رواية عشك فلاح الفصل السادس بقلم ورود الخالدي
علي:::
تأكدت هنه نامن..نزلت نمت بالديوانيه كعدت الصبح كبل رحت للسوك اشتريت ماطور للمبردة ورديت وشديته شغلتها..زهيرة دكت الباب كالت :
تعال تريك
كتلها:
جيبي الريوك للغرفة..
راحت جابت الريوك واجت تريكت وطلعت ماشفت جنة رحت..للبكشة..اشوف العنب قسم بعده حصرم..وقسم..توه يريد يروج يعني بعد شهر..نحوشه..بس التينات ماعجبني..توهن منكدات..ضليت بالبكشة..اميل الدغل عن الزرع..حسين وحيدر مابيهم حظ. مالهم شغل بس وكت مانحوش الزرع يجون..رجعت للحوش..سبحت وبدلت..كعدنا نتغدة هم ماشفتها ويه الغدة..بس اسمع امي تحجي وياها بالمطبخ..طبيت.. لغرفتي محمد..ماكو..يمكن يم جدة بالديوانيه..كلت خلي اناملي ساعة مادام كلها بغرفها وفروخ اخوتي مالهم حس..بعدني ماغمضت عيني..اشو اندكت باب غرفتي..كلت:
ياهو:
اني جنة!
هاااه شعدها جايه لغرفتي اول تالي:
فوتي جنة
دخلت..شفت وجهها متغير..شبيها ..يمكن باجيه مدري مريضة..اول مافاتت..كتلها:
ها جنة اليوم فايته لغرفتي شني سالفة جديدة!..فلم جديد..لوعندج.......
بعدني مامكمل حجايتي كالت:
اني معندي سوالف يمك وﻻ..افﻻم..واجيت اكولك..ترة المرة اﻻولى من طلعتني من المي..اني مجنت اسبح وﻻ اعرف اسبح..واصﻻ اخاف من المي..بس من انت جيت والبنات خافن وانهزمن ردت اكوم جلبت دشداشتي..وكعت بالمي..يعني..مجنت امثل.حتى.... حضرتك..تصير..فارس الفرسان وتنقذني..وثاني مرة من جيت يمك..العفو اقصد حضنتك..مجنت اعرف انت نايم بفراشنا..جنت اتوقعك ماما..لهذا صرخت من لمست وجهك..وحسيت بلحيتك..اجكجك..يعني..مجنت امثل..حتى تضمني بأحضانك استاذ..كاظم الساهر..بس حظي المصخم..والصدف العوجة تخليني بمواقف محلوة ويه واحد..مثلك..
بوووووويه هاي شتحجي تكول واحد مثلك..انه راسا كمت..ادنيت يمها..وكلت:
شني..ولج واحد مثلي..ليش انه شبيه؟
هي بسرعة دموعها صبن حسبالك ضامتهن من زمان..وكالت:
انت..واحد..مريض..ومغرور..بس مغرور..عالفارغ..عقلك يصورلك اي بنيه تشوفك..راح...توكع بغرامك..وتسويلك اغراءات..وعبالك..اني من هالبنات..شوف اني اكرهك..ومو بس اكرهك..احتقرك..واحتقر..تفاهتك..
هاي شبيها تسودنت..ردت اكضها بيدي اكسر سنونها...بس هي بت ..مااكدر امد ايدي عليها بس كلت:
ولج انت شتحجين تسودنتي..ولج..انتي..
بعدني اريد احجي..كالت:
اششش..اسكت..وﻻكلمة تحجي..مو انت هيج تزمخ عليه وتكولي اششش..اسكتي ومتخليني احجي..هالمرة..اني اكولك اسكت واسمعني للنهاية..شوف..اذا عندك عقدة كل البنات..موزينات..وخاينات مثل مرتك..الخانتك..ترة انت غلطان..واذا مرتك..خانت يمكن الصوج موبيها..ﻻن الزوجة متخون..الزوج اﻻ اذا جان الزوج..مبي خير..فأنت هذا الغرور..الخابص نفسك..بيه اطلع..منه واعرف حجمك..شنو ترة انت متحرك..بداخلي ذرة وعدم وجودك..عندي احسن بهواي من وجودك..
صح هيه تحجي وتبجي..بس صفنت ما اعرف شجاوب ماعندي جواب الها احس..الحجي كله ضاع من لساني..اتمني اذبحها على حجيها هذا ..كلش..أذتني خلصت حجيها وطلعت بسرعة من الغرفة تمسح بدموعها..
