رواية ساقي الود الفصل السابع والثلاثون بقلم هاله ال هاشم
.
عزيز اليوجعك ماتگدر تحاجي
يدبچ بالگلب وتصيحله مدلل
.
_______ ود ______
ارتجفت ايديه و اهتز گلبي مرعوب برسـالته ، ارمش بعيوني عسى ولعل الداشوفه وهم من اوهامي ، اروح و اجي بقلق افكر واحجي ويا نفسي ، شلون مصيبة منين جـاب رقمي ماكو لحظات و ارسل رسالة لخ :
عزيز :: ما رايـد شي منج ، بس اطمئن عليج
-بلا تفكير مني گبل حظرته و مسحت رسائله الي سببن مغص مؤلم اليـه ، منين جـاب رقمي وشيريد مني بعد كل هاي الفترة معقولة سمرة ، لا بس سمرة تحبه مستحيل تنطي رقمي وهيج خلـصت يومي فكرة تجيبني
وفكرة توديني لحدمـا اجـه غياث من شغله ، طبعـًا ماكدرت افاتحـة بالموضوع لأن نفسيته هاي الفترة مو حمل مشاكل اضافية و بطبعه لمن يحزن ينزوي بنفسه بعيد يعيش حداده بلا ما يأثر على محيطه ، يتألم بصمت و ما يحجي ابد !
كسرة اواب مو كسرة عاديه چـانت ،هو يعتبره الأخ ، الصديق وكاتم اسراره رغم فارق العمر بينهم الا ان اواب الله يرحمه وهارون و غيـاث تربطهم صداقة وأخوّة عابرة لهذه الفروقـات
اواب الي عاش چبير بعيوناوِمات چبير، اكثر موقف آلمني من ما انطـه بسمرة و لا كسّر بيها ويعرف جانت غلطانه، صح ماگدر يستمر وياها لان صعبة على رجال غيور يفرط بكرامته ويا انسانه ماتحبه
و من الممكن ما تصونه بس غيرته
و حميته ما خلّته يفضحها ، مات وهو المُلام و الخاسر الوحيد و هالشي عجزت اتخطـاه ، كل ليلة اتذكره و ابچي عليه الله يرحمك اواب ويجمعك مع الشهداء والصديقين .
مرات اصفن ويا نفسي و احسّ استشهادة مو حدث عابر انما درس كبير بالانسـانية ، التضحية و الوفاء ، اواب گان مجروح بس ما انتقم من سمـرة وكلام غياث اذاه بس اخر نفس منـه كان بحضنه ، الوطن بـاعه بس سـلم روحـه بكل ممنونية لأرضـه وفاته علمتني ان الدنيـا قصيرة و على لحظة نفقد اعزازنـا شيفيد الجـفا لو راحوا و احنـا بعازتهم ؟
من بعد حادثـة الزيتون الناس دخلت صدمة نفسية بعضهم طلع مظاهرات بنفس المكان الي انقتلوا بيه اولادهم يطالبون وينددون بمحاسبة الفاعل والتحقيق العاجل بهذه القضية لكن كلامهم ، صَيحاتهم ، تضحياتهم كانت كالهواء في شبـك لهذا يومنـا ما طلع حق اولادنـا و لا شفنا الفاعل تحاسب بعد شهرين من الفاجـعة قرر عمـو مهران يحاجيهم و يحثهم بأن يرجعون يمارسون اشغالهم لان اكو عوائل تعتاش على كدهم وهم كطريقـة لتجاوز الحزن قبل ما يفتك بيهم أكثر من هيج !
غيـاث قرر انه يسلم المشتل لعامل آخر لان نفسيته ما تستحمل التعامل مع الناس و فكر بأن يستلم شغل اواب بتجارة السيارات ويه هارون و هذا طبعهم ما يخلون غريب يشاركهم بالشغل ،
وهيج كان الوضـع رتيب و كئيب ببيتنا ،اما اني ظليت مشغولة البـال على بابا و على موضوع الرجال الي ديهدده قطع صفنتي صـوت دخول كفـاية ،
انتبهت وجهها مغيم خفت :
شبيج ليش ضايجـة ؟
كفاية :: هسه خابرت ابوج ، عمچ حمدان طايح بالقاضية
-مايطگه عرج لتخافين !
كفاية :: لا ولچ صدك منتهي سوده عليه ، اليوم ياخذونه يسوون اله رنين و الله يستر
-الله يشـافيه بس ليش سوده بوجهج ، بعدين هاي شباب مثل الورد دتموت !
كفاية :: يا ولچ البرعـة شمالج انچلبتي عالزلمة شنهي نسيتي هذا عمج
-لا اني ما عندي عمـام و ما نسيت شنو سوه بيه
كفاية :: حقودة موش بيدج ، اكلج ما حللتي
-شحلل ؟
كفاية :: موش غايبتلج الشهرية ، حللي يو تجيبين هذا الاختبار من الصيدلية بلچن مشكلة بفرخ
-لا ماكو فرخ ، شهريتي ما منتظمة بسبب الادوية الاخذها يمكن
-لمعن عيونها وهي تقرأ المضموم بعيني و شافت شكد رايده أصير أُم لطفل بهذه اللحـظة !
كفاية :: بسج لا تاخذين دوه بعد صرتي زينـة
-هو مقررة اعوفه لان معدتي تعبت !
