبخ اندومي واحظر فلم على "MBC 2 "
بالي كلة الفلوس وين راحت منو اخذهن ماعرف
كل شوي اصفن بقهر بيها عليها فلوسي يرحن هيج
كلها دورت وياي امي انخصبت على الفلوس وخاجية تتوعد للي ماخذهن
رفعت راسي على نزلة شهاب من الدرج خزرتة ودرت اباوع لتلفيزون
جنت اشوف خطواته تتقرب ب اتجاهي بس اني مغلسة مسوية نفسي مندمجة ب الفلم
كعد على القنفة عيونه صارت على التلفزون
باوعلي وحجة
_شهاب:: قس
_قس:: خير
باوعتلة صفن متردد يحجي
باوعلي وحجة ب استغراب
_شهاب:: فلوسج لكيتيهن لا؟
باوعتلة بخزرة رفعت حاجبي وحجيت بشك
_قس:: ها ولك انت ماخذهن مو انااااا شكيتت بيك من البداية كلت هذا شهاب مو مال يسكت على كتلتة القديمة. ماخذذء فلوسي مو الحرامي
باوعلي بصدمة. خلة ايدة على حلكة وحجة بصوت ناصي
_شهاب:: صوتججج قسسسس سكتي
_قس:: شنو ترديني اسكت على حقي لااا عيني لا ماسكت انطيني فوك البكتهن 200 واسكت
باوعلي وفتح حلكة صاح بيه يهز ايديه
_شهاب:: فايززز هذا
_قس:: بواك ولك افضحك اليوم ولجج خاجيةة
وكف وركض علية يسكتني واني اتهدد اله الخاشوكة بيدي
_شهاب:: مو انااااا اخذتهن مو اناااا
_قس:: لعدددد منووو غيرك
_شهاب:: اختج قبس هية الي باكتهن
سكتت مصدومة بكلامة قبس.؟ اختي لا ماتسويها اكيد يجذب هذا يريد يخربني ويا اختي
صحت بي بعصبية
_قس:: لاتشمريننن مصايبك على اختييي شهاب ! ..
_شهاب:: اختج انطتني فلوسج وسلمتهن بيدي
وكفت ابلع ريكي
باوعتلة وحجيت بترجي
_قس:: لاتجذب شهاب عليك الله لاتجذب
_شهاب:: ما مجذب وحتى فلوسج موجودات بغرفتي
بقيت ساكتة ماحجيت شي صدمتي بفعل اختي خلاني اخجل اعبر واحجي شكيت ب امي ماخذتهن وماشكيت ب اختي. لان هاي اختي معقولة اكو وحدة تبوك اختها!
ضحكت على روحي
قس اختج باعتج كدام الكل تتوقعين ماتبوكج
بس هية لو جايتني وكايلة اريد فلوس ما ابخل عليها بفلس واحد ليش هيج سوت !....
كسر صفنتي كلام شهاب من كال
_شهاب:: اختج ماتحتاج الفلوس بس حقارة بيج سوت هيج اخذتهن وانطتني ياهن كالت اخذهن الك
باوعتلة وضحكت
_قس:: كريمة اختي مو؟
_شهاب:: مادرين شتشوفين انتِ.
سكتت ماحجيت شي شحجي شنو الي اكدر اسوي؟ القهر ترس صدري اريد استوعب الي سوته شنو معناه
باوعلي شهاب وحجة
_شهاب:: اخذي الفلوس بس لاتنطيها علم انتِ تدرين هية الماخذتهن
_قس:: شنو؟
باوعلي شهاب وابتسم
حجة
_شهاب:: سويلها جرة اذن
_قس:: لااا لا معليك انت. اني واختي نتجازة انت اطلع منها لاتصير خير
حجة بعصبية
_شهاب:: عوفييي عاطفتج بطلي تنقهرين على اختج
_قس:: انت شعجب هيج اختلفت عليها مو نفسكم جنتو حبايب؟
ابتسم وهز راسة ب اي
حجة
_شهاب:: احبها بس اريد أسويلها جرة اذن
رفعت ايدي وصحت
_قس:: اللهههههههه اللههههههه يا شهاب احبها بس اريد اسويلها جرة اذن اكلك انت جار اذنك قبل؟
_شهاب:: صدكيني كلامج مو مهم ب النسبة الي الي يهمني بس اصحح افعال قبس واخليها تمشي صح
شمرت الخاشوكة على القنفة ومشيت اضحك
بس بداخلي محروكة حرك اريد الزم قبس بيدي اريد اطلع حركة كلبي كلها بيها
صعدت فوك مغلسة على شهاب
فتحت باب الغرفة دخلت شفتها نايمة هية والبنات وامي بنصهن نايمة
شمرت نفسي على الفراش
شسوي بيج يا قبس
زين هية تحب شهاب اني شكو بسالفتهم
انجبي قس هية شالت بكلبها عليج من اخر موقف
خاف غارت وضاجت شلون شهاب دافع علية وانطى بيها كدام الكل
اتحسرت ياربي شسوي حايرة
اختي هاي مابية انطي بيها ولابية اسكت على سوالفها شنوو الحل؟؟
زين معقولة شهاب صدك يحبها.؟ ياحب هذا قس هذا حرام علاقة محرمة شجابه على الحب
زين خاف صدك يريد يتوبها ويحسن من تصرفاتها؟
اهوووو كله بسبب امي ورجعتها رجعتنا لهنا اكيد السبب منها..!!
