رواية أحزان قمر الفصل السابع بقلم جمانه السعيدي
بقيت اربع اشهر بيت عمي بس بابا ابد ماعافني يروح ويرجع عليه
حالتي النفسيه زفت احس نفسي خسرت كلشي
عشر سنوات زواج فاشل ضاعن من عمري
احس نفسي مثل الجان يمشي بطريق اضلم طويل
منتضر النهايه بس ابد ماجان اكو نهايه
ماحصلت بس التعب والاذيه
والاتعس من هذا كله خسرت اطفالي
اعترف الذنب ذنبي لان اتساهلت بموضوع اطفالي من البدايه
جنت ازغيره وما افهم
وكلها تكول ازغيره بعدج ماتعرفين للاطفال
جنت اعتقد من مصلحتي ان همه يديرون بالهم على جهالي لان همه اكبر وافهم
ويمكن لو امي موجوده جان علمتني الصح من الغلط
جمانه السعيدي
ورا ست اشهر ازوج صلاح زوجنا امه وخواته
بلعافيه عليه خلي تشوف ضيمي الي شفته من وراهن
بس يجوز قويه وتكدر تاخذ حقها منهن
ولله الفقير والساكت ابد مايطلع حقه بهاي الايام
الدنيا تريد واحد محزم تحزم للطلايب
بابا من سمع بي ازوج اجه اخذني البيتا خاف عليه لا انهار
اني صحيح ضجت
بس اكثر شي ضوجني جهالي اخاف عليهم من زوجت ابوهم
وهمه بعدهم ازغار
بس مابدي حيله ابد هم أقوى مني
اني ضعيفه وقليلة خبره
رجعت للبيت ويه بابا وقررت ساعتها ان اكون قويه
وبعد ما اسكت عن حقي ابد
الصراحه بابا بهاي الفتره دللني دلال موطبيعي وحيل اهتم بيه
يمكن جان يحس بلذنب اتجاهي
هو السبب بهاي الزواجه الفاشله
لو واكف وياي وسامعني ومدافع عني ماصار كل هذا
الضلم وحياتي كانت احسن
قررت ارجع ادرس مره ثانيه
وما اضيع عمري بلحسره والندم
مثل ما صلاح شاف حاله واتزوج
اني لازم احدد هدفي بلحياة واحقق كل احلامي
طلبت من بابا يجيبلي كتب ثالث متوسط وقدمت خارجي
شديت حيلي وبديت ادرس
وفعلا امتحنت ونجحت والحمد لله
بدا بابا يدورلي على وضيفه بشهادة الثالث متوسط
وفعلا لكالي وضيفه بشركة اثير
فرحت كلش لان بديت احقق ذاتي
وبدت اول خطواتي بحياتي الجديده
بدا بابا يدور على سايق ياخذني ويرجعني لان يخاف عليه اروح وارجع الوحدي
جمانه السعيدي
اكو رجال جبير اسمه ابو علي يشتغل سايق اتفق ويا بابا ياخذني ويرجعني يوميه
اشتريت ملابس جديده وحضرت نفسي
وبديت اداوم شغلي سهل وحبيته كلش
جان ابو علي يسئلني على وضعي وشلون انضلمت بهاي الزواجه
وجان يحجيلي على ابنه هم كان منفصل وعندا اثنيين بنات
ابنه علي انسان بسيط وشغله على كد حاله
بلبدايه زوجته زينه بعدين بدت تطلب اشياء مايكدر يوفرها الها
وجانت دائما تعيره بفقره كثرت المشاكل بينهم
تعرفت على شخص كان يصرف عليها
وشجعها تطلب الطلاق ويزوجها
بدت تخلق مشاكل كل يوم مشكله
وبعدين راحت الاهلها وماقبلت ترجع اله تطلك
حاول وياها هواي لكن ابد ماقبلت ترجع ويا
اضطر يطلكها ويدفع نفقه البناته
هاي قصة علي باختصار
كان ابو علي دائما يتعمد يذكر ابنه كدامي ويمدح بي
الصراحه اني استلطفت ابو علي وحبيت سوالفه
وتعودت علي
جنت احسه مثل ابوي احس بامان موطبيعي ويا
الا ان فد يوم طلعت الصبح اريد اروح للدوام
جان اصعد بلسياره واتفاجى السايق مو ابو علي
لكن السياره نفسها
والموعد مضبوط
التفت عليه شاب بعمري تقريبا حلو وجسمه مليان وعيونه سود ورموشه كثيفه شعرا اسود وعندا لحيه خفيفه
حيل لايكه على وجهه وكال
صباح الخير وياها ابتسامه
...صباح النور وين عمو ابو علي
...وياج علي شخصيا يرهم يكون السايق اليوم لو اله ابو علي
...ابتسمت من جرأته وحجيه هزيت راسي بمعنى اي
انطلقنا للدوام وهو كلساع يباوع بلمرايه
ومن انتبهله ينزل عينه عني
نزلت وكتله شكرا
...العفو من يخلص الدوام تلكيني منتضرج هنا
وفعلا خلص الدوام ولكيته منتضرني صعدت بلسياره ووصلني للبيت
صحيح ما حجه وياي اي كلمه لكن عيونه جانت تحجي اشكال
نزلت واني احجي ويه نفسي شني هذا منيين طلعلي
ضلت صورته كلساع ترجع كبال عيني
الصراحه انتضرت الصبح بفارغ الصبر اريد اشوفه راح يجي باجر لو لا
كعدت من الصبح بدلت وتريكت وسمعت الهورن طلعت بسرعه
شفته هو جاي فرحت حيل ما ادري ليش
جمانه السعيدي
..صباح الخير
...ياصباح الانوار
دخلت للسياره طبعا اني اكعد ورا بلسياره
..علي ... .اكول الوالد ليش كل يوم يكعد نشط ثاري يتصابح بهل وجه الحلو
....نعم تحجي وياي طبعا اني سمعته بس حبيت ابيع ثكل
...لا هيج اكول اشغل قراءن من الصبح احسن
...بكيفك
طبعا لوما استحي منه جان طكيتها ضحكه بصوت عالي
وصلت للشركه ونزلت
وما حجيت اي شي جان يكول
مع السلامه ديري بالج على نفسج
التفتت علي ونزلت حواجبي
جان مدنك رفع راسه وصفن بوجهي
اني ماكدرت ابقه اباوع علي هواي درت وجهي ومشيت
بس جنت كلش فرحانه بكلامه