طبطبت على ايدي و همست :
كفاية :: وره كل غيبوبة جيبوبة هيج چانن يگولن حبوباتنا
اكتفيت بأبتسـامه مارديت ، استرسلت هي :
كفاية :: ابوج مشتاكلج ود ، حرام هلگد مجافيته هو ماله احد بالدنيـا غيرج
-انعصـر گلبي و حاصرتني البچية عليه ، همست :
اريد اروح اشوفه قلقانه عليه
تهللّت اساريرها بگلامي :
كفاية :: والله ما خيبتي ظني اعرف گلبج چبير وما يحقد ، چـا نروح نشوفه وره الغدا
-ماشي بس خلي يرجـع غياث واكول اله يودينا ، راحت كفاية وبلشت اني اكمل الغدا ، طبعـًا بهاي الفترة رتبت مطبخ صغير على كدنـا و البنات ساعدوني بالطبخات الصعبة وشفت هيج حلو تصير عدنـا خصوصية لان غيـاث ميدخل للبيت حده للمضيف لو يروح يخلص كم ساعة يم سعدية و يجي هنا شكد الح على سعدية تجي تسكن يمهم مقبلت بس هو متركها ابد بيوم الي تنشغل زينب عنها ، يروح غيـاث يقوم بكل واجباتها فعلاً ايقنت الأم التربي مو الي تخلف ، نبهني من شرودي صوت خطواته ، رحت تلگيته بلهفة جـان دينزع حذائه ، شاله وحطه بالجزامـه ، ابتسملي بتعب :
غيـاث :: ريحة الاچـل طيبة و انه نكضـان من التعب وجوعان
-تقربت منـه انتزع قمصلتـه عنه ،
سلامتك من التعب ، دقايق كلشي يكون جاهز تغده ونام
غيـاث :: اي والله اريد آخذلي طخـة ، العصر عندي شغلة
-تذكرت سالفة الروحة مال بابا و غَيم وجهي ، رأسا حسّ عليه وكال:
غياث :: هاه شماله وجهج غَيم
-شبكت ايديـه وره ظهري ، ميلت راسي و همست :
هممم مـووو ؟
غيـاث ::مووو شنهوو ؟
-اريد اروح اشوف بابا
-باوعلي لثواني و أبتسـم
غيـاث :: الظـاهر حنيتي مصكوعة
-دنكت راسي ، تكلمت بنبرة خفيضـه :
ماعنده غيري غيـاث ، و الدنيـا مو امان
حاوط اكتافي و طبع بوسـه على جبيني :
غيـاث :: زين تسوين ، الماله خير بأهله ماله خير بأحد خليني آتغده و ارتاح شويه و اخذچن اله
-تركني و راح يغسـل ياربي شگد احبه و شگد محتاجـة اشوفه يضحك مرة لخ ، اختفت ضحكته من يوم وفاة المرحوم وانتكست حالته النفسية ،حتى الزاد گوه يتجرعـه ، اتمنى لو بيدي انتزع تعب گلبه بس مابيدي شي
حطيتلـه الاكل و كالعادة ماياكل غير شي بسيط وتحسـه يغص باللگمة ، اباوعله و أنقهر ، همست :
ماعجبك آكلي حبيبي ؟
33
باوعلي بأبتسامة مزيفـة
غيـاث :: شلون تحطين ايدج بشي و تگولين عنه موش طيب
-اخذ ايدي باسـها و أسترسل :
غيـاث :: هاي الايد نعمة اذا تلزم كاع بور هم تخليها تخـضر
-قبل لا يفلت ايدي لزمت ايده ، همست اتوسله :
لخـاطري اذا تحبني ، ارجـعلي غيـاث ابو ضحكة الحلوة اعرف الخسـارة مو سهلة بس الحياة لازم تستمر
هز راسـه و دمعته انسابت وي صوته المجرح ينعاه :
غيـاث :: ثاري الاخو تحرك يناره
والدمع حكه لو تجاره
من شفت خلوانه يداره
شهگنـا ثنينـا سوه ، استرسل بنعي لاخ :
غيـاث :: صّبن على الراحو الدمعات من كالو اليوم الأخو مات وحدر الظلع ظلت الجويات ، اااخ اي والله يخوي فراكك چسم ظهري !
باوعتلـه بيأس ، اريده يتخطى ؟ شيتخطى وهو فاقد جزء منـه مو بس اخو ، بقى هيچ متأذي لفترة من الوقت خليت راسـه بحضني ، ظليت اقراله آيات واهون عليـه لحدما غُفى ، بقيت متحنطة بمكاني ما ردت اتحرك و يكعد خطية نومـه متقطع باخر فترة
12
بقيت اتأمل بشكلة تعبـان، لحيته عاليـة وجوه عيونه اسود بخفـة مسدت حواجبة و رتبت كم شعرة متمردة مثل نوارس مهاجرة خارج السرب ، نصيت على جبينه وطبعت بوسـه محسيت على نفسي الا واني نايمـه يمـه و ما كعدنا الا على رنّة كفاية :
جاوبتهـا بصوت ناعس : ها كفاية
كفاية :: صحي النوم حبوبه جلجل الليل وانت ما منج خبر چـا موش گلنه نروح نسير على ابوج ؟
-باوعت ناحية الجـامة الدنيـا بعد بيها ضوة ، يمعودة بعد وكت يا ليل الجلجل رحمة لاهلج
2
غيـاث :: يله جهزي نفسج بس اغسل و ابدل
-سديتـه منها و تجهزنـا بسرعة ، طلعنـا ولكيناها هي وفاطمة ينتظرن ، باوعلهن غياث بأستغراب
كفاية :: خطيه فطيم ضايجة گلت اخذها ويانا تغير جو
غيـاث :: تغير جـو ؟ شنهي بويه سليمـان فاتح مدينة العاب شو راسه والحياطين
-دغيته على كيف لا فشلها :
يمعود دخل تجي مو موتوهن من الحبسـة
هز راسـه و مگال شي ، صعدنـا وياه ، بنص الطريق اجـاه اتصال ، من گال الو تعمد ينصي الصـوت و ميجاوب بس بـ أي ، آخر شي گال :
غيـاث :: عراق و كله نباع بسعر التراب ظلت عالديرة !
-سدة و ظل يدخن ويجر حسـرات و من لزمته للستيرن عرفته صاير نار ، وصلنـا اخيرًا نزلنا من السيـارة و نزل ويانا تسالم ويه خنجر و جلال ، اشرلنه بعيونه عود فوتن جوه ، فتنـا بس فطومة ظلت تتلفت مدري شبيها
-تلگانه بابا من البـاب و اللهفة ارتسمت على ملامحـة
ارتميت بحضنه گام يبچي و بچيت على بچيته ، بست راسـه وچفوف ايديـه
1
سليمـان :: هيج گالوها تكطعين وياي كل هالمدةً
داهرته كفاية حبت تقطع اجواء الحزن :
كفاية :: شسوي خويه چـا غير من سويلفاتك
خزرها ، ضحكنا اني و فطوم ، دخل غيـاث تسالموا بيناتهم وراحوا للديوانيـة بينما ظلينـا احنا نحضر العشـا :
فاطمة :: گلت اجي وياچن خاطر اخلص من هوسـة العشا تلگاني عشاكم بالباب
كفاية :: حسّج يمهطورة اليسمعج يگول ريحة الهبيط مالتج تجيب التايه ، هن خضورات لگطيهن و اسكتي
ضحكت ،، خزرتني و تأشر علية بالسچينة :
كفاية :: و انت لا ضحكين صارلج ساعـة بهالزلاطة ادري لو صالخة باچـة هم چـان كملتي
ضحكت فاطمة و عيبت عليها ، تالي افحمتنا ثنينه :
كفاية :: نسوان آخر زمن فالحات يكضن التلفون ويسمعن اغاني ، الله يرحمج يمـه چانت تكعدني الفجر خاطر اعجن للخبز
فاطمة :: خالة وكتچن شي و هسـة شي ثاني
4
كفاية :: الوكت شلّة غرض انتن عجوزيات و فاهيات ، الله يعين زلمچن
هزت ايدها ، بصوت ساخر :
فاطمـة :: تهي بهي تريدني اعوف النومـة الحلوة خاطر زلمتي ياكل خبز حار شنهي يمـه رئيس الوزراء !
-بهالاثنـاء دخل خنجر شايل علاكة خبز ، سمع حجايتها ، باوعلها لا ارادياً وهي تحجي بسخرية رفع تك حاجب ،تناوشت منه كفاية الخبزات وشكرته :
كفاية :: عاشت ايدك يمـة خوش خبز حـار
خنجر :: و ايدچ يمـه ، الفرن اليمنـه معزل تعنيت غاد كله خاطر تاچلن خبيزات حارات
-حسيته بسمّر فاطمة و هي افتهمت من خزرته بنظرة حادة ، تسلطت على طرف شفته ابتسـامة ماكرة راح ، هي صاحت بأنزعـاج :
فاطمـه :: اوووي شگد غثة عليمن شايل خشمه هلكد چيف حلو عود عشتو !
