رواية أرض الخناجر الفصل الواحد والثمانون بقلم ايلول
جيتك يا لب الگلب جيتك
وافرش وصل دمعي ثنيتك
نفس الهلا اللباب بيتك
كتلي هلا بس ما لگيتك
══━━━━✥◈✥━━━━══
-لاااا
ريـــمه :: صرخت بكل صوتي متسودنه وانه اشوف سجاد بالهول كاض التفكه ويمشي على روس اصابعه، متوجهه الابوي الواكف بصف شباج الدوانيه ظهره علينه موخر البرده ويمد بس عينه يعاين للعركه ويحجي وي عمي وليد، سجاد توه يرفع التفكه يريد يوجها عليه ووي صرختي التفتوا عليَّ اثنينهم ابوي وسجاد
گـــلبي حسيته راح يوكف ورجليَّ بادن اريد الحك اوصل لأيد سجاد ماكو سنين مو خطوات حسيت بيني وبينه، ابوي من شافه كاض سلاحة عباله يريد يروح وي الولد مو جاي يكتله توه صاح عليه
-رد بويه وين رايح؟
واجه خطوه وحده باتجاه سجاد بعده خطوه وحده وسجاد رد شال التفكه عليه، بين فتحة عين ابوي بصدمه ووجع روحـــي على اخوي وخوفي ثواني الدنيا وگفت بعيني وسجاد چن متاني هالفرصة من سنين وخايف اضيعها من اديه ضغط الزناد وثار صوت الطلق بلحظة اكثر من طلقة هزن البيت غمضت عيني حييل اصررخ واحس بروحي ما اسمع صوت صريخي أذني توون ويتردد بيها نفس الصوت طحت على اركبي اصرخ
وبس فكيت عيني لمحت ابوي طايح بباب الدوانيه دشداشته البيضة نصبغت بالدم وعمي وليد اجاه يركض اعاين الحلكه يصيح بس ما اسمع صوته ما بأذني بس صوت الطلق ايديي على اذني التشوفه عيوني هواي على عقلي ثگل جفني واحس براسي يريد يطيح من جسمي اغمض وارد افتح بس اريد عيني تشوف بوضوح وعقلي يستوعب
شلت ايدي من اذني امسح الغواش من عيوني وبس جريتها بهتت رايحه روحـــي سجاد وكف التفكه بالگاع وكعد على اركبه حاط فوهة التفكه جوه حنجه، حطيت ايديي بالگاع اعين روحـــي وعيوني وي ايده النزلت تريد توصل للزناد انتهيت ما چن خطوتين بيني وبينه مدري شلون وصلته كبل لا اصبعه يوصل الزناد دفعتها بكل حيلي من جوه حنجه والمح هاجر وياي جرت اديه تكضه... شمرت التفكه لبعيد وطحت عيوني مغوشات مره اسمع صياحهم ومره ما يجي بأذني غير صوت الطلق
انربد باب البيت وطبوا حسين ورنه يركضون ارجف كلني ووراهم طبن عمتي ايمان وبدور، وسجاد يريد يوكف على حيله يريد يگدر يكوم للتفكه وهاجر تشبگه بكل حيلها تبجي بخوف ، ركض حسين شال التفكه وطلع من البيت، عقلي وكف ما ادري شنو الاسويه.
بــدور:: بجيت خايفه من منظر الدم جلبت بعباية امي وهيه مهدود حيلها وتصيح ومشت يم ابوي المگابل عمي شاكر يحط ايده على رگبته ويصفك ايد بأيد
-يا بويه يا شاكر يا خووويه.
رنـــه شبگت ريـــمه بخوف من شافتها ترجف وحاطه اديها على اذنها وتجر نفس بشهگه رد حسين يركض السجاد وهو رايحه روحه يريد يطيح وابوي يصيح
-ووولك سجيد كتلت ابوووك ولك ولك كتلت ابوك عمت عييينك خايب... يا خوويه يا شاكر خوويه
ركضت امي غسلت وجهه سجاد بماي وجهه صار اصفر وشفايفه بيض صاحت امي بوجهه هاجر
-اممج وووين؟
وهاجر ولا يمها شابگه سجاد بكل حيلها وتبجي، نخبصنا بهوسه محد يدري شيسوي ابوي يخابر على الولد محد يجاوبه وامي تخابر صياحهم وصوت الطلق يرجف الگلب
جرتني رنـــه من ايدي تنبهني على ريـــمه وهي ردت البيتهم تركض، بين الرمي والهوسه عشر دقايق عدن بعده الرمي ما واكف واجوا يتراكضوان صــيهد وسليم سلاحهم بأديهم محزمين وملثمين يعاينون مصدومين وابوي يصيح عليهم
-سجيد كتل شاكرر.
ســليم يعاين الاخوته بصدمة وصيهد ركض الشاكر يعاين لصوابه مابيه نفس وثلث طلقات بجسمه وحده بگلبه واثنين ببطنه وبطنه انفخت، صــيهد ذب عليه بطانيه ودار يعاين السليم كعد على اركبه ويعاين الاخواته يبجن وسجاد مغمض عينه يريد يطيح وحسين يكضه.
صاح على امي
صــيهد:: يمه ييمه اخذيهن وروحي البيت عمي شامل.
جر امي من ايدها گومها وانه گومت ريـــمه وياي انتهت بأيدي وما بلسانها بس اسم سجاد مشينه لبيت عمي شامل علي وشمس اثنينهم يبجون وريمه كعدت على حيلها بالهول تنود مخلوبه روحها وامي تلطم على رجلها وتدعي بخوف شوي شوي صوت الرمي يخف لمن كمنه ما نسمع صوتهم شوية وگبت الهوسه بباب بيت شاكر طلعت بصف رنـــه اعاين من باب الحوش متكابلين على شاكر مــيثم وصيهد ووهب درت عيني امسح بدموعي اريد احاجي رنـــه لگيتها مبتسمه رجف گـــلبي بخوف ساكته واسمع صوتهم ينشدون على ميلاد وين ســليم گالهم
ســليم:: ما ادري ما ادري وين راحت.. وي وي مرتضى.
وهب:: مسحت وجهي أعاين عليهم ســليم مصدوم بعده ما مستوعب وسجاد جره كهلان يريد ياخذه البيتهم مارضى يروح وياه گاله بريا
بريا:: تعال وياي.
اخذه يمهم وصيهد مشه يم ولد شيخ حيدر يوصيهم ما يحجون وكلنه نعاينله ماندري شنهي بباله شلون مايحجون اول وتالي تطلع قابل راح نضم جنازته، رد يمنه عاين الابوي وشال أيده يحذر
-شاكر كتلوه بيت غانم بالعركه ويشهد علي الحسين لو خابرت علي ابن غانم وبلغته بغير هالحجي اصيرن نفس سجاد واكتلك.
هد ابوي يريد يطكه كضيته وهو يغلط علينا ويدعي اخذته للبيت وصيهد وسليم اخذوا شاكر للمستشفى، غسلت وجهي مفترة بيه الدنيا وابوي وراي يفتر ويغلط ويصيح
-تردووون تكتلوني هسه اشتكي عليكم هسه اشتكي.
ندى:: باوعت الوهب بخوف وهوه دار الابوه يمسح بوجهه من الماي گاله
-بس اسكت ترى صــيهد حاطها وياك على الحافة ولو ما فشلتنه بين الوادم من زمان ساجنك.
