.jpeg "Knight of novels"){kind=small}
رواية أرض الخناجر الفصل التاسع والسبعون بقلم ايلول
أحنا من زين الزلم ما عدنا خوف
الزلمه خوفه من الردي لا يغدره
العال بأهلي روحوا وصلوله الكلام
خلي من الصبح چفنه يحضره
بعد لا دوله التحميه لا عمام
محد يلفيه بس المگبره
══━━━━✥◈✥━━━━══
رنـــه :: نعاين عليهم من باب الدوانيه مخبوصين وواحد يصيح على الثاني والتلفون بين اديهم كلهم مركزين بصوت كهلان .. شهگت، گـــلبي انفجع اعاين بوجهه ريـــمه مصدومة وهيه كاضه الاوراق بأيدها وتعاينلهم ترجف محد مستوعب حچي كهلان سد التلفون بوجهم
اعاين عليهن وعلى صياحهم وهوستهم احس صوتهم صدى بأذني وما ببالي غير حجي اخوي.. درت الريمه اريد اگدر احاجيها، كعدت على أركبها فاتحة عينها حييل ما مستوعبه.. اجه سلطان يركض جر الاوراق من اديها ورد للدوانيه وهم يصيحون ويتعاركون ويردون يخابرون على كهلان ومايحصلون يخابرون على ابهاتهم ما يردون لمن شافوا الرسومات، ســليم عاين بوجهه سلطان وصاح بصدمة
ســليم:: هاجر.
ووي حجايته طلع يركض اتلفت بين الكل چني بحلم، انهد حيلي اريد واحد يحاجيني واحد ضل بيه عقل من بيناتنا حطيت ايدي على اذني ما اريد اسمع صوتهم بس اريد افهم شجاي يصير بينا نز جسمي بفزة على صوت ريـــمه وصريخها لطمت على وجها بكل حيلها ركضلها سلطان يريد يكضها ما يگدرها، شمس وعلي يبجون وزهره حايره بينهم.
لمحت عبود كاعد على حيله بالدوانيه وسجاد حاط ايده على گلبه بخوف يحاجيه، وصيهد مدري وين يريد يطلع ووهب وميثم كاضينه حسيت بروحي ميزت من صياحهم بس اسم هاجر مسحت عيوني گـــلبي موجوع اركز وياهم
وبس طب ســليم جايب هاجر صــيهد مد ايده يريد يجرها دفعه ســليم حيل ركضلهم سلطان عايف ريـــمه كعدت يمها على اركبي احاجيها صوتي يرجف
-ريـــمه.. ريـــمه.
وهي تهتز بأيدي تركز بيهم وترد تصيح بصدمة، فزيت على صياح صــيهد طك ســليم حيل اعاين بوجهه ســليم من حاجبه الدم ينزل على طول وجهه
صــيهد:: حاااجيني حاجيني هاجر.
وهاجر تعاينله بخزر وسلطان يحاجيها بهدوء يردون يفهمون منهم تأشر السلطان وصيهد متسودن ما گدر يفهمها ســليم انطاها تلفونه تكتبلهم رخت ايدي من ريـــمه اسمع صوت سلطان وشهگته وهو يقرأ كلامها شلون صعدت بالسيارة ختلت وشلون شافتهم من كتلوا ابوي كتلوا ابوي بدم بارد تعاونوا عليه اخوته والغربه وشلون ابوها من رد لسيارة لگاها وحاسبوها هو وميلاد.
حطيت ايدي على عيوني احس نار تطلع من بينهن بلحظة وحده بيتنا ماضل بيه واحد قوي يسند البقيه ولدنا الچانوا يعاركون الگاع ما شفت بيهم واحد ما حنى ظهره ومد ايده يدور شي يستند عليه.
وهـــب:: عقولنه ما مصدكه ولا راضين نقتنع، صــيهد يصيح جذب ماكو هيج شي لمن وصله فيديو من طــروادة مسحت وجهي واكف بصفة اسمع وياه وكلنه منتبهين، عباره عن تسجيل صوتي لمكالمة بين شاكر وواحد صوته ثخين وبعيد لمن اركز بيه هذا صوت كهلان انهد حيلنه بحجيهم ويا ريت مصدكين هاجر ولا سامعين المكالمة .. يگله
-ما استحيت تتعاون وي الوادم حتى تكتل اخواك.
شاكر:: بويه انتَ منين ناصب علينه شني؟
-احجي وياي عدل لان تسجيل فيديو عندي الجريمتكم هسه اسلمه الابن شامل وللشرطة جر عدل احسنلك.
وراها صوت ماكو قدم الفيديو صــيهد ورد الصوت
شاكر:: كلي انتَ منين اطلع خلني اشوفنك ليش ضال تخابر وتتختل وتهدد كونك زلمه تعال واجهني.
-جا انتَ واخوك زلم من حطيتوا ايدكم بأيد راضي وعلي وسهيل حتى تكتلون اخوكم؟ اشرحلك شلون سهيل ينتله وشلون انتَ وراضي تطكونه؟ اشرحلك شلون علي ووليد ضلوا واكفين على الجرف يحرسولكم المنطقة خاف واحد يشوفكم بس فاتتهم شفت وسجلت كلشي وصار سنين أدور عليكم بس اريدن اعرفكم .
وهـــب::حطيت ايدي على گـــلبي مهدود حيلي من سمعت صوت ابوي يم شاكر يگله
وليد:: جيبه خلني احاجيه.... عمي هسه انتَ شني التريده كاتلين عمك كاتلين خالك عليمن محترك كلبك؟
-لا عمي ولا خالي، انا زلمه صار سنين ادور عليكم وهسه عرفتكم اريدن اعرف ليش كتلتوه شلون انتم اخوته تتفقون وي وادم غربه عليه عقلي ما مستوعبها هاي سولفلي ليش ؟ يجوز اطلع غلطان وظالمكم.
شاكر:: جيب التلفون جيبه...شنهي التريده وتمسح التسجيل العندك؟
وهـــب:: طاح التلفون من ايد صــيهد جلب بأيد سلطان خشمه يجري دم انهد حيلنه وضاگت بينا ديرتنا الوسيعه طلعت من الدوانيه بره الحوش. ماكو هوه يطفي نار الوجرت بگلوبنا، ما يتموا بس اولاد عمي شامل همه يتمونا كلنا.
لحگوني الولد بهوستهم ما ندري وين نروح ركض صــيهد الاهلي يتراجف ويصيح على امي من قهره ما يدري شني اليسويه وولد عمي سلطان وسليم حرف ما ينطقون
حسينا ارواحنا محددين مــيثم جر صــيهد غسل وجهه يحاجيه
مــيثم:: بس على كيفك وخلينا نشوف دربنا ونفرزن كهلان ووين .
درت وجهي الصيهد ما يوم شفته منزل راسه هيج مسح وجهه وسلطان گاله
-خابر.. خابر شيخ حيدر بلكن عنده خبر كهلان وين.
دك صــيهد على شيخ حيدر وما جابله طاري للسالفة شيگله اهلنا الكتلوا عمنه؟ شيحجي؟ سأله على كهلان گاله ما ادري سد التلفون وردينا كل واحد بصفحة نخابر على اي واحد بلكن نحصله كهلان تلفونه طافي وابوي مغلق وعمي شاكر يدكّ ومايرد.
مــاسه:: اعاينلهم من باب المطبخ دموعي بجرن وامي تلوب وتلطم على صدرها اخواني متسودنين، مسحت عيوني اسمع صريخ ريـــمه ركضت للغرفة جريت عبايتي احاجي بماريا
-ضلي هنااه رايحه اشوفن البنات.
طلعت رجليَّ يرجفن وبس اريدن اوصل البيت عمي شامل احس الدرب صار شطوله عليَّ وكل موقف وي عمي ذكرته بهاللحظة وكلهن مرن على ذاكرتي، دفعت الباب وطبيت عبود كاعد بالحوش اسمعه كوه يجر النفس وشهگته تمرد الگلب وسجاد مكابله ميت من الخوف ويحاجيه ويسب بأهله.
طبيت للهول. البنات يبجن ريـــمه مملخة روحها وتلطم على صدرها ووجها بكل حيلها وتصيح بصوت مبحوح
-انه الوديته انه الگتله روووح وياهم ياااا يمه.
