رواية نقش بارد الفصل الثاني والثلاثون بقلم فدك فاطمه
عاشرنـه التعب وألإه والـحرمان
كـلها لخـاطر أعيـونك
.
غنـــوة
بعد مكالمة رفا ماكدرت اگطع الامل تعلگت روحي بهذة الخبر ادعي بدون ماعرف اذا صدك يشملة
دعيت من كل گلبي كل شوية أتصل حتى افهم منها
ثاني يوم گعدت من وكت على صوت غفران تصيح
گمت ملانة من جيتها وصلت الباب و رجعت كعدت
بغرفتي صاحت و ملت ما فتحتة مرات اضوج منها
مرات احس مو عيب علية اضل سادة الباب هي برة
بس حجيها يترفزني تجي تتشكى و اضوج من سيرة
صفـية صدك انغـث من تـصرفاتهن اضل ضايجة
مر اليوم كاعدة ببيتي حتى ما طلعت و شفت شعدهة
كل مرة اگعد بالحوش و تجيتي نرجس اليوم للغروب
يالله طلعت رشيت الحوش سگيت الحديقة بدربي
تذكرت فلوس أبو المولد البارحة عبالي من تجي خالتي وياهة واحد من الولد و يروحلة بس محد أجة
استحيـت من أبـوعلي شلـون اوديه عيب مايصير
دگت بية العوزة خابرت غفران گوة حصلولي علي وأجاني بس هو كفو الباقي فاهين اخذهن راح اجاني
ورة العشة يتمضحك و نافش روحة فتحتلة الباب
گعد يحجي بضوجة :لگيتة شالع الجوزة ويگول ما ارجعها
غنوة:شصار عليه هو بس شكم يوم تأخرنة
علي:خبل عمة يريد بس يتأمر گتلة بيت عمتي عدهم طفلة اذا ضار عليهة شي برگبتك والله خوفتة بيهة راح سواهة غصباً عليه
ضحكت على تصرفاتة ضل يمي تعشة اخذ غمزة يفتر بيهة بالشارع يوديهة للمحل هي مكيفة عليه
الـمهم واحد يـطلعها بسـرعة تتعلق بيه و تحبة
حجة يخليها على الكاونتر:عمة هاي الي
التفتت الة مستغربة:شنو
علي:اني خاطبها منج ناهي عليهة
غنوة:خاب دروح اني ازوجها لأبن صفية شمالني
علي:صار بيهة أبن صفية من ردتيني يشغلة ضليتي تگولين أبن اخوي و حبيبي
ضحكت اطگة بالشقة على جتفة لسانة شطولة بس انطيه مجال اللوتي شال غمزة ماخذهة بالحوش طلعت وراه شافني شرد هي تضحك لان يركض بيها
بات يمي بالليل ثاني يوم من الصبح لگيتة رايح طلع
يشتغل عمالة وية خالة كسر خاطري ما يدخل لبيت
أهلي بس يشوف أمة من بعيد و يروح ضالة يتنقل
ماتقبل فكرة زواجها من علوان عكس اخوانة الصغار
هو وعى عليه عمة نوب يرجع يتزوج أمة ما هاضمة
ثاني يوم العصر ندك الباب طلعت فتحتة الة ضل يمي و بالليل يبات بالاستقبال مرات نرجس تجيني
لحد ما صفية اشتغلت الخباثة عدهة و اجت هادة
بالغروبية اجتني تهف كسرت الباب تكسر اريد الحك
البس نعالي ة اطلع افتحة خلت گلبي بين رجلية
فتحتة مل أبالي غفران لاگتني هي ترعد تصيح علية
تحجي بصوت عالي شنو علي يبات يمي و يضل هنا
حجيهة و نغزاتهة تحسسني الولد مو أبن اخوي كشت روحي منها هو خطية نايم بالاستقبال سحلتة
طلعتة يريدها تسكت خزتنة خلتني اشعوط افور
ضليت الليل كلة من گد الحرگة اتگلب و الشقيقة هاجت علية اعصابي أنهارت كل ما أذكر حجيها اطگ
من القهر شنو من مرة لا تخاف الله ولا تستحي
گمت ادور على العلاج بلكي الگة حباية مخلص كلة
شمرت الشريط بالثلاجة لگيتلي براسيتول شربت
طلعت من البيت مختنگة گعدت بباب المطبخ مرتكية على أطار الباب صافنة على الحايط شبيهة
الناس ماتستحي شگد ما اگعد و امتنع عنهم يقهروني بالزايد بس لان گاعدة وحدي محد عندي
ذاك اليوم حجي سـكنة و اليوم صـفية كـرهت روحي
كرهوني بالساعة الصرت بيهة اتمنى روحي ولد حتى
اخلـص من حجـيهم الوصخ اليـمرد الگلـب مـرد
ما جان على بالي أبد اسمع هيج كلام حتى لو محد سمعهة بس تفكيرها يخليني اضوج و تلعب روحي
عصرت عيوني سوة قفلت الباب گمت رايحة للغرفة
غمزة گعدت من الفراش للكومدية تلعب بيها تجر
بالغراض واكفة على طروف رجليهة حتى تلوحهن
بوستهة حاضنتهة أبجي ماعندي غيرها لزمت أديهة
اشمهن يالله كلشي يهون خل يطلع دلهم اغم روحي
اذا ضليت هنا اگعد بخرابة ولا أكعد يم اهلي بعد
تمنيت يتصل علية هسة الة ادگهة شكواوي للصبح
بس ما أتصل ضليت سهرانة لحد ما طخ براسهة تنام
نمت بصفهة مخلية ايدهة على خدي تگرص بية
خلصت اليوم ألوب من القهر كل ماريد أنسى ماكدر
