رواية نقش بارد الفصل الواحد والثلاثون 31ةبقلم فدك فاطمه

يطشرني التَعب وعيونَك تلمني !..

.

دلـــهم 

صافن على نفس البقعة بالحايط هاي مرت اربع ساعات عقلي من گد ما يفكر و يخلي احتمالات راح 

يتلف و يخبلني مليون ظنة تجي أبالي 

السجن مو غريب علية ولا أول مرة ادخلة بس خمس

سنوات أكبر من طاقتي جنت اشرد و اتستر حتى لا اوصل هاي اللحظة و اصل محبوس مدة طويلة 

كل ما تجي غنوة أبالي اتندم على السنوات الراحت

لو ما دافع كفالة و مگضي محكوميتي جان ما صار هذا حالي هسة ولا ضليت اتحسر عليهن 

درت عيوني للولد اجتمعو عيني صارت بعين عصام

كل الاحداث رجعت براسي ما جان عدي فكرة احنة

نلتقي ولا اشوفة هنا وجودة يعكر علية مزاجي

غطيت راسي أذا اباوع بوجهة بعد دقيقة اكتلة ما أريد اتورط بسالفة لحد الان امشي بصف الحايط 

حاى ما اخلي اي زلة علية احاول استفاد من كلشي

مرت ايام ماتعرف بيها الليل من النهار كلشي متشابه 

الساعة عدال سنة گوة يخلص النهار و الليل كارثة 

احاول اشغل عقلي بالسوالف بس اليعض يغثون

خلص أسبوع حـافظ الايام حفظ اليـوم زيارة منتظر

صفوان يجـي گعدت من الصـبح اهز رجـلي بصبر

لحد ما صـاحو بأسمي طلـعت خلة الكـلبجة بيدي 

مشيت بالممرات گعدت بمكاني گبال الشباك حجة الحارس يوگف وراي:الك عشر دقايق

مسحت لحيتي اسكت غضباً علية تقربت يمة حجة صفوان بسخرية:عيونك حمر مانمت الليل تفكر بية

دلهم:عايف ناسي و افكر بيك 

صفوان:چلب ولا الك صاحب

دلهم:شصار بالمحكمة اختصر ماكو وقت

صفوان: ماكو دليل على القضية الاصلية منين ما ادور اضيع كل شوية كامز بوجهي واحد يگلي جنت هناك من اروحلة لو يغير اقوالة لو يشرد

دلهم:تقرير المستشفى واحد من الدكاترة بالتشريح

گال اكو أثر طلقة 

صفوان:رحتلهم تلاثة طلعت الملف اكدو جان حادث و على أثرة توفة

دلهم:لا همة اربعة بس ذاك ناسي أسمة اخذتلي فترة اراقبة من دخلت السجن و طلعت ضيعتة دورة 

خل يطعن بتقرير التشريح حتى تنوخذ القضية بجدية همة اكيد تلاعبو بيه سوه حادث

صفوان: شسمة

دلهم:شدراني ناسيه تلگة اسمة بالملف

صفوان:شفتة مابيه بس تلث دكاترة

باوعت بطرف عيني للحارس دنگت اشرلة للطاولة 

حجة مستغرب:احجي لا تكتب كلشي ما اشوف

                                            

              

                    

دلهم:لاتصير مطي

صفوان:ها اي لا تخاف سهلة هاي الشغلة 

دلهم:اي دير بالك عليه 

صفوان:ببطن عيني لاتخاف

خلصت الزيارة مالحگت حتى افهم منة الصار وين همة هسة گمت راجع للزنزانة ادعي كون ما يورطنة

ياخذلة واحد من الدكاترة على صفحة و يعرف منة وين راح صاحبـهم الرابع لـيش اسمة ما مكتـوب 

هاي سـوالف نعمان يريد ينـفي تهمـة القتل من أساسهة ،حـرگ البيت هجوم السـجن كلهن مو حتى 

اعوف القضية مثـل ما گال صلاح لا هو يريد يموتني

نهـائيا حتـى يخـلص من كلشـي و يطلع بالنظـيف 

تنهـدت بضيق خليـت راسي بين أدية حتبى سيـرتة تضوجني تمددت رجعت أحس الساعات و الثواني

خمس سنـوات شيخلصـهة هنا من خر*ا بيك زيـاد

لا أنتة ميت مرتاح منك ولا من جنت عايش فايدني

سكـير طايـح الحظ اكلـت من وراك خمس سنـوات هسة بنتي تكـبر ما اشـوفهة من طـيح الله حـظك

خلص الاسبوع و الوراه جنت منتظرة جيتها ما أجت

شگد ما يهون علية شوفتها هنا ولا احمل تتأذة بس 

ماكو سلوى غير الدقايق لأشوفهن بيهة كل فترة 

اسبوع يخلص بشوفتها اضل عايش على أمل ثاني

مرة نلتقي ما مخفف علية هاي الضيقة الة صوتها

مرة ثانية من أحة صفوان عرفت منة موقفينهم بعد

التحقيق مستمر كل لحظة حساسة خاف يتدخلون

اذا گدروا يطيحـون للتهـمة مال قتل حاتـم كلشـي ينتهي يبقى حرگ البيت عادي عدهم يدفعون كفالة

سبحت المخدة رفعت الدوشگ طلعت صورتها كل 

ما أريد اركز بملامح غمزة أسهى تضل عيني على أيد 

غنوة الطالعة بالتصوير حتى رنة بتوتها مشاق الهة

گلبـت الصـورة خـليت ايدي على خدي شلون بيج 

"تــوصيني على يأذمة توصيني ،حياتي أنتة و نبض يسري بشرايني"

اتلمس الكلمات التارسة ظهر الصورة مو خط مصيبة

ترددت ابوسهة ماريد اتيه بمشاعري من هسة خايف 

من هاي الخمس سنوات خايف تقسي گلبي عليهة

خلص الاسبوع على أمل شوفتها من صاحوني زيارة

گمت حتى ما أتأخر عليهة گعدت گبال الشباك عيني 

عليـهة الدمـوع تصب و الوجه أحمـر و ضعـفانة

دلهم:كافي بزعتيني اذا تضلين تبجين لاتجيني 

انصدمت أيدهة عصرن العباة تنزل عيونها مني تنهدت گلبي نقبض مو قصدي اكسر خاطرها بس تعبت من بجيهة حجيت ما فاد لحد من تضل هيج

