رواية بنت الحرام الفصل الخامس 5 بقلم جمانه السعيدي

صعدت ع الميز خليت الشال بركبتي بعدني اريد ادفر الميز..رأسا دخلت هديل هي شافتني وكامت..تعيط بعلو صوتها:وتصرخ حيل اجوي ع صريخها عمو..ومرته والبنات شافوني واكفه ع الميز بقو صافنين رأسا عمو..كال:

بنيتي شبيج تخبلتي هاي شدتسوين بنفس....!!

بعده ممكمل كلامه اجه ضرار..

شكو شنو هالعياط..و..بس شافني سكت بقه لياخذ ولا ينطي هديل ترجف..وكالت:

ضرار..ضرار..دخلت لكيتها هيج واكفه تريد تشنق نفسها..

اني واكفه ع الميز والشال. بركبتي..

اسمع ام ضرار..تكول:

يمه شوف العيارة تشنق روحها لان ضرار كتلها..البارحة..تريد اجيبلنا طلابه

ضرار..بقة صافن مثل الي ممصدك عيونه..بس بسرعة..زمخ بيهم كولهم:

اطلعو..منا..بسرعة ولاواحد يبقى بالغرفة..

عمو كله:

وليدي نزلها..هاي..مو بعقلها:

يابه كلت كولكم طلعو ما اريد احد هنا..

كولهم طلعوبقه..

بس ضرار..جر الجرباية وصعد عليها..وكلي:.

لتتحركين..وبده يطلع راسي من الشال..بس احسه مثل المختنك كوه يجر النفس..طلع..راسي..حضني ونزلني بالكاع..بعد دفع الجربايه..شفته مثل المرتبك..وجهه..انكلب خفت كلت يمكن راح يضربني..بس هو جرني من ايدي..وكعدني كبالة ع الجرباية..اني رأسا كتلة:

فدوة..ضرار..لتضربني..الله يخليك..

شفت ملامحة حيل فترت..وعيونه..بيهن نظرة..مال قلق وارتباك..لزم اديه حيل..وكلي:

ما اضربج..اهدي اخذي نفس..والله ما اضربج..

بقيت اباوع بوجهه..كلي؛

انت شبيج..تخبلتي..صدوك..تردين تشنقين نفسج لان ضربتج..ولج حتى المخبل ميسويها..

جان يحجي ونفسه قريب..يم وجهي..رأسا عيوني صبت دمع..كتلة:

لا ضرار..مو لان ضربتني..                   

لعد ليش هيج..تردين..تموتين نفسج..شبيج..تخبلتي

اي..اموت نفسي..ضرار..الموت..اهون..ولا اخليك..تنام وياي بالحرام..

صدوك..تحجين انتي..تعوفين هاي الروح..العزيزة..لان كتلج..تعالي يمي..

وشسوي..بيها روحي..اذا عاشت بالحرام

راح اتخبل..ولج..احس عقلي ..ميشيل سوايتج..هاي!

شكلتي لنفسج من فكرتي هالتفكير!

كلت الموت اهون..ولا الحرام

بقه يباوع بعيوني..مثل المصدوم من كلامي..وكال:

لج مخبلة ام نص عقل..بعدج مثل الوردة المفتحة..تردين تعوفين الدنيا ع مود نومه!

اي..اعوفها انعل ابو الدنيا..الي اعيشها حالي حال..الساقطات..

لج انجبي. شنو ساقطات..ليش..اني..وين موديج..قابل..اني اريدج الي وحدي..

نفس الشي..ماكو فرق..

شنو ماكو فرق..كتلج الي وحدي!

بجيت بالزايد اول مرة احس خاطرة ينكسر عليه اول مره اشوف بعيونه نظرة رحمه..اول مرة..ما اخاف منه:.

ضرار..انت مو عندك اخوات..مو تخاف عليهن..مو حابسهن..وضامهن جوة رمش..عينك..تقبل وحدة منهن تصير بمكاني!

بس..بس اخواتي..

بس اخواتك..بنات حلال واني بت حرام مو..ليش اني شنو..ذنبي..قابل اني اختاريت امي وكتلها خلفيني بالحرام

لا..اكيد..مختاريتها!

اذا تعرف..معندي ذنب..ليش..هيج..تبيع وتشتري..بيه..عبالك..اني سلعة ومشتريها

كافي..كافي من هالحجي يله سكتي بعد لتبجين..متريدن علاقة..وياي..عادي اني هم ما اجبرج..هاي هيه انسي..

الموضوع..

صدوك..صدوك..راح تعوفني بحالي!

