رواية جذبني فمك البني الفصل السادس والستون بقلم عبير إدريس
الادهم ❌الفهد
حرب العمالقه
صراع الجبابره بالفكر
حرب الخير والشر
_
ولأنكم بنفس الذكاء ستطول حربكم
لقاء من بعد فراااااق
الادهم هل كانت
معاملته معه ومعها ؟
انتقام ام علاج
زوجته واخيه.
دعونا نقرأ ونبحر في عالم الدكتور النفسي ادهم يوسف عمران ليكشف لنا عن تلك الخبايا والخفايا ...
كنا نظن شيئا وكان يفعل شيئا اخر....
___
صفنت عليهم شنو راح يبررون لهذا الشبل شلون راح يقنعوه بالبعد عن ابوه جان بحق لو باطل.....
صار شجار محتد بين يوسف وهاشم
يوسف يسأل بتشكيك
وهاشم يجاوب بغضب..
يوسف : كم مره اجيتك ودكيت بابك وانذليت وانت نفس الحجر لا احساس ولا ضمير وتالي ابني تخبل ليش ما خليته يشوفه تره السويته لا بشر يقبله ولا حتى الحيوان..
تقرب هاشم وصل لوسط الاستقبال وكف بنصهم وكال..
هاشم : الصار لبنتي لا بشر يقبله ولا حيوان يتحمله لهذا من توصل لذكر ابنك حاول تتلافه تذكر اسمه كدامي ليزيد الحقد اكثر واقفل عليك اكثر وامنع علي يروح وياك..
يوسف : زوجه ادهم حبيبك بيده يعني فهد واصل هيج مرحله في سبيل يشوف ابنه كاعد يضغط بكل طريقه صح غلطان بس الصارله خلاه ميحسب حساب احد كلبه محروك رجعوله ابنه يرحم اهلكم بس يشوفه والله وهو علاوي جبير مو صغير حتى نجلب بيه هو يختار وحتى اذا اختار ابوه هم نرجعه لامه بس خل يشوفه مو موتتنه ولك عشر سنين دكيت بابك عشر سنين ماخليت شيوخ ولا خليت ساده ما جبتهم وانت تكلي مسافره بدوله وتزوجت وتالي تطلع هنا لا مسافره ولا متزوجه من الاساس..
هاشم : من نرمان لو زمن لو باقي بناتك يتعرضون لربع معاناه روايه ذاك الوكت تعال ونكعد ونسولف انه لو ما ادهم عزيز عليه وسمعت بخساراته المتتاليه واعرف هاي راح تكون القاضيه اله وحتمآ يروح بيها ميطول لهذا قبلت اجيبهم وتشوفوهم بس والله بختكم بزوجه ادهم لو ماهيه بيده واعرفه حيوان يأذيها ماشوفه اظفرهم لو اشوفه يحترك اتفرج عليه وما اطفيه..
علي قاطع كلامه بحده..
علي : اياك جدي تكمل اللي جمعني بيك وبسببه صرت حفيدك هو ابويه صح انت جدي وربيتني والك حقك عليه بس هذا ابويه انت تعرف عليمن كاعد تحجي..
باوعت على عمو ادهم رفع ايده يطبطب على ظهره مفتخر بيه ..
روايه اختلطت دموعها بشهكاتها وهيه تتفرج على خساره ابنها ....
بفوره من الغضب اتجه هاشم ولزم ايده قوي خزره وعلي ردله نفس النضره القويه نفس نضره ابوه ...
هاشم: لك شبسرعه بعت امك؟
علي : مو تكول امك مريضه وصرفت العندي والماعندي عليها وما كدرت اعالج ايدها صح لو لا واخر مره سفرتها كالوا ما الها جاره.
هاشم : صح.
علي : ابوي هم مريض بس ذاك محد صرف عليه وعالجه لحد ما وصل بيه الحال يتحول لمجرم ويخطف مرت اخوه علمود يلتقي بأبنه .
هاشم : والله وكبرت علي.
علي : علمتني ما احكم على شي اذا ما سامعه بأذني وشايفه بعيني ، اشوف ابوي واسمعه ذاك الوكت اعرف شلون اتصرف بس اسمعه بالاول..
ضليت مستغربه شنو هذا المنطق العنده شنو من ثقافه بالردود جامع ثقافه عمه ادهم وشخصيه ابوه ..
يوسف : يله يابه اذا ماعدكم شي نروح علمود نلحك نرجع لبغداد..
الكل سكت بعدين علي كال..
علي : يله جدي ماعدنه شي ..
قبل لا يطلع راح لأمه ضمها بحضنه هيه ناعمه وهو ضخم مثل ابوه ، عبالك اخته الصغيره بنعومتها حجه وياها باس راسها ودنك باس جفوف ايدها لزم وجها مسح دموعها وحجه بصوت مسموع..
علي : ماريدج تنامين ودمعتج على خدج اشوف ابوي وارجعلج انه رجالج ما ابدلج بكنوز الدنيا بس ابوي هم اله حق عليه وحتى وان كان سيء انه وانتي نغيره ماشي حبيبتي ..
باوعتله بنظره تعاتبه بيها بعدين هزت راسها بالايجاب.....
علي : مو اخابر يكلولي بجت ازعل عليج..
روايه : لا ليظل بالك.
ابتسم ومازحها ..
علي : اسلملج عليه لو انتي تسلمين وجه لوجه.
رفعت عينها باوعت بأتجاه ابوها بعدين باوعتلي ورجعت باوعت لابني وكالت..
روايه : ابوك اسس حياة وعنده طفل صغير محتاجه حرام يعيش العشته انت لهذا لتجيبني بالطاري..
علي : مضطر اعوفج والله..
روايه : روح ماما حبيبي سوي اليريحك ..
علي : احبج تدرين مو؟
ضحكت وعيونها مليانه دموع مسحت عيونها وكالت.
روايه : يخليك اليه يارب.
علي : ويخليج الغاليه..
رجع حضنها وتسالموا وطلعنه ...بس عمهم هاشم عافنه وفات جوه قبل لا نطلع...