دلهم:غناي أسف ماريدج تبجين اخاف عليج حبيبتي 

عيونج راح تعمة صدك جذب شجاج ياعيني 

غنوة:مو بيدي والله من أشوفك ابجي 

دلهم:أذا تبجين أخونج

            

              

                    

ردت بهمس ادري بيـهة غلطـت علية حكيـت لحيتي

بـس حتى ما يـشوفـوني اضـحك خزرتهة حتى تطبل تخـزر بية عيونهـا آخ من عـيونها دنگـت تحوس اريد تـطگ محـتارة شلون مـديت ايدي بيـن فتحـتات الشبـاك غصـباً علية مبتسم على سوالـفهة گرصتني

دلهم:بنتي عزيزتي شلونها 

غنوة: الحمدلله زينة گول اني شلوني مخبلتني

دلهم: حقج الله يساعدج اني هم عندي وحدة مخبلتني 

غنوة:اسكت دلهم

رفعت راسي للسـاعة ماضل شي خلـصت الـزيارة شلون اعرفها خلصت من غنوة تگوم تبجي تنهدت 

اشرتلهة رجـعت قربت حجيت بهمـس گبل أكوم

دلهم:أحبـج 

أرتبكت وجهة نصبغ گومتي الحارس توسعت عيوني بصدمة اشوف ماهر أبن نعمان واگف وراهة بعد مسافة مالحگت حتى احجي طلعني الحارس برة 

دلهم:خليني ارجع بس دقيقة وحدة 

:ماكو خلص وقتك امشي

دلهم:اوگف يمي بس لحظة گبل لاتروح كلمتين بس

رد يدفعني:امشيي لا تتوسل ماكو 

قبضت أيدي مدري شلون لزمت اعصابي ما طگيتة

دخلت للزنزانة ماكدر افكر طارت كل افكاري ماهر

شيسوي هنا ماعدهم سجين عيونة جانت عليهة

گعدت مخلي راسي بين رجلية ياهو ليجيبلي صفوان

گمت افتر بالغرفة ادية قابضهن ،منو الجابهة هنا تمنيت بهاي اللحظة صفوان وياهة على الاقل نبه 

مرت ساعات احسها شهور و سنين التفكير اكل راسي

بس صـارت دنيا الليـل رفعت الدوشـگ احـسب شكد الفـلوس اخذت مشيت لـولد نعرفة يأجـر مـوبايـل 

حجة يرفع راسة من المخدة: الدقيقة بخمسين

دلهم:جيب هناك ذني 

:أحسبهن ترة أذا يزيد ثانية وحدة اخذ أكثر

دلهم:فضني نطيني الموبايل 

خلاه بيدي خليت رقم صفوان اذا ما رد اهلة اسلگهم 

خليت ايدي بشعري كل بالي وياهة لا تعرضلها ماهر

اكثر من مرة كررت الاتصال ما رد ماريد اخلي رقمها

بهذة الجهاز رجعت اتصلت بيه ما فتح خط الگ**"

سجلت رقمها خليت الموبايل على أذني رن مرتين

بالثالثة فتحت خط ماحجت بس صوت نفسها اسمعة تنهدت براحة اشتعلو أهلك نعمان

دلهم:غناي

سكتت لحظات رجعت بلهفة:دلهم هذة انتتة شلون تخابر طلعت شنو وينك هسـ..

دلهم:شش على كيفج ما طلعت حصلت موبايل 

غنوة:ليش ماتخابرني اذا تحصل موبايل 

دلهم: عوفي العتب هسة گليلي وين أنتِ

غنوة:ببيت خالتي هنا ببغداد 

دلهم:عفية ضلي يمهم ديري بالج على روحج اليوم شفت أبن نعمان مراقبج انتبهي  

غنوة:شيريد مني صخمان مودي أبنة 

دلهم: عاش لسانج ، حاولي لا تطلعين وصلي خبر لصفوان مفهوم 

غنوة:افتهمت اي دلهم انتظر بس شوية خل اگلك

دلهم:استعجلي ماعندي وقت بسرعة

باوعت بالشاشة صار أربعين ثانية رجعتة اسمع حيلي نهد واني اسمع صوتها من گالت "أبا" 

خر*ا بالساعة السودة لتورطت بيهة وية زياد

حرمت روحي منج 

            

              

                    

غنوة:سمعت 

دلهم: سمعت حبيبتي بوسيهة و شيمهة بمكاني خلصت الدقيقة راح أسدة ممنوع تتصلين على هذة الرقم خوش ممنوع غنوة ديري بالج

غنوة:امم أحبــك أموت عليك

دلهم: حبيبتي 

سديتة مسحت الرقم الحمدلله راجعة بخير هذة الجلب أني اعلمة خلاني اتصل بيهة بعد شيخلصني 

تصير سولة ماعوفها استلكو اهلك صفوان اشتعلو

رجعت الموبايل مشيت لمكاني اتگلب عدة اسبوع 

بألف ياعلي لازم روحي ما اتصلت كلشي ما أستفاد

ذولة جلاب يقطون دم الواحد مو بس فلوسة يذلونة

اجاني صفوان ما طلعتلة خلص اسبوعين للزيارة الثانية مشيت بالممر طلعنة اني و عصام سوة خزرني من كل عقلة يريد اطگة افلش راسة و اموتة

گعدت عيني عليه لحد ما كسر عينة و نزلهة التفت لگعدة صفوان گبالي الوجه منور يگول داخل الجنة

صفوان:گ**" ليش ماتجيني

رديت بهمس:بيك مرض هي دقيقة مجديها جداوة

صفوان: والله بعيد عني 

تحمحمت لا يحس الحارس ولو همة لواتة ياخذون الموبايل يرجعون يبيعونة علية بس هم اتورط وياه

