رواية أرض الخناجر الفصل السادس والسبعون بقلم ايلول
كلشي انت
بالنسبه الي
شمس الفجر والكمر
والماي والغيمهَ ومادامنه احنه سوه
ضيمك وضيمي علي
مو كلمن وضيمه!
══━━━━✥◈✥━━━━══
ريـــمه:: گـــلبي يدك بقوة ما مستوعبة حسيت على هاجر من وكفت بصفي كضتني من ايدي وانه عقلي ولا مستوعب، ليمت طلع؟ وليش؟
اعاينله كاعد ماد رجليَّه وهيه تعصر بيهن شال راسه عاينلي وفتح ايده
شاكر:: هلا بويه ريـــمه هلا.
بلعت ريك بخوف درت الهاجر أعاين بوجها وهيه تعاينلهم ساكته درت وجهي عليهم امي خازرتني وهوه يأشر بأيده تعاي، حجيت بصوت يرجف
-لي..ليمت طلعت؟
ميلاد:: هسه جابه مرتضى.
-شلون طلعت.. ليش؟
مسحت عيوني بأيدي الترجف وهوه دنك يهز راسه بأسف ويحجي بقهر
شاكر:: جا بويه گولي ريتك ما طلعت عليمن هالحجي بعد.
طبطبت امي على أيده تگله
-چلبه لا اجت ولا نشدت ولا گالت ليمت ابوي يطلع، چم مره گتلك ريـــمه كل خير مابيها.
شال راسه خازرها دفع ايدها ونتر بوجها
-رجلها يكرهني چا شتسوي شبيدها تعاركه؟ وخري عني.
دفع امي من يمه وهيه خازرتني گـــلبي يدك بخوف احس بعدني بصدمة وحتى الهوا يثگل على ريتي، هاجر تمسح على ايدي وتعصر اصابعي بين اصابعها عاينت بوجهه ملت براسي متوسله ودموعي يجرن
-يابه.. يابه امي سحرت ابني..علاوي مو زين .
شهگت أبجي بحرگه وابوي فتح عينه حييل مصدوم ودار يعاين الامي ويشوفها شلون خازرتني رد عاينلي يحجي
-لا بويه لا اسم الله عليه يا سحر هذا تعاي ليه.
تدنيت خطوه ابجي وهاجر كاضه ايدي حييل جريتها منها ماهامني شي بس خل ابني يطيب وكلشي ما اريدن، كعدت يمه على اركبي مد ايده يشبگني بچيت بحرگه گـــلبي مفرفح
-ابنيي مو زين... ابني راح يمووت بويه.
وهو يطبطب على ظهري ويحجي مقهور
-لا بويه لا مابيه الا العافيه.. شو حاجيني اخذتوه للعلويه؟
وخرني من صدره ومد ايده يمسح عيوني هزيت راسي اي مختنگه من البجي
-اخذته اخذته ماصار.. ماصار زين.
دار وجهه الامي يحاجيها بنتر
-ما اخذتيها للساده انتِ خاف صدك ساحرينه.
ميلاد:: اخذ مرض اذا هيه ورجلها يگولون جدته ساحرته اليگول انه النهار كله افتر على السحارات.
شاكر:: خافنها مرت مرتضى.
وامي تعاين بوجهي وتهز راسها اي
-تعاركت وياها ذاك اليوم من دريت بيها.
هزيت راسي لا آمسح بعيوني فاقده ما فكرت بأي شي،گتله
-لا... لا جذب هيه ساحرته هيه...
وگبل ما اكمل حچيي التفتت على طبه قوية واشوفن هاجر طايحه بباب الغرفة گمتلها اركض وهمه وياي جريتها الحضني ايديي يرجفن
-هااجر هاااجر يمه هاجر
اطك على خدها ارجف وامي ركضت تجيب ماي وابوي مكابلني يجر بيها الحضنه ويصيح
-بويه هجيره بويه .
فتحت عيونها گبل ما امي ترد عاينت بوجهي ومدت ايدها تكرصني من ايدي من جوه الردن بلعت ريك اعاين بوجهه خازرتني وابوي جرها كعدها يحاجيها
-شجاچ بويه؟
طبت امي بأيدها دولكة ماي اخذه منها ابوي صب بأيده غسل وجهه هاجر وهيه عيونها عليَّ تعاينلي بغضب مسحت وجهي ساكته وامي تحجي على هاجر وتشكيها الابوي ما تاكل وتسهر. عافهن ودار يحاجيني
شاكر:: تكومين بويه ناخذ ابنج للساده؟ خاف صايبته عين خاف مس لو فاز الغروب .
ميلاد:: كومي يله مو بس جايتنه تتبچبچين .
أعاين بوجهم ساكته ما ادري شنو الاسويه هزيت راسي اي گـــلبي يدك بخوف، حطيت العبايه على راسي وطلعت دموعي يجرن اغش عقلي مدري اضــحك على گـــلبي كلشي بيه رافض اصدكهم بس خوفي على ابني خلاني اچلب بگشايه.
فتحت باب الحوش اريد اطب للبيت لگيته واكف بباب الهول عاينلي بغضب طبيت وسديت الباب وراي ساكته وماحط عيني بعينه دنگت آمسح عيوني وتعديت بصفه اريد اطب للبيت كضني من زنذي وردني گدامه شلت راسي اعاين بوجهه عصر زندي بقوة.
طــروادة:: إنا شگلت؟
شلت ايدي احطها فوك ايده حتى لا يعصر زندي اكثر، صوتي مبحوح وگوه احاچيه
-علاوي.. علاوي مو زين بس خل يصير زين بعد ما اروحلهم والله.. كهلان.
بچيت عيوني تتوسل، روحـــي رايحه واسمع صوت علاوي يبچي بأيد رنـــه شايلته بحضنها وتفتر بالهول.
دفع أيدي بنتر طبيت للبيت بساع مديت ايدي اخذت علوش من رنـــه وطبيت للغرفة ابدل هدومه چيه كلساع نغسل وجهه يتبللن بدلتله وشلته اريدن اطلع وهوه كاعد بالحوش حاط اديه فوگ راسه لمحت ســليم وميثم يمه دنگت ومشيت بخطوات ترجف.
طلعت من باب الهول شال راسه وگبل ما اوصل باب الحوش صاح
-وووين؟
درت وجهي عليه علي بأيدي غاص من البجي وهوه خازرني متفاجئ بيه، اجه ســليم بساع وگف گدامي اخذ علي من ايدي ومد أيده على راسي يعدل العبايه ويحاجيني على كيف
ســليم:: وين رايحه خويه؟
عاينت بوجهه احس شفايفي يرجفن، مــيثم دنگ وطلع وكف بره، عاينت الكهلان حايره شلون أقنعه شنو احجي وشنو اگول رد ســليم گال
-حاچيني ريـــمه وين رايحه.
-ناخذ.. ناخذ علاوي للسادة ابوي گال.
ضحك كهلان مستهزئ وانه عيوني من البچي مغوشه وگف بساع يريد ياخذ علي من ايد ســليم ما رضى ينطيه جرني من ايدي يحاجيني بحرگه
طــروادة:: تردين تسودنيني ابوچ ما أأمن تطبين بيته يا ساده هذول الياخذونج الهم، تسودنتي رررريمه؟؟
-ما يدري ابوي ما يدري امي ساحرة علوش.. هسه سولفتله انه گال والله گال اخذكم للساده.
دار وجهه بغضب وحرگه ما يدري شيحجي طب سلطان مدخن كلهم مقهورين من طلعت ابوي، ومن شافنه وشاف علاوي سكت يعاين ما فاهم، مشيت اوكف يمه كاضته من اثنين اديه ابجي واتوسل
-كهلان.. بس عاينلي.. ابني جاي يموت گدام عيوني وعلي راح اتسودن ماضل حيل بيه فـــدوه اروحنلك خلني اخذه.
عاين بوجهي وجرني من زندي الحضنه بچيت اشهگ باسني براسي وحجه بصوت واضح
-لو عانديتني وطلعتي لا تردين.
وخرت من حضنه اعاين وجهه مصدومة واخواني يحجون وياه ماراضين صاح سلطان
-تعاي ريـــمه
مد ايده جرني من بين أدين كهلان هز راسه خوش وأشر بأيده روحـــي، طلعت من الحوش بأيد سلطان وسليم ورانه شايل علوش.
چلبت بأيد سلطان ابچي بوجع ليش ما يفهمني هذا ابنا اهم من روحـــي واهم من كلشي بهالدنيا، طلع ابوي من بيتنا يتجه على عوجيه مابيه حيل يمشي اخواني يعاينوله يغضب صاح عليهم.
-رجلها وين؟ مابيه خير وياخذها هوه.