ب اليوم الثاني جنت حايرة اروح اصارحها واكلها شهاب حجالي لو اسكت؟ يمكن اذا اكلها راح تحقد ب الزايد وتزيد افعالها الشينة
هية تحب شهاب من تعرف بي حاجي الي راح تحقد عليه اني وعلى شهاب هم
هسة اني شعلية ب شهاب يولي اني اليهمني ارجع فلوسي بس الباقي يولون
لالا مو بس فلوسي اريد اصحي اختي واطلعها من قوقعة الحب الي عمه عيونها
طلعت من الغرفة مشيت ب اتجاه غرفة شهاب
دكيت باب الغرفة ووكفت منتظرة شهاب
انفتح باب الغرفة
باوعت لشهاب التلفون بيدة يباوعلي ب استغراب
حجة
_شهاب:: ها قس محتاجة شي
_قس:: انطيني فلوسي
هز راسة ب اي واشرلي ادخل للغرفة
_شهاب:: دخلي
_قس:: مادخل جيب الفلوس وتعال
هز راسة ودخل للغرفة
بقيت واكفة عيوني تتوزع على غرفتة
فتح باب الكنتور طلع منه جيس اسود اجه ب اتجاهي مد الجيس وكال
_شهاب:: هاي فلوسج كلهن
اخذت الجيس من شهاب فتحتها
هاي فلوسي ارباع وخمسميات والالف خمسات وخمسة وعشرين وعشرات هاي جنت بيت عمي شكو ربع اشوفة اخذة واشمرة ب الحصالة
غير مشاريعي الرابحة هم جنت احصل منها فلوس الحمدلله الف الحمدلله لان فلوس حلال رجعلي بدون تعب
باوعت لشهاب وحجيت
_قس:: قبس اذا سألتك على الفلوس انكر
عكد حواجبة ب استغراب يستأل السبب
حجيت ويا ورجعت لغرفتي اني اعرف شلون اربيج يا قبس
ضميت الفلوس بمكان سري وماكالت لاحد لكيتهن خليتها بيني وبين نفسي
نزلت الدرج ادور على قبس سألت عليها كالو ب المطبخ ركضت ماشية ب اتجاه المطبخ
شفتها كاعدة ب المطبخ وحدها تاكل كدامها التلفون اتابع فلم كارتوني
من دخلت رفعت راسها باوعتلي ورجعت مرة ثانية تباوع للتلفون
كعدت كدامها بهدوء
باوعتلي وعكدت حواجبها ب استغراب
_قبس:: شكو؟
_قس:: فلوسي وين
عكدت حواجبها وحجت
_قبس:: وين ادري بفلوسج شوفي وين شامرتهن هسة تطلعين صارفتهن وجاية تتهمين ب الوادم
ابتسمت بوجهه
حجيت
_قس:: طلعي فلوسي قبوسة ادري بيج انتِ ماخذتهن
صاحت بعصبية
_قبس:: انيييي ماخذتهننن شنوو اكلج ترا مالي خلكج ماضال واحد مابوكتي وهسة جاية تردين تبوكيني لاعبالج اني نفسهم واسكت ترا والله
ماخليتها تكمل كلامها.ضربتها راشدي سريع على وجهه
سكتت مصدومة تباوعلي من سرعة الكف الي اجاها
_قس:: فلوسي اذا ماطلعن اليوم سوالفج كلها تصير عند خوانج وافضحج واخزيج اخليهم يجون هما وعمامج يسحلونج سحل من نص البيت ويكسرون ظهرج الج وشنو تردين تتحامين بخوالج؟ هما ما استقبولج من امي تطلكت تذكرين شسوو لو اذكرج من طردونا ؟
ابتسمت بوجهه وغمزت
_قس:: تشدين حيلج بيمن ب شهاب؟ نفسة الي باعج قبل كم يوم كدام الكل وطلعج جذابة غير امه الي تكرهج وتكره طاري امج تتوقعين ترضى بيج يعني ؟ بيمن تزامطين كليلي اطلعلج خيستة
جانت صافنة علية تسمع الي وجسمها يرجف من الخوف
بلعت ريك وحجت تحاول تبين قوتها وهية ماخايفة
_قبس:: ماعندج دليل شلون تبوكيني
_قس؛: لاعندي دليل
_قبس:: وين دليلج.....!!!!
