رواية جذبني فمك البني الفصل الواحد والستون 61 بقلم عبير إدريس

،

كنتُ أنساب في نهاية اليوم بين طيّات سريري

أعدُ أسباب الوجود

أتذكر مشاكلي قليلًا

أترنحُ بين الأفكار السلبيّة

 أبكي قليلًا

أُلقي التحية على مدينتي الخيالية

أُقبل الشخص المُفضل لديّ

تسرقني الأفكار

بين الحين والآخر، 

حتى تتكدس الأفكار

 داخل عقلي، وأنام "

سيلين

__________

دخل فهد شلون الاعصار كلت هذا هو راح يحرك الاخضر بسعر اليابس الصراحه خفت على نرمان اكثر شي وفعلا صار الجنت خايفه منه .. 

تقرب منها لزمها من زندها قوي وحجه من بين اسنانه كلمه كلمه بنبره غضب مغلفه بالتهديد. 

فهد : شنو طبيعة علاقتج بهجان؟ 

نرمان : على كيفك هسه افهمك هاي مو طريقه حوار.. 

فهد : والله هههههه شنو تريدين اجيبلج نركيله ونسولف لو اعزمج بمطعم دكتورتنا تره انه فهددد مو دكتور ادهم السياسي انه ماسايس... 

نرمان : شنو قصدك يعني تضربني مثلا؟ 

فهد : اذا اقتضت الضروره اضرب مجربتني قبل . 

نرمان : ماعندي شي واي علاقه وياه ماعندي لا من قريب ولا من بعيد..

فهد : هااا والسمعته قبل دقايق شنو ؟ ممكن اتخيل تعرفين مخبل بعد.. 

نرمان : لا حشاك بس شغله قديمه وسولفتها لسيلين. 

فهد : اذا قديمه عليش خايفه ؟ 

حجاها وعوص عينه اليسره.. 

نرمان : دشوف اسلوبك وطريقه حجيك عبالك عندك تحقيق.. 

فهد : حقج لازم اتأكد يله اتصرف مو صح ؟ 

نرمان : صح . 

هد ايدها ومد ايده .. 

نرمان : شنو؟ 

فهد : موبايلج. 

نرمان : شبيه ؟ 

فهد : اريد اخابر صاحبتي ماعندي رصيد ، جيييييبيه دشوف.. 

عاط بعلو صوته من الخوف انخلست كامت ترجف تدور على الموبايل ماكو ، هيه وتدور رمقتني بنضره لو ضاربتني يمكن اريح اليه ، حسيتها تكلي الصار والراح يصير بسببج يعني حملتني المسؤوليه مقدما ومو بس هيج حسستني احنه متفقين عليها ، 

ماعرف اني عقلي يترجم احداث بكيفه وهيه متقصد..

نرمان تدور وهو واكف على راسها يصيح من الخوف كعدت على الجربايه خلت ايدها على وجها وكامت تبجي ، بس الغريب ابد ماسأل على موضوع روايه معقوله مسمع بس شلون سمع سالفه هجان وروايه مسمعها والله حيره هالفهد.. 

عفتهم وطلعت رحت لايفين جانت كاعده بالهول وماده رجلها على الطبله حاطه ماعون فواكه بحضنها وتقطع وتاكل.. 

سيلين : ايفين الحكي ..

رفعت عينها باوعتلي برود ودارت وجها على التلفزيون وكالت.. 

ايفين : شكو ؟ 

سيلين : مكاعد تسمعين الهوسه ولج فهد عرف بسالفه هجان وراح يأذي نرمان كومي.. 

ضحكت .. 

ايفين : وشسوي اذا كمت ؟ 

سيلين : يابرودج انتي شنو ولج كومي نشوف حل. 

ايفين : مو انتي هذا الردتيه تحملي نتائج غبائج شكد كتلج عوفيه لتندكين بيه يطلعلج كلب استلمي راح يدمرنه واحد واحد تعاي كعدي بصفي وانتضري دورج..

سيلين : وهو شنو محد يكدرله قابل وعلى شنو يأذينه كال اشوف ابني وهذا هو.. 

ايفين : وشلون يشوف ابنه برأيج ؟؟ 

سيلين : اكيد من يكعد ويتفاهم وياهم يشوفه. 

ايفين : هههههه فهد يتفاهم حبيبتي منا وجاي استلمي حروب ودم وانتي انتهت حياتج من هسه اكلج. 

سيلين : شنو قصدج؟ 

ايفين : قصدي مادام فهد عرف مكان روايه وين ما راح يسكت ولا يهديله بال اذا ما طلعهم من جوه الكاع. 

سيلين : وانتي شمدريج بروايه بالعراق.. 

ايفين : جنت واكفه يمه وسمعناكم سوه. 

سيلين : وهو شلون عرف احنه نحجي هو مو طلع بره.. 

ايفين : الشي المتدرين بيه فهد زارع كامرات بكل البيت ورابطهن على موبايله ويشوفج كلش زين وين تروحين ومنين تجين عدا غرفه نومج مابيهة كامره. 

سيلين : وليش محجيتي ليش ما نبهتيني. 

ايفين : حتى تروحين وتكليله على شنو أأذي نفسي بسببج الف مره اجيتج وحذرتج عوفيه ابتعدي عنه معليج بيه لزكتي لزك تريد تعالجه جان غيرج اشطر ومافلح.. 

سيلين : هسه شنو لج كومي نشوف حل سمعي صوتهم بس لا يضربها .. 

ايفين : يضربها شنو اذا ما موتها تعاي عاتبيني.. 

سيلين : يعني الصار بسببي مو بس والله اني نيتي اساعده ماردت توصل هيج. 

ايفين : انتي خسرتي بالتتابع صحتج وامانج وهسه نرمان ومستقبلا ادهم وكولي كالت ايفين والحبل على الجرار .. 

سيلين : انتي شنو التعرفيه وضامته عني احجيلي اريد اعرف ليش تخليني على عمى عيني. 