ورنه على صفحة كاعده شمس شابگتها تبجي يحضنها وهيه بلا صوت بس دموعها يجرن، كضيت ايدين ريـــمه احاجيها ما تحس بروحها دعت على ابوها وامها بحرگة گلب تشهك ومن بين دموعها تدعي عليهم حرت بينها وبين رنـــه بالنص ساعة عدت وسمعت صوت الولد
طلعت اركض لباب الحوش صاروا بوجهي توهم يطلعون من الثنية صار بوجهم ضوه سيارة وكفوا كلهم درت وجهي اعاين للسيارة من الضوه ماجاي اميز ياهو الاجه لمن نزل. لمحته كهلان عاف السيارة مشتغلة وبابها مفتوح يمشي بخطوات ما ثابته صار گدام الضوه بأيده سلاحه يمشي خطوه يروح ويجي دايخ توه يعثر وركضله صــيهد بكل حيله بس راد يلحك عليه ويكضه.. توه يمد اديه يريد يلكفه وكهلان طاح دفعتني رنـــه وطلعت تصرررخ متخبله كضاها بريا وهي بس تريد توصل الكهلان.
روحـــي راحت صــيهد تسودن. شالوه هوه وميثم للسيارة وسليم ركض شغلها فروا السيارة طايرين ورنه تخبلت بريا يحاجيها ويتوسل بيها ولا سكتت كوه وصلها الايدي شبگتها ابجي، بعدنا بباب الحوش ودك تلفون وهـــب درت عيني عليه بس رد اشر السلطان على سلاح طــروادة ركض سلطان شاله صاح على بريا
-تعااال بريا تعال.
وهـــب:: ركضنا للسيارة من صــيهد خابرني ابوي مخابره يون ويفزعه الحگلنا تكتلنا، عفنا السلاح بأيد سجاد وركضنا للسيارة انا وسلطان وبريا اسوق بساع وما ادري بروحي ادعي عليهم بالموت لو أدعي نلحگهم
بين ما وصلناهم طبگت السيارة ونزلنا نركض جايبهم الهيمه السيارة مزرفة ابوي فاتح الباب ونازل ممدد بالشارع ودمه يسيل ركضتله وبس وصلت يمه فتح عينه ايده على فخذة
-هاا بويه
-الحكنيي الحكني ولك صــيهد بووويه.
كعدته عدل اتأكد من صوابه شديت رجله بجفيته وگمت وي الولد السيارة غارگه بالدم، السايق سهيل، وبصفه جان كاعد شاكر ووراه كاعدين ابوي وراضي وعلي، بالمچان الوره السايق كاعد راضي.. وكهلان راميهم من صفحة السايق الصفحة الثانية مالايحها شي.
سلطان يفتر بوجع گلب وخوف اديه يرجفن ما گدر يحرك ابوه ويشوفه عدل لو ميت، دشداشته البيضه مگلوب لونها احمر من الدم، بريا افتر عليهم واحد واحد راضي ميت وسهيل ميت وشاكر صوابه ببطنه بس بيه نفس .
جرينه علي طلعناه من السيارة لمن شفناه مابيه صواب بس مغمي عليه سلطان خابر الاسعاف گوه يحاجيهم ما گدرنا نحرك شاكر من مجانه صوابه قوي ودمه يسيل.
علي ابن غانم صحى وبس لگه اخوه مكتول. لطم وشك ثوبة يصيح يا بويه يا راضي الدقيقه احسها تمر بساعة من الصدمة ضالين هادئين بس نعاين عليهم وعلى الدم.
جنت عبالي ما يدرون كهلان الراميهم بس لمن علي ابن غانم خابر اهله يفزعهم ويكلهم كهلان ابن شامل كتَلنه عاينت بوجهه سلطان حاير، اثاري كهلان راميهم من الساتر ونازل واكف يم السيارة معاينلهم وما يدري بيهم ضالين عدلين، ابوي وعلي شايفينه.
بين ما اجوا الاسعاف والشرطه شالوهم وشالونه للمركز ثلث ساعات يله طلعونه مشينا للمستشفى لگينه الولد گدامنه ابوي وشاكر اثنينهم بالعمليات درت السليم اسأل
-صــيهد وينه؟
مسح وجهه بقهر گوه يحاجيني
ســليم:: الشرطة اخذت كهلان ومشه وراه.
التمت وهسه هاي هيه كملت، للساعة بالسبعة الصبح يله شاكر استقرت حالته ردينا انا وبريا للبيت خاف لا بيت غانم لو اخوال كهلان يدكونه صــيهد خابرنه گال سلاح كهلان تخفونه چن لا صار ولا انصنع تونه وصلنه القرية لكينه عبود وسجاد بره كاعدين عبود وجهه اصفر وتعبان درت السجاد انشده
-سلاح كهلان وين؟
سجاد:: ضميته.
-وين ضميته؟
-ضميته يابه محد يلگاه.
سكتت منه اعاين لعبود وبس شال راسه درت وجهي مال عين اعاين بوجه واحد منهم .
مــاسه:: للصبح ما غفت عينهن ونامن كضنها بچي وخوف على كهلان ريـــمه ما هدت هاجر وحتى من اجت عليها ميلاد ماخلتها تروح وميلاد تغلط وتسب لمن سجاد طردها يله ولت من عدنا...ما گدرت ما اخافن من كالوا ابوي وشاكر مصوبين.. بس ريـــمه ذبت شيلتها ودعت من كل گلبها كون ابوها ما يطلع بسلامه والليله گبل باجر ينلف بالچفن.
ومرتضى اجه هداد يريد يكتل عبود وياخذ حگ ابوه تعارك وياه سجاد ويحلف كل يمين يكتله، ما كضت هوستنا لمن الصبح اجوا الولد ودرينا منهم كهلان ماخذته الشرطة ماتن البنات بچن لمن عيونهن ورمت.
بيت غانم وولد سهيل مشتكين على كهلان وولدنا مثل بلاعين الموس لا يگدرون يحجون بالسبب والتسجيل ما يردون احد يعرف السالفة وشلون اهلنه غدروا عمي وي الغربة ولا يگدرون يسكتون ويخلون كهلان بالسجن لا ليلهم ليل ولا نهارهم نهار.
محد من عدنا گدرت تداوم هالمده، انه عايفه بيتي وكاعده يم ريـــمه ورنه حالهن يفلش الگلب وولدنا كاضينها بين الكعدات وبين المراكز والمستشفى، ومن احير بسالفة ومحد يفهمني اخابر على مــيثم هوه يفهمني... كهلان ما معترف ولا سلاح موجود ولا سيارة واصله للمچان الرماهم بيه... ومحاجين أبوي وشاكر ما مخلينهم يشتكون ورايحين العلي ابن غانم هم محاجينه وكلهم هددوهم بالتسجيل مال المكالمة وبساع غيروا أقوالهم وكالوا لا مو كهلان مسلبچيه سبگولنه.. ضلوا بس ولد سهيل مايرضون يتنازلون ويحلفون لو طلع من السجن يكتلونه، الولد كالولهم ميخالف تنازلوا ونحلها عشائرياً
مارضوا.
وبيت غانم هم وره ما تنازلوا خابروا يهددون كهلان بس يطلع من السجن احنا كتالته وصيهد يگلهم يطلع وسهله هالمره اشوفن يا عشيرة تلفيكم
يعارك ويهدد ميت من القهر ورغم عدن ثلث ايام على السالفة هوه ابد ما رايح الابوي للمستشفى وشايفه ولا يريد يشوفه يجي بالربع ساعة للبيت يسبح ويشرب چاي ويرد يطلع حيله انهد، رابع يوم جابوا ابوي من المستشفى، مديتله فراش بالهول وهـــب وبريا ساندينه اعاينله من بعيد گـــلبي جفل من عنده الحمدلله على السلامة ما گدرت اگله، مددوه وهـــب ما يعاين بوجهه وابوي يصيح ويغلط عليه علمود يعدله على الفراش يسوي اليريده ساكت لمن استقر.
وهـــب عافه وطب للغرفة يم امي طبيت وراه مختنگه اعاينله تمدد حط راسه على رجلين امي وغطه عيونه بأيده
اجه يمه رضا يحاجيه وهوه مغطي وجهه حرف ما نطق لمن امي مسحت على راسه وشهگ يبجي مرد گـــلبي ضام وجهه من عدنا يبجي بحرگه مهضوم. وامي دموعها يجرن غطت. حلكها بالشيله ايدها على راس وهـــب وتنوعي بصوت يمرد الگلب
وابوي من يمه يغلط ويسب ما يتنازلون ويكولون غلطنه ابد، درت وجهي طبيت للمطبخ جــويريه والبنات كاعدات اخذت عبايتي من فوك الباب
-انه رايحه يم البنات.
جــويريه:: خل اروحن وياج.