وابوه بسرعة اجه عليه جره من ايده وضربه راشدي بكل حيله بجه رضا يريد يركض الابوه وكوه لازمته الغصه خانگتني اباوعله گـــلبي منطحن طحن مسح خده ووخر من گدام ابوه اجه يمنه من السلاح اديه باطنهن محترك ومطكك.
عاف ابوه يغلط ودخل الغرفة امه ما يدري جويريه كاعده هناك اعتذر منها كالتله
-تعال خويه
دخل يمسح بوجهه باوع الكرار شاله من الگاع باسه ورجعه المكانه، كعد على صفحة مخلي اديه فوك راسه مسحت وجهي احاجيه صوتي رايح
-شراح تسوون؟
تحسر مقهور
وهـــب:: سجاد اذا انسجن يموت...الناقذنه عركتنا وي بيت غانم انذبها بروسهم همه الكتلوه.
-جا مو حرام؟
-بس اسكتي يرحم اااهلج.
سكتت اباوعله مقهوره وابوه بعده يحجي خابره صــيهد يغلط بحركه ويصيح عليه ما اعرف شيريد من عنده سد التلفون وكام يريد يروح ومن شاف ابوه بعده يحجي ويصيح گال
-البسن عبايجن وتعالن غاد يم امي.
بسرعة لبسنه اني وجويريه ووي طلعتنا تلاكت ويانه رغد بأيدها سيف مشت ويانه البيت عمو شامل، زلم واكفين على صفحة ما اعرفهم وكهلان وميثم يمهم، دخلنه للبيت ووهب راحلهم، هوسه وبجي محد يفهم شي ربع ساعة عدت واجت ميلاد تصرخ وتدك وتلطم عبالها سجاد يمنه دفعت الباب ودخلت تصررخ
تستمر القصة أدناه
-سجاااد يمممه يممممه سجيد.
كاملتها عمتي دفعتها من ايدها تصيح بوجها
-اطللعي بررره ام المصايب خليتيها ناس تكتل ناس هسه صرتي حنينة وخايفة على سجاد؟
وهي حجاية عمتي تغثها جرتها تريد تضربها وعمه مابيها حيل مو قوية مثل قبل، ركضن رغد وبدور ملخنها ومرتضى بالباب يتعارك وي الولد ويصيح يريد يكتل سجاد وامه جرت روحها من بين البنات وطلعت. شكت دشداشتها وتلطم وتصيح
-فننننه فننننه اليجيس سجيد فففنه بوووويه بويه اشرررب من دمه.
وركضت بكل حيلها على كهلان تغلط وتصيح
-انتَ الودييييته يكتل ابوووه انتَ الوديته.
تصيح وتركض وبس وصلت يمه مدّت اديها اثنينهن تريد تملخه دفعها حييل طاحت ليوره ومرتضى ركض عليه هاد لزموه هوه ووهب گـــلبي اوجعني من صياحهم وومالخهم ولد شيخ حيدر واكفين بينهم وميلاد تلوع وتصيح ، وولدنا بسرعة طششوا الخبر بيت غانم كتلوا شاكر.
ولان ولدنا هالمره دخلوا الشرطة همه ماعليهم اي خطأ وبيت غانم الغلطانين سدوا شي بشي ذبوا كتلت شاكر براسهم واشتكوا عليهم. ساعة وخابروهم كالولهم راح يجون تفتيش على السلاح.
ما غفت عينا للصبح رجعت صارت هوسه مشيت يم البنات بباب الحوش نباوع عليهم يدخنون وكلساع واحد مخابرهم، بس حجينا ضربتنا رغد ماقابله
-اسكتن خل اسمع.
مديت عيني وياها كهلان ووهب وكفوا بصف الباب يحجون وي شيخ حيدر كهلان بس يهز راسه وصوته مبحوح يگله
كهلان:: والله يابه ما شفى گـــلبي وعمت عيني چيه مو انا الكتلته
جر نفس من الجكارة والتلفون على اذنه ووهب مكابله مضيك عيونه وبس يريد يفهم من حجيهم شي رجع گله
كهلان:: اكو واحد يعوف كتال اهله؟ ما برد گـــلبي ما برد مو انا الكتلته.
سكت مده وهز راسه اي
-هاي هيه هسه اودي وي خالد ولولد
سد التلفون ووهب گاله
-هاه؟
كهلان:: يگول ودوا سلاحكم بأيد الولد وخلوا يمكم بس المرخص.
وهـــب:: وتجي الشرطه تاخذ المرخص ويهدون علينه ونضل نعاين احنا؟ نعاركهم بحجار مو؟
باوعله كهلان بطرف عينه مهدود حيله وماله خلك شي التفتوا على صوت بريا وسجاد مشه كهلان بسرعة لزم سجاد وهوه يجر بروحه من عنده ويحجي بتعب مختنك
سجاد:: ودوني ودوني للشرطة صرت كاتل اثنين بسرعة يعدموني .
وهـــب:: ضل يمسلت بالحسين اطكك على حلكك ولا اخلي سن صاحي شبيييك؟
سحبه كهلان باسه بكصته وحط اديه على اجتافه يحاجيه
كهلان:: هوه شاكر يسوه تنسجن من وراه؟ يستاهل تضيع من عمرك يوم بالحبس علموده؟ والله ما يسوه چلب ومات.
چلب سجاد بأدين كهلان وكعد على اركبه يبجي حط راسه على جتف كهلان ويصيح بلوعه مخنوك
سجاد:: ووولك صاحبي يسوه ووولك كتلت صاااحبي اريدن اموت كهلان خايب انا كتلت عبووود ولك اريدن امووت، كوون انعدم مو بس انسجن .
حضنه كهلان يطبطب على ظهره مهدود حيله وما يگدر حتى يحجي وهـــب وبريا جروا سجاد غسلوا وجهه ويحاجونه وولد شيخ حيدر صاحوا عليهم. اباوعلهم مشوا خلوا السلاح بسياراتهم وودوا بريا وسجاد وياهم خافوا لا من يصير تفتيش سجاد يحجي.
رغد:: كون تكضي سلامات بجاه الحسين والله گـــلبي موتني من الوجع.
بــدور:: انه ما مقهوره على شاكر بس على البنات مصدومات.
تحجي والدمعه بعينها اجه وهـــب يمنه كالتله رغد
-جيب مــاسه وماريا هنا يخافن من يجي الجيش
مشه بسرعة جابهن واجه عيونهن مورمه يبجن على حال سجاد لان جان يمهن وسامعات بجيه وقهره .
دخل كهلان للبيت قبل لا يوصل الجيش باوع الريمه كاعده على صفحة علاوي عل رجليها تحركهن وصافنه بالفراغ دموعها يجرن يباوعلها بحسره وهيه حتى ما حاسه بيه جر نفس متحسر ودار يحاجي عمتي
-عمه طبّوا للغرفة.