ابتسمت ورفعت راسي اباوع لسحر واكفة خلف قبس مكتفة ايدها تباوع لقبس بخزرة
باوعتلها قبس بعصبية
صاحت بيها بصوت
_قبس:: انتِ مووو انتِ حجيتي براس اختي حتى تبوكنييييي ياحقيرة
_سحر:: شفتج بعيوني تاخذين الفلوس من غرفة اختج
_قبس:: هااااا وهسة اشتغل ضميرج واجيتي لقس تحجيلها يلا صفكولها خوش فتانة وحية ام راسين
صاحت سحر بقبس
_سحر:: انجبي لج انجبي فوك ماساترة على سوالفج وخيستج
_قبس:: ساترة على خيستي ليش عيني شنو شفتيني مك"""" مثلاااا لو بايعة نفسي مثلج ولج خليني ساكتة مو انتِ سويتي الماسويته اني
فتحت سحر عيونها مصدومة من كلام قبس باوعتلي بعصبية
_سحر:: اختج مو مؤدبة وهذا كلامها ماراح اسكت عنه اني اعلمج قبس هسة رايحة احجي كلشي لخوالج والامج اريد اعرف منو البايعة نفسهااا
مشت سحر تطلع من المطبخ ناوية تحجي كلشي وتفضح قبس !!
طلعت اركض وراها اتوسل بيها تسكت وماتحجي شي لان لو احد عرف ماراح يسكتون والسالفة راح توصل لاخواني واكيد ماراح تعدي على خير
سحبت ايدها وحجيت بترجي
_قس:: سحر بربج اسكتي تدرين بيها طايشة تحجي بدون وعي وتفكير
_سحر:: شفتيهاا شلون تحجي قس ولج اني بايعة نفسي !!!
_قس:: حشاج يمعودة شعليج بيها بس اسكتي ولاتحجين شي انتِ فدوة اروحلج لخاطري
وكفت تجر نفس بعصبية
باوعتلي وصاحت
_سحر:: لخاطرج بسسس قس لخاطرج بس
_قس:: اي فدوة اروحلج اني
اتعذرت منها على كلام قبس
كلام قبس جانت قاصدة علاقة خالي وسحر قبل الزواج امي سولفت كلشي كالت علاقتهم غير قانونية دخلو بعلاقة قبل الزواج واهلها اكتشفو وزوجها يسترون عليها
سحر جانت تعرف بعلاقة قبس وشهاب ومحذرتهم اكثر من مرة
وغيرها سحر شايفة قبس تاخذ الفلوس يعني صار عندي دليل غير شهاب يثبت قبس هية الماخذة الفلوس
رجعت للمطبخ احمد الله محد موجود وسمع الي صار جان راحت بيها قبس
دخلت للمطبخ شفتها كاعدة ب الارض تاكل اظافرها بخوف
من دخلت رفعت راسها تباوعلي
حجت بتوتر وخوف
_قبس:: راح تحجي مووو؟؟
_قس:: اي راح تحجي واني احجي هم
_قبس:: جذابة ترا الفلوس مو عندي
_قس:: مايهمني عندج لو لا المهم الفلوس ترجع غيرها تعرفين شسوي
باوعتلي وحجت
_قبس:: تنطين ب اختج علمود فلوس؟
_قس:: انطي بيكم كلكم علمود الفلوس. وها لاتنسين انتِ انطيتي ب اختج علمود شهاب
دنكت راسي بخوف ايديها ترجف
كمت من مكاني باوعتلها وحجيت
_قس:: فلوسي يرجعن فلس فلس غيرها مالج يمي ستر سوالفج كلهن اطلعهن
_قبس:: اختججج انييييييي !!!
_قس:: اخت مثلج ماريدها
حجيتها وطلعت من المطبخ
كلشي حجيته جذب مستحيل انطي ب اختي لو افكر احجي بيوم عليها كدام احد
كل الي جاي اسوي تخويف الها اريدها تتصرف بعقل وتخاف تكرر هاي افعالها مرة ثانية
بقيت كاعدة ب الغرفة انتظر منها خبر اريدها ترجع
اريد اشوف رد فعلها من تروح لشهاب تطلب منه يرجع الفلوس ويكلها ماكو !
