رواية هشاشة قلب الفصل السادس والثلاثون بقلم العباديه
مااتحمل بعد ابقه اريد ارجع للبيت
- جايچ انتِ وين هسه؟
- بالحديقه كاعده ع المسطبات
سده مني واجه .. لكاني كاعده تقرق كعد يمي ولزم إيدي نظراته متروسه قلق وحنيه
- ثُرىٰ شبيج ياعيني
- أعراض النساوة كلهه گامت عليه هسه .. مااگدر اكمل الدوام
- تأجلين السنه؟
- يا يا وين رحت للسنه كلهه اني قصدي بس اليوم لان تعبانه
- ثُرىٰ أجليهه
- إذا جبت بعد ألتهي بيه ومستحيل أدوام
- زين أدبرهه إلج تداومين بس بيوم الإمتحان؟؟
- تگدر؟
- اي طبعاً أگدر بالواسطه كله يمشي
- جا خوش بس بيوم الامتحان اداوم وهسه رجعني لعبت روحي
- يلا كومي
وكفت ومشينه رجعني للبيت .. لكينه امه كاعده بالمطبخ اني كعدت ع الكرسي وهيَ تلكتنه
ام ماهر.. شنو شبيهه المسعده؟؟
ماهر.. مريضه الحمل مأذيهه
ام ماهر.. الحمل؟؟؟؟؟؟
- اي الحمل لعد شنو
ام ماهر.. واني ماادري؟؟ يعني حامل ورجعتهه واني اخر من يعللمممم
- اي وهسه دريتي شنو الفرق
ام ماهر.. شنو الفرق مو؟ الفرق انتم فرحانيين واني هنا لاحفيد ولا شي واتحسر اريدلي طفل يونسني وانتم تدرون وفرحانين ومتشاركوني هيج صارت ماهر اني امك
- يووووم اني راجع للدوام بعد عندي محاضرتين رجاءً رجااااءً مااريد مشكله وسدي الموضوع إن عرفتي هسه او قبل مراح يفرق شي تمام
ام ماهر..هاي هيه ماهر بكيفك روح
- يوووم مشكله ماااريد
ام ماهر .. اي اي فهمنا
- رايح
راح وتلگتني بالگولات ..
ام ماهر.. سميييررة المنعيه تدرس بالكليه
تلحن بيهه وسوتهه إغنيه وتصفك وياهه هم .. اني ظليت اضحك وهيَ تأشرلي بإيدهه وتتحلف
ام ماهر.. ثراووي المنعيه تدرس بالكليه
- ههههههههههههاي
ام ماهر.. ووسم تضحكين عليه
- لا لا حشاج
ام ماهر.. طبعاً حشاي يلا كومي كمليي الغده
- عمه تعبانه غير انتِ طبختيه دكمليه
ام ماهر.. اممم يلا خطيه هاي لخاطر حفيدي حكمله اليوم بس اخر يوم لاتكيفين عبالج يوميه اطبخ
- اي ميخالف
خليتهه تطبخ هيَ مالت الله غير .. النره طبخهه كلش طييب .. عفتهه وصعدت تمددت بس نعاس راح اموت من النوم وين ماالگه مكان فارغ نمت بي حتى مليت .
شويه وخابرني ماهر يسأل عليه :-
- ها ثُرىٰ شلون صرتي؟
- زينه الحمد لله
- اذا تحتاجين مستشفى اتصلي بيه
- شلقضيه اريد اجيب شنو ههههه
- مو تريدين تجيبين بس خاف تحتاجين مغذي لان بهالحاله الجسم يفقد املاح والحذر واجب
- خوش اني اخابرك اذا احس روحي احتاج مستشفى
- تمام
- زين خلصت محاضرات انتَ؟
- لا بعد
- ترجع من وكت لو تتأخر؟
- ارجع نفس وقت كل يوم لما ينتهي الدوام
- اهاا
- ليش؟؟ تريدين اجي
- لا لا كمل دوامك
- تمام .. مع السلامه
- باي
سديته منه ونزلت احضر وي ام ماهر .. سويت الزلاطه وحضرت السفره .. بقينه منتظرين ماهر لما إجه يلا . دخل سلم وسألني :-
- شطابخين غده
- تمن ومرگة طرشانه اصب ؟
- صبي صبي علما اصلي وابدل
- خوش .