طلعنه وصلت للكراج تقرب يمي مبتسم نضراته تتفحص حمودي..
علي : هذا الشبل من ذاك الاسد صح..
ايفين : اي والله وصفت صحيح واني هم شفتك شبل ذاك الاسد.
علي : متلهف اشوفه احجيلي عنه ماعندي صبر.
ايفين : احجيلك كلشي بس نوصل.
مد ايده اخذ حمودي شاله وطلع يمشي بثكل خطواته رزنه عبالك عمره ٣٠ سنه ولا مبين ابن ال ١٧ سنه..
صعدنه بالسياره اني وعلاوي كعدنه ليوره بالطريق طلعت موبايلي بودي اتصل على فهد واخليه يسمع صوته واكون اول وحده تبشره بس اخاف الكل محذريني ما اتصرف اي تصرف بدون علمهم..
طلعت الصور وخليت الموبايل بيده التفت عليه وكال..
علي :منو هذا؟.
ايفين : هذا ابوك..
صفن بالصوره وتمعن بيها يقرب ويبعد بعدين كلب بالصور طلعت صورتي وياه بدون حجاب شافها ضحك والتفت عليه..
علي : ماشاءالله كلش حلوة انتي.
ايفين : شكرا شفت ابوك شنو رأيك بيه.
علي : خليني محتفظ برأيي من اشوفه اكله.
ايفين : براحتك اخذه لحمودي منك خاف تعبك.
علي : شتعبني خفيف شنو متنطوه اكل..
ضحكت..
علي : ها كلت شي غلط...
ايفين : انت عندك خفيه دم مثل ابوك ماعرف حسيت هيج يعني بيك اطباع منه.
علي : والله شوقتيني اتعرف عليه..
رفعت راسي باوعت ليكدام لكيت عمو ادهم يباوعلنه بالمرايا من شافني عكد حاجبه وباوع على الطريق..
وصلنا للبيت وعمو يوسف وعمو ادهم ما نطقوا كلمه صفو السياره نزلنه طبكت سياره ايمن باوعلي خزرني تفاديت نضراته ودخلت للبيت..
مشيت بروح خفيفه كأنما جبال من الهم انزاحت من صدري..
دخل علاوي شافته بيبيته فتحت ايدها حضنته وعماته تلكنه بالهلاهل صار عدنه عرس بس بعد فهد وينك وتشوف ابنك ،،من بعد السلام الحار والعتب ...
اجتمعنه بالهول تناقشوا بموضوع فهد وشلون يعالجوا قررو قرارات ابد ما عجبتني اولها يعالجوه اجباري يعني بعلم الدوله وهيج راح يخسر منصبه وهو بالجديد ترقه لمنصب جبير ماعرف شصار بيه تخبلت بس مع هذا سكتت محجيت ...
عمو ادهم يحجي ويوصف الراح يسويه والحروف تتبعثر بحيره على شفته ، يحجي والعبره خانكته...
يوسف : بس هاي خساره جبيره اله يابه شوفلك حل ثاني.
ادهم : ما ينلزم حجي اله هيج عبالك ما سألت ما فكرت ، خليه يتعالج تعبت من ملاعيبه كأنما احنه شطرنج وهو يلعب بينه ويوجهنا بذهن صافي وعقل جايبه من عالم ثاني وماعنده كش ملك بس لادهم ولزوجته كافي مليت تعبت شنو اخسر بعد فهمني.
يوسف : مو رجع ابنه وراح يشوفه ويصير زين.
ادهم : يتعالج يله اسلمه ايفين واولاده علمود من اسافر راسي بارد من يمه مو يوميه تعال ارجع اخوك سوه مصيبه اكبر من راسه ، ٣ ارواح راح تصير بيده ما كلك انه متفائل بعلاجه لا مأيس بس عسى ولعل يتحقق هذا الحلم..
علي : انه اتفق وياك عمي بس اهم شي تكون الخطوات مدروسه ما تأذوه ..
يوسف : حبيبي عمك دكتور بعلم النفس يعرف شغله ويتفهم اخوه اكثر من عدنه ومن تتعرف عليه اكثر راح تشوف كلامي صحيح.
ابتسم علي وكال.
علي : عاجبني اتعرف عليكم كلكم بس بعد ما اشوف والدي واشبع منه كاعد احسب دقيقه دقيقه شوكت نروحله..
ادهم : منتظر اتصال منه لان موبايله مغلق شلون اوصله ماعرف..
ضلوا هواي يحجون عفتهم ورحت للمطبخ صاحتني عمتي كعدت اسوي وياها اكل جانت مريومه كاعده على الميز وتلعب بشعرها..
مريم : ففة.
ايفين : ها عيني.
مريم : منو هذا الولد ؟
ضحكت وكتلها.
ايفين : هذا ابن عمج فهد.
مريم : يبوو هذا علي الحرك الدنيا علموده.
ايفين : اي ليش شبيه؟
مريم : مابيه بس بابا هواي تأذه من عمو وهو ميستاهل هيج يصير بيه..
ايفين : وانتي ليش ضايجه حبيبتي سوالف كبار همه يحلوها واحنه علينه الصافي.
مريم : ليش نسيتي بابا شلون تعذب ٨ اشهر ميمشي واحنه نوكله اني ما انسه اذا انتي نسيتي.
ايفين : حبيبتي ميصير نحقد ..
قاطعني علي من فات للمطبخ شايل محمد ..
علي : هذا بس يبجي ماعرف شسويله ؟
ايفين : جيبه جاع وكت اكله هسه.
علي : هاا عبالي اذيته بدون ماعرف.
ايفين : لا حبيبي.
مريم دفعت الكرسي بضوجه وكامت طلعت من المطبخ هو باوعلها ورجع التفتلي..
علي : منو هاي ؟
ايفين : هاي مريم بنت عمك ادهم..
علي : هاا وشبيها متسلم ..
ايفين : تستحي وما متعوده عليك.
علي : هاا خليها براحتها..
ايفين : اكعد حبيبي ليش واكف.
علي : لا اروح يم عمي كال ودي محمد وتعال.