ســليم حط ايده على حلگه يسكته ومشه للسيارة، مشيت وياهم صعدت وانطوني علاوي سلطان بصفي وابوي كعد كدام يم ســليم يحجي وياهم ويغلط على كهلان وهمه چنهم ما يسمعون محد يرد عليه لمن ســليم نشده على الساده دلاه مشه ساكت
سلطان اخذ علاوي من ايدي يبوسه ويحاجيه بحسره
سلطان:: ها خالي هاه يا بعد روحـــي.
حطه على گلبه يبوسه مقهور لمن وصلنا للساده رديت ابجي
-يابه جبناه هناه ما سووله شي.
-جا جبتوه مره وحده مره ومرتين مناه لمن يصير زين.
عاينت بوجهه سلطان گـــلبي منطحن طحن هز راسه ميخالف نزلنا وابوي مارضى ينزل گالهم تعبان مابيه حيل، ضل بالسيارة واحنا طبينا للناس،اخذوا علوش وراحوا يم الولد وانه ضليت يم غرفة النسوان چم وحده كاعده يم العلويه تتشكيى وهيه القران بأيدها ومتلفله بالعبايه وريحة البخور بغرفتها حلوه اسمع سوالفها وگلبي يخفگ ودموعي تحفر خدي وهيه تكلهن
-الانسان مرات من كثر ما يفكر ويفاول على نفسه الجسد ينصاع للعقل وتبدي تشوف اعراض على جسدك ونفسيتك اذا انتِ بكلشي تكولين انه محسوده انه مسحوره تلقائياً راح تشوفين بنفسج اعراض السحر والحسد لان هيج افكار تزيد القلق وتضعف مناعة الجسم، ما يصير على كلشي واحد يگول انه مسحور انه محسود .
والمره مدنكه تهز راسها اي وردت گالتلها
-مو انه اعرفهن اليسحرني
-دام تعرفينهن لا تخلينهن يطبن البيتج ولا تضلين تشكين بكلشي حسره يوجعج راسج صحتي انسحرت والله ما ترتاحين بحياتج وتكضينها تعب بتعب خلي املج بالله اكبر من هيج هو الحامي والحافظ .
وانه اسمع ساكته وبس دموعي تجري المريه اخذت منها بخور وماي ورد وطلعت وتدنت يمها وحده ثانية كشفتلها بالقران وهم حجت وياها شويه وراحت شالت راسها عاينتلي وهزت راسها تسأل
-شلون صار وليدج؟
مسحت عيوني ما جنت ادري بيها راح تتذكرني حجيت بصوت مخنوك
-بعده ورديت جبته يمكم اخذه اخوي يم ابوج.
هزت راسها اي تحرك السبحة بيّن اديها
-لا تخافين بأذن الله اله عمر طويل يمر بصف الموت وما يصيبه شي الله حافظة.
ووي حجايتها صاحوا عليها
-علويه، يمج مره ام علي؟ اخوتها يردونها.
وكفت بساع مرتبكه عدلت العبايه على راسي وطلعت من الغرفه ســليم وسلطان واكفين على صفحة وعلي نايم بين ادين ســليم، وسلطان شايل علاكه سوده مشيتلهم دموعي تجري وكفت يمهم ابوس بأيده وأحاجيهم
-ها سلطان شگالولكم؟
عاين بوجهي متحسر
-يگول جان عنده عمل بس رايح وهذا بچيه شوي شوي يقل، هذا ماي مقري عليه تشربينه منه شويه، وگال كل يوم اقري عليه الفاتحة واية الكرسي والمعوذات.
اخذته من ســليم حطيته على گـــلبي ابوسن خده الحار يابعد روحـــي جعل كل وجع روحك بيه وريتك سالم ييمه.
ســليم حط ايده على جتفي يمشيني وياه لكينه ابوي نايم بالسيارة وبس صعدنا فز واتلفت ليوره يحجي
-ها بويه؟
الولد ساكتين وانه هزيت راسي اي ساكته ما ادري شحجي وياه، ردينا الدرب كله محد يحجي مناه لمن وصلنا صف السيارة ســليم بباب بيت اهلي نزلنه سوه ومشيت البيتنا گال سلطان.
-تجين يم رغد؟
وابوي صاح
-تعاي بويه تعاي هناه ببيتنا.
هزيت راسي لا شايله علي بأثنين ايديي ومشيت البيتنا شيسوي يطردني؟ اعوف علي عنده واطلع بس ما اخذه وياي البيت اهلي ويعيش الانه عشته.
اخواني يعاينون وراي محتارين، دكيت باب الحوش وواكفه متانيه يفتحونه الي احس برجليَّ يرجفن ومو ثواني يمرن جن ساعات.
انفتح باب الحوش وصارت بوجهي رنـــه وشمس مچلبه بدشداشتها عاينت بوجهي ومدّت اديها تساعدني وتاخذ علاوي
رنـــه:: ها بشري؟
انطيته الها وطبيت وياها للحوش اعاينلها تحط شفايفها على خده الصاير احمر وتبوسه حيل تحاجيه
رنـــه:: يمه من عافيتي على عافيتك يروح عمتك.
غسلت وجهي بالحوش وسلطان دك الباب جايب الماي مشيت اخذته منه يحاجيني بهمس
-اذا ضوجج كهلان خابريني تجين يمي.
-لا ما يضوجني .
تحسر ساكت عافني وطلع سديت الباب ودرت الرنه احاجيها
-يگولون العمل العليه رايح ... كهلان وين؟
-بغرفتكم.
مسحت وجهي محتاره اخذت علي منها وطبيت صوت القرآن بالتلفزون مال الهول عالي، مشيت للغرفه فتحت الباب وطبيت مطفي الضوه شغلته وعاينتله متمدد عل الچرباية مغمض عيونه بس جفنه يتحرك مبين ما نايم، مشيت حطيت علاوي بالكاروك ماله ومسحت على راسه متحسره
-نام يمه نام يروحي.
غطيته وتدنيت يم كهلان ادري بيه كاعد جريت البطانيه عليه غطيته عدل طفيت الضوه وطلعت حسره بگلبي تهد الحيل، طلعت للحوش حسين يدردم لان عبود طاكه ورنه ترزل بيه وهوه يهز ايده ويصيح
حسين:: خاب ما اخافن من اكبر واحد.. وهوه شني عبود ويطكني بالحسين اكضه افصم ظهره.
رنـــه:: هلا هلاا تفضم ظهرمن ولك؟
عاينت عليهم احجي
-شكو رنـــه؟
حسين گلب وجهه ما عاجبه ورنه تهز بأيدها
رنـــه:: گالوله لا تفتح الماي على الذنايب ما نسگيها اليوم، بس وين حسين يسمع الحچاية اخذ المسحاة وراح وحده وكضه عبود.
كام طب للبيت يدردم لميت الهدوم من الحبل ورنه طبت تصلي، اخذت الهدوم وطبيت للغرفة لگيته كاعد على طرف الچرباية ويعاين بوجهه علاوي سكتت وهوه ولا رفع راسه ولا التفت عليَّ، حسيت الهدوم بالكنتور وطلعت حطيت العشه على الطباخ توضيت بسن ما رنـــه كضت هيه وكفت بمچاني وانه طبيت اصلي.
وانه على السجادة سمعته يبجي گـــلبي انمرد راحتله رنـــه تركض وبس كضيت صلاة گمت للغرفة كهلان شايله ويهز بيه بين اديه غص من البجي اخذته من ايده تربعت وحطيته بحضني اقره عليه ودموعي يجرن ينمرد گـــلبي من ما اعرف شسويله
ورنه وكهلان واكفين يمي محتارين مثلي واكثر عاينت الرنه احاجيها
-رنـــه تلكين بطل ماي بالكنتور انطينياه
فتحت الكنتور وزهره ركضت جابت خاشوكه كوه شربناه خاشوكة ماي، وضل على فد بچيه طبت للغرفة شمس بأيدها لعابه، كعدت بحضن رنـــه وتعاين العلاوي شلرن يبجي، حرّكت ايدها على بطن اللعابه غنت، عاين عليها علاوي فاز وسكت يعاين يميز الصوت من وين، رنـــه اخذت اللعابة من ايد شمس ودنتها يم علاوي تحركها وتحاجيه
-ها علوش هاا .
وشمس تصفگله وهوه ساعة يسكت ساعة يبجي لوعني كهلان عافنه وطلع، ضليت وياه ل١٢ كاعده ورنه مكابلتني مناه لمن نام انهد حيلي عفتها يمه ومشيت اسبح طلعت من الحمام لگيتها واكفتلي بالباب
-هاه؟
رنـــه:: نايم بس اجه كهلان وطلعت من الغرفة.. ريـــمه فـــدوه مو تتعاركون اسكتي اذا ضل يحجي وهاي غلسي سوي روحج ما تسمعين.
هزيت راسي اي
-لا والله اسكت منه.
-اي فـــدوه هوه حتى لو يحجي شوي ويسكت.
-اي.
