رواية هشاشة قلب الفصل الرابع والثلاثون بقلم العباديه
كملت المواعين وام ماهر وموج هيج وقت ينامن واحنه كلنه ننام الظهر .. البيت جوه فرغ ف صعدت لفوك للغرفه عزلتهه ولميت الگزاز التطشر .. دخلت بإيدي گزازه شاغت روحي طلعتهه ولفيت إيدي .. كملت تنظيف الغرفه وسحبت مخده اريد اتمدد .. دخل هوَ اني شايله المخده بإيدي من شفته توجه للخانه البيهه الفراشات مديتله المخده مالتي .
اخذهه من إيدي وذبهه بالگاع وكمل مشيته اخذ مخده وديباج وطلع للصاله .. ظليت صافنه !!
اذا ماتريدهه جا إلمن اخذتهه .. خليتهه بحطتهه ورحت ع الجربايه تمددت وصافنه مانمت ولااخذت عيني نوم .. اتذكر مخططاتنه لبعد اسبوعين من قررنا نروح نشتري ملابس الكليه من مولات بغداد ومن كالي نروح افرچ بغداد كلهه ونروح سفره نتونس واتذكر من كال هالسنه مايدرسنه لان تزوجني واعترف بلسانه كال ادرسكم علمودج .
صدگ لو كال ابو المثل الگدر ماگدر والشله ماعبر .. بس كله من إيدي حيل بيه وأستاهل
ظليت متمدده منا لما صارت الساعه بالـ4 دخل كال :-
- يلا تحضري دنروح
كعدت على حيلي اريد اروح للحمام راح سبقني واخذ ملابسه ودخل يسبح .. هسه ساعه يلا يطلع .
ظليت منتظرته لما طلع يلا دخلت غسلت وبدلت خفيت آثار إصابعه بالمكياج بس الفشخه گلت اخفيهه بالكب ..
هوَ هم بدل بدون أي كلمه ولا أي نقاش دار بيناتنه
شلت الجنطه مالتي ونزلت ظليت گاعده بالصاله انتظره لما يتعطر ويتكشخ .
نزل وكفت وهوَ يمشي مشيت كدامه والجنطه بمتني .. رأساً إنسحب السير مال الجنطه ونترهه مني وشالهه .. اخذهه وراح للسياره واني وراه .
دخل للسياره واني كعدت يمه ساق ببرود احسه قطعة ثلج وتمشي ولا چنه هذا المساع ينشال وينرگع وناره تحرگ الاخضر واليابس .
وصلني لبيت اهلي قبل لاانزل كال :-
- لاموبايل ولا سيم كارت ولا طلعه ولا مخابره ولا مراسله ولا تسيوره ولا أي شي خطوه للباب رجلج متخطي مفهووم
سكتت.. رجع نتر :-
- مفهووووم ؟؟
- اي اي فهمت
طلع ظرف ابيض وانطانياه باوعتله وباوعت بالظرف سألته :-
- شنو هذا؟
- شتشوفين؟
- ظرف ابيض وداخله شي
- اي اخذيه بدون نقاش
- هوَ شنو
نتر :-
- معليج اخذيه وخلاص
اخذته منه وحطيته بالجنطه.. عرفته مصرف.
هز راسه ونزل سلم علىٰ امي من الباب وراح لان هيج وقت الولد بالشغل.
دخلت للبيت مشتاقه لااهلي بس ماتهنيت لان بالي وتفكيري كله يمه وشراح يسوي وشنو موقفه .
امي ظلت حاضنتني مشتاقتلي ودمعت اني ماصدگت عبالك ظليت ابجي هم مشتاقتلهم وهم من مصيبتي المحتاره بيهه .
من بچيي اخواتي عرفن صاير شي ظلن يباوعلي بقلق ..حتى امي سألتني :-
- يمه صاير شي وياج
- لا لا كلشي ماكو بس تعبانه
كعدنه وظلينه نسولف يسألن بيه على عيالي وشلون تعاملهم وياي وجانت اجاباتي مختصره وكلهه زينين لو اي لو لا .
امي سألتني على ام ماهر كتلهه مدبره إموري وياهه .. قدمنّلي كيك وعصير .. اكلتهن ورحت للغرفه مشتاقه لمكاني ومشتاقه لراحتي هنا بدون هم .