ايفين : اخذ راحتك..
ابتسم وطلع من المطبخ ...
____
سيلين
جنت نايمه غاطه بنوم عميق صارلي كم يوم منايمه زين بس البارحه من الخوف لفلفت روحي بالبطانيه وغفيت كعدت الصبح على صوت تركع استغفرت ربي وكلت هاي ايفين شلون متحملته وفوكاها تحبه ادهم وين يسوي الريوك ويكمل يجي يكعدني اروح للمطبخ اكله هاي شلون سويته ومسمعت لا صوت تكلاه لا فتحت باب كاونتر يكلي متعلم اشتغل بهدوء لان الاصوات تعصبني خلي يجي يشوف اخوه راح يخبلني...
لبست شالي وطلعت باوعت الصاله مرتبه ونظيفه استغربت مو جانت طحين فلشها تفلش ، المهم كلشي بمكانه رحت للحمام غسلت وطلعت البيت مجلوف جلف من اروح للمطبخ الكه مره كبيره وبنيه صغيره وياها ترددت افوت بعدين كلت اشوف ذوله شنو سالفتهم شعدهم هنا وفهد وين ..
سيلين : السلام عليكم.
التفتت المره شافتني ضحكت..
_ هله بنيتي واخيرا شفنه مرته لابو علاوي..
استغفرت ربي لا بيه اكلها اي حرام ولا بيه اكلها لا خاف تاخذ عني نظره محلوه سكتت وكعدت على الميز..
سيلين : وين راح.
_ منو ابو علاوي..
سيلين : اي.
_ هسه يجي راح يتسوك كم شغله ويرجع ما يتأخر ..
سيلين : ها تمام اساعدكم بشي.
_ لا حبيبتي ارتاحي احنه نكمل كلشي..
سكتت وضليت اتفرج عليهم كملوا وكالت.
_ عيوني راح نروح بلغي ابو علي احنه كملنه كلشي من فدوه رحت لهذا الوجه.
سيلين : ان شاءالله عاشت ايدكم..
_ ربي يرزقكم الذريه الصالحه كولي امين.
سيلين : يمعوده ...
_ ها خاله ويايه..
سيلين : لا مو وياج خاله..
ضحكت وطلعت ..
ضليت اهز بيدي هذا شكال الهم الخبل...
وره نص ساعه اجه فتح الباب وفات بالدراجه نزل منها ، شال الاكياس واجه توجه للمطبخ شافني غمزلي وضحك.
فهد : صباح الخوف جبانه.
كتفت ايدي وكتله.
سيلين : وين جنت ؟
فهد : رحت تسوكت وجيت ليش خفتي لو اشتاقيتيلي.
سيلين : بله سخافه بله.
فهد : البنات راحوا.
سيلين : اي راحوا..
فهد : خوش ، تعاي هاج ذني صفيهن لو مابيج حيل حتى لو مابيج حيل سويهن..
سيلين : اسويهن هسه كلت لا حتى تحجي ..
فهد : صدك عليش خفتي البارحه تره ضحكت ماسويت شي.
سيلين: لتذكرني لخاطر الله خليتني ارجف والله.
فهد : شدعوه هيه ضحكه.
سيلين : الله عليك ايفين تخاف منك لو تحبك ومتخاف ..
فهد : ليش تسألين هواي عن حياتنه تره اضوج.
سيلين: لا مو تدخل بس اخاف منك مجرد ضحكت ضحكتك مرعبه شلون اذا عطت بيها شتسوي.
فهد : توكف عينها بالحق هههه.
سيلين : ليش هيج مخوفها مو حرام عليك.
فهد : قبل جنت هيج بعدين تغيرت سأليها اصلا ما انام اذا ماحضنها انيمها على صدري هيه من جهة وحمودي بالجهة الثانيه.
سيلين : الله يهديك عليهم ..
كعدت اصفي بالمسواك وهو مدري شيسوي مخبوص حركاته كلها توترني..
سيلين : صدك سؤال.
فهد : والله بالمدرسه ما نسألت بكد ما سألتيني من جيتي لسه.
التفتت عليه لكيته ساند عكوس ايده على الفاصل مال مطبخ ، تفصل بين المطبخ الحار والبارد..
سيلين : غير انت سوالفك هوواي وكلها تدك بالكلب هسه شفت الماطور وتذكرت شغله ردت اسألك عليها.
فهد : وهي؟
سيلين : مره جنت كاعده بسيارتي واجه ابو ماطور لزك بسيارتي وظرب الجامه بيده هذا انت مو؟
جانت تفاحه بيده قضمها وكال..
فهد : قصدج من اجاج المصلح مال البواري وطلعتي بره كعدتي ..
سيلين : خرب هاي شمدريك ؟؟؟
فهد : رامي خابرني كال اجه رجال فات لشقتها وهيه نزلت ضايجه وكعدت بالسياره انه جيت ضليت واكف بعيد انتظر خاف تحتاجين شي علمود اتدخل من خابرني رامي كال كمل راح ينزل حبيت الطف الجو جنتي ضايجه ههههه جيت طخيت سيارتج ورحت..
سيلين : وانت شكو جيت مو تدري ادهم ساكن ويايه بنفس العماره هو يدير باله عليه انت شكو؟؟
فهد : جان مسافر لمحافظتنه ابوي كلفه بشغله وراح ثاني يوم من الصبح رجع.
سيلين : صدك لو كالوا حاميها حراميها..
فهد : ههههههه تريكتي..
سيلين : ماريد اريد اروح لادهم راح اتخبل انت شبيك متحس تره طوختها..
فهد : ماضل شي بس باجر .
سيلين : فهد تره سويتها بله ملح..
فهد : تدرين البارحه بحثت عن صفات السايكو وطلعت فعلا هاي صفاتي القديمه بس والله نصها تخليت عنها ويه ففه.
سيلين : ففه دكتوره بعلم النفس خلي يعزلون وهيه تعالج المرضى افضل ...
فهد : بعيد عن الاستهزاء تره اي انسان بمقدوره يكون طبيب مجرد يحتوي المقابل حتى انتي الج فضل بعلاجي.