هي طلعت بس احس روحي طلعت ويه كل حجايه من حجيها..شكالت..تكول مرتك خانتك ﻻن مابيك..خير..محد يكدر يكلي هاي الحجايه والله لو زلمة كايلي هالحجاية ادفنه بمجانه وهوعدل..انه ينكالي مابيك..خير..بس هي شمدريها..بفاطمة..شمدريها بقصة مرتي..احس..روحي..طلعت..من جثتي..يابوووويه الموت اهون وﻻ هالحجاية..وشكالت بعد هيه تكرهني وتحتقرني..اخخخخخ..اخ.بويه خايبين راح اموت وعلي..تكلي عقلك مريض..ومابيك خير..يا..ربي مرة..مرة ما اكدر اضربها..خطار..ابيتي ما اكدر اكضها..وانعنع عظامها....اختنكت بالغرفة..المبردة مشتغلة عركان دمي محروك حرك..طلعت رحت برة امشي هيج وحدي ما ادري وين اروح..الشمس ادك..براسي رحت كعدت يم الماطور بسد النخﻻت..احس روحي..اريد اموت واخلص من الدنيا..
جنة:::
حسيت نفسي ارتاحيت من حجيت كل الي بكلبي احسن يستاهل حته يعرف قيمته وحجمة وميضل ماخذه الغرور..ومعتقد اني مهتمة بيه ومخليته ابالي..صار العشه مشفته اجه ع العشه..ثاني يوم شفته خطف دخل الغرفته زهورة اخذتله..الريوك لغرفته وبالغدة كعد..ويانه تغدة بس محجه وﻻ صارت عينه بعيني..بقه يسولف ويه اخوانه..وطلع..3 ايام مرن هو بعد محجة ويايه اي همزين شالني من باله ﻻزم كﻻمي جاب نتيجة وكفه عد حده..رابع يوم سمعت من عمه ام علي هو..رايح البغداد..
علي::::
وداني ابوي لبغداد..اشتري..غراض للحوش..واوصي على ماطور ﻻن كتله ماطورنا مايطول هذا الصيف تعبان واخاف يحترك..على غفله والزرع يندمر..رحت وصيت على ماطور كالولي بعد اسبوعين يجن مواطير زينات واخذلك واحد جبير.رحت للسوك تسوكت ﻻهلي...
اشتريت قماش ﻻمي ولنسوان اخوتي هم يتلكني..واشتريت..هدوم لزهيرة وزنيبه..وكاروك..زغير..ﻻبن حسين..ولكيت بايسكل اخذته لمحمد كاتل روحة..ع البايسكل..واخذت لبوي دشداشه وغترة..ما اشتريت شي لروحي احس روحي مغثوث ما الي واهس..جنت من اروح لبغداد احير..ششتري لروحي بس هالمرة ضايج مالي خلك..اعصابي نار يمكن بس احد يحاجيني حجاية اطك..بوجهه..بتت بالفندق...ثاني يوم الصبح..رديت للحوش كلهم تلكوني كلمن اطيته غراضة...
جنة:::
ثاني يوم شفتهم ملتمين على علي..جايبلهم غراض من بغداد..محمد طاير من الفرح بالبايسكل والبنات مكيفات بالمﻻبس والحجابات..وانطة دشداشه وغترة لخالي خالي راح للديوانيه لبسها ورجع..طلعت ضيكة بس شنو خالي..طالع بيها يموت ضحك ..عمه ام علي كالت:
ياااايمة علي شني هاي الدشداشة الجايبها لبوك..!.... طلعت الزلمة جنة بريعصي..مكمط..
خربنا من الضحك على حجيها عاد خالي اخذ..العكال هيه شافته كامت ركضت طلعت من الهول..هو ركض..وراها:
اوكفي وين شردتي..انه ولج..انه بريعصي مكمط..اليوم وين ترحين مني فخرية..
