رواية سراج السادة الفصل الواحد والثلاثون بقلم غسق ادريس
" قس "
نزلت من الدرج اركض فتحت باب الغرفة ودخلت جفت
باوعت لامي وصحت
_قس:: قدس اختي ببيت عمي
ابتسمت امي بفرح وحجت
_فردوس :: صدكك اتصلييي عليها خلي تجي هنا
_قس :: ماتقبل تجي رجلها مايرضا بس كومي احجي ويا شهاب ياخذنا لبيت عمي
حجت امي بزعل
_فردوس :: ليش ماتجي اريد اشوفها
_قس :: رجلهااا يمهه رجلهاا مايقبل
حجت خاجية تباوع لامي
_خاجية :: يمة روحي انتِ شوفيها ببيت عم البنات
_قس :: لانضال ماتقبل تكول فردوس احش رجليها لو اجت
صاحت امي بعصبية
_فردوس :: ختولي هاي نضال ليش تخليني اخابرها هسة اغلط عليها
_خاجية :: خايبة اسكتي مانريد مشاكل عوفج عود بعدين تشوفين بتج احجي ويا رجلها اخلي يجيبها الج
سكتت امي مزعوجة
طلعت من الغرفة مامهتمة المهم عندي اشوف قدس مشتاقة الها هواي
صعدت لغرفتي اجهز نفسي حتى اروح لبيت عمي
خواتي قسار وقادسية كامن يجهزن وياي عكس قبس الي بقت كاعدة بمكانها تباوع لسقف صافنة
حجت وياها قادسية وانطتها علم
حجت بعدم اهتمام
_قبس :: ماروح اني بس بوسي قدس الي وسلميني عليها
حجتها وغطت راسها ب الحاف
شفتها رافضة الجية ويانا عفتها براحتها وطلعت من الغرفة اني والبنات
اخذنا شهاب لبيت عمي محمد
اول ماوصلت للبيت دخلت اركض متلهفة ومشتاقة لقدس
شفتها ماموجودة ب الصالة ركضت اصعد الدرج
واستوقفتني نضال
_نضال :: نايمة قدس
_قس :: اي هسة اكعدهااا
_نضال :: عوفيها تعبانة خليها هية تكعد
باوعت لنضال ب استغراب
_قس :: شبيها تعبانة؟
_نضال :: متعاركة ويا السيد
رفعت حواجبي بصدمة
حجيت
_قدس :: متعاركة ويا غضنفر؟؟
_نضال :: مشكلة عادية بس هية ضايجة لهذا اكلج عوفيها خلي ترتاح من تكعد شوفيها عود
مشيت ب اتجاه نضال وحجيت
_قس :: ماحجت السبب ؟
_نضال :: لا بس كالت متزاعلين
_قس :: السيد جابها مووو
_نضال :: اي
كعدت على القنفة مستغربة
البارحه احجي وياها ماحجت شي؟
كعدت نضال على القنفة تلبس بجواريبها
باوعتلي وكالت
_نضال :: ترحين وياي للسوك
_قس :: اي اروح
_نضال :: اي ادري بيج مامتعودة تخلين "" "" ب الكاع يلا كومي
كمت من مكاني لفت نضال الشال على راسها لبست عباتها وطلعت واني امشي خلفها
صعدت بسيارة مجتبى ابن عمي توها نضال تسد باب السيارة وطلع علي ابن باسم من البيت يركض
باوع لنضال وصاح
_علي :: بيبي خليني اروح وياج
_نضال :: البسك نعالك وتعال
_علي :: حلفي بروح امج ماتعوفيني وترحين
مدت نضال راسها من الجامة وصاحت بعلي
_نضال:: ولك ياهو علمك تحلف بروح امي؟
مديت راسي من الجامة وحجيت
_قس:: انت اخلاقك منين جايبها
باوعلي علي وحجة
_علي:: عمتي قس علمتني كالت حلف بيبي نضال ب امها وهية ماتجذب
ابتسمت وحجيت
_قس:: مني متعلم اخلاقك هاي
طكتني نضال براسي ادردم عليه
باوعت لعلي وصاحت بي
_نضال:: يلا بسرعة احسبلك ل 3 اذا ماجيت انعوفك ونروح
دخل علي للبيت يركض ونضال تحسب
طلع علي من البيت يركض بسرعة فتح باب السيارة وصعد
باوعت نضال ل مجتبى وصاحت
_نضال:: يلا انت استعجل لايزعلون
مشة مجتبى للسوك
باوعت لنضال وحجيت
_قس:: نضيلة اني البارحه صفنت ويا روحي كلت نضال شكد تعبت ويانا مايوم هديتها هدية اجازيها على تعبها ويانا
_نضال:: اي وهسة شتردين