سيلين : اني ..
حجيتها وضحكت ..
فهد : والله انتي الج فضل بعلاجي هم.
سيلين : شسويت يعني.
فهد : يكفي سمعتيني وتفهمتي وشرحتيلي هواي امور جنت غافل عنها.
سيلين : ادهم شكد حاول وياك ليش ما سمعتله وجان ماد ايد الدعم الك..
فهد : ما تقبلت منه اي شي مجرد اشوفه اتذكر فراك ابني وزوجتي بسببه واريده يتأذه كل ما اكعد كباله اريد اعيشه الشعور العشته ..
سيلين : وهسه ارتاحيت من عيشته هذا الشعور مرتين ؟؟
فهد : مرتين ؟؟
سيلين : اي مرتين.
فهد : شلون مرتين ؟
سيلين : مره من دفعتني غصب حتى اتزوج سامر وثاني مره هاي..
فهد : لا سالفه سامر تختلف.
سيلين : شلون تختلف وانت جنت الضاغط الوحيد بهاي السالفه حشدت امك وابوك وخليتهم يسكنون بغداد وانت كابلتنه وكعدت وتسمعني بالحجي وراجع ليوره اخر شي كتلي اذا رحتي ادهم يعيش براحه وايمن يتزوج ايفين والحياه تصير لونها وردي.
فهد : كل حجيج صحيح بس مو لان ردت افرقكم.
سيلين : لعد ؟
فهد : تتذكرين من جنه مجموعين بلهول بليل وره عرس ملاك وضيغم ...
سيلين : اي ...
فهد : بيومها كتلهم اكو واحد يريدج وخطبج مني ..
سيلين : اي اتذكر..
فهد : انه هذا الواحد.
سيلين : ههههههههههههههه
ضليت اضحك فصلت وهو هم كام يضحك..
سيلين : صدك تحجي عود
فهد : اي والله شبيج انه ردتج من اول يوم شفتج بيه بالمطبخ تتذكرين من ضليت اتلفت عليج بس ماصارت طلع ادهمج واكع بحبج وغراكان.
سيلين : ياااا الله شنو هاي واكول ليش لحيت انت بالذات زوجهن زوجهن واله سيلين.
فهد : مو مره كتله اريد وحده منهن ما حددت غلس شكال كال فهد ابتعد عنهن ذني ترفات انه شكتله كتله بحالهن انه ، وانه انام واكعد ابالي عيونج الحول..
سكتت مجاوبته..
فهد : بس تره اعجاب جان وراح بوكته لا عبالج غير شي ودماغج يبلش يألف حوارات ماصايره.
سيلين : بس هواي لحيت واستقتلت اتزوج شعليك مني انت دمرتني جنت مرتاحه يم ادهم..
فهد : من تمسك بيج ورفض ينطيج عرفت انتي نقطه ضعفه وانتي من خلالج راح احصل ابني .
سيلين : واني شنو ذنبي مرضتني حرام عليك.
فهد : ذنبج عدوي يحبج..
سيلين : يابه ادهم عدوك صار لو تدري شنو يصيحلك كله عزيز كلبي بس شوف تفكيرك للأسف .
فهد: سايكو بعد ماعليه عتب.
سيلين : خوش اخذتها ذريعه تطمطم مصايبك بيها.
فهد : شوفي السايكو بس يحصل اليريده يظهر على حقيقته.
سيلين : مو كتلك؟
فهد : بس انه مو هيج اذا حصلت علي اتغير ..
سيلين : نشوف.
فهد :واهم فقره مينقهر على اي ذنب يسويه حتى اذا قتل انسان.
سيلين : انت اعرف بنفسك عندك هيج خصال ..
فهد : اي عندي .
فتحت عيني كلها والخوف دب بكلبي.
فهد : بس مو ويه الكل بس الاشوفه يستاهل القتل اقتله وما انقهر ولا اشعر بذنب..
سيلين : يعني انت مجرم من صدك.
حجيتها بخوف.
فهد : لا مو مجرم يعني من كبرت وعاقبت الجانوا السبب بوصولي لهذا الحال واستمع لصراخهم واتلذذ مثل ما صار ويايه برأيج ذوله انقهر عليهم.
سيلين : قتلتهم..
كام من الكرسي وكف باب المطبخ خله ايده بجيوب البنطرون وكال.
فهد : دفنتهم..
سيلين : عززه عايشين..
فهد : اي عايشين وطميتهم بالتراب مثل ما ندفنت بالحياه.
سيلين : وهاي من صار عندك منصب لو قبلها وشلون ملزموك.
فهد : بنص الامن دفنتهم
سيلين : عزززه شلون
فهد : شعليج شلون رتبتلهم تهمه تليق بيهم وعلسناهم..
سلين : بداعه ولدكم هم ناس مظلومه اذيتهم..
التفت عليه عاكد حاجبه ومغضب عضلات وجها..
فهد : وداعت اولادي الماكو اعز منهم بهاي الدنيا ما مسيت انسان بريء بورده عداج انتي..
سيلين : اني..
فهد : اي انت اذيتج هواي.
سيلين : ليش؟
فهد : الصارلج بسببي وماعرف اذا بيوم تسامحيني او لا.
سيلين : يعني اي جزء انت السبب بيه غير افهم لان هنه هواي.
فهد : ماكدر اكلج مو جبن وانما خجلان والله..
سيلين : الله يسامحك كلشي ماكول.
فهد : اريدج انتي تسامحيني .
سيلين : فهد انت كاعد تغسل دماغي وتخليني اسوي شغلاتك ومهامك كأنما واجبات عليه ..
فهد : مثليش يعني ما فهمت..
سيلين : يعني هسه كاعد اصفي المسواك واني شكو شعليه لو ابنك الزمتني ارجعه الك واني لا بيها ولا عليها كأنما واجبي هذا ولازم ارجع ابنك هيج خلقت شعور بداخلي شلون سيطرت عليه وعلى افكاري ولازلت مسيطر راح اتخبل تخيل من اختلي بغرفه وحدي بودي املخك واني اتذكر اذيتك لادهم ومن اكعد كبالك اسمع واتعاطف وامنيتي بالدنيا اساعدك فسرلي الديصير شنو معناته.
