رواية جذبني فمك البني الفصل الثامن والخمسون بقلم عبير إدريس
مَن لي أنا يا حاسدينَ سِواها؟
أنا كلُّ إحساسٍ جميلٍ مَسَّني
ما كانَ إلّا بعضَ بعضِ هواها،
خَيَّرتُ قلبي عَشرَ مراتٍ،
وما يَختارُ يومًا في الهوى إلا هي،
رِفقًا بها، وبقلبِها، وبحُبِّها،
ادهم
______
صعدنه فوك نزلني على السرير بهدوء مسد على شعري طبع قبله رقيقه على كصتي وكام يشل الاغراض المتطشره بالكاع ...
همست...
ايفين : عوفهن باجر اني المهن..
فهد : لا هسه انه اشيلهن ..
ايفين : تتعب ..
فهد : هههه شمسوي قابل انه خربته وارجع ارتبه..
ايفين : فهد تعرف بيك هواي صفات حلوة.
التفت عليه وضحك
فهد : ولج ففه قبل ساعه تريدين تطلكين مني وكارهتني هسه تمدحيني..
ايفين : من باب ساعه اصحاب ساعه اعداء هههه.
فهد : فف انه وياج ما نتعاده ابد فاهمتني صح..
حجاها وغمز ..
ايفين : ابو ففه اريد اغير ملابسي ضجت منهن ..
فهد : ابدلج انه.
ضحكت..
ايفين : لا بس طلعلي تراك من الكنتور واني البس ..
فهد : مو تدللين..
عاف الاغراض من ايده وكام مشى للكنتور طلع تراك واجه كعد يمي كمت على كيفي كعدت وارتاجيت على الظهر مال جربايه.
فهد : بدلي يلا.
ايفين : اي ابدل بس وخر اول.
فهد : يمعوده دبدلي هسه ما شايفج..
ايفين : وخر احسلك..
ضحك وضل كاعد.
نزعت التيشيرت وضليت بالكيمونه السوده شافها وضحك
ايفين : شو تضحك.
فهد : ايابه من شفتج بيها شكد حلوه جنتي رغم ثوله بس حبيتج بيها..
ايفين : وانت شكو تباوع بالصور الدزتهن صاحبتك مو حرام ..
فهد : ومنو كلج انه ادهم ..
ايفين: عمو شجابه.
فهد : مو تكولين حرام قابل انه ادهم واستحرم.
ايفين : هم صدك قابل انت عمو ..
فهد : الله لا يكولها يمعوده هذا معقد واختج صايره نسخه منه.
ايفين : لتحجي عليه.
فهد : ماحاجي هاي حقيقه..
سكتت مديت ايدي سحبت البلوز حتى البسه اجتي عينه على كتفي باوعت بوجها عاكد حاجبه.
ايفين : شنو عجبك الوشم.
فهد : تؤ ( لا) اساسا عاجني..
ايفين : لعد شكو..
فهد : ليش هيج كتفج متأذي و صاير ازرك ..
باوعت ع كتفي ورجعت باوعتله..
ايفين : غير انت مجلوب..
فهد : يا جلبه ليش تتجاوزين.
ايفين : انت كلت كلشي بينه مباح بعد شنو تتحسس.
فهد : لياخذ لسانج وبعدين يفلت كدام احد اموتج تره.
ايفين : لتخاف ما افلت ..
فهد : تره مو بقصد اذيتج..
ايفين : اعرف..
فهد : ففه ماقاصدها وداعت علاوي بس انتي صوجج ضميتي علاجي وتلفت اعصابي بسببج..
ايفين : اويلي عليك من تلكه عذر وتضل تبجي عمي مسامحتك منو كلك شايله عليك..
فهد : والله ياففتي كمتي تعرفيني اكثر من روحي..
ايفين : شعبالك بس كون الله يهديك كلشي ماريد.
فهد : ففه ..
ايفين : هممم..
كمز واجه مدد يمي..
ايفين : شبيك خضيتني خض..
فهد : ها اسف تأذيتي..
ضحكت..
هو هم ضحك بعدين سألني..
فهد : شبيج ؟
ايفين : ماكو شي كمل.
فهد : الله عليج احجي شكو تره اضوج.
