رواية لست خائنه الفصل الرابع 4 بقلم انين الليل

تدرون بيه انا احترك 

بحاجتكم انا اطفوني 

كدامكم بس الجسد 

خاوي وعميتو عيوني 

تدرون بيه شكد احن 

وشكد اون تدروني 

وصيحاتي مخنوكه بممر شبساع ضيعتوني 

دلوني ع الحب من بجى 

والصدك لمن اندفن 

والاه عاشت وخلفت 

ضيم وقهر فوك الحزن

////////////////////

رضوى

لمن راح سلام وعطاء وبيت عمي طاهر بقيت انا افتر بالبيت بصراحه ضجت حجيت وانا اتافف

=اوووف هسه انا لو رايحه وياهم مو احسن لا وانوب ست آلحسن كويثر مشتهيه كباب وسلام 

وصى على مشاوي وبيبسي زين انا ليش ما رحت شلي خلاني ابقى

نزلت سويت لفة جبن وخيار واخذت تفاحه واكلت وانا ضايجه وكل شويه ألوم روحي 

=ليش ما رحت هسه كوثر شنو تحجي ويا امداني لو رايحه اصلا ما اخلي يتحرك يمها

انا ما أطيق اشوف كوثر تباوع السلام ادري بيها تحبه من احنه زغار وجانت دووم تسوي وياي مشاكل 

ومن تشوف اخوانها تكللهم رضوى ضربتني وحتى مره جانو يمنا اخوانها كالت هسه اخليهم يجوون يبسطونج 

كتلها 

=لا ما تكدرين شتكليللهم همه شافوني انا جاي ألعب بلعابتي 

كالت /:شوفي هسه اراويج -- كامت عضت ايدها وصرخت حيل اجو اخوانها --

همه يتراكضون/: شبيج كوثر منو وياج 

هي تصرخ وتاشر بايدها عليه وهمه لزموني كطعوني من البسط شافهم فواز لزمهم جان ثاني متوسط وسالهم 

فواز/:ليش وياها 

صلاح/:ضربت أختنا وعضتها 

فواز/:ها وكلكم تجون تهدوون 

صلاح/:اي ندافع الاختنا جا شعبالها ما عدها إخوان 

فواز//ولان انتم اخوان كوثر تلتمون على رضوى وتكتلوها ما تخافون 

فلاح//منين نخاف عود تطلع اخوانها لو بيها خير 

هو سمع هيج وهو لزمهم كسرهم ولازم اديهم واحد واحد وكلي عضيهن وانا اكله وانا ابچي وخايفه 

=لا فواز مي خالف سامحهم انا سامحتهم 

وهو يكلي بعصبيه /:رضوى عضيهم اذا انت ما تعضينهم انا اعضهم واجرم بيهم 

انا عضيتهم باوع وكلهم 

اذا كوثر عدها تلث إخوان -لان صبيحه بعدين كملت النص درزن --انا اخوها الرضوى وعن مية أخ ديرو

 بالكم مره ثانيه اذا اجيتو صوبها اموتكم مووت

وأتذكر اجه سلام وشاف فواز شلون يرجف أولد خالي طاهر يبجون سألني وسولفتله جانت

كوثر يمكن بالثالث ابتدائي راح سلام وصاحها وكلها 

::ليش تجذبين وتكولين رضوى عضتج انا شفتج انتي عضيتي روحج ليش هيج تسووين

كوثر اتخوصرت // لان أكره رضوى وانتم كلكم تحبونها أكرهها اموت منها ياربي تموت 

سلام ::شوفي لج كوثر هالمره اعبرها مره ثانيه انا اموتج بايدي

انا ما اعرف ليش تذكرت هذا الشئ اليوم رجعت الغرفتي وانا أحاول ألهي نفسي واكول

غير طلعه هاي سلام خطيبته مو ويا وعطاء خطيبها مو وياها 

للعلم احنا ما شايفات المزرعه ولا نروح الها الا مرتين من جنا زغار اخذتنا امي وعمه وسيله

فتحت الكنتتور وطلعت دشداشه قصيره نص ردن لبستها انا من اريد أنام لو ألبس دشداشه قصيره لو 

تراك برموده لبست الدشداشه وكعدت أقرأ واجت سهير لان هي بوكتها راسها يوجعها وراحت يم صبيحه وبعدها 

اجت جابتلي كوب چاي حتى اصحصح وهي راحت نامت صرت اقرا وبعدها اتمددت ع الجربايه ما اعرف 

شوكت غفيت صحيت بين الحلم واليقظة جمدت بمكاني بقيت متمدده ما اتحركت وانا اسمع خالي