فهد : بكل بساطه عرفت نقاط الضعف والقوه بشخصيتج واشتغلت عليها بنيت علاقتي وياج على اساس هاي النقاط العندج ..
سيلين : صح صح..
حجيتها وهزيت راسي.
سيلين : دخلتلي بوديه بالبدايه وحجيت بلطف وتعاطفت ويه حالتي من سافر ادهم وحاولت تساعدني وتريد تحل مشكلتي خليتني انجذب لشخصيتك مثل المغناطيس من يجذب نشاره الحديد اله ومن تقربت منك بلشت تسيطر على نقاط الضعف العندي تلاعبت بذهني وحسستني اني تحت سيطرتك الكامله ماعرف شلون هيج خليتني شلووون سمعت كلامك بس سؤال محيرني اريدك تجاوبني عليه.
فهد : وهوو؟
سيلين : انت شلون تكدر تتحمل تعيش ويه انسان وتجامله وتطول خلك وياه في سبيل تنتقم عسمى تطول سنه.
ضحك وكال.
فهد : البارحه قريت من ضمن صفات السايكوباثي عنده قابليه يحافظ على علاقاته سنين طويله ويتواصل بشكل دائم ويؤدي صله الرحم على اتم وجه ، لهذا تشوفيني طولت خلك ويه ادهم علمود ارجع ابني ..
سيلين : عجيب امرك والله...
فهد : نصب غده ناكل انه ما متريك.
سيلين : اصبلك انت اكل اني ما اشتهي.
فهد : ناكل سوه بدون حجي..
سيلين : اصب هسه.
فهد : صبي كتلج ما متريك.
كمت صبيت وعلى اعصابي اريد ينتهتي هذا الكابوس واخلص خليت الاكل والتفتت اروح.
فهد : بروح ابوج كعدي اكلي لتقهريني..
سيلين : ليش تحلفني.
فهد : بداعه ادهم كعدي .
جريت كرسي وكعدت شمرلي خاشوكته..
سيلين : انت بيش تاكل.
فهد : بيدي متعلم..
سيلين : براحتك ..
تغده واني بس اكلب بالاكل كل شويه يرفع عينه يباوعلي ويكول اكلي واجاوبه داكل..
كمل راح غسل وخله القوري على الطباخ واجه كعد كبالي.
رفعت عيني شفته مركز بوجهي خزرته انتبه على روحه ضحك وكال..
فهد : صدك انتي ليش عيونج حوله..
سيلين : اي حول هسه شتريد..
فهد : بضميرج فد سؤال بس رون سايد.
سيلين : اذا تعرفه رون سايد ليش تسأل.
فهد : سمعيه باالاول.
سيلين : اسأل فضني..
فهد : انتي ما جانت عندج مشاعر اتجاه ادهم شلون كمتي تحبيه بعدين...
سيلين : وانت شعليك والله حلوه هاي شكو تدخل.
فهد : ادري هو سؤال فايت لغرفه نومكم وانرعصتي شجاج ..
كام مشى للطباخ ويدردم..
فهد : واحد يبتلي على روحه يسأل سؤال اليشوفها يكول فهد ماكل عشاها اعوذ بالله..
سيلين : اسئلتك اوفر وهواي تتدخل واني من اسأل تكلي اضوج تدخلين بحياتي وانت حرت شنو حجيت وبشنو تدخلت..
فهد : غير تستقر كونداليزا رايز...
سيلين : انهجم بيت كوفي عنان.
فهد : كوفي عنان هوهو يحب النسوان هوهو يشرب جكاره هوهو فوك العماره هوهو سوبر اسبين هوهو ب ١٥٠ هوهو ...
صدك ضحكت من كل كلبي هو هم ضحك..
فهد : اي ضحكي يمعوده عيشتيني بمحاضره مال علم نفس اختنكت خنك من خرب ب ***.
سيلين : لتفشر شبيك انت تره مو صاحبك اني.
فهد : والله بس ففه الصاحبه الوفيه يابه شكد تتحملني نضحك ونتشاقه ونتعارك والله ابوس راس ادهم ما قبل اخذج جان متت قبل يومي.
سيلين : وموتتهم..
فهد : شلون متحملج نكديه اعوذ بالله.
سيلين : نكديه ومجلب بيه رجعني لرجلي والله حلوه هاي.
فهد : ارجعج صبر..
سيلين : وانت ارجع لففتك صاحبتك وخلصوني من شركم.
فهد : اخ ففه صديقتي المقربه مو مجرد حبيبه وبس وانه من الرجال اليفضل الصديقه على الحبيبه ..
سيلين : ليش يعني وين لفرق.؟
فهد : الحبيبه الها وقت معين تعرفين ماكو داعي اشرح..
سيلين : لتشرح دخيلك
ضحك وكال.
فهد : وتكون نكديه بس الصديقه تختلف بكل وقت تتحملني...
سيلين : زين اكو صديقه تتحملك.
فهد : هو بس ففه الله وكيلج كلهن يهجن مني يومين ويطفرن..
سيلين : من اعترف بذنب.
فهد : لا ذنب عليه ههه..
سكتنه وره شويه رحت للأستقبال كعدت واجه جايب صينيه الجاي صب اليه واله شال الكوب خلاه كبالي.
سيلين : شكرا
فهد : عفوا فد سؤال سيلين
سيلين : نعم ..
فهد : شتكولين اذا شفت علاوي راح يحبني يتقبلني لو ينفيني برأيج عباله ميت لو امه كرهته بيه تدرين شكد صعبه اذا غاسلين دماغه متأكد راح يخليني اتمنى البعد هذا ولا الاقتراب منه اذا نفاني من حياته معناها اموت ...
صفنت شجاوبه حيره ضل يحجي ويسولف لحد ما دك موبايله ابتسم وكال.
فهد : ففتي هاي .
سيلين : انت مو غالق موبايلك شلون اتصلت لعد..
