رواية جذبني فمك البني الفصل الثاني والستون 62 بقلم عبير إدريس

كلولها الشيب الطلع ما ينصبغ الة بسواد عيونها 

ادهم 

______ 

صباح الألم صباح التعب الجسدي والنفسي صباح الضياع صباح الحلم الضائع صباح الملامة صباح الغدر صباح سوء السريره صباح سوء النوايا والخبايا صباح الكسر صباح الفقد صباح الدمار صباح الوجع ... 

هكذا هيه صباحاتي بدونك ياعزيزي..... 

صباح الصدمات صباح الخوف صباح الخذلان صباح الخيانات صباح الفاجعة بفقد عزيز واي عزيز يا سيلينه اي عزيز صباح التشتت الفكري صباح الجنون العقلي صباح الوجع صباح الموت صباح الخسارات واولها انتي.. 

هكذا صباحاتي بدونك يا عزيزتي.. 

مرحبا من الألم ..... 

اسمي ملاك احدى بطلات هذه القصه صباحكم خير وعافيه من بيتي.... 

كعدت الصبح مثل كل يوم باوعت بصفي فراشي مرتب يعني هم مانايم يمي وليش استغرب مثلا وعلى شنو اضوج نفسي .... 

صح اني مااحبه ويمكن ما اطيقه او ماعندي رغبه بيه بس المرأة تبقه مرأة وتحب تدلل وتحس هيه مرغوبه حتى وان كانت متحب ، لهذا كل يوم اكعد على نفس الخذلان ، يوما ما سوف اقص عليكم تفاصيل حياتي ربما تكون موجعه قليلآ.... 

رتبت فراشي وطلعت من الغرفه لكيته نايم بالاستقبال والهوسه تحيطه من كل جانب ، ضيغم انسان فوضوي بمعنى الكلمه هو والترتيب اعداء... 

تركته ورحت للمطبخ خليت القوري على النار وسديت الروب مالتي تلفلفت بيه من البرد علكت التدفئه وكفت يمها ادفي اصابعي البارده لونهن وردي مائل للأزرق يابروده طقس هذه الدوله ابرد من مشاعرنه هههههه.. 

دك المنبه مالته ماعرف كعد او لا المهم سويتله ويايه ريوك واعرف ماراح يشاركني بالاكل بس العليه اسويله مثل ما علمني دكتور ادهم .. 

تنهدت وسلمت امري لرب العباد وعقدت العزم اتغير وياه واشوف شنو تاليها مشيت بخطوات متثاقله نحو ممر الاستقبال سرقت نظره منه لكيته كاعد يفرك بعيونه مط جسمه بتثاقل تملكتني رغبه اروح احضنه بس اخاف اتفشل صحصح والتفت بأتجاهي مجرد شافني تخطط وجها بخطوط العبس ، كام ونفض عنه الغطى بطريقه عصبيه نوعا ما ، عفته ورجعت للمطبخ بس اكو غصه بداخلي وين جنت قبل وين صرت هسه ؟ 

سمعته يدندن 

زوجي على الورق يملك انفاس طربيه رنانه مرات يبهرني من يدندن وكفت قريب باب المطبخ واسمعه اكيد راح يغنيلها واني اتكطع ألم لان اعرف حبيبته المقصوده.. 

( دنيانا ماترحم ابد دنيانا

طول العمر تمشي عكس ويانا 

يادنيا فهميني الصار

من غدرج بكلبي النار 

شكد متغيرة عليه انتي شكد متغيره

جرحتيني ولا رحمتي شكد متغيره

وانتي مايوم ما يووم فرحتيني 

معقولة يادنيا انتهت ايامي

واحلامي ضاعت من ايدي احلامي 

مدري شوكت يصفى الراس وافرح

مثل باقي الناس وافرح مثل باقي الناس) 

سمعت كلمات الاغنيه والشجن بصوته سافرت بعيد بواقع حالم عشته بزمن الفراق ... 

تنهدت بقهر شنو يقصد بهاي الاغنيه كل مره يبسمرني بس هلمره ماعرف حسيته يقصدني بيها ... 

نفضت الافكار من راسي ورجعت ارتب الاكل فوك الطاوله.. 

دخل للمطبخ واني حبست انفاسي لاول مره يسويها ونتواجد بمكان سويه لو اني اطلع لو هو اصلا ميدخل للمكان الاني بيه قليل كلش واذا دخل نتعارك، 

بس اليوم دخل سحب كرسي وكعد بهدوء ضليت صافنه ضربني فيوز من الثول ، التفتت على الطباخ شلت القوري حتى اصب جاي اله وكفت قريبه منه توني اصب مد ايده وحضني من خصري حبست انفاسي وتعالت نبضات كلبي ردت اسيطر على انفعالاتي حتى ليكول بكلمه او بلمسه مني كدرت أأثر عليها . 

حركه ثائرة مني خانتني بدون وعي واني اسحب ايده من خصري وخرتها من شافني هيج سويت دفع الكرسي وكام عاف المطبخ وطلع يمكن عباله بعدني مطايقته او بعدني ما اريده ... 

بين فكري والندم .. 

اندك جرس الشقه بشكل مستمر حسيت اكو مصيبه لان عمو من يريد شي يتصل علينه ميجي نادرا يدك الباب بس صارله كم يوم كلش قلق ترك شغله ودوامه وباليوم يجي مرتين او اكثر على ضيغم ياخذه ويروحون لشقته ماعرف شنو بينهم بس مبين الوضع مريب... 

طلعت من المطبخ وهو طلع من الغرفه تلاكينه،

تلاعب بنضرات عينه يوديها منا ومنا يتحاشاني ضليت اباوع عليه وعلى حركاته ضيغم اليوم مو طبيعي حسيته متغير ماعرف اني هيج كاعد احس رن جرس الباب من جديد وقطع هاله الصمت بينه تحمحم وراح فتح الباب ونفس توقعي دكتور ادهم ... 

باوعت عليه وجها اصفر عيونه ذبلانه وجواها انتفاخ يحجي والحروف متلعثمه على شفايفه يخاف ينطقها خجل او خوف ماعرف بس اكو شراره غضب بعينه اول مره اشوفها ادهم هادئ مو هيج شنو الشي خلاه يتحول لهذا الانسان المحطم ذاتيا ، 

ابو ضحكه الحلوه هيج يصير بيه يحجي كلمه ويسكت يجر النفس كوه .. 