ايفين : ماكو شي بس قبل ساعتين ردت تموتني وهسه كمزت كمزه خفيفه وتكلي اسف خاف اذيتج.
فهد : مو بوعيي والله وداعت ابني .
ايفين : لتحلف اعرف المهم هسه احجيلي شنو ردت تكول..
مددت وسحبني خله راسي على صدره وضل يلعب بشعري.
ايفين : تره انعس وانام قبل لا تكمل سالفتك.
فهد : راح احجيلج ونامي عادي من انتبه ثكلت نومتج اسكت..
ايفين : يلا ..
فهد : تخيلي ففه بعد ٣٠ سنه يصير عمري فوك الستين وانتي هم تكبرين ونكعد وحدنه بيت بس انه وياج وبيتنه كلش جبير بيه حديقه واسعه ومربوط بيها جلب ..
ايفين : اي...
يحجي واني سارحه بفكري وياه.
فهد : اي وعدنه هواي اولا وبنات ويلتمون عدنه بأيام العطل والاعياد وياهم اطفالهم يهوسون ويضوجوج لان خربو البيت بس انه اكيف عليهن عكسج يعني..
ايفين : هو انت دومك عكسي كمل.
فهد : اي ونكعد انه وياج نباوع على صورنه ونتذكر سوالفنه ومخططاتنه وتسوين روحج فقيره وحبابه وتبيعيهن على جناينج.
ايفين : هسه هذا مدح ذم ما فهمت.
ضحك وجسمه كام يهتز ..
فهد : سمعي لج.
ايفين : سمعت كمل كمل اريد اشوف اليوم شنو تاليته صارت ساعه خمسه وفهد بعده يتخيل..
فهد : اكلب بالالبوم مال الصور وانتي سانده راسج على كتفي واكلج شوفي هنا شكد حلوه جنتي جان عندج سنون وجنتي حلوه ...
ايفين : ليش وين راحن سنوني.
فهد : وكعن غير..
ايفين : وانت سنونك.
فهد : بعدهن.
ايفين : شمعنى يعني .
فهد : انتي توكعين كبلي ..
ايفين : ههههه شنو تعلم الغيب انت.
فهد : لا بسبب الحمل والرضاعه تتلف اسنانج..
ايفين : منين عرفت راح تكلي من روايه تسوست اسنانها واخذتها للطبيب واذا حجيت اجفص بمصارينك والنبي..
فهد : ههههههه لا لا سمعي..
ايفين : الحمدلله من ضحكت يلا كمل.
فهد : لهناك وتعطسين.
ايفين : ليش عود.
فهد : ماعرف تعطسين تخلين ايدج على حلكج والسن يطفر بيدج...
ايفين : ههههههههه عيع عابتلك دكافي كل هالحجي هذا علمود تكلي سنونج توكع قبلي ومدري شنو.
فهد : لا
ايفين : لعد
فهد : الجلب الكتلج عليه.
ايفين : البلحديقه الجبيره...
فهد : اي هو
ايفين : شبيه ؟
فهد :هذا كل ما تضوجيني وتنكين براسي اشمره الج يكرز بيج..
ايفين : ههههههههههههه اخ يابه راح اموت ..
فهد : بس تدرين راح انقهر.
ايفين : تنقهر عليه هو انت دومك تضوجني وتأذيني بعدين تنقهر..
فهد : لج لا مو عليج على الجلب.
ايفين : اي مو داكول ...
فهد : خطيه شياكل بس عظام يمكن حتى سنونه تتكسر.
ايفين : وشمدريك اني بس عظام جوز اسمن.
فهد : جوز بعد هو وحضه..
ايفين : فهد ليش متنام مو احسن.
فهد : طفي الضوه من يمج هو انتي مال واحد يكابلج ويحلم.
ايفين : دخيلك لتحلم نام وبس.
فهد : ههههه بس والله ضحكت.
ايفين : افكار سوده والعياذ بالله.
فهد : ههه تصبحين على خير.
ايفين : وانت من اهله.
نمت اني ومادري بيه نام ضل كاعد......
سيلين ....
من صعدوا وره شويه اجه ادهم دك الباب عباله ايفين نايمه يمي ..
ادهم : سيلي نايمه.
سيلين : لا كاعده تعال.
فتح الباب وفات علك الضوه وكال.
