رواية جذبني فمك البني الفصل الخامس والستون 65 بقلم عبير إدريس

 يتوقُ شوقًا لِلقيّاهُ .

_مظلمٌ ك فانوس مكسور في كهف مهجور .

_مُبهم، ك حُب لافائده منهُ.

_واهيّ، ك عُذر قتل قابيل لهابيل.

_مُتناقض جدًا، وحاد، ك مرايا تعكسُ الكُل إلا نفسها. 

_قلبي مليءٌ بالوحده .

 _يملئهُ الشوق .

يتوق القلب شوقا

لفاتنة ملّ مني اشتياقي

ألا يا قلب مهلا

فكل الشوق في عينيّ

ذاتي

_________

رجل غامض احداث غامضه كشف اسرار 

معرفه الحياة كيف كانت تدار خلف ذلك الستار. 

طفلان اثنان احدهما يشعر بالخجل ومسالم 

الاخر حاد الطباع جريء 

كبرو في كنف والديهم

تقاسموا الحب الاهتمام الدلال من الاهل... 

لكن احدهم خطفت برائته دنائه البشر حولته الى وحش نائم يستيقض وقت الغضب ... 

هذا الوحش من صنع البشر تحول الى صياد وحش كاسر كل انثى عاشرته وصفت افعاله بالوحوش البريه كتشبيه.... 

هذا الوحش البشري يسكن داخله طفل بريء مكسور متعاطف لكن هذا الطفل قليل الظهور بسبب.. 

احداث تراكمات عواطف مكبوته فراق سهر هجران ..

حياته عباره عن كابوس يهرع منه واليه متسائل اين الحبيبه ؟ اين الاهل ؟ اين الاصحاب ؟ 

الكل هجروني لكن اتت تلك القريبه اللامرئية قبلتني على وجنتي مسحت قطرات العرق عن جبيني و قالت سأسندك واطمئنك واحميك من شر نفسك... 

الوحيده التي شعرت بجانبها اني رجل كامل عاقل ناضج اقدم لها الألم وتتظاهر بعدم الوجع 

ارهقتها عتب ولوم ومجامله كاذبه .. 

قابلتني بالتحمل لمزيد من الاوجاع ...

كيف لا احبك كيف لا احن اليك كيف استطيع التفريط بك... 

عاشت حياة صعبه لذلك احتوت الاصعب .. 

فهد ايفين... 

____

سيلين 

اليوم اليه ٣ ايام اني محبوسه بهذا المكان جنت كاعده بالغرفه سمعته يصيحني.. 

فهد : سيلينه سيلينه.. 

ضحكت هذا شبيه خاف عباله هو ادهم ونسة روحه لبست شالي وطلعت ادور وينه هذا اتبعت الصوت بره بالحديقه طلعت مكان كلش جبير يعني كأنما مزرعه هيج شي مشيت ادور وينه لكيته واكف يم منقله يشوي تقربت سمع خطواتي رفع راسه ابتسم وكال ...

فهد : تعاي ساعديني اذا ماعندج شي.. 

سيلين : ماعندي يعني شعندي مثلا ... 

فهد : هاج شيشي اللحم بين ماكمل هاي الوجبه. 

سيلين : شدعوه هاي منو ياكله.. 

فهد : انه وانتي.. 

سيلين : فهد انت صاحي شي. 

فهد : شبيج قابل واكف املخ بشعري واعيط شمسوي فوك ماعشيج والله صوجي ما خليتج انتي تطبخين وانه اكل على الحاضر .. 

سيلين : اني المخبلني برودك يعني مو شرط تملخ بشعرك وتكون مو صاحي لا بس اليشوفك ويشوف الراحه الانت بيها يكول طالعين سفره نغير جو..

فهد : اي اعتبريها سفره شبيج نفسيه.. 

سيلين : فهددددد اخوك الي هو حبيبي ابو بيتي زوجي كاعد يدور عليه وكلبه محروك مفرفح واني اكعد يمك نسولف ونضحك على جراحه وناكل عادي براحه على حساب راحته واذيته انت شبيك .. 

فهد : شبيج تحجين كلمه كلمه جنج ست سعديه الله يرحمها هم جانت هيج تحجي د اااا دا وره اسبوع يله تكول دار ...

سيلين : هههههههه استغفر الله... 

على ضحكتي ضحك ودنك يهفي بالكارتونه ..

فهد : اي ضحكي منو يسوه تضوجين علموده. 

سيلين : منو يسوه شنو ... 

هزيت راسي والتفتت ردت افوت صاحني.. 

فهد : هوب هوب وين؟ 

سيلين : اروح انام بلكت باجر الله يهديك وتوديني تره صبري خلص.. 

فهد : منو هذا صبري 

سيلين : ههههه جيرانكم...

فهد : تعاي الله عليج والله مخنوك احس روحي راح تطلع.. 

استوقفتني هاي الكلمه عكدت حاجبي و كتله.. 

سيلين : تره بيدك الصار كله بيدك وانت الوحيد تكدر تغير حياتك وتعيش صح انت ساعد نفسك ليش منتظر ادهم يساعدك انت رجال تره مو صغير.. 

باوعلي ودنك راسه كام يقلب بشياش اللحم جر نفس قوي وهمس.. 

فهد : والله لو احجيلج العشته تبجين دم على الصارلي.. 

سيلين : احجيلي جوز اساعدك وحتى اذا رجعت مستحيل اشهد ضدك واكللهم اني اجيت وياك برجلي بس بشرط باجر ترجعني ونروح سوه لبيت عمك منطلع منهم اذا متشوف ابنك وتصالح ويه ادهم وخلينه نعيش عائله وحده على محبه الله ورسوله الله يخليك فهد تره انت بيدك تشعل الحرب وبيدك تطفيها.. 

زادت سرعه ايده وهو يهفي ورذاذ النار تتطاير كبال وجها وتلوحه وهو ما مهتم.. 

سيلين : راح تدخل لعينك دير بالك.. 

تجاهل كلامي وكال.. 

فهد : جنت مشتري بايسكل لونه ازرك ، المدرسه كلها نجمع انه وادهم حتى نشتري بايسكلات بالعطله ونتنافس منو درجته اعله حتى والدي يجمل النه فلوس ويشتريلنه..

 بوكتها درجاتنه جانت متقاربه ادهم اعله مني بدرجتين لهذا والدي اخذنه واشترالنه شنو فرحتي ما تنوصف واخيرا اشتريته طلعت اول يوم بيه افتر فرحان ،ادهم ميروح بعيد عن البيت جان خجول كلش ويخاف يبتعد او يجازف عكسي انه جريء احب اغامر لهذا رحت افتريت وابتعدت هوواي عن البيت وصلت مكان تيهت وين انه شلون راح ارجع بالطريق شافني اقاربنه هذا جان يبات يمنه وينام وياكل ويشرب ويه والدي يعني مأمنين بيه ويحبنه كلش .... 