_قس:: شنو تردين تتشرين من السوك اشتري واني ادفع
دارت نضال علية وابتسمت
_نضال:: خوش لعد اشترينه سمجة اليوم نشويها
_قس:: كتلج شنو تردين تشترين اشتري اني ادفع
اتونست نضال تمدح بية واني مبتسمة على فرحتها خطية مايوم انطيتها عربون لحبي الها اليوم قررت احرك مشاعري وجيبي وانطيها
وصلنه للسوك بقى مجتبى ب السيارة منتضرنا واني ونضال وعلي نزلنه نتسوك اخذت نضال بيد علي ومشت تفتر ب السوك واني خلفها امشي
اول ماصارت كدامنا ام السمج ركضت عليها نضال
وكفت نضال تعامل على سمجة جبيرة
واني واكفه يمها
_نضال :: بيش كيلو السمجة
_ ب 7
_نضال :: انطينة كيلوين
باوعت لنضال بصدمة
_قس:: بس لاعبالج اني ادفع؟
_نضال:: اي انتِ ادفعين خير ومدت ايدة وكليهم اليوم سمج من فلوسج خطية هل مساكين خليهم يدعولج
سكتت اباوع لام السمج توزن السمج
باوعتلي نضال وكالت
_نضال:: اشتريلنا طرشي هم خطية السمج وحده ماينبلع
_قس:: شسالفة نضال
سكتت نضال مغلسة عني
اخذت علاكة السمج من المرة باوعتلي وحجت
_نضال:: يلا دفعي الفلوس خليني اعامل على الخضرة
حجتها ومشت مبتعدة عني
باوعت للمرة وابتسمت
_قس:: ما يصير تحسبيلي السمجة على 5
_:: لا يمة مايصير
_قس:: 5 ونص؟
_:: خالة مايصير
_قس:: زين 6؟؟
باوعتلي المرة بعصبية وكالت
_:: مايصير يمةةة يطلع عليه خسارة
اتحسرت بقهر اسب بنفسي شجاني وصرت كريمة
فتحت الجنطة اطلع الفلوس باوعت للمرة وابتسمت
_قس:: زين 6 ونص؟
_:: خالةةةة اكلج مايصير رجعي السمجات وروحي شوفيلج واحد يبيع الج ب 6 ونص
مديت الها الفلوس مزعوجة هسة شيصير لو اطيحيلي الف دينار التفت ابتعد عنها
درت عليها وابتسمت
_قس:: ماتصير ب 6 و 750 ؟؟
كمزت من مكاني من شفتها شالت مثقال الميزان
ابتعدت عنها ادردم هوا ربع دينار شسالفة
مشيت ب اتجاه نضال شفتها واكفة عند ابو الخضرة بيدها ريحانة تاكل بيها
من شافتني اشرتلي وصاحت
_نضال:: تعاي اشتريلنه خضرة
دارت على ابو الخضرة وحجت
_نضال:: انطيني فجل هم
باوعتلي وكالت
_نضال:: عمج عندة قالون خلي يشتغلنه بليل
دنكت راسي بخجل من ابو الخضرة ضحك اخذت نضال علاكة الخضرة واشرتلي ادفع الفلوس
طلعت الف من الجنطة وانطيتة لابو الخضرة مشت نضال تفتر ب السوك واني اغلط على نفسي ويا روحي شجاج حجيتي لو منلصمة مو احسن
وكفت نضال وصاحت بية
_نضال:: تعاي ولج قسيسة اشتريلي ترجيات
_قس:: نضاللل لاتستغلينييي
_نضال:: خايبة عليمن هنا ب الف تعاي
مشت نضال ب اتجاه البسطية واني احجي وياها واحذرها
_قس:: بس تراجي ماشتريلج غيرها والله
_نضال:: تعاي تعاي
وكفت نضال تكلب ب التراجي واني اباوعلها خاف تاخذ شي زايد
اخذت تراجي من السلة وانطيتهن للرجال
_نضال:: اريد هذن
_:: تدللين يمة
التفتت اباوع لعلي ابن باسم
جان واكف يباوع للشارع والناس شلون يمشون خطية اول مرة يشوف بشر وشارع ولا جنة خلص عمرة ب الشوارع
التفتت على صوت نضال
_نضال:: ولج قس المحبس مايطلع من ايدي
مشيت ب اتجاها اباوع للمحبس
_قس:: نضاللل !!!
_نضال:: اشتري بعد ماكو غير حل
اخذت اصبعها اريد اطلع المحبس وهوا ماكو حاشر ب اصبعها
باوعتلي وغمزت
_نضال:: مايطلع شبيج لاتأخيرنا انطي للولد فلوسة خلينه نطلع
_قس:: لاعليمن
باوعت للولد ابو البسطية وحجيت
_قس:: عندك سجينة؟
_نضال:: عليمن ولج !