اسمع توسلات ضيغم علمود يدخل الشقه رفض يريده يروح وياه لشقته طلعوا سويه واني رجعت للمطبخ جمعت الريوك بصينيه كبيره واخذتها وطلعت رحت لشقته جان الباب مردود دخلت خليت الصينيه كبالهم ، 

ادهم مدنك راسه وضيغم جان يتصل بمنو ماعرف المهم حجه بالموبايل بلغه هاي الدوله ، الفهمته من الحجي حسب دارستي البسيطه لهاي اللغه بعد ما دخلت دورات هنا تفيدني من اطلع لان وحدي اطلع هو ميجي ويايه بسبب التزاماته واصلا اني ما اطلب منه ، 

الفمهته اتصل بمحامي ويريد يقرب موعد رحله ادهم ماعرف ليش اكو عراقيل خلت رجعته للعراق تتأجل شهرين او اكثر ... 

سد الموبايل ضيغم وادهم استشاط نار.. 

ادهم : شلون ضيغم اريد ارجع للعراق بعد ما اتحمل اكثر.. 

ضيغم : اكو شي استجد بحاله زوجتك 

ادهم : هيه وينها اريد احجي وياها كم مره طلبت منهم ينطوها الموبايل يكلولي نايمه لو بالحمام لو ماعرف شنو كلها اعذار واهيه .. 

ضيغم : يعني كلبك مامرتاح تحس اكو شغله صايره وضاميها عليك ؟ 

ادهم : اي 

ضيغم : اتصل بوالدك ممكن يبلغك شي. 

ادهم : ميجاوبني ليش انت مو تدري تبره مني والوالده كذلك. 

ضيغم : اتصل انه بيه واسأله عن زوجتك شتكول؟ 

ادهم : ياريت ضيغم ياريت.. 

اتصل ضيغم بعمو يوسف يدك الموبايل ويفصل عيوني على ادهم اباوع على ملامح وجها شلون مخيمه خطوط الحزن عليها ومعالم الهم واضحه بنبرات صوته جاوب عمو يوسف مجرد سمع صوت ابوه تنفس بضيق عاقد حاجبه منتظر رد عمي بخصوص زوجته والصدمه جانت من عمو كال.. 

يوسف : هيه وينها الباعنه علمودها انهزمت وكلبنه بغداد عليها انه وفهد تحزمنه ندور ماكو بلعتها الكاع لبنت ال*****. 

بهاي الكلمات التسطرت جانت مثل الساعقه ووكعت على راس ادهم .. 

ضيغم رفع عينه على ادهم باوعله بنضرات مرتبكه سد الحاكيه وخله الموبايل على اذنه بس بعديش... 

ادهم سحب موبايله واتصل اعتقد على فهد وفعلا اتصل عليه مثل متوقعت... 

دخل جوة بس اسمعه يحجي بحركه كلب... 

ملاك : ضيغم كوم يمه كلبه راح يوكف.. 

ضيغم : الله يعينه شكد صعبه والله ما اعتقد تعدي عليه هاي السالفه بسلامات. 

ملاك : يعني شنو ؟ 

ضيغم : شبيج ملاك انتي مستوعبه الوضع لو لا زوجته حبيبته مهزومه سواء بسبب او بدون سبب ومحد يدري عنها وين يعني مو بس هيه خسرها حتى سمعته.. 

ملاك : اعرف سمعت زين برأيك وين راحت . 

ضيغم : ماعرف شمدريني وفوكاها ادهم ميكدر يرجع هسه لان مرتبط بعقود والدنيا محتركه اذا عاف كلشي ورجع يخسر الاول والتالي. 

ملاك: الشغل انت لزمه ودوامه عادي يبطل منه شيسويله. 

ضيغم : اذا رجع ادهم افلش الشغل انه ماكدر اديره وحدي تعرفين التزاماتي شكثر وصار كم سنه عايفني ماكدر بعد تعبت.. 

ملاك : ماعرف خطيه هذا تعب كلبه كله راح يروح. 

ضيغم : هسه بس خلي يحصل رجعه اذا ضل هنا ينتهي. 

ملاك : اويلي سمعه شلون يصيح عفيه كوم يمه .. 

ضيغم : يابه شغله حساسه مشفتيه شصار بيه من سمع هو لو يريدنه نسمعه جان سولف هنا ليش دخل جوه وسد الباب. 

ملاك : يعني مابيها مجال يرجع هسه 

ضيغم : اله يتنازل عن كلشي ويفركش العقود يله يسمحوله يرجع . 

ملاك : اويلي ويرجع للصفر  

ضيغم : هو عقد ملتزم بيه مده معينه واعتقد خمس سنوات يعوف ويرجع غفل وين صايره اقلها لازم يقدم عذر مقنع مثلا حاله وفاه او شي مستعجل يله يسمحوله يرجع.. 

ملاك : والله ادهم ماعنده حظ اول زواجه تعذب بيه وهذا زواجه هم. 

ضيغم : الله يستر اذا شفته تعب احتمال اسافر وياه ماكدر اخليه يرجع وحده تضلين وحدج هنا عادي مو.. 

ملاك : كم مره عايفني وراجع وحدك عادي تعودت. 

ضيغم : بس تمر فتره على جيتج واكوم اخذج وارجعج ويايه .. 

ملاك : مو ضروري اروح تعرفني ماريد اشوف احد .. 

ضيغم : حتى اهلج ؟ 

ملاك : حتى اهلي. 

دنك راسه وسكت... 

ادهم 

الهي شنو من خبر تلكيته كأنما صاعقه ووكعت على راسي وين راحت وين وهيه ضعيفه ومريضه ، الخبر جان عباره عن ارتطام قوي بالمخ خبر افزعني وايقضني من سباتي الطويل بالغربه ، صافن داير مدايري اباوع انه وين وشنو راح اسوي حيره ضياع ، غلبني النعاس صارلي اربع ايام ما نايم ولا هاديلي بال من يوم القفلت جهازها ، مددت حسيت حركه بصدري الم نار تلهب وتاكل دواخلي ، 

ملامه اكلت عقلي اكل الوم بنفسي انه عفتها انه ضيعتها انه السبب دعيت ربي يجيني اتصال او خبر عنها يرحمني من عصف التساؤلات الاكلت عقلي... 

كمت لملمت بقايا روحي واتجهت للحمام توضيت وفرشت سجادتي بأيادي ترتجف وكفت بين ايد الرحمن الرحيم وسلمته امانتي يحفظها من كل سوء.. 