هزيت راسي خوش اعاينلها عافت كرار بأيد بــدور ولبست عبايتها طلعنه سوه وروحتنا لا تقدم ولا اتأخر ما ندري بيمن نواسيهن ويا حچاية التصبرهن، تلاگوا ويانه عبود وسجاد وحسين رادين من الگيعان وكت نثار الحنطة وما يردون تخرب گيعانهم ضلوا بالحوش يغسلون واحنا طبينه للهول سلمت على رنـــه گوه ترد صوتها رايح شمس اجت تركض لجويريه شالتها تبوسها وتحاجيها طبينه للغرفة يم ريـــمه. كاعده تعاين العلاوي نايم گدامها وهجوره كاعده يمها.. كعدنه سوه نحاجيهن بلكن شوي يفكن بس وين ريـــمه دموعها يجرن كالت رنـــه
-ما سمعتي شي؟ ما كالوا ليمت كهلان يطلع؟
تحسرت ساكته ما ادري شأگللها
جــويريه:: رنـــه والله يطلع... دام كلهم گالوا لا مو كهلان وضلوا بس ولد سهيل هم هسه صــيهد يلگه حل يقنعهم وغصباً عنهم يسحبون الدعوة وتخلص.
ريـــمه شالت راسها تحجي ونفسها مگطوع
-طلع هذا؟
-ياهو تقصدين ابوي؟
هزت راسها لا تمسح بعيونها
ريـــمه:: شاكر.. شاكر طلع من المستشفى.
هزيت راسي لا وهيه ترجف تخوف
-يكولون يومين تلاثه يله يطلع بعده
لطمت على رجلها تبجي بحرگه
ريـــمه:: ينسجن وهوه ما كاتلهم؟ والله لو كاتلهم مووت ما ينقهر گـــلبي على سجنه والله ما انقهر.
جرتها جــويريه الحضنها شبگتها وهيه تطك على رجلها بحرگه گـــلبي مردته ورنه تعاينلها بعيون ذبلانه ما تحجي شي، ضلينه يمهن بالساعتين وكامن ويانه من ردنا نطلع كضيتها على صفحة احاجيها.
-ريـــمه ترى انتِ اكبر وحده بيهم المفروض توكفين وياهم تصبرينهم .. هاي رنـــه ما متعلمه تفارگ كهلان وكلساع سكرها يصعد كون انتِ توكفين وياهم وتقوينهم ريـــمه جا هيج هيه؟
دنگت يقهر تهز راسها لا ردت تعاينلي عيونها يجرن
ريـــمه:: اواسيهم؟ ولج اواسيهم شگللهم اعذروني ابوي كتال ابوكم... اعذروني انه القنعته يروح وياهم للصيد ذاك اليوم بس كليلي بسمن اواسيهم؟
- وجعنا واحد وابهاتنا نفس الطينه بس ياهي مالتي بيه؟ انه احبن عمي واحب عياله اخذ طنب ابوي وچن انا المسويه هالجريمه ليش؟ انتِ تحطين روحج بمچان المذنب رغم مالج ذنب المفروض ما تفكرين هيج.
مسحت عيونها وهيه ساكته، درت وجهي لجويريه تحجي وي رنـــه وتگلها داومي انتِ شادي مايصير تفوتج امتحانات... ورنه ساكته وكفنا يمهن مديت ايدي الايدها احاجيها.
-والله صــيهد ما يعوف كهلان يطلعه من السجن لو كلفه روحه.
رنـــه :: هزيت راسي اي متحسره راحن اثنينهن وريمه مشت للغرفة وادري بيها تسد الباب وتكضيها بچي، غسلت وجهي گـــلبي يوجعني عاينت الهاجر كلساع اريد اسألها على تفاصيل عن ابوي واخافن اخاف تكتبلي شي ما يحمله گـــلبي
طبيت للهول سمعت صوت عبود من الدوانيه صاح
-رنـــه .
فتحت الباب ومديت راسي احاجيه
-ها.
اعاينله ماد رجليَّه وساند ظهره على الحايط. وحسين متمدد بالجهه الثانيه يعاين بتلفون عبود گال
-طبن شوكات برجلي ما تطلعينهن؟
هزيت راسي اي جبتلي ابره ورجعت كعدت گباله حطيت رجله على رجلي اطلع الشوك منها لمن كضيت مدلي ايده تدنيت بصفه جانت خشبة صغيرة من المسحاة بين الاضفر والعظم نمرد گلبه لمن طلعتها عاينت بوجهه
-توجعك؟
ابتسم هز راسه لا ومد ايده يحضن خدي يسأل
-قستي السكر؟
-اي زين.
دنك ساكت كضيت ايده بين ايديي روحـــي رايحه
-عبود... فـــدوه گلي طــروادة يطلع ما يضل بالسجن لا تخليني اتأمل وتالي ما يطلع.
تحسر جر ايدي عليه لمني بحضنخ يبوس براسي اختنگت دموعي يجرن
عبود:: خالي جعفر بالهند وما يگدر يرد هسه بس هوه يگدر يسد حولگ ولد سهيل خل يرد وسهله.
-يعني ما ينسجن غير؟
-عاينــي هوه لو ضالين بس ولد سهيل تنحل لان تصير تضارب شهادات والاكثرية ينكرون كهلان الرماهم جان طلع بساع بس هسه ابن راضي رابط على الخط وره ما علي ابن غانم تنازل هذا راح وصف وي ولد سهيل كالهم لا كهلان الرماهم وعمي تنازل بسبب التهديد... بس والله وعيونج تنحل وهم شيخ حيدر تدخل بالسالفة وصيهد خابر جدي محسن گاله بالسالفة خاف يحولونه البغداد... هم تدخلوا وان شاءالله خير.
هزيت راسي خوش وادعي بگلبي كون تنحل كون كهلان يرد اموتن لو ما اشوفنه... طلعت من يم عبود كلشي يمرّ بثگل ضايعين بدونه وما اصدك يجيني الليل حتى اضم روحـــي بفراشي وابجي للصبح حسيت على ريـــمه تكعدني تدغني بأيدي فتحت عيوني اعاين بوجها گالت
-كعدي زهره وگومن يله للمدرسة.
هزيت راسي لا ما اريد اداوم جرتني من ايدي
-گومي رنـــه لا تشلعين گـــلبي.
دنگت على زهره كعدتها غطيت شمس وطلعت گوه على روحـــي غسلت اعاينلها تسوي ريوك وكعدت الولد طبيت للغرفة بدلت ومشطت زهره طلعت للهول حطيت علاوي بحضني اعاين بوجهه متحسره
-والله لو تدري ابوك فراگه شيسوي بگلبي.
دنگت ابوسه وهو يصحك للهوه مشت ريـــمه للدوانيه ودت ريوك عبود وسجاد وجابت ريوكنا كعدت يمنه تصب چاي. وتحجي ويانه عبالك مابيها شي وانه ادري كل هذا هيج عاينت بوجها اسأل
-هاجر وين؟
-نايمه ما كعدتها.
هزيت راسي خوش ما ودي اروح ولا اداوم بس تدك بگلبي حجايته لا تهملين دراستج، طلعنه ري عبود تلاكه ويانه بريا عاينت بوجهي مقهور
بريا:: وين رايح انتَ؟
عبود:: اوديهم المدارسهم وامشي للگيعان
بريا:: روح انت وي سجاد انا اوديهم واردلك للگاع.
هز راسه عبود موافق صعدوا حسين وزهره ليوره وصعدت انه يمه اعاين من الجامه ساكته لمن وصلنا زهره وحسين لمدرستهم ومشه يريد يوصلني مد ايده يكض ايدي
-رنـــه .
درت وجهي عليه ساكته عاينلي ورد عاين للدرب يحرك اصابعه فوك ايدي
-شبيج يا بعد روحـــي؟ عليمن خايفه وعلي كهلان يطلع شكد يطول شهر شهرين تاليته غصباً عليهم يطلع.
-والشهر والشهرين شويه؟ غير گـــلبي ينطحن.
بريا:: گتلج شهر شهرين انطي مثال مو شرط يضل هلكد شدراج يجوز بعد يومين تنحل السالفة ويطلع.
-ان شاءالله يا رب ان شاءالله بس انتم لا تعوفونه فـــدوه يوميه روحوله.
عاينلي مصدوم وانه مدري شبيه خايفه على اخواني حاستهم وحدهم گال
-شتحجين انتِ ياهو يعوفوهم؟
-خايفه عليه.
-وداعت عيــونج تنحل ادعيلها وكله يسهل.