_قس:: نكص صبعج غير ؟
سحبت نضال ايديها من ايدي خازرتني
_نضال:: ادفعين فلوسة لا اطيح حضج
_قس:: كتلج بس تراجييي
_نضال:: امشي لج امشي
مسحت على وجهي بعصبية دفعت فلوس التراجي والمحبس والتفتت امشي خلف نضال
مشت نضال تباوعلي وتضحك واني مخنزرة
وكفت تباوع ب استغراب
باوعتلها وحجيت
_قس:: يلا ماتمشين
_نضال:: ولج قس علي وين؟
باوعت للمكان ب استغراب توا جان واكف هنا وين راح مشت نضال واني خلفها عيوني تتوزع بين الناس وين راح هذا؟؟؟
دارت علية نضال بخوف
_نضال:: ولجج وين راح الولد
_قس:: ماعرففف قبل شوي جان واكف يباوع للشارع
مشت نضال تهمش بين الناس وتسأل
وكفت نضال وهزت راسها بقهر
_نضال:: ربي لاتشمت بيه الناس
_قس:: عليمن يتشمتون
دارت نضال علية وصاحت
_نضال:: سكتيييي ولج كله من وراج انتِ السبب ما انتبهتي على الولد ولككككك يمةةةةة علي وينك احتركت امك كون
مشت نضال واني امشي وراها
بجت نضال ادك على وجهه وتصيح راح علي
حجيت ويا نفسي
_قس:: نادي علياً مضهر العجائب تجدهُ عونً لك الناوائب علي علي علي علي ياعليي
الخوف بدة يسيطر علية وين راح الولد
حجت نضال بصريخ تبجي
_نضال:: ولكككك يمةةة علاوي وينك
انقهرت حيل عيوني على الطريق اريد اشوف علي اريد عيني تلكفة
بعد فترة من البجي وصياح نضال صاح واحد بنضال
_:: حجية هذااا الولدددد تعاي
دارت نضال على علي مبتسمة شفتة بيد الرجال يبجي ايدة بحلكة مشت نضال ب اتجاهه توقعت راح تاخذ ب الاحضان والبوس والدموع بس لااا ! !
صارت عيوني على نضال من وكفت بنص الطريق نزعت الشحاطة من رجلها وركضت على علي تكتل بي وهوا يصرخ متوجع
الناس كلها التمت يبعدون علي من ايد نضال
باوعت للناس عيونهم علينا ابتسمت بخجل وحجيت
_قس:: تفريغ طاقة هذا احد انواع البر
سحبت نضال عن علي
جانت تبجي مقهورة وهوا يبجي وياها حضنته بعد الكتل تعاتبة شلون ضاع
ماعرف شلون بقيت متحملة اوكف هل وكفة ماضل واحد ماباوع علينة وضحك خفت لايصورون نضال وينشروها بحجة التعنيف الاسري
مشينا مبتعدين بعد مانضال تشكرت من الناس
اباوع لنضال راحت تشتري لعلي كيلو برتقال عمي على هاي الفشلة صناديق برتقال ماتفيد
مشينا طالعات من السوك نضال مرة تصكع علي مرة تحضنة وتبوسة بنص الدرب شفت وحدة مشبهااا عليها
باوعت لنضال وصحت
_قس:: خايبة نضيلة هاي ام سراب الجنتي تسوين عدها سحورة
باوعت نضال لام سراب عاوجة حلكها
ضحكت ام سراب تباوع لنضال
_ام سراب:: ها نضيلة شلونج
_نضيلة:: ها ام سراب زينة اني بس انتِ شصاير بيج صايرة جنج عودة ماسحة هاي من السحورة شوفي الله شلون كلبها بيج
ضحكت ام سراب وحجت
_ام سراب :: ليش انتِ شنو جنتي تسوين عندي حروزة شو هم سحورة
_نضال:: الله يكفيني شرج هيا بس مرة وحدة جيتج ردتج تسويلي محبة لمحمد وهاي من ايدج ماضال مرة ماراكض الها حتى سحورتج الله كالبها
ضحكت ام سراب قبل لاتحجي ودعتها نضال مستعجلة على الرجعة مشيت خلف نضال صافنة
صحت بنضال من وراها
_قس:: نضال اذا ماترجعيلي فلوسي القديمة اكول لعمي محمد نضال تسويلك سحر.
_نضال:: طز بيج انتِ وعمج
سكتت ملصومة بعد شحجي الفلوس ودخلن لجيب نضال شنو يطلعهن
رجعنا للبيت بس سمعت صوت قدس ركضت عليها فرحانة
اخذتها بحضني اضحك متونسة بجيتها عكسها جانت تتصنع الضحكة والحزن واضح بعيونها !!