حجاها وطلع للحوش كومنا ريـــمه وهاجر والتمينا كلنه بغرفة رنـــه كعدت يم عمه ونسمع صوتهم من دخلوا يخوفون وولدنا يفترون وياهم فتحوا باب الغرفة عبالي راح يطلعونه الغرفة ثانية ويفتشون ماخلونه نطلع بس باوعوا بالغرفة تلمسوا الفراشات وطلعوا، اخذوا السلاح المرخص كالوا للولد يراجعون عليهن ومشوا، ووراها بساعة بعد انخبصنا اباوع للساحة انترست زلم وكلها سلاحها بأيده گالت رغد
رغد:: خل يرتاح وهـــب جان محتار اذا هدوا علينه بيش يعاركهم هاي اجاه سلاح
بعدنا واكفين بباب الحوش نسولف واجه عمي وخرنا على صفحة وهو دخل للحوش وجهه ما يكصه السيف يصيح بحركه
وليد:: ووين امجن يله يله ردن للبيت الفاتحة ببيتحن وانتن دايحاات
التفتت للباب من اجت عمه مشيتها ثگيله وينگطع نفسها گالتله
-وبيتهم شبيه ليشش ببيتنا؟
مد ايده يريد يجرها والبنات جلبن بيه مايخلنه يتراجف ويصيح
-انا اخووه وفاتحته ببيت ابوي شنهي انتِ وتوكفين بوجهي
رغد:: هسه نجي للبيت روح انتَ الزلم كلساع اسمع واحد ينشد عليك.
باوعلها بطرف عينه وطلع درنه العمه محترك گلبها گالت
-يله البسن عبيچن.
دخلنه نلبس وهيه كعدت گدام ريـــمه تحاجيها وتوصيها وريمه شفايفها يرجفن ودموعها يجرن،. وهاجر حالها بعد اتعس
وصتهن عمه وحده على الثانية هنه ورنه وطلعنه من يمهن البيتنا مخبوصات نص ساعة واجت ميلاد تبجي وتتوسل بعمتي ما تحجي الاحد وتكول سجاد الكتل ابوه خاف ينسجن وعمه انطتها ظهرها ما مهتمه الها.
التمت النسوان والهوسه ويصيرن وي ميلاد يصرخن ويلطمن واحنا محموسات بالمطبخ وللظهر يله جابوا التابوت عمه جرت رغد وماسه وبدور كالتلهن وي النسوان صرخن وابجن وصدك غطن وجوهن بالحجابات وودخلن وي النسوان يصرخن.
وبس شالوا الجنازة النسوان صاحن
-چا وين بناته؟
ماحاجتهم عمه وطلعت وي ميلاد مغطيه وجها بالعبايه وشايله أيدها تصرخ والولد شايلين التابوت ويمشون بيه لمحت ســليم وياهم حسيته جسد بلا روح بس يتحرك ويسوي اليردونه الولد
ما خلوا اي مره تروح وياهم والولد ماعافوا ســليم مشوا وياه مــيثم وصيهد.
وديت رضا وي ماريا والتهينا بالشغل بعد مافرغنا، وريمه وهاجر ابد ما اجن وشما النسوان يحجن عليهن عمتي تسكتهن، وما فرغنه الحد الليل يله شويه ارتاحيتا.
رنـــه :: عبالي اذا يموت شاكر گـــلبي يرتاح عبالي هاي هيه تبرد ناري، اثاري ماكو شي بهالدنيا يعوضني ولا يخفف وجع گـــلبي على اخوي.
وكل يوم يعدي احس روحـــي ابتعد عنه اكثر وهذا اليذبحني كل ما يمر الزمن چن المسافة بيني وبينه تطول
غمضت عيني اجر نفس طويل وفززتني شمس التفتت عليها تباوعلي بزعل اشرتلي دنكي نزلت يمها مديت ايديها تمسح عيوني
شمس:: انتِ تبجين خاله تبجي هجور تبجي كله كله يبجي.
-خاله ريـــمه تبجي؟
هزت راسها اي بزعل، باوعت الزهره اشرتلها اخذي شمس لهيها يمج صاحتلها والدمعه بطرف عينها الوحيده بيناتنا تبجي بسكته تضم روحها وتبجي الحد ما يورمن عيونها وچم مره اجي اغطيها الكاها حاطه صورة عبود وعفره على گلبها الحد ما غافيه.
طلعت من الغرفة ادور على ريـــمه طبيت الغرفة اهلي سانده ظهرها للحايط لامه رجليها الصدرها وهاجر بصفها سانده راسها على جتفها شباج الغرفة مفتوح وعلاوي گدامهن يلعب، تمشيت سديت الشباج ونزلت البرده اعاين العلاوي بردان ريـــمه غمضت عيونها دموعها يجرن طلعت من يمها لو اضل دقيقة الومها.
توقعتها تريد تروح الفاتحة ابوها وتخاف من كهلان... لمن اجه كهلان طب للبيت عاينلي بتعب هز راسه يسأل
-ريـــمه وين؟
اشرتله على غرفة اهلي سكت ومشه كعد بالدوانيه اعاينله مدنك صافن بالگاع والچفيه فوك راسه.
صحت لحسين يمي بالغرفة يعاينلي ضايج فرشتله على صفحة
حسين:: انامن بالدوانيه.
هزيت راسي لا وجريته من ايده تمدد غطيته ومشيت يم البنات اطفي الضوه وامثل عليهم وعلى روحـــي النوم وانه حتى لو اغفى شويه وافز لو اتخيله يمي لو اذكر موقف يشعل نار گـــلبي شيضل بحيلي بعد وانه دافنه عزازي.
للفجر يله غفيت شويه وفزيت حسيت بروحي اسمع صوت ريـــمه گمت من فراشي طلعت الاضويه بعدها مطفيه وباب الهول مردود بس ما مقفول عاينت من الشباچ لمحتها واكفه گدام امها بباب الحوش تتعارك وياها
ميلاد:: شگل للنسوان ووولج شحجي؟ جيبي اختج وتعاااي فاتحة ابوج هااي فاتحة ابوج.
وتعت بيها وتطكها على وجها حييل دفعتها ريـــمه تبجي وتصيح
ريـــمه:: وخررري عني ما اجي والله ما اجي.
عتتها حييل تغلط وتدعي علينا
ميلاد:: تمشين وگوه عليج لا اسودنج واسودنهم ووولج ررريمه لا تعانديني علمود بيت شامل اكضيهم كضيان والله اكضيهم.
دفعتها ريـــمه من صدرها ولطمت على وجها تبجي بحرگه وتحجي بصوت مبحوح
ريـــمه:: وانتِ مقصرررة ووولج مقصررة؟ ولج موتوهم شخليتوا بيهم انتِ وابوي شخليتواا؟ عيني مااگدر احطها بعينهم، ولج متفشله گدامهم اغص باللگمه الاكلها من زادهم وانه اهلي كتالت اهلهم ، ريتكم مو اهلنه ريتنا ايتام مثلهم ولا لوعتنا هاااي.
درت وجهي كهلان واكف وراي اديه وره ظهره ويعاين وياي، ميلاد بساع شالت ايدها تطك ريـــمه وتجر شعرها حييل، طلع كهلان جرها من ايدها ودفعها بره الحوش شايل اصبعه بوجها.
كهلان:: عتبة بابي ما توصلينها بعد وايدج لو نمدت على واحد من أهلي اكسرها.
وهيه تسودنت تهد عليه وهو يدفعها تغلط وتسب وتدعي دعاوي تقشعر البدن مشيت بسرعة الريمه من شفتها كعدت على اركبها تبجي بحرگه جريتها الصدري وأعاين الميلاد توخر دشداشتها من صدرها كبال كهلان وتدعي عليه وعلينا وهو يهز راسه خوش لمن لمحها ســليم واجه بساع جرها من زندها حييل ويصيح بوجها
ســليم::شترردين منهم؟ شتررردين منهم؟ سودتوا وجوهنا الله يسود وجوهكم دنيا واخره.
