رواية عشك فلاح الفصل الثالث 3 بقلم ورود الخالدي

جنة::

نزلت اني وماما من السطح لكيت عمه ام علي دتسوي ريوك..لخالي..كلت لماما اروح اخسل..وابدل العبايه من اول البارحة ﻻبستها..فكلتلي:

البسي مﻻبس طويلة يوم؟

اي يوم صار..

رحت للحمام الحمام مالهم الارضية كاشي والحياطين سمنت مصبوغة صبغ ابيض..وبي بس رف عليه صابون ..ركي..اوحدة زغيرة من هاي ام ربع ماكو ﻻعلبه شامبو..ﻻمكيف ﻻشي فكرت لعد البنات شلون يسبحن شنو بدون شامبو..فتحت البوري المي دافي..موبارد بس خسلت..اديه ووجهي وخليت شويه مي على ركبتي بس يربي وين ابدل عمتي بالمطبخ والولد كولمن بغرفته همه وعوائلهم..رحت فتحت الجنطة جانت بالهول طلعت تنوره جويتي طويلة وقميص كريمي..بس ..ﻻ...حرامات..ماما جانت... مستعجلة نست تخليلينا مﻻبس داخليه هسه شلون ابقة بهذه المﻻبس..من اول البارحة ﻻبستهن وهنا موت حر اعرك..وينشفن على جسمي..المهم..رحت نزعت العبايه بالحمام ولبست..التنورة والقميص..فوك مﻻبسي الجوة شسوي مكدرت ابدلهن مجايبة غيرهن..ولبست الشال اليخنك مال عمه ام علي..طلعت بعدني دا امشي بالممر حتى ادخل للبيت ﻻن حمامهم خارجي..سمعت صوت علي:

شني خويه رايحة للمدرسة!!!     

التفتت عليه..جان ﻻبس دشداسه رصاصي..وغترة هم رصاصية مبدل يمكن يريد يطلع فكتلة:

مدرسه شنو مفهمت؟

هدومج مال مدرسة..زنوبة وزهيرة من يمشن للمدرسه يلبسن مثلج جوة العبي؟

شنو انت دتصنف؟؟

ﻻ بعد اخوج..ما اصنف..بس روحي لبسيلج دشداشة استر..واحسن؟

وشبيها مﻻبسي..اكيد مستورة شنو الستر بس.... بالدشداشة..بعدبن تعال اكولك..ترة..المﻻبس..مو هنه اليقيمن البشر..بس النيته عاطلة يعتبر..المﻻبس تقييم للستر..

اي والله خوش تحجين ست جنة

هو يباوعلي من فوك لجوة عبالك ممقتنع ﻻبكﻻمي ولابلبسي هذا شبي شايف نفسه ويبسمر بيه من شافني..لحد اﻻن..ههه عباله اسكتلة:

وليش..ما احجي شنو معندي..لسان..اكيد عندي جواب لكل سؤال:

اكلج ترة اني ما الي خلك..للتنغوص مالج من الصبح الف شغلة عندي..كتلج لبسي دشداشة ﻻن استرلج ترة الحوش بيه زلم..والزلم عدها عوايل..واذا مسويه روحج فهميه..افهمي معني كﻻمي..

وعافني وطلع..يا الله هذا شبي وشنو قصده..هسه اني شبيه مهتمة لكﻻمه..واحد..شايف نفسه ع الفارغ..دخلي يطير..ابقة بتنورتي بعنادة..هو اني جايبتلي كم فستان وتنورة شنو عندي كنتوري..شايلته ع ضهري والبس ع..مزاجه ..امدايه حتى مﻻبس.... داخليه مجايبة بقيت ع الﻻبستهن ...شفت خالي طالع..يمكن رايحين لمكان ﻻن خالي هم مبدل ومخلي عطر..

علي:::

صعدت سيارتي..اوصل ابوي للكراج مال بغداد ماقبل ياخذ السيارة يكلي:

 اروح عبري..احسن خلي السيارة بالحوش خاف تعتازها بشغلة

صعدته بسيارات بغداد ورديت..

فتت الغرفتي محمد بعده نايم..نزعت دشداشتي وكعدت ع الجربايه بعدني مامتريك..بس ابوي تريك ومشه..امي تدري بيه ما اتريك من وكت..يعني من يكعدن خواتي..يصبلي ريوك..اجتني زهيرة تركض..:

امي تكول يتريك ويانه لو اجيب..الريوك يمه..

ﻻ ..ﻻ تجيبة..اجي يمكم بعده محمد نايم ..