نزعت الشال وطلع أثر الفشخه هذا الأثر ماانساه طول حياتي خليه عبرة ودرس إلي .. دخلت امي مدري شجايبه بإيدهه :-
- ثريا ادري بيج تحبين الـ...
صفنت من ركزت بگصتي.. اجت عليه جاستهه وكالت :-
- شنو هاي؟
- ماكو شي
- هوَ شنو ماكووو شي من اجيتي وشفت ملامح وجهج اني كلبي نغزني وكلت صاير شي بس من اسألج تكولين ماكو شي قنعت روحي بس هسه كولي هاي شنو وسولفيلي السالفه كلهه
- مشكله صغيره بيناتنه نحلهه اني وياه
- صغيره؟؟؟ لو صغيره مايجيبج
- لا والله هذا موعد جيتي هوَ حدده .. اصلاً حددناه قبل لاتصير المشكله
- مااصدگ ثريا مااصدگ غير تسولفيلي حتى انصحج
- لا لا مااريد اني احلهه
هزت راسهه ماراضيه وتنهدت .. شأحچيلچ وشأكلچ .
المغرب اجو الولد لبست شال وطلعت سلمت عليهم وظلينه نسولف ونضحك شويه طلعت من الاجواء الكئيبه.
فدك متأقلمه وي أهلي وفرحانين بيهه وهم ضحوكيه صايره عود تريد تقلدني .. فادني هسه الضحك .. مو طاح حظي لو لا.
تعشينه نفس لمة قبل وسوالفنه التضحك الهوىٰ .. اشتاقيت لاأيامي.
بالليل تقوى ومروه اجن وظلن يسولفن وياي
مروه.. اني مامصدكه ب ولا كلمه من الگلتي هاي صفحة خدج حمره وگصتج مفشوخه شنو الموضوع
تقوى.. ثريا سالفتج جبيره مبينه احجي يختي خففي احنه غير اخواتج ومابيناتنه اسرار
مروه.. اول تالي ثريا تضملهه سر ماجاي اصدگ
- اوف اوف شأريد احچي وشأريد اخلي
مروه.. كتيهن كلهن يختي
سولفتلهن السالفه كلهه وهنه ظلن لاعين ترمش ولاإيد تتحرك .. بس صافنات بوجهي
- شكو شبيجن
مروه.. بهذا تصرفج فقدتيه الثقه وبعد لو يجي العلاّگ مايرجع يثق بيج
- جا شأسوي اخلي صوري تنشر
تقوى.. تصرفاتج مو معقوله انتِ شلون تدزيهن لنهى
- هسه بعد صارت ونهى تعاركت وياهه
تقوى.. اكوووول البارحه خابرتني تبجي من اسألهه شبيج تكول ضايجه اسألهه متعاركه وي وليد تكول لا خلتني محتاره وصافنه شبيهه ماادري ظليت الليل كله افكر بيهه اكول ابنهه صاير بيه شي وليد صاير بيه شي بس طلعتي انتِ مرزلتهه لج نهى شعليهه انتِ دزيتيهن الهه وتدرين الحساب مخترقيه جا مادزيتي ع الواتساب ع الفايبر مالگيتي غير الفيس
- مو هيَ بوقتهه جانت تراسلني ع الفيس ودزيتهن
مروه.. الله يستر خوفج لاشو شمسوين بالصور يمكن هذا الهدوء اليسبق العاصفه
- فدوه اروحلج لاتخلسيني تره مابيه حيل بعد هبطات بس شوفة شكل ماهر وهوَ معصب صرفت خمس بطالة دم
مروه.. والله ياثريا هاي الحقيقه مانكدر نغيرها
مرن يومين واني عند اهلي وكل عقلي متأمله يجي ياخذني .. اليوم الثالث ومتأمله باجر يجي عليه .. خلصتهن تفكير بقلق وكله احسب يجي لو لا. لاتهنيت ولا شفت منهم شي مخلصتهه بس نوم حتى امي كلساع وكالت جايه تنامين لو نشوفج .
ثاني يوم كعدت الصبح وادعي يجي عليه ياخذني مامستعده اتطلگ ولااكدر افارگه هوَ صار 3 أيام ماشايفته ولا سامعة صوته گلبي طگ عليه ف كيف اذا تطلگنه لا سامح الله .