ايفين : على شنو احجيلج فهد معروف من البدايه شنو شلون تأمنين بيه وتخلين ايدج بأيده اني كلش معجبتني علاقتكم وحاجيتج بس انتي مسمعتي ... 

سيلين : خابري على ابوهم وامهم خلي يجون هذا راح يموتها ولج كومي.. 

ايفين : حبيبتي انتي شعلتيها انتي تطفيها طلعيني ويامن تريدين اتبالش ميكلي منو خابر تريدين اجيب قبل وكتي.. 

سيلين : انطيني رقمهم اني اخابر. 

ايفين : ذاك موبايلي اخذ الرقم واتصلي علمود من يكلي اكله انتي اتصلتي وعوفي المكالمه لتحذفيها حتى اذا تطلب الامر نشوفه .. 

سيلين : هاي شنو انتو عصابات ..

ايفين : منو كالج خلي ايدج بيده..

سيلين : والله صح اني غلطت . 

ايفين : شيفيد بعد روحي شوفيلج حل للبنيه سمعي صريخها راح يموتها..

ضليت ارجف من الخوف فركت وجهي ورحت دخلت للغرفه لكيته لازم الحزام ويضرب بيها ، لزمته من قميصه دفعني حتى ما التفت وشاف منو وراه ونرمان تعبت استسلمت بس تبجي بصوت مخنوك ، طلعت اخذت موبايل ايفين واتصلت على ابوهم رن رن رن جاوب.. 

يوسف : نعم. 

سيلين : هلو عمو شلونك اني سيلين لتسده اسمعني نرمان وفهد صارت مشكله بينهم و اذاها الله يخليك الحك.. 

يوسف : شنو شصاير نرمان وفهد شبيهم. 

سيلين : صارت مشكله جبيره عفيه عمو تعال. 

سده بوجهي سمعت صوت الموبايل مال فهد يدك وراها موبايل نرمان دك اخر شي طلع فهد سد الباب وبيده الموبايل جاوب ابوه ينهت.. 

فهد : هااا حجينه وصلك الخبر انت هم متفق وياهم عليه وعلي لا احركم كلكم تريد تزوجها من هجان تخلون ايدكم بيد الدمرني وضيع ابني ومرتي مني ، بسيطه والله لا اكلبها عليكم بسيطه اله اخبلكم ، شتفاهمممم شتفاااهم ليش انتو خليتوا بيها تفاهم بنتك العاقله الرزنه تتمعشك ويامن ويه عدوي وفوكاها بيتي بكل عين صلفه ، لا صدك انت وين نايم بيا عسل تعال شوف الحبجيات رسائل محادثات صور كم مره جاييها للجامعه والله والنعم منك ماربيت حجي..

سده وشمر الموبايل على الميز مال مطبخ كعد خله ايده على راسه واني حايره وين اروح وشنو اسوي حركت الدنيا وخربتها شجاني شجاني هيج سويت ضليت الوم بنفسي وخايفه ،

 طلع فهد وسد باب المطبخ وراه ركضت لغرفه نرمان لكيتها نايمه وتون ضليت واكفه اباوعلها وعيني مكسوره ماكدر احجي وياها ، هيه حست بيه فتحت عينها وهمست بتعب... 

نرمان : تعرفين انتي اي علاقه تدخلين نفسج بيها تدمريها واي شخص تتقربين منه يحترك ويتأذه بدايتها بأدهم وهسه اني وهجان واكيد روايه وعلي والقائمه تطول ولتنسين اختج هم الها نصيب من هاي النار.. 

سيلين : حقج شنو تحجين استاهل بس والله جان طالع ما ادري بيه بلبيت واجيت حجيت وياج. 

ضحكت مستهزئه. 

نرمان : تريدين تقنعيني انتي ما متفقه وياه تخليني احجي وهو يوكف يسمع.. 

تقربت منها اعصابي ترجف كوه مشيت.. 

سيلين : باعي بشنو احلفلج ما متفقه وياه ولا ادري بيه واكف وصدك ردت اساعده بس مو بهيج طريقه والله. 

نرمان : انتي شنو غبيه لو تستغبين احنه اهله اعرف بيه منج لو نعرفه ادمي ندليه على مكان مرته وابنه بس نعرف شنو نعرفه يحركنه كلنا والكل يلوحه طشار جنه نريد نضغط عليه حتى يتعالج يله نرجعله ابنه. 

سيلين : وهذا منطق تخلوه يفرفح على ابنه لعد تستاهلون كل اليصير بيكم والراح يصير اذا فعلا عدكم علم بمكانهم وساكتين شلون تكدرون تنامون ليلكم وهو كل يوم يندب على ابنه وعيونه مشايفه النوم. 

نرمان : انتي احن عليه من ادهم لو من ابوه ؟ 

سيلين : اي احن منهم لان ما اقبل بالظلم. 

نرمان : انتي متعرفين شنو سوه بروايه وشلون دمرها ولوما الولد جان هيه شابعه موت لهذا سكتي. 

سيلين : المهم اني حبيت اساعده مو بقصد اذيتج هو سمع شمدريني ... 

نرمان : تعرفين شنو اكتشفت ؟ 

سيلين : شنو؟ 

نرمان : انتي وحده فاشله والاسوء من فشلج تسوين الذنب وتبرأين نفسج منه .. 

سيلين : شكرا دكتوره حقج شنو تحجين لان اذيتج صارت بسببي حتى وان كانت غير مقصوده.. 

نرمان : انتي منو نطاج الحق تتصرفين بكيفج ومنو يعرف بيج تساعدين فهد وتريدين ترجعين ابنه ادهم يدري بيج لو ياغافل الك الله هو حارك نفسه هناك وكل يوم يخابر ويسأل ويوصي وانتي تلعبين لعب بكيفج.. 

سيلين : عباراتج قاسيه وبيها ألم جبير يا نرمان واني ما استاهل هذا التصرف منج.

اختنكت اريد اتنفس ماكدرت انتابني شعور غريب انهي حياتي واخلص اول مره هيج افكر اريد انهي حياتي ، طلعت من غرفتها سمعتها تكول.. 

نرمان :ديري بالج تجين واشوف وجهج .. 