" قدس "
بيوم رجعتنا للبيت قرر غضنفر يغير طريقة بدال مانرجع لكربلاء لبيت السيد معز طلعنة لبغداد لبيت رنا ام غضنفر
استغربت بس ما اهتميت ولا سألت غضنفر
طول الطريق عيوني بقت تراقب من جامة السيارة على الشارع
جادح وجميلة وابنهم عماد وكفاية اخت الولد بسيارة
واني وغضنفر وغل ورنا ام غضنفر بسيارة
غفيت بنص الدرب مستسلمة عيوني للنوم
بعد مدة من الوقت
سمعت صوت عمتي رنا تصيح ب اسمي وتحرك ب كتفي تريد تصحيني
فتحت عيوني بتعت. حجيت اباوع لعمتي
_قدس :: هااا عمة
_رنا:: يلا يمة كومي ماضل شي وصلنه
هزيت راسي ب اي وكعدت على حيلي افتح بعيوني اريد اصحح
باوعت لغضنفر يباوعلي من المراية
عدلت ربطتي ورجعت نفسي للخلف اعدل كعدتي
باوعت لغل عيونة على الطريق والسبحة بيدة يسبح
درت عيوني على الجامة واتحسرت
صرنا بمحافظة بغداد
الي مايعرف عمتي ام غضنفر رنا عايشة ببغداد قريبة لبيت اهلها هيا و كفاية بنتها
والولد غل عايش هوا امه يعني استقرارة ببيت امه
اما غضنفر وجادح ف لا بين بيت امهم وبين بيت ابوهم السيد معز
وكف غضنفر كدام البيت باوعت للبيت بتمعن
جان البيت من الخارج جميل
البيت كله مصبوغ ابيض ومنقش بلون صحراوي كلش حلو ومرتب
نزلنا من السيارة
وكفت كدام باب البيت التفتت على غضنفر ينزل الجنط من السيارة
دخلت خلف عمتي للبيت بعد ما غل فتح القفل
دخلت للبيت عيوني تتوزع على البيت
حسيت بتعب فضيع اشتاحني ردت بس انام اشرتلي عمتي على غرفتها دخلت للغرفة نمت على الجرباية ضاربة العالم ومامهتمة
هيج مرت الايام صابني برود فضيع اتجاه غضنفر صرت ادور الزلة والعركة دوارة وجميلة ماجانت تقصر جانت تجيب وتزيد النار حطب
بيوم من الايام جنت كاعدة اني وجميلة وكفاية ب المطبخ باوعتلي جميلة وحجت ب استغراب
_جميلة:: اكلج صدك شعجب ماحبلتي ؟
_قدس:: ماحب ماريد الاطفال
_جميلة:: اني اعرف غضنفر يحب الاطفال
ابتسمت كفايةة وهزت راسها ب اي
_كفاية::كلش يحب الاطفال غضنفر
_قدس::ليش هوا بكيفة لو بكيفي؟
ضحكت جميلة وحجت
_جميلة::قصدج انتِ المسيطرة على هاي العلاقة
_قدس::اي اني غضنفر شغلتة بس يسمع الي
دنكت راسي على الخيار اسوي زلاطة حجيت بدون مارفع راسي
_قدس :: غضنفر شنو اسوي يكول بكيفج ماعندة حجاية ولا قرار بعلاقتنة ههه ابسط شي لو رحت هسة وعاركتة وحتى وان كان الغلط مني اني يجي هوا مثل الحباب يصالحني
ضحكت وحجيت بصوت
_قدس:: مرات احسة بدون كرامة ماعرف يعني شكد انفرة يرجع هوا الي يبادر ويصالح
رفعت راسي اباوع للبنات
شفتهن ثنينهن صافنات يباوعون وراي عفت الخيارة والسجينة من ايدي والتفتت بسرعة
صارت عيني على غضنفر جان واكف هوا وعمتي رنا
باوعت لعمتي خازرتني وغضنفر عاكد حواجبة بعصبية
دنكت راسي بخجل مستحية من كلامي
طلع غضنفر من المطبخ كمت من مكاني وطلعت خلفة صعد للغرفة دفع باب الغرفة ودخل
دخلت خلفة حجيت بخجل
_قدس:: غضنفر ترا جنت اشاقة
_غضنفر:: اذااا تشوفيني مهتم الج وبزعلج ف السبب انتِ مرتي وهذا واجب علية اذا شفتيني ابادر ب العلاقة رغم غلطج ف انا ماريد اخليج تحسين بنفسج غلطانه وماريد احرجج ب الاعتذار هاي مو لان انا ماعندي كرامة للااا هاي اخلاقي والمبدأ الي تعلمت وتربيت علية
رفع ايدة بدون قصد بس اني كمزت من مكاني عبالي راح يمد ايدة علية
ابتعدت منه راجعة للخلف
باوعلي وحجة
_غضنفر:: ماتربيت امد ايدي على مرة لو اعرف تنكص اهون من انو امدها مرة
حجاها ودار وجهه عني كاعدة على الجرباية
حاولت احجي ويا واهدي الموضوع بس جان ساكت ومامنطيني اهتمام
صحت من مكاني مقهورة
_قدس:: اذا ماتحجي وياي اروح لاهلي زعلانة ترا !!!
_غضنفر:: روحي
سكتت اباوعلة بقهر
_قدس:: صدك اروح واطلك منك هم
_غضنفر:: براحتج
ماتوقعت السالفة هاي راح تكبر توقعت يرجع طبيعي بعد يوم او يومين؟ بس لاغضنفر بقى زعلانة ماتحملت الجفاء الي صار منه والبرود
بس كتلة وديني لبيت اهلي كال امشي بسبب فعلة هذا انقهرت معقولة هنت علية بهل سرعة؟ صح الغلط مني بس اني ماجنت قاصدة الي صار !!!!