صفوان:أجيت ابشرك رجل بنتك بعد ثمن أشهر يشرفنة 

دلهم: والله دنيا انتة تصير أبو 

صفوان:جا بس انتة حلكك حلو

دلهم: بيهة الخير عايز العراق گ***يد

صفوان:خاب نجب صوج ليجي يبشرك

دلهم:اي مو گنالك مبروك شتريد بوسة على الراس

صفوان:الله لا يعوزني مو مثلك 

دلهم:اكل خ*را

نعتــت ايدي انتهت الــزيارة ما صــار بس لحظات يلمــونك ليش تعصب گمـت راجع للزنزانة انتظرت اجمع فلـوس لو اشتـري بيهن أكـل و افتـك مـــن

  وجباتهــم لتمرض لو اخابر بيـهن غناوي و اسمعها

انتظرت لحد ما حصلت الموبايل نطيتة الفلوس گعدت منتظر ما لمن صارتـلي فرصة اخابر خليت رقمها انتظـرت مـا طـولت أول ما يرن تفتح خـط 

دلهم:غناتي

غنوة:عرفتك راح تتصل ضليت منتظرة و شحنت الموبايل حتى غمزة نومتها

دلهم:حساج گلبج حبيبتي 

غنوة: اي من الصبح اني فرحانة مادري ليش

دلهم: فدوة لليفرح يمتة احضنة لگلبي 

غنوة:مايصير ننسجن سوة 

دلهم:نتعارك بابا 

غنوة:ميخالف مليت مشتاقتلك البيت مو حلو وكلشي مو حلو احس روحي گاعدة بالشارع والله 

دلهم: حبيبتي تخلص ان شاء الله شبيدي اني هم مشتاقلج لعبانة روحي و كلهة ضايگة علية

غنوة:شلونك تاكل ينطونكم أكل هم يضربونك 

دلهم:أكل و أنام كلشي عدنة لايضل بالج

غنوة:دزيتلك ملابس وياهن أكل و كلشي خليت

دلهم:امم وصلن

غنوة:عود ليش تجذب 

دلهم:ولج غناي 

غنوة:ها عبالك اذا مو يمي ماحس بيك

دلهم: مو كلشي يدخل للسجن لاتعبين روحج 

و تودين كافي الملابس هاي هي 

            

              

                    

غنوة:ليش خبيثين 

دلهم:خيولون حبيبتي خلص الوكت راح اسدة 

غنوة:تتصل بعد

دلهم:عشرين بالشهر اتصل عليج

غنوة:عزة هواي ليش 

دلهم: حبيبتي راح اسدة ديري بالج على روحج

غنوة:انتة هم ءء أموت عليك 

دلهم: حبيبة روحي

سديتة بسرعة مسحت الرقم رجعتة الة مر الليل كلة 

ماگدرت انام للصبح گوة غفيت ساعة فكيت عيوني

على فتـحتة باب الزنزانة دخـل اخر شخـص جنت متـوقع اشوفـة هنا خلانـي أنهـض على حيلي مگابلة

قسـور شعدة دار بعيونة على كل الغرفة لحد ما شافني ابتسم مستـهزئ گعد بعد سرير عني عيونة عليـة نـاوي على شي بدخـلتة هـاي ما ارتاحيـتلة

خلص اليوم هو مراقب كل حركاتي لحد ورة العشة

اجة گعد فوك السرير الي بصفي شبك أديه سوة

قسور: مطولة ساعاتك بالدنيا

دلهم: ماكل من كد الخلفوك تحسبلي ساعاتي 

قسور: ما سألت عني لا گلت معارف تشوفني شمحتاج

دلهم:شتحتاج گل للشباب محد يقصر وياك 

قسور:گ**" 

دلهم:شنو تهمتك 

قسور:جنايات حالي من حالك 

دلهم: منو لكتلتة 

قسور:صفوان ما وصلتلك اخابرة

حسـيت أذني صارت بيـهة وشة طنيـن ركـزت عيني علـيه هذة الأسبوع صفوان ما أجـة جنت منتظر زلة

منة ضـحكة تثبـت لي هو يجذب تهمـتة مو جنـاية

جريتة من رگبتة گوة كاتم عصبيتي:احجيي عدل 

قسور:شايفني احجي مگلوب انتة سألت جاوبتك

دلهم:ليشش أجييت هنااا 

قسور: مو بأرادتي حكموني و اجيت 

دلهم:قسور لا تصير چلب صفوان أذا صاير عليه شي 

اموتك هنا بگاعك

قسور:تهدد وانتة مسجون فكر بالبرة شيصير بيهم

دلهم:احجي صفوووان وين 

قسور:يسمع حسك بالگبـ..

ردمت راسة براسي رجع ليورة سحبتة رجعت دفرتة

بصدرة طگ راسة بالحديد الوراه ثبتة بأيدي خانگة

دلهم:احجيي قسور والله العظيم أموتك هنا اسلم على روحك مني 

قسور:تروح بيها تنعدم

دلهم:احجييي لا تخبلني 

قسور:جان لازم تفكر گبل ما تسلمة الملف سويناهة مرة خطفنة مرتة عدت سلامات تدري بالثانية ماتعدي اذا تخسرنة مادياً نخسرك نفسياً 

لزمت راسة بثتين أدية گوة لازم أعصابي:اكتلك والله 

اخنگك هنا و اموتك انتة الخسران 

قسور:دمشي أبن الگ***" 

طگيتة كلة الحيوان يفشر علية ماكدرت الزم أعصابي

جنت كاتم طول هذة الشهر احس هاي هي فاضت

كـبرت العركة من شـاف روحة خسـران بدة يـضرب لحـد ما دخـلو الحرس فـرقونة طلـعونة للانفرادية ما جان هـامني العـقاب گد ما هامتني سـلامة صفوان 

ما أسـامح روحي اذا صـارلة شي و نكسرت فـرحتة

            

              

                    

دفعني الحارس دخلت لغرفة ضيگة ما اكدر ارفع راسي بيهة أسوء ليلة مرت علية رغم عقلي يجذب 