مشينا سوه اسمع صوت عبود وسجاد بالدوانيه يسولفون، رنـــه طبت للغرفة وي البنات وانه طبيت الغرفتي لگيته يصلي وعلاوي نايم، وكفت يم الميز امشط شعري واعاينله بالمرايه كضه صلاة لم السجادة ومشه الكاروك علاوي عاين بوجهه ودنك باسه من راسه تحمحت احاجيه واشوفن الاي حد زعلان گتله
-احس شويه احسن من امس.
ما حاجاني دنك مره ثانية باسه براسه وجر الجفية من التعلاگه لفها على وجهه متلثم بيها، فلت اللايت من الشحن حطه بجيبه وشال تلفونه وباكيت الجكاير اخذهن ومشه للگاع بدون ما يحاجيني.
سكتت راضيه ميخالف اذا علاوي يتحسن ميخالف، نمت وعيني عليه فزيت مرتين وهم بچه بنفس الصريخ بس يرد ينام ارضعه والوليله مناه لمن يرد يغفه، رديت نمت للساعة بالسته فزيت على صوت باب الهول، عاينت من شباج الغرفة الدنيا تمطر والجو بيه بروده صاير ماينعرف يوم عادي يوم بارد لا هو شتاء لا هو صيف
كمت على حيلي سديت البرده عدل واسمع صوت قطرات المطر وي صوت العصافير، طلعت للهول شفته توه طاب للبيت مبلل ويريد يشغل الصوبه، رديت طبيت للغرفة جبتله هدوم وطلعت اعاينله شفايفه يرجفن واديه شصاير بحالهن
شال راسه عاينلي وعاين للهدوم بأيدي اخذهن ساكت وطب للحمام عدلت الصوبه سديت باب الهول وطبيت للمطبخ اسويله ريوك خدرت الچاي وعيني للباب شويه وطلع من الحمام مغلس عني ما يحاجيني كعد يم الصوبه يريد يشبگها
طبيت جبتله بطانيه صغيره واسمعه شغل دعاء الصباح وكفت استمعله وجريت نفس طويل ومشيت بهدوء وكفت بباب الغرفة اعاينله يدفي اديه على الصوبه وفاتح ياي الهول يعاين للدجاجات وافراخهن لان ماضامينهن ببيوتهن اجن يحتمن من المطر يم الباب.
ابتسمت مركزه بكلشي من حواليه ريحة الصوبة وريحة الچاي المهيل وي صوت قطرات المطر وصوت دعاء الصباح
عيوني نرسمت عليه ضال بس بالفانيله التعلاكه يحط اديه على سيم الصوبه ويرد يفركهن وحده بوحده ومن الدجاجات يتدنن يردن يطبن للهول ينشهن
اعاينله متأملته وكاضه البطانيه بأيدي وجوده وصوته يحسسني بدفو وامان غريب
تدنيت يمه بدون ما احاجيه حطيت البطانية على ظهره ضل ساكت وانه اعدل بيها عليه واتقصد اصابعي يلوحن رگبته كش جسمه ومال براسه كض البطانية من الاطراف لفها على روحه وخرت عنه ظطيت للمطبخ وكلساع اعاينله اندمج وي الدجاجات كل ما يتدنن للباب ينشهن التفت من طلعت رنـــه صبحت عليه ومشت غسلت رجعت تركض للصوبه وتحجي
-اليوم بارده ولا چن امس حاره؟
طــروادة:: الشته جاي يلعب ويانه.
ضحكت رنـــه وتدنت الحضنه لفها وياه بالبطانيه وشلعت گلبه تجر بالبطانيه من عنده وتداهر وياه عضاها من اذنها صرررخت بكل صوتها فززتها كلها حتى علاوي ركضت للغرفة طلعته حطته بحضن ابوه وشمس هم اجت غسلتلها رنـــه وردت عليه مت روحها بحضن خالها وياه بالبطانيه ضحك لمها الحضنه ويعاينون بوجهه علاوي وزهره من الضفحة الثانية عاينتلهم مبتسمه لمهم كلهم وياه بالبطانيه.
مناه لمن طلع عبود يفرك بعيونه گاله
عبود:: حطوني وياكم.
طــروادة:: چنك جمل وين انحطك؟ وخرر.
عبود:: تحطوني لو اخرب لمتكم؟
وطرواده فرد اديه يلمهم كلهم الحضنه يحرك بگلب عبود وحسين لان متحمل على عبود من حوه ليجوه يسيويله حريگه وشمس تمدله السانها
رنـــه:: روح السجاد انتَ
طــروادة:: يله ولي مانريدك شمس گليله ولي.
شمس:: لااا خالو عبب.
ضحكوا كلهم وعبود هز راسه خوش ويفتر داير ما دايرهم وبس يريد يجر واحد منهم يصرخ وكهلان يكضه يحميه ضحكت من سمعت ضحكت علاوي وكبهم ضحكوا مكيفين بيه وعبود يگله
عبود:: ولك چلب ولك حارمنه من هالضحكه وساطرنا ببچيك شمااالك ابن الخايس.
ضحك كهلان وتلفت يدور شي يطك بيه عبود
طــروادة:: لا يا سگط.
عبود:: سوووولي مچاااان.
رنـــه:: وخررر رد نام.
افتر على رنـــه وكضها من رجليَّه صرخت بكل صوتها وكهلان يريد يلحك يكضها ماكو وهيهرتصرخ وتصيح
-اتكشففف.
سحلها عبود
-چذابة لابسه بجامه.
ووي ماسحلها نبمت دشداشتها وطلعت بجامتها وهيه تصرخ على كهلان تريده يكضها كالها
-علاوي بحضني شلون اجيج.
-يبوووووي... ظهررري ظهررري نعلعله.
ذبها عبود بغرفتها ورد يركض اخذ مچانها وكهلان كضه من اديه وگالها
-تعاااي بساع تعاي اكتليه
وشمس ماترضى تفرغ بيه ورنه جنها مسودنه شمرت روحها فوگاه تريد تكتله ما تگدرله، ضحكت اخذت الخيز حطيته على الصوبه يگلبونهن بين ما اكضي الريوك، حطيت الصينية والكوابة اخذتهن للهول صاح عليهم
-كاافي يله.. ياهو ما مصلي.
عبود شال أيده گاله
-گوم ما تتريك ويانه.
عبود:: اتريك واصلي.
-لا گوووم
-ذمه برگبته الياكل.
ركض توضى وطب يصلي صبيت چاي ومحد من عدنا ياكل متانينه لمن كضه صلاة واجه تريكنا شوه كهلان من يريد شي من يمي يگول الرنه عفته على راحته ورنه تعاينلي وتغمز عود عوفيه هزيت راسي اي
رنـــه:: حجيت بصوت واضح اسأل ريـــمه
-اليوم ماكو مدرسة نريده غده زين
ريـــمه:: اسويلكم مرگة حمص ودجاج گلي؟
عبود:: لا شني.
-جا شتردون؟
طــروادة عاين العبود گاله
-ناصب الغزل (شباك الصيد) بذنايب الگاع هسه وره الريوك اروحن اجيبهن وتتغدون سمچ.
بس سمعت بسها صيد وسمچ صرت فقيررة وحبابه عاينتله احاجيه
-طــروادة
-هاه؟
-حبوبي.
يشرب چاي رافع حاجبه وريمه مدنگه كاضه ضحكتها گوه
-اروحن وياك اموتن على الصيد من تلم الغزل والسمچ يترس البلم فدوووه.
-لااا
-بروح امك
-لا
-بروح ابوك.
-لاا
-جا ازعل
-جا ازعلي
دنگت ضايجة وهوه يشرب چاي ما مهتم وعبود يضحك عليَّ هوه وحسين ويأشرون بأديهم يسوون خطيه والله خطيه.
ضليت ساكته، وهوه عاف علاوي وگام غسل ولبس غيير هدوم وكف بباب الهول عاينتله عيب عليَّ عود ما اخذج سكتت سد سحاب القمصله هزيت ايدي البارحة هوه لابس نص ردن اليوم قمصله، مشه وعيني وراه طلع من الحوش وحسين وعبود تمددوا بالگاع يضحكون عليَّ
عبود:: عبالها راح يگلها تعاااي
ريـــمه:: يخاف عليها من المطر بس صوجه لو ماخذك وكاربك شويه بالشغل جا ماضحكت انتَ وهذا ابو الجبن حسين.
ووي حجي ريـــمه فتح باب الحوش ومد راسه مبتسم
-يله تعااي.
ضحكت وركضت للغرفه بساع ذبيت الدشداشة ولبستلي بجامه وتشيرت ولبست عبايتي فوكهم وجزمة حتى لا ينشلع گـــلبي شمس تعاينلي ماراضيه وتسأل وين وايحين كالتلها ريـــمه رايحين للطبيب يله سكتت.
طلعت اركض وصلت لباب الحوش ودرت لحسين وعبود سديت ايدي ورگعتها بباطن ايدي الثانية اسويلهم احريگه .
