رواية نقش بارد الفصل الثلاثون بقلم فدك فاطمه
مِن ثگل بِية إنتِظارك
سَافرتلك وأنحنِيت
سَافرت لأخر مَحطة
بيهَا مَصلُوب الوَداع
.
.
رفــا
أفتر بالحديقة اعصر بأدية بقلق من الساعة بالوحدة
خابرو صفوان على دلهم بالمستشفى لهسة مارجع
من جهة غنوة تراسلني ماريد ارد و اگللهة وحدهة خاف يصير بيهة شي حتى ماعرف شلونة هسة شگول شحجي
اتصل على صفوان مغلق جهازة دخلت للبيت ورة ما أذن توضيت و صليت دعيتلة من كل گلبي لخاطر غنوة هاي اذا تسمع تتخبل
غفيت و فزيت الصبح على اتصالهة قبل لا ارد فصلتة ما رجعت اتصلت اتأكد من صفوان اذا شي خطر اگللهة نشوفة هو اذا يريدها نگللهة
گمت غسلت سويت جاي جهازي بيدي اشوف رسايل وتين الغبية مخابرتهة همزين ما زال لسانهة
هي وحدهة نوب تتخربط منو الهة هناك
اتصلت عليهة ارزلهة حجت بضوجة:عبالي تدري خفت عليهة اتصلت
رفا:لا غير تنجلط منو يجيبهة بتهة شلون بيهة عد منو تضل خليهة خطية خل اتأكد شنو وضعة
وتين:اخوي هم راح ننتصل مايرد وترني
رفا: هسة خفت بالزايد
درت وجهي للباب من نفتح حجيت اريد اسدة: اجة صفوان خل اسمع منة و اردلج خبر
وتين:اي عفية امي صعد ضغطها من اخوي
سديتة طلعت للحوش الاگيه حجيت خايفة: وينك اتصل ماكو شصاير
رد بضوجة:طاگينة بسجين وضعة زين بس يحتاج وقت يتشافة
رفا:الله يعافيه شنو متعاركين هناك
صفوان:نعمان الكلب ابن الكلب يريد يموتة
رفا:اشتكو عليه
صفوان:التهديد مسجلينة عد المحامي بقى بس نلزم الحرگ البيت حتى يصير اغتيالين بنفس الفترة ما يكدر ينكرهن
رفا:ان شاء الله تلزمونة ، غنوة تتصل علية اگللهة
صفوان:لا مابي شي لاتخوفينهم
تنهدت بضوجة هو طاگة روحة يشتم بنعمان اخذلة ساعة ارتاح و تريك طلع رايح للمحامي يردون يستغلون طعنة دلهم حتى يشددون عليهم بلكي ينسجون تطلع الادلة وحدة وحدة عليهم
فتحت جهازي اتصلت عليهة ردت بنتر:وينجج شبيج اتصل و اراسل ماتردين
رفا:جنت نايمة مادري توني گعدت
غنوة:صاير شي وتين اتصلت خوفتني
رفا:اي ضحكت عليهة گتلهة غنوة بايتة يمي مادري بيهة متصلة بيج اسفة خوفناج
غنوة:رفا الله عليج دلهم بي شي
رفا:كلشي مابي لاتضلين توهوسين راح تتخبلين من التفكير ترة جنت اضحك على وتين اتصلت بيج
غنوة:اني گلبي مامرتاح
بعدت الموبايل كاسرة خاطري رجعت اضيع الموضوع:حقة مايرتاح من كد ما تفكرين تعوذي من الشيطان ادعي الله يحفظة و يريح گلبج
غنوة:يومية ادعي حبابة رفا اذا سمعتو اي خبر لو صفوان راح للمقابلة طمنوني عنة
رفا:ان شاء الله اي شي اسمعة اگلج ديري بالج على روحج هدي شوية
غنوة: ماعندي شي بس خفت البارحة متضايقة
رفا:حارة و بوخة وداعتج تضيگ الخلگ
غنوة: اي الكهرباء مو زينة
رفا:كلش زفت رايحة اسوي ريوك من رخصتج
سديتة منها تنهدت متوترة احسن شي ماتسمع نبهت على وتين محد يجيب سيرة يمها خطية خل شوية ترتاح دومها مفجوعة بشغلة
غيرت ملابسي خابرت صفوان غلس عود يوصلني
گتلة صديقتي تمر علية طلعت يم الباب رجعت اركض ناسية العباة ما لابستهة
ذاك اليوم صعدت بالسيارة هو يباوعلي صافن يالله
انتبهت لو انساهة ما اغسلهة ولا تعودت عليهة طلعت اعدل بروحي يم المراية
على ما وصلت صعدت صبحت عليهة التفت تضحك علية يگول مهرج ياهو لشافني ضحك باوعتلهة معبسة ماحجيت يمهة اخوها زحمة
وصلنة نزلت اگرص بيهة بالخفية حجت تبعد ايدي:شبيج عيب وصلنة
رفا:شبيج تضحكين
ردت بضحكة:مو بيج شي بس شكلج حلو بالعباة طالعة كتكوتة
عيبت عليهة ادخل گدامهة نزعت العباة اول ما دخلت الإدارة خليتهة بالجنطة كعدت رحلة جديدة من الملل ذاك اليوم اخذت درسين من الجدول
بعدين ضلو يطالبون بدرسي راح تنتهي السنة مامخلصين المناهج خصوصاً السادس بلشو يگعدون كل موادهم على النص مامكملين اضطريت
اكعد و اسكت بالادارة و درسي راح تفرهد
مرت الايام بدت امتحانات نهاية السنة بين فترة والثانية اروح لغنوة مرتين اجت هنا علمود المقابلة