 صاحب يعيط ويكل السهير - - بسرعه المسدس خلي اغسل عاري

باوعت شفت فواز بطرك الشورت ومدنك واجت صبيحه من شافتني كامت تخرط بخدها

وتعد وتصف غلط وفشاير عليه وعلى امي وانا ما ادري شكو جابت سهير المسدس وهي تكله وتتوسله

- - صاحب لا تتهور فدوه لأتيتم جهالك على مود هاي الساقطه --وصارت كدامي--وفاتحه أديها 

انا بعدني مصكوكه ما اكدر حتى احجي احس ريكي حديده ما اكدر احجي حاولت اتحرك 

وما كدرت اكوم من الجربايه شويه وسمعنا اجو من المزرعه وهمه يسولفون فرحانين خالي

من سمع كال الصبيحه

- - انزلي صيحي طاهر وسلام خلي يشوفون الفضيحه

انا من سمعت باسم سلام ظليت بس ابجي دموع بدون صوت 

شويه واجو خالي طاهر كال شكو 

صاحب /بعد شكو ابن أخوك وبت أختك ما تشوف الوضع شلون واضح

انا ما باوعت الخالي طاهر باوعت السلام الي صار يرجف وعيونه غوركن وانا بس اهز برأسي 

اهنا طاهر أخذ المسدس صارت سهير وصبيحه كدامي صبيحه تحچي

- - - وك سلام كظ عمك ولك يمه خلوها تولي ما تسوه تكتلونها ويجون عمامها وتصير بس هيه وبس يتصلى

 على اذيالها وما نربح بس الفضيحه وشگلك هي عدكم ويحقونكم

سلام اخذ المسدس انا بيني وبين نفسي فرحت كلت يكتلني هو بيده بس هو كل الخالي طاهر

::عمي خابر شيخ حسن خلي يجي يعقد الفواز وهاي -اشر براسه عليه -احسن بدل الفضيحة

انا بقيت ارجف اريد احجي ما كدرت اتدنى يمي خالي طاهر ضربني رأشدي وتفل بوجهي وانا اشوف 

سلام شلون نز وغمض عيونه وخابر شيخ حسن فتح الحاكيه

الو شلونك شيخنا 

راح أودي عليك صلاح رايدينك يشغله 

شيخ حسن /: خير ابو صلاح 

كل الخير عقد لابن اخوي 

شيخ حسن /:شعجب بهالليل 

اي والله شيخنا(وباوعلي وهو عاكف وجهه ويهز براسه ) مو البنيه مخطوبتله من زمان ومن صار حادث 

اخوي اتاخرنه بس اشو عمامها بدلو الحجي عاد كلنه نعقد الهم على مود من يجوون باجر نكلهم اتزوجت 

ونخليهم امام الامر الواقع 

شيخ حسن /؛اذا البنيه موافقه بيها الخير 

اي شيخنا موافقهةهسه ادزلك صلاح تسلم

صار عمي طاهر يصيح على ابنه /:صلاح صلاح روح البيت شيخ حسن وجيبه بسرعه

صاحب باوع الفواز وحجى ويا

- - - روح البسلك شي كدام الرجال وانتي خاتون استري روحج بس وينج وين الستر هو الله فضحج

نزل فواز وهو مدنك وطلع طاهر وصاحب وسلام وصل يم الباب المسدس بيده لحكته رغم دايخه 

طحت على وجهي لزمته من جتفه باوعلي لزمت أيده الي لازم بيها المسدس وخليته 

بكلبي وانا ابجي وكوه احجي

=سلام اكتلني اذا مصدك اخونك لاتخذلني والله ما خنتك اسأل فواز حلفه بالقرآن

فدوه انت اعقد عليه وخليني خدامه الك مو مره اعقد علي واهجرني واتزوج وانت ومرتك 

اخدمك بس لا تظلمني والله بريئه

شال أيدي وشمرها حيل انا حاجيته 

=سلام والله بريئه والله ما ادري اخذني واسجني بغرفه واذبحني بس لا تعقدولي على فواز

هو خله اصبعه على حلكه وكوه يحجي ::اششش ولا نفس ما اريد اسمع صوتج

طلع سلام وانا رجعت الغرفتي وكعدت بالكاع وانا لأمه رجليه وانود انفتح الباب شفت عطاء الي جانت 

ترجف من فوك ليجوه شفتها وما أنسى نظرة الاحتقار الي تباوعلي بيها حجت وهي تبجي وحقها 

لان هي تحبه الفواز حب عجيب لكن الخيانه اجت من اقرب شخص منها مني انا الي الدنيا كلها متعجبه 