هزيت راسي اي خوش وصلني لباب المدرسه نزلت يعاين وراي لمن طبيت، گوه على روحـــي اتابع الدرس والشرح وي المدرسات واتخيل من اطلع الكه كهلان راد للبيت،
بس كضه دوامي وطلعت لگيت بريا متانيني يم الباب مال المدرسة واكف بصف الشرطي عاينت بوجهه ابتسم أشر براسه تعاي سلم على الشرطي مشيت بصفه مد أيده على جنف اخذ الجنطة يسأل
-بشري خوما فايتج امتحان؟
-لا
صعدت بالسيارة مرينا لمدرسة حسين وزهره ضالين واكفين بالباب متانين ... زهره اول ما صعدت گالت البريا
-طــروادة ما طلع؟
عاينلها بالمرايه ساكت وانه اعاينله متأمله يگلها اي هز راسه لا
-يطلع بس مو هسه... زهره حسين اي واحد من هاي الجهال بالمدرسة ينشدكم على طــروادة لا تحجون اي شي.
زهره:: انه اجت بنيه بتّ حيدر ابن جبر كالت صدك كهلان رمه عليهم گتلها لا جان نايم وهمه يجذبون.
بريا:: اي عفيه وحتى يم صاحباتج لا تحجين.
حسين:: انا محد سائلني واليجيب طاري كهلان اكسر الرحله على راسه وراس الخلفة.
بريا:: اي جا ياهو اخوك... ما يكعد گرندايزر.
سكت حسين ضايج وبريا بس يريد يضحكهم، تونا وصلنا للبيت لگينه سيارة مرتضى طابگه گدامنه نزلوا شاكر منها حطوه بالعربانه ســليم ومرتضى وسلطان واكف على صفحة نزلنا نعاين عليهم. شكد تمنيته يموت وما ارد اشوف خلقته لا هو ولا وليد
اجه بريا حط ايده على جتفي ومشه زهره وياه
-تعالوا يله.
طببنه للحوش وراح صارت بوجهي ريـــمه گتلها
-ابوج طلع من المستشفى.
عاينت بوجهي ساكته، اجتني شمس تركض دنگت شبگتها وشلتها ابوس بوجها من دون الكل تگلب اسمي وتحجيه مكيفه
-لنه.
بستها بخدودها ومسحت على شعرها أشرت على ريـــمه
شمس:: خاله سوتهن.
-يخبلن.
-سويلج؟
-لا انه چبيره.
-عادي عادي.
إبتسمت اكرص بخدودها نزلتها راحت تدور مشط طبيت للغرفة گوه اجر نفس رديت طلعت بساع مديت راسي احاجي ريـــمه
-هاجر وين؟
-بالغرفة يم علاوي.
-مو تخلينها تروح.
هزت راسها لا.
وصدك ما خلتها تروح من يجون عليها ميلاد لو مرتضى ريـــمه تگلب الدنيا وسليم وسجاد يتعاركون وياهم ومايخلون هاجر تروح... الوكت حيل ثگيل واليوم من يمل عبالك ياخذ من حيلنه.. تمنينه بس يخلونه نروح ونشوف كهلان محد رضى وصيهد والولد تبدغما متيهينه بس محد منهم رد طب بيتنا غير سجاد لان ما معترف بشاكر ابوه.
ومثل السم عدن اخمسطعش يوم وبعدها سالفة كهلان ماينعرفلها حل ماخلوه يصعد محكمة ويوميه نفرفح من القهر يوميه تصير هوسه وعركه وصيهد يهد ويكضونه وانه بدأ صبري يكضي بعد مابيه اصبر اكثر اخوي ما چن يطلع منها
كمت من بين زهره وشمس تلفوني بأيدي غطيتهن وطلعت اسمع صوت ريـــمه تنوم بعلوش وصوتها مخنوك طلعت للحوش كعدت يم الحديقة دموعي تجري تمنيتها موجوده تمنيت أأمن وما اخاف بس هيه تگدر تطمني
"وينج ولج يمه عفره يبعد حيلي"
لو موجوده غصباً على اكبر شارب تخليهم يطلعونه من السجن ما ضلينه هيّج ضايعين.
مسحت عيوني على صوت رسالة بالتلفون فتحته مالي واخس بشي كاتبلي
-رنـــه والله ادري مو وكتها وصعبه بس انجبرت باجر التحق.
ذبيت التلفون بحضني ورديت ابجي بحرگه هيه هاي العايزه هسه كملت وياي دقايق وخابرني جاوبته ابجي
-الو.
-الو ها حبيبي كعدتج؟
-لاا
سكت شويه ورد گال
-جاي تبچين.
-هسه وكتها تلتحق وكتهااا؟
-اطلعي للحوش جايج.
سد التلفون وانه بس اريد دموعي تكف حسيت كلشي التم على گـــلبي مسحت وجهي وگمت فتحتله باب الحوش طب يعاين بوجهي مستغرب
-عليمن تبجين.
وخرت من گدامه ساكته رديت كعدت على حافة الصبه وهو سد الباب واجه وراي كعد بصفي يحاجيني بحيره
-رنـــه! بس حاجيني عليمن تبجين؟
هزيت راسي ماكو شي تدنى يمي مد ايده الجتفي يدنيني الصدره شبگني يبوس راسي ويحجي مقهور
بريا:: بالعباس انجبرت لو بأيدي ما اروحن واعوفنج بهالوكت بس اخذت كل اجازتي واخذت فوگها بعد ما اگدر.
-بس انه تعبانه والله العظيم تعبانه وكافي عليَّ التفكير بأخوي اروح افكر واخاف عليك النوب عايزه؟
حرك ايده يمسح على زندي ويشبگني حييل
-والله مو بمچان خطر لا تخافين عليَّ ولا تفكرين بيه فـــدوه اروحنلج.
سكتت مغمضه عيني ما عندي حل انكتب على گـــلبي التعب ، ضل كاعد بصفي شابگني وساكت لو يمسح على زندي لو يمسد على شعري ما ودي يروح لو بس يضل يمي، مغمضه عيني ما غافيه بس اريد گـــلبي يرتاح فزيت على صوت عبود وهو يگله
عبود:: خاب هاي ما ينسكت عليها ياهو گالك تحضن اختي خايس؟
وخرت من صدر بريا دفعت ايده ما بعدها ضحك يعاين العبود
بريا:: باجر التحق والله
-لاا جا مو كلت بعدها؟
-بعد ما صارت لازم باجر
-الله يسهلك
دنگت ساكته منحرجه لو بس كاعده يمه وكاض ايدي ميخالف بس مال حاطه راسي على صدره ومغمضه تفشل بس شلت راسي العبود خزرني كال
عبود:: يله اخذوا راحتكم... رنـــه شويه وطبي نامي وراج دوام.
هزيت راسي اي عافنه ومشه بريا گال
بريا:: خزرج
-اي
-حقه مو تضوجين انا هم صاير اتمادى شني منومج على صدري مو زحمه على شواربي.
عاينت بوجهه ومديت ايدي امسح على شوا به وامشطهن
-وينهن هنه ملح وهلكدوتهن گوه لامهن.
عض اصبعي يضحك طكيته موجوعه وجريت اصبعي من حلكه امسح عليه
-ما عاجباتج؟
-لا
-والله خايسه جامليني هسه شمالج؟
ابتسمت امسح بعيوني مديت ايدي اثنينهن مسحت عليهن
-يخبلن
-بوسيهن!
-والله من جيتك عرفتك ما ميت على دموعي كاتلك البوس.
ضحك خانك صوته جر ايدي الوجهه يبوسها ابتسمت اعاين لوجهه
بريا:: لا والله غير من سمعتج تبچين ما ندليت دربي
ذنگت مبتسمه والمح رجليَّه لابس نعال مــاسه نص رجله طالعه من النعال هزيت راسي. اي
-صدگتك دام لابس نعال مــاسه.
عاين لرجليه وضحك جرني عليه يريد يشبگني دفعته وگمت
رنـــه:: روح نام وراك درب.
وكف وياي كض ايدي ومشينا للباب سوه اخافن كل ما يروح اخافن ما يرد واشوفنه طلع من الحوش وكف كبالي اعاين بوجهه وبعيونه متحسره عصر اصابعي بين اصابعه
-شبيج؟
-مو ما ترد ترى اموتن.
تلفت يعاين مناه ومناه دنك يبوس باطن ايدي متحسر شال راسه يعاين بوجهي
بريا:: اتيهن بدونج شلون ما اردلج.
-ديربالك على روحك
-حبيبتي وانتِ هم ولا تبجين والله وداعت عيــونج كهلان يطلع
-ان شاءالله
-عليج العباس لا تكضينها بجي
-جا شسوي اختنك والله وانجبر ابجي
-خابريني من تضوجين .
-ان شاءالله
ابتسم عصر اصابعي بسن اصابعه لأخر مره هداها وراح، عفته وطبيت للبيت بساع ضميت روحـــي بالفراش بين زهره وشمس.
للصبح من ردنا نطلع للمدرسه اجت مــاسه جايبه حور وماريا يم ريـــمه گالتلها
-ماريا مصخنه وخفت اعوفنها لوحدها، وما رضت تروح يم اهلي خاف ابوي يغثها.