ادهم : ايفين وين ؟
سيلين : اخذها فهد وصعدو فوك..
ادهم : الله يهديهم.
سيلين : امين تعال اريد احجي وياك بموضوع ..
ادهم: كومي نروح لبيتنه وباجر نحجي تره كلش تعبان ومانايم..
سيلين : ادهم اني راح اضل هنا وما ارجع وياك للبيت ..
عكد حاجه وكال .
ادهم : ليش عود .؟؟؟
سيلين : لان ايفين مريضه ومحتاجتني ومستحيل اعوفها بعد.
ادهم : تجي يمنه تضل ليش انتي مبهذله روحج وراح تبهذليني واكيد مريم ونرمان هم راح تتأثر راحتهم ..
سيلين : ليش يعني ؟
ادهم : شنو ليش سيلي انتي اذا اجيتي هنا انه ماكدر اعوفج وحدج اجي يمج ومنو يضل يم البنات اكيد اجيبهم ويانه
سيلين : ادهم لعد شلون راح تسافر وتعوفني هسه هم نفس الشي اعتبر نفسك مسافر..
ادهم : مسافر وحد وقريب يمج وبعيد وحد ما اتحمل انه وياج بنفس المدينه واخليج تغيبين عن عيني واما بالنسبه لسالفه السفر مضطر تعرفين كلش زين انه ماخذ اجازه اربع سنوات راحت منها سنه ونص باقي سنتين ونص لازم اروح واكمل كلشي علمود اسحبكم عملي هناك وسكني ودزيت اوراقج واوراق مرايم ضيغم راح يحرك المعامله بين ما اروح..
سيلين : ادهم اني ما اكدر اسافر اذا مو ايفين تجيب بسلامه والاهم اتطمن فهد يصير زين وميأذيها شلون تريدني اعوفها بيد فهد واسافر اذا صار بيها شي اموت ماتحمل.
ادهم : هو هذا هم حجي سيلين شبيج اكلج مستقبلي سنين انه اكافح واتعب ومتوقف عليج اذا ما تبعتيني كلشي ينهدم وماسامحج..
سيلين : افهمني هاي اختي ادهم ماكدر.
ادهم : وانه زوجج وهيه الها حياتها اختارتها بنفسها وانتي الج حياتج وكل وحده بيكم تتبع زوجها ..
سيلين : صح بس كتلك تجيب ايفين يلا اسافر..
ادهم : هسه هيه شكد عليها ..
سيلين : شهرين
ادهم : والمعامله تتأخر بين ست الى تسع اشهر تلحك جايبه ..
سيلين : صح وبلكت فهد متعالج علمود نطلع من ذمتهم ونعيش مرتاحين..
ابتسم وتقرب يمي حضني دفن راسه بركبتي وكال..
ادهم : ليش انه احبج كل يوم وبكل موقف ..
سيلين : ليش شسويت ..
ادهم : يكفي احساسج العالي بالمسؤوليه وما فكرتي با انانيه حبيت ..
سيلين : شكرا حياتي..
همس بأذني..
ادهم : كولي حبيبي..
همستله
سيلين : نروح لبيتنه وهناك نسولف..
ادهم: ايييييي يله تعبان اريد انام والله
سيلين : ماشي وباجر ارجع.
ادهم : باجر ايمن يجي شلون نعوفه عكب باجر نجي هنا ..
سيلين : ونضل يمهم.
ادهم : اخليج لليل واخذج نبات بيتنه وارجعج الصبح.
سيلين : ماشي متفقين..
ادهم : يله استعجلي راح انام على روحي..
سيلين : ههههه الله يساعدك..
ابتسم وكال
ادهم : طالع كدامج لتتأخرين.
سيلين : ماعندي شي بس البس حجاب..
كمت لبست على السريع طفيت ضوايات البيت قفلنه البوب من بره وطلعنه رجعنه للبيت ، دخلنه هدوء نايمين ، على كيف دخلت للحمام سبحت على السريع وتوضيت وطلعت دخل ادهم ورايه...
صليت الفجر ورحت شمرت نفسي بفراشي توني اغط بالنوم فات ادهم وكف على السجاده كبر وبده يصلي ضليت صافنه عليه ودموعي كامت تنزل من وحدهن ليش ماعرف ...