يشلعون الگلب يالله يخلونهم يشوفونة
تروح بس هي تخلي بنتها يم وتين خطية ترجع منتهية من القهر عدهة عقدة مال بجي دمعتها بطرف عينها اذا بجت بعد ما تسكت تجيهة نوبة شقيقة تطيح بالمكان تكسر الخاطر
جنت راجعة من بيت أهلي صفوان اشوف هلال العيد ما اشوفة لو يشتغل لو وية المحامي يريد بس يسجن نعمان و صلاح و يتشفى بيهم
دخلت لبيتنة بعد شارع عن اهلي شكد ردت نگعد بالمشتمل كتل روحة أجر بعيد عنهم يخاف صفاء يلزملة الباب مسوي عدة فوبيا
كملت شغلي بالبيت سويت غدة خابرتة سويتهة إجباري لو تجي لو تزعل ورة الصلاة يالله شرف فتحتلة الباب دخل مبتسم
رفا:همزين شفنة وجهك
صفوان:افا عليج هيج مقصر
رفا:ومهمل هم
بوسني بخدي يبرر شعدة من مشاكل حضنت ايدة دخلت وياه للبيت راح مدد بالصالة على ما حميت الغدة و جبتة خليتة يمة
حجيت ارتكي على رجلة:شصار وياك
رد يقرب الصينية عليه:لزمنة الولد بس فلت
رفا:وانتة من البارحة لهسة تركض وراه و شرد
باوعلي بطرف عينة هزيت ايدي اخذ الخاشوگة توني خليت اللگمة بحلگي اكل هو عينة علية مغثوث من حجايتي
صفوان:كون تغصين
من الصدمة كحيت غاصة طگاني على ظهري يضحك
دفعت ايدة بضوجة تقرب يريد يراضيني گمت شايلة الماي اريد الكحة تروح لزمتني
صفوان:راح تموتين تعاي اشوفج
رفا:انتة لدعيت
صفوان: وداعتج اشاقة
رحت غسلت عينة علية تحول الشقة لخوف رجعت گتلة كلشي مابية كعدت اكمل غداي عيني على لگمتة بلكي يغص حتى اگلة شورت بيك
صفوان: لاتخافين الج ما اطير
رفا:غير يستقر القيصر كاظم ياهو لياخذك
صفوان:اني ياهو لياخذني صايرة مكاتل علية
رفا: ثنين بالشارع مايعرفونك
صفوان:ربج كدامي نعمة الله جان عرفت ارد عليج
رفا: دكمل خل اشيل النعمة و راويني ردك
صفوان:اكلي اكلي
دنگت مبتسمة كملت غدة عفت الماعون على النص اخذة كملة و اكل ماعونة و خلص كرصتين خبز و ضلت اخر شي بالمرگة گومني خليت فوكهة تمن رجعت نطيتهة الة
رفا:راح تضل تاكل لليل
صفوان:لحد ما الگة رد على حجايتج
رفا:لعد ابقى اكل اني راح اغسل المواعين ليضل عدك انتة تغسلة
صفوان:اي مو اشتغل عد الخلفوج
رفا:يروح نصك شنو
سكت كمل أكل عافهن وگام هزيت ايدي يستنكف حضرة جنابة كلشي مايشتغل ذاك اليوم گتلة طلع الكبة من الثلاجة بس گليهة كتل روحة
كملت شغلي رجعت للغرفة حضرت ملابسي گعدت بصفة اجر بردانة حتى ينتبه التفت منتظرني احجي
رفا:فكرت بالگتلك عليه
صفوان:ذكريني
رفا:البس رداء بدل العباة ماتعودت
صفوان:اي حبيبتي تتعودين
رفا:ترررة انتة اخذتني سافرة حرام عليك
صفوان:بالله ماتسدين هاي السالفة اني من يمي جزت روحي منها
مديت ايدي اريد اخنگة شكد راسة يابس لزم باكيت الجكاير من العجز يشمرة على النقطة يريد الضوة يطفة گمت طفيتة رجعت لمكاني
العصر كعد بس يغسل وجهة و يطلع البيت يگرصة
دزتلي غنوة صور لبنتهة مالحگ افتح وحدة الة دازة عشرة غيرها بدون ما توگف
اخر شي كتبت "عادي اودي صورة لدلهم منهم اطبعهة و اوديهة "
رفا"مادري اسأل صفوان اذا يصير اسحبلج وحدة منا بطريقي"
ضلت تكتب و تمسح رسلت رسالة "مو اريد اكتب عليهة"
بس لمحتهة قريت مسحتهة رجعت كتبت"خوش سحبي اي وحدة وديهة وياه"
مردت گلبي بسوالفهة گلبت الصور ردت احفظ وحدة بطلت رسلتهة "اختاري أنتِ "
دزت صورة ضحكت على أفكارهة لازمة غمزة من بطنهة طالعة ايدهة من المعصم اگلب بالصور راحت ضحكتي تذكرت اني ضامة عليهة حالة
من سألت صفوان عنة گال زين و الجرح مو غميج طلع من المستشفى و رجع للسجن هي ماتدري
دلهم مايرضى تروح هواي الة لان يذلون الواحد يالله
يخلونة يشوف المسجون مايرديهة توصل
سديت موبايلي بضوجة انتظرت صفوان اجة وگفت متخوصرة فاجئني من دنگ حيل و بوس خصري خلاني انسى شنو اريد منة
حجة يوگف طول بطول وياي:مو نبي و اقاوم حسن خصرج أنصهر
بللت شفتي بلساني من الخجل رفعت ايدي اوخر شعري من وجهي ادير عيوني عنة ضامة الضحكة