" معراج "
ابتعدت انفض التراب عن ملابسي
التفتت على فقار ايدة على خاصرته عيونة على مفرقد
تمشيت ب اتجاه فقار اباوع لمفرقد كاعد ب الارض
صافن على الارض سارح بعيد
باوعت لفقار وحجيت ب استغراب
_معراج :: مفرقد مو على بعضة
هز فقار راسة ب اي وحجة
_فقار :: من رجع من كربلاء هيج حالتة
هزيت راسي ب لا وحجيت
_معراج :: اسراء اختي تكول ماجان هيج هاي حالتة من رجع من بغداد
التفت فقار يباوعلي ب استغراب
_فقار :: ليش؟
_معراج :: ماعرف
سكت فقار عيونة على اخو محتار ومستغرب ب وضع اخو الي تغير برجعتة من بغداد وكربلاء صار منزعل عن الكل
طلع السيد من البيت يسرفن بردن ملابسة رفع راسة
يباوع النه اشر على الاغراض وحجة
_عبد الرؤف :: ليش بعدهن هنا؟
_فقار :: سيد منتضرين غضيمر يجيب السيارة حتى نحملهن
هز راسة ب اي والتفت على مفرقد
عكد حواجبة ب استغراب
باوع لفقار وحجة
_عبد الرؤف :: شبي اخوك ؟
_فقار :: مابي شي سيد
_عبد الرؤف :: ليش هيج صافن. مفرقد ابني شبيك
صاح السيد بمفرقد
رفع مفرقد راسة يباوع للسيد بتركيز على صوت السيد
هز راسة بلا وكام ينفض التراب عن ملابسه
حجة
_مفرقد :: لا سيد مابية شي
هز السيد راسة ب اي وحجة
_عبد الرؤف :: مانريد صفنات كملو شغلكم بسرعة حتى نطلع
_مفرقد :: ان شاءالله سيد
ابتسم السيد وابتعد يشوف الاغراض الي راح ناخذهن للموكب
كملنا انا وفقار ومفرقد نطلع الاغراض من البيت نجمعهن ب الشارع منتضرين غضيمر ومشواق يجيبون سيارة الحمل حتى تحمل الاغراض
وكف السيد كدامنا ملابسة كلهن اتراب
_عبد الرؤف :: وين صارو؟
_فقار :: هسة اتصل عليهم اشوف وينهم
طلع فقار تلفونة من جيبة يريد يتصل على الولد يشوفهم وين صارو
التفتت على صيحة مفرقد يأشر على سيارة حمل جاية من بعيد
ابتسمت اضحك من شفت غضيمر ومشواق صاعدين ب السيارة ودلهب وياهم يسوق
نزل فقار التلفون من ايده وضحك
_فقار :: دلهب منين طلع
وكفت السيارة كدام البيت
نزل دلهب من السيارة يضحك
_ دلهب :: كالو تردون سيارة حمل كلت ليش ترحون للغربة وانا موجود
_مفرقد :: منين الك هاي السيارة؟
_دلهب :: لابو جاكوج هاي
تسالمنة ويا دلهب نضحك
باوعلنا مشواق وحجة
_مشواق :: ماقبل نأجر سيارة كال انا اجيب الكم سيارة
_دلهب :: كلبي يرفرف على السادة
ضرب السيد على كتف دلهب مبتسم دنك دلهب راسة
بس ابتعد السيد رفع دلهب راسة وغمز
_دلهب :: الخجل ثم الخجل
ابتعدت اضحك ودلهب وكف يسولف ويا الولد
نقلنه الاغراض للسيارة
باوع السيد لدلهب وحجة
_ عبد الرؤف :: طالعين للحلة
_دلهب :: اي كالو الولد
_عبد الرؤف :: يلا لعد نطلع؟
_دلهب :: اي صعدو
صعد دلهب بمكان السايق والسيد عبد الرؤف وانا بصفة
والباقين صعدو بسيارة فقار
مشى فقار ودلهب ورا ب السيارة
التفت دلهب على السيد وحجة
_دلهب :: زين سيد ليش موكبكم ب الحلة ليش مو هنا ؟
_عبد الرؤف :: والدي الله يرحمة اول موكب اله جان ب الحلة والزوار تعودو يشوفون الموكب بدربهم
هز دلهب راسة ب اي ساكت
رجعت راسي للخلف نزعت النضارة وفركت عيوني
فتحت عيوني على صيحة السيد
_عبد الرؤف :: انتبهه كدامك
وكف دلهب السيارة بنص الطريق
باوعت الجهال اجو يركضون على السيارة يباوعون جوا السيارة
فتح دلهب السيارة ونزل نزلت انا والسيد خفت لا دعم طفل
نزل دلهب يباوع جوا السيارة نزلت اباوع وياه
حمدت الله من شفت الطوبة جوا السيارة
سحب دلهب الطوبة يباوع للجهال
صاح واحد من الجهال بزعل
_:: لا انفشتتت
باوعلهم دلهب وحجة