امي وعمتي جابن الريوك هيه ماشفتهه يمكن..بعدها بالمطبخ..طلعن نسوان حسين..وحيدر.وفروخهن وراهن.. والتمينا..وشفتها طلعت من المطبخ..اووف ماتسمع الحجي بعدها بهدوم المدرسة...التنورة طويلة بس ﻻزكة عليها..وهي ماشاء الله..جسمها..يكتل..رادت تكعد بالكاع كوة كعدت طبها مرض شجابرها تلبس تنورة ضيكة..

اني كاعد بس اشوف اليصير كلت..خلي اشوف تاليته الريوك..اشرب جاي اشوف حميدة وانعام مامرتاحات كصنها كص..بكلبي..اضحك..اكول اي..خلي..اتونس ع الطﻻيب..مبين راح تكب..حسين جاب ابنه الزغير وكعد يمها..                                                

شوفي جنة شلون انتاج..

ههه اي كولش حلو..شنو اسمه

كرار..سميته كرار..

فدوة يخبل..

اشوف حميدة..تفرك بأديه ودها تاكلها..هي وحسين..العب..بدت..الطﻻبة اﻻولة.وية حسين..

هيه جاي تاكل وغصت....شو هذا حسين بسرعة كام ذب الولد بحضن امه..وركض..يجيب ماي..انه بكلبي.... ميت من الضحك..اطاها ماي..

شربي..شربي خويه يخربيتي غصت..

مرته اخذت الولد وعافت الريوك..وطبت للغرفة..هوتريك وكمل وطب يمها..اني ورثت جكارتي وكاعد..متاني..العيطة..

بس جنه كبالي كاعدة حتى من كامن اخواتي ومرت حيدر..هيه بقت ماكامت..بس صدك وين تروح هو بس الهول..عدها..وين تكعد بعد..شوية وسمعنا مرت حسين..                                      

ها..ابو..عبيس..كتلتك المحنة اليوم...شوفي اﻻنتاج..وسميته..كرار..خايب.شمالك..ملطلط..وماشايف...ﻻ...ومن غصت ركضت زركت..الفرخ بحضني..هاج..شربي.ماي يخربيتي..من كون انهجم بيتك.على هاللوكة...

حميدة انجبي..ﻻتكبرين السالفة البت غصت واطيتها ماي...شني هي غريبة لو بت عمتي..

اي بت عمتك...وانت كلبك رهيف....من يمته..هسه لو انه اغص..بطابوكة هم ماتطيني ماي.... حميدة كضي لسانج..ﻻتخليني اكوم اكصه..

تكص لساني جا احجي الحك..مو..حسيون..بطل من جنة..ترة وعلي..والسمه علي اخذ فروخي واهج..

حسهم عالي وهاي حميدة اعرفها وكحة ورعنه وماتسكت والله..عرفتها الطﻻيب راح تكب..من اول يوم بس شسوي ابوي ماياخذ الحجي..هيه باوعتلي..وكالت:

شنو همه ديحجون عليه؟

ﻻيابوي يحجون عليج شني ..هاي وحدة جيرانه اسمها جنة ﻻبسه تنورة ضيكة..ومرت اخوي..تغار منها؟..مثل ماكلتي..ست جنة المﻻبس ماتقيم البشر..بس النيته عاطلة يشوفهن عاطﻻت..ويمكن حميدة مرت اخوي..نيتها عاطلة اليوم..

جنة:::

هذا ديحجي من كل عقلة شلون منتجي على ايدة..ومخلي الجكارة صفح ويحجي ويايه عبالك بنتة الزغيره....كتلة:

اي صح بس النيته عاطلة يحجي مثلك..

عمي انه نيتي عاطلة بس بشرفج لو ﻻبسه دشداشة وحاشمة روحج..وكاعدة يم امج وملفلفة ..جا صارت هاي الطﻻبة..موكتلج البيت بي زلم..وعدهم عوايل بس عقلج مجيم..ماتفتهمين؟

والله اني مجابرة احد يباوع عليه ..ومحشومة غصبن ع اي واحد..واذا ضايج من مﻻبسي ..غمض عيونك

                                              

بكيفج..ضلي بس..ﻻتكولين بعدين ابو محمد..ما كال!

اكولك..ترة انت خابص نفسك ومنطيها حجم..هوايه تره اني مقتنعة بلبسي وبتصرفاتي وكﻻمك ﻻيقدم وﻻ يأخر..ماشي؟؟

عفته ورحت للمطبخ صح المطبخ حار..بس احسن من..ما اضل مكابلته..شلون يحجي ع كيفه....ويدخن عبالك رئيس جمهورية كاعد..بقمة..والله يا الله..