كمل صلاه وكام بدون لا ذكر لا تسبيحات لا قران هلكد ما تعبان ونعسان ، اجه فتح الغطى ونام بصفي جرني لحضنه وغفينه بسرعه ..
كعدت الصبح على لمساته وقبلاته فتحت عيني ضحكت..
سيلين : صباح الخير شوكت كعدت..
ابتسم وكال..
ادهم : وسوسلي شيطاني من الصبح وكال اكعد اكو وحده بصفك كلش حلوه كأنما اميره ونايمه انت لازم تستغل الفرصه ماضل غير اسبوعين وتسافر ..
سيلين : يعني ماضل شي ياالله.
حجيتها بغصه..
ابتسم ومد ايده ربت على خدي بظهر كفه..
ادهم : شسوي ياعمري مضطر عبالج هينه عليه اعوفج هلكد كل يوم يمر ويقترب موعد السفر انه اختنك..
دنكت راسي وكمت العب بطارف تيشيرته..
همست بصوت تعبان.
سيلين : ادهمي.
ادهم : نعم ياجنتي..
روحي رجفت من كال هيج نزلت دمعتي مد ايده مسحها..
ادهم : صايره ضعيفه وهواي تبجين انه شعلمتج ..
حجاها بحزم...
سيلين : ادهم تتذكر من كتلك اذا عفتك بيوم من الايام شنو راح تسوي.
ادهم : اتذكر شذكرج بيها..
سيلين : لو يرجع بيه الوكت ماكولها ابد لان اني ما اكدر اعيش بدونك..
ادهم : سمعي اكو عباره قاريها بس ما اتذكر وين بالضبط المهم عجبتني وتنطبق علينه بوقت ما كلتي اعوفك.
سيلين : شنو ؟
ادهم : مكتوب لايجوز قتل الرجل المؤمن عن طريق العمد ، ولأني ياسيلينه رجل مؤمن لهذا لا يجوز قتلي مرتين..
سيلين : مرتين ليش ؟
مد ايده وخر شعري عن وجهي وباوعلي حاير..
ادهم : اول مره من عفتيني وتزوجتي كتلتيني ومتت بيها والمره الثانيه من كلتي اعوفك حسيتها صدك لهذا تأذيت ولحد الان ماناسيها ..
سيلين : تندمت حجيتها وانت لتاخذ بكلامي الله يخليك.
ادهم : اعرف اعرف ..
سيلين : اريد اسألك بس يمكن راح تعتبره حقاره مني بس اريد اعرف من باب الفضول يعني.
ادهم : اعرفكم يا معشر النساء شكثر فضوليات البعض منكم وتحبون تعرفون الرجل شكثر يتعذب بفراقكم وتحسون بنشوه وفرح من تستمعون لكلامه من يحجي بقهر بوصف حالته الهتسيريا بغيابكم..
سيلين : وانت شمدريك اريد اسألك هيج ؟
ضربني على خشمي بأصبعه خفيف.
ادهم : نسيتي انه شنو دارس..
سيلين : لا مانسيت المهم اوصفلي شعورك من تزوجت ..
جر نفس قوي والتفت نام على ظهره سرح بفكره غمض عينه تنهد وبلش يوصف شعوره..
ادهم : تخيلي عاشق مجنون عايش بمدينه وهاي المدينه هو بناها وحاوطها بأسوار من ذهب حافظ عليها من الغريب ، وهاي المدينه هيه عباره عن امرأه يحبها هووواي يعشقها ويتمنى رضاها ، بس هيه متبادله هذا الحب وماحيته من قاموس عشقها وهو يتعذب من يحاول يفهمها مشاعره وبكل مره يشوف الرفض بعيونها وكلامها ورده فعلها ...
جر نفس وياه حسره جبيره واسترسل..