_دلهب :: بيش هيا؟
_:: ب 3 الالف
طلع دلهب خمسة من جيبة
_دلهب :: اشتري غيرها
_:: لاعمو مشكور الغلط من عدنا احنا شمرناها على السيارة
_دلهب :: اخذ حبيبي اعتبرها هدية
ابتسم الولد واخذ الفلوس من دلهب
تشكر منه وابتعدو يركضون
صعدنا ب السيارة ودلهب كمل طريقة
باوع السيد لدلهب وابتسم
_عبد الرؤف :: ب ميزان حسناتك ان شاءالله
باوع دلهب للسيد وابتسم ب استغراب
_دلهب :: بس انا ماسويت شي
_عبد الرؤف :: جبرت بخاطر الاطفال
_دلهب :: يعني حتى على هاي الله ينطي حسنات؟
هز السيد راسة ب اي
وكال
_عبد الرؤف :: شوف ب شمال العراق بفصل الشتاء ينزل الثلج على سفوح الجبال هذا الثلج يمتى يجي وقتة والاستفادة منة بفصل الصيف يذوب الثلج ويصير ماء يسقي الزرع ويفيد الحيوانات ويصير شلال من الماء
احنا هيج اعمالنة الصغيرة نتوقع ما منها فائدة او ماراح نشوفها والعكس صحيح هاي اعمالنة الصغيرة تتجمع النه عمل على عمل يصير عدنا جبل جبيرر من الحسنات الي راح نستفاد منة بيوم الحساب
وقت نوكف بين ايادي الله متوقعين ماكو مفر النه من الحساب ماعدنا عمل يشفع النه
بس وقتها راح نشوف جبل جبير من الحسنات الي ينزل يغطي على السيئات
مصدر هاي الحسنات هيا اعمالنة الصغيرة الي ماتوقعنا بيوم نشوف نتيجتها
كمل السيد كلامة وكال
_عبد الرؤف:: نفس جبل الحسنات هذا ممكن يصير جبل من السيئات ابسط فعل احنا غافلين عنه هوا كلامنا ويا الناس اليوم انا انتقد شخص واسيء اله ب الكلام انا اشوف كلامي صح ومابي غلط. انا رجال شخصيتي قوية احب اكون صريح ويا الناس وماحب اخلي الكلمة بحلكي احب احجي كلشي احنا نشوف كلامنا عادي بس هذا كلامنا لو اثر ب الشخص المقابل بنسبة 1 ب المية وجرحة ممكن الله يحسابنة عليه ويصير هذا كلامنا جبل من السيئات بسبب كسر خاطر غيرنا
جان دلهب يسمع للسيد بتمعن وتركيز من كمل السيد كلامة التفت دلهب على السيد مبتسم
_دلهب :: سيد كلامك دررر
_عبد الرؤف :: وانت اخلاقك درر
ابتسم دلهب وكمل طريقة بعد فترة طويلة
التفت اباوع لدرب الحلة كله نخل وخضار عيوني صارت تتوزع على البساتين
وكفت السيارة كدام بيت السيد عبد المقتدر نزلنا من السيارة
مشة السيد ب اتجاه السيد مقتدر يسلم علية واحنا خلفة
رحب بينا السيد بفرح وكف السيد عبد الرؤف يسولف ويا السيد عبد المقتدر واحنا انتقلنه نزل الاغراض من السيارة
الاغراض جانن لموكب السادة موكب جبير على درب المشاية السادة كلهم متعاونين بهذا الموكب
" شاهيناز "
باوعت للجنطة خاف ناسية شي
صفنت اتذكر شنو لازم اخذ بعد رفعت عيوني صارت على ميز المراية
مشيت للميز طلعت المشط من المجر خليتة على الميز وصفنت احس ناسية شي بس ماعرف شنوو
قررت اعوف التجهيز واروح اشوف البنات وين وصلن
اخذت عباتي من الجرباية وطلعت من الغرفة
شفت سجاد اخوي كاعد ب الصالة على القنفة يقرة قرأن
اتصدق ورفع راسة باوعلي وحجة
_سجاد :: لبيت السيد رايحة؟
_شاهيناز :: اي
_سجاد :: ساجد ب الغرفة خلي يوصلج لاترحين وحدج
هزيت راسي ب اي ومشيت متوجهه لغرفة ساجد دكيت باب الغرفة ووكفت منتضرتة يسمح الي ادخل
اجاني صوتة
_ساجد :: تفضل
فتحت باب الغرفة طليت براسي شفتة واكف كدام المراية يعدل ب عمامتة باوعلي من المراية ابتسم وحجة
_ ساجد :: ها شاهيناز
_شاهينا :: ساجد توصلني لبيت السيد
_ساجد :: ثواني بس البس العمامة
هزيت راسي ب اي منتضرتة حجة وهوا يعدل ب العمامة
_ساجد :: شاهيناز هدى لاتهمليها