طفل متيه شاف واحد من ريحه اهله يجلب بيه لو لا برأيج.

سيلين : اكيد يحسه منقذ اله. 

فهد: عفيه عليج رحت عليه شافني ضحك ماجنت اعرف واميز هاي الضحكه وراها انياب حيوانيه راح يكشر عنها مجرد صعودي وياه .. 

جر نفس قوووي مسح كصته بظهر كف ايده غمض عينه ورفع راسه للسما واسترسل.....

فهد : صعدت وياه اخ ياريتني ماصعدت اخذني لمكان ماعرف وين بستان وبيه غرفه وصار الصار بجيت و صرخت وقابل صراخي بضحكه واستهزاء صورني وانه بحاله ما.. 

سكت ماكدر يكمل عض شفته السفلى مستحسف نزلت دمعه ضايعه منه مسحها بعصبيه حرت شنو احجي وياه واصلا مااكدر اناقشه او احاجيه لان موقف صعب وبنفس الوقت هو رجال هسه مو طفل واكعد اواسيه... 

فهد : رجعني واشترالي علاكه حلويات واجه ويايه للبيت خطار هددني اذا حجيت يشوف صوري لاصدقائي بالمنطقه ويضحكهم عليه بوقتها صورني بكامره عاديه مجانت اكو موبايلات،،، 

 الغلط مني ما حجيت خوفي وكسرتي خلته يتماده اكثر والدي الصبح يروح للدوام امي موظفه خواتي صغار ادهم ينام او شو وين وهذا يستغل الموقف مو بس هو جان واحد وياه يجي للبيت .. 

سيلين : شعجب اهلك يأمنون يخلوه يمكم ويطلعون شلون تضلون وحدكم.. 

فهد : المصيبه عايشين بيت جدي وجبير كلش وهوسه كلنا صغار بحيث الطفل اذا ضاع وره ساعات يلا ينفكد واصلا مأمنين المنطقه كلها كرايب يعني ماعدنه طفل يضيع غلطتي ماحجيت والصدمه هيه الخلتني اسكت ، ست ايام ياسيلين ست ايام وسبع ليالي انه متعرض للأعتداء برأييج انه انسان سوي اكدر اعيش طبيعي ،

 تغيرت صرت انام هوواي ابجي هوواي احتاروا اهلي بيه هذا فهد الوكح هيج صار خايف ويبجي ياهو اليشوفني يضرب على راسه الى ان طكت روحي وحجيت بعدها اخذت موقف السكوت واعتزلت الناس صرت ماحب اختلط،

 ماكو شي يفرحني كلشي اشوفه اسود ، كمت اشوف الناس كلها تتشابه كل الناس موزينه كلهم نواياهم سوده مصخمه ، الكل افتهم الصار لفهد ليش لان عايشين بيت واحد وجنت طفل يعني واذا طفل لازم يحجون عني وين خصوصيتي ليش حجو عني منو يكول انه اقبل تشاركون عمامي بالرأي واخذو قرار عن والدي يدخلوني مصح لان صرت هجومي ومؤذي خافو على اولادهم مني دخلوني مصح يابه سيلين شسووا بيه لو تدرين شحجيلج خبلوني والله خبلوني.

يحجي ويرجف كمت للمطبخ جبتله مي اخذه مني بأيد ترجف شربه والباقي غسل وجها بيه.. 

سيلين : كافي ارتاح تعبت.. 

فهد : اريد احجيلج كلبي محروك ..

سيلين : احجي اذا ترتاح احجي.. 

فهد : خبلوني انام يجكجكون رجلي بالابر لو يكعدوني بمي بارد ، جان يجيني والدي اتوسل بيه اكله طلعني تعبت كاعد يأذوني هنا ، الجان مسؤول عليه يكله لا ابنك يتخيل تره وهواي يأذي الجهال هنا ولان انه مأذي اولاد عمامي قبل لا ادخل المصح لهذا جان والدي يصدكهم وميصدك بيه ، ويروح ويعوفني ابجي واصرخ ، الى ان قررت امثل انه تعالجت كمت انام قليل او اسوي روحي نايم اريد اخلص سيلين متت .. 

حجاها وجر بلوزه بحركه مال واحد بزعانه روحه.. 

سيلين : ومنا بلشت تمثل مرحله الشفاء علمود يطلعوك.

فهد : اي كمت اي واحد يضربني ماضربه حتى اذا ضايج منه اكتم اكتم اذا صار وكت النوم اول واحد انام ، اكعد قبلهم كلهم اكل بموعد الاكل اذا طلعوا للحديقه اطلع اذا دخلونه جوه اول واحد ادخل الى ان كالو هذا تعالج بس انه متعالجت انه مثلت لان اريد اخلص تدمرت...

 طلعت ونفس الشي عدته ويه اهلي مثلت عليهم انه زين ياهو يضربني اضحك بوجها حتى بس اثبت الهم انه انسان طبيعي مابيه شي حتى ميرجعوني كمت اتحمل واضغط على نفسي واكبت اكبت في سبيل ابين انه صاحي مابيه شوائب،،

 الماضي نسيته وانمسح بس داخلي ينزف دم وألم .. 

كبرت صرت صف سادس اعدادي صح تأخرت سنتين عن دراستي بين المرض والمصح بس رجعت داومت بهاي الفتره الطلعت بيها من المصح تقربت مني روايه بت عمي هاشم ومن صارت صف خامس اعدادي قوت علاقتنه ، انه من جنت صغير اميل الها اكثر من بنات عمامي الباقين ، سؤال مني اهتمام منها صارت علاقه قويه بينه .. 

الوحيده الجانت تسمعني وجنت احجيلهة كلشي شلون ما حجيتلج هسه تسمع تسمع بعدين تخلي ايدها على كلبي وتقره ايات عليه وتهدأني وتروح ... 