6
كفاية :: چبي ولج كلشي ولا خنيجر هذا وردة مالت الله
محد مغرور غيرج ام خشم يابس
-كلش حبيت علاقة كفاية بـ فاطمة حسيتهن أُم و بنتها وحدة محتوية و متفاهمة ويه الثانية على عكس دلال الي منزوية بعيد يم سمره من بعدما حذرها مهران متقترب من البدوية
حطينـا العشـا من خيرات الله ، چـانت لمة حلوة وصراحة انصدمت من تعامل غياث ويه بابا المفروض ياخذ موقف منه بعدما سمع كلام البدوية والي داشوفه العكس منخرطين بنقاش حامي بخصـوص الشخصية الجديدة و الصـايرة حديث وجهاء الديرة " الشبح "
وهذا درس ثـاني تعلمته منا، مهما كنت على خلاف ويا ابن ديرتك بس وكت المحن تتوحد قواك و يا قواه لمواجهة المشـاكل والتصدي الها
كفاية :: و تالي خويـه شراح تسوي وياه ؟
سليمـان :: خله يولي و داعتج ما يخوف چلبي ، اعرف دكهم وين ؟
غيـاث ::وين ؟
-صدت عيني بعين بابا و كأنه يكلي ديربالج تبوحين بسرنا الصغير ، رمشت بعيوني ببطء و كأني اكوله خلص لا تشيل هم وسرك بيير
كفاية :: ماتحجي خوية عليش يركض وراك الشبح
سليمـان :: هيج شغيلة عندي يدورون عليها من زمان
كفاية :: چـا ما تنطيهم اليردونه بلچن يفكون منك ياخة
سليمـان :: چا انه بيش كاضهم لو موش هالشغلة ، اطمني خويه محد يجوسلنه طرف
دنكت راسـها بحيرة :
كفاية :: الله كَريم
فجـأة انتبهنا للاخبـار الي ذاعت اول حالة اصـابة بفيروس كوفيد -19 بالنجف الاشرف ، صفك ايده غيـاث وصاح :
2
غيـاث :: استلم هاك صكعة لخ
سليمـان :: هاي سوالف الحكومه خاطر يلهون الشعب
كفاية :: ماظنتي دليلي ما مرتاح چن جايتنا مصايب
سليمـان انت بسج تفاولين و ان شاء الله سلامات
-بهالاثنـاء رنّ تلفون بابا والمتصـل كان شهاب ، رفع خط وبنفس اللحظة غيم وجهه و تبدلت ملامحـة
سليمـان :: لا حول و لا قوة الا بالله شنهي ورم ؟ ادري ما هيس على رويحته ذيج المدة ؟
-عيونه تحدق بفضول ، انهى مكالمته و بحزن مبالغ اعلن عن خبر وجود ورم خبيث بالدمـاغ عند عمو حمدان
لطمت كفاية على صدرها وهلن دموعها:
كفاية :: يما اسم الله اخوي ، دخيلج بالزهرة منين اجاه الورم
سليمان :: هاي بعد ، ابتلاء ربچ ..
-سكت شويه و كأنما مختنك بغصة
غياث :: لا حول و لا قوة الا بالله ، ان شاء الله معافى عمى شتحتاجون انه موجود
سليمـان :: كفو منك يالنشمي ما تكصر
-صفنت ، هو صح حمدان اذانه هواية بس يبقى انسـان صاحب عائلة و عنده عزاز ، كمت طبطبت على كتف بابا بمواساة و دعيتله بالشفاء ، اما كفاية بعد شيسكتها المسكينة ظلت تشهك بدموع رغم كل الخلاف البينهم والجروح ،
رجعنـا لبيتنا بس مو مثل ما اجينه ، كفاية نفسيتها تدهورت كلش حتى غياث انقهر عليها اما اني مدري ليش احسّ بالجمود ناحيتـه يمكن لان ماشفت منه بس الاذية
بس اندعيتله بالشـفاء لخاطر عائلته ،
لحد وقت متأخر من الليل ما نمت بقيت افكر بالمسج الي ارسلة عزيز ، اباوع لغياث النايم بصفي اشوفه تعبان مو مـال ازيد مشاكله بعد ، تعبتي التفكير لحدمـا نمت مدري شگد مر من الوقت بس فَزيت على صوت شهكتـه وهو نايم ، كعدته رأسـًا ورفعت راسـه لحضني فتح عيونه تعبـان :
اسم الله ، شنـو كابوس ؟
غيـاث :: والله ما ادري ، ما اذكر اشفت بالمنـام
-بقيت امسّد راسـه بهدوء :
ليش ما تشوف دكتور ، صارلك فترة تعاني بالنوم
غيـاث :: شـراح ينطيني الدكتور حباية منَوّم ، علّة الوجدان ما تداوى
2
-صفنت بعيونه ثواني ، همست :
الله يبرد گلبك بس ، محتاجتك ترجعلي غياثي القديم
مثل ما لميته ، لّمني لحضنـه :
غيـاث :: جاي احبچ فوك ما تتصورين و خايف اگلج ليش ؟
-همم ليش تخاف
غيـاث :: ما يحسّد المال الا صاحبه و خايف احسدني عليج
-ميخالف حباب دكول ليش دتحبني
لزم حنجي و يضغط عالنونة بسبابته :
3
غيـاث :: لأن كلمـا اطيحن الگاج يمي ، تكترين جروحج غاد وتفرغين نفسج اليه ، اميلن منـا تسنديني ، اطيحن مناك تتلگاني ايدچ منا ، لا تلوميني من اگلج مجنون بيچ
-اويلييي لو هيچ الفَزة من النوم لوماكو ، نطيتني جرعـة حب اعيش بيها سنة ليگدام
لمعن عيونـه بشوق غامر :
غيـاث :: شگد مشتاكلج لو تدرين
-و آني اشتاقلك حتى و انت يمي أيها السـاقي العزيز
بـصوت ذابل :
غيـاث :: السـاقي يريدج يا وردتـه
-اقترب و نيته واضحة يلثم شفايفي ، حطيت سبابتي على شفته و سـامرته ببيت شعري طرأ على بالي هالحظة :
يا ساقي الكأس يكفي أيها الساقي هيجت بالكأس أشجاني وأشواقي
غيـاث :: احتركوا عمـامه ...
***
اخذتني النومة لحد وقت متأخر ثاني يوم ، ما لگيته يمي ، باوعت للسـاعة عزة بـ12 و اني لاهسه لا طبخ ولا نفخ ضربت كصتي و قفزت عالسريع مدري الملم الغرفة بدلت الفرش و طلعت خليت ملابس بالغسالة سبحت عالسريع و لملمت البيت ، وكفت گدام الثلاجة صفنت بيأس شحسوي و الدجاج واللحم جـامد ، اخابر لزينب تظل تصنف و تقلد عليـه ماكو غيرها المنقذة المعكروونة !
