رواية هشاشة قلب الفصل الثاني والثلاثون 32 بقلم العباديه

ظلينه ناكل ساكتين هوَ شويه سأل موج 

- اكلج موج احنه بالعرس عزمنه بيت آل صمد؟

موج.. لا ماعزمناهم 

- شكدد فشله قبل شويه الولد لاگاني باركلي وشمر بسمار عليه احنه شلون نسيناهم 

موج.. مااعرف والله هوسه صارت علينه ونسينه

- لازم نعزمهم فد يوم على غده لو عشه

ام ماهر.. لا لا لتعزمهم خليهه فد نوب على زواجك الثاني نعزمهم !!

اني جنت مدنگه آكل رفعت راسي رأساً اللگمه وكفت ببلعومي .

هوَ وسع عيونه حيل خزرهه رافع حاجبه .. هيَ عوجت حلگهه وهزت إيدهه .. دارت وجهه وظلت تقوس بحواجبهه وتدير بعيونهه .

همس :- احمم الحمد لله

خله وگام من السفره .. گطع غداه من وراهه اني ظليت كاعده جذب لااكلت ولا شي .

اول ماخلصت هيَ لمينه السفره وكمنه .. 

صعدت وراه لگيته نايم .

طفيت الضوه وظليت كاعده محتاره شأسوي حتى بعده الأكل مامهضوم. 

ظليت اراسل بنهى ع الفيس توافيني بالأخبار 

- اهلي شلونهم

نهى.. كلهم زينين 

- شخبار فدك وي اهلي؟ عوضت مكاني

نهى.. زينه لاتخافين بس ماعوضت مكانج .. ههههه مكانج خالي

- هههه

نهى.. اكلج صدك دزيلي صوركم مال الزواج ولا صوره عندي ياهي الاگلهه تگول ماعندي 

- اي مو ماهر ماخله ولا مخلوق يصور بس احنه 

نهى..تدزيلياهن 

- خوش

دزيتلهه صورنه وظلينه نسولف .. لما شويه نعست ونمت .

العصر نزلت سوينه كليجه واكلناهه وي چاي وماهر ويانه يسولف وأمه نايمه .

وره صلاة المغرب بلشت بالعشه هم وتعشينه.

إستمر هذا الروتين لمدة شهرين مايخله من بسامير أم ماهر .

اليوم ضايجه ام ماهر كالت خل نروح للمنتزه .. كلت لماهر ماعارض عادي كال روحن يوصلجن السايق وظلن تمشن مايكدر يجي ويانه .

لبست فستان طويل وفوكاه عبايه وخليت مكياج .. اجه ماهر جايب علاگه متروسه حلويات حتى مانشتري مناك .. تقرب تقرب يمي ركز بوجهي :-

- اممم مخليه مكياج شهالجمال يابه

- لا عمي هوَ انه بيضه

- ههههه بيضه مال دجاجه

- هههه تحشش عليه دهاك شوف رجليه منو ابيض 

- هنه رجليج گطن هيَ مال كلاوات 

- ههههه وصلنّه انتَ

- راح اطلع جماعتي ينتظروني 

- اخذنه بطريقك

- غير مره .. اذا تحتاجين فلوس هنا بهذا المجر اني طالع

- خوش

طلع وعمتي خبصتني يلا ويلا نسيت مااخذت فلوس بس اخذت العلاكه وطلعنه .

خابرنه السايق كال اني هسه ماموجود خلوهه ع الرجعه اوصلكم .. انجبرنه وطلعنه ع الشارع الرئيسي نريد سياره توكفلنه ماكو .. واحنه واگفين وكف رف .

باوعت بموج وضحكت اشرتلهه بحواجبي

- صعددي

ام ماهر.. اني مااصعد لو ااموووت

موج.. هههه يوم خل نجربه عليج الله

- عمه تره بعد محد يوكفلنه 

ام ماهر.. مااصعد 

السايق صاح :-

- يلا حجيه تصعدون لو نتوكل تره العبريه منتظرين 

ام ماهر.. كله من وراج 

ظلت معفسه وجهه وصعدت .. كعدنه اني وموج نسولف ونضحك .

وصلنّه السايق بكروته للمنتزه العام .. نزلنه والاجواء بالليل تجنن .

ريحة الشجر والطين معبيه المكان والاضويه وصوت الاغاني البعيده ع الشط تسوي واهس .

دخلنه وظلينه نتمشه المكان حلو وواسع والعوائل بكل مكان متواجده والاطفال تكمز بالمراجيح كلما نمر من يم طفل وبسمرتني ام ماهر تريد طفل .

موج شافت وردات حمر يبيعون راحت يمه تشتري واحنه وياهه وكفنه .. ام ماهر لزكتلي الا تشترين اني مااريد اولاً وثانياً نسيت اجيب الفلوس .وهيَ خبصتني 

ام ماهر.. اشتري داكوللج

- عمه مااريد

ام ماهر.. اشتري 

- مايعجبني

اشترت موج وظلينه نتمشه كعدنه بمكان على طبله وهيَ راحت اشترت وجابته . 