اشعوط بالزايد يمة كون أكدر اكتلهة اسحل الشارع
تتهمني وية أبن اخوي ام عقل الجايف الوصخة
شافت محد الي رجعت لسوالفهة اگدر اروح لأبوها
لان انطة كلمة بس خو ما يوگف وياي همة اعمامي أول امس اجوني هادين علمود كتلتة سكنة
بلعتها و سكتت ماحجيت بس احترگ دمي خلتني ادعي عليهة نوب استغفرت ما أسامحها بس اخاف
نوب أدعي عليهة و ترجع الدعوة علية و اتندم
أجوني الجهال بالليل نكسر خاطري عليهم بس ما فتحت الباب غلست گعدت بالاستقبال مكتئبة خابرت رفا حجيت شوية وياهة حسيتها مستعجلة
سديتة منها الساعة بالعشرة گعدت مطلعة مسلسل
لأنجلينا بس حتى أتذكر دلهم السخيف بالله شعاجبة
منها هي صح حلوة بس مو لهدرجة يكتل روحة كتل
لگيتلي سبب ابجي علمودة مگابلة المرة و ابجي نوب الفلم حزين بجيت عليهة من گص جناحاتها هذة حبيبها قهرتني من گامت تبجي بعدني كاعدة
أسب بي و طفرت من دك موبايلي گمزني غميت الشاشة هاي وتين عبالي دلهم عفتها ما رديت عليها
ضلت تدز رسايل بالگروب مالتنة تريد نختارلها لبسة
نمت و الموبايل بيدي و غمزة تدفر ببطني كل شوية
گالبة على جهة عذبتني الجو صاير بي خيط برودة
بالليل ضلت تكح گمت للغرفة اخذتها نومتها هناك
لازمة جهازي اگلب بالصور كلهن صور لغمزة وأبوها
نوب صايرة بية سولة اكبر الصور و اشوف الوشوم
اروح ارسمهن بالورقة من الفراغ ضالة اتملعب هيج
بعدني مركزة بوجهة دك علية طرت من الفرحة گعدت على حيلي أنزل غمزة مني گامت تبجي على ما سكتتها فـصلة خليت الـموبايل گبالـي وغمزة بحضني تتمضيگ لاهي الراضعة ولا عايفتني براحتي
رجع اتصل فتحت خط حجيت بفرحة:توني افكر بيك
دلهم:شنو نوع الافكار
غنوة:استغفر الله
دلهم:ها مطورة أفكارج صايرة تستغفرين منها
غنوة: دلهممم
دلهم:كشفتج حسيت اكو وحيد يفكر بية گلت خل اقطع افكارة گبى لا يتعمق
ضحكت اشيل الجهاز اخلي على رجلي مبتسمة على
سوالفة شكد مشتاقتلة شلون يگلب السالفة علية
غنوة:شلونك
دلهم:بخير من سمعت صوتج
غنوة:يگولون اكو عفو سمعت من رفا أذا أجة تطلع
دلهم: يعني السالفة صدك عبالي يجذبون
غنوة: لا صدك رفا گالت
دلهم:خل يعزل مجلس الوزراء گلي لصاحبتج تقر الموازنة همين
غنوة:ماضحك
دلهم:ها ماضحك اذا ماتطلعين شارة الحلگ
غنوة:شو اليوم تحجي على كيفك
دلهم:ماترديني راح اسدة
غنوة:لا اتشاقة شبيك مو لان يومية تحجي مستعجل
دلهم:بگت الموبايل محد لگاه صارلهم أسبوع
غنوة:لاصدك
دلهم: والله
راحت ضحكتي شلتة احجي بخوف:خاف يعرفونك
و تتأذى لو يكتلونك
دلهم: لاتخافين محد يكشفني متعود ايدي خفيفة
غنوة:گرت عيني هنيال العراق عليك
دلهم:ارشح للانتخابات
غنوة:أي گلهم ايدي خفيفة أبوگكم حتى ماتحسون
بية و تنقهرون
ضحـك بس بصـوت ناصي حابـس الضحكة هزيت ايدي ماكدر حتى اضوج فرحانة المهم اسمع صوتة
دلهم:عوفج من أيدي گليلي ليش تودين صورة بيهة أيدج ما خفتي الله بية
عضيت شفتي اتبوسم حجيت بهمس:جا احتاريت شلون اخليك تشوفني
دلهم:جنت خايف تودين صورتج طلعتي ذكية
غنوة:ادري يشوفونهة گبل لا توصلك ترة من غبية اني ليش تذمني مو صوجك
دلهم:بعد بعد مشتاق لصوتج و سوالفج
غنوة:اوف دلهم اريدك والله مليت ضوجة
دلهم:ماضل شي اذا وافقو على العفو اكيد يشملني
غنوة:شدراك
دلهم:احساسي يگول لان دوم توگف وياي هيج سوالف
غنوة:ما شاء الله متعود
دلهم:خبرة ، بنتي وين
غنوة:هاي بحضني
دلهم:هنيالهة بت الگ**" بوسيهة بمكاني
ضحكت ردت احجـيلة عن علي و سـوالفة راحت ضحـكتي من تذكرت حجي صفية بس ما سولفلتلة
حجينة شوية وراهة نوب استعجل سداه حتى يرجع الموبايل نبهني لا ارجع اتصل ولا افتح خط اذا دك
يگـول عـلاج مو اتصـال ضليـت ثاني يوم اضحك ونفـسيتي مسـتعدلة گعدت سـويتلي جدر دولمة
واكلتة هم زين محد عدي يوصل حجي لدلهم جان
طارت هيبتي و ثگلي كلة گبالة سوالني ميز تصنيف
أيام روتيـن نفسها بس هالفتـرة جو كل شوية شكل
اخاف تصير ترابـة بس تگب العجاج تنگ غمزة اسد
البيبان و اخلـي وصل جوة الباب هم تحسـس منة
