رواية خيانة لا تغتفر الفصل الثالث بقلم جمانه السعيدي
نازك...من كد القهر على مريم قررت امنعه تزوج لازم اتكمل دراسته
خصوصا وهي بعد مااجت تقرأ يمي ابد
يمكن لغت فكرت الامتحانات
بعدها بيوم رحت اني واخوي وصلني وكال اني ارجعلج
دخلت بس شافتني اتفاجئت مني
سلمت عليه وعلى اخواته وعلى امه وكعدت
نازك...اريد احجي وياج
مريم...اعرف شتريدين تحجين اذا على موضوع الزواج
انسي ابطل
نازك...ولج بكد عمرج مرتين شنو تعرفين عنه وعن اطباعه
شلون عايش حياته هناك
صدكيني بس تمتحنين وتنجحين راح تلكين الأحسن منه بلكليه
انتي حلوه وماناقصج شي
مريم....بابا افتهمي بلخارج تعرفين شنو بلسويد يعني الجو حلو والاكل غير والكهرباء ماتنطفي والماي يخبل
وعندا شركه قابل اخذ واحد بلعراق عندا شركه
وهذا الي بلعراق اذا تجي وشاف ببتنا برائيج راح يوافق
وحتلو وافق راح يبقى يعيرني بمستواه المعيشي طول العمر
على الاقل هذا ماشايف بيتنا
نازك...شلون تزوجين واحد ماتحبينه ولا تعرفين عنه أي شي
مريم....قابل هو الحب شنو بس نعيش سوا اني راح اخلي يحبني اصلا بس يشوفني راح يحبني ويتعلق بيه
اني شنو ناقصني
( هنا مريم ركزت على كلمة يحبني وماكالت احبه كانت عدها ثقه بجمالها وان اي واحد راح يشوفه راسا يحبه
بس مو مهم هي تحبه لو لا
نازك....شلون تعوفيني
مريم...وانتي شكو عليج قابل واني راح اتصل يوميه اطمن عليج
نازك....يعني مراح تبطلين من هذا الزواج
على الاقل اطلبي وكت تفكرين او منا لمن تخلص الامتحانات شنو جنج ماصدكتي خطبج واحد بلخارج
مريم...ابطل اني اصلا ماصدكت الله استجاب الدعائي
وراح يتحقق حلمي
نازك...امتحني ذني الامتحانيين اخذي شهادة السادس
مريم...مالي واهس للدراسه
بعدين هم يله اريد اطلع جواز واكمل شغلاتي لان هو مستعجل على الزواج
نازك...خاف تتندمين
مريم.... لا مااتندم ابد يمكن اخذج وياي هناك اشوفلج عريس
نازك....لا شكرا اني اريد اكمل دراستي واتخرج والزواج اخر همي اصلا ماناويه ازوج اذا مااتخرج واتوضف
طلعت من بيت مريم ضايجه اكثر من قبل اتوقعت اكدر اقنعه
ثاني يوم اتفاجئت اجت البيتنا من شفته فرحت توقعت
غيرت رائيه وتريد تمتحن يعني جايه تقرا
نازك...هله همزين غيرتي رائيج راح تمتحنيين
مريم...يااا امتحن اريد ملابس حلوه اخذ بيهن صور وادزهن للعريس
نازك...يااا واني اكول غيرت رائيه
مريم...احلى ملابس عندج اريدهن اريد اخذله كم صوره يشوفني ويتخبل عليه
نازك فتحت الكنتور وكتله اخذي اي شي يعجبج
هاي الملابس كله كدامج
فتحت الكنتور وأخذت احلى ملابسي
اكشخ ملابس عندي اخذتهن حتى بعدني مالابستهن
اني عيني عليه وساكته مااريد اكسر خاطرها ابد
مريم...اخذ ذني خوما ترديهن
نازك استحيت منه كتله لا اخذيهن بلعافيه