اتصل بيه ماهر يسألني بيش اجينه 

- هههه احزر بشنو اجينه

- بشنو؟

- كلمه تتكون من حرفين اجينه بيهه

- هههه هالحب من حرفين شنو؟

- رف 

- رف !!!!

- ههههه. اي

- وصعدتو بالرف بااليل وانتو نسوان؟؟ والسايق ووووين؟؟

- ماموجود

- وامي شلون تصصصعدد؟؟؟؟

- جا واذا؟

- شنوو جا واذا نسوان وصاعدات بالليل وي عبرريه هسه شيكوولوون ذني تايهات ما وياهن رجال ؟؟

سكتت. صار عصبي ويشيل بروحه ويدگهه اخر شي ختمهه

- روحي ثُرىٰ اني من ارجع تصرفي وي امي الخلت بنات شابات يصعدن برف

سديته منه وعمتي بس تباوع ماسألتني مغلسه. 

ظلينه نباوع على العوائل ونضحك على رجال جبير وخر ابنه من المرجوحه وصعد بيهه .

هيَ تباوع بيه لما صفنت وكالت :-

ام ماهر.. ثُرىٰ روحي اشتريلي عصير مابيه حيل بعد اروح

- استحي 

ام ماهر.. دروحي شنو تستحين

سكتت لان ماشايله شي منين اشتريلهه .. باوعتلي رافعه حاجبهه 

ام ماهر.. انتِ مشايله فلوس مو؟

- هاا لا عندي

ام ماهر.. لعد روحي اشتريلي 

سكتت ودرت وجهي

ام ماهر.. مشايله والله .. يعني مرت الدكتور ماهر ربع دينار ماكو بجنطتهه هسه خل نرجع واني اعلم ماهر شنو مينطيج

- لا عمه اني نسيت مااخذت هنه بالجرارات بس طلعنه مستعجلين وراح عن بالي

ام ماهر.. لا والله احاجي ماهر شنو هالوضع هذا مينطيج 

- عمه ماكو داعي والله كال اخذي بس نسيت

ام ماهر..معليج معليج

سكتت وازفر انفاس بنفاذ صبر تريد تسوي مشكله كوه .

من طلعنه كالت خل ناخذ صوره .. اخذنه صوره والمصور كال :-

- شو تعالو شوفو

رحنه اني وموج شفناهن .. هوَ قدّم الكاميره عليه وموج يمي 

موج.. ايييع شنو هاي طالعين محلوين

- هههه انتِ اشوه دباعي اني

المصور.. هههه شبيج اشو تخبلين مثل الورد

رجعت يم عمتي وظليت واكفه هيَ ظلت خازرتني عباالك اني كتله ازحف عليه .

راح سحب الصوره وانطاهياه .. خابرت السايق واجه علينه .. صعدنه واني كعدت يم الجامه وفاتحتهه على الاخير .

ام ماهر كاعده بالصدر .. مرينه بالازدحام ومااحسلك الا تصچيمه والرقم طاح بحضني .

رفعت راسي متفاجئه وام ماهر رأساً التفتت عليه تخوزر بيه وتزأر مثل الاسد ..

ظليت محتاره شأسوي .. لزمت الرقم وذبيته من الجامه . ظلت عينهه عليه وبس تخوزر وشكلهه مال واحد يتوعد .

وصلنه للبيت لگينه ماهر جاي .. كاعد بالصاله ويباوع على فلم ومندمج . من طبينه نصاه وظل يباوع لاامه خازرهه هيَ كعدت ع القنفه آي ظهري وآي رجليه نزعت جواريبهه وظلت كاعده .

هوَ نتر :-

- يووم شلون تاخذيهن برّف؟

ام ماهر.. اني شعليه هاي مرتك

- شنوو مرتي؟؟

ام ماهر.. مرتك ام الرفات تموت ع الرف حنت لماضيهه 

- يوووم اني دزيتهن بإيدج مو هنه يتصرفن بكيفهن غير انتِ جبيرتهن 

ام ماهر.. معليه اني معليييه هاي مرتك وتصرف وياهه دگت رجلهه لو تصعدوني برف لو مااروح

إلتفت عليه خزرني وأشرلي براسه عود صدك .

سكتت ودنگت .. هوَ سكت ورجع للفلم يباوعله بس متوتر ويهز برجله حيل احسه ضاملياهه .

امه ظلت تسولف الاجواء الي بالمنتزه لما وصلت للتريده

ام ماهر.. هههه تعال باع هاي الصوره اخذناهه عند المصور شلون وليّد حباب وميباوع 

باوعت بالصوره وكالت :-

.. هههه صدگ لو كال ثُرىٰ طالعه مثل الورد 

هوَ جان منتبه للفلم ومغلس لان لحد الآن مايحجي وياهه بس من سمع هاي الفقره التفت عليهه موسع عيونه ونتر :-

- شنو شنو شگال شگال؟؟

ام ماهر.. شنو شكال .. كال ثُرىٰ طالعه تخبل مثل الورده

- وين لگه ثُرىٰ وكاللهه؟؟ 

ام ماهر.. يااا غير هيَ وكفت يمه متن على متن ودگ سوالف كالهه انتِ تخبلين !!!!!!