ادهم : حبيتها رغم جنت الها اب وحسستها بهذا الشي وهذا غلطي الاكبر ، حسيتها خاصه بيه هاي مالتي هيج جنت احبها بأنانيه ،
جانت قريبه مني لدرجه ماجنت احسبها غريبه عني احسها مالتي ههههه حاسب انفاسها حافظ حركاتها اقره عيونها كلش زين ،،
تخيلي تشبثت بيها بقهر طفل تركته امه كبال مأتم وتالي اجه غريب من بعد التعب اخذها مني على الحاضر كمت ادعي بكلبي واردد بصوت بداخلي يحرك روحي حرك ياغريب حافظ على امانتي اسعدها واجبر كسرها ،
ارحم ضعفها حبها واصبر عليها على كيفك ويه كلبها لتأذيه لان انه ساكنه وهيه ما عدها علم
و كل يوم اطلعلج عذر ابرر بيه تركج اليه علمود لا احقد ولا اكرهج....
سيلين : كافي ادهم اذيتني..
ماهتم اليه من حركه كلبه يمكن ماسمعني حتى..
ادهم : جنت اوكلها وما استنكف اذا دنكت ولبستها حذائها ..
سيلين : شوكت لبستني حذائي ما اتذكر..
ادهم : بمرضتج الاولى اول ما اجيتي يمي...
سيلين : هااا بس مادري ايفين ماكالت.
ادهم : هواي شغلات طلبت منها تسكت وماتحجيلج..
سيلين : ليش ؟
ادهم : علمود لاتتحسسين مني ولاتفكرين بيوم انتي ممتنه اليه..
سيلين : يا الله على كلبك وتفكريك انت شنو؟؟
ضحك بتعب وكال.
ادهم : سهرت واطعمت وعلمت وفهمت ودرست وحضنت وانه الممنون ..
سيلين : اهم شي حضنت.
التفت عليه صار وجهي بوجها ...
ادهم : تعرفين شسويتي بيه اول مره صحتيني بابا وحضنتج بيها ..
سيلين : شنو.
ادهم : كلبي يدك سريع اريد ازيلج من فكري وازرع فكره جديده هاي بنتك هاي مثل مرايم علمود لا اوكع بالحرام وياج جنت اسهر وياج للصبح انتي بحضني وانه احجيلج واوصفلج ظروفنه البائسه المرينه بيها وانتي متدرين فاقده كلشي وبس تصيحين بابا وعمه..
سيلين : وبعد ؟
ادهم : جنت اجيج بكامل اناقتي سابح ومتعطر جنتي اول ما تشوفيني تفتحين الغطا وتأشريلي تعال هنا تسويلي مكان واجي انام يمج اول شي تسويه تحتضنين وجهي بيدج الصغيره ومرات اذوب من لمساتج اوخر تعصبين عليه وتكليلي روح بعد ماحبك اضحك وارجع انطيج وجهي تلعبني بلحيتي وبعدين تبوسيني ههههههه.
سيلين : ههههه جذاب والله.
ادهم : وداعت مرايم هههههه شبعت بوس وحضن لعد انه شصبرني عليج غير ذيج الايام تسع اشهر يا سيلين تسعه ..
سيلين : خبيث
ادهم : تعبت بغيابج وانه ادور بالوجوه عن شبيهتج كمت اخلق قصص بداخلي واتصور عايشها وياج واضحك ومرات تنزل دمعتي المشكله ما الج شبيه شكد دورت على ال ٣٩ مالكيتهم ..
سيلين : ماعرف شنو اكول ماعرف كل الكلام مايعبر عن كلمه حجيتها هسه...
ادهم : احجيلج موقف بس الله عليج لتزعلين حتى تشوفين شلون نفسي ما تلعب منج..
سيلين : شنو اكيد فضيحه ههههه.
ادهم : هو هم اكو فضيحه بس ذيج ماحب احجيها واحرجج.
سيلين : ابدي بالفضيحه هههه.
ادهم : متأكده متضوجين.
سيلين : لا
ادهم : مره الصبح كعدت جنتي تتلوين وجع اخ واخ جنت نايم بالكاع مجرد تنامين اسحب نفسي وانام بفراشي المهم كعدت على صوتج تتلوين باوعت الفراش متدمر ضليت صافن شسوي كلت يا ادهم وحضك اليوم لا نرمان موجوده ولا ايفين اجتي شلون شسوي ، ضليت صافن عليج غطيتج وطلعت خابرت ايفين اجتي بدلتلج..
وجنت اكل وياج بنفس الخاشوكه ونشرب من نفس الكلاص لهذا من تزوجنه اكلج شربي يلا انه اشرب او عضي اللفه قبلي يلا اكلها....