خالتي أجتني لان ابوعلي رايح للعمرة أجت يمي من
تضـل هنا اتطـمن كلشي يصيـر هي وياي ما أخاف كاعدة بالغرفة تمشط بشعري و غمزة يمي تلعب
الهيهة بلكي ما تخـتنگ لو هي مـبين گوة تتنفس تقهرني ينكسر خاطري عليها بس تبرد لو تشم دخان
تگوم تسحب النفس گوة و صدرها يخرش بي صوت
نمنة و فززني صوت الهوة العالي و صوتها هي تكح
گمت شغلت الضوة غسلت وجهة گعدت ادلك
بمتونها لزمتها الكحـة و صدرها بي صوت مثل الصفير گوة تسحب النفس تكسر الخاطر
گمـت شايلـتهة امسح على متونهـا طلعت برة اگعد
بخالتي قلقتني وجهة صار أصفر خطية فزت خايفة
اخذتهة مني اعصر بأدية مگابلتهة ردناهة شوية
تصير زينة كل ما شوية تزود لحد ما گامت تتقيء اخذتـها غسـلتلهة و رجعت لگيـت خالتي تـلبس بعباتهة طلعت تدور سيارة الساعة بالاربعة الصبح
لبست عباتي على ما أجت ملحگة على جيرانة گاللهة
بس اوصلجن بطريقي صعدنة وياه الجو كلش صاير
أصفر خنگة اني من يمي اختنگت من التراب
وصلنة للمستشفى ما شاء الله نصها هناك مختنگة
بس العدة ربو يتبهذل بهيج جو دخلنة للطوارئ
خلولهة اوكسجين ضلينة هناك لحد ما صحصحت
انتظرنة الجو صفى للصبح احنة گاعدين وياهة خطية من ارتاحت نامت مسحت على شعرهة ابوسة
ياريـت المـرض بـية ولا بيهة شـگول عليك نعمان خطيتها برگبتك ولا أسامحهم على الصار ذاك اليوم
رجعنة للبيت لعبانة روحي من التراب مغطي الحوش گعدن هنة بالغرفة رحت سويت ريوگ اكلنة
سديت الباب عليهة نايمة و خالتي هم نامت يمهة
طلعت غسلت الحوش رشيت الحديقة طالع بيهة
ورد و ياس مخضر بعد شتلة ماعرفهة اشترتهة رفا
كلش حلوة نفس المتلسق بيه ورد بنفسجي ترس الحايط بسرعة ينمو شكلة حلو كلش عاجبني
خالتي گالتلي اسحب منة اخلي بخيوط حتى يغطي
كل البيت يصير ضل من الفضاوة گعدنة نسوي بي
ضلت يمي اكثر من أسبوع لحد ما رجع ابو علي
رحت وياهة لبغداد ضليت فترة يمهم تونسنة هناك
رجعنة وية علي ويانة سمر نزلونة و غمزة لازمتة ما ترضى تعوفة تبجي هو يضحك يحضن بيهة اخذتهة
تناشغ من صدك متعلقة بي سكتتها بألعابهة كعدنة
نطلع الهدايا نشوفهن محد معترف بية كلشي لبتي
شلتها اريد اكلهة من گد ما مكزكزة عليهة و احبها
ورة مدة أتصلت علية رفا عرفت مقدمين طلب علمودة لان اذا بقينة عليهم يضيع الملف مالتة وية البقية و يتأخر عرفت منة مبصمينهم على الاوراق
المشكلة العلة جعفر معترض مايريد يتنازل يحاول يعترض خلينة محامي بس حتى يرافع عنة ويسرع
أوراقة حتى ما يصير مشكلة مخلية ايدي على گلبي
جنت گاعدة بالحديقة فاتحة الصوندة للزرع اسگي
و غمزة يمي تلعب بالحجلة گمتلهة اشيلهة تحفر
بالحايط بالحايط و تاكل طين شلتهة مكشمة تارسة
حلگهة لازگة راسهة على الحايط و تلحس
غسلت الهة شربتها ماي ضلت لازمة الكلاص تلعب بي گعدتهة بالهول مشيت للباب مستغربة اسمع صوت صريخ و هوسة أيدي على گلبي خايفة منة
كل ما بي و يزود الصوت شلت غمزة مشيت مخلية
شالي على راسي فتحت الباب أباوع گلبي نخمش
أشوف علوان شايه يفتر بالشارع وراه صفية تلطم
ماعرف منو الي بيدة نهبطت على الجهال اريد واحد
يمر و سألة ماكو ضليت لازمة الباب گلبي يخفگ اهز
بغمزة گامت تبجي اخذت عباتي طلعت لبيت أهلي
وصلت للبيت صفية گاعدة بالباب تدگ على رجلهة
و غفران تفتر فوگ منها وجهة اصفر تعصر بأديهة
حجيت خايفة :شكو شبي علوان شصاير عدكم
ردت بهمس يمي:حسن و نرجس يلعبون ولاگين الفلاش مال تنظيف و شارب منة
غنوة:صخاام شمالة صغيرون
غفران:أندري خابطينة وية الماي يلعبون مقلب مثل هذة ليشوفونة باليوتيوب و شاربة الولد
غنوة:سودة علية بلكي مو هواي صخام بوجهي
غفران: الولد انتهى صار ازرگ مايتنفس يتگلب مثل السمجة ربج علوان هنا و اخذة
غنوة:الله يستر ان شاء الله مابي شي سودة علية شجاه نرجس شمالهة ما تعرف
غفران:دبريهة الي هسة يموتون الفرخة لو ضار بي شي
غنوة:لا أسم الله عليه
سكتت درت وجهي أهز بغمزة شايلتهة عيني على صفية گاعـدة بباب الحـوش تلطم على رجـليهة وتحجي وية روحها و الموبايل بيدها بدون ما تخابر