اهووو..كتلج ما اجبرج..عليه..لتطويلها..كومي اغسلي وجهج...وارتاحي..

ماشي..

عفته بغرفتي..ورحت غسلت وجهي..واني اكول..الحمد لله همزين راح يعوفني بحالي..سمعته يكول ما اجبرج وانسي الموضوع ممصدكة..راح..يفك مني ياخة..رجعت للصاله لكيته يحجي ويه اخواته:

من..اليوم..جمانه تنام يمجن..هسه فورا

 تنقلن جربايتها لغرفتجن..بعد لتخلنها تنام وحدها..صار معلوم!.

اي..اي..هسه ننقل جربايتها..

يمنه..

وفعلا..شالن الجرباية يمهن..اي الحمد لله والشكر..راح انام..واني مرتاحة الظاهر..هو صدوك.بعد ما اله شغله بيه..ثاني يوم الصبح كعدنا سوينا ريوك..هو محاجاني تريك..بس شفت عيونه تعبانات عبالك..منايم من البارحة..المهم تريك وطلع للمحل..ومر اليوم عادي..صار وكت الغده اجه تغده..وصعد لغرفته اشوفه ميحجي حتى ويه اهله مثل الضايج..ويوم بعد يوم احسه متغير..حتى من يدخل للمطبخ..اسمعه يحجي ويه امه ومرات يصيح ع اخواته..يحجي وياهن بس اني محاجاني مر اسبوع ع..نفس الحاله..ومرة انتبهت عليه..اني دا..اغسل

بالمواعين..التفتت لكيته يباوع عليه..بس شافني سوه نفسه يشرب جاي من يومها كمت..كولما..يكعدون ياكلون لو..تتجمع عائلتهم..التفت اشوفه صافن عليه..بس تصير عيني بعينه..يبدل ع اساس يباوع بغير مكان..الى ان..اجه يوم العرس..مال..اسيل..طبعا العريس ابن خالتها..وسلسبيل هم مخطوبه لاخو الثاني وعلاقتهم حيل قويه ويه ضرار..بحيث بقو يلحون على ضرار.لان..من جوي كعدو بالصاله اسمعهم يسولفون ويضحكون وياه ويكولوله اله تجي للعرس..يكولهم..وين اكو واحد يروح بعرس اخته بقو يلحون الى ان قبل..المهم..بيوم الزفه البنات..سلسبيل وهديل..مسويات تسريحات بسيطة لان من يطلعن لابسات بوشية وعبايه..بس لابسات جوه فساتين حلوة..اني طبعا لابسه اسود..بنطرون وقميص طويل وشعري سويته ذيل حصان..واسيل..طالعة حلوة بدلتها مستورة ومكياجها..نازك..وتسريحتها..رغم بسيطة بس لايكتلها..ام الصالون فنانه مطلعتنا عبالك عروسه تركية..المهم جتي الزفه والناس صعدو بالسيارات طبعا كومة ناس لان خوال ضرار..وخالاته هوايه عدهم معارف واصدقاء..حسب..مشفت ..من الهوسه..صعدو بالسيارات..اني وسلسبيل..وهديل صعدنا بسيارة ضرار..كعدت بالكشن الورة..ضرار..طالع يخبل لابس. جاكيت رصاصي مقفل...طوخ..وبنطرون وقميص رصاصي فاتح..الزفه دتمشي ومشغلين بالسيارة اغاني صوتها يشك..الاذن..بالطريق..طلعت اغنيه كاظم الساهر. مال..

مال مبروك عليك..بنت الحلال..مبروك عليك ملكة..جمال..اني سمعت الاغنيه..مدري ليش..عيوني كامت تحركني..لان سمعت كلمة بنت الحلال مثل الي حسيت بفد نقص بداخلي..مردت احد يحس..بيه التفتت ع الجامه وبجيت..مجنت ادري هو يباوع عليه بالمرايه..نزع النظارة شافني..ابجي..استلم..من يمه..يمكن فهم..الاغنيه بجتتي رأسا..طفى..الاغاني..سلسبيل كالت:.هاي شنو ليش طفيتها..حلوة الاغنيه مال عرس:.

هو..بسرعة كال بنزفزة:..

لاحلوة ولا صخام..معجبتي

.وصلت الزفة..نزلنا..هو..نزلنا..واختفه بعد محد شافة شكد ناس حتي وراحت..هو مدري وين راح بس سيارته..شفتها واكفه..برة..الناس تعشت وخلصت عشه..والمواعين لموهن وكوموهن بالحمام الخارجي..وهو ماكو..حتى من جوي الولد زفو العريس وراحو..هو مجان موجود..بعدين الناس..خفت شفته دخل للصالة..شافته خالته:.