طلعت صدر دجاج ذوبته شويه و قطعته شرائح والخضروات كذلك ، شوحتهم سوا و ضفت التوابل ، سلكت المعكرونه بسـرعة بين ما حمس الخليط ضفتله كريمة طبخ !
همزين لگيته مخدر جـاي هو يسويه اطيب مما اني اسويه على گولته اني اسويه بلالة ( خفيف بلا طعم )
بعدني احضـر بالزلاطة وسمعته فات ، غسلت ايدي وتلكيته فحطانة : الله يسـاعدك
باوعلي بـأستغراب :
غيـاث :: ويسـاعدج
1
-تقرب مني باس خَدي و مرر ايده على خصلات شعري الرطبة ،
غيـاث :: ليش هيج بويه ، شعرج مبلل و لبسج خفيف فوكاها كاربته كرب هيج يتكسر ويطيح شو تعالي خليني انشفه الج
-دعووفة هسة يمعود مو انت تعبان
غيـاث :: عوفيني انتِ اتونس بي
-شكل الشسوار و صار ينشف بي ، صحت :
اريد اكصـة حيل متعبني
غيـاث :: كصي حتى أَكص راسج
-مو قصير على الاقل لنهاية ظهري
غيـاث :: چـؤ سانتيم ما ينكص ، عجوزية
-مشطـه و ظفره اليه برهاوة ، فاحت ريحة العطـاب
يبووو الفوتشينييي
عبس بحواجبه :
غيـاث :: فوتو شنهي ؟
باوعت للطاوة محتركة من جـوة ، طفيتها ومن صدك بچيت
گوه كتم ضحكته ..
غيـاث :: ليش تبچين ياعيني ، شو ميلي خل اشوفن شمبدعة اليوم
وخرت منـه وكف عالطباخ يباوع للطاوة بعبوس :
غيـاث :: شنهي هاي
-مـو كتلك فوتوشيني
غيـاث :: فوتو ايش ؟
-اوووي لا تضل تقلد عليه ترا هاي باستا ايطالية مشهورة
-يقلب بالطاوة و يضحك :
غيـاث :: جدمة مال عجين همزين احتركت !
-هااه هيج صـارت دظل هيج بلا غدا
-من فشلتي عفتـه و رجعت للغرفة لفيت روحي باللحاف وظليت ابچي و بنفس الوقت احس بالتفاهة هسه اني ليش ابچي فوك ما خليته بلا غده ، لحظات ودخل للغرفة ما كشفت راسي بس سمعته فتح الكنتور اكيد راح يسبح و بالفعل توجـه للحمام يسبح اني بقيت جوه اللحـاف نوب ما اكدر اطلع يربي بعدين اسأل نفسي هو ليش ما صالحني ؟
حسيت بي بالمطبخ من الطـاخ و الطيخ گلبي نمرد شي اكيد جوعـان ، كُمت تمشيت على كيف و مديت راسي شميت ريحة تكلاه تشهي ، هذا شديسوي ؟
4
بطني گامت تبقبق من الجوع ، لا ريوك و لاغده رجعت بدلت ملابسي لان بيهن ريحة أكل وطلعتله توسعت عيوني و گامت تطلع گلوب منظرة يجنن مسرفن ردانه ومشغول يگلي باذنجان ومخلي حميسة مال طمـاطة عالنار ، حس على وجودي ما رفع راسـه
غيـاث :: يلا عيني سميراميس حضري السفرة زهبت الغدة
-تقربت منـه رفعت نفسي بسته بخده ، ضيق عيونـه عليه وهمس :
غيـاث :: قشمريني خوش
-لا بس حبيت الـ سميراميس منك ملكة و كذا
ترك الي بيده و رفعني من الارض كعدني عالكاونتر ، ثبت ذراعـة منا و منا :
غيـاث :: و انتِ هم ملكة على عرش گلبي
طوقت عنقهِ و بغنج همستلة :
اني اول ملكة عشكت ساقيـها
غيـاث :: انهجم بيت لسـانج ، نتغدا اليـوم لو لا !
قفزت للارض :
طبعا لان ميتـة جوع
غيـاث :: يخسى الجـوع هسه جايج.
حط الصينية عالكاع و تربع گدامي ، الاكل يشهي مسويه بتيته و باذنجان مقلي و حميسة طماطة لاجعة زلاطة وطرشي و لبن حامض اويلييي قمة السـعادة
سَمينه بسم الله و بدينا ناكل ، باوعتله و راودني بهاللحظة سؤال :
-اريد اسـألك سؤال ؟
غيـاث :: گول حنطاوي اسأل !
-شعجب ما استنكفت تسوي أكل اليـه ؟
باوعلي بأستغراب :
غيـاث :: عليش استنكف ؟
-يعني چنت اظن انو الزلم هنـا تستنكف تسوي شغلات النسوان مثل الطبخ او التنظيف و غيرها
ابتسم بتكلف :
غيـاث :: موش كل اصابيعج سـوه و التعاون بين الزوج والزوجة مو عيب بالعكس احنا كأسلام لازم نقتدي بأخلاق النبي و آل بيته الاطهار عليهم افضل الصلاة والسلام .
-عليهم السـلام ، بس للاسف مو كل الرجال تقتدي
غيـاث ::الامام جعفر الصـادق عليه السلام يگول :
كَانَ امير المؤمنين عليه السلام يحتطب ، وَ يستقي ، ويكنس وَكَانَتْ فاطمة سلام اللَّهِ عليها تطحن ، وتعجن ، وَ تخبز
-صلوات الله عليهم
غيـاث :: شفتي اذا ابو الحسن علي بجلالة قدره وعظيم شأنه يعاون زوجتـه ، اجي انه العبد البسيط استنكف اعاونج ؟
-باوعتله بحب ودي اضمـه بنص گلبي
اتعب و آني اكول احبك تدري ؟
غيـاث :: احبنج اميرتي
مرت الايـام و الاوضـاع نحو الاسوأ ، الحياة توقفت بس الموت يتجول بالأزقة يخطف شباب و اطفال بلا رحمة ببغداد الوضع جدًا سيء كل يوم تشهد سـاحة التحرير فاجعة بشاب بعمر الورد ، صاروا الناشطين يسقطون مثل اوراق الشجر الواحد تلو الاخر جروح و شروخ صعب تندمل ، صيحات الحبوبي مستمرة و الآمنـا حاضرة مهما ردنا نتخطاها ،
3
غياث و هارون استمروا بالدعم اللوجيستي بس امتنعوا عن القتال و المواجهة بأمر من عمو مهران وبعد ما حلفهم يمين والسبب تدخلات اطراف خارجية بالمظاهرة وتحولت السـاحة لميدان تصفية حسابات و كأنما نبوءته تحققت من كاللهم يجي يوم وينحرف كل شي عن مسـارة الامر كارثي صار ويفوق قدراتنا ..