حـجي قسـور بس ضـليت ما متطمن لجيتة هنا 

خلصت عقوبتي بالانفرادية طلعو الدنيا من عيني 

رجعت للزنزانة عضامي تطكطك من الگاع لنمت عليهة و المكان الضيگ گعدت اعصر بمتني منتظر 

قسور يجي متجاهل الشباب يحجون وياي عن الصار

مرت اكثر من تلث ساعات يالله شرف حالة احسن من حالي ضليت خازرة طول النهار لحد العصر اجة

وگف گبالي الشباب اليمنة نبهونا ما نرجع نتعارك  

قسور:صاحبك كلشي مابي اعتبرة تهديد هالمرة حجي باجر عگبة يتنفذ 

دلهم:أخوك شيريد ما كفاه لأخذة 

قسور:اربع أخوان راحولنة غير أبوي ذني ننساهن

دلهم:دم أهلك مو عندي ولا عد حاتم اخذتوه وانتهى الثار بعد بشنو تطالبون

قسور:بس انتة لضيت من نسلة النگس ما نخليك تشم الهوة لنحرمو منة اخوانة خليهة ابالك 

غنـــوة 

گعدت بالمطبخ يم البنات يسون كبة خالتي متعودة

تطلع أكل من البيت كل بداية شهر توزعة على الناس

الماعدهة كعدت من الصبح تسوي و تغلف بسفري

ندك الباب عدلـت شالي دخـل علي شــايل غمزة 

علموها على الشارع و الطلعة بس تشوف واحد يمر 

من كدامهة عبالهة طالع تضل تبجي الة يشيلونها

اخذتهة سمر منة بوستهة خلتهة بصفي مرتكية علية

عينها للباب بس شافتهم مشو گامت تبجي نطتهة

وتين من العاب الجهال لزمتهة ساكتة بسرعة تغير

طول اليوم احس بروحي خفيفة و عندي نشاط صار

أسبوعين من خابرني دلهم لهسة صوتة بعقلي يتردد

كل شوية طاگتلي صفنة يحجون ما انتبه عليهم

شلت غمزة اجتها الحالة گامت تضرخ غسلت ادية

رحت للغرفة صار هواي يمهم گاعدة بغرفة وتين

ضالة فارغة لان بلش الدوام و هي راحت لبيت عمها متعودة عليهم اكثر قليل تجي هنا بس بالعطلة

ما شـفت شي منهم حـبابين بس هـم ما ارتـاح الة بالبيـت ، علوان اجة مـرتين گعد وياه ابـو علي حجة

يريد يـرجعني ما رضى كاتلتني جيـتة هو لا داير بالة

علـية ولا يدري بية شناقصني و شلوني بس دفعوه

انتظرت الايام تمر يوم ورة يوم احسب كل شوية شايفة التاريخ شنو بيومها خابرتني رفا تريد تعزمني

كل يوم اطلعلهة حجة شكل استحي من علي اگلة يوديني لحد ما طگت روحهة اجتني هي و صفوان

حضرت روحي انتظرتهم من وصلو طلعت سلمت 

عليهم التفتت رفا اخذت غمزة گبل صارت تبوس 

            

              

                    

رفا:جنتي ولج لا تسألين علية لا تگولين شلون خالتي

غنوة: مو يومية نحاجيج

رفا:وين تگضيها علية أبا و أبا اني اريد اسمع اسمي

غنوة:نطيهة مجال تكبر

گعدتهة عدل بحضنها و صفوان كل شوية يمد ايدة

يگرص خدها تطگة رفا ما راضية اخر شي علية 

رفا:عوفهة البت تستحي

صفوان:خليني ساكت 

درت وجهي للشارع عايفتهم يسولفون لحد ما وصلنة ما ضل بس وصلنة راح اخذت راحتي بالبيت

سوينة عشة سوة عود معزومة نصة طاح براسي ست

رفا محتارة بغمزة شايلتهة و تفتر ماخلت شي ما الها

غنوة:كافي تبوسين شبيج

رفا:ولج اريد اكلهة يبووي تموت 

غنوة:ان شاء الله يجي ابنج و تطوف

رفا:خيولي ماحب الولد خايسين 

ضحكت عليهة مخبلة لحد ما نامت غمزة يالله اجت

تكمل العشة گعدنة تعشينة بالمطبخ ضلينة هواي سهرانيين لحد العشرة و فوك يالله رجعت للبيت

ضليت گاعدة اليوم عشرين خفت دلهم واني هناك

نومت غمزة شلعت گلبي لحد الوحدة هي تلعب

مرت الساعات منتظرة لازمة جهازي كل شوية اغفى

مادري ماحس بروحي لحد الصبح هو ما اتصل علية

ضجت حيل اني منتظرة صار تسع أيام ساعة أزعل وحدي ساعة اطلعلة عذر نوب اخاف عليه لا صاير

شي بيه ما اتصل تعوذت من الشيطان نمت شوية

گعدتي و نومتي ورة بنتي يمتة ما فزت افز بالنهار شلعت گلبي تبجي بس تسمع صوت علي تكتل روحهة مدري شلون تعودت عليه و تعرفة تعلمت

على التدلل و الطلعات و صوت الجهال حتى صاير

عدهة حركة اكثر من گبل 

من جنة ببيتنة صح تحوس بس اذا تلزم شي تضل كاعدة تلعب بيه ما تگوم هسة لا شيكضهة جنهة دودة تروح منا ترجع منا تزحف على بطنها موتتني

ركبها صارن سود و يضحكن دوائر أشتريتلهة مرطب

يومية اخليلهة من تنام الدنيا حارة مو مال البسهة

طويل ،مخليتهة على راحتها حتى تصير وكحة مو فاهية و خاملة يصير عدهة نشاط و تحرك روحها

تكتلني بالليل تنام و ادلك ظهرهة تسنح تخليني 

اكزكز علـيهة اموت تبتـسم و مغمـضة عيونها اريد اگرطهة اتمنى دلـهم موجود و يـشوف حـركاتها 