صار الليل وهوَ ماكو .. ظليت ابچي من أيست لا ياالله ليش ماإجه ليش اكيد يريد يطلگني .
رحت خابرت على موج سألتهه عليه :-
- موج ماهر وين؟
موج.. مموجود
- اي وين؟
موج..شعرفني بيه وين قابل من يطلع اسأله وين رايح
- اي دسئليه يحظي شبيج
موج.. حتى يسويني قطعتين
- زين شوكت يرجع وشوكت بطلع
موج.. مانشوفه بس ع الريوگ
- صخاام وين يروح؟
موج.. يااا ثُرىٰ شبيج غير كتلج مااعرف
- ها ها يلا خوش مشكوره حبيبتي باي
موج.. مع السلامه
شنو وين يروح؟؟! هسه فوك تفكيري وضيمي يجي عليه هذا الهم .
صارلي إسبوع عند أهلي وهوَ ماكو لاوصيه ولا خبر .. النوب بعد إسبوعين ويبلش الدوام وتبلش الطلايب .
مر اسبوع ثاني وعكب باجر دوام .. اني مخلصتهه بس اتجطل وين مالگه مكان فارغ انسدحت بيه وشهيتي مفتوحه ع الأكل واكو اكلات جنت اموت عليهه هسه اتخبل منهه .. امي شكت بيه واجتني :-
- ثريا وجهج اصفر خاف حامل
- يااا لا شلقضيه منين.. هيج لگيتي حظي كاعد وحامل
- خايبه صارلج من اجيتينه لهسه بس تتجطلين
ووجهج متغير انه اكلچ حامل
- شدراني
- حللي وشوفي
-لا مااريد
- بكيفج ظلي
مااريد أي شي بس القهر خليه يكتل بيه .. اخواني عرفو صايره مشكله وامي كالتلهم ماتقبل تحچي .. هذا احلى شي بأهلي الماتريد تحچي مايصغطون عليهه بس من اذا المشكله جبيره يتدخلون وامي كالتلهم صغيره ويحلونهه بيناتهم .. بس بغياب ماهر راح تصير شكبراتهه عدهم ولابد يجي وقت يحاصروني ويكشفوني .
ضايجه وروحي طالعه ماعندي ملابس لـعكب باجر وجسمي تغير بعد الزواج سمنت وصار احلى ملابس مروه ضيگات عليه وتقوى مايجن عليه هم .
ظليت محتاره شألبس حتى حصرتني البچيه من تذكرت هاي الأيام لازم اني وياه نحضر للكليه النوب هوَ يگلي انتِ إختاري القمصان والبنطرونات واني عليه الربطه والستره وفساتينج كلهه عليه .
القهر ياكل بيه حتى وجهي أحسه ضعف .. اني اذا انقهر بسرعه يبين على وجهي أنسل سسل
ثاني يوم گلت لاامي نروح للسوگ اشتري ملابس قابل اداوم بگونيه .
امي كالت :-
- تخابرين رجلج وتگليله مابينه حيل مشاكل
- چا ماخابرني هوَ
- اشش ماليش يخابرج انتِ الغلطانه
- ياا منين دريتي؟
- اني اعرفج بنت بطني واعرفج مادام ماحجيتي المشكله يعني انتِ الغلطانه هاي لو هوَ غلطان جان غردتي تغرد
- يااا
- ووجعا فوتي خابريه .. تخابريننه اروح ماتخابرينه مااوصل ولااخطي خطوه
- اصلاً اني ناويه اخابره لان اخاف منه غير يسويلي زفه بالسوگ إذا دره بيه طالعه بدون علمه
- اي جا خوش فوتي خابريه
رحت طلعت رقمه وكلبي رجف .. حاطه صورته اني بجهات الاتصال .. مشتاقه لكل جزء منه .
ضغطت إتصال وظل يرن .. ويرن .. انقطع الإتصال بدون رد !
رجعت إتصلت مره ثانيه وهم ماكو رد .. واتصلت مره ثالثه وماكو !
آخر شي دزيتله رساله :-
- السلام عليكم اني راح اروح للسوگ وي امي محتاجه شغلات من بره ف اتصلت بيك اكلك و انتَ الظاهر ماتريد تحجي وياي
3 دقايق وموبايلي دك بإسمه .. ضحكت وابتهجت أساريري يعني يشوف الاتصالات ويشوفني مشلول حالي صار ساعه ادك .