گمت احسّ بأعراض حمـل ، ماردت احجي قبل ما اتأكد فقط استسريت بزينب الي جابتلي اختبار حمل وبالفعل طلعت النتيجة ايجابية ،من سمعت كفاية ظلت تبچي من الفرحة وزينب صارت تگمز ، فرحتي ما انطيها لاحد و أَخيـرًا راح اقدم شي لغياث شي يسعده و يطيب جروحة بعد كل هذه المعاناة ..
بيومها هم اتـصل بينـا بابا و بلغنـا بصحة عمو حمدان المتدهورة كلش بسرعة استفحل عليه الورم يريد يشوف كفاية ويشوفني ، تردد انطي جواب مو قبل ما اشور غيـاث بهالامر ,
جنت كاعدة بمطبخ البنـات من بين الهوسة والسوالف لفتتني سمرة الجانت مثل المُغيبة بغير عالم ، تراسل و تتبسم فاقدة وكأنها لوحدها بالمكان انقبض گلبي وحسيت وراها شيء موزين وانقهرت كلش لان جـان المفروض تكون بحالة حداد او على الاقل تنطمس بشعور الذنب تجاه السَوته ويه اواب لكن هو هذا الواقع سمرة تشبه هواي ناس بعالمنا لا مبالاين كل همهم نفسهم و ارضـاء ذاتهم حتى لوكان على حسـاب الغير !
رجعت لبيتي نظفته مرة لخ عطرته و شغلت قرآن ، سبحت و بدلت ثوب اسود حلـو وكفت گدام المراية اتأمل شكلي ، مررت ايدي على بطني گلبي يخفق بقوة و ادعي ربي يتمملي على خير ، فرحت أخيـرًا لان راح اكدر اسعده و اعوض جزء من خسـاراته ، حبيبي الي غابت ضحكته من شهور و حتى من يبتسملي ابتسـامته تحمل أسى غير مسبوق ، حدثت جنيني بصوت خافت و كأني اخـاف ابوح بسعادتي و تنخطف مني :
مامـا حبيبي اذا چنت حتكون ولد اسمك اواب و اذا بنوتة اسمج بنين ، انفتح البـاب و دَخل خفيت شريط الاختبار رأسـا وتلگيته و رحبت بي :
حضني و كالعادة دايمـًا يشجعني من يشيد بنظافة وريحة البيت :
غيـاث :: احب ارجـع للبيت بس لخاطر انتِ بي
امني و امـاني و مسكني شگد احبنج تدرين ؟
-طَوقت ركبته بثنين ايديـه و بثقة تـامة همست :
ادري تحبني و اريد تحبني أَكثر بعد تدري ليش ؟
غيـاث :: ليش يا مـاي العين
-اخذت ايده و خَليتها على بطني ، توسعت عيونه بدهشة وافتهم المقصـود من گتله :
"حب واحد ميكفينـا احنـا الاثنين "
بنفس اللحـظة امتلئت محاجرة بالدمـوع :
غيـاث :: تحجين صدك .. انتِ ..
-هزيت راسي بـ"اي"
راح تصير اب يجنن
من شدة فرحتـه شالني من الارض و صار يدور بيـه مثل المجنون ،، صحت : ولك مو هيچ نزلنيي
يحضني و يباوعلي مثل الممصدك و يرد يحضني حيل
غيـاث :: رحمتك يارب ،، احمدك و اشكرك يارب
-هاي اللحظـة ما انسـاها ، لهفته تلعثمه وهو يعبر عيونة التلمع بفرح عارم من بعد شهور من الحزن هاي اللحـظة الها معزة بروحي و مستحيل راح انسـاها
و أصـر عليه ثاني يوم ياخذني لطبيبة نسـائية اسوي فحص ، رغم گتله ميحتاج وبعد وقت بس أصر على قرارة وهم گال ياخذني اشوف عَمي بعدما كتله طالب شوفتي ، اخذنا آني وكفاية لدكتورتها هم رادت تچيك فدمرة ، انتظرنا شويـة بالعيـادة و دگات گلبي اسمعها من هلگد ما متوترة ، صاحت على اسمائنا السكرتيرة ، دخلنـا صعدت كفاية اول وحدة والحمدلله صحتها عال العال وهم صار الي نصيب اول وحدة تعرف جنس المولود
الدكتورة :: راح تجيكم بنوتة
كفاية :: الحمدلله و الشكر كل شي يجي من الله انعم الله
الدكتورة :: ما شـاء الله وزنها زين و امورج تمـام صحة وعافية
-ناوشتها كلينكس مسحت بطنها من الجـل و اشرتلي اصعد وراهـا
-مدري ليش ارتبكت بس فيفي شجعتني ، صعدت للسدية و بلشت تمرر الجـل على بطني ، تباوع للشـاشة و تسألني على آخر شهرية
الدكتورة :: حمل موجود ، انت بالاسبوع السـادس بس نبض لهسة ماكو
بصوت خايف :
يعني شـنو دكتورة ؟
الدكتورة :: لا تخافين عزيزتي مرات يتأخر ظهور النبض
عند البعض لاسباب هواي بس كوليلي تاخذين علاج معين عندج امراض مزمنة ؟
-سولفتلها كفاية عن حالتي المرضية بذيج الفترة و ادوية مميعات الدم الاخذتها
الدكتورة :: هممم ، تعاليلي بعد عشرتيام وهم جيبي وياج كل الراچيتات و التحاليل العندج و ان شاء الله خير
-بلعت ريگي و گوه همست :
ان شـاء الله
اول ما طلعت من يمها حاجيت السكرتيرة :
عفية اكو حمـام هنا ؟
السكرتيرة :: اطلعي من هذا الممر على ايدج اليسرة
كفاية :: شمالج حبوبة شتهيسين ؟
-روحي كدامي فيفي هسة اجي وراج
راحت و تتلفتلي بشـك ، دخلت للحمـام ، عضيت عبايتي وظليت ابچي بحرقة ، ايدي على بطني و كأنما اناجي جنيني ، لا تخذلني ، لا تكسرني و تكسـّر ابوك ، احساس مو حلو جثم على صدري ، خايفة اخسر روح ثانية بسبب عقدي وأَمراضي و الغل الجـان تارس گلبي !
اغسـل وجهي و ارجـع ادخل بنوبة بچي انطحنت طحن واني احاول ادرب نفسي ما اتأثر من اطلع غياث شذنبه ؟
و كفاية ،، كفاية من حقها تفرح بمعرفة جنس جنينها على يا اساس اجي اخرب فرحتها ، اول فرحتها و اللحظة هذه تتذكرها طول العمر و تتناقلها من مناسبة لمناسبة اجي اخربها بكآبتي و وجهي العابس ، غسلت وجهي مرة ومرتين و ثلاثة لحدما جف خط الرمش و أَحمّر !
ابتسمت .. اي ماكو شي هاي هواجس تصير عند كل حامل و الدكتورة طمنتني !