بدت مريم اجراءات العرس الي كان أوله الجواز واشترت ملابس وذهب والصالون
طولت أوراق السفر يله طلعت محتاجه كومة موافقات
تقريبا ست اشهر وهي تمشي بلمعامله
طبعا العقد تم بلوكاله
زوجه سوا وكاله الزوج عمته وتم العقد بيت مريم
ماعزمت اي احد بس اني وامي وعمة العريس و كم وحده من اقاربهم
بعدين بقت منتضره تطلع الموافقه حتى تسافر
كان الاتفاق تطلع للاردن هي وابوها
بعدين تسافر وحدها والعريس هناك ينتضرها
يوم الي ودعته عمت عيوني من البجي عليه
تركت فراغ مو معقول بنفسي صديقتي صار سنيين
شلون تعوفني وتسافر
وكعت مريضه وماكدرت اداوم تقريبا اربع ايام واني ما
رايحه الدوام ابد
طبعا اني انقبلت معهد صيدله وبديت اداوم بس طول هاي الفتره الي بعدها مامسافره
اني اروح وارجع عليه
انكسر واهسي حيل بسببه
بقيت انتضرها توصل وتتصل حتى اطمن عليه
بس مااتصلت بيه قلقت عليه حيل
رحت البيتهم اطمن عليه
نازك...خاله فدوه مريم مااتصلت ضل بالي يمه
ام مريم..اي اتصلت مره وحده كالت وصلت الحمد لله
نازك...اني ليش ماتتصل عليه
ام مريم...بعدها عروس جديده وملتهيه هسه تتصل عليج
بعدها بيومين اتصلت مريم عليه
بس سمعت صوته كمت ابجي
مريم...شبيج ليش تبجين تعاي وشوفي الأجواء هنا تنسين امج وابوج
نازك...يعني انتي مرتاحه
مريم...طبعا مرتاحه بعدني عروس ومددله
البارحه اهله عزمونا بيتهم هنا المنطقه تخبل
نازك ...بلعافيه حبيبتي
مريم...الله يعافيج
نازك...ممكن تتصلين بيه وطمنيبني عليج
مريم...طبعا اتصل بيج لج انتي صديقتي الوحيده مااكدر استغني عنج
نازك...اني هم احبج
مريم...متعجبين بملابسنا الي جبتهن وياي يكولون كلش حلوه ملابسكم بلعراق
وخاصه الملابس الي اخذتهن منج يخبلن عليه
نازك...بلعافيه
مريم...عود مو تنسيني اشتريلي ملابس وياج حلوات
ودزبهن الاهلي وهمه يدزوهن اليه
نازك...صار تدللين
نازك بديت اتعود شويه شويه على أجواء الدراسه وكدرت اجاوز التعب النفسي الي حسيت بي من فاركت صديقة عمري
كلما ادخل الغرفتي اذكر مريم وشلون نكعد وشلون نتعارك
وشلون تكعد تقيس ملابسي
وشلون بلمدرسه جنا نضحك ونسولف
تعرفت على بنات ثنيين يداومن وياي ايمان وايات
خوش بنات واخلاقهن حلوه
بس ماسدن الفراغ الي عافته مريم ابد
المهم بقينا سوا وعلاقتنا اني وياهن حيل اطورت
اني مااجره خط خاص بيه يوصلني كل يوم ويرجعني للبيت
بيوم اتأخر عليه الخط اتصلت على السايق
نازك...هااا عمو وين صرت اتاخرت عليه
السايق...انا بالتصليح السياره عطلت خاف اتأخر عليج
نازك...تمام اني راح اااجر سياره وارجع للبيت
ايمان وايات سمعني اخابر
آيات.. هااا خير
نازك...السياره عطلت راح ااجر تكسي وارجع للبيت
ايات...احنا نوصلج بطريقنا
نازك...لا عليمن اتعبكم اني ااجر تكسي