صبيت لما كمل وكعدنه كلنه نتغده .. موج مكيفه راح يصير بالبيت طفل تتونس عليه على گولتهه .. ماتدري اني من هسه افكر بالولادة شلون بيه .
وره الغده صعدنه ننام هوَ بجهه واني بجهه احس صارت بيناتنه فجوة .. حتى مو مثل قبل لايتشاقه وياي لا يضحك حتى مايحاول يتقرب مني بس على كد السؤال والجواب ومن اجي يمه يسولف سوالف عاديه .
هوَ مانايم ولا اني .. سألته :-
- ماهرر ماتحس حياتنه صارت رسميه اشو بس سؤال وجواب وين چنه قبل
- مو اني الرحت دزيت صور وضميت ولا رحت راسلت ولو جايتني احلهه بخمس دقايق
- بس انتَ لان حذرتني خفت منك كلت هسه يكول محذرهه وتروح تسوي هيج
- يعني السويتيه هسه زين؟
- طبعاً لا ومتندمه
- لعد هاي هيه ندمج ميفيد بشي
- وشلون نبقه هيج؟
- الله كريم
سكتنه بعد ماحچينه شي هيَ بكيفك الله كريم اليوم الا اخليك تحاجيني وترجع مثل قبل .
العصر حضرت ملابسه بدون أي كلمه وطلع اني دزيت السايق دوم يتسوك للبيت .. وصيته على شغلات هم للبيت وهم نشرات للزينه .
المغرب هوَ رجع واني سويت العشه .. كعدنه نتعشه هوَ ماحچه شي وياي مخلصينهه سكته يلفته .
كملنه عشه وظلينه شويه كاعدين نسولف لما تأخر الوقت اني صعدت قبله طلعت شموع ونشرات ضوئيه ملونه رفعت شعري كعكه مثل مايحبه ولبست ثوب نوم لون زيتوني غامق .. تمكيجت وصبغت اظافري وطفيت الأضويه بس على ضوه النشرات والشموع .. عود اريد اصير جريئه واطلع گدامه بهذا الثوب بس خاف من أشوفه كله يتبخر .
بقيت كاعده انتظره لما صارت بـ11 يلا دخل للغرفه من شافهه ظلمه استغرب رأساً شغل الگلوب لان النقطه صايره يم الباب .. اني وگفت وأجرجر بالثوب من شافني صفن وعيونه مشت على جسمي كله من زنودي لعضلة رجلي .
اني مستحيه ومدنگه بس ارفع راسي اشوف ملامحه وادنگ .. تحمحم بعد صفنته الطويله . طفه الگلوب وتقدم .
مشه من يمي وراح نام ع الچربايه سحب الغطه تغطه ونام !! ظليت واگفه جامده ومتفشله .. احتاريت هسه شأسوي ؟!
تحركت طلعت فراش وبطانيه فرشتهن جوه يم الجربايه وتغطيت ونمت !! أو تظاهرات النوم .. شبعت بجي المن محضره روحي المننن والنوب متحمسه واگول هسه اخليه يرجع مثل قبل وأحسن تالي هيج يسوي بيه ؟؟
ماتوقعت هيج يسوي عبالي يرجع مثل قبل ونتصالح ادري غلطت بس مو لهالدرجه يقسي وياي بلشت أتعب اول شي 40 يوم اني عيني ماشايفه نوم والتفكير نخر عقلي وهسه هيج يسوي !
الليل كله مانمت ولا شافت عيني النوم بس ابچي .. هوَ هم مانايم لان اسمع صوت حركته وكلساع يدور على جهة .