بكل تعب الدنيا رفعت ايدي للتكبير ورددت ما تيسر من القران الكريم ، ودموعي انهالت تغسل وجهي رميت هامتي على الارض وسجدت لله اشكو ضعفي وقله حيلتي وادعوه بكل ضعف يحفظها وين ماكانت ويستجيب لمناجاتي والكاها او يلكون الها اثر .... 

ضيغم : على كيفك كلبك راح يوكف ليش هالرجيف. 

ساكت ادهم ميحجي بس الرجيف الماخذه يعبر عن حالته.. 

صافنه عليه شلون وكف يصلي انحنى ظهره واسمع دعواته ومناجاته لرب العالمين ، دموعي تنساب بقهر وحدها .. 

همس بصوت ضعيف متجاهل وجودنه.. 

ادهم : الهي ارحم نبضاتها المرتجفه وخوفها وضعفها احفظها وين ماكانت الهي ماريد شي سوى تحفظلي سيلينتي فأنها لاحول ولا قوه... 

طلع ضيغم من الغرفه طلعت وراه وكف بالهول واجرى عده اتصالات تقريبا استمر ساعه ونص يتصل ويشرح ويحجي جان عصبي كلش اخر اتصال ، ارتاح نوعا ما ، طلب مني اصيح ادهم ، رحت لغرفته لكيته كاعد على السجاده ومرتاج بظهره على الحايط مغمض عينه وشفايفه تردد دعاء بصوت ضعيف ومرتجف... 

ملاك : دكتور ، ابو مريم عيني .. 

فتح عينه باوعلي بنضرات ضايعه . 

ملاك : ضيغم يريدك بالهول.. 

هز راسه وكام يتجى على الحايط ، طلع من الغرفه واني لميت السجاده ورحت وراهم اسمعه يكله لضيغم.. 

ادهم : ادفعلهم عادي .. 

ضيغم : بس هواي طالبين.. 

ادهم : عادي كتلك اهم شي ارجع. 

ضيغم : دوامك وشغلك كله يروح هنا اذا رجعت هسه. 

ادهم : طززز بكلشي اريد ارجع. 

ضيغم : اذا هيج نروح باجر وانت وقع على كل الاوراق حتى رجعتك تكون اصوليه وتكدر تسافر مره ثانيه وما يدكولك منع. 

ادهم : هذا هو سويها انت رحم لوالديك.. 

ضيغم : صار تدلل باجر كلشي ينتهي بس السفر ممكن يتأخر اسبوع .. 

هز راسه ساكت.. 

ثاني يوم ضيغم راح كمل كلشي ورجع اخذ ادهم علمود التوقيع ، كلش انقهرت تعبه راح وشغله انتهى هنا يعني اذا رجع لهنا مره ثانيه لازم يبدي حياته من الصفر... 

مر الاسبوع على اعصابنه ، ابد ما تركناه ضلينه يمه بالشقه ضيغم ينام يمه ويجبره ياكل لكمتين ويعوفنه ويفوت للغرفه علمود منضغط عليه . 

مختصر لمأسات ادهم كبر فوك عمره عشر سنوات... 

خلص الاسبوع وباجر سفرتهم جنت بالغرفه احضر الجنطه مال ضيغم لان راح يرافق ادهم... 

دخل لغرفه النوم جانت الساعه ١٢ ونص عبالي راح ياخذ اللحاف ومخدته ويطلع ينام بره مثل كل يوم بس الصار مدد على الجربايه رمقته بنضره سريعه لكيته يكلب بموبايله رجعت ارتب بالجنطه.. 

ضيغم : عفتلج مصرف يكفيج شهر.. 

ملاك : ممممم. 

ضيغم : خابريني اذا احتاجيتي شي. 

اول مره هيج يكلي دائما من يسافر من ولايه لثانيه او يرجع للعراق ابد ميكلي خابريني واصلا قليل بينه اتصالات... 

ملاك : ماراح احتاج شي.. 

ضيغم : متخافين وحدج.. 

ضحكت .. 

ملاك : حتى لو اخاف راح اتقبل خوفي برحابه صدر .. 

نضراته ندم ونضراتي بيها جبال من العتب حسيته قره داخلي لهذا غابت ابتسامته من وجهة ... 

كام بتثاقل وكف يمي مد اطراف اصابعه وسد الجنطه لاحت اصابعه كف ايدي سرت غصه بداخلي غريبه من قصتنه وحياتنه الاغرب.. 

سحبت ايدي توجهت حتى اطلع من الغرفه اجاني صوته كال.. 

ضيغم : لحظه انه طالع .. 

وكفت بمكاني تقرب مني همس بأذني.. 

ضيغم : خلي ثقه بنفسج عليش هلكثر مهزوزه ... 

رفعت عيني باوعتله بثقه احاول اشجع نفسي بيها ... 

عيونه تفتر على ملامحي متفحصه كل تفصيله بوجهي.. 

همس بصوت حاني ... 

ضيغم : كل مره امشي وره قلبي هلمره راح اساير عقلي .. 

ابتلعت غصتي وجاوبته بصوت مثلت بيه الهدوء.. 

ملاك : وين تريد توصل بنهايه هذا الحوار. 

سرت ابتسامه نصر على شفته واني الرجفه اعتلت ملامح وجهي .. 

ضيغم : هلمره قراري راح يكون صائب لا معادي للدين ولا مخالف للشرائع ... 

ملاك : ما فهمت ؟ 

ضيغم : ارجع من السفر ونحجي واشرحلج منو اله الحق بتحديد تفاصيلج.. 

صابتني رهبه وانتفض جسمي خجل جان مراقب حركاتي ، استرسل بالكلام على نفس الوتيره المستفزه لمشاعري كأنثى مستحيل متتأثر بهاي النضرات او هذه الكلمات الحانيه.. 

ضيغم : صرت انعجب بخجلج مني وين جنتي عيونج تاكلني ولسانج رشاش ههههه... 

جريت نفس لزمت الباب وكتله. 

ملاك : تروح وترجع بالسلامه ابن عمي تأخر الوقت اريد انام. 

ضيغم : تمام ساعه سته ونص انه اروح اذا حبيتي تكعدين تحضرين اكل لادهم براحتج. 

طلع من الغرفه ثارت مني كلمه بعصبيه استوقفته بمكانه خلته يلتفت عليه مبتسم.. 

ملاك : وانت شنو متتريك؟ 

ضيغم : الخير وما مدت ايده تصبحين على خير بنت العم.. 