صرت صف ثاني كليه تغيرت ملامحي يعني لو ناجح سنه على سنه جان انه صف رابع كليه انعجبت بشخصيتي هواي وطلبت مني اخطبها ،

من حس عمي علينه قرر يشيل بيت وحدهم وفعلا استقلوا بيت وحدهم ، 

من صارت اول كليه جنت اروحلها وصارت بينه علاقه وهيه بادرت بيها لهذا عمي من سمع كامت الدنيا وما كعدت فهد كسر عيني وفهد سواها غصب عني علمود يلوي ايدي وياخذ بنتي غصب ،

 انجبر يزوجها اليه ، بس شنو ياسيلين حقد عليه ، انه غلطت ماكلج صح وابرر بس هيه هم تتحمل الغلط وياي لان هيه بادرت مو انه ، يعني شاب وبنيه حلوه ويحبها صار تقارب بينهم شلون ما ينجرف خصوصا انه بهاي الفتره ابتعدت عن الدين والدنيا صارت روايتي هيه اهلي وناسي وحبيبتي وصديقتي وبعدين زوجتي وام ابني..

جر نفس قوي واخذ الصينيه سفط الشياش بيها وغطاهن بالخبز....

فهد : تزوجتها وبنفس الشهر صارت حامل بعلاوي .. 

فرك عينه ووجها يمنع نزول دمعته ويحاول يهدأ من روعته ويقلل التوتر الملىء صوته بس مع هذا مكاعد يسيطر على انفعالاته ورجفه ايده ... 

فهد : جنت اخاف عليها دللتها جنت انام يم رجلها والله افركها حتى تنام لان جان ضغطها يصعد وتورم رجلها وتكوم توجعها ،

 شكلت عدها حساسيه جنت اجيب ليفه ترفه واكعد الليل كله احكلها جسمها حتى تكدر تنام وابرده الها اشكال مرهمات اجيب ، تخيلي اخر فتره من حملها ورمت جانت متكدر تمشي اشيلهة بهاي ايدي اوديها للحمام وارجعها لغرفتها وياويله اليحجي وياها كلمه... 

جر نفس ودار وجها على الجهة الثانيه... 

سيلين : ليش افترقتوا اذا انت هيج مدللها.. 

ضرب ايده بالكاع حيل وصاح... 

فهد : الوحش البداخلي ماسيطرت عليه ماكدرت امثل اكثر ماكدرت كمت اطلع امراضي النفسيه بيها كمت اطلب منها شغلات واذا رفضت اضربها لو اخنكها وتبجي بسكوت تخاف مني وتحبني بنفس الوكت تخاف تخسرني لان تعرف ابوها اذا راحتله بعد مستحيل يرجعها اليه ويفرقنه ، يموت مني، سأليه تتكبل على الموت لو فهد يكلج المووووت...

سيلين : وبعدين شصار؟؟ 

فهد : كل مره أأذيها والصبح اندم واعتذر الى ان مره من المرات بزعت روحها خابرت صعب ، اخوها اجه وياه اخوانه وصارت عركه بينه كلش جبيره تقريبا خسرت ولد عمي بيها ذوله جانوا اصدقائي صداقتنه مبنيه على الخوه ، 

حقدت عليها ليش خربت علاقتي بيهم صرت أأذيها اكثر وحذرتها تحجي ، الى ان بيوم من الايام عيشتها الرعب على اصوله لان سمعتها تشكي لامها تكللها مخبل ويطلع عقده القديمه بيه وانه تندمت ارتبطت بيه ابوي اول ما يرجع من السفر يجي ياخذني ، بيومها شوفتها العقد العشتهن من صدك وجانت تسكت تخاف مني ، ست ايام وسبع ليالي ، ختمتها وشمت على صدرها بالموس حرفي ورقم سته وسبعه ،... 

ماعرف شصار بيه تحولت غير انسان ، بيومها جنت متأكد محد موجود بلبيت لهذا من وشمت الحروف جانت تصرخ وتبجي بصوت عالي ، اخر شي عصبتني كسرت ايدها الحلوه الرقيقه كسرتها سيلين كسرتها اجه ايمن خلصها من ايدي ، 

وراها حسيت على نفسي حسيت بالغلط السويته ، خسرتهم ثنينهم صارت كعده وعدتهم بيها اتعالج هلمره من صدك ورحت برجلي للمصح بس والله ما عالجوني جانو يضربوني ابر مهدئات ومضاد اكتئاب جنت انام وبس وهم رجعت مثلت عليهم انه تشافيت ماكو ٣ اشهر طلعوني ولكيت ايدي والكاع مرتي ماكو ابني ماكو يابه وينهم راحوا بح مرتك تزوجت ابنك صار يم رجال غريب ، 

وهاي لوعتي صارلها سنين شوكت اتشافى شوكت اجتمع بيهم مره ثانيه شوكت اعيش وياهم واعوضهم الفات شوكت سيلين شوكت ؟؟

سيلين : بعد السمعته منك وترجع تلوم ادهم لان خلص البنيه من ايدك .. 

فهد : هو حقه وانه حقي محد ساعدني الكل اخذ موقف المتفرج كلهم يعزفون على نار كلبي .. 

سيلين : نفرض رجعتلك روايه وابنك ، ايفين وابنك الثاني شنو مكانتهم بحياتك.. 

ابتسم وعيونه لمعت اخذ خشبه من الكاع وكام يخطط بيها بالطين ... 

سيلين : تحبها ؟ 

رفع راسه عكد حاجبه وكال . 

فهد : منو ؟ 

سيلين : ايفين . 

ضحك وكال...

فهد : طبعا احبها هاي ففه الضلعه.. 

سيلين : اذا خيروك بينها وبين روايه المن تختار. 

فهد : روايه انتهت بالنسبه اليه بس عدها ذكرى حلوه بكلبي ، بس ايفين لا تختلف هاي اخذت كلبي.. 

حجاها وجر نفس بحسره.. 

فهد : هاج اكلي راح يبرد .. 

سوه لفه وخلاها بيدي وكام راح للمطبخ جاب قوطيتين طك وحده قدمها اليه اخذتها منه سوه لفه اله وكعد بصفي...

سيلين : منيلك هاي الحنيه النزلت غفل هههههه 

رفع عينه باوعلي ضحك ورجع دار وجها.. 

سيلين : اليشوفك هسه ميكول هذا فهد القديم الجان ساكمني تزوجي تزوجي..

فهد : ماجانت عندي تعلمتها من ففه ههههه .. 

سيلين : ففه علمتك الحنيه.. 

فهد : هووواي غيرتني هوواي اذا اكلج هيه السبب بعلاجي وتغيري نسبه ٥٠ بالميه تصدكين .. 

ضحكت.. 

سيلين : ففه . 

فهد : اي والله ففه .. 

سيلين : احجيلي عنها.. 

فهد : يوووو اذا حجيت القائمه تطول. 

سيلين : عادي اسمع .. 