صفوان:يضحك يحلة من يبجي يصير احلة
رفا:كافي يالله ما أنكد
حضن اديه ملتفات على خصري دخلني للاستقبال حجة يدنگ لوجهي:أخاف انجن واهد وتضحك عليه
ضميت وجهي من يلزم حبل الغزل بعد يقفل يطير كل الحجي من راسي خليت وجهي بصدرة اضمة عنة حضني يضحك
حجة يلم شعري بيدة :آخ يالون الشعر وية لون وجهج أحلى مشهد
رفع وجهي يبوس عيوني يحجي بصوت ناصي:عينـي يمكحل من الله بغير كحلة بغير مرود
لا تغطي عيونك بجف الخجل لا عيني تمرد
رفا: كافي حباب شكد حافظ
صفوان:أخاف عليك من الحسد و العين أيات عليك اقرة من الردية
مسحت وجهي مشاعري كلهة نجمعت ببطني احس
فراشات و اشياء ترفرف حضنت خدة ابوسة بالخد الثاني دنگ حتى اوصل لعينة بوستها
لزم ادية يفرني يرجعني الة ضحكت احضن رگبتة شالني بأيد و الثانية يتلمس خدي بيهة و شفتي
صفوان:طولج يرد الروح لو جيتي تمشين و خلافج الحلوات ماتترس العين
حجيت متنهدة: احس روحي فاهية ماعرف ارد
صفوان:بوسي يابة جا البوس المن سوه
رفا:لازم انتة تبادر انتة الرجال
صفوان:اشگگ روحي و امردها گدامج مو بس ابادر
ضحكت على سوالفة دخل للغرفة سد الباب قفلة
حضن خدي بجفة يرفع راسي يبوس رگبتي و يتحسر
يخليني اضيع الاول و التالي وياه انسى روحي
بين السوالف و الضحك سمعنة صوت الباب ندگ حجة يفز من مكانة :عزمت اهلج
عطت مصدومة:جذذاااب
صفوان: والله نسيتهم خرب اشتعلو
رفا:ماكو عشة على شنو عازمهم على حضي المصخم
صفوان:البسي هسة الستر بعدين البطن
طگيتة على جتفة متورطة لبس يعدل بشعرة طلعت اريد اموتة دخلت للحمام مستعجلة شكد فشلة لو گايلتلي أمي راسلتهة الظهر ما حجت
كملت لبست مشطت شعري من گدام خليت شال على راسي ندك الباب حجة بهمس:رفا استعجلي
طلعت ادفع بي اخوزر عدلت روحي على المراية رحت سلمت عليهم كعدت بصف امي متوترة تندس بية مدري شتريد تقربت منهة ما فاهمة
حجت بهمس:جيبي ضيافتج اخوانج گاعدين اضل دوم اعلم بيج
رفا:ها اي نسيت
طلعت اجيب ماي احك بشعري محتارة التفت عليه
مد راسة من الباب حجة: وصيت اكل مو تطبخين
رفا:راح يأذن المغرب جاي مالحگ اسوي
صفوان:ورة الاذان يوصل الاكل هدي اعصابج
رفا:وخر منا
عافني دخل للاستقبال اخذت الماي وراه بطالة كل واحد بطل صفاء اخذ ثنين شمر واحد على أحمد
حجة يعيب:هاك طلع اسمك بالوجبة
أحمد: ما استلذ بس بالگلاص
صفوان: حبيبي حمودي ركز هذة ماي
صفاء:اعذرة بعدة دايخ من يم الجسر و جبناه
صفوان:اگول شبي خدة أحمر
صفاء: من الخجل
أحمد سد البطل شمرة عليهم طك بالحايط فوك راس صفوان طاح وراه مد ايدة اخذة يغامز وية صفاء و يباوعون الة
رفا:شنو تحجون
صفوان:كلاص وين الكلاص جيبي
رفا:اشرب بالبطل ابرد
گعدت بصف امي اسولف وياهة لحد ما أذن يالله سكتو سوالفهم من جوة ليجوة تخليك تحس بشي غلط بس مدري شنو
صلينة ياهسة يجي العشة اهز برجلي متوترة عيني على الباب أيست رحت للثلاجة طلعت كيك و مقبلات سويت صينية اخليهة بلكي على عينهة يجي العشة و يرحمون بحالي أهل التوصيل
مر مني صفاء يباوع بالصينية اخذ من الطرشي راح للاستقبال حكيت گصتي بضوجة رحت واكفة بالباب
صفاء: عشة عشة
رديت متفشلة:بالطريـ.. قصدي بالفرن
أحمد:شو تأخر شنو الفرن مابي بانزين
صفوان:لمولة ضحكة
ضحكت گام احمد يريد يكتلة لو ما متعودة على شقاهم جان گلت تعاركو صدك بعدهم يتلاون وية صفوان دك موبايلة فتح خط صفاء
يدليه ببيتنة بالضبط راح طلع جاب العشة وراه صفوان دفع اجو يفتحون بالعلاليك صحت امي توهة كملت صلاة جبت صينيتي مال المقبلات ولا واحد مد ايدة عليهة
صفاء:ليش كلفتي روحج رفا ليش تعبتي
رفا:تعبك راحة صدك جذب
صفاء: امشييي لجج طالبتلي من المطعم
رفا:لو ما أعزك ما طلبتلك
صفوان:انتة تريد تحرج رفرف بعقلك بذمتك
صفاء:شو بالله اسكت
أحمد:شبع گام يتبطر معليج بي عاشت ايدج حبيبتي