جنت تردد هذه الجملة مثل الصدى يتلاطم بدماغي حتى اقتنع بيها و اعيشها ، فجـأة لكيتني اصعد للسيارة
و نبهني من شرودي صـوته :
غيـاث :: شبيج ود ، مو جاي احاجيج
-هااه
باوعلي بتأثر و كأن افتهم البية ، ابتسمتله رأسـًا :
مابيه حبيبي صار عندي لعبان نفس و احتاجيت حمام
غيـاث :: خير ان شـاء الله ، نتوكل لابو عگاب هسه
كفاية :: اي خوية رحمة على اهلك
-توجهنـا لبيت عمي حمـدان الي راح ازوره لأول مرة ، چان مشغل قرآن بصوت عبد الباسط طول الطريق الشي الي خلا نفسيتي تستقر و تخف هاي الغـصة الي ببلعومي
وصلنـا أَخيرًا و عيوني اندهشت من شفت بيتهم صح واجهته قديمـة بس چبير و محاوطة بستان تلكـانه بابا وشهاب چـانوا واكفين بالبـاب ، رغم كل الخلاف نزل غيـاث و القى تحية السلام رغم فتور السؤال و الجو المشحون ، و حسب الي عرفته سـابقًا من كفاية شهاب اجـه و ادى الواجب بفاتحة اواب
دخلنـا البيت تصميمه مثل اغلب البيوت هنـا غير متكلف بس فضاءاته شـاسعة طارمة كبيرة و ديوانيات ثنين وحدة للنسـاء و الاخرى للرجـال و المطبخ صاير بنهاية البيت ، سلمنـا على مرت عمي و چنتهم و بناته و چـان واضح التنافر بيناتنا بس كفاية بأسلوبها واخلاقها تجبر اكبر واحد يحترمها و يقدرها امـا اني اكتفيت بهمي ساكته وافكر بكلام الدكتورة ، لحدما اجـه السؤال المتوقع من چنتهم :
شهلة :: الله بالخير خَية شلونج شعلومج بشري ما صار عندج شي
-ابتسمت بتصنع :
الحمدلله عزيزتي ، ان شـاء الله بالطريق
-ضيقت عيونها عليه بعدم اقتنـاع :
شهلة :: چـا وينه شو كلشي ما مبين
كفاية :: رشيقـة خيّة ، هالتشوفينها چنها شبوطة بعد موش هسه يبين حملها
-لوت شفايفها بخبث :
شهلة :: اچلي دادة خافن يجي سلبوح سيان
بصوت مغتاض :
-لا عمري هاي مو قاعدة گم وحدة رشيقة جابت جاهل مينشال من السمن وكم وحدة مثلج اقصد متروسة تجيبة سلبوح ،
اختنگت و نطن عيونها :
شهلة :: شنهي كصدج عيني انه سمينه تراني حبلة موش سمن هذا
كفاية :: لا يبوي موش سمن هذا ، منيلج السمن شطب ريحان
-ضحكن بنات عمي و راحت تخوزرهن بنظرات شرر خلتهن يطافرن
صاحنا بابا حتى نسلم على عَمـو الراقد بغرفته ميكدر يگوم ، توجهنـا لغُرفته و ويانه زوجته ، دخلنه لغرفته الي تفوح منها ريحة الدوة و المرض ، تفاجئنا بي ضعفان وغركان بفراشـه ، انفاسـة مسموعة وكأنه يجاهد حتى يلتقطها انكفت عليه كفاية تبچي و تولول امـا اني تحمدتله السلامة من بعيد ، اشر لزوجته تطلع برا و تسد الباب ومتخلي احد يفوت علينـا اصابتنا حالة من الاستغراب و ظلينـا واحد يباوع بوجه الثاني
حرك عيونـه بأتجـاه ابويه مرة و بأتجـاهنا اني وكفاية مرة تكلم بنبرة غَريبة متعوبة بس بيها مزيج من الندم والتحدي :
حمدان :: يمكن راح تگولن هاي حوبتنـا
كفاية :: يا خوية استغفر الله شني السـالفة الشماته حرام اولا و ثانيـاً احنه اخوه شما صار بيناتنا الدم ما يصير ماي
حمدان :: معلـوم بس انه حيل اذيتچ خويه و اذيتك انت يخوي حتى بنيتك لاحها طشـاري
تكلم ابويـه بنبرة حزينة :
سليمان :: عرك خوان ، مصارين البطن تتعارك يحمدان
-ابتسم بذبول و همس :
حمدان :: انه مو بس عاركتك يخوي انه دبرتلك المكايد وحفرت جواك ياما
-اثار فضولي كلامـه ، تجاوزت صدمة بابا و سألته :
شنو قصدك عمـو ، اكو شي مانعرفه غير السويته بينا
غَمض عيونه بتعب :
حمدان :: من اول هيل شفتج گلت هاي لبوة ، شف شلون لكطت المضموم
سليمـان :: شنهي المضموم يخوي ؟
-كل صكعة طاحت على راسك انه چنت وراها يسلمـان
توسعت عيون ابويه بصدمـة اما اني فأحس كتلة مال غضب انحشرت بصدري اذا اطلعه احركه حرك !
استرسل بصوت مرهق :
حمدان :: الجمـاعة الصوبت فخري انه وراهم و التجار الصوبوك انه بعتك الهم و سالفة الاسلحة تعرفها بعد
-قاطعتـه بأنفعـال :
ليش ،، ليش كل هذا الغل على اخوك !
انتحبت كفاية و خزرني ابويه حتى اسكت !
حمدان :: حكج يبوي شما تگولين ، انه واحد چلب وعماني الجشع و الطمع والحسد بس يشهد ربي وانه بشدة ماسعيت لچتل ابوج كل الي ردته اصيرن مثله من يومـه صاير بالوجه وكل العيون عليه الا انه بالظل محد يشوفني
سليمـان :: ليش ما جيتني ما صارحتني ليش طعنتي بظهري يخوي
حمدان :: سامحني ،، ادري صعبة و اعرفن شكد اذيتك لچن ما اريدن اروحن و انت گليبك محمل عليـه
باوع لكفاية و استرسل :
حمدان :: و انتِ خوية سامحيني چثير اذيتج و وجفت بطريج قسمتج و ما شفتي مني ريج حلـو بيوم بس هاي بعد صـارت
صفنت عليه و مدري ليش متأثرت ، تكلمت بسخرية :
عجيبين انتم نتحمل اذاكم سنين و بلحظة تردونا نسامح !
سليمـان :: ود ! بسّج عـاد
-لا مو من حقـة يجيبنا هنا و يتصيد عاطفتنا بهالطريقة
وين چـان عنكم قبل كم مرة عرضك للموت كم مرة ذل كفاية و كم مرة طعني بشرفي ، عنفني و ضربني !
تقربت لحافة سريرة ، باوعتله بغضب لاهب :
طول حياتك عاديتنا بلا حتى شعور بالذنب ، تزرع بينا الشقاء ، طمعت بأسمنا و فلوسنا بس لمن صرت قريب من الموت تذكرت تستسمحنا بلا متنطينا فرصة او وقت نفكر بي اذا جنا نريد نسامحك او لا !
دنكت يم اذنه و شاورته :
و انتَ هم مثل البدوية ما كدرت أأذيكم مثل ما اذيتوني لكن عند الله تجتمع الخصوم و اني مستحيل ابريك الذمة !