بـس تنـود مـن الخوف عينها للـشارع شايهة
ضليت يمهم حتى اطمن عليه امشي و أدعي دنيا غروب تقلض الگلب احنة بالحوش واكفين والجامع
يقرة قرآن ادعي بيني و بين نفسي جسمي باد من الخوف صار أكثر من ساعتين علوان مايفتح خط
وديت الجهال يجيبون موبايلي راسلت رفا حولتلي رصيد حتى اخابرة هنة ضالات بس يرمشن عليه
اتصلت نطيتة لغفران توني مديتة الهة خمشتة من أيدي صفية تحاجي وجهة يتلاطم خلتنة نحوس وراهة من الخوف اريد توگف افتهم منها ماكو تفتر
سدتة حجت غفران تباوعلة:ها شگالج شلونة حسن
حجت تلف شالهة على راسهة:زين مخلينة بالعناية
خل تخلص الليلة و اذا استقر يطلعونة
تنهد براحة توني گلت الحمدلله واشوف صفية طفرت للبيت ركضت وراهة غفران كل أبالي تريد تروح للمستشفى تلحگهم مشيت على راحتي گبت العيطة طلعت من الغرفة تسحل بنرجس سحل
هي نخلست من الخوف نريد نلزمها نوخرها مانگدر گطعت البت تگطع بألف ياعلي جرتها غفران منها
دفعتهة علية لزمتهة گلبي محترگ عليها ايد شايلة
بيهة غمزة و أيد ترتسها ماي رشگت على وجهة
صارت مثل السعفة ترجف و صفية تهادد تريد تموتها دفعتها گدامي اخذت البس بعباتي اريد اروح
غنوة:ماگدر حتى ادعي عليج و خاف تطيح بأبنج
بدل ما تحمدين الله و تشكرينة تگعدين تدعين للولد لبعدة بالعناية
صفية:امشي الگ**" تالي وكت انتِ تعلميني ام ال***" فاتحة بيتج للرايح و الراد انعل ابوج بس تفكين حلگج وياي هاي الجلبة الزمها لو لا الة اگضي بيهة التوبة جان مات الولد من ورة وكاحتهة
غنوة:ماگول بس حسبي الله عليج وين تروحين من الله على هذة حجيج
صفية:ايي حجيي لو ما صح مابزاج عود مشيخة علينة جابتلهة زلم أمدة الشوارب التطلع وراج الگ**" رجلج بالسجن وفاتحة مـ***" ببيتج السيارات مدري شني ماشني تجي لبابج
غنوة:امشي عمة امشي نجلبت علينة صفية بعد شيسكتها مايفيد وياهة شي صدك من گال الحجي ليجي من أهل العيب مو عيب
التفت تـدور شي تطـگني بي لزمت بتـي و نـرجس شردت حجيها حتى ما يأثر بية ضلن يتعاركن هي
و غفران مكافش بينهن دخلت للبيت سديت البيبان
خليت غمزة بالگاع رجعت لنرجس ترعش من گد ما خايفة وجهة أحمر و سنوانها واحد يطگ بالثاني على خدها أدين صفية مطبعة صايرة أحمر علة أزرگ
سكتتها كسرت خاطري تناشغ و الدموع تصب بدون
صوت گعدتها نومتها على رجلي امسح على راسها
لحد ما غفت ،نزلت غمزة بالگاع تصرخ الة حضن
توضيت گوة لهيتهة خليتهة تلعب و صليت وراهة
خليت العشة على النار سويت شوربة حتى بسرعة
تستوي واكفة بالباب اسمع صوت الدعاء من الجامع
المؤذن الي يمنة يضل يقرة ادعية و مناجاة صوتة حلو هنا المكان هادئ بنسمع گعدت بالباب كل شوية التفت لغمزة لا تسويلهة كارثة من كوارثها
تأففت سحـبتها يمي بدت كـلاص الـماي عـليهة بدلتلهة عينـي على الباب دخلت غـفران تدك بباب المـطبخ فتحتة الـهة طبت راحت تشـوف نرجس
گعدو جهالهة يمها علوان جاي و طاردهم كلهم من البيت گمت صبيتلهم عشة اني مامعترفة بيهن بس
كلة لخاطر للجهال احبهم و ربو گبالي ماكدر اكرهم
ضليت اسولف على البنات هنة يتحسسن من ابوهن
اذا كتلهن يضلن يبجن گوة تعشن سايگة عليهم صفية شلون ما جانت تسوي وياي نفس الشي تتبلة
تخليهن يشتغلن شغلهة حتى هدومها جنت اغسلهن
حجيت اخلي الماي يم غفران:ماتگلين لعلوان شني
بيوم و ليلة نساكم
غفران:خليهة و اسكتي هسة لو تگلة احرگ روحك يحرگها خايبة شتحجين انتي تبدل صاير ماينعرف
غنوة:على حورها هسة هي صفية جنها هايشة بگعة
و صوتها يصم الاذن يگول صوت رجال
غفران:ساحرتة جا ميت عليهة عاميتة
التفت الهة عاگدة حواجبي:شنو ساحرتة
غفران:مسويتلة سحر جا شني
غنوة:صدك تحجين لو تتشاقين
ردت هي تغسل بوجهة:لا صدك جا غير جانت مسوية لسالم ماتدرين
غنوة:عزة بعينجن وانتي تدرين وساكتة
غفران:جانت هي و رجلهة شعلية بيهة رادتني اسوي گبل ورحت وياهة خفت خية مدري شني من مكان يقمت الروح رديت شاردة