مجاوبتها مشيت وصعدت لغرفتي تعالت اصوات الحقد والكره بداخلي وبالاخص على نفسي اريد أأذيها ،،

صفنت وكمت افكر بالصار والراح يصير احس اكو حلقه مفقوده اكو شي ناقص اكو لعبه حقيره اكو جذب اكو دغش ما مرتاحه ابد ،

 لاول مره احب شعور الوحده اريد ابتعد اريد اعيش وحدي اعتزل هذا العالم المنافق بحلوه ومره مددت وافكر بطريقه اخلص من حياتي ماعرف شكد مر وقت رن موبايلي خلصت الرنه ورجع دك باوعت المتصل ادهم ، ماعندي واهس اجاوبه وحتى لو جاوبته راح يعرفني من صوتي بيه شي ، ضل يدك ويفصل اخر شي قررت اجاوبه.. 

جاوبته همهمت بتعب كلت ..

سيلين : تعبت اريدك ادهم اريدك.. 

ادهم : وينج سيلين ليش هيج سويتي بيه وينكم اتصل عليكم محد يرد صاير شي ضل بالي .. 

سيلين :اني جنت نايمه وهسه كعدت وماعرف جوه شكو.. 

ادهم : صايره تجذبين سيلين.. 

سيلين : ليش اكذب ؟ 

ادهم : صوتج مو مال نوم قابل ماعرفج.. 

سيلين : ادهم تره تعبانه بحيث ضلوع صدري كاعد تضغط على كلبي ما اتحمل ملامه ابد .. 

ادهم : هسه انه شكلت غير ضل بالي ياحبيبتي والله حتى لضيغم رحتله ويتصل على فهد ميرد .. 

سيلين : ماكو شي ليضل بالك.

ادهم : ما مرتاح سيلين ما مرتاح اكو شي مادري بيه ضامه شي عليه. 

سيلين : لا ماكو شي جان كتلك.

ادهم : اكيد سيلينه. 

سيلين : اكيد حبيبي اكيد. 

ادهم : شبيج متوتره وترجفين شصاير احجي لخاطر الله.. 

سيلين : ادهم تريد تصدك متريد براحتك اروح اني تعبت اريد انام. 

ادهم : نامي نامي انه اعرف بطريقتي، قبل لا تروحين نرمان ليش موبايلها مغلق. 

سيلين : ما ادري شمدريني يعني تريدني اعرف البيت كله شبيه ما بيه..

ادهم : ليش تصيحين.. 

ماعرف شبيه سديته بوجها وغلقته ، نمت قرفصت على نفسي تغطيت لحد راسي... 

وره شويه اجتي ايفين فتحت الباب وفاتت وكفت فوك راسي.. 

ايفين : سيلين كومي احجي وياج. 

سيلين : شكو احجي. 

ايفين : شبيج ويه عمو مخبلته. 

سيلين : يبووو ماسويت شي هو يضخم الامور. 

ايفين: كومي حاجيني يعرف بالسالفه لو لا حتى اعرف شنو احجي وياه. 

سيلين : ما اعتقد يعرف.. 

ايفين : انتي شبيج فهميني ليش هيج جسمج يختض بردانه. 

سيلين : اريد مي وانطيني علاجي اريد اخذه ..

ايفين : هذا الدمرج شوفي وين وصلتي ليا حال وبعدين منين اجه علاجج انتي مو صرتي زينه وكطعتيه. 

سيلين : وين صرت زينه ومنو كال كطعته اني جنت اخذ منه بس قليل مرتين بالاسبوع ومرات ٣ حسب نرمان شوكت تحن عليه تنطيني لا عبالج اني قطعته ورجعت . 

ايفين : وعمو يدري بيج تاخذين علاج لو من وراه. 

سيلين : ميدري لان مانعني منه واني من ما اخذه تتعب اعصابي واتأذه 

ايفين : وهسه العلاج كله كبالج وتاخذيه بخبال .. 

سيلين : معليج مني عوفيني. 

ايفين : اتركي العلاج سيلين راح تدمرين نفسج وتدمرينه شنو تصرفاتج ما محسوبه ولا متوازنه. 

سيلين : معليج مني طلعي وعوفيني. 

ايفين : شوفي ياسيلين اذا لاحني طشار من سوايتج هاي ما اسامحج واجزج من حياتي. 

سيلين : هههههه اعرفج حبيبتي بدون متكولين اعرفج.. 

ايفين : اصحي على نفسج اصحي. 

حجتها وطلعت.. 

ثاني يوم من الصبح اجوي ابوهم وامهم وكبت العيطه بينهم وبين فهد وكفت باب الغرفه اسمع ... 

يوسف : انت شنو مشكلتك؟؟ 

فهد : شلووووون تريد تنطيها لهجان . 

يوسف : يعني انت مشكلتك هجان وبس ؟ 

فهد : اي هاي مشكلتي ليش تريد تنطيها لهجان.. 

يوسف : ما انطيها هذا هو هاي مشكلتك لهنا وتنتهي. 

فهد : اي . 

يوسف : وتبطل مشاكل. 

فهد : ليش انه شمسوي حتى هيج تكول ، هيه ادبسز مسويه علاقه من ورانه وتريد اسكتلها.. 

يوسف : كافي فهد اسكت .. 

ضلو يتعاركون بيناتهم والاصوات تعالت ، من الخوف سديت الباب ، كعدت وسديت اذني كمت اعيط واصرخ بصوت عااالي... 

الى ان اجتني ايفين .. 

ايفين : شكو شبيج ؟ 

سيلين : ماريدهم ماريد اسمع كااافي خليهم يسكتون كافي تعبت كااافي كااافي . 

حضنتني وضلت تهدأ بيه ، مر اليوم واني حابسه نفسي فوك منزلت ابد ، بس الصار امهم صعدتلي ثاني يوم.. 

حجت حجت براسي دمرتني ، عيرتني وحجت حجي ثكيل كله يدك بالعظم بحيث دمرت نفسيتي فوك ما هيه متدمره ، شي تعيرني بسامر وشي تقارن بيني وبين ادهم وابني هيج وانتي هيج وامج كذا وسمعتكم كذا.. 