بقيت يم عمه ام علي بالمطبخ طلعن البنات يخسلن بساحة البيت..مالهم..ومرت حيدر..عجنت..واللخ دتسوي غدة..خلص الوقت صار الضهر بس اني ميته..... حر..شفت زنوبه كتلها:

اكولج اريد اشتري شامبو..

عدنا شانبو ليش تشترين..

ها عدكم اشومشفته بالحمام

ها مو امي تضمة ماتخلي بالحمام..ﻻن هذن..حميدة وانعام بالعناد..يضمن الشانبو مالتهن ويغسلن عبيهن بالشانبو مالتنا..تردين تسبحين؟

اي..والله ميته حر..

هسه اطيج..

وانطتني شامبو رحت للحمام فتحت المي..بالقروانه النايلون اويلي المي يفور..شلون يسبحون بيه..  

رجعت على زنوبه

فدوة زنوبه المي يفور شلون تسبحون.

اي خيتي اترسي البادية وخليها تبرد واسبحي

ها..هيجي..

اي هيج..خيتي واذا محترة كلش العصر..نروح بسكته انه وانتي وزهيرة نسبح يم الماطور..

وليش بسكته..

اي بسكته..جا غير..اذا..شافنه علي نسبح هناك نشبع صودندات ودك..

شلون يشوفجن شنو اكو مسبح مفتوح هناك..

هههههههه..تكول مسبح..اي خيتي .اي مثل المسبح الماي بارد..حلو..

اذا علي ميقبل شلون ترحن..

نروح من غير درية..هو يروح يتعلل..من العصر يم صحبانه وحيدر..وحسن هم مايجون لليل..احنا نروح نسبح يم الماطور ونرد المغرب..كبل مايجون..

هااا...هيج

بس شلون تسبحن والمكان مفتوح..يعني 

شبيج سويتيها دوخة نروح نسبح بدشاديشنه ونطلع الغروب وبالدرب تيبس هدومنا..

ها..فهمت..

معجبتني الفكرة شنو اسبح بمﻻبسي رحت ترست القروانه مي كلت من تبرد اسبح بالحمام خليهن هنه يرحن اني ما اروح لهذا المسبح بعدين اخاف اخوهن يعرف..ومبيه حيل حجية مثل السم......

وره ساعتين رحت اريد اشوف المي برد لو ﻻ..شفت البزونه تشرب..منه..يبوووولعبت نفسي بطلت بعد ما اسبح بيه..شلون قهر..يربي..كلبت المي وطلعت..شفت الولد طلعو..وراهم علي هم شفته مبدل وديصعد سيارته اجتني زهورة

ها...جنة ترحين ويانه كلهم طلعو

هااا.اي اروح بس شلون اسبح بالتنورة اخاف متنشف..

شني تنورة..ذبيهن ذني هدومج..كلهن ولبسي بس دشداشه ..خلي نروح حتى نرد ورة المغرب..

اي راح البس دشداشه من امي واجي..وياجن..

رحت نزعت مﻻبسي كولهن حتى الداخليات كلت نرجع بالليل محد يشوفنا..واني عود اغسلهن..واصعد انام والصبح البسهن...وكلت ﻻمي راح اروح ويه البنات..نكعد برة..

طلعنا..اشو نمشي والطريق ميخلص شنو هذا وين صاير المسبح..اشو طلع بعيد..

وباﻻخير..وصلنا بوري مال مي كولش..جبير ويجري بمكان يخوف مثل البحيرة..يااااا...هو هذا المسبح عزة..عزة لو اموت ما اسبح هنا..عبالي مسبح من صدوك..زنوبة كالت:

يله جنة تعالي نفوت؛

تحجين صدوك لو اموت ما انزل هنا..

شني ماتعرفين تسبحين ترة الماي موكلش غميج..

ﻻ..ﻻ..انتن سبحن..لو اموت ما انزل اخاف

هنه نزلن بمﻻبسهن يسبحن بالمي..ويلعبن تعجبت شلون يعرفن يسبحن اني ما اعرف يمكن متر..مي اغرك بيه كعدت..ع الجرف خليت رجليه بالمي..الله شكد بارد المي..هنيالهن ميخافن يعرفن يسبحن..متعلمات..اشو شويه..زنوبة صفنت:

ولجن..يمكن هاي سيارة علي..اي ولجن هيه..خلي نشرد كبل ﻻيجي..هنه طلعن من المي يركضن..اني جلبت دشداشتي بغصن يم المي..ردت اجرها..جان اوكع على وجهي..المي اخذني كمت ارجف..خفت كلت هاي هيه راح اغرك واموت

الفصل الرابع من هنا