غنوة:حَل اي والله تستاهلين الصار بيج سكتي عنها لحد ما اجة الدور و ردت لرجلج
ردت مستعرة:تشمتي لا تضمينها بگلبج
غنوة:الله يجفينة شرجن لو شيصير ما تكسرن خاطري اني مقهورة على هاي الجهال شنو ذنبها
دارت وجـهة على گـعدة نرجس اخذتـهة و اخذت الباقـين و مـشت لهلهة خلتـني صفنة وراهة جسمي قشـعر خفـت تحـطلي سـحر هـاي صـفية اني شلون
حـالي يمـة كمت اطـكطك من الخوف اباوع للبيت فارغ اتخـيل تجيني الة امـوت بگاعي الصبح يلگوني
يابـسة ضليـت افكر لو ما مـسوية هيج بسـالم الله يرحمة يجوز يصير زين وياي لان بي شوية هدة گبل
اتذكر گبل جان يدافع شوية بس تحاجي يصدگها و يگلب علية حسبي الله عليها صدك ماعدهة ضمير لاتخاف من الله هي التطعن و تفضح يضل براسها خير الله يستر منها دخل يطلع دلهم والعباس ماضل
اخذة و افلت اروح حتى لو للصحراء نتحمل الحر ولا نتحمل سحورة خفت على روحي بعد ولا احاجيها
مبين ماتنرد شما اسوي سبحان الله حتى بأصعب الظروف هي ما نهز گلبها ولا حمدت الله من گد ما طاغية و ماشية بدرب مايرضي رب العالمين ما ضال عدها گلب ولا شوية أيمان احنة دعينة هي ما دعت
خليهة ربها يحاسبها وين اكو أعدل من رب العالمين
يجي يوم و تطيح بشر اعمالهة كل خوف لا تطلع بذولة المساكين جهالهة لابيها و لاعليها يطيحون
قبل مدة علي همزين ما طايح من السكلة هسة حسن غير تحمد الله وتشـكر و تعوف سوالفهة عابت
اني احجـي على اخـواني طلعو اصلا مو بعقلهم
بالله علوان بدون سحر مهموش نوب تسحرة صفية
ضلت عركتهم فترة يومية اسمع اخبار من نرجس الي شاردة من ابوها تخاف منة ،رغم حسن صار زين
و طلعوه مارحت شفتة اطكطك من سحورة صفية
من سـمعت هيـج اجذب أذا اگـول ما نخلست
تقريباً مر اقل من شهر على قانون العفو رغم دلهم
مشمول لهسة ماكو المحامي عدة وكالة هو يمشي
بيهة بس شنو هلسنة تهلس بالفلوس اخذ هواي
استحيت من صفوان ناهبين الزلمة احنة الراتب اجة
مال هذا الشهر كلة وديتة الة ضليت اصرف من دلاعة غمزة عادي عندي اقبل بأقل شي بس المهم علاجـاتها و الي تحـتاجة اني ما أصرف ولا أريد
خلصت شهر بطلاع الروح صامة ايدي على الفلوس
گوة دبرت روحي هذة المحامي جزعنة يومية يگول
عن قريب ماكو ما يطلع الي مخوفني دلهم بعد ما
أتصـل من اخر مرة و اخر مرة بالقاء من رحت لبغداد
بجية ابـو علي من العـمرة اخـذانة علي الة وشفتة
جان الجـو بارد شـوية يمنة أم علي ماعـرف اجت فجأة العصر جنت نايمة دگت الباب هواي يالله گعدت سلمت عليهة دخلت احسهة فرحانة وجهة
بشوش سألتهة گالتلي سمر حامل هم فرحتلهم باركتلهة فتحت باب الاستقبال گعدت بصف غمزة
على ما جبتلها ماي نطيتة الهة تباوعلي و تضحك عبالي اكو شي غلط بية ضليت اعدل بروحي متوترة
فتحت علاگـتهة طلعت كارتونة نـساتل نطت وحدة لغمزة و جيس جـكليت ضمتة بكـترهة جوة العباة غطتة تبـاوعلي سكتت مـدري شبيهة المـرة اليوم
لحد الليل تعشينة عرفت بيهة جاية عبرية و تعبانة
نامت بالاستقبال ما رضت تروح للغرفة گمت اخذ غنزة لا تگـعدهة بس تـشوف واحد نايم تكتلة
نومتها بين الواعية و الغافية تذكرت هدومنة ضالة على الحـبل خاف تمطر الدنيا لو تنگط مادري بيها
طـلعت الهـوة بارد يحـرك بثوبي رجلية جرشن
اخذا الهدوم من الحبل غمزة تارستة الي ترس تبدل ولا هي ملحگة تذكرني بذاك الرجال نفس الاطباع
اخذ بالملابس و احجي وية روحي مر مني ضوة هيج
خطف من ورة البيت استغربت لميت للهدوم خليتهن بالسلة اسمع صوت همس على كيف ورانة
صـعدت على البلوكة اباوع ثنين نسـوان مگبعات واكفـات يتـساسرن بيـنهن عـدهن لايـت مخلياتة يضـوي للگاع وحدة مـدري سـتدور تحفر عگدت حواجبي توسعـت عيوني اشوفها صفية الملعونة
وحدة يمهة ماعرفهة الفهمتة من حجيهن جايبتلهة
مدري شنو تگلهة دفني بمكان بعيد عضيت شفتي
اتذكر حجي غفـران نزلت على كـيف اخذت عباتي
و الجـداحة كل ابالي مسويتلة عمل الية لان تحفر