باخوتنا انا وياها

عطاء //جنت شاكه بفواز عده علاقه محرمه بس أشك بالدنيا كلها بس انتي لا انتي لا (بعدين صفنت )ليش

لا اصلا كل ما نكعد انا ويا يجيب طاريج انا الغبيه الي صدكتج كل هاي السنين ياخاينه

ردت احجي سكتتني //مبروك ياعروسه عرفتي تختاري لمن يسألونج بالكليه كولي

اخذت خطيب بت خالي وصديقتي و ها عود من تصير عدج بنيه علميها شلون تبوك الزلم 

الله لا يوفقج يارضوى 

لو اموتتني ولا بهذا الشكل خاينتني حسبي الله عليج

وصارت تبجي وانا محد يقبل يسمعني وهذا فواز الحقير ساكت انفتح الباب واجت سهير وكالت وهي متخوصره

- - رضوى افندي ألبسي دشداشه وحطيلج حجاب على راسج الشيخ يريد يجي يعقد

ولبست دشداشه سوده وشال وعبأية رأس واجه فواز لابس دشداشه لونها رصاصي وقبل

لا يدخل الشيخ دخل خالي طاهر كال بلهجة تهديد

اسمعي ولج يسالج بسرعه توافقين لا والحسين الشهيد انتي وفواز ازتكم للنجف

انا كتله وانا ابجي واشهك 

=خالي اذا ما تكتلوني ودوني العمامي همه يكتلوني وما أخذ فواز 

طاهر /:انجبي بت السكط طلعولها عمام ثقي اموتج موت أجرم بيج ما اخليج تاكلين 

ولا تشربين وانوب اكتل فواز واكول كتلته

انا سكتت خفت من نظرت عيونه وانا اعرف بعصبيته ودخل الشيخ وعقد وخالي طاهر صار وكيلي 

وصاحب وصلاح شهود وطلع الشيخ وطلعو عمامي ويا اجه صاحب صاح

- - فواز تعال أخذ زبالتك الغرفتك لا تنكس بيتي 

وانتي ولج بسرعه اطلعي منا ما اشوف طولج اهنا

كومني فواز وانا بغير عالم عبالك فاقده الذاكره ابالي شي واحد لازم اسوي وهو انهي حياتي حتى يصدگوني 

انا بريئه ما حچيت راسا هديت آيدي منه واجيت امشي من وصلت يم الدرج شمرت روحي

من اخر بايه الاول بايه ما وعيت إلا وانا بالمستشفى تصدكون هاي الطيحه بس أيدي 

ورجلي انكسرن ورضوض قويه عبالي اموت وافتك 

فتحت عيني لكيت امي وخالتي ورقيه وامي تبجي وتعاتب بيه

امي /: ليش ولج رضوى ليش خليتيني عار الصبيحه وسهير وج مو بالعطله تتزوجين انتي وسلام

اشبي فواز بيش احسن من سلام ها بيش فهميني --واشوفها تضرب بخدها--

خالتي //وفواز يريد بت عمه هاي المسكينه المظلومه من هي هلكدها ليش خاله

شنو طمعتي جي دريتي فواز عده فلوس واملاك أكثر من سلام 

رقيه //يمه خاله شنو هالحجي اكيد صاير شي او رضوى ما تحجي احجيلي رضوى مو انا اختج

كامت رقيه تبجي وامي وخالتي يبجن وما يعرفن شيي وانا ألوم بروحي واكول

=ليش ما متت ليش ياربي شسويت عدك خليتني عار

بقت يمي خالتي ام مقداد لان امي زوجها ما قبل تبقى اخواني الزغار وين يبقون

بس مو هذا السبب امي ما تريد تشوفني امي مصدومه من الي سمعته ورقيه راحت لان 

ابنها مصخن بقت خالتي ظلت تسأل بيه وانا ساكته اجه الطبيب وانوب الممرضة الطبيب

شاف الاشعه والمفراس كال الطبيب

- - الحمد لله المفراس والاشعه زينات جنه شاكين عدها فطر بالجمجمه والضلوع متكسره بس 

ما كو شي مجرد رضوض ان شالله بمرور الوقت تصير زينه

كتب علاج وكال للممرضه الابر تاخذهن مرتين باليوم كل اثنين سووا

وخالتي كالت للطبيب

ابد دكتور كل شي ما اكلت حتى ماي ما خلت بحلكها 

سالني الدكتور //ليش ما تاكلين شنو السبب 

انا سكتت ما جاوبت 

الدكتور كتب ورقه وانطى تعليماته للممرضه 

همه طلعو اندك الباب طلعت خالتي واجت جايبه علاليك فواكه وأكل لان ما اعرف انا ليل نهار

