رواية الوجه الاخر للحقيقه الفصل السادس بقلم جمانه السعيدي
ليلى....قبل زواج اثير بشهر اني ازوجت
اجيت الاهلي بعد عشرين يوم من زواجي حتى اساعدهم بتحضيرات زواج اثير
هلمره بابا صمم اثير يزوج بيتنا
يعتبر بيت اثير بي ذكريات موحلوه تقريبا ما متفائل بي
كان عرس اثير يخبل عرس حقيقي حفله ومعزيم
وذبايح وشكد عزمنا ناس
جهزنا الطابق الثاني للعرسان
كلشي كان طبيعي وحلو فرحتنا كانت مالها مثيل
اني بعد الزواج بيومين رجعت
وياا زوجي البيتنا
من بعدها كوثر كملت دوامها كلما اسئل امي عليها تكول زينه تجي من الدوام تتغدا وتنام وبليل تشتغل بلبيت
امي كانت حيل فرحانه بيها
وتحاول ما تخلي عليها شغل هواي
حتى لا تعبها
ابوي كان يدقق حيل يعني اذا اثير مو بلبيت وكوثر تريد شي ياخذها بسيارته تشتري ويرجعها مايقبل تطلع وحدها
واذا تريد تروح بيت اهلها البغداد
لو اثير ياخذها بسيارته لو بابا
ومن ترجع هم يرحون يجيبونها
يعني موفريلها كل اسباب الراحه من كل النواحي
بعد ما تخرجت كوثر من الجامعه بدت تسوي مشاكل
كل الوقت تتعارك وياا اثير
اني ضايجه اريد اطلع اني ليش شايله مسؤلية بيت اهلك اني تعبانه اريد ارتاح
رغم امي كانت شايله الطبخ والمواعين وهي عليها التنظيف
زعلت كوثر بيت اهلها وماقبلت ترجع اله تطلع بيت اثير
لو بيت وحدها لو تطلك
هنا اهلي صارو كدام الأمر الواقع
يعني كوثر هددت بلطلاك مو معقوله اثير يطلك للمره الثانيه
وهما ماصدكو استقر نفسيا بعد الازمه الي مر بيها
رغم ابوي ماكان موافق ابد تطلع من البيت
يكول البيت راح يصير فارغ علينا
بس هي عاندت لو طلاك لو اطلع بيت وحدي
اضطر اثير يفتح بيته وينظفه وينقل غرفة النوم البيته
ويرجع كوثر للبيت جمانه السعيدي
هسه هي بهاي الفتره رجعت علاقتها بحبيبها لو لا اني مااعرف المهم هي استقتلت حتى تطلع وحدها بيت
رغم اهلي مدلليها دلا
بكيفها تكعد تنام تشتغل ما تشتغل بكيفها
بعد سنتين زواج طلعت كوثر بسالفه جديده
اكو سيد بمنطقه الحسينيه بغداد كل الي يروح علي
يصير عنده اطفال
اثير...شلون يصير واني نسبتي صفر
كوثر...انت شخسران مثلا خل نروح ونجرب حظنا
اثير...حبيبتي بس تعب يعني بلعقل شلون يصير طفل
كوثر...انت ما تحبني ذيج زوجتك ماعفت مكان مارحت
وجربت واني مجاي اطلب منك شي صعب
سيد نروح ونجرب صار شي زين
ماصار ماخسرانيين شي شكد ناس راحت وصار عدها اطفال
اثير...بس هلمره لان اني ابد ما مقتنع بس الخاطرج اروح
فرحت كوثر حيل
اثير ماانطه خبر الاهلي لان جان متأكد مراح يصير شي
انسان نسبته صفر شلون يصير عنده اطفال
ليش يحجي الاهلي وبعدين يفشل
فعلا اخذها وراح للسيد جمانه السعيدي
السيد سمع قصتهم وقرا عليهم ثنيبنهم ونطاهم اشياء يسبحون بيهن اخذ منهم مبلغ محترم وأكد عليهم اذا يصير طفل يرجعون علي وياخذ نفس هذا المبلغ
من رجعو مرو بيت اهلها
باتو هناك ليله ورجعت البيتهم
المفاجئه الي لا على البال ولا على الخاطر
كوثر طلعت حامل بنفس الشهر
يعني من بعد ما وصلت السيد بكم يوم راحت حللت وطلعت حامل
هاي يمكن معجزه لان مستحيل يصير هيج شي
كوثر. مبروك حبيبي موكتلك هذا السيد ايده بيها البركه
اثير...اني مامصدك رغم عدنا التحليل مرتين بس مامصدك الف الحمد لله والشكر
.