راح للأستقبال كالعاده ينام هناك واني رحت مددت بس ماعرف شصار بيه جسمي كله يرجف عصبيه كل ما احجي وياه اعصب ماعرف ليش اريد اجوز من هذا الطبع ماكدر.. 

نمت ليلي بين الذكريات وبين الحاضر .. 

كعدت الصبح سويتلهم ريوك وسلمت عليهم وراحوا .... 

ادهم 

تركت المكان وتركت مستقبلي ومالي واهدافي الخططت الها من سنين طلعت من هذا البلد بحيره وقله حيله متجه الى دياري القديمه واي ديار ؟ 

اغمضت عيني واعلنت الطائرة على اقلاعها ، قضيت ساعات السفر وانه مشلول الحال تائه الفكر مشتت البال ، غياب سيلين المفاجئ طفه كل شي حلو بحياتي هروبها خلانه نتجه بحياتنه نحو العدم ، مشت الساعات بثقل يضغط على عضلات صدري ضيغم قضى الرحله متأسف على حالتي ويهز براسه مستغفر على قله حيلته بمساعدتي .. 

بين النعاس والتعب مانايم ايام بس مجرد اغمض عيني وافكر حتى وانه مغمض وينها خاف ماتت لا يمكن خطفوها يمكن انجنت وصارلها حادث ، تشويش افكار واضطراب مشاعر انتهت بأعلان وصولنه لمطار بغداد الدولي ... 

كمت اول المسافرين وخرجت من باب الطياره حامل روحي بيدي كلشي ثكيل عليه حتى النفس ماكدرت اشيل جنطتي التفتت خلفي جان يمشي ضيغم ويسحب بالجنط مالتنه ،طلعنه من المطار وركبنه تكسي وادعي يارب انطيني دليل الكاها عسما انبش بغداد وضواحيها لازم الكاها اليوم ما انام ولا يهدالي بال اذا ما لكيتها.... 

الهي اعشقها رغم اخطائها رغم مرضها رغم تمردها رغم رحيلها الغير مبرر .. 

ايتها البعيده

سعيده وحيده 

ام متعذبه طريده

محبوبتي 

قاسيه عنيده

كيف تركتكِ وحيده وصفيتي شريدة 

هجرتني ايام عديدة

وعاهدتك بأن اعود لكن عودتي كانت لأجلك ايتها الفقيده 

خذلوا قلبك وحرقوا احلامكِ 

وكعادتك تتظاهرتي بأن شيئا لم يكن.. 

اذ عذبوك سأنتقم وان غدرتي لن انتقم

سأعاملك بحنان كعادتي ثم ارحل .. 

هكذا اكون سددت جميع ديوني ...

اللهم قلبي ثم قلبي والتي لأجلها ينبض قلبي.. 

بقلمي...

عبير ادريس.. 

ايفين 

كعدت الصبح مثل كل يوم وبوجهي لغرفه سيلين ردت اطمأن عليها جان وضعها مو طبيعي وميعجب دكيت الباب وفتت فراشها مخربط معقوله كاعده من وكت وشعجب نزلت جوه هيه تضل فوك واني اصعدلها الاكل طلعت وسديت الباب نزلت على كيفي لكيتهم بالمطبخ كلهم مجموعين على سفره وحده يتريكون اله اختي ماكو كلبي لعب صبحت عليهم وسألتهم مستفسره.. 

ايفين : صباح الخير... 

ردولي بصوت واحد / صباح النور. 

ايفين : سيلين وين ؟ 

فردوس : فوك غير يحتاجلها سؤال .. 

ايفين : لا مو فوك هسه جنت بغرفتها.. 

ضلوا واحد يباوع بوجه الثاني فهد ياكل ومغلس على الوضع حتى ماعلق.. 

ايفين : فهد فهد .. 

رفع عينه وكال . 

فهد : وياي. 

ايفين : اكو واحد ثاني اسمه فهد غيرك. 

فهد : لا بس انه وانتي ففه. 

ايفين : سيلين وين ؟ 

فهد : لحظه ادورها بجيبي.. 

ايفين : مكاعد اتشاقه فهد سيلين وينننن. 

فهد : وانه شكو تعلين صوتج عليه روحي دوريها هسه تلكيها شو وين. 

ايفين : وين ادورها واني بطني لخشمي اكللهم اختي ماكو شنو هالبرود الانتو بيه .. 

يوسف : اتصلي بنرمان احتمال راحت وياها للجامعه. 

ايفين : شعدها تروح وياها اكيد لا فهد كوم شوف الكامرات اذا طالعه ويه نرمان تبين.. 

يوسف : اي خوش فكره كوم يابه شوف مرت اخوك وين. 

كلت بكلبي هسه صارت مرت اخوك وانتو موتوها قهر .. 

كام فهد طلع تسجيلات الكامره مال الصبح لحد ساعتنه هسه .. 

ماكو لا طلعت سيلين ولا رجعت ، بس مريم طلعتها ام ادهم للخط ونرمان راحت للدوام .. 

دخلت للبيت دورتها غرفه غرفه كلت جوز غلبها النعاس ونامت ، دورت ماكو تخبلت بالزايد رجعت الهم الهث من التعب ... 

ايفين : ماكو والله ماهيه دورت كل البيت.. 

يوسف: عجيب شو ارجع بالتسجيلات .. 

فهد : وين ارجع. 

يوسف: البارحه ... 

فهد : تمام هسه ارجع.. 

رجع التصوير وتطلع سيلين تتلفت الساعه فوك ال ١٢ طالعه من البيت وشايله جنطه صغيره على كتفها . 

يوسف: فهد حول على كامره الشارع دشوف وين راحت.. 

فهد بحركه اصابع خفيفه حول الكامرا ، مشت سيلين للشارع صعدت بسياره ليكدام بس بسبب الظلام مابين لا لونها ولا منو بيها حتى لايتات مطفيهن... 

احنه بيته بوسط الفرع صاير والكامرات اضبط شي جايبهن فهد بحيث نشوف لنهايه الفرع بوضوح بس بليل مو كلشي يبين. 

اني من شفتها انصدمت ماعرف شنو اسوي عبرت عن صدمتي بشهكه ولطمت على وجهي... 

عمو يوسف جر كرسي وكعد ، فهد واكف حاير ، عمتي استلمت سيلين غلط وطعن بشرفها عاط بيها فهد.. 

فهد : شنو سالفتج خل نفهم جوز اقاربها صديقتها هسه انتي شفهمتي وحجيتي. 

