رواية أرض الخناجر الفصل الثمانون بقلم ايلول
شكد ايام مرت فارگيناه
ودورنه بمكانه وما لگيناه
بعد قاط العرس ما علگيناه
عميانه على الزينين عيني
══━━━━✥◈✥━━━━══
ريـــمه :: هوسه براسي كمت أحسها صدى مجلبه بأيد رنـــه الگاع مفتره بيه... لحظة هيه لحظة وشهگت فازه على صوت الطلقة الزرفت اذني، وريتها بگلبي ولا الشافته عيني
من بين ايدين سجاد ثارت، وفزعت گلوبنه وارواحنا صداها تردد بأذني وي صرخت رنـــه وهبتت ايدها من ايدي صرخت بگلب مفجوع وركضت بلا وعلي من شافت طاح بيّن اديهم عبود.
من بين ايدين سلطان وسليم جرته تصررخ بكل صوتها
-ييييمه يييييمه يمه عبود يييمه.
اعاين يهتانه عيوني وعقلي ما مصدگات ولا مستوعبات الگدامي حقيقة مو حلم، صياحهم وركضتهم وصريخ رنـــه الفزز روحـــي، ومن بين كل اصواتهم اسمع جرت نفس عبود العاليه يشهگ حييل بس كون يتنفس هوستهم وثغيبهم چون گلبي انه وسجاد نفس الطيحة طحنه هو گبال عبود وانه گبال رنه اثنينا ماضل بينه حيل نوصلهم
اخواني يعاينون لدم عبود الروى التراب ويتصايحون چنهم مسودنين ما يشوفون دربهم وصيهد يركض اجه دفع رنـــه حيل ودنك لاف الچفيه وحطها على بطن عبود
يصيح
-بووويه عبووود بويه.
وسليم يگوم من يمهم يركض للسيارة ويرجع عليهم ما يدري بروحه شيسوي، وعبود عيونه مفتوحة وماد ايده المتروسه دم السجاد، وسجاد بس فاتح عينه اخوي لا هو ميت ولا هو عدل.
هزتني صرخت عمتي ورغد تصحيني على الواقع الچان عقلي رافض يصدگه، اريد اوكف على رجليَّه ما اگدر ارجف كلني ورنه مثل طير المنذبح تفرفح وتلطم تفتر داير ما دايرهم وهمه ملتمين على عبود ودمه من بينهم يسيل مختلط ويَّ التراب
وسجاد زحف بس يريد يوصله كضه من ايده يعاين لدمه ويحاجيه يرجف
-عبود .. عبود .
وعبود فاتح عينه حييل يريد يحجي ماكو بس خرشة النفس بيه والشهگه التمرد الگلب، گمت على حيلي مفتره الدنيه بيه أريد اگدر اكض رنـــه ماكو وعمتي تصرخ وصيهد يصيح دفع ســليم يريدهم يصحون ويعاونونه
-شغللل السيارررة شغل السيارة.
ركض وهـــب شغل السيارة ورد عليهم يركض يردون يشيلونه ورنه تفرفح اكضها وتفلت روحها من ايدي بس شافت عبود گلب عيونه ماضل شي منهن غير الفص الابيض شالوه سلطان وصيهد للسيارة ووي كومتهم سجاد طاح فوگ دم عبود الضل بالگاع لا يحرك ايد ولا رجل
هديت رنـــه ورديت اله اركض جريته الرجلي بس اطك على خده اريدن احاجيه ما اگدر وامي اجت تركض وتصرخ وابوي يصيح من يمه دفعته من رجلي للگاع وگمت اركض وره رنـــه من شفتها ركضت بلا وعي وره السيارة البيها عبود تصررخ
كضاها وهـــب وسليم رد يركض السجاد الصريخ يدوي براسي الهوه ضاگ بريتي وهـــب بس وصل رنـــه الايدي ركض السليم من شافه شابگ سجاد ويصيح مايگدر يشيله انهد حيله.
كضيت رنـــه بأثنين ايدي ارجف واصرخ روحـــي رايحه وهيه تفرفح وتجر روحها من ايدي طحنه بالگاع اثنينا شابگتها بكل حيلي. تصرخ بصوت مبحوح
-ووولج الحكي وولج ريـــمه ولج عبود والله مات عبود مااات يييييمه عفره ييييمه.
ما گدرت ... ما گدرت اكضها مالي حيل يحمل حجيها ولا اريدن اسمعه فلتت من ايدي تركض بكل حيلها وره سيارة وهـــب الاخذوا بيها سجاد گمت ابجي اركض وراها واعثر وهي على الشارع الترابي تركض وتصررخ لحگتها رغد
طحت على اركبي ما گدرت اوصلها ولا گمت اسمع صوتها غوشن عيوني شويه شويه اشوفنها مثل الضباب.
وهـــب:: ما اشوفن دربي اسوق وسليم حاط سجاد بحضنه وجهه اصفر وشفايفه بيض جريت تلفوني ما اعرف شنهي الاسويه كل الطلع بأيدي اخابر مــيثم بس رد عليَّ صيحت عليه
-ووولك مــيثم ولك الحگنا.
-سلامات هاا ولك وهـــب هااه.
-سجاد...سجاد سجاد صوب عبود ولك انكسرت ظهوررنا تعااال تعاال للمستشفى تعال.
ومدري بيا حيل وصلنا المستشفى عفت ســليم وي سجاد وطبيت اركض ادور الولد ما لكيتهم سألت عليهم ما جايبينهم صحت على ســليم
-الولد مو هناااه رايح وراهم انا رايح الهذاك المستشفى
مسح وجهه حاط ايده على اصفاحه هز راسه اي يحاجيني
ســليم:: بس خابرني عليك ابو فاضل خابرني وگلي عبود مابيه شي .
عفته وطلعت اركض للسيارة طول الدرب ادعي، يا رب دخيل اسمك لا تنكسر ظهورنا بهالمصيبة. ها يا علي ياحاضر الشدات احضرنا.
وبس وصلت للمستشفى نزلت اركض ادور وروحي رايحه توني اريد اوصل للطوارئ وتلاگه وياي صــيهد حاط اديه اثنينهن على اصفاحة. حاني ظهره ويصيح
صــيهد:::ولك وووهب الحگني وهب الحگني ولك من بين ادينه تفرهدوا اولاد عمي... يا بووويه يا شامل بووويه.
اسمعنه ولا راضي اقتنع لمن طلع سلطان لاف الچفيه على وجهه يبجي ويصفك ايد بأيد
سلطان:: يا عبيد يا خووية يا كسرة ظهرنا.
نهد حيلنه هذا الما چنه حاطينه بالحسبه مديت ايدي اكض صــيهد انكسر ظهره
-ولك صــيهد وولك راح عبود وصانه عليه كهلان وصانه شنگله ووولك شنگله؟
كعد على حيله يصفك ايد بأيد ويصيح بحرگه
-يا كسرة ظهرري.... يا كسرتي يا بوويه انهددد حيلنا بويه شامل بووويه.
جريت روحـــي جر امشي للردهة ماضل حيل بيه امشي ومتمني عيوني ما تشوفه هذا عبيد عزيزنا هذا وصية عمنه، من ادينا يكضنا ويوصي ديربالكم عليه عبود گلبه مو زين خلوا عينكم عليه عبود يتعب، هذا الما يوم واحد من عدنا زعله.
طبيت گـــلبي مهدم اعاينله على السديه ابو طول الحلو والله السديه ما مكفيه الطوله شبگته ابجي
-يا بعد روحـــي يا عبد يا خووويه .
اعاينله وروحي تنطحن ولك هديت حيلنه كسرتنا وحگ ابو فاضل كسرتنااا، غفلة تفرهد من بين ادينا، الوادم البالمستشفى ويعرفونه من السلف التمت علينه لمن الشرطة اجت، التفكه ترخيصها بأسم سلطان كالهم انا الرميته بالغلط جنت انضف السلاح، اخذوه هوه ما گدر يكلهم سجاد يموت والله يموت.