خالتي من وره خشمها كالت 

رجلج بره يريد يدخل يشوفج

باوعت جانت يمي قوطية ببسي فتحتها بأيد وحده واخذت السداده الحاده وانا كوه احجي

كليله اذا وصل بهاي اجرح بروحي بكل مكان وكدامه لا تخلوني اذب نفسي من شباج المستشفى 

خالتي قسيمه/:غلى كيفج خاله اهدي هسه اكله

وراحت خالتي ورجعت كالت //هو سامع كل شي وخله وراح

انا صرت انحب وابجي حييل وخالتي ساكته رن تلفونها جاوبت

هله خيه هله ام صلاح 

على الله زينه تكول رجلي اتعثرت وطحت

ها بيها الخير يمته 

هلكد مستعجلين 

بالتوفيق أن شالله 

والله بعد اذا اكدر اجي 

الله وياج وشايفين الف خير

انا باوعت الخالتي اريد اعرف شكو هي كالتلي //لا تباعيلي صبيحه عزمتني باجر عرس كوثر وسلام

انا ما حجيت بس ضليت فاكه عيوني بدون ما ارمش خالتي انتبهت اجت حركتني 

دكت جرس وصاحو للطبيب 

الي اجه وانطاني ابره مهدئه 

اتمنيت الموت خلص سلام راح يتزوج اتوقعت هذا الشئ بس ياخذءكوثر 

كوثر الي اذا إجت ويشوفها حتى ماي ما يشرب 

كوة يحجي وياهاومن تطلع يظل يقلد عليها كوثر

الي يكول شكد دمها ثكيل وتغر ع المعده يأخذها سلام

ظليت اون اون وانوب صرت أصرخ حيل خالتي لزمتني وهي تكلي 

خاله اهدي اهدي كافي هذا الي تسوينه ما منه فايده 

بقيت ابچي بدون صوت و يمكن نمت ما اعرف من كعدت لكيت

امي يمي وخالتي ما موجوده انا بس باوعت ودرت وجهي 

حسيت بامي كاتمه دموعها لان تعرف شكد احب سلام سلام الي اليوم زواجه 

امي حاولت وياي اشرب كوب حليب لكن انا ابد حتى ماي ما خليت بحلكي صرت اشهك لان اختنكت وانا كاتمه 

دموعي امي أهنا ما تحملت انفجرت علي لان سمعتني شهگتي وانا العبره متكسره بصدري

امي بعتب /:عليمن تبجين رضوى على عملتج وصخام وجهج لو على سلام لان اليوم عرسه 

بعد من سويتي الي سويتي ما فكرتي ما كلتي راح انكشف الله لا ينطيج حتى ما الي 

عين اباوع بوجه خواني لا وفوكها شماتة صبيحه وسهير

انا اححي بتعب وكلام متقطع /:ح ت ى انتي يمه حتى انتي مو كافي ال صار بيه 

وال الظلم الي انظلمته انوب انتي تت همي ني ويه ذاك الچ لب

امي /:يا ظلم هذا رضوى ولد وبطرك الشورت وبغرفتج انتي ويا ومحد موجود شيسوي

انا كمت ابجي حيل 

امي //ابجي رضوى طكي راسج بالحايط عليمن تبجين ها عليمن 

على سلام شبي أخذ كوثر بت عمه وتحبه وصانت نفسها 

لو تبجين على عطاءعطاء الي يشوفجن يكول تووم من كثر ما وحده تحب الثانيه

عطاء الي يحتار الوكت شيسوي بيها من أبوها لو من سهير ولكت عد فواز الراحه 

والاستقرار انوب انتي اخذتي بس ياريت اخذتي بذكاء مثل كوثر إله اخذتي بطياح الحظ

 وفضيحه ياريتج من طحتي من الدرج كون ميته ولا هاي الفضيحه ياريتني انا اموت ولا شماتة صبيحه وبتهه

انا بس ابجي ما كدرت احجي معقوله حتى امي تشك بيه يعني نزلت من عين الكل صرت احچي ويه نفسي 

= ياريتني متت ولا عشت هاي الذله 

اندك الباب طلعت امي ورجعت كلتلي //رجلج يريد يجي يشوفج

باوعت شفت بطل عصير راني لزمته كتلها وانا ابجي //والله بس يدخل اكسر البطل واذبح روحي وكدامج 

امي استغربت طلعت أسمعها تكله//مو اليوم عرس أخوك رووح وخليها تهدأ وتعال 

فواز // عمه خليني ادخل اشوفها الخاطر الله 

انا راسا كسرت البطل امي سمعت الكسره ركضت عليه وهي تكلي /:شوفي لا تتهورين باعيلي حتى الباب قفلته هسه 