رفا: حبيبي مو مثل ذولاك الناس
صفاء:أحمد منين تعلمت كلمة حبيبتي
صفوان:من ذولاك ليگولون حموداتي
أحمد:ترة احجي و افشلك
ضحكت و صفوان نگلب وجهة يخوزر بية خلصنة العشة بين الضحك و السوالف امي ماتشارك بس تدعي الله يحفظكم و الله يخليكم
صفاء:راح نطب الجنة يمة
خاتون:عاب لهل الحلگ حتى من ادعيلك ماترضى
صفاء:شاركي احجي
أحمد:الة يترزل يالله يرتاح
حجة صفوان يمثل الحسرة:هاي الام هاي وين تلگة مثلهة يدعيلك
أحمد:درينة بيك يتيم
صفوان:تضحك على جروحي
رد صفاء يأشر عليه:هاها عدة جروح هاها يتيم
طاحت اللگمة من حلگي عبالي صفوان يضوج اخزر
بصفاء مالحگ حتى يلتفت علية و حصلة رفسة شال بطل اللبن فرغة على راسة رزلتهم امي
عفتهم سطرون اصواتهم عالية گمت سويت الجاي
صاح صفوان علية:اخت أحمد حبيبتي تعاي
وكفت يم الباب ودالي بوسة ضميت ضحكتي مستحية رجعت للمطبخ احضر الكوابة على ما خلصو رجعت اشيل السفرة و الم الباقي من العشة
امي ماخذة ركن وية صفوان اعرف سوالفهة شنو گام صفاء ساعدني ارجع بي مايرضى نظفنة المطبخ
سوة هو صب الجاي
صفاء:خافنج زعلتي مني
رفا:لا يمعود عليمن أزعل
حضن جتفي يبوس راسي بوستة بخدة مبتسمة شال الصينية وداهة الهم بالاستقبال ضلو يمنة لحد العشيرة يتابعون العبة خلصت و مشو
وگفت بالباب اوصلهم حجة صفاء هو يطلع:نظفي ورة المخدات نكتو وراهن جكايرهم
ضحكت همة ينكرون ثنينهم ما يوصخون هيج كل ضني يتشاقة سديت الباب رجعت امدد بعضامي
رفا:صدك صفوان اگلك يصير تودي صورة لبنت دلهم هناك الة
حجة هو يدخل كدامي:عدة
رفا:صدك يصير عبالي مايصير يدخلونة ذاك اليوم رجعو الاكل بيدك
صفوان:صورة لا تضر لا تفيد يدخلونهة
هزيت راسي بفهم دنگت اشيل الطاولات خليتهن على جهة وخرت المخاد من الفضول لگيتة مخليلي فلوس طحن مشاعري طحن
ثاني يوم من رجعت دخلت للمكتبة سحبت الصورة
ما نطيتها الة انتظرت لحد الجمعة لزمت صفوان الح عليه يودينة الهم گورعت راسة
طلع لازم تراكة بيدة شارد لبسة يم الباب ما رجع لحد نص الليل اباوعلة من جوة البطانية يمشي على طروف رجليه خاف يگعدني
رفا:اجيــت
صفوان: استغفرالله
رديت اتماوع:صفصف
صفوان: اشتعلت روحي
رفا:ليشش
صفوان: ماروح يمعودة عيب كل اسبوع رايحين
رفا:نروح اني و امي ها شگلت
صفوان : الجمعة الجاية نروح
هزيت راسي موافقة رغم الجمعه الجاية بس هي عطلتي و السبت دوام مراقبة بالقاعات لازم يالله هي الدنيا شبيهة المهم يرضى صفوان
مر الاسبوع نفس الروتين اتأخر صفوان يصلبني هناك و اخاف ارجع وحدي لو بخط ورة الدكة الناقصة الصارت بية احسن ارجع وية واحد من اهلي
انتظرت صفوان على الغدة ما أجة و ضل برة البيت لورة العشة خابرتة هم ما رد تأففت ضايجة ولا مرة خابرتة و ما شلع گلبي مدري المن شايل موبايل
لحد العشرة بالليل افتر و جهازي بيدي طلعت للحوش من سمعت الباب نسد اجة بهتت اشوف وجهة كلة كدمات و يم عينة ازرگ رحت يمة خايفة
رفا:شبيك ويين جنت شصاير بوجهك
صفوان:ماكو شي تعاركت وية صاحبي
رفا:هيج ضاربك شسالفة شبي
صفوان:جا شيسوي يدغدغني
دخلت وراه على ما غسل و غير ملابسة صبيتلة العشة طول الكعدة هو ساكت حتى ما فتحت سالفة الروحة وياه ثاني يوم نام لحد صلاة الظهر گعدتة
حجة اول ماخلصنة:يالله حضري روحج
رفا:يمتة بعد نروح و نجي باجر دوام
صفوان:ماترحين بعد احسن
تأففت بضوجة عناد بي گمت بدلت لميت اغراضي طلعت وياه وگفتة اشتري كم شغلة الهن همزين ما يلح بالمشترة جان خنگتة خلاني على راحتي
طلعنة الطريق كلة عينة على موبايلة بس رن برسالة دار الستيرن وگف السيارة صرخت خايفة لان تحرك بسرعة لزمت الكشن متفاجئة
فتح الموبايل شغل البصمة وصلني صوت رجال يحجي گالة " تم صاروا جوة ايدي "
تنهد مرجع راسة ليورة حجيت مستغربة:شكو شبيك
التفت الي من فرحتة جر راسي عليه بوسني رجع حرك السيارة تغير مزاجة فوك جوة صار عدة حماس