ركضت طلعت لگيت طــروادة واكف بره ويمه ســليم وبريا، بس لمحني الضحكه شگت حلكه وحجه يصوت عالي
بريا:: وين رايحه.
گاله طــروادة
-ياهي مالتك؟
ضحك وكفت بصف طــروادة وعاينت بوجهه مبتسمه
-صباح الخير
بريا:: صباح العافيه يا روحـــي.
وسليم دار وجهه غاص من الضحك وطرواده يهز بأيده جرني من زندي وياه
طــروادة:: امشي عمي امشي.
ضحكت امشي وياه بطلت تمطر بس طين وين ما نروح طين، نص الدرب وتعبت ضحك گال
-بعد بعد بالذنايب ناصبهن
-يا يمه يا رجليَّ
-حتى بعد لا تگليلي اروحن وياك للصيد
بريا:: اشيلج؟
التفتت فازه واشوفه متلفلف بالقمصله حاط الكبوس على راسه وساد السحاب الحد حلگه وحاط اديه بجيوبة، يمشّي ورانه ما حاسين بيه وطرواده تسودن دنگ بالگاع يدور فد حجاره ضاله قوية ماصايره طين حتى يطكه بيها وهوه وصل يمنه يضحك
بريا:: گلت اجي اساعدنك رنـــه ما تدبرها.
وطرواده يعاينله ماعاجبه
-لا اريدنك ولا اريدن مساعدتك امشي رد.
عاينت بوجهه گتله
-خطيه بعد اجه شيرده؟ خليه ويانه الذنايب كلها بردي وزور تخوف لا يطلعلنه خنزير ذيب شيشيات عاد هوه ويانه.
بريا ضحك خنگ وطرواده رافع حاجبه گال
-وشني هوه يحمينه؟
ضحكت هزيت راسي لا گتله
-شبيك طــروادة اذا طلع علينه الذيب ننطيه بريا ياكله بين ما احنا نشرد.
ضحك من كل گلبه وبريا يريد يلطم غمزتله اعضله بشفتي مشه طــروادة گدامه وبريا صار بصفي يحجي وياي همس
-تذبيني للذيب؟
-اجذب على طــروادة حتى يخليك تجي ويانه.
-ااخ منج شيطانه.
ضحكت وطرواده يمشي سيده وعدل الا انه اروح منه واجي مناه وبريا كلساع وكاضني لو يگلي
-وين الله تتزحلكين وتطيحين بين ايديي.
-ويكضك طــروادة ويكصص اديك بسجينته ام الياي.
ضحك يعاين الطرواده يمشي گدامنه ما يتلفت علينته، مد ايده كض ايدي نمشي سوه لمن وصلنا لذنايب الگاع، وره الساتر اكو زور وبردي مشينا بيناتهن بمن وصلنا للشط بنص الزور والبردي، غاد طــروادة حاط بلم وعايفه من يجي للصيد يستخدمه گاله بريا
-حاط بيه حرز حتى ما ينباگ؟
ضحك هز راسه لا گاله تعال عاين كاتب على الدوسه مال البلم بصبغ
-استخدمة اذا احتاجيت ومبري الذمه.
طــروادة:: ياهو اليجي للصيد ينزله للشط ويمد شبچاته ويرده المچانه بعد عليمن ينباگ.
طرواده ذب غراضه وجفيته على الجرف وجروا البلم اثنينهنن نزلوه للشط تسودنت من بريا راد ياخذ مجاني وهوه اللي يريد يغرف
-شني شني سالمين؟
دفعته وصعدت انه بالبلم وي كهلان هو واكف بطرف وانه بطرف بأيدي غرافه( اداة من الخشب تدع الماء لنحريك البلم)
غرفت وطرواده يلم بالشبچ ويحط بالبلم متروس سمچ يلبط وانه مكيفه
-عاااين هاي چبيرة.
-هاه هااه جا هيج صعدتي البلم فوگهن شلون المهم؟
غرفت عدل اضــحك وهوه يلم والسمچ يتطافر بالبلم وبريا بالحرف ويصيح علينه
-اليوم غداي يمكم.
طــروادة:: ماعدنا هذا مو سمچنه مال الوادم.
ضحكت والتفتت ليوره احاجي بريا
-تعال تعال جيب اخوك وتعال تغدوا يمنه
طــروادة:: تعزمين بكيفج انتِ؟
-خطيه ايتام.
-ولج احنا الايتااام.
ضحكت متونسه ايديي لان تبللن احسن جمدن وما مهتمه احب الصيد واحي هالوكت والبروده، لم الشبچ كلهه عافهن بالبلم وكعد عدل
-انطيني الغرافة.
مديتها اله هوه يغرفه وانه كعدت وامد ايدي بالماي واضحك
وگبل ما نوصل للجرف مرينا بشبچ عبالي هم مالنه شفت سمچه مجلبه بيه بساع. مديت ايدي عليه انحنيت كلي وگلبت البلم بينا طــروادة توه يصيح وولج مالحك اثنينا طحنا بالشط والبلم غرّك ويانه وبريا بساع ذب قمصتله واجاني وكهلان مچلب بالشبچ والبلم وبدل مايعصب علي مات من الضحك لان انه ضليت اهومش بأيديي بس اريدن اجلب بشي رغم الشط مايغرك صاح على بريا
-تعال جر البلم.. امشي رنـــه انزلي.
مشيت للجرف ارجف وسن يطك بسن وهمه جروا البلم نزلوه يتراجفون متت من البرد صوت اسناني يدك بأذني طــروادة بساع ذب ًقمصلته وعاينلي يهز بأيده
-صدك تحجين؟
-ششش..ششفت سسس سسمجه .
احجي وارجف كلني وبريا صار وجهه احمر من البروده
طــروادة عاين للگاع بس قمصله بريا وچفيته ما مبللات ضالات على الجرف.
جابهن واجه يمي بعدني مجلبه بالعبايه وهيه تنگط ماي حجه وياي همس
-لابسه دشداشه؟
وانه من البروده ما اگدر احجي بس اهز راسي لا عاينلي ساكت ومشه للزور طلع من جواهن علاكه لاف بيها بطل اخضر صغير بيه نفط. ولموا من جوه الشجر حطب رشوا عليه نفط ولان مرطوب گوه اشتعل اعاين لبريا ذب التشيرت عصره وشاله ينشفه على النار وطرواده طگه يگله
-كوم هسه مو وكتك رنـــه راح تجمد.
بريا:: خليني اشبگها تدفى والله.
وطرواده جابه براشدي دفه خده، رد اجه يمي دارني عليه منطيه ظهري البريا يحاجيني همس
-اصيرلج غطه وتذبين الفانيله تلبسين قمصلة بريا؟
هزيت راسي اي راح اجمد من البرد وكوه حركت شفايفي اسأل
-شلون؟
عاينلي بحيره، عاف القمصله والچفيه بين رجليه، ومد ايده طلع العباية من ايدي لف روحه بيها وياي وطلع راسه من العبايه حتى لا يشوفني سواها الي شلون الخيمه
-ذبي فالينتج.
-خاف بريا يشوفني.
بريا:: لا والعباس ولا اشوفن .
نزعت الفايلنه والحجاب جامده من البروده ومستحيه وكلساع اشيلن راسي خاف انشاف جريت القمصله من بين رجليَّه لبستها وسديت السحاب لفيت الچفيه على راسي بجامتي لازكه عليَّ وخر العبايه كهلان يعاينلي ضاج شال راسه لبريا
-غمض عيونك.
وهوه يضحك وغمض عينه شال العباية كهلان من عندي ومشيت يم النار كعدت اتدفى وارجف وطرواده صل واكف وشايل عبايتي فوگ النار يريدها تنشف، بريا عاينلي يضحك.
بريا:: ارتاحيتي من گلبتينه؟
-اهم شي سمچاتنه ماراحن.
عاينوا للغزل وكام بريا حطهن بالچيس رد يمنه ينشف بهدومه وطرواده يدفعهن يريد ينشف عبايتي شويه وكام بريا يلم بعد حطب وطرواده يعاين من بيج الشجر خاف لا واحد يجي وبس عبايتي شوي نشفت گال
-كومي يله
وكفت لبسني العباية ولم غراضه وبريا لبس تشيرته ردينه نرجف وبريا الدرب كله يگلي
-ادفيج.
طــروادة :: هسه ادفنه
التفت علينه خازره شايل الچيس الابيض على ظهره حطيت راسي بالگاع امشي واطكطك من البرد وما صدكت وصلت البيتنا شهكت ريـــمه من طبينه عليها
-يااا شصاير بيكم.
ركضت للصوبه واحجي على طــروادة گتلها
-غير طــروادة گلب البلم بينه؟
وهوه بالحوش فرغ الغزل من الچيس وصاح على حسين وكف يمه فرغوا السمچ منه وصفوه ربس كضه طب للحمام على گولت عفره تسميه البطه بكثر ما يسبح لان يعرك ويتعب لو من يصيد سمچ يتزفر يضوج بساع يطب يسبح.