ميلاد:: ياااا يييمه ولك ســليم ووولك انه تحاجيني هيييج.
جرها من ايدها للبيت وهيه متسودنه تغلط وتدعي سد الباب كهلان وراهم وريمه بين ايديي تشهگ وتغطي وجها بأديها كعد كهلان گدامها تعبان وگوه يحجي
كهلان:: ريـــمه.
ضامه وجهه عنه تبجي بحرگه مد أيده جر اديها من وجها يحاجيها
-عليمن تبچين؟ گومي خل تولي.
حاجته مفرفحة دموعها يجرن
-تريدني ابچي عللليه تريدني الطم؟ لا هو حنين لا هو زين لا هو ما مأذي بشر ابجي والطم عليه ليششش؟
لطمت على وجها تصرخ لمها الصدره شبگته تبجي وتصيح بصوت مبحوح
-ريتهم مو اهلنه ررريتهم، لوعوا گلوبنا وگلوبكم
غمض عيونه حييل مختنك مديت ايدي على ظهر ريـــمه احاجيها، گمنه سوه غسلت وجها اديها يرجفن
-كافي ريـــمه .
عاينت بوجهي رجفت شفتها ما تگدر تكض دموعها وتحجي بخنك ماتريد كهلان يسمع .
ريـــمه:: والله ما ابجي عليه والله ما ابجي عليه ابجي على روحـــي ابجي چيه ما عندي أبو يسوى الطم واشك ثوبي عليه شيصير لو اهلنه مثل البشر مو شياطين شيصير لو بيهم حنية وكافين شرهم عن الوادم.
مسحت عيونها محترك گلبها بس تريد تسكت عفتها ومشيت ماعندي حجايه تواسيها، طبيت للغرفة وخرت الغطه من حسين اعاين لصدره اتأكد منه يتنفس عفتهه ومشيت تمددت بين البنات شمس وزهره اثنينهن اسمع نفسهن.
ريـــمه:: گـــلبي هلكده صار يوميه انطيح بمصيبة ويوميه مصيبتنا تبجي الگلبه من صخر، طبيت للغرفة خابرت على ســليم شلع گـــلبي يله رد
-الو.
-ها اكلك رحت السجاد شفته؟ ترى كضه حيلي من الخوف عليه لا يسوي بروحه شي
ســليم:: ببيت عمي خليل جبناه البارحة، بريا يمه لا تخافين... شعدها من الصبح شتريد منج ؟
-تريدني اطب للفاتحة الطم والله ما اوصل ولا الطم عليه كضوا عمــرهم معذبيني وماضلت مصيبة ما سووها ببيت عمي شامل ويردوني بفاتحتهم ابجي وألطم.
تحسر ساكت مسحت عيوني ورديت كتله
-سلطان ليمت يطلع.
-اليوم.
-خوش يله اخذ راحتك.
سديت التلفون منه عاينت الهاجر بفراشها ضامه روحها وتبجي طلعت من يمها ادور على كهلان شفته بالدوانيه يصلي، جان نايم گبال المچان الينام بيه عبود.
طبيت للمطبخ اسويله ريوك حطيت الچاي على النار وذكرت ماعدنا بيض مشيت للغرفة اكول الرنه تكعد حسين لكيتها راده نايمه، تدنيت انه يم حسين مديت ايدي على زنده ادغه
-حسون...حسوني.
فتح عينه بعيني فاز
-تكعد تصلي حتى تروح تجيبلنا ريوك من الدكان؟
مسح وجهه يهز راسه اي كمت طلعت وهو طلع وراي كمل صلاته واجاني للمطبخ بعده نعسان
حسين:: شجيبن؟
مديتله الفلوس احاجيه
-كاسة جبن وبيض بألف، لا تبطي فـــدوه كهلان جوعان من امس ما ماكل.
هز راسه خوش لبس قمصلته هو طلع وانه وكفت اگلي طماطه بين ما يجي التفتت الكهلان طلع من الدوانيه واجه يمي للمطبخ بدون ما يحجي صبله كوب چاي
-جاي اسوي ريوك لا تشرب چاي هسه اكمل بس يجي حسين.
-ميخالف.
اخذ الكوب وطلع للحوش عاينت وراه من الشباچ كعد على البلوكه مدنك ويشرب چاي وهاسكي يفتر عليه وهو ماله خلگه، فزيت على رگعة الباب التفتت واشوف رنـــه تركض من غرفة الغرفة تدور فتحت باب الدوانيه وركضت الغرفة اهلها والغرفتنا طلعت احاجيها
-هاه رنـــه هاااه شكو؟
وهيه ماتحجي تركض بخوف من مجان المجان واركض وراها ما فاهمه شي طلعت للحمام فتحته تدور وصيحت تبجي
-حسين وووين حسين وووين.
وركضت للحوش متسودنه ركضت وراها اصيح راح يشتري وهي ما مهتمه الحجيي ولا بالها يمي كضها كهلان من زندها ونتر بوجها
-شبييييج؟
تجر بروحها من ايده تصرررخ
-حسسسين اندعم حسيين اندعم.
جريتها من ايده رايحه روحـــي
-ووولج راح يشتري هسه يجي والله هسه يجي.
تستمر القصة أدناه
ابد ولا يمها ولا ببالها حجيي تبجي بخوف وبس تريد تطلع وكهلان مدري شجاه جرها من ايدي حييل حاط ايده على حلكه خازرها
انفتح باب الحوش وطب حسين يركض البيض مكسر بأيده وهي بس شافته بچت فاتحة اديها اله.
ذبهن من ايده واجه الحضنها شبگته بكل حيلها تبجي وهوه يحاجيها بخوف
حسين:: شبيج؟ رنـــه شبيج؟
دار كهلان يمسح بوجهه جريت رنـــه من ايدها للبيت غسلت وجها احاجيها
-شجاج رنـــه مو كتلج راح يشتري؟
مسحت وجها وهـــي ساكته رد كهلان طب للبيت هو وحسين يعاينولها كعد بالهول وعيونه عليها. مشت من يمي تريد تطب الغرفتها بس تعدت من يمها كضها من ايدها وجرها الحضنه.
ضمت وجها بصدره تبجي وهو بس شابگها وساكت الحد ما هي سكتت وخرها مسح عيونها وحاجاها
طــروادة:: كافي بچي ... واليوم داومي خوش؟
هزت راسها لا مدنكه وتمسح بعيونها
طــروادة:: تداومين.
شالت راسها تعاينله دار وجهه منها ساكت، اخذت الصينية يمه لو من الاول عايفه البيض احسنلي، تريكوا هوه وحسين.
طبيت يم رنـــه تبجي وتحلف ما تداوم
رنـــه:: ما اگدر ما اگدر يا دوام هذا.
-باوعي والله مو هوه ما يريد تضيع سنة من عمرج.
ضمت روحها بالفراش ساكته طلعت من يمها محتارة للعشرة كاعده بالحوش واسمع هوسة الفاتحة والسيارات التجي وتروح وخبصتهن، خابرني ســليم گال
-اجه سلطان.