ريـــمه:: شلت حور ابوسنها واحجي وي مــاسه
-هلا بيهن همزين جبتيهن
ماريا طبت بساع عيونها حمر من الصخونه تمددت بغرفة البنات وشمس تفتر عليها تريد تبوسها وماريا تگلها
-تتمرضين لاا.
عفتهن بالغرفة ومشيت الغرفتي اكعد هجوره اعاينلها بقهر وين اضمج وين اوديج من شرهم حتى انتِ ما سلمتي على روحج منهم، كعدتها مشت غسلت اخذت علاوي وراحت يم ماريا.
طبيت للمطبخ اسويلهن ريوك روحـــي وعقلي يمه وكل يوم يمر اتاني البعده بلكن يطلع الايام تشابهت وانتظاري نفسه.
ما ادري اهلي شني الحصلوه بسوايتهم، اخواني ما يعاينون بوجوهم ومتفشلين منهم، ولليوم ما يگدرون يعاينون لعبود وميتين من القهر سلطان يعض ايده حيل ويگلي
-شلون من يطلع كهلان أعاين بوجهه ؟ شگله خويه اعذرني خويه ابريني الذمه ابوي يتمكم ويتمنا؟ شگله؟
وگلبي ينمرد عليهم بچه على عمي شامل هواي مهضومين كلهم ويردون يطلعون كهلان من السجن بأي طريقة. امنت شويه من شفتهم ما مستسلمين ولو شما يصير يطلعونه صبرت روحـــي گوه.
اخذت صينية الريوك للغرفة يم البنات ماريا تسولف وي هاجر وهي بس تتبسم
ماريا:: والله اني ما اريد.
-اكعدي اكعدي ما تريد هيه.
جريتها من ايدها كعدتها گوه عليها صبيتلهن چاي كالت
ماريا:: بيتكم ينعس
-هاي من الصخونه بيتنا معليه.
-لا لا كل ما اجي يمكم بس اريد انام.
ابستمت صافنه بوجها
-صارلج بالسنتين ويانه ماتحجين عراقي ووي ســليم حجيتي اقل الشهر گمتي ما تحجين حجايه لبنانيه بعد.
ماريا:: لا تذكريني فشلانه.
-والله لو انه بمچانچ ما اراويه وجهي بعد فشله.
وهيه مصدگتني وتعاينلي بقهر طكيتها على رجلها حتى تاكل شمس يمنه تلعب كالت
شمس:: خالو سلومي.
ماريا:: سلومي؟ ولك شمس هذا مايرهمله دلع
وشمس تضحكله وهاجر تتخوصرلها خوفنها بساع غيرت الموضوع غسلت ورجعت للغرفة شويه ونامت، كملت غرض البيت وخابرت سلطان اسأل
-والله خويه نفس الوضع بعده لو اكو جديد انا اخابرج.
-اعذرني انه هم الحن وكلساع اخابرك بس والله العظيم مو بأيدي اريدن التهي وما افكر بيه ما اگدر.
-لا يابه شسالفة خابري ليمت ما يعجبج ارد وانا بخدمتج.
-فـــدوه اروحنلك.. اخذ راحتك لو صار شي انتَ خابرني.
-اكلج شوفي ســليم وين؟ ترى مو زين
-يمه شبيه؟
-تعارك وي شاكر واحترگ گلبه طك الكاونتر وطفرت بعينه كزازه منها البارحة ب١٢ احنا بالمستشفى وهسه اخابرنه ما يرد.
-يااا يمه جا غير تگلي.
-شگلج ابشرج؟ شوفيه انتِ خابريه بلكن يرد عليج بس مو ترحين لبيتهم تدورينه.
-لا لا ما اروحن هسه اخابرنه.
سديته من عده وخابرت على ســليم ما يرد عليَّ مرتين وتلاثه ولا رد ضل بالي، گمت اسوي الغده وكلساع اخابرنه ما يرد للساعة بالعشرة ونص دك باب الحوش من باب الهول حجيت
-هاه؟
ســليم:: انا.
طلعت بساع فتحتله الباب اعاين بوجهه خايفه عينه فصها الابيض صاير احمر كله وتهمل كلساع يمسها
-سوده بوجهي.. ليش ما مضمدها؟
-ختولي مابيها شي هسه تصير زينه.. شلونج انتِ؟
-زينه... ضل بالي يمك سولفلي سلطان وخابرتك ليش ماترد عليَّ.
-والله جان التلفون بالسيارة.
كضيته من ايده اريد اطببه للحوش مارضى هز راسه لا متحسر
-هنا بالحوش لا تطب للبيت.
-بيا وجهه؟
-انت والولد ما مسوين شي اذا اكو واحد لازم يفشل ويستحي ويتحاسب هوه ابوك.
دنك ميت من القهر يهز راسه لا
-والله هضيمه هذا ابوي.
جريته من ايده للحوش گوه عليه طلعتله هاجر وبأيدها علاوي سلم عليهم واجته شمس
-خالو سلومي.
-هلااا هلاااا بشمسنا هلا يابعد روح خالج.
شالها من الگاع يبوسها وهيه تبوسه باوعلي مبتسم
-شو هاي صايره تلبگ لبگ بالحچي.
-انه اعلم بيها كل ما تحجي غلط الح وياها بمن تحجي صح بس نوبات تعاند مجلبه الرنه تگله لنه.
صحك باسها بخدها وكرصها يگلها
-رنـــه كليلها ام الصخول.
-لا لاا ســليم
ســليم:: وريمه گليلها الگرطه.
-راح تخرب تربية بنيتنا انتَ.
ضحك يريد ينزلها وهيه تشبگ عليه گال
-اعلمها تسب منا ورايح
-لا ربحنا.
التفتنا على حور من تمشي تنود جنها عجوز وتضحك للهوه بس شافت ســليم وكفت بالباب تعاينله
-تعااي عمي تعاااي ام عيون.
اجته بساع وانه أأشرله لا تنزل شمس علمود حور غير هسه تگلب الدنيا بالبواچي قصص وروايات عراقية كرار صلاح شالهن اثنينهن وعود شمس تعرف اكثر من حور تعلم بيها تحط ايدها على صدر ســليم وتگلها
-هذ سلومي.
وحور بس مكشرة عاين بوجها مبتسم
ســليم:: شني هالعيون الحلوه.
-لو ما اكبر من علاوي جا حجزناها اله ونعدل النسل.
ضحك نزلهن اثنينهن وعاين بوجهي مبتسم
ســليم:: يجوز انا تصير عندي بت عيونها ملونه اضمها لعليوي.
رفعتله حاجبي متخوصره
-جا ياهو الما يتزوج؟
-شفت هاي الوجوه وصارلي واهس.
طكيته على زنده اضــحك وهاجر تغمزله كرصها من خشمها يگلها
-انتِ شيطانه حتى غمزتج تحسسني مسوي جريمه.
وهي بس تضحك رد عاين لحور گال
-شعجب عايفينها يمج اليوم؟
-هيه وعمتها خطيه مصخنه وماسه خافت تعوفها وحدها بالبيت جابتهن يمي.
-هاه سلامتها من جذبها تصخن
-يبووي صارت قديمة هالسالفة انساها
-شلونج زينه؟ ولا انساها الخايسه تتعاونين وياها عليَّ؟
-هسه شسوينا صاحلك تحاجي وحذه مثلها.
-لا والله
-وعلي چنها طير ذهب.
هز ايده يضحك ضل شويه يمنه وراح.. طبيت يم ماريا كعدتها مصخنه حييل
-اكعدي حيل مصخنه لو تسبحين بماي بارد بلكن شويه تصيرين زينه.
عاينتلي عيونها حمر
ماريا::شكد الساعة صارت؟
-بالعشرة ونص شعدج؟
-اروح للبيت اسبح وانام ما بقى شي وتجي مــاسه.
-لا وين رايحه النوب تتخربطين.
-ما يصير شي ما يصير شي.
تحجي وتمسح بخشمها بالكلنس وحور وشمس اثنينهن يقلدنها، كامت لبست شالها وعبايتها صايره سباعيه مو كلش ضابطتها بس احسن من گبل مشيت وياها للحوش
-والله لو ضاله هناه منا لمن تجي مــاسه.
ماريا:: ابتسمتلها اهز راسي لا
-هسه اروح اسبح اصير زينه لا يضل بالج.
-خوش وخابريني بو ردتي شي.
-تمام.