طبيت سبحت وراه وطلعت اركض كعدت يمه على الصوبه ونعاين الريمه كاعده بالحوش تنضف السمچ حجيت وياه بهدوء
-ريـــمه ما تستاهل تقهرها بزعلك.
وهوه يعاينلها ساكت ومتحسر دار وجهه على صوت بچي علاوي گمت جبته، حطيته بحضني وهوه دنك عليه باسه ويحرك ايده على وجهه
-شبيك بويه؟ شبيك يا بعد حيلي.
اخذله شويه يله سكت، صح بعده يبجي بصوت عالي بس اهون من آول يومين،سويتله ممه ورديت كعدت يمه حاطه بحضنه وشمس تبوس بوجهه كهلان حسيت بيها تغار وتخاف اذا يلاعب واحد من الجهال خاف يهملها حتى لو مندمجه باللعب وهوه كض علاوي تنتبهه عليه وتجي تكعد يمه لو تضحك العلاوي لو تشبگ كهلان وتبوسه.
وهوه يخبل عليها يبوسها حييل ويشمها من رگبتها
-يا بويه يا ررريحتج.
حطت ايدها على وجهه كضته وباسته حيييل وتسوي مثله
-يبويه حيرتك.
ضحك من كل گلبه
-ريحتك خالي ريحتك مو حيرتك.
وهيه تضحكله مكيفه طــروادة عاف علاوي بحضني وطب ينام عاينت لوجهه علاوي بخوف حتى وهو كاعد نوبات ينز جسمه فاز ويبجي بلا سبب، لمن سكت عفته يم زهره وشمس وكمت اساعد ريـــمه بشغل البيت رديت التلفوني لكيت رسالة من بريا كاتب بيها
-ترى گلت الميثم والبنات بيت كهلان عازمينه على غده سمچ خاف تكولون ما ندري حبيت ابلغكم غدانا يمكم.
ضحكت ومشيت الريمه اراويها الرساله ضحكت
-عساهم على غده صدك جذب
-طــروادة يكتله.
-لا هذا ابو علي يهلي بخطاره ويكيف عليه
رفعتلها حاجبي اضــحك وهي توزع ابتسامات، درنه على شباچ المطبخ من اندك ياب الحوش مشه حسين فتح الباب واشوفن شاكر واكف بالباب ريـــمه بساع عافت البأيدها وطلعت ضل واكف بالباب وگالها
-شلون صار وليدج بويه؟
مشيت للهول اعاين لريمه واكفه بباب الهول مرتبكه هزت راسها وحجت متردده
-زين.
-وينه خليني اشوفنه.
دارت وجها عليَّ بخوف هزيت راسي لا وهي تعاين بحيره مرتبكه كالها
-بس اشوفنه بويه ريـــمه.
مسحت وجها محتاره تعاين لعلوش دنگت شالته ومشت للحوش تبعتها بخوف ما ادري الومها لو حگها طب للحوش حسين واكف بصفه وريمه تدنت وكفت گدامه مد ايده اخذ علوش من بيّن اديها عاين بوجه ودنك يبوسه اعاين لعيونه مستغربه من شفته بچه
-هاه جدي بعد روحـــي .
ما لمت ريـــمه من شفت دموعه رده الايد ريـــمه وعاين بوجها
-ديربالج عليه بويه.
وهيه مدنگه ساكته دار وجهه وطلع، ردت ريـــمه عافت علاوي بالهول وتعاين علي مقهوره ما تدري شتسوي هزيتلها راسي ميخالف
-ميخالف بس ما انضم على طــروادة من يكعد حتى لو ما يحجي وياج كليله ابوي اكه شاف علاوي حتى لا بعدين يدري ويگول تضمن عليَّ.
-اي بس يكعد اسولفله.
-ان شاءالله
تحسرت مقهوره، اخذت سله وسجينه ومشيت للخضره البداخل حوشنا حشت منها ورديت للبيت وهيه محتاره طبخت تمن وسوت مرگه گالت نگلي السمچ گلي نضفت الدوانيه واندك باب الحوش طبوا رغد وسلطان كل واحد بأيده جدر طلعتلهم ريـــمه وسلطان يضحك
سلطان:: تعزمون بيت مــيثم وما تعزموني، جبنه غدانا واجينا.
ضحكت تسلم عليهم
-هلا بيكم كل الهلا.
اخذت الجدر منه وطلع لان بعد وكت ورغد ميته من الضحك اقل الربع ساعة واجن ندئ وبدور وجدورتهن وياهن وياهو اليجي غاص من الضحك وعيونه مدمعه بريا كايللهم طــروادة عازمنا انه وميثم سودنهم جابو غدياتهمواجوا وي الصلاة جابوا عمتي وجويريه كيفنا فرحانات وصوت الجهال ببيتنا والضحك والسوالف تخبل اللمه صارت
ريـــمه خابرت ســليم ودالنه هاجر، والبنات ويانا بالمطبخ يساعدنا مناه لمن اجوا الولد ويصيحون على كهلان
-هااا الخايس تعزم بس نسيبك.
فز من نومه طلع للهول انصدم بالبنات عيونه حمر ورضا ركض يسلم عليه باسه وشاله يرحب بيهن وحده وحده ودنك على عمه ام صــيهد سلم عليها كالتله
-اعذرنا يمه اخوتك مسودنين وجابونه كوه.
طــروادة:: كل الهلا عمه فـــدوه اروحلج هلاا بيج.
صاح عليه وهـــب من الدوانيه
-خاب الخايس تعزم بس نسيبببك
غسل وطب للدوانيه يضحك صوتهم عالي يتداهرون وهوه يگلهم
-والله بريا هوه عزم روحه
بريا:: جذاب خايف منك غير چلب بيه ضل يحلف بروح عني شامل ما يتغده اذا ما اجيتهم.
مــيثم:: أنا اشهد انتَ واختك خابرتونه گلتوا معزومين يمنه بس لا تخلون صــيهد والجماعة يدرون.
نسمع صوتهم ونضحك وماسه تگول الماريا
-اخوتج والله جذابين.
ماريا:: شو بدنا نساوي هي هيه تربيتك.
ضحكنا كلنه وعمه فتحتلها أيدها تكعد بحضنها وتحرك بگلب مــاسه، احنا ملتمات بالهول والولد بالدوانيه شمس ورضا وزهره يلعبون ورغد وندى وي ريـــمه بالمطبخ كعدت يم جــويريه اعاين الابنها واكرص بخدوده وهي تتوسل
-لا رنـــه عليج الله.
-ينكرط.
جــويريه::طكيتها على أيدها اضــحك صدك ابني خدوده كبار وترفات، عفته يم عمه وگمت للمطبخ وي البنات، حتى ما نكلف عليهم كل وحده من عدنا طبخت غده وجابته وياها، صبينه وونگل الصواني الباب الدوانيه والولد ياخذون من عدنا، باوعتلهم شمس عافت اللعب ومشت يمهم يخلصن خدودها من البوس يلزمونها يصورون وياها ويشاقونها صــيهد اللي بالشافعات يله گالي احبج بس شمس كعدت بحضنه وباسته من خده تسأل
-تحبني؟
ضحك حضنها وباسها
-اموتن عليج يا خالي.
حضنته هيه هم تضحك وسليم يهلهل عبالك يدري بيه بالكوه يطلع الكلمة.
رجعت للمطبخ نصب غدانا اباوع لكل مكان وابتسم كل صوت بهالكعده ينذكر مدينه السفره بالهول ووزعنه الاكل عليها التمينا كلنا ناكل وصوت سوالفنا وي صوت الولد العالي وصوت الجهال والضحكة اللي ما ينشبع منها.
وبس خلص الغده توزعنه بين اللي تسوي چاي وبين اللي يغسلن مواعين كعدنا قصص وروايات عراقية كرار صلاح بالساعتين سوه نسولف ونضحك ومن رجعنا للبيت بعد مشيت للمشتمل كعدت بما فيه الكفايه اريد اتعود شوي اعتمد على نفسي حتى ارجع اداوم.
اجن يمي بــدور وندى ناصبين على بــدور من الولد ما موجودين نصيحلها
-صاحبة السيد
وهيه تشيل روحها وترگعها تريد تدعي عليه واني وندى انگلها
-ولج ساده بس تدعين عليهم الدعاء ينگلب عليج .
ندى:: اي وحتى اذا دعوا عليج يخلون لا ليلج ليل ولا نهارج نهار احتمال تصيرين مسودنه
بــدور:: صخام الصخمني انه اريدن اتزوج واحد مهتلف يطلعني يسفرني يوديني يجيبني شماله حضي اجاني سيد
غمزتلها ندى
-جا ياهي الحطته بحضنها وتغسل بوجهه.
جــويريه:: وشاربه ضل بأيدج هاااه بــدور هاااه.