مشيت بساع اعاين من فتحات السياج سيارات هواي طابكه واجت سيارة مــيثم من بينهن طبگت قريب على باب حوشنه ونزل سلطان عيونه حمر تلگاه صــيهد وبس شبگه سلطان دموعه جرت وخر منه ومشوا الچادر الفاتحة گـــلبي يوجعني على اخواني وعلى الموقف الهمه بيه گدام كهلان .
للظهر كهلان كاعد بالدوانيه بس يعاين لمچان عبود، عفت علاوي وشمس يمه، بيبان الدوانيه اثنينهن مفتحات اشتغل واعاينله، لمحت هاجر طلعت من غرفتي ومشت للدوانيه دك گـــلبي حيل خاف عدها شي تگله بيه وتقهره فوگ قهره، غسلت ايدي ومشيت وراها كعدت گدام كهلان على اركبها وهوه يعاينلها ساكت .
تريد تحجي ما تگدر الغصه خانگتها دنگت تبجي
كهلان:: ياهو وياج؟
شالت راسها تمسح عيونها وتحاجيه مختنگه
-عبالي اگدر احميكم والله عبالي اگدررر.
بچت مغطيه وجها بأثنين اديها مد ايده فوگ راسها مسح عليه
-ما قصرتي يابه، ما بيج صوج لا تبجين.
هاجر:: لا تزعل من اخواني لا تكرهم لا تكره لا تكره سجاد... لا تكرهم.
-اخواني هذول شلون اكرهم؟
عاينلي يأشر عليها طبيت للدوانيه وهو يحاجيها ما راضي تبجي مسحت عيونها واندك باب حوشنه ركضت شمس فتحت الباب واحنا نعاين وراها طبوا سلطان وصيهد وسليم. وكف كهلان بساع ومشه فتح ايده سلطان وبس وصله شبگه وبچوا اثنينهم
سلطان:: شگلك؟ اعذرررني؟ ابريني الذمه؟ ووولك شكلك؟ ريتني بمچانه ريتني بمچان عبود يا حچاية تبرد گلببك ولك خويه يا حچاية تبرد گلبببك؟
شابگه بكل حيله ويحجي بغصة رايحه روحه وخر كهلان يمسح بعيونه
طــروادة:: على ياهو من اهلي ناري تبرد؟ واحد اثنين همه؟
ســليم دار وجهه يضم دموعه وصيهد والولد مدنگين وسلطان مچلب بأيد كهلان مخلوبه روحه وشمس مچلبه بطرف دشداشة خالها تعاينلهم گمت بساع من سمعت صوت شيخ حيدر يم باب الحوش اجاهم طلعنه من الدوانيه وهمه طبوا، اخواني ميتين من القهر ما يدرون بيش يسدون غدرات ابوي ما يدرون شني اليسوونه ويخفف وجع كهلان.
كعدت يم الباب اسمعهم شيحجون شيخ حيدر يعاتبهم لان يلومون رواحهم وهمه ساكتين رد حاجه كهلان يصبره ويواسيه بس ادري بيه ماكو اي حچايه تخفف عنه ، ضل شويه يمهم وطلعوا كلهم بس سلطان ضل كاعد بمچانه ورد يمه كهلان ، فتحت الباب هاجر وطبت يمه شبگها حييل وهي تدفن روحها بحضنه تبجي باسها براسها يگلها
-تحجين؟ هجوره كالوا تحجين شو سمعيني صوتج.
مسحت عيونها
هاجر:: احجي
باسها بوجها ورد شبگها
-فـــدوه اروحن الحسج.
ضل شويه يم كهلان ومشه بعد ما شفتهم لمن كضت الفاتحة وادري بأمي طول ايام الفاتحة يوميه متعاركه وي وحده من البنات لو مــاسه تسولفلي لو رغد لو جــويريه على كلشي تعاركهم، عمتي ايمان سامعتها تحجي على ندى وجويريه كالتلهن بعد محد تطب للهول وتلطم وياها خلنها وحدها بنص النسوان، وهي من فشلتها بنصهن ترد على البنات تتعارك وياهم.
كضت الفاتحة وكل السلف وكل واحد سمع بعركتهم عرف بيت غانم كتلوا شاكر، وبيت غانم متباهين وينشرون وكل شوي منزلين منشور احنا المحد يگدرنا لا عشيرة ولا قانون، ومدري شلون ولدنا متحملين و ساكتين منهم .
ردوا ســليم وسجاد البيت اهلي وي امي وهاجر مارضت تضل يمي بعد راحت يمهم وخلت گـــلبي بنار ابد ما ارتاح وكاتلني الخوف عليها. اكثر وكتها من احجي وياها تأشر. ومن اصيح محترك گـــلبي يله تحجي بس حتى تفتك من عندي وما اضل الح عليها.
وكل اليهمني هسه كهلان ورنه صاح عليها محترك گلبه
-مو گتلج داوومي؟
رنـــه:: فصلوني غياباتي هواي.
هز راسه خوش وجر تلفونه يخابر على بريا
-وين انتَ بريا... روح المدرسة رنـــه كلهم جانت عدنا فاتحة وهل غابت هاي المده كلها ااي يله.
سد التلفون شمره يمه يعاين لباب الهول ويدخن ورنه من باب الغرفة تعاين عليه ودموعها يجرن، سكتت محتاره وهو ما يحمل دموع رنـــه اخذ تلفونه وطلع من البيت صاحت رنـــه تبجي
-ما اريد اداااوم ما ارررريد گـــلبي يوجعني ما اگدررر.
-والله حرامات رنـــه ماضل شي على امتحانات نصف السنة قهرر تروح هيج.
-يا بشر افهمووني افهموووني ما اگدر ولج والله ما اگدر مو هوه هل عاف الكليه هاي السنة مو ما گدر يداوم جا انه شلون اگدر .
شبگتها شمس تمسح بعيونها وتباوعلي بخزر عبالها انه البچيتها، سكتت مناه لمن اجه بريا فتحتله باب الحوش وطب عاينت بوجهه اسأل
-ها شگالولك.
بريا:: طردوني.
-ياا ليش
-كالوا شتعودلك كتلهم خطيبتي وچن صاب عليهنّ تيزاب اطلع بره ما اطلع بره واذا خطيبتك ياهي مالتك وين اهلها طلعت شارد والله دارن علي كل وحدها لسانها هاطوله .
-هيه ما تريد تداوم هالسنة بس كهلان ما يرضى وحرت هيه تبجي وتصيح ما اداوم وهوه يصيح تداومين.
-لا لا تداوم بس تضل بالبيت تتخبل من القهر... هوه وينه كهلان.
-طلع ما ادري.
هز راسه خوش ومشه يدوره رديت للبيت شفت علاوي يلعب گدام رنـــه وهي تبتسمله ومن يبوسها تبوس اديه وتگله
-اروحنلك فـــدوه.
وكل شوي تعاين للساعة وتطلع للحوش تعاين للدرب وترد يمي تطكطك بأصابعها
-بطوا حسين وزهره مو؟
-لا بعد وكت هسه يجيبهم وهـــب.
سكتت ومشت للحوش ما مرتاح ردت طبت للبيت خابرت ندى تسألها
-وهـــب راح يجيبهم من المدرسة؟ جا شو بطوا؟
سدته منهم وردت للحوش وتعاين للدرب مناه لمن يجون وفنه اليغيب عن عينها ساعة، حسين لو طب يسبح وبطه تمشي تدك الباب عليه وبس يگلها
-هااه؟
-هاه يله اطلع بطيت.