رفا:شعدك منو هذة همزين ما دعمتنة علمودة
صفوان:لزمتتة الگ**" الحرگ البيت اعترف و ثاني هم اعترف هسة ضل بس دليل على مشاركتهم بقتل حاتم و نفتك أن شاء الله
رفا:أمين الله يسهل عليكم ليش ما ترفعون بس ذني و تسجنونهم هو مو شروع بالقتل
صفوان:يگدرون يطلعون منها مانستفاد شي
رفا:خاف يأذي دلهم لو عائلتة
صفوان:مأمنين دلهم ضلو بس اهلة ما تقنعينهة تروح لبيت خالتهم
رفا:احجي وياهة اشوف بلكي توافق
صفوان:احسن الهة
رفا:مو هناك اهلهة اخر مرة من نسجن و گعدت يمنة اخوها خبث اجة اخذهة
صفوان:هو اخوه حجاية تودي و حجاية تجيبة
رفا:فد داغيني اريد اكتلهم
صفوان:رفرف عرامة گعدي راحة
رفا: حرام كلشي ما مسوية ضالة بس اتگلب
صفوان: اذا عالو بيج حقج بس مو تعيلين و تبلينة بفصل
رفا:لازم تگول الفلوس ترخصلج
صفوان: أنتِ أغلى و الباقي دونج ،وأنتِ أحلى منهم
و أعذب
ضحكت من الخجل اعدل بشالي گرص خدي وگف السيارة على الشارع نزل اتسوك فواكه و مخضر
ارتكيت على الكشن اباوعلة جهازي بيدي اصور
رجع الطريق كلة يقرالي شعر عراقي و خليجي يگلبة
يسوي عراقي واني شارة الحلگ ماكدر اسد حلگي
بس اتوبسم و اضحك
وصلنة نزلني و راح حتى ناخذ راحتنة هم عيب هي وحدها مايدخل ولا يوگف بالباب دگيتة اشيل بالعلاليگ كومهن كلهن يمي
فتحت الباب ابتسمت بوجهة اشوف دنفوشة مستقبلتني بالنفوف الاحمر دخلت الي بيدي سلمت عليهة اخذتهة من ايدهة حاضنتهة
رفا:ياناس احبها احبهااا
غنوة: بالجذب بوسيني حضنيني
رفا:حضنتج بيهة عطر طيب هيج
غنوة:خفة شكلج
ضحكت ارجع ابوسها دخلت خليت غمزة بالگاع رجعت ساعدتهة عزلت المسواك وياهة افتح بالعلاليگ طلعت الفستان الي اشتريتة رحت اجربة
على دنفوشتي اكيد يطلع حلو
غنوة:ليش كلفتي روحج والله عدهة هواي
رفا:فرحة الاطفال تسوة الدنيا
غنوة:مشكورة اليوم الج و نشتري لبنتج
رفا:ابنن لو تردين تغلسين
ضحكت فايتة للمطبخ شوية اجت بيدهة ماعون فواكه كعدت گبالي وجهة أصفر و عيونها جواهن هالات من التعب و البجي
رفا:ماتاكلين شبيج ضعفانة
غنوة:لا أكل بس مو بوقتة و نومي متخربط تعبانة من السهر وياهة
رفا:معذبتج الفصمة الوكحة
غنوة:ولا تنام بعيونها ملح وين اكو طفل لحد الثنتين يلعب بس اغفى تبجي
ضحكت رفعهة من الگاع ابوسهة مبينة الوكاحة عليهة صوتها من تناغي و تحجي شعلوة بوستها الله يحفظها الهم يستاهلون بنية حليوة هيج
رفا:سحبت صورة بس جبتهة حتى اذا تردين تخلين شي وياهة
ردت مرتبكة:ها وينها اشوفهة
رفا:هاي بالجنطة طلعيهة
فتحت الجنطة اخذت الصورة گامت جابت قلم ضلت تحوس شنو تكتب تدور بالموبايل تطلع كلمات و أشعار
غنوة:هاج اكتبي هذة
رفا:اني شعلية
غنوة: شبيج ماعرف اكتب بالقلم خطي مو حلو بس بالموبايل اعرف هنا من اكتب انسى الحروف
رفا:ميخالف اكتبي بيدج احسن حتى لو حرف حرف
غنوة:مو حلو والله
رفا: عادي المهم من گلبج هو يفهم
لزمت الصورة گامت تريد تقط القلم الرصاص الصورة زيتية ينمسح منها قصص وروايات عراقية كرار صلاح انتظرنة بنت اخوها اجت وديناهة للمحل جابت قلم جاف التهيت وية غمزة خليتهة على راحتها حتى ماتسمعني مركزة بالكتابة
رادت نضل للعشة تعذرت منها عدي دوام اخذت الصورة خليتهة بظرف و هم ملابس لدلهم محضرتهن سلمت عليهة و طلعت اشوف صفوان واكف يم اخوها برة يسولفون
صعدنة راجعين للبيت خليت الصورة بيدة حجيت بجدية:لو بيهة اعدام لازم توصلهة الة
صفوان: والله دراميات انتن مو گتلج عدة صورة
رفا: احنة دراميات اذكرك لو ناسي خمسين صورة لگيت بجهازك الي تخيل العدد شكدة
حك گصتة دار وجهة للشارع سوة روحة ما سمع ندستة بجتفة احجي:هاا شو سكتت
صفوان:صور ضالة من ايام خطوبتنة
رفا:صدك جنت تلزم صوري و تأملني
صفوان:لا اتفل عليج
راحت ضحكتي درت وجهي زعلانة يجر بيدي يريد ارضى قفلت طبگ يم المطعم يعشيني مارضيت
ضليت مطنگرة عليه اريد يحسن اسلوبة
.
.