ندى:: يوميه گلوبنا تنفجع ويوميه صريخنا يهزّ السلف، متأملين يخابرونا ويگولون عبود عدل، ملتمين بحوش بيت عمو شامل رنـــه بحضن عمتي تشهك رايحه روحها وممرود گلبها وعمه تغسل بوجها بس تريدها ترجع الوعيها
لا هي ولا ريـــمه مستوعبات، مسحت وجها عمه وهيه تگلها
رنـــه:: عمه ... عمه مات عبود عمه گـــلبي انشلع من مچانه عمه امووتن اموتن اموووتن وياه عممممه.
وشمس تفتر عليها تشبگها وتگلها
شمس::لا تبجين هسه .. هسه خالو يجي اخابره اكله لنه تبجي تعال خالو تعال تعال لنه تبجي عليك.
وهي وريمه تسودنن فد صرخة صرخن وعمه تحجي عليهن ما راضيه متأملين بمخابرتهم يطمنون گلوبنا الحد ما اجن البنات مــاسه وجويريه موديهن ميثم بتكسي،ورنه بس لمحت مــاسه فتحت اديها الها تبجي وتصيح
رنـــه:: ووولج مــاسه الحگيني ولج يمه كتلوا اخوي ووولج كتلوا عبوود.
شبگتها مــاسه وجويريه تعاين ما فاهمه شي لطمت عمتي على رجليها حلكها يابس تريد تحاجيهن وتكلهن السالفة ما تگدر
جــويريه:: حاجوني راحت روحـــي شصاااير؟
ايمان :: خايبات يمه... هذا شاكر...شاكر تعارك وياهم وسجاد هد على ابوه شلون طك عبود تعاركوا على التفكه وطاحت الطلقة بعبود.
مــاسه:: ييييمه.
وجويريه لطمت على رجليها مصدومات، وكلها هانت الا من اجوا حسين وزهره جايبهم مازن لان وكت حلتهم وضالين بالباب محد رايحلهم ورضا وياهم، رنه بس شافت حسين تخبلت
حضنته بكل حيلها تصرخ وتبجي وهوه حاضنها ما يدري شنو السالفه
حسين:: شبيج رنـــه بعد روحـــي شبيج؟
دار وجهه الريمه والنه مصدوم ببجينه
حسين:: شني ريـــمه؟ كهلان بيه شي؟ حاجوني... عمه حاجيني انتِ.
حاجته عمه رايحه روحها زهره سدت حلكها تبجي جريتها الحضني وهوه فاتح عيونه بصدمة ما يدري شنو اليسويه وكل الطلع بأيده شمر كتبه وكعد كبال رنـــه مختنك يباوع بوجها كلساع تنسحن روحها
حسين:: مصوب غير؟
ايمان:: شالوه مصوب هسه هسه يخابرونه ويطمنونه هسه يمه رنـــه هسه.
ويمر الوقت علينا بثگل محد منهم يجاوبنه... نسمع بس صياح ميلاد على مرتضى يردون يرحون وره سجاد هي وشاكر أخذهم مرتضى واحنا مكابلين رنـــه وكاعدين بالحوش اني اخابر على وهـــب وعمه تخابر على صــيهد بس ردنا واحد يطمنه ماكو ووين يله دك تلفون عمه
من حلاة روحها جرت رنـــه تگلها
-هل خابر صــيهد هل خابر اسمعي
وعبالها راح يطمنها فتحت السماعة مقربه التلفون الرنه واجاها صوت صــيهد مفجوع ويصيح
صــيهد:: ييمه...انكسر ظهري عبود راح من ادينا تعاي ليه ييييمه. انهد حيلي.
ويا ريت ما ردت عليه عمه ولا حاجته... صريخ البنات يخلب الروح ولطمهن يمرد الگلب ركضت شلت شمس من بينهم تخبلت من صريخهن، حضنتها واكفه على صفحة ابجي وعمه شگت دشداشتها تلطم ورنه طاحت لا تحرك ايد ولا رجل ركضتلها ماريا، ومثل نار بگطن طش الخبر بالسلف .
كلشي تحسه حلم شلون بلحظة بيت كامل ينهدم وتطفى ضحكته، قصل الساعة والناس التمت والنسوان اليدخلن للحوش يصرخن اخوات ام صــيهد وگرايبها وأم منذر واهل شيخ حيدر الدنيا انگلبت وهمه ما جايين من المستشفى ما راضين ينطونهم عبود لان كالولهم بالغلط سلطان ينضف السلاح وضربه بس لان على عبود اثار ضرب بكصته وعلى گلبه ماقبلوا، ومن الصبح للستة العصر ماضل حيل بينا والبنات ما بطلن بچي ولطم
ام منذر حاضنه رنـــه وهيه عبالك مو بوعيها ساعة تبجي وساعة تفتح عينها حيل وتباوع العمه ايمان. تجرها من أيدها ترجف تكلها
-عمه... كضوا اخواني عمه بس عبود يرجع ابوسن ايدج كليلي شسوي شسوي وعبود يررردلي شسوووي بس كليلي شسوي.
لطمت على وجها بكل حيلها يردن يلزمن اديها ما يگدرن صريخهن ونحيبهن يمرد الروح وبره هوسة زلم كلها ملتمه علينا، تدنت ريمه شبگت رنـــه يبجن اثنينهن
-ووولج مات اخوووي ييمه گـــلبي ييييمه ولج ريـــمه مات اخوووي .
هدتها ريـــمه تلطم وتصرخ مملخه روحها وما بلسانه بس
-يا عبود يااا خوويه .
ورنه كل شوي مغمي عليها ولا تقبل تشرب حباية السكر لا تخلي بحلكها قطرة ماي بس تدفع أدينه وتصرخ
-يممه عبود يييمه يمه عفرره شلون بييه يمه شلوون بگلبي انه يوم ما مفارگتك عبود يا روحـــي ولك يوم ما مفارگتك شلون افارگك طول عمــري
لطمت وملخت روحها الحد ما گمت اشوفن شعرها بين اديها ومحد من البنات واعيه تلزمها كلهن يتصارخن ويلطمن الحد ما سمعنا صوت الوادم تصيح
-لا إله الا الله.... لا إله الا الله
ركضت الرنه اكومها وجويريه كومت ريـــمه وعمّه والنسوان الكبار طلعن بره الحوش يتصارخن الباب مفتوح لمحتهم صــيهد لافّ الچفية على وجهه ومخلي اديه اثنينهن على اصفاحة وبس شاف امه مدلها ايده يصيح
-تعاااي ليه يييمه تعاااي ليه انكسر ظهررري .
وعمه شبگته يبجون وصوت الوادم وصريخ البنات يتردد بأذني وصداه يدك بالگلب، دخلوا التابوت للدوانيه والبنات ملتمات عليه يتصارخن ويلطمن ماتن ريـــمه ورنه انتهن
ريـــمه تبوسه بأديه تصرخ وتلطم على وجها وشعرها تگطع بين اديها وتصيح بگلب مفجوع مفرفحة
-عمتتت عيني يييمه ولج يمه ربااب يييييمه
ورنه لامه وجهه بين اديها والنسوان ما يقبلبن يردن يسدن التابوت تخبلت تلطم وتصرخ وترجع تدنك عليه تلم وجهه بجفوفه تبوسه بوجهه وتصيح
رنـــه:: عبود يحيلي عبووود يروووحي خويه يا حبيبي ولك اموووتن اموووتن شلعت گـــلبي شلعت گـــلبي خايب شلعت كلبييي حاااااجيني ولك حاجيني موتتني.