وتكعد بباب الحمام لمن يطلع، اخذته للغرفة كعد يم للصوبه وغطته بالبطانيه، اعاينلها ساكته وخرت من يم حسين لمن دك تلفونها
-الو... ها بريا.
حجتها وسكتت تهز راسها اي تسمعله
-روح روح هيه ضلت عليك.
حجتها وسدت التلفون بوجهه محترك گلبها رد خابرها ما جاوبته دك تلفوني عاينت عليها مــاسه
-الو.
-الو ريـــمه شلونج؟
-هلا بيج.
-اكلج رنـــه وين؟
-بالغرفه.
-كهلان وين؟ لان بريا يريد يجي يشوفها ماجاي ترد عليه
-مشه للگيعان خل يجي.
سديت التلفون منها واعاين لرنه فرشت لحسين وهوه يتوسل بيها يروح ينام بالدوانيه علمود من يجي كهلان ينام يمه ماترضى سكت تمدد بفراشه لمن اندك الباب مشيت فتحته اله طب مستحي
بريا::خوما نايمين؟
-لا خويه تفضل.
طب للدوانيه وانه مشيت الرنه احاجيها اشرتلها اجت يمي
-بريا بالدوانيه يريدج.
عگدت حاجبها شالت ايدها مسحت عيونها وطبت للدوانيه عفتهم ومشيت للمطبخ سويت چاي واخذته الهم باب الدوانيه ضاله بيه فتحه اشوف منها رنـــه متمدده راسها على رجلين بريا تشگيله وتبجي.
-اگله ما اگدر اداوم والله انه هالسنة ما اگدر ادرس وما اتحمل المدرسات يحاجني لان ما دارسه ويفشلني غير امووت... وكهلان يتعاند وياي وچن گـــلبي من صخر.
يمسح على زندها ويمسد على شعرها دنك باسها براسها متحسر
-بريا:: هاي هيه تولي المدرسة ضلي على السنة التجي انا أحاجي كهلان لا تقهرين روحج.
دگيت الباب وطبيت رنـــه ما تحركت بس هو استحئ ما يدري شيسوي خليت الچاي يمه ورنه وهي على رجله تمسح بعيونها عفتهم وطلعت بعد مارجعت بمهم لمن طب كهلان للهول طگطگت بأصابعي مرتبكه وهو التعب ماكل وجهه وكلساع يمسح على گلبه غسل اديه ووجه وعاينلي يسأل
-ناموا؟
هزيت راسي اي
-بس..
-شنو؟
-رنـــه بريا باجر يلتحق واجه يشوف رنـــه .
عگد حاجبه وشال راسه يعاين للساعة
-صارله ساعتين من مــيثم گالي بريا راح يشوف رنـــه ليش بعده الهسه هناه؟
-هستوه اجه.
ما اهتم مشه وانه الغي وراه اريد بس اكضه فتح باب الدوانيه نز بريا فاز جان ساند راسه على الحايط غافي ورنه متمدده وحاطه راسها على رجله نايمه مغطيها وحاط ايده فوك زندها فز مخروع عاين بوجهه كهلان ودنك يعاين الرنه رد شال راسه صارت عينه بعيني أشر عليَّ
بريا:: هيه گالتلي تعاال.
فزت رنـــه على صوته وبس لمحت كهلان كعدت على حيلها وبريا وگف رجله منمله ما يحطها بالگاع گاله
كهلان:: امشي نام مو الفجر تلتحق.
بريا:: اي رايح رايح هسه.
عاين الرنه ومشه گوه يدوس على رجله الثانية وكهلان مشه وياه الباب الحوش وصله ووكفوا لباب الحوش سوا گاله
بريا:: لا تضل تقهر بروحك كهلان... كلنه اخوتك واروحنا ترخصلك.
هز راسه اي متحسر ومد ايده على جتفه يوصيه
-ديربالك على روحك
بريا:: ان شاءالله، كهلان عوف رنـــه ما تداوم هالسنة ما تگدر ومن تضغط عليها تتعب وگلبها يضل يوجعها خليها على راحتها رحّمه الاهلك.
-اريدها تلتهي بدراستها ماتضل تفكر.
-ما تگدر والله بالها مو يم الدراسه وما تتحمل تروح للمدرسة بلا ما تحضر واجباتها ويحاجنها المدرسات گدام الطالبات يفشلنها عوفها على راحتها.
-الله كريم.
سلم عليه ومشه، اعاين على كهلان گعد على حافة الحوض بالحوش ايده على گلبه طلعت كعدت بصفه ساكته سند راسه على جتفي بلا ما يحجي وعده الوكت اثنينا ساكتين البروده تدك بالعظم مديت ايدي اتلمس ايده
-كهلان... امشينا للغرفة بارده هناه.
گمت وجريته من ايده مسح وجهه وگام وياي طب للغرفة يعاين لعلاوي بقهر، باسه وعاينلي
-انطيني مخده هناه اتمدد ما اريدن على الچرباية.
جريت المخاد والغطه خليتهن وحده بصف الثانيه تمددت يمه فترة سكت ورد گال
-ريـــمه.
-هممم.
-گـــلبي يوجعني.
يابه شصار بگلبي من حجاها نمردت مرد مديت ايدي اله الم راسه الصدري ابوسه بشعره مختنگه
-اسم الله على گلبك يبعد روحـــي يمن عافيتي على عافيتك
جر نفس بغمج متحسر
-ادعيلي ماضل بيه حيل ادعيلي ريـــمه.
شبگته بأثنين ايدي دموعي يجرن بلا صوت الحد ما غفى وانه عيوني ما شافن النوم حجايته زرفت گـــلبي ولا گدرت اشيلها من بالي.
للصبح گال الرنه هاي هيه لا تداومين بس ضل خايف عليها وهي كاتلها الخوف بالاخص على حسين وزهره .
عدن چم يوم كهلان شما جاله حاله يزيد اكله يقل. ويتعب اكثر، الولد مرتين اجوه وشافوه حتى ما يحجي وياهم وباله مشدوه گاموا ما يگدرون يجون، ســليم وسلطان حايرين بسجاد، وامي بس تبجي عليه وتتعارك وياهم وهم ولا چنهم يسمعونها تغلط وتسب ما يهتمولها مغلسين منها.
وره عطلة نصف السنة تأخرنا على دورة سنة عــفراء الثانية چم يوم حتى تصادف وي أربعينية عبود اصعب يوم مر علي سجاد ما رضى يروح ولا يوصل يسد اذنه ويصيح
-لا تگلولي تعال ما اشوفن گبره ما اگدر.
ضلوا سلطان ورغد يمهم واحنا كلنه مشينا، نسوان وزلم نبجي، كهلان يتمدد بصفه ويبجي بصوت
-ولك عبود ولك خويه كسرت ظهري ولك خويه موتتني.
وما سكت لمن شاف رنـــه تخربطت گومها للسيارة وصيهد گال يله امشونا.
ماريا:: تمنيت ما سامعه كلام مــاسه وما اجيت وياهم گـــلبي اوجعني وعيوني ورمن من البجي عليهم، ما صدگت رجعنا ووصلنا للبيت باوعت الماسه اشكي
-راسي كلش يوجعني.
-اخذي براسيتول وطبي نامي.