غنــوة
غمضت عيوني يحرگني طفيت الموبايل من كد ما أگلب بالصور حفظتهن حفظ نمت على جهة صفحتي عيني ماتاخذ نوم و وحدي محد يمي خايفة
كل ما اسمع طگة برة لو صوت انخلس تقربت من غمزة من لاجارة احضنهة حتى اطمن واحد يمي نزيت من صوت الموبايل فتحتة
جانت غفران تتصل طلعت على طروف اصابعي خاف تفز على صوتي رديت عليهة بهمس واكفة بالهول، أبن سالم برة جايني و الباب مقفول
ارتاحيت من گالت اجة رحت فتحت البردة تأكد هو برة يالله فتحت الباب دخل يحك شعرة بأحراج
حجيت احضن جتفة:ماسمعت الباب صار لك هواي برة
علي:اي اجيت مرتين هناك الغرفة هوسة ماكدرت أنام گلت اجي يمج
غنوة:هلة بيك او تجيب هدومك و تكعد يمي احسلك
علي:لا زحمة
رديت اخربط شعرة:منين زحمة جنت تنام بحضني
باوعلي وجهة احمر من الفشلة ضحكت طلعتلة فراش الضوة طافي على كيف ضل كاعد بالاستقبال علي اكبر واحد بأخوانة
صار عمرة تسع سنوات اخذتة خالتة تربيه بعدين توفت رجع ما يندمج وية خوانة هواي خجول من كلشي يستحي
تطمنت بجيتة كدرت أنام گبل لا تفز و تسهرني صدك ثاني يوم نقل اغراضة علي و كعد يمي احسن
احتاج شي من المحل اوديه ولا اضل وحدي
مر اسبوع معزولة ببيتي عدي مسواك و الخبز اروح يم اهلي اخبز اشاركهم بالغاز و ساكتين عني خلص الشهر وراهة بأيام اجت خالتي
بس شافتني ما باتت من اجة ابنها اخذوني بالسيارة
جبت الراتب رجعت بسرعة اول ما دخلت صارت بوجهي غفران كاعدة بالحوش
غفران: وين جنتي بيتج مقفول
غنوة: اخذت غمزة للعيادة
سكتت حتى ما سألت شبيهة فتحت الباب نزلت غمزة بالگاع سحبت السجادة طلعتها برة فرشتها حتى تگعد عليهة البيت خنگة
غنوة:شعدج جاية
ردت متنهدة:شاردة من البيت ولج هاي صفيـ..
حجيت اقاطعهة:لا تسولفيلي مشاكلج لا اريد اسمعها ولا اعرف عنها البية مكيفيني
غفران:شجاج الواحد يبطل مايسولف
غنوة:انتي و صفية صحبة هسة جايتني تاخذين غيبة يمي و تحجين باجر عگبة تتصافن تگلبن علية
غفران:ولجج شريجتي ياصحبة هاي اتزوجت علوان كلهة تدري حتى بيت جدج اني اخر من يعلم
غنوة:شعلية بيكم ناركم تاكل حطبكم روحي لأخواتج تشكي
گامت تدردم زعلانة لفت عباتها مشت سديت الباب
وراهة تنهدت بضوجة رحت ضميت الفلوس الجني الازرگ مايندلهن اذا نباگن ينلعب بحالنة
جنت منتظرة عيد الاضحى بس حتى اروح لدلهم رغم الروحة تشلع الگلب بس عادي كلشي اتحمل
گبل العيد بيوم اتصلت برفا حاجيتهة
من گتلهة اريد اجي حتى اشوف دلهم لان يصادف أيام المقابلة ثاني يوم العيد ، صفوان گال لا اجي
ازدحام و هوسة كلشي ما استفاد ورة العيد احسن
سكتت ما لحيت هو اعرف المهم اشوف دلهم رغم هنة دقايق بس شسوي ماكدر ما اشوفة اختنگ اذا اضل انتظر خمس سنوات على هاي الحال
بيوم العيد گعدت من وقت البارحة نظفت البيت انتظرت غمزة تگعد لبستهة كشختهة راح تجي وتين و خالتي هنة بس ليمرن علينة
علي جان يمي نطيتهة الة اخذهة بالشارع يفتر بيهة
بلشت اسوي الغدة على ما وصلو دخلت وتين اول وحدة شايلة غمزة ملاگيتهة بالشارع
حضنتها اعايدهة محد ميت علية كلهم يجون علمود
بنتي من الباب و اطوف ، رحت سلمت على خالتي عايدتهة أفرح من تجي على الأقل احس عدنة اقارب
عدلت شالي متفاجئة بجية ابوهم سلمت عليه فتحت الاستقبال دخلو و وياهم سمر جنتهم رحت جبت الماي مبتسمة على حبهم لـ لعمزة كل شوية واحد شايلهة
طلعت للمطبخ لحگتني وتين توهة تريد تصور ندك الباب نفتح بنفس اللحظة دخلت رفا تهف بعباتهة
ضحكت لان وتين تريد تحنصهة
حجت اول ما شافتهة:جبح لهل الزول حتى هنا لاحگتني
وتين:ماكو حدائق مطاعم ترحولهن نفتك منكم
رفا:على گلبج كاعدة و مددة
حضنتني عايدتها و سلمت على وتين طلعت تصيح صفوان گبل لا يروح جان منتظر نطلعلة غمزة يشوفهة دخل من عرف يمنة رجل خالتي
لزمتهن الله جلبهن يساعدني حضرنة الغدة لان اجو كلش گبل الصلاة على ما صلو مدينة السفرة البيت هوسة ضحك و سوالف
شگد تمنيت دلهم هنا صارت غصة بگلبي مكانة ناقص بالبيت و بكلشي بكل لحظة اكو نقص لان ماموجود و يشاركنة الگعدة و الونسة
جنت فرحانة من تذكرتة تغير كل مزاجي گوة صرت أبتسم من البارحة ما غاب عني ضليت ابجي گوة نمت هسة هم عيوني صارن يحرگني