توسعت عيونـة مرعوب ، و لسـانه نشل مو كادر ينطق
اخذتني كفاية و طلعتني برا الغَرفة ترزل بيه بخفوت :
كفاية :: شهالحقد ولج شوكت ينظف گلبج عاد رجال طريح الفراش على ساعة يموت انت ليش گلبج حجر
-ما ادري يا كفاية ، يمكن من رحت لبغداد نسيت جناحاتي عدكم
كفاية :: تتمهزئين حضرة جنابج الكسيف
-لا احجي صدك ، اني بشر عادي يحب و يكره ، يغل ويحقد ممكن ما تكون عنده القوة الكافية يأذي الي اذوه بس عنده الخيار اذا جـان يريد يسامح او لا خليكم انتم بطور الملاك
عفتهـا و رجـعت للديوانية يم بناته ، صفنن عليه بفضول و تسائلت البنت الچبيرة :
نهال :: شراد منج ابوي ؟
-ماكو شي ، راد نتبارى الذمم
فرت ايدها اختها الصغيرة و همست :
نهى :: والله خوش ظليتي بس انت يتبارى الذمم وياج
-ليش شبيه اني
نهى :: مابيج خـية بس من يوم الرديتي لليوم ما شفنا يوم عدل
-هه و انتِ منين تعرفيني حتى تحكمين عليه هيج ؟
نهى :: نعرفج خية نعرفج ، و نعرف بسببج انسجنوا اخوتي شهور و حتى انه لاحني من طشارج وخطيبي عافني
نهال :: ولچ نهية بسج عاد الفرخة شعليها ، خطيبج موش زلمة راداله حجة خاطر يطلكج
باوعتلها بغضب :
نهى :: هو شنهي الشعليها ، موش بسبة ابن خالها انچتلت البت و خذوا ولدنـا للحبوس !
-صحت بيها گازة على اسناني :
قصدج اخوتج الرعنان كتلو البنية بطلق عشوائي و اني الي تزوجت ابوها خاطر اخوانج يطلعون من السجن يالغبية ولوما ابوج مريض چـان گُمت هسة سحلتج ذهابًا و ايابًا و غسلتج غسل
نهضت من مكانها تضرب على صدرها :
نهى :: عوينة ابوي ذولة منهو الرعنان و هاي منو التسحليها لچ زقچة !
-ردنـا نتكافش لولا تدخل كفاية بآخر لحظة انقذت الموقف ، رزلتها بصوت خفيض:
كفاية :: لج انتِ صدك ماعدج حيـا ، الفرخة اول نوبة تدش على بيتكم هيج ربوج تهينين ضيفج يبت حمدان
نهال :: يا خية حسبيها عليه ، انه اطيحلج حظها بس ود الله يسلمها هم ما كصرت ، هنوب تگول على وليداتنا رعنان ترضيها
باوعتلها مضيقة عيونها :
كفاية :: چـا مجذبة موش رعنان ، شنهي نسيتي عمايلهم الكاع تصيح منهم الغوث و انتِ قسمتج تعطلت بسبتمن موش بسبة عكاب و مرته ؟ و حتى من عرستي ظلوا ينبشون وراج و يوميا طلابة ويا الزلمة و انتِ اللخ هاي النوبة فايته بچيس الله الج ، نوبة ثانية خن اسمعج تحاجينها هيج ، والله و جلالة الله اشرج عالحبل و اطيح حظج و حظ اليطلع وراج
اجـه صوتها الحاد من ورانـا :
شهلة :: على كيفج خية اشو كلتيهن بگشورهن ، شنهي ندري بيج صرتي مرت الشيخ بس موش تهينين بنواتنا ابيتنا ونسكت
التفتت الها كفاية و نظرات عيونها شرر :
كفاية :: و اهينج انتِ نوب اذا تدخلتي بيني وبيني و بين بنات اخوي !
اندارت عليـه و استرسلت :
كفاية :: امشينـا حبوبة علّكن ضغطي عساهن تعلگن بنار جهنم
مشيت من يمهن بتفاخر ، طلعنـا للطارمة، شاورتها :
كفو منج بردتي گلبي بيهن
كفاية :: امشي جدامي و لاتحجين انت هم بعدين احاسبج ، طلـع ورانا بابا و غياث بس وجه ابويه ما يتفسّر
سألت كفاية بخفوت :
شبيه ليش هيج وجهه مَغيم ؟
كفاية :: بعدين اسولفلج
-سولفي هسـة !
كفاية :: بعدين گتلج سالفة تخص المدهور الي يسمونة الشبح
-انقبض گلبي من طـاريه ، تسالمنـا ويه بابا و صعدنا للسيارة رجعنـا تقريباً الدنيـا ليل ، لكينه زنوبة معشيتهم و مخليتلنه عشـا ، باركت لكفاية على البنوتة وهم واستني على سالفة نبض الجنين ، اخذت العشـا منها وعبرت للمشتمل ، لكيته متمدد يتفرج الاخبـار بفضول والي مابيها شي يبشر بخير من ناحية الوضع الامني و من ناحية جائحة كورونا الي تفشت بدول العالم كالنـار في الهشيم ، باوعلي و فتح ذراعـة بأبتسـامة حنونة تركت صينية العشـا و تقربت جاورته و ويـا ما حطيت راسي على صدره نزلت دمعتي اطلق تنهيدة طويلة
غيـاث :: خليهـا على الله
-گالتلك كفاية ؟
غياث :: گالت
-خايفة غيـاث ،، خايفة اخسـره و اخذلك مرة ثـانية
-رفع وجـهي اله ، تكلم بتسليم تـام :
غيـاث :: اذا الله قاسمـه النه انعم الله و اذا ما قاسمـة هم انعم الله لان اكيد راح يعوضنـا بالاحسن
هزيت راسي بـ " لا "
اني السبب ،، اني معلولة ، ما اكدر اصيـر ام
اخذ وجهي بين ايديه :
غيـاث :: ششش كل شي ما بيچ انتِ چنج العافية وحمدي ربچ على العندج ود اعرف المريتي بيه موش قليل بس تنوعي لروحج هسه صحتج احسن وتخطيتي چثير امور و ارجـع واكلج القسمه رب العالمين محمود مشكور و الما قسمه فعرفي ضاملج الاحسن
غمضت جفوني براحـة واني مسلمة كل اموري لرب العالمين ،
اجتني كفاية ثاني يوم و صدمتني بآخر الاخبـار انه عمي محذر ابويه من الشبح ، تساءلت بذهول :
حمدان شجـابة عالشبح اذا هو محد يعرفه و لا احد شايفه ؟
كفاية :: الظاهر عمج متخشخش جوه التجـار و واصلة خبر الشبح رايد ابوج
-خو گولي عمي عالسـة لا متخشخش ولا شي بعدين شيردون منه لابويه و هو عاف الشغل من زمان
كفاية :: مادري حبوبة بس موصله طارش بيد جمـاعة لو تنطيني الاريده لو اخذ منك كلشي تريده