اخذت حور ورجعت للبيت عفت تلفوني بأيدها تباوع بسه ودخلت اسبح بالي يمها كل خمش دقايق امد راسي اشوفها لو اصيح عليها، طلعت بسرعة شغلتلها التلفزون واني تلفلفت بردانه حييل تباوع وتصفك التفتت التلفوني على صوت رسالة باوعتلها مستغربه فتحت الإنستغرام ودخلت للمحادثات ارتبكت من شفتها من ســليم كاتب
-شلونج؟ كالوا مرضانه الحمدلله على السلامة.
ابتسمت على كلمة مرضانه كتبتله
-الله يسلمك ، ههههه مريضة مو مرضانه.
-ما يهم نفس المعنى، شربتي علاج لا تمرضين حور النوب.
باوعت الرسالته احسه يحجي بتكبر صوجي ضحكت
-نتمرض ونتشافى سوه ميخالف
-اخذتي علاج؟
-لاا.
-ليش
-ما حابه اخذ علاج حابه ابقى مريضه
-يطبج مرض.
قريتها مقهوره اتمنى ارد عليه مثل قبل بس اخاف لا يگلي احجي البريا لو الميثم على المحادثة كتبتله
-عيب عليك اني بنيه مريضة وتگلي هيج.
- ماريا
-ها.
-اشربي علاج وجهج احمر من الصخونه لا تشمرين.
شلت راسي فازه وگلبي يدك حييل اتلفت منين جاي يشوفني هذا باب الهول قافلته والبرده منزلته كتبتله
-جاي تشوفني؟
-اي.
لميت المنشفة على جسمي وگمت اركض للغرفة
-والله ما تستحي مصلخنه اني شلون تباوعلي؟
-ترى شفتج من رديتي البيتكم مو هسه. وشعندج مصلخه ما تستحين بله طاح البيت انفجر تصخم فوكج نطلع مصلخه؟
عضيت اصبعي. وشلت ايدي اسب بالتلفون ما جاوبته كتب
-هيوو.
-خير؟
-المن مصلخة؟
هفيت على وجهي ضاع الكلام من عندي كتبتله
-أحترم نفسك
-كافي يله لا تلحين اخذي علاج وانخمدي.
-اسلوبك كلش جايف
-باجر اسبحه.
-نعم؟
-اسلوبي باجر اسبحه.
مارديت على رسالته لبست ومشطت شعري رجعت كعدت يم حور عدت نص ساعة دزلي رسالة جديدة كاتب
-هيوو اخذتي علاج؟
-اسمي ماريا.
-ماريا اخذتي علاج؟
-لا
-ليش؟
-مــيثم جابلي البارح خافض حرارة بس كسرته بالغلط.
شافها ومارد تمددت على القنفة بالهول توني اغمض عيوتي ودم تلفوني رسالة مسحت عيوني وفتحتها كاتب
-تعاي بالباب
-ليش؟
-جبتلج خافض حرارة من ثلاجتنا.
-اي لا دخيلك.
-خير؟
ردت اكتبله تلكه بيه سحر وترددت لا يروح ينطح الباب.
لبست مثل ماسه شال واضم كل شعراتي نزلت الردان وطلعت لباب الحوش فتحته ومديت راسي منطيني ظهره
حركت الباب عدل التفت عليَّ مضيك عيونه وما يياوع لوجهي، وجهه مابيه اي ابتسامه كأنما اني جابرته يجي.
مدلي ايده بيها شيشة دوه اخذته منه باوعت بيها اسأل
-اخاف منتهي مدتها؟
-لا جديدة جبته الهاجر ذاك اليوم.
-شكراً تعبتك.
رفع عيونه لعيوني احاجيه مبتسمه والمفروض يرد بنفس الابتسامه بس كل اللي سواه باوع لوسط عيوني بتمعن لحظة نزلهن ورفع ايده يمسح على رگبته هز راسه وحجه بخفوت
-تدللين، ديربالج على روحج
-اي ان شاءالله
دار وجهه يمشي باوعت وراه مبتسمه اريد اسد الباب وصارت بوجهي رغد بيتها لان مقابيل بيتنا وباي مقابل باب لمحتني ابتسمتلها أشرت
-شلونج سيف شلونه؟
رغد:: باوعتلها مستغربه شعنده ســليم يمها خفت عليها وخفت لا تصير مشكله واحنا ما عايزين گتلها
-الحمدلله..انتِ شلون صرتي گالوا مريضه.
-اي والله هسه راح اشرب هذا العلاج جابه سليم محتمل بيه سحر من ميلاد ههههه.
تحجي بدون اهتمام شي عادي عدها
-يله طبي وسدي الباب لمن تجي مــاسه.
هزت راسها اي طبت وسدت الباب وراها رديت للغرفة سيف نايم خابرتني امي تحجي
-ها يمه.
-تعاي الابوج شوفيه شيريد، وحگ العباس لو حاجيه نديوه يكون اضلن ساعة بهالبيت.
- جايه هسه.
سديت التلفون مقهوره ابوي ممدد ويصيح ويغلط واحنا نخدمه ودايرين بالنا عليه بس محد من عدنا يگدر يحاجيه طبيعي، اخذت ابني ومشيت يمهم اول ما دخلت للبيت اسمع صوته يصيح ويغلط وندى كاعده بياب المطبخ ايدها على خدها هزيت راسي اسأل
-شكو؟
رفعت اجتافها ما ادري حظيت سيف بأيدها وطبيت للهول بس شافني شال المطفايه شمرها عليَّ يغلط
-چلبااات ما تسون الررربه انعل ابوجن لا ابو امجن.
شلت المطفايه ورجعت يمه
-ها بويه كلي شتريد؟
دفعني ينتر
-جيبس عكازتي، ما بيجن خيره وهاي الچلبه مرررت ابني عود مرت ابني بكلاص ماي ما تحن عليَّ.
كمت من يمه ساكته جيت العكازه توني امد ايدي اعونه يوكف على حيله وطب وهـــب حط ايده على ايدي اشر وخري ودنگ هوه يعينه توه مد ايده يريد يشيله وابوي طگه راشدي بكل حيله عاينله وهـــب مصدوم وامي صيحت تبجي وتتحسب عليه
وليد:: عايفيني چلاب عايفيني انتَ واخيك ولك انا تهدددوني تهدوووني؟
يجيب سالفة على سالفة ويحجس بحرگه وهـــب حرف ما نطق ولا وخر منه ساعده وكفه وحجه بهدوء
-وين تريد تروح؟
-وودني الشاكر.
-ما اطبن البيتهم انا.
-ووودني ووودني كتلك.
غمض عيونه بقهر ومشه وياه سانده وصله البيت شاكر ورجع وجهه احمر وميت من القهر ندى تعاينله عيونها مدمعه كعد يمنه وامي دموعها يجرن مقهوره عليه وعلى صيهذ اللي لليوم ما حاجه ابوي ضليت يمهم نص ساعة عدت واجه سلطان جايب ابوي اخذه منه وهـــب وانه طلعت وراه للحوش سيف بأيدي عاين بوجهه متحسر مد ايده تلمس خده
-راح تضلين هناه؟
-انتَ وين راح تروح، اذا تجي اجي
عاين لوجهي عيونه ذبلانه مد ايده يتلمس ايدي الكاضه بيها سيف
-راح اروحن وي صــيهد احفاد جدي محسن راح يجون علمود كهلان.
-يجون ليجاي يعني نسوي عشه شي؟
-لا لا ما يوصلون ليجاي
-خوش، جا راح اضل هناه
هز راسه خوش دنك باس سيف وراح.
رجعت يم امي وهـــب اخذ سيف من ايدي يبوسه ويحاجيه
-خالي، سيف سيوفي.
باسه ومدري شلون بنص هالضيم عاينلي يسأل
-خو ما ســليم غش شكد انطاه؟
-هههه لا ما غش ميتين وخمسين
-ابن الچلب والله غني.
ايمان:: يا يمه صلي على محمد اخيك.. لا عنده مره ولا جاهل ولا يصرف على بيت ولا دراسه فليساته يلمهن بتعبه.
وهـــب:: ادري يمه جا هسه انا بگته؟؟ الله اكبر شگلت هم على كيفج ويانه.
طكته على رجله تضحك عاين الندى ومد ايده يتلمس بطنها كالها
-هسه يجون ابطوطي الصغار وعلي حتى كهلان يدفع ميه.
بطه:: اني ما اريد بطوط اريد وهبات مثلك.
حجت تتموع وهو تسودن جرها الحضنه يصيح
-خرررب روحـــي خرررب تعااي.
والخايس كضها يريد يبوسها گدامه اصيح عليه وامي مكيفتله جرتني تسد بعيوني وعيونها وتگله
-بوس بوس يمه مالك غرض.
-لااا وهـــب لااا مو يمنه زحمه.
باسها وندى ميته من الضحك ووجها ورد عوّد خجلانه گال
-بخدها شمالج.