فردوس : يا اقارب وياصديقه منيلها اقارب هالمكطمه هاي ، دشوفها انهزمت وبعدك تدافع وتبررلها. 

فهد : جوز هجت من مشاكلج شسويتي بيها مو دمرتيها.. 

فردوس : اسكت انت انه اعرفهن بنات تماره العرك دساس انه ليش اكرهن.. 

يوسف : شو سكتي خليني افكر وين نلكاها.. 

فردوس : قابل ضايعه وتلكاها انهزمت.. 

فهد : كوم يابه نشوفها . 

يوسف : امشي هسه اخوك يتخبل . 

التفت علينه وكال. 

يوسف : ممنوع احد يبلغه بالصار نتأكد يله. 

ايفين : اذا اتصل شنو اكله. 

يوسف : بالحمام نايمه طلعت انتي دبريها لا يصير بيه شي وهو بالغربه.. 

جريت حسره شكبرها طلعوا واني الوب اروح وارجع بالطرمه لحد ما اجتي عمتي رزلتني يله فتت.. 

فردوس : هسه تجيبين من وكت ياغبره طبي جوه.. 

مجاوبتها فتت والوب ، تالي صعدت فوك بغرفتها فتحت الكنتور اباوع ملابسها ماكو غراضها كتبها كلهن ماخذتهن واني شفت بس جنطه صغيره شايلتها من طلعت ورجعنه الكامرات بس مره وحده طالعه يعني فهد اله ايد بالشغله وهو مساعدها ضليت الوب شوكت يجي دامرعده تمرعد لو اعرف يموتني ما اسكت اله يدليني مكان اختي وين. 

نزلت جوه افور البيت ميلمني ماكدر اكعد بمكان مرت ساعه وثنين وتلاثه ومحد بين عمو ادهم يتصل على موبايل امه مترد عليه عود هيه زعلانه ولا اني كدرت ارد لان صوتي يرجف وراح يعرف بيه اذا كذبت.. 

انتضرت جيتهم وهمه يبلغوه اجوي ايد وره وايد كدام ، ملتهين يسولفون او بالاصح ينهشون بلحم اختي ، سحبت فهد من وسطهم وطلعنه بره بالطرمه. 

فهد : شبيج هيج جارتني . 

ايفين : تعال احاجيك. 

فهد : يله احجي ؟ 

خصر ايده وعكد حاجبه. 

ايفين : وين وديت سيلين بدون كذب. 

فهد : اهووو راح تذبيها براسي مو؟ 

ايفين : فهد لتلعب عليه عبالك ايفين القديمه واتقشمر.. 

فهد : شنو تريدين تعرفين. 

ايفين : سيلين وين ؟ 

فهد : ماعرف شفتيها طلعت وحدها لو انه طلعت وياها. 

ايفين : هدومها كلهن ماخذتهن وهيه طلعت بجنطه صغيره يعني انت مساعدها. 

فهد : والله شلون استنتجتي بله؟ 

ايفين : رجعت الكامرات وشفت انت ماسح الوقت الانت مساعدها بيه.. 

اني جذب ماعرف بس حفظت سوالفه من يوم ماجنت اطلع وياه .. 

صفن بوجهي عوص عينه ... 

فهد : شمدريني جوز طفت الكهرباء بهذا الوقت والكامره ما سجلت.. 

ايفين : ياسبحان الله وماطفت من سيلين طلعت بس قبلها طفت.. 

فهد : انت تسولفين بكيفج اختج شو وين راحت وتذبيها براسي شو ولي.. 

عافني وفات طبيت لكيته واكف هو وابوه يم الكامرات ابوه جان يصور المقطع السيلين طالعه بيه بعدها فهد حذف كلشي تأكدت اله ايد بالسالفه لان ليش حذفهن حتى متبين لان يعرف عمو اذا رجع راح يرجع الوقت اذا اني نبهته ، شكد غبيه وثوله شجاني هيج حجيت ونبهته. 

توتر بلبيت مصحوب بقلق مرت اربع ايام صبح وليل عمو يوسف وفهد يطلعون يدورون عليها ويرجعون هلكانين تعب حتى اني بلشت اصدك فهد ما اله علاقه بطلعتها والاكدلنه هذا الشي موبايلها الظهر فجأه نرمان جانت تنظف واجتي كالت.. 

نرمان : هذا الموبايل مو مال سيلين. 

ايفين : اي وين لكيتيه. 

نرمان : فوك الثلاجه مسحت فوكاها ولكيته.. 

ايفين : انطينيا 

نرمان : خلي نشوف بلكت اكو شي يوصلنه الها متفقه ويه صديقه ويه اقارب شتكولين قبل لا ننطيه للولد. 

ايفين : يله بلكت الله نلكه شي.. 

نرمان : مابيه شحن عندج شاحنه ترهم عليه. 

ايفين : اي فوك هسه اجيبها. 

نرمان : انتي دليني اني اصعد  

ايفين : اكو بلك كهرباء بصف راسها يم الجربايه تلكيها مشكله بيه 

نرمان : ماشي.. 

صعدت جابتها واجتي ربطناه على الشحن وانتظرنه بفارغ الصبر ينفتح الموبايل.. 

ايفين : واخيرا انفتح .. 

كمت افرك بوجهي من القلق. 

فتحته نرمان وكمنه نكلب بيه دخلنه على الرسائل سوده عليه عمو شكد متصل وشكد داز رسائل عدا الصور مالته تعبان بيها شارح حالته يكلها جاوبيني شوفيني شكد متعذب وتعبان بس ردي .. 

نرمان : سوده عليه شوفي ادهم شلون متكطع وهيه ليش هالشكل تحجي وياه والله عجيبه معقوله متحبه ؟ 

ايفين : شلون متحبه وهيه روحها بيه مو حتى تمرضت من سافر عاد مو تطلعوها صفر فد مره. 

نرمان : هسه شكلت اني شوفي الرسائل شتبين.. 

ايفين : اطلعي شوفيلنه غير محادثات.. 

ماكو محادثات قليله كلش دخلنه على الواتساب ونشوف مراسله رقم غريب دخلنه عليه .. 

بالبدايه كلام تتوسل بيه وبعدين من مجاوبها صاير عتب قوي بينهم بعدين حجي هواي مو حلو ، واخر شي تهديد من سيلين تخرب حياته اذا تركها وماساعدها والصدمه فديوات دازلها اشكال وكلهن على النص واسدهن ما اكدر اكمل... 