-و شمنتظر ابويه يكتلوه ميروح يبلغ عليه هذا ابتزاز
-هزت راسها بأسف :
كفاية :: ابوج بنظر القانون مجرم و القانون يا بنتي ما يحامي لمجرمين خليها ابالج اذا ابوج وصل خبر للحكومة كلها تروح بيها البايع و المشتري و الساكت عن شغلهم
-لعد شراح يسوي فهميني
كفاية :: امس گالي انه اتصرف ، و من سألته شلون راح تتصرف كالالي امن فلوسك عند الحرامي ولا تخاف
گلبي لاسبني من عده مرات يگوم يدرعم منا و منا
-الله يستر ، گلبي ما مرتاح هذا الي يشتغل شغل اعوج لابد يجي يوم و يدفع ثمن افعاله
كفاية :: الله يستر عليه و على امة محمد هنوب لكفتنا الكورونا ، دخيل الزهرة يگلج الي تطيح بي تچتلة بالمچان
-ههه لا ترى حالها حال الفلاونزة و يمكن الفلاونزة اخطر
الناس لازم تلتزم بالنظافة و التبـاعد الاجتماعي
كفاية :: ياحبوبة ياهو اليتباعد و احنا ناس تدش على ناس واهم شي عدنـا صلة الرحم اما عمج مضيفة ما ينسد مفتوح للرايح و الجاي
-الله يستر من الرايح و الجـاي
اجـاني ألم مفاجئ ببطني ، ركـضت للحمـام تقيأت كل معدتي ، هي واكفة وراي تلـم شعري خاف يتوسخ حتى ما استنكفت من وضعي ، بصوت حنون :
كفاية :: وحامج قوي ، لا تخافين بلچن الله يجبر بخاطرج و يتم حملج على خير
باوعتلها، حنونة شفـافة ، منظرها يحسسك بالسكينة
بطنها الي رافعه ثوبها و خدودها ، صحت :
هنيال عمـو مهران بيج ، تخيلي كفاية جهالنا يكبرون سوه
جرتني و حضنتني حيل :
كفاية :: ان شاء الله يبعد چبدي
مرت ايام اصابني بيها نوم فضيع و تقلبات مزاجية خاف عايزة گبل ، كعدت لگيته گبالي گاعد و يتأملني بحب :
غيـاث :: احب وجهج لمن تنـامين
سندت روحي على اكواعي ،، سألته : بس من انـام؟
سافرت ايده على طول جسمي ، رد بصوت هامس
من تنامين ، من تضحكين حتى من تبچين اعشكج
-هممم على كيفك هيج اني حلوة !
غيـاث :: بالدنيـا اكو الحلوة و اكو الكلش حلوة و اكو انتِ
-آني شنـو ؟
غيـاث :: انتِ حويتيهن كلهن ، ترستي عيوني ومليتي گلبي
استوطنتي على كل ذرة من كياني
-همم كم مرة اكولك ما اكدرلك ،،ملسـون !
لمعـن عيونـه الحزينة ، شوكت ترجعلي سألته ؟
غياث :: آني يمج و الچ و بين ايديج
-مشتاقة لضحكتك ، لمداهرك لشقاك المُدرج بلائحة محتوى البـالغين
اهتز جسمـه يضحك !
ابتهجت .. يا ويليي اذوب آني اذوب بضحكتك
غيـاث :: يااابه مو انه رجـال فقير و انتِ هواي تندكين بيه
مررت سبابتي على منحرة ، همست بغنج :
واذا اندكيت بيك شتسويلي ؟
لمعن عيونـه بدهـاء ، رأسـاً شلح تشيرته وصاح :
غيـاث :: احنـا المحد يندك بينـا ..
عرفتـه راح يتشاقى شقاه الثگيل لو يدغدغني حيل وبالفعل اشتغلني لحدما خلاني اتوسل يعوفني و ما جانت عنده اي نيـة يتركني ، تلاكت عيونا بشوق جامح لكن ..
فجـأة سمعنـا صوت صرخـة جاية من بيتهم ،، صحت :
هذا صـوت كفاية سترك ربي
لبس تشيرته و لبست صاية على وجه السرعة ، لفيت راسي وعبرنـة ، ما خابت شكوكي و توقعت الخبر يخص
عمي حمـدان ، توفى متأثر بمرضه ..
مـا ادري اذا بسبب الفيروس او بسبب تعامل المرحوم ما شفت ناس هواي اجـو بفاتحته ، يعني اكو بس موهذا العدد الرَهيب الي شفته بفاتحة الشيخ و فاتحة اواب الله يرحمهم ، شاورتني زينب بصوت خفيض :
زينب :: جاي اهيس حتى النسوان تلطم بدافع الواجب موش بدافع الحزن ، الله يرحمك حمدان حتى بفاتحتك مشرد الوادم منك
-نَصيت راسي و همست من جوه اسناني :
اذكروا محاسن موتاكم
زينب :: هن وينهن المحاسن الله وكيلج مامش
گوة لزمت نفسي ماضحكت :
گومي من يمي زينب
زينب :: خلص خية سكتت يا چلمة ردي لمچـانچ
صاحت بنتـه الچبيرة :
نهال :: سوده عليـه بويه ، ابو وجـه الحلو ، ياحيف تصير جوه التراب
-حَسيت بزينب راح تذبلها قنبلة ما التفتت عليها بس سمعتها هسهسهت بخفوت جوه شيلتها :
زينب :: هذا ياهو الوَجهه حلـو بو عگاب ؟
ردت چنتهم بصوت اعلى ::
شهلة :: مودع بالله عمييي، رايتك بيضة هم حجيت على احد بيوم شلت غيبة احد
مدري شجـاني و باوعت لزينب لگيتها تولول جوه الشيلة و كالت :
زينب :: لا ابد وييين رايتك بيضـة بو عگاب
ردت باعتلي و اهتزن شفافها بضحكة كتومة اني هم مكدرت الزم روحي شركت حلكي محسيت الا ايد خمشتني من چتفي ورفعتني من الكاع تهز بيـه ، لفيت لكيتها شهلة :
شهلة :: شنهي ولج عدج عرس تتمضحكين ؟
شالت راسـها كفاية من بعيد تباوعلنا بأستغراب ، گامت
زينب تريد تجرني منها متكدر تكول بلايس وچلب بزندي
زينب ::يااا حبوبة شبلاج عالفرخة ، هديها عاد مو راح تخلعين ذراعها
شهلة :: خليني اربيها لهالوكحة ام عين صلفة جاي تضحك واحنا حلوجنا متروسة دم
-فضحتني البربوك النسوان كلها تباوعلي تفشلت ، اجت كفاية عتتني منهـا حيل و بخزرة حاجتها :
كفاية :: لون تعرفين حلوجنا مليانه دم ما تعملين هيَج يالرعنـة ، امشي انچبي لمجانج ، انه اعلمج بعدين
فجـأة صرخت شهلة :
هاااي شني ..
بأستغراب باوعنه الها لكن بهاللحظـة حسيت بشي ينسحب مني من تبعت مسـار نظراتهن ....
شكرا لزيارتكم عالم روايات سكيرهوم