يروح انتي على كيفج اهدي 

رجعت علي ودنت الكرسي وكالت 

امي/:رضوى راح اسويلج كوب حليب اشربي وبعدين سولفيلي كل الي صار لا تضمين

علي شي بس بالبدايه اكلي على مود تسندين نفسج واكدر افتهم لان شاكه اكو بالموضوع-- ان --

جاوبتها وانا مختنگه =يعني ماما انتي مصدگتني 

ما جاوبتني كامت امي وشربتني الحليب وكلتني بسكت اجه الطبيب وشافني وطلع بقت الممرضه سالتها =اريد اطلع 

كالت //حبيبتي زوجج ما قبل اتطلعين يكول إله تطيب يالله 

=ليش بكيف زوجي 

الممرضه /:اي عيني هذا مستشفى اهلي وما طول يدفع خلص بعدين انتي بعدج تعبانه ما شايفه جسمج كله رضوض 

وازرك من الوگعه بعد الچ عمر الله سبحانه قدر ولطف 

انا اعرف فواز ما يريدني اطلع علمود عرس سلام من طلعت الممرضه انا حجيت آلامي كل شي 

كل شي ما ضميت عنها شي حسيت بأمي صدكت بس كالت

معقوله فواز دخل للغرفه راد يعتدي عليج وشافه صاحب 

=لا يمه فواز عمره ما باوعلي غير أخت إله 

امي/:رضوى يا أخت ولد شاب بغرفة بنيه شابه او وضع مخل يا أخت ما تكليلي الشيطان عدل ما مات 

=بس والله يمه هذا ال صار وروح خالي ما ضميت عليج شي (صرت ابجي ) فدوه صدكيني انا عمري 

كله ما حبيت بس سلام فتحت عيني فواز اخوي وسلام عمري وعقلي وروحي سلام يمه اريد اموت اتمنى 

الموت لان سلام شافني بذاك الموقف يمه سلام ذبحني ذبحني من أخذ كوثر فدوه يمه خلي فواز يطلكني واروح

العمامي بكربلا يمه يمه سلام اليوم عرسه اليوم يمه سلام وقع على موتي تعرفين شنو سلام ذبحني 

فدوه يمه خليني اذب روحي من الشباج ولا تغضبين عليه ساعديني موتيني بايدج 

ولا اشوف سلام ماخذ كوثر (وصرت اضرب على وجهي وعيوني بايدي )

صرت ابجي حيل امي حضنتني وهي تبجي وياي وتكلي 

- - عينج بعين الله ياخذ حقح هسه اذا بريئه اهدي وصيري سباعيه وتقبلي الوضع ولابد ما تظهر الحقيقه 

وفواز غصبن ما علي يحچي وبذاك الوكت والله وامان الله انا ما راح ارحم احد لومو فواز ولو مو ابو صبار لا 

گدام الشرف كل شي يهون وانتي فواز مس شرفج بس ياريت كون الزم دليل چان شفتي شسوي 

هدئت شويه من كلام امي الي احس بيها مجروحه اكثر مني واجه الطبيب والممرضه وانطوني ابره مهدئ

💔💔💔💔💔💔💔💔💔💔💔💔💔💔💔💔💔💔💔💔💔💔💔💔💔

سلام 

رحنا للمزرعه جان يوم خميس بس عمي طاهر أصر انو لازم نروح لان الشباب ضايجين تعبانين 

من الدراسه وما طول خميس من يرجعون ينامون ويكعدون يدرسون خابرت فواز علمود يروح

وياهم لان انا ما احب اروح دائما للمزرعه

فواز/:سلام ما الي خلك شغل الفوك رأسي عمك بطران هو اكو واحد يروح بهيج جو للمزرعه 

::فواز يكعدون بالبيت خو ما يطاردون مثلك تعال انت ابدالي لان بالأساس رضوى

ما رايحه وعطاء اهنا تعال يااخي يم خطيبتك 

فواز /:خاب انت شتحجي انا اخذ بيت طاهر واروح إله مخبل رووح انت خلي كوثر تشبع نظرها بيك