بــدور:: هوه انه خايسه واحجي الچلبات مثلجن
ضحكنا وهيه تغم بروحها واختفت ضحكتنا بلعنه طن هوه من رضا صاح عليها
-تعاي صاحبة السيد.
بــدور تسودنت ضلت تلطم ورنه ركضت جرته وكعدته كدامها توصي وتعلم بيه عيب ما يصير يحجي هيج هز راسه اي واجه شبگ بــدور يعتذر منها ويبوسها بس احنا ما نثق بيه كلنه خفنه، ضلت يمي للغروب گبل العشا يله راحن
خليت كرار بفراشه بغرفتي وطبيت للمطبخ امسح وانضف عبالي نص ساعة واخلص تالي ساعتين واني ما مخلصه من المطبخ للهول للحمامات أنهد حيلي وبطني بقت توجعني الحد ما اجه صــيهد وكف بباب المشتمل باوعلي حالي حال مبهذله ومتوصخه
صــيهد:: هسه ردت روحـــي.
-يا روحك هذا ليش هيج البيت ما تمسح ما تنضف كاتله التراب عبالك مهجور.
-مسحت الغرفة
ضحك واجه يمي جرني من زندي يبوسني براسي ومشه للغرفه گابل كرار وكعد يلعب وياه، اخذت ملابسي ودخلت أسبح وافكر بعد ما اسوي طفل الا يصير عمر كرار خمس سنوات هم اني متخرجة وهم ابني چبير وأخطط وارتب بأفكاري
طلعت من الحمام لكيته مخليه بحضنه ويحرك رجليَّه يضحك ابتسمت كعدت يمه وباوعت بوجهه اسأل
-صــيهد شنو شعورك وانت لازم ابنك ؟
باوع بوجهي يضحك ويحك بحاجبه رفع اكتافه
-شني شعوري اندري، حلو غير؟
ضحكت وهوه دنك يبوسه كنت أمشط شعري ودك تلفونه رساله يمي على الميز باوعت للأشعارات رسالة من رقم ولان اعرف الرمز لزمت التلفون اريد افتحه باوعلي. گال
-لااا
-رقم ترى اريد اشوف منو.
-عوفيه خاف واحد من الولد
ما اهتميت فتحت الرمز ودخلت للوتساب صاح
-ووولج، مو گتلج عوفيه.
دخلت للمحادثة مكتوب" السلام عليكم صــيهد اعذرني هم نسيت قلمك يمي وعد باجر اشتريلك خمس اقلام هههه"
فتحت عيني مصدومة وهوه ما يگذر يكوملي لان كرار بحضنه ضل بس يصيح" جيبي التلفون "
درته عليه ارجف خازرته
-هااااي شنو؟؟؟؟
باوع بالتلفون مستغرب نترت متخبله
-من المرحله الاولى للثانيه تاخذ اقلامك؟؟؟
-صووتج
-لا تگلي صووووتج لا تگلي صووووتج، خرررب.
درت بخبال وهوه يباوعلي بصدمة ويصيح
-بس تعاي شيلي كرار من حضني خل اعلمنج شلون تصيحين هيج.
دنگت بسرعة شلت كرار من حضنه خليته بفراشه وانطيته المميه وهو وكف بسرعة جر التلفون من ايدي بنتر وكفت كدامه شايله ايدي واحجي بحرگه
-هسه تخااابرها الا انعل والديهاااا.
-بس اسكتي.
صررخت ايديي يرجفن بحرگه
-لا تگلي اسكتيييي.
باوعلي بخزر
-هاي عليمن تصيحين.
-جيب التلفون.
مديت ايدي اريد اجر منّه دفعني
-ووولج.
-خررررب خرررب شعوطت گـــلبي خررررب كلبك خررب اهلك.
شمرت المشط على الميز ابجي وافتر بحرگه وهو مصدوم من تصرفاتي كرار من صياحنه بقى يبجي وهو يحجي بحرگه ونتر
صــيهد:: شو صايره مدري شلونج لگيتيني مصاحب ليش ما تعرفين تحجين ادبسز.
-ووولك من المرحلة الاولى للثانية تفتر عليك بقلم ما عرفت تگلها وخري عني لو ما انت مسويلها واهس ماجان جلبت لو مخليلها حد ما بقت الهسه تفتررز وراك.
اجاني بسرعة وحرگه جرني من ايدي دفعني على الميز ساد حلكي
-احجي بعد وشوفيني لو ما طيحت حظج.
واني بس ادفع بأيده اريد احجي لو يطلع جده من گبره ما اسكت اني يصاحب عليَّ ام قلم؟ امداني اي والله امداني.
فاتح عينه حسل خازرني
-اغلطي بعد حتى اشگ حلگج.
دفعت ايده من حلكي حييل
-هسسسه هسه تخابرها لا والعباس ابو فاضل والحسين التحلف بيه أربعه وعشرين ساعة اگلب قرية لفحة عليك .
-تسودنتي؟ ولج جــويريه !
-خابرررها خاابرها.
ضربت رجليّ بحرگة عتني من زندي
-سددي حلگج.
مسحت عيوني اباوعله وهو سجل بصمه يحجي بنتر
-اخذي القلم الج وكفيني شرج وبعد لا تجيني على قلم بالقاعة افشلنج گدام الوادم.
وداها الها وحضر رقمها دار علي اعصاب
-تعلمي تنطين مجال لا الزگج بالگاع.
دفعت ايده من عندي مقهوره وهو يحجي وكل شويه وگال فنج العدتيها وغلطتي. فرشت فراشي بالگاع وجبت فراش كرار يمي وهم احجي مثله
-حلال عليك وحرام علينه.
-ناويه الليله ما تكضينها على خير؟
خليت كرار بفراشة وهو كاعد على الچرباية وجر باكيت الجكاير يريد يدخن
-الطفل مو زين عليه لو ما يهمككك؟
شمر الجداحة على الحايط انفجرت فزيت وهوه وكف بحرگه ويأشر بأيده
-سددي حلگج.
طلع من الغرفة وسد الباب وراه وكفت فتحت الشباك والباب الغرفة انترست غاز، تمددت بفراشي ومملخة روحـــي بالبچي ما ملت سنتين تفتر عليه ام قلم لو ما شايفه منه مجال جان ما بقت مجلبه بس هوه مكيف بنيه وتطلب من عنده وحلوه شلون ما يكيف.
ساعة وفتح الباب دخل للغرفة شغل الضوه باوع علينه مسحت عيوني تغطيت طفه الضوه ومشه للچرباية تمدد اخذله شويه وگال.
-ما منطيها وجهه بس بوكت الامتحان تحرجني وتگلي نسّيت أقلامي زحمه اعوفنها تفتر تدور قلم.
-وسنتين هيه تنسى اقلامها مو؟
سكت واني متندمه لان بقيت فترة يم خالتي ايمان وهو يبات هنا وحده يجوز جان يخابر كعدت على حيلي
-انطيني تلفونك.
-جــويريه شبيج؟ تسودنتي أنا اصاحب
-جا شنو وحد من الزلم انت؟
-لا اله الا الله.. هاچ.
شنو تلفونه بحضني فتحته ادور بيه
-لا تطبين على محادثات الولد... لو ردت اصاحب واحبن واتزوج ما خايف.. بس عندي مره وحبيبه وماليه عيني اروحن اعاين لغيرها ليش؟
-لو ماليه عينك جان خليتلها حد وگتلها بعد لا تطلبين من عندي قلم وعيب تسوين هالسوالف.
-افشلها گدام الطلاب؟ وترى يشهد الحسين حجايه ما حاجي وياها تگول اريدن قلم انطيه الها ساكت ما معبرها.
-اني باجر اداوم.
-خوماكو شي
-اداوم.
-انچبي.
-يشهد الحسين اداوم وأجيك القاعتك.
-هاي شبيها؟ لج عاينــي علي املح حاركتني الشمس ياهي تعاينلي اشايفتني يوزرسيف.
-هنه يموتن على الاملح.
-لا حول ولا قوة إلا بالله..گوه متحملج ترى.
-مثل ما تحملت ام قلّم سنتين تحملني.
ضل يستغفر كمت من مكاني خليت التلفون على الميز وفتحت الكنتور طلعتلي ملابس كويتهن وهو يحلف ما اداوم واني احلف اداوم، خلصت كوي طفيت الضوه ورجعت لفراشي اخذله شويه وگال
-وعلي محد معبرتني ترى ومكروه عليمن حارگه گلبج بعد؟
-اي اي اني هم جنت اشوفك مكروه وما معبرتك تالي صخمت وجهي وحبيتك.
سكت مدري شلون متحملني غمضت عيوني هستوني اريد اغفه واجه يمي باس راسي يحجي
-مسودنه وعلي.
بقيت مغمضه ما احاجيه باس كرار ومشه لفراشه.