فهد : يكفي احتوتني لج جنت اكسر الدنيا واشوف الخوف بعينها بس تضحك تمتص عصبيتي وغضبي جنت اغلط عليها اصيح اطيح حضها تسكت تمد ايدها الحنينه على وجهي تمتص تعبني واضحك غصب عني ، يعني بالمختصر حركت روحها في سبيل تغيرني جازفت هوواي. 

سيلين : مظلومه ايفين دير بالك عليها الله عليك لتأذيها.. 

باوعلي ضيق عينه وكال...

فهد : حتى اذا بيوم عرفتي هيه اذتج هم ترجعين توصيني عليها. 

عكدت حاجبي وكتله. 

سيلين : شلون يعني اذتني مفهمت.. 

فهد : يعني القصد اذا بيوم اذتج هم توصين عليها.. 

سيلين : اكيد تضل اختي واضل احبها واخاف عليها.. 

فهد : جيد.. 

سيلين : تحبها 

فهد : ايفين قصدج .. 

سيلين : اي 

دنك راسه وكال 

فهد : اي وهووواي بس ولا يوم اعترفتلها.. 

سيلين : ليش ؟ 

فهد : هيج غايه في نفس يعقوب.. 

سيلين : لا صدك ليش ؟؟؟

فهد : لان صارت خوفه بكلبي الاحبها وادللها راح تعوفني لهذا احتفظت بحبها بكلبي وسكتت احجيلج موقف خلاني اعشقها. 

سيلين : يله اسمع. 

جر حسره وكال. 

فهد : جنت ضاربها اول مره اسويها طولت لسانها عليه ردت منها شغله تسويها وعاندت هددتها عاندت بالزايد صارت متخاف مني او الاصح كلبها مات لهذا ضربتها ، طلعت من البيت عصبي وافور من قهرتي عليها صخنت ، رجعت للبيت نمت بملابسي هيه بين الزعلانه وبين بالها يمي حسيت عليهة مدت ايدها ترجف تحسستني عرفت بيه مصخن راحت جابت مي وسوتلي كمادات ياسيلين يمكن ساعتين مساهره على راسي... 

سيلين : اوي خطيه عيوني لعد شكد مخوفها شكد ظالم انت .. 

جر نفس وسكتنه اكلت لفتي بهدوء وهو هم كعد ياكل بعدين كال.. 

فهد : سيلينه. 

التفتت عليه اضحك.. 

سيلين : شنو هالميانه الزفره شنو سيلينه هههه عرف ولف بابه صح كعدت واستمعتلك بس لتاخذ راحتك زايد..

فهد : شدعوه يابه من كثر ما ادهمج يصيح سيلينه طبع ابالي اسفين يابه. 

سيلين : سيلين صيحني سيلين.. 

فهد : صدك تعاي تذكرت شغله ليش جنتي تضوجين من نسرين تكلج سيلي ههههه. 

درت وجهي عليه فتحت عيني على وسعها شهكت بالببسي وهو يضحك.. 

فهد : صحه صحه اجيبلج مي.. 

اشرتله بيدي لا راحت الكحه التفتت عليه. 

سيلين : تعال شمدرك انت ؟هسه عرفت نسرين منين جابت هذا اللقب واني عبالي صدفه طلعت انت كايل الها مو .. 

فهد : شنو سالفتج مو كتلج توصلني اخبارج كلها .. 

سيلين : واللقب شلون وصل الها؟؟ 

فهد : انه كتلها عينج على سيلي من باب السهوله يعني سيلين ثكيل وصعب.. 

سيلين : ياااااااااا.. 

فهد : لا صدك ليش جنتي تضوجين.. 

سيلين : شعليك فهد شعليك. 

فهد : ضجتي من ادهم بهاي الفتره لو كرهتيه.. 

سيلين : لا كرهته ولا ضجت منه بس بسبب الصارلي كمت ماريد اتذكر اي شي من الماضي واي تعلقات بيه ردت انساها لان ذكرياتي متسببلي سوى الالم والفضل الك طبعا عيشتني بهذا العذاب الطويل. 

فهد: اذا كتلج اسف يمكن ماراح تسامحيني صح. 

سيلين : شيفيد الاسف انت صح ساعدتني وصح درت بالك عليه ودبرتلي شغل بس انت السبب الاكبر بتحطيم حياتي انت بالضبط مثل اليقتل بشر وبعدين يتندم ويروح يطبع بوسه على جبينه معتذر لهذا يا فهد انت السويته كله ميوصل ربع اذيتي العشتها وحدي تعرف شصار بيه بالشقه عشر اشهر عشت الحرمان اللوعه رجعت للأدمان عشت بذاكره ضعيفه بأعصاب تالفه تخيل ذاكرتي متسعفني اتذكر حسابات اخوك لو اختك حتى اتواصل وياهم والاكثر خفت اتواصل خفت تأذي اختي لهذا بعدت عن حبيبي مجبوره عشت حياة تعيسه انت سببها. 

فهد : اويلي هاي شمسوي انه

سيلين : هاي نقطه من بحر السويته بس ليش تندمت هسه تعرف مستغربه. 

فهد : ماعرف انه هم مستغرب عليش اذيتج اصلا وعليش هسه تندمت حيره ..

سيلين : ههههههههههههه. 

فهد : ههههههه شبيج وثول.. 

سيلين : اني وياك سايكو تعرف والله سايكو بس درجات اني خفيفه وانت بلاء اسود .. 

فهد : شلون عرفتي وشنو السبب رجعتي ذكرتي الموضوع . 

سيلين : قاريه عنه هواي وادهم حاجيلي عن هاي الشخصيه وهسه من حجيتلي تعاطفت وياك رغم انت مدمرني وانت تعاطفت ويايه رغم انت مطيح حضي ههههه يعني برأيك احنه صاحين اكيد لا نسولف جراحنه ونضحك عليها تخيل ، انت خاطفني وتشكيلي انت دمرتني وتريد حل مني انت طيحت حظ حضي وتريد تحصل ابنك من خلالي زوجي يفرفح ويمكن انجلط وانت كاعد تشوي واني اكل من ايدك عادي يعني برأيك هاي التصرفات مال ناس صاحين...

فهد : شنو صفات السايكو ؟ 

حجاها وضيق عينه.. 

سيلين : هواي صفات عايبه بيه.. 

فهد : مثلا. 

سيلين : مثلا شخصيته جذابه وذكيه كلش هاي اول ميزه بيها..

فهد : ههههه حلو يعني انه بنضرج جذاب وذكي بس اوكفي جذاب حلو لو كذاب يكذب هوواي. 

سيلين : انت منيلك حلو وجه المجرمين بس القصد صفاتهم بشكل عام تكون عدهم جاذبيه. 

فهد : اي كملي انه عندي جاذبيه وففه تموت عليه . 