وحسين مدنك على صدره يبجي النسوان يجرن برنه دفعت ايد المره احاجيها ودموعي يجرن
-عوووفيها عوفيها تودعه همه جابوه حتى نودعه ليش تلزمنها؟
رجعت رنـــه شبگت عبود تبجي وعلى غفله سكتت جرتها ماريا ترش على وجها ماي وتضربها على خدها اباوع لعيونها ضل بس الفص الابيض مبين طلعت للحوش اصرخ طب وهـــب يركض شفايفها بيض وعيونها مگلبات تخبلت ضربها راشدي مره ومرتين ويرش عليها ماي بارد ولا صحت شالها ياخذها للمستشفى وركضت وياه بــدور، الساعة التمر علينا تاخذ من حيلنه جريت ريـــمه الصدري أغطي بشعرها وطبوا الولد ياخذونه شالوا التابوت من بيناتنا وريمه فرفحت تصرخ وتلطم
ريـــمه:: اخوووه ما شااااافه كهلان كهلان ما شاااافه.
وفرفحت گبال صــيهد چن روحها جاي تتحرك تتوسل بيه وتصيح
-جيب كهلاااان يشووفه لا تخليها حسررره بگلبه.
وصيهد لاف الچفيه على راسه مدنك دموعه تجري وعمه جرته تبجي وتصيح
-لا تخلونهن وراكم اخيااته اخياته اخذوهن.
صاحوا عليه طلع وحسين وياهم وگالوا وهـــب ياخذهن بسيارته وراهم، وصدك بس جاب رنـــه وصلت للبيت وتلكته ريـــمه تلطم وتصرخ شبگتها وكعدن على حيلهن بنصّ الحوش
وهوسة الزلم بره تدك بروسنا وصوت حديد الچادر اليبنونه يخلب الروح حاجتهن عمه، وكومناهن اني ورغد بس غسلن وجهن وريمه لبست عبايتها حتى ياخذهن وهـــب وراهم للنجف باوعتلي رنـــه رايح صوتها وعيونها ماضال بيهن بياض حمر دم.
-ندى.. شمس... شمس عينج عليها.
دارت عمه الرغد كالتلها
-ترحين وياهن انتِ انه ينهد حيلي هنااه.
رغد:: مسحت عيوني اهز راسي اي عفت ابني بأيد ماريا ومشيت وي البنات زهره مجلبه بأيد رنـــه تبجي مفرفح گلبها
زهره:: اخذذيني اخذذيني وووياج اخذيني.
شبگتها رنـــه تبجي صاح عليها وهـــب خليها تجي وياج مشينه وراه كاضه رنـــه من. زندها ترجف على ساعة تطيح صعدنا ارواحنا رايحة توه وهـــب حرك السيارة ورنه ردت تخربطت وريمه تسودنت بس وهـــب صف السيارة نزلت للشارع متسودنه بس شافت رنـــه مگلبه عيونها غسلت وجها ووهب حار بيها صعدنا أخذنه للمستشفى انطوها ابره ومغذي وضلينه بالساعة يمها كالها وهـــب
-اردج للبيت والله راح تمووتين.
وهيه بس فاتحة عينها ودموعها يجرن طلع وهـــب يخابر على صــيهد بطينه عليهم هواي لمن شوي رنـــه صارت احسن يله ردينا مشينا وتبهذلنا ووهب ميت من القهر خاف على رنـــه حيل كلساع تتخربط وتلفونه ما سكت مره بريا يخابره مره ســليم... بريا گاله نص ساعة بعد واوصل للأمام علي گبل صيهد.
ولتلاثة الفجر رد بريا خابر وهـــب گاله بالامام علي احنا للفجر يله ندفن، كاله من تطلعون للمگبره كلي حتى كبل امشي للمگبره.
ولمن بدأ خيط الصبح يبين يله وصلنا ومشينا گبل للمگبره لگيناهم كدامنه ومتانين نوصل ويمه شصار بحال رنـــه من شافته اريد اگدر اشيلها من الگاع ماكو طاحت على اركبها تلطم على وجها وتصرخ
-عبووود ياا خوووويه يييمه ولج يييمه .
شبگت التابوت تصرخ هي وريمه وزهره وحسين يعاين للگبر ودموعه تجري، لطمنه نتصارخ مصدومات وماضل عقّل بروسنا وبس فتحوا التابوت وطلعوه ملفوف بالچفن رنـــه شهگت شهگه گلبها وكف طاحت بين ايديي رشيت عليها ماي ابجي اجه بريا يركض جرها من ايدي الحضنه غسل وجها وبس فزت تكابلت ويانه انه وريمه تلطم، گدام عيونا غطوه بالتراب.
الزلم الاجو دفانه وي صــيهد دايرين وجهم من عدنا واحد يقرأ قرآن وواحد يصبر بصيهد الملثم بچفيته والله ما شفت وگفته عدله اخوي كضه اليوم حاني ظهره واديه على اصفاحة
ومثل بنيان قديم بروجة ماي تهدمنا كل لحظة تمر عبود يبعد عنها اكثر، ورنه روحها مثل طير المنذبح ما تدري شني التسويه تزيح التراب البارد من فوگه باديها اليرجفن وتحط خدها على تراب الگبر تصيح
-ياا يمه يا عبود يا حبيبي خوويه يروح اختك يمه ما اشوفنك بعد ما اشوفنك بعد ولك يمه عبود يييمه.
ودارت وجها الگبر عــفراء مدت اديها تهزهن گبالها وتصيح
رنـــه:: عفرره يييمه وولج يمه شوفي شصااار بيه ووولج عبد راح من بين ايديه يييمه يااا يمه
وتتلفت بين گبور اهلها وتلطم على وجها شبگها بريا عيونه يجرن گمت الصيهد شبگني بكل حيله يبجي
صــيهد:: ووولج خويه وصاااني وصاني على أخيه... شگله كهلان شگله.
بجيت رايحه روحـــي متنا وتندمت گد شعر راسي چيه اجيت وياهم تگطع گـــلبي . رنـــه چنها امي گايلت گبور اهلها تنوعي بصوت مبحوح ومخنوك
-حبيبة ييييمه اكعدي وحاجيني راح اخووي يمه راح نظر عيني
ولج عفررره يا ييييمه.
مشيت يمها حايره بينها وبين ريـــمه الگابلتها وتبجي وي بچيها بعد ماضل حيل بينه وهـــب مكابل زهره وحسين شابگهم اثنينهم وحسين بس يمسح عيونه ويهز راسه اي وبريا جر رنـــه وكفها غسل وجها ومشينا من يمه نتلفت عايفينه ورانه مكسور ظهرنا.
ودرب الرجعنه بيه يوجع الروح كلشي يمر مثل الصدى صريخ النسوان من تلگنه ولطمنه والهوسه كلشي يصير صدى بأذني، رنـــه شابگه امي وتبجي تصيح بصوت مبحوح
-ريته يردلي رررريته
جا شلت صوابه من گلبه وبگلبي حطيته
راااح اخوي عمه وراااح صيته
اااخ يمه ااااخ يمه يا وجع گـــلبي يييمه.
وامي بكل حيلها شابگتها وتبجي وره ردتنا بربع ساعة اجت ميلاد مفرفحة وتبجي وتدعي على بيت عمي وعلى عبود وتصيح
-ابني من وررراكم انجلط ابني طفت عينه ووولج ريـــمه سجيد طفت عينه.
وتسب بروح عبود والنسوان يصيحن عليها كامت ريـــمه تريد تعاركها جرتها امي كاضتها من ايدها واشرت علينه انه وبدور اطلعلها، طلعت للحوش دفعتها
-اطلعيي بررره.
شالت ايدها تريد تطكني وتفشر بحرگه چن هي الميتلها عزيز مو احنا، تعاركنه وياها انه وبدور والنسوان تفرغها من بين ادينه ويصيحن
-زحممه يااا ولجن ووولجن مرت عمجن ياا يييمه.