باوعتلة ب استغراب عاكدة حواجبي
_شاهيناز :: شبيها؟
_ساجد :: مابيها غير العافية بس انا منتبة عليج هل فترة كله عند بيت السيد ماجاي تكعدين ويا اختج. ترا هدى بدت تكبر تحتاج تسولف وتطلع الي بداخلها لاتهجرين اختج احتويها
هزيت راسي ب اي وحجيت
_شاهيناز:: اي صح نادراً اكعد وياها بس اني ادري بيها تكعد ويا المحسنات
_ساجد:: اي صح بس انتِ هم لاتعوفيها
هزيت راسي
_شاهيناز:: ان شاءالله
_ساجد:: عفية ب شاهيناز يلا امشي كملت
بعدت عن باب الغرفة سامحتلة يطلع
طلع من الغرفة مبتسم بوجهي رديت اله الابتسامة ومشيت خلفة مرينا على الصالة شفت سجاد على كعدتة يقرة قرأن ويجود بصوتة
طلعنا من البيت اني وساجد بس وصلني للبيت وشافني دخلت مشة قاصد الحوزة
دخلت للبيت هدوء محد موجود ب الصالة
جذب انتباهي صوت معراج وهوا يحجي باوعت للمصلى السيد ومعراج كاعدين والتلفون بيد معراج عرفت المتصل جادح من صوتة
كال معراج
_معراج:: يعني انت اسنين تخدم ب الموكب وهاي السنة قررت تنسحب؟
_جادح:: مامنسحب بس انا هل سنة مامرحب بية بهذا الموكب
_معراج:: الموكب هذا لاهل البيت والابو عبد الله لاتربط زعلتك ب السيد مع خدمتك ب الموكب
سمعت صوت حسرة جاية من جادح
حجة
_جادح:: ان شاءالله خير معراج ان شاءالله خير
_معراج:: ان شاءالله ابو عماد نريدك ويانا ونريد وكفتك ويانا ب الموكب
_جادح:: بحيل الله. اترخص منك معراج عندي مرافعة
ودع معراج جادح وسد الاتصال عرفت السيد هوا الي يريد جادح بس مايحجيها بحكلة لا يخلي الولد يحجوها .....
" عاتكة "
باوعت لحميدة رفعت سحاب العباية
باوعتلي وعكدت حواجبها ب استغراب
_حميدة:: تأخرو مو؟
هزيت راسي وحجيت
_عاتكة:: اي فقار من ساعة خابر كال راح نجي
_حميدة:: هوا فقار شيسوي راح للحلة قبلنه؟
_عاتكة:: السادة كلهم راحو نقلو الغراض
هزت راسها ب اي ساكتة
خليت ايدي على رجلي ومسحت عليها متوجعة منها هل ايام صايرة توجعني حيل ماعرف السبب
سمعت صوت شاهيناز تحجي ويا مهجان
رفعت راسي من دخلن للصالة ثنينهن لابسات عبيهن يضحكن
باوعتلهن وحجيت
_عاتكة :: ها تضحكن؟
باوعتلي شاهيناز وضحكت بصوت ناصي
باوعت لباب الصالة واجت تقربت من عدنا تحجي بهمس
_شاهيناز:: ولجن سيد معراج ودلهب جانو يتناكرون برا
_عاتكة:: شبيهم؟
ضحكت مهجان وحجت متذكرة الي صار
باوع معراج لدلهب ب استغراب عدل نظارتة وحجة
_معراج:: المواكب هم يوزعون حليب الصبح؟
_دلهب:: كلشي يوزعون ضلت بس بشر ماوزعو
ابتسم معراج وهز راسة
_معراج:: اي الحمدلله
_دلهب:: ليش عدكم طفل يشرب حليب ؟
باوع معراج لدلهب بعصبية وحجة
_معراج:: ليش بس الاطفال يشربون حليب؟
_دلهب:: اي انه طعم الحليب ناسي اصلاً
هز معراج راسة ب لا وحجة بأسف
_معراج:: الحليب فوائدة هواي مايصير تمنع جسمك من فائدتة
_دلهب:: سيد اسكت
_معراج:: احد فوائد الحليب هية
خلة دلهب ايدة على اذنة وصاح
_دلهب:: خاااااااببببب اسكتتتتتتتتتت اسكتتتتتتت
_معراج:: دلهب انت ماتحب المعلومات الي تفيدكم
نزل دلهب ايدية من اذنه وحجة
_دلهب:: عفيةةةة اي هيج ماحب لهذا لاتسولف
باوع سجاد لدلهب وضحك ب استغراب
_سجاد :: هدي اعصابك
_دلهب:: عمي ياهدي اعصابي انت تدري شسوا بيه ابو نظارة هذا اخذني طريق الحلة روحة ردة يسولفلي على التشريح جسم الانسان حتى لعب روحي
رفع دلهب ايدة وحجة بعصبية
_دلهب:: عبالك كافي سكت ؟؟ لااااا
باوع دلهب لمعراج وصاح بحركة
_دلهب:: كعد يسولفي على زراعة الشعر ب ايران انت بس كلي شقصدك بهاي سالفتك ؟