اختنكت من البواجي جوه البطانيه اريد اتنفس اريد احس بالهوىٰ من اتنفسه .. آخر شي گمت سحبت ثوب لبسته فوك ملابسي وطلعت لبره .. احس روحي تريد تطلع .. فتحت باب المطبخ وطلعت بالطارمه اشهگ حيل اريد الهوىٰ يدخل برئاتي .. اسحب نفس وابچي الخنگه بلشت تخف كلما ابچي واشهگ ارتاح شويه .
كاعده بالگاع وابجي انفتح باب المطبخ التفتت اريد أشوف منو .. بطبيعتي مااحب احد يشوفني ابچي .
لگيتهه موج واگفه وتباوع عليه بإستغراب تقربت يمي متفاجئه :-
- ثُرىٰ شبيج تبجين؟
- مابيه
موج.. ثُرىٰ لتبجين شبيج والله خوفتيني عليج كومي ياعيني
- موج عوفيني
موج.. منو وياج ماهر؟
بس جابت إسمه كدامي ظليت اشهك وابجي .. النفس احسه انكطع عليه .. ركضت جابتلي ماي وشربتني .. تريدني اهدأ بس بهالليله حسيت روحي تعبت .. ظليت ابجي وهيَ كاعده يمي .. كلساع تطيح دمعتهه وتمسحهه .
- موج فوتي نامي لاتبقين كاعده يمي روحي
موج.. مااريد خليني يمج
- روحي يختي خاف تنعسين
موج.. لا لا اني يوميه ابقه سهرانه اتابع مسلسلات بس خليني هنا يمج ابجي براحتج عبري عن الي بداخلج البجي يفيد يخليج ترتاحين اني مجربته
هزيت راسي وظلينه كاعده .. نسمات الهوىٰ العذبه تلفح بوجهي وصوت الاشجار من تتحرك يحسسني بهدوء المكان الگاعده بي.
بهالأثناء انفتح الباب مال المطبخ .. اليوم كلساع مفتوح .. مسحت دموعي والتفتنا طلعت ام ماهر .. من شافتني استغربت وتقربت يمنا .
ام ماهر.. شنو شبيج ليش وجهج احمر دتبجين؟
- لا ماكو شي
ام ماهر.. وجهج كله احمر وآثار دموع دتبجين ليشش؟
- عمة ماكو شي اني رايحه انام
ام ماهر.. بكيفج شنو تعالي كوليلي شكو منو مضوجج
- محد محد
عفتهه وصعدت ركض دخلت بفراشي وتغطيت .. شويه واندگ الباب مال الغرفه صخام بوجهي تريد.تفضحني اليوم حسرة عليه اشتم هوىٰ وارتاح اذا ماتلحگني .
ماهر بسرعه فتح الباب مبين كاعد .. سمعت صوتهه
ام ماهر.. ماهر شبيهه مرتك؟
- شبيهه؟؟
ام ماهر.. لكيتهم هيَ وموج جوه ودتبجي بحرگة شبيهه
- مااعرف
ام ماهر.. دشوفهه خوفتني عليهه بنص الليل خاف متعاركين وضاربهه تره مااقبل تضربهه هيَ حامل بحفيدي خل تجيب عود وحاسبهه
- ماكو شي يوم شنو ضاربهه ششايفتني اضرب ليل ونهار هيَ مرة ضربتهه ومتندم
ام ماهر.. اي اني كتلك لتكولي مكلتي ضرب مااريد
- اهووو ماكو شي يوم
ام ماهر.. تمام
- اريد انام هسه شلون؟
ام ماهر.. رايحه رايحه شبيك تطرد بيه
راحت وسد الباب .. خفت لايگعدني يگلي شبيج مابيه حيل اشرحله ولا بيه حيل احجي .. رجع لمكانه وظل ساكت .. ظلينه للصبح اثنيناتنه نحوس لا اني النمت ولا هوَ .