ورة بيتنة وگفت بالباب اروح اگعد خالتي لو الحگهة
باوعت للهول نايمة و باب الغرفة مفتوح و غمزة هم
غافية بمكانها سديت باب المطبخ طلعت تأكدت منهة بعدهة برة بس اريد اشوف شنو الي دفنتة هناك ورانة
ماكو باب من ورة عـدنة مثل اهـلي و البيوت شي بـصف شـي لازم افتر اكو دربين واحد بنهاية الشارع هناك ابـوالمحل مفتح خـاف يشـوفني و الثـاني من جهـة اهـلي مشـيت حتى ليسألني حجة رايحة لهلي
امشي ضـامة الضوة بيدي هـد علية الجلب ضليت اطكـطك منة خاف يركـض وراي توني صرت قريبة نفتح باب بيت أهلي لبدت بسد الحايط أسمع صوت
علوان يحجي على حسن يريدة يروح للمحل يشتري
التفتت مشـيت بالشارع اتلفت بخـوف و قـلق ندمانة لان طلعت هيج وقت اول مرة بحياتي اطلع من بيـتنة مـشاعري ماكدر اوصـفهة جـاي اخاطر بنفسي علمود شي مايسوة المن حاشرة روحي
اذا لزمني علوان انتهي محد يرحمني يگلولي شو شعدج ماشية بالليل بعد ماگد ارجع لان هو واگف
ببابهم منتظرة حسن يجيه گلت اروح وافتر ورة البيوت ارجع مناك لبيتنة
امشي اضوي گدامي اريد اشوف عليمن أدوس لحد ما صرت قريبة على الشارع من ورة البيوت طريت البستان و الگاع اعض أصابعي بندم ادك على خدي
سمعت صوت وراي سرعت خطوات دموعي تصب
عقلي ينهاني عن الراح اسوي التفت وصلت لحد النهر ضيگ يخلونة لسگي الزرع جروفة عبارة عن صبة اعبرة حتى افتر مناك ارجع لبيتنة احسن الي
نزلت بخطوات ترجف طفرت لجهة ثانية ظلمة بس
الضوة لبيدي يدليني بطريقي حسيت شخص وياي مو وحدي هنا گلبي رجف رجلية تطكطك من خوف
سمعت صوت خشن يدندن گال:صغـــير بعدك رايـــح ويـــن ، ليـــشوفوك الصيـــادين
شلــون تأمن ، وانتـــة تجنن , والدنيــا تخوف ماتطمن
شهگت جامدة بمكاني رفعت ايدي بخوف احضن ملابسي علية ضامة اللايت داخل عباتي رگبي وحدة طك بالثانية من الرعب عبالي اتخيل لزمتني الرجفة
رجع گال:صغيــر بعــدك وانــتَ المثلك
ألة بحراس يطلعوه
صوتة يدخل گلبي گبل أذني رجلية بادن طاح الايت من ايدي جمدت بمكاني خايفة التفت واطلع اتخيل
عقلي ما مستوعب أعرفة صوت دلهم و دندنتة
التفت أبجي أشوفة گدامي واگف ماكدر اتحرك خطوة نزل الجنطة من أيدة اجاني بلهفة حضني من خصري رافعني شايلني من الگاع شيل
أحس بأديه تحضني من الصدمة أجذب أذني و كل حواسي شلون طلع شلون وصل هنا و اجة ليش أني ما ادري من يمتة
حضني صوتي ترس الجو أبجي أتلمس أديه الي لازماتني حاضني لصدرة ماكو صوت غير صوت شهگاتي صوتة هو يتحسر و يشم بية ضامني لگلبة
حجة دافن وجهة برگبتي:غناوي غناتي
لزمت زندة اريدة بس يوخر و أشوف وجهة ابتعد حضن وجهي بين اديه يمسح عيوني من الدم الدموع رفعت ادية يرجفن مخليتهن على خدة اتلمس وجهة مامصدگة هو گدامي واگف حاضني
حجيت برجفة:د..دلهم يروحي حبيبي شلـ.. شلون دلهم
رد يبوس راسي: حبيبتي نظر عيني
احجي و أبجي ساعة المس وجهة ساعة أديه رجع حضني شبگتة محاوطة رگبتة بثنين أدية اشم عطرة
گلبي يرجف رجلية گوة شايلاتني نسيت كلشي
حسيت بأيدة ترفع عباتي علة راسي حضنت وجهة
ابوس خدة و عيونة كل هاي المشاعر و اللهفة اني بعدني مامستوعبة شلون طلع ليش ما ادري بيه
حضـن جتفي بعـدني متعلگة بـرگبتة دنـگ شال الجنطة رجع ضمني بين أديه مخلـية وجهي برگبتة
اتعثر بخطـواتي ما أباوع للـگاع بس عيوني عليه
طلعـنة للشـارع اشـوف سـيارتين طابـگات ببـابنة وصفـوان و ولد خالتة واكـفين ولا اهتـميت بـگد ما مهتمة بـدلهم گبالي كل مـا نمشي خـطوة يحضني اقوة يبوس راسـي يضل مـخلي شفتة فوك گصتي
حجة صفوان يضحك:ها لگيت البزونة
ضميت وجهي بفشلة حجة يغطي وجهي: عود مسويلهة مفاجئة نوب هي فجعتنة
عضيت شفتي امسح دموعي ضامة روحي بين اديه
دخلني للمطبخ نصدمت بـخالتي گاعدة و رفا كل معـرفنة صـرت هلگدوتني مصـدومة منهم
كلهة فرحانة و خالتي تطش جكليت صفوان برة يدك
هـورنات و أبـوعلي يحجي عـليه دنـيا الليـل و الـناس نايمة التفتت لرفا الواگفة تضحك حضنتها لا اراديا