جنت گاعدة يم البنات من نامت اخذتها للغرفة خليتهة بمكانها قفلت الغرفة بدلت هدومي تمددت

بصفهة متغطية تعبانة ظهري يوجعني و بطني 

بين الواعية و الغافية اسمع الموبايل يدگ و غمزة

تبجي فزيت اسكتها خليتهة بحضني رجعت غفيت

مطفية من النعاس صعدت فوك راسي فززتني

وخرتهة جرت شعري وياهة لو تسبل بأذني تخليني

احوس دگيت عليهة بلكي تنام تخلي حلگهة على خدي عود تعض تحك بثتها بخدي تكش روحي

طلعلهة سن صغيرون فوگ و البقية بعدهن تتأخر 

منتظرة تقوة أسنانهة حتى تعضني اريد اشوف عضتها حلوة لو لا اتمنى هسة تعض خدي واجرب

            

              

                    

ضحكت على افكاري عفتها تتملعب فوك مني غفيت

الصبح من گعدت لگيتهة غافية بصفي گمت بهدوء

اخذت موبايلي اخلي على الشحن بس فتحتة شفت

اتصال من رقم خبطت معدتي عزة متصل علية اشوف الاتصال الساعة بالاربعة الفجر البارحة كتلني

النعاس غفيت حتى ما صليت فوگهة متصل علية

كلش ضجت و نقهرت لا أكدر ارجع اتصل بيه ممنوع

على گولتة ضليت احوس ما أكدر اروح زيارة الة ورة

اخر مرة من راقبني أبن نعمان گالولي لا تروحين هم

أني خفت منهم گعدت و سكتت ما دام يتصل علية 

كلش كافي اسمع صوتة حتى لو ثواني قصيرة 

مر اكثر من أسبوعين و فوك هو ما متصل اخبارة توصلني من رفا تسأل رضوان و تگلي حتى لو بي شي ادري ما يحجون يضمون علية عدي حساس هيج

محاكمة نعمان نطوهة موعد أخير بعد مايصير تتأجل ، فتحو ملف موت حاتم بشكل رسمي ورة ما اعترف واحد من الدكاترة أن جان اكو أثر رصاصة 

الموضوع جان يحتاجلة أكثر من صفوان يرادلة ظهر

قوي حتى يطيح نعمان الي عدة هواي معارف كلشي

يگدر يسوي تعبو يالله گدرو يفتحون الملف رسمياً 

بلش التـحيق من جديد سمـعت مستـجويين الكل حتى أهـل صلاح كل شـخص جان متـواجد وحاظر 

هناك بأخر جلسة عرفت مستدعين دلهم علمود التحقيق ضليت اتحسر لو ادري بي الة اروح اشوفة 

طول هاي المدة نعمان و صلاح بالسجن دلهم جان

عدة ملفات لشغلهم بس احترگن بالبيت لو موجودة

هم تساعدهم هواي بالقضية بس حظة كلش زفت

صادف واحد صفر جان موعد محاكمة نعمان ورة 

ما اعترفوا ثنين من الدكاترة أن تقرير التشريح مزور

و الي دافـعلهم و جان متـواجد هو نـعمان الة ايد

ضليت الليل كلة ادعي بس اريد يتحاكمون لخاطرة

بلكي شوية يبرد گلبة بيهم ثاني يوم لحيت شگد 

حتى أروح محد رضى اخوانهم و اقتربهم كلهم هناك

ضليت منتظرة على نار افتر بالغرفة الموبايل بأيدي

كل شوية اخابر رفا و ماكو اي خبر من صفوان عنهم

لحد ورة أذان الظهر يالله رجع جنت اصلي و دگ الموبايل ما رديت خلصت صلاة دعيت من كل گلبي خبر يفرحنة مو مثل حل مرة توصل للنهاية وتخرب

فزيت على صوت هلهولة طلعت أشوف خالتي تطش

جكليت على راس علي الي يضحك يلم بيهن من فوك

شعرة خلصت الجيس عليه وگفت ما فاهمة شكو

حجة يضحك:اني شعلية تطشون علية 

سمر:جايب الخبر مثل صاحبة المهم فرحتنة

غنوة:شكو شصاير

سمر:خلصت المحكمة حكمو عليهم مؤبد 

غنوة:لا صدك

سمر: والله هذة علي سأليه

ضحكت فرحانة ماي بارد نزل على گلبي من كد الفرحة صعبة علية أصدك رجعت اتصل برفا بس حتى اتأكد ضلينة كل شوية نعيد السالفة نفسهة 

            

              

                    

بالليل ضليت سهرانة هم ما اتصـل يـوم ورة يوم انتظـرة كل يوم اشوف الرسـائل بس حتى اتأكد من الخبر احس مامصـدگة من كد ما شـلعو گلبنة 

من حكموهم و أمنت انتظرت يوم الزيارة مشيت هالمرة اخذت غمزة وياي لهناك تورطت بيهة حارة

و هوسة نزعحت ضلت بس تبجي و تتنعوص 

گعدت مخليتهة بحضـني منتظرة يجـي عيني على 

الشباك العب بأديهة لحد ما شفتة دخل گعد بمكانة

عيونة عليهة ما شال عينة عنها واضح متأثر عليه شلون متأثر بشوفتها أخر مرة شافهة يوم محاكمتة

حجة يقرب من الشباك :بابا حبيبي رويحتي 

مدت ايدهة بس حتى تلعب بالقفل الموجود هناك 

معلگينة بالشباك اخذت ايدهة اقربها لحد ما كدر 

يبمس أيدهة دنگ يبوس اصابعهة لصغر أيدهة كدرت أمـدهة الـة مـن ورة الحـديد لمخلـينهن 