كعدت الفجر على بچي كرار رضعته ورجع نام، كمت صليت وحضرت ملازمي وسويت چاي للسته كعدته مبدله ومكمله وهو اول ما يكعد وجهه ما يكصه السيف باوعلي ودار وجهه كام سبح حضرتله ملابسه وحضرت الريوك طلع من الحمام ساكت راسلت ندى بسرعة
-راح اداوم اخلي كرار يمج عادي؟
-وتسألين؟ طبعاً عادي وأخليه بعيوني.
-بعد گـــلبي خيه تسلمين.
قفلت التلفون ودخلت للغرفة حضرت اغراض كرار اخذته وطلعت وديته الندى ورجّعت المشتمل بعده يباوع من وره خشمه غلست من عنده اكلت على السريع وغسلت اخذ السويچ والملازم وطلع لبست عبايتي اخذن جنطتي وملازمي طلعت وراه احجي بهدوء
-وكت خلاني اني الاشيل ملازمي
شغّل السيارة يحجي
صــيهد::. استغفرالله.. الصبر يا علي الصبر.
حرك السيارة وكف بباب بيت خالي شامل اجه كهلان واول ما صعد للسيارة سلم وگال
-ها خويه ام كرار،جا مو ماخذه اجازة؟
وصيهد يرد من وره خشمه وهوه يسوق
-عدها سوادين الامومه وتعال تحملها لان حقها وهاي السوادين تصيب كل النسوان وانت مجبور تاكل تبن وتنچب.
وكهلان يباوع ما فاهم گتله
-خويه ما أريد الاجازه الفار مستغل غياب القط وصاير يلعب بكيفه.
داس برگيك ودار عليه خازرني درت وجهي گلبي دك حيل مدري شمسلتت وكهلان ركف ضدي
طــروادة:: انتِ معدله خويه وما تطلع منچ هيج حچاية وصيهد انا اكفله لا يلعب ولا دربه بهيج سوالف وروح ابوي.
درت وجهي للجامه وهو بقى خازرني طول الطريق ما حجيت الحد ما وصلنا للجامعة عفتهم ومشيت الكليتي
محاضرتين وطلعت اجت يمي مــاسه گتلها
-نروح الكليّة الادارة والاقتصاد؟
-شنسوي؟
-نشوف اخوج.
مــاسه:: مو مــيثم گال تعالي للمكتب يجوز نظلع نتريك.
-ها خوش روحـــي اني راح اروح يم صــيهد شويه وارجع.
هزت راسها خوش، بس مشيت شويه لگيته واكف منتظرني ضايج أشر براسه تعاي مشيت يمه مد ايده اخذ ملازمي
-ليش ما تعوفينهن يالقاعة؟
-ما ادري نسيت.
مشينا سوه ساكتين شويه وگال
-اجت رجعت القلم واعتذرت.
-ااي؟
-ما اخذته منها گالت ترى حاسبتك اخو لا اكثر عليمن شايف روحك جنك حكاكة التمن محترك، ردت الزكها بالگاع بالحسين كونهاا اختي.
يحجي بحرگه واني قالب مثلج تمدد على گـــلبي باوعتله غير احلى حكاكة تمن بحياتي، اشترالي چاي وطلعنا نتمشى القسمه ما قابل بس متحمل وساكت اول ما وصلنا وكفت وشهگت اباوع الكهلان.
واكف ويمه بنيه كاعده على المسطبة وهو گدامها لازم دفتر وقلم يكتب بيه ويشرح وينزل الدفتر يارويها وهيه تهز راسها اي
-عزا بعينج ريـــمه حتى كهلان خاين.
صــيهد:: شني السااالفة.
-عززا عزززا يبتسملها.
-يشهد الحسين اخذج للبيت اكتلج شبيج؟
ولا اهتميت بس اباوع الكهلان يشرح للبنيه ويمتب يالدفتر وكفت هيه يمه بس محترمه نفسها من بعيد وتمدّ ايدها للدفتر تسأل وهو يشرح احس بروحي من يمي غرت ومتحلفه بيه احجي الريمه بس ارجع وصيهد يهدد فنج وفنج.
واني احجي وي روحـــي هاي واحد يغطي للثاني همه، كهلان انطه للبنيه القلم والورقة واجه يمنه مبتسم اول ما وكف گتله
-والله لو تدري بيك ريـــمه حتى من القرية تطردك.
باوع بوجهه صــيهد واحد صافن بوجهه الثاني، جريت ملازمي من ايده اخذتهن ومشيت لوّ وحدنا من عدنا واكفه يم ولد يگلبون الدنيا وهمه يتمضحون وي البنات.
فتحت نت على بنيه يمي بالقاعة وراسلت ريـــمه
-والله واكف يم بنيه ويشرحلها بس اشهد الحق البنيه مبينه خوش بنيه ما تباوعله وبس تأشر على الدفتر وهوه بأيده حتى تفهم.
-جــويريه راقبيه وكليلي فـــدوه.
-خوش بس اخلص هاي المحاضره اروح اشوفه.
-عفيه اعتبريني اختج لا تضمين عليَّ كليلي كلشي
-لا والله ما اضم غير احترك دمي ردت اصورلج بس خفت من صــيهد.
-سهله انه اله يجي لو ما يجي.
باوعت بالمحادثة وعضيت اصبعي ندمانه النوب اتخيل نفسي بمكانه لو اني بالبيت وصيهد وحده يضحك ويشولف ويصاحب ومحد يگلي غير اموت من القهر واقنع روحـــي لا زين سويت، رجعت راسلتها كتبتلها
-ما شفته بعد والله ماكدرت.
ريـــمه:: مسوي روحه شاطر يشرحلهن وهوه يكض الملزمه نص ساعة سهله بس خل يجي، إشتغل بحرگة وعلاوي عل گـــلبي حسره اكوم من يمه يبجي تبقى شمس تطبطب على صدره وتلعب وياه خلصت شغلي لمن اجوا من المدرسة وتانينه كهلان.
اول ما طب للبيت عاينلي وسلم من الخوف جان ما يحجي وياي وهسه يسلم درت وجهي منه مارديت طبيت للمطبخ اصب الغده بذل واجه وراي يتحمحم
-شمسويه غده؟
حطيت الصحن بالصينية رگع ودرت عليه باوعلي ورفع ايده الشعره ميله عن كصته وهز راسه يسأل
-شكو؟
-ماكو شي شبيك خايف؟
-ياهو الخايف؟
-ابوي.
-ادري بيه جبان كضه عمره خايف.
درت وجهي اصب وهوه طلع من المطبخ حظيت الغده واجه عبود اخذ الصينية التموا كلهم ياكلون وهوه ياكل ويعاينلي وبس كضه غده وشرب چاي غسل وطب للغرفة ينام، حطيت علاوي يم رنـــه وطبيت وراه للغرفه معدت بصفه اعاين بوجهه جريت المخده حطيتها بحضني
-كهلان.
فتح عينه انگلب على ظهره يعاينلي شلت المخده من حضني الصدره
-ياهي هاي الكاضها وتشرحلها؟
-ما فهمتج.
-فهمت فهمت.
حط ايده جوه راسه يعاينلي
-بنيه بقاعتي
-اي
- غايبه بسوم الامتحان ورادت تمتحن شرحتلها الماده.
-وشني انتَ على شطارتك؟
-اشطر واحد بالقاعة.
-بغياباتك.
ضحك دنيت المخده على رگبته
-ما ارضى ترى هاي السوالف بطلهن هوه انتَ گوه مدبرها شلون رهمتها تشرحلهن.
-بعد ما اعيدنها بس اذا عندي معلومه ليش لا اساعد والله حتى ما احط عيني بعينهن وعلي خوش ولد انت ما تشوفين روحج حبيتيني.
حطيت المخده فوگ وجهه خانگته جرني عليه حيل شمرني بصفه وطبگ ايديي اثنينهن على بطني شايل روحه مبتسم يعاين بوجهي
-بنات قاعتي ماشاءالله على اخلاقهم كلهن مؤدبات والبنيه ما تحجي حجايه اذا ما تگلي خويه.
-ما تخون؟
-لا وروح ابوي بنظرة ما اخون.
-اريد اصدگك بس ما اگدر.
ضحك شلت ايدي اتلمس خده واعاين لعيونه
-اسفه كهلان ابد ما أقصد أعاندك بس شفت اليا حال وصل علاوي، وهسه شوي شوي جاي يصير زين اعذرني .
تحسر هز راسه اي ودنگ يضم وجهه برگبتي غمضت عيني اشبگه واضم وجهي بصدره كلشي بيه احبنه حنيته ومن ما يگدر يضل زعلان ومن اغلط وينسى ، لمني بين أديه على صدره مغمضه واستمع الدكات گليه المخربطه وهوه ايده تتلمس غمازات جتفس واثر الحرك
-ريـــمه ابوج يخوف لهذا السبب باعدج عنه لا تثقين.
-ما ثاقة بس ما اعرف شسوي من يجي يشوف علوش وييوسه ويبجي ينكسر گـــلبي .