وصارن الحنينات الماكو منهن طلعنها من ادينه دشداشتها مشگگه وشالها طايح تحلف وتهدد توها طلعت وگبت هوسة الولد بره ركضت خايفه على اخواني اعاين عليهم من يم الباب كوه كاضين صــيهد، لاكي شاكر كاعد على كرسي الفاتحة، شايل كرسي ثاني طاگه على راسه گدام الوادم وشاكر يهد وصيهد يهد طرده من الفاتحة يله صــيهد سكت.
وكل هذا وكهلان ما يدري وصيهد ميت من القهر وخايف لا يوصله خبر ويتسودن.
طبيت يم البنات بالمطبخ ندى تلوع من بطنها وماسه وجويريه يحجن عليها يردنها تگعد اشتغل وياهن ودموعي يجرن نسمع نواعي النسوان وبجي ريـــمه ورنه گـــلبي يفرفح، ورنه تبجي بحرگه تريد حيل وتوكف بفاتحة اخوها ماكو صحتها تغدرها وردت تخربطت. حسين تسودن طب بنص النسوان شبگها يصيح ويبجي وهي طايحة بين أديه ركضت بماي بارد اغسل أديها ووجها شهگت عيونها ذبلانه گوه تعاين بوجهنا.
وحسين يضم بيها بحضنه يبجي وامي تحجي عليها ما ترضى تاكل ولا تشرب علاج السكر انطيناه لحسين عاينلها يتوسل
حسين:: فـــدوه اروحنلج لا تشلعين گلوبنه.
شربت الحباية من ايده ذبلانه كلها طلع وعيونه عليها مشت شمس الحضنها تشبگها وتمسح عيونها تگلها
-وين خالو عبود؟
شبگتها رنـــه تبجي ومرن أيأم الفاتحه بلوعة... سلطان بالسجن وسجاد بالمستشفى مجلوط وبسبب الجلطه وحده من عيونه ما يشوف بيها وسليم بأخر يوم من الفاتحة بريا راح بمچانه وهوه اجه وتلگوه وهـــب وصيهد مشابگ ثلاثتهم يبجون مكسورين حيل لان عبود وصية عمي شامل ولان طــروادة موصي صــيهد عليه، ضل ســليم ساعة ورد للمستشفى .
بدت الناس تروح الاهلها واحنا نستوعب دفنه نفر من اهلنه ومچانه راح يضل فارغ بيناتنا، كعدت بصف رنـــه سانده راسها على الحايط زهره نايمه على رجلها وشمس تمسح بعيونها وتبوسها بخدودها وهي عينها على باب الهول الدنيا بارده ومغيمه چن يوم وفاة عفره تاريخ وفاتها وتاريخ وفاة عبود بينهن شهر وشويه، مديت ايدي الرنه امسح على ايدها واحاجيها
-رنـــه اجيبلج شي تاكلينه مو زين عليج من الصبح الهسه بلا اكل لا تتخربطين.
هزت راسها لا وعيونها على الساعة همست بصوت مبحوح
-نفس ايام فاتحة عــفراء
سكتت محتارة وموجعني گـــلبي عليها لمحت بريا طب للحوش ويأشر يسالني اذا اكو غريبة لو بس بناتنا صاحت عليه امي وطب ورنه بس لمحته ردت تبجي كعد يمها وهي ردت النفس البچي
-ررراح اخووي راح عبود راااح.
وهو شابگها بحيره ما يدري بيا حچاية يصبرها وخرها من صدره يمسح عيونها ويحاجيها
-انا لله وانا اليه راجعون، انتِ انسانة مؤمنه بقضاء الله وقدره، وقوية وصبوره والجاي تسوينه حرام يا بعد روحـــي لا تضرين نفسج تعلين گـــلبي وگلب اخوتج... هذا حسين رايحه روحه من الخوف عليج جا هيج هيه؟
ورنه تهز راسها لا دموعها يجرن رد لمها الصدره وامي هم تحجي وياها ووي ريـــمه توصيها وريمه تگلها
ريـــمه:: عمه شيصبرني اثنينهم عززاز دفنت واحد وواحد بالمستشفى ما ادري شني حاله، وسلطان بالسجن ورجلي بالسجن مصيبتي مصيبة عممممه.
وتلطم على رجليها بحرگه بس اللطم والبجي ما غير شي من مصيبتنا وضلت مثل ما هيه، نظفنه وعزلنا انه والبنات، وماريا ملتهيه بجهالنه حايره بيهم هي وهاجر طبيت يمها للغرفة تبجي تعبانه اخذت سيف ورضا وحاجيت هاجر اجت وياي مشيت لييت اهلي گـــلبي بعد ما يحمل.
ريمه:: كل ما اظنها هانت يزيد وجعها اصبر گـــلبي مدري اصبر رنـــه الما حاسه بروحها وتفز كل ما لمحت واحد من ولدنا يم الباب ولمن تشوف وجهه ترد المچانها بعدها متأمله كل العشناه حلم وبلكن نصحى منه
مسحت عيوني وكعدت يمها احاجيها وانه بنفسي ما مقتنعه
- رنـــه يا بعد حيلي لا تشلعين گـــلبي عليج، تعاي تكومين تصلين؟
عاينت بوجهي ذبلانه همست صوتها مبحوح
-ريت انه بمچانه، چنت اظن اكبر وجع اعيشنه فگد عفره اثاري الزمن ضاملي مصيبة تهدم الحيل... ريـــمه نار بگلبي نار ما تنخمد اريدن اخوي اريدن عبود انه وياه فد روح .
شبگتها ابجي وهي تدفن روحها بحضني ساعة تحجي بوعيها ساعة لا بس وخرت منها ولمحت صــيهد صررخت تطك أديها بالگاع وتصيح عليه
-ررردلي اخووواني ردلي كهلااان اخوووي ماات وكهلان ما يدري
كضيت اديها اتوسل
-رنـــه والله مو زين عليج رنـــه فـــدوه.
بچت الحد ما فرفح گلبها وبهتت روحها بحضني مسحت عيونها ساكته واجن البنات يمي ندى وجويريه وماسه يحاجنها غمّضت عيونها ما تحاجيهن، يا ثگل الوكت اليمر علينه الحد الساعة بهدعش من اللليل گوه نامت عفت عمتي والبنات يمها وطلعت وي بريا للمستشفى گـــلبي يم سجاد .
وبالتواسيل يله دخلونه تلاگه وياي ســليم مسحت دموعي وكضيت بأيده رايحه روحـــي
-شلونه سجاد؟
تحسر يهز راسه
-مو زين عينه انتهت ما يشوف بيها. وما يحجي.
طبيت للغرفة دموعي يجرن اعاينله وجهه اصفر ممدد الكانونه بأيده فاتح عيونه على الفراغ، تدنيت يمه روحـــي رايحه مديت ايدي اتلمس شعره
-سجاد يا روحـــي .
وهو بس يرمش بعيونه حتى ما عاينلي دنگت ابوسه وابجي
-سجاد خويه يا بعد حيلي حاجيني
مسحت على خده ووخرت شعره من كصته احاجيه واتوسل بيه ولا حاجاني نص ساعة ضليت يمه وطلعت الدرب كله گـــلبي مفرفح شجاي يصير بحالنه. مسحت عيوني احاجي بريا
-سلطان ما يطلع؟
-لا الا يطلع كهلان ويتنازل وكتها يطلع.
هزيت راسي خوش وصلني للبيت وطب الدوانيتنه باله يم رنـــه غسلت وجهي وكعدت يم عمه بالهول احجيلها على سجاد مدت ايدها تمسح على ايدي
-لحد يلومه ولا تلومون رنـــه البگلبها وجع ما ينحمل.