اريدها تجرب شعور الغدر من شهاب مثل ماغدرتني اريدها تجرب شعوري
فعلاً دخلت للغرفة تبجي وتصرخ بحركة كلب
جنت كاعدة على الجرباية عرفت سبب انهيارها شنو
كعدت كدامي تبجي ايديها يرجفن
_قبس:: قسسس والله وروح ابوي انطيت الفلوس امنتهن عند شهاب وهسة هسة اكله انطيني الفلوس يكلي مالج يمي فلوس ماتذكر انطيتيني فلوس كتلة انزل احجي اكلهم شهاب اخذ الفلوس يكلي انا انزل قبلج اكلهم قبس تتهمني ماخذ فلوس اختها نشوف يصدكون منو وسحر مرت خالي وياي شاهدة !!!
شهكت وحجيت بصدمة مفتعلة مني
_قس:: يعني انطيتي فلوسي لشهابببب !؟؟؟؟
_قبس:: خليتهننن يمة امنته امنتهه
_قس:: ههههههههههي هاي ثاني مرة تغدرين بية علمود شهاب وتالييي يرجعلج الغدرة
كعدت اضحك عليها وهية ب الارض تباوعلي وتبجي بقهر
قوست حلكها وحجت
_قبس:: قسس شسوي هسة
_قس:: شعلية شوفيلج حل كتلج العندي اذا فلوسي مارجعن اشهرج واخزيج
_قبس:: قسسس والله ماعندي فلوس شلون ارجعلج فلوسجج !!!
قوست حلكي ب ماعرف عيوني عليها
بنفس الساعة رن تلفوني اتصال من نضال
اخذت التلفون فتحت سبيكر اضحك
_قس:: حنضلللل شلونك
_نضال:: ها قسة شلونج
_قس:: الحمدلله انتووو شلونكم شخباركم شكو ماكو
_نضال:: ماكوو على حطة ايدج. اكلج سمعيني
حجيت ويا نضال عيوني على قبس
جانت صافنة تاكلها بشفايفها تبجي
كملت نضال كلامها وكالت
_نضال:: باجر رايحين لسوك مو كلتي بس ترحون كللولي اجي اشتري عباية وملابس؟
_قس:: اييي اييي اجي وياكم
_نضال:: اي حضري نفسج باجر نمر عليج اني وعمج وابتهال
ابتسمت اباوع لقبس
اتفقت اني ونضال وسديت الاتصال
باوعت لقبس وحجيت
_قس:: بيعي تلفونج ورجعي فلوسي
_قبس:: شنو؟
_قس:: باجر تعاي ويانا نبيع تلفونج وتنطيني فلوسي والباقيات رجعيهن حتلو ب الاقصاد
حجت برفض
_قبس:: لااا تلفوني شلون ابيعة
_قس:: بكيفج هاي هية باجر عمج محمد يجي شنو رأيج افاتحة ب الموضوع
دنكت راسها بخوف تفرك ب ايديها
ممكن البعض يشوفني حقيرة بهاي الحظة بس اني جاي اسوي الصح اريدها تفكر بكل خطواتها بعدين اريدها تعرف شلون شهاب مو زين ويبيعها ب اي لحظة
وافقت تبيع تلفونها وفعلا ثاني يوم رحت اني وقبس ويا نضال وعمي محمد وابتهال باعت تلفونها وانطتني الفلوس الدموع بعينها
جنت صاعدة ب السيارة كاعدة ب النص
مادة راسي بين كرسي نضال وعمي
حجيت اباوع لنضال
_قس:: قررت افتح مطعم اسمي " مطعم قس تدخل اله تطلع مفلس "
باوعتلي نضال وصاحت
_نضال:: شنو تردين تسلبين الوادم
رجعت ضهري وحجيت
_قس:: نضولة لضمان هاي
هزت نضال ايديها ساكتة واني اقترح اسم للمطعم
_قس:: زين مطعم قس للبقشيش
_ابتهال:: مطعم كراميش
_قس:: انجبي شهل اسماء مابيها جاذبية
حجت نضال
_نضال:: مطعم نضال لتضليل
_محمد:: تضليل سيارات
درت اباوع لقبس جانت صافنة عيونها على الطريق
ماردت اوصل لهاي المرحلة وياج بس جبرتيني !!!!