سيلين : سود الله وجهك و وجه ففه . 

فهد : مشكوره كملي. 

سيلين : يعني تخيل اليتعرف على هيج شخصيه تكون اسوء تجربه مرت بحياته..

فهد : الله يساعد ادهم عليج. 

سيلين : الله يساعده عليك ويساعد ففه ويساعدني هم. 

فهد : هههههه مقبوله منج كملي.. 

سيلين : غشاش وكذاب وعديم الوفاء ينطي وعود ومايوفي بيهن.. 

فهد : والعباس موهيج. 

سيلين : لتحلف هو شنو موهيج يعني تريد تقنعني انت متكذب ولا غشاش وما تنطي وعود وتخلف بيهن. 

فهد : انطيني موقف سويته ينطبق على الحجيتيه هسه ..

سيلين : يعني ما غشيتني من طلعتني من بيتكم وخليتني اكعد بيت وحدي و وعدتني تجيب اختي وخلفت بالوعد .. 

حك راسه وغمض عينه متفشل .. 

فهد : بهاي حقج كملي دشوف الضيم. 

سيلين : انسان شايف نفسه وعنده هو وبس منفوخ على العالم ومن يكعد لازم الكل يحجي ويمدح بيه يعني بين قوسين يريد الحب والاعتناء من الناس العايش وياهم بس شنو بدون مقابل.. 

صفن بوجهي طولت صفنته وكال.

فهد : تدرين صح يعني انه شقدمت لففه بس الاذيه وهيه تنطي حب واهتمام وانه ما ابادلها يعني تدعمني بدون مقابل هاي خوش التفاته منج ممكن اغير بيها نفسي .. 

سيلين : ليش احسك تستهزء.. 

فهد : والله ما مستهزء وداعت اولادي كملي دشوف مصايبي شكثر..

سيلين : يكون حاد الذكاء عاطفيا ، وعنده قابليه تقنع اي شخص ويتلاعب بمشاعره مثل ما سويت ويايه قبل وخليتني اتعاطف وياك واخسر حياتي وهسه هم كدرت تسيطر على مشاعري من جديد ورجعت تعاطفت وياك والدليل كاعده اسمعلك من جديد بالرغم انت السبب بدماري.. 

سكت ودنك راسه مجاوبني... 

سيلين : كثير الخيانات الزوجيه.. 

رفع راسه وكال. 

فهد : ابد والله ما مسويها يمكن مره وحده ويه روايه ولزمتني بعدها توبت. 

سيلين : همزين عندك شي زين..

فهد : كملي بله الله عليج. 

سيلين : شوف اسوء شي بهاي الشخصيه هو التلاعب الذهني بالمقربين علمود تحصل عن الشي التريده وبعدها يظهر على حقيقته لهذا يافهد انت تلاعبت بعقلي سابقا وضحكت عليه خليتني اتعاطف وياك وخسرتني هووواي وهسه رجعت تلاعبت بعقلي وممكن راح تخسرني اكثر في سبيل تحصل على علي بس المستغربته السايكو ما يشعر بالذنب تجاه اي مصيبه يسويها او اذيه لبشر معين ومايتعاطف ويه اي مشكله...

 انت شلون تكول حاس بذنب اتجاهج ومقهور من السويته ومتندم وردت اساعدج اتصور حسب دراستي لهاي الشخصيه واطلاعي عليها سبب تعاطفك اكو مصلحه عندك بس تخلص راح تسويلي بيباي.. 

ضحك ضحكه حتى خفت والله انرعبت حسيت بخطر الانسان البصفي من خوفي زحفت ليغاد اريد افلت .. 

كمت دخلت للمطبخ باوعت كاعد بمكانه ويضحك صدك خفت يعني اني شلون جنت مأمنه بيه وكاعده يمه ماعرف شنو من ضحكه فززتني ورجعتني للواقع بأن هذا الانسان مريض وخطر شيطان بهيئه بشر هذا مو مثلي اني اختلف اني ما اكدر أأذي حيوان عاد بشر دخلت للغرفه وقفلت الباب دكات كلبي تدك الف.. 

__ 

ايفين 

نحتاج الى ثرثره لعرافه لكي تبوح لنا عن مستقبلنا الخفي ياترى اين ترسوا سفينتي واين ربانها... 

اليوم النه رابع يوم على المصيبه الحلت على روسنه بسبب فهد الملام الاول ايفين الكل ترك فهد وعملته وتعاي يا ايفين احجي شلون هيج صار وليش طاوعتيه وليش ما حجيتي، عمو ادهم نضراته وحدها تكفي وابوه يعيد ويزيد بالحجي اما امهم صارت الحنينه على سيلين والغضب انصب عليه. 

منو عنده قهره بكلبه ذبها بيه منو عنده غضب فرغه بيه وصلت بيه مرحله روحي ماطيقها كمت من نصهم ورحت للمطبخ اخذت جداحه وطلعت وره البيت كلت احرك روحي واخلص ، 

وصلت يم الجلكان مال نفط فتحت القبغ وصفنت عليه وتذكرت حياتي كلهة اني شنو عشت وشنو شفت منها وليش اصلا مجلبه بالدنيا على شنو اعيشها بعد هاهيه احرك روحي واخلص من الملامه واخلصهم مني ، بين فكري ودمعتي طلعت شهكاتي وترجمت بصوت عالي ،

 سمعت صوت ورايه التفتت لكيته ايمن واكف يباوع عليه.. 

ايفين : شكو خير اكو شي تتفرج عليه ؟؟ 

ايمن : شفتج طلعتي من الهول لحكتج عرفت عندج نيه خبيثه تريدين تبلينه بيها لهذا تبعتج.

ايفين : وانت شكو ،، حتى اذا واحد يريد يموت ويخلص متخلوه الله اكبر. 

ايمن : الله اكبر عليج وعلى مصايبج السويتيها تعرفين ليش تريدين تحركين روحج لان ما الج عين تباوعين بيها بعين اختج اذا رجعت،،

 انتي تستاهلين الحرك صح بس مو بيتنه تبلينه ويه رجلج المخبل من يرجع حركي نفسج وحركيه وياج والله شبيج هم احنه نخلص وهم انتو تخلصون العالم من شركم. 

ايفين : انت ليش هلكد حاقد عليه شمسويتلك اني ؟

سوه حركه بحلكه مال واحد ما مهتم..

ايمن : وليش احقد عليج اذا حقدت معناها مهتم وانه ما مهتم انتي اخر اهتماماتي . 

ايفين : اصلا تحجي من حركه كلبك لان عفتك واخذت اخوك. 