سيلين : هههههه عزه بعيني همزين تزوجنه جان وين كدرت احط عيني بعيونك.
ادهم : بس امانه اريد اكلج على شغله.
سيلين : شنو؟
ادهم : انتي اول مره بستيني بشفتي تره مو انه .
سيلين : جذببببب.
ادهم : والله ههههه جنت نايم وكعدت على بوساتج عايفه فراشج ونازله يمي بس باعي جنتي مجنونه ولا على المجنون حرج يعني الاقلام مشيوله عنج..
حجاها وخرب ضحك.
ضربته حيل على زنده...
سيلين : اسكت كافي ادهم كافي.
ادهم : خو من كلتي ادهم وشلتي التكلفه ردت افوتج بكلبي بس جنتي متوحشه ماريدك وماريدك ثبرتيني ماخليتيني اعبر عن مشاعري..
سيلين : صدك شنو شعورك من صحتك باسمك..
ادهم : ماعرف كلبي دك سريع عبالك كلتيلي احبك ..
تقربت منه ولزمته من بلوزه همست بدلال.
سيلين : واذا كتلك احبك ..
صفن بوجهي عكد حاجبه بضحكه مدفونه كال..
ادهم : دكوليها عاد ...
سيلين : احبك يا ادهمي حبيبي ..
بعدني ماكملت اخر كلمه باسني و سكتني وبلشت حرب المحبين...
بكل مره يحتويني بحبه ولهفته يغطي على برودي بالعلاقه..
باسني براسي وكام ..
سيلين : وين .
ادهم : اسبح واطلع راح يجي ايمن..
سيلين : راح انام شويه بين متكمل..
ادهم : نامي حبيبي..
طلع واني نمت ماكعدت اله ومريم تنغ بيه..
فتحت عيني لكيتها تباوعلي تضحك.
مريم : كومي بابا يكول اجه عمو ايمن وراح نصب الغده.
سيلين : حيل ليش عفتوني هلكد نايمه.
مريم : مادري بابا مقبل نكعدج كال تعبانه.
سيلين : راح اكوم كليلهم اجتي..
مريم : تمام..
طلعت واني كمت لبست روبي وطلعت للحمام سبحت ورجعت لغرفتي صليت لبست حجابي وطلعت رحت للمطبخ لكيت ايمن كاعد يم نرمان وادهم بالمطبخ..
سلمت بضحكه من القلب..
سيلين : السلام عليكم ياهلا بأيمون الغالي..
التفت عليه ضحك كاملي..
ايمن: ياهله بمرت الغالي شلونج يابه مشتاقين.
سيلين : الحمدلله انت شلونك اني الاشوق والله ..
ايمن : شلون صحتج ان شاءالله احسن.
سيلين : احسن الحمدلله.
ايمن : يارب خير تعاي كعدي..
رحت كعدت ادهم يباوعلنه مبتسم..
سيلين : نرمان خجلانه اكول اساعدج لان مكمله كلشي بس عليه المواعين هههه.
جانت واكفه يم الطباخ التفتت عليه وكالت..
نرمان : يمعوده شسويت نص الاكل ادهم جابه من بره.
ايمن : غير انه اليوم هنا..
ادهم : احتفال بيك..
باوعت عليهم ثنينهم..
سيلين : احتفال بجيته لو شي ثاني.
ادهم : تحجي لو انه احجي.
ايمن : لا احجي انت ..
ادهم : تمام ، يابه ايمون خطب بت عمنه والعرس قريب ان شاءالله..
سيلين : صدك ياالله مبروك تستاهل كل الخير..
ايمن : الله يبارك بيج تسلمين وانتي حاضره..
ادهم : تحضروا عدنه عرس قريب.
سيلين : ههههه الله ...
جر نفس ادهم وسكت..
عرفت لان ابوه ضايج منه او ممكن وجودنه راح يسبب مشكله لاهله ، ضجت بداخلي بس بنفس الوقت مبينت الهم...
نرمان حست بالوضع توتر لان جانت تباوعلنه كالت..
نرمان : يلا نتغده تره متت جوع شنو انتو متجوعون..
ادهم : صبي يابه صبي كلنا ما ماكلين..