" ملاك "
نفس اليوم بعد ما السيد فاتح الكل بموضوع خطبتي لفقار اجو امي وابوي حجو وياي ب الموضوع وانتظرو ارجع الهم الموافقة واني بكامل قناعتي
جنت كاعدة ب المطبخ ايدي الى خدي صافنة الابتسامة بوجهي
جانت عطاء واكفة تفتر ب المطبخ تحظر حليب للسيد معراج
باوعتلي وحجت ب استغراب
_عطاء:: اكلج انتِ موافقة على فقار مو؟
_ملاك:: مادري بعدني ما مفكرة
رفعت حاجبها وهزت ايدها
_عطاء:: ابصم عليج مفكرة ب الموضوع اول يوم شفتي فقار بي
ابتسمت وكلبت عيوني اضحك
شالت عطاء الماي من الطباخ خلت الكلاص على الطاولة وجابت القوري تصب الماي ب الكلاص فوك الحليب والشكر
جان القوري مفتوح من فوك
نزلت القوري تصب الماي. لان الماي حار وفاير والقوري مامغلوق
صار فوران الماي كله على ايدها
نزلت القوري متوجعه من حرارة الماي
ركضت فتحت باب الثلاجة خلت ايدها ب الثلاجة متاذية
باوعتلها وهزيت ايدي
_ملاك:: غير تغلقين القوري
_عطاء:: ايدي راحت ايدي
كمت من مكاني اخذت غلق القوري
سديت القوري وصبيت الماي ب القوري. سمعت صوت معراج يصيح ب اسم عطاء
باوعتلها وحجيت
_ملاك:: تاخذي
_عطاء:: ايدي تاذيني
_ملاك:: راح اخذة اني
هزت عطاء راسها ب اي ساكتة تشمر ثلج من الثلاجة على ايدها اخذت كلاص الحليب ب الصينية وطلعت من المطبخ
محد جان موجود ب الصالة كاعدين ب المصلى
فتحت باب المصلى شفت فقار ومعراج ومشواق كاعدين بنص المصلى كدامهم كتب يقرون بيهن ويسجلون المعلومات
من دخلت رفعو راسهم ب اتجاهي.
رجعو دنكو روسهم على الكتب مرة ثانية
حجيت بصوت ناصي تعرفون من الخجل والحياء
_ملاك:: سيد معراج هذا الحليب الك
رفع راسة معراج ابتسم وكام وكف اجه ب اتجاهي قدمت الصينية وابتعدت بخطواتي اخذت الحليب من الصينية وابتسم متشكر
رجعت للمطبخ شفت عطاء واكفة تباوع لباب الحديقة بخوف جسمها يرجف باوعتلها وحجيت ب استغراب
_ملاك:: شبيج
_عطاء:: ماحب احلف بس مستعدة هسة احلف على الي شفتة
_ملاك:: شنو؟
_عطاء:: قبل شوي سمعت صوت يتردد ب اسمي من الحديقة فتحت الباب عبالي اتوهم بس لاااا شفت مرة لابسة عباية كاعدة على المرجوحة تباوعلي
بلعت ريك وكملت
_عطاء:: جنت مركزة عليها ماعرف منو كرصني من خاصرتي التفتت بس رجعت اباوع للمرجوحة ماشفت احد
عكدت حواجبي اسمع الها
حجيت
_ملاك:: يمكن تتوهمين؟
_عطاء:: ماعرف ماعرف
طلعت عطاء من المطبخ خايفة
خليت الصينية على الطاولة
مشيت ب اتجاه باب الحديقة فتحت الباب ووكفت اباوع للحديقة فارغة محد موجود
اكيد تتخيل؟
التفتت على صوت فقار
شفت واكف قريب على باب المطبخ مكتف ايده ومدنك راسة
_ملاك:: ها سيد
رفع راسة باوعلي عيونة تتهرب يمنى يسرى
حجة
_فقار:: اريد كلاص حليب مثل معراج
عكدت حواجبي وحجيت
_ملاك:: حليب؟
_فقار:: اي بس معراج يشرب حليب؟
_ملاك:: مو سيد معراج مثقف مايشرب جاي كله حليب وعصاير
رفع فقار حاجبة وحجة ب انزعاج
_فقار:: وانا مو مثقف مثلا ً ؟؟؟
_ملاك:: لااا اقصد سيد معراج هاي فطرتة
_فقار:: اي كلنا هاي فطرتنا من اول يوم نولدنا على الدنيا نشرب حليب يعني مو بس معراج مثقف علوية
كلبت عيوني وحجيت ب انزعاج
_ملاك:: سيد معراج تحسة مثقف ودكتور ناضج
_فقار:: ناضج ليش تفاحة هوا؟
_ملاك:: لا اقصد من هذول العباقرة
_فقار:: علوية انا مدرس فيزياء
حجيت
_ملاك:: ايي تمام بس تحس السيد معراج ذكي اكثر وو دكتورررر هم مثقف يعني
حجة فقار ب انزعاج وعصبية
_فقار:: وشنو الدكاترة يختلفون عن الاساتذة؟
_ملاك:: اي تحسة مثقف اكثر
_فقار:: هاي خامس مرة تكولين مثقف علوية. يعني قصدج انا مو مثقف ؟؟؟
حجيت اهز ايدي
_ملاك:: لا مثقف بس سيد معراج تحسة