ايات...بلا كلام زايد احنا اليوم نوصلج بطريقنا
طبعا همه بمنطقه واحنا بيتنا بمنطقه ثانيه يعني تقريبا
ساعه فرق بسبب الازدحامات
المهم شويه وطبكت سياره وبيها ولد شاب يسوق
ايات...يله نوصلج بطريقنا
سحبتني من ايدي ودخلتني السياره
ايات...اعرفج اخوي بسام
صديقتي نازك
بسام...اهلا وسهلا
نازك...هله بيك
وصلوني للبيت وتشكرت منهم وراحووو
بعد هاي المره ماصعدت وياهم ابد
بعد شهرين تقريبا كاعدين احنا التلاثه اني وايات وايمان
برا بلحديقه نسولف
جان اجاها تليفون اخوها متعرض الحادث وناقلينا للمستشفى
البنيه انهارت فد مره وكامت تبجي وماتندل دربه
تريد تطلع تروح للمستشفى تشوف اخوها
اني وايمان قررنا نروح وياها ومانعوفه ابد
اتصلت اني على السايق اجاني واخذنا للمستشفى
وصلنا ولكينا اهله كلهم موجودين
ايات بس شافت امه انهارت بلبجي خطيه اهله حيل متاثرين على حالة بسام
حقهم هذا الولد الوحيد عدهم على ثنيين بنات
اتصلت على امي وشرحتله الحاله خاف اتاخر
بقينا ننتضر برا اكثر من ساعه يله طلع من العمليات
الحمد لله وضعه تمام
ايمان بس اطمنت على بسام طلعت رجعت البيتهم
واني بقيت وياهم خطيه ايات ابد مابطلت بجي على اخوها
بعدين جابو اكل اني ماقبلت اكل وياهم ترخصت ورجعت البيتنا
بليل رحنا اني وبابا نطمن على وضع بسام
كان واعي بس اكو اثار كدمات بوجه وبطنه مربوطه
ورجله هم
ايات...ليش كلفتو نفسكم
نازك...لا بلعكس احنا اهل
ابو نازك..اذا محتاجين شي احنا بلخدمه
ايات...تسلمون هاي جيتكم كلش كافيه
بسام....ممنون منكم تعبتكم وياي
ابو نازك...شلون صرت احسن
بسام..الحمد لله احسن
ابو نازك...يستاهل الحمد
نازك....ثاني يوم مريت عليهم من طلعت من المعهد كان عدنا بس محاضرتين
خليت السايق يمر عليهم
اخذت باقة ورد وعلبة حلويات ورحت عليهم
دخلت للغرفه كان بس بسام موجود
نازك... هلو مرحبا
بس شافني ابتسم ابتسامه حلوه
بسام..اهلا وسهلا
نازك...اليوم وحدك
بسام...انهزموا مني
نازك...ليش ينهزمون
بسام...تعبتهم
نازك...البارحه لو تشوف حالتهم وانت بالعمليات خطيه
حالتهم حاله
بسام...امي ابوي راحو يرتاحون وايات نزلت جوا اجيب العلاج
نازك....اليوم وضعك تمام
بسام..الحمد لله عدت على خير
نازك...شلون صار الحادث
بسام...سياره يسوقه طفل طلعت من الفرع سريعه وضربت سيارتي
نازك...الحمد لله عدت على خير
راسا دخلت ايات
ايات...هلو نونه ليش تعبتي نفسج ترا هواي علينا هذا الاهتمام
نازك...لا مو هواي احنا صديقات وهذا واجب
بسام...الله لا يشوفكم مكروه وشكر لهذا الاهتمام
نازك...ليش مكبرين الموضوع ترا عادي مجرد زياره
ايات...اتغدي ويانه هسه راح يجي الغده
نازك..الف عافيه اترخص منكم
ان شاء الله الشفاء العاجل
بسام...شكرا على الورد والحلويات