حجت تبوس خدي: مبروك الله يديم الفرحة عليكم
غنوة:شلون ماتگليلي صدك تحجيين
رفا: والله هو ما رضى نگول نريد نفاجئج نوب اجينة ندور عليج ماكو
غنوة:شگد صار الكم
رفا:ماكو اقل من نص ساعة تونة نزلنة خطية الزلمة
دخل يدورج و مالگاج
مسحت دموعي دخلت للحمام أغسل رجلية كلهن طين من الزرع خليت الماي يجري رجعت برة واگفة بباب الحوش مامصدگة اشوف دلهم واكف برة
أعصر بأدية اريد اروحلة هو واگف يمهم كل شوية يلفت الي يرجع يباوع الهم ما ضلو شوية اخذولهم ساعة هيج و مشو حتى خالتي مشت
طلعت وراهم أسلم بس بدون تركيز گلبي يدگ حيل
روحي تلوب اريدة بس يرجع يمي واگفة بالباب صعدو بسياراتهم بس صفوان واگف يمة كل شوية
متحاضين واحد يطگ على جتف الثاني حجت رفا من الجامة:اليوم شلون نضل للصبح
ضحكت امسح بدموعي وصفوان يخوزر بيهة حجت تنزل:خل ارجع يم صاحبتي جا ضلت لوحدهة
رجعها صفوان بعد اذا نزلت ما يكدر يطلعها الة سحل رجع تحـاضنو هو و دلـهم سلم عليهة اسمعة يتشـكر مـنة ماكو دقايق صارت الشتايم بفلس
مشو كلهم اجة بعدة بالباب شمرت روحي بحضنة
حضن خصري مطوقني بأديه و ادية على رگبتة وجهي دافنتة بنحرة ماريد اخلي اي مسافة بينة
سد الباب برجلة ضلينة بالحوش متحاضنين حجيت العبرة خانگتني:شلوون ماتگلي شلوون اني منتظرة احسبهن ساعة ساعة گلبي تعلعل من ورة الانتظار ماصدگ يجي يوم و أشوفك
رد يحضن وجهي يخليني قريبة عليه: وداعتج فجأة طلعونة ما لگيت غير صفوان گبالي درب طويل اني اروحلج يروحي ماتعبج فوك التعب و تجيني
غنوة:ميخالف لو گايلي كلهة تدري الة أني دلهم ليش هيج
دلهم:عيون دلهم و روحة شني حياتة بدونج بيهة
و علي ماتسوة فلس
غنوة:يمة گلبي راح يوگف گوة لازمتك
حضني يشيلني من الگاع دخلنة للبيت شماني حيل يبوس خدي وخر بسرعة فايت للغرفة يسمع صوت
غمزة تبجي گعد على ركبة گدامهة هي بمكانهة
حجة يشيلهة من الگاع:يابعد روحي حبيبتي بابا بعد بيتي و نظر عيني فدوة لصوتج
حاضنهة لصدرة يشمهة ويحجي:كبرتي واني مو يمج فدوة لهذة الطول فدوة لهذة الصوت
يحجي و يبوس بيهة ساعة يدنگ لرجليهة ساعة لأديهة البت مصدومة ساكتة گعدت بصفة امسح على جتفة وخرهة من شافهة مستغربة حتى البجي
گطعتة حضنتهة هو مايگدر يوخر أيدة عنها لازمها
خلة أيـدة الثانية على جتـفي ضمـانة سوة لصدرة
حجة يشمنة ثنينة:شگد حسبت أيام و ليالي هاي الحضنة ما تفارگ بالي
ماگـدر احجي كلـشي ضـاع من راسـي كـل الكـلام
و العتب ماضل شي أبالي غير الدموع حضن وجهي مرة يبوسني مرة يبوس غمزة گاعد بالغرفة حاضنة
حتى ماحسيت بالوقت ولا مليت هاي الگعدة منا لمن غمزة زهگت منة گامت تبجي تريد توخر عن حضني نزلتهة مشت للموبايل تلعب بيه وحدها
قربني الة حاضني بثنين أديه گام طلعنة للهول يم باب الحمام يگلي اريد ارتاح و أسبح مايعوفني وخرت اضحك و ابجي بنفس الوقت من الفرحة
غنوة:اشتاقيتك شلون ماتخليني اشوفك هناك
دلهم:الزمج بعد ماعوف حضنج تخزة
غنوة:شوف شيحجي شوف ياربي
حضني يضحك يحرك بية يمنى و يسرى ادية على ظهرة وخرني يبوس بوجهي اني كل شوية ابوسة گوة
ابتعد دخل للحمام مشيت مستعجلة اطلع هدوم
همزين مهتمة بيهن و أعطرهن مابيهن ريحة ضم
طلعتهن اخذتهن الة واگفة بالباب اهز برجلي بقلة صبر ارفع ايدي وأنزلهة طگت روحي
دگيتة احجي بعجلة:يالله افتح دلهم افتح الباب جبتلك هدوم
فتحة يضحك الماي ينزل من راسة سحبني دخلني وياه حاضني التفتت علگت الهدوم رجعت الة
خلة أيدة ورة راسي اصابعة بشعري دنگ رفعت روحي لطولة حضنت وجهة قرب يبوسني بلهفة أبادلة بنفس اللهفة و الشوق حاضنة رگبتة مغمضة عيوني گلبي يدك حيل اسمع صوتة بكل جسمي
الماي يصب فوك راسي رغم برودة الجو بس وجهي
حار و انفاسي گوة أسحبهة ايدة كل شوية يمررهة
على خصري لو يحضن ظهري حتى اقرب ما أبتعد
وخر يجر نفس يلهث ملت وجهي بوستة بخدة حجة يقربني الة :لا توخري اريدج يمي طاگ گلبي روحي محترگة بفراگج
غنوة:بـ..بس اشوف اشوف غمزة ضلت وحدها هية اجي بـ..