::اي شرايحلك هي تشبع نظرها أو رضوى يطكن فيوزاتها 

فواز/:هانت سلوم كلها عشر تيام وتصير حلالك شبيك يالله بعد أخوك رووح 

::وانت وين تروح تديح 

فواز/:انا أخلص شغل واروح أودع العزوبية 

::ما تجوز من سوالفك

انا ادري بأن اخوي فواز عنده علاقات نسائيه بس هو عمره ما بين علي او خلانه نحس 

بهذا الشي جان رزن كلش رحنا للمزرعه وانا ما مستقر ما اعرف شكو حاولت كوثر تتقرب

مني بس عطاء بالمرصاد لحظه ما خلتها ابحدها انا خابرت رضوى

هلو حبيبتي 

رضوى =هلا --بدون نفس --

ها شبي الحلو 

رضوى =انت خليت بيها حلو هناك بالمزرعه وهسه العينتين وياك وين ما تروح 

::ههههههههه وج هي من ناحية تراقبني تراقبني ودها تجي وتحجي بس أبو هادي

الشرطي الها بالمرصاد 

رضوى =يا ابو هادي هذا

::اكو غيرها عطاء وياها لحظه بلحظتها خنكتها من زردومها 

رضوى =ههههههه صدقه العطوءه 

::اكلك حبي مشتاق 

رضوى =وانا هم 

::يعني اجي 

رضوى =أي تعال منو لازمك 

::خالج طاهر لازمني 

رضوى =شكد بعد وتجون

::بس نتعشى ونجي

رضوى =تماام

::اوكفي شنو تماام انتظريني اريد تصبيرة ما قبل النوم 

رضوى=عابت شكد مكروه 

:...زين هسه اجي واعلمج المكروه شيسوي 

رضوى =لا حبيبي والله اتشاقى

هاي اتشاقى سولفيها على خوالج اجي واعلمج 

رضوى بدلال =لا حباب سلومتي 

::اشتعلوا اهلج ولج لا تتعايرين تدرين بيه أفقد 

رضوى:=ياالله خليني أقرأ 

::مو تنامين 

رضوى =حتى لو أنام كعدني 

::رضوى احبح 

=مو بكدي 

رضوى =لا انا أكثر 

::لا انا أكثر 

هسه اجي ونشوف منو أكثر 

رضوى =اي تعال مو تتأخر

صاحولي ع العشا وكعدنا نتعشى واجه يمنا عادل الفلاح هذا ورده أكثر من اخوي

احبه وأمه إنسانه طيبه شكد تحبني ما اجي للمزرعه إلا أمر بيها اروحلها للغرفه

من نسوان كبل تطلع شكو ظامه عدها حلقوم جكليت عبالك زغيرون وانا احبها دوم اكثر

شي احبه من جوه ايدها الخبز بالدهن والتمن بالحليب كل ما اجي تسويلي انا احبها 

انطيها مصرف الها مني جنت كاعد يمها وحاجتني ام عادل

- - يمه سلام شعجب ما اجه فواز وياك 

::خاله عده شغل 

ام عادل /:هاء شغل يمه اريد احاجيك وخاف تعتبرني اتدخل وانا رحت لو رديت مره غريبه

::لا خاله انتي مو غريبه انتي ربيتيني انتي وحده منه وبينا 

ام عادل/:جا خوش اريد اكلك على فواز 

::وانا اسمع 

ام عادل /:يمه فواز ذاك اليوم اجه للمزرعه وجانت ويا ،،،،،

اهنا اجه فلاح وقاطعنا وهو يكول //سلام ابوي يكول بسرعه خلي يجي هم ياالله نروح 

زين جاي 

ابوي يگول استعجل

باوعت على ام عادل ::خاله اذا الامر مهم باچر امرلج 

- - اي والله سلام شغله مهمه 

طلعت ولكيت الكل صاعد بالسياره وطلعت ام عادل وراي سالت عمي 

ها عمي خير 

كل خير بس نمشي هم يالله

وصعدنا وصلنا للبيت جان صنطه دخلنه للصاله فارغه 

سمعنا عمي صاحب يصيح //طاهر سلام تعالو

أجينه نصعد تلكتنا صبيحه تخرط بخدها عمي طاهر يسألها

شبيج شصاير 

وهي تخرط بخدها //مصيبه طاهر صخام بوجهنا بلاوي النسوان المسويات ارواحتهن

فقاير فضيحه طاهر فضيحه اذا ما نتلاحگها نصير علج بحلوك الناس

ما اعرف شلون وصلت للغرفه شفت وياريت عيوني عميانات كبل ما اشوف الي شفته

شفت اخوي عضيدي بطرك الشورت وحبيبتي شنو حبيبتي خطيبتي بعد أقل العشر تيام 

تصير حلالي شفتها كاعده ع الجربايه وهي بدون حجاب ونص ردن واللحاف على نص جسمها

عمي طاهر بس شاف هيج أخذ المسدس من صاحب إجت سهير وهي تتوسلني 

- - فدوه سلام لا تكتلوها وتنفضحون

انا انتبهت الكلامها رحت آلعمي طاهر واخذت المسدس عبالهم انا اريد اكتلها اخذته وإنا