آخر شي مليت كمت سبحت ارتاحيت شويه .. طلعت ملابسه خليتهن على الجربايه ونزلت سويت ريوك وصعدت ابدل مخنوكه اليوم مو مال مااروح خل اروح احسن .
صعدت للغرفه .. لكيته كاعد يبدل .. اشوفه بطرف عيني ظل يباوعلي .. ماباوعت على جهته ابدد .. اخذت ملابسي من الكنتور وطلعت بدلت بالصاله .
اول مانزعت الثوب فتحت الباب وطلع شافني صفن اني سحبت الثوب خليته على جسمي ودنگت اغطي جزء .
هوَ كال :-
- دخلي بدلي كملت اني
نزل لجوه واني دخلت بالغرفه كملت تبديل .. نزلت جوه تريكنه وطلعنه للكليه .
بعدني بالسياره خابرتني نهى :-
نهى.. هلو ثُرىٰ شونج
- الحمد لله وانتِ
نهى.. تمام .. اكلج باجر خطوبة مروه الساعه بـ3. !
- شنووو؟؟ خطوبة مروه؟؟ ومتصله بيه تعزميني حالي حال الغريب؟
نهى.. لج والله اليوم المشاية اكيد ماتلحگين تجين وباجر الخطوبة
- مااجي مشكورة
نهى.. لج ثُرىٰ شبيجج والله صارت بسرعه بسرعه
- اي اي هاي هيه يااخت هاي بله يتصلون عليهه باجر تعاي للخطوبة ؟؟
نهى.. خيه انتِ هرمونات الحمل مأثره عليج ف عاذرتج بعد شوي نجيكم ونحچي حچي معدل
سديته منهه وظليت اغلي عازمتني حالي حال الغريب واخر من يعلم .. هوَ جان كاعد يمي سألني
- شنو شصاير
نترت بعصبيه :-
- ماكوو شييي
- وشبيجج تصيحيين
- مامصيحه
- لا صيحتي
سكتت ودرت وجهي ع الجامه .. حالتي النفسيه صايره صفر وكلهه تضغط عليه ملييت .
كمل اليوم عادي وبالليل اجو وليد ونهى ظلو يتعذرون ونهى تكلي
نهى.. اني شعليه اسألي اهلج صارت بسرعه بسرعه واني حالي حالج ماادري
ماهر.. يلا ثُرىٰ مصار شي هسه دريتي ماتغير شي
- حط نفسك بمكاني ويجوك يكللولك باجر خطوبة موج شتسوي؟
ماهر.. هالشي يختلف لان همه لازم يخطبوهه مني ف اكيد اعرف وماكو اي وجه تشابه بيني وبينج
ام ماهر.. حيل حيل حتى تحسون بيه من كلتولي اخر شخص بخبر الحمل هاا حسيتي بإحساسي لو لا؟
- اي عمة حسسيت يوجع طلع
ام ماهر.. حييل
ظلينه نضحك ومشيتهه .. ثاني يوم طلبت إجازه وانتظرت ماهر لما يجي من الدوام .. تغدينه وبسرعه ركضت حضرت ملابس ماهر خليته يبدل ويكمل نزلته لجوه يلا بدلت لبست فستان طويل أسود لزگ على الجسم وردانه بوري وكله .
نزلت شعري وبرمت خصلتين بالمقدمه وتمكيجت حطيت ظل رصاصي خفيف وكحل برز عيوني .
شويه وصعد ماهر .. متذمر من الانتظار :-
- اهوو يلا ثُرىٰ وين صرتـ...
شافني صفن ظليطت عيونه تزر زر گصني من فوگ لجوه . إبتسم بخبث ورفع حاجبه تقدم عليه ويضحك .
كال :-
- شنو هاي شطالعه؟
- كلشي ماطالعه
- تعالي بله
- مااجي
- لج ثُرىٰ تعالي
- مااريد
تقرب عليه يريد ياكل بعقلي حلاوة عباله مااعرف سوالفه
- شو دشوف بطنج صايرتلج بطن صغيرونه .