ايمن : مو كتلج نذله وقمه بالحقاره متصدكين. 

ايفين : يله عوفني اذا كملت. 

ايمن : فوتي جوه لا اسحلج من شعرج سحل وابجيج دم بالقران.. 

ايفين : لتتجاوز اني تجاوزت عليك. 

ايمن : جربي وشوفي شسوي شلون متحمل عليج انه ..

ايفين : اذا انت رجال صدك وتكول رجال جرب مد ايدك عليه وشوف شسوي .. 

ايمن: شتسوين مثلا ؟؟ 

حجاها وكتف ايده. 

ايفين : من تجرب امسح برجولتك الكاع .. 

حجيتها لو تخبل ماعرف منين تجيني الراشديات يضرب واني اغلط عليه طلعوا على صوتنه بالكوه خلصوني من ايده.

ايفين : جبان انت لو رجال صدك متمد ايدك عليه وفوكاها مرت اخوك واخوك ماموجود. 

ايمن : تريدين اربيج من جديد مستعد وانه كاعدلج هنا اريد اشوفج شلون تتنفسين بوجودي خاف فهد ناطيج عين انه اختلف. 

يوسف : انت تخبلت.. 

ايمن: اصحى واحد بيكم انه كلكم متعرفون تتصرفون خاليها على حل شعرها تخطط ويه الكو****** مالتها ويأذون ابنك خسروه كلشي وانتو تتفرجون بله ما سألت روحك فد يوم ذوله شلون انجمعوا سوه ما حاولت تلزم ابنك وتربيه لو كدرت على ادهم كل يوم متبري منه. 

يوسف : لسانك ايمن .

ايمن : لان حجيت الحك ضجت لو تألمت تدري شلون كلبي محروك وكاعد افور ابنك خسر كلشي صحته منصبه حياته زوجته اضافه للمسكينه خبلتوها وهجت بالشوارع لو محتضينها ماجان اجتي وكالتلك يابه شور عليه شسوي فهد يطلب مني نطلع بيت مفصول عنكم انتو لا استغليوا ضعفها وحاربتوها لاعدها ام لا اب تلجئ اله زوجها بالغربه مأمنها يمكم وخوش صنتو الامانه سنتين هنه يمي وياسه وياهن يله اجه ادهم ،

 صنتهن حافظت عليهن من الهوى وحدي جنت رجع ادهم سلمته الامانه بأحسن حال 

،أمني وصنت الامانه ، انتو شسويتوا مره هججتوا ياسه واخذتها بليله ظلمه وعشنه وحدنه بغداد طلعت منكم مريضه من القهر وهاي ثاني مره تعيدوها ويه سيلين بمساعده اختها العاهر ...

والله ثم والله اذا سيلين ما رجعت خلال يومين ياحجي يوسف لا احرك البيت فوك روسكم وكولوا ايمن ماكال اجمع اخوتك وشوفلك حل اذا ادهم انتكست صحته العب بيكم لعب.. 

عافنه وطلع بره بالشارع..

اجتي نرمان مسحت وجهي وعدلت شعري لبستني الشال خلت ايدها وره ظهري ومشينا للبيت. 

ايفين : ماجنت اقصد أأذيها والله جنت خايفه منه والله. 

نرمان : الصار صار صح جبير وغلط بس بعد راح،،

 لا تكدرين ترجعين الوكت ولا تغيرين شي بس المهم اخذتي درس وتعلمتي منه واذا كدرتي تساعدين ادهم ساعديه بلكت تتذكرين شي تدليهم على فد مكان اكيد فهد حاجيلج.. 

سكتت مجاوبتها.. 

ثاني يوم يعتبر الخامس على حادثه اختطاف سيلين ، كعدنه الصبح اصلا محد نايم اجاني عمو يوسف وكال.

يوسف : بدلي وتعاي ويانه. 

ايفين : وين ؟ 

يوسف : بدلي وبعدين تعرفين وجيبي ابنج وياج. 

ايفين : ماشي.. 

بدلت بروح مخنوكه وجسد ميت بدلت ودموعي تنزل انهانيت هووواي وانظلمت هوواي وظلمتتتتت ظلمتت اخ ياسيلين حوبتج جبيره والله متتعداني اعرف اعرف.. 

لبست شلون مجان وبدلت لابني ونزلت لكيت عمو ادهم كاعد على القنفه وايده على راسه مدنك ، وعمو يوسف واكف فوك راسه يحجي وياه ايمن على يمنته وصعب وراه محاوطيه مثل الذيابه ويريدون ينهشون فهد بس يلزموه كلها حاده سنونها عليه شافوني نزلت عمو ادهم رفع عينه وكام طلع كدامنه ، عمو يوسف شافني وكال يله امشي ،

 مشيت وراهم وطلعنه كلنه ، اني صعدت ويه عمو ادهم وعمو يوسف والسياره الثانيه بيها ايمن وصعب ، وطلعنه وين ماعرف المهم نص ساعه وصلنه صفوا السيارات كدام بيت جبير ونزلنه ، 

صعب توجه على الباب فتحها وصاح تفضلوا عرفت هذا بيتهم دخلنه كعدنه اجتي زوجه عمهم سلمت علينه من وره خشمها وكعدت بعدين اجه اخوهم الصغير هم سلم وكعد وضلينه ننتظر شنو ماعرف اخر شي عمو يوسف كال.. 

يوسف : يابه رجلج وينه شوكت يشرف ونشوفه.. 

جاوبته .. 

_ هو عرف بيكم اجيتوا اذا يحب يطلع من وحده .. 

يوسف : ناطيه خبر بجيتي ويعرف شغله كلش مهمه ماجاي علمود يضيفني صيحيه خلينه نفضها ونرجع لبيوتنه لو يحب يذلنه اكثر.. 

_ انت واخوك تريد تصيحه ذيج غرفته فوت عاتبه. 

عمو يوسف هز راسه ساكت .. 

وره ساعه من كعدتنه انفتح باب الهول ودخل شاب سبحان الخالق فهد بس صغير نفس عكده الحاجب والغضب محدد ملامحه ، نفس الطول والضخامه مال فهد وراه دخلت بنيه ناعمه اعتقد هاي روايه اسم على مسمى ملامحها تعكس روايتها ، وجها حزين بشكل عيونها غرغرت مجرد شافت عمو يوسف وادهم ، شافهم عمو يوسف فز من مكانه وصاح.. 

يوسف : لك هله يابه هله حبيبي هله يالوعه ابوووك اخ اخ صاير شاب لك تعال انه جدك تعال... 