هذا الخبر نزل علينا مثل الصاعقه
كلنا ما مصدقين بس كلنا اكيد رب العالمين لطف بااثير
لان ماكو شي مستحيل يم رب العالمين
اثير اكتفى بهذا الخبر وطار من السعاده
وابد مافكر يروح يحلل ولا يتاكد من نفسه
اعتبر هذا تعويض من رب العالمين
امي وابوي حالتهم حاله من كد الفرح
ابوي جاب عجل ووزعه على الجوارين والناس الفقره
وامي جابت كلاده ذهب هدية الكوثر
طبعا كوثر كامت تامر وتنهي ومحد يكدر يحجي وياها
طلعت حامل بعد
بقينا ننتضر هذا الطفل بفارغ الصبر
منا لمن جابت كوثر اثير بوقتها مايمشي على الكاع
من الفرح جمانه السعيدي
تقريبا صار عمر حمودي ٣ اشهر يمكن اربعه بهل حدود
طلع اثير وتعرض الحادث
كانت صدمه مميته بلنسبه النا هلاخ الوحيد
وتوه صار عنده طفل وفرحان بي
المشكله الي دهسه كان لابس لثام صح الوقت جان شتا
والناس كلها تلبس الثام من البرد
بس الدراجه بدون رقم
يعني هاي شلون مصادفه غريبه
مرت علينا ايام سوده الحزن خيم علينا
مانعرف اثير انقتل لو مجرد صدفه
المشكله الشرطه سدت القضيه لان ماكدرو يوصلون
للولد ابو الدراجه
بعد مادهس اثير دخل داخل الفروع وضاع عليهم
الدراجه بدون رقم حتلو يدورون عليها شلون راح يلكوها
من بعدها ابوي حاول ويا كوثر ترجع للبيت لان بقت وحدها بيت اثير
بس هي ماقبلت ابد ترجع
وسوت مشكله شكبرها ودخلت اهلها
بوقتها ابوها كان ميت اخوها اجا وهد على ابوي
اخو كوثر...ممنوع تدخل بكوثر
كاعده بيتها وابنها عدها ليش تريدها ترجع وياكم
اذا قربت عليها اشتكي عليك
ليلى.... من هاي اللحظه بدت العداوه بين ابوي وكوثر لان هو مايقصد شي
بنيه شابه وياها طفل عمره اشهر شلون تكعد وحدها
اخوها مشا بمعاملة راتب اثير وحوله الها
وابوي كل أسبوع يدزلها مسواك بيد ولد سايق
كان زعلان عليها لان سوت مشكله شكبرها بدون سبب
بعد كم شهر ابوي كان يروح هو وامي يشوفون حمودي
وينطوها مصرف ومسواك ويرجعون
كلنا نسمع اهلها دائما يجون عليها
الحد ما كملت سنه ابوي سوا عزيمه بثواب اثير وزوع
شكد اكل على الناس
من غير الناس الي اجت اكلت وراحت
وزع قرائين بثواب روح اثير
أخذنا اربع سيارات واحنا للنجف نزور اثير
اهل كوثر كلهم اجو ورانا للنجف
بعد ما دارت السنه بشهر تقريبا
اجا اخو كوثر الابوي
اخو كوثر.. عمي كوثر جاي عليها خوش ولد ونريد انزوجها
حجي عداي...شنو تزوجها تحجي صدك
امس دارت السنه شنو ماعدها صبر
اخو كوثر...ابنيه زغيره ليش باقيه بهذا البيت وحدها
تزوج وتصير بمسؤولية رجال
حجي عداي...اني مو كتلها ترجع ويانا واني ادللها دلال
اخو كوثر....ترجع وياكم شنو مثلا خدامه
شنو وجودها بيتكم
تزوج ويصير عدها عائله
حجي عداي.. .بسم الله الرحمن الرحيم امس مات زوجها
شنو ماكو صبر
اخو كوثر...اني مجاي اخذ رائيك اني جاي اخليك بلصوره
اذا وافقت او ما وافقت
كوثر راح تزوج هذا الشي من حقها
والطفل بعده زغير بحضانتها
وانت ماتكدر تسوي شي
حجي عداي...خلفله عليك خوش تقدير منك
هذا جزاء التعب
اخو كوثر... حجي هذا الكلام ماله داعي بنيه زغيره وكاعده وحدها اني اخاف عليها
وهذا الي متقدملها خوش ولد واعزب مامزوج ومشتريها
حجي عداي....اي وشلون عرفته خوش ولد
اخو كوثر... اني سئلت عنه قبل جان يشتغل دلفري
وهسه لزم سوبرماركت يشتغل بيها
خير من الله ومستعد يكتب على نفسه اي مبلغ
كضمان الها ومشتريها هي وابنها جمانه السعيدي
حجي عداي.. اني ماموافق
اخو كوثر...واني كتلك تريد توافق تريد لا
الاسبوع الحاي زواجهم في امان الله
ليلى...بيومها ابوي تخربط وامي اخذت للمستشفى
ضغطه صعد وحالته حاله
يومين وهو ضغطه معلك ماينزل
رجع للبيت فدمره حبس نفسه بلبيت
يكول استحي اطلع خاف الناس تسئلني شلون زوجت
ابنك ازوجت
ابنك امس مات
ليلى...كلنا قاطعنا كوثر واهلها
لارحنا سئلنا منو الي ازوجها ولا شلون عرفها ولانريد نعرف اي شي عنها
وحده بلا اخلاق تمشي بكيفها مالها رداد
ازوجت كوثر
اخذت كلشي البيت والراتب والسياره والطفل
والأهم قاطعت اهلي حتى لا يدخلون بحياتها بعد