ايمان:: ندري يمه بخدها جا شبيه الخد
-اندري.
ضحكت وعلى صوتنه فز كرار ابن صيهد مشتعل چنه ابوه خبصنا خبص ركضت اسويله ممه وهو گلب الدنيا بالبجي شاله وهـــب يلعب وياه ويحاجيه بمن كملت الممه يله سكت، شويه واجه رضا من المدرسه عيون وهب تضحكله بفرح. ويسأل شدرست وشقريت ورضا يشرحله بحماس، ضل كاعد يمنه شويه وراح ، وراه اجت بــدور من المدرسه بس طبت للهول ابوي تفل عليها يصيح
-بطلي بطللللي انا ضال محد اليه.
وبدور تعاينله بهتانه گالتله امي
-اعتبرها ما موجوده احسبها مذبوحة مثلاً.
وهو يتسودن لو سمع حجايه من امي يغلط ويسب واحنا بس نريدها تسكت الا هي حيل مدغوغه منه وابد ما تسكت، صعدت بــدور تبدل وابوي مل من الحجي يله سكت، ووين يله اجن مــاسه وجويريه جايبهن مــيثم، ردت احجي الماسه على ماريا وترددت خاف البنيه تضل تضوج من عندي سكتت.
راحت جــويريه بدلت واجت يمنه حطت كرار بحضنها تبوسه وتسب بالكليه
-ماضل شي هسه تكضين وتگابلينه.
جــويريه::ضميت وجهي برگبته اشمه حييل يروح امك باوعت الرغد
-ولج والله قبل واني بالمحاضره افكر شوكت الدكتور يخلص شرح واجي للبيت اكل هسه افكر شوكت يخلص شرح واجي للبيت اشوف كرار.
ابتسمت وعمه تصلي على محمد وذكرت گبل شلون هم هنه جانت حبالتهن هيج يخلفن باوقات متقاربه گتلها
-اكيف تصير خوتهم مثل الولد هسه.
تحسرت مقهوره
-كونهم ما يعيشون العاشوه ابهاتهم.
-ان شاءالله.
تغديت يمهم ووره الغده اخذت كرار ومشيت للمشتمل خابرت رنـــه اطمن عليهن كوه تحجي تعبانات اثنينهن يضحكن ويسولفن بس كله مو من گلبهن . سديت المكالمة منها.
نومت كرار وتوني تمددت اريد اغفى دخل صــيهد باوعتله ساكته صار فترة يجي بس گد يسبح يبدل ويروح باوعلي عيونه تعبانه، كعد على اركبه گدام كاروك كرار دنك يبوسنه متحسر ويبوس اديه مقهور
-بويه كرار.
باسه لاخر مره ووگف باوع بوجهي يسأل
-شلونج؟
-الحمدلله
كعدت على حيلي وهو نزع قميصه وعاف تلفونه على الشحن
-اسويلك غده؟
هز راسه لا واجه للچربايه تمدد مخلي راسه على رجلي هدأت ساكته اباوع بوجهه غمض عيونه، شلت ايدي امسح حواجبه وكصته زفر نفس دنگت بسته بكصته احاجيه
-شبيك عمــري؟
وهو ساكت ما يحجي مشيت ايدي على شعره فتح عيونه الذبلانه يحاجيني
-مايخلوني اشوفن كهلان طك گـــلبي.
-مو على اساس هذول اقاربكم راح يجون اليوم ويخلونك تشوفه.
-ما رهمت، اظن هوه المايريد يشوفني.
يحجي بقهر مختنك
-لا والله كهلان ما يسوي هيج، ان شاءالله ترهم وتشوفه يارب.
رجع غمض عيونه ساكت شويه وغفى حركته احاجيه
-نام عدل صــيهد جسمك يأذيك هيج.
تمدد عدل وجرني الحضنه ضميت وجهي بصدره حيل مشتاقتله نمت وفزينا سوه على صوت تلفونه.
جر التلفون بس باوع بالاسم كعد عدل
-الو.. وعليكم السلام.. اي وين انتَ ربع ساعة وانا يمك.
كام من الجرباية مستعجل خابر على وهـــب گاله
-تعال بساع سيارتي نابيها بانزين اظن رهمت اشوفن كهلان.
بدل بسرعة واني وراه لو انطيه تلفونه لو محفظته كد ما مستعجل ما يركز مشيت وراه لباب المشتمل وهـــب واكفله
-سلمونا عليه فـــدوه صــيهد.
وهـــب:: هز راسه صــيهد مستعجل طلعنه سوه وبلغت الولد سلطان وسليم اثنينهم مارضوا يجون مستحين من عنده بس احنا صلفين وكل همنا نشوفه
لمن وصلنا صــيهد ماضل بسر بالشارع ما سبه، مشينا وي الضابط فتح باب الغرفة صرتا وجهه بوجهه وي كهلان
مشاله صــيهد بساع شبگه حيل كل ظني كهلان ما راح يشبگه بس رد هوه هم لمه الصدره مغمض عيونه
صــيهد:: هدديت حيلي ولك كسرت ظهري.
كهلان:: يا بعد روحـــي.
ســليم عليه ووخر سلمنه عليه انا وميثم تلفت يسأل
-ســليم وسلطان وينهم؟
مــيثم:: مستحين من عندك ما گدروا يجون.
-سهله اطلع وما اخليهم يستحون اخليهم يزعلون لان ناوي هالمره يا شاكر ووليد اذبحهم ما ارميهم خاف طلعوا من الرصاص ما يطلعون من ...
سد حلگه صــيهد خازره ومسكته شويه ضلينه يمه وگالوا يله كافي وكفنا وهو يوصي
كهلان:: صــيهد ديربالك على اهلي... وعبود لا تخلونه يمشي للگاع خلها تولي ما اريدنها.
مــيثم:: سجاد ما متيهه والله ويا حاط روح بروح وكلنه نعاونه ما عايفينه بالگاع وحده وان شاءالله ماضل شي وتطلع انتَ.
-الله كريم.
طلعنه من يمه زايد قهرنا اضعاف صــيهد اخذنا الاخوال كهلان تعاركنا وياهم وردينا ما بيهم واحد يحجي وكفوا متانين جعفر يرد من الهند وبلكن يحلها.
""
رنـــه :: اموت من القهر لمن اشوف شاكر ووليد صاروا زينين ووكفوا على حيلهم يطلعون گدام الحوش همه هناه واخوي يالسجن گـــلبي ينطحن هاي راح يصيّر شهرين وهمه يوميه يگولون راح تنحل باجر عگبه يطلع وكل يوم يعدي واخوي ما طالع.
اعاين من باب الحوش شاكر اجه يتجه على عوجيته وايده الثانية على بطنه وصل يم باب حوشنه دكه بالعوجيه صاح
-هاااجر.
درت وجهي لباب الهول ريـــمه كاضه هاجر وتعاين للباب بغضب وهاجر تريد تفلت من ايدها وتجي رد دك الباب يصيح
-تعاااي اهلااه شعندج ضاله هنااه.
ســليم:: وين تريد بيها؟
دار وجهه السليم يريد يطكه
-ما تستحون اختكم ضاله هنااه؟
-لا ما نستحي عفنه المستحه الكم.
شال العوجيه يريد يطكه دفعها ما مخليه واجوا سجاد وعبود وعبود مدغوغ منه بس لمحه گدام بيتنا ركض عليه طكه بكل حيله وسليم يحيز. بينهم حطيت ايدي على گـــلبي خايفه على عبود. دفعه سليم وسجاد يعاين عليهم بهدوء
عبود:: والله وروح ابوي خاف كهلان رماك وما متت انا ذبح اذبحك خااايس تروح فـــدوه للتراب الداسه نعال ابوي انتَ الخسيس تغدررره.
يحجي بحرگه متسودن وشاكر يغلط ويسبنا ويسب ابونا بحقد دار وجهه ومشه لبيتهم من شاف ســليم ما دافعله بس حاز بينهم لا سكت عبود ولا طكه.
طبّ عبود غسل وجهه يرجف ركضت جبتله ماي خايفه
-على كيفك لا يصير بيك شي عبود فـــدوه .
كعد يمسح على گلبه ويجر نفس بقوة الحد ما ارتاح عاينلي ابتسم
-مابيه شي شمالج ترجفين اكثر مني؟
-تروح روحـــي من تحط ايدك على گلبك احس گـــلبي الراح يوكف.