سيلين : اليوم لا ريوك ولا كعده من الصبح هيج راح الوقت.
نرمان : غير فهد وخبالاته همزين جنت نايمه ومادريت اله الصبح..
ايمن عكد حاجبه وكال.
ايمن : ليش شبيه فهد ؟
سكتنه كلنا نسينه ايمن ونسينه سالفه ايفين ..
رجع سألنه مصر على الجواب..
ايمن : شكو غير يحجون.
ادهم : ماكو شي بس البارحه مشكله صارت بينه وبين ايفين وانحلت ..
ايمن : شبيها ايفين ؟
ادهم : تعاركوا ودايخه وكعت من الدرج اخذتها للمستشفى مابيها شي بس طفلها تعبان شويه.
ايمن : طفلهااااا
عكد حاجبه وحجاها مستغرب..
ادهم : اي طفلها ليش مستغرب..
ايمن : لا ما مستغرب بس كذبه جديده اكتشفت..
ادهم : منين؟
ايمن : ماتسوه اضوجك عليها غلس وتغده..
سكتوا بس اني دخلت بنص هدومي من الفشله يعني يا ايفين هم كذبه جديده..
خلصنه الغده نظفنه البيت على السريع كعدنه شربنه جاي سوالف وضحك ، صارت ساعه سبعه ايمن ونرمان طلعوا واني طلبت من ادهم يوديني يم ايفين اشوفها خاف تحتاج شي...
رحنه وصلني ورجع ، فهد فتحلي الباب شافني ابتسم.
فهد : بنت الحلال بذكرها.
سيلين : هاا خير ليش ذاكريني..
فهد : البيت وسخ وايفين تريد تنظف وماخليتها وبنفس الوقت ماعرف انظف وجنه حايرين شلون نحلها وانتي اجيتي.
سيلين : نيتكم صافيه سبحان الله.
حجيتها مبتسمه مجان قصدي شي بس هو حسيته ضاج..
سيلين : كلت شي ضوجك.
فهد : لا يابه دخلي يمها راح اطلع اتنفس اختنكت من البيت وهم اجيب كم شغله واجي.
سيلين : براحتك ..
طلع واني دخلت للهول لكيته فارشلها كبال التلفزيون وداير مدايرها كومه غراض سيار مال كهرباء والشاحنه الموبايل والريمونت مال سبلت والتلفزيون وصينيه بيها مي وبيها اكل وفاكه وكرزات ضحكت..
سيلين : هاي شكو داخلين على حرب.
ايفين : هههههه يمعوده يتعاجز اصخره راح جاب كلشي وكومه كبالي..
سيلين : والله يافهد يضحك ...
حجيتها وكعدت بصفها على الفراش..
ايفين : ولج مو بس يضحك عنده سوالف تخبل والله اذا تتعرفين عليه عن قرب متعوفيه ابد..
سيلين : فهد؟
ايفين : اي والله.
سيلين : احجيلي عنه بله ..
ايفين : راح احجيلج بشرط.
سيلين : شنو ؟
ايفين : متسأليني اي شي..
سيلين : قصدج تحجين اليعجبج وبس.
ايفين : بالضبط..
سيلين : احجي اسمعج
.
ايفين : باعي اول شي غرفته هاي الجوه ممنوع افوتها هذا قانون حتى تنظيف ميخليني..
سيلين : زين.
ايفين : من تدخلين لوحات معلكها عباره عن رموز وشخابيط ماعرف شنو ترمز بس من تركزين تلكين ارقام باللوحه مكتوب 6 و 7 وفوكاهن شخابيط هواي وعلامات x فوك كل رقم ومجيمهن ...
سيلين : يعني هو راسمهن قصدج.
ايفين : اي.
سيلين : كملي..
ايفين : بالبدايه جنه كل يوم عركه كل يوم تالي كام يصيحلي ففه من هيج يصيحني اضحك...
سيلين : هههه اي.
ايفين : اي من شافني اضحك استغل الوضع وكل يوم حيله شكل صارت علاقه بينه مو حب بس ماعرف شنو اسميها علاقه مجنونه مبنيه على مصالح وتهديد وبنفس الوكت يخاف عليه وبمرور الايام صرت اخاف عليه شلون وليش هم ما ادري ..