تقرب الشاب مستغرب الوضع كله ، حضنه جده ويشم بيه وهو منزل ايده مداير بال ، بعدين كام ادهم مشى بتعب وصل يم روايه وسلم عليها.. 

ادهم : شلونج بت عمي ان شاءالله مرتاحه .. 

مجرد حجه الحجايه الاخيره بجت بحركه وصوت عالي.... 

تقرب عمو يوسف منها حضنها وهو يبجي وهيه تختض بحضنه... 

عمو ادهم راح لعلي حضنه وضل يحجي وياه على كيفه وعلي عاكد حاجبه نفس نضرات الغضب مال ابوه... 

من بعد عتب نضرات ومشاعر كعدوا.. 

تحمحم عمو يوسف وكال.. 

يوسف : بنيتي انه وشيبتي جاييج واترجاج بشغله واتمنى ما ترديني بيها لا اريد اعتب ولا الوم لان راح نطول بالعتب وماعدنه وكت .. 

حجت بهدووووء وصوت ناصي اقرب للهمس ... 

روايه : شنو مطلوب مني عمو كول وماقصر اذا كدرت.

يوسف : عندج خبر عن ابو ابنج شصار بيه بعدكم لو متدرين.. 

مجرد جاب سيرته غطت وجها بثنين اديها وبجت ، لفت نظري كف ايدها اليسار مو عدل بيها عوق يمكن هاي ايدها الكاسرها فهد.. 

يوسف : تدمر عليكم وما خله على حالنه حال وهذا اخو تدمر ودمر عائلته وياه شلون حليها بنيتي فهد يريد ابنه دبرينه... 

روايه : وينه ليش ؟؟؟ 

يوسف: منعرف وين اخذ سيلين وراح جيبوا ابني ارجعها الكم..

روايه : سيلين منو ؟ 

ادهم : زوجتي ... 

روايه : اتذكر جان اسمها ياسة حسب ما سمعت قبل.. 

ادهم : انطتج عمرها .. 

روايه : هاا اسفه بقيه بحياتك..

ادهم : حياتج الباقيه. 

روايه : وهسه زوجتك يم فهد؟

ادهم : اي ساومني يريد ابنه لهذا دزيت عليكم دبريني يابنت العم شسوي زوجتي مريضه وخايف اخسرها واخويه فقد اخر ذره من عقله علمود ابنه .. 

روايه : هذا ابنه كدامكم هو مو صغير يريد يشوف ابوه يروحله اني ما مانعته. 

علي : لحظه لحظه بكيفكم تقررون وتحجون عني ليش ابوي وين وعليش انه ماعندي خبر ابوي عايش ليش كل هالسنين انه عايش يتيم اذا عندي اب... 

حجاها بصوت حاد ونتر بيهم. 

يوسف : هذا السؤال اسأل جدك عليه. 

علي : ليش مو انت هم جدي احجيلي انت .. 

يوسف : انه جدك ابو ابوك وشكد دورت عليك شكثر طالبت بيك وجدك منعنه عنك.. 

علي : وليش ما دور عليه ابوي ليش ما دور عليه صار سنين.. 

يوسف : دورنه لحد ما ملينه ليش احنه ندري بيك انت وين عايش بيا جزء من الكره الارضيه حتى نوصلك. 

علي : انه بسليمانيه من صغير هناك معقوله ما تدرون بيه.. .. 

عمو يوسف وادهم واحد صفن بوجه الثاني مستغربين السمعوه. 

ادهم: يله بله ويكلي انت تدري بيهم وضامهم الدماغ سزز ..

يوسف : احجي يابه روايه .. 

روايه : نعم عمو .. 

يوسف : شوكت رحتوا هناك صار سنين يدور فهد وما لكه الكم اثر.. 

روايه : عمو احنه من اول ماعرفنه فهد طلع من المصح اخذنه ابويه وسفرنه للشمال وضلينه هناك .. 

يوسف: شلون عشتي وحدج بالغربه لتخبليني .. 

روايه : ليش وحدي امي وابويه ضلو يمي اخر فتره رجعوا هنا من كبر علاوي..

يوسف : بس هاشم عنده دوام مرتبط بيه شلون عاش بالشمال. 

روايه : جان يروح ويرجع ومرات ياخذ اجازه طويله ويضل كاعد يمنه وهيج مشت السنين. 

يوسف : منو جابكم اليوم. 

روايه: ليوثي ومصطفى.. 

يوسف : وينهم ماشفتهم. 

روايه : طلعوا للشغل.. 

ادهم : حجي كملت اسئله 

يوسف : اي يابه احجي اسفين.. 

دار وجها بثكل على علي وكال.. 

ادهم : حبيبي تريد تشوف ابوك هو يحبك وكلبه عليك صار سنين يدور شنو رأيك اخذك اله هم يفرح بشوفتك وهم انت تتعرف عليه.. 

علاوي مغضب حاجبه عصبي رجف حلكه ونزلت دمعه منه مسحها بعصبيه مثل حركات ابوه سبحان الله...

حجه بنتر.. 

علي : وهو وينه ليش ما اجه يشوفني ليش انه اروحله. 

ادهم : لو بغير ظروف جان اجاك زحف بس الظرف اختلف لازم اخذك اله بيدي.. 

علي : مادري افكر واقرر اشوفه لو لا جوز مايستاهل.. 

ادهم : ليش مايستاهل ابوك هذا حبيبي ميصير هيج تحجي عليه..

ضحك مستهزء.. 

علي : ابوي عمري ١٧ سنه وغفل يطلعلي اب وتعال شوفه وحبه من جديد. 

روايه : علاوي ليش هيج تحجي ماما. 

التفت عليها وعاط بيها.. 

علي : عليش فرقتيني عنه ووهمتيني ابوي ميت وعشت يتيم اذا هو زين احجيلي كلشي لو اعوفج واخليج بحسرتي مثل ما خليتي ابوي بحسره شوفتي وربيت بعيد عنه ماعرفه بس باالاسم اسمه فهد حتى صوره ماعندي اله ماشايفه انه ماشايفه ماشام ريحته ... 

كامت يمه كعدت لزمت ايده باستها سحبها منها ودار وجها يتنفس بغضب.. 

روايه : ماما حبيبي لتسوي بيه هيج الله يخليك. 

التفت عليها مغضب وكال. 

علي : انطيني مبرر واحد وعذر اقنع بيه حتى اسامحج على السويتيه. 

روايه : كسر ايدي عذبني هذا سبب كافي.. 

علي : منو يكول حجيج صدك.. 

التفتت على عمو يوسف وكالت.. 

روايه : عمو انصفني احجي ضميرك راح اخسر ابني.. 