اباوع الهم واشوف شلون فواز عيونه بالكاع وهي بس صافنه وتباوعلي وتهز برأسها

بمعنى (انا ما مسويه شي )

كسرت السكوت وكلت العمي طاهر 

::اتصل بشيخ حسن (عالم ديني ) خلي يجي يعقد الفواز وهاي

عمي طاهر خابر الشيخ وطلع فواز يلبس وهمه طلعو انا اتأخرت يمكن ردت اسمع منها شي 

لحكتني ولزمتني من جتفي درت عليها شفت بعيونها دموع 

جابت المسدس وحطته بكلبها وكالت =سلام اكتلني اذا تشوفني خنتك وانا والله مو خاينه اكتلني

سلام بس لاتزوجوني الفواز اعقد عليه انت اصير لك خدامه جوه حذائك لاتمر بيه عاملني

خدامه بس لا تظلمني سلام اخذني اسجني واتزوج وحده ثانيه واصير خدامه الك والمرتك 

اكتلني بيدك كطعني بس لاتخلي فواز يتزوجني فدوه سلام 

جاوبتها وانا ارجف ::اششش انجبي ما اسمع صوتج انتي وحده خاينه

شمرت ايدها ونزلت كعدت بالصاله والكل كاعد شفت عطاء صعدت واجه الشيخ لان صلاح 

ابن عمي راح يجيبه اجه وطلع فواز اجه عليه يريد يحجي وياي ما باوعت بوجهه وطلعت ما

ردت اسمع اي كلمه منه لان اعتبره خاين وهو فعلا خاين انا صعدت بالسياره ظليت

أسوق وابجي واكول

:: وج توني خابرتج تكليلي لا تتأخر ليش او ويامن ويه اخوي 

فريت السياره وخابرت فارس صديقي 

الو هلا والله 

:: فارس انت وين 

بالكوفي شبيك سلام 

:: اسبقني للشقه 

شصاير سلام كلي 

انا سديت التلفون انا وفارس أصدقاء من زمان وفواز ويانه معتبرين فارس اخو النه بالنسبه الي ما اضم علي 

شي خوش ولد مؤدب ملتزم هاي الشقه مالته مشتريها وانا مساعده بقسم منها منطيني نسخه مفاتيح واله نسخه 

انا من طلعت من البيت ماخذ وياي المفاتيح رحت لكيت فارس منتظرني شافني سألني

- سلام شكو شصاير 

انا ذبيت روحي ع القنفه اجه يمي فارس كلي //شبيك سلام فهمني 

عيوني مليانات دموع :: فارس اريد ارتاح لا تسألني 

فارس صار گدامي وهزني من اكتافي // سلام شبيك انت تبجي يخسا الي ايبجيك ياصاحبي 

انا فقدت ما كدرت اسيطر على نفسي واحجي 

::ولك فارس راحت راحت مني الي احبها خانتني ويه أقرب الناس الي --بعدين باوعتله كتله --

روح جيب مشروب 

فارس/:شني هاي سلام انت ما تسويها تهزك مره وتخليك تشرب 

::فارس رووح جيب لي لا تخليني اطلع بالشارع 

فارس/:على كيفك سلوم هسه رايح بس اهدا

وطلع فارس وانا بقيت كل شويه اكول 

ولج انا شنو شسويتلج بيش اذيتج ولج ويه اخوي وانت يا اخوي يا عضيدي ما لكيت 

إلا البنيه الي احبها ليش ياخاين 

لا والجلبه تكلي اكتلني بيدك اذا تحس بيه خاينه ولج ودي مو بس اكتلج لو بيدي اكطعج

وأذب لحمج للجلاب يا نذله

اجه فارس وصرت أشرب ابحدي بالغرفه وابجي واكول

::هسه لزمها دخل هو وياها للغرفه يضحكون عليه لان استزوجوني شيسولفون جنت اريدها تركص الي

 بالغرفه هسه كل الي حلمت بي وياها جاي تسوي الفواز(عضيت اصبعي حييل ) انا الكم إلا اندمكم 