نرمان : هذا زوجها السابق سامر مو صح.. 

ايفين : اي هو 

نرمان : وليش تراسله وتتوسل بيه مو دمرها شلون تريد ترجعله صدك اختج مخبله.. 

ايفين : لتحجين عليها اكيد اكو دافع قوي خلاها هيج تسوي.. 

نرمان : شنو الدافع هاج شوفي اخر اتصال بينهم قبل طلعتها بنص ساعه. 

ايفين : باعي هيه ضيعت موبايلها والله العظيم جوز مو هيه احتمال لعبه سيلين مو هيج سيلين اشرف من الشرف نفسه. 

نرمان : اوكفي نتصل على هذا الرقم ونشوف اذا فعلا هيه وياه او لا.. 

ايفين : اي هم خوش فكره اتصلي. 

اتصلت يطلع مشغول  

نرمان : حاضر الرقم.... 

ايفين : زين ليش. 

نرمان : ماعرف احتمال لان ناسيه الموبايل هنا حتى محد يتصل عليه. 

ايفين : باعي هو سامر مسافر وهذا رقم عراقي احتمال لعبه. 

نرمان : هم صح بس ننطيه للولد يشوفون الرقم المن راجع. 

ايفين : انتضري عمو يرجع وانطياه لتنطيه لفهد.. 

نرمان : ليش ؟ 

ايفين : معليج انتي سمعي كلامي ولتنطيه لفهد.. 

نرمان : هذا هو يرجع ادهم وننطيه الموبايل هو يتصرف  

ايفين : لتحجين لاحد عفيه هاي سمعه اخوج مو بس اختي. 

نرمان : اكيد ما احجي ليش انتي متعرفيني 

ايفين : اعرفج بس اوصيج مابيها شي. 

نرمان : ليضل بالج. 

نهينه الكلام اخذت الموبايل وطلعت ... 

تكررت اتصالات عمو ادهم بنرمان وفهد يسأل عن سيلين يكلوله نايمه او بالحمام الى ان اتصل ضيغم بعمو يوسف وافتهموا السالفه خابر على فهد يصيح ويعيط وفهد يهدأ بيه ... 

سمعنه ادهم راح يرجع اسبوع الجاي ثاني يوم كبت عركه بين فهد ونرمان والله شنو يكللها تبطلين من دوامج يابه ليش شفتها ويه هجان ، وهيه تحلف ماكو هيج شي وماشايفته من يوم المشكله نهيت كلشي بس فهد مصمم شافها واعصابه البارود وخوف نرمان يقنع اكبر واحد هو الصح ونرمان التكذب ... 

يوسف : والحل شنو فهمني راح اتخبل عايف شغلي وبيتي وجيت هنا بس المصايب. 

فهد : ارجع لازمك انه 

يوسف: اخذ نرمان ويايه متبقه يمك. 

فهد : اي اخذها واحنه هم نجي لان ما اثق بيها بعد. 

يوسف: تعال بعد احسن زين ومرت اخوك شلون اذا رجعت. 

فردوس: وين ترجع صارلها اربع ايام لو تريد ترجع جان رجعت .. 

فهد : اي صدك جوز ترجع ومتلكانه نضل هنا افضل وانت حجي روح وتعال. 

يوسف : اروح واجي انت عقلك براسك من حجيتها الطريق هنا هنا .. 

فهد: معليه قروو وانه وياكم بأي قرار تاخذوه.. 

يوسف : هذا هو نرجع وانت بين فتره وفتره تعال دورها هنا او نخلي خبر يم الجيران اذا اجتي يكون عدنه علم.. 

فهد : ماشي هسه اطلع ابلغهم اكللهم اي واحد يسأل علينه كلولهم رجعوا للمحافظه واخلي رقمي يمهم حتى تتصل وارجع اجيبها.. 

يوسف: اي الله يبارك بيك ، وانتو بنات اخذو ملابسكم وبس لتاخذون شي ثاني .. 

وهيج اقتنع الكل بطلعتنه من بغداد ، رحت واني ابجي دم على فراك اختي بس المصبرني ومبرد كلبي رجوع عمو ادهم متأكده راح يلكاها اول ما يرجع ... 

مشت الايام واليوم موعد رجعته وصل لبغداد اتصل علينه من موبايل ضيغم .. 

ضيغم : ها فهد انتو وين ؟ 

فهد : رجعنه لبيت عمك. 

ضيغم : يمعود صدك تحجي احنه كبال البيت وهذا ادهم تخربط عليه لا ايد ولا رجل... 

فهد : ليش تخربط. 

ضيغم : وكف بنص الشارع وعاط بعلو صوته يصيح وين الكاها هسه وين وهو منا لا اكل ولا نوم وكع عليه اجوي الجوارين سندوه اخذوه لبيتهم.. 

فهد : شلون سالفه زين تكدر تنتظرني على ما اجي. 

ضيغم : مخبل انت انتضرك ست ساعات راح اخذه لفندق وانت تعال من الصبح.. 

فهد : ماشي متفقين دير بالك عليه. 

ضيغم : لتوصي حريص ، باوع قبل لا تروح ماكو خبر عن سيلين 

فهد : لا ماكو. 

ضيغم : يله توكل. 

فهد : هله.. 

ايفين : شنو عمو متخربط. 

فهد : وانتي تتسنطين عليه.. 

ايفين : انت فاتح مايك وسمعت احجي عمو شبيه. 

فهد : اشو انتي هواي ضاربه ميانه وياي تره بختج بالحمل ايفين اذا جبتي وضليتي على اسلوبج هذا اربيج ليش تكولين ماكلت .. 

ايفين : عود ربيني بس كلي اختي وين وديتها. 

فهد : بعدج شاكه بيه افونه. 

ايفين : مو شاكه وانما متيقنه انت الك ضلع بطلعتها وتدري مكانها وين. 

لزم شفتي مردها بيده مرد.. 

فهد : اذا حلكج الحلو تفوه بكلمات مثل هاي مره ثانيه اصلخج صلخ.. 

دفعني وفات للبيت مديت ايدي على شفتي تحسستها حاره ،،

حلفت ما اسكت وبس يرجع عمو ابلغه بسالفه الكامرات وكلشي احجيله حتى لو يكرهني عادي اهم شي ترجع سيلين.. 

ثاني يوم راحلهم فهد باقين يومين بغداد وجابهم .. 