فهد : هذا الخط خاص بس هيه تعرفه.
سيلين : خط المصايب قصدك..
ضحك وجاوبها .
فهد : ففتي ام حمدمد الغاليه كولي. ..
عقج حاجبه جان استكان الجاي بيده من الاعصاب ضغط عليه قوي تكسر بيده وماحاس على نفسه كمت وكفت من الخوف لا بيه اقترب ولا بيه ابعد اريد اشوف شكو كل بالي يم ادهم خاف صار بيه شي توني اعيط صرخته سكتتني..
فهد : لج ففه غدرتينييييييييييييييي ففه غدرتي انتي هم لج ليششششش ليششششش طلعي من البيت وشوفي شنو اسوي بيج ....
نص الحديث الدار بين فهد وايفين ...
ايفين : هلو فهد شلونك.
فهد : ففتي ام حمدمد الغاليه كولي..
ايفين : بعد ما تسمع الراح اكوله تغير رأيك متأكده.
فهد ضل ساكت واني جريت نفس وكتله..
ايفين : عمو ادهم كلبه تعب وماكدرت اضم اكثر حجيتله عن الاماكن التتواجد بيها من ضمنها البيت اطراف بغداد و اذا تريد ترجع ارجع بس ماراح تلكاني اعوفلك ابنك واروح لتسأل عليه ولتدورني وعيش حياتك بعيد عني..
فهد : لج ففه غدرتينييييييييييييييي ففه غدرتي انتي هم لج ليششششش ليششششش...
ايفين : مغدرتك مغدرتك هذا اللازم يصير ..
فهد : طلعي من البيت وشوفي شنو اسوي بيج اطلعج من تحت سابع ارض..
ايفين : لتعب نفسك متلكاني لان راح اموت نفسي واخلص عذاب الضمير موتني ماكدر اعيش وياه اني اذيت اعز اثنين على كلبي بسببك وماكدر اشوفهم متأذين واني اتفرج عليهم وانت صرت زين ماعرف لا المهم عيش ويه اولادك ولتدورني.
فهد : سمعي حتى انتي وميته اجيج لج ايفين لتتخبلين لتسوين بيه هيج لتسوين.
ايفين : اني لعبه ومن خلالي وصلت للتريده وراح تشمرني متأكده بعد عليمن مجلب بيه ابتعد اني افضل ما تلزمني الباب بعدين.
عاط بعلو صوته..
فهد : منووو كلج انتي لعبه منو لج لتخربطين بكيفج..
ايفين : وهسه من عرفت دليتهم البيت شنو راح تسوي بيه راح تدمرني ومن هسه اكلك بعد ما اتحمل تعبت.
هدأت نبرتنه وكال ...
فهد : ففتي احبج انه وين تعوفيني وتروحين.
ايفين : ههههه حجيتها بوقت اني ماحب اسمعها احتفظ بيها لنفسك مو ضروري تجاملني.
فهد : ما جاملج ففه انه ما جامل تعرفيني كلش زين..
ايفين : المهم حبيت ابلغك راح يجون ياخذون سيلين وابنك وياهم ..
فهد :شلون تدزين محمد وياهم لج شلووون تخبلتي.
كام يعيط ويصيح اريد افهمه مو محمد علي ماكو ميسمعني صوتي مقابل صوته لا شيء..
اخر شي انسد بوجهي ..
سيلين
من سد الموبايل ركعه بالكاع تفلش دفر الطبله الكباله ويفشر على ايفين ويغلط.
فهد : غبيييييه غبيييه دازته بيدهم عبالهم يلووون ذراعي بيه قابل راح يموتوه غصب عنهم يديرون بالهم عليه غير احركهم حرك..
التفت عليه شافني صافنه عليه ودموعي تنزل.
فهد : كومي وياي.
سيلين : وين ؟
فهد : نطلع منا اندلوا المكان ...
سيلين : فهد..
ردت احجي وياه قاطعني بعياط وضرب رجله بالكاع ...
فهد : امشششششششششي لبسييييي ولتحجيييين لتحجيييين..
عرفت خوفه من ادهم جبير ..
رحت لبست العبايه الجابني بيها وطلعنه قفل البوب وصعدنه بسيارته ..التفت عليه وكال.
فهد : لبسي حزام الامان كلشي يصير..
سيلين : عفيه اخاف لتسوي هيج.
فهد : لتلبسيه يطبج طوب..
شخط السياره وساق السياره بجنون..
بيت حجي يوسف.
ايفين جنت كاعده بالهول واسمعهم عمو ادهم يفرفح وحده كلبه لزمه تخربط متت قهر مكدرت اسكت بعد رحت يمهم ودليتهم بيت فهد....
صفن بوجهي عمو ادهم همس بتعب وكال..
ادهم : ليش ماحجيتي ذيج الايام يعني كل يوم اتفاجئ بيج اكثر من اليوم القبله..
ايفين : اخاف منه والله اخاف..
ايمن : الف مره نطيناج الامان من شنو خايفه لو كولي احبه وماريده يتأذه..
التفتت عليه باوعتله بنضره غضب وكتله..
ايفين : صح دليتكم على مكانه بس اذا اذيتوه تشوفون مني شي ما صاير..
كتف ايده وارتاج على اطار الباب ..
ايمن : شتسوين بله ؟؟
مجاوبته التفتت على عمو وكتله..
ايفين : عمو متأذوه صح متحبسوه مو عفيه عمو مو كلت مريض ابنه شلون اربيه وحدي عمو الله يخليك...
مجاوبني ، كام من الهول وطلعوا هو وايمن جمعوا الولد كلهم ماعرف منين اجتي السيارات والقهرني اكثر من سمعت عمو ادهم اتصل على ضابط صديقه حتى يحضر وياهم. ..
ادهم : راح نتحرك لكينه مكانه انتو طلعوا كبلنه لان اقرب بس اريدهم ثنينهم مابيهم شي اخويه وزوجتي بأمانتكم ، اي ميخالف هسه بلكت هسه احاول ادز العنوان مضبوط..