فتح عيونه حيل وعكد حاجبه. رجع دار وجهه ع الفلم .. وهيَ كملت 

- اي وبعد هم ترقمّت !

رأساً التفت مفزوع

- شنوووووووو؟؟؟؟؟؟

ام ماهر.. ياا ياا شبيك هيَ كاعده بالسياره ومطلعه راسهه من الجامه واجه ولد صچمهه وشمرلهه الرقم بحضنهه وهيَ المكياج يجنن عبالك مال خبيرات 

سوتني مكياج خبيرات في سبيل تسويلهه مشكله .. هوَ صار وجهه احمر ويعض بشفته ويعصر بإيده .

اخر شي كالت

ام ماهر.. اكوولك ماهر عود ليش متنطي زوجتك فلوس؟؟ يعني زوجةةةة الدكتوور ماهر ربع دينار ماكو بجنطتهه

- شنووو ليشش غير الفلوس بالمجر ليش معدههههه

ام ماهر.. كتلهه روحي اشتريلي عصير كالت ربع دينار ماكو بجنطتي 

التفت عليه :-

- ثُرىٰ اني مو كتلج اخذي من المجر لو لا؟؟

- اي كتلي

- لعد ليش مماخذه؟

- مااحتاجهن اشو حلويات وانتَ اشتريت واني هم نسيت من طلعت مستعجله

ام ماهر.. لعد متنطيهه انتَ

- يووم مو اني الأقصر وي مرتي خليهه ببالج تره لاعايز لااحد ولا محتاج لااحد بس كل واحد بكيفه اذا هيَ متريد ف هالشي بكيفهه ومابيناتنه فلوس احنه تمام وبعد لحد يتدخل 

خله وصعد واني ظليت محتاره اصعد وراه لو لا ؟؟ ظليت شويه يلا صعدت وراه .

لكيته كاعد مدنك ويهز برجله متوتر ووجهه نفس ملامح العصبيه .

من دخلت رأساً نتر :-

- ثُرىٰ فهممييينني شنو هالكلام السمعته جوه صحيح لو لا؟؟

- هسه اسولفلك 

- ديلا سولفي 

- اول شي المصور هوَ الكال تعالو شوفو الصوره ورحنه اني وموج شفناهه وهيَ قلدت عليهه واني هم قلدت على روحي وهوَ نط كال تخبلين مثل الورد اني رأساً رجعت والله .. وسالفة الرقم مثل ماكالت عمتي يعني شدراني كاعده اباوع وهوَ انشمر عليه لزمته وذبيته من الجامه

- مكياج بعد ققلللليه من تطلعين ووين صاير هذا المصوور؟؟؟

- ماهر تريد تروح تعارك؟؟

- كوولييي وييين

- باالمنتزه

- اعلمه شلون يحجي بكيفه وي اعراض العالم

- ماهر فدوه لاتسوي مشكله

- معلييج .. واني مو كتلج اخذي من المجر فلوس لو لاا؟؟؟

- اي كتلي

- لعدد ليش مااخذتي؟ ماتدرين بأمي لو لا صارلج شهرين عايشه وياهه ماعرفتيهه تدقق ع النمله وين عايشه 

- شدراني والله نسيت 

- استغفر الله ياربي .. ثُرىٰ اذا تستحين تاخذين اني اخصصلج راتب شهري افضل شي 

- ماهر والله ماقصدت اسوي شي بس هيَ عمتي لحت 

- هاي هيه راتب شهري كل شهر انطيج والمجر موجود بيه شوكت ماتحتاجين ثُرىٰ إخذي مااريد اطلع بعيونهم مقصر وياج رحمه لربج اخذذي

- لا لا والله مامقصر عليه بعد شأسوي بالفلوس

كعد وظل يفرك بوجهه مبينه العصبيه بعدهه بيه . 

كمت سويت عصير بطيخ وبرتقال وجبت وياه كيك حطيتهن ع الطبله وجبت الايباد النطلع بيه فيديوات وطلعت فيديوات تضحك .

اجيت يمه كعدت وهوَ معصب ظليت اتحرش بيه لما ضحك .. كعدنه سويه ناكل ومطلعين فيديوات نضحك شويه هدأ 

اتصل موبايله ظل يخابر واني اجتني رساله من نهى ع الفايبر .

فتحتهه كالتلي :-

- اكلج حسابج مال الفيس فاتحته؟

- لا

- ولج نشط

- عززا صددك صار يوم مافاتحه فيس 

- لج نشط دروحي شوفي

ركضت للفيس سجل خروج رأساً ومن اسجل دخول يطلع كلمة مرور غير صحيحه !!

نهى تراسل بيه وتصيح نشط والحساب ماينفتح .

صخام بوجهي الصور مالتي كلهه بيه دازتهه لنهى !

الفصل الثالث والثلاثون من هنا 

شكرا لزيارتكم عالم روايات سكيرهوم