رديت عليه اجه صوته ينتر نتر حتى بدون سلام كال :-
- كل الشغلات المحتاجتهن باجر يوصلوج للباب
- وانتَ شلون تعرف اني شمحتاجه
- كتلج كل المحتاجتهن يوصلن للباب
- وقياسي
- ميخصج .. باي
سده واني بعدني تحت تأثير الصدمه !! الطلعه لغاهه بثواني وهوَ راح يتسوك بكيفه !
ماادري شحچي وشأگول .. رجعت كلت لاامي مايقبل وهيَ كالت ادري بيه مايقبل .
ثاني يوم الصبح اندك الباب وطلعت موج .. دخلت للبيت شايله علاليگ شكثر .. حطتهن ع السريع وتلهث
موج.. ذني الامانه واني رايحه
- لج اوكفي اوكفي وين رايحه خل اشوفج نسلم عليج
موج.. السايق واكفلي ميقبل ينتظر باي
بوستني وراحت .. عرفته هوَ جايبهه لان مايحب الانتظار .
فتحت العلاليگ جايب كل الانواع فساتين طلعه وملابس بيت ذوق يجنن .. وجايب كلشي حتى شغلات نسائيه كله كله مامخلي شي حتى صابونه مشتري .. شكالولك عني وصخه هههه ظليت اباوعلهن فرحانه احس شي من ريحته مااريد ألبسهن خاف تروح ريحته ولو قابل لابسهن همه جدد شهالتفكير هذا .. يمكن تخبلت اني .
ثاني يوم داومت بفستان طويل من ذوقه لونه ماروني .. من بين كل الالوان اخترته لان يحبه يگلي يطلعج كطن .. كلماته جاي تتردد ببالي وماكدر انسه ولا وحظه منهن وجاي اطبق بيهن .
وصلني إسماعيل مثل قبل وطلع لشغله .. دخلت للكليه اول يوم مشتاقه لصديقاتي وخلصناهه بس ضحك وسوالف وهنه كاعدات يسألن بيه على ماهر وكلما يسألن اغلس ولزمني ينصبن عليه .. اني اتخبل من يجيبن سيرته كلههن يتغزلن واني اغار بنات زواحف .
دخلنه للقاعه مالتنه نشوف شنو الاختلاف عن مال كل سنه لان قاعه عن قاعه تختلف واكو قاعات يهتمون بيهه الطلاب ف يصير واهس نقره بيهه .
كعدنه كلنه طلاب المرحله الرابعه وتفاجئنه من دخل ماهر !
ياا غير كال مااخذكم !!
من اول محاضره بلش يشرح وينطي واجبات الطلاب تعودوا عليه وكلهم جانو متحضرين الإ آني .
وجهه مايگصه الطبر ومغنددب .. كمل محاضرته وطلع .. لا باوع ولا شي وذني شكن
فاطمه.. اشو ماكو لا نظرات لا شي
- ولج مايقبل كال بالجامعه دكتور وطالبه وبالبيت زوج وزوجه ماعنده هيج شي
فاطمه.. ياا امده حظي دشوفي الدكاتره زوجاتهم بس تجي تزورهم يتفاخرون بيهه وانتِ يمه وماعليه بيج
- اي يختي خاف الطلاب يسون بيهه إنَّ شگلك انطاهه الاسئله لو غششهه من ذني السوالف
فاطمه.. هم صدك
كمل اليوم عادي ورجعت للبيت .. تغديت وسولفت للبنات عن اجواء الكليه ومادرسنه بس هوَ .
للعصر اني نايمه ودگ موبايلي .. باوعت لكيته اسمه .. كمت من نومتي مفزوعه ورديت كلبي كام يدك حيل .. عبالي يريد يصالحني بس انصدمت من اجه صوته يرعد وعصبي وصياحه واصل للستار .
- ارتاااحيييتتييي هسسسه ارتاحيييتييي فهمميينني شداازه شمصخمممه
- شنووو؟
- الصووور الدازتهننن شنننننه ؟؟؟؟
شكرا لزيارتكم عالم روايات سكيرهوم