يوسف : صح هو اذه امك بس مريض ولا زال مريض واذا تريد اشوفك تقاريره اقراهن بعينك.. 

هو سمع هيج لو تحول لاعصار...

علي : يعني مررررررريض كل هالسنين وعفتيه يعاني وحده عفتيه بحسرتي ليش يمه ليش هيج سويتي ليشششششش جاوبيني.. 

بجت وكامت ترجف.. 

روايه : اني حالي جالك انحرمت منه عبالك بس انت اني هم اني هم .

علي : تريدين تقنعيني انتي تحبين ابويه وهيج اذيتيه. 

روايه : هو هم اذاني هو هم واني ما تركته بأرادتي والله جدك بعدني عنه غصب وسنين افرفح على شوفته وعلى اخباره بس جدك ماقبل وبنفس الوقت من اتذكر اذيته اليه واشوف اثار تعذيبه بجسمي احقد عليه واكول يستاهل الصار بيه خليه يتعذب علينه بس والله لو راجع ومعتذر وكال تعالجت جان رجعتله وخليتك تتربه يمه. 

علي : كل مبرراتج مو منطقيه انتي حقج تنفصلين عنه وتحرميه من شوفتج بس ابد مو من حقج توهميني ابوي ميت وتعيشيني طفولتي يتيم وانه بحسره الاب يسأل عليه من جنت بالمدرسه كم مره جيتج ابجي عدنه اجتماع اباء وانه الوحيد ماعندي اب جنت اشوفج تبجين عبالي ميت ليش عيشتيني مكسور ليششش.. 

سمعنه صوت حاد وقوي صاح من ورانه لك علي . 

من التفت هذا عمهم هاشم.. 

علي : ها جدي شلونك زين. 

هاشم : عليمن تعلي صوتك وتهدد ليش ابوك خوش ادمي وجاي تتعارك وي امك علموده.. 

علي : خوش موخوش مجرم صالح طالح انه اقرر مو صغير وانتم تقررون عني ... 

هاشم : والله وكبرت ياعلي. 

علي : من اليوم مكاني بيت جدي اليحب يجي يشوفني يجيني هناك. 

روايه : علاوي ماما لتسوي بيه هيج اروحلك فدوه. 

علي : انتي هم تجين تعيشين ويايه مكانه الصحيح يم ابويه مو هناك بالغربه وحدنه.

روايه : لك ماما ماكدر ارجع لابوك ماكدر.

علي : ليش غير افهم جوز تغير انتي ليش هيج قافله عليه. 

هاشم : وين ترجع وهاي مرته كدامك وهذا ابنه ليش ابوك مهتملك لو مهتم لامك مجان عوقها وشمرها عليه سنين اعالج بيها عبالك امك عاشت حياة طبيعيه امك ماتت وبالموت رجعتها للحياه ابوك مو ادمي. 

من بين الهوسه كلها والمهاترات التفتت عليه روايه باوعتلي ونضرات الغضب انرسمت على ملامحها لالا مو بس غضب حتى غيره همست بصوت يرجف.. 

روايه : انتي مرته ؟

جريت نفس وجاوبتها...

ايفين : للأسف اي اني مرته وهذا ابني اسمه محمد.. 

روايه : وشلون عايشه وياه تغير وياج لو اذاج مثل ما اذاني دللج وطلعها من خشمج بعدين لو بس دللج هاااا جاوبيني. 

باوعت عليها ...

انسانه شفافه وراقيه لابعد حد جنت متصورتها شي وشفتها شي ثانيه راكزه هادئة كل كلمه تحجيها بمكانها وبثكل عكسي تماما اشوف فهد يمشي ويحجي بيها حقه عدا جمالها رغم اكبر مني مبينه بس هدوئها وحده قصه.. 

ايفين : عشت حياه مثلج واصعب بس الفرق اني احتويته بالغلط قبل الصح حبيته بدون مقابل داريته بدون ملل الكل تركه وعافه دارو وجهم وضليت وحدي وياه اداري واوكل من يتمرض و يصخن اسهر على راسه يضرب اصالحه يزعل اراضيه شلت الكرمه والكبرياء من قاموسي ..

 وحاولت اعالجه لان عرفته يعاني من عقده بحياته ويريد انسان يحتويه بعيوبه رغم ما جنت متأكده هو مريض وشنو نوع المرض ،،،

بس الاعرفه عنده ندبه قديمه بحياته وهيه السبب بالحال الوصله

 واضافه لهذا بعد ابنه عنه انتي تدرين شكد تجاهلني وضرب مشاعري بعرض الحايط وهو يتذكرج ويتذكر ابنج نحجي بيكم اكثر ما نحجي بنفسنه واسمع واني الممنونه وابلع غصتي واسكت اريد احتويه اريده يعيش نزعت ثوب الغيره والكبرياء وشبه عالجته والظاهر راح يرجع الكم وامسح ايدي بالحايط بس اذا بهذا الشي سويت زين هاهيه ميضيع عند رب العالمين. 

شنو اني احجي وارجف اخذت ابني وكمت ردت اطلع تبعني عمو ادهم ترجاني ابقه واكعد رجعت كعدت بس جسمي كله يرجف..... 

علي : سمعتي شسوت وهيه غريبه لا بت عمه ولا عدها ولد منه شفتي وهذا الشي خلاني احقد عليكم بالزايد..

صفنت على علاوي وعلى نضراته كلت بكلبي وينك فهد تشوف ابنك شلون يشبهك وشلون يدافعلك مثل الاسد وهو ماشايفك اذا شافك شيسوي وشلون راح يكون اللقاء بينكم ...

نزلت دموعي واني اتخيل اللقاء بينهم...

_____________

اشتاق الى نزهة صغيره برفقتك

الى ثرثرة ثائرة حول الطعام مثلا

اشتاق احتضنك 

اشتاق شم رائحتك

اشتاق لكِ ولأشباهكِ

اشتاق لطفله منكِ تشبه عيناكِ

اشتاق لشيء لم يحدث الا معك 

اشتاق للغتي العربيه حين تتكسر بحضرة فمك

اشتاق لأطفئ مصابيح غرفتي واتلحف بدفئ حضنك

اشتاق لاغط بنوم عميق بعد يوم مهلك

اشتاق لشخصك القريب مني ومن قلبي

اشتاق لايام لا احمل فيها همآ ولا اخاف من الفقد وانام حين يهجم سلطان النوم على عيني 

اشتقت استيقظ مسرع لأمسك هاتفي ابحث عن اتصال منك او حتى اشاره تأكد بأنك في الطرف الاخر من الدنيا..

اين انتِ يا كل اشيائي يا ملكي وممتلكاتي...