كمت ما انزل بس اسمع الحجي تحاربت منهم كلهم الضلت ويايه بس ايفين وكل شويه تلوم بيه وليش هيج سويتي وليش هيج ... 

ادهم يتصل ماجاوب يدز مسجات ماجاوب تخبل كام يدز بصمه صوت يتوسل ومرات يدز بصمه نبرة صوته بيها تهديد مده اسبوع اني مامسعته صوتي ماعرف شنو الصار بيه حسيت نفسي تخبلت... 

جربت مره انزل جوه اكلوني اكل من ابوهم لأمهم ، عدا نرمان متحجي ويايه وضلت تلوم بيه كل متشوفني عفتهم وطلعت بره ضليت ابجي ابجي... 

لحد ما فات فهد جان طالع شافني كاعده ابجي اجه كعد يمي. 

فهد : شبيج منو وياج ؟ 

سيلين : راح اتخبل ماعرف شبيهم دمروني اهلك دمروني. 

فهد : شنو تريدين اسويلج احجي ؟ 

رفعت عيني مليانه دموع وكتله. 

سيلين : شوكت اهلك يروحون منا تعبت بعد ما اتحمل هذا الضغط.. 

فهد : شنو تريدين نشيل منا انه وياج وايفين. 

سيلين : يعني صدك تحجي لو تكذب عليه.. 

فهد : لا صدك اذا تريدين نطلع نطلع انه هم ضايج منهم . 

سيلين : زين ليش ما يرجعون لبيتهم واحنه تضل هنا. 

فهد : ما اكدر اطردهم همه يريدون يضلون هنا الافضل احنه نطلع منا. 

سيلين : منو يكول ادهم يقبل.. 

فهد : يقبل انه اخابره واقنعه 

سيلين : اي انت احجي وياه اني صار كم يوم محاجيه وياه ابد .. 

صفن بوجهي حك لحيته ضيق عينه وكال. 

فهد : ليش ؟ 

سيلين : ماعرف احس عقلي تعبان ماريد اجاوبه اذا جاوبته راح أأذيه بالكلام واضل الوم بيه لان تركني وحدي هنا وضليت اتخبط بالغلط لهذا ماريد اجرحه اعرف بنفسي من متأذيه ادوس بالكلام وياه..

فهد : احسن شي سويتيه لتحجين وياه لحد ما نطلع ونستقر وانه اشرحله الوضع كله. 

سيلين : فهد اكيد اذا طلعنه منا تنتهي كل المشاكل تره تعبت. 

فهد : تنتهي بس المهم تسمعين كلامي وتنطيني وعد متحجين لادهم عن طلعتنه منا. 

سيلين : ليش متريد اكله خاف يزعل اذا يسمع منك عادي احجي وياه وافهمه.

فهد : تعرفين اذا اتصلتي بيه وبلغتيه بطلعتنه راح يخابر ويستفسر واذا عرف السبب احتمال يرجع ليش تخسريه شغله وتعبه. 

سيلين : مهما يكون ماكدر اتصرف شي بدون علمه اخابره واكله افضل.. 

فهد : براحتج .. 

سيلين : ايفين عدها خبر . 

فهد : لتحجين شي هسه يعني انتو النسوان متكدرون تضمون شغله. 

سيلين : بس هاي اختي ومرتك ليش متريد احجي كدامها.. 

فهد : عادي احجي بس اول شي نلكه بيت نأجره يله نبلغهم منو يكول ابويه يسمحلنه نطلع وهو راجع علمودنه.. 

سيلين : هم صح. 

فهد : فكري بالشغله قبل لا تسويها .

سيلين : من تلكه بيت انت بلغهم.. 

فهد : هو هذا الراح يصير 

سيلين : شكرا فهد

فهد : واجبي هذا يابه.. 

عافني وكام وره نص ساعه كمت دخلت جوه هم سمعت حجي يسم البدن سكتت وصعدت فوك اول مادخلت لكيت ايفين كاعده منتضرتني. 

ايفين : وين جنتي؟ 

سيلين : بره ليش؟ 

ايفين : موبايلج ليش غالقته وهذا عمو فرفحت روحه عليج ليش هيج تأذيه مو حرام عليج اليوم حلف اذا متجاوبيه ويسمع صوتج يعوف كلشي ويرجع ..

سيلين : هسه اخابره .. 

ايفين : خابريه متدمر تره. 

سيلين : راح اخابر اخابر لتلحين. 

ايفين : اتصلي هسه كدامي. 

حكيت شعري بطريقه هستيريا فركت وجهي ورحت كعدت..

ايفين: انتي ابد مو طبيعيه 

سيلين : منو كال اني طبيعيه اني تخبلت اصلا ..

ايفين : وليش هيج سويتي بروحج ولج ليش.. 

سيلين : لتضلين تلومين بيه تره تعبت تدرين شنو اتمنى.. 

ايفين : شنو؟ 

سيلين : اهج منا واعيش بيت وحدي لا اشوف احد ولا احد يشوفني لا اسمع صوت ولا نفس صايره ما اتحمل صوتكم كلشي ما اتحمل. 

ايفين : سيلين انتي دمرتي نفسج بالعلاج الاخذتيه .. 

سيلين : هو نفسه علاجي بس الفرق كمت اخذه يوميه. 

ايفين : اعرف نفسه بس عمو من منعج منه مو اعتباطآ يعرف راح يدمر اعصابج. 

مديتلها ايدي.. 

سيلين : هاج شوفي ايدي شلون ترجف اذا ما اخذه ما اسيطر على نفسي ولا انفعالاتي اعصابي كلها ترجف حتى عقلي يخدر ويوجعني. 

ايفين : خابري عمو شرحيله حالتج خليه يعالجج عن بعد فدوة لعينج. 

سيلين : اي هسه اخابره هسه .. 

ايفين : وين موبايلج . 

سيلين : بالجرار 

ايفين : هسه اشوفه.. 

راحت دورته رفعت راسها باوعتلي وكالت.. 