سحب وجهي عليه بوسني يحرك شفتة على كل وجهي يرحع يبوس شفتي دموعي صارت تنزل وية
الماي احس بحرارتها على خدي مسح عيوني بصابعة ضحكت گلبي طاير من الفرحة محتارة
شلون أعبر التفتت للباب غمزة طلعت من الغرفة لازمة الحايط عفتة رحتلهة اصب ماي من راسي
لرجلية شلتهة اوخرهة عن باب الحمام طلعت هدوم
بدلت رجعتلهة احجي وياهة:بابا أجة غمزة بابا هنا شفتي گولي أبا گولي
خلت السيارة بحلگهة مامهتمة دايرة وجهة تلعب ضحكت اتمنى شوية تعرف حتى يفرح بسوالفهة هي عدهة بس علي تروحلة تركض تعرف صوتة
وگفت يم الباب أسمعة :دلهم متعشي
رد بضحكة: والله اشتاقيت لعاي الحجاية
ابتسمت العب بالسرگي لحد ما طلع الفانيلة علة راسة ينشف بيهة حضني يبوس راسي و يبوس غمزة
غنوة:محتارة شسوي گلي والله مادري گلبي راح يطلع من الفرحة
دلهم:يابعد روحي كافي شوفتج تضحكين كلشي لاتسوين
غنوة: والله مامصدگة احس روحي بحلم
رد يتلمس شفتي:لا بعلم مو عضيتج ماصحيتي
غنوة:حتى لو حلم ماريد اصحى اضل هنا
دخلنة للغرفة شال غمزة خلاهة على الجرباية مدنگ
عليهة طابگ رجليهة سوة يبوس بجف رجلهة يشمة
يرجع يبوس بطنها شلون اول ما راح نفس الشي
مسحت دموعي بوستة بجتفة گمت رايحة للمطبخ
سويتلة عشة من الفرحة اريد بس احس بوجودة
واحس أني اسوي شي الة هو موجود ويانة هسة
شگد فاگدتة شهور ماسامعة صوتة بالبيت هسة من أسمعة يحجي وية غمزة گلبي يدك حيل وبطني تمغصني كملت العشة اخذتة للغرفة ابتسم نزل
من الجرباية بيدة غمزة تحوس تريد تنزل خلاهة على رجلة شمرت روحهة علية عفتها بس لازمة ايدهة قرب الصينية عليه بيد سوة لفة مداهة الي
اخذتهة ابجي مدنگة دموعي تطيح بحضني
حجة يرفع راسي:ولج سد الموصل اذا خليناه على جفنج مايمنع الفياضات كافي دموع حبيبتي
غنوة:جا شسوي ماعرف بس ابجي
دلهم: اضحكي اروح فدوة لضحكتج
غنوة:راح اموت گلبي صار يوجعني
دلهم:اخ منج اخ
قربت علـيهة جذب اذا اكـلنة كل لگمة وياهة طن دمـوع و حضـنات شلت الـمواعين شمـرتهن على السنـك و رجعت اركـض للـغرفة جان متـمدد على ظهرة فوك صدرة غـمزة يابة شگد متغير و ضعفان شعـرة ماكو كلـة مزينة و وجـهة مـسمور حـيل
التفت الي رحت يمة نمت حاضنة خصرة و غمزة تغفي فوك صدرة تبجي تريدني خلاهة بينة خجلت
بعد هاي الشهور گوة كدرت ارضعهة بوسني براسي
ايدة فوك جتفي و أيد على شعري يمسح عليه
عيني بعينة كل شوية تغوش من الدموع يمسحها
حجة بصوت هامس:أحبـج
غنوة:أموت عليك ماتنحسب الايام العشتهة بدونك
دلهم:ليل ونهار بالي يمج ماغمضت عيني اذا ما جنتي أبالي حتى حلم تحلمت بيج
غنوة:لاتحرمنة منك بعد والله شبعت ضيم وراك
اخذ ايدي يبوسهة :ما أعوفج الة مسدون
غنوة:كل مرة تگولهة
دلهم:وداعتج فد ندمان على كل يوم جنت بي مو أدمي و ضيعتجن مني
ضحكت انزل راسي لغمزة نامت خليتهة فوك على فراشهة رجعت يمة راسي على أيدة و حاضن خدي
رفع الغطة فوك راسي صرنة جواه خلة شفتة على شفتي يبوسني بهدوء بس يلمسني جف ايدة يمررة على ظهري تقربت منة مايفصلنة شي
حضني بين أيده يشم رگبتي حجة بهمس يم أذني:يابة شگد مشتاق انام على ايدج اخلي راسي بحضنج كل يوم اتعب بي اتمناهة هاي اللحظات تنسيني النعب
غنوة:واني مشتاقة لصوتك و گعدتك يمنة كل يوم يمر وانتة ماموجود اختنگ روحي تحترگ
دلهم:أسم الله على روحج ما ترجع راحت هاي الايام هسة لو الدنيا تنگلب ما يوخروني منج
تنهدت اخلي وجهي برگبتة اشمة حضني حجيت اخلي أدية على زندة:ولا مصدگة انتة يمي
دلهم:على بالي سوالف يابو سوالف
غنوة: والله مامصدگة باوعلي خل اشوفك
رفعت وجهي ايدي على خدة تقرب يبوس بين عيوني حجة :هذة اني گبالج كافي ترجفين يروحي
غنوة: والله مصدومة احس بروحي مو بعقلي
دلهم :على هاي السالفة هينة انتي دومج مو بعقلج
غنوة:بالله بعد احجي علية خل اصدگ
ضحك يمرغ وجهة يرگبتي ولا كدرت اغفى هو مبين
منعس و تعبان وخرت عن أيدة تقربت خلة راسة فوك أيدي حاضن خصري بسرعة غفى ذاب روحة
ايدي بشرة احرك أصابعي بهدوء ماكدر اوصف مشاعري جسمي بعدة لهسة يرجف و گلبي اسمع صوت دگاتة و احسهن يمشن بدمي رجلية بايدة
كلشي رجع لعقلي من لحظة لشفتة لحد هاي اللحظة كل شوية اقنع بروحي من حلم هذا واقع
احس بدفو انفاسة على أيدي حاشگ روحة بحضني
قربت خليت شفتي على عيونة أبوسهن بهدوء خاف
افززة بوستة خدة غمضت عيوني و النوم ما مر علية
باليلتهة هاي اللحظة لتصير خارج كل المتوقعينة
نضل مشدوهين بين المصدگين و بين الحايرين
تليين المسافات ونلتقي بعدَ كُل هذا البُعد.