ياانذال 

التلفون يرن اباوع رقيه صرت ا ضحك

::أخت الشريفه شعدها

ما جاوبت رقيه نمت وكعدت على رنة التلفون شفت الساعه عشره الصبح باوعت شفت 

شكد اتصالات من عمي طاهر وصاحب ومن عمتي عليه بس ما كو من فواز اي طبعا خجلأن

لو لا معرس لازم ما يدوخ نفسه بالاتصالات

رفعت التلفون وعمي طاهر //انت وين سلام انت زين ما بيك شي 

جاوبته بتعب ::اي عمي ما بيه شي يم صاحبي 

طاهر //تعال بابا رايدك بشغله 

::كول عمي أسمعك 

طاهر //عمي تعال كبل البيتنا اذا ما تريد تروح هناك 

:: عوفني اليوم ابو صلاح ما الي خلك باجر اجي 

طاهر //لا هسه تجي انا وصاحب منتظريك 

 عرفت اذا ما اروح راح ايلحوون عليه وكل شويه واحد متصل جاوبته ::يالله ماشي جاي

طلعت لگيت فارس ما موجود ومخلي ع الطبله الي بالصاله صينينه مغطيها ويمها ترمز چاي رحت للحمام 

سبحت وبدلت واجيت شربت بس چاي وطلعت البيت عمي طاهر ما فتت على بيتنا ماردت ازعج المعاريس 

وانا الف حسبه أبالي بس أهم شي عندي شلون انتقم 

وصلت تلكاني فلاح ابن عمي سلمت وكال //فوت سلام للديوان منتظريك 

دخلت لكيت عمي طاهروعمي صاحب كاعدين 

سلمت وانا اشوف القلق بعيونهم عليه سألني صاحب // وين جنت خوفتنا عليك 

جاوبتهم :: يم ولد صديق 

گعدت وعمي طاهر گال // الله بالخير 

الله بالخير 

طاهر //شوف بابا سلام الي صار بيك مو شويه ولو ما انت لازم أيدي جا وروح صبار كتلتهم بايدي بس شسويلك 

::عمي بعد صارت ما تسوى 

صاحب //عمي سلام انت عزيز وتعرف شكد نحبك لا والله نحبكم بس دكة فواز ناقصه 

طاهر //. مو بس فوازصاحب مو بس فواز هي هي الساقطه ام نفس الدنيه شسوي الصبار الي خلاهن عنده واله انا 

ردت اوديهن الابوهن گبل لا امهن تتزوج 

صاحب // كافي طاهر الصار الصار 

طاهر // هم صحيح بعد الحچي ما اله داعي (باوعلي ) شوف عمي سلام من الأخير انت تختار وحده من بناتنا 

وتتزوجها وغير هالحجي ما عدنا 

::عمي تسلم بس انا ما أفكره...قاطعني 

طاهر //لا عمي مو بكيفك انت تاخذ وحده من بناتنا لو عطاء لو كوثر انت ابنه وما نقبل 

ينكسر كلبك من وره اثنين جلاب حقراء وهاي انا وصاحب انكلك كبع وأخذ واليوم

انا فكرت بيني وبين نفسي شلون اخلي رضوى تموت من القهر لان ادري بيها شكد تكره كوثر وكوثر

تموت من رضوى بيني وبين نفسي ::اي سلام هاي فرصتك للانتقام 

:: انتقام انتقام منين انتقم من أخذ كوثر انتقم من نفسي كوثر ما احبها ولا اطيقها شلون اخذها

  ::بس لا خلي اخذها وأتشفى برضوى 

  ::مو فواز يكلي ما أطيق كوثر لان تضوج رضوى هسه اجيب كوثر و اخليها بالبيت عظم 

بزردوم الحقيره

صاحب //ها سلوم وين صفنت 

::لا عمي وياكم وانا أشكركم بالنسبه العطاء تدرون رابين سووا ما اشوفها إلا مثل زينب وغدير 

وبصراحه ما اكدر أصير نذل واسوي مثل الي سووا فواز لان ادري هي موكفه الفواز 

من همه زغار 

صاحب //اي والله كلامك ذهب حتى انا من حجيت وياها كالت ما اشوف سلام إلا اخو الي

وفواز بعد ايخسا ايشوف اظفرها

::لذلك عمي ابو صلاح انا يشرفني أن اطلب ايد بنتك المصون بت عمي وتاج راسي كوثر طبعا بعد أن تسالها 

طاهر //عمي سألتها من الصبح وكالت ما عندي مانع اذا يجي ويخطبني 

صاحب //أبو صلاح خابر شيخ حسن كبل لا يروح الصلاة الجمعه 

وفعلا خابر عمي الشيخ واجه وعقد وانا ما اعرف هذا الي سويته وصار امر واقع صح لو خطا 

رحت للبيت شفت محد بي طبعا جمعه ومعاريس نايمين المن يگعدون 

رحت الغرفتي وطلعت من الميز فلوس وانطيتهن العمي وكتله العرس يوم الإثنين 

اخذهن عمي وسمعت بس الهلاهل من داخل البيت

الفصل الخامس من هنا