ها..خاله اشو بعد مشفناك..وين اختفيت..

هو مدنك.                           

والله..خاله طلعت برة اتمشه تدرين الولد الجايين اكثرهم اصدقاء..وولد ولاية زحمه..يكولون جاي بعرس..اخته..

ياااا..صدوك تحجي قابل ماخذه غريب..هو ابن خالتك..

بعد..شنو..اكولك خاله انت اكيد متعشيت!

خاله مجوعان..بس صيحيلي البنات..حتى ارجعهن وياي للبيت!

لا خاله..ميرجعن الليلة يباتن عدنه..كولهن:

ماشي لعد اني رايح

ابد..والله متروح..اله تتعشه!.

خاله والله مجوعان..وحتى اذا جوعان وين راح اكعد متشوفين الهوسه!

اكعد يم الولد بالاستقبال!

هههه..هو اني شارد من الولد!

تعال..بعد خالتك..اصعد فوك بغرفة..مصطفى..محد بيها..اتعشه واشرب جاي..هسه..انته شكو مستعجل ع الروحة هو بيتكم منو بي اشو حتى ابوك راح يبات يمنه..

ماشي خاله بس اتعشه واروح

ماشي اصعد واني اصعدلك العشه..

شفته راح صعد فوك..

بقن البنات يسولفن..بالغرفة مال ام..العريس. شويه ودخلت ام ضرار:

اكولج..ام سلام شنو هاي الاماعين راح تضل بالحمام للصبح..

شسوي الصبح البنات يغسلنهن هسه خطيه مبدلات وكاعدات وملابسهن تنعدم اذا راحن يغسلن مواعين

هيه التفتت عليه..وكالت:

اي صدوك لابسات فساتين بس جمانه لابسه اسود...يله جمانه روحي غسلي المواعين الي بالحمام..خو ميضلن للصبح..

حيل ضجت..يعني..البنات اذا مبدلات واني لابسه اسود..

تتركب براسي اماعين العرس..بس مكدرت احجي كتلها:.

اي خاله هسه اروح اغسلهن..رحت دخلت للحمام صاير هوسه كعدت ع الطبلة..اصلا..اني اليوم..عليه الدورة..وظهري..وبطني حيل يوجعني بس شسوي بعد تركبن الاماعين ابراسي..بديت اغسل اماعين بس شنو..حيل متأذية من ظهري. وبطني..والمي مال السخان برد هالكد ما الناس كل شويه..احد فاتح المي الحار ميلحك..يحمه المي..كمت اغسل بمي بارد اديه ثلجن..خلصت تقريبا..ربع من المواعين شلت راسي لكيت ضرار واكف يم باب الحمام نزلت نفنوفي لان رجليه شويه مبينات كتله:

ها..ضرار..رايد شي

جيت اغسل..

ليش مغسلت جوه..

مكدرت افوت اكو بنات..صديقات ..بنات خالتي..جوه زحمه افوت.

ها..لعد هسه اكوم..تعال هنا غسل..

ردت اكوم..احس.ظهري مفصوم..رأسا توجعت..هو شافني!

شبيج..جمانه!

ها..ماكو شي..شويه ظهري يوجعني باوع ع الاماعين:.

وليش وحدج دتغسلين مواعين هالكد وين البنات لعد:.

ها..مو البنات مبدلات..خطيه..اني لان لابسه اسود..دزتني خاله اغسلهن...

اتفاجأت..حيل ادنه..يمي..ومد يدي وره ظهري وجرني مثل الي حضني..ومرر..ايده ع ظهري:.

منين يوجعج..ظهرج..! ؟؟                         

خفت..ورجفت عزة..عززززة هذا شبي شلون هيج حاضني..ويفرك.بظهري..ارتبكت حيل:.

مبيه شي ضرار..فدوة لتحضني هيج..شيل ايدك!

اششش..

بقه يمرر..ايده ع ظهري.احسه عصرني حيل لجسمه..كتله:.

ضرار..فدوة كافي..هدني ليدخل احد.للحمام هسه شيكول..البيت مليان ناس..هسه احد يدخل علينا..فدوه هدني..

جان يهدني..ويلزم ايدي

خرررب..خرررب..ولج اديج ثلج..

ميخالف ضرار..فدوة..هد ايدي..

جان يهد ايدي..ويكولي.

عوفي هاي الهوسه ولحكيني..لسيارتي!.

عززززة..ضرار..شتريد مني ليش الحكك!