غنوة:شلونك

دلهم:هسة صرت زين

غنوة:مبروك حصلت حگ حاتم كلش فرحتلك

دلهم: حبيبتي ردت احضنج بيومها

غنوة:دير بالك على روحك واطلع وتدلل

دلهم:لو ضالين على البجي اشرفلنة

ضحكت تلفت حولة مايريد يطلع صوتي دنگت حتى

اخفي ضحكتي ضلينة ساكتينبس صوت غمزة تناغي

دلهم بعدمايگدر يضم فرحتة بشوفتهة مات عليهة

خلصت الزيارة رجعـنة لأول مـرة ارجع بـدون بجي 

بس اخذت اغراضنة رجعت لبيتنة بعد هاي المدة 

الطويلة هسة الگاه صاير ترابة اني أهم بالتنظيف

وصلنة فتحت الباب شايلة غمزة من شفتها ترابة خفت عليهة نزلت جنطتي قفلت الباب رحت لبيت 

أهلي فتحت بدون ما ادگة دخلت اسمع صياح 

علوان گاعد يتغدة يمة صفية و غفران تلعلع بصوتها

و ذيج ترد عليهة هو مدنگ و ساكت البنات ضايجات

سلمت يالله انتبهو علية صحت نرجس للغرفة خليت

يمهه غمزة وصيتهن عليهة بس انظف البيت بسرعة

خاف ادخلهة للتراب هي متنگة نوب تتمرض رجعت

وراي غفران تهف التفت الهة مستغربة المن اجت

فتحت الباب حجيت :المن لحگتيني

غفران: اريد اشرد من هاي المرة خبلتني

غنوة:اريد انظف ارجعي لبيتج فكيني من شرج

ولا جني احجي گبل دخلت كعدت بالحوش فتحت الباب مال المطبخ ذبيت عباتي بلشت انظف بالبيت 

صار هواي أني ببغداد تحسفت ما جبت رفا وياي

طگ ظهري من التنظيف و غفران گاعدة كل شوية تهد و ترد لاهي فايدتني ولا ساكتة ، نرجس كل شوية 

تجي تگلي البنية بجت خلتني ما أندل دربي 

جابتهة ضلت عد غفران برة بالحوش على ما كملت

فتحت البيبان صار الهوة يتداور بالبيت توني غاسلتة

بدلت الفراش مال الجرباية اخذت غمزة نومتها رجعت حتى ما ارتاحيت كملت شغلي كلة لحد الغروب رحت صليت مددت بالهول ميتة من التعب

            

              

                    

وديت نرحس جابتلي عشة منهم كباب عروگ وياه خضرة و لبن بارد وياه ليمون و نعناع خلاني اسرسح

ضليت ارتب بالبيت كل يوم اغسلي وحدة من السجادات من كد العجز ضليت اسبوع بيهن اتململ

وحدي ماعندي ليگومني لو يسخرني ضالة اخيط 

و أخربط وحدي على راحتي صرت مثال للكسل

مادري سجن نعمان و صلاح راح يخليني هيج أفرح

واني جنت اريد يعوفون القضية حتى دلهم ما يتأذى

بس والله ماي بارد هيح نزل على گلوبنة و ريحنة

ضليت شهر كامل اني اسولف بيهم كل مرة افرح بالزايد احس عدنة عيد يگلولي لاتشمتين هو دلهم

بالسجن بعد منو ينسحل محد عندي غيرة 

اهتميت بالحديقة مالتنة رجعت أزرع بيهة ورد مثل

اول ما اجينة هنا هم زرعتها اني ازرع ورد تطلعلي

يطلعلي زرع مدري شنو ماشنو تعبني هم حضي

بليل تمددت بصف غمزة عيني عليهة تندمت على اليوم الجنت انتظر بيها تعضني هسة شبعت عضات

طلعلهة سنون الاماميات الفوك و الجوة ضالة تعض

خدي لو من ارضعها مرات نايمة بأمان الله افز عليهة

تعض بأدية صـرت منگـرشة من وراهة عـذبتني 

التفت على موبايلي يدك كل ابالي رفا اجيت اسدة

گعدت على حيلي اشوفة رقم تخربطت مشاعري

التفت للمراية بدون وعي اشوف روحي الم بشعري 

نوب فصل و اتصل بنفس الثانية فتحتةخط عليه

حجة بصوت ناصي:غناي 

رديت متوترة:دلهم وينك صدك تحجي

دلهم:أسف يابة ماكدر احصل الموبايل دوم

غنوة:شلونك 

دلهم:سمعت صوتج صرت زين ،بنيتي شلونهة

غنوة: الحمدلله زينات بناتك

ضحك عضيت شفتي بدون وعي رديت:اروح فدوة لضحكتك 

تحمحم حجة بخبث:صايرة تخجليني 

غنوة:بس تعال

دلهم:خرب عرضج

ضحكت وجهي صخن مدري شبية لگيت روحي واكفة يم الميز بدون ما احس افتر بالغرفة من التوتر

دلهم:لا تسكتين ادفع فلوس حتى احصل شكم كلمة

غنوة :منيلك الفلوس 

دلهم:صفوان يجيب و اگدر ابيع شكم شغلة هنا كلشي يتبدل بفلوس

غنوة:مادري جان ادزلك اني والله ماعرف يصير يدخلولك فلوس للسجن 

دلهم: لا حبيبتي خليهن عدج بيت تصرفين عليه

غنوة:البيت مشتاقلك 

دلهم:اخ من البيت ميت عليه

غنوة:هو هم مو حلو بدونك يريدك

دلهم: والله بالج صافي اني بالي خايس

ضحكت العب بطرف الخانة حجيت بهمس:أحبك

دلهم:حبيبة روحي غناوي 

غنوة: محد يدلعني من يوم الرحت

دلهم:سودة بوجهم ليش مايدلعونك حبيبي

غنوة:بس انتة تگلي غناوي 

دلهم:غناي غنوتي كل أهلي و ناسي حبيبة روحي 

بنيتي 

بجيت مدنگة دموعي يطيحن على أيدي احس بغصة

صارت بلعومي بعد ماگدر احجي ازلغ بظافري 

            

              

                    