دخلو ساندين عمو منا ومنا مشي ميكدر يمشي امه شافته كامت تدك وتلطم ابوه راح يمه يمسدله ويبوس بيه ويتعذر على الصار قبل.. 

الكل هنا تحزم ويه ادهم علمود ترجع سيلين... 

وره ما ارتاح وكعد اجته نرمان خلت الموبايل بيده .. 

جاوبها بتعب.... 

ادهم : هذا موبايلها شجابه يمج؟ 

نرمان : ناسيته شوفه بلكت بيه شي يفيدك. 

اخذه وراح للغرفه الجوه سد الباب ماكو اقل النص ساعه وسمعناه يصيح بالموبايل فتحنه الباب لكيناه نار صاير يسب ويغلط ويتوعد العرفته من كلامه يحجي ويه سامر.. 

وره ما سد الموبايل ابوه افتهم السالفه وجابله تصوير الكامرات ، شافهن فرك عينه بعدين لزم ركبته صاح اريد مي ، ركضت نرمان تجيبله مي متحمل وكع ، تخبلنه الكل انخبص ضيغم كام يصيح علينه علمود نسكت ونطلع من الغرفه.. .. 

شالوه هو وفهد واخذوه للمستشفى ، وللأسف من بعد ساعات مرت اكتشفنه عمو ضربته جلطه ... 

وره اسبوع رجعوه للبيت وبلشت رحله علاجه طولت هواي لا شهر ولا شهرين ، بهاي الفتره رجع ضيغم لان شغله هناك وعايف ملاك وحدها... 

ضل فهد يداري بأدهم وبنفس الوقت يروح لبغداد يدور على سيلين هنا ايقنت وامنت وصدكت اختي انهزمت ويه سامر لان اخر مكالمه النهت عمو جانت ويه سامر ولو كذب جان عمو ما وكع ولا صار بيه شي اذن السالفه صحيحه.. 

هنا حقدت عليها كل ما اشوف عمو متدمر ومن طبيب لطبيب حتى بس يرجعوله عافيته .... 

بعد مرور ثمانيه اشهر ضبط يله عمو استرد عافيته وعلى عكازه يمشي شويه شويه كدر يتركها ويمشي طبيعي.. 

رجع لبغداد يدور عليها والخبله اكثر من سامع من الجوارين سيلين راجعه وسألت علينه ، رجع الامل بكلبه بس بنفس الوقت حاقد عليها ... 

بهاي الفتره ولدت وابني عمره اشهر فهد طار بيه وكل يوم يشتريله ويطلعه واني اركض وراه.. 

ايفين : فهد راح ينمتن شو جيبه. 

فهد : هاي شبيج عوفيه يصير رجال . 

ايفين : ادري شنو هيج شايله والله ميصير.. 

التفتت لعمتي .. 

ايفين : عمه حاجيه .. 

فردوس: عوفيه امي متشوفيه فرحان بيه.. 

هنا فهد دللني دلال اني وابني واخيرا حياتي استقرت وعلاقتي بيه قوت واهم شي فرحني شال فكره الانتقام من باله وترك سالفه روايه وابنه وشبه انطوت ... 

اكثر من مره تدك عليه ارقام غريبه واني ما ارد اخاف من فهد محذرني مره دك الموبايل جان هو كاعد .. 

ايفين : فهد هذا الرقم هواي يدك عليه متشوف منو ؟ 

جان يلعب بأبنه... 

فهد : خنفور شنو هذا خشمك معنفص ، حمدمد.. 

ايفين : جاوب يمعود عوفه. 

فتح الخط وخلاه على اذنه تغيرت ملامحه باوعلي وسده .. 

فهد : لتردين على ارقام غريبه وهذا الرقم حضرته. 

ايفين : ليش محجيت.. 

فهد : همه ما حجوا. 

ايفين : هااا.. 

اخذته منه وشكيت هاي سيلين ماعرف ليش بعدها فتحت الحضر وهم اتصلت فتحته وصدك هيه سمعت صوتها حرت اجاوب لو لا ماعرف خفت سديته ورحت اركض على عمو ادهم.. 

سألت عليه كالو طلع لبغداد صعدت فوك خابرته. 

ايفين : الو هلو عمو انت وين ؟ 

ادهم : بغداد نزلت ليش ؟ 

ايفين: عمو عندي خبر الك قنبله. 

ادهم : شنو؟ 

ايفين : سيلين اتصلت عليه وعندي رقمها. 

ادهم :دزيه برساله 

ايفين : شو متفاجأت. 

ادهم : دزيه ايفين وسكتي. 

ايفين : ماشي راح ادزه. 

دزيته وابتسمت واخيرا راح ننجمع بسيلين، وماحس اله فهد على راسي جر شعري ولفه على ايده. 

ايفين: اخ هاي ليش شعري شبيك. 

فهد : شعليج انتي بسيلين انه ماكلت اذا اتصلت متردين عليها سمعتها سحك صارت مو حتى ادهم مات من وراها. 

ايفين : اختي هاي فهد اختي شلون اتخله عنها. 

فهد : شوفي اذا اتصلت تكليلها تبريت منج وما الج دخل بيه واذا سويتي العكس اموتج. 

ايفين : اختي هاي فهد اختي وكافي الصار بيها بسببنه .. 

فهد : ابنج لو اختج اختاري. 

ايفين : انت تخبلت شلون هيج تخيرني وبعدين شلون عرفت اني خابرت عمو شنو تتجسس عليه فهد هيج صارت ..... 

هنا بعد ماشفت شي من الوان الدنيا غير بس اللون الاسود .. 

ضرب ماعرف منين اجاني وانسحب الموبايل مني .. 

ضلت تتصل يفتح خط عليها ويسده ومرتين خلاني احجي وياها وهو كاعد يمي تحت التهديد حاجيتها.. 

بالمرتين قيست عليها هواي بالكلام وشنو لقني حجيت... 

وعشت تحت عينه وتحت التهديد موبايلي انسحب مني نهائيا حركاتي محسوبه انفاسي محسوبه ممنوع اختلط بعمو ادهم اسلم واصعد اخذ اجازه وكابلني وكعد .. بس هواي ينزل لبغداد ومرات يخابر عمو ادهم نسأله يكول فهد يمي بلبيت بغداد يدورون على سيلين ... 

سيلين... 

امشي بالكليه والف حسره واه بكلبي اطلع من الكليه اروح لشغلي وهيج عشت ايامي، تعرفت على بنيه جديده اسمها نسرين او باالاصح هيه تقربت مني وتعرفت عليه لان اني معليه بأي احد لا اكون علاقات ولا غيرها .... 