مسحت وجهي وگمت للغرفة منومتهم كلهم يمها حسين وزهره وشمس طبيت الغرفتي يم علاوي وبس سديت باب الغرفة غطيت حلكي اصيح واكتم صوتي انهجم بيتنا وانهد حيلنه ومصيبتنا ما تتسولف.
جــويريه:: ابد ما ناويه الدنيا تصحكلنا، نومت ابني ودموعي على خدي كل ما اتذكر حچايات رنـــه ينمرد گـــلبي.
كمت من يم كرار توضيت ورجعت اصلي وأقرأ قرآن العبود، بعدني على السجادة ودخل صــيهد مكسور حييل وميت من القهر، ذب چفيته وكعد بالگاع حاط اديه على راسه وصافن بالفراغ لحد ما سدّيت القرآن حاجيته
-صــيهد.
شال راسه متحسر عاينلي عيونه حمر مسح وجهه وتمدد حاط راسه على رجلي غطه عيونه بأيده ساكتين اثنينا ما ادري اواسيه لو يواسيني ويا حجايه تصبره وتقوية
-صــيهد
زفر نفس متحسر ضام عيونه عني حجه وصوته مخنوك
-لو مييت انه ولا عبود
-اسم الله.
-يا فشلتي يا سواد وجهي گبال كهلان شگله وولج شگله انا مو خوش زلمه وما حميت اااخوك لا مشيت بوصيتك ولا بوصية ابوك ... اثنينكم وصيتوني على عبود.
لميته الحضني بأثنين ايديي ضم وجهه بازار الصلاة نفسه عالي وخنگته ذبحتني
-انكسر ظهري جــويريه انكسر ظهرري... تفرهدوا من بين ادينا اولاد عمي.
مسحت دموعي مختنگه گوه احاجيه
-الله يرحمهم ويصبرنا ويصبر گلب اخوانهم... سوي اي شي اي شي وطلع كهلان من السجن والله رنـــه وريمه ماضل بيهن حييل راح يموتون من القهر هسه يصير بيهم شي .
مديت ايدي لوجهه اريد يعاين بوجهي من احاجيه تبللن ايدي بدموعه دفع ايدي ورد غطه وجهه عني سندت راسي على الميز ساكته ورجعت اقرأ قرآن لحد ما رجلي گمت ما احس بيها كعدته فز يخرعة وكف على حيله ويتلفت
-اسم الله الزهره اسم الله.
باوعلي مستوعب مسح وجهه جر جفيته وطلع، كمت طفيت الضوه وتمددت بفراشي. بعده صريخ الفاتحة يتردد براسي الحد ما غفيت.
ريـــمه:: يا ثگل الليل وحيرته اغفى وكلساع افزن للفحر صليت ورديت غفيت اقل الربع ساعة وفزيت طلعت من الغرفة ما مرتاحة اريد امشي انام يم رنـــه بلكن اگدر أغفى بلا ما افز بس فتحت الباب وعاينت لفراشها ما لگيتها.
طلعت بساع خايفه اتلفت بالحوش والمحها ملتفه بعبايتها لامه رجليها الصدرها وكاعده بباب الحوش تعاين للشارع الجو بارد ثلج وهي كاعده هناه تدنيت يمها احاجيها
-رنـــه .
عاينت بوجها غافيه مديت ايدي هزيتها من جتفها فزت فاتحه عينها حيل وتتلفت تعاين للدرب گـــلبي مردته حريت ايدها بأيدي احاجيها
-ليش كاعده هنا.
-اتاني اخواني
جرت ايدها من ايدي حضنت بيهن اركبها وردت تعاين للدرب مسحت عيوني گـــلبي يدك حيل
-رنـــه... شبيج؟
وهي تعاين ليغاد ساكته مديت ايدي امسح على زندها
-فـــدوه كومي وياي لا تخوفيني عليج البيه كافيني رنـــه.
غمضت عينها تهمس من بين اسنانها
-اريدن اخوواني.
سكتت محتاره وگلبي يدك بوجع ضليت كاعده يمها للصبح وهي تدك على رجليها بأيدها على كيف وتردد بصوت ناصي
-يريت المووت ... اخذ روحـــي ويريحني
اذا انساك الله لا يسامحني.
-ررنه رنـــه تمردين گـــلبي وعلي تمرردين گـــلبي لا تسوين بيه هيج.
حطت راسها على جتفي شبگتها دموعي وي دموعها يجرن تحجي وتناشغ
-خل يردلي كهلان اريدن يعلمني، بس خل يرد .
مسحت دموعها ابوس براسها
-ان شاءالله يطلع وتفرج علينا ان شاءالله.
شلت راسي على صوت سيارة لمن عدت النخلات يله شفتها صــيهد وميثم ووراهم سيارة وهـــب هو وبريا بيها، طبگوا گدامنه وخرت من رنه عدلت حجابي اعاينلهم مستغربه لمحت اسلاحهم بالسيارات ونزلوا كلهم اجوا علينه بريا كعد كبال رنـــه يحاجيها والولد واكفين بصفه
بريا:: ليش كاعده هناه؟
وهي شالت راسها تعاين الصيهد دنك ما يحط عينه بعينها گالها مــيثم
-رنـــه خويه بيج شي؟
هزت راسها لا وهمست
-مابيه شي متانيه اخوي.
صفنوا بوجها ساكتين وهيه تحسرت تمسح بوجها شفايفها يرجفن گعدوا گبالها كلهم گالها صــيهد
-بس خل خالج يرد للعراق والله اطلع كهلان، گومي طبي جوه بارده هناه مو زين عليج
هزت راسها لا تعاين بوجهه وبوجهه بريا
-من يجون اخواني.
وكف صــيهد بحيره حط ايده على وجهه وانطانه ظهره حاجاها وهـــب وحاجاها مــيثم ولا رضت ولا طبت للبيت بريا جر بلوكه حطها بصفها وكعد وهي ايدها على خدها وتعاين للدرب ضلوا الولد مكابلينها محتارين رادوا بس يقنعونها تطب للبيت ما گدروا مشوا وضل بريا يمنه.
طبيت جوه من سمعت علي يبجي كعدوا كلهم سويت الريوك ورنه بعدها بره طلعت عمه حاجتها ما رضت ولا اجت لمن حسين طلع گعد يمها ومد أيده لمها الصدره ضمت وجها بحضنه تبجي وتبوس بيه بخوف طاير گلبها
-لا تروح الاي مچان من گدام عيني لا تروح لا انتَ ولا زهره.
حسين:: ما رايح يا بعد روحـــي... كومي تعاي خل نطب جوه بارده عليج والله بارده عليج.
هزت راسها لا تبجي مد اديه بريا يكض اديها ويحاجيها بقهر
بريا:: گومي رنـــه لا تشلعين گـــلبي يمن فـــدوه اروحنلج گومي.
جراها من ايدها ترجف جابها للهول يم عمه شبگتها عمه تبوسها وتصبر بيها، غسلت الشمس ووديتها الها ركضت الحضنها شبگتها تبوس بوجها ورنه تشمها حييل وتزفر نفس روحها رايحه.
عاينت لباب الحوش من اندك مشه حسين فتحة طبت هاجر وجها اصفر صحتلها يمي للمطبخ خايفه
-شبيج ياهو وياج؟
هزت راسها ماكو شي
-چنتِ يم رغد غير؟
هزت راسها اي
-جا شبيج حاجيني ليش وجهج اصفر خايفه؟
اشرت بأديها لا بس ما گدرت انام، عافتني ومشت يمهم كعدت يم علاوي وتعاين الرنه بقهر.
وعده اليوم بالف حسره ووجع كلساع نبجي وعمه تفتر علينه. تصبر وتواسي، للعصر گالوا طلعوا سجاد من المستشفى ركضت فرشتله بالدوانيه ومشيت لباب الحوش اعاين نزلوه من السيارة ســليم وبريا اثنينهم كاضينه وهو يمشي حاني ظهره وامي طلعتلهم تبجي عليه وانصدم بيه ما يرضى يجي يمنه يأشر بأصبعه على بيت شاكر، اخذوه وانه اعاين وراه گـــلبي ممرود.
