رواية علي اليتيم الفصل السابع بقلم جمانه السعيدي
علي...كمت على حيلي مسحت دموعي
...ليش ما حجيتي ليش ساكته مريضه وساكته
لمن المرض استفحل بجسمج
لو من البدايه مطيتني خبر جان بدينا بلعلاج
امي....اني ماعرفت كلش من البدايه لان هذا المرض
لمن ينتشر بلجسم يله الواحد يعرفه
اله اذا واحد كان يداوم على التحاليل كل فتره بكدر يعرفه من وكت هو اسمه سر طان يعني يمشي بلجسم بسريه
بعدين هيج مرض يرادله مراجعات وعلاج
واحنا يله على كد الراتب وانت جنت تدرس
علي...انتي تهمين بيه ماتهمين بنفسج جان عايف
المعهد سنه شيصير ما يصير شي
ليش هيج اني منو اليه من بعدج ليش تردين تحرميني منج
امي...مااريدك تزعل انت اغلى شي عندي بهاي الدنيا
علي...حتى لا ازعليني تاخذين نفسج للتهلكه
رجعنا دخلنا للغرفه مهدي كعد شويه وكال اني راح اجيب اكل واجي
اذن المغرب توضيت وكعدت اصلي امي صلت على
السرير ماتكدر توكف وتكعد
خلصت الصلا بدعاء من كل كلبي ودموعي تجري
الله يحفضلي امي ويبعد عنها المرض والشر
امي...اذا خلصت صلا تعال اريد احجي وياك
اجيت كعدت بصفها على السرير ولزمت ايدها
امي....كنت ناويه اضم هذا السر طول عمري منا لمن اموت
بس توقعت يكون عمري طويل وازوجك واشوف جهالك
بس الضاهر العمر بعد مابي بقيه
الحمد لله على كل حال
جمانه السعيدي
علي...لا تحجين اي شي الشي الي راح تحجي مراح يغير شي بعلاقتي بيج انتي امي حبيبتي الي مالي غيرج
اذا ما تحبين تحجين لا تحجين
امي....لا اريد احجي واريح ضميري قبل لا اموت
أريدك تعرف اهلك وتعرف ابوك
علي...ابوي عايش
امي....مااعرف بس اتوقع عايش قبل سنه سئلت علي
عايش وتزوج وعندا ابناء
علي...ليش ما حجيتي من زمان ليش كل هاي السنين
واني اسمي علي اليتيم وابوي عايش
امي....عزت نفسي خلتني اسكت كرامتي خلتني اسكت
ردت اربيك وتكبر بدون ماتحتاج احد
علي....هيج غلط اعيش يتيم وابوي موجود
امي...اني راح احجيلك كلشي صار وياي
من البدايه اني اكلك اني غلطانه كنت زغيره وماافتهم
احنا عائله تتكون من ٣ بنات وابوي وامي
اني ازغر وحده
ابوي يشتغل بمحصار حلال العائله كلش غنيه بمنطقتنا
يشتغل بااجور يوميه
هاي العائله أغنى عائله بلمنطقه عدهم بيوت وكيعان
وحلال وابوهم عندا ضلع بلدوله
يعني مال وسلطه
لمن شافو شغل ابوي وامانته حيل تمسكو بي
يشتغل باامانه وكانما الحلال حلاله
بيوم..ابوهم ابو محسن
طلب ام ابوي وحده تساعد زوجته بلبيت
بالخبز والطبخ والتنظيف بيتهم كلش حبير وعليهم رجل
وناس تعرفهم اكثر شي ناس تجيهم حتى يتوسطولهم
بشغلات بلدوله
ابو محسن عندا خمس ولد
ثنيبن بلخارج وثنيين مزوجين وساكنين واحد بيت قريب عليهم وواحد ساكن وياهم
ذوله الثنتين هم وابوهم الي يديرون الشغل كله
وازغر واحد محمد بعد طالب مامزوج
يدرس كليه هذا مايشتغل لان بعدا طالب
بيومها رجع ابوي للبيت
ابوي....اليوم بيت ابو محسن وصوني يردون وحده تساعد ام محسن بلبيت تخبز تطبخ
كون عدهم فراشات تغسلهن بفلوس
امي...هااا بفلوس
ابوي...اي بفلوس بس كون امينه وشاطره
امي...اني اروح اشتغل كون بيها فلوس
ابوي...بيج حيل للشغل ترا بيتهم كل الوكت بي خطار
امي... شني الخبز نمونه اني اروح بس كون اخذ فلوس تسوه
ابوي...جاااا همه عايزين
خيرهم تاكل بي الجلاب كل هاي المنطقه الهم
جمانه السعيدي
ام علي.اسمها ( امل )...ثاني يوم امي راحت اخذها ابوي البيتهم
حتى تبدي الشغل عدهم
اول يوم خبزتلهم ٦٠ كرصة خبز تعجبو بخبزها
وأم محسن فرحت بيها
ونضفت البيت هي وجنتهم واجت
العصر كلش يله رجعت للبيت مطيها فلوس هواي
كلش فرحت بيهن بوكتها الفلوس السويسريه
ماخذه عشر دنانير هيج مبلغ كلش هواي على امي
امي مالزمه هيج مبلغ قبل عشره هواي
عجبتها الشغله حيل
امي كل يوم تكعد من الصبح تطلع تروح البيتهم
اذا تشتغل هواي تاخذ فلوس هواي وجيب وياها اكل منهم
مرات اجيب لحم ما مطبوخ لان دائما يذبحون ذبايح