باوع معراج لدلهب وحجة
_معراج:: ماقصدي شي بس حبيت افيدك
_دلهب:: حبيبي هاي سالفتك بزت كلبي بز
رفع معراج ايدة وحجة
_معراج:: صدك شنو سبب الصلع عندك وراثة او مرض؟
رفع دلهب حاجبة وحجة ب انزعاج
_دلهب:: ضيم وقهر
_سجاد:: لاصدك شنو السبب؟
مسح دلهب على كرعتة وحجة
_دلهب:: انت شايف ابوي؟
_سجاد:: لا
_دلهب:: شايف كهنة معبد امون؟
_معراج:: اي بمسلسل النبي يوسف
هز دلهب ايدة بقهر وكال
_دلهب:: ابوي يشبة الكاهن الجبير اليصيح لعنة امون عليكم يشبه كرعتة وراسة وكل ماشافني كاعد كال انطيتك جينات تنحسد عليها
دخل معراج شفايفها بحلكة كاتم ضحكتة
باوعلة دلهب ورفع حاجبة
_دلهب:: ابو الحليب تضحك؟
_معراج:: لا لا احممم بس انا اتضامن مع ابوك سالفة الجينات صح تنحسد عليها
باوع دلهب لمعراج وصفن عليه
طفرنا اني وشاهيناز من ركض دلهب على معراج ومعراج ابتعد عنه جاي ب اتجاة الباب
دخلنة نضحك كل ماتذكر سالفة الكاهن
باوعتلهن وضحكت
_عاتكة:: بس الصلعة مامعيبتة
_شاهيناز:: هوا دفان ترهم الصلعة لشغلة
باوعتلنة حميدة وحجت
_حميدة:: بنات سكتن لاواحد يسمعجن
_مهجان:: بس احنا ماحجينة شي؟
_حميدة:: اي عادي ماكو شي يربطنه بين الدفان لهذا لاتسولفن بي !
سكتنا اني والبنات مأيدات كلامها صح لو واحد سمع يرزلنا
حجت مهجان ب استغراب
_مهجان:: عمتي وين؟
_شاهيناز:: شبيج مو راحت ترجع قدس
_مهجان:: هاااا اي صح تدرين ناسية والله اشتاقيت لقدوسة وقسوسة حيل مشتاقة الها
باوعتلهن وضحكت بفرح
_عاتكة:: اكلجن شغلة؟
_شاهيناز:: كولي !!
_عاتكة:: قس راح تجي ويا قدس تخدم ب الموكبببب
فتحن البنات عيونهن ب صدمة
باوعت وحدة بوجه الثانية وطفرن فرحانات على جية قس. واني فرحانة اكثر منهن من سمعت امي تحجي ويا العلوية زهراء وكالت الها حيل فرحت
كلش اعز واحب قس دوم تنطي بهجة بكعدتها وسوالفها
مرت ساعتين على كعدتنا ولحد هسة فقار ماجة
كال انا راجع وينك يا فقار
نزعت عباتي وكعدت اسمع واسولف ويا البنات نكضي وقت من كعدتنا
بنص سوالفنا واندك باب الصالة عدلن البنات كعدتهن واني حجيت من مكاني
_عاتكة:: منووو؟
_مفرقد:: انا عتوكة
_عاتكة:: فوت مفرقد محد غريب
انفتح باب الصالة دخل مفرقد مدنك راسة للكاع باوع النا وابتسم
_مفرقد:: السلام عليكم
ردينا اني والبنات السلام. باوعت اله وحجيت
_عاتكة:: مفرقد يمتى نمشي للحلة؟
_مفرقد:: انا جاي أخذكم وايليا برا منتضريكم
حجت شاهيناز ب استغراب
_شاهيناز:: ليش وفقار وين؟
_مفرقد:: فقار راح يجيب عائلة السيد غل من بغداد لان سيارة غل عطلانة وجادح وغضنفر ماموجودين. يلا جهزن نفسجن وانطن علم للعلويات الكبار منتضريهم برا
هزينا راسنا ب اي
دنك راسة وطلع من الصالة خارج البيت
باوعتلنا مهجان وحجت
_مهجان:: بنات مفرقد مو على بعضة
_شاهيناز:: لجججج اي من رجع من بغداد وضعة مو تمام
_حميدة:: خاف مريض؟
كمت من مكاني حجيت واني البس العباية
_عاتكة:: اني هم لاحظتة صاير هواي يصفن ودوم بالة شارد من كتلة كال مابية شي بس هل فترة جاي امر بضغوطات
سكتن البنات وكامن يلبسن ويجهزن ارواحتهن
انطينة علم لامي ونسوان عمامي
بس كال ايليا يلا
طلعنا كلنا من البيت متوجهين لسيارات الولد احنا البنات رحنا بسيارة ايليا وامي والكبار بسيارة مفرقد
حفيدات العلوية لباب طلعن قبلنا ويا مشواق
طلعت بينا السيارة متوجيهن للحلة
باوعت ل ايليا وكلت
_عاتكة:: ابو ال
شكرا لزيارتكم عالم روايات سكيرهوم