متت..متت..من الضحك..همه هم كولهم خربانين ضحك...باوعت علي هم مبتسم..انتبه عليه بس صارت عيني بعيني راحت ابتسامته..حسيت بيه حيل مغثوث مني..اي مبين اصﻻ صار 5 ايام..هو ممخلي عينه بعيني..يا الله صدوك حقه اني هوايه جرحته بكﻻمي..مجان المفروض احجي على مرته وادخلها بموضوعنا خصوصا اني اعرف قصتها..واعرف هو يضوج من طاريها وميحب احد يذكرها بالبيت..بعدين اني مو من حقي..اجيب طاريها اصﻻ..بس شسوي هو حيل غثني وتهمني بالباطل..وخﻻني ابجي ..ﻻ..ﻻ هوايه دست بالكﻻم..وياه..ندمت على كل كلمة كلتها
اله
ومرن اسبوعين..هوه هم راح لبغداد يجيب ماطور..ما اعرف شنو ﻻن سمعتهم هيج يحجون..رجع ثاني يوم..اني هم ضايجة..ﻻن احس نفسي غاثته ومضوجته...هو يكعد عادي يسولف ويه اخوانه وخواته وامه ..حتى ويه ماما يسولف..ويتشاقة ويه ابنه..ومرات..يﻻعب جهال حيدر وحسين..بس ابدا..وﻻمرة حجه ويايه صار19..يوم..حتى اني تعودت على اهله اخواته..وامه صارت العيشه عدهم عاديه وحلوة حتى نسوان اخوانه اليكرهني هم تعودت على نظراتهن وكرهن الي..بس..بقه شي..بكلبي..ما اعرف احس نفسي غلطانه حيل بحقة..فكرت اعتذر منه سمعت عمي كله :
العصر بويه روح شد الماطور..الجديد
اي بويه بس اناملي ساعتين..اكعد اشدة..شفته العصر طلع عرفت هو راح لهذا المكان مال الماطور كلت اروح اعتذر..منه مهما يكون هو رجال..واني خطار..عدهم..بلكي من اعتذر تخلص المشاكل الي بيني وبينه..
رحت..وراه..هو راح بسيارته اني رحت مشي..صح المكان شويه بعيد..بس اندله..وصلت لكيته جوة بالغرفة مال الماطور..بيده وايرات..بس دخلت..هو باوعلي مستغرب..بعدين عافني والتفت ع الغراض مال الماطور..كتلة:
علي..اني..جاية اعتذر..منك..يمكن اخر مرة من حجيت وياك..جرحتك..حيل..جنت ضايجة منك..وحجيت حجي ما اله داعي..واعرف اني حيل ضوجتك..وغثيتك..اني كولش اسفه
هو شمر الغراض من ايده واجه يمي..قريب..من وجهي وكال:
ولج انه محد يكدر يغثني ويضوجني..وحدة مثلج ماتهز شعرة من راسي..يمكن لو امي لو ابوي..لو اخوي..لو اختي..كايلين هالحجي الي يمكن اضوج..لوانغث..بس انتي..ﻻ..ماتغثيني..ﻻن ماتهميني وﻻ مخليج ابالي اصﻻ....وحجيج..طب منا طلع منا ﻻن انه ما اهتم..الحجي اﻻدنه مني؟
ادنه..منك؟؟؟؟؟؟
اي ادنه....وادنه بالف مرة..مني انتي..اصلج..شني..فصلج شني وين رابيه ومني رباج..اكو غير هذا السكير..العركجي القمرجي..الي ربيتي ابتيه..وحدة مثلج..تحمد ربها الف مرة ﻻن انه مكلف روحي واحجي وياها..
اني رأسا..دموعي نزلت..من حجة على بابا..وكال عني مامربايه..
صوتي راح بالكوة حجيت:
شوف..اني جنت اكره بابا..واكره تصرفاته..بس اذا جنت اكرهه..مرة هسه اكرهه الف مرة..ﻻن..خﻻني..بهيج موقف..خﻻني..اوكف كدامك..وتهيني..هاﻻهانه..
عفته وطلعت من يمه اركض..دموعي يجرن..رحت اعتذر منه ونيتي صافيه بس هو جرحني..حيل..وحسسني اني ممربايه..
علي::؛
طلعت من يمي دموعهاتصب مثل المطرعيونها الحلوات....
يجرن دمع..صح انه..حجيت هواي ومتقصد اغثها مثل..ما غثتي ذاك اليوم وازود..بس من كالت حجاياتها اﻻخيرة حيل تأذيت..حسيت..روحي ذالها...ﻻن كاعدة عدنا..ضليت احجي ويه روحي افه..افه عليك ابو محمد..البت خطاره عندك وانت هيج تشتم ابوها وتهينها..حتى لو ابوها هتلي وماعنده اصل يضل ابوها..بوووووية شلون كسرت خاطري من كالت كمت اكره ابوي الف مره جا..خﻻك تهيني..شلون حجايات..توجر..خطية...ماتستاهل مني هالحجي..صح لهسه حجيها يزرف بكلبي زرف..بس ﻻ..مو من شيمتي..اهين..خطاري..حتى لو هو غلطان وياي..شسوي..ماادري ليش يمها اصير..غير واحد..حجيها..بساع يفوت لكلبي..بساع ياذيني..ماادري..بروحي ليش هالبت من دون خلك الله..تكدر..تأذيني..بساع..ﻻ وموبس تاذيني من اشوف عيونها الحلوات يدمعن احس كل الصوج بيه..