دلهم:لاتبجين حبيبتي راح اسدة 

غنوة:ما باجية يالله روح تصبح على خير دير بالك على روحك 

دلهم: وانتي هم بالج على بنتج 

غنوة:صار بعيوني 

دلهم:فدوة لعيونك 

غنوة:دلهم

رد متنهد: ياروح دلهم رحمي من نعوصتج رحمة لذاك الاب الطيب

ضحكت هو مستعجل حتى حجينة كلة بسرعة سداه

رجعت لمكاني ابوس بالشاشة من الفرحة گوة نمت

ثانـي يوم معـيدة حتى لبسـت غمزة بدلتة الطلعة

اني هم كاشخة و مشغلة اغاني الدنيا ما سايعتني

ضليت اليوم كلة هيج يگول مو سامعة صوت دلهم 

صار عدي جناحات من الفرحة كل شوية ابوس بتة

خلص أسبوع يخليني اتگلب يطول يالله يتصل اكثر

من اربعطش يوم و ازيد مرات يخلص شهر يتصل

لحظات و يفصلة حتى الزيارة بالسجن اطول منة

مايرضى اروح هناك طريق يتعب من اوصل لضل للظهر انتظرة بس اروح مو دوم مرات متباعدة 

مر على غياب كلهم عنة ست أشهر بهاي الفترة كملت غمزة السنة اول عيد ميلاد الهة صادف هو 

ما موجود متت من القهر تمنيتة هنا و يشوفهة

ضليت بيومها سهرانة الأربعة كلي أمل يتصل بينة

هم ما أتصل كلش ضجت بيومها حتى ما سويت 

عيدميلاد الهة بس لبستهة گصيتلهة صور كتبت

التاريخ مال الصورة و تاريخ ميلادهة من اجتني رفا

اخذتهن حتى صفوان يوديهن الة بس صورة وحدة خليتهة وية ملابسه انتظرتة بليلتهة هم ما أتصل

من كل عقلي زعلانة بس بعدين عرفت شگد غالي عدهم هناك الاتصال و الفلوس يشتري بيهن أكل 

احسن من الاكل الي يوزعونة بالسجن هاي عرفتها

صدفة شفت تقرير على قناة بالتلفزيون ضليت ابجي واني أسمع شلون حالهم هناك و الوضع السيء كلشي عدهم ينباع و ينشري بفلوس هواي 

دخلنة سنة جديدة اني أحسب لدلهم بس اريد يكمل

سنة حتى على الاقل اگول بعدلة أربع سنوات اخفف

عن روحي بيهن الوقت يمشي بطيء من گد الانتظار

ابتسمت اتأمل غمزة تلزم طرف الميز و تگوم صارت

حركة و تزحف ما تنگض صوتها تارس البيت ترس

اصورهة و أسجل بصمات مستمرة ادز لحسابة

حتى من يطلع هو يشوف كلشي بوقتة ضامة الصور

كل لحظة صار بيهة شي جديد بحياتنة اني مصورتة

طلعت ارش بالحـديقة متخوصـرة اباوع لغـمزة بالحجلة گاعدة تلعب تطگ الخرخاشة و تطلع صوت

ندگ الباب رحت فتحت مستغربة عمتي أم جسام

نزعت عباتهة گبل راحت للصحيات بيتنة قريب على الشارع هي عدهة سكر كل ماتروح للسوگ تجينة

گمت من اشوفهة اخرب ضحك نوب استحي على دمي عضيت شفتي امنع روحي اضحك دخلت بنين

وياهة سكنة جانن بالسوگ سديت الباب وراهه

            

              

                    

ما رضن يدخلن ضلن واكفات يالحوش لحد ماطلعت

اخذت عباتها سلمت عليهة ردت منها تگعد هي فحطانة و وجها أحمر عندت سكنة ماتريد تضل هنا

طلعن هاي تخوزر بية سحبتهة من عباتها گبل لا تروح التفت الي تسحبها من أيدي بقوة تعدلها

غنوة:عود ليش تخزرين بية بايگة ذهب أمج ما ادري

سكنة:لا فقيرة ما تدرين

غنوة:ما أدري گليلي شبيج وين علتج

حجت بنتر و تهديد:لو تموتين ماتحصلين جسام ديري بالج تطلعين گبالة افرم لحمج فرم

غنوة:انتي صدك تحجين ماتشوفيني متزوجة و بنتي عدي

سكنة: بس رجلج مو عدج خاف ابالج تلعبين

بدون وعي من الصدمة صفگتهة على وجهة شهگت

مصدومة شمرت العلاليگ خمشتني بثنين أديهة تريد تطلعني للشارع اني بدون عباة و حجاب 

گدرت اسحلهة هنة يتصايحن و عمتي تحايز بينة 

جيرت شالهة وية شعرهة هي لازمتني تسب و تشتم

اني هم ما گلت باطل غلطت بس ما شتمت عيب

فكتنة عمتي ترزل بينة وخرتها اعدل بثوبي لميت شعري الهث:طايحة الحظ ياهي لتگليلهة تلعب دولي انتي و رجلج لو أبلاش ما أباوعلة ادبسزز 

سكنة:شوف ياهو لتحجي ولج غنيوة لا عبالج جبتي شيوخ و نظفني ماضيج احفرة و اطلع ساسة

غنوة:دولي روحي مشطي شعرج كاتلة الجبان 

سكنة:تالي وكت الگ**" تعلمنة النظافة

غنوة:ايا جلية عليمن تغلطين اطيح حظج والعباس

هدت تريد بنين تعوفهة واني عمتي سادة حلگي ماگدرت تلزمني ورة ما جرتني سكنة بعكس ايدي

اطگ بيهة على ظهرهة بالعظم القوي بالايد 

شاغت روحها خطية عافتني من حرگة گلبي جريتهة

لزمت ادية لتعت بشعرها گامت تهامش احنة ثنينة

نفس الشي محد عافت الثانية لحد ما عمتي گامت 

تحجي و تصيح دفعتهة شالت حجابهة تلبسة شلون

ما جان و العباة انترست تراب الحمدلله عمتي هنا

لو ما هي جان دارن علية هي و بنين طلعن روحي

سديت الباب وراهن گطعت شعري الجلبة رحت غسلت لميتة كور فوك راسي التفت لغمزة

تلعب ولا تدري بالدنيا وين وصلت عدها عضاضة 

مكيفة عليهة رحت شلتهة دخلت خاف يجون اعمامي يهدون علية والله يسونهة مو بعيدة عليهم