ايفين : وينه ماكو خاف خالته بغير مكان. 

سيلين : ماعرف اني متأكده خليته هنا. 

ايفين : انتضري اشوف موبايلي اتصل عليج ونشوفه وين.. 

سيلين : ماشي.. 

ايفين. 

طلعت من غرفتها رحت لغرفتي ادور موبايلي جنت خالته على الميز مالكيته استغربت نزلت جوه على كيفي كوه نزلت لازمه بطني وانزل ، ثكلت كلش هسه عليه سبع اشهر .. 

دخلت للمطبخ لكيت فهد كاعد يمهم اشرتله عكد حاجبه واشرلي بصبعه معنى حركته شنو تريدين. 

اني هم سويتله حركه بيدي متفقين عليها معناها اريدك بشغله ضروريه. 

حك انفه واجه جرني من ايدي رحنه للغرفه الجوه.. 

فهد : ها ففه شكو؟ 

ايفين : على شنو ناوي من الاخير ؟ 

فهد : شكو ياستار . 

ايفين : فهد اطلعلي بالنظيف احنه دافنيها سوه سوالفك متعبر عليه بعد. 

فهد : سوالفي شمسوي ؟ 

ايفين : حنانك ويه سيلين وخايف عليها وتدافع عنها كبال امك وابوك ومتقبل احد يحجي عليها ذني الشغلات شويه قلقتني.. 

فهد : يله خليهم ياكلوها ولج مو جانو هيج وياج اله تعاركت وحجيت يلا فكو ياخه عنج هسه هم هيج سويت ويه سيلين متشوفيها شكد تعبانه. 

ايفين: فهد انت من جنت تدافعلي لان عندك مصلحه ويايه تريد فكري صافي و ما التهي بالمشاكل وبنفس الوقت حبيت دفاعك عني مهما كانت الاسباب ،،بس سيلين انت تكرها اني ادري وانت تدري عليمن تبيع سوالفك. 

فهد : حرت اصير زين ميعجبج اصير مو خوش ادمي هم ميعجبج. 

ايفين : برأيي ضل موخوش ادمي افضل واريح لان من تصير زين اخاف منك معناها عندك مخطط..

فهد : كيفج فف شنو تريدين تفكرين فكري وشتحللين حللي. 

ايفين : سكوتك عن مكان روايه مخوفني شعجب ماحجيت.. 

فهد : قررت اتعالج واقدم اوراقي للمحكمه واطلب اشوفه اسبوعيا احسن من الحروب لان انه تعبت ..

ايفين : احاول اصدكك ، المهم انطيني موبايلي .

فهد : مو عندي . 

ايفين : فهد موبايلاتنه وين . 

فهد : النوب صارن موبايلاتكم شمدريني وين خاليهن. 

ايفين : عندك ومتأكده لان ثنينهن اختفن سوه. 

دفعني وعصر فكي .. 

فهد : ففه لتلعبين بالنار اتذكري عندج طفل ويحتاج تربيه التهي بنفسج وعوفي كلشي والاصح غلسي . 

باسني بشفتي وطلع.. 

اعرف عنده شي واعرف ديخطط لشي جبير بس شنو ماعرف... 

سيلين. 

من طلعت ايفين اخذت علاجي او الاصح السم لان دمرني ، دقايق ونمت كعدت الصبح على صوت نقرات خفيفه على الباب كمت لفيت حجابي وفتحته لكيته فهد واكف وبيده الموبايل . 

سيلين : هاا. 

بأبتسامه كال.. 

فهد : صباح الخير 

سيلين : صباح النور. 

فهد : ادهم هواي متصل عليج وموبايلج مغلق ليش. 

سيلين : ماعرف وينه جنت حاطته بالمجر وفجأه اختفه دورته ايفين ماكو جوز اني شو وين خالته وناسيه.

فهد : المهم هذا ابو مرايم على الموبايل احجي وياه براحتج من تكملين دزيه.. 

مديت ايدي اخذته وكلبي يدك سريع... 

اول ما كلت الو عاط بيه جان يحجي منهار عتب وملامه بس من سمع صوت شهكاتي سكت تقريبا هدأ وره صمت دام دقايق كال.

ادهم : حبيبي انه صح بعيد عنج بس احس بيج ومتأكد متأذيه واكو شي ضامته عليه احجيلي سيلين اساسا انه حجزت راح ارجع الشهر الجاي بس طمنيني لحد ما ارجع كون مابيج شي مانايم والله مانايم صار اربع ايام ولج ليش اتصل وادز مسجات متردين عليه ليش شسويتلج انه وغفل هجرتيني احجيلي اي شي صار وياج وعد مني ما احكم عليج بأي شي حتى وان كنتي على خطأ وياج ماعوفج هااا سيلينه حبيبتي احجي مو شلعتي كلبي.. 

سيلين : موبايلي ضاع لهذا مجاوبت.. 

ادهم : اكو احد مأذيج او ضاغط عليج بشي احجيلي ما اكول لاي احد وعد يضل سر بيناتنه ، انه صديقج وتذكري كلشي اتقبل منج واسامحج حتى وان كان خطأ مقصود مادام بالبدايه . 

سيلين : كلشي غريب عليه ماكادره اتعايش وياهم ولا اكدر اشاركهم بأكلهم او كعداتهم تعبت يحجون عليه ويأذوني تعبت نفس المأسات الصارت لعمه ياسه انعادت عليه لو بيك ترجع ونعيش سوه لو تطلكني.. 

ادهم : سمعيني وعوفج من هالحجي الماصخ اوراقج خلصت وانه راجع نضل فتره ونسافر بس صبري شهر واحد بالزايد شهر ونص لان الفيزا تأخرت ماكو حجز قريب.. 

سيلين : انتظرك بس يا ادهم اذا تأخرت اسوي شي ميعجبك...

تغيرت نبرته نتر بيه. 

ادهم : يعني شتسوين بله .. 

سيلين : اغير حياتك كلها   

ادهم: شلون يعني مافهمت. 