اخذت حباية ودخلت للغرفة تمددت بفراشي تعبانه هستوني اغمض عيوني واجه ببالي حتى شكله متغير وحيل مقهور، جريت تلفوني دخلت المحادثته متردده كتبت ومسحت رجعت كتبت
-ســليم.
عفت التلفون يمي وغمضت عيوني اريد انام حتى لا ابقى كل شوي داخله للمحادثة ربع ساعة ورجعت باوعت بالتلفون شايفها وماراد شمرت التلفون ونمت ما كعدت الا على حور تبوس بوجهي
-اامه.
فتحت عيني وجريتها الحضني
-يا عيون عمه اووف اووف ابوس هالريحة الطيبة.
دغدغتها وصاحت علينا مــاسه عفتها راحت الامها وجريت تلفوني اباوعله لگيته كاتب
-ها ماريا.
شفتها ومارديت عفت التلفون وگمت التهيت وي مــاسه ويعد مادخلت للانستا الحد الليل لگيت رسالة منه رجع كتب
-ها ماريا.
-هيج ماكو شي
-متأكده؟
-اي.
-على راحتج.
سكتت طلعت اباوع بالمنشورات صارت الساعة ب٢ رجعت المحادثته اريد اكتب وكتب هوه
-نمتي؟
-لا.
-كولي ليش راسلتيني ضل بالي.
-ماكو شي والله تذكرت من شفتك بالمقبرة وراسلتك حتى اكلك شلون صرت.
-زين زين كلشي مابيه عرج مايطكني.
-تمام.
-ماريا انتِ ليش تراسليني ؟
سكتت گـــلبي دك حيل كتبت
-ليش اراسلك؟
-ليش؟
-اي ليش؟
-لا تصيرين خوثة انا جاي انشدج ليش تراسليني؟ ترى انا واحد الدنيا زايعته وساقط وانتِ بعدج زعطوطه شكو تراسلين ؟
-وجعه الهالاسلوب العتب مو عليك على الادميه التحجي وياك اروح احاجي بريا احسن الي.
-بريا وحد وانا وحد هذا اخوج وتحاجينه انا شكو؟
-ابن عمي
-اي مو اخوج
-عدنا ابن العم هو والاخ واحد
-وين هاي بيا قاموس؟
-بروسيا.
-سولفيها الاخوالج هاي
-مع السلامة.
شافها ومارد طلعت من محادثته ضايجة نص ساعة عدت ولگيته ناشر ستوري شعر عن الموت شفته وطلعت وصلتني رسالة منه
-اسف
شفتها وسكتت ما سويتله شي بس سألت عنه وهو خربط بالحجي رجع كتب
-ما اريدن اضل احجي وياج ولا ينطيني گـــلبي احضرج.
قريت كلامه مقهوره لان ما مسويتله اي شي وكل نيتي اسأل عنه كتبتله
-لو اعرف سؤالي هيج يغثك ما راسلتك ترى بس ردت أطمن عنك ما سويتلك شي حتى تحاجيني هيييج.
-تخسين تغثيني... بس انا مو خوش ادمي حرامات تراسليني والله يعني لو عندي اخت وتراسل واحد مثلي اعدمها.
وداها الي وبعده يكتب دخلت للحضر قبل لا يكمل رسالته حضرته ربع ساعة ووصلني طلب مراسله من حساب وهمي دخلت عليه كاتب
-وخري الحضر عني لا حتى تلفونج احرگه والعباس.
حضرت الوهمي هم شمرت التلفون ونمت شايف روحك على شنو مدري، عدن كم يوم ما رجعت احجي وياه الحد ما مــاسه رجعت تداوم، مرات اخذ حور واروح يم رغد وانتبهت بكل كلامها تحذرني من الولد ابتسمت
-عبالج اراسل ولد؟
رغد:: ابتسمت اهز راسي لا وهي خلت تلفونها بأيدي رجعته ألحضنها
-لا ولج مو هيج قصدي بس انتِ فطيرة واحس ينضحك عليج بكلمتين.
-لا والله ما خلفته امه اليضحك عليَّ.
ابتسمت وگمت من يمها للمطبخ اعقل انسانه عرفتها بس اليخوفني عليها ســليم لان اعرفه من سوالف سلطان يحب البنات ويموت على الحلوات مو عاقل مثل ولدنا خفت يعلقها بيه ويعوفها... مركزه وياه من يوم الصارت مصيبتنا ماشفته اجه يم بيتهم بعد...
بقت يمي الحد الصلاة يله رجعت البيتهم، كملت غداي وعيوني على سيف طب سلطان لحيته عاليه ووجهه تعبان عاينتله اسأل
-شلونه سجاد؟
-نفس وضعه الحمدلله على كل حال.
-وكهلان هم رحتوا يمه حاجيتوه؟
مسح وجهه محتار هز راسه لا يعاينلي بقهر
-حتى لو نكعد يمه حجايه ما يحجي ويانه ولا يعاين الواحد بينا.. جاي يذبل گدام عيونا واحنا ما ندري شني النسويه.
سكتت مقهوره همه واخواني حاروا وي كهلان.
تغدينا وطلع اخذت سيف ومشيت يم اهلي ابوي بعده يصيح ويحجي شلون صــيهد لليوم ما يحجي وياه ويلوم بأمي وجويريه كلساع وگالهن
-انتن تحرضنه هاااي هاااي بت تضال بنيت الچلاب هيه السودنته علينه.
ضحكت جــويريه تهز بأيدها صاحت عليه امي
-اااي واسم الله عليه چان عاقل اذكررك خاف نسيت من طب عليكم برمانات راد يفجركم جان ماماخذ بت نضال... وتذكر من حرك المضيف جان ما ماخذ بت نضال.. وبعد وبعد تريد اعدهن.
غلط عليها ويسبها وهي ترده. عاينتلها مقهوره
-يمه اسكتي منه هسه عليمن هل حرگت گلب يوميه ما نرتاح.
ايمان:: جا مو هل يفتر على البنات ومن الصباحيات اليوم طك بــدور بصحن الچاي وخله دمها بطولها.
شهگت ايدي على گـــلبي
-يااا ليش.
-مسودن عاروض الصابه فد نوب والله يفكني منه.
گمت من يمهم صعدت فوك البدور اعاينلها عيونها مورمات من البجي ولافه راسها
-صخام الصخمني كون شك چبير ولج؟
بــدور:: هزيت راسي لاا وهي كعدت يمي مقهوره وتسأل
-عليمن طكج؟
-جبتله چاي يكلي ماحاطه شكر كتله والله حاطه شال الصحن وشمره علي يكلي من اكلج ماحاطه شكر كولي اي ما حاطه لا تعانديني.
احجي والغصه خانگتني اريدن اسولف الصيهد وامي ما تخليني مسحت عيوني مقهوره ورغد عينها بعيني تحسرت بحيره
رغد:: والله لو صــيهد يرضى ينطيج البيت سيد عباس خوش وادم وتفتكين من هالبيت هذا.
-اي والله والسيد حلو.
ووي حجايتي صفگتني راشدي وجعه ضعف طگة ابوي خلتني اشيل روحـــي وارگعها وابجي كل قوتي وهيه تكض بيه وتسد بحلكي وتصيح
-خيبه ما ادري ما ادررري مدري شلون طكيتج اشش اششش صوووتج اجانه صــيهد.