قفلت البيبان گعدت بالغرفة حتى ما اسمع الباب 

اذا ندك سويتلي لفات بتيتة و كلاص جاي غمزة تفتر علية تريد تشرب طلعتلهة بالخاشوگة ضاگتة طيب

تخبلت علية تمطگ ماريد اشربها مو زين عليهة نطيتها بتيتة كعدت مخلوسة والله بابنة يدك عزة 

بعيني هسة اني المن اتعارك ياهو الي يدافعلي

لازمة الموبايل اريد اخابر دلهم من الخوف ضليت افتر علون يدك علية اعصر بأيدي بطني خبطت

            

              

                    

هاي سكنة مدللة عد ابوها هسة تروح تتمضيگ هناك طبعا يشكونها ،عفت الموبايل علوان يدك

خلسني بالزايد اريد اعرف شيريد واخاف افتح خط

بجيت من الخوف متندمة هسة المن اعارك خرب حضي دنگت اشيل غمزة نوب حتى هي بجت وياي

طلعت برة اغسل البيت مطفية الضوة مالتة كلة خليت ماي شوية بالكلاص اسكت بغمزة شريتها ماي

الباب يدك شبيهم ذولة دكافي طاح الكلاص مني من 

ندك الباب مال المطبخ بلعت العافية من الخوف

رجعت لغرفتي فتحت خط على علوان كل غلاط و رزايل ليش ما افتح الباب لعمي خلف هو جايني 

رديت عليه بصوت يرجف:جـ..جنت نايمة مادري 

علوان:نامت عليج طابوگة جلبة توكفين عمج بالشارع جان استحيتي 

غنوة:هو المن جاي 

علوان:مو كاتلة مرت حسام طاگة البت 

غنوة:هي بدت تحجي علية رديت عليهة مامسوية شي اسأل عمتي 

علوان:بنينة تگول انتي سحلتيهة هي جانت رايحة

خل يجي الصبح اذا ما اكسر ظهرج غينوة

سداه خلاني اتگلب من القهر مدري شلون نمت كعدت تريگت رجعت لغرفتي اليوم كلة ما فتحت الباب هو من كل عقلة اجاني دك و تعب ما فتحتة

على حظي المصخم طگت المحولة مالت الكهرباء 

و ابو المولد يشغل و يطفي لان ما موديلة الفلوس

راسلت غفران الحقيرة تشوفهن و ماترد لو توديلي

واحد من الجهال ، علي جان فايدني نوب رجع لخوالة خلاني وحدي الة اودي عليه الصبح يجيني

گضيت الليل اهفي لغمزة مسنحة وعايفتني اهفي

ايدي تشنجت گلبت الموبايل بيدي الثانية يرن

خرب حضي صخمان يفتر علية مستعر علمود سكنة

واني بت البطة السودة عصبت كلش ضليت اتگلب

من الحرگة و القهر كل ما اتذكر حجي سكنة انط

هسة اكيد يردون اعتذر فوك ماتحجي علية الادبسزز

اباوع للساعة بالوحدة راسلت وتين حجيتلهة حتى

تگول لأمها رغم متفشلة منهم بس مالي غيرهم 

ثاني يوم للعصر اجو طلعت الهم سلمت على خالتي

بس هي و ابو علي جايين دخلو للاستقبال مشيت

جبتلهم الماي خليت الجاي على النار  

غمزة واكفة بباب الاستقبال همة يصيحونها شلتهة

اخذتهة الهم خلاهة بحضنة يبوس خدودها ثنينهن

هي تگول "ددا" هو كل ابالة تگلة جدو فرحان

يبوسهة يحجي :هلة جدو هلة بست البنات

ضحكت اخلي الجاي گبالة مارضى اخذهة كعدت يم خالتي حجت :شلونج حبيبتي 

غنوة:زينة الحمدلله 

سألتني عن الصار خجلت احجي اهمس اسولفلهة المشكلة هزت ايدهة على گولتهة سالفة ما تسوة

شبي اخوج هاد عليج سكتت شسوي 

ضلو يمي للعصر لحد ما اجة علوان هاد تفاجئ بيهم 

من يم الباب شاف السيارة و سكت دخل للاستقبال

حجو وياه هو بس يهز راسة اكبر عربانة بالعراق علوان ، اخـذوه راحو لبـيت جدي الحـمدلله سـدو السـالفة طلعـت سـكنة ضايـفة عليهـة بهـارات 

رجعو يمنة تشكرت منهم اضحك فرحانة لان كسرت

عينهة شگد حبيتهم بيومها خصوصاً أبو علي كلش حباب و حقاني شكد وگف النة بهاي الفترة هواي

دخلت لازمة موبايلي اكتب لرفا الصار بعدني احجي 

ردت علية بصمة فتحتهة مستغربة هي تودي وياهن سمايلات تركص لو هاي مال الاحتفالات خبصتني

فتحتها اسمع بيها حجت بصياح:عدي الج خبرين واحد احلى من الثاني دوسي على رقم واحد يوصلج الخبر الاول 

شكد تافهة اتصلت بيهة طرشتني تهلهل نوب گالت فرحانة:ولججح طلعت بنية مو ولد اني حامل ببنية

رديت بضحكة:صدك مبروك

رفا:الله يبارك بيج يوم الالج

غنوة:نجبي

رفا: ولج صفوان راح ينجلط يريد ولد حتى يغث بي رجلج تالي هو نغث

غنوة:يا شماتتة دلهم بيه هسة

رفا:الخبر الثاني راح يخليج تصرخين من الفرحة

غنوة:شنو الخبر خليني اصرخ 

رفا:انطو عفو عام يجوز يشمل دلهم 

رمشت ما مستوعبة گمت اخلي الموبايل قريب علية

حجيت مستغربة: يعني شنو عفو مافتهمت

رفا:شبيج عفو يعني يطلع گبل لا يخلص الحكم كلة اذا قدمنا الطلب و شملة يطلع 

الفصل الثاني والثلاثون من هنا