سيلين : باوع اني عصبيه هسه واعصابي تلفانه وامك وابوك هواي اذوني وسمعوني حجي لهذا ماريد اطول وياك بالكلام وخاف لا اجرحك لهذا عوفني لتتصل لحد ماترجع. 

ادهم : هيج صار الحجي سيلين. 

سيلين : اي ماريد اسمع صوتك لحد مترجع. 

ادهم : ماشي حبيبتي ماشي روحي الله وياج. 

سده وراح قبل لا اجاوب.. 

طلعت رحت لغرفتهم دكيت الباب فتحها فهد.. 

سيلين : هذا موبايلك شكرا 

فهد : عفوا وصاني اجيبلج موبايل جديد بدل موبايلج القديم. 

سيلين: بكيفك. 

فهد : باجر يمج. 

سيلين : ماشي.. 

زاد الضغط عليه والمشاكل زادت حتى ايفين حسيتها بدت تضوج مني وتحملني مسؤوليه الصار لان هيه هم لاحها طشار من المشاكل ، كل مره تكلي صوجج جنه مرتاحين اجوي يمنه بسببج .. 

وره يومين من اتصال ادهم صارت مشكله جبيره بيني وبين امهم بسبب عمه ياسه الله يرحمها ، صعدت فوك لميت شكو شي احتاجه من ملابس مستمسكاتي استنساخ اخذتهن والكي كارد هم اخذته ادهم قبل لا يسافر رحنه اني وياه سواه على بصمتي يعني اكدر اتصرف بيه بكيفي.. 

اخذت كتبي مال الدوام مخليت شي ما لميته.. 

انتضرت جيه فهد اول ماسمعت صوته طلعت من غرفتي وكفت يم الدرج صحته صعد.. 

فهد : هاا خير. 

سيلين : طلعني منا فهد اريد اطلع تعبت.. 

اتلفت منا ومنا وكال. 

فهد : تعاي بغرفتج نحجي. 

مشيت كدامه دخلت للغرفه اجه ورايه. 

سيلين : يله احجي. 

فهد : باعي اجرت بيت قريب رتبته اذا تحبين تنتقلين بيه براحتج بس ايفين رفضت الفكره متريدج تطلعين منا.. 

سيلين : هيه كم يوم ويرجع ادهم يعني بالزايد شهر شنو يعني اذا اجتي ويايه وبعدين ترجع. 

فهد : هم صح باعي روحي انتي ارتاحي وانه اقنع ايفين لان قافله. 

سيلين : وينها اني احجي وياها . 

ردت اطلع منعني.. 

ماعرف شلون قنعني ضل يحجي ويايه غسل دماغي غسل الى ان وافقت مثل الغبيه واتفقنه نطلع بليل وهاي جانت غلطتي الجبيره خلتهم يكلبون عليه كلهم.. 

وفعلا بليل كلش طلعت اتفق نتلاكه بالشارع يعني اني اطلع وحدي وهو ينتضرني بسيارته مجنت اعرف شنو المغزى من هذا الشي عبالي صدك راح ننتقل لان هو هم يوميه عركه ويه ابوه صبح وليل علمود شغله نرمان وهم يدافع عن ايفين ومرات يدافع عني لهذا زادت المشاكل والمشاحنات بينه وبين ابوه واشوفه دمه محترك ويصيح عليهم اقتنعت هو فعلا يريد يساعدني.. 

طلع الجنط مالتي المغرب واني بليل طلعت جنطه صغيره على الكتف ، وطلعت سديت الباب ورايه ورحت برجلي لمصيري المجهول .. 

صعدت بالسياره ورحنه فعلا البيت جان قريب .. 

وصلنه للبيت دخل الجنط ونطاني المفتاح وموبايل جديد. 

فهد : هذا موبايل اشتريته جديد خليه يمج ورقمي بيه اي شي تحتاجين اتصلي. 

سيلين : عاشت ايدك ، وسجل رقم ادهم بيه لان محافظته .. 

فهد : ميخالف باجر اليوم كلش تعبت. 

سيلين : ماشي باجر باجر شكرا على كلشي. 

فهد : ماكو داعي تشكريني اختي انتي 

سيلين : رحم الله والديك. 

فهد : قفلي البوب زين تسوكتلج وضلت ففه اقنعها واجيبها واجي.. 

سيلين : اي عفيه لان اخاف وحدي.. 

فهد: يله رايح محتاجه شي. 

سيلين : لا عاشت ايدك. 

فهد : وايدج.

راح دخلت بيت صغير كلش صح مأثث اثاث بسيط بس يخنك خنك ، 

ماعرف اني مخنوكه اصلا ، فتحت الموبايل جديد مابيه برامج نت ماكو ، بيومها مكدرت انام للصبح عشت بخوف وقلق ردت ادهم يرجع حتى أأمن ، ثاني يوم خابرت على فهد يدك وميجاوب يدك وماكو اتصلت على ايفين حافضه رقمها مغلق ، ثاني يوم دكيت جاوبني فهد بس بوجه جديد.. 

بمعنى وجها الحقيقي.. 

فهد : ها شتريدين بيت واجرتلج شكو كل شويه تتصلين.

سيلين : هاي شبيك انت مو كلت من تحتاجيني اتصلي واني احتاجيتكم اخاف وحدي.. 

فهد : تخافين شنو وانتي طالعه من البيت وحدج بنص الليل ماحسبتي حساب لزوجج لاهله. 

سيلين : انت شدتحجي تره صدك ضحكتني.. 

فهد : باعي من الاخير للبيت مترجعين ورحنه للمحافظه وهذا البيت انقفل وادهم تعطلت سفرته يعني دبري روحج . 

سيلين : فهد لتسويها بيه وتدك الناقصه حرام عليك.

فهد : والله ما كتلج امني بيه صوجج انتي غبيه. 

سيلين : فعلا غبيه امنت بيك فعلا غبيه واني اليوم ارجع واريد اشوف شلون تمنعني. 

فهد : هههههه رجعي تلكين البيت فارغ. 

سيلين : انطيني ايفين احجي وياها. 