وانه ادك رجلي بالگاع واصيح شلون رضا من يسترعن ووي حجايتها انفتح باب الغرفة وصيهد يعاين علينه عاگد حاجبه هدتني رغد تلف بشالها على راسها وانه وخرت من يمها ومشيت يم البرده مديت السجاده وكعدت اسبح بأصابعي صاح
-گوووومي گوووومي لا الزكج بالگاع .
-سبحان الله والحمدلله ولا اله الا الله
-تگووومين لو اجيج؟
رغد:: عدنا تسبيح.
لميت السجادة وهوه دار الرغد
-عليمن كتلتيها شمسويه؟
-ما كاتلتها عمي.
-هوه شني الما كاتلتها مو هاي اصابعج داكات بخدهااا؟
-جاي اشاقيها.
دار وجهه من رغد الي بعصبيه رخت عگدت حاجبه يسأل
-شبيه راسج؟
-رضا طكني
رغد:: تعال تعال امي تنشد عليك.
دفعته رغد مت جتفه تريده ينزل وهوه ولا مقتنع نزل جوه لحكتهم ابوي كاعد بالهول ويعاين الصيهد يفر بسبحته وصيهد ولا چنه يشوفه وصل يم باب غرفة امي صاح عليه ابوي
-صخونه التلفك وتلف أولاد عمك.
مارد عليه طب الغرفة امي ولحكناه انه ورغد،
دنك باس راس امي وما تحمل حجي ابوي طلع من البيت واحنا شوبه ومشينا وي امي البيت عمي شامل نشوف البنات سلمنه عليهن وكعدت يم رنـــه احاجيها.
-شلونج؟
رنـــه:: ابتسمت اهز راسي الها
-الحمدلله.
سكتت اعاين بوجوهن جــويريه تعاينلي بقهر اخذت كرار من ايدها ابوسه واناغيه وعمه تحجي ويانه وتصبرنه ضلن يمنه ساعتين وراحن.
كمت للحوش يم ريـــمه وهيه تنظف وبالها يم سجاد لان البارحة متخربط وانه من يكولون سجاد بيه شي من يمي گـــلبي يوجعني گمت اشوفن عبود بيه، كعدت على صفحة اعاينلها وطب كهلان راد من الگيعان ركضتله شمس فاتحة اديها دنك شالها جان لو ركضتله ضحكته توصل وووين هسه بكلشي مكسور ما يگدر حتى يضحك باسها نزلها وطب للبيت عفتهن ومشيت وراه سمعته يحجي وكفت اركز وياه يحجي بقهر
-يوكفون بعيني والله يوكفون بعيني بس ما اگدر... تحز بگلبي ضلتي مثل بلاع الموس ادري بكتالت اهلي وساكتلهم... لا ما الوم الولد انا...شني صــيهد مخابرك؟ والله العظم ما الوم عليهم ولا حاجي شي وياهم... ولو همه بمچاني يسوون الاكثر.. الله كريم لا يابه هلا بيك الله وياك
بس سد التلفون دكيت باب الغرفة وفتحته مسح وجهه اشر تعاي كعدت بصفه مد ايده على جتفي جرني الصدره يبوس راسي
-فـــدوه اروحنلك،
-اسم الله عليج.
جريت ايده من جتفي ابوسنها واحاجيه
-عليمن ضايج وقاهر روحك؟ شاكر ومات موتت الچلب بعد على ياهو ضايج
هز راسه لا
-ماكو شي مالج غرض بهالسالفة
-ما اگدر اشوفك هيج گـــلبي يضل يوجعني عليك وعلي
-سهله سهله تنحل.
سكتت محتاره كض علي من اديه يمشيه وياه كعدنا بالهول وحسين كابله يسولف وياه على الگيعان ووين وصل بالسگي وانه اعاين ساكته لمن اجت ريـــمه سولفتلها كضت گلبها بأيدها خايفه ، بالليل اندك بابنه واجوا الولد يمنه اثنينا نعاين عليهم من الباب انه وريمه،
كاعدين ويحجون وياه وهوه كل اليسويه يهز راسه اي بلا ما يشاركهم بسالفة ولا يعترض ولا. يبتسم گاله صــيهد
-كهلان عليمن ضال مهموم حاجيني ترى بالحسين روحـــي زهكت حيل ماضل بيه حرت وياك كلي شني البيك؟
-مابيه شي
سلطان:: ندري گلبك محترك وحگك ومحد يگدر يلومك... بس انطينا حل گللنا يابه هذا اليبرد گـــلبي شني التريده ارواحنا ترخصلك بس لا تضل هيج.
يحجون ميتين من القهر وهوه مدنك ساكت شال راسه عاين الصيهد گاله
كهلان:: لو انتَ بمچاني تسكت عن وليد وعلي حتى لا الوادم تدري بسالفتهم ؟ وغدرتهم الابوي؟
سكتوا كلهم يعاينون بوجهه شوي وصيهد گاله
صــيهد:: واذا الوادم درت بسوايتهم احنا النتعير وانا اموتن من حچاية الغريب التغث.
هز راسه كهلان خوش وسكت وضلوا محتارين وياه حجوا رادوا ابد بعد ما حاجاهم
وهـــب:: طلعنه من يمه صــيهد شايط وميت من الحرگة حيره تاخذه وحيره تجيبة الثاني يوم كعدني من الصباحيات صعدت يمه بالسيارة ما ادري وين رايح بيه وجهه ما يكصه السيف خفت انشده لمن طلع للشارع گتله
-وين رايحين؟
-الجهنم.
-جا نزلني.
دار علي خازرني درت وجهي ساكت لمن وصلنا المدينه گال
صــيهد:: تشوف ابوي يستاهل ينسجن؟
حجاها مختنك سكتت رد گال
-حط روحك بمچان كهلان وفكر.
سكتت اقارن بين روحـــي وبين كهلان شلت راسي الصيهد
-لا لو انا بمچانه اكتله ما اسجنه.
صــيهد::ابوي ما اگدر اكله تعال هذا ابوي وروح اكتله بس اگدر اخليه ينسجن يتجازة على افعاله وكهلان يبرد گلبه.
درت عليه مصدوم
-والوادم كلها تدري بسالفتهم؟؟؟ تسودنت صــيهد غير اذا طبوا مركز من ثاني يوم الخبر يطش بالسلف؟؟؟
سكت يسوق شويه وگال
-خابرت احفاد جدي محسن يرهمونها من بغداد تجي قوات تشيلهم اثنينهم ابوي وعلي ابن غانم ومحد يدري بسالفتهم واحنا الينشدنه نگول اي جذبة نرهمها.
-تضحك على روحك صــيهد لازم واحد يعرف ويطش الخبر.
طك ايده بالستيرن يصيح
-شسووووي شسوي اعوف كهلان يحترررك؟
سكتت منه لمن بنص الطريق لاف ورجع هاي الفرة بس حتى يحاجيني،
ندى:: عمه ضلت تلوب عرفتهم عدهم شي وتسألهم مايگلولها شكو تانيت الليل يجي واكض وهـــب ما اجه الحد ما غفيت الفجر فزيت لگيته نايم صليت ورديت نمت كعدت بالستة اسمع صوت غريب هزيت وهـــب من چتفه
-ووهب وهـــب يمكن عركه صارت مدري شنو.
فتح عينه وطفر بسرعة جر العباية ذبها على راسي واني ما فاهمه شي وبس فتح باب الغرفة صرررخت واني اشوف....
شكرا لزيارتكم عالم روايات سكيرهوم