سكتت ميته من القهر، وعيوني عليهم بريا بس وصله وطلع وهاجر تعاين وياي مقهوره جرّت ايدها تريد تطلع جريتها حيل خازرتها
-وووين؟
اشرت على بيتهم
-لااا ما ترحين.
دفعت ايدي وطلعت تركض درت وجهي الرنه وعمه مصدومة ركضت للتلفون اخابر ســليم رايحه روحـــي بس گالي الو. گتله
-هااجر اجتك هاجر.
-اي هاي يم سجاد
-ردها يمي فـــدوه ســليم لا يصير بيها شي
سكت شويه ورد گال
-الله كريم.
سد التلفون وانه روحـــي رايحه بينهن وبين رنـــه الردت وكت الغروب كعدت بباب الحوش وتعاين للدرب فرفحت روحـــي من القهر ساعتين تلاثة يله تطب للبيت وبالتواسيل يله تاكللها لگمه.
بالليل رديت خابرت ســليم أنشده على سجاد گال
-نفس وضعه.
-مو تخليهم وتطلع.
-يمهم.
يحجي وماله خلك سديته منه الخوف داك گـــلبي . عمه ابد ما تيهتنا وحتى البنات كلساع وحده منهن تجي يمنه، الثاني يوم الصبح كعدتهم يرحون للمدرسة وطلعت للحوش اشوفن رنـــه وهي على نفس الكعده حاجيتها كالت
رنه ::ما اروحن انه بطلت
-كوومي كوومي مو بكيفج بطلتي.
جريتها من ايدها هبتتها من عندي وردت لامه رجليها الصدرها
-ولج رنـــه سادس انتِ سااادس شني البطلتي.
احاجيها وهي ولا مهتمه موتتني من القهر طبيت للبيت لگيت بس زهره مبدله وتعاين لحسين تبجي درت وجهي اله
-ليش ما مبدل.
حسين:: ما اروحن اريدن امشي للگاع اذا ما تنسگي اليوم تخرب.
لطمت على وجهي ابجي واصيييح كضه صبري
-تررردون تسودنوني يا گاااع هاي يا گااااع امشي بدل.
صاحت عليه عمه وهوه ولا مهتم لبس قمصلته ومشه وكفت رنـــه متسودنه تحاجيه گالها
-رايح للگاع اشوفلي واحد يشغل المكاين انا ما اگدر بس يشغلونهن الي واسگيها
مسحت وجها تهز راسها لا
-ما ترروح لاا.
حسين:: تخرررب كاعنه وتروح فلوس اخوانج.
ريـــمه:: خل تخرررب خلها تولي ما نريدهاا.
رنـــه:: امشي بدل تروّح للمدرسه.
حسين:: يابه والله ما اداوم لو تنگلب الدنيا وخري عني.
دفع رنـــه يريد يمشي جرته حيل متسودنه وتصيح
-بس تروح تموووت بس ترووووح تمووت.
جره بريا منها ترجف كلها وتصيح بخيال
-يموووت حسين يمووت اذا راح للگاع حسين يمووت.
بريا:: اششش رنـــه شني السالفة كااافي
مسح وجها يسكتها ترجف وتحجي بلا وعي
-ماتت عفره ومات عبود... حسين وزهره واحد منهم يمووت اموتن بعد ما اگدر اموتن.
رد بريا شابگها وحسين يعاينلها بقهر عيونه مدمعه جابها للبيت وهوه طب ورانه كعدها بريا يم عمه يمسح بوجها ويحاجونها اثنينهم وحسين واكف بباب الهول يحجي وياها بقهر
حسين:: انا اگدر للسگي ليش اخلي الگاع تخرب وهذا تعب عبوود وفلوس كهلان يضيعن هيج مو حرامات... عليمن قهرتي روحج هسه؟
بريا:: رنـــه انا اروحن وياه وما ارد الا رجلي على رجله خوش؟
غمضت عيونها رايحه روحها گال لحسين ضل وانه امشي للگاع ولا رضى عناد يعاند، مشوا سوه للگاع ووهب اجه على زهره اخذها هيه ورضا للمدرسة ورنه قفلت ابد ما رضت تداوم.
وكضتها بخوف كل شوي وكالت
-خاف. زهره اندعمت... خاف حسين صار بيه شي اروحن اشوفنه.
وتجر عبايتها تحجي وتمشي كضيتها من ايدها محتركه حرك شكد بعد لازم اصبر واتحمل هالتعب ماضل واحد منهم ما انفجع شلون بيه وشلون اصبرهم
-مابيه شي هسه يجون هوه وبريا.
-لاا بطوا عاينــي للساعة جا اجوا لو مابيه شي .
اجت عمه يمي تحاجيها محتاره وياي قفلت تروح تشوف حسين گتلها
-تانيني اجيبن عباتي واجيج.
طبيت اركض لبست عبايتي اخذتها ومشيت للگيعان عفت شمس وعلي يم عمه.. تمشي وتردد
- يارب احفظهم يا رب احفظهم.
تونه وصلنه الشارع ولمحناهم يفترون بالگاع سوه حسين وبريا كضيتها من ايدها
-تعاي نرد هذاك حسين وكلشي مابيه
-وزهره؟
-رنـــه عقل ماضل براسي راح تسودنيني زهره بالمدرسه وهـــب يردها من يكضي الدوام.
مسحت وجها ساعات ترد تستوعب وساعات أحسنها حتى وفاة عبود ما مقتنعه بيها بحيث من عمه تذكر وحده من النسوان يمها وتكلها فلانه حاجتج وشبگتج تكلها لا ما شفتها.
اخذتها ورديت للبيت وكل يوم يعدي هي گبل اذان الغروب تكعد بباب الحوش وتعاين للدرب وكت رجعت اخوانها بس محد منهم يمر.
فزيت على صياح صــيهد وركضته گـــلبي انخمش من سمعت اسم كهلان ركضوا للسيارات هوه وبريا وميثم ووهب يتصايحون واحنا ما فاهمين شي حسين جان يمهم اجانه وجهه احمر ويمسح بعيونه. ميت من القهر وكوه يحاجينه
حسين:: مدري ياهو.. مدري ياهو گايل الطرواده سجاد كتل عبود. وطرواده يگولون.. يكولون طايح وناقلينه للمستشفى.
يحجي ويجر نفس بشهگه حيله رايح... وانه احس بگلبي انمرد وماضل بيه حييل كعدت ممروده روحـــي ورنه غطت وجها بأثنين اديها حرف ما نطقت وعمه تفتر علينه بخوف وتخابر على صــيهد ووهب تحاجينه رايح حيلها كابلتنه وكعدت تدعي وتصبر بينه ضميت وجهي بين ايديي ابجي والله ما ضل بيه حيييل
وبالساعتين يله وهـــب رد على امه جريت التلفون من ايدها افتح السماعه رايحه روحـــي حاجاها مختنك
- ها يمه.
-ولك يمه موتوني ليش ما تردون.. كهلان شلونه.
وهـــب:: مهدود حييله شلونه يمه شلونه؟ طببوه للعنايه المركزه گلبه مو ززين يمه ادعيله راح نتسودن ومايخلونه نشوفه.