-النوب تحججي مره كليله نايم مره كليله مو هنا اخذه ابوه وياه، ما اريدنه يشوفه.
سكتت توه يغفى ودك تلفونه عاين بالاسم مكتوب فيصل بس جاوبه كام مفزوع
-شكو شصاير؟
ركض اخذله هدوم ويخابر على الولد بس رد عليه صــيهد گاله
-الحك جدتي متخربطه وماخذينها للمستشفى.. روح هسه اجي وراك.
ركض بساع سبح ومشه وولدنا كلهم ركضوا للمستشفى وعمي وليد وابوي لحكوهم، وي اذان الغروب واجت سيارة ســليم نزلوا ابوي وعمي وليد اثنيننم يتثاغبون
وليد:: يا يييمه يالحنينه يييمه.
حظيت ايدي على گـــلبي وسليم عافهم واجاني مستعجل عيونه حمر
-ريـــمه، جده توفت.
شهگت گـــلبي اوجعني ورنه وراي صرخت ويچت بساع وابوي وعمي گلبوا الدنيا بالصياح والبجي وسليم بساع اخذ من فلوسه العندي ومشه شكد اذتنا شكد حجت علينا بس ما گدرنا ما نبجي عليها، اخوتها مارضوا تصير فاتحتها يمنه رادوا يمهم وطرودوا ابوي وعني وليد ماخلوهم يحضرون الفاتحة بس ولدنا حضروا.
اعاينلهم كلهم مقهورين وكهلان يعص اصابعه ندم كل ما يجي للبيت يگلي
-لو جايبها يمي .
-هذا يومها كهلان والله لو جايبها يمك وميته جان تهومك انت موتتها.
هز راسه مقهور، بدل ومشه ويوميه يرحون ويحون لمن كضت الفاتحه وردوا ابوي وده گوامه الاخواله واخواله ولا مهتمين راد الولد يدكونهم گالوله لو تموووت.
خلوه يلوب من القهر وكهلان متشفي بيهم، عاينلي يريد يحجي عليه ويسكت گوه على روحه اخط هاسكي ومشه للگيعان ورنه ركضت تعاين من باب الحوش بريا سوه دچه بصفنا ونزل بلوك وللعصر التحق اجه سلّم عليها يخاف لا هم تزعل منه.
وهيه مكيفه كلساع تعاين للبلوك وتحجي وي شمس مناه بيتنا يصير وتجين يمي وشمس تضحك.
استغربت هدوء امي وسكوت ابوي دوم يجي الباب حوشنه حتى لو كهلان موجود يضل بباب الحوش يشوف علاوي يبوسه ويروح وكهلان يعاينله مضيك عينه ما مقتنع وابوي من يبوس علاوي يبجي كالي كهلان
-اذا هيج بالباب وگدام عينج ميخالف خليه يشوفه بس ما تدورين وجهج عنه.
هزيت راسي اي وهوه ضل كل يومين تلاثه يجي مره يشوف علوش ويروح ومره واكف واجه مازن على شمس اسمعه يوصيه
-ديربالك عليها بويه.
ومازن ساكت اخذ شمس وراح لوره العشه سله جابها. وعلاليكها وياها حلويات وهدوم ويحطلها فلوس بجنطتها.
مهتم حيييل بيها.
انصدموا الولد من بيت غانم انطوا گيعانهم الفلاح وشالوا الغير ديره لفو على عشيرة ثانية جان گبل عدها ثار وي عشيرتنا واشتروا بسلفهم گاع
وضلوا ينشرون على المراجل وعلى العشاير ويا عشيرة احسن وولدنا هم ما يسكتون كل شويه منزلين منشور ومكتوبه بيه قصه على اليمشون لفو على غير عشيره الحد ما سيد حيدر خابرهم ماراضي وگالهم اسكتوا يله عافوهم .
""
بــدور:: حيل فرحت نن صــيهد ووهب ردوا يحجون، وسدوا موضوع بيت سيد عباس مناه لمن بيوم من الايام خابر صــيهد على سيد عباس وانصدم مايرد عليه خابر على جعفر هم ما يرد عليه تسودن يحجي بقهر عليهم شبون زعلانين من عنده
طلع من البيت مقهور والحد الليل انه متغطيه وألعب بتلفون امي جوه الفراش سمعته طي للغفة بساع قفلت التلفون وعفته يمي سلم على امي وكعد يمها يسأل
-هاي نايمه؟
-اي يمه نايمه.. شمالك عليمن مقهور؟
تحسر بقهر يشكيلها
-من الصبح الهسه اخابر عليهم محد منهم يرد انا سيد عباس ما يرد عليَّ؟
-يجوز صار بخاطره ميخالف صــيهد روحله وطيب خاطره بحجايه.
گلبي سدك بخوف وهو يحجي بحرگه
-يمه يا حچايه تطيب خاطره ماتعرفينه انتِ يقفل يمه يقفل بعد ما يحاجيني مناه لمن انطيه بــدور ولو اموت ما انطيها.
-بيهم عله؟
-لا
-جا يمه ليش رافضهم؟
حجه بصدمه
-شني ليش؟ بــدور زعطوطه.
-ادري بس جن مو بس علمود العمر احس بيك شي انه امك واعرفنك.
سكت مده يله رد گالها
-ما اگدر افارگ اخواتي انا اريدنهن يمي مون كل يوم اشوفنهن مو كل يوم كل اسبوع موديها البغداد وانخرم منها شهرين وتلاثه.. وبعدين يمه ساده وشلون طكتنا بس طلايب اطلعها من نار اذبها بنار؟
-هيه هاي الدنيا يمه جا شلون تريدهن كلهن يمك؟
-ما اريدن ازوجها بعدها صغيرة خل تكضي دراستها لاحگه على شلعان الگلب.
حجه ورد سكت شويه وگالها
-هاي اضنها كاعده.
خنست ومن الخوفه نمت صدك بعد ولا گدرت اشيل السالفة من راسي ثاني يوم من طلعت من المدرسة تلفتت اعاين شكيت بيه يجي، رديت للبيت وكلساع اسولف الندى الحد ما دعت علي
ندى:: كون ياخذج ويفكني منج.
-شمالج ندى.
-موتيني.
ضحكت رضا كاعد بحضني يلعب بتلفون وهـــب عافه بأيدي وگام اخذته كعدت على الدرج اللعب بالالعاب ومدري شلون اجت ببالي دك گـــلبي بخوف. طلعت من اللعبه وشلت راسي اعاين مناه ومناه، ما شفت احد دخلت للفيسبوك ايدي رجفت رحت للبحث كتبت اسمه وگلبي يدددك بخوف بس طلعتلي صفحته دخلت عليها مرتبكه عاينت بصورته
هوه واخوه قاسم الله يرحمه واكفين يم ابوهم كل واحد من صفحة لابس دشداشة سوده ولاف چفيه خضره على رگبته، طبيت على الصوره قربتها على وجهه اركز بملامحه وفزيت من انخمش التلفون من ايدي وكفت ابلعم متلعثمة وگلبي يدددك حييل ما اعرف شلون ابرر
وهوه يعاين بالتلفون مصدوم وشال راسه خازرني
-هاااي شني وووولج؟
-والله هيج بس ردت اشوفن والله.
مد ايده جرني من اذني بچيت مجلبه بيه واجت ندى تركض تفرغني منه
-يااا وهـــب عوفها عوووفها.
-لج بــدور لج حطيتيه براسج؟ والله اموتج.
فلتتني ندى من ايده صعدت فوك اركض وابجي واغم بروحي المن سويت هيج المن.
اجت وراي ندى بس رداتني اسكت ميته من القهر لان وهـــب شافني هسه شيگول عليَّ.
كامت ندى من يمي خابرت مــاسه وخلتها تجي عاينتلي مــاسه بقهر گتلها
-والله بس ردت اشوفنه صار عندي فضول.
مــاسه:: عاينتلها بحيره قهرتها كلها علمود وهـــب متفشله منه
-بعد شوي انزلي اعتذري من وهـــب وكفت راحت ماصار شي
-مايرضى ادري بيه.
-يرضى والله انه هسه هم احاجيه.
عفتها ونزلت مالكيت وهـــب خابرته مارد علي مشيت البيتي گلت بالليل ارد واحاجيه ادري بيها فضوليه ومن فضولها طبت لصورته مابنيتها شي ، طبيت للحوش اعاين للحديقة جنت مشغله الماطور وموصيه نارسا تطفيه عايفته وطابه جوه
طبيت للبيت بهدوء توني اريد اصيح وسكتت من سمعتها تحجي وتبجي بحرگه مشيت على كيف گـــلبي دك حيل وهيه تحجي بالروسي وتبجي وتتعارك ذاك هو حجيها مبين عرك
فتحت باب الغرفة دارت عليّ عاينت الايدها ورديت عاينت بوجها مصدومه
شكرا لزيارتكم عالم روايات سكيرهوم