ضليت الوب شسوي ماعرف طلعوا للطرمه طلعت محد بحالي الكل مخبوص شلون يحاسب فهد وشنو راح يسوون بيه اذا لزموه الكل تحشد ضده صارت ثوره ضد فهد ومن بعدها تم اعلان الحرب ، سمعت صعب يصيح بصوت عالي..
صعب : جيبو علي اذا قاومنه نضغط عليه بيه وراح يضعف ..
جاوبه عمو ادهم بنبره عاليه..
ادهم : ابنه معليه يبقه هنا بس نتصل بيه يسمع صوته وراح يرجع برجله لهنا .
علي: لا عمي اجي وياكم كلام خالي صعب صحيح من يشوفني يختلف الموقف..
تقرب عمو ادهم ربت على كتفه وكال ..
ادهم: حبيبي ماريد اي شي يأثر على نفسيتك وماريد تشوف ابوك بموقف يكون بيه ضعيف..
علي : لا لتخاف اعرف اوزن الامور كلش زين.
صفن عليه بعدين كله..
ادهم : براحتك ..
ضربه على كتفه وطلعوا..
اباوع بالكامرات الشارع متروس سيارات وزلم ...
خفت على فهد ليش اكذب هووواي خفت كمت اتخيل يقاومهم ويضربوه طلقات واكون اني السبب بموته وايتم اولاده تخبلت صعدت اركض اتصلت بيه وبلغته قبل لا يوصلون ، اني اعرفه ومتأكده منه ما راح يأذي سيلين ومداريها بس همه راح يأذوه الكل حاد سنونه عليه عبالي من حجيت بس عمو ادهم يروح وياخذ علي ما تصورت يبلغ عليه ..
الحديث منقول من ايمن لسيلين...
ايمن ..
صعدنه كلنا وانه صعدت ويه ادهم وصعب بالي يم ادهم وضعيته تعبانه وكل شويه يلزمه كلبه تخبلت عليه..
ايمن : صعب انت سوق تره ادهم تعبان
نتر ادهم بصوت ضعيف..
ادهم : مابيه شي..
صعب : بالرجعه انت سوق خليني هسه انه اسوق.
مجاوبه صعد والطريق كله شفته ترتل ادعيه وجها اصفر حلكه يابس كل شويه انطيه مي يبلل حلكه ...
وصلنه على الوصف بس منعرف يا بيت بالضبط اتصلنه على الضابط المتفق ويه ادهم كال اني هم بنفس المكان الكلتو عليه بس مندليت البيت ..
ادهم صار عصبي كام يعيط بصوت عالي على صوته نزلوا الولد والتموا يم سيارتنه كلها تتنفس غضب وتسب بيه السواه ابد مو قليل ولا يغتفر لو مسويها ويه ضي اكتله خلاص وميرفلي جفن ...
انتضرنه مرت الساعه والثنين ومندلينه المكان رجعنه اتصلنه على ايفين رجعت وصفتلنه بالمضبوط اندلينه على الوصف وصلنه للبيت جان مزنجل عبروا الولد شافوهم وطلعوا من فوك الباب حاجوا ادهم..
_ ماكو احد البوب مقفوله..
ادهم همس بصوت تعبان..
ادهم : ربي احفظها وين اخذتها فهد وينننن ..
ايمن : اصعد اكعد تعبت انت..
ادهم : مابيه شي..
اجه علي وكف يمنه..
علي: عمي جرب اتصل عليه جوز فتح خطه وانه احجي وياه ..
بدون ميحجي طلع موبايله واتصل على فهد ونطاه لعلاوي .
علي: كاعد يدك..
ادهم : ياالله..
الكل متوتر ومترقب عيشنه بأستنفار تخبلنه منين عرف احنه جايين وفلت بعدين طخت ابالي ايفين بس محجيت...
سيلين...
يسوق بجنون وماعرف وين رايحين.
سيلين : وين ماخذنه فهد..
فهد : ماعرف وين ماعرف.
سيلين : راح تضل مهزوم فهمني.
فهد : تريدين انلزم ويضيع الاول والتالي عليه.
سيلين : منو كال مبلغين عليك.
التفت رمقني بنضره سريعه طلع لسانه لعق شفته السفلى وعضها بعصبيه وكال.
فهد : ففه سامعتهم.
سيلين : زين نرجع نشوف شنو يريدون اذا عليه جايين ما اشهد ضدك اكللهم اني اجيت وياك برجلي علمود ابنك يرجعلك.
فهد : جذابه متسويها.
سيلين : اسويها والله بس بشرط.
فهد : شنو ؟؟
سيلين : متأذي ادهم وتعوفنه بحالنه...
سكت مجاوبني..
وكف السياره وضل يفكر بعدين كال.
فهد : راح افتح خطي ونشوف اكيد راح يتصلون بينه.
سيلين : اي افتحه.
فهد : سيلين متغدريني.
سيلين : وعد مااغدر بيك.
فهد : نشوف..
فتح الموبايل وره ساعه اتصل ادهم ثنينه متوترين هم اني وهم هو ..
سيلين : جاوب وافتح سبيكر اريد اسمع.
باوعلي وفتح الحاكيه اجانه صوت شاب مو ادهم هنا كلبي راد يوكف كلت هذا هو ادهم بيه شي وله ليش يتصلون من موبايله اله صاير شي ....
فهد : الو منو حضرتك..
علي : انت شتكول منو؟
فهد : احجي لخاطر مكه منو انت ؟؟
علي: ليش عصبي وروحك بخشمك..
فهد : اكلك اذا انت اكبالي اكسرك من الاعصاب الانه بيها احجي منو انت احسلك.
علي : متأكد اذا شفتني تفلش وجهي...
فهد : انت منو احجي لتخليني اسبك.
علي : تسبني شلون تسبني وانه ابنك..
فهد عكد حاجبه التفت عليه باوعلي واشرلي بيده همس بصوت ناصي.
فهد : هذا شديكول تسمعين السمعته..
علي : يابه انه علاوي تعال اريد اشوفك شنو مهزوم مني وانه جيتك برجلي هيه هيج المراجل ..