سيلين : اكو وحده تحب واحد ومتدري ليش هاي شلج بيها ايفين.
ايفين : سمعي والله هواي يدافعلي ميخلي امه تحجي عليه يتخبل واذا واحد ضوجني يلعب بيه لعب..
سيلين : زين
ايفين : اذا امه كالت اشتغلي يكللها بنتج هم تشتغل ليش بس ايفين ههههه.
سيلين: وانتي كيفتي.
ايفين : طبعا اكيف جنت كل يوم انهان منهن وهو وكفهن عد حدهن ليش ما اميل اله واحتمي بيه حتى لو جان هو مصدر اذيتي ورعبي.
سيلين : تمشين على مبدا اخاف منك واحتمي بيك.
ايفين : عفيه بالضبط ، واحله شي سهراتنه للصبح جنه نضل كاعدين.
سيلين : شتسوون للصبح ..
ايفين : نعلك اغاني ودك وركص ثنينه هههههه.
سيلين : زين ساكتيلكم.
ايفين : منو ساكت هههه هاي شبيج غير يوميه عركه ويه عمو يوسف.
سيلين : حقهم شنو اغاني للصبح الواحد شوكت ينام ويرتاح.
ايفين : شوفي فهد ابد مينام بليل.
سيلين : ليش؟
ايفين : من يوم ما دخل للمصح لهذا يومج هو ميكدر ينام ..
سيلين : لعد شوكت ينام.
ايفين : من ٨ الصبح للعشره اقصى حد ويكعد.
سيلين : ياخطيه متشوفيه يعصب هاي من السهر يتعب..
ايفين : بس عفيه لتحجين ابد تره يأذيني اذا عرف حجيتلج.
سيلين : لا شعليه.
ايفين : ومن يوم ابنه راح منه تأذه بالزايد والسهر زاد اكثر ..
سيلين : الله يساعده.
ايفين : لو تشوفيه شكد حنين ويايه شوفي اليوم كل شويه ومعتذر كل شويه جايبلي شي وماخلاني انزل الدرج هو شالني ...
سيلين : لعد ليش هيج مؤذي ويريد يأذي ادهم بكل طريقه.
ايفين: سيلين يريد ابنه تره صعبه تدمر عليه صارله كم سنه مشايفه ولا سامع صوته والصراحه اني كرهت مرته وحاقده عليها.
سيلين : طبعا تكرهيها غير ضرتج.
ايفين : شنو قصدج ضرتي .
سيلين : مشاركتج بفهد ..
ايفين : شلون يعني ؟
سيلين : شبيج ضجتي انتي مو كلتي يحبها يعني مشاركتج بكلبه ..
ايفين : لا ميحبها واصلا يريد ينتقم منها.
سيلين : وانتي راح تساعديه ينتقم منها مو ؟
ايفين : مكلت هيج.
سيلين : ايفين اي شي تسويه لو تتوجهين عليه خلي الله بين عيونج وفكري الدنيا ممكن تدور وتعيشين اذيتها.
ايفين : وليش هيه مفكرت بيه واذته.
سيلين : وانتي تعرفين شنو صار بينهم حتى تحكمين تعرفين شكد تاذت منه وانتي شفتي بعينج شلون يتحول لوحش بس انتي تتحملين احتمال هيه متتحمل.
ايفين : بس يكول صارحتها من جانو بعلاقه وهيه قبلت بكلشي.
سيلين : احتمال انصدمت بيه مو مثل ما جانت متصوره..
ايفين : ماعرف المهم هيه اذته هواي وتعبته والحاله الوصل الها بسببها هيه الملامه بالدرجه الاولى.
سيلين : يمه يمه اعصابج عيني شدعوه هيج ..
ايفين : كلبي محروك عليه يا سيلين لان حاركين كلبه..
سيلين : الله يبرد كلبه بس لو يتعالج كلنا نرتاح ونأمن عليج يمه.
ايفين : اعالجه اعالجه والله ماعوفه هيج تخيلي وصلت مرحله تراهنت ويه نفسي عليه ...
سيلين : رهن .
ايفين : اي تراهنت عليه لو اني لو هو ...
لهناك وسمعنه باب المطبخ انسد بهدوء..
شكرا لزيارتكم عالم روايات سكيرهوم