_فقار:: مثقف اكثر
_ملاك:: اي عفية مثقف و
_فقار:: واعي اكثر
_ملاك:: اي صح شفت حتى انت توافقني الرأي
هز راسة ب اي
باوعلي وحجة ب ابتسامة كاتم عصبيتة
_فقار:؛ بلا زحمة اريد جاي تدرين انا مو مثقف اشرب كله جاي ونومي بصرة لان مو مثقف مثل معراج
_ملاك:: اي لا ماكو زحمة هسة اجهزلك الجاي
هز راسة ب اي وطلع من المطبخ جاي اخذ القوري اخليه على الطباخ سمعت فقار صاح بصوت عالي
_فقار:: عمة ليش مافطمتي معراج عن الحليب من صغرة
_لباب:: يااا يمة اكو احسن من الحليب مفيد للجسم ومعراج يمة حبيبي هوا مايشرب بس حليب مايرتاح للجاي
مديت راسي من باب المطبخ وصحت
_ملاك:: قصدج مثقف علوية
_لباب:: اي يمة عفية عليج مثقف
صك فقار على سنونة ومشة ب اتجاه المصلى
ضحكت ورجعت اجهز الجاي اله
كل ماتذكر سالفة المثقف اضحك اني ماجنت قاصدة شي فعلاً السيد معراج مثقف هواي وواعي وهدوئة لطيف
قبل يوم رجعتنا جنت كاعدة ب المطبخ اني وشاهيناز نسولف دخلت قدس للمطبخ كعدت الطاولة مشاركتنا السوالف والحديث
طلعت شاهيناز من المطبخ تحجي ويا اخوها سجاد وكفت اني انزل الاكل من الطباخ واحجي ويا قدس
_ملاك:: صدك قدس هم حجيتي ويا امج البارحه احجي ويا قس امج حجت وياي سوالفها حيل حلوة و..
جنت احجي عيوني على الاكل التفتت اباوع لقدس
سكتت اباوع الها
جانت كاعدة على الكرسي تباوعلي ب ابتسامة غريبة
ضحكتها مخيفة
عاوجة ركبتها عيونها بعيوني
بلعت ريكي بخوف خليت الاكل على الطاولة اضحك
تذكرت عمتي جهاد كالت لاتخافن خليجن شجاعات وتصرفن طبيعي
باوعت لقدس اضحك هزيت ايدي وحجيت
_ملاك:: عيونج حلوة ههيهههيي
صفنت عيوني على الطاولة ماعرف شتصرف رجلي انشلن من الخوف ماريد ابين خوفي اني شجاعة ملاك انتِ شجاعة لاتخافين
باوعت لقدس وغمزت
_ملاك::: خشمج هم حلو
رجعت صفنت مرة ثانية ابلع ريكي بخوف
باوعتلها وحجيت
_ملاك:: نضراتج تخجلني والله مادوريهن
باوعت لقدس ابتسامتي بوجهي
_ملاك:: بطتنه بطت ببطن بطتكم
خلت قدس ايدها على وجهه تمسح على وجهه بقوة
تراجعت بخطواتي محظرة الركضة والطفرة
رفعت قدس راسها باوعتلي ب استغراب
_قدس:: شبيج؟
_ملاك:: ها شبية
_قدس:: راسي يأذيني راح انام
كامت قدس وطلعت من المطبخ مخلتني بصدمتي وخوفي من الي صار نضراتها جانت مخيفة
حسيت ب رجفة تسلل بجسمي بمجرد تذكرت ابتسامتها
ثاني يوم ودعنة بيت السادة ورجعنا لبيتنة
جنت فرحانة من الداخل كل ماتذكر كلام السيد وشلون صارح الكل بخطبتي اني وفقار جنت ابتسم بفرح
ابوي واخوي ميزان جانو فرحانيين بفقار ومتونسين بي
واني هم متونسة
تذكرت عمتي جهاد من كالت فقار خوش فقار
" شاهيناز "
مرت الايام وبدت التجهيزات لمشاية الاربعين
السيد عبد المقتدر والسيد معز وعوائلهم رجعو لبيوتهم
سمعت من البنات جادح راجع لبغداد هوا وزوجتة وابنهم عماد وامه رنا وكفاية اخته
حتى غل و غضنفر رجعو
كلها رجعت لبيوتهم
طلعت من البيت الكتب بيدي
مشيت ب اتجاه عمتي والعلوية زهراء جانن واكفات كدام الباب يحجن
سلمت عليهن ومشينة قاصدات الحوزة
جنت مدنكة راسي وامشي بس اذني تسمع لسوالف عمتي والعلوية
حجت العلوية زهراء بقهر
_زهراء:: خطية حيل انقهرت على جادح
_جهاد:: ابوي شلون ماحجة ويا جادح
_زهراء:: ابوج زعلان من جادح من ذاك اليوم وذيج السالفة ماحجة ويا جادح بعد. البارحه رنا ام جادح تحجي وياي . جادح من داري ابوج كايل لغل وغضنفر بس ضايج حيل
هزت عمتي راسها ب اي ساكتة
استغربت ليش جادح ضايج شنو الموضوع الي السيد ماحجاه لجادح؟
وكفت بنص الطريق باوعت لعمتي والعلوية وحجيت
_شاهيناز:: عمة ام ود كالت من تمشن للحوزة مرن علية تروح ويانا.