فهد فتح عينه على وسعها وضحك بصدمه..
علي : الو يمعود كالو ابوك اسد وفرهم فر شو انت فريت منهم سمعت بيك انت ماتخاف..
فهد : منو كلك انه خايف انه ردت ابني وبس والسويته كله علموده ومنو يكول انت صدك علي.
علي :انه ابن روايتك هسه تمام..
ارتبك فهد بلل شفته بلسانه عرك وكام يضرب على رجله بتوتر ميعرف شيسوي حار..
علي : يعني انه واكف باب بيتك الي ساعتين عبالي تغديني نشرب جاي راح ارجع منين ما جيت ولتلوم عمامي عكبها..
ضل ساكت مصدوم بس عيونه غرغرت فر السياره وساق سريع عاط بصوت عالي عبالك هسه يله استوعب الموقف..
فهد : لك عليوي انت صدك اجيت..
علي : هههههه وداعت حمودي اخوي ..
فهد : لك حبيبي شفته لاخوك شفته التقيت بيه.
علي : اي شفته وكعدت يمهم صارلي يومين انت بس تعال دنتفاهم...
فهد : جيتك ابويه انت جيتك ...
سده وفرك وجها بأيد ترجف..
سيلين: جان سألته اكو شرطه لو لا..
فهد : ميحتاج ..
سيلين : شلون اذا لزموك فهد...
فهد : ابني يمهم ابني خلي انلزم عادي المهم اشوفه..
سيلين : الله يبرد كلبك.
فهد : ما انسالج وكفتج والله..
سيلين : هسه انجمع بأبنك وبعدين وفي الدين.
ضحك ... وصلنه للشارع البيه البيت متروس سيارات وكلها زلم عدا سيارات الشرطه ثنين لو تلاثه ماعرف يمكن اكثر..
فهد : دنكي راسج بين ما دزلج ادهم لو ايمن ياخذوج ماشي..
سيلين : ماشي..
نزل فهد مشى بخطوات ثكيله يباوع على الشباب يدور ابنه بوجوهم..
طلع شاب من نصهم ومشى بأتجاه فهد من شكله عرفته هذا علي نسخه ابوه بس صغير شنو هالشبه الفضيع من فهد بس عيونه ملونه يمكن على امه او على جدهم عيونه ملونه ، واتذكر ضيغم عيونه هم خضر...
ضليت اباوع عليهم اجه ايمن يمي فتح باب السياره و صعد..
ايمن : حمدلله على سلامتج يابه خوما متأذيه.
سيلين : الله يسلمك لا مابيه شي انت شلونك ادهم وينه ليش ما اجه.
ايمن : واكف يم الضابط كاعد يحجي وياه ويفهمه..
سيلين : راح يلزموه مو..
ايمن : لعد شلون ياخذوه يتعالج اله هيج لان فهد ما ينلزم.
سيلين : بس والله خطيه خلوه يشوف ابنه يشبع منه بعدين يروح طاير المصح قابل.
ايمن : هسه نشوف شلون تصفى...
جانو كلش قريبين من عدنه باوعت لهفتهم وسمعت حواراتهم يحجون بصوت عالي فقدو ثنينهم...
انطلقت التنهيدات والدموع المحبوسه طيله ١٤ سنه ترجمت الموقف ترجمت الاشتياق ....
سيلين : اوف ياايمن فهد قهرني شوفه ماخله مكان ما بوس ابنه منه ..
ايمن : الله يبرد كلبه..
سيلين : امين..
طبع بوسات بكل وجها بعدين جره لحضنه حضنه حسيته راح يتكسر بيد ابوه ..
التفت فهد على الموجودين وصاح بصوت عالي وجها صار احمر ودمراته كلها برزت...
فهد : ولكممممم يكلي يابه سمعتووووا ياالله سمعتوواا هذا ابني ولكم صاير رجااااال تعالو شوفوه تعالووو الله عليكم هذا ابني ياناس ابني ابني شفته ..
يصيح بعلو صوته بجه الزلم الواكفه كلها....
الحقد مالتهم تحول شفقه سياره من السيارات تحركت مال منو منعرف المهم شخطت حيل وراحت اباوع ادهم ماكو ليش ما اقترب ليش ما اجاني وينه...
اجه للسياره فتح الباب البجهة ايمن اخذ موبايله وراح يحضن بأبنه ويكلب بالموبايل ماعرف المن خابر يحجي ويضحك...
فهد : لكم كوا***** ابني رجع ولكم الجنت اون عليه الليل كله هيانه كبالي صاير رجال جيبوا ذبايح ومزايق انه بيتي القديم تندلوه لا تتأخرون كلهم اريدهم يجون..
السيارات مال شرطه الجانت واكفه نزلوا منها ٢ شرطه واجه وياهم ضابط وتبعهم ادهم اخ يا ادهمي شصاير بيك لا لا مستحيل ياعمري انت مجرد شفته دموعي كامت تنزل....
التفتت لايمن وكتله .
سيلين : هاي ليش هيج شبيه عفيه.
ايمن : بعدين احجيلج خل نفهم ..
لو ماعيب انزل واركض بنصهم واروح احضنه..
الشرطه من شافوا فهد وعرف عن نفسه انخبصوا سيدي ماسيدي انخبصو خبص حجه وياهم كلمتين ضربوله تحيه ضحك ايمن وكال.
ايمن : هاج استلمي ردناهم عون..
حجوا وياه هواي بعدين تقربوا من السياره مالتنه فتح الباب الضابط وسألني..
_ انتي سيلين وضاح..
سيلين : نعم اني.
_ ال______ فهد يوسف عمران خاطفج صحيح هذا الكلام.؟
باوعت نضراتي حايره بينهم عين عليهم وعين على ادهم ونضراته الحاده وعين على فهد المتوسلني بنضراته وعين على علي الكاسر خاطري.. ...
حرت شنو اكول وشنو اسوي؟
الكل منتظر مني كلمه...
كلمه ممكن تهدم حياتي وتبني حياتهم
وممكن تبني حياتي وتهدم حياتهم..