وهذا حد صبرنه صرخت رنـــه بكل صوتها لطمت على رجليَّ ماضل صبر ماضل عقل يحمل صدمه بعد التمن علينا البنات واحنا حيلنه انهد ل١٢ من الليل يله ردوا طمنونه بعده بالعنايه بس وضعه احسن توسلنه وبجينا الحد ما ملينا بس اخذونه نشوفه... حلفوا هنه مايخلونهم يشوفونه ضالين من بعيد لبعيد يطمنون عليه
وما غفت عينا للصبح كاعدين بباب الحوش متبهذلين وسليم ضال مثل بلاع الموس يفتر بباب حوشهم يعاين علينه ميت من القهر لا بيه يضل. ولا بيه يروح يخاف على هاجر وسجاد
بالسبعة يله ردوا وهـــب وبريا ركضت رنـــه البريا متسودنه وهو كضها يحلف صار احسن جلبت بأيده مفرفحه
-طلعوه من العنااايه طلعوه؟
بريا:: لا يومين ويطلعونه يطمنون عليه ويتأكدون من صحته.
-اخذذني اشوفنه اخذني
تبجي وتتوسل بيه لمها الصدره ميت من القهر ووهب يحاجيها
وهـــب:: رنـــه خويه والعباس احنا ماخلونه نشوفه ما يرضون
ومثل السم عدن يومين ما شفنه صــيهد بيهن.. كل واحد بينه يبجي على همه... رغد ميته من القهر على سلطان لان سالفتها تخوف بسبب اثار الضرب بجسم عبود ضايفينها بالتقرير ومخلينها قتل متعمد. ومنين ما ادير وجهي تلاكيني مصيبة.
ثالث يوم كالوا طلعوا كهلان من العنايه ووراها بيومين ردّوه للمركز وولدنه ابد ما شايفينه شويه گدرنا نجر نفس وكيفنه من گالوا جعفر خال كهلان رد من الهند وساحل ولد سهيل مطيح حظهم ومتنازلين وضل بس ابن راضي يعاند ما يتنازل. كالولهم خيولي ما يهم كلها كالت مو هوه بعد هذا لا يقدم ولا يأخر، وضلينه متانين ليمت يطلع مهدود حيلنه.
وكل يوم يعدي يمرد گـــلبي ورنه ما تيهت الباب ومن تشلع گـــلبي اودي عليها شمس بس هيه تگدر تخليها تطب للبيت.
حسين جبرته رد يداوم بس ما تيهه الگيعان ورنه تتسودن يطير گلبها وماتخليه ينام بالدوانيه تبجي وتصررخ الا تنام يمنه بالغرفه ومو بأيدها خوفها مو بأيدها ضلت كل ما تعاينلي تبجي وتكلي
-خاف يموت واحد منهم.
مديت ايدي امسح عيونها اهز راسي لا
-لا تفاولين عليهم رنـــه .
سكتت شفايفها يرجفن كاعده يمها بباب الحوش درت وجهي اعاين البيت شاكر شفته طلع على العكازة وهيه وياه مرتضى متانيهم بالسيارة صعدوا اثنينهم وهي بس صعدت بالسياره عاينت علي من الجامه أبتسمت بشماته مردت روحـــي درت عيوني منها ساكته لمن حركت سيارتهم همه طلعوا وسيارة الولد طبگت بس نزلوا صــيهد صاح على رنـــه
-والله باجر هيج وكت اخوج يمج .
مسحت عيونها تهز راسها لا
-ما اصدگك.
بريا كعد كبالها وهمّه التموا يحجون وياها ضميت روحـــي وره الباب مادره بس راسي
بريا:: والله صدك باجر يمج.
وهـــب:: ان شاءالله كضت يطلع وهم سلطان يجوز باجر يطلع
مسحت عيونها ساكته والولد داروا وجوهم على صوت ســليم اجه يتمشى يمهم سلم عليهم وهمه ينشدونه على سجاد
ســليم:: نفس وضعه احجي لمن امل ما يحاجيني، انتم شسويتوا؟
مــيثم:: نحلت ان شاءالله انحلت بفضل رب العالمين واحفاد جدي محسن وشيخ حيدر الله ينطيه الصحه والعافيه، كضت حتى سلطان باجر يطلع حلوها لا قتل متعمد ولا هم يحزنون.
هز راسه خوش عافهم يحجون واجه يمي بالباب حاجيته
-شعجب عفت هاجر وسجاد؟
-مو هذول طلعوا مدري وين مشوا.
-شفتهم ســليم ، متشمته بيه تعاينلي وتضحك.
احاجيه والغصه خانگتني عاين بعيوني مقهور هز راسه ميخالف
ســليم:: شفت الأتعس ميخالف الله كريم.
-هجوره ليش ما اجت يمي شمالها؟
-مداريه سجاد وياي والله... هسه لمن سجاد نام هيه راحت تسبح وانه كلت خل اشوفنهم.
-ديربالك عليها لو طلعت من البيت وديها يمي.
هز راسه اي وفززيت على صرخه بأسمي فززتني الصوت اعرفنه بس ما اميزه ياهوه
-رررررررريمه .
التفتوا الولد كلهم على بيت اهلي وانه گـــلبي احسه يدك براسي والمح هاجر بباب الحوش تصرخ مفرفحة اعاين مصدومة بيها وبصوتها وهي تصرررخ
هاجر::: ررررريمه رررريمه لحگي سجاد.
ركض ســليم بكل حيله وركضوا الولد وياه وانه الگاع افتريت بيه اركض ورجلي احسهن ما ثابتات اسمع صياح الولد ميته من الخوف واول ما وصلت للغرفة اشوفن سجاد معلگ بالبنكه والولد متكابلين عليه شايلينه يتصايحون
كعدت مهدود حيلي اسمع صوته يصيح عليهم وهمه غصباً عليه نزلوه من الحبل متسودنين طكه ســليم وهوه لطم على وجهه وعلى عيونه بكل
سجاد:: وووولكم كتلت صاااااحبي ولكم موتت صااااحبي
ركضت هاجر تشبگه تبجي وتحاجيه وانه اذني تون جرها ســليم فاتح عيّنه بصدمة يعاين بوجها دفعت ايده وردت شبگت سجاد
هاجر:: ما تدررري ما تدري ماجنت متقصد.
تبجي وتصيح جره صــيهد يحاجيه بحرگه
-ما تخاف الله انتَ؟ اذا ما تفكر برووحك فكر بينا فكر بأخووتك.
وهو مايحاجيه ذبلان كله ومنتهي هز راسه خوش
-اتاني كهلان يكتلني وياخذ ثار اخوه مني انا ارتاح وهوه يرتاح.
تعارك وياه صــيهد جروه الولد طلعوه ومشوا كام تمدد بمچانه وسليم مشه يغسل تدنيت يمه ابجي مديت ايدي امسح وجهه وحده من عيونه حتى من ادني ايدي يمها ما يرمش بيها انتهت طفت، دنگت ابوسه واحاجيه گـــلبي رايح
-ليش هيج تسوي سجاد؟ والله تمووتني.
غمض عينه وجرت دمعته على خده ضم وجهه بالمخده يبجي بنحيب
-وولج كتلت صاااحبي ولج والله ما مصدك اناا انا كتلت عبود كتلت ررروحي كتلت روووحي.
شبگته ابجي وادعي الله يعينه ويصبر گلبه.. ضليت يمه الحد ما غفى وهاجر تعاينله وعيونها يجرن اشرتلها بأيدي تعاي اجت الحضني شبگتها ابوسها واحاجيها
-تحجين هاجر تحجين؟
عاينت بوجهي تهز راسها اي
-احجي احجي خليني اسمع صوتج.
هزت راسها لاا بجيت احجي بحرگه
-ووولج احجي ليش تگطعين گـــلبي احجي.
هاجر::الحجي اذيه الي.
صفنت بوجها ساكته عافتني وطلعت گمت وراها ســليم كاعد بباب الغرفة صافن على الحايط عفتهم ورديت للبيت كلهم يحجون بهاجر بس انه حجايتها تدك براسي عمه تكول
-انصدمت بسجاد وحجت.