كتلج..لحكيني..لسيارتي..اني راح اغسل ايدي..وانتظرج

ضرار..الله يخليك..ليش هيج..تتصرف..

ليش اني شمسويلح..لتخافين..لحكيني للسيارة لتخليني اطلعح من بيت خالتي كوه:

عزة..صدوك تحجي!

اي لعد جذب!

لا ما اروح وياك!

ماشي!

عفته يغسل ايده وطلعت بعدني مواصله لباب الصاله لزمني من ايدي

ضرار..عوف ايدي..الله..يخليك..هسه يطلع احد لبرة ويشوفك لازمني هيج شيكول..

فوتي كدامي..بسكته..اني..ميهني احد..وانتي تعرفيني زين

مشيت كدامه..صعدت بالسيارة احس كلبي..يدوك حيل..هو رأسا حرك..ومشت بينا..السيارة بس كتلة:

وين حنروح..وين ماخذني!!

اشش..سكتي..

طلعنا من المنطقة التفت عليه:

جمانه..ليش..بجيتي..اليوم!.

شوكت بجيت!

من جينا بالزفه

ها..هيج..ماكو شي بس جنت شويه ضايجه.

من شنو..

ماكو شي..يمكن شويه مخنوكة..

اوكي..مخنوكة..اني..اريحج..

شتقصد!!

هو..ضحك!

ههههه..لا..ياجبانه..بسرعة باكت..طن..هوه وراح بالها بعيد!.

اي مو انت حجيك..يخوف..شنو..اريحج!

هههه..يعني اخذج..لمكان تحسين نفسج مرتاحه بيه..وتروح منج الخنكة والضوجة!

تحسرت وكتله

ماكو مكان ارتاح...بيه بس حضن امي الله يرحمها!

اهووو..كلبتها عزة..لج بابا مكان يعجبج!

ماكو مكان يعجبني!

هاااه..يعني..هاي بغداد كولها ماكو بيها مكان يعجبح وترتاحين بيه!.

اي..جانت ماما تاخذني تزورني ابو الجوادين عليه السلام جنت حيل ارتاح من ازور!

اي..شكو بيها اخذج هسه للكاظم..مو بعيد قريب..

ياااا..هذا شبي من كل عقله ياخذني للامام بهالليل..بعدين اني مونظيفة عليه الدورة شلون..افوت ازور..هاي شلون سالفه هسه شكوله:

هااا..لا..لا هسه الدنيا ليل مو مال زيارة..واني ملابسه حجاب!

اي..هاي بسيطة بعدها المولات مفتحة هسه اشتريلج..حجاب!

شلون ورطة هاي..كتلة:.

لا ماكو..داعي خليها ع غير يوم..

اشش..سكتي..بسرعة افتر..وكفنا يم المول..ونزل..ونزلني..دخلنا كال:.

يله اخذي عبايه اسلاميه وحجاب وفوتي لبسيهن جوة..

مو..مو..

لا مو ولاشي يله..اني منتظرج..فوتي..اخذي..ولبسي..

اضطريت ادخل اخذ شال..وعباية لبستهن وطلعت..من طلعت بقه يباوع بوجهي حسيت عيونه مرتاحه..وبيها مثل..الابتسامه الممفهومة...

صعدت بالسيارة..حرك..

كال..هسه نروح نزور

والله دنيا ليل منو يكول..مفتوح الامام..مرات يسدو بالليل!.

لا..بعد وكت!

والله ماكو داعي نروح..خلي نرجع للبيت..هسه..امك تفكدني..وتلكاني ماكو..وتضل تحجي هسه تكول وين راحت ويضلون..يدورون عبالهم انهزمت مثل ذيج المره..

اي بهاي حقج..بس سهله..

اخذ موبايلة اتصل:

الو....يابه جمانه..وياي..طالعين نزور..

وسد التليفون..

هسه صار عدهم علم..

مو..مو..

شبيج..تمأمئين..هسه اني وين ماخذج..شبيج خايفه هيه زيارة

مو اني ما اكدر ازور..هسه خليها...غير مرة..

وكف السيارة ع صفحة:.

ليش متكدرين تزورين..يابه!

هااا..لا ماكو شي..بس ما اكدر ازور وخلص!

بقه يباوع بوجهي..بعدين مثل الي..كام يفكر!

ههههه..خرب..يومج..خو كولي عندي سالفه مال نسوان وفضيها من البدايه!

متت..بدمي..حست وجهي صار..نارررررر..عززززة..عزززة شكد عيب..هذا شلون عرف

شكرا لزيارتكم عالم روايات سكيرهوم