ضحك مد ايده الي جريته وكفنا سوه دخل للدوانيه وانه يمه، نص ساعة عدت واجه مازن طلعله عبود كتله گله مو اليوم ياجر تعال عليها، وركضت اعاينلهم مشه يمهم صــيهد ووياه سلطان سلموا على مازن يسولفون وياه ما اسمع سوالفهم صوتهم بعيد مناه لمت ضل عبود يصيح
عبود:: ياهو الگالك ما نريدهاا انتَ تصددددك حجي الوادم؟؟؟
مازن:: يرد كهلان واردها يمكم عبود اناا بت اخوي مو ثگيله عليَّ حتى اهلكم يخابرون الوادم عليَّ وكلساع واحذ مخابرني تعال اخذ بت اخوك .
روحـــي راحت وريمه اجتني تركض كعدت على حيلي رجليَّه مهدودات هد مابيه اضل واكفه عليهن الا شمس الا شمسس، عبود تسودن من گاله عمك شاكر يخابر الوادم حتى يخابرني، والولد يحلفون يمين شمس ما تطلع مناه
مازن:: انا لر جاي اتعارك وياكم خو ادري بيها وصية اخوي وعايفها يم كهلان بس خويه يرحم اهلك مسودين وجهي گدام الوادم كلساع واحد مخابرني لم بزر اخوك وليش عايفه حمل على الوادم، بالعباس. يا شمس عندي. تسوى الدنيا كلها وما اعوفنها لو ما وصية منذر واذري بكهلان شكد حنين عليها هل ساكت وعايفها بس مال يكلولي ثگيله لا بويه.
بجيت شابگه شمسس بكل حيلي ييمه ياخذونها مني يمه اموتن، حاجوه الولد وحلفوا ما ياخذها. وبس مشه عبود وصيهد اثنينهم هدوا على شاكر والولد بس يدفعونهم مايخلونهم يطكونه ساكتين ميتين من القهر.
للغروب وي الاذان يله كفت هوستهم بس شاكر ماناوي تخلص على خير ثاني يوم عارك عبود على الگيعان ما يريده يسگي الگاع اليم بيوتنه وعبود عناد شغل المكينه هوه وسجاد لوعني انه وريمه اثنينا كاضين الباب عليه خايفين وبس رد ضحك طكيته على ايده
-مكيف بخوفي عليك؟
عبود:: اي والله ولا جنت حاس بيج تحبيني
-يااا يمه غير اموتن عليك وعلي.
ضحك حيل وجرني الصدره يعصر وجهي ويشبع بشعري فرغتني ريـــمه من ايده
-شعررها موهيج.
عبود:: كبل بس من اتعارك وي كهلان تجي يمي عبودي والله احبنك.
-هههههه اي والله النوب من كهلان يطكك انه من يمي اخافن احس هم راح انطك اركض لو اثرم زلاطه لو اكنس لو اصلي.
ضحكنا كلنا وطبينا للبيت ، بالليل راحوا اثنينهم ينطرون على المكاين لان صاير بوگ، بالاربعه رد عبود وسجاد صل بالگيعان. نام على وجهه يمنه بالغرفة.
للصبح كعدتنه ريـــمه للمدرسه گتلها
-ما اروحن ما عندي شي انه.
-رنـــه هواي غبتي.
-بس اليوم والله.
كعدت حسين وزهره. مشه عبود يوصلهم المدرستهم وانه نايمه وفزيت اشهك ركضت للدفتر فتحته ولطمت اليوم امتحاني المؤجل وانه لا دارسه ولا رايحه للمدرسه عاينت للساعة وركض ركض بدلت گلت اروحن متأخره اكلها مريضه بس امتحن واطلع.
وريمه تركض وياي. لمتلي الكتب بالجنطه وحطت عبايتي بأيدي طلعت مستعجله حتى اتلاكه وي عبود ويوصلني
توني عبرت من باب حوشنه وصار بوجهي شاكر گيل شال العوجيه طكني على زندي يغلط
-وووين موليه.
-وخر عني شلك غررض؟
وعبالك متاني حجايه من عندي شال العوجيه وهي حديد وثگيله طكني على راسي الگاع افترت بيه ردت بس ريـــمه تطلع ما دري وين راحت اعاينله اريد احجي ما اگدر وهو يغلط ويسب ويحلف ما يطلع كهلان من السجن.
-غصباً عليك يطلع وانتَ التنسجن.
اجاني يريد يطكني بعد دفعت العوجيه بأيده واسمع ميلاد صاحت
-تاااني تااني اجايتج.
-تعاااي الا ادوس ببطنج.
اجت تركض ذبيت جنطتي بالگاع احس دم ينزل من راسي على اذني وبس. وصلت يمي ميلاد تكامشت وياها. وهوه يفتر وراي بعوجيته يريد يطكني عليت صوتي واجتني ريـــمه تركض ووي جيتها اجه عبود
ما اهتم الشاكر شاف دمي واجه عليَّ بخوف يريد يجرني من العركه بس شاكر النطل طكه بالعوجيه على گلبه فززتني شهگت عبود وطيحته بالگاع يشهگ وايده على صدره
عفت ريـــمه تتكامش وي امها وجريت روحـــي اريد اركضله مالحكت شاكل شال العوجيه طكه على راسه ركضت متسودنه جريتها من ايدها بكل حيلي شمرتها لبعيد ودفعته من بطنه طاح بالگاع يصيح
ركضت العبود ارجف وهو الدم يسيل من كصته ويشهك. بصوت بس يريد يجر نفس. عدل روحـــي راحت وريمه عافت امها واجت متسودنه وتبجي وتهدد
-والله الا اخابر الولد واللله.
وامها تغلط وتسب واحنا كل همنا عبود گومناه انه وريمه من الگاع گلبه يريد يوگف اغطي الدم بايدي الترجف بجيت بخوف راحت روحه ووجه صار احمر طبينا للحوش اغسل وجهه وريمه ركضت جايت ماي ولفاف وتعقيم. اخذتهن من ايدها ارجف امسح الدم من كصته وابجي وهوه بس استقر نفسه شويه بلع ريگه يحاجيني ويكض ايدي
-دم.. راسج كله.. دم.
جريت ايده ابوسنها وابجي كل همي هوه، التفتنا على طبت سجاد سلاحة بأيده عاين علينا مبتسم وبس لمح ايدي امسح بوجهه عبود والگطن كله دم ذب سلاحه واجه يركض متسودن
سجاد:: يااا هو وياك ووولك عبود ياهو طكك.
ويكض وجهه عبود مثل المسودن يمسح وجهه بردانه وبس يرده يحاجيه وكفت ابجي وارجف
-ااابوك الچلب الحيوان
عبود:: ما يهيد شاكر عباله الدنيا فرغتله من كهلان انسجن يمد ايده على اختي.
فتح عينه بصدمة يعاين العبود وعبود دار وجهه مقهور يتمنى عنده حيل... وسجاد ركض للتفكه الذبها بالگاع صاح
-بالحسين موووته على ايدي.
طلع يركض وريمه صرخت ولحگته وعبود تبعهم يركض وايده على گلبه طلعت وراهم خايفه على عبود وهمه اثنينهم ريـــمه وعبود يتكامشون وي سجاد يردون يجرون السلاح منه وشاكر طلع يصيح ويغلط وسجاد متخبل ويصحيح
-انتَ تطكك عبود وروح الحسين موووتك على ايدددي.
دفع ريـــمه بكل حيله وعبود مچلب بالتفكه يحاجيه ويصيح بوجهه
-تنسجنن تنسجن تعوووفني؟؟؟
سجاد:. وروح شامل يا شاااكر اكتلك اكتلك لو تلبد عد سلللف.
اجوه يركضون الولد كلهم التموا عليه بس يردون يجرون التفكه من ايده صــيهد عافهم متكابلين على سجاد وركض الشاكر جره وطكه على وجهه بكل حيله مسحت عيوني مختنگه وارجف
ما گدروا السجاد ماهد التفكه اذيه جرت دم وهوه ماهادهاا ويصيح بحرگه يرجف
-وووولك يطك عبود ووولك شيررريد منهممم.
ريـــمه:: تسودنت ما ضل حيل بيه والله ماخايفه على ابوي خوفي على اخوواني خوفي لا سجاد يتةرط بكتلته وينسجن حاله حال كهلان
يتوسلون بيه بس يردون يهد التفكه وهو بكل حيله ينترها منهم ويشيل روحها من بيناتهم وعبود يحاجيه متوسل اب. ما شافن عيونه بعذ كل همه يوجها على ابوي ويرميه وكل ما تتوجهه على ابوي يصير صــيهد گدامه مو يحميه يطكه.
هوسه براسي كمت أحسها صدى مجلبه بأيد رنـــه الگاع مفتره بيه... لحظة هيه لحظة وشهگت فازه على صوت الطلقة الزرف اذني، وريتها بگلبي ولا....
شكرا لزيارتكم عالم روايات سكيرهوم
.jpeg "Knight of novels")