هزيت راسي لا وكمت من يمها افكر اختي من زمان تحجي ومن جنت اسمع صوتها وعبالي اتخيل هاي حقيقه ، رد ســليم بالليل خابرني يسأل
-اكلج هاجر غير مساع تحجي لو انا تسودنت؟
-اي حجت
ووي حجايتي سمعت صوت فرح يمهم سكت ســليم وهيه تكلها
-مبرووك عمه مبروووك رجع صوت هاجر.
انخمش گـــلبي وسليم سد التلفون خايفه حيل وابد ما مرتاحة... الثاني يوم الولد من الصبح مشوا علمود كهلان وسلطان للعصر وهمه ماكو... كعدت يم رنـــه بعتبة الباب اثننيا نعاين للدرب ماضل بيه حيل.
دك گـــلبي حيل من سمعت صوت سيارة ولمحتها سيارة صــيهد بس هوه بيها نزل يدخن صاحت عليه رنـــه صوتها يرجف
-هاا وين كهلان؟
ذب الجكارة بالگاع داس عليها ومسح وجهه گوه يحاجينه
-هسه يجي
طلع ســليم من باب بيتهم صاح عليه
-ليش مارحت وياهم؟
سكتت يعاين للدرب مسحت وجهي گـــلبي يدك حيل وانه اسمع صوت السيارات شهگت ووگفت على حيلي من لمحته وي مــيثم صاعد گدام بدشداشته السوده الاخذوها اله الولد والچفيه ملفوفه على رگبته نزل. من السيارة رنـــه وكفت على حيلها تبجي وما تگدر تمشيله مچلبه بالباب
وصيهد واكف على صفحة مدنك اعاين لكهلان وروحي تنمرد يمشي ايده على صفاحة وايده الثانية مستند بيها على السيارة مهدود حييله
شال اديه صفك ايد بأيد. ما يدري شيحجي اجاه صــيهد بساع شبگه بكل حيله
كهلان:: يااا بويه يا عبيد يا خويه.
فرفحت روحـــي من البجي والولد تلثموا كلهن يبجون وصيهد يتعذر مختنك
صــيهد:: مو گد وووصيتك انا خوويه مو گد وووصيتك مات اخيك بين ادييه.
اهتز جسمهم يتباچون وكهلان ساند روحه على جتف صــيهد مهدود حيله طلعتلهم عمه وهو ابتعد عن صــيهد وهيه تلكته تصيح
-يا يييمه يا كهلان يمممه
مد ايده الها مكسور ظهره
كهلان:: تعاااي ليه عمه انكسرر ظهري انكسررر ظهري.
شبگته عمتي تبجي وهوه تسودن
- رراح اخييي عمه ررراح اخيي.. يا بووووويه.
ورنه تريد توصله ما تگدر رجليها على الگاع ويرجفن عاف عمه واجه الرنه وبس وصلت حضنه بجت بصررريخ
فرفحنا من البجي لمن حاجوه الولد مو زين على گلبه كعد بالهول مدنك ودموعه يجرن وعمتي والولد مكابلينه يحاجونه ويصبرونه وهوه بس مدنك ويهز راسه اي ساكت... سلطان ما رهمت يطلع وياه بنفس اليوم رغم اول ما كهلان طالع رايح وياهم للمركز البيه سلطان حتى يتنازل بس ما اعرف ليش ما طلعوه
درت وجهي الباب الحوش على صوت ســليم يصيح على سجاد عاينت السجاد طب للحوش گوه يمشي حاني ظهره اجه للهول كهلان يعاينله ساكت كعد گباله مختنك
سجاد:: اناا... انا كتلت.. كتلت عبود... كتلت صاحبي اناا... اكتلني اكتلني اخذ ثارك مني مووتني .
وكهلان يعاين بوجهه ساكت مسح عيونه. گاله
كهلان:: انتَ عايش حتى اكتلك؟
سكت سجاد يعاين بوجه شبگه كهلان يبجون اثنينهم يتوسل بيه
سجاد:: اريدن اموتن خلوووني ارتاحن انهد حيلي انهد حيلي موتت اخوي وصاحبي .
ومالحگوه يرتاحون خابرهم شيخ حيدر كالهم بيت غانم مودين ناس عليَّ حتى ابلغكم الليله يدگونكم لو تسلمونهم كهلان ... نص ساعة ويوصلكم العتاد والعصر يوصلونكم ولدي.
اخذوا كهلان وطلعوا بره يحجون وسليم من شالف سجاد راح يطيح اخذه ورد للبيت، اعاين بخوف واسمع صوتهم من اجه واحد من بيت شيخ حيدر جايب السيارة متروسه سلاح فرغوها بحوشنا وبعد ما شفنه كهلان الحد الليل
كاعده يم رنـــه بباب الحوش دموعها يجرن على خدها وتردد بصوت مبحوح
-بعد انتَ عبود يروح رنـــه ليمت ترد خويه ليمت ترد النه .. بعدني اكعد بالباب اتانيك واكعد العمر كله لو تردلي يوم يوم اشبگك واشمنك يا ضي عيووني .
مسحت وجها تعاين الضوه السيارة نزلوا الولد عاين عليها كهلان واجه يمها گوه يمشي كعد كدامها مد ايده يمسح وجها ويحاجيها صوته مبحوح
-ليش كاعدات هناه؟
وهي تعاين بعيونه دموعها يجرن حاجته صوتها مخنوك
رنه::شلون گدرت كهلان شلون گلبك تحمل من ماتت عفره؟ شلون گدرت تصبر على موت نصفك
انه ما جاي اگدر ما جاي اگدر اتحمل فررراگه گـــلبي يتچووه عليه كلساع اموتن كلساع اموووتن.
شبگها وهي تبچي بحرگه
-والله ما اگدر انه مو قوية مثلك حاجيني علمني علمني شلون اتحمل وجع گـــلبي عليه شلون اقتنع علمني واقنع گـــلبي تبرررد ناره.
باسها براسها مايگدر يحجي مختنك وجرها من ايدها حاضنها طبينه للبيت اخذتها من ايده اغسل وجها وهوه كعد بالهول ملتمين عليه حسين وزهره وشمس وعلاوي يمه.
وبس عدت ال١٢ تحزموا يمشون للساتر گدام بيوتنا حتى يصيرون مگابل وي بيت غانم، حطيت ايدي على گـــلبي بخوف اعاينلهم بالحوش يتحزمون ويشيلون بالطلق ويعبون طلع ابوي يصيح على ســليم
-تعاااال مالك غرررض بيهم تعااال لا ارميك بالحسين ارميك.
هز راسه كهلان صاح عليه
-اصبرررلي افرغلك.
واسمع ابوي يضحك ويصيح عليه
-الله شيسوي بيك بعد ما تهيد يوميه ناصبلك فاتحة وانتَ لا تتعض لا تهود.
كهلان:: الحمدلله.. الحمدلله على كل حال، ربي هو الينطي وهو الياخذ..والموت حق علينا كلنه
ابتلاني بفگد اعزاز وانا راضي بقضاء الله وقدره الحمدلله.
رد ابوي يضحك ويصيح
-لااا ما ترتاح انتَ الا تكتل اولادنا يله تهيد.
صــيهد:: يشهد الحسين حجايه بعد ارميك
وليد:: تعااال شاكر تعال.
اخذه وراح... والولد مشوا للساتر اقل الربع ساعة وعله صوت الرمي چنه فوگنه رنـــه لامتهم بالغرفة وعمتي راحت للبنات كالت يخافن طلعت. بخوف اعاين السماء شلون الشرار الاحمر تارسها.
رديت الرنه اركض
-رنـــه رايحه الهاجر تخاف من الطلق وتضل وحدها بالغرفه.
هزت راسها خوش طلعت بسد الحايط اركض وخااايفه طبيت للبيت توني حطيت رجلي بالهول. وصرررخت گـــلبي ررايح
-لااااااا.
شكرا لزيارتكم عالم روايات سكيرهوم