_زهراء:: جيبها وتعاي احنا نطلع كدامج رجليه اني مابية اوكف انتظر
باوعتلي عمتي وحجت
_جهاد:: روحي شاهيناز احنا نتمشه كدامجن
هزيت راسي ب اي ومشيت عكس طريقهن
ام ود صديقتي ب الحوزة تدرس ويانا. زوجها ياخذها للحوزة كل مرة.
بس اليوم زوجها ماموجود وطلبت مني امر عليها
مشيت ب اتجاه بيت ام ود عيوني على الكتب
الشارع جان فارغ بس اني امشي
وصلت لبيت ام ود دكيت الباب ووكفت منتظرة يفتحو
التفت اباوع جانت اكو سيارة واكف على مسافة من بيت ام ود نزل منها رجال ضخم صاحب ملامح حادة مابيها ذرة من الرحمة
وكف شامر حيلة على السيارة الجكارة بيدة والتلفون ب الايد الثانية
درت عيوني منه مغلسة عنة رجعت طرقت باب البيت مرة ثانية
اجاني صوت ودة تصيح منو
فتحت الباب وطلت راسها تباوعلي
ابتسمت بوجهه اضحك
_شاهيناز:: ها ودة شلونها الوردة
ضحكت ود خجلانة دنكت راسها تفرك ب رجليها
_ود:: زينة
_شاهيناز:: حبيبتي ان شاءالله دون زينة. ماما وين؟
_ود:: جوا تلبس الشال
_شاهيناز:: يلا عفية كولي الها شاهيناز اجت
هزت راسها ب اي ودخلت تركض للبيت
بقيت واكفة منتظرة ام ود
جاني فضول على هذا الشخص كل شوي اباوع بطرف عين وكفتة وملامحة حسيتة مجرم يفتر حول السيارة الجكارة ماطاحت من ايدة والتلفون ماوكف من الاتصال
كسرت نظراتي من اجت ود تركض
باوعتلي واشرتلي على البيت
_ود:: علوية ماما تكول تعاي دخلي للبيت
_شاهيناز:: لا حبيبتي انتظرها هنا
هزت راسها ب اي وسكتت واكفة ب الباب تباوعلي بخجل ابتسمت بوجهه
مرت دقايق على وكفتي ود تركض للبيت وتجي
_ود:: ماما هسة تجي
هزيت راسي ب اي ساكتة
سمعت صوت عالي جاي من جهتي
التفتت اباوع.
عكدت حواجبي مستغربة من شفت دلهب صاعد على ستوته يمشي بسرعة
بقيت مستغربة طلعتة دوم الدفان يصدمني بظهوره يطلع بدون سابق انذار
وكف الستوتة كدام السيارة ونزل يتسالمون
جان صوتهم ناصي ماسمع شيحجون بس ثنينهن متحمسين ويسولفون ب انطلاقق
التفتت على طلعة ام ود من البيت باوعتلي وبقت تتعذر عن التأخير الي صار
هزيت راسي وابتسمت
_شاهيناز:: عادي ام ودة ماصار شي. يلا اذا كملتي نمشي
_ام ود:: اي علوية كملت ماعندي شي. ماما ود دربالج على اخوج بس يبجي صيحي لعمتج سجى. لاتقتربين للكهرباء ولا للنار معليج ضلي كاعدة عند اخوج هسة عمتج تجي يمكم
مشينة بعد ما وصت بنتها على اخوها الصغير
مشينة للحوزة صارت عبرتنا على دلهب وصديقة
عبرناهم اني وام ود ساكتات ثنينه
سمعت صوت ضحكة دلهب وصرختة بحماس
_دلهب:: شالوهمممم يبااا
صارت ضحكاتهم تتردد بفرح استغربت منو الي شالوهم؟ وليش دلهب هيج فرحان
غلست عليهم اني شعلية بيهم السالفة كلها مو يمي بس فضولي المواضيع الي ماتخصني دوم عالي
مشينة ب اتجاه الحوزة نسولف اني وام ود توقعت اشوف عمتي والعلوية بس لا واصلات قبلنة لان اتأخرنا يلا وصلنه للحوزة
دخلنه للحوزة
كل الطالبات موجودات وكاعدات متحظرات للدروس
مشيت ب اتجاه رف الكتب ارجع الكتب العندي
حسيت بشخص وكف خلف
اجاني صوت طالبة من البنات
_:: علوية شلونج
التفتت عليها ب ابتسامة رحبت بيها. جانت خجولة عيونها تطير من مكان لمكان