وهيج مشت حياتي وحجيتلكم شصار ويايه وشلون عشت الوحده والألم وحدي.. 

كل حياتي واحلامي احتركت كدام عيني كل ما املك تحول الى دخان كلشي راح هباء ... 

اليوم اني واكفه كبال عياده الدكتور النفسي بيني وبين الجنون خيط خفيف ... 

دخلت للعياده سلمت على السكرتيره ودخلتني لان ماكو مراجعين سوايه المجنونه الوحيده بالعراق اني هههه. 

دخلت بعد ما سلمت وسألني عن وضعي وتطورات حالتي النفسيه جاوبته اخر شي كلي.. 

_ شنو استجد وياج بهاي الفتره او حياتج شلون عشتيها بعد العلاج الكتبته الج.. 

سيلين : الصراحه علاجك ما اخذته.. 

هو ادهم بدله اليه ومتأكده هو غيره بس ماحجيت للدكتور.. 

_ ليش ضروري تاخذيه. 

سيلين : ما اخذته اما بالنسبه لسؤالك شلون عشت ، عشت بخيال حالم طيله النهار يحجي ويايه وبليل افز ادور ريحته اعلك اضاءه موبايلي وادوره بعين ناعسه ، اصحى الصبح افتش موبايلي عن رساله منه مثل المجنونه بلكت يكلي بيها سامتحج ورجعتلج ما راح اتركج بس تعرف طلع قلبه قاسي ماجنت اتخيله بهاي القساوه قسى عليه لدرجه عندي رغبه بالبكاء بوسط فرحتي المسروقه.. 

وحجيتله كلشي صار ويايه بغيابه والاسباب الخلتني اترك البيت واعوفه.. 

_ تخيلي حياتج عشتيها داخل فديوا وهذا الفديوا بعد ما شفتيه تلفتيه او حذفتيه عن طريق الخطأ وهيج راح تكدرين تعيشين حياتج وتبدين كلشي من جديد. 

سيلين : دكتور اني سويت شغله ومنتظره رده فعله يا اما يرجعلي فعلا يا اما اختفي من حياته وللأبد لان تعبت وسالفه الفديوا وعلاجات الكلام ماعادت تنفعني تخيطت هاي المرحله اني... 

_ ممكن اعرف هذا الشي شنو؟ 

تنهدت وجريت حسره.. 

سيلين : رفعت دعوه تفريق خليت محامي بس المشكله يراد فلوس هواي واعتقد هو سمع اني خطيت هيج خطوه لهذا وقف حسابه بالبنك و منعني اسحب من جديد..... 

_ ليش ما تبلغيه بمشاعرج برساله وتحجيله الصار وياج.. 

سيلين : شنو اكله بيا عين احجي وياه واصلا اني حجيت وتوسلت بس ميرد عليه ، ويعرف كلش زين اني عايشه بعقل مريض بس مع هذا ما رحمني هو دكتور وحنين ويه كل الناس وحتى ويايه بس هلمره ما رحمني وتحمل فركه سنه ونص ويعرف مكاني ورغم هذا ما واجهني.. 

_ ماعرف شنو اكلج بس حاولي تدزيله رساله المسي بيها قلبه وان شاءالله يحن عليج. 

سيلين : شنو اكتب بيها؟ 

_ اكتبي مثلما اسأت بحقك يوما ما رجعت تأسفت ضعف اسائتي الك ..

واصعب قرار ممكن نتخذه بحياتنه من نبتعد مجبرين عن انسان احببناه بكل جوارحنه... 

صدكني انت الامان الغادرحياتي انت الثقه الفقدتها بنفسي.. 

كتبيله انت رجل الصعاب انت حمايتي انت اماني ومأمني انت القائم على رعايتي ولا زلت تتفقدني ،ما اريد منك سوى القليل من الاهتمام السابق بالعلن مو بالخفاء مثل كل مره .. 

كتبي مستحيل انساك نهائيا اعرف كبريائك يؤلمك ويمنعك مني لكن لاتنسى انا فتاتك الطيبه لو انت خطأت بدون قصد كان سامحتك بدون تردد انت رجل ولازم تواجهني مو تراقبني مثل طفل مراهق .. 

تعلمت عليك من تغضب مني تعاتبني او حتى عاقبني وبنهايه اليوم تجمعنه غرفه واحده وسرير واحد حتى وان كنا على خلاف... 

كتبت كلشي ملاه عليه الدكتور ودزيتها اله بوجه مبتسم مغسول بالدموع ، طلعلي تم التسليم فرحت بودي احضن الدكتور من الفرحه... 

رفعت راسي ضحكت وامسح بدموعي.. 

سيلين : شكرا دكتور يارب تكون جيتي يمك خير وعد مني اجيبه ويايه ونزورك نتشكر منك.. 

_ ماسويت شي هذا واجبي واهلا بيكم بكل وقت انتي وزوجك ويارب عن قريب اسمع خبر مفرح عنكم .. 

سيلين : يارب ادعيلي دكتور وشنو حجيته الك انساه الله يخليك. 

_ اكيد اعتبريني نسيت وماسامع شي هاي سريه مريض شلون احجيها.. 

سيلين : شكرا جزيلا. 

_ اهلا بيج بكل وقت. 

طلعت واني الفرحه ما سايعتني.. 

صعدت بالسياره ونسيت الموعد ويه نسرين ومحمد فريت السياره رجعت للشقه بالطريق دك موبايلي باوعت نسرين. 

سيلين : الو هلو نسرين.. 

نسرين : هله بيج انتي وين ؟ 

سيلين : جايتكم بالطريق. 

نسرين : هواي تأخرتي صار نص ساعه كاعدين منتضريج. 

سيلين : جايه قريبه يمكم.. 

نسرين : ماشي ننتظرج باي. 

سيلين : باي. 

فريت السياره ورحت الهم مكلت الها نسيت ، رحت وكلي لهفه راح اشوف ادهم وينتهي كلشي ونتواجه بس بنفس الوقت كلبي لاعبني ما مرتاحه وصلت صفيت السياره ونزلت توجهت للمكان المتواعدين بيه اتصلت على نسرين دلتني وين كاعدين.. 

مشيت متبعه الوصف من اوصل انصدم 

اعتلاني شعور الخوف والرهبه وصدمه وألم كلهن اجتمعن سوه همست بصوت ضعيف... 

سيلين : فهد ؟؟؟؟؟