لهيت روحي بالسوالف و الگعدة للثنتين ساعدني بغسل المواعين و تنظيف ودة صفوان على رفا حتى يرحون مشيت للغرفة جبتلهة عيدية
اجت وراي مادة راسهة حجت تضحك:علية الطلاگ اذا حمرة ما اخذهة
غنوة:اخر حمرة شفتهة المعجونة بالثلاجة
اجت يمي تگلب بالفلوس طگيت ايدهة دفعتهة:عيدية اني انطي مو تاخذينهة لوحدج
رفا:هاي الزرگة مشگوگة
حجيت اطلع الخمسة:هاج اياهة
وتين:شسون
رفا:معليج امشي
وتين: الله عدكم فلوس ياعالم يا أغنياء
غنوة: صلي على النبي
سحبت ايد رفا تباوع بيهة :بالله يالونةعدج كش خمسة
رفا:ومشگوگة
وتين:اني هم اريد خمسة مشگگة
نطيتهة حلفت ما تاخذهة تشاقة كرصتة رفا خلتهة تاخذها هي الممنونة طلعنة من الغرفة سديتةالباب قفلتة اخلي المفتاح بيدي
حجت رفا تشاورني:عدي الج شغلة
غنوة:شعدج
رفا:وية العلاليگ الي جبتهن اكو ظرف الج
حسيت الگاع بعد ما تشيلني گلبي يدك حيل ضليت اعصر بأدية منتظرة يرحون و اطلعهة حتى اشوفهة
ورة الظهر من صار الجو شوية احسن راحو طلعت ماعرف شلون اشكرهم على هاي اللمة كلش فرحت بجيتهم وكفت بالباب ودعت البنات
لزمت رفا اسحبهة:بنتي وينهة
ردت بضحكة:مخليلي رسالة هناك روحي اقريهة
سحگت رجلهة مستحية منهن طلعت تضحك جابتهة
بوستهة مكزكزة على اديهة لان خليتلهة حنة صارن حمر و رجليهة هم شبعتهة بوس
غنوة:فرحت بشوفتكم اردهة الج بالافراح
رفا: هلة بيج بعرس ابني
غنوة: والله خطية ابنج من هسة تركضون
وراه على زواج
رفا: ازوجة بنتج حتى تربي على أيدها
ضحكت ابوسهة صفوان يصيح من برة كلهة مشت ضلت بس هي گوة زلغهة من الباب اخذهة سديتة وراهم دخلت طايرة بس اريد افتح الرسالة
قفلت البيبان دخلت لغرفتي نزلت كلشي كدام غمزة حتى تلتهي و تلعب تعوفني فتحت العلاگة جان بيهة
گلايد و صبغ اظافر كلهن لغمزة عفتهن
طلعت الظرف نفسة الي دزينة بي الصورة زفرت متوترة فتحتهة مديت ايدي طلعت ورقة صغيرة مطبگة و يمهة ثنين سوارات گلبتهن بيدي
لونهن بيجي و اسود خيوط رفيعة مضفورة سوة بجيت اقربهن لشفتي ابوسهن يابة شگد مشتاقتلة گلبي نار عليه ماتحمل هلكد بدونة
فتحت ايدي اشوفهن امسح دموعي يطيحن غيرهن
مسحتهن برداني و فتحت الورقة جانت صغيرة نص من ورقة مو كاملة حتى الكتابة بيهة قليلة
اريد تتوضح گدامي حتى اقرة ماكدرت من البجي ضليت بمكاني لامتهن بيدي صوتي عالي بدون ما أحس ضامة وجهي بين رجلية
حسيت بملمس ايدهة على رجلي من صوتي اجتني
توهة تزحف على بطنهة مسحت وجهي شلتهة اتعوذ من الشيطان عود وعدت روحي بعد ما ابجي
گعدتهة بحضني نزعتها سواراتها و طلعت السوار الي مسويه دلهم ما جان بي حلقة بس خيوط مضفورة سوة و نهاية مشدود قوي حتى ما تنفل
گمت جبت الجداحة حرگت طروفهة حتة ما تنفتح
اخذت ايد غمزة لبستهة شديتة شوية رخية بوست ايدهة اشمهة بقهر
خليت السوار الثاني بالظرف اشتغل خاف يطيح من ايدي غير انط و اموت رجعت افتح بالرسالة عصرت عيوني اهدي روحي تلمست الاسطر
الكتابة واضحة الواتي يعرفني مادبر القراية بالورقة
مسحت عيوني ابوس الورقة گمت شغلت الضوة گعدت اتهجى كلمة كلمة
"
غنــاوي ، غناي ، غناتي
مشتاق لشوفتج ولگعداتنا مشتاق لصوتج وضحكتج وللحنان اللي ما ألكاه بس يمج أكثر شي يوجعني إني بعيد عنج و عن بنيتي ، كل يوم أتخيل ضحكتها وأتمنى أحضنها. الله يعلم شكد محتاج أشوفكم يجي يوم أرجع وأعوضكم عن كل لحظة غياب"
اخذت نفس مختنگة من الحزن و الشوق الة رجعت
اقرة كل كلمة احسهة تخلي غصة بگلبي من الظهر لليل اني على نفس الگعدة
غمزة نعست اخذتهة نومتهة و الرسالة بيدي ارجع
اقراهة و ابجي عيوني ثگلن احس الدموع جف على خدي و صرت گوة افك عيني
خليت غمزة بمكانهة ضميت الرسالة بس طلعت توضيت و صليت رجعت طلعتهة خلص اليوم و ليلة
العيد كلهة اني مگابلتهة و گاعدة
ثالث يوم العيد بيت جدي مسوين ثواب لأبوي هي اخر اضحية الة عزموني رحت لان جدتي جانت يمي الظهر و اخذتني وياهة
من لا جارة كشخت لبست احلى شي عدي خليت مكياج و رتبت غمزة و لبستهة نفس اللون الي لابستة دخلت لبيت جدي سلمت على الموجودين
كعدت بالغرفة بيدي الموبايل غمزة تكيف على الضوة كاعدة عاقلة تلعب بيه البنات كلهن يشتغلن