باوعتلي وحجت
_:: علوية اكو بنية اجت اليوم تسأل عليكم وعلى السيد
عكدت حواجبي ب استغراب
_شاهيناز:: منو. ماكالت اسمها؟
_:: لاكالت اسمها خلود
_شاهيناز:: زين. شنو رادت
_:: ماعرف والله علوية هية اجت قاصدتجن بس محد جانت موجودة ف حجت وياي. هية اعتقد تعرف واحد من السادة
استغربت كلامها
حجيت
_شاهيناز:: يمكن قاصدة السيد عبد الرؤف احتمال شخص حاجيلها عن السيد وجان عدها موضوع واجت قاصدته
_:: ماعرف علوية بس هية تخدم ب التفتيش لان جانت لابسة وشاح
هزيت راسي ب اي ساكتة
رجعت البنية لمكانها واني رجعت اكمل شغلي مادققت ب موضوع هاي البنية وهاي اول مرة اسمع اسمها
كملنه دروس الحوزة ورجعنا
بوجهي دخلت لبيتنه نمت ماكعدت غير على صلاة المغرب صليت ونظفت البيت كملت شغلي كله وطلعت لبيت السيد
دخلت للبيت شفت عاتكة كاعدة على القنفة وعمتي كاعدة كدامها التلفون بيدها تكلب
سلمت عليهن وكعدت
بحادث عاتكة صابني الخجل والمستحة والذنب بسبب الي صار وشلون وصلتها للموت بيدي بسبب تصرف غير مقصود
بس السيد وعاتكة كدرو يمتصون الخجل والتوتر مني
باوعت لعاتكة وحجيت ب استغراب
_شاهيناز:: عمتي رقية وين
_عاتكة:: توها طلعت هية والعلوية لباب راحن يزورن الامام. امي حيل متونسة وفرحانة
_شاهيناز:: ان شاءالله دومها فرحانة بس ليش؟
ابتسمت عاتكة تباوعلي بفرح
_عاتكة:: بسبب قرار فقار وموضوع الزواج
_شاهيناز:: كلنا فرحانين مو بس عمتي
_عاتكة:: لو تشوفين فقار شلون متونس ولا كانو السيد قبل يتوسل بيه على الزواج
ضحكت وغمزت لعاتكة
_شاهيناز:: غير ملوكة ياعيني
_عاتكة:: لججج اني مصدومةة ماتوقعت ولا واحد ب المية فقار رايد ملاك
صفكت ايدي بفرح وحجيت
_شاهيناز:: انييي فرحانة لان صايرة احب ملاك وتعجبني
_عاتكة:: انيييييي هممممم فرحانة
مر الوقت على كعدتنا اني وعاتكة عمتي جانت فاصلة عن عيونها ب التلفون
دخل فقار للبيت سلم وكعد على القنفة فتح تلفونة يكلب
رن تلفون عمتي جهاد طلعت من الصالة دخلت للمصلى تحجي
صاح فقار ب ام الحسن تجي
وكفت ام الحسن تباوع لفقار
_ام الحسن:: ها فقار
_فقار:: حبيبتي فدوة رايد كلاص حليب
_ام الحسن:: حليب لو جاي
_فقار:: لاحليب ماشرب بعد بس حليب
عكدت حواجبي ب استغراب
_شاهيناز:: من يمتى تحب الحليب؟
_فقار:: من اليوم قررت اصير مثقف
_عاتكة:: ليش الثقافة ب الحليب؟
باوعلنا وفقار وحجة
_فقار:: اي وراح البس نظارت هم
_عاتكة:: هاييي شنو فقار ماتحتاج نظارة انت؟
_فقار:: الثقافة تحتاج
عوجت حلكي مستغربة كلامة صرننا اني وعاتكة وحدة تباوع بوجه الثانية ثنينه مافاهمات كلام فقار
طلعت عمتي من المصلى نضرات الانزعاج والعصبية بعيونها باوعلها فقار وعكد حواجبة
_فقار:: ها عمة شبيج؟
_جهاد:: رنا ام جادح خابرتني قبل شوي
_فقار:: خير ان شاءالله
اتحسرت عمتي وحجت
_جهاد:: صايرة مشكلة بين غضنفر وقدس
_عاتكة:: مشكلة شنووو عمة؟؟؟
_جهاد:: ماعرف شصاير ب الضبط بس غضنفر مرجع لقدس لبيت اهلها وهية تريد تطلك
"" "" "" "" "" "" "" "" "" "
هيلاو مددلاتي ♥
شكرا لزيارتكم عالم روايات سكيرهوم