فهد : افونه تعبانه من الطريق ونامت بعد لتتصلين ماشي.. 

سيلين : زين انطيني رقم ادهم الله يخليك هسه عباله غدرته وانهزمت. 

فهد : تريدين رأيي لتتصلين بيه .. 

سيلين : ليش ؟؟ 

فهد : افضل عوفيه عايش حياته بره ليش يرجع وتخربيها..

سيلين : معليك انت اني اعرف شلون اوصله .. 

فهد : لازم نسيتي ادهم مايستعمل برامج غير الواتسب يعني اذا رقمه ماكو شلون تتصلين بيه. 

سيلين : اعرف شلون اجيبه روح وجفيني شرك حسبي الله ونعم الوكيل بيك انت مو رجال وحرامات تنحسب على الرياجيل اصلا. 

سديته بوجها وضليت افور ، ماعرف المن الوم بس بالدرجه الاولى الوم نفسي وغبائي اني وصلت نفسي لهذا الحال ، غدرت ادهم اني غدرته من امنت بأخوه والله يعلم شنو راح يطلعون عليه حجي ... 

ضليت يومين بهذا البيت طكت روحي منه طلعت ادور على مكان ثاني اروح بيه لان نفسيتي تعبت عبالك قبر مو بيت ، 

٣ ايام ادور لو ايجار غالي لو بيت جبير لو تعبان رحت على دلال دلاني على شقه بمنطقه بغداد ، رحت شفتها حلوه ومأثثه اثاث بسيط ، 

رجعت للبيت وطلبت من ابو التكسي ينتضرني اخذت الجنط وسديت الباب وطلعت ماعرف البيت المن ، صعدت بالسياره واني الدنيا طالعه من عيني مخنوكه اريد ابجي ، وصلت كبال العماره طلبت من ابو التكسي يوكف نزلت اجه رجال عمره يطلع بدايه الخمسينات اول ما شافني ابتسم وتقرب سلم على ابو التكسي جان ينزل بالجنط اخذهن منه وحاسبه. 

سيلين : لا عمو ليش اني انطيه عندي فلوس. 

ابو عبد : اسمي ابو عبد الله وانتي ظيفه يمي ومثل بنتي لتشيلين هم. 

سيلين : شكرا عمو. 

ابو عبد : هله بنيتي فوتي فوتي هنا الجيران كلهم زينين لتخافين نامي مأمنه .. 

هزيت راسي ساكته. 

وصلنه للشقه فتح الباب دخل الجنط ونطاني المفتاح..

سيلين : عمو شلون تريد الدفع وشكد الايجار.. 

حسبلي الايجار والمولد والنت تقريب ٢٥٠ وبعدين من اشتغلت زيدها... 

سيلين : عندي جوه ايدي مال شهرين يصير ادفعهن. 

ابو عبد : اي عادي يصير خليهن اذا ماعندج بنيتي. 

سيلين : لا عمو عندي الحمدلله. 

طلعت الفلوس حسبتهن وخليتهن بيده اخذهن ونطاني المفتاح وطلع.. 

دخلت للشقه بدايتها هول وعلى ايدي اليسرة مطبخ بعدين ممر ياخذني لغرفه النوم وعلى يساري حمام صح صغيره بس مرتبه ومأثثه .. 

العرفته اصحابها مسافرين واجارها شويه غالي لان مأثثه.. 

رتبت ملابسي بالكنتور وكلبي يفور محروك على ادهم متت اريد وسيله اوصله بيها ، كنكت على النت نزلت واتسب وحفظت رقمه القديم مال العراق كلت حتى اعرف من يفتحه اتصل عليه.. 

الصار وخرب مخططي اول ما فعلت البرنامج اجتني رسائل من فهد .. 

فديوات حدث ولا حرج لايفين ، شغلات تلعب النفس وياه ، وصورها ويه اسامه وفديوات مشايفتها قديمه الها ، تصوير احنه ونركص ، 

والمفاجأة فديوات اليه بيت سامر تخبلت شلون وصلن اله منين جابهن هنا عرفت هو على تواصل ويه سامر الكلب والصارلي سببه فهد .. 

عدا فديوات بيها صوت تعذيب بنيه وتصرخ وتبجي كتب جواها.. 

اذا تريدين اختج تعيش مصير روايه اتصلي بأدهم ، واذا تحبين مستقبله ينهد وسمعته تضيع اتصلي بيه منشور صغير مني بكروب الدكاتره مال جامعتهم واكتب زوجه الدكتور ادهم يوسف عمران شنو رأييج؟؟ 

كتبتله.. 

ناقص غيره وشرف عبالك اخاف منك كلشي احجيله لادهم ونشوف يصدكني لو يصدكك. 

فهد : هههههههه انتي شمدريج شنو جوه ايدي علمود يصدكني لو يصدكج احسن ابتعدي واذا متخافين على اختج اتصلي بيه ماعندي اشكال اخفيها عن الوجود ومحمد وتعرفيني ما اتشاقه. 

سيلين : زين انت ليش هيج دتسوي شنو التريده غير افهم. 

فهد : ارجع ابني ذاك الوكت رجعي لزوجج ساعديني مقابل حريه اختج. 

سيلين : يعني تعوفها لايفين اذا ساعدتك. 

فهد : اي اعوفها ماريدها .. 

سيلين : زين فهد زين.

فهد : لتنسين حياه اختج مقابل ابني والله اسويها ابسط شي اخفيها واحرك كلبج واذا تحبين تتأكدين من كلامي ادزلج فديو بسيط عن مكان الجني الازرك ميندله. 

سيلين : اعوذ بالله منك انسان مريض الله يشافيك وتستاهل كل الصارلك اني غبيه امنت بيك وصدكتك ..

فهد : غلطه الشاطر بألف. 

حجاها وسده ضليت افكر شسوي وشلون احلها بمنو اضحي بأدهم لو بأيفين لو بنفسي شسوي .. 

اول شي سويته شلت الخط ضميته وقررت اشتري شريحه جديده ، ثاني يوم رحت اشتريت شريحه وتسوكت كم شغله تسد جوعي ، رجعت للبيت رحت حسبت فلوسي عندي فلوس تكفيني فتره شهر تقريبا... 