شديت الماطور رديت للحوش ماشفتها..بعد وين راحت..بدلت طلعت اتعلل ورديت لكيتهم يتعشون..فتت....
عافت عشاها وكامت للمطبخ..امها كالت:
شو ما تعشيتي جنة!
ما اريد بعد ماما شبعت..
يااا..شأكلتي..وشبعتي..توج مديتي ايدج..
بعد ماطلعت من المطبخ خطية شافتني وكامت...عافت عشاها..كلش ماتريد تكابلني ع العشه..بس وين تروح قابل تضل حابسه روحها بالمطبخ..ثاني يوم هم كلما تشوفني تروح تكعد بالمطبخ..ما تكعد جدامي..هاي شلون سالفة بالله..مر اسبوع وهيه ماتكعد يمنه ﻻعلى عشه وﻻ على غدة وﻻ ع ريوك...جنت كاعد اتغده سمعت امها تكلها:
وج يوم..تعالي..تغدي هنا..والله جسمج اتنرس حصف من الحر بالمطبخ هسه شلايكلج من كعده المطبخ حتى مروحة مابيه
كلت لعمتي:
عمه نامن بغرفتي الظهر انه ومحمد نروح انام بالديوانيه
يااا..عمه زحمة عليك؟
ﻻعمه..شالقصة..هنة ساعتين انامهن الضهر بالديوانيه..
بكيفك عمه..
ثاني يوم..اجيت لكيت جنة بالهول..شافتني هم فاتت للمطبخ فتت لغرفتي لكيت عمتي نايمة ع جربايتي..تشخر..اووف عنوديه خلت امها تنام بغرفتي وهيه ماترضة حابسة روحها بالحر..طلعت من غرفتي كلهم نايمين..زهيرة..وزنوبه ماهنه رايحيات ويه امي لبيت خالتي سعدية..واخواني بغرفهم..كلت محد كاعد بس هيه خلني اروح احاجيها..
فتت للمطبخ لكيتها كاعده ع البساط كعدت..بصفها..دارت وجهها:
هسه شني تضلين كلما تشوفيني تشردين..للمطبخ..ولج حارة عليج...حتى مروحة ماكو
وانت شعليك..بيه اكعد بالحر اموت انت معليك..
رادت تكوم..لزمت ايدها..
شنو هاي..علي لتلزم ايدي صدوك جذب..
الزمها..واكسرها..كعدي وسمعيني..شوفي انتي... حجيتي وانه حجيت..واحدنا..آذه اﻻخر..بس اذيه عن اذيه تفرق..جنة..صدك؟؟..جنة..انه مابية خير..صدك جنة هيج..انه ابالج..ولج لو شالعة كلبي من سدري..وﻻ كايلة هاي الحجايه بوجهي..انه ابو محمد ولج زلم..ماتوكف..بوجهي..تكولين عليه مابيه خير!!
مو..مو اني..اجيت..ع مود اعتذر..منك..وانت..انت؟؟
ماكملت..بساع دموعها جرن..انه..تبسمت
شوف..انت متتغير..علي..انه..ابجي وانت تضحك عليه؟؟
هههههه...ولج..انتي شني ذني دموعج..شو بساع تبجين شني ضامتهن وتهديهن..عليه..حكج ماتدرين ليش اضحك من تبجين؟
ليش..؟؟
وكﻻم الله..وكﻻم الله صارلي..33سنه عايش..بهاي الدنيا..بس ماشفت بعمري كله احله..من عيونج..من تبجين..والله احس..روحي صدك..بالجنة..بووووية صدك جنة واسمج عليج..
هي تبسمت..
اي..اي..انوب تبسمت وهي تبجي..اي احركي..بكلبي..بعد..انعلي والد والديه...
ههه..هاي..شبيك.اليوم علي..
شبيه خلني..افلت احسن احجي غير حجي..وتزعلين مني...انوب...وانه ما صدكت..تبسمتي..يله..كومي نامي يم امج..عالمبردة..حارة عليج هنا..
عفتها وطلعت..
شكرا لزيارتكم عالم روايات سكيرهوم