ماگدرت اضل گاعدة خليت غمزة يم جدتي
طلعت ضميت موبايلي بهدومي عدلت روحي اضم شعري جوة الشال خاف طالع مني شي دخلت يمهن
اساعدهن للاسف گابلت سكنة نلگط خضرة
مدري ليش حصرتني الضحكة هي تخوزر رغم ضامتهة بگلبي ما ضحكت بس من اشوفها تخزر بية
اريد اضحك شعدهة وياي مادري
حجت تفرغ العلاگة :عزلي الكرفص وحد نثرمة للكباب
همهمت بدون ما ارد رجعت تسولف ما تجاوبت وياهة اعرف حجيهن بالبداية عادي بعدين يغثن المقابل بسالفة كلهن نفس الشخصية
من دخلو ولد عمي گمت راجعة للغرفة خليت العباة
على جتفي گعدت الالعب بغمزة اجو سلمو على جدتي اني مدنگة امسح على السوار
ما شاركت بأي شي وراهة لان الولد برة تعشيت ورجعت يمي علي و نرجس سديت البيبان كعدت بالهول منتظرة ست الحسن تنعس و تنام
بعدها بفترة اجتني خالتي حتى اروح وياهة لبغداد
علمود مقابلة اشوف دلهم ، عزلت الكهرباء و قفلت
البيبان طلعت وياهم عذبتني غمزة شلعت گلبي
تحوس تريد توگف طاحت ايدي التفت علي الهة حجت :ماتگعدين جنج ابوج من شفتة و شافني يركض
ضحكت اعدل وگفتهة تمد ايدهة تريد تلزم النقشة
مال قميصة لان تلمع بالشمس قربتهة للكشن وصلت للنقشة يالله ارتاحت
وصلنة لبيتهم طلعنة متأخرين وصلنة ورة العشة بتت يمهم خليت غمزة يم وتين و رحت الصبح
صافنة على الشوارع كل فكري وياه
وصلنة شكد نسوان اكو أيام للزلم و أيام للنساء وكفت منتظرين يدخلونة كرهت هذة المكان هاي الوگفة حارة و ازدحام يشلعون گلب الواحد يالله يدخل
دخلت وحدي اباوع للختم على ايدي اضوج من اشوفة لحد ما گعدت منتظرة يجي اعصر بأدية ماريد ابجي هالمرة اضيع هاي اللحظات هيج
لحد ما اجة كل وعودي طارت واني اشوفة شلون متغير مسحت عيوني گعد گبالي بينة بس الشباك
دلهم:غناي كافي بجي حبيبتي
رديت امسح دموعي:عمت عيني شوف شصاير بيك
ليش هيج
دلهم:اصلا مدللينة
غنوة:نوب مدللينة شعرك وين
تقرب حجة بهمس:من گد الشوق صار عدي تساقط
باوعتلة مقهورة حتى ماكدر اضحك على شقاه خليت
ايدي على حافة الشباك بس اصابعي لمسهن يتلمسهن بهدوء
دلهم:موتتني ايدج مشتاقلج غناي
غنوة:اني اكثر گوة متحملة البيت ماينطب بدونك
دلهم: تخلص حبيبتي اعوضج يروحي بس ديري بالج
كافي تبجين هاملة صحتج
غنوة:مابية شي مابجي هواي
دلهم:فضنة بدموعج
گرصت طرف اصبعة بظفري نحجي بصوت ناصي گوة اسمعة اكو هواي غيرنة نسوان كاعد يمي هاي لتشوف ابنهة لو اخوهة
دلهم:شلونها بنيتي
غنوة:زينة بس وكحة شالعة گلبي
دلهم:عليمن طالعة عليج
غنوة:شوف منو يحجي
ضحك دنگ يحك بلحيتة ابتسمت على صوت ضحكتة اتمنى اخذة وياي و نرجع للبيت حجينة شوية خلص الوقت من يگوم و يمشي روحي تروح وياه احس بنفسي لا شايفتة ولا واصلة
من گد ما الوقت يمشي بسرعة تنهدت طالعة راحت لهفتة الصبح و الانتظار صدري ضاگ و اختنگت رجعت لبيت خالتي لگيت غمزة مفرفحة علية
حضنتها گعدت بغرفة وتين امسح على شعرهة موبايلي كدامي اشوف البصمات من رفا ما جان عدي نت حتى افتحهن اسمع بيهن
رفا:ضلي يم بيت وتين لاترجعين ، باجر المحكمة مال صلاح و نعمان قدمو ادلة مال قضية حاتم ضعيفة بس يگدرون يستغلونها ، صفوان يگول خل تضل هنا لا يخطفج قسور موسكو مثل ما خطفني
اسمع بالبصمات ايدي على گلبي خايفة على بيتنة
لا يحرگونة غير أنط و اموت يالله المهم سلامتنة ما رجعت گلت لخالتي هي اصلا ماتريد اروح
دعيت شكد حتى تكمل الجلسة مو مثل البقية تتأجل و كلشي ما نستفاد ، جهازي بيدي منتظرة اي خبر من رفا يريح گلبي
محاكمتهم جانت بالعشرة هاي مو اول وحدة بس
دائما تصير بيهة عارض من وراهم دوم حجة شكل
نمت گعدتني غمزة تبجي اخذتهة بحضني ادور على موبايلي فتحتة لگيت رفا دازة بصمات شكد خفت لا هم سوهة مثل اخر محاكمة
رفا: هلو اگلج توة رجع صفوان الي عرفتة منة صلاح ونعمان موقوفين هسة بالسجن لأن الأدلة ضدهم ما اكتملت مال قضية حاتم يعني الجلسات مستمرة والنيابة لازم تجمع كل الأدلة گبل الحكم النهائي باقي التهم الي عليهم تقدمت ان شاء الله يدخلون بعظ ما يطلعون اتمنى من كل گلبي
ارتاحيت من سمعت بيهم نسجنو خل يضوگون شوية من عذاب الدنيا ماعدهم مخافة من رب العالمين شكد دم برگابهم و عايشين مرتاحين