مشت الايام بين الحسره والقهر والمرض لا الي عين اتصل بأدهم ولا عندي مبررات للسويته واصلا خطه مانفتح وبنفس الوقت خفت على اختي فضلت دمار حياتي للمره المليون على حساب راحتها وسعادتها... 

تعرفت على جيراني ام عبد الله صارت صديقتي كم مره حاولت تعرف عني شغلات جنت كلش متحفظه كمت ما اثق بأي احد ، 

علاجي كمت اقلل منه مشيت على نظام الصيدلاني كتبه اليه وباليوم الما اخذ هذا العلاج اخذ مقويات حتى جسمي ميرجف ، شويه شويه كدرت اتركه بس الالم والاعصاب والدمار العشته بسبب فراك ادهم وبسبب تركي للعلاج لعدوي ما اتمناه ،.. 

اجتي ابالي فكره اسحب فلوس من البنك علمود الايجار والمصرف اني وبالطريق كلت ليش ما اشتري سياره احسن من التكسيات ، سحبت مبلغ ورجعت للشقه ضميتهن .. 

مرت الايام واليوم اليه شهر ونص، كبرت هواي وتعذبت هواي وتألمت واني اتذكر حياتي وياه واتذكر لحظاتنه سويه احن واشتاق...

وكل يوم اموت واني اتخيله مشلوع كلبه وهو يدور عليه فكرت اروح لبيته القديم كلت اشوفه واحجيله كلشي وشيصير خلي يصير وفعلا رحت واني كلي لهفه الكاه ويفتحلي الباب وارتمي بحضنه والصدمه الباب مزنجل تخبلت يعني شنو ادهم وينه سألت الجوارين كالو قفلو البيت قبل اكثر من شهر ومحد اجه بعد..

ايست ورجعت للبيت لزمت موبايلي اتصلت بأيفين كله مغلق يطلعلي.. 

مرت الايام واني من ضيم لضيم اصارع مرضي واشتياقي وألمي ايست من الحياه بحيث اكل من لاجاره اشتغل من لاجاره وكل وكتي نايمه الله ينطي ام عبد شويه هونت عليه مرار الايام.. 

مشت الايام واليوم اليه عشر اشهر اني بعيده عنه ومادري بيه وين ماوين كمت اتصل على ايفين خطها مفتوح بس تسمع صوتي تسده متجاوبني ابجي اتوسل بيها اريد رقم ادهم متقبل تدزه اصلا متجاوب ولاتقره الرسائل...

 افكر بيها اكول هسه جابت هسه ابنها صار عمره اشهر وابجي بحركه اشتاقلها هيه متدري اني ضحيت بنفسي وحياتي علمودها ومتأكده هسه تلومني تكلي منو كلج ضحي منو كلج سمعي كلامه ، اني صوجي خضعتله جنت مريضه واعصابي ترجف وخايفه وكلها التمت عليه. 

مرات اكعد افكر اذا فعلا ادهم رجع بيا عين اشوفه واكيد ماراح يسامحني لو اموت.. 

بيوم كاعده واجتي ام عبد يمي اقترحت عليه اقتراح عجبني.. 

ام عبد : يمه انتي ليش متشتغلين مو احسلج من الكعده بلبيت وبس ضايجه وتبجين . 

سيلين : وين اشتغل واني ممكمله دراستي.. 

ام عبد : اكو شغل صديق ابني عبد الله يشتغل ب_______ وسمعت يريدون عاملات شنو رأيج. 

سيلين : ماشي اروح واشوف اذا عجبني المكان اشتغل.. 

ام عبد : ان شاءالله يعجبج.. 

ضلينه نسولف لحد ما راحت وفعلا ثاني يوم رحت لهذا المكان سألوني اسأله واختبار بسيط انقبلت لان واسطتي صديق عبد الله اشتغلت بهذا المكان ، 

كمت اروح واجي تكسيات انشلع كلبي ، اجتي ام عبد سولفنه اني وياها وحجيتلها على التكسيات وشلعان الكلب كالت .. 

ام عبد : ليش متشوفيلج سياره صغيره حتى لو متسعمله.. 

سيلين : فكرت بس خاف غاليات . 

ام عبد : ام عبد عنده معارف نشوفلج وحده على كد فلوسج. 

سيلين : ياريت بس اكو شغله 

ام عبد : شنو؟ 

سيلين : مستمسكاتي الاصليه ضايعات عندي بس مستنسخ. 

ام عبد : احجيلج ويه الولد ونشوف.. 

سيلين : ماشي انتظر.. 

وراحت ام عبد سألت واجتي كالت ابو عبد يدبرها الج شلون ماعرف المهم هو سعالي بيها و السياره مال كرايبهم . 

شغله السياره والشغل انحلت ضلت سالفه الدوام فكرت ارجع صح ما الي واهس وكلبي تعبان وعشت ايام بس الله يدري بيها كل يوم ابجي كل يوم انحب كل يوم اتخربط ومحد اليه وعشت فتره على المسكنات وفتره اترك كام جسمي ميستجاب للعلاج ولا يتأثر بيه تشبع جسمي مرات اتقيء من اخذ علاج جديد او منوم معدتي متتحمل..  

بدايه السنه الجديده قررت ارجع للدوام بس خايفه من شغله شلون اذا وصل خبر لادهم اني اداوم بالجامعه ، بعدين كلت منو يتذكرني اصلا اكيد ناسيني ، رحت رجل وره ورجل كدام ورجعت للدوام وداومت بس بلا روح كل مكان يذكرني بيه كل مسطبه تذكرني بكعداتنه ، 

النادي وريحه الجاي واصوات الطلاب كلشي يذكرني بيه كلشي ، امشي بممرات الكليه وابجي مخليت مكان جنه نكعد بيه ما رحتله ...

كمت ابجي وادعي رب العالمين يوصله خبر ويرجعلي ايست لا هو فتح خطه كله مغلق ولا كدرت اتواصل وياه بأي طريقه ....