اجيب خبز مرات تمن ومرك
حتى ملابس اجيب منهم
امي من ترجع الحد ما تنام بس تحجي بيهم وبيتهم
وبلعز الي عايشين بي
احنا بيتنا كلش بسيط ماعدنا بس تلفزيزن وبوفيه
وطباخ وفراش بلكاع
صح بيتنا ملك بس زغير وقديم
امي كامت تشتري غراض للبيت فرحانه بفلوس الي
تاخذهن
بيوم من الايام جددو كاونترهم والكاونتر القديم امي جابته
بعده جديد وبي سنك
ماصدكنا من شفنا يخبل
بهاي الفتره اختي الجبيره احلام ازوجت
ام محسن جابت ثنيبن ثياب جدد و٢٠ الف هديه الاحلام
علاقتنا بيهم حيل زينه بس احنا البنات ماواصلين البيتهم
بيوم كان نهاية الشتا وعدهم فراش هواي للغسل
امي اخذتني وياها حتى نغسل الفراش
لان اني ازغر وحده واشطر وحده بخواتي بوكتها عمري ١٨
بعدني بحيلي وقوتي بوكتها
وصلت للبيت دخلت اني وامي
فكيت حلكي البيت جبير ويخبل
لا اتخيل ولا اتحلم اشوف هيج شي بحياتي كلها
ام محسن بس شافتني
....هاي بتج فدوه حليوه تخبل
امي....اي هاي امل الزغيره
ام محسن...صلاوات عروس بازغيره
امي...جبتها تعاوني هاي نادره وشغلها يخبل
ام محسن هله بيها خل نشوف شغلها
اذا يعجبني تاخذ إكراميه
امل.. فرحت اكراميه يعني راح اخذ فلوس
جمانه السعيدي
أخذنا الفرش بيتهم من ورا عدهم كراج ورا بيتهم جبير واني تحزمت وبدينا نغسل اني وامي
شويه وحسيت بلحر من الشغل نزعت حجابي وصعدت ثوبي
ونزلت على اركبي وكمت افرك بلفراش
امي تعبت راحت ترتاح يم ام محسن
واني بعدني اغسل وافكر بس اخلص ام محسن
راح تنطيني فلوس واشتري ملابس جديده
لازم اطلع الفراش يلمع لمع
رفعت راسي واني بعدني مدنكه وشعري طالع شفت ابنهم محمد واكف ويباوع عليه
راسا وكفت ونزلت ثوبي ولزمت الحجاب خليته على راسي ثوبي لازك على جسمي لان مبلل
رفعت راسي بعده واكف
محمد....ليش وكفتي كملي شغلج
...من تروح اكمل شغلي
محمد....ليش مو هسه
.امل...سكتت ودنكت شويه وراح بعد اني لا رفعت ثوبي ولا نزعت حجابي كملت شغل هيج
وكل شويه التفت خاف رجع
ماكملنا الشغل بهذا اليوم بس ام محسن من شافت شغلي انطتني خمسه
طرت من الفرح بلفلوس رغم اني انكسر ضهري من غسل الفراش
ثاني يوم امي اخذتني وياها حتى نكمل شغل
ابد مانزعت حجابي ولا رفعت ثوبي خاف محمد يكون موجود لمن خلصنا اول فرشه وجاي اغسل بلثانيه
نزل من غرفته من فوك واجا للكراج
يطلع سيارته بس شافني ابتسم وكال صباح الخير
امل...صباح الخير
ثالث يوم ام محسن كالت اريدج تنضفين الفوك
امي....اصعدي نضفي الفوك واني راح اخبز
صعدت فوك توقعت ماكو احد رفعت الحجاب وشديت راسي
اني بديت اكنس والم بلزباله راسا فتح باب غرفته
وطلع لابس تراك
جنت اشوفه احلى واحد بهاي الدنيا شكله كلش حلو
والعطر الي يخلي يترس البيت
محمد....انتي شنو اسمج
امل...وكفت اني
محمد....ماكو احد غيرج هنا
امل...اني امل
محمد...اموله عيوني غرفتي اريدها تلمع
اني سمعت اموله عيوني واني عقلي طار من راسي
كمت مااشوف هو نزل واني دخلت غرفته
تخبل عندا غرفة نوم وتلفزبون بغرفته وملابسه
داخل الكنتور تخبل
طلعت الملابس الوصخه ورتبت الكنتور غيرت الفرشه
غسلت الغرفه
وطلعت كملت الشغل الي برا ونزلت
اشتغل بسرعه وحماس ما مصدكه نفسي
هم فلوس وهم كلام حلو
من بعدها اني كنت اتوسل باامي تاخذني وياها
بحجة شغل وبي فلوس
بس اني جنت اجذب عليه اريد اروح اشوف محمد
كانت ترضيني ابتسامه منه
لو نضره لو كلمة صباح الخير
اكوم اشتغل شغل يعادل شغل عشر نسوان
كل يوم بعد مااخلص الشغل اروح الام محسن
امل....اصعد انضف الفوك
ام محسن...اي ولله مرت امجد ماتكدر تنضف بطنها واصله الخشمها
كنت اطير من الفرح بس تكول اصعدي
ابقى انضف على كيف بلكت يطلع واشوفه
هو كان شاب صاحب علاقات وعندا خبره بلبنات
وحده مغفله مثلي يكدر يوديها البحر ويرجعها عطشانه
واني كنت منبهره بي يعني مااشوف اي شي بعده
كنت أتصور ابتسامته اليه وسلامه
